မိုးမောက်က တံတား ဗုံးကြဲဖျက်ဆီးတာဟာ ဗန်းမော်ကိုထိန်းချုပ်ဖို့ စစ်တပ်ရဲ့ကြိုးပမ်းမှုဟု KIA ပြော

အောက်တိုဘာ ၂၄၊ ၂၀၂၆။ ထားမြတ်/People’s Spring

ကချင်ပြည်နယ်၊ မိုးမောက်မြို့နယ် မြို့သစ်ဒေသက တံတားကို အာဏာသိမ်းစစ်တပ်က တိုက်ခိုက်ဖျက်ဆီးခဲ့တဲ့ ရည်ရွယ်ချက်ဟာ ကချင်လွတ်လပ်ရေးတပ်မတော်(KIA) ပူးပေါင်းတပ်ရဲ့ ထောက်ပို့လမ်းကြောင်းကို ဖြတ်တောက်ပြီး ဗန်းမော်မြို့ကို ထိန်းချုပ်လို၍ ဖြစ်နိုင်ကြောင်း KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောပါတယ်။

၂၀၂၄ ကတည်းက KIA တိုက်ခိုက်သိမ်းပိုက်ထားတဲ့ မိုးမောက်မြို့နယ်ကို စစ်တပ်က အောက်တိုဘာ ၂၃ရက်မှာ လေကြောင်းက ဗုံးကြဲတိုက်ခိုက်ခဲ့ရာ တာပိန်မြစ်ကူးတံတား ပျက်စီးမှု ဖြစ်ခဲ့တာပါ။

" မြစ်ကြီးနား -ဗန်းမော် ကားလမ်းပေါ်က တာပိန်တံတားကိုလည်းသူတို့ မနေ့က ဗုံးကြဲပြီးမှ ဖျက်ဆီးလိုက်တဲ့ အခြေအနေရှိပါတယ်။ ဒါကတော့ သူတို့ရဲ့ ဗန်းမော်ကို ထိန်းချုပ်နိုင်ဖို့ သူတို့လည်း ကြိုးစားနေတယ်လို့ သုံးသပ်ပါတယ်။KIAနဲ့ ပူးပေါင်းတပ်တွေရဲ့ ထောက်ပို့လမ်းကြောင်းဖြစ်နေတယ်ဆိုပြီး သူတို့ သုံးသပ်လို့ဖျက်ဆီးလိုက်တာ ဖြစ်နိုင်ပါတယ်” လို့ ဗိုလ်မှူးကြီးနော်ဘူက ပြောကြားပါတယ်။

လတ်တလော ဗန်းမော်ဘက်မှာ တိုက်ပွဲတွေဆက်ရှိနေပြီး လေကြောင်း၊ ဒရုန်း လက်နက်ကြီး တိုက်ခိုက်မှုတွေ နေ့တိုင်းလိုလိုရှိနေတယ်လို့ အသိပေးပါတယ်။

“သူတို့ ထိုးစစ်ဆင်တဲ့နေရာကတော့ ခလရ(၄၇)ရဲ့ အောက်ပိုင်းမှာ မံစီဘက်ကို မျက်နှာမူတဲ့နေရာဘက်မှာ သူတို့ ထိုးစစ်ဆင်တာတွေ့ရပါတယ်။” လို့ ဗိုလ်မှူးကြီးနော်ဘူက ပြောပါတယ်။

စစ်တပ်ဟာ စက်တင်ဘာအတွင်းက ဗန်းမော်မြို့ကို ရေကြောင်းကနေ စစ်အင်အား ၁၀၀၀ကျော် ဖြည့်တင်းခဲ့ပြီးနောက် မြေပြင်ထိုးစစ်တွေလုပ်ဆောင်နေလို့ တိုက်ပွဲတွေ ပြင်းထန်နေတာပါ။

KIAနဲ့ စစ်တပ်တို့ဟာ ကချင်-စစ်ကိုင်းအစပ် ဟုမ္မလင်းဒေသမှာလည်း တိုက်ပွဲတွေရှိခဲ့ပြီး ဟုမ္မလင်းမြို့နယ် တောင်ဦးဒေသက စစ်တပ်နဲ့ SNA တပ်စခန်းအချို့ကို သိမ်းပိုက်ရရှိခဲ့ပါတယ်။

စခန်းသိမ်းတိုက်ပွဲအတွင်း လက်နက်ခဲယမ်း သိမ်းပိုက်ရရှိခဲ့ကြောင်းလည်း စစ်ရေးသတင်းရင်းမြစ်တွေက အသိပေးထားပါတယ်။

(မိုးမောက်မြို့နယ် မြို့သစ်ဒေသက တံတားကို အာဏာသိမ်းစစ်တပ်က ဖျက်ဆီးအပြီးတွေ့ရစဉ်။ ဓာတ်ပုံ - Lung Jung LA N)

မင်းတပ်မြို့ပေါ်ကို စစ်တပ် ထပ်မံ လေကြောင်း တိုက်ခိုက်

▪️လူထိခိုက်မှုရှိ၊ ဘာသာရေးအဆောက်အအုံနဲ့ နေအိမ်တွေ ပျက်စီး

အောက်တိုဘာ ၂၄၊ ၂၀၂၆။ ထားမြတ်/People’s Spring

ချင်းပြည်နယ် မင်းတပ်မြို့ကို အာဏာသိမ်းစစ်တပ်က လေကြောင်း တိုက်ခိုက်မှု ထပ်မံ ပြုလုပ်ခဲ့လို့ လူနဲ့ နေအိမ်အဆောက်အအုံ ပျက်စီးမှုတွေရှိခဲ့ကြောင်း မင်းတပ်ဒေသခံက ပြောပါတယ်။

ဒီကနေ့ အောက်တိုဘာ ၂၄ရက်မနက် ၁၀နာရီလောက်မှာ မင်းတပ်မြို့ပေါ် တနေရာကို စစ်တပ်က တိုက်လေယာဉ် ၂စီးနဲ့ ဗုံး ၈လုံး ကြဲချခဲ့ရာ ထိခိုက်ပျက်စီးမှုတွေရှိခဲ့တာလို့ဆိုပါတယ်။
“လူအထိအခိုက်တော့ရှိတယ်လို့ကြေားတယ် သေချာတော့ မသိရသေးဘူး” လို့ ဒေသခံက ပြောပါတယ်။

လေကြောင်းတိုက်ခိုက်မှုကြောင့် ဘာသာရေး အဆောက်အဦးအပါအဝင် ပြည်သူ့နေအိမ် ၁၀ လုံးကျော် ပျက်စီးခဲ့ရတယ်လို့လည်း ဒေသခံက အသိပေးပါတယ်။

စစ်တပ်ဟာ အောက်တိုဘာ ၂၂ရက် ညနေပိုင်းကလည်း မင်းတပ်မြို့အနီး တနေရာကို လေယာဉ်ဗုံးကြဲခဲ့ပါသေးတယ်။ တိုက်လေယာဉ် ၆စီး၊ Y12 လေယာဉ် ၁စီးနဲ့ ဗုံးကြဲတိုက်ခိုက်ခဲ့တာဖြစ်ပြီး အတွဲလိုက်ဗုံးတွေ အပါအဝင် ဗုံးအလုံးရေ ၃၀ ကျော်ကြဲချတိုက်ခိုက်ခဲ့တယ်လို့ ဒေသခံက အသိပေးထားပါတယ်။
အာဏာသိမ်းစစ်တပ်ဟာ ချင်းပြည်သူ့အစည်းအရုံး/ချင်းပြည်သူ့တပ်မတော်(CPU/CPA) ထိန်းချုပ် ထားတဲ့ မင်းတပ်၊ ကန်ပက်လက်၊ ကျင်ဒွေးဒေသတွေ ပြန်ရဖို့ ထိုးစစ်ဆင်နေတာဖြစ်ပြီး မေလကနေ အခုထိ တိုက်ပွဲတွေ ဖြစ်ပွားနေတာပါ။

လတ်တလော မင်းတပ်နဲ့ ဆောမြို့နယ် ကျောက်ထုအကြားမှာ တိုက်ပွဲတွေ ရှိနေတယ်လို့လည်း ဒေသခံက ပြောပါတယ်။

စစ်တပ်ဟာ ချင်းတောင်ပိုင်းဒေသတွေကို အင်အားအလုံးအရင်းနဲ့ ထိုးစစ်ဆင်ရာမှာ တိုက်ပွဲအတွင်း အထိနာတာကြောင့် ရှုံးမဲမဲပြီး ပြည်သူတွေကို လေကြောင်းဗုံးကြဲတိုက်ခိုက်နေကြောင်း CPU/CPAက ထုတ်ပြန်ထားပြီး ပြည်သူတွေ လေကြောင်း သတိပြုဖို့ နှိုးဆော်ထားပါတယ်။

ကန့်ဘလူနယ် လေကြောင်းတိုက်ခံရပြီး ပြည်သူ ၅ဦး သေဆုံး

အောက်တိုဘာ-၂၄၊ ၂၀၂၆။ ကတ်သရင်း/People's Spring

စစ်ကိုင်းတိုင်း၊ ကန့်ဘလူမြို့နယ် မလယ်တိုက်နယ်က ထန်းတောကျေးရွာနဲ့ ချောင်းသာရွာတို့ကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ပြည်သူ ၅ဦး သေဆုံးပြီး ၄ဦး အပြင်းအထန်ဒဏ်ရာရခဲ့တယ်လို့ ဒေသခံတွေက ပြောပါတယ်။

အောက်တိုဘာ ၂၃ ရက် မနေ့က ညနေ ၆နာရီခွဲမှာ မိတ္ထီလာရှမ်းတဲလေတပ်က တက်လာတဲ့ ဂျက်ဖိုက်တာနဲ့ အာဏာသိမ်းစစ်တပ်က ဗုံးကြဲတိုက်ခိုက်ခဲ့တာလို့ သိရပါတယ်။

ဗုံးကြဲခံရမှုမှာ ထန်းတောရွာက အသက် ၄၆နှစ်အရွယ် ဒေါ်ပြား၊ အသက် ၄၀ အရွယ် ကိုကျော်ဝင်းအောင်နဲ့ ဇနီးဖြစ်သူ အသက် ၃၂နှစ်အရွယ် မသူဇာဝင်း၊ အသက် ၃၀အရွယ် ကိုထက်လင်းအောင်နဲ့ အသက်၂၆နှစ်အရွယ် ကိုစည်တို့ ပွဲချင်းပြီး သေဆုံးခဲ့တာလို့ သိရပါတယ်။ ကိုစည်က ဒေါ်ပြားရဲ သားဖြစ်ပြီး သားအမိနှစ်ယောက် သေဆုံးခဲ့ကာ ကိုထက်လင်းအောင်နဲ့ မသူဇာဝင်းတို့ကလည်း မောင်နှမ တော်စပ်တယ်လို့ သိရပါတယ်။

နောက်ထပ်အမျိုးသမီး ၄ ဦးလည်း ထိခိုက်ဒဏ်ရာ ရခဲ့တယ်လို့ ဒေသခံတွေက ပြောပါတယ်။

"ဒီနေရာက တိုက်ပွဲနဲ့လည်း မနီးစပ်ပါဘူး။ စစ်ရေးလှုပ်ရှားတာမျိုးလည်း မရှိဘဲ စစ်တပ်က လေကြောင်းတိုက်သွားတာပါ။ ထန်းတောကိုကျ ဒီကောင်‌တွေက အငြှိုးတကြီးလုပ်တယ်ဗျ။ လေကြောင်းလည်းကြဲတယ်။ ရွာလည်း မကြာဏ ဝင်စီးတယ်။ ဘာစစ်ရေးလှုပ်ရှားမှုမှမရှိထားဘူး"လို့ ဒေသခံအမျိုးသားတစ်ဦးက ပြောပါတယ်။

အဲဒီနောက် စစ်တပ်ဟာ ချောင်းသာရွာကို မကွေးလေတပ်ကတက်လာတဲ့ ဂျက်ဖိုက်တာနဲ့ ထပ်မံ ဗုံးကြဲတိုက်ခိုက်ခဲ့ရာ နွားနှစ်ကောင် သေဆုံးခဲ့တယ်လို့ သိရပါတယ်။

စစ်တပ်က ပြည်သူတွေကို ပစ်မှတ်ထားကာ လေကြောင်းတိုက်ခိုက်မှုတွေ ဆက်တိုက်ပြုလုပ်နေပြီး စက်တင်ဘာ ၂၈ ရက်ကလည်း ကန့်ဘလူမြို့နယ် အင်းလယ်ကြီးရွာ လေကြောင်းတိုက်ခံရကာ ကလေးငယ်တွေအပါအဝင် စုစုပေါင်းပြည်သူ ၄ဦး သေဆုံးခဲ့ပါတယ်။

(စစ်တပ်လေကြောင်းဗုံးကြဲမှုကြောင့် သေဆုံးခဲ့ရတဲ့ ပြည်သူတချို့။ ဓာတ်ပုံ - ဒေသခံ)

စစ်တွေနဲ့ ငပြီကျွန်းမှာအထိနာတဲ့ စစ်တပ်က ပေါက်တောမြို့ကို ဗုံးကြဲ၊ ပြည်သူ ၉ဦးထက်မနည်း ဒဏ်ရာရ

အောက်တိုဘာ ၂၄၊၂၀၂၆။ ခိုင်မြတ်/People’s Spring

ရခိုင်ပြည်နယ်က စစ်တွေနဲ့ ငပြီကျွန်းတိုက်ပွဲမှာ အထိနာနေတဲ့ စစ်တပ်ဟာ တိုက်ပွဲနဲ့အလှမ်းဝေးတဲ့ ပေါက်တောမြို့နယ်အတွင်းက အရပ်သားလူနေကျေးရွာတွေဖြစ်တဲ့ သဝင်ချောင်း၊ အ၀ကန်ကျေးရွာတို့ကို ထောက်ပို့လေယာဉ် Y12 နဲ့ ဗုံးကြဲတာကြောင့် ဒေသခံပြည်သူ ၉ ဦးထက်မနည်း ဒဏ်ရာရသွားတယ်လို့ ဒေသခံတွေက ပြောပါတယ်။

ဒီနေ့ အောက်တိုဘာ ၂၄ ရက် မနက် ၆ နာရီဝန်းကျင်မှာ Y12 ၁ စီးနဲ့ အဲဒီရွာတွေနဲ့အနီးဝန်းကျင်တို့ကို ဗုံးပတ်ကြဲ နေခဲ့တာဖြစ်ပြီး သဝင်ချောင်းရွာမှ ပြည်သူ ၇ ဦး၊ အ၀ကန်ရွာမှ ပြည်သူ ၂ ဦး ဒဏ်ရာရခဲ့ပါတယ်။

“ငပြီကျွန်းကိုက နေ့တိုင်း လေယာဉ်တွေအများကြီးနဲ့ ဗုံးလာကြဲတယ်။ ကျွန်တော်တို့ရွာတွေ လမ်းကြုံဗုံးချခံရတာ။ မနက်ကလည်း သဝင်ချောင်းကို လေးလုံး၊ အ၀ကန်ကို နှစ်လုံး ချသွားတယ်။ တိုက်ပွဲနဲ့လည်း အဝေးကြီး၊ စစ်ရေးနဲ့ လည်း ဘာမှမဆိုင်ပါ” လို့ ပေါက်တာဒေသခံတစ်ဦးက ပြောပါတယ်။

သဝင်ချောင်းနဲ့ အ၀ကန်ကျေးရွာတို့ဟာ အခုတိုက်ပွဲဖြစ်နေတဲ့ ငပြီကျွန်းနဲ့ လေးမိုင်ဝန်းကျင်အကွာ ကုလားတန် မြစ်ရှေ့ဘက်ကမ်းမှာ တည်ရှိတဲ့ရွာဖြစ်ကြပြီး ဒေသခံအရပ်သားတွေနဲ့ စစ်တွေမြို့နယ်အတွင်းက စစ်ဘေးရှောင် တွေ ခိုလှုံနေထိုင်ကြတဲ့ ရွာတွေဖြစ်ပါတယ်။

လက်ရှိမှာတော့ စစ်တပ်ရဲ့ ပေါက်တောမြို့နယ်နယ်အတွင်းက လူနေကျေးရွာတွေကိုပါမချန် လေကြောင်း၊ လက်နက်ကြီးခတ်မှုတွေကြောင့် ရွာသားအများစုတိမ်းရှောင်နေပြီး လယ်ယာလုပ်ငန်းလုပ်ကိုင်မယ်သူအချို့ အိမ်စောင့်သဘောကျန်နေကြပါသေးတယ်။

“ကျွဲတွေ၊ နွားတွေနဲ့ တချိုု့က အစောင့်ကျန်တယ်” လို့ သဝင်ချောင်းရွာသားတစ်ဦးက ပြောပါတယ်။

စစ်တပ်ဟာ ပေါက်တောမြို့နယ်အတွင်းက တိုက်ပွဲဖြစ်နေတဲ့ ငပြီကျွန်းနဲ့ ကျွန်းအနီးပတ်လည် အရပ်သားကျေး ရွာတွေကို Y12 အပါအဝင် လေယာဉ် အစီးတဆယ်ဝန်းကျင်နဲ့ နေ့စဉ်ရက်ဆက်ဗုံးကြဲနေတာဖြစ်ပါတယ်။ “မနေ့ က တညလုံးကြဲတယ်။ မနက်အစောကြီးကလည်း ကြဲတယ်။ အခုလည်း လေယာဉ်ဝဲနေတယ်။ ဘယ်နား ချအုံးမလဲမ သိဘူး” လို့ ပေါက်တောမြို့နယ်မှ ဒေသခံအမျိုးသမီးတစ်ဦးက ဒီနေ့ နေ့လယ် ၂ နာရီဝန်းကျင်မှာ ပြောပါတယ်။

ပြီးခဲ့တဲ့ အောက်တိုဘာ ၂၁ ရက် ည ၁၀ နာရီလောက်ကလည်း Y12 လေယာဉ်နဲ့ ပေါက်တောမြို့နယ် သဝင် ချောင်းနဲ့ တောင်ညိုရွာတို့ ကို ဗုံးအလုံး၂၀ ဝန်းကျင် ကြဲချတိုက်ခိုက်ခဲ့ပါသေးတယ်။ ဒါ့အပြင် မနေ့က အောက်တို ဘာ ၂၃ ရက်နေ့မနက်ပိုင်းကလည်း စစ်တွေမြို့ပေါ်ကို Y12 နဲ့ ဗုံး ၂လုံး ကြဲချခဲ့တာကြောင့် ၉ ဦး သေဆုံးပြီး ၁၆ ဦး ထက်မနည်း ဒဏ်ရာရခဲ့ပါတယ်။

အာဏာသိမ်းစစ်တပ်က ၄၉၂၆ စစ်ဆင်ရေးလို့ အမည်တပ်ပြီး အာရက္ခတပ်တော်(AA)ထိန်းချုပ်နယ်မြေတွေကို ထိုး စစ်ဆင်နေခဲ့တာဟာ တလကျော်ရှိပြီဖြစ်ပြီး အဲဒီစစ်ဆင်ရေးကာလအတွင်း တပ်စခန်းတွေလက်လွှတ်၊ အထိနာနေ ကာ အရပ်သားလူနေကျေးရွာတွေ၊ စစ်ဘေးရှောင်စခန်းတွေ၊ စျေးတွေကို ဆက်တိုက်ဗုံးကြဲနေတာဖြစ်ပါတယ်။

လူထုနွေဦးက ကောက်ယူပြုစုထားတဲ့အချက်အလက်တွေအရ စစ်တပ်ရဲ့ စစ်ဆင်ရေးစတဲ့ စက်တင်ဘာ ၄ ရက်နေ့ ကနေ အောက်တိုဘာ ၂၄ ရက်နေ့ထိ တလကျော်အတွင်း စစ်တပ်လက်ချက်ကြောင့် သေဆုံးရတဲ့ ရခိုင်ဒေသခံ အ ရပ်သားပြည်သူ ၁၀၆ ဦးနဲ့ ထိခိုက်ဒဏ်ရာရသူ ၁၈၆ ဦးထက်မနည်း ရှိသွားခဲ့ပြီဖြစ်ပါတယ်။

(အောက်တိုဘာ ၁၀ ရက်က ပေါက်တောမြို့နယ် ဆင်အိုင်ကျေးရွာကို စစ်တပ်ဗုံးကြဲလို့ ဒဏ်ရာရသွားသူ၁ဦး။ဓါတ်ပုံ - Wai Hun Aung)

EV ကားအားသွင်းရင်း ပျောက်ဆုံးတဲ့ အမျိုးသမီး နေအိမ်ပြန်ရောက်

▪️ခက်ခဲပြီးကြောက်စရာကောင်းတဲ့အခြေအနေကြုံခဲ့ရတယ်လို့ ကာယကံရှင်ဖွင့်ဟ

အောက်တိုဘာ-၂၄၊၂၀၂၆။ရောင်နီ/People's Spring

ရန်ကုန်မြို့မှာ EV ကားအားသွင်းရင်း ပျောက်ဆုံးသွားတဲ့ အမျိုးသမီးက နေအိမ်ကို ဘေးကင်းစွာပြန်ရောက်ပြီဖြစ်ကြောင်း သူမရဲ့ လူမှုကွန်ရက်စာမျက်နှာကနေ ဒီနေ့(အောက်တိုဘာ၂၄) မှာ အသိပေးထားပါတယ်။

"ကျမ နှင်းလဲ့လဲ့ပိုင် (Ma Yuki) ကျန်းမာစွာနဲ့ အိမ်ပြန်ရောက်ပါပြီရှင်။ အများထင်နေသလို ပြန်ပေးဆွဲတာမဟုတ်ပါဘူးနော်"လို့ ရေးသားထားပါတယ်။

မနှင်းလဲ့လဲ့ပိုင်က အောက်တိုဘာ ၂၁ရက်ညမှာ MG EV Charging Station မှာ ကားအားသွင်းရင်း လူငယ်အမျိုးသား ၃ဦးက ခေါ်ဆောင်သွားတာကို CCTV မှတ်တမ်းတွေမှာ တွေ့ခဲ့တာပါ။

ပျောက်ဆုံးနေတဲ့ ၂ရက်ကျော်အတွင်း ဖြစ်ခဲ့တဲ့ အကြောင်းအရာတွေကိုတော့ ကာကယကံရှင်က ပွင့်ပွင့်လင်းလင်း အသိပေးထားတာမရှိပါဘူး။

ဒါပေမဲ့ ကာယကံရှင်က “ဘဝမှာမေ့မရတော့မယ့် အခြေအနေတစ်ခုတော့ကြုံခဲ့ရပါတယ်ရှင့် ၊ ခက်ခဲပြီးကြောက်စရာကောင်းတဲ့ ၂ရက်ခွဲတာမှာ အစအဆုံး စိတ်ပူကူညီပေးကြတဲ့ တစ်ဦးတစ်ယောက်ချင်းစီကို ကျေးဇူးအထူးတင်ပါတယ်ရှင့်" လို့ ရေးသားအသိပေးပါတယ်။

ရန်ကုန်မြို့ အလုံမြို့နယ်မှာ အောက်တိုဘာ ၂၃ရက်က သတိမေ့နေတဲ့ အမျိုးသမီးကို လမ်းပေါ်မှာ လာရောက်ပစ်သွားတဲ့ ဖြစ်စဉ်ဖြစ်ခဲ့ပြီး အဲဒီ့အမျိုးသမီးက မနှင်းလဲ့လဲ့ပိုင် မဟုတ်ဘူးလို့ ယင်းဖြစ်စဉ်ကို သွားရောက်ကူညီခဲ့တဲ့ ကြီးလေးကြီးလူမှုကူညီရေးအသင်းက အသိပေးထားပါတယ်။

ရန်ကုန်မြို့ရဲ့ မြို့နယ်တော်တော်များများမှာ လူပျောက်မှုတွေ ဆက်တိုက်ဖြစ်နေတာဖြစ်ပြီး နေအိမ်ကို ပြန်ရောက်လာသူတွေရှိသလို အချို့လည်း သတင်းအဆက်အသွယ်မရတာတွေရှိနေပါတယ်။

စစ်တပ်အာဏာသိမ်းပြီးနောက်ပိုင်း ရန်ကုန်အပါအဝင် မြို့နယ်တိုင်းမှာ လုယက်သတ်ဖြတ်မှုတွေ တိုးမြင့်လာတာကြောင့် ပြည်သူတွေက ကိုယ့်လုံခြုံရေးကို ကိုယ်တာဝန်ယူရမယ့် အခြေအနေဖြစ်နေတာပါ။

စစ်တပ် သံချပ်ကာယာဉ် အသေခံဒရုန်းနဲ့ တိုက်ခိုက်တဲ့ ရုပ်သံထွက်ပေါ်

အောက်တိုဘာ ၂၄၊၂၀၂၆။ထားမြတ်/People’s Spring

အာဏာသိမ်းစစ်တပ်ရဲ့ သံချက်ကာယာဉ်ကို အသေခံဒရုန်းနဲ့ တိုက်ခိုက်ခဲ့တဲ့ အဲဒီဖြစ်စဉ်ဟာ ကချင်ပြည်နယ်၊ ဗန်းမော်မြို့တိုက်ပွဲမှာ ကချင်လွတ်လပ်ရေးတပ်မတော်(KIA)၊ ပြည်သူ့ကာကွယ်ရေးတပ်မတော်(PDF) ပူးပေါင်းတပ်က တိုက်ခိုက်ခဲ့တဲ့ ရုပ်သံဖြစ်တယ်လို့ စစ်လက်နက်ပစ္စည်း လေ့လာအသိပေးလျက်ရှိတဲ့ Tactical Raptor က ဖော်ပြခဲ့ပါတယ်။

စက္ကန့် ၂၀ ကျော်ကြာမြင့်တဲ့ အဲဒီ ရုပ်သံမှာ လမ်းမပေါ်က သံချပ်ကာယာဉ် ၁စီးကို အသေခံ ဒရုန်းနဲ့ တိုက်ခိုက်ခဲ့တာ တွေ့ရပါတယ်။

" ဗန်းမော်မှာ စစ်တပ်ရဲ့ Type-92 သံချပ်ကာတိုက်ယာဉ်တစ်စီးကို KIA/PDF ပူးပေါင်းတပ်ဖွဲ့တွေက FPV ဒရုန်းနဲ့ တိုက်ခိုက်ခဲ့တဲ့ ဗီဒီယိုတစ်ခုပါ။ တိုက်ခိုက်မှု ဘယ်နေ့က ဖြစ်ခဲ့တယ်ဆိုတာတော့ အတည်မပြုနိုင်သေးပါဘူး။ ဖြစ်စဉ်အဟောင်းကို အခုမှ ဗီဒီယို ထုတ်ပြန်တာလည်း ဖြစ်နိုင်ပါတယ်” လို့ Tactical Raptor က ရေးသားထားပါတယ်။

အခု သံချပ်ကာယာဉ်ကို ဒရုန်းနဲ့ တိုက်ခိုက်မှုနဲ့ပတ်သက်ပြီး Tactical Raptor ရေးသားချက်မှာ ၂၀၂၅ ဗန်းမော်မြို့တိုက်ပွဲမှာ စစ်တပ်က Type-92 သံချပ်ကာယာဉ်တွေ အသုံးပြုခဲ့တာ ခပ်စိပ်စိပ်တွေ့ရဟု ရေးသားထားပါတယ်။

" အခုတော့ မတွေ့ရတာ လနဲ့ချီကြာနေပါပြီ။KIA ပူးပေါင်းတပ်ဖွဲ့‌တွေရဲ့ တိုက်ခိုက်မှု‌ကြောင့် ထိခိုက်ပျက်စီးတာ၊ အသုံးပြုတာ များတာနဲ့အမျှ ပြင်ဆင်ထိန်းသိမ်းဖို့ အပိုပစ္စည်းမရတာကနေ operational conditions မရှိတော့တာ လားလို့ ယူဆထားကြတာပါ။ ဩဂုတ်၊ စက်တင်ဘာလတွေအတွင်း ဗန်းမော်ကို ရောက်အောင်သွားနိုင်ခဲ့တဲ့ စစ်တပ်ရေယာဉ်တွေမှာ အပိုပစ္စည်းတွေ ပါလာပြီး စစ်တပ်ရဲ့ Type-92 သံချပ်ကာယာဉ်တွေကို operational conditions ရောက်အောင် ပြန်လည်ပြင်ဆင်နိုင်ခဲ့တာလား စဉ်းစားစရာရှိပါတယ်။ယခု ဗီဒီယိုထဲမှာတော့ FPV ဒရုန်းက Type-92 သံချပ်ကာယာဉ်ရဲ့ 25mm စက်အမြောက်တပ်ဆင်ထားတဲ့ turret နေရာကို ဦးတည်ပြီး တိုက်ခိုက်ခဲ့ပါတယ်။ စက်အမြောက် ပျက်စီးပြီး mission kill ရသွားနိုင်တဲ့ အခြေအနေပါ။” လို့ ရေးသားထားပါတယ်။

၂၀၂၅ကလည်း စစ်တပ်ရဲ့ Type-92 သံချပ်ကာယာဉ် ၁စီးကို KIA ပူးပေါင်းတပ်ဖွဲ့တွေက FPV ဒရုန်းအသုံးပြုပြီး တိုက်ခိုက်ခဲ့ကြောင်းဖော်ပြပါတယ်။

“မနှစ်က ဖြစ်ရပ်မှာတော့ အတီးခဲ့ရတဲ့ Type-92 သံချပ်ကာယာဉ်မှာ ဒရုန်းရန်ကာကွယ်ဖို့ သံဇကာတွေ တပ်ဆင်ထားတာတွေ့ရပါတယ်။” လို့ ဆိုပါတယ်။

၂၀၂၄ နှစ်ကုန်ပိုင်းနဲ့ ၂၀၂၅ နှစ်ဆန်းပိုင်းတွေက မိုးမောက်၊ ဗန်းမော်မြို့သိမ်း တိုက်ပွဲတွေဖော်ဆောင်စဉ်ကလည်း စစ်တပ်ရဲ့ သံချပ်ကာယာဉ်တွေကို KIAပူးပေါင်းတပ်က တိုက်ခိုက်ဖျက်ဆီးတာ၊ ဗန်းမော်အခြေစိုက် သံချပ်ကာတပ်ရင်း၊ တင့်ကားတပ်ရင်းတွေကို တိုက်ခိုက်သိမ်းပိုက်တာ ရှိခဲ့ပါတယ်။

သံချပ်ကာယာဉ်ကို အသေခံဒရုန်းနဲ့ တိုက်ခိုက်ခဲ့မှုနဲ့ပတ်သက်ပြီး KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံ ဆက်သွယ်မေးမြန်းရာ “ဗန်းမော်မှာကတော့ မံစီဘက်ကို မျက်နှာမူတဲ့နေရာမှာ ဒရုန်းတို့ လက်နက်ကြီးတို့ နဲ့တော့ နေ့တိုင်းလိုရှိပါတယ်။ လေကြောင်းနဲ့ တိုက်တာလည်းရှိပါတယ်။ သူတို့က မြေပြင်ကနေ လည်း လိုက်ပြီးမှ ထိုးစစ်ဆင်နေတဲ့ ဖြစ်စဉ်တွေရှိပါတယ်” လို့ ပြောကြားပါတယ်။ သံချပ်ကာယာဉ်ကို ဒရုန်းနဲ့ တိုက်ခိုက်မှု ဖြစ်စဉ်ကို မေးမြန်းရာ အဲဒီဖြစ်စဉ်ကို မကြားသိရဟု ပြောပါတယ်။

KIA အနေနဲ့ အသေခံ ဒရုန်းတွေကို ၂၀၂၅နှစ်ဆန်းကတည်းက အသုံးပြုခဲ့တာကို တိုက်ပွဲရုပ်သံဖော်ပြချက်အရ သိရပါတယ်။

၂၀၂၅ မေလ ဗန်းမော်မြို့တိုက်ပွဲမှာ ဗန်းမော်သို့ စစ်အင်အားလာပို့တဲ့ ရဟတ်ယာဉ်ကို အသေခံဒရုန်းနဲ့ တိုက်ခိုက်ခဲ့ရာ ရဟတ်ယာဉ် ၂စီး ထိခိုက်ပျက်စီခဲ့ပါတယ်။ မေလ ၂၀ရက်က တိုက်ခိုက်ခဲ့တဲ့ အဲဒီဖြစ်စဉ်မှာ ရဟတ်ယာဉ် ၁စီးဟာ ရွှေကူမြို့နဲ့ ၁၅ မိုင်အကွာ တောတွင်းမှာ ပျက်ကျခဲ့သလို ကျန် ၁စီးဟာ ရွှေကူမြို့ စစ်တပ်က အရေးပေါ် ဆင်းသက်ရပ်နားစဥ် KIAက ထပ်မံ တိုက်ခိုက်ဖျက်ဆီးခဲ့တာပါ။

အဲဒီလိုပဲ ပြီးခဲ့တဲ့ စက်တင်ဘာလဆန်းကလည်း ဗန်းမော်မြို့ကို ရေကြောင်းကနေ စစ်အင်အားဖြည့်တင်းလာတဲ့ စစ်တပ် သင်္ဘောတွေကို KIA ပူးပေါင်းတပ်က တိုက်ခိုက်ခဲ့ရာ ဒရုန်းတိုက်ခိုက်မှုတွေကြောင့်လည်း စစ်တပ်သင်္ဘောတွေ ထိခိုက်မီးလောင်ခဲ့တာ တွေ့ရပါတယ်။ စက်တင်ဘာလအတွင်းမှာ ဗန်းမော် -ရွှေကူကြားမှာ KIA ပူးပေါင်းတပ်ရဲ့တိုက်ခိုက်မှုကြောင့် စစ်သင်္ဘော အစီး ၂၀ခန့် မီးလောင်ပျက်စီးနစ်မြုပ်ခဲ့ရကြောင်း KIAက အသိပေးထားပါတယ်။



𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #စစ်ကောင်စီ #သံချပ်ကာယာဉ် #အသေခံဒရုန်း #ဒရုန်းဖြင့်တိုက်ခိုက်မှု #မြန်မာ့စစ်ရေးသတင်း #MilitaryCouncil #ArmoredVehicle #KamikazeDrone #DroneAttack #MyanmarConflict #MyanmarNews

မြိုင်မြို့နယ်ကို စစ်တပ် ဗုံးကြဲ၊ အရပ်သား ၃ဦးသေဆုံးပြီး ကလေးငယ် ၃ဦး ဒဏ်ရာရ

အောက်တိုဘာ-၂၄၊၂၀၂၆။ဖိုးသား /People's Spring

မကွေးတိုင်း၊မြိုင်မြို့နယ်ကို အာဏာသိမ်းစစ်တပ် ဗုံးကြဲတာကြောင့် အရပ်သား ၃ဦးသေဆုံးပြီး ကလေးငယ် ၃ဦးဒဏ်ရာရတယ်လို့ ဒေသခံတချို့က ပြောပါတယ်။

ဒီကနေ့ (အောက်တိုဘာ ၂၄ ရက်) မနက် ၁၀နာရီ၀န်းကျင်က ဂျိုင်ရိုကော်ပရာ ၃စီးနဲ့ မြိုင်မြို့နယ် အနောက်ပိုင်းကို ဗုံးကြဲခဲ့တာလို့ ဆိုပါတယ်။

အဲဒီဗုံးကြဲမှုတွေကြောင့် တောင်ယာလုပ်နေတဲ့ အသက်(၆၀)အရွယ် အမျိုးသား ၁ဦးနဲ့ အသက်(၄၀)၀န်းကျင် အမျိုးသမီး ၂ဦး သေဆုံးခဲ့ရတယ်လို့ သိရပါတယ်။

ဒါ့အပြင် ကလေးငယ် ၃ဦး ထိခိုက်ဒဏ်ရာရထားပြီး ဆေးကုနေရပါတယ်။

"ယောက္ခထီးနဲ့ ချွေးမ ဆုံးသွားတယ်။ ထိတဲ့ကလေးတွေကလည်း သူတို့မိသားစု၀င်တွေ ။၁၁ လအရွယ် ကလေးတောင်ပါတယ်"လို့ မြိုင်နယ်အနောက်ခြမ်း စစ်ရှောင်တွေကို ကူညီနေသူတစ်ဦးက ပြောပါတယ်။

လေကြောင်းအန္တရာယ်နဲ့ မြေပြင် ဒေသခံတွေရဲ့ လုံခြုံရေး အပါအ၀င် ထိ‌ခိုက်သေဆုံးခဲ့တြဲ
ကာယကံရှင်မိသားစု၀င်တွေရဲ့ ဆန္ဒအရ ဖြစ်စဉ် ဖြစ်ပွားရာနေရာအသေးစိတ်ကို မဖော်ပြဖို့ သူက တောင်းဆိုပါတယ်။

အာဏာသိမ်းစစ်တပ်က အခုရက်ပိုင်းအတွင်း မြိုင်မြို့နယ်ကို ဂျက်ဖိုက်တာ၊ Y12၊ပါရာမော်တာ၊ဂျိုင်ရိုကော်ပတာ တွေနဲ့ လေကြောင်း တိုက်ခိုက်မှုတွေ ဆက်တိုက်လုပ်နေပြီး ကျေးရွာနဲ့ တောတိုက်တွေကို ဗုံးကြဲတိုက်ခိုက်နေတယ်လို့လည်း မြိုင်မြို့နယ် အရပ်ဖက်အဖွဲ့အစည်းတွေက အသိပေးထားပါတယ်။

"ပြည်သူတွေအားလုံး ဒီရက်ပိုင်းတွေမှာ လေကြောင်းရန်ကို အထူးဂရုစိုက်ပါ။အကြမ်းဖက်စစ်ကောင်စီဟာ စစ်ရေးမှာ နေရာတိုင်းမှာ အရှူံးနဲ့ ရင်ဆိုင်နေရချိန်ဖြစ်ပါတယ်။ဒါကြောင့် လေကြောင်းကို ဖိပြီး သုံးနေတာ"လို့ မြိုင်မြို့နယ်စစ်ရေးသတင်းရင်းမြစ်က ပြောပါတယ်။

ဒီကနေ့ ဖြစ်စဉ်မတိုင်မီ လွန်ခဲ့တဲ့လေးရက်ကလည်း မြိုင်မြို့နယ်နဲ့ကပ်လျက်က ပခုက္ကူမြို့နယ် ကမ္မမြို့ အုန်းတောရွာကို စစ်တပ်လေကြောင်းတိုက်ခိုက်ခဲ့တာကြောင့် (၈)နှစ်အရွယ်ကလေး အပါအ၀င် ဒေသခံ၆ ဦးသေဆုံးခဲ့ရပါတယ်။

ပခုက္ကူ ၊မြိုင်နဲ့ပေါက်မြို့နယ်တွေက ဒေသတွင်းတော်လှန်ရေးတပ်တွေရဲ့ အရင်းအမြစ်ဖြစ်တဲ့ ရေနံမှော်တွေကို ထိန်းချုပ်ဖို့ အာဏာသိမ်းစစ်တပ်က ဇွန်လဆန်းပိုင်းကစပြီး အင်အား ၅၀၀၀န်းကျင်နဲ့ စစ်ကြောင်းထိုးခဲ့တာဖြစ်ပြီး လက်ရှိ တဲကြီးရွာမှာ တပ်စွဲထားတာ ၂လ နီးပါးရှိနေပြီဖြစ်ပါတယ်။

ပေါက်-မြိုင် ဒေသအစပ် တဲကြီးရွာမှာ တပ်စွဲထားတဲ့ စစ်တပ်စစ်ကြောင်းကို အောက်တိုဘာလဆန်းကတည်းကတော်လှန်ရေးတပ်တွေ ထိုးစစ်ဆင်နေပါတယ်။

အဲဒါကြောင့် အထိနာနေတဲ့စစ်တပ်က ပခုက္ကူတပ်မ (၁၀၁)ကနေ ပခုက္ကူ-ကမ္မ လမ်းပိုင်းကတဆင့် စစ်ကူယာဉ်တန်းတွေ ပို့နေတာလက်ရှိ မြိုင်မြို့နယ် တွင်းမပျူစောထီးရွာကို ရောက်နေပြီလို့ သိရပါတယ်။

တောင်ဒဂုံမှာ ခြင်ဆေးခွေမီးကြောင့် နေအိမ် ၂လုံးဆုံးရှူံး

အောက်တိုဘာ-၂၄၊၂၀၂၆။သတိုး/People's Spring

ရန်ကုန်မြို့၊ ဒဂုံမြို့သစ်တောင်ပိုင်းမြို့နယ်မှာ ခြင်ဆေးခွေထွန်းရာက မီးစလောင်ခဲ့ပြီး နေအိမ် ၂လုံး မီးလောင်ဆုံးရှုံးခဲ့တယ်လို့ ဒေသခံတွေက ပြောပါတယ်။

အောက်တိုဘာ ၂၃ရက် ည ၁၀ နာရီခွဲလောက်မှာ ဒဂုံမြို့သစ်တောင်ပိုင်းမြို့နယ် (၁၉)ရပ်ကွက် နွယ်နီလမ်းမှာ မီးလောင်မှုဖြစ်ခဲ့တာဖြစ်ပြီး ခြင်ဆေးခွေက မီးစလောင်ခဲ့တာလို့ ဒေသခံတစ်ဦးက ပြောပါတယ်။

မီးလောင်မှုနဲ့ပတ်သက်ပြီး မီးသတ်ဌာနက မိနစ် ၂၀အတွင်း မီးငြှိမ်းသတ်ခဲ့နိုင်တယ်လို့ ထုတ်ပြန်ထားပြီး မီးလောင်မှုအကြောင်းရင်းနဲ့ ဆုံးရှုံးမှုတန်ဖိုးတွေကို ထုတ်ပြန်ထားတာတော့မရှိပါဘူး။

မီးစလောင်တဲ့အချိန်မှာ ကြိတ်ငြှိမ်းနေတာကြောင့် ဆုံးရှုံးမှု ပိုများရတာလို့ မီးလောင်တဲ့ အိမ်အနီးမှာနေထိုင်သူတစ်ဦးက ပြောပါတယ်။

တောင်ဒဂုံမြို့နယ်မှာ ညနေပိုင်းတွေ အမှိုက်မီးရှိူ့မှုတာ‌တွေ လုပ်နေတာကြောင့် မီးလောင်မှုအန္တရာယ်ကိုသတိထားသင့်တယ်လို့ ဒေသခံတွေက သတိပေးထားကြပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
#ludunwayoo #တောင်ဒဂုံမြို့နယ် #မီးလောင်မှု #ခြင်ဆေးခွေမီး #နေအိမ်ဆုံးရှုံးမှု #ရန်ကုန်သတင်း

ဓာတ်ပုံ - Myanmar Fire Services Department

တောင်ဒဂုံမှာ ခြင်ဆေးခွေမီးကြောင့် နေအိမ် ၂လုံးဆုံးရှုံး

အောက်တိုဘာ-၂၄၊၂၀၂၆။သတိုး/People's Spring

ရန်ကုန်မြို့၊ ဒဂုံမြို့သစ်တောင်ပိုင်းမြို့နယ်မှာ ခြင်ဆေးခွေထွန်းရာက မီးစလောင်ခဲ့ပြီး နေအိမ် ၂လုံး မီးလောင်ဆုံးရှုံးခဲ့တယ်လို့ ဒေသခံတွေက ပြောပါတယ်။

အောက်တိုဘာ ၂၃ရက် ည ၁၀ နာရီခွဲလောက်မှာ ဒဂုံမြို့သစ်တောင်ပိုင်းမြို့နယ် (၁၉)ရပ်ကွက် နွယ်နီလမ်းမှာ မီးလောင်မှုဖြစ်ခဲ့တာဖြစ်ပြီး ခြင်ဆေးခွေက မီးစလောင်ခဲ့တာလို့ ဒေသခံတစ်ဦးက ပြောပါတယ်။

မီးလောင်မှုနဲ့ပတ်သက်ပြီး မီးသတ်ဌာနက မိနစ် ၂၀အတွင်း မီးငြှိမ်းသတ်ခဲ့နိုင်တယ်လို့ ထုတ်ပြန်ထားပြီး မီးလောင်မှုအကြောင်းရင်းနဲ့ ဆုံးရှုံးမှုတန်ဖိုးတွေကို ထုတ်ပြန်ထားတာတော့မရှိပါဘူး။

မီးစလောင်တဲ့အချိန်မှာ ကြိတ်ငြှိမ်းနေတာကြောင့် ဆုံးရှုံးမှု ပိုများရတာလို့ မီးလောင်တဲ့ အိမ်အနီးမှာနေထိုင်သူတစ်ဦးက ပြောပါတယ်။

တောင်ဒဂုံမြို့နယ်မှာ ညနေပိုင်းတွေ အမှိုက်မီးရှိူ့မှုတာ‌တွေ လုပ်နေတာကြောင့် မီးလောင်မှုအန္တရာယ်ကိုသတိထားသင့်တယ်လို့ ဒေသခံတွေက သတိပေးထားကြပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #တောင်ဒဂုံမြို့နယ် #မီးလောင်မှု #ခြင်ဆေးခွေမီး #နေအိမ်ဆုံးရှုံးမှု #ရန်ကုန်သတင်း