(ရက္ခိုင့်တပ်တော်(AA) စစ်သင်တန်းဆင်းပွဲတစ်ခုအား တွေ့ရစဉ်။ ဓာတ်ပုံ - AA)

ဟုမ္မလင်းမြို့နယ်ရှိ စစ်ကောင်စီ ရှေ့တန်းစခန်းနှစ််ခုကို PDF ပူးပေါင်းတပ်ဖွဲ့များ သိမ်းယူ

▪️စစ်ကောင်စီက လေကြောင်းမှဗုံးကြဲတိုက်ခိုက်

နန်းနောင့်နောင့်/People's Spring

စစ်ကိုင်းတိုင်း၊ ဟုမ္မလင်းမြို့နယ်ရှိ စစ်ကောင်စီ​၏ ရှေ့တန်းစခန်းနှစ်ခုကို ပြည်သူ့ကာကွယ်ရေးပူး‌ပေါင်းတပ်ဖွဲ့များက တိုက်ခိုက်သိမ်းပိုက်ပြီးနောက် ဇီးပင်သာ၊နောင်ဆန်းကျင်နှင့် တီလောင် ကျေးရွာတို့ကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ကြောင်း သတင်းရရှ်ိသည်။

ဟုမ္မလင်းမြို့နယ်အတွင်း ရွာချင်းဆက်နေသည့် ဇီးပင်သာ၊နောင်ဆန်းကျင်နှင့်တီလောင်ကျေးရွာအနီးရှိ စစ်ကောင်စီနှင့် ရှမ်းနီတပ်ပူးပေါင်းတပ်ဖွဲ့ ရှေ့တန်းစခန်းနှစ်ခုကို ပြည်သူ့ကာကွယ်ရေးပူးပေါင်းတပ်ဖွဲ့များ ဒီဇင်ဘာ ၁၉ရက်တွင် တိုက်ခိုက်သိမ်းပိုက်ခဲ့သည်။

ထို့နောက် ဒီဇင်ဘာ ၂၂ရက် နေ့လယ် ၁နာရီခန့်တွင် စစ်ကောင်စီက အဆိုပါရွာသုံးရွာအတွင်း ဗုံး သုံးလုံးကြဲချတိုက်ခိုက်သွားသည်ဟု ပြည်သူ့အုပ်ချုပ်ရေးအဖွဲ့ဝင်တစ်ဦးက ပြောသည်။

"စခန်းအသိမ်းခံရလို့ လေကြောင်းကနေ လာပစ်နေတာ။ ဘေးလွတ်ရာ ရှောင်နေကြရတယ်။ ဒီရက်ထဲ လေကြောင်းအန္တရာယ်ကို အထူး သတိပေးထားရတဲ့ အနေအထားပါ"ဟု ဇီးပင်သာကျေးရွာဒေသခံတစ်ဦးက ပြောသည်။

စခန်းသိမ်းတိုက်ပွဲအတွင်း စစ်ကောင်စီဘက်မှထိခိုက်မှုကို အတိအကျမသိရှိရသေးပေ။

သို့သော် စစ်ကောင်စီတပ်ဖွဲ့ဝင်များသည် ဟုမ္မလင်းမြို့ပေါ်ရှိ တပ်ရင်းသို့ ပူးပေါင်းသွားကြောင်းသတင်းရရှိသည်။

စစ်ကောင်စီ၏လေကြောင်းအန္တရာယ်ကိုကြောက်လန့်၍ ဒေသခံ နှစ်ထောင်ခန့်မှာ ဘေးလွတ်ရာတိမ်းရှောင်နေကြရသည်။

ယမန်နေ့က တိုက်ခိုက်မှုတွင် အရပ်သားထိခိုက်မှုမရှိခဲ့သော်လည်း နေအိမ်လေးလုံးပျက်စီးခဲ့သည်။ စစ်ကောင်စီတပ်သည် ဟုမ္မလင်းမြို့နယ်အပြင် ၊ရွှေပြည်အေး၊ ဖောင်းပြင်၊ တမူးမြို့နယ်တို့ကို ဟုမ္မလင်းမှ တက်လာသော Mi-2 တိုက်ခိုက်ရေးရဟတ်ယာဉ်ဖြင့် မကြာခဏဗုံးကြဲတိုက်ခိုက်နေကြောင်း ကာကွယ်ရေးရေးဘော်များကပြောသည်။

ဒီဇင်ဘာ ၂၁ ရက် ညနေ ၄ နာရီ ၂၀ မိနစ်ခန့်ကလည်း ဖောင်းပြင်မြို့နယ်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီက လေကြောင်းတိုက်ခိုက်ခဲ့၍ အမျိုးသားတစ်ဦး သေဆုံးပြီး အမျိုးသမီးလေးဦး၊ အမျိုးသားငါးဦးဒဏ်ရာရခဲ့ကြောင်း သတင်းရရှိသည်။

ဖောင်းပြင်မြို့နယ် သရောင်းနှင့်ထောမကျေးရွာအားတိုက်ခိုက် ရေးရဟတ်ယာဉ်ဖြင့် ဗုံး ၁၃လုံးအထိ ကြဲချခဲ့ခြင်းဟု သိရသည်။

ဒဏ်ရာရသူများဆေးကုသမှုခံယူနေရဆဲဖြစ်ပြီး အသက်အန္တရာယ်စိုးရိမ်စရာမရှိတော့ကြောင်း ဖောင်းပြင်မြို့နယ်ပြည်သူ့အုပ်ချုပ်ရေးအဖွဲ့ဝင်တစ်ဦးက ပြောသည်။

(ဟုမ္မလင်းမြို့တည်နေရာအား မြင်တွေ့ရစဉ်)

KNU တပ်မဟာ(၆)တွင် စစ်ကောင်စီလက်နက်ကြီးပစ်၍ အမျိုးသမီးတစ်ဦးသေ၊ နှစ်ဦး ဒဏ်ရာရ

မောင်မောင်/People’s Spring

ကရင်အမျိုးသားအစည်းအရုံး(KNU) ဒူးပလာယာခရိုင် တပ်မဟာ(၆)နယ်မြေတွင် အာဏာသိမ်း စစ်ကောင်စီတပ်မှ ပြည်သူနေ ကျေးရွာအတွင်းသို့ လက်နက်ကြီးများဖြင့် ရမ်းသမ်းပစ်ခတ်မှုကြောင့် အမျိုးသမီးတစ်ဦးသေဆုံးပြီး နှစ်ဦးဒဏ်ရာရခဲ့ကြောင်း KNUက သတင်းထုတ်ပြန်သည်။

ဒီဇင်ဘာ ၁၈ရက်က စစ်ကောင်စီတပ် စကခ(၁၂) လက်အောက်ခံ ခလရ(၂၃၀) တပ်ရင်းမှ (၁၂၀) မမ လက်နက်ကြီးများဖြင့် ပြည်သူနေ ကျေးရွာအတွင်းသို့ ရမ်းသမ်းပစ်ခတ်ခဲ့ရာ ဒူးပလာယာခရိုင် ကျုံဒိုးမြို့နယ် တောင်ကြာအင်းကျေးရွာမှ အသက် (၄၆)နှစ်ရှိ အမျိုးသမီးတစ်ဦး ပွဲချင်းပြီး သေဆုံးခဲ့ရကြောင်း ဖော်ပြသည်။

ဒီဇင်ဘာ ၁၉ရက်တွင်လည်း ခလရ(၂၃၀) တပ်ရင်းမှ ပင်လက်နက်ကြီးများဖြင့် ကျေးရွာများသို့ ထပ်မံပစ်ခတ်ခဲ့၍ တောင်ကြာအင်း ကျေးရွာနေ အမျိုးသမီးနှစ်ဦး လက်နက်ကြီး ကျည်စထိမှန် ဒဏ်ရာရခဲ့သည်ဟု အသိပေးသည်။

ဒဏ်ရာရသူများမှာ အသက် (၇၁)နှစ်အရွယ်နှင့် အသက် (၆၈)နှစ်အရွယ် သက်ကြီးရွယ်အိုများဖြစ်သည်ဟု ထုတ်ပြန်သည်။

KNUနယ်မြေများတွင် စစ်ကောင်စီက လက်နက် ကြီးဖြင့် ရမ်းသမ်းပစ်ခတ်မှု၊ လေကြောင်းတိုက်ခိုက်မှုများ မကြာခဏပြုလုပ်ခဲ့၍ အရပ်သားပြည်သူထိခိုက်သေဆုံးမှုများ ဆက်တိုက်ဖြစ်ပေါ်လျက်ရှိသည်။

(စစ်ကောင်စီတပ် ပစ်ခတ်မှုကြောင့် ထိခိုက်ဒဏ်ရာရသူများအား တွေ့ရစဉ်။ ဓာတ်ပုံ - KNU)

ယင်းမာပင် ဒေသခံပြည်သူများ၏ စစ်အာဏာရှင်ဆန့်ကျင်ရေး တောင်ယာသပိတ်

သုည/People's Spring

စစ်ကိုင်းတိုင်း ယင်းမာပင်မြို့နယ် ကျေးရွာတစ်ရွာတွင် ရွာပေါင်းစုံသပိတ်စစ်ကြောင်းက ဦးဆောင်၍ ဒေသခံပြည်သူများနှင့်အတူ စစ်အာဏာရှင်ဆန့်ကျင်ရေး တောင်ယာသပိတ်ယနေ့ (ဒီဇင်ဘာ ၂၃) နံနက်က ဆင်နွှဲခဲ့ကြသည်။

ဆန္ဒပြပြည်သူများက တောင်ယာစိုက်ပျိုးရင်း "China:Stop killing myanmar people by supporting fascist criminals" စာသားကိုင်ဆောင်ကာ "သို့ တရုတ်အစိုးရ ဖက်ဆစ်တပ်နဲ့ပေါင်းပြီး မြန်မာပြည်သူတွေကို သတ်နေတာ ချက်ချင်းရပ်" ဟု ကြွေးကြော်ဆန္ဒပြခဲ့ကြသည်။

ယင်းမာပင်-ဆားလင်းကြီး ရွာပေါင်းစုံသပိတ်စစ်ကြောင်းသည် စစ်အာဏာရှင်ကို နေ့စဥ်မပြတ် ဆန္ဒပြလျက်ရှိရာ ယနေ့ ရက်ပေါင်း (၁၀၀၃) ရက်မြောက်အဖြစ် ဆန္ဒထုတ်ဖော်ခဲ့ခြင်း ဖြစ်သည်။

ဓာတ်ပုံ - ရွာပေါင်းစုံသပိတ်ဦးဆောင်ကော်မတီ

ခလရ(၁၃)တပ်သိမ်းပိုက်ပြီး မန်တုံမြို့ကို TNLA ထိန်းချုပ်

▪️စစ်ကောင်စီက ၄ရက်အတွင်း လေကြောင်းပစ်ကူအကြိမ်၂၀၀ကျော် ပြုလုပ်ခုခံခဲ့သော်လည်း မြို့ကို လက်လွှတ်ခဲ့ရ

မိုးမိုး/People’s Spring

မန်တုံအခြေစိုက် ခလရ(၁၃၀)တပ်ရင်းကို တအာင်းတပ်မတော်(TNLA) တပ်များ ဝင်ရောက်နိုင်ပြီဖြစ်ကြောင်း TNLA ခေါင်းဆောင်တစ်ဦးက People’s Spring သို့ အတည်ပြုထားသကဲ့သို့ ဒေသအခြေစိုက် ရွှေဖီမြေသတင်းဌာနကလည်း ခလရ(၁၃၀)တပ်ရင်း အပါအဝင် မန်တုံမြို့ကို အလုံးစုံ သိမ်းပိုက်နိုင်ပြီဖြစ်ကြောင်း ဓာတ်ပုံမှတ်တမ်းများနှင့်အတူ ဖော်ပြသည်။

ယမန်နေ့ညပိုင်းတွင် မန်တုံမြို့ ခလရ(၁၃၀) တပ်ရင်းကို သိမ်းပိုက်နိုင်ကြောင်း သတင်းအပေါ် TNLA ခေါင်းဆောင်တစ်ဦးက "တပ်စခန်းထဲတော့ ဝင်ပါပြီ ။ အားလုံးမရှင်းရသေးဘူး"ဟု ဖြေကြားခဲ့သည်။

TNLA က မန်တုံမြို့သိမ်းတိုက်ပွဲဆင်နွှဲရာ အဆိုပါ ခလရ(၁၃၀)တပ်ရင်းတစ်ခုသာ ကျန်တော့သည်ဟု TNLA သတင်းပြန်ကြားရေး အရာရှိက ပြောကြားထားသည်။

ရွှေဖီမြေ၏ ဖော်ပြချက်တွင် မြို့ကိုသိမ်းပိုက်နိုင်ခဲ့ပြီး လက်နက်ခဲယမ်းများစွာ ရရှိခဲ့ကြောင်း ဓာတ်ပုံများနှင့်အတူ ဖော်ပြရာ ခလရ(၁၃၀) တပ်ရင်းအတွင်း TNLA တပ်ဖွဲ့ဝင်များရောက်ရှိမှု၊ စစ်ကောင်စီတပ်ဖွဲ့ဝင် အချို့သေဆုံးနေမှု၊ ခလရ(၁၃၀) တပ်ရင်း ဗဟိုကင်းနေရာ၊ စစ်ကောင်စီတပ်ပိုင် ကားများထားရှိရာ မော်တော်ယာဉ်ဌာန၊ စစ်ကောင်စီရဲအရာရှိများစီးနင်းသည့် ကား၊ စစ်ကောင်စီတပ်ရင်းအတွင်းထောင်ထားသည့် နင်းမိုင်းများ၊ ခလရ(၁၃၀) တပ်ရင်း စာကြည့်တိုက်နေရာ၊ ခလရ(၁၃၀) စက်သုံးဆီ သိုလှောင်ရုံနေရာ များကို ဓာတ်ပုံများ၌ တွေ့ရသည်။

TNLAက ယခု ဒီဇင်ဘာဒုတိယပတ်တွင် နမ့်ဆန်နှင့် နမ့်ခမ်းမြို့များကို အလုံးစုံ သိမ်းပိုက်ထိန်းချုပ်နိုင်ခဲ့ရာ ယခု မန်တုံကို ထပ်မံရရှိ၍ ၁၀၂၇ စစ်ဆင်ရေးအတွင်း ၃ခုမြောက် မြို့သိမ်းတိုက်ပွဲ အောင်မြင်မှုရရှိခြင်းဖြစ်သည်။

TNLA အနေဖြင့်ကွတ်ခိုင်တပ်စခန်း၊ နမ္မတူတပ်စခန်းများကိုလည်း ဆက်လက်တိုက်ခိုက်လျက်ရှိသည်။

မန်တုံမြို့သိမ်းတိုက်ပွဲအခြေအနေနှင့်ပတ်သက်ပြီး မေးမြန်းရန် TNLA သတင်းပြန်ကြားရေးသို့ ဆက်သွယ်ရာအဆက်အသွယ်မရသေးပေ။

မန်တုံမြို့တွင် စစ်ကောင်စီတပ် လေကြောင်း တိုက်ခိုက်မှုအခြေအနေကိုမူ ယနေ့ နေ့လည်ပိုင်းတွင် TNLA ပြန်ကြားရေးဌာနက ထုတ်ပြန်ထားသည်။

မန်တုံမြို့တွင် စစ်ကောင်စီတပ်က လေကြောင်းဖြင့်ဗုံးကြဲတိုက်ခိုက်မှုကြောင့် နေအိမ် ၁၅အိမ်ခန့် ထိခိုက်ပျက်စီးခဲ့သည်ဟု ဆိုသည်။

မန်တုံမြို့နယ်တွင် တအာင်းတပ်မတော် PSLF/TNLA နှင့် စစ်ကောင်စီတပ်တို့ တိုက်ပွဲဖြစ်ပွားခဲ့ပြီး စစ်ကောင်စီတပ်က Y12 လေယာဉ်ဖြင့် ဗုံးကြဲတိုက်ခိုက်ခြင်း၊ လက်နက်ကြီးဖြင့် အရပ်သားများအားဦးတည် ပစ်ခတ်တိုက်ခိုက်မှုများစွာပြုလုပ်ခဲ့သည်ဟု ဆိုသည်။

ဒီဇင်ဘာလ ၁၉ ရက်မှ ယမန်နေ့ ဒီဇင်ဘာလ ၂၂ရက်အထိ စစ်ကောင်စီတပ်က ဂျက်ဖိုက်တာဖြင့် (၄၃)ကြိမ်၊ Y12 လေယာဉ်ဖြင့် (၁၈၃)ကြိမ် ဗုံးကြဲတိုက်ခိုက်ခဲ့ပြီး စစ်ကောင်စီ၏ (၁၃၀)တပ်စခန်းမှ လက်နက်ကြီးဖြင့် အကြိမ်(၁၃၀)ကျော် ပစ်ခတ်ခဲ့သည်ဟု အသိပေးထားသည်။

(မန်တုံအခြေစိုက် ခလရ(၁၃၀)တပ်ရင်းအား TNLA သိမ်းပိုက်ပြီးနောက် တွေ့ရစဉ်။ ဓာတ်ပုံ - ရွှေဖီမြေသတင်းဌာန)