မင်းကင်းတိုက်ပွဲ ကြံ့ဖွံ့ အမတ်ဟောင်း ပျူခေါင်းဆောင်ဒဏ်ရာအပြင်းအထန်ရပြီး စစ်တပ်ကရဟတ်ယာဉ်ဖြင့် ကယ်ထုတ်

ရွှေပြည်စိုး/People's Spring

မင်းကင်းမြို့ ဖက်ခပ်ပျူရွာစခန်းသိမ်းတိုက်ပွဲတွင် ဦးသိန်းစိန်အစိုးရလက်ထက် လွှတ်တော်ကိုယ်စားလှယ်၊ ယခုပျူခေါင်းဆောင် ဒေါက်တာစန်းဝင်းအပါအဝင် ပျုစောထီးအဖွဲ့ဦးဆောင်သူအချို့ ဒဏ်ရာအပြင်းအထန်ရရှိသွားပြီး စစ်တပ်ကရဟတ်ယာဉ်ဖြင့် ခေါ်ဆောင်သွား​ကြောင်းသိရသည်။

မင်းကင်းနယ်၌ နာမည်ကြီးပျူရာဖြစ်​သော ဖက်ခပ်ရွာကို
မင်းကင်းမြို့မှ ပြည်သူ့ကာကွယ်ရေး တပ်ရင်းများနှင့် ဒေသကာကွယ်ရေးတပ်များက ဖေဖော်ဝါရီလ ၁၃ ရက်​နေ့ကစ
တင်တိုက်ခိုက်ခဲ့ခြင်းဖြစ်သည်။ အဆိုပါတိုက်ပွဲ၌ ပျူ စောထီးလေးဦးထက်မနည်းသေဆုံးခဲ့ပြီး ဒဏ်ရာရသူများလည်းရှိကြောင်း သတင်းရရှိသည်။

" ‌ဒေါက်တာစန်းဝင်းလည်း ဒဏ်ရာရသွားတယ်။ သူ့ကိုရဟတ်ယာဥ်နဲ့ကယ်ထုတ်သွားတယ်။ သူက မင်းကင်းနယ်ကအဓိကပျူခေါင်းဆောင်ပဲ" ဟု ပြည်သူ့ကာကွယ်ရေးတပ်ဖွဲ့ဝင်တစ်ဦးကပြောသည်။

​ဖေ​​ဖော်ဝါရီ ၁၃ ရက်က ဖက်ခပ်ရွာအပြင် ကြေးတောင်ဦးပျူရွာကိုလည်း ပြည်သူ့ကာကွယ်ရေးတပ်ဖွဲ့များကတိုက်ခိုက်ခဲ့ရာ ထိုရွာမှပျူစောထီးခေါင်းဆောင်ကိုကိုကြီးဆိုသူ၏ မျက်နှာအား သေနတ်ကျည်ထိမှန်သွားပြီး မေးရိုးပြုတ်ဒဏ်ရာရရှိခဲ့ကြောင်းလည်း သတင်းရရှိသည်။။

" ဒေါက်တာစန်းဝင်းရောကြေးတောင်ဦးပျူရွာက ပျူခေါင်း
ဆောင်ကိုကိုကြီးရော ရဟတ်ယာဉ်နဲ့ခေါ်သွားတာ" ဟု ဒေသခံတဦးကပြောသည်။

ဒေါက်တာစန်းဝင်းသည် ဦးသိန်းစိန်အစိုးရလက်ထက် ၂၀၁၀ - ၂၀၁၅ အတွင်း မင်းကင်းမြို့နယ်မှ ကြံ့ခိုင်ရေးပါတီကိုယ်စားပြုပြည်သူ့လွှတ်တော်ကိုယ်စားလှယ်ဖြစ်သည်။စစ်တပ်ကနိုင်ငံတော်အာဏာသိမ်းယူပြီးနောက် ၎င်းသည် မင်းကင်းနယ်၌ နာမည်ကြီးပျူ‌ စောထီးခေါင်းဆောင်ဖြစ်လာသည်။ ပြည်သူ့ကာကွယ်ရေးတပ်ဖွဲ့များ၏ပစ်ခတ်မှုကြောင့် ဒဏ်ရာရပြီး နောက်ဆက်တွဲအခြေအနေကိုမသိရှိရသေးပေ။

မင်းကင်းမြို့နယ်အတွင်း ဖေဖော်ဝါရီ ၇ရက်မှစ၍ စစ်ရေးတင်းမာနေသည်။ မင်းကင်းမြို့နယ်မှကံရွာကိုလည်း ပြည်သူကာကွယ်ရေးတပ်ဖွဲ့များကတိုက်ခိုက်ခဲ့သည်။ ယမန်နေ့ ဖေဖော်ဝါရီလ ၁၄ရက်ညနေက တိုက်ပွဲအတွင်း ကျောင်းသားတော်လှန်ရေးတပ်ဖွဲ့ (SRF)မှ ရဲဘော်အချို့ ဒဏ်ရာရခဲ့သည်။

AA က မြေပုံမြို့ကိုပါကိုသိမ်းပိုက်ထိန်းချုပ်ထား​ကြောင်း ကြေညာ

▪︎ရသေ့တောင်၊ ရမ်းဗြဲ မြို့ပေါ်တိုက်ပွဲဖြစ်ပွားနေပြီး မောင်တောရှိ စစ်စခန်းတစ်ခုကို AA ထိုးစစ်ဆင်

▪︎ရက္ခိုင်ဒေသရှိ စစ်စခန်းအားလုံး တစ်ခုမှ မကျန်စေရန် တိုက်ခိုက်မည်ဟု အသိပေး

ရှိုင်း/People’s Spring

ရက္ခိုင်ပြည်နယ် နှင့် ချင်းပြည်နယ် ပလက်ဝမြို့နယ်ကို
ရက္ခိုင့်တပ်တော်(AA)က ထိုးစစ်ဆင်တိုက်ခိုက်ခဲ့ရာ သုံးလတာ စစ်ဆင်ရေးအတွင်း ပလက်ဝ၊ ပေါက်တော၊ ကျောက်တော်၊ မင်းပြား၊ မြောက်ဦး၊ မြေပုံမြို့ များပေါ်မှ စစ်ကောင်စီ၏ စစ်ဘက်၊ ရဲဘက် တပ်စခန်းများကို သိမ်းပိုက်ရယူနိုင်ခဲ့ပြီးဖြစ်ကြောင်း AAက ယမန်နေ့တွင် ထုတ်ပြန် ကြေညာသည်။

AA သည် ဇန်နဝါရီ ၁၄ရက်တွင် ပလက်၀မြို့၊ဖေဖော်ဝါရီ ပထမပတ်တွင် ပေါက်တော၊ မင်းပြား၊ မြောက်ဦး၊ ကျောက်တော် မြို့များကို သိမ်းပိုက်နိုင်ခဲ့ပြီးယခုဖေဖော်ဝါရီလလယ်တွင် မြေပုံကို ထပ်မံသိမ်းနိုင်ခဲ့ဟု အသိပေးလာခြင်းဖြစ်
သည်။ ထိုအပြင် AA သည် ပလက်ဝ မြို့နယ်အတွင်းရှိ ဆမီးမြို့ ၊ ​မောင်​တောမြို့နယ်အတွင်ရှိ ​တောင်ပြို (လက်ဝဲ)ကိုလည်း သိမ်းပိုက်ထားသည်။

ထို့အပြင် ရမ်းဗြဲကျွန်းပေါ် ၌ တိုက်ပွဲများမှာလည်း ခပ်စိပ်စိပ်ဖြစ်လျက်ရှိကြောင်း ဖော်ပြသည်။

ရက္ခိုင်ဒေသအတွင်း လက်ကျန်မြို့များမှ စစ်ကောင်စီ၏ စစ်ဘက်၊ ရဲဘက် တပ်စခန်းများ ကို တစ်ခုမျှမကျန်စေရဟူသော စစ်ရေးရည်မှန်းချက်အတိုင်း ရက္ခိုင့်တပ်တော်မှ ဗျူဟာမြောက်စွာ ထိုးစစ်ဆင် တိုက်ခိုက်လျက်ရှိသည်ဟု AAက ထုတ်ပြန်သည်။

အခြားတစ်ဖက်တွင် စစ်ကောင်စီအနေဖြင့် ကြည်း၊ ရေ၊ လေ ပူးပေါင်းခုခံစစ်ကို ဆင်နွှဲလျက်ရှိရာ ဖေဖော်ဝါရီ ၁၄ရက်မှစ၍ ရသေ့တောင်၊ ရမ်းဗြဲ၊ မောင်တောမြို့များ၌ တိုက်ပွဲများ ပြင်းထန်နေကြောင်းလည်း အသိပေးသည်။

ထို့အတူ စစ်ကောင်စီ သည် စစ်ပွဲအရှုံးများကြောင့်သော်
လည်းကောင်း၊ လူမျိုးရေး အမုန်းတရားများကိုအခြေခံ
၍လည်းကောင်း၊ သွေးပျက်ကြောက်လန့်နေ၍လည်း
ကောင်း လက်နက်ကြီးများဖြင့် မြို့ရွာများကို ဦးတည်တိုက်ခိုက် လျက်ရှိသည်ဟု ဆိုသည်။

ရမ်းဗြဲမြို့သည် စစ်ကောင်စီ၏ လေကြောင်း၊ ရေကြောင်း၊ လက်နက်ကြီး ပစ်ခတ်တိုက်ခိုက်ခံရမှု အများဆုံးမြို့ဖြစ်သကဲ့သို့ စစ်ကောင်စီသည် ယမန်နေ့မှစ၍ ရသေ့တောင်မြို့ပတ်ဝန်းကျင်နှင့်၎င်းအနီးအနားရှိကျေးရွာများသို့ လေ
ကြောင်း၊ ရေကြောင်း၊ လက်နက်ကြီးများဖြင့်ပစ်ခတ်တိုက်
ခိုက်လျက် ရှိကြောင်း၊ ရသေ့တောင်မြို့သည် စစ်ကောင်စီ
၏ ဒုတိယပစ်မှတ်ထား မြို့တစ်မြို့ဖြစ်လာခဲ့ကြောင်း AAက ထုတ်ပြန်သည်။

AA ထိန်းချုပ်ထားသည့် ပလက်ဝမြို့အတွင်းသို့လည်းစစ်ကောင်စီက လေကြောင်း တိုက်ခိုက်မှု ထပ်မံ ပြုလုပ်လာသည်ဟု အသိပေးသည်။

ဖေဖော်ဝါရီလ (၁၅) ရက်နေ့တွင် ရက္ခိုင်ပြည် မောင်တောမြို့နယ်၊ ဗောဓိကုန်းကျေးရွာအနီးရှိ ဗောဓိကုန်းစခန်းအား AAက ထိုးစစ်ဆင်လျက်ရှိရာ စစ်ကောင်စီက စခန်း မကျရေးအတွက် ကြည်း၊ ရေ၊ လေ ပူးပေါင်း၍ အပြင်းအထန်ခုခံလျက်ရှိဟု ဖော်ပြသည်။

ရသေ့တောင်မြို့တွင် AA နှင့်စစ်ကောင်စီတို့အကြား တိုက်
ပွဲများ စတင်ဖြစ်ပွားနေကြောင်း အသိပေးသည်။

AA ပါဝင်သည့် ညီနောင် ၃ဖွဲ့ကလည်း ၁၀၂၇ စစ်ဆင်ရေး (၁၁၂) ရက်မြောက်နေ့ ဖေဖော်ဝါရီ ၁၅ရက် တိုက်ပွဲသတင်းများကို ထုတ်ပြန်ခဲ့ရာ

ရက္ခိုင်ဒေသရှိ လက်နက်ချအညံ့မခံသော စစ်ကောင်စီတပ်စခန်းတိုင်းကို တစ်ခုမျှမကျန် ထိုးစစ်ဆင်တိုက်ခိုက်သွားမည်ဖြစ်ကြောင်း ဖော်ပြသည်။

စစ်ကောင်စီသည် ဖေဖော်ဝါရီ ၁၄ရက်က ကျောက်ဖြူမြို့နယ် ပေါက်နက်ချေကျေးရွာမှ အမျိုးသား ၉ဦးကို ဖမ်း
ဆီးသွားကြောင်း ၊ ပေါက်နက်ကြီးကမ်းနားရှိ မြစ်ပြင်ထဲတွင် စားဝတ်နေရေးအတွက် လောင်းလှေ (၃) စီးဖြင့် ငါးဖမ်းထွက်နေစဉ် စစ်ကောင်စီ၏ “ဓညဝတီရေတပ်စခန်းဌာနချုပ်” ရေတပ်သင်္ဘောက ဖမ်းခေါ်သွားခြင်းဖြစ်ကြောင်း ထုတ်ပြန်သည်။

ဆီဆိုင်တိုက်ပွဲ စစ်ကောင်စီတပ် ၂ဦးထက်မနည်းသေဆုံးပြီး
ခဲယမ်း၊ ကျည်အချို့နှင့် မူးယစ်ဆေးဝါးများပါသိမ်းဆည်းရရှိဟု PNLA ​ပြော

▪︎မူးယစ်​ဆေးဝါးသုံးစွဲသုံးစွဲ​စေပြီး ​ရှေ့တန်းတက်ခိုင်း​သောအ​ခြေအ​နေဟု PNLA ​ပြော​ရေးဆိုခွင့်ရှိသူ​ပြော

ဝင်းမောင်/People’s Spring

ပအိုဝ်းဒေသ ဆီဆိုင်မြို့နယ်မြောက်ဘက်ခြမ်း တိုက်ပွဲ၌ စစ်ကောင်စီတပ်နှင့်လက်အောက်ခံပြည်သူ့စစ် ၂ ဦး​ထက်မည်းသေဆုံးပြီးစစ်​ကောင်စီတပ်ထံမှ မူးယစ်ဆေးဝါးနှင့်ခဲယမ်းကျည်ဆံအချို့သိမ်းဆည်းရမိခဲ့ကြောင်း ပအိုဝ်းအမျိုးသားလွတ်မြောက်ရေးတပ်မတော်(PNLA)၊ပြောရေးဆိုခွင့်ရှိသူ ခွန်ရိန်းယံက​ပြောသည်။

ဖေဖော်ဝါရီ ၁၅ရက်က ပအိုဝ်းအမျိုးသားလွတ်မြောက်ရေးတပ်မတော်(PNLA) လုံခြုံရေးစစ်ကြောင်းကို ချောင်း
မြောင်းပစ်ခတ်သည့် စစ်ကောင်စီနှင့်အပေါင်းအပါများအား ပြန်လည်ရှင်းလင်းရာ ခဲယမ်းအချို့နှင့် မူးယစ်ဆေးဝါးများအား ဖမ်းဆီးရမိခဲ့ခြင်းဖြစ်သည်ဟုဆိုသည်။

“(စစ်ကောင်စီလက်နက်ကိုင်)နှစ်ဦး ထက်မနည်း သေဆုံးတာတွေ့ရတယ်။ အဲဒီအလောင်းကိုတော့သူတို့ပြန်သယ်သွားတာပေါ့။အခင်းဖြစ်တဲ့နေရာမှာသူတို့ယူနီဖောင်းတွေ မူးယစ်ဆေးဝါး အထုပ်ကြီး နှစ်ထုပ်ရယ် အထုပ်သေး ၂ထုပ်ရယ် RPG အသီးတချို့ရယ်၊ ၇၉ ကျည်အချို့ရယ် သိမ်းဆည်းရမိတယ်” ဟုခွန်ရိန်းယံက ပြောသည်။

ယခင်တိုက်ပွဲဖြစ်စဉ်များအတွင်း၌လည်း စစ်ကောင်စီနှင့်လက်အောက်ခံတပ်ဖွဲ့များထံမှ မူးယစ်ဆေးဝါး သိမ်းရသည့် ဖြစ်စဉ်များရှိကြောင်း ၎င်းက ဆက်​ပြောသည်။

“အနေအထားကြည့်ရတာက အထုပ်ကြီးတွေ အထုပ်သေးတွေအများကြီးတွေ့ရတော့သူတို့ကမူးယစ်ဆေးဝါး သုံးစွဲပြီးတော့ ရှေ့တန်းတက်ခိုင်းတဲ့ ပုံစံ အနေအထား ဖြစ်နေတာပေါ့” ဟု ခွန်ရိန်းယံကပြောသည်။

PNLAသည် ဇန်နဝါရီလကုန်ပိုင်း၌ ဆီဆိုင်မြို့ကို ထိန်းချုပ်ခဲ့ရာ စစ်ကောင်စီနှင့်လက်အောက်ခံ ပြည်သူ့စစ် PNO တပ်များက မြို့ပြန်လည်ရရှိရေးထိုးစစ်ဆင်နေ၍ တိုက်ပွဲများ မကြာခဏ ဖြစ်ပွားလျက်ရှိသည်။

(စစ်ကောင်စီတပ်ထံမှ သိမ်းဆည်းရရှိသော ပစ္စည်းများအား တွေ့ရစဉ်။ ဓာတ်ပုံ - PNLA)

ဘင်္ဂလားဒေ့ရှ်ထွက်​ပြေးတဲ့စစ်သား ၃၀၀ ကျော်ကိုပြန်ပို့

-People's Spring

နယ်စပ်ဖြတ်ကျော်ပြီး ထွက်ပြေးလာကြတဲ့ စစ်​ကောင်စီ စစ်သားတွေနဲ့ တခြား အရာရှိတွေ၊ မိသားစုဝင်တွေ စုစုပေါင်း ၃၃၀ လောက်ကို ဘင်္ဂလားဒေ့ရှ်က မြန်မာဖက် ပြန်ပို့ဆောင်လိုက်ပါတယ်။

ဖေဖော်ဝါရီ ၁၅ ရက် မနက်ပိုင်းတုန်းက မြန်မာ စစ်သားတွေကို ပြန်လည် ပို့ဆောင်ပေးလိုက်တဲ့ ကိစ္စကို ဘင်္ဂလားဒေ့ရှ် နယ်ခြားစောင့်တပ် (BGB)ရဲ့ ပြောရေးဆိုခွင့်ရ အရာရှိ ရှာရီဖူလ် အစ္စလာမ်က အတည်ပြုခဲ့ပါတယ်။

ဖေဖော်ဝါရီ ၁၅ ရက် မနက် ၈ နာရီ ဝန်းကျင်မှာ ကော့စ်ဘဇား ဒေသမှာရှိတဲ့ အင်နာနီ ရေတပ်ရဲ့ ဆိပ်ခံတံတားမှာ မြန်မာ စစ်သားတွေနဲ့ နယ်ခြားစောင့် ရဲတွေကို စစ်​ကောင်စီရဲ့ ဘင်္ဂလားဒေ့ရှ် နိုင်ငံဆိုင်ရာသံအမတ်ကြီး ဦးအောင်ကျော်မိုးဆီ လွှဲပြောင်းပေးခဲ့တယ်လို့ သိရပါတယ်။

BGBရဲ့ အကြီးအကဲ မိုဟာမက် အက်ရှ်ရာဖူဇ်မန် ဆစ်ဒီကီကလည်း စစ်​ကောင်စီတပ်ဖွဲ့ဝင်တွေကို ပြန်ပြီး လက်လွှဲလိုက်တဲ့ ကိစ္စကို သီးခြား အတည်ပြုခဲ့ပါတယ်။ အဲဒီ စစ်တပ်နဲ့ နယ်ခြားစောင့်တပ်ဖွဲ့ဝင် ၃၃၀ လောက်ဟာ သင်္ဘောတစ်စီးနဲ့ မြန်မာဖက်ခြမ်းကို ပြန်ကြတာပါ။

ရက္ခိုင့်တပ်တော် (AA)ရဲ့ ထိုးစစ်ဒဏ်ကြောင့် အာဏာသိမ်း မြန်မာစစ်တပ် တပ်ဖွဲ့ဝင်တွေဟာ ဖေဖော်ဝါရီ ၄ ရက်နေ့ကစပြီး ဘင်္ဂလားဒေ့ရှ် ပိုင်နက်ထဲထိ ထွက်ပြေးခဲ့ကြတာ ဖြစ်ပါတယ်။ သူတို့ကို BGB၊ ဘင်္ဂလားဒေ့ရှ် စစ်တပ်၊ လူဝင်မှု ကြီးကြပ်ရေးဌာန၊ ရဲတပ်ဖွဲ့နဲ့ တခြား အေဂျင်စီတွေက ခွဲဝေ ထိန်းသိမ်းထားပြီး ရက်ပိုင်းအကြာမှာ အခုလို ပြန်ပို့ခဲ့တာ ဖြစ်ပါတယ်။

မြန်မာဖက်ခြမ်း နယ်စပ်မှာ ဖြစ်ပွားနေတဲ့ တိုက်ပွဲတွေကြောင့် ဘင်္ဂလားဒေ့ရှ်ဖက်ခြမ်းမှာ မော်တာကျည်ဆန် ကျရောက် ပေါက်ကွဲပြီး ၂ ဦး သေဆုံးခဲ့သလို ဒဏ်ရာရရှိသူ ဒါဇင်နဲ့ချီ ရှိခဲ့တယ်လို့လည်း ဘင်္ဂလားဒေ့ရှ် အာဏာပိုင်တွေက ထုတ်ပြန်ထားပါတယ်။

မြန်မာဖက်ခြမ်း နယ်စပ်တဝိုက်မှာ စစ်ရေးအခြေအနေတွေ ဆက်လက် တင်းမာနေဆဲ ဖြစ်တာကြောင့် ဘင်္ဂလားဒေ့ရှ်ကလည်း နယ်စပ် ဧရိယာတွေမှာ လုံခြုံရေး တိုးမြှင့်ပြီး တပ်လှန့် စောင့်ကြည့်နေရပါတယ်။ မြန်မာနဲ့ ဘင်္ဂလားဒေ့ရှ်တို့ဟာ ၂၇၁ ကီလိုမီတာ ရှည်လျားတဲ့ နယ်စပ်နဲ့ ပိုင်းခြားထားတာ ဖြစ်ပါတယ်။

ကိုးကား The Hindu