မန်တုံ၌ တိုက်ပွဲပြင်းထန်

▪️စစ်ကောင်စီ လေကြောင်း ပစ်ကူပေးခုခံပေးနေဟုဆို

မိုးမိုး/People’s Spring

ရှမ်းမြောက်ရှိ မန်တုံမြို့စစ်ကောင်စီတပ်စခန်းကို တအာင်းတပ်မတော်(TNLA)က ထိုးစစ်ဆင်တိုက်ခိုက်လျက်ရှိရာ တိုက်ပွဲများ ဆက်လက်ပြင်းထန်နေသည်ဟု TNLA ပြန်ကြားရေးအရာရှိက ပြောသည်။

TNLAက ရှမ်းမြောက်ရှိ မြို့များ အလုံးစုံထိန်းချုပ်နိုင်ရေး ထိုးစစ်ဆင်လျက်ရှိရာ ဒီဇင်ဘာ ၁၅ရက်တွင် နမ့်ဆန်၊ ဒီဇင်ဘာ ၁၉ရက်တွင် နမ့်ခမ်းမြို့များကို အလုံးစုံထိန်းချုပ်ထားနိုင်ပြီး မန်တုံတွင်လည်း စစ်ကောင်စီ၏ ခလရ(၁၃၀) တပ်စခန်းသာ ကျန်တော့သည်ဟု ဆိုသည်။

“မန်တုံကတော့ တိုက်ပွဲပြင်းထန်နေပါတယ်။ ဒီနေ့မနက်မှာလည်း စစ်ကောင်စီဘက်က လေယာဉ်နဲ့လာပြီးတော့ ဗုံးကြဲတိုက်ခိုက်တာမျိုးတွေရှိတယ်"ဟု TNLA သတင်းပြန်ကြားရေးအရာရှိက ပြောသည်။ ထို့အပြင် ၁၀၂၇ စစ်ဆင်ရေး ရည်မှန်းချက်အတိုင်း ဆက်လက်အကောင်အထည်ဖော်နေကြောင်းလည်း ၎င်းက ပြောသည်။

TNLA သိမ်းထားသည့် နမ့်ခမ်းမြို့၌ ပြည်သူများ ပုံမှန်လည်ပတ်နေပြီဖြစ်ကြောင်း ပြောပြသည်။

"နမ့်ခမ်းကတော့ ပြန်ပြီးတော့ လည်ပတ်နေတယ်။ စျေးတွေ ထွက်ရောင်းနေပါပြီ။ မနက်စျေး နေ့စျေးအဲဒီလိုမျိုး သွားလာမှုတွေရှိနေပါတယ်။ နမ့်ဆန်ဘက်ကလည်း တချို့တွေ ရွာဘက်တော့ ပြန်လာနေပါပြီ။ မပြန်လာသေးတဲ့ သူတွေလည်းရှိပါသေးတယ်"ဟု TNLA ပြန်ကြားရေးအရာရှိက ပြောသည်။

စစ်ကောင်စီအနေဖြင့် ၎င်းတို့ တပ်စခန်းများ မကျရေးအတွက် လေကြောင်း ၊ လက်နက်ကြီး ပစ်ကူ အကြိမ်ကြိမ် အသုံးပြု ခုခံနေရပြီး ထိုသို့ ပစ်ကူပေးနေသည့် ကြားမှ နမ့်ဆန်နှင့် နမ့်ခမ်းမြို့မှ တပ်စခန်းကြီးများအပါအဝင် တပ်စခန်း ၆၀ကျော်ကို TNLAက တိုက်ခိုက်သိမ်းပိုက်ထားသည်။

(စစ်ကောင်စီတပ် လေကြောင်းတိုက်ခိုက်မှုကြောင့် လူနေအိမ်များ ထိခိုက်ပျက်စီးနေသည်ကို တွေ့ရစဉ်။ ဓာတ်ပုံ - TNLA)

ညနေခင်းသတင်းလွှာ

ဒီနေ့ (ဒီိဇင်ဘာ ၂၂ ရက်) ညနေခင်းသတင်းတွေကို People’s Spring က တင်ဆက်ပေးပါမယ်။

▪️တစ်နိုင်ငံလုံးဟန်ချက်ညီ စစ်ဆင်ရေးဖြစ်လာလို့ နှစ်(၇၀)ကျော်အတွင်း စစ်တပ်အထိနာဆုံး အချိန်ဖြစ်ဟု ညီနောင်သုံးဖွဲ့ ပြော

၁၀၂၇ စစ်ဆင်ရေးမှသည် တစ်နိုင်ငံလုံး ဟန်ချက်ညီစစ်ဆင်ရေးအဖြစ်သို့ ကူးပြောင်းလာပုံမှာ စစ်ကောင်စီကို လုံး၀အလိုမရှိတော့တဲ့ မြန်မာပြည်သူတစ်ရပ်လုံးနဲ့ တော်လှန်ရေးဘက်တော်သားများအတွက် အားရကျေနပ်စရာ မြင်ကွင်းများ ဖြစ်တယ်လို့ ညီနောင်မဟာမိတ်သုံးဖွဲ့က မနေ့က ဖော်ပြပါတယ်။ နှစ်ပေါင်း (၇၀)ကျော်အတွင်း စစ်ကောင်စီတပ်ရဲ့ အထိအနာဆုံးအချိန်နဲ့ စစ်ဘေးရှောင်ဒုက္ခသည် အများဆုံးကာလလည်း ဖြစ်တယ်လို့ ဖော်ပြပါတယ်။ ဒါပေမဲ့ မြန်မာပြည်သူလူထုတရပ်လုံး မျှော်လင့်နေတဲ့ ရည်မှန်းချက်၊ မျှော်မှန်းချက်ကို အပြည့်အဝရရှိဖို့အတွက်မူ အခုထက် အဆများစွာကြိုးစားအားထုတ်ဖို့ လိုအပ်နေသေးတယ်လို့ ညီနောင်သုံးဖွဲ့က ဆိုပါတယ်။ တော်လှန်ရေးသက်လုံနဲ့ ဘုံရန်သူကို တိုက်ထုတ်နေကြတဲ့ အဖွဲ့အစည်းအချင်းချင်းအကြားမှ စည်းလုံးညီညွတ်မှု၊ အပြန်အလှန်နားလည်မှု၊ ယုံကြည်မှု၊ လေးစားတန်ဖိုးထားမှု တို့ဟာ အခုထက်ပိုမိုအားကောင်းဖို့ တိုက်တွန်းပါတယ်။

▪️ပေါက်တောမြို့ မြို့တွင်းတိုက်ပွဲပြင်းထန်၊ စစ်ကူလာ​တဲ့ စစ်သင်္ဘောသုံးစီးကို AA တိုက်ခိုက်ရာ နောက်ကြောင်းပြန်ထွက်ပြေး

ရခိုင်ပြည်နယ်၊ ပေါက်တောမြို့မှာ မြို့တွင်းတိုက်ပွဲဖြစ်ပွားနေပြီး စစ်သင်္ဘော သုံးစီးဖြင့် အင်အားဖြည့်တင်းဖို့လာတဲ့ စစ်ကောင်စီတပ်ကို ရက္ခိုင့်တပ်‌တော်(AA )က ပစ်ခတ်တိုက်ခိုက်ရာ စစ်သင်္ဘောတစ်စီးကိုထိမှန်ကာ နောက်ကြောင်းပြန်ပြေးသွားတယ်လို့ မြောက်ပိုင်းမဟာမိတ်သုံးဖွဲ့က ထုတ်ပြန်ပါတယ်။ မနေ့ နေ့ခင်းက ပေါက်တောမြို့အတွင်း AA နဲ့ စစ်ကောင်စီတပ်ရဲ့ လက်ကျန်တပ်ဖွဲ့ဝင်တချို့တို့ မြို့တွင်းတိုက်ပွဲဆက်လက်ဖြစ်ပွားခဲ့ပါတယ်။ ဒါ့အပြင် စစ်သင်္ဘောသုံးစီးဖြင့် အင်အားဖြည့်တင်းဖို့ လာ​တဲ့ စစ်​ကောင်စီတပ်ကို AA ကပစ်ခတ်တိုက်ခိုက်ခဲ့ရာ စစ်သင်္ဘောတစ်စီးကို ထိမှန်ပြီး စစ်‌ကောင်စီဘက်မှသေဆုံး၊ ဒဏ်ရာရခဲ့ပြီး နောက်လှည့်ပြန်ပြေးသွားတယ်လို့ သိရပါတယ်။ ဒီနေ့ မနက်ပိုင်းမှာ ရခိုင်ပြည်နယ် အမ်း၊ မင်းပြား၊ ရမ်းဗြဲမြို့နယ်တို့မှာ တိုက်ပွဲများဖြစ်ပွားနေ​တယ်လို့ ဒေသခံအချို့က​ပြောပါတယ်။

▪️မင်းတုန်းမြို့နယ်မှာ စစ်ကြောင်းထိုးနေတဲ့ စစ်ကောင်စီတပ် တိုက်ခိုက်ခံရပြီး ၆ ဦးသေ

မကွေးတိုင်း၊ မင်းတုန်းမြို့နယ်မှာ ဖောကာနှစ်စီးဖြင့် စစ်ကြောင်းထိုးလာတဲ့ စစ်ကောင်စီတပ်ကို မိုင်းဆွဲတိုက်ခိုက်သည့်အပြင် လက်နက်ကြီး၊ လက်နက်ငယ်များဖြင့်ပါ တိုက်ခိုက်ခဲ့တယ်လို့ သရက်ခရိုင် PDF တပ်ရင်း(၄)မှ တာဝန်ရှိသူတစ်ဦးက ပြောပါတယ်။ မင်းတုန်းမြို့ (၅)မိုင်စစ်ဆေးရေးဂိတ်မှ ကြို့၀၊ ကာမနိုင်ရွာအနီးသို့ ခြေလျင်စစ်ကြောင်းနှင့်အတူ Faw ကားနှစ်စီးဖြင့်လာတဲ့ ရန်သူ့စစ်ကြောင်းကို တော်လှန်ရေးပူးပေါင်းတပ်က ဒီဇင်ဘာ ၁၉ ရက် မနက်ပိုင်းမှာ ကြားဖြတ်တိုက်ခိုက်ခဲ့တာလို့ဆိုပါတယ်။ တိုက်ခိုက်မှုကြောင့် စစ်ကောင်စီဘက်မှ ၆ ဦးသေဆုံးသည်ကို မျက်မြင်အတည်ပြုနိုင်ခဲ့ပြီး စစ်ကောင်စီအရာရှိတစ်ဦးအပါအဝင် ၂၀ ဦးခန့်ဒဏ်ရာရပြီး မဟာမိတ်တပ်ဖွဲ့များဘက်မှ အထိအခိုက်မရှိခဲ့ဘူးလို့ သရက်ခရိုင် PDF တပ်ရင်း(၄)မှ တာဝန်ရှိသူက ပြောပါတယ်။

▪️ဘုံဇုံးစခန်းတိုက်ပွဲ စစ်ကောင်စီတပ် ၁၀ ဦးသေ၊ ဗိုလ်ကြီးအပါအဝင် ၆ ဦးကို အရှင်ဖမ်းမိ

ချင်းပြည်နယ် ဟားခါးမြို့နယ်ရှိ ဘုံဇုံးစစ်ကောင်စီစခန်း သိမ်းပိုက်ပွဲအတွင်း စစ်ကောင်စီတပ်ဖွဲ့ဝင် ၁၀ ဦးသေဆုံးကာ ဗိုလ်ကြီးအပါအဝင် ခြောက်ဦး အရှင်ဖမ်းမိပြီး လက်နက် ၃၂ လက်ရရှိခဲ့တယ်လို့ ချင်းဒေသကာကွယ်ရေးတပ်(CDF)-ဟားခါးက သတင်းထုတ်ပြန်ပါတယ်။ ဘုံဇုံးစခန်းကို ချင်းတော်လှန်ရေးတပ်ဖွဲ့တွေက ဒီဇင်ဘာ ၁၈ ရက်မှာ သိမ်းပိုက်နိုင်ခဲ့တာပါ။ တိုက်ပွဲအတွင်း ချင်းပူးပေါင်းတပ်မှ ရဲဘော် နှစ်ဦးကျဆုံးပြီး ငါးဦးဒဏ်ရာရရှိခဲ့တယ်လို့ CDF ဟားခါး တာဝန်ရှိသူက ပြောပါတယ်။ ဘုံဇုံးစခန်းသိမ်းတိုက်ပွဲအတွင်း စစ်ကောင်စီတပ်က လေကြောင်းပစ်ကူလာရောက်ပေမယ့် ထိခိုက်မှုမရှိဘူးလို့ သိရပါတယ်။

▪️စစ်ကောင်စီတပ် အရာရှိ အပါအဝင် တပ်ဖွဲ့ဝင်များ KNUထံ အလင်းဝင်လာသူ များပြားလာ

ကရင်အမျိုးသားအစည်းအရုံး(KNU) ဒူးပလာယာခရိုင် တပ်မဟာ(၆)ရှိ ကရင်အမျိုးသားလွတ်မြောက်ရေးတပ်မတော်(K.N.L.A)ထံ အာဏာသိမ်း စစ်ကောင်စီတပ်မှ ဗိုလ်ကြီး တစ်ဦး အပါအဝင် ငါးဦး လက်နက်နှင့်လာရောက်ပူးပေါင်းခဲ့တယ်လို့ KNUက မနေ့က အသိပေးပါတယ်။ KNU တပ်မဟာ(၆)မှာ လက်ရှိကာလ နှစ်ဖက်ထိတွေ့ပစ်ခတ်တိုက်ပွဲများ နေရာအနှံ့ နေ့စဉ်ဖြစ်ပွားနေလို့ စစ်ရှောင်ပြည်သူများစွာရှိနေသကဲ့သို့ စစ်ကောင်စီတပ်မှလည်း စိတ်ဓာတ်ပိုင်းဆိုင်ရာ ကျဆင်းလာတာကြောင့် KNU ထံ လာရောက်ပူးပေါင်းသူများစွာရှိလာတယ်လို့ ဖော်ပြပါတယ်။ အလင်းဝင်လာတဲ့ စစ်ကောင်စီတပ်သားတွေက လက်နက်ခဲယမ်းများလည်း ယူဆောင်လာတယ်လို့ မှတ်တမ်းဓာတ်ပုံများနှင့်တကွ ထုတ်ပြန်ပါတယ်။

▪️မြစ်သာဆည် စစ်​တပ်စခန်းကို ပြည်သူ့ကာကွယ်ရေးတပ်ဖွဲ့များ တိုက်ခိုက်သိမ်းပိုက်

မကွေးတိုင်း၊ ဂန့်ဂေါမြို့နယ်တောင်ပိုင်းရှိ မြစ်သာဆည်တပ်စခန်းကို ပြည်သူ့ကာကွယ်ရေးတပ်ဖွဲ့များက ဒီနေ့ မနက်ပိုင်းမှာ တိုက်ခိုက်သိမ်းပိုက်ခဲ့တယ်လို့ ကာကွယ်ရေးရဲဘော်တစ်ဦးက ပြောပါတယ်။ စခန်းသိမ်းတိုက်ပွဲအတွင်း စစ်ကောင်စီတပ်က လေကြောင်းမှ လာရောက်တိုက်ခိုက်ခဲ့ပေမယ့် စခန်းကို ရရှိခဲ့ပြီလို့ သိရပါတယ်။ တိုက်ပွဲအတွင်း ထိခိုက်သေဆုံးမှုအခြေအနေကို မသိရသေးပါဘူး။

▪️ချောင်းဦးနယ် ကျေးရွာနှစ်ရွာကို စစ်တပ် မီးရှို့ဖျက်ဆီး၊ လက်နက်ကြီးပစ်ခတ်လို့ ပြည်သူအချို့ ဒဏ်ရာရ

စစ်ကိုင်းတိုင်း၊ ချောင်းဦးမြို့နယ်မှာ စစ်ကောင်စီတပ်က ကျေးရွာနှစ်ရွာကို မီးရှို့ဖျက်ဆီးခဲ့ပြီး လက်နက်ကြီးဖြင့်ပါ ပစ်ခတ်ခဲ့လို့ ပြည်သူအချို့ ထိခိုက်ဒဏ်ရာရရှိခဲ့တယ်လို့ ဒေသခံများက ပြောပါတယ်။ ဒီဇင်ဘာ ၂၀ ရက်နဲ့ ၂၁ ရက်က စစ်ကောင်စီတပ်ဟာ ချောင်းဦးမြို့နယ် ပေါက်ပင်ကျေးရွာနဲ့ ညောင်ပင်တဲကျေးရွာကို မီးရှို့ဖျက်ဆီးခဲ့ပြီး ပျက်စီးမှုအခြေအနေကိုတော့ မသိရသေးပါဘူး။ ဒါ့အပြင် ချောင်းဦးမြို့နယ်အထွေထွေအုပ်ချုပ်ရေးမှူးရုံးရှိ စစ်ကောင်စီတပ်က မြို့အနီးရှိကျေးရွာများကို ဒီဇင်ဘာ ၁၈၊ ၁၉ နှစ်ရက်ဆက်တိုက် (၈၁) မမ လက်နက်ကြီးဖြင့် ရမ်းသမ်းပစ်ခတ်ခဲ့လို့ အရပ်သားပြည်သူအချို့ ထိခိုက်ဒဏ်ရာရခဲ့တယ်လို့ သိရပါတယ်။

ဆားလင်းကြီးမြို့မရဲစခန်းမှ ရဲတစ်ဦး လက်နက်ခဲယမ်းများယူလာပြီး အလင်းဝင်လာ

အောင်ဇေယျ/People's Spring

စစ်ကိုင်းတိုင်း၊ ဆားလင်းကြီးမြို့မရဲစခန်းမှ ရဲတပ်သားတစ်ဦး လက်နက်ခဲယမ်းများယူလာပြီး အလင်းဝင်ရောက်လာကြောင်း ယင်းမာပင်ခရိုင် တပ်ရင်း ၁၆ တပ်ခွဲ(၃)သမန်းကျားပြောက်ကျားတပ်ဖွဲ့က သတင်းထုတ်ပြန်သည်။

ယမန်နေ့ (ဒီဇင်ဘာ ၂၁ ရက်) နံနက် ၃ နာရီ ၅၀ မိနစ်ခန့်က ဆားလင်းကြီးမြို့မရဲစခန်းမှ ရဲတပ်သားတစ်ဦးသည် G3 တစ်လက်၊ ကျည်ဘောက် ၄ ခု ကျည် ၁၉၉ တောင့်၊ လက်ပစ်ဗုံး တစ်လုံး၊ ကျည်ကာ တစ်ထည်စသည်တို့ယူလာပြီး အလင်းဝင် ရောက်လာခြင်းဖြစ်ကြောင်း သမန်းကျားပြောက်ကျားတပ်ဖွဲ့က အသိပေးသည်။

အဆိုပါရဲတပ်သားသား ဂုဏ်ပြုဆုငွေကျပ် သိန်း ၅၀ ချီးမြှင့်ခဲ့ကြောင်း သမန်းကျားပြောက်ကျား တပ်ဖွဲ့က ဆိုသည်။

ဖြစ်စဥ်နှင့်ပတ်သက်၍ သမန်းကျားပြောက်ကျား တပ်ဖွဲ့ထံ ဆက်သွယ်မေးမြန်းသော်လည်း ဆက်သွယ်၍ မရသေးပေ။

အဆိုပါဖြစ်စဥ်ဟုတ်မှန်ကြောင်း ဆားလင်းကြီးအခြေစိုက်ရဲဘော်တစ်ဦးက အတည်ပြုသည်။

"သမန်းကျားအဖွဲ့ကို ခဏခဏအလင်းဝင်တယ်။"ဟု ၎င်းရဲဘော်က ပြောသည်။

ပြီးခဲ့သည့် ဒီဇင်ဘာ ၆ ရက်ကလည်း ဆားလင်းကြီးမြို့မရဲစခန်းမှ ရဲတပ်သားတစ်ဦးသမန်းကျားပြောက်ကျားတပ်ဖွဲ့ထံ လက်နက်ခဲယမ်းများဖြင့် အလင်းဝင်ခဲ့သေးသည်။

(အလင်းဝင် ရဲတပ်သားယူဆောင်လာသော လက်နက်ခဲယမ်းများအား တွေ့ရစဥ်။ ဓာတ်ပုံ - သမန်းကျား)

ဖောင်းပြင်ကို တိုက်ခိုက်ရေးရဟတ်ယာဉ်ဖြင့် ဗုံး ၁၃လုံးကြဲချ၊ အရပ်သားတစ်ဦး သေဆုံးကိုးဦးဒဏ်ရာရ

နန်းနောင့်နောင့်/People's Spring

စစ်ကိုင်းတိုင်း ဖောင်းပြင်မြို့နယ်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီက လေကြောင်းတိုက်ခိုက်ခဲ့၍ အရပ်သားတစ်ဦး သေဆုံးပြီး အမျိုးသမီးအချို့အပါအဝင် ကိုးဦးဒဏ်ရာရရှိခဲ့ကြောင်း မြို့နယ်ပြည်သူ့အုပ်ချုပ်ရေးအဖွဲ့ဝင်တစ်ဦးကပြောသည်။

ဖောင်းပြင်မြို့နယ် သရောင်းနှင့်ထောမကျေးရွာအား ယမန်‌နေ့(ဒီဇင်ဘာ၂၁ ရက်) ညနေ ၄ နာရီ ၂၀ မိနစ်ခန့်တွင် တိုက်ခိုက်ရေးရဟတ်ယာဉ်ဖြင့် ဗုံး ၁၃လုံးအထိ ကြဲချခဲ့ခြင်းဟု ဖောင်းပြင်မြို့နယ်ပြည်သူ့အုပ်ချုပ်ရေးအဖွဲ့ဝင်တစ်ဦးကပြောသည်။

"မြေပြင်မှာပါတိုက်ပွဲမှမရှိပါဘူး။ ဟုမ္မလင်းကနေတက်လာတဲ့ ရဟတ်ယာဉ်နဲ့ ပစ်ချတာပါ"ဟု ‌၎င်းက ပြောသည်။

အဆိုပါ တိုက်ခိုက်မှုကြောင့် အသက် (၃၂)နှစ်အရွယ် ကိုကျော်စိုးသေဆုံးပြီး အမျိုးသမီးလေးဦး၊ အမျိုးသားငါးဦးဒဏ်ရာရခဲ့ကြောင်း သတင်းရရှိသည်။ ဒဏ်ရာရသူများဆေးကုသမှုခံယူနေရဆဲဖြစ်သည်။

စစ်ကောင်စီတပ်သည် ဖောင်းပြင်မြို့နယ်အပြင် ဟုမ္မလင်း၊ရွှေပြည်အေး၊ တမူးမြို့နယ်တို့ကို ဟုမ္မလင်းမှ တက်လာသော Mi-2 တိုက်ခိုက်ရေးရဟတ်ယာဉ်ဖြင့် မကြာခဏဗုံးကြဲတိုက်ခိုက်နေကြောင်း ကာကွယ်ရေးရေးဘော်များက ပြောသည်။

လေကြောင်းသတင်းများအား ပြည်သူများအနေဖြင့် သတိထားစောင့်ကြည့်ပြီး သက်ဆိုင်ရာ ပြည်သူ့ကာကွယ်ရေးတပ်ဖွဲ့များထံ အချိန်နှင့်တပြေးညီ ပေးပို့ပေးကြပါရန် လူထုတော်လှန်ရေးသတင်းများဖော်ပြနေသည့် Just You Homalin Media က တိုက်တွန်းထားသည်။