လူထုနှင့် ပူးပေါင်းမလား၊ ချေမှုန်းခံမလား တစ်ခုကို ရွေးရန် KNDF ဒုစစ်ဦးစီးချုပ်က စစ်ကောင်စီတပ်ဖွဲ့ဝင်များအား သတိပေး

သက်ဝေ/People’s Spring

စစ်အာဏာရှင်ဖြုတ်ချရေး စစ်ဆင်ရေးလှိုင်း နောက်တစ်လှိုင်း ထပ်မံပြုလုပ်မည်ဖြစ်၍ စစ်ကောင်စီတပ်သားများအနေဖြင့် လက်နက်ချပြီး လူထုနှင့် ပူးပေါင်းခြင်း သို့မဟုတ် ချေမှုန်းခံခြင်း တစ်ခုခုကိုရွေးချယ်ရန် ကရင်နီအမျိုးသားများကာကွယ်ရေးတပ်(KNDF) ဒုစစ်ဦးစီးချုပ် မာဝီက သတိပေးပြောကြားလိုက်သည်။

KNDF ဒုစစ်ဦးစီးချုပ် မာဝီဦးဆောင်သည့် တပ်ဖွဲ့ကစစ်ကောင်စီတပ်ထံမှ သိမ်းဆည်းရရှိသည့် ငါးကြင်းမြီးသက်သေနတ် ၁၀လက်ကို ကိုင်ဆောင်ထားသည့် ရုပ်သံကို ထုတ်ပြန်ပြီး ထိုသို့ သတင်းစကား ပါးလိုက်ခြင်းဖြစ်သည်။

"လူထုနဲ့ ပူးပေါင်းပြီး လက်နက်ချမလား ချေမှုန်းခံမလား လမ်းနှစ်လမ်းရှိတယ်။ ကြိုက်တဲ့လမ်းရွေး။ နောက်တစ်လှိုင်း ထပ်လာမယ်။ချေမှုန်းခံမယ်ဆိုရင်တော့ ရယ်ဒီလုပ်ထားပါ"ဟု ဒုစစ်ဦးစီးချုပ် မာဝီက ပြောသည်။

KNDF စစ်ဦးစီးချုပ်သည် ကရင်နီဒေသ ၁၁၁၁ စစ်ဆင်ရေးတွင်ရှေ့တန်းတွင် ကိုယ်တိုင်ပါဝင် တိုက်ပွဲဝင်နေပြီး လွိုင်ကော်တက္ကသိုလ်တိုက်ပွဲတွင် စစ်ကောင်စီတပ်သားများ လက်နက်ချရန် ပြောဆိုခဲ့သူဖြစ်ပြီး စစ်ကောင်စီတပ်သားများစွာ လက်နက်ချခဲ့ကြသည်။ အဆိုပါတိုက်ပွဲ၌ စစ်ကောင်စီတပ် ရင်း ၂ရင်း မှ တပ်ဖွဲ့ဝင် အများအပြား သေဆုံးပြီး လက်နက်ခဲယမ်းများစွာ သိမ်းဆည်းရရှိခဲ့သည်။

ထို့ပြင် နိုဝင်ဘာ ၂၉ရက် စစ်ကောင်စီ အစည်းအဝေးတွင် စစ်ခေါင်းဆောင်မင်းအောင်လှိုင်က လွိုင်ကော်မြို့ကို ပြန်လည်ထိန်းချုပ်ထားနိုင်ပြီဖြစ်ကြောင်း ပြောကြားခဲ့ရာ ဒုစစ်ဦးစီးချုပ် မာဝီက စစ်ကောင်စီတပ်အနီးရှိ လွိုင်ကော်မြို့နယ် နောင်ယားကန်တံတားပေါ်တွင် ၎င်းကိုယ်တိုင် သွားရောက်ကာ စစ်ကောင်စီခေါင်းဆောင်၏ ဗြောင်လိမ်ပြောဆိုမှုကို တုံ့ပြန်ခဲ့သူဖြစ်သည်။

▪︎Photo News

ထယ်ဘွယ်စစ်ကောင်စီတပ်စခန်းသိမ်းတိုက်ပွဲကလက်နက်ခဲယမ်းအများအပြားရ

-People's Spring

ချင်းပြည်နယ်၊ မတူပီမြို့နယ်နဲ့ ပလက်၀မြို့နယ်အစပ်မှာရှိတဲ့ ထယ်ဘွယ်စစ်ကောင်စီတပ်စခန်းကို CDF-မတူပီ ဦးဆောင်တဲ့ ချင်းပူးပေါင်းတပ်ဖွဲ့က ဒီဇင်ဘာ ၁၉ရက်နေ့ မှာသိမ်းပိုက်ပြီး​တော့ CDFမတူပီရဲ့အလံလွှင့်ထူလိုက်ပါတယ်။ စခန်းသိမ်းတိုက်ပွဲက​နေ လက်နက်ခဲယမ်း​တွေအများအပြားရခဲ့ပြီး​တော့ စခန်းသိမ်းတိုက်ပွဲ သတင်းဓါတ်ပုံ​တွေကို ဒီက​နေ ထပ်မံထုတ်ပြန်ပါတယ် ။ထယ်ဘွယ် စစ်ကောင်စီတပ်စခန်းကို ဒီဇင်ဘာ ၁၈ရက်နေ့မှာ CDFမတူပီ၊ CDF-မင်းတပ်၊ CDF-Lautu နဲ့ CNDF ပူးပေါင်းတပ်ဖွဲ့က တိုက်ခိုက်သိမ်းပိုက်နိုင်ခဲ့တာပါ။

ချင်းပြည်နယ်နဲ့ မကွေးတိုင်းအစပ်ကဘုံဇုံးစစ်ကောင်စီတပ်စခန်းကိုလည်း ဒီဇင်ဘာ ၁၈ရက်နေ့မှ ချင်းအမျိုးသားတပ်
မတော် (CNA)ကဦး​ဆောင်ပြီး CDF-ဟားခါး၊ CDF-ထန်တလန် နဲ့ CDF-KKG ပူးပေါင်းတပ်ဖွဲ့က သိမ်းပိုက်ခဲ့ပါ​သေးတယ်။ ဘုံဇုံးစခန်းသိမ်းတိုက်ပွဲမှာ စစ်​ကောင်စီတပ်က ၁၀ဦး​သေ ၊၆ ဦးစစ်သုံ့ပန်းအဖြစ်ဖမ်းမိပြီး အများအပြားထွက်​ပြေးကုန်ပြီး​တော့လက်နက်မျိုးစုံ ၃၂ လက်ရတယ်လို့ CDFဟားခါးကထုတ်ပြန်ထားပါတယ်။

ဓါတ်ပုံ-CDF မတူပီ ၊ CDF-KKG ၊CJ

၁၀၂၇ ထိုးစစ်​ကြောင့်အထိနာ​နေတဲ့ စစ်တပ်ဟာ စစ်ရာဇ
ဝတ်မှုတွေ ကျူးလွန်နေလို့ စုံစမ်းစစ်​ဆေးဖို့ AI တိုက်တွန်း

-People's Spring

ရှမ်းပြည်နယ် ​မြောက်ပိုင်းမှာ ညီ​နောင်မဟာမိတ် သုံးဖွဲ့ရဲ့ ၁၀၂၇ ထိုးစစ်ဒဏ်ကို အလူးအလဲခံနေရတဲ့ အာဏာသိမ်း စစ်ကောင်စီဟာ အရပ်သားပြည်သူတွေကိုပါ သိမ်းကြုံးတိုက်ခိုက်တာ အပါအဝင် ဆိုးရွားတဲ့ စစ်ရာဇဝတ်မှုတွေ ကျူးလွန်နေကြောင်း စွပ်စွဲမှုတွေ ရှိနေပါတယ်။

နိုင်ငံတကာ လွတ်ငြိမ်းချမ်းသာခွင့်အဖွဲ့ (AI)က စစ်ကောင်စီဟာ တိုင်းရင်းသား နယ်မြေတွေမှာ ကျင့်ဝတ်ပိုင်းအရ အငြင်းပွားစရာ ဗုံးပဒေသာ (cluster munitions)
လို ဖျက်အားပြင်း လက်နက်တွေကို အရပ်သား ဧရိယာတွေပါ မရှောင်ဘဲ အသုံးပြု တိုက်ခိုက်နေတဲ့အတွက် ထိရောက်တဲ့ စုံစမ်းစစ်ဆေးမှုတွေ လုပ်ဆောင်စေလိုကြောင်း တိုက်တွန်း တောင်းဆိုခဲ့ပါတယ်။

စစ်​ကောင်စီတပ်ဟာ အာဏာသိမ်းခဲ့တဲ့နောက်ပိုင်း ဘယ်
တုန်းကမှနဲ့ မတူအောင် အချိတ်အဆက်မိမိ ထိုးစစ်ဆင် တိုက်ခိုက်မှုတွေကို ခံနေရပြီး အထူးသဖြင့် ညီနောင် မဟာမိတ် သုံးဖွဲ့ရဲ့ နိုင်ငံ အရှေ့မြောက်ပိုင်း ရှမ်းပြည်နယ်နဲ့ နိုင်ငံ အနောက်ဖက်စွန်း ရခိုင်ပြည်နယ်တွေမှာ ဆင်နွှဲတဲ့ စစ်ဆင်ရေးတွေကြောင့် အကြီးအကျယ် အထိနာနေပါတယ်။

AIက စစ်လက်နက် သုတေသီတွေဆီက မှတ်ချက်တွေကို ကိုးကားပြီး ရှမ်းပြည်နယ် မြောက်ပိုင်းမှာ အခုလ အစောပိုင်းက ပြုလုပ်ခဲ့တဲ့ ဗုံးကြဲ တိုက်ခိုက်မှု တခုအတွင်း စစ်တပ် အနေနဲ့ ဗုံးပဒေသာတွေကို အသုံးပြုခဲ့တယ်လို့ ယုံကြည်ရကြောင်း ထုတ်ပြန်ခဲ့ပါတယ်။

ညီနောင် မဟာမိတ် သုံးဖွဲ့မှာ ပါဝင်တဲ့ တအားင် အမျိုးသား လွတ်မြောက်ရေး တပ်မတော် (TNLA)က အဲဒီ တိုက်ခိုက်မှုအတွင်း အရပ်သား ၁ ဦးသေဆုံးပြီး ၅ ဦး ဒဏ်ရာရခဲ့ကြောင်း ပြောပါတယ်။

တချိန်တည်းမှာပဲ ရခိုင်ပြည်နယ်၊ ပေါက်တောမြို့နယ်ထဲက အရပ်သား ၁၀ ဦးကို AI က မေးမြန်းခဲ့တဲ့နောက် ဒေသခံတွေဟာ စစ်တပ်ရဲ့ လုယက်မှုတွေ၊ စိတ်ထင်ရာ ဖမ်းဆီးမှုတွေ၊ လူမဆန်တဲ့ ဖိနှိပ်မှုနဲ့ နှိပ်စက်ညှင်းပန်းမှုတွေကို ခါးစည်း ခံနေရတယ်လို့ ဖော်ထုတ်တွေ့ရှိလာခဲ့ပါတယ်။

မြန်မာစစ်တပ်ရဲ့ သွေးစွန်းတဲ့ လုပ်ရပ်တွေဟာ ဆက်လက်ကျူးလွန်နေဆဲ ဖြစ်ကြောင်း၊ စစ်ဘက် အရပ်ဖက် မခွဲခြားဘဲ တိုက်ခိုက်နေတာတွေဟာ ပြည်သူလူထုအပေါ် အကြီး
အကျယ် ထိခိုက်စေခဲ့ကြောင်း၊ တိုင်းရင်းသား တပ်ဖွဲ့တွေရဲ့ ထိုးစစ်ဆင်မှုကို ကြုံလာတဲ့အခါ စစ်တပ်ဟာ လုပ်နေကျ နည်းတွေအတိုင်း တုံ့ပြန်နေတာဖြစ်ကြောင်း AIရဲ့ စီမံတုံ့ပြန်ရေးဌာန ဒါရိုက်တာ မတ်ဝဲလ်စ်က ပြောပါတယ်။

စစ်ကောင်စီ ပြောရေးဆိုခွင့်ရ အရာရှိ ဗိုလ်ချုပ် ဇော်မင်းထွန်းကတော့ စစ်တပ်ရဲ့ ကိုင်တွယ်မှုတွေဟာ အကြမ်းဖက် အဖွဲ့အစည်းတွေကို စည်းမျဉ်း ဥပဒေတွေနဲ့အညီ တုံ့ပြန်နေတာသာ ဖြစ်ကြောင်း ပြောကြားပြီး အရပ်သားတွေကို ပစ်မှတ်ထားတယ်ဆိုတဲ့ စွပ်စွဲချက်တွေကို ငြင်းဆန်ခဲ့ပါတယ်။

အောက်တိုဘာ လကုန်ပိုင်းကစလို့ အော်ပရေးရှင်း ၁၀၂၇ စတင်ခြင်းနဲ့အတူ နိုင်ငံအနှံ့မှာ စစ်ရှောင် ဦးရေ ၃ သိန်းလောက် ထပ်တိုးလာကြောင်း၊ အာဏာသိမ်းပြီး နောက်ပိုင်းကတည်းက မြန်မာနိုင်ငံမှာ နေရပ်စွန့်ခွာ ထွက်ပြေးရသူ ၂ သန်းကျော် ရှိနှင့်ပြီးဖြစ်ကြောင်း ကုလသမဂ္ဂက ထုတ်ပြန်ထားပါတယ်။

AIရဲ့ အစီရင်ခံမှု မတိုင်ခင် ကတည်းက ညီနောင် မဟာမိတ် သုံးဖွဲ့က စစ်တပ်ဟာ ပဋိပက္ခ နယ်မြေတွေမှာ အရပ်သားတွေကို ထင်တိုင်းကြဲ ဖမ်းဆီးတာတွေ၊ နှိပ်စက်တာတွေ၊ လူသားဒိုင်းအဖြစ် အသုံးချတာမျိုးတွေနဲ့ ခြိမ်းခြောက် ဗိုလ်ကျနေခဲ့ကြောင်း ကြေညာထားခဲ့ဖူးပါတယ်။

AI ရဲ့အစီရင်ခံစာမှာ မပါ​ပေမယ့် စစ်​ကောင်စီတပ်ဟာ ၁၀၂၇ စစ်ဆင်​ရေး​တွေ​ကြောင့် အထိနာ​နေချိန်မှာ ရှမ်းပြည်နယ်​မြောက်ပိုင်း ၊ရခိုင်ပြည်နယ်တို့မှာ ဓါတုဗုံး​တွေအသုံးပြုခဲ့ပါ​သေးတယ် ။

ရှမ်းပြည်နယ် ​မြောက်ပိုင်းတစ်​နေရာတွင် စစ်​ကောင်စီတပ်က ပြည်သူများရှိ​သော​နေရာကိုပါကျဲချထား​သော ဗုံးပ​ဒေသာ (cluster munitions) ကျည်ခွန်အစိတ်အပိုင်း။
ဓါတ်ပုံ- CJ/ AI

စစ်ကောင်စီကို ပြောက်ကျားတိုက်ခိုက်နေသည့် ရေးဘီလူးအဖွဲ့ NUG ကာကွယ်ရေး၏ ကွပ်ကဲမှုခံယူ

"ပိုပြီးတော့ အင်အားကြီးမားလာမယ်။ တော်လှန်ရေးအားကောင်းလာမယ်။ နောက်ပြီးတော့ ပိုပြီး စနစ်ကျလာမယ်။ တိုက်ခိုက်တဲ့နေရာမှာလည်း စနစ်တကျ ဖြစ်လာမယ်" - ရေးဘီလူးအဖွဲ့ခေါင်းဆောင်

သက်ဝေ/People’s Spring

မွန်ပြည်နယ် ရေးမြို့နယ်အတွင်း စစ်ကောင်စီတပ်နှင့် လက်အောက်ခံများအထိနာအောင် ပြောက်ကျားတိုက်ခိုက်မှုများ ဖော်ဆောင်ခဲ့သည့် ရေးဘီလူးအဖွဲ့အနေဖြင့် အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာန၏ ကွပ်ကဲမှု ခံယူပြီး တော်လှန်ရေး ပိုအားကောင်းအောင်ဆောင်ရွက်မည်ဟု ရေးဘီလူးအဖွဲ့ခေါင်းဆောင်က ပြောသည်။

ရေးဘီလူးအဖွဲ့အနေဖြင့် စစ်အာဏာရှင်စနစ်ချုပ်ငြိမ်းရေးအတွက် မြို့ပြ စစ်ဆင်ရေးတာဝန်များကို အစဉ်တစိုက်ကြိုးစားဆောင်ရွက် ခဲ့ကြောင်း၊ ယခု အခါ တော်လှန်ရေးအရှိန်မြှင့်လာသည်နှင့်အညီ စစ်ဆင်ရေးတာဝန်များကို ဗျူဟာအစီအစဉ်တကျ ပိုမိုအရှိန်မြှင့် ဆောင်ရွက်နိုင်ရန် ရည်ရွယ်ပြီး NUGကာကွယ်ရေးဝန်ကြီးဌာန (MOD)၊ ပြည်သူ့ကာကွယ်ရေးတပ်မတော်၊ တောင်ပိုင်းစစ်ဒေသ၏ ကွပ်ကဲမှုကို ခံယူ၍ အထူးစစ်ဆင်ရေးတပ်ဖွဲ့(SOF)၏တပ်ခွဲ တစ်ခုအနေဖြင့် ဆက်လက်တာဝန်ထမ်းဆောင်သွားမည်ဟု တပ်ခွဲမှူး ရေးဘီလူးက ယနေ့ (ဒီဇင်ဘာ ၂၂ရက်)တွင် အသိပေးထုတ်ပြန်သည်။

"MOD အောက်ကနေ ကာကွယ်ရေးဝန်ကြီးဌာနအောက်ကနေ သွားမယ်ဆိုရင် ပိုပြီးတော့ အင်အားကြီးမားလာမယ်။ တော်လှန်ရေးအား ကောင်းလာမယ်။ နောက်ပြီးတော့ ပိုပြီး စနစ်ကျလာမယ်။ တိုက်ခိုက်တဲ့နေရာမှာလည်း စနစ်တကျ ဖြစ်လာမယ်။ ပြီးလို့ရှိရင် ခဲယမ်းပိုင်းတွေဆိုလို့ရှိရင် ပိုပြီး အားကောင်းလာမယ်"ဟု SOF တပ်ခွဲမှူး ရေဘီလူးက ပြောသည်။

မူလက စစ်ကောင်စီကို တိုက်ခိုက်ရာ၌ ပြည်သူလူထုနှင့် အတူရုန်းကန်ခဲ့ရကြောင်း၊ လက်ရှိတွင် ယခင်အခြေအနေမျိုးမဟုတ်တော့ဘဲ အင်အားပိုမိုကြီးထွားလာပြီး မွန်ပြည်နယ် တစ်ခုလုံး၌ တိုက်ပွဲများဖော်ဆောင်နိုင်မည်ဟု မျှော်လင့်ကြောင်း ၎င်းက ပြောသည်။

"ကွပ်ကဲမှုအောက်ထဲကျနော်တို့ ဝင်လိုက်တယ်ဆိုတာက ကျနော်တို့အခြေအနေတစ်ရပ်ပေါ့ ပြောရရင် ဥပဒေဘောင်နဲ့ အဲဒီပုံစံမျိုးသွားချင်တယ်။ အဲဒီလို လမ်းစဉ်တစ်ခုပေါ့။ အဲဒီလိုဆို ပြည်သူ လူထုအတွက် ပိုပြီး အခိုင်အမာတစ်ခုလည်းဖြစ်စေမယ်။နောက်တစ်ခုက အားကိုးရတဲ့ တပ်တစ်တပ်လည်းဖြစ်လာခဲ့မှာပေါ့"ဟု ရေးဘီလူးအဖွဲ့ခေါင်းဆောင်က ပြောသည်။

ယခုထက် အင်အားများ စုဖွဲ့လာနိုင်ပါက စစ်ကြောင်းအနေဖြင့် သွားမည်ဖြစ်ပြီး SOFနှင့် တိုင်တိုင်ပင်ပင် အပြန်အလှန် အကူအညီပေး တိုက်ပွဲဝင်သွားမည်ဟု ရေးဘီလူးအဖွဲ့ခေါင်းဆောင်က ပြောသည်။

ကိုးကန့်ဒေသတွင် ၄ရက်အတွင်း စစ်ကောင်စီ လေကြောင်း တိုက်ခိုက်မှု အကြိမ်၅၀ခန့် ပြုလုပ်

ရန်ရန်/People’s Spring

ကိုးကန့်ဒေသတွင် အာဏာသိမ်းစစ်ကောင်စီတပ်က လေကြောင်း တိုက်ခိုက်မှုများကို ဒီဇင်ဘာ ၁၈ရက်မှ ပြန်လည်စတင်ပြုလုပ်လာရာ ယမန်နေ့ ဒီဇင်ဘာ ၂၁ရက်အထိ လေကြောင်းမှ ၄၉ကြိမ် တိုက်ခိုက်ခဲ့သည်ဟု ကိုးကန့်တပ်မတော်(MNDAA)က ထုတ်ပြန်သည်။

ဒီဇင်ဘာလ ၁၈ ရက် ညနေတွင် စစ်ကောင်စီတပ်ဖွဲ့သည် ကိုးကန့်လောက်ရှမ့်ထန်နေရာရှိ MNDAA၏ ခံတပ်ကို စတင်ထိုးစစ်တိုက်ခိုက်လာသည်မှစ၍ ဒီဇင်ဘာ ၁၀ ရက်နောက်ပိုင်း စစ်ရေးတည်ငြိမ်မှုကို ချိုးဖောက်ခဲ့ခြင်းဖြစ်သည်ဟု ဖော်ပြသည်။

ထို့နောက် ယခုရက်ပိုင်းအတွင်း ကိုးကန့်ဒေသတိုက်ပွဲထပ်မံဖြစ်ပေါ်လာရာ စစ်ကောင်စီ၏လေကြောင်း ပစ်ခတ်မှုလည်း ပိုမိုပြင်းထန်လာကြောင်း ထုတ်ပြန်ကာ လေကြောင်း တိုက်ခိုက်မှု အခြေအနေများကို အသိပေးခဲ့သည်။

စစ်ကောင်စီတပ်ဖွဲ့သည် လေကြောင်းဖြင့် ကိုးကန့်လောက်ရှမ့်ထန်နယ်ခြားစောင့်တပ်အနီး (၁၅)ကြိမ် ၊ မူကွာကျိုင့်နောက်တောင်ကုန်း ပိုက်ထ‌ပေါက်‌ပေါက်နေရာနှင့် လောက်ကိုင် (၃၁၁)ငြိမ်းချမ်းရေးကွင်း (၄)ကြိမ် ၊ တာရှင်ကျိုင့် ၊ ကျင်ရှမ့်ချိန်နှင့်ကျင်စံကျောက်(၈)ကြိမ် ၊ ကွမ်ရင်ရှမ်တောင်အောက်ခြေ ၊ တာကြာကျိုင့် ၊ လောက်ရှမ့်ထန်တောင် နှင့် ကျင်ရှမ့်ချိန်ဟိန်းလိစာသင်ကျောင်း(၁၄) ၊ ရှိတုံ့ရွှေ နှင့် လောက်ရှုကုတ်(၃)ကြိမ် ၊ မာဟိုင်တောင်(၂)ကြိမ် ၊ တာရင်တောင် နှင့် ရှောက်ရင်တောင်(၃)ကြိမ် စုစုပေါင်း ၄၉ကြိမ် တိုက်ခိုက်ခဲ့သည်ဟု ထုတ်ပြန်သည်။

စစ်ကောင်စီသည် လေကြောင်းပစ်ခတ်တိုက်ခိုက် ရာတွင် နေအိမ်များကို ဦးတည်ပစ်ခတ်လာကြောင်း၊ လက်ရှိ စစ်ကောင်စီ၏လေကြောင်းပစ်ခတ်တိုက်ခိုက်မှုကြောင့် နေအိမ်ရပ်ကွက် များဖျက်ဆီးခံရမှုနှင့် လူသေဆုံးမှုများ အသေးစိတ်မတွက်ချက်နိုင်သေးကြောင်း ဖော်ပြထားသည်။

တရုတ်အစိုး၏ ကြားဝင်မှုအရ MNDAAနှင့် စစ်ကောင်စီတပ်တို့သည် ဒီဇင်ဘာ ၁၀ရက်မှစတင်၍ အပစ်ရပ်စဲခဲ့ကြောင်း သတင်းများ ထွက်ပေါ်ခဲ့သည်။ သို့ရာတွင် စစ်ကောင်စီက လေကြောင်းတိုက်ခိုက်မှုပြုလုပ်လာ၍ တစ်ပတ်ကျော်အကြာတွင် ကိုးကန့်တိုက်ပွဲများ ပြန်ဖြစ်ပွားလာကြောင်း MNDAAက အသိပေး ထုတ်ပြန်ခဲ့သည်။

MNDAAသည် ၁၀၂၇ စစ်ဆင်ရေးကာလအတွင်း ကိုးကန့်ဒေသရှိ စစ်ကောင်စီတပ်စခန်း ၂၀၂ခုထက်မနည်းကို တိုက်ခိုက်သိမ်းပိုက်ရရှိထားသည်။


ရုပ်သံ - The Kokang

မြိုင်မြို့ရှိ စစ်ကောင်စီစစ်ဆေးရေးဂိတ်ကို PDFများ တိုက်ခိုက်

ဟာနာဆန်/People's Spring

မကွေးတိုင်း၊ မြိုင်မြို့ပေါ်ရှိ စစ်ကောင်စီစစ်ဆေးရေးဂိတ်ကို သွားရောက်တိုက်ခိုက်ရာ ထိခိုက်မှုရှိကြောင်း မြိုင်မြို့နယ် ပြည်သူ့ကာကွယ်ရေးတပ်ဖွဲ့က သတင်းထုတ်ပြန်သည်။

ယနေ့ (ဒီဇင်ဘာလ ၂၂ ရက်) နံနက် ၁၀နာရီခွဲခန့်က မြိုင်မြို့ပေါ်ရှိ စစ်ကောင်စီတပ်နှင့်ပျူစောထီးများ အထိုင်ချတပ်စွဲထားသော မြို့နယ်စီမံကိန်းရုံး စစ်ဆေးရေးဂိတ်အား သွားရောက်ပစ်ခတ်တိုက်ခိုက်ခဲ့ကြောင်း မြိုင်ပကဖအဖွဲ့က အသိပေးသည်။

"ဂိတ်က ပခုက္ကူဘက်က အဝင်ဂိတ်ပါ။ စခနဲ့ပျူအင်အား ၄၀ လောက်ရှိတယ်။ ဆယ့်ငါးမိနစ်လောက်အပြန်အလှန်ပစ်တယ်။"ဟု မြိုင်ပကဖအဖွဲ့ ပြန်ကြားရေးတာဝန်ခံက ပြောသည်။

အလစ်အငိုက်ဝင်ရောက်တိုက်ခိုက်ခြင်းဖြစ်၍
စစ်အုပ်စုဝင်များ အထိအခိုက်များပြီး စစ်သားတစ်ဦးနှင့်ပျူတစ်ဦးသေဆုံးကြောင်း မြိုင်ပကဖအဖွဲ့က ဆိုသည်။

သို့သော် စစ်ကောင်စီတပ်၏ ထိခိုက်သေဆုံးမှုများအား သီးခြားအတည်ပြုနိုင်ခြင်း မရှိသေးပေ။

အဆိုပါ တိုက်ခိုက်မှုကို မြို့နယ် ပကဖ တပ်ရင်း ၁ /သပြေတော ပကဖနှင့် ဗိုလ်လင်းမြွေအဖွဲ့တို့ ပူးပေါင်းတိုက်ခိုက်ခဲ့ခြင်း ဖြစ်သည်။

မြိုင်(ပကဖ)နှင့်မဟာမိတ်များသည် ပြီးခဲ့သည့် ဒီဇင်ဘာ ၁၆ ရက်ကလည်း မြိုင်မြို့ပေါ်ရှိ ရဲစခန်းအပါအဝင် စစ်ကောင်စီတပ်စွဲရာနေရာများအား မောင်းသူမဲ့ လေယာဉ်ငယ်များဖြင့် ဗုံးချ တိုက်ခိုက်ခဲ့သေးသည်။

မြိုင်(ပကဖ) အဖွဲ့ဝင်ရဲဘော်များအား စစ်ဆင်ရေးတစ်ခုတွင် တွေ့ရစဥ်။ ဓာတ်ပုံ - မြိုင်(ပကဖ)

သင်ကြီးရွယ်အို၊ အမျိုးသမီးနှင့် ကလေးငယ်အများစုနေထိုင်သော စစ်ရှောင်စခန်းကို စစ်ကောင်စီတပ် စီးနင်း၊ ၁၅ ဦးခန့် ဖမ်းဆီးခံရ

ကျော်ဇော/People's Spring

ပဲခူးတိုင်း၊ နတ်တလင်းမြို့နယ်၊ ပဲခူးရိုးမအတွင်းရှိ သက်ကြီးရွယ်အို၊ အမျိုးသမီးနှင့် ကလေးငယ်အများစုနေထိုင်သော စစ်ဘေးရှောင်စခန်းတစ်ခုကို စစ်တပ်က အင်အားအလုံးအရင်းဖြင့် ဝင်ရောက်စီးနင်းခဲ့ကြောင်း သာယာဝတီခရိုင် PDF တပ်ရင်း (၃၈၀၂)မှ တာဝန်ရှိသူတစ်ဦးက People's Spring သတင်းဌာနသို့ ပြောသည်။

ပဲခူးရိုးမအတွင်းရှိ ကျောက်ပြုတ်ကျေးရွာအနီးမှ အမျိုးသမီးများ၊ သက်ကြီးရွယ်အိုနှင့် ကလေးငယ် ၅၀ကျော်နေထိုင်သော စစ်ဘေးရှောင်စခန်းကို စစ်ကောင်စီတပ်က အင်အား ၁၀၀ခန့်ဖြင့် ဒီဇင်ဘာ ၂၁ ရက် မွန်းလွဲ ၃ နာရီခန့်တွင် ဝင်ရောက်စီးနင်းခဲ့ခြင်း ဖြစ်သည်။

"ကလေးတွေ၊ အဘိုးအဘွားတွေ၊ အမျိုးသမီးတွေများတယ်။ သန်သန်မာမာက နည်းတယ်။ စခန်းစီးခံရပြီး သေနတ်ပစ်သံလည်း ကြားရတယ်"ဟု သာယာဝတီခရိုင် တပ်ရင်း (၃၈၀၂)မှ တာဝန်ရှိသူတစ်ဦးက People's Spring သို့ ပြောသည်။

အဆိုပါ စစ်ဘေးရှောင်စခန်း စီကောင်စီတပ်၏ စီးနင်းခြင်းခံရစဥ် စစ်ရှောင်အမျိုးသမီးများအပါအဝင် ၁၅ ဦးခန့်ဖမ်းဆီးခံရသည့်အပြင် ပြည်သူသုံးဦးကို စစ်ကောင်စီတပ်က ပစ်သတ်ခဲ့သည်ဟု ကနဦးသိရပြီး ဆက်လက်အတည်ပြုစုံစမ်းဆဲဖြစ်ကြောင်း ၎င်းက ဆက်ပြောသည်။

စစ်ကောင်စီတပ်၏ ဝင်ရောက်စီးနင်းအကြမ်း ဖက်ခြင်းခံခဲ့ရသော စစ်ဘေးရှောင်စခန်းတွင် နတ်တလင်းမြို့နယ်၊ ပဲခူးရိုးမအစပ်ရှိ ကွေ့ကြီးအပါအဝင် ကျေးရွာအချို့မှပြည်သူများ ဘေးလွတ်ရာလာရောက်တိမ်းရှောင်နေခြင်းဖြစ်ပြီး စီးနင်းခံရမှုကြောင့် စခန်းစွန့်ထွက် ပြေးနေကြရကြောင်း စုံစမ်းသိရသည်။

"ခုက လိုင်းတွေမရ ဖြစ်နေတာ။ ပြေးကြ၊ လွှားကြနဲ့ အဆက်အသွယ်တွေ ပြတ်နေတယ်"ဟု စစ်ရှောင်ပြည်သူများ၏ နောက်ဆုံးအခြေအနေကို တပ်ရင်း(၃၈၀၂)မှ တာဝန်ရှိသူက ရှင်းပြသည်။

လတ်တလောတွင် စစ်ကောင်စီတပ်မှ ပဲခူးရိုးမအတွင်းရှိ သာယာဝတီခရိုင် PDF တပ်ရင်းများ၏ လှုပ်ရှားဒေသများသို့ စစ်ကြောင်းထိုးဝင်ရောက်ရန် စစ်ရေးပြင်ဆင်မှုများရှိနေကြောင်း တပ်ရင်းတာဝန်ရှိသူများထံမှ စုံစမ်းသိရသည်။