(အာဏာသိမ်း စစ်ကောင်စီတပ်များ၏ မီးရှို့ဖျက်ဆီးမှုကြောင့် မီးလောင်နေသော မုန်းမြို့ရှိဈေးဆိုင်တန်းများ။ ဓာတ်ပုံ - KNU)

မြိုင်မြို့နယ်တွင် စစ်တပ်က ကျေးရွာနှစ်ရွာ မီးရှို့ဖျက်ဆီး၊ နေအိမ် ၁၀၀ခန့် ပျက်စီး

ဟာနာဆန်/People's Spring

မကွေးတိုင်း၊ မြိုင်မြို့နယ်တွင် တိုက်ခိုက်ခံရသည့် စစ်ကောင်စီတပ်စစ်ကြောင်းက ၅ ရက်အတွင်း ကျေးရွာနှစ်ရွာအား မီးရှို့ဖျက်ဆီးခဲ့ရာ နေအိမ် ၁၀၀ခန့်ပျက်စီးဆုံးရှုံးခဲ့ကြောင်း သတင်းရရှိသည်။

မြိုင်မြို့နယ်အတွင်းရှိ စစ်ကောင်စီတပ်စခန်းများ၊ ပျူစောထီးစခန်းများအား ခဲယမ်းနှင့် ရိက္ခာများ ဖြည့်တင်းရန် ပခုက္ကူမြို့မှ ထွက်လာသော စစ်ကောင်စီယာဥ်တန်းသည် ဒီဇင်ဘာ ၁၅ ရက်နံနက်ပိုင်းက တွင်းမရွာနှင့် သာစည်ကျေးရွာကြား၌ တိုက်ခိုက်ခံရသည်။

ထိခိုက်သေဆုံးမှုများပြား၍ အနီးရှိ သာစည်ကျေးရွာအား ဝင်ရောက်မီးရှို့ဖျက်ဆီးခဲ့ရာ နေအိမ် ၅၅လုံး၊ ဆီစက်နှစ်လုံး၊ မြေပဲတင်းသုံးရာကျော် မီးလောင်ပျက်စီးခဲ့ပြီး ဆိတ် ၁၃ကောင် မီးလောင်သေဆုံးခဲ့ကြောင်း We Love Myaing အဖွဲ့က ပြောသည်။

အလားတူ ယမန်နေ့(ဒီဇင်ဘာ ၂၁ ရက်)နံနက်၈ နာရီခန့်ကလည်း အဆိုပါစစ်ကြောင်းသည် မြိုင်မြို့နယ် နှမ်းဆီကန်ကျေးရွာအား ဝင်ရောက်မီးရှို့ဖျက်ဆီးခဲ့ရာ နေအိမ် ၄၀ခန့် ပျက်စီးဆုံးရှုံးခဲ့ကြောင်း ဒေသခံများက ပြောသည်။

"နှမ်းဆီကန်ရွာမှာ မနက် ၇ နာရီခွဲလောက်ကနေ စရှို့တဲ့မီးဟာ နေ့လယ် ၁၂နာရီခွဲလောက်အထိ ၅ နာရီလောက်ကြာအောင် လောင်ခဲ့တယ်။"ဟု We Love Myaing အဖွဲ့ဝင်တစ်ဦးက ပြောသည်။

အဆိုပါ စစ်ကြောင်းသည် မိုင်းများ၊ ဒရုန်းများနှင့် လက်နက်ကြီးငယ်တို့ဖြင့် တိုက်ခိုက်မှုကြောင့် အထိနာသွားကာ ရှေ့ဆက်မတက်နိုင်ဘဲ  တွင်းမပျူရွာသို့ ထမ်းစင်များထမ်း၍ ပြန်လည်ဆုတ်ခွာသွားကြောင်း မြိုင်(ပကဖ)အဖွဲ့က ပြောသည်။

ထို့အပြင် ကမ္မနှင့် မြိုင်မြို့နယ် တောင်ပိုင်းတကြောရှိ ကျေးရွာ ၈ရွာခန့်မှ ဒေသခံပြည်သူထောင်နှင့်ချီ ထွက်ပြေးတိမ်းရှောင်နေရကြောင်း သိရသည်။

သာစည်ရွာသည် ပြီးခဲ့သည့် ၂၀၂၂ ဇွန်လ ၉ ရက်ကလည်း တွင်းမရွာပျူစောထီးများနှင့် စစ်ကောင်စီတပ်များက မီးရှို့ဖျက်ဆီးခဲ့ရာ နေအိမ် ၁၂လုံး မီးလောင်ပျက်စီးခဲ့သေးသည်။

နှမ်းဆီကန်ရွာ မီးရှို့ဖျက်ဆီးခံနေရသည်ကို တွေ့ရစဥ်။ ရုပ်သံ - We Love Myaing

ခမ်းပါတ်မြို့တွင်း အခြေအနေတည်ငြိမ်နေပြီဟု PDF ပြော

ဆလိုင်း/People’s Spring

စစ်ကိုင်းတိုင်း၊ ခမ်းပါတ်မြို့ကို ပြည်သူ့ကာကွယ်ရေးတပ်ဖွဲ့(PDF)များက အလုံးစုံထိန်းချုပ်ထားပြီး အခြေအနေတည်ငြိမ်နေပြီဟု သတင်းရရှိသည်။

ပြီးခဲ့သည့် နိုဝင်ဘာလဆန်းက မြို့သိမ်းတိုက်ပွဲဆင်နွှဲပြီးနောက် ပြည်သူ့ကာကွယ်ရေးတပ်ဖွဲ့များထိန်းချုပ်ထားသည့် ခမ်းပါတ်မြို့ကို ပြန်သိမ်းမည်ဟုဆိုကာ စစ်ကောင်စီတပ်က အင်အား ၁၂၀ခန့်ဖြင့် ဒီဇင်ဘာလဆန်းတွင် စစ်ကြောင်းထိုးလာခဲ့သည်။ ဒီဇင်ဘာ ၁၀ ရက်ခန့်တွင်တိုက်ပွဲစတင်ဖြစ်ပွားပြီး စစ်ကောင်စီတပ်ကို အမှတ် (၁) စစ်ဒေသကွပ်ကဲမှုဖြင့် ပြည်သူ့ကာကွယ်ရေးတပ်မတော်(PDF) စစ်ကိုင်းတိုင်း အထူးတပ်ရင်းများ၊ ခရိုင်တပ်ရင်းများ၊ ပကဖနှင့် တော်လှန်ရေးတပ်ဖွဲ့များက တိုက်ခိုက်ခဲ့သည်။

အဆိုပါ စစ်ကောင်စီစစ်ကြောင်းသည် ဒီဇင်ဘာ ၁၇ရက်နံနက်က တိုက်ပွဲတွင် တပ်ပျက်ပြီး ဆုတ်ခွာထွက်ပြေးသွားခဲ့သည်။ ယခုအခါ ခမ်းပါတ်မြို့ကို ပြည်သူ့ကာကွယ်ရေးတပ်ဖွဲ့များစွာ အလုံးစုံပြန်လည်ထိန်းချုပ်ထားပြီး တိုက်ပွဲဖြစ်နေစဉ်ကာလက တိမ်းရှောင်နေသည့်ဒေသခံများသည် မြို့ပေါ်သို့ ပြန်လည်ဝင်ရောက်နေထိုင်ပြီဟု သိရသည်။

" စုစုပေါင်း သုံးပန့် ငါးဦးဖမ်းမိတယ်။ ငါးယောက်တစ်ဖွဲ့ သုံးယောက်တဖွဲ့နဲ့ ဦးတည်ရာထွက်ပြေးနေတဲ့ အဖွဲ့တချို့လည်း ရှိနေတယ်။ ၃၀ ခန့်ပါတဲ့အဖွဲ့ကတော့ ဖောင်းပြင်ကိုရောက်သွားပြီး စစ်ကောင်စီနဲ့ သွားပေါင်နေတယ်။ မြို့ကို ဒီကောင်တွေ လာသိမ်းတာ မရပါဘူး"ဟု ပြည်သူ့ကာကွယ်ရေးရဲဘော်တစ်ဦးက ပြောသည်။

တိုက်ပွဲဖြစ်နေစဉ်၌ ဒေသခံစုစုပေါင်း တစ်သောင်းခန့်သည် ဘေးလွတ်ရာထွက်ပြေးနေခဲ့ကြရသည်။ စစ်ကောင်စီ၏ လေကြောင်းအန္တရာယ်ကို သတိပြုရန်လိုအပ်နေသော်လည်း မြေပြင်၌ အခြေအနေတည်ငြိမ်နေ၍ ဒေသခံများပြန်ဝင်လာကြခြင်းဖြစ်သည်။ခမ်းပါတ်မြို့ကို စစ်ကောင်စီက ဒီဇင်ဘာ ၁၅ရက်တွင် လေကြောင်းတိုက်ခိုက်မှု နောက်ဆုံးပြုလုပ်ထားသည်။

ဒီဇင်ဘာ ၁၀ရက်က တိုက်ပွဲဖြစ်ပွားနေစဉ် ခမ်းပါတ်မြို့၊အမှတ်(၁)ရပ်ကွက်ရှိ AG မိဖမဲ့ဂေဟာကို စစ်‌ကောင်စီကတပ်စွဲပြီး ညဘက်တွင် သေနတ်ဖြင့် ရမ်းသမ်းပစ်ခတ်ရာမိဖမဲ့ကလေးငယ် လေးဦး သေဆုံးခဲ့သည်။ ထို့အပြင် ကျောင်းအတွင်းပိတ်မိနေသော ကလေးငယ် ၃၆ ဦးနှင့် ဝန်ထမ်းအချို့ကို ပြည်သူ့ကာကွယ်ရေးတပ်ဖွဲ့များက နောက်တနေ့တွင် ကယ်ထုတ်နိုင်ခဲ့သည်။

ယခုတစ်ကြိမ်ဖြစ်ပွား‌သော တိုက်ပွဲအတွင်း စစ်ကောင်စီထံမှ MA-10 RPG 7 တစ်လက်၊ MG-3 တစ် လက်၊ MA-S1 MK2 တစ် လက် အပါအဝင် လက်နက်မျိုးစုံ ၁၇လက် သိမ်းပိုက်ရရှိခဲ့သည်ဟု အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန(MOD)က ဒီဇင်ဘာလ ၁၇ရက်တွင် သတင်းထုတ်ပြန်သည်။

(PDFများ သိမ်းပိုက်ထားသော ခမ်းပါတ်မြို့အား စစ်ကောင်စီ လေကြောင်းမှ ဗုံးကြဲတိုက်ခိုက်ပြီးနောက် ဒီဇင်ဘာ ဒုတိယပတ်က တွေ့ရစဉ်။ ဓာတ်ပုံ - CJ)

ကိုးကန့်စစ်ရှောင် ၁,၅၀၀ကို မိုင်းလားတပ်ဖွဲ့စားနပ်ရိက္ခာ ပေးဝေ

မိုးမိုး/People’s Spring

မိုင်းလားလက်နက်ကိုင်တပ်ဖွဲ့ (NDAA)အထူးဒေသ(၄)အစိုးရမှ ဆီလူးခရိုင်၌ ယာယီနေထိုင်သည့် ကိုးကန့်စစ်ဘေးရှောင်များအား စားနပ်ရိက္ခာများ ပေးဝေခဲ့ကြောင်း အထူးဒေသ (၄) သတင်းပြန်ကြားရေးက အသိပေးထုတ်ပြန်သည်။

NDAA အုပ်ချုပ်နယ်မြေ ဆီလူးဒေသသို့ ရောက်ရှိလာသည့် ကိုးကန့်စစ်ရှောင်များကို ဒီဇင်ဘာ ၁၄ရက်မှ ၁၇ရက်အတွင်း စားနပ်ရိက္ခာများ ပေးဝေခဲ့ခြင်းဖြစ်ပြီး စစ်ရှောင် ၁၅၀၀ ဦးတွက် ဆန်၊ ဆီ၊ ဆားများကို ပေးဝေခဲ့သည်ဟုဆိုသည်။

ဒေသအစိုးရ၏ ဂရုစိုက်မှုအောက်၌ ပြည်သူ့အကျိုးပြုလုပ်ငန်းအဖွဲ့၊ ဆီလူးခရိုင်အုပ်ချုပ်ရေးရုံး၊ ဆီလူးရဲတပ်ဖွဲ့၊မိခင်နှင့် ကလေးစောင့်ရှောက်ရေးအသင်း၊ ကိုးကန့်တိုင်းရင်းသားဆက်ဆံရေးအစည်းအရုံးတို့သည် ဆီလူးခရိုင်၌ ယာယီလာရောက်နေထိုင်သည့် ကိုးကန့်စစ်ဘေးရှောင်များအား စားနပ်ရိက္ခာများ သွားရောက်ပေးဝေခဲ့သည်ဟု ဖော်ပြသည်။

စစ်ရှောင်ပြည်သူများ၏ ဒုက္ခအခက်အခဲများကို ထည့်သွင်း စဉ်းစားပေးသည့်အနေဖြင့် ဒေသအစိုးရသည် စားနပ်ရိက္ခာများ ဝယ်ယူရန်အတွက် ငွေကြေးထုတ်ပေးခဲ့သည်ဟု ဆိုသည်။

စစ်ရှောင်ပြည်သူများအနေဖြင့် စိတ်ဓာတ် ကြံ့ကြံ့ခိုင်ထားရမည်ဖြစ်ကြောင်း၊ ဒေသအစိုးရ သည် စစ်ရှောင်ပြည်သူများနှင့် ခက်ခဲသည့် အချိန်များကို အတူတကွ ကျော်ဖြတ်သွား မည်ဖြစ်ကြောင်း ကိုးကန့်တိုင်းရင်းသား ဆက်ဆံရေး အစည်းအရုံးက ပြောဆိုခဲ့ကြောင်းလည်း ထုတ်ပြန်သည်။

မိုင်းလားတပ်ဖွဲ့ အပါအဝင် လက်နက်ကိုင် ၇ဖွဲ့ဖြင့် ဖွဲ့ထားသည့် ပြည်ထောင်စုနိုင်ငံရေးဆွေးနွေးရေးကော်မတီ(FPNCC) အဖွဲ့ဝင်များဖြစ်သော ကိုးကန့်၊ တအာင်း၊ ရက္ခိုင် တပ်များသည် အောက်တိုဘာ ၂၇ရက်မှစ၍ စစ်ကောင်စီကို တိုက်ခိုက်သည့် ၁၀၂၇ စစ်ဆင်ရေးကို ဆင်နွှဲလျက်ရှိရာ ရှမ်းမြောက်နေရာအနှံ့၌ တိုက်ပွဲများ ပြင်းထန်ခဲ့ပြီး စစ်ရှောင်များစွာရှိခဲ့ရာ ၀နှင့် မိုင်းလားတပ်ဖွဲ့များက စစ်ရှောင်များအား ယာယီနေထိုင်ရေး၊ စားနပ်ရိက္ခာနှင့် သွားလာရေးအတွက် အကူအညီပေးခဲ့ကြသည်။

(မိုင်းလားလက်နက်ကိုင်တပ်ဖွဲ့ (NDAA)အထူးဒေသ(၄)မှ ကိုးကန့်စစ်ရှောင်များအား စားနပ်ရိက္ခာပေးဝေနေစဉ်။ ဓာတ်ပုံ - Mongla SR4 News Agency)

ကွတ်ခိုင်တွင် စစ်ကောင်စီ ဒုတပ်ကြပ်တစ်ဦး စစ်မတိုက်လို၍ သေနတ်တစ်လက်နှင့် RPG ယူပြီး TNLA ထံ လက်နက်ချ

▪️နမ္မတူမြို့နယ်တိုက်ပွဲ၌ စစ်ကောင်စီထံမှ လက်နက်ခဲယမ်းများစွာရဟု အသိပေး

ဝင်းမောင်/People’s Spring

ရှမ်းမြောက် ကွတ်ခိုင်မြို့နယ်တွင် စစ်ကောင်စီ တပ်ကြပ်တစ်ဦး စစ်မတိုက်လိုသောကြောင့် တအာင်းတပ်မတော် (TNLA) ထံ လာရောက် လက်နက်ချခဲ့ကြောင်း TNLAက ယနေ့ညပိုင်း၌ သတင်းထုတ်ပြန်သည်။

စစ်ကောင်စီ၏ ကွတ်ခိုင်ဗျုဟာ၊ လက်အောက်ခံ ခလရ-၄၅ တပ်မှ တပ်ကြပ်ကိုနိုင်သည် ယနေ့ (ဒီဇင်ဘာ ၂၁ရက်)တွင် မိခင်တပ်ရင်းမှ စွန့်ခွာခဲ့ပြီး TNLA တပ်မဟာ(၅)ထံ လက်နက်ချလာခြင်းဖြစ်သည်ဟု ဆိုသည်။

အဆိုပါ တပ်ကြပ်သည် လက်နက် တစ်လက်၊ RPG-7 တစ်လက်နှင့် ခဲယမ်းများယူလာကြောင်း ဓာတ်ပုံမှတ်တမ်းနှင့်အတူ ဖော်ပြသည်။

လွန်ခဲ့သည့် ဒီဇင်ဘာ ၁၇ ရက်ကလည်း TNLAနှင့် စစ်ကောင်စီတပ်တို့ နမ္မတူမြို့နယ်တွင် တိုက်ပွဲဖြစ်ပွားခဲ့ကြောင်း သတင်းထုတ်ပြန်သည်။

နမ္မတူမြို့နယ် မန်စံကျေးရွာ စစ်ကောင်စီတပ်စခန်းတွင် တိုက်ပွဲဖြစ်ပွားခဲ့ရာ စစ်ကောင်စီတပ်၏ လက်နက်ခဲယမ်းများစွာ သိမ်းဆည်းရရှိခဲ့သည်ဟု အသိပေးသည်။

TNLAသည် ၁၀၂၇ စစ်ဆင်ရေး ရက်ပေါင်း ၅၅ရက်အတွင်း နမ့်ဆန်နှင့် နမ့်ခမ်းမြို့ကို အလုံးစုံ သိမ်းပိုက်ထိန်းချုပ်ထားခြင်း အပါအဝင် စစ်ကောင်စီတပ်စခန်း ၆၀ ကျော်ကိုသိမ်းပိုက်ထားသည်။

(စစ်မတိုက်လို၍ သေနတ်တစ်လက်နှင့် RPG ယူပြီး TNLA ထံ လက်နက်ချအလင်းဝင်လာသော တပ်ကြပ်နှင့် နမ္မတူမြို့နယ်တိုက်ပွဲ၌ စစ်ကောင်စီထံမှ လက်နက်ခဲယမ်းများအား တွေ့ရစဥ်။ ဓာတ်ပုံ - The Ta'ang Post)