ဘန်ကောက်မှာ မြန်မာလုပ်ငန်းရှင်ကို သတ်ပြီး စင်ကာပူကို တိမ်းရှောင်သွားတဲ့ ကင်မရွန်းနိူင်ငံသား ၂ ဦးကို ဖမ်းမိဖို့ ထိုင်းရဲတပ်ဖွဲ့ ကြိုးစားနေတယ်လို့ဆို

-People's Spring

ထိုင်းနိုင်ငံမှာ မြန်မာ လုပ်ငန်းရှင် တစ်ဦးကို သတ်ဖြတ်ပြီး ပြည်ပကို တိမ်းရှောင်သွားတဲ့ နိုင်ငံခြားသား နှစ်ဦးကို ခြေရာခံ ရှာဖွေနေတယ်လို့ ထိုင်းရဲတပ်ဖွဲ့က ပြောပါတယ်။

ကင်မရွန်း နိုင်ငံသား နှစ်ဦးဟာ ဘန်ကောက်မြို့တော်မှာရှိတဲ့ ဇိမ်ခံ တိုက်ခန်း တစ်ခုမှာ လူသတ်မှု ကျူးလွန်ခဲ့တဲ့နောက် သေသူရဲ့ ဘတ်ငွေ ၅ သန်းကိုပါ ယူဆောင်ပြီး စင်ကာပူနိုင်ငံထဲ ထွက်ပြေးသွားတယ်လို့ ထိုင်း​ထောက်လှမ်း​ရေး အရာရှိတွေက ဖေဖော်ဝါရီ ၁၅ ရက်နေ့မှာ ပြောပါတယ်။

အစောပိုင်းက ကျူးလွန်သူ နှစ်ဦးကို စကော့တလန်သားတွေကို ဖော်ပြခဲ့ပေမယ့် နောက်ပိုင်းမှာ ကင်မရွန်း နိုင်ငံသားတွေအဖြစ် ထိုင်းရဲတပ်ဖွဲ့က ပြန်လည် ပြင်ဆင် ထုတ်ပြန်ခဲ့ပါတယ်။

သံသယ တရားခံ နှစ်ဦးကိုတော့ ဝီလျံလို့ အတိုကောက် ခေါ်ဝေါ်တဲ့ ရော်ဘင်ဆင် ဆာဟာ (၃၂ နှစ်)နဲ့ ဂျွန်လို့ အတိုကောက် ခေါ်ဝေါ်တဲ့ ဗစ်စီယို ဒါလော့ဒ် မမ်ဂိုင်ခန် (၃၆ နှစ်)တို့ ဖြစ်တယ်လို့ ကြေညာထားပါတယ်။ သူတို့နှစ်ဦးဟာ ထိုင်းကို ကမ္ဘာလှည့် ခရီးသွားတွေအဖြစ် ရောက်ရှိလာပြီး ဆန်သွန်ခရိုင်က သွန်မဟာမက် ဧရိယာက တိုက်ခန်းတစ်ခုမှာ နေထိုင်ခဲ့ပါတယ်။

သူတို့နှစ်ဦးဟာ အသက် ၅၀ ကျော်အရွယ် မြန်မာ စီးပွားရေး လုပ်ငန်းရှင် တစ်ဦးနဲ့အတူ ဆူခွမ်ဗစ် ဧရိယာကနေ ထွက်ခွာသွားတာကို နောက်ဆုံး တွေ့ခဲ့ရပါတယ်။ သတင်းအရ ရဲတွေက သွားရောက် စစ်ဆေးတဲ့အခါ အဆင့်မြင့် ကွန်ဒို တစ်ခုရဲ့ ၂၃ ထပ်မှာ ဖေဖော်ဝါရီ ၁၄ ရက် မနက်အစောပိုင်းတုန်းက မြန်မာ အမျိုးသားကို သေဆုံးလျက်သား တွေ့ရှိခဲ့တာ ဖြစ်ပါတယ်။ ကင်မရွန်း အမျိုးသား နှစ်ဦးဟာ သူတို့ရဲ့ တိုက်ခန်းဆီ ပြန်သွားပြီး အဲဒီကနေတဆင့် တက္ကစီငှားပြီး ဒွန်မောင်းလေဆိပ်ဆီ သွားရောက်ပြီး စင်ကာပူကို ခရီးဆက်ခဲ့ကြောင်း ရဲတွေက ထောက်လှမ်း သိရှိထားပါတယ်။

အခင်းဖြစ်တဲ့ နေရာကို ရဲတွေ ရောက်သွားချိန် ​ငွေလဲလုပ်ငန်းလုပ်ကိုင်တဲ့ မြန်မာနိုင်ငံသား လုပ်ငန်းရှင်ဟာ မျက်နှာ၊ နား၊ ဦးခေါင်းမှာ ရထားတဲ့ ဒဏ်ရာတွေကြောင့် သွေးအလိမ်းလိမ်းနဲ့ လဲကျ သေဆုံးနေတာကို တွေ့ခဲ့ရပါတယ်။

အခုအခါ ရဲတွေဟာ သံရုံးချင်း ချိတ်ဆက်ပြီး နိုင်ငံတကာ ရဲတပ်ဖွဲ့ (အင်တာပိုလ်)ရဲ့ အကူအညီကိုပါ ရယူပြီး သံသယ တရားခံတွေကို ဖမ်းဆီးနိုင်ဖို့ ကြိုးစားနေကြောင်း သိရပါတယ်။ လူသတ်မှုရဲ့ တစ်ဦးတည်းသော မျက်မြင်သက်သေဖြစ်ပြီး သေဆုံးသူရဲ့ မွေးစားမိခင်ဆိုတဲ့ အမျိုးသမီးကြီးက လူသတ်သမားတွေဟာ သူ့ကို မေ့မျောသွားတဲ့ထိ လည်ပင်းညှစ်ထားခဲ့တယ်လို့လည်း ရဲတွေဆီကို စကားပြန်ကနေတဆင့် ထွက်ဆိုခဲ့ပါတယ်။

သူမသားနဲ့ လူသတ်မှု ကျူးလွန်တဲ့သူ​တွေဟာ လုပ်ငန်းအတူတွဲလုပ်သူ​တွေလို့ သူမကထွက်ဆိုပါတယ်။သေဆုံးသူဟာ​ငွေလဲလုပ်ငန်းလုပ်ကိုင်သူလို့ သတင်း​တွေက​ဖော်ပြ​ပေမယ့် သူ့ရဲ့အမည် နဲ့ အချက်အလက်အ​သေးစိပ်ကိုထိုင်းရဲတပ်ဖွဲ့ကထုတ်ပြန်ခြင်းမရှိ​သေးပါဘူး။

လုံခြုံရေး ကင်မရာ မှတ်တမ်းတွေအရ အခင်းဖြစ်ချိန်အတွင်း သေသူ၊ မျက်မြင်သက်သေနဲ့ သံသယ တရားခံ နှစ်ဦးတို့ဟာ တိုက်ခန်းထဲမှာ အတူရှိနေခဲ့တယ်ဆိုတာ အတည်
ပြုနိုင်ကြောင်း ရဲတွေက ပြောပါတယ်။

သေဆုံးသူဟာ ဘန်ကောက်နဲ့ ရန်ကုန်၊ ဘန်ကောက်နဲ့
ဟနွိုင်းကြား ၅၂ ကြိမ်လောက် ကူးလူးသွားလာမှုတွေ ရှိခဲ့တယ်လို့ ဆိုပါတယ်။ အခင်းဖြစ်ရာ တိုက်ခန်းကိုတော့ သူဟာ ဖေဖော်ဝါရီ ၇ ရက်နေ့ ကတည်းက ရောက်ရှိနေခဲ့တာလို့ ရဲမှတ်တမ်းတွေမှာ ပါရှိပါတယ်။

​
သေဆုံးသူရဲ့ လုပ်ငန်း အခြေအနေနဲ့ တခြား အသေးစိတ် အချက်အလက်တွေကို သိရှိဖို့ ဘန်ကောက် ရဲတပ်ဖွဲ့ဟာ မြန်မာသံရုံးနဲ့ ချိတ်ဆက် စုံစမ်းမှုတွေ ဆက်လက်လုပ်
ဆောင်နေတယ်လို့လည်း သိရပါတယ်။

ကိုးကာ: Bangkok Post ၊ Thai PBS

လူသတ်မှုဖြစ်ပွားရာကွန်ဒိုတိုက်ခန်းနှင့် ထိုင်းရဲတပ်ဖွဲ့အချို့ကို​တွေ့ရစဥ်။ဓါတ်ပုံ-Thai PBS

ဆင်ဘိုမြို့ကို KIA ဆက်လက်ထိန်းချုပ်ထား

ဆန်အောင်/People’s Spring

ကချင်ပြည်နယ် မြစ်ကြီးနားမြို့နယ်ရှိ ဆင်ဘိုမြို့ကို ကချင်လွတ်လပ်ရေးတပ်မတော်(KIA)က ထိန်းချုပ်ထားဆဲဖြစ်ကြောင်း စစ်ရေးသတင်းရင်းမြစ်က ပြောသည်။

ဧရာ၀တီမြစ်ကမ်းဘေးရှိ ဆင်ဘိုမြို့ကို ဖေဖော်ဝါရီ ၁၀ရက် နံနက်တွင် KIAနှင့် PDF ပူးပေါင်းတပ်က ဝင်ရောက်တိုက်ခိုက်ခဲ့ရာ မြို့ကို ထိန်းချုပ်ထားနိုင်ခဲ့ပြီး မြို့နှင့် မိုင်အနည်းငယ်အကွာရှိ စစ်ကောင်စီ၏ ခလရ(၁၄၁) တပ်ရင်းကို ဆက်လက် တိုက်ခိုက်ခဲ့သည်။

ဆင်ဘိုတိုက်ပွဲအတွင်း စစ်ကောင်စီလေကြောင်း ပစ်ကူပေးတိုက်ခိုက်ခဲ့ရာ ခလရ(၁၄၁)တပ်ရင်းကို သိမ်းပိုက်နိုင်ခြင်းမရှိသေးဘဲ ပြီးခဲ့သည့် ရက်ပိုင်းများအတွင်း တိုက်ပွဲငြိမ်သက်သွားသည်။

"မြို့ကို ထိန်းထားဆဲ။ တိုက်ပွဲဖြစ်တာ မရှိဘူး"ဟု စစ်ရေးသတင်းရင်းမြစ်က ယခုရက်ပိုင်းအတွင်း ပြောကြားထားသည်။

ယနေ့ နံနက်တွင် ကချင်သတင်းရင်းမြစ်အချို့က ဆင်ဘိုရှိ စစ်ကောင်စီတပ်စခန်းကို KIA/PDF ပူးပေါင်းတပ်က ဆက်လက်တိုက်ခိုက်နေကြောင်း လူမှုကွန်ရက်တွင် ရေးသားသည်။

ဆင်ဘိုမြို့ စစ်ရေးအခြေအနေနှင့်ပတ်သက်ပြီး KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူနှင့် စစ်ရေးသတင်းရင်းမြစ် အချို့ကို ဆက်လက်မေးမြန်းထားဆဲဖြစ်သည်။

မင်းပြားမှ သိမ်းရသည့် အတွဲလိုက်ဒုံးတင်ယာဉ် ၂စီးနှင့် လက်နက်ခဲယမ်းများ၊စစ်သုံးယာဉ်များ AA ပြသ

ရှိုင်း/People’s Spring

ရက္ခိုင့်တပ်တော်(AA)က သိမ်းပိုက်ထားသည့်မင်းပြားမြို့နယ်ရှိ စစ်ကောင်စီ တပ်ရင်းများမှ ရရှိခဲ့သည့် လက်နက်ခဲယမ်းများကို ယနေ့ ဖေဖော်ဝါရီ ၁၆ရက် ညနေပိုင်း၌ ထုတ်ဖော်ပြသခဲ့သည်။

မင်းပြားမြို့ကို ဖေဖော်ဝါရီ ပထမပတ်တွင် AAက သိမ်းပိုက်နိုင်ခဲ့ရာ အမှတ်(၉) စစ်ဆင်ရေးကွပ်ကဲမှု ဌာနချုပ်(စကခ-၉) လက်အောက်ခံ နည်းဗျူဟာ(၂) ခမရ( ၃၇၉)၊ ခမရ(၃၈၀) နှင့် ခမရ(၅၄၁) တပ်ရင်းများကို အပြီးသတ် ရရှိခဲ့သည်။

အဆိုပါ တပ်ရင်းများမှ သိမ်းဆည်းရရှိခဲ့သည် လက်နက်ခဲယမ်းမီးကျောက်များကို ဖော်ပြခဲ့ရာ ပျက်စီးနေပြီဖြစ်သည့် အတွဲလိုက်ဒုံးတင်ယာဉ် ၂စီး၊ အရာရှိကိုင် လက်နက်ငယ် ၆၀ကျော်၊ အခြားလက်နက်ငယ်နှင့် လက်နက်ကြီးများစွာ၊ စစ်သုံးမော်တော်ယာဉ်များ ကိုတွေ့ရသည်။

ပြီးခဲ့သည့် ရက်ပိုင်းကလည်း ကျောက်တော်ရှိ စစ်ကောင်စီတပ်ရင်းများမှ သိမ်းရသည့် လက်နက်များကို AAက ထုတ်ဖော်ပြသခဲ့သည်။

AAသည် ၂၀၂၃ အောက်တိုဘာ ၁၃ရက်တွင် ရက္ခိုင်ဒေသနှင့် ချင်းပြည်နယ် ပလက်၀မြို့နယ်ကို ထိုးစစ်ဆင်ခဲ့ရာ သုံးလအတွင်း ပလက်၀၊ ပေါက်တော၊ မင်းပြား၊ ကျောက်တော်၊ မြောက်ဦးနှင့် မြေပုံမြို့များကို သိမ်းပိုက်ထားနိုင်ခဲ့ပြီး ရသေ့တောင်၊ မောင်တောနှင့် ရမ်းဗြဲအပါအဝင် ရက္ခိုင်ဒေသ၌ ကျန်နေသည့် စစ်ကောင်စီတပ်ရင်းများ၊ စခန်းများကို ထိုးစစ်ဆင်လျက်ရှိသည်။

ဟိုပုံးမြို့နယ်တွင် စစ်ကောင်စီက လမ်းများကို ဘူဒိုဇာဖြင့်ထိုး ဖျက်ဆီး

မိုးမိုး/People’s Spring

ပအိုဝ်းဒေသ ဟိုပုံးမြို့နယ်တွင် စစ်ကောင်စီနှင့် လက်အောက်ခံပြည်သူ့စစ်များက ပြည်သူပိုင်လမ်းအား ဖျက်ဆီးနေကြောင်း ပအိုဝ်းအမျိုးသားလွတ်မြောက်ရေးတပ်မတော်(PNLA)က သတင်းထုတ်ပြန်သည်။

ဟိုပုံးမြို့နယ် မဲနယ်တောင်ရှိ အများပြည်သူပိုင် လမ်းများကို ဘက်ဖိုးများ ဘူဒိုဇာများဖြင့်ထိုးဖျက်ဆီးခဲ့ခြင်းဖြစ်ကြောင်း PNLAက ယနေ့ ဖေဖော်ဝါရီ ၁၆ရက်တွင် ထုတ်ပြန်သည်။

"စကစ နဲ့ ပြည်သူ့စစ်ရဲ့ပုံစံအတိုင်း အလုံးစုံဖျက်ဆီးရေးဆိုတဲ့အတိုင်း ဖျက်ဆီးသွားတာဖြစ်ပါတယ်။ ပြီးတော့ ပအိုဝ်းဒေသက ပြည်သူလူထုကို ခက်ခဲအောင်လုပ်တာလည်းဖြစ်တယ်။ နောက်ဆုံး ကျွန်တော်တို့လုံခြုံရေးလှုပ်ရှားရာမှာ ခက်ခဲအောင် လမ်းကိုဖျက်ဆီးတာလည်းဖြစ်တယ်။ ပြောရရင်တော့ စစ်အာရှင်တွေရဲ့ အကျင့်အတိုင်း ဖျက်ဆီးလိုက်တာဖြစ်ပါတယ်"ဟု PNLA ပြောရေးဆိုခွင့်ရှိသူ ခွန်ရိန်းယံက ပြောသည်။

စစ်ကောင်စီနှင့် လက်အောက်ခံပြည်သူ့စစ်များက ယင်းကဲ့သို့ အများပြည်သူပိုင်လမ်းကို ဖျက်ဆီးခြင်းကြောင့် ပြည်သူများ သွားလာရေးတွင်အခက်အခဲဖြစ်ခဲ့ဟု PNLAက ထုတ်ပြန်သည်။

စစ်ကောင်စီနှင့် လက်အောက်ခံ ပြည်သူ့စစ်များ ဖျက်ဆီးခဲ့သည့် လမ်းကို ယာယီသွားလာနိုင်ရန် ပအိုဝ်းအမျိုးသားလွတ်မြောက်ရေးတပ်မတော် (PNLA)က ပြင်ဆင်ပေးခဲ့သည်ဟုလည်း အသိပေးသည်။

စစ်ကောင်စီသည် ကချင်၊ ကရင်၊ မွန် ၊ရှမ်းမြောက်နှင့် ရက္ခိုင်အပါအဝင် ၎င်းတို့ စစ်ရေးအရ အထိနာသည့် ဒေသများ၌ လမ်းများကို ဖျက်ဆီးခြင်း၊ တံတားများကို မိုင်းခွဲဖျက်ဆီးခြင်း၊ လေယာဉ်ဖြင့် ဗုံးကြဲဖျက်ဆီးခြင်းများ လုပ်ဆောင်ခဲ့သည်။

(စစ်ကောင်စီက လမ်းပိုင်းအား ဘူဒိုဇာဖြင့်ထိုး ဖျက်ဆီးပြီးနောက် တွေ့ရစဉ်။ ဓာတ်ပုံ - PNLA)

NMSPအဖွဲ့ တော်လှန်ရေးပါဝင်လာမှု NUG ဂုဏ်ပြုကြိုဆို

▪️တော်လှန်ရေးတွင် ပါဝင်ခြင်းမရှိသေးသော တိုင်းရင်းသားတော်လှန်ရေး အင်အားစုများလည်း ပါဝင်လာရန် ဖိတ်ခေါ်

ထားမြတ်/People’s Spring

စစ်ကောင်စီနှင့်ထိတွေ့ဆက်ဆံမှုများလုပ်ဆောင်ခဲ့သည့် မွန်ပြည်သစ်ပါတီ(NMSP)(စစ်အာဏာရှင်တိုက်ဖျက်ရေး)အဖွဲ့ တော်လှန်ရေးတွင်ပါဝင်လာမှုအား ဂုဏ်ပြုကြိုဆိုကြောင်း အမျိုးသားညီညွတ်ရေးအစိုးရ(NUG) က ယနေ့ ထုတ်ပြန်ကြေညာသည်။

NMSP အထွေထွေအတွင်းရေးမှူးနိုင်ဇေယျနှင့်ဒုစစ်ဦးစီးချုပ် ဗိုလ်မှူးချုပ်စလွန်းထောအပါအဝင် အဖွဲ့အတွင်း သဘောထားတူညီသည့် အင်အားစုများ စုပေါင်းပြီး NMSP(စစ်အာဏာရှင်တိုက်ဖျက်ရေး)အမည်ဖြင့် စစ်ကောင်စီကို ပြန်လည်တိုက်ခိုက်ရန် ဖေဖော်ဝါရီ ၁၄ရက်တွင် ကြေညာခဲ့သည်။

အာဏာသိမ်းစစ်တပ်၏ အကြမ်းဖက်မှုကို ကာကွယ်ရန်၊ တိုင်းရင်းသားလူမျိုးများ လိုလားတောင့်တသည့် အမျိုးသားတန်းတူရေး နှင့် ကိုယ်ပိုင်ပြဌာန်းပိုင်ခွင့် အပြည့်အဝရှိသော ဖက်ဒရယ်ပြည်ထောင်စု တည်ဆောက်ရန်အတွက် စစ်ကောင်စီအား ဆန့်ကျင်တိုက်ပွဲဝင်နေသော တိုင်းရင်းသားတော်လှန်ရေး အဖွဲ့အစည်းများ၊ နွေဦးတော်လှန်ရေး အင်အားစုများနှင့် ပူပေါင်းလက်တွဲပြီး အာဏာသိမ်းစစ်တပ်အား တိုက်ခိုက်သွားမည်ဖြစ်ကြောင်း အဆိုပါ အဖွဲ့ကထုတ်ပြန်ခဲ့ရာ ယင်းသို့ထုတ်ပြန်မှုအပေါ် ဝမ်းမြောက်စွာ ဂုဏ်ပြု ကြိုဆိုကြောင်း NUGက ယနေ့ အသိပေးခဲ့ပြီး ဖေဖော်ဝါရီလ ၁၄ ရက်နေ့အား မွန်တော်လှန်ရေးသမိုင်းတွင် မော်ကွန်းသစ် ရေးထိုးလိုက်သည့် နေ့တနေ့အဖြစ် လေးစားစွာ မှတ်တမ်းတင်သည်ဟု ဖော်ပြသည်။

စစ်အာဏာရှင်စနစ် မြန်မာ့မြေပေါ်မှ လုံးဝ ကင်းစင်ပပျောက်ပြီး အနာဂတ် ဖက်ဒရယ်ဒီမိုကရေစီပြည်ထောင်စု တည်ဆောက်နိုင်ရေးအတွက် မွန်ပြည်သစ်ပါတီ (စစ်အာဏာရှင်တိုက်ဖျက်ရေး) အပါအဝင် တော်လှန်ရေး အင်အားစုအားလုံးနှင့် အခိုင်အမာ လက်တွဲပူးပေါင်း တိုက်ပွဲဝင်သွားမည်ဖြစ်ကြောင်း ကတိပြုသည်ဟုလည်း NUGက ထုတ်ပြန်သည်။

တော်လှန်ရေးတွင် ပါဝင်ခြင်းမရှိသေးသော တိုင်းရင်းသားတော်လှန်ရေး အင်အားစုများအနေဖြင့်လည်း ကိုယ့်ကံကြမ္မာ ကိုယ်ဖန်တီးခွင့်၊ ကိုယ်ပိုင်ပြဌာန်းခွင့် တို့အတွက် လက်ရှိအခွင့်အလမ်းကို အမိအရဆုပ်ကိုင်ပြီး ပြည်သူ့နွေဦးတော်လှန်ရေးတွင် ပူးပေါင်းပါဝင်ကြရန် NUGက ထပ်မံတိုက်တွန်း ဖိတ်ခေါ်ခဲ့သည်။

ဖေဖော်ဝါရီ ၁၂ရက်က ကျင်းပသည့် (၇၇) ကြိမ်မြောက် ပြည်ထောင်စုနေ့ အခမ်းအနား (ပင်လုံစာချုပ်ချုပ်ဆိုခြင်းနှစ်ပတ်လည်နေ့)တွင် NUG ယာယီသမ္မတ ဒူဝါလရှီးလက မိန့်ခွန်းပြောကြားခဲ့ရာ မွန်နှင့် ရှမ်း လက်နက်ကိုင်အဖွဲ့များ၏ ပါဝင်အားဖြည့်မှုကို လိုလားကြောင်း ဖိတ်ခေါ်ခဲ့သည်။

"ရှမ်းပြည်နယ်အတွင်းမှာရှိတဲ့တိုင်းရင်းသား လက်နက်ကိုင်အဖွဲ့အစည်းတွေရဲ့ တစ်တပ်တစ် အား ပါဝင်အားဖြည့်မှုကို ကျနော်တို့ အလေးအနက်ထား ကြိုးစားဖို့လိုပါတယ်။ ဒါ့အပြင် မွန်ပြည်နယ်အတွင်းက တိုင်းရင်းသားလက်နက်ကိုင်အဖွဲ့အစည်းတွေရဲ့ အားဖြည့်မှုကိုလည်း အထူးလိုလားစွာ ကြိုဆိုကြောင်း တင်ပြချင်ပါတယ်"ဟု ယာယီသမ္မတက ပြောဆိုခဲ့ခြင်းဖြစ်သည်။

မွန်ပြည်ကာကွယ်ရေးတပ်(MSDF)ကလည်း ၎င်းတို့ အနေဖြင့် မွန်ပြည်သစ်ပါတီ (စစ်အာဏာရှင် တိုက်ဖျက်ရေး) နိုင်ငံရေး၊ စစ်ရေး ဦးဆောင်အဖွဲ့နှင့်အတူ တိုက်ပွဲဝင်သွားမည်ဖြစ်ကြောင်း ထုတ်ပြန် ကြေညာခဲ့သည်။

မွန်ပြည်သစ်ပါတီ (စစ်အာဏာရှင် တိုက်ဖျက်ရေး) အဖွဲ့၏ ရဲဝင့်ပြတ်သားပြီး မှန်ကန်သည့် ရပ်တည်မှု အပေါ်၊ မွန်ပြည်ကာကွယ်ရေးတပ် (MSDF)မှ လှိုက်လှိုက်လှဲလှဲ ဝမ်းမြောက်ဂုဏ်ယူကြောင်း၊

အကြမ်းဖက်စစ်ကောင်စီနှင့် စစ်အာဏာရှင် (အာဏာရှင်စနစ် အမျိုးမျိုး) ချေမှုန်း ပျက်သုဉ်းရေး အတွက် မွန်ပြည်သစ်ပါတီ (စစ်အာဏာရှင် တိုက်ဖျက်ရေး) အဖွဲ့နှင့် အတူတကွ လက်တွဲပြီး အောင်ပွဲ ရသည့်အထိ တိုက်ပွဲဝင်သွားမည်ဖြစ်ကြောင်း အသိပေး ထုတ်ပြန်ခဲ့သည်။

(မွန်အမျိုးသားနေ့ အခမ်းအနားကျင်းပနေသည်ကို တွေ့ရစဉ်။ ဓာတ်ပုံ - CJ)

စစ်ကိုင်း၊ ဧရာဝတီနဲ့ တနင်္သာရီတိုင်းမှာ စစ်အာဏာရှင် ဆန့်ကျင်ရေးသပိတ်တွေ ချီတက်ဆန္ဒပြ

သုည/People's Spring

စစ်ကိုင်း၊ ဧရာဝတီနဲ့ တနင်္သာရီတိုင်းမှာ သပိတ် အဖွဲ့တွေ၊ ဒေသခံပြည်သူတွေက စစ် အာဏာရှင် ဆန့်ကျင်ရေး သပိတ်တွေ ဒီနေ့ (ဖေဖော်ဝါရီ ၁၇) အသီးသီး ချီတက်ဆန္ဒပြခဲ့ကြပါတယ်။

စစ်ကိုင်းတိုင်း ယင်းမာပင်မြို့နယ်မှာ အောင်လံလွှင့်မည် ဒေါင်းသွေးနီ သပိတ်စစ်ကြောင်းက ဒေသခံပြည်သူတွေနဲ့ ပူးပေါင်းကာ စစ်အာဏာရှင် ဆန့်ကျင်ရေးညသပိတ် ဆင်နွှဲခဲ့ပါတယ်။

ဆားလင်းကြီးမြို့နယ် လက်ပံတောင်းတောင်ဒေသမှာလည်း သပိတ်အင်အားစုတွေနဲ့ ပြည်သူတွေ ပူးပေါင်းကာ "အဆုံးသတ်အောင်ပွဲဆီ လူထုလှိုင်းတွေနဲ့ တက်စုံဖွင့် ရွက်ကုန်လွှင့်ချီ" စာသားကိုင်စွဲပြီး စစ်အာဏာရှင် ဆန့်ကျင်ရေး လူထုဟစ်ကြွေးသံများနဲ့ ချီတက်ခဲ့ကြပါတယ်။

ဝက်လက်မြို့နယ်မှာလည်း အခြေခံပညာကျောင်းသားသမဂ္ဂများနဲ့ ဝက်လက်ဒေသစည်းရုံးရေးရဲဘော်များက ဦးဆောင်ပြီး ကျောင်းသားပြည်သူလူထုကို စည်းရုံးစုစည်းကာ စစ်သုံးစစ်တိုက်ဖျက်ရေး လူထုလှုပ်ရှားမှုအဖြစ် ချီတက်ဆန္ဒပြခဲ့ကြပါတယ်။

မြင်းမူမြို့နယ်မှာလည်း ဒေသခံလူငယ်တွေ စုပေါင်းကာ လက်နက်မဲ့လမ်းစဥ်နဲ့ လူထုတိုက်ပွဲများ မြင်းမူမြို့နယ်အတွင်း ပြန်လည်ပေါ်ပေါက်နိုင်ရေး အကြိုလှုံဆော်မှုအနေနဲ့ ကျေးရွာတွေကို ဆိုင်ကယ်သပိတ်စစ်ကြောင်းအဖြစ် လှည့်လည် ချီတက်ခဲ့ကြပါတယ်။

ဧရာဝတီတိုင်း ကြံခင်းမြို့နယ်မှာလည်း စကြဝတေးမင်းကြီးသပိတ်အဖွဲ့ဝင်တွေက စစ်အာဏာရှင်ဆန်ကျင်ရေးလှုပ်ရှားမှုအဖြစ် "စစ်ကောင်စီရဲ့ဆုံးဖြတ်ချက်အမှားတွေကြောင့် ပြည်သူ့ထောက်ခံမှုမရသည့်အပြင် အောက်ခြေစစ်သားများ၏ အသက်များစွာစတေးနေရပြီ" စာတန်း (ဗီနိုင်း)အားကိုင်ဆောင်ကာ ဆန္ဒဖော်ထုတ်ခဲ့ပါတယ်။

တနင်္သာရီတိုင်း ထားဝယ်ခရိုင် လောင်းလုံးမြို့နယ်မှာ လည်း ဒီမိုကရေစီအရေးလှုပ်ရှားမှု သပိတ်ကော်မတီ(DDMSC) မှ ဦးဆောင်ပြီး လူထုသပိတ်လှုပ်ရှားမှု ပြုလုပ်ခဲ့ပါတယ်။

ယင်းလှုပ်ရှားမှုကို "လူထုအာဏာတည်ဆောက် လွတ်မြောက်ရေးအတွက် ဆက်လျှောက်" ဆိုတဲ့ ခေါင်းစဥ်နဲ့ ပြုလုပ်ခဲ့တာဖြစ်ပြီး ဒေသခံအမျိုးသမီး လူငယ်တွေ အပါအဝင် ပြည်သူလူထု ပူးပေါင်းပါဝင်မှုနဲ့အတူ ချီတက်ဆန္ဒပြခဲ့ကြပါတယ်။

ဓာတ်ပုံ - ရွာပေါင်းစုံသပိတ်၊ DDMSC ၊ လက်ပံတောင်းသပိတ်၊ စကြဝတြေးမင်းကြီးသပိတ်