မေး။ဒီကနေ့ယာယီသမ္မတရဲ့ မိန့်ခွန်းမှာပြည်ထောင်စုအသစ်တည်ဆောက်တဲ့အခါ ပဋိပက္ခအသစ်တွေမဖြစ်စေလိုဘူးဆိုတဲ့အပေါ်မှာ အဲဒီလို ပြဿနာ အသစ်တွေ ထပ်မဖြစ်ဖို့ အင်အားစုအသီးသီးကို ဘာ​ပြောလိုပါသလဲ။

ဖြေ။အဓိကကတော့ ကျနော်တို့က အာဏာရှင်စနစ်မှန်သမျှကို လုံး၀ ပျက်သုဉ်းသွားအောင် စုပေါင်း ချေမှုန်းပစ်ရပါမယ်။ အဲဒီနောက်မှာ ကျနော်တို့ ရလိုတဲ့ ရလဒ်တစ်ခု မရသေးခင်မှာ၊ နောက် ရလဒ်ရလာတဲ့အချိန်မှာ ဘယ်လိုပုံစံမျိုးနဲ့ စုပေါင်းညီညွတ်စွာ အတူနေထိုင်သွားကြမယ်ဆိုတဲ့ဥစ္စာကို တချိန်တည်း တပြိုင်တည်း စဉ်းစားထားဖို့လိုအပ်ပါတယ်။ စစ်အာဏာရှင်စနစ်ကို တိုက်ဖျက်နေတယ် ပြောပြီး ကိုယ့်ကိုယ်၌က စစ်ဝါဒကို ပြန်ထူထောင်နေတာမျိုးဆိုရင် အဆင်မပြေဘူးဆိုတာကိုပဲ နိဂုံးချုပ်ပြောလိုပါတယ်။

မေး။လက်ရှိ သုံးနှစ်အတွင်း စစ်ကောင်စီရဲ့ စစ်ရေး၊ နိုင်ငံ
ရေးမှာ သူ့အနေအထား ကိုဘယ်လိုသုံးသပ်ပါလဲ။

ဖြေ။စစ်ကောင်စီကတော့ ကျနော်တို့ အမြင်မှာ အဖက်ဖက်က ကျရှုံးနေတာပေါ့။ ကျဆုံးသွားတဲ့ အဆင့်တော့ မရောက်သေးပါဘူး။ အဖက်ဖက်မှာ သူက ဆုံးရှုံးနေတယ် ကျရှုံးနေတယ်။ သို့သော်လည်းပဲ ကျနော်တို့ပြည်သူလိုလားတဲ့ တန်း
တူညီမျှတဲ့ ဖက်ဒရယ်ဒီမိုကရေစီ ပြည်ထောင်စုသစ် ဖြစ်
ထွန်းဖို့က ကိုယ်လုပ်စရာရှိတဲ့အလုပ်ကို အားလုံးက အချိတ်
အဆက်မိမိ မလုပ်နိုင်ဘူးဆိုရင် ပန်းတိုင်က သူ့အလိုလို နီးလာမှာမဟုတ်ဘူး။ ဒါကြောင့်မို့လို့ ကျနော်တို့ စုဖွဲ့မှု ဒီထက်ပိုကျစ်လျစ်ဖို့လိုအပ်တယ်။ ကျနော်တို့ သွားချင်တဲ့ ပန်းတိုင်ရဲ့အလွန်မှာ မဖြစ်သင့်မဖြစ်ထိုက်တာကို အခုကတည်းက ကြိုတင်ပြီးတော့မှ ပြင်ဆင်ထားသင့်တယ်၊ ညှိနှိုင်းထားသင့်တယ်ဆိုတာလောက်ပဲ ဖြည့်ပြောချင်ပါတယ်။

မေး။စစ်ကောင်စီ ကျရှုံးနေတယ်ဆိုတာ သုံးသပ်ကြတယ်။ တစ်ဖက်မှာလည်း NUGနဲ့ တိုင်းရင်းသားတော်လှန်ရေးအဖွဲ့တွေရဲ့ ဘုံသဘောထားရပ်တည်ချက်မှာ စစ်တပ်အာဏာ
သိမ်းမှုကို ဖယ်ရှားပြီး အာဏာလွှဲပြောင်းရေး အေးအေးချမ်းချမ်းလုပ်သွားနိုင်ဖို့ စစ်ကောင်စီအတွက် လမ်းဖွင့်ပေးထားတဲ့ အနေအထားလည်းရှိတော့ ဒီအခင်းအကျဉ်းကို စစ်ကောင်စီဘက်က လက်ခံနိုင်ဖို့ အပေါ် ဘယ်လိုမြင်လဲ။

ဖြေ။ဒါက ကျနော်တို့လို နိုင်ငံရေးပါတီအစုအဖွဲ့နဲ့တော့ တိုက်ရိုက်မပတ်သက်ဘူး။ သို့သော်လည်းပဲ ၃၁ရက်နေ့ ပဒိုတာဒိုမူး(KNU အထွေထွေအတွင်းရေးမှူးချုပ်)တို့ လေးဖွဲ့ (NUGနှင့် ကရင်၊ ချင်း၊ ကရင်နီအပါအဝင် တော်လှန်ရေးတပ်ဖွဲ့များ)ထုတ်တဲ့ စတိတ်မန့်ထဲမှာတော့ ပါပါတယ်။ ကျနော်တို့က စားပွဲဝိုင်းပေါ်မှာ မဖြစ်မနေ တစ်ရက်တော့ တွေ့ရမယ်လေ။ ဒါပေမဲ့ အဲဒီ စားပွဲဝိုင်း တွေ့ဆုံရေး ပေါ်ပေါက်ဖို့ဆိုရင် စစ်ကောင်စီဘက်ကလည်းပဲ သူ့မှာလိုက်နာရမယ့် စည်းကမ်းတွေရှိတာပေါ့။ တဖက်က ဖြစ်ချင်တာကို အကုန်
လုံးက ပွင့်ပွင့်လင်းလင်းပြောထားပြီးပြီ။ သူ့ဖက်ကလည်း ဖြစ်သင့်တာကို ပြန်ပြီးချိန်ဆဖို့လိုအပ်တာပေါ့။ တစ်ဖက်နဲ့တစ်ဖက် အပြုတ်တိုက်ဖို့ဆိုတာ တိုင်းပြည်စိစိမွှမွှကြေရုံပဲရှိမယ်၊ လူငယ်တွေရဲ့ အနာဂတ်ပျောက်ရုံပဲ ရှိမယ်။ ဆိုတော့ အဲဒီ အခြေအနေမျိုး မရောက်ခင် နှစ်ဖက်စလုံးက အနာဂတ်ကို ရည်မှန်းပြီးတော့မှ တွေ့ဆုံဆွေးနွေးဖို့ ဆိုတာမျိုးကတော့ အဲဒီလမ်းကြောင်းပေါ်အောင်တော့ ကြိုးစားဖော်ဆောင်ရပါမယ်။ ။

ငွေစက္ကူရိုက်နှိပ်ထုတ်ဝေသော ဝါဇီစက်ရုံရှိ စစ်တပ်အား PDF လေးဖွဲ့က ပစ်ခတ်တိုက်ခိုက်

ဟာနာဆန်/People's Spring

မကွေးတိုင်း၊ ပခုက္ကူမြို့နယ်နှင့် ချောက်မြို့နယ်စပ်ရှိ ငွေစက္ကူရိုက်နှိပ်ထုတ်ဝေသော ဝါဇီစက်ရုံမှ စစ်ကောင်စီတပ်အား PDF အဖွဲ့လေးဖွဲ့ခွဲကာ ပစ်ခတ်တိုက်ခိုက်ခဲ့ကြောင်း သိမ်းငှက်နက် ဆိပ်ဖြူတော်လှန်ရေးတပ်ဦး Black Hawk Seikphyu Revolution Front၏ တာဝန်ရှိသူက ပြောသည်။

ဖေဖော်ဝါရီ ၁၃ ရက် ည ၁၀ နာရီခန့်က ငွေစက္ကူထုတ်ဝေရာ ဝါဇီစက်ရုံ (လုံခြုံရေးနှင့် သက်ဆိုင်သော ပုံနှိပ်လုပ်ငန်းများစက်ရုံ- လ.န.စ)အား Short Range Missile ၂၇လုံး၊ ဒရုန်းများဖြင့် ပစ်ခတ်တိုက်ခိုက်ခဲ့ကြောင်း သိမ်းငှက်နက် ဆိပ်ဖြူတော်လှန်ရေးတပ်ဦး- BHSRF၏ တာဝန်ရှိသူက ပြောသည်။

ပထမခံစစ်စည်းဖြစ်သော ချိုက်​ကျေးရွာရှိ လက်နက်ကြီးစခန်းအား DROP BOMB ခြောက်လုံးဖြင့်လည်းတစ်ပြိုင်တည်း တိုက်ခိုက်ခဲ့ပြီး လည်ကျင်းကျေးရွာအနီးရှိ လက်နက်ကြီးအထိုင်နှင့် ကင်းပုန်းများကိုလည်း အလစ်အငိုက်တိုက်ခိုက်ခဲ့ကြောင်း ဒေသကာကွယ်ရေးအဖွဲ့များက ပြောသည်။

တိုက်ခိုက်မှုများကြောင့် စစ်ကောင်စီတပ်​၏ ထိခိုက်ပျက်စီးမှုများရှိကြောင်း သိမ်းငှက်နက် ဆိပ်ဖြူတော်လှန်ရေးတပ်ဦး- BHSRF၏ တာဝန်ရှိသူက ပြောသည်။

"ဝါဇီထဲကျပါတယ်။ ချိုက်ကျေးရွာဆိုတာ ဝါဇီစက်ရုံရဲ့ အနောက်တည့်တည့် ၂မိုင်အကွာက ရွာပါ။"ဟု ၎င်းတာဝန်ရှိသူက ပြောသည်။

အဆိုပါ စစ်ဆင်ရေးအား သိမ်းငှက်နက် ဆိပ်ဖြူတော်လှန်ရေးတပ်ဦး- BHSRF၊ မကွေးတိုင်း ပြည်သူ့ကာကွယ်ရေးအဖွဲ့ Droneလက်ရုံးတပ်ဖွဲ့နှင့် ညီနောင်မဟာမိတ်များဖြစ်ကြသော ပခုက္ကူခရိုင် အမှတ်(၈) တပ်ရင်း၊ တပ်ခွဲ (၁)တို့ပူးပေါင်းကာ တိုက်ခိုက်ခဲ့ခြင်းဖြစ်သည်။

"၁၄ရက်နေ့ ညနေ ဆိပ်ဖြူယော၀သင်္ချိုင်းမှာ ဝါဇီမှာတာ၀န်ကျတဲ့ စခ ၁၀လောင်းလာ သင်္ဂြိုလ်တယ်တဲ့။ အထိအခိုက်များလို့ Complain တက်ကြတယ်။ဝါဇီထဲမှာ ခွေးချင်းကိုက်ကုန်ကျပြီ။"ဟု ဒေသကာကွယ်ရေးရဲဘော်တစ်ဦးက ပြောသည်။

ဖြစ်စဥ်နှင့်ပတ်သက်၍ စစ်အုပ်စုထိခိုက်မှုအခြေအနေအား လူထုနွေဦးက သီးခြားအတည်ပြုနိုင်ခြင်း မရှိသေးပေ။

ဝါဇီစက်ရုံကို ပြီးခဲ့သည့် ၂၀၂၃ကလည်း ဒေသကာကွယ်ရေးအဖွဲ့များက တိုက်ခိုက်ခဲ့သေးသည်။

(တိုက်ခိုက်ရာတွင်အသုံးပြုခဲ့သော လက်နက်များအားတွေ့ရစဥ်။ ဓာတ်ပုံ-ဒေသတွင်းတော်လှန်ရေးအင်အားစု)

▪︎​ဆောင်းပါး

စစ်ပွဲအရှုံးကို လူမျိုးရေးပဋိပက္ခဖြင့်
ဖုံးကွယ်ရန်ကြိုးစား​နေ​သောစစ်​ကောင်စီ

အင်ကြင်း၊ယောနသံ /People's Spring

ရခိုင်ပြည်နယ်တိုက်ပွဲများတွင် စစ်ရှုံး၍ မြို့ ၅ မြို့ နှင့် စစ်သင်္ဘောများဆုံးရှုံးပြီး​​နောက် စစ်​ကောင်စီက AAကိုယှဥ်မတိုက်နိုင်​သောအခါ လူမျိုး​ရေး ပဋိပက္ခများဖန်တီးရန်ကြိုးစားလာသည်။

၁၀၂၇ စစ်ဆင်​ရေးတွင် စစ်ရှုံးပြီး​နောက်စစ်​ကောင်စီက
ကိုးကန့်​ဒေသစစ်ပွဲမှာမျိုးနွယ်စုချင်းဖြစ်ပွား​သောပြသာနာဟုလည်း​ကောင်း ၊ ကိုးကန့်တပ် MNDAA သည် ဘုရားများကိုလိုက်လံဖျက်ဆီးသည်ဟုလည်း​ကောင်း ၊TNLA ကိုလည်း ဘုရားဌာပနာများ​ဖောက်ထွင်းသည်ဟုလည်း​ကောင်း ၊ ​မြောက်ပိုင်းမဟာမိတ်ညီ​နောင်သုံးဖွဲ့နှင့်အတူ တရုတ်စစ်သားများကပါပူး​ပေါင်းတိုက်ခိုက်​နေသည့် ပြည်ပကျူး​ကျော်စစ်ပွဲဟုလည်း​ကောင်း မျိုးစုံဇာတ်လမ်းဆင်ဝါဒဖြန့်ခဲ့​သော စစ်​အုပ်စုသည် ရခိုင်​ဒေသတိုက်ပွဲအတွက် ဇာတ်လမ်းတစ်ပုဒ်ဖန်တီး​လာကြပြန်သည်။ စစ်အုပ်စု ၊စစ်တပ် သြဇာခံ အမျိုးသား​ရေးအစွန်းအုပ်စုများ ​မကြာခဏ ဖန်တီး​လေ့ရှိသည့် လူမျိုး​ရေးပဋိပက္ခဖန်တီးရန် ကြိုးစားလာကြခြင်းဖြစ်ပါသည်။

ယခုရက်ပိုင်းတွင် စစ်​ကောင်စီနှင့် ဘာသာ​ရေးအစွန်း​ရောက်မဘသများက ရန်ကုန်နှင့် မန္တလေးမြို့ပေါ်တွင် ရခိုင်ဆန့်ကျင်ရေး စာရွက်များ မြို့အနှံ့ လိုက်ကပ်နေပြီး လူမျိုးရေးပဋိပက္ခဖြစ်အောင် အရှိန်မြှင့် ဖန်တီးလာကြသည်။

ဖေဖော်ဝါရီလ ၁၂ ရက် နံနက်ပိုင်းက မန္တလေးမြို့လယ်ရှိ ၃၅ လမ်းကုန်းကျော်တံတား၊ ၄၁လမ်းကုန်စိမ်းညစျေးအပါအဝင် စျေးများ၊ လူစည်ကားရာလမ်းမများ၊ ဓာတ်တိုင်များ၌ စစ်တပ်​ထောက်ခံသူနှင့်မဘသများက ရခိုင်လူမျိုးများအား လူမျိုးရေးခွဲခြားပြီး ခြိမ်းခြောက်ထားသည့် စာရွက်စာတန်းများအား လိုက်ကပ်လာကြောင်း မန္တလေးမြို့ခံများက ပြောသည်။

အဆိုပါစာရွက်များတွင် "ပြည်သူတွေအနေနဲ့ မန္တလေးမြို့ပေါ်က ရခိုင်စားသောက်ဆိုင်နှင့် အရောင်းဆိုင်တွေကို သွားရောက်ဝယ်ယူခြင်းမပြုရန် သတိပေးတားမြစ်လိုက်သည်"၊ "ရခိုင်ဆိုင်တွေမှန်သမျှ မန္တလေးမြို့ပေါ်ကထွက်သွားကြ"၊ "ရက်စက်ယုတ်မာတဲ့ AA အကြမ်းဖက်သမားတွေကို ဆန့်ကျင်သည့်အနေဖြင့် မန္တလေးမြို့ပေါ်က ရခိုင်ဆိုင်မှန်သမျှကို ဝယ်ယူစားသောက်အားပေးခြင်း ရှောင်ကျဥ်ကြပါ"၊ "လူမျိုးရေးဝါဒစွဲပြင်းထန်ပြီး အစွန်းရောက်နေတဲ့ ရခိုင်စားသောက်ဆိုင်နှင့် အရောင်းဆိုင်တွေ အခုချက်ချင်းပိတ်သိမ်းပါ" အစရှိသည့်စာသားများရေးသားထားသည်။

အဆိုပါ လှုံ့​ဆော်မှုများနှင့် ပတ်သပ်၍ မန္တလေးမြို့ခံတစ်ဦးက"ဘာမှမဆိုင်ဘူး။ လူမျိုးရေးနဲ့လွှဲချနေတာ"ဟု ပြောသည်။

ထိုစာသားတိုင်း၏ အောက်ခြေ၌ မန္တလေးမြို့သူမြို့သားများဟု အလွဲသုံးစားလုပ်ကာ ပြည်သူချင်းပါ ရန်တိုက်ပေးနေသည်ဟု မန္တလေးမြို့ခံများက ပြောသည်။ မန္တ​လေးမြို့ခံပြည်သူများမှာ မည်သူမျှ ထိုသို့မလုပ်ဘဲ စစ်​ကောင်စီ စစ်မှုထမ်းဥပ​ဒေ​ကြောင့် ပြည်သူများမှာ​ပေါ်တာဆွဲခံရမည့်စိုး၍ ညပိုင်းအပြင်ထွက်သူနည်းချိန်တွင် ထိုစာများကပ်သူများမှာစစ်​ကောင်စီသာဖြစ်​ကြောင်း မြို့ခံပြည်သူများက​ပြောသည်။

ဖေဖော်ဝါရီလ ၁၃ ရက်နေ့ နံနက်ပိုင်းတွင် ရန်ကုန်မြို့ပေါ်ရှိ လူစည်ကားရာနေရာများနှင့် ရခိုင်ရိုးရာစားသောက်ဆိုင်များ၊ လူသိများ​​သော​ဈေးဆိုင်များရှေ့တွင်လည်းအလားတူစာသားများ လိုက်လံကပ်၍ လူမျိုး​ရေး ပြသာနာဖန်တီး​နေသည်ကို​တွေ့ရသည်။

"ဗိုလ်ချုပ်ထွန်းမြတ်နိုင်တို့ AAက စစ်တပ်ကို တိုက်တာတွေအရမ်းကိုအားကျနေတာပါ။မန်းလေးကဖြင့်။ကျမတို့ရပ်ကွက်တင်မဟုတ်ဘူး။ အနယ်နယ်က သဘောကျနေတာပါ။စာကပ်လည်းအရေးစိုက်မှာ ဟုတ်ပါဘူး" ဟု မန္တ‌လေးမြို့ခံတဦးက သူ့ခံစားချက်ကို​ပြောသည်။

စစ်အုပ်စုသည် ရခိုင်ပြည်နယ် တွင် စစ်ရှုံးပြီး မြို့ ​လေးမြို့ကို ရက်ပိုင်းအတွင်းဆုံးရှုံးခဲ့ရကာ စစ်သဘာ်များကိုပင် တိုက်ခိုက်​ချေမှုန်းခံ​နေရသည် ကို ဝန်မခံဘဲ လူမျိုး​ရေးပြသာနာများ ဖန်တီး​နေခြင်းဖြစ်သည်။ အထူးသဖြင့် ကျောက်တော်မြို့၌ ဖေဖော်ဝါရီလ ၇ ရက်နှင့်၈ရက်က ဖြစ်ပွားခဲ့သည့်ရေကြောင်းတိုက်ပွဲ၌ ​ခေတ်မီလှသည်ဟု အစဥ်တစိုက်ဝါဒ
ဖြန့်ခဲ့​သော ​ရေတပ်မှ စစ်သ​ဘော် ၃ စီးကို AAကတိုက်ခိုက်​ချေမှုန်း​ရေနစ်ခဲ့သည့်အ​ပေါ် ကြိတ်မနိုင်ခဲမရဖြစ်ခဲ့ပုံရသည်။

အရှုံးကို ဝန်မခံဘဲ ​စစ်သ​ဘော်​ပေါ်မှ တိုက်ခိုက်ခံရ၍ ကမ်း​ခြေ၌ ​ရေကူး​​လာသူများကို ​ဒေသခံများက ဓါးဖြင့် ခုတ်သတ်သည်ဟုလည်း​ကောင်း ၊ က​လေးနှင့် အမျိုးသမီးများကိုပါ မချန် AA က​တိုက်ခိုက် ​ချေမှုန်းခဲ့သည်ဟုတစ်ဖုံ လုပ်ကြံဖန်တီးထား​​​သော ဇာတ်လမ်းမျိုး စုံဖြင့် လူမျိုးရေးပဋိပက္ခဖြစ်လာရန်လူမှုကွန်ယက်တွင် အင်နှင့်အားနှင့် လှုံ့​ဆော်ဝါဒဖြန့်ကြသည်။

အ​စောပိုင်းတွင် စစ်​ကောင်စီဝါဒဖြန့် တယ်လီဂရန်များနှင့် စစ်တပ်​ထောက်ခံသူများ၏ ပစ်မှတ်မှာ​ ​ရေကူး၍ ကမ်း​ခြေ​ရောက်လာသူများကို သတ်သည်ဆိုကာ ဒေသခံပြည်သူများကိုဖြစ်သည်။ သို့​သော် ​မြေပြင် အ​ခြေအ​နေ သိ​သောပြည်သူများက တိုက်ပွဲအပြင်းအထန်ဖြစ်ပွား​နေ​သောထို​နေရာ၌ ​ဒေသခံပြည်သူများမရှိဘဲ စစ်တပ်ရန်​ကြောက်၍ အ​စောကတည်းကထွက်​ပြေး​နေကြရ​​ကြောင်း​​ရေးသားရှင်းပြကြသည်။

"​ရေမြှပ်တဲ့ သ​ဘော်က​နေပဲ ကမ်းကိုအရင်​ရောက်​အောင်ကူးကြည့်ပါဦး ။ ဒီ​လောက်​ရေစီးသန်တဲ့မြစ်ကို ​တော်ယုံ​ရေးကူးကျွမ်းကျင်တဲ့လူ အသာထား ၊မိန်းမ​တွေက​လေး​တွေကူးတယ်ဆိုတာဘယ်လိုမှ မဖြစ်နိုင်။ စစ်ဖြစ်တာနဲ့ အဲနားကရွာကလူ​တွေအကုန် ​ပြေးကြတာ ။​နေဗီလက်နက်ကြီးနဲ့ ရမ်းသမ်းပစ်လို့ ။စစ်​ရေယာဥ်ကို လုံခြုံ​ရေးယူ​ပေးတဲ့ ရဟတ်
ယာဥ်​တွေပါတာကို အဲနားကရွာကလူ​တွေက ဓါးနဲ့ခုတ်နိုင်ပါ့မလား ။စဥ်းစား​ပေါ့"ဟု ​ဒေသအ​ခြေအ​နေသိ​​သောပြည်သူတစ်ဦးက​ရှင်းပြသည်။

ထို​​​​​နောက်ပိုင်းတွင် စစ်​ကောင်စီ​ဝါဒဖြန့်အ​ကောင့်များက AA တပ်ဖွဲ့ဝင်များက စစ်သင်္ဘော​ပေါ်ပါ အမျိုးသမီးနှင့်က​လေးငယ်များကိုပါ တိုက်ခိုက်​ချေမှုန်းသည်ဟု အသား​​ပေး၍ဝါဒဖြန့်​နေကြပြန်သည်။​ AA က​ကျောက်​တော်မြို့ရှိ စစ်​ကောင်စီတပ်စခန်းများကို ဇန်နဝါရီလကတည်းက အပြင်းအထန်ထိုးစစ်ဆင်တိုက်ခိုက်ခဲ့ခြင်းဖြစ်ပြီး တိုက်ပွဲပြင်းထန်​သော​နေရာများတွင် ၊ စစ်ဆင်​ရေးလုပ်​သော
စစ်သင်္ဘောများ​ပေါ်တွင် က​လေးငယ်နှင့် အမျိုးသမီးများပါသည်ဆိုခြင်းမှာ မဟုတ်ဘဲ ၊တိုက်ပွဲများမပြင်းထန်ခင်ကတည်းကစစ်​ကောင်စီ မိသားစုဝင်များကို​ဘေးကင်းရာသို့ ပို့​ဆောင်​ပေး​လေ့ရှိ​ကြောင်း စစ်​ရေးအရင်းအမြစ်များက​ပြောသည်။

ထို့​ကြောင့် တိုက်ပွဲတွင် စစ်ရှုံးသည်ကို စစ်ရှုံး​ကြောင်းဝန်မခံဘဲ ဇာတ်နာ​အောင်ဇာတ်လမ်းမျိုးစုံထွင်၍ လူမျိုး​ရေးပြသာနာဖန်တီး​နေခြင်းမှာ သူရဲ​ဘော​ကြောင်​သောလုပ်ရပ်ဖြစ်​ကြောင်း အထက်ပါစစ်​ရေးရင်းမြစ်များက​ပြောသည်။

AAက ​မြောက်ဦး ၊​ကျောက်​တော် ၊မင်းပြား အပါအဝင်ရခိုင်ပြည်နယ်ရှိ စစ်​ကောင်စီတပ်စခန်းများကို တိုက်ခိုက်သိမ်းပိုက်မည်ဟုစစ်​ကြေညာကာတိုက်ခဲ့ခြင်းဖြစ်သည်။ထို​ကြောင့်အသက်မ​သေလိုပါက လက်နက်ချ ကြရန် အကြိမ်ကြိမ်​ကြေညာပြီးထိုးစစ်ဆင်ခဲ့ခြင်းဖြစ်သည်။

AAက ရေကြောင်းတိုက်ပွဲသတင်းကို ​ဖေ​ဖော်ဝါရီ ၁၁ ရက်ည ထုတ်ပြန်သည်။စစ်ကောင်စီ၏ စစ်သင်္ဘော နှစ်စီး၊ ဇက်သင်္ဘောတစ် စီးတို့အား ကျောက်တော်မြို့နယ်၊ အပေါက်ဝရွာအနီး၌ အပြတ်အသတ် တိုက်ခိုက်နိုင်ခဲ့ပြီး သုံးစီးစလုံးအား ရေထဲနစ်မြုပ်အောင် ​ချေမှုန်းနိုင်ခဲ့သည်ဟု ​ဖော်ပြသည်။ စစ်သင်္ဘောသုံးစီးအပြင် နောက်ထပ်အထိနာအောင် တိုက်ခိုက်ခဲ့သော စစ်သင်္ဘော လေး စီးအထိ ရှိခဲ့သည်ဟု AAက အတိအလင်းအသိ​ပေးသည်။

ထိုတိုက်ပွဲ၌ စစ်သင်္ဘောသုံးစီးစလုံးသည် ချက်ကောင်းကိုထိ၍ အထိနာခဲ့ကြောင်း၊ သင်္ဘောများ စင်းလုံးပြတ် နစ်မြုပ်ကာနီးအချိန်တွင် လက်နက်ချ အညံ့ခံ အလံဖြူထောင်ရန် လော်စပီကာများဖြင့် သုံးကြိမ်တိုင် ပြောကြားခဲ့သော်လည်း နားထောင်ခြင်းမရှိဘဲ တန်ပြန်ခုခံတိုက်ခိုက်နေသေးသည့်အပြင် လေကြောင်းမှ ဒရော့ဗုံးများဖြင့် အပြင်းအထန်ခုခံကာကွယ်ရန် ကြိုးစားခဲ့ကြောင်း၊ သင်္ဘောသုံး စီးပေါ်တွင် လိုက်ပါလာသောသူများ အသက်ချမ်းသာရာရရှိမည့် အခွင့်အရေးအဖြစ် နောက်ဆုံးအကြိမ် အချိန် မိနစ်၃၀ ထပ်ပေးသည့်အချိန်တွင်လည်း စစ်ကောင်စီက ဒရော့ဗုံးများဖြင့် စုပြုံပစ် လာရောက်တိုက်ခိုက်နေခဲ့သောကြောင့် AAတပ်ဖွဲ့ဝင် ဆယ်ဦး ကျော်ထိခိုက်ဒဏ်ရာရခဲ့ပြီး ကျဆုံးသူအချို့ရှိခဲ့သည်ဟု အသိပေးထားသည်။

"လက်နက်ချအညံ့ခံရန် ပြောကြားသည်ကို နားထောင်ခဲ့ပါက သင်္ဘောပေါ်ပါလာသောသူများမှာ အသက်ချမ်းသာခွင့် ရရှိကြမည်ဖြစ်သည်။ အမှန်တကယ်လည်း အဆိုပါဖြစ်စဉ်၌ အသက်မသေဘဲ ရေကူးလွတ်မြောက်လာသောသူများစွာတို့အား မိမိတို့မှ ကယ်တင်ထားနိုင်ခဲ့သည်။ ဤကဲ့သို့ ကယ်တင်ရာတွင် အာရက္ခစစ်သည်တစ်ဦး အသက်ဆုံးရှုံးခဲ့ရသည်" ဟု ထုတ်ပြန်ထားသည်။

သို့​သော် ကယ်ဆယ်ထားသူအရေအတွက်ကို AAကမထုတ်ပြန်သေးပေ။

စစ်ကောင်စီ၏‌ ရေတပ်စစ်သင်္ဘော (Navy) ၊ ဇက်သင်္ဘောများသည် ၎င်းတို့ချီတက်ရာလမ်းကြောင်း တစ်လျှောက်ရှိ မြစ်၊ ချောင်း နံဘေးရှိ ကျေးရွာများအား စစ်သင်္ဘောများပေါ်မှ လက်နက်ကြီး၊ လက်နက်ငယ်များဖြင့် ရမ်းသန်းပစ်ခတ်ခြင်း၊ တမင်တကာရည်ရွယ်ချက်ရှိရှိ နေ့၊ ည အချိန်မရွေး ပစ်ခတ်တိုက်ခိုက်ခြင်းများကို နှစ်ရှည်လများပြုလုပ်လာခဲ့သည့် မှတ်တမ်းများ ရှိခဲ့သည်ဟုလည်းအသိ​ပေးသည်။ ယခုအကြိမ်တ့င်လည်း ယခင်နည်းတူ ရပ်ရွာများအတွင်းသို့ ပစ်ခတ်တိုက်ခိုက်ခြင်းများကို ပြုလုပ်ခဲ့သည်။ ထို့ကြောင့် အရပ်သားပြည်သူလူထုများ သေဆုံးမှု၊ ထိခိုက်ဒဏ်ရာရမှုများမှာ နေ့တိုင်းရှိခဲ့သည်။ ထို​ကြောင့် ​ဒေသခံပြည်သူလူထုအား နေ့စဉ် သတ်ဖြတ်နေသော စစ်ကောင်စီ၏ရေတပ်အား လက်တုံ့ပြန်ခဲ့ခြင်းလည်း ဖြစ်သည်ဟု ​ရေ​ကြောင်းတိုက်ပွဲ
နှင့်ပါတ်သပ်၍ တရားဝင်ထုတ်ပြန်သည်။

စစ်​ကောင်စီတပ်သည် ရက္ခိုင်ဒေသတိုက်ပွဲများတွင် ရေတပ်ကို အလေးထားအသုံးပြုပြီး တိုက်ခိုက်ခဲ့သော်လည်း ရက္ခိုင့်တပ်တော်မှ စစ်တပ်၏ ရေတပ်အား အကောင်းဆုံးတုံ့ပြန်တိုက်ခိုက်နိုင်ခဲ့သည်ခြင်းဆက်လက်၍လည်း လက်နက်ချအညံ့ခံရန် ပြောကြားထားသော ရန်သူ့စစ်စခန်းများအနေဖြင့် အချိန်မီ လက်နက်ချအညံ့ခံရန် ထပ်မံအသိပေးလိုက်သည်ဟုလည်း AA က​ကြေညာထားသည်။

" ရက္ခိုင့်တပ်တော်၏သမိုင်းတွင် ဖေဖော်ဝါရီလ (၈) ရက်နေ့သည် အာရက္ခ ရေပြင်ထက်တွင် ရန်သူ့သင်္ဘောများအား အလဲထိုးပြီး အောင်ပွဲရယူနိုင်ခဲ့သော နေ့တစ်နေ့ဖြစ်ခဲ့သည်"ဟု AAကထုတ်ပြန်ထားသည်။

ထိုအပြင် ​ဖေ​ဖော်ဝါစီ ၁၂ ရက် ကလည်း မင်းပြားမြို့နယ်တွင် စစ်​ကောင်စီတပ်၏ ​သဘာ်တစ်စင်းကိုထပ်မံ တိုက်ခိုက်နစ်မြှပ်ခဲ့​ကြောင်း ​ဖေ​ဖော်ဝါရီ ၁၃ တွင်ထပ်မံထုတ်ပြန်လာသည်။

စစ်​ကောင်စီက​မူ စစ်ရှုံးမှုအ​ပေါ် တစ်ခွန်းမျှမ​ပြောဘဲ လူမျိုး​ရေအဓိကရုဏ်းဖြစ်ရန်၊ စစ်ပွဲအရှုံးအ​ပေါ်အာရုံ​ပြောင်းရန် သာ လှုံ့​ဆော်စာများဖြန့်​ဝေခြင်းအလုပ်များ​နေသည်ကို​တွေ့ရသည်။

ထို​ကြောင့်စစ်ကောင်စီက ယခုရက်ပိုင်း ဇောင်းပေးဖော်ပြနေသည့် လူမျိုးရေးနှင့် ဘာသာရေးအခြေပြုဝါဒမှိုင်းကို သတိပြုရန် ပြည်သူအချင်းချင်းကသတိပေးနေကြသည်။

​ဖေ​​ဖော်ဝါရီ ၁၅ ရက်တွင်မူ စစ်သ​ဘော်နစ်မြှပ်၍ ကုလာတန်မြစ်အတွင်း​ ​ရေကူး​နေကြ​သော စစ်​ကောင်စီတပ်သားများကို AA တပ်ဖွဲ့ဝင်များက စက်​​လှေဖြင့် လိုက်လံဆယ်ယူ​နေ​သောရုပ်သံဖိုင်များ ရခိုင်ပြည်သူ အချို့၏ ဖေစ်ဘွခ်များမှတစ်ဆင့် ပြန့်နှံလာသည်။ ကုလာတန်မြစ်အတွင်း​ရေကူး​နေသူများကို စက်​လှေဖြင့် လိုက်ဆည်​နေ​သောရုပ်သံမှတ်တမ်းများက ယခုဖြစ်စဥ်တွင်မည်သူက လိမ်ညာ၍ ၊မည်သူက အမှန်​ပြောသည်ကို ထင်ရှား​စေသည်။AA က နစ်မြှပ်စစ်သ​ဘော်များမှ စစ်​ကောင်စီတပ်သားမည်မျှကို ကယ်တင်ခဲ့​ကြောင်းသတင်းမထုတ်ပြန်​သော်လည်း ရုပ်သံမှတ်တမ်းတွင် ​ရေနစ်ရာမှကယ်တင်ထားသူ ဆယ်ဂဏန်း​ရှိသည်ကို​တွေ့ရ၏ ။ ရခိုင်စစ်​ရေးသတင်းအမြစ်အဆိုအရ AA တပ်ဖွဲ့ဝင်များကယ်တင်ခဲ့သူများတွင် စစ်​ကောင်စီတပ်မှ အရာရှိအချို့ပင် ပါဝင်​ကြောင်းသိရသည်။

ရန်ကုန်မြို့မှ မြို့ပြ​ပြောက်ကျားရဲ​ဘော်တစ်ဦးက "အရင်လဲ
စစ်တပ်က ဒါမျိုး လူမျိုးရေးမှိုင်းတိုက်တာတွေ လုပ်ဖူးပါတယ်။ အခုခတ်မှာတော့ ဒါတွေလုပ်လို့ မရတော့ပါဘူး။ ပြည်သူတွေအနေနဲ့ ဒါကို မယုံဘဲ ဘုံရန်သူ စစ်ကောင်စီကိုပဲ ဆန့်ကျင်ဖို့ လိုအပ်ပါတယ်" ဟု​ပြောပါသည်။ ။

စစ်သ​ဘော်နစ်မြှပ်၍ ကုလာတန်မြစ်အတွင်း​ ​ရေကူး​နေကြ​သော စစ်​ကောင်စီတပ်သားများကို AA တပ်ဖွဲ့ဝင်များက စက်​​လှေဖြင့် လိုက်လံဆယ်ယူ​နေ​စဥ်။ဓါတ်ပုံ-CJ

YDF ရဲဘော်နှစ်ဦးအပါအဝင် ပြည်သူများ သတ်ဖြတ်မှုကို နိုင်ငံတကာက အရေးယူပေးရန် ဂျပန်ရောက်မြန်မာများ တောင်းဆို

သုည/People's Spring

ဂျပန်နိုင်ငံ တိုကျိုမြို့ရှိ ကုလသမဂ္ဂရုံးရှေ့တွင် ပြည်ပရောက်မြန်မာများ စုပေါင်း၍ YDF ရဲဘော် နှစ်ဦး အပါအဝင် ပြည်သူများကို စစ်တပ်က ရက်ရက်စက်စက် သတ်ဖြတ်မှုကို နိုင်ငံတကာက အရေးယူပေးရန် ယနေ့ (ဖေဖော်ဝါရီ ၁၅) တောင်းဆို ဆန္ဒပြခဲ့ကြသည်။

ဆန္ဒပြမြန်မာများက ဂန့်ဂေါမြို့နယ် မြောက်ခင်ရန်းရွာမှ PDF ရဲဘော်နှစ်ဦးကို မီးရှို့သတ်ဖြတ်မှု အပါအဝင် မြန်မာပြည်သူများအပေါ် အာဏာသိမ်းစစ်ကောင်စီ၏ မတရား အကြမ်းဖက် သတ်ဖြတ်မှုကို ကုလသမဂ္ဂ အပါအဝင် နိုင်ငံတကာက အရေးယူပေးရန်အတွက် တောင်းဆိုခဲ့ကြသည်။

ထို့အပြင် လက်ရှိ မြန်မာပြည်သူများ ရင်ဆိုင်နေရသည့် အခြေအနေများကို ကုလသမဂ္ဂအတွင်းရေးမှူးချုပ် အန်တိုနီယိုဂူတာရက်စ်ဆီ ပေးပို့သည့် တောင်းဆိုစာကိုလည်း ဂျပန်ကုလသမဂ္ဂရုံးထံ ပေးပို့ခဲ့သည်။

ဓာတ်ပုံ - CJ

▪︎​ဆောင်းပါး

ပညာသင်ရင် အသက်စတေးနေရတဲ့ နိုင်ငံ

-ရဲ​ခေါင်/People's Spring

ရွာအပြင်ရှိ ငါးကန်ရောက်ရှိနေသော ဦးမောင့်မြင့်တစ်ယောက် ပေါက်ကွဲသံများကြား၍ ရွာအတွင်းသို့ အပြေးပြန်လာခဲ့သည်။ ပေါက်ကွဲမှုဖြစ်ရာနေရာလှမ်းကြည့်တော့ စာသင်ကျောင်းဖြစ်နေ၍ စိုးရိမ်တကြီး အမြန်​​​​​ပြေး​လေသည်။

ပြန့်ကြဲနေသော အပိုင်းအစများကြား ပထမဆုံးတွေ့ရှိသည့် သေဆုံးနှင့်ဒဏ်ရာရ ကလေးငယ်များအား အပြင်ဆွဲထုတ်၍ ကယ်ဆယ်လိုက်ပါသည်။ စစ်ကောင်စီဗုံးကြဲတိုက်ခိုက်သော ကျေးရွာစာသင်ကျောင်းတွင် ဦး​မောင်မြင့်၏ သားငယ်ဖြစ်သူလည်း ပညာသင်ကြား​​နေ၏။ထို့ကြောင့် သားငယ်​လေး​ဘေးကင်းပါ​စေဟုဆု​တောင်းမိသည်။ အပျက်အစီးများကြား ဒဏ်ရာရက​​လေးငယ်နှင့် ​သေဆုံး​နေ​သောက​လေးငယ်များကို အမြန်​ရှာ​​ဖွေရင်းသားဖြစ်သူဖြစ်​လေမလား ရင်တထိတ်ထိတ်ဖြင့် ကြည့်ရှု​နေသည်။

သို့​သော် ဦး​မောင်မြင့်ဆု​တောင်းမပြည့်ခဲ့ပါ ။

"ခေါင်းတစ်ဝက်မပါတဲ့ ကလေးတွေ။တခြား ထိထားတဲ့ကလေးတွေ သယ်ပြီးတဲ့အချိန် အပြင် ရောက်လို့ စစ်ကြည့်မှ ကျွန်တော့်သားဖြစ်နေတယ်။ကျွန်တော်တောင်မမှတ် မိတော့ဘူး။သူ့မျက်နှာက ပေနေတာ။လက်တစ်ဖက်လည်း မရှိတော့ဘူး။ခြေထောက်တစ်ဖက်လည်းမရှိတော့ဘူး ဗိုက်လဲ တစ်ဝက်ပဲကျန်တော့တာ"ဟု ဦးမောင်မြင့်က အသက် ၁၄ နှစ်အရွယ် သားဖြစ်သူကို ပြန်​တွေ့ရ​သောအ​ခြေအ​နေကို
ဆို့နင့်စွာဖြင့် ဖွင့်ဟသည်။

ကရင်နီပြည်နယ်၊ဒီးမော့ဆိုမြို့ အနောက်ဘက်ခြမ်းရှိ ဒေါဆီအီနှင့် လွိုက်နန်ဖ ကျေးရွာတွင် ကိုယ်ထူကိုယ်ထဖွင့်လှစ်ထားကလေးငယ်များပညာသင်ကြားနေသော စာသင်
ကျောင်းနှစ်ကျောင်းကို စစ်ကောင်စီက ဖေဖော်ဝါရီ ၅ရက် နံနက် ၁၀နာရီတွင် တိုက်လေယာဉ်နှစ်စင်းဖြင့် ပေါင် ၅၀၀ဗုံးကြဲခဲ့သည့်အပြင် လက်နက်ကြီးများဖြင့်ပါ
တပြိုင်တည်း ပစ်ခတ်တိုက်ခိုက်ခဲ့ခြင်း ဖြစ်ပါသည်။

ထိုသို့ ပစ်ခတ်တိုက်ခိုက်မှုကြောင့် အသက် (၁၂)နှစ်မှ (၁၄)နှစ်အရွယ်အတွင်း ကလေးငယ် လေးဦးနှင့် (၃၅)ရွယ် အရပ်သားပြည်သူ တစ်ဦး စုစုပေါင်း ငါးဦးသေဆုံးခဲ့ရပြီး ၁၅ဦးထက်မနည်း ဒဏ်ရာရရှိခဲ့သည်။

လေယာဉ်ဖြင့် ဗုံးကြဲတိုက်ခိုက်၍ ဗုံးခိုကျင်းအတွင်း ကလေးငယ်များနှင့် ပုန်းခိုနေသော ဆရာမမှာ အပြင်သို့ထွက်လာချိန်တွင် စာသင်ကျောင်းမှာ လုံးဝပျက်စီးနေပြီဟု အဆိုပါဒေါဆီးအီကျေးရွာ စာသင်ကျောင်းမှ ကျောင်းဆရာမ တစ်ဦးက ပြောသည်။

"အဆောင်တွေအကုန်လုံးက ပျက်စီးတာကိုတွေ့တော့ ကျွန်မက မနေနိုင်တော့ဘူး။ကျွန်မကလေးတွေအကုန်သေတော့မှာပဲ ဆိုပြီး ပတ်ဝန်းကျင်မှာရှိတဲ့ မိဘတွေရော ပြီးတော့ အသံကြားပြီးတော့ လာရောက်ကြည့်ရှုပေးတဲ့ ညီအစ်ကိုမောင်နှမတွေလည်းရှိတယ်။သူတို့ကို အကူအညီတောင်းပြီးတော့မှ အဆောင်ပြိုကျတဲ့နေရာမှာ ကလေးတွေကို သွားကြည့်ပေးဖို့ ခွင့်တောင်းရတယ်"ဟု အဆိုပါ ဆရာမက ပြောသည်။

ဆရာမက ဆက်လက်၍ "စာသင်ခန်းထဲမှာ ရှစ်တန်းကလေးတွေကို စာသင်နေတဲ့အချိန်မှာ အရမ်းအော်ဟစ်ငိုနေတာကို ကြားတော့ ကျွန်မလဲမနေနိုင်လို့ အပြင်ထွက်ကြည့်မှရမယ်ဆိုပြီး ကျန်နေတဲ့ကလေးတွေကို ကျွန်မနဲ့ တခြားဆရာ၊ ဆရာမတွေရောက ခေါ်ပြီး ကျောင်းနဲ့နည်းနည်း အလှမ်းဝေးတဲ့ လေယာဥ်ဗုံးခိုကျင်းထဲ ကို ဆွဲခေါ်သွားတယ်။ဒါပေမယ့် အဲဒီအချိန်မှာ ကလေးက အရမ်းများနေတော့ တချို့ကလေးတွေကို ဆွဲခေါ်မိတယ်။တချို့ကလေးတွေတော့ အရမ်းလန့်ပြီး အော်ငိုပြီး သူ့ဟာသူ ပြေးသွားတဲ့ကလေးတွေတော့ရှိတယ်"ဟု ပြောသည်။

စာသင်ကြား​နေရင်း ဗုံးကြဲတိုက်ခိုက်အသတ်ခံရမှုမှာ ဒေါဆီအီနှင့် လွိုက်နန်ဖ ကျေးရွာတို့မှာ ပထမဆုံးမဟုတ်ပါ ။ ၂၀၂၂ စက်တင်ဘာ ၁၆ ရက်ကလည်း စစ်ကိုင်းတိုင်း၊ ဒီပဲယင်းမြို့အနောက်ဘက် ၁၄ မိုင်အကွာ လက်ယက်ကုန်းရွာရှိစာသင်
ကျောင်းနှင့် ဘုန်းကြီးကျောင်းကို စစ်​ကောင်စီတပ်က ​လေ​ကြောင်းမှ ဗုံးကြဲပြီး ​မြေပြင်မှပါစစ်​ကြောင်းထိုးစီးနင်းတိုက်ခိုက်၍ ​ကျောင်းတက်​နေ​သော က​လေးငယ် ၇ ဦးသေဆုံးခဲ့ပြီး အများအပြားဒဏ်ရာရခဲ့သည်။ မြေပြင်ထိုးစစ်ကြောင့် လူကြီး ၆ ဦး သေဆုံးခဲ့ရသည်။ စစ်​ကောင်စီကမူ စာသင်​ကျောင်း၊ ဘုန်းကြီး​ကျောင်းနှင့်ရွာအတွင်း PDF များရှိ၍ တိုက်ခိုက်သည်ဟု စစ်ရာဇဝတ်မှူကျူးလွန်ခဲ့မှုအ​ပေါ် ငြင်းဆိုခဲ့သည်။

ဒေါဆီအီနှင့် လွိုက်နန်ဖ ကျေးရွာ အစုလိုက်အပြုံလိုက် လူသတ်မှူတွင်လည်း ​သေဆုံးသူများမှာ ကရင်နီတပ်ဖွဲ့ဝင်များဖြစ်သည်ဟု စစ်​ကောင်စီ လိမ်ညာခဲ့ပြန်သည်။

ယခုဖြစ်စဥ်အပါအဝင် စစ်ကောင်စီသည် အာဏာသိမ်းပြီး သုံးနှစ်အတွင်း ကရင်နီပြည်နယ်၌ လေကြောင်းတိုက်ခိုက်မှု အကြိမ်ရေ ၁,၂၀၃ အထိ ပြုလုပ်ခဲ့သည့်ဖြစ်ရပ်များထဲမှ တစ်ခုဖြစ်​ကြောင်း တိုးတက်သော ကရင်နီပြည်သူ့အင်အားစု
(PKPF)၏ နောက်ဆုံးထုတ်ပြန်ထားချက်က ဆိုသည်။

စစ်​ကောင်စီသည် ကလေးငယ်များ ပညာသင်ကြားနေသော စာသင်ကျောင်းများနှင့် အရပ်သားပြည်သူများ အား အစုလိုက်၊ အပြုံလိုက်သတ် သေစေရန် တိုက်ခိုက်သတ်ဖြတ်နေမှုမှာ ကရင်နီပြည်ပင်မက နေရာအနှံ့အပြားတွင်ပါ ကျူးလွန် နေဆဲဖြစ်၏။

အထူးသဖြင့် ၎င်း(စစ်ကောင်စီ)တို့ စစ်ရှုံးနေသည့် ဒေသများတွင် လေကြောင်းအားပြု၍ စစ်ဘက်၊ အရပ်ဘက် စိစစ်ခြင်းမပြုဘဲ တိုက်ခိုက်နေခြင်းက ဆင်ခြင်တုံတရား လက်ဝယ်မရှိတော့သည်မှာ ပို၍ ထင်းရှားလာပါသည်။

ပျှမ်းမျှစာရင်းအရ တစ်နှစ်လျှင် အကြိမ်ရေ ၄၀၀ ရှိ​နေပြီး တစ်ရက် တစ်ကြိမ်ထက်ပို၍ စစ်ကောင်စီကလေကြောင်းတိုက်ခိုက်မှု လုပ်ခဲ့ခြင်းပင် ။

၂၀၂၂တစ်နှစ်လုံးအတိုင်းအတာအရ စစ်ကောင်စီ၏ လေကြောင်းအသုံးပြုတိုက်ခိုက်မှု ၁၈၂ ကြိမ်ရှိခဲ့​သော်လည်း ၂၀၂၃တွင် အကြိမ်ရေ ၈၀၀ အထိရှိလာခဲ့သည်။

ယခုနှစ် ဇန်နဝါရီ တစ်လတည်းပင် က ရင်နီပြည်နယ်၌ စစ်ကောင်စီ​၏ လေကြောင်းတိုက်ခိုက်မှု ၂၁၉ ကြိမ်အထိပြုလုပ်ခဲ့ကြောင်း PKPFက ဆိုသည်။

ဦးမောင်မြင့်​သည် ဒေါဆီအီကျေးရွာမှဖြစ်ပြီး သားဖြစ်သူမှာ အဆိုပါရွာစာသင်ကျောင်း တိုက်လေယာဉ်ဖြင့် ဗုံးကြဲတိုက်ခိုက်မှုကြောင့် သေဆုံးခဲ့ရခြင်းဖြစ်သည်။

ဦးမောင်မြင့်နည်းတူ သား၊သမီးဖြစ်သူ ကလေးငယ်များ စာသင်ကျောင်းက ပြန်အလာ အခြားမျှော်လင့်ခဲ့ရသူများလည်း ရှိခဲ့ပါသည်။

"ကျန်တဲ့ သားသမီးသုံးယောက်က ကျောင်းကနေ အိမ်ကို ပြန်ရောက်လာပေမယ့် အကြီးဆုံးသား ဖြစ်တဲ့ ခုနှစ်တန်း ကျောင်းသား(ခွန်းစန်းလှိုင်ကတော့ အိမ်ကို ပြန်မရောက်လာတော့ဘူး"ဟု ခုနစ်တန်းကျောင်းသား ခွန်းစန်းလှိုင်​၏ ဒေါ်ခရစ္စဝင်းဦးက ပြောသည်။

သားဖြစ်သူခွန်းစန်းလှိုင်က လာမယ့် ဧပြီ ၂၁ ရက်ဆိုပါက အသက်(၁၄)နှစ် ပြည့်တော့မည်ဖြစ်ပြီး စစ်​ကောင်စီ​ကြောင့် ​လူ့ဘဝတွင် အသက် ၁၃ နှစ်​ကျော်သာ​နေခဲ့ရသည်။

အမျိုးသားညီညွတ်ရေးအစိုးရနှင့် ကရင်နီပြည်ကြားကာလအုပ်ချုပ်ရေးကောင်စီတို့က ပူးတွဲတောင်းဆိုချက် လေးချက်အဖြစ် ဖေဖော်ဝါရီ ၈ရက်ကပြုလုပ်သည့် ဒီမော့ဆိုမြို့နယ် စာသင်ကျောင်းများပစ်မှတ်ထား လေကြောင်းတိုက်ခိုက်ခံရမှုပူးတွဲသတင်းစာရှင်းလင်းပွဲတွင် တောင်းဆိုခဲ့သည်။

အဆိုပါ တောင်းဆိုချက်မှာ အရပ်သားပြည်သူများအား လေကြောင်းတိုက်ခိုက်မှုရန်မှ ကာကွယ်ရန်အတွက် No Fly Zoneအဖြစ် ကုလသမဂ္ဂအပါအဝင် အိမ်နီးနားချင်းနိုင်ငံများက ပူးပေါင်းလုပ်ဆောင်ရန်၊ စစ်ကောင်စီအား လေယာဉ်ဆီတင်ပို့ရောင်းချနေမှုအား ရပ်တန့်စေဖို့အတွက် နိုင်ငံများပူးပေါင်းဆောင်ရွက်ပြီး ကုလအပါအဝင် တစ်ကမ္ဘာလုံးကနေဝိုင်းဝန်းပိတ်ဆို့အရေးယူရန်၊ စစ်ကောင်စီ​၏ စစ်ရာဇဝတ်မှုကျူးလွန်နေမှုအတွက် သံတမန်အရေး၊ စီးပွားရေး၊လက်နက်တင်ပို့ရောင်းချမှုအပြင် တရားစွဲဆိုလုပ်ဆောင်နိုက်မှုအတွက် နိုင်ငံတကာတရားရုံးများက ဝိုင်းဝန်လုပ်ဆောင်ရန် နှင့် ပြည်သူလူထုလုံခြုံရေးအတွက် လေယာဉ်အချက်ပေးစနစ်နှင့် ဆက်သွယ်ရေးနည်းလမ်းပညာများအား အရပ်သား ပြည်သူများအား ပေးပို့အကူအညီပေးရန်တို့အား ပူးပေါင်းတောင်းဆိုကြောင်း လူ့အခွင့်အရေးဆိုင်ရာဝန်ကြီးဦးအောင်မျိုးမင်းက ပြောသည်။

ယခုကဲ့သို့ စစ်ကောင်စီ၏ ရက်ဆက်စွာတိုက်ခိုက်မှုများကြောင့် အခြားကလေးသူငယ်များ​၏ စိတ် ပိုင်းဆိုင်ရာ ထိခိုက်မှုများရှိနေပြီဟု အဆိုပါ တိုက်ခိုက်ခံရမှုဖြစ်ရပ်အား ကူညီကယ်ဆယ်ရေးပြုလုပ်ခဲ့သူ Karenni Human Right Groupကို ဦးဆောင်သူ ဦးဗညားက မှတ်ချက်ပြုသည်။

"သူတို့အချင်းချင်းချစ်ခင်ရတဲ့ အတန်းဖော်အတန်းဖက်၊ သူငယ်ချင်းတွေဆုံးရှုံးသွားကြတယ်။ကျောင်းကိုလည်းဆုံးရှုံးလိုက်ရတယ်။ထို့နည်းတူစွာပဲ ဆရာ၊ဆရာမတွေ နဲ့ မိဘတွေကလည်း သူတို့ သားတပည့်တွေ ဆုံးရှုံးခဲ့ရတယ်။ဒီဆုံးရှုံးမှုတွေက လူမှုအသိုင်းအဝိုင်းတစ်ခုလုံးကို တုန်လှုပ်ခဲ့စေတယ်"ဟု ဦးဗညားက ပြောသည်။

ထို့အပြင် ခေတ်အဆက်ဆက် ပြည်သူများ ပညာမတက်စေရန် လုပ်ဆောင်သည့် အာဏာသိမ်းစစ်တပ်၏ ခြေလှမ်းများအနက်မှ တစ်ခုဟုလည်း ၎င်းက ဆိုပါသည်။ ဒဏ်ရာရ​သောက​လေးငယ် အချို့မှာ အ​ပေါ်ယံဒဏ်ရာ သက်သာစပြု​နေပြီဖြစ်​သော်လည်း ​ကျောင်းတက်စာသင်ကြား​နေရင်းအချိန်မ​ရွေး ဗုံးကြဲ​သေဆုံးနိုင်သည်ဆို​သော စိတ်ဒဏ်ရာကမူ အချိန်ဘယ်​လောက်ကြမှ ကုသ​ပျောက်မည်မသိနိုင်​ပေ။

"ပညာသင်ရင် အသက်စတေးနေရတဲ့ နိုင်ငံပေါ့"ဟု
ဦးဗညားက ဖြည်းဖြည်းချင်း​ပြောပါသည်။ ။

MDFတပ်စခန်းမှ လက်နက်ခဲယမ်းအချို့နှင့် ကား တစ်စီးသိမ်းရဟု CDF မာရာထုတ်ပြန်

ထိုက်ထိုက်/People’s Spring

မာရာနယ်မြေကာကွယ်ရေးတပ်(MDF) တပ်စခန်းတစ်ခုကို ချင်းအမျိုးသားတပ်မတော်(CNA) ၊ ချင်းဒေသကာကွယ်ရေးတပ်(CDF)-မာရာတို့ပူးပေါင်းတိုက်ခိုက်ခဲ့ရာ လက်နက်ခဲယမ်းအချို့နှင့် ကား တစ်စီးသိမ်းရခဲ့သည်ဟု CDF မာရာက သတင်းထုတ်ပြန်သည်။

မာရာတပ်ဖွဲ့ နှစ်ခုအကြား ယခင်ကတည်းကတိုက်ပွဲဖြစ်ပွားမှုနှင့် ပြဿနာအချို့ဖြစ်ပေါ်ခဲ့ရာ ဇန်နဝါရီလအတွင်း၌ CDF မာရာတပ်ဖွဲ့ဝင် နှစ်ဦးအား MDFကဖမ်းဆီးခဲ့သည့်အပြင် ယင်းတပ်ဖွဲ့ဝင်များလွတ်မြောက်ရေးသွားရောက်ညှိနှိုင်းသည့် CDF မာရာဗျူဟာမှူးနှင့် တပ်ခွဲမှူးတို့ကို MDFကထပ်မံဖမ်းဆီးခဲ့ရာ နှစ်ဖက်အကြားပိုမိုတင်းမာခဲ့သည်။

တိုက်ပွဲမဖြစ်ရေးအတွက်ညှိနှိုင်းရန် ဇန်နဝါရီ နောက်ဆုံးပတ်တွင် မာရာလူငယ်များအသင်းဌာနချုပ်က ကြိုးပမ်းခဲ့သော်လည်း MDFတပ်ဖွဲ့က CDF မာရာ၏ ယာယီစခန်းတစ်ခုကိုပစ်ခတ်ခဲ့ရာ CDF မာရာတပ်သားတစ်ဦးနှင့် CNA တပ်သားတစ်ဦးကျဆုံးကာ တစ်ဦးဒဏ်ရာရခဲ့သည်။

အဆိုပါ ဖြစ်စဉ်ပြီးနောက် CNA ၊ CDF မာရာ အပါအဝင် ချင်းပူးပေါင်းတပ်ဖွဲ့က MDF တပ်စခန်းအား ဖေဖော်ဝါရီ ၂ရက်မှ စတင်တိုက်ခိုက်ခဲ့ရာဖေဖော်ဝါရီ ၅ရက်တွင် MDF စခန်းကိုသိမ်းပိုက်မီးရှို့ခဲ့ကြောင်း CDF မာရာက ထုတ်ပြန်သည်။

တိုက်ပွဲတွင် MDFဖက်မှ ထိခိုက်မှုများရှိပြီး၊ ဒဏ်ရာရသူများလည်းရှိ‌ကြောင်း၊ MDF တပ်ဖွဲ့များ၏ လက်နက်ခဲယမ်းတချို့၊‌မော်တော်ယာဉ် တစ်စီး၊ ဆေးဝါးအမြောက်အများ သိမ်းဆည်းရရှိခဲ့ကြောင်း ဖော်ပြထားသည်။

MDF တပ်ဖွဲ့များဘေးလွတ်ရာသို့တိမ်းရှောင်သွားကြောင်း၊MDF တပ်ဖွဲ့မှ ပြန်လည်တုံ့ပြန်လာပါက မရာဒေသတွင် တိုက်ပွဲပြင်းထန်လာနိုင်ကြောင်း ထုတ်ပြန်ခဲ့ပြီး ခရီးသွားပြည်သူများသတိထားကြရန်အသိပေးထားသည်။

တိုက်ပွဲဖြစ်ပွားမှုနှင့်ပတ်သက်ပြီး MDFက လတ်တလောတွင် သတင်းထုတ်ပြန်မှုမရှိသော်လည်း MDF ပါဝင်သည့် ချင်းညီနောင် အဖွဲ့က ဖေဖော်ဝါရီ ၃ရက်တွင် ကြေညာချက်ထုတ် ပြန်ခဲ့ရာ မာရာညီအကို အချင်းချင်း ကြားဖြစ်ပွားနေသည့် ကိစ္စတွင် တခြားအဖွဲ့များမှ လက်နက်အင်အားဖြင့် ဝင်ရောက်ပါဝင်စွက်ဖက်ခြင်းထက် စားပွဲဝိုင်းတွင်ကူညီ ညှိနှိုင်းဖြေရှင်းပေးရန်လိုလားကြောင်း ဖော်ပြထားသည်။

စစ်အာဏာရှင်ကို တော်လှန်သောချင်းညီအကိုအချင်းချင်းကြားပြဿနာကို လက်နက်ဖြင့် ဖြေရှင်းခြင်းသည် အဖြေမဟုတ်ကြောင်း ဖော်ပြပြီး အကယ်၍ မာရာမျိုးနွယ်စု ပြဿနာတွင် CNA နှင့် အခြား CDFများဆက်လက် ပါဝင်နေပါက လက်မခံကြောင်း ချင်းညီနောင်က ထုတ်ပြန်သည်။

ဝင်ရောက်စွပ်ဖက်မှု ဆက်လုပ်ပါက MDFနှင့်အတူ ပူးပေါင်းလုပ်ဆောင်မှုများ စတင်မည်ဟု ကြေညာခဲ့သည်။ ချင်းညီနောင်တွင် PDF ဇိုလဲန်း၊ CNO/CNDF၊ CDF မင်းတပ် နှင့် MDF တို့ပါဝင်သည်။

မာရာတပ်ဖွဲ့နှစ်ခုဖြစ်သော CDF မာရာနှင့် MDF တို့သည် ချင်းပြည်နယ် မရာနယ်မြေအတွင်း မှ တပ်ဆုတ်ဖယ်ရှားပေးရန် အပြန်အလှန် စာထုတ်မှုများ လုပ်ဆောင်ခဲ့သည်။ မာရာဒေသသည် ချင်းပြည်နယ် ထန်တလန်၊ မတူပီနှင့် ပလက်ဝမြို့နယ်များ အတွင်းရှိ ဒေသအချို့ကိုစုပေါင်းသတ်မှတ်ထားခြင်းဖြစ်သည်ဟု ဆိုသည်။