ချောင်းဦးတွင် စစ်တပ်က ကျေးရွာများစစ်ကြောင်းထိုးနေစဉ် မြို့ပေါ်ရှိ စစ်အုပ်စုကို ဒေသတွင်း PDFများ သွားရောက်တိုက်ခိုက်

အောင်ဇေယျ/People's spring

စစ်ကိုင်းတိုင်း၊ ချောင်းဦးမြို့နယ်တွင် စစ်ကောင်စီတပ်က ကျေးရွာများအား စစ်ကြောင်းထိုးနေစဉ် မြို့ပေါ်ကျန်ရှိသည့် စစ်ကောင်စီတပ်အား ဒေသတွင်းတော်လှန်ရေးအင်အားစုများက သွားရောက်တိုက်ခိုက်ခဲ့ကြောင်း ၎င်းအဖွဲ့များက ပြောသည်။

ချောင်းဦးမြို့နယ်အတွင်း ၉ရက်ကြာ စစ်ကြောင်းထိုးပြီး ဒေသခံပြည်သူများ၏ ပစ္စည်းများအားသိမ်းယူကာ နွားလှည်းများဖြင့် သယ်ဆောင်နေသော စစ်ကောင်စီစစ်ကောင်စီစစ်ကြောင်းအား ဗုံးချတိုက်ခိုက်ရန် သွားရောက်ရာ ဓားစာခံပြည်သူများပါနေ၍ တိုက်ခိုက်ခဲ့ခြင်းမပြုခဲ့ကြောင်း မြောင်မြို့နယ် ပြည်သူ့ကာကွယ်ရေးနှင့်လုံခြုံရေးအဖွဲ့(CDSOM)၏ တာဝန်ရှိသူက ပြောသည်။

သို့သော် အဆိုပါစစ်ကြောင်းအား ပစ်ကူပေးသည့်အနေဖြင့် ကျေးရွာများကိုပါ လက်နက်ကြီးဖြင့် ပစ်ခတ်နေသည့် မြို့ပေါ်ကျန်ရှိသည့် ချောင်းဦးမြို့မရဲစခန်းနှင့် အထွေထွေအုပ်ချုပ်ရေးမှူးရုံးရှိ စစ်ကောင်စီတပ်သားများအား ဒီဇင်ဘာ ၁၈ ရက်က Shar Htoo Wawနည်းပညာသုံး မောင်းသူမဲ့လေယာဥ်ငယ်များ၊ လေးလက်ဒရုန်းများဖြင့် ဗုံးချတိုက်ခိုက်ခဲ့ကြောင်း CDSOM၏ တာဝန်ရှိသူက ပြောသည်။

နေ့လယ် ၁၂ နာရီ မိနစ်၄၀မှ ညနေ၃ နာရီအထိ ဗုံး ၇ လုံး ကြဲချတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၆ ဦးသေဆုံးကာ ၁၅ ဦးထိခိုက်ဒဏ်ရာရရှိကြောင်း၊ ထို့အပြင် စစ်ကောင်စီတပ်၏ လက်နက်ကြီးတစ်ခုပါ ပျက်စီးသွားကြောင်း CDSOM အဖွဲ့က အသိပေးသည်။

"သေတဲဲ့သူတွေထဲ စခ လေးကောင်သေတယ်။ ရဲမေ တစ်ဦး သေတယ်။ စခန်းမှူးမိန်းမ မျက်လုံးထိတယ်။"ဟု CDSOM အဖွဲ့မှ ကိုနွေဦး(မြောင်) က ပြောသည်။

သို့သော် စစ်ကောင်စီတပ်၏ ထိခိုက်သေဆုံးမှုများအား လူထုနွေဦးက သီးခြားအတည်ပြုနိုင်ခြင်း မရှိသေးပေ။

စစ်ကောင်စီဘက်က လက်နက်ကြီးဖြင့် ပြန်လည် ပစ်ခတ်ခဲ့၍ ပြည်သူသုံးဦးလည်း ထိခိုက်ဒဏ်ရာရရှိခဲ့ကြောင်း သိရသည်။

အဆိုပါတိုက်ခိုက်မှုကို CDSOM 001 Drone Team၊ GTR Drone အဖွဲ့ မြင်းမူ၊ Farmer FRF ချောင်းဦး၊ မြောင်မြို့နယ် ပလဖ၊ Myaung Revolition Force စသည့် အဖွဲ့များ ပူးပေါင်းတိုက်ခိုက်ခဲ့ခြင်းဖြစ်သည်။

စစ်ကောင်စီစစ်ကြောင်းတွင် ဓားစာခံပြည်သူ ၈၀မှ ၁၀၀ကြားအထိပါပြီး စစ်ဝတ်စုံများပါ ဝတ်ဆင်ပေးထားကြောင်း ဒေသခံများက ပြောသည်။

အဆိုပါ စစ်ကြောင်းကြောင့် ချောင်းဦးမြို့နယ်အတွင်းရှိ ကျေးရွာ ၅ ရွာထက်မနည်း ပြည်သူ ၈,၀၀၀ ခန့်ထွက်ပြေးတိမ်းရှောင်နေရပြီး ဆန်၊ဆီနှင့်စားနပ်ရိက္ခာများလိုအပ်နေကြောင်း ချောင်းဦး PDFအဖွဲ့ ပြန်ကြားရေးတာဝန်ခံက ပြောသည်။

စစ်ကောင်စီတပ်အား ဒရုန်းဖြင့်တိုက်ခိုက်ရန်ပြင်ဆင်နေစဥ်။ ဓာတ်ပုံ-Ko Nway Oo(Myaung)

ထီးချိုင့်မြို့ကို တစ်လကျော်အတွင်း စစ်ကောင်စီ လေကြောင်းမှ အကြိမ်‌ရေ ၁၅၀ကျော် တိုက်ခိုက်

ဆလိုင်း/People's Spring

စစ်ကိုင်းတိုင်း၊ ထီးချိုင့်မြို့သိမ်းတိုက်ပွဲစတင်သည့် နိုဝင်ဘာ၈ရက်မှ ယမန်နေ့(ဒီဇင်ဘာ ၁၉ ရက်) အထိ ၄၁ရက်အတွင်း စစ်ကောင်စီက လေကြောင်းတိုက်ခိုက်ခဲ့မှု အကြိမ်ရေ (၁၅၀) ကျော်ရှိလာပြီဟု တော်လှန်ရေးအင်အားစုများက ယနေ့ သတင်းထုတ်ပြန်သည်။

မြစ်ကြီနားလေဆိပ်၊ တံတားဦးလေဆိပ်နှင့် မုံရွာ အနောက်မြောက်တိုင်းစစ်ဌာနချုပ်(နမခ)တို့မှဂျက်ဖိုက်တာများ၊ Mi-35 ရဟတ်ယာဉ်များဖြင့် တိုက်ခိုက်ခဲ့ခြင်းဟု Tigying Revolution -TR က အသိပေးထုတ်ပြန်သည်။

ထို့အပြင် မုံရွာ(နမခ)မှ MI-17 ထောက်ပို့ ရဟတ် ယာဉ်၊MI-2 ရဟတ်ယာဉ်များဖြင့် ခြောက်ကြိမ်ထက်မနည်း မြတောင်ရွာဘက်နှင့် နီကယ်စက်ရုံများအတွင်းသို့ ကျည်၊လက်နက် ရိက္ခာများ ပို့ဆောင်ထားသည်ဟု အသိပေးထားသည်။

အများဆုံးအသုံးပြုခဲ့သော ဂျက်ဖိုက်တာများ အနေဖြင့် YAK 130၊K8W၊A5 အမျိုးအစားများကို အသုံးပြုခဲ့သည်ဟု ဆိုသည်။

ထီးချိုင့်မြို့တွင် မြို့ပေါ်ရပ်ကွက် ငါးခုရှိပြီး ယင်းရပ်ကွက်များအပြင် ဘေးပတ်ဝန်းကျင်ကျေးရွာများကိုလည်း စစ်ကောင်စီလေကြောင်းတိုက်ခိုက်မှုကြောင့် ဒေသခံများ၏ နေအိမ်အများအပြား ပျက်စီးသွားပြီဟု ဒေသခံများကပြောသည်။

ထီးချိုင့်မြို့တွင် ယမန်နေ့ တိုက်ပွဲပြင်းထန်ခဲ့ပြီး စစ်ကောင်စီက ပေါင် ၅၀၀ဗုံး နှစ်လုံးအပါအဝင် ဂျက်ဖိုက်တာ ခြောက်စင်းဖြင့် ဗုံး ၁၂လုံးကြဲချတိုက်ခိုက်ခဲ့ကြောင်း ပြည်သူကာကွယ်ရေးထောက်ပို့ရဲဘော်များက ပြောသည်။

ထီးချိုင့်မြို့ရှိ စစ်ကောင်စီစခန်းများကို KIA၊AA၊ABSDF နှင့် PDF တပ်ဖွဲ့များက ပြီးခဲ့သည့်နိုဝင်ဘာ ၈ရက်မှစတင်ကာ တိုက်ခိုက်နေခြင်းဖြစ်သည်။

ဒေသခံများမှာလည်း အနီးဝန်းကျင်ရွာများနှင့် မြို့အချို့၌ သွားရောက်တိမ်းရှောင်နေရသည်။

စစ်ကောင်စီတပ်သည် ထီးချိုင့်မြို့ ၊ မြသိန်းတန်တောင်ပေါ် စခန်း၌ ဘန်ကာအခိုင်အမာတည်ဆောက်၍ တပ်စွဲထားပြီး ဘန်ကာအတွင်းမှ မထွက်တော့ဘဲ လေကြောင်းမှသာ နေ့စဉ်လာရောက်တိုက်ခိုက်နေကြောင်း သတင်းရရှိသည်။

ဒီဇင်ဘာ ၁၅ရက်က တိုက်ပွဲတွင် စစ်ကောင်စီက ဓာတုလက်နက် အသုံးပြုတိုက်ခိုက်ခဲ့ကြောင်း မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး -ABSDFက သတင်းထုတ်ပြန်ထားသည်။

(စစ်ကောင်စီတပ် ပစ်ခတ်တိုက်မှုကြောင့် ထီးချိုင့်မြို့ရှိ နေအိမ်များ မီးလောင်နေသည်ကို ပြီးခဲ့သည့်ရက်ပိုင်များက တွေ့ရစဉ်။ ဓာတ်ပုံ - TR)

ထယ်ဘွေးစခန်းတိုက်ပွဲ စစ်ကောင်စီတပ်သားများ စခန်းစွန့် ထွက်ပြေး

▪️တိုက်ပွဲတွင် CDF မင်းတပ် ရဲဘော်တစ်ဦးကျဆုံး၊ ထွက်ပြေးစစ်ကောင်စီတပ်ဖွဲ့အား ဆက်လက်ရှာဖွေနေဟု မတူပီ CDF အသိပေး

မောင်မောင်/People’s Spring

ချင်းပြည်နယ် မတူပီမြို့နယ် ထယ်ဘွေးတပ်စခန်းသိမ်းတိုက်ပွဲတွင် စစ်ကောင်စီတပ်သားများ စခန်းစွန့်ထွက်ခွာထွက်ပြေးသွားကြောင်း ချင်းဒေသကာကွယ်ရေးတပ်(CDF)- မတူပီ က အသိပေး ထုတ်ပြန်သည်။

ဒီဇင်ဘာ ၁၈ရက်တွင် မတူပီ - ပလက်၀ နယ်စပ်ရှိ ထယ်ဘွေးတပ်စခန်းကို CDF မတူပီ၊ ချင်းအမျိုးသားများကာကွယ်ရေးတပ်(CNO/CNDF)၊ CDF လောက်တူ၊ CDF မင်းတပ်တို့ ပူးပေါင်းပြီး ထိုးစစ်ဆင်ခဲ့ရာ ဒီဇင်ဘာ ၁၉ရက် နံနက်တွင် စခန်းကို သိမ်းပိုက်နိုင်ခဲ့သည်။

ထယ်ဘွေးတပ်စခန်းကို ဒရုန်းဖြင့်ဗုံးသီးချ တိုက်ခိုက်ခဲ့သည့် ရုပ်သံကိုလည်း CDF မတူပီက ထုတ်ပြန်သည်။

တိုက်ပွဲစတင်သည့် ဒီဇင်ဘာ ၁၈ရက် နေ့လယ်ပိုင်းတွင် စစ်ကောင်စီက မတူပီမြို့နယ် ဗန်ကိုင်ရွာနှင့် လေဆင်ကျေးရွာကို တိုက်လေယာဉ်ဖြင့် ဗုံးကြဲခဲ့ရာ အရပ်သား လေးဦးသေဆုံးကာ တစ်ဦး ဒဏ်ရာရခဲ့သည်ဟု အသိပေးသည်။

စစ်ရေးပစ်မှတ်မဟုတ်ဘဲ လေကြောင်း တိုက်ခိုက်ခဲ့ခြင်းဖြစ်သည်ဟု ဆိုသည်။

ညပိုင်း စခန်းသိမ်းတိုက်ပွဲတွင် CDF မင်းတပ်မှ ရဲဘော်တစ်ဦး ကျဆုံးကာတစ်ဦး ဒဏ်ရာရခဲ့ကြောင်း ဖော်ပြသည်။

"မဟာမိတ်တို့နဲ့ အတူတူ ပူးပေါင်းတိုက်စစ်ဆင်ခဲ့သော ထယ်ဘွေးစခန်းကို အောင်မြင်စွာ သိမ်းပိုက်နိုင်ခဲ့ခြင်း သတင်းနှင့်ထပ်တူ CDF Mindat ရဲဘော်တစ်ဦးကျဆုံးခဲ့ခြင်း သတင်းလည်း ရောက်လာပါတယ်။ ရဲဘော်ရဲ့ အသက်စွန့်ခဲ့သော အောင်မြင်ခြင်းအတွက် ငါတို့လေးမြတ်စွာနဲ့ ကြေကွဲစွာ ဂုဏ်ယူစွာအလေးပြုပါတယ်။ ရဲဘော်ရဲ့တိုက်ပွဲကို အောင်မြင်စွာတိုက်နိုင်ခဲ့သလို ငါတို့လည်း တိုက်ပွဲအားလုံး အောင်မြင်စွာအဆုံးသတ်သည်အထိ တိုက်ပွဲဝင်ပါ့မယ်"ဟု CDF မင်းတပ်က ထုတ်ပြန်သည်။

ဒီဇင်ဘာ ၁၉ရက် နံနက် ထယ်ဘွေးစခန်းအား ဝင်ရောက်ချေမှုန်းရာ၌ စစ်ကောင်စီတပ်ဖွဲ့ဝင်များ စခန့်စွန့် ထွက်ခွာသွား၍ အဆိုပါ စစ်ကောင်စီတပ်ဖွဲ့ဝင်များကို လိုက်လံရှာဖွေလျက်ရှိကြောင်း၊
လက်ရှိတွင် ထယ်ဘွေးစခန်း၌ CDF မတူပီ အလံ စိုက်ထူထားကြောင်း အသိပေးသည်။

မတူပီမြို့နယ်အတွင်း တိုက်ပွဲများ ဆက်ဖြစ်နိုင်၍ ပြည်သူများ သတိရှိကြရန် တိုက်တွန်းကြောင်း ထုတ်ပြန်ထားသည်။

(ထယ်ဘွေးတပ်စခန်းအား ချင်းပူးပေါင်းတပ် သိမ်းပိုက်ပြီးနောက် တွေ့ရစဉ်။ ဓာတ်ပုံ - မတူပီ CDF)

ကျောက်ရစ်ရဲစခန်းပြန်လာသည့် စစ်ကောင်စီစစ်ကြောင်းအား PDFများ တိုက်ခိုက်

အောင်ဇေယျ/People's Spring

စစ်ကိုင်းတိုင်း၊ မြောင်မြို့နယ်တွင် စစ်ကြောင်းထိုးပြီး ကျောက်ရစ်ရဲစခန်း ပြန်လာသည့် စစ်ကောင်စီတပ်အား မောင်းသူမဲ့လေယာဥ်ငယ်များဖြင့် ဗုံးသီးအလုံး ၅၀ နီးပါးချ တိုက်ခိုက် ခဲ့ကြောင်း စစ်ကိုင်းခရိုင်အမှတ်(၄)တပ်ရင်း- Myaung Special People Defence Force-MSPDF အဖွဲ့က သတင်းထုတ်ပြန်သည်။

ဒီဇင်ဘာ ၁၈ရက် နံနက်၆ နာရီခန့်က မြောင်မြို့နယ်၊ သနပ်ကုန်းရွာနှင့် ကျောက်တန်းရွာများအား စစ်ကြောင်းထိုး ဝင်ရောက်ခဲ့ပြီး ကျောက်ရစ်ရဲစခန်းသို့ ပြန်လာသည့် စစ်ကောင်စီတပ်အား မဟာမိတ်တပ်ဖွဲ့များက Shar Htoo WAWနည်းပညာသုံး တိုက်ခိုက်ရေး မောင်းသူမဲ့တိုက်ခိုက် ရေးလေယာဥ်ငယ်များဖြင့် Air Bomb (၁၂)လုံး ၊ လက်လုပ် Rocket (၁၂)လုံး ၊ လက်လုပ် (၆၀ မမ ၂၃လုံးတို့အား နံနက် ၁၀ နာရီ၄၅မိနစ်ခန့်အထိ ကြဲချ တိုက်ခိုက်ခဲ့ကြောင်း MSPDF အဖွဲ့က အသိပေးသည်။

တိုက်ခိုက်မှုများတွင် စစ်ကောင်စီတပ်ဘက်မှ အများအပြား ထိခိုက်ဒဏ်ရာရရှိပြီး နှစ်ဦး ဒဏ်ရာပြင်းထန်ကြောင်း MSPDF အဖွဲ့၏ ပြန်ကြားရေးတာဝန်ခံက ပြောသည်။

"အင်အားက ၉၀လောက်ပါတယ်။ ရွာတွေကိုတော့ဘာမှ လုပ်မသွားဘူး။ နှစ်ပတ်တစ်ခါလောက်တော့ ဝင်တယ်။"ဟု ပြန်ကြားရေးတာဝန်ခံက ပြောသည်။

အဆိုပါ စစ်ဆင်ရေးကို စစ်ကိုင်းခရိုင်အမှတ်(၄)တပ်ရင်း- MSPDF/MSDFနှင့်
မြင်းခြံခရိုင် အမှတ်(၁)တပ်ရင်း၊အမှတ်(၂) တပ်ရင်း၊ အမှတ်(၃)တပ်ရင်း၊အမှတ်(၈)တပ်ရင်း၊ မိတ္ထီလာခရိုင် အမှတ်(၂)တပ်ရင်းနှင့် အမှတ်(၃) တပ်ရင်း၊ချောက် PDF၊ ကျေးရွာတပ်ပေါင်းစု၊ ချင်းတွင်းတပ်ပေါင်းစု(Zone6)၊ MBTT-LDF၊အောင်သပြေညီနောင်(ကျောက်ဆည်)၊ KTTM(GBF)တို့ ပူးပေါင်းတိုက်ခိုက်ခဲ့ခြင်းဖြစ်သည်။

ပြီးခဲ့သည့် ဒီဇင်ဘာ ၁၂ ရက်ကလည်း ကျောက်ရစ်စခန်းမှထွက်လာသည့် အင်အား ၄၀ ခန့်ပါစစ်ကောင်စီစစ်ကြောင်းကို CDSOM 001 ဒရုန်းအဖွဲ့က ဒရုန်းဖြင့် ဗုံးချ တိုက်ခိုက်ခဲ့သေးသည်။

(စစ်ကောင်စီစစ်ကြောင်းအား မောင်းသူမဲ့လေယာဥ်ငယ်များဖြင့် တိုက်ခိုက်ရန် ပြင်ဆင်နေစဥ်။ ဓာတ်ပုံ - MSPDF)

မြိုင်တွင် စစ်ကောင်စီထောက်ပို့စစ်ကြောင်းအား PDFများ တိုက်ခိုက်

ဟာနာဆန်/People's Spring

မကွေးတိုင်း၊ မြိုင်မြို့နယ်တွင် စစ်ကောင်စီထောက်ပို့စစ်ကြောင်းကို ပီပါမိုင်းဖြင့် မိုင်းဆွဲတိုက်ခိုက်ခဲ့ရာ ထိခိုက်သေဆုံးမှုများရှိကြောင်း မြိုင်မြို့နယ် ပြည်သူ့ကာ​ကွယ်ရေးတပ်ဖွဲ့က သတင်းထုတ်ပြန်သည်။

ယမန်နေ့ (ဒီဇင်ဘာ ၁၉ ရက်)က တွင်းမပျူစောထီးကျေးရွာမှလာသော စစ်ကောင်စီထောက်ပို့ယာဥ်နှင့် စစ်ကြောင်းကို ပီပါမိုင်းဖြင့်မိုင်းဆွဲတိုက်ခိုက်ခဲ့ကြောင်း မြိုင်(ပကဖ)အဖွဲ့က အသိပေးသည်။

တိုက်ခိုက်မှုကြောင့် စစ်ကောင်စီတပ်သား ခြောက်ဦးထက်မနည်း သေဆုံးနိုင်ပြီး ၁၀ဦးထက်မနည်း ထိခိုက်ဒဏ်ရာရသည်ကို ဒရုန်းမှတ်တမ်းတွင် တွေ့ရကြောင်း မြိုင်(ပကဖ)အဖွဲ့ကဆိုသည်။

"အဲဒီစစ်ကြောင်းက ဒုတပ်ရင်းမှူးသေဆုံးသွားလို့ တွင်းမပျူရွာမှာ နှစ်ရက်လောက် ရပ်နေတာ။ တပ်ရင်းမှူးဦးစီးပြီး ရှေ့ဆက်ထွက်လာတဲ့အချိန် နှမ်းဆီကန်ရွာထဲဝင်တယ်။ ရွာထဲမှာ ပြည်သူတွေရဲ့စားနပ်ရိက္ခာတွေကို ခိုးယူစားသောက်ပြီး ကင်းတိုထွက်လာတဲ့အချိန် ပီပါမိုင်းနဲ့ ဖောက်ခွဲတိုက်ခိုက်ခဲ့တာပါ။"ဟု မြိုင်(ပကဖ)အဖွဲ့တာဝန်ရှိသူက ပြောသည်။

အဆိုပါစစ်ကြောင်းသည် ပခုက္ကူမှ မြိုင်မြို့နယ်အတွင်းရှိ စစ်စခန်းများကို ထောက်ပို့လာသော စစ်ကြောင်းဖြစ်ပြီး မကြာခဏတိုက်ခိုက်ခံနေရ၍ ရှေ့ဆက်မတတ်နိုင်ဘဲဖြစ်နေကြောင်း သိရသည်။

ထို့အပြင် အဆိုပါစစ်ကြောင်းသည် ဒေသခံပြည်သူများဖမ်းဆီး၍ လူသားဒိုင်းအဖြစ် ခေါ်ယူခြင်း ၊ နေအိမ်များကို မီးရှို့ဖျက်ဆီးခြင်း၊ ပြည်သူ့ လက်ဝတ်ရတနာများနှင့် ငွေကြေးဥစ္စာများကို အတင်းလုယူသိမ်းယူခြင်းစသော စစ်ရာဇဝတ်မှုများကို ဆက်တိုက်ကျူးလွန်နေကြောင်း ဒေသခံများက ပြောသည်။

ထို့ကြောင့် ပြည်သူများအနေဖြင့် စစ်ကြောင်းသတင်း နားစွင့်ပြီး သတိပြုနေထိုင်ကြရန် မြိုင်(ပကဖ)အဖွဲ့က တိုက်တွန်းသည်။
   
အဆိုပါ မိုင်းစစ်ဆင်ရေးကို မြိုင်(ပကဖ)၊ တပ်ရင်း(၂၊၆၊၇၊၁၇) ၊  မြိုင်(ပကဖ) အဖွဲ့ဝင်များဖြစ်သော တပ်ရင်း(၁)- တပ်ခွဲ ၁ ၊ တပ်ခွဲ ၂ ၊ Myaing Warriors တပ်ဖွဲ့ ၊  အလင်းတန်းပြောက်ကျားတပ်ဖွဲ့ ၊ MRDFတပ်ဖွဲ့တို့နှင့် KMDF -ကမ္မကာကွယ်ရေးတပ်ဖွဲ့ (ကမ္မတပ်ပေါင်းစု)တို့က ပူးပေါင်းတိုက်ခဲ့ခြင်းဖြစ်သည်။

စစ်ကောင်စီ​၏ ထောက်ပို့ယာဥ်တန်းသည် ပခုက္ကူမြို့မှ ဒီဇင်ဘာ၁၂ ရက်တွင် စတင်ထွက်ရှိလာခြင်းဖြစ်ပြီး ဒီဇင်ဘာ ၁၅ ရက်အထိ လမ်းကြောင်းတလျှောက် နေ့စဥ်တိုက်ခိုက်ခံခဲ့ရသည်။

မြိုင်(ပကဖ)အဖွဲ့ဝင် ရဲဘော်များအား စစ်ဆင်ရေးတစ်ခုတွင် တွေ့ရစဥ်။ ဓာတ်ပုံ - မြိုင်(ပကဖ)