မန်တုံ ခလရ(၁၃၀)တပ်စခန်းအတွင်းTNLA ဝင်ရောက်နိုင်ပြီဟု အတည်ပြု

▪️ခလရ(၁၃၀)ကို ရှင်းလင်းသိမ်းပိုက်နိုင်ပါက မန်တုံမြို့ကို TNLA အလုံးစုံ သိမ်းပိုက်ထိန်းချုပ်နိုင်မည်ဖြစ်

သက်ဝေ/People’s Spring

ရှမ်းပြည်နယ်မြောက်ပိုင်း မန်တုံမြို့ရှိ စစ်ကောင်စီတပ် ခလရ(၁၃၀)ကို သိမ်းပိုက်ရရှိရေး တအာင်းတပ်မတော်(TNLA)က ထိုးစစ်ဆင်တိုက်ခိုက်လျက်ရှိရာ ယမန်နေ့ညပိုင်းတွင် စခန်းအတွင်း ဝင်ရောက်နိုင်ပြီဖြစ်ကြောင်း TNLA ခေါင်းဆောင် တစ်ဦးက အတည်ပြုသည်။

မန်တုံမြို့သိမ်းပိုက်နိုင်ရေး TNLAက ထိုးစစ်ဆင်လျက်ရှိရာ ခလရ (၁၃၀) စခန်းတစ်ခုသာ ကျန်နေခြင်းဖြစ်သည်။ ယင်းစခန်း မကျဆုံးရေး စစ်ကောင်စီက လေကြောင်း ၊ လက်နက်ကြီး ပစ်ကူအများအပြားသုံးခုခံနေသည့်ကြားမှ ယမန်နေ့ညတွင် TNLAက သိမ်းပိုက်နိုင်ကြောင်း သတင်းများအပေါ် TNLA ခေါင်းဆောင်က ယခုကဲ့သို့ အသိပေးခြင်းဖြစ်သည်။

"တပ်စခန်းထဲတော့ ဝင်ပါပြီ။ အားလုံးမရှင်းရသေးဘူး”ဟု TNLA ခေါင်းဆောင်တစ်ဦးက ပြောသည်။

TNLAက ယမန်နေ့ညပိုင်းတွင် မန်တုံတိုက်ပွဲ သတင်းကို ဖော်ပြထားရာ စစ်ကောင်စီက ဒီဇင်ဘာ ၂၂ရက်တွင် မန်တုံမြို့ အနီးတဝိုက်သို့ တိုက်လေယာဉ်ဖြင့် ၁၃ကြိမ်၊ Y12 လေယာဉ်ဖြင့် ၄၈ကြိမ် ဗုံး ၂၅၈ လုံး ကြဲချတိုက်ခိုက်ခဲ့ကြောင်း အသိပေးသည်။

ထို့ပြင် မန်တုံမြို့နယ် စစ်ကောင်စီ ခလရ(၁၃၀) တပ်စခန်းမှ မန်ဖန်ကျေးရွာ၊ စစ်ရှောင်စခန်း၊ ရောကျိန်းကျေးရွာ၊ နမ္မတူလမ်းခွဲသို့ လက်နက်ကြီးဖြင့် (၃၀)ကြိမ် ပစ်ခတ်တိုက်ခိုက်ခဲ့သည်ဟုဆိုသည်။

ယမန်နေ့တွင် မန်တုံတပ်စခန်းသို့ လက်နက်ခဲယမ်းများ ရဟတ်ယာဉ်ဖြင့် တစ်ကြိမ် လေထီးအသုံးပြု ချပေးခဲ့သည်ဟု ဆိုသည်။

“ဒီနေ့မှစ၍ မန်တုံမြို့နာမည်သည်မူလနာမည်ဖြစ်သော ရူကော(Rukaw)နာမည်ဖြင့်စတင်သုံးသွားရန် မေတ္တာရပ်ခံအပ်သည်”ဟု TNLA ဒုဥက္ကဋ္ဌ ဗိုလ်ချုပ်တားဂျုတ်ဂျားက ယနေ့ နံနက်တွင် လူမှုကွန်ရက်၌ ရေးသားခဲ့သည်။

၂၀၀၅ ခုနှစ် ဧပြီ ၂၉ရက် မှသည် ၂၀၂၃ ရက်အထိ ၁၈နှစ်ကြာခဲ့သည့် ရူကောမြေအတွက် ကြေကွဲခဲ့သမျှ ဆွေးမြေ့ခဲ့သမျှ အသစ်တဖန် ပြန်လည်မွေးဖွားလာပြီဟုလည်း ဒုဥက္ကဋ္ဌက ရေးသားထားသည်။

ယမန်နေ့ မန်တုံမြို့တွင် စစ်ကောင်စီတပ်မှ လေကြောင်းဖြင့် တိုက်ခိုက်ခဲ့သော နေရာများမှာ မန်တုံရဲစခန်း၊ ပြည်သူစစ်စခန်း၊ လောက်ကျယ်အနီးတဝိုက်၊ နွားသတ်ကုန်း၊ ဒုက္ခသည်စခန်းအနီးတဝိုက် နှင့် ပန်နင်ကျေးရွာလမ်းခွဲ နေရာများဖြစ်ကြောင်း၊ စစ်ကောင်စီတပ်၏ လေကြောင်းတိုက်ခိုက်မှုကြောင့် လူနေအိမ်များစွာ လေယာဉ်ဗုံးစ ထိမှန် ပျက်စီးခဲ့ရကြောင်း အသိပေးသည်။

TNLA အနေဖြင့် ရှမ်းမြောက်ရှိ နမ့်ဆန်နှင့် နမ့်ခမ်းမြို့များကို ဒီဇင်ဘာ တတိယပတ်အတွင်း အလုံးစုံသိမ်းပိုက်ထားနိုင်ပြီး ယခု ခလရ(၁၃၀) တပ်စခန်းကို ရှင်းလင်းပြီးပါက မန်တုံမြို့ကိုလည်း အလုံးစုံ သိမ်းပိုက်နိုင်မည့် အခြေအနေဖြစ်သည်။

TNLA ဒုဥက္ကဋ္ဌ ဗိုလ်ချုပ်တားဂျုတ်ဂျားက လည်း
“ဒီနေ့မှစ၍ မန်တုံမြို့နာမည်သည်မူလနာမည်ဖြစ်သော ရူကော(Rukaw)နာမည်ဖြင့်စတင်သုံးသွားရန် မေတ္တာရပ်ခံအပ်သည်” ဟု ယနေ့မနက်တွင် လူမှုကွန်ရက်၌ ရေးသားထားသည်။

၂၀၀၅ ခုနှစ် ဧပြီ ၂၉ရက် မှသည် ၂၀၂၃ ရက်နေ့အထိ ၁၈နှစ်ကြာခဲ့သည့် "ရူကောမြေ" အတွက် ကြေကွဲခဲ့သမျှ ဆွေးမြေ့ခဲ့သမျှ အသစ်တဖန် ပြန်လည်မွေးဖွားလာပြီဟုလည်း ဒုဥက္ကဋ္ဌက ရေးသားထားသည်။

မြိုင်မြို့နယ်တွင် စစ်ကောင်စီအား မောင်းသူမဲ့ လေယာဉ်ငယ်များဖြင့် ဗုံးချတိုက်ခိုက်

ဟာနာဆန်/People's Spring

မကွေးတိုင်း၊ မြိုင်မြို့နယ်၊ သရက်ကန်ကျေးရွာတွင်တပ်စွဲထားသော စစ်ကောင်စီတပ်ကို မောင်းသူမဲ့ လေယာဉ်ငယ်များဖြင့် ဗုံးချတိုက်ခိုက်ခဲ့ကြောင်း မြိုင်မြို့နယ်ပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောသည်။

ယမန်နေ့ (ဒီဇင်ဘာ၂၂ ရက်) နံနက် ၁၁ နာရီခန့်က မြိုင်မြို့နယ်၊ သရက်ကန်ကျေးရွာ၌ တပ်စွဲထားသောစစ်ကောင်စီတပ်သားများကို မောင်းသူမဲ့ လေယာဉ်ငယ်များဖြင့် အီနာဂါဗုံးသီး ခုနစ်လုံးချကာ တိုက်ခိုက်ခဲ့ကြောင်း မြိုင်(ပကဖ)အဖွဲ့တာဝန်ရှိသူက ပြောသည်။

"ပစ်မှတ်နေရာတွေကို အတိအကျ ဗုံးသီးချတိုက်ခိုက်နိုင်ခဲ့တယ်။"ဟု မြိုင်(ပကဖ)အဖွဲ့တာဝန်ရှိသူက ပြောသည်။

စစ်ကောင်စီဘက်က ထိခိုက်သေဆုံးမှုများကို စုံစမ်းနေဆဲဖြစ်ကာ ဒရုန်းတပ်သားများ အထိအခိုက်မရှိ ဆုတ်ခွာနိုင်ခဲ့ကြောင်း မြိုင်(ပကဖ)အဖွဲ့က ပြောသည်။

အဆိုပါ စစ်ဆင်ရေးကို Middle Revolution Task Force(MRTF)၊မြိုင်(ပကဖ)၊Thu Rain(TR)၊DMG(ဓါးမင်းကြီး )၊နယ်မြေခံမဟာမိတ်တပ်ဖွဲ့များ ပူးပေါင်းတိုက်ခိုက်ခဲ့ခြင်းဖြစ်သည်။

ဒီဇင်ဘာ ၂၁ ရက်ကလည်း ပခုက္ကူမြို့နယ် ကျပ်ထိုးရဲကင်းစခန်းအား မြိုင်(ပကဖ)၊ ကမ္မ KMPF၊ ဧရာအနောက်ပျောက်ကျားတပ်ဖွဲ့တို့ ပူးပေါင်း၍ ဒရုန်းဖြင့် ဗုံးချ တိုက်ခိုက်ခဲ့သေးသည်။

စစ်ကောင်စီတပ်အား မောင်းသူမဲ့လေယာဥ်ငယ်ဖြင့် တိုက်ခိုက်ရန် ပြင်ဆင်နေစဥ်။ ဓာတ်ပုံ-မြိုင်(ပကဖ)

▪︎​မေးမြန်းခန်း

"ဆုံးဖြတ်ချက်မှာ တရုတ်ရဲ့ထောက်ခံမှုလည်း အဓိက ပါတာပါပဲ။ တရုတ်ကလည်း ကျွန်တော်တို့ဘက် ရပ်လိုက်လို့ ရုရှားကလည်း မကန့်ကွက်တာပေါ့နော်"

▪︎NUGသမ္မတရုံးပြောခွင့်ရပုဂ္ဂိုလ်ဦးကျော်ဇောနဲ့မေးမြန်းခန်း

ကုလသမဂ္ဂတွင် မြန်မာနိုင်ငံကိုယ်စားပြုခွင့်အတွက် Credentials Committee က လက်ရှိ သံအမတ်ကြီးဦးကျော်မိုးထွန်းကို ဆက်လက်ထားရှိရန် ဆုံးဖြတ်ခဲ့သည်။ ယင်းဆုံးဖြတ်ချက်မှာ အာဏာသိမ်းစစ်ကောင်စီအတွက် ကုလသမဂ္ဂမျက်နှာစာတွင် ကိုယ်စားပြုခွင့် ဆုံးရှုံးခဲ့ခြင်းဖြစ်ပြီး မြန်မာပြည်သူလူထုနှင့် တသားတည်းရပ်တည်ကာ စစ်အုပ်စု၏ ပြည်သူလူထုအပေါ် ချိုးဖောက်ကျူးလွန်မှုများကို ကမ္ဘာ့နိုင်ငံများသိရှိအောင် သံအမတ်ကြီးဦးကျော်မိုးထွန်းက ကုလသမဂ္ဂစင်မြင့်မှ ဆက်လက်ပြောကြားခွင့်ရရှိခဲ့ခြင်းဖြစ်သည်။ လက်ရှိအမြဲတမ်းကိုယ်စားလှယ်အနေဖြင့် ယခင်အတိုင်း ပြည်သူများ၏ ဆန္ဒ၊ ပြည်သူများ၏ အသံကို နိုင်ငံတကာက ကြားအောင်၊ သိရှိအောင် ကုလသမဂ္ဂမှတဆင့် ဆက်လက်ပြောကြားသွားမည်ဟုလည်း သံအမတ်ကြီး ဦးကျော်မိုးထွန်းက ပြောကြားထားသည်။ သံအမတ်ကြီးဦးကျော်မိုးထွန်း ကုလသမဂ္ဂတွင် ဆက်လက်ကိုယ်စားပြုခွင့်ရရှိခြင်းနှင့်စပ်လျဥ်း၍ အမျိုးသားညီညွတ်ရေးအစိုးရ NUG သမ္မတရုံးပြောခွင့်ရပုဂ္ဂိုလ် ဦးကျော်ဇောကို People’s Spring - လူထုနွေဦးက ဆက်သွယ်မေးမြန်းထားသည်ကို ကောက်နုတ်ဖော်ပြအပ်ပါသည်။

လီလီယန်/People's Spring

မေး - ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းက ကုလသမဂ္ဂမှာ ဆက်လက်ကိုယ်စားပြုခွင့်ရတယ်လို့ Credentials Committee ရဲ့ဆုံးဖြတ်ချက်မှာ တွေ့ရတယ်။ သံအမတ်ကြီးကလည်း People’s Spring ကို အတည်ပြုပါတယ်။ ဒါနဲ့ပတ်သက်လို့ အမျိုးသားညီညွတ်ရေးအစိုးရရဲ့ သဘောထားနဲ့မှတ်ချက် ပေးပါလား။

ဖြေ - ဒါကသတင်းကောင်းးတစ်ခုပါပဲ။ နယူးယောက်မှာရှိတဲ့ ကုလသမဂ္ဂရုံးချုပ်မှာ မြန်မာနိုင်ငံကို ကိုယ်စားပြုဖို့ ကျွန်တော်တို့ရဲ့ သံအမတ်၊ ပြည်သူလူထုရဲ့ ကိုယ်စားလှယ် ဦးကျော်မိုးထွန်းဆက်လက်တာဝန်ထမ်းဆောင်ခွင့်ရဖို့ Credentials Committee က အတည်ပြုတယ်ဆိုတာက အင်မတန်မှ ကောင်းတဲ့သတင်းတစ်ခုလို့ ပထမဆုံးပြောချင်ပါတယ်။ Credentials Committee ကနေ ကန့်ကွက်မယ့်သူမရှိ၊ မဲခွဲဆုံးဖြတ်တာတောင်မဟုတ်ဘူး။ အရင်အတိုင်းပဲ မြန်မာနိုင်ငံကို ကိုယ်စားပြုတာ ဆက်လက်ထားရှိမယ်ဆိုတာမျိုး အတည်ပြုခဲ့တာပေါ။ အဲဒီမှာဆိုရင်လည်း အင်အားကြီးနိုင်ငံထဲက အမေရိကန်လိုမျိုး၊ တရုတ်ပြည်သူ့သမ္မတနိုင်ငံလိုမျိုး၊ ရုရှားလိုမျိုး တိုင်းပြည်တွေလည်းပါတယ်။ အဲဒီတိုင်းပြည်တွေ အကုန်လုံးက ဒီအတိုင်းပဲ ဆက်ရှိမယ်လို့ ဆုံးဖြတ်တာက အင်မတန်မှ ကောင်းမွန်တဲ့သတင်း
ကောင်းတစ်ခုပါ။ ရုရှားရော၊ တရုတ်ရောပါတာပေါ့နော်။ ဆုံးဖြတ်ချက်မှာ တရုတ်ရဲ့ထောက်ခံမှုလည်း အဓိက ပါတာပါပဲ။ တရုတ်ကလည်း ကျွန်တော်တို့ဘက် ရပ်လိုက်လို့ ရုရှားကလည်း မကန့်ကွက်တာပေါ့နော်။ ကျွန်တော်တို့ တော်လှန်ရေးအတွက်ဆိုရင်လည်း မြန်မာပြည်သူလူထုရဲ့ အသံကို ကိုယ်စားပြုပြီး ပြောနိုင်မယ့် သံအမတ်က ကုလသမဂ္ဂစင်မြင့်ပေါ်မှာ ဆက်လက်ပြီးတော့ ရှိနေတဲ့အတွက်ကြောင့် မြန်မာပြည်သူလူထုရဲ့အသံကို ပိုမိုပြီး ထိထိရောက်ရောက် ပြောကြားနိုင်မယ့် အနေအထားရှိပါတယ်လို့ သုံးသပ်ပြောကြားချင်ပါတယ်။

မေး - ၂၀၂၁ စစ်တပ်အာဏာသိမ်းပြီးကတည်းက စစ်အုပ်စုက ကုလသမဂ္ဂမှာ ကိုယ်စားပြုခွင့်ရဖို့ ကြိုးစားခဲ့တယ်လို့သိရတယ်။ ၂၀၂၁ မှာ မအောင်မြင်ခဲ့ဘူး။ ၂၀၂၂ မှာလည်း မအောင်မြင်ခဲ့ဘူး။ အခု ၂၀၂၃ မှာလည်း ဆက်လက်အရေးနိမ့်တယ်၊​ကျရှုံးတယ်ဆိုတာ တွေ့ရတယ်ပေါ့နော်။ ဒါက မြန်မာပြည်သူတွေနဲ့အတူ တသားတည်းရပ်တည်တဲ့၊ အမျိုးသားညီညွတ်ရေးအစိုးရဲ့ သဘောထားတွေ၊ မူဝါဒတွေကိုထင်ဟပ်ပြီး ပြောကြားနေတဲ့ သံအမတ်ကြီး ကိုယ်စားပြုခွင့်ရတာက စစ်အုပ်စုအတွက် ဘယ်လောက်အထိ ထိုးနှက်ချက်ဖြစ်သွားစေလဲ။ ဒီအပေါ်မှာ ဘယ်လိုသုံးသပ်ပါလဲ။

ဖြေ - စစ်အုပ်စုက နိုင်ငံတကာမှာ ဖယ်ကြဥ်ခံနေရတာ ကြာပြီပေါ့။ ဒါက ဆက်လက်ပြီး ဖယ်ကြဥ်ခံထားရတာ။ သူတို့ သုံးနှစ်ဆက်တိုက်ကြိုးစားတယ်။ သူတို့ကိုယ်စားပြုခွင့်ရဖို့အတွက် သူတို့မအောင်မြင်ဘူး။ ကျွန်တော်တို့ရဲ့ သံအမတ်ကြီးပဲ ကိုယ်စားပြုခွင့်ရတယ်။ စစ်အုပ်စုအတွက်က ရှက်စရာကောင်းတဲ့အရှုံးတစ်ခုဖြစ်လာတာပေါ့။ စစ်အုပ်စုအတွက်ကတော့ မြန်မာနိုင်ငံမှာလည်း နေရာမရှိတော့ဘူး။ နိုင်ငံတကာမှာလည်း နေရာမရှိတော့ဘူး။ အကြမ်းဖက်စစ်ကောင်စီဟာ မြန်မာနိုင်ငံကို ကိုယ်စားပြုခွင့်မရဘူး။ အားလုံးလည်း မြန်မာပြည်သူတွေ သိတယ်။ သူတို့ဟာ တရားမဝင်အာဏာသိမ်းဖို့ ကြိုးစားတဲ့ အုပ်စုတစ်ခု၊​လက်နက်ကိုင်အုပ်စုတစ်ခုသာဖြစ်တယ်။ အဲဒါကို နိုင်ငံတကာကလည်း၊ ကမ္ဘာ့ကုလသမဂ္ဂလို နိုင်ငံတကာစင်မြင့်မှာ အမြင့်မားဆုံး ကုလသဂ္ဂအဖွဲ့ကြီးကလည်း မြန်မာနိုင်ငံကိုယ်စားပြုခွင့်မပေးဘူးဆိုတာ သူတို့အတွက် အင်မတန်မှ အရှက်ရစရာ၊ ထိခိုက်စရာဖြစ်ပါတယ်။ သူတို့ကတော့ သူတို့ကိုယ်သူတို့ အခွင့်ရတိုင်း ကုလသမဂ္ဂကိုယ်

စားလှယ်တွေနဲ့ ဆွေးနွေးတာကိုပဲ သူတို့ပဲ အသိအမှတ်ပြုခံရတယ်ဆိုတာမျိုး ပြပြပြီး ပြောနေတယ်။ အဲဒါဟာ ရှင်းရှင်းပြောရရင် ရှက်စရာကောင်းနေပြီ။ ကုလသမဂ္ဂကိုယ်စား
လှယ်တွေက သူတို့နဲ့တွေ့တယ်၊ ဆွေးနွေးတယ်ဆိုတာက မြန်မာနိုင်ငံ ထဲမှာ humanitatrian assistance လိုမျိုးပေးဖို့၊ သူတို့နဲ့တွေ့တာရှိတယ်။ အဲဒါကိုပဲ သူတို့ကို အသိ
အမှတ်ပြုသယောင်ယောင်နဲ့ သူတို့က လုပ်တာ။ အဲဒါ လုံးဝမဟုတ်ဘူးဆိုတာ ဒီဆုံးဖြတ်ချက် ပြသလိုက်တာပဲ။ သူတို့ဟာ မြန်မာနိုင်ငံကို ကိုယ်စားပြုတဲ့ အစိုးရ မဟုတ်ဘူး။

မေး - ပြည်တွင်းမှာဆိုလည်း လက်ရှိမှာ မြောက်ပိုင်းညီနောင်မဟာမိတ်သုံးဖွဲ့ရဲ့ ထိုးစစ်ဆင်မှုတွေ ၊ စစ်ဆင်ရေးတွေကြောင့် ရှမ်းမြောက်မှာရှိတဲ့ စစ်ကောင်စီစခန်းပေါင်း ရာနှင့်ချီဆုံးရှုံးတယ်။ မြန်မာနိုင်ငံတဝှမ်းမှာလည်း ပြည်တွင်း စစ်မျက်နှာမှာ စစ်အုပ်စုက အရေးနိမ့်ကျရှုံးနေတာ တွေ့ရတယ်။ အခုလိုအချိန်မှာ ကုလသမဂ္ဂမှာ၊ နိုင်ငံတကာ မျက်နှာစာမှာ ထပ်ပြီးတော့ ကျရှုံးမှု တစ်ခု၊ ဆုံးရှုံးမှုတစ်ခုပေါ့။ ဒီအပေါ်မှာရော NUG အနေနဲ့ ဘာများ ပြောကြားလိုပါလဲ။

ဖြေ - ၂၀၂၃ နှစ်ကုန်ခါနီး မြန်မာနိုင်ငံမှာ ကျွန်တော်တို့ တော်လှန်ရေးအင်အားစုတွေက ဟန်ချက်ညီညီနဲ့ ထိုးစစ်တွေ ဆင်နွှဲပြီးတော့ အောင်ပွဲတွေ ဆင်နေကြတယ်။ စစ်အုပ်စုရဲ့ဗျူဟာအခြေစိုက် စခန်းတွေ အပါအဝင် စစ်စခန်းပေါင်း ၃၀၀ ကျော်ကို အချိန်ကာလ တစ်လကျော်ကျော် နှစ်လအတွင်းမှာ သိမ်းတယ်။ မြို့တွေ သိမ်းတယ်။ ရွာတွေ သိမ်းတယ်။ ဗျူဟာမြောက်တဲ့ မြို့တွေ သိမ်းတယ်။ အဲဒီလို အချိန်မှာ ကုလသမဂ္ဂကလည်း စစ်ကောင်စီရဲ့ ကိုယ်စားလှယ်ကို အသိအမှတ်မပြုဘဲနဲ့ ကျွန်တော်တို့ သံအမတ်ကြီး၊ ပြည်သူလူထုရဲ့ ကိုယ်စားလှယ် ဦးကျော်မိုးထွန်းကို ဆက်လက်ပြီး တာဝန်ထမ်းဆောင်ဖို့ ခွင့်ပြုလိုက်တာက အင်မတန်မှ ကောင်းမွန်တဲ့ လက္ခဏာ၊ စစ်အုပ်စုအတွက် အင်မတန်မှ ဆိုးရွားတဲ့ လက္ခဏာ၊ တော်လှန်ရေး အင်အားစုတွေအတွက် မင်္ဂလာရှိတဲ့ သတင်းလေးပေါ့။ အဲဒီတော့ ဒီဟာက ဒီအချိန်မှာ တော်လှန်ရေး စစ်ရေးကဏ္ဍမှာ အရှိန်အဟုန်တွေမြှင့်တင်ပြီးတဲ့အချိန်မှာ အရေးကြီးတဲ့ အချိန်မှာ မြန်မာပြည်တွင်းမှာ ဖြစ်နေတဲ့ မြန်မာပြည်သူလူထုတွေရဲ့ တော်လှန်ရေး၊ စစ်အုပ်စုရဲ့ အကြမ်းဖက်မှုတွေ၊ အခုအချိန်မှာဆိုရင် စစ်အုပ်စုက သူတို့ ခံနေရတာနဲ့ လူတွေကို သတ်တာ ပိုများတယ်။ လေကြောင်းက တိုက်တယ်။ အမြောက်ကြီးတွေနဲ့ ပစ်တယ်။ ရွာတွေ မြို့တွေကို မီးရှို့တယ်။ ဒီတစ်လကျော်ကာလအတွင်းမှာ စစ်ရှောင်ဒုက္ခသည် ၅ သိန်းကျော် တိုးလာတယ်။ နောက်ပြီးတော့ တော်လှန်ရေး အင်အားစုတွေ အပေါ်မှာ ဓာတုလက်နက်တွေ သုံးလာတဲ့ အထောက်အထားတွေလည်း တွေ့ရတယ်။ ကလက်စတာဗုံးလို့ခေါ်တဲ့ ပိတ်ပင်တားမြစ်ထားတဲ့ ဗုံးတွေ သုံးပြီး လူအမြောက်အများ၊​အရပ်သားအမြောက်အများ သေကြေအောင် လုပ်တာတွေ ၊ ရည်ရွယ်ချက်ရှိရှိနဲ့ အရပ်သားတွေကို သတ်တာတွေ တွေ့ရတယ်။ အဲဒီအချိန်မှာ သံအမတ်ကြီးအနေနဲ့ ကမ္ဘာ့ကုလသမဂ္ဂမျက်နှာစာမှာ ဒီအဖြစ်မှန်တွေကို တစ်ကမ္ဘာလုံးက သိအောင်၊ ကမ္ဘာ့ခေါင်းဆောင်တွေ သိအောင် ပြောပြခွင့်ရနိုင်တယ် ဆိုတာ တော်လှန်ရေးအတွက် အင်မတန်မှ ကောင်းမွန်တဲ့ရလဒ်တစ်ခုလို့ ပြောကြားချင်ပါတယ်။ စစ်အုပ်စုအတွက်ကတော့ ဘယ်လိုမှ အဖက်ဆယ်လို့ မရတဲ့ ဆုံးရှုံးမှုတစ်ခုပါပဲ။

မေး - ကုလသမဂ္ဂမှာ မြန်မာသံအမတ်ကြီး ဦးကျော်မိုးထွန်း ဆက်လက်ပြီးတော့ ကိုယ်စားပြုခွင့်ရဖို့အတွက် ပြည်ပရောက်မြန်မာတွေရော၊ ပြည်တွင်းက သပိတ်အင်အားစုတွေ၊ ပြည်သူတွေက ‘ငါတို့ သံအမတ်၊ ငါတို့ အသံ’ လှုပ်ရှားမှုတွေ၊​ ဆန္ဒထုတ်ဖော်မှုတွေ လုပ်ဆောင်ခဲ့ကြတယ်။ ဒါတွေက အခုလို သံအမတ်ကြီး ဆက်လက်ရရှိရေးအတွက် ဘယ်လောက်အကျိုးဖြစ်ထွန်းစေခဲ့သလဲ။ ပါဝင်ခဲ့တဲ့ မြန်မာပြည်သူတွေကို ဘာများ သတင်းစကားပါးလိုပါလဲ။

ဖြေ - ဒါက အင်မတန်အရေးကြီးဆုံးအချက်ပါ။ သံအမတ်ကြီးဟာ ကုလသမဂ္ဂမှာ မြန်မာနိုင်ငံပြည်သူလူထုကို ကိုယ်
စားပြုတယ်။ မြန်မာပြည်သူလူထုရဲ့ အသံဟာ အင်မတန်အရေးကြီးပါတယ်။ ပြည်တွင်း၊ ပြည်ပမှာရှိတဲ့ မြန်မာပြည်သူတွေက သံအမတ်ကြီးရဲ့ credentials campaign မှာ တခဲနက် ဦးကျော်မိုးထွန်းသည်သာ ကျွန်တော်တို့၊ ကျွန်မတို့ရဲ့ ကိုယ်စားလှယ်ဖြစ်တယ်ဆိုတာကို အတိအလင်းပြောကြားတာ၊ အဲဒါဟာာ အင်မတန်မှ အရေးကြီးတဲ့အချက်ပါ။ အဲဒီအသံတွေက ဒီဆုံးဖြတ်ချက်တွေ အပေါ်မှာ ရောင်ပြန်ဟပ်စေပါတယ်။ ကျွန်တော်တို့ အမြဲပြောပါတယ်။ တိုင်းရင်းသားပြည်သူလူထုတွေရဲ့ အင်အားသည်သာ အဓိကဖြစ်တယ်။ အခုနိုင်ငံတကာမျက်နှာစာမှာရော၊ စစ်ရေးမျက်နှာစာမှာရော၊ ဒီပြည်သူလူထုရဲ့ အင်အားတွေကြောင့် အောင်ပွဲတွေရနေတာ။ အောင်ပွဲတွေ ဆက်လက်ခံပြီးတော့၊ ပိုမိုကြီးမားတဲ့ အောင်ပွဲတွေ ရပြီးတော့ စစ်အာဏာရှင်စနစ်ကို အမြစ်ဖြုတ်ဖို့အတွက်ကလည်း မြန်မာပြည်သူလူထုရဲ့ အင်အားနဲ့ အမြစ်ဖြုတ်နိုင်မှာ။ အဲဒီကာလသည်လည်း ပြည်သူလူထုရဲ့ ညီ
ညွတ်မှု အင်အား၊ ဟန်ချက်ညီညီနဲ့ဆောင်ရွက်မှုကြောင့် အချိန်တိုတိုအတွင်းမှာ ဖြစ်ရပါလိမ့်မယ်လို့ ပြောကြားချင်ပါတယ်။

ကျေးဇူးတင်ပါတယ်။ ။

အိန္ဒိယ- မြန်မာနယ်စပ်ရှိ စစ်ကောင်စီတပ်စခန်းကို AA စခန်းသိမ်းတိုက်ပွဲဆင်နွှဲနေ

▪️ကျောက်ဖြူနှင့်မောင်တောတွင် AAနှင့်စစ်ကောင်စီတိုက်ပွဲဖြစ်၊အရပ်သားများကိုဖမ်းဆီးမှု စစ်ကောင်စီဆက်လုပ်

ရှိုင်း/People’s Spring

မြန်မာ -အိန္ဒိယ နယ်စပ်ရှိ စစ်ကောင်စီတပ်စခန်းတစ်ခုကိုသိမ်းပိုက်နိုင်ရေး ရက္ခိုင့်တပ်တော်(AA)က ထိုးစစ်ဆင်တိုက်ခိုက်လျက်ရှိကြောင်း ညီနောင်မဟာမိတ်သုံးဖွဲ့က သတင်းထုတ်ပြန်သည်။

၁၀၂၇ စစ်ဆင်ရေး ဒီဇင်ဘာ ၂၂ရက် တိုက်ပွဲသတင်းကို ညီနောင် ၃ဖွဲ့က အသိပေးထုတ်ပြန် ရာ၌ ဖော်ပြခဲ့ခြင်းဖြစ်သည်။

ပလက်ဝမြို့နယ်၊ အိန္ဒိယနယ်စပ် BP-9 မြိတ်ဝရွာ၏ တောင်ဘက် (၅)ကီလိုမီတာအကွာ နယ်စပ်မှတ်တိုင် BP-5 ၏ အရှေ့ဘက်ရှိ ပွိင့် (၃၇၇) စခန်းအား အပြီးသတ်ချေမှုန်းသိမ်းပိုက်နိုင်ရန် အတွက် AA က ထပ်မံ ကြိုးပမ်းနေသည်ဟု အသိပေးသည်။

မောင်တောမြို့နယ်မြောက်ပိုင်း ကြောင်နဘေကျေးရွာနားတွင် လည်း ထိတွေ့မှု ဖြစ်ခဲ့ကြောင်း ၊ စစ်ကောင်စီတပ်က ကြောင်နဘေကျေးရွာအား မီးရှို့ဖျက်ဆီးခဲ့ကြောင်း ထုတ်ပြန်သည်။

မောင်တောမြို့၊ မြို့သူကြီး ၊ နခခ (၅) တပ်ရင်းမှ လက်နက်ကြီး များဖြင့် ရမ်းကားပစ်ခတ်တိုက်ခိုက်ခဲ့သောကြောင့် မောင်တောမြို့နယ်ရှိ ဗောဓိကုန်းရွာ၏ မြောက်ဘက်တွင် လက်နက်ကြီးများ ကျရောက်ပေါက်ကွဲခဲ့သည်ဟုဆိုသည်။ မောင်တောအခြေစိုက်ဗောဓိကုန်းနယ်ခြားစောင့်တပ်စခန်းမှ ကံသာယာ (အလယ်) ကျေးရွာနှင့် အနီးတဝိုက်သို့ လက်နက်ငယ်များဖြင့် ရမ်းပစ်ခတ်ခဲ့သည်ဟု အသိပေးသည်။

ကျောက်ဖြူမြို့နယ်ရှိ စစ်ကောင်စီ၏ ဓညဝတီရေတပ်စခန်းအနီး၌ စစ်ကောင်စီစစ်ကြောင်းတစ်ခုမှ ရက္ခိုင့်တပ်တော် (AA) လှုပ်ရှားရာနယ်မြေသို့ ရုတ်ချည်း စစ်ကျွံလာ၍ ထိတွေ့တိုက်ပွဲဖြစ်ခဲ့ကြောင်း ထုတ်ပြန်သည်။ တိုက်ပွဲအသေးစိတ် အခြေအနေများကို ဖော်ပြမထားပေ။

ရသေ့တောင်မြို့နယ်ရှိ စစ်ကောင်စီ၏ “ကိုးတန်ကောက်နယ်ခြားစောင့်တပ်စခန်းမှ စစ်ကောင်စီတပ်ဖွဲ့ဝင် (၁၀) ဦးခန့်သည် ဒေသခံနှစ်ဦးပိုင်ဆိုင်သည့် မရိတ်သိမ်းရသေးသည့် စပါးခင်းများသို့ ဝင်ရောက်ကာ တမင်ရည်ရွယ်ချက်ရှိရှိ ဓါတ်ဆီလောင်းကာ မီးရှို့ခဲ့၍ စပါး ၂ဧကကျော် မီးလောင်ခဲ့သည်ဟု ထုတ်ပြန်သည်။

အပြစ်မဲ့အရပ်သားများအား မတရားဖိနှိပ်ဖမ်းဆီးမှုများကိုလည်း စစ်ကောင်စီက ဆက်လက်ပြုလုပ်ခဲ့ကြောင်း၊ စစ်တွေမြို့နယ်ရှိ ကိုးရီးယားဆိပ်ကမ်းသို့ ဈေးလာဝယ်သည့် အပြစ်မဲ့အရပ်သား အမျိုးသမီးသုံးဦးနှင့် အမျိုးသား ရှစ် ဦးတို့အား ပေါက်တောမြို့နယ်၊ ရဖီးချပ်တောင်အောက် မြစ်ထဲ၌ ရပ်နားထားသည့် စစ်ကောင်စီနေဗီ (၄၄၃)မှဖမ်းဆီးပြီး စစ်တွေရဲစခန်းသို့ ဖမ်းခေါ်သွားသည်ဟု ဆိုသည်။

အဆိုပါ အရပ်သားများစီးနင်းလာသည့် လှေသဗ္ဗာန်၊ ဟွန်ဒါများ၊ ဝယ်ယူလာသည့် ပစ္စည်းများကိုပါ တပါတည်း သိမ်းဆည်းသွားသည်ဟု ထုတ်ပြန်သည်။

ထို့ပြင် သံတွဲမြို့နယ် ကင်းမောကျေးရွာမှ ဒေသခံ ၁ဦးအား ဖမ်းဆီးပြီး ငပလီ ခမရ (၅၅) တပ်ရင်း၌ ဖမ်းဆီးထိန်းသိမ်းထားသည်ဟု ဖော်ပြသည်။

တောင်ကုတ်အခြေစိုက် စစ်ကောင်စီတပ်ကလည်း တပျော့ကျေးရွာအတွင်းသို့ ဝင်ရောက်၍ ဒေသခံ (၆)ဦးအား ဖမ်းခေါ်သွားပြီး သုံးဦးသာ ပြန်လွှတ်ပေးခဲ့သည်ဟု ဆိုသည်။

(ရက္ခိုင့်တပ်တော်(AA) စစ်သင်တန်းဆင်းပွဲတစ်ခုအား တွေ့ရစဉ်။ ဓာတ်ပုံ - AA)

ဟုမ္မလင်းမြို့နယ်ရှိ စစ်ကောင်စီ ရှေ့တန်းစခန်းနှစ််ခုကို PDF ပူးပေါင်းတပ်ဖွဲ့များ သိမ်းယူ

▪️စစ်ကောင်စီက လေကြောင်းမှဗုံးကြဲတိုက်ခိုက်

နန်းနောင့်နောင့်/People's Spring

စစ်ကိုင်းတိုင်း၊ ဟုမ္မလင်းမြို့နယ်ရှိ စစ်ကောင်စီ​၏ ရှေ့တန်းစခန်းနှစ်ခုကို ပြည်သူ့ကာကွယ်ရေးပူး‌ပေါင်းတပ်ဖွဲ့များက တိုက်ခိုက်သိမ်းပိုက်ပြီးနောက် ဇီးပင်သာ၊နောင်ဆန်းကျင်နှင့် တီလောင် ကျေးရွာတို့ကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ကြောင်း သတင်းရရှ်ိသည်။

ဟုမ္မလင်းမြို့နယ်အတွင်း ရွာချင်းဆက်နေသည့် ဇီးပင်သာ၊နောင်ဆန်းကျင်နှင့်တီလောင်ကျေးရွာအနီးရှိ စစ်ကောင်စီနှင့် ရှမ်းနီတပ်ပူးပေါင်းတပ်ဖွဲ့ ရှေ့တန်းစခန်းနှစ်ခုကို ပြည်သူ့ကာကွယ်ရေးပူးပေါင်းတပ်ဖွဲ့များ ဒီဇင်ဘာ ၁၉ရက်တွင် တိုက်ခိုက်သိမ်းပိုက်ခဲ့သည်။

ထို့နောက် ဒီဇင်ဘာ ၂၂ရက် နေ့လယ် ၁နာရီခန့်တွင် စစ်ကောင်စီက အဆိုပါရွာသုံးရွာအတွင်း ဗုံး သုံးလုံးကြဲချတိုက်ခိုက်သွားသည်ဟု ပြည်သူ့အုပ်ချုပ်ရေးအဖွဲ့ဝင်တစ်ဦးက ပြောသည်။

"စခန်းအသိမ်းခံရလို့ လေကြောင်းကနေ လာပစ်နေတာ။ ဘေးလွတ်ရာ ရှောင်နေကြရတယ်။ ဒီရက်ထဲ လေကြောင်းအန္တရာယ်ကို အထူး သတိပေးထားရတဲ့ အနေအထားပါ"ဟု ဇီးပင်သာကျေးရွာဒေသခံတစ်ဦးက ပြောသည်။

စခန်းသိမ်းတိုက်ပွဲအတွင်း စစ်ကောင်စီဘက်မှထိခိုက်မှုကို အတိအကျမသိရှိရသေးပေ။

သို့သော် စစ်ကောင်စီတပ်ဖွဲ့ဝင်များသည် ဟုမ္မလင်းမြို့ပေါ်ရှိ တပ်ရင်းသို့ ပူးပေါင်းသွားကြောင်းသတင်းရရှိသည်။

စစ်ကောင်စီ၏လေကြောင်းအန္တရာယ်ကိုကြောက်လန့်၍ ဒေသခံ နှစ်ထောင်ခန့်မှာ ဘေးလွတ်ရာတိမ်းရှောင်နေကြရသည်။

ယမန်နေ့က တိုက်ခိုက်မှုတွင် အရပ်သားထိခိုက်မှုမရှိခဲ့သော်လည်း နေအိမ်လေးလုံးပျက်စီးခဲ့သည်။ စစ်ကောင်စီတပ်သည် ဟုမ္မလင်းမြို့နယ်အပြင် ၊ရွှေပြည်အေး၊ ဖောင်းပြင်၊ တမူးမြို့နယ်တို့ကို ဟုမ္မလင်းမှ တက်လာသော Mi-2 တိုက်ခိုက်ရေးရဟတ်ယာဉ်ဖြင့် မကြာခဏဗုံးကြဲတိုက်ခိုက်နေကြောင်း ကာကွယ်ရေးရေးဘော်များကပြောသည်။

ဒီဇင်ဘာ ၂၁ ရက် ညနေ ၄ နာရီ ၂၀ မိနစ်ခန့်ကလည်း ဖောင်းပြင်မြို့နယ်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီက လေကြောင်းတိုက်ခိုက်ခဲ့၍ အမျိုးသားတစ်ဦး သေဆုံးပြီး အမျိုးသမီးလေးဦး၊ အမျိုးသားငါးဦးဒဏ်ရာရခဲ့ကြောင်း သတင်းရရှိသည်။

ဖောင်းပြင်မြို့နယ် သရောင်းနှင့်ထောမကျေးရွာအားတိုက်ခိုက် ရေးရဟတ်ယာဉ်ဖြင့် ဗုံး ၁၃လုံးအထိ ကြဲချခဲ့ခြင်းဟု သိရသည်။

ဒဏ်ရာရသူများဆေးကုသမှုခံယူနေရဆဲဖြစ်ပြီး အသက်အန္တရာယ်စိုးရိမ်စရာမရှိတော့ကြောင်း ဖောင်းပြင်မြို့နယ်ပြည်သူ့အုပ်ချုပ်ရေးအဖွဲ့ဝင်တစ်ဦးက ပြောသည်။

(ဟုမ္မလင်းမြို့တည်နေရာအား မြင်တွေ့ရစဉ်)

KNU တပ်မဟာ(၆)တွင် စစ်ကောင်စီလက်နက်ကြီးပစ်၍ အမျိုးသမီးတစ်ဦးသေ၊ နှစ်ဦး ဒဏ်ရာရ

မောင်မောင်/People’s Spring

ကရင်အမျိုးသားအစည်းအရုံး(KNU) ဒူးပလာယာခရိုင် တပ်မဟာ(၆)နယ်မြေတွင် အာဏာသိမ်း စစ်ကောင်စီတပ်မှ ပြည်သူနေ ကျေးရွာအတွင်းသို့ လက်နက်ကြီးများဖြင့် ရမ်းသမ်းပစ်ခတ်မှုကြောင့် အမျိုးသမီးတစ်ဦးသေဆုံးပြီး နှစ်ဦးဒဏ်ရာရခဲ့ကြောင်း KNUက သတင်းထုတ်ပြန်သည်။

ဒီဇင်ဘာ ၁၈ရက်က စစ်ကောင်စီတပ် စကခ(၁၂) လက်အောက်ခံ ခလရ(၂၃၀) တပ်ရင်းမှ (၁၂၀) မမ လက်နက်ကြီးများဖြင့် ပြည်သူနေ ကျေးရွာအတွင်းသို့ ရမ်းသမ်းပစ်ခတ်ခဲ့ရာ ဒူးပလာယာခရိုင် ကျုံဒိုးမြို့နယ် တောင်ကြာအင်းကျေးရွာမှ အသက် (၄၆)နှစ်ရှိ အမျိုးသမီးတစ်ဦး ပွဲချင်းပြီး သေဆုံးခဲ့ရကြောင်း ဖော်ပြသည်။

ဒီဇင်ဘာ ၁၉ရက်တွင်လည်း ခလရ(၂၃၀) တပ်ရင်းမှ ပင်လက်နက်ကြီးများဖြင့် ကျေးရွာများသို့ ထပ်မံပစ်ခတ်ခဲ့၍ တောင်ကြာအင်း ကျေးရွာနေ အမျိုးသမီးနှစ်ဦး လက်နက်ကြီး ကျည်စထိမှန် ဒဏ်ရာရခဲ့သည်ဟု အသိပေးသည်။

ဒဏ်ရာရသူများမှာ အသက် (၇၁)နှစ်အရွယ်နှင့် အသက် (၆၈)နှစ်အရွယ် သက်ကြီးရွယ်အိုများဖြစ်သည်ဟု ထုတ်ပြန်သည်။

KNUနယ်မြေများတွင် စစ်ကောင်စီက လက်နက် ကြီးဖြင့် ရမ်းသမ်းပစ်ခတ်မှု၊ လေကြောင်းတိုက်ခိုက်မှုများ မကြာခဏပြုလုပ်ခဲ့၍ အရပ်သားပြည်သူထိခိုက်သေဆုံးမှုများ ဆက်တိုက်ဖြစ်ပေါ်လျက်ရှိသည်။

(စစ်ကောင်စီတပ် ပစ်ခတ်မှုကြောင့် ထိခိုက်ဒဏ်ရာရသူများအား တွေ့ရစဉ်။ ဓာတ်ပုံ - KNU)