အညာမြို့ကြီးဖြစ်တဲ့ မန္တလေးမြို့ဟာ နဂိုကတည်းကမှ ပူလွန်းတဲ့မြို့ပါ။ အခု အယ်လ်နီညိုကြောင့် အပူပေါ် အပူထပ်ဆင့်နေချိန် အာဏာသိမ်းစစ်ကောင်စီရဲ့ လျှပ်စစ်မီး ဖြတ်တောက်မှုကြောင့် ဘူးလေးရာ ဖရုံဆင့်နေပါပြီ။

အယ်လ်နီညိုကြောင့် တဟုန်းဟုန်း ပူပြင်းနေရတဲ့အထဲ လျှပ်စစ်မီးတွေပါ ဆိုးဆိုးရွားရွား ပြတ်တောက်နေတာမို့ မြို့ခံတွေဟာ အပူဒဏ်ကို ဆိုးဆိုးရွားရွား ရင်ဆိုင်နေရပါတယ်။

ပြီးခဲ့တဲ့ အောက်တိုဘာ ၃ ရက်နေ့တုန်းက
တော့ သက်ဆိုင်ရာ လျှပ်စစ်ရုံးအသီးသီးကနေ မန္တလေးမြို့နယ် ၇ မြို့နယ်လုံးကို လျှပ်
စစ်ဓာတ်အား ထက်ဝက် လျှော့ချမယ်၊ A နဲ့ B ဆိုပြီး အုပ်စုခွဲလို့ ၄ နာရီလာ၊ ၄ နာရီပိတ် စနစ်နဲ့ တစ်နေ့ကို ၁၂ နာရီပဲ မီးပေးတော့မယ်လို့ အသိပေး ကြေညာခဲ့တာပါ။ စာထုတ်ပြန်ကာစကတော့ မီးပြတ်ချိန် နည်းနေခဲ့ပေမယ့် အခု အောက်တိုဘာ တတိယပါတ်ထဲကစလို့ မီးပြတ်တောက်မှုတွေ ပိုမို ဆိုးရွားလာခဲ့ကြောင်း မန္တလေးမြို့ခံတွေက ပြောပါတယ်။

မန္တလေးမြို့မှာ ပြီးခဲ့တဲ့ မတ်လ နွေရာသီတုန်းက တစ်ရက်ကို ၈ နာရီ မီးဖြတ်ခဲ့တာပါ။ အခုလို နွေရာသီတောင် မရောက်သေးဘဲအယ်လ်နီညိုကြောင့် အပူချိန်တွေ မြင့်တက်နေတဲ့ အ
ချိန်ကျမှ နွေထက်တောင် ပိုပြီး မီးဖြတ်ပစ်နေတာကိုတော့ မန္တလေးမြို့ခံတွေအနေနဲ့ မကျေမနပ် ဝေဖန်နေကြပါတယ်။

“မနေ့ညက ၈ နာရီက ပြတ်သွားတာ။ တစ်ညလုံး ပြန်မလာဘူး။ မနက် ၆ နာရီ ခဏလေးလာပြီး ပြန်ပြတ်သွားတယ်။ ကောင်းကောင်း မအိပ်ရဘူး” လို့ ချမ်းအေးသာစံမြို့နယ်က ပြည်သူတစ်ဦးက ပြောပါတယ်။ လျှပ်စစ်မီး ဖြတ်တောက်မှု အချိန်ကြာမြင့်တာကြောင့် ဖုန်းတွေကအစ အားမရှိတော့ဘူးလို့ မြို့ခံတွေက ပြောပါတယ်။

နေ့ခင်းဘက် မကြာခဏ ပြတ်တောက်တဲ့အပြင် ညဘက်မှာလည်း တစ်ညလုံးနီးပါး ပြတ်တောက်နေတဲ့အတွက် ညဘက် အိပ်မရတဲ့ အခြေအနေ ရင်ဆိုင်နေရတယ်လို့ မြို့ခံတွေက ပြောပါတယ်။ “နေ့ခင်း အလုပ်လုပ်ပြီး ညဘက်ကျ အေးအေးအိပ်ချင်တာကို အိပ်မရဘူး” လို့ အောင်မြေသာစံမြို့နယ်က အမျိုး
သားတစ်ဦးက ပြောပါတယ်။

ပိုဆိုးတာကတော့အခုအချိန်ဟာအခြေခံ
ပညာ ကျောင်းသား၊ ကျောင်းသူတွေ စာ
မေးပွဲ ဖြေနေကြရတဲ့ အချိန် ဖြစ်နေပြီး ရာ
သီဥတုက ပူလွန်းလို့ ကလေးတွေ စာမကျက်နိုင်၊ ညဘက် ကောင်းကောင်း မအိပ်နိုင်ကြပါဘူးလို့ မန္တလေးမြို့ခံ ကျောင်းသားမိဘတွေက ပြောပါတယ်။

“ကလေးတွေက ညကျ ပူလို့ အိပ်မရတော့ မနက်ကျ မလန်းဘူး” လို့ မဟာအောင်မြေမြို့နယ်က အမျိုးသမီးတစ်ဦးက ဆိုပါတယ်။ မီးပြတ်တာ ကြာလွန်းတာကြောင့် ရာသီဥတု အပူဒဏ်နဲ့ ကလေးငယ်တွေ ဖျားနာတာတွေလည်း ဖြစ်ပွားနေကြောင်း သိရပါတယ်။

ဒါ့အပြင် မြန်မာတစ်နိုင်ငံလုံး အတိုင်းအတာနဲ့ မီးပုံမှန်မရတဲ့အပြင် စက်သုံးဆီ ဈေးနှုန်းတွေကပါ အဆမတန် မြင့်တက်နေတာကြောင့် ပြည်သူတွေဟာ ပိုမို ကျပ်တည်းစွာ နေထိုင်နေရပါတယ်။



https://www.facebook.com/share/p/1Ccqwk83EA/

အမေရိကန်ပြည်ထောင်စုရဲ့ ကြားဖြတ်ရွေး
ကောက်ပွဲတွေဟာ အမေရိကန်နိုင်ငံခြားရေးမူဝါဒ၊ အကူအညီပေးရေးအစီအစဉ်တွေနဲ့ စီးပွားရေးပိတ်ဆို့အရေးယူမှုတွေအပေါ် တိုက်ရိုက်သက်ရောက်မှုရှိတာမို့ မြန်မာနိုင်ငံရဲ့ နိုင်ငံရေးနဲ့ နွေဦးတော်လှန်ရေးအတွက် အလွန်အရေးပါပါတယ်။

ကြားဖြတ်ရွေးကောက်ပွဲမှာ အမေရိကန်အောက်လွှတ်တော် ဒါမှမဟုတ် အထက်လွှတ်
တော်ရဲ့ အများစုနေရာကို ဒီမိုကရက်တစ်ပါတီက အသာစီးရသွားခဲ့ရင် မြန်မာနိုင်ငံအတွက် ဘတ်ဂျက်လျာထားမှုနဲ့ စစ်ကောင်စီအပေါ် ဖိအားပေးမယ့် ဥပဒေကြမ်းတွေ၊ တိုက်တွန်းမှုတွေမှာ အပြောင်းအလဲတွေ ရှိလာနိုင်ပါတယ်။ လွှတ်တော်ကိုယ်စားလှယ်တွေရဲ့ စိတ်ဝင်စားမှုပေါ် မူတည်ပြီး စစ်ကောင်စီထံ လေယာဉ်ဆီနဲ့ ဘဏ္ဍာရေးစီးဆင်းမှုတွေကို ပိတ်ဆို့ဖို့ သမ္မတထရန့်ဦး
ဆောင်တဲ့ အမေရိကန်အစိုးရကို ပိုမိုတွန်း
အားပေးလာနိုင်ပါတယ်။

အမေရိကန်ရဲ့ ပါတီကြီးနှစ်ခုလုံးဟာ မြန်မာအပေါ် တရုတ်ရဲ့ ဩဇာလွှမ်းမိုးမှုကို တားဆီးဖို့ မူဝါဒတူညီကြပေမယ့် မြန်မာနိုင်ငံဟာ တ
ရုတ်နဲ့ နယ်နိမိတ်ချင်း ထိစပ်နေတဲ့ မဟာဗျူ
ဟာမြောက် နေရာဖြစ်တာမို့ အမေရိကန်ရဲ့ တောင်အာရှနှင့် အရှေ့တောင်အာရှ မူဝါဒမှာ မြန်မာ့အရေးကို ဘယ်လောက်အထိ ပြန်ပြီး အရေးပေးမလဲဆိုတာဟာ လွှတ်တော်အသစ်ရဲ့ အခင်းအကျင်းပေါ် မူတည်နေပါတယ်။

စစ်ဘေးရှောင်တွေ၊ စစ်ကိုင်း၊ ကချင်၊ ကရင်၊ ရခိုင် စတဲ့ဒေသတွေက ပြည်သူတွေအတွက် US Agency for International Development (USAID)၊ NED Burma Act အပါအဝင် နိုင်ငံ
တကာအဖွဲ့အစည်းတွေကတစ်ဆင့် ပေးအပ်နေတဲ့ ကူညီထောက်ပံ့မှု ဘတ်ဂျက်တွေဟာ အမေရိကန်လွှတ်တော်ကပဲ အတည်ပြုပေးရတာပါ။ ပြီးခဲ့တဲ့ ၂၀၂၅ ခု နှစ်စပိုင်းကတည်း
က USAID အဖွဲ့ဟာ သမ္မတထရန့်ရဲ့ အမိန့်ဖျက်သိမ်းခံခဲ့ရပြီး ကူညီထောက်ပံ့မှုတွေ ရပ်ဆိုင်းခဲ့ရပါတယ်။ တကယ်လို့ ကြားဖြတ်ရွေးကောက်ပွဲမှာ ဒီမိုကရက်တစ်ပါတီကသာ လွှတ်တော်တွေမှာ နေရာအသာစီး ပြန်ရခဲ့ရင် နိုင်ငံတကာအဖွဲ့အစည်းတွေကတစ်ဆင့် ပေးအပ်နေတဲ့ ကူညီထောက်ပံ့မှုတွေ ပြန်ရကောင်း ရနိုင်ပါတယ်။ ဒါ့အပြင် ရပ်စဲထားတဲ့ ယာယီတရားဝင်နေထိုင်ခွင့်နဲ့ အလုပ်လုပ်ခွင့် (Temporary Protected Status-TPS) တွေ၊ အမေရိကန်သမ္မတရဲ့ အမိန့်နဲ့ ပိတ်ထားတဲ့ ပြည်ဝင်ခွင့်တွေလည်း အပြောင်းအလဲရှိလာနိုင်ပါတယ်။

အမေရိကန်နိုင်ငံရဲ့ ရွေးကောက်ပွဲတွေနဲ့ နိုင်ငံရေးဆိုင်ရာ အချက်အလက်တွေကို အဓိကထား တင်ဆက်ပေးနေတဲ့ Decision Desk HQ နဲ့ Ballotpedia တို့ရဲ့ အောက်တို
ဘာလဆန်း စစ်တမ်းစုစည်းမှု (Polling Averages) အရ ဒီမိုကရက်တစ်က ရီပက်ဘလစ်ကန်ထက် ၇/၈ ရာခိုင်နှုန်းလောက် အ
သာစီးရထားပါတယ်။ Fox News နဲ့ The Guardian သတင်းဌာနတွေရဲ့ ဖော်ပြချက်အရ မဲဆန္ဒရှင်တွေရဲ့ ထောက်ခံမှုဟာ ပျမ်းမျှ ၅၀ ရာခိုင်နှုန်းကျော်အထိရှိလာကာ ဒီမိုက
ရက်ပါတီကဦးဆောင်နေတယ်လို့သိရပါတယ်။

https://www.ludunwayoo.com/feature-mm/explainer/2026/10/21/171281/

စစ်တွေမြို့ပေါ် စစ်တပ်ဗုံးကြဲလို့ ဒဏ်ရာရ​သူတွေထဲမှာ ၆ ဦးပြင်းထန်ပြီးစိုးရိမ်​နေရ

■စစ်တပ်ကစစ်တွေမြို့ပေါ်နဲ့ အနီးဝန်းကျင်ကိုဒရုန်းနဲ့ လေယာဉ်တွေဝဲနေတာကြောင့် သေဆုံးသူတွေကို မသင်္ဂြိုလ်နိုင်သေး

■​ဒေသခံ​တွေစိုးရိမ်ပြီး ​ပြောင်း​ရွေ့​နေကြ

■ စစ်တပ်ကပုဏ္ဏားကျွန်းမြို့နယ် ပန်းနီလာကို ဗုံးထပ်ကြဲ ၁ ဦးသေ၊ ၂ ဦး ဒဏ်ရာရ

အောက်တိုဘာ-၂၃၊၂၀၂၆။ခိုင်မြတ်/ People's Spring

စစ်တွေမြို့ပေါ်လူနေရပ်ကွက်ကို စစ်တပ်ရဲ့ ထောက်ပို့လေယာဉ် Y12 နဲ့ ဗုံးကြဲမှုကြောင့် ၉ ဦးသေဆုံးခဲ့ပြီး ၊ဒဏ်ရာရသူ ၁၆ ဦးရှိတာမှာ ၆ ဦးဟာ ဒဏ်ရာပြင်းထန်တာကြောင့် စိုးရိမ်ရတဲ့အခြေအနေမှာ ရှိနေ တယ်လို့ မြို့ခံတွေက ပြောပါတယ်။

စစ်တပ်ဟာ ဒီ​နေ့ မနက် ၈ နာရီဝန်းကျင်မှာ Y12 လေယာဉ်တစီး၊ ဒရုန်းအချို့နဲ့ စစ်တွေမြို့ထဲ ကျောင်းတက်လမ်းရပ် ကွက်ရှိ ရွှေငါးခွဆုံဝန်းကျင်ကို ဗုံးကြဲခဲ့တာဖြစ်ပြီး အဲဒီဗုံးကြဲမှုကြောင့် ၉ ဦး သေဆုံးပြီး ၁၆ ဦး ဒဏ်
ရာရခဲ့ပါ တယ်။

“၁၆ ယောက်ကတော့ ဆေးရုံမှာ။ ခွဲစိတ်တာတွေလုပ်နေကြရတယ်။ ၆ ယောက်က အခြေ
အနေမကောင်းဘူးလို့ ဆရာဝန်တွေ ပြောတယ်။အခု မြို့ထဲက ဆူ(ပွက်လောရိုက်)နေကြတယ်။ပြေးတဲ့သူပြေးကြတယ်။ ကျောင်းတက်လမ်းကလူတွေတော့ ပြောင်းနေကြပြီ” လို့ ကျောင်းတက်လမ်းရပ်ကွက်မှ မြို့ခံတဦးက ပြောပါတယ်။

ဒါ့အပြင်စစ်တပ်ကမြို့လယ်ကိုဗုံးကြဲပြီးနောက်မှာလည်း မြို့ပေါ်နဲ့ အနီးဝန်းကျင်ကို
ဒရုန်း၊ လေယာဉ်တွေ ဝဲနေ တာကြောင့် ဗုံးထိမှန်သေဆုံးသွားသူတွေကို သင်္ဂြိုလ်ဖို့အဆင်မပြေသေးဘူးလို့လည်း မြို့ခံတွေနဲ့ သေဆုံးသွားသူ တွေရဲ့ မိသားစုဝင်တွေက ပြောပါတယ်။

“ဒရုန်းတွေအများကြီးဝဲတယ်။ Y12 လည်း
ဝဲနေလို့ သင်္ဂြိုလ်ဖို့ အဆင်မပြေသေးဘူး။ အခြေအနေစောင့်ကြည့်နေပါ တယ်။ ဆေးရုံက ဝန်ထမ်းတွေတောင် ကြောက်နေကြတယ်” လို့ စစ်တပ်ဗုံးကြဲမှုကြောင့် သေဆုံးသွားသူတဦးရဲ့ မိသားစုနဲ့ နီးစပ်သူက ပြောပါတယ်။

စစ်တပ်ဗုံးကြဲမှုကြောင့် သေဆုံးသွားသူတွေထဲမှာစစ်တွေအခြေစိုက်လူမှုကူညီရေးအ
သင်းတခုဖြစ်တဲ့ ရွှေရောင် မေတ္တာဖောင်ဒေးရှင်းက အသင်းဝင်လူငယ်တဦးလည်း ပါဝင်ပါတယ်။ စစ်တပ်ဝါဒဖြန့်တယ်လီဂရန်တွေက အာရက္ခ တပ်တော်(AA)က လက်နက်ကြီးနဲ့ ပစ်တာဖြစ်ပြီး စစ်တပ်ဗုံးကြဲတာမဟုတ်ဘူးလို့ ရေးသားနေကြပါတယ်။

ဒါပေမယ့် စစ်တွေမြို့ခံတွေကတော့ စစ်တပ်ထောက်ပို့လေယာဉ် Y12 ပေါ်ကနေ ဗုံးချတာကို ကိုယ်တိုင်မြင်တွေ့ လိုက်ရသူတွေရှိနေပြီး စစ်တပ်ကရည်ရွယ်ချက်ရှိရှိ မြို့ကိုဗုံးကြဲတာလို့ ​ပြောကြပါတယ်။

ဒါ့အပြင် စစ်တပ်ကဒီ​နေ့ မွန်းလွဲ ၂ နာရီကျော်
အချိန်မှာလည်း ပုဏ္ဏားကျွန်းမြို့နယ်၊ပန်းနီ
လာရွာထဲကို ဂျက်ဖိုက်တာနဲ့ ဗုံးကြဲခဲ့တာကြောင့် အရပ်သားပြည်သူ ၁ ဦး သေဆုံးပြီး ၂ ဦး ဒဏ် ရာရသွားခဲ့တယ်လို့ ဒေသခံတွေက ပြောပါတယ်။

“စာသင်ကျောင်းနားကို ကျတယ်”လို့ ပုဏ္ဏားကျွန်းဒေသခံတဦးက ပြောပါတယ်။

စစ်တွေတိုက်ပွဲအတွင်း အထိနာနေတဲ့ စစ်တပ်ဟာ စစ်တွေမြို့ပေါ် မြို့အနီးပတ်လည် နေရာတွေ၊ စစ်တွေနဲ့ ထိ စပ်နေတဲ့ ပေါက်တော၊ ပုဏ္ဏားကျွန်းမြို့နယ်တို့ကို ဒရုန်း၊ Y12 ၊ ကင်းထောက်လေယာဉ်တွေနဲ့ အချိန်ပြည့်နီးပါးကင်းထောက်တာတွေ လုပ်နေပြီး အရပ်
သားလူနေကျေးရွာတွေကို ဗုံးကြဲတာတွေလည်း ဆက်တိုက်လုပ်နေပါတယ်။

ပြီးခဲ့တဲ့ စက်တင်ဘာ ၈ ရက်နေ့ကလည်း စစ်တွေမြို့ပေါ် အထက(၄)စာသင်ကျောင်းဝင်းနဲ့ စံပြရပ်ကွက်တို့ကို လက်နက်ကြီးကျည်ကျရောက်ပေါက်ကွဲလို့ လေးဦးထက်မနည်း ဒဏ်ရာရခဲ့ပါတယ်။ စစ်တပ်ဟာ ၂၀၂၄ ခုနှစ် ဖေ ဖော်ဝါရီလ ၂၉ ရက်နေ့ကလည်း စစ်တွေမြို့ ကိုရီးယားဆိပ်ကမ်းရှိ မြို့မစျေးကြီးဝင်းထဲကို လက်နက်ကြီးနဲ့ ပစ်ခတ် ခဲ့တာကြောင့် အရပ်သားပြည်သူ ၁၂ ဦး သေဆုံးပြီး ၅၀ နီးပါး ဒဏ်ရာရခဲ့ပါသေးတယ်။

အာဏာသိမ်းစစ်တပ်က ၄၉၂၆ စစ်ဆင်ရေးလို့အမည်တပ်ပြီးအာရက္ခတပ်တော်(AA)
ထိန်းချုပ်နယ်မြေတွေကို တန်ပြန်ထိုးစစ်ဆင်ဖို့ကြိုးစားတာ တစ်လခွဲကျော်ရှိပြီဖြစ်ပါတယ်။ဒါ​ပေမယ့် AA ရဲ့တိုက်ခိုက်မှု​ကြောင့်
စစ်ဦးကျိုးတာ၊တပ်လန်တာကြုံ​နေရပြီး စစ်တပ်စခန်းတွေလက်လွှတ်၊ အထိနာနေ ကာ အရပ်သားလူနေကျေးရွာတွေ၊ စစ်ဘေးရှောင်စခန်းတွေ၊ စျေးတွေကို ဆက်တိုက်ဗုံးကြဲနေတာဖြစ်ပါတယ်။

လူထုနွေဦးက ကောက်ယူပြုစုထားတဲ့အချက်
အလက်တွေအရ စစ်တပ်ရဲ့ စစ်ဆင်ရေးစတဲ့ စက်တင်ဘာ ၄ ရက်နေ့ ကနေ အောက်တိုဘာ ၂၁ ရက်နေ့ထိ တစ်လကျော်အတွင်း စစ်တပ်လက်ချက်ကြောင့် သေဆုံးရတဲ့ ပြည်သူ ၉၆ ဦးနဲ့ ထိခိုက်ဒဏ်ရာရသူ ၁၅၉ ဦးထက်မနည်း ရှိ​နေပြီဖြစ်ပါတယ်။

စစ်​တွေမြို့​ကုတင် ၅၀၀ ​ဆေးရုံ(ပုံအ​ဟောင်းဖြစ်ပါတယ်) ။ဓါတ်ပုံ-​ဒေသခံ

တိုက်ပွဲပြင်းထန်ခဲ့တဲ့ အင်းတော် မဲဇာရွာမှာ စစ်တပ်ရုပ်အလောင်းအများအပြားတွေ့

အောက်တိုဘာ-၂၃၊၂၀၂၆။အိမ်သွင်/People's Spring

စစ်ကိုင်းတိုင်း၊ အင်းတော်မြို့နယ်၊ မဲဇာကျေးရွာမှာကနေ စစ်တပ်ထွက်ခွာသွားလို့ ဒေသခံတွေပြန်လည်ဝင်ရောက်စဉ် နေအိမ်တွေနဲ့ခြံဝင်းတွေအတွင်း ဖြစ်သလိုမြှုပ်နှံထားတဲ့ စစ်တပ် ရုပ်အလောင်း ၅၀ နီးပါးတွေ့ရှိလို့ ဒေသခံတွေ ရှင်းလင်းနေရတယ်လို့ စုံစမ်းသိရပါတယ်။

မဲဇာကျေးရွာမှာ စစ်တပ်က အောက်တိုဘာလဆန်းပိုင်းမှာ ဝင်ရောက်တပ်စွဲခဲ့တာပါ။ ရွာကိုမဝင်နိုင်ခင်မှာ တိုက်ပွဲအပြင်းအထန်ဖြစ်ခဲ့ပြီး လေကြောင်းကနေ အဆက်မပြတ်ဗုံးကြဲပြီးမှ တပ်စွဲနိုင်ခဲ့တာလို့ တော်လှန်ရေးတပ်ဖွဲ့တွေက ပြောတယ်။

အဲဒီနောက်ပိုင်း တိုက်ပွဲတွေပြင်းထန်ခဲ့ပြီး စစ်တပ်က ကျေးရွာကို ယာယီထိန်းချုပ်နိုင်ခဲ့ပါတယ်။

အောက်တိုဘာ ၂၀ရက်မှာ စစ်တပ်က ဝန်းသိုနဲ့ ထီးချိုင့်မြို့ဘက်ကို စစ်ကြောင်းထွက်ခွာသွားတဲ့အတွက် ဒေသခံတွေက မဲဇာရွာအတွင်း ပြန်ဝင်စဉ် ရုပ်အလောင်းတွေ တွေ့ရှိရတာလို့ သိရပါတယ်။

" စစ်တပ်ရှိနေတဲ့အချိန်ကလည်း တော်လှန်ရေးတပ်တွေကပိတ်ပြီးတိုက်တာ။ ခဏပဲ တပ်စွဲနိုင်တာ။အကြာကြီးမနေနိုင်ဘူး။အခုပြန်ထွက်သွားတော့ ဒေသခံတွေကခဏပြန်ဝင်တာပေါ့။ စစ်ကြောင်းရန်လည်းရှိတယ်၊လေကြောင်းကလည်းပစ်နိုင်တာမို့ အပြီးပြန်ပြီးအခြေချဖို့မဖြစ်နိုင်သေးဘူး။ ရွာကိုပြန်ဝင်တော့ အိမ်ဝင်းတွေထဲမှာရော၊ လမ်းတွေမှာပါ စစ်တပ်ဘက်က ရုပ်အလောင်းတွေမြုပ်သွားတာလို့ ကြားတယ်။ စုစုပေါင်း၅၀မကဘူး။ တိုက်ပွဲကလည်း ထီးချိုင့်ဘက်မှာရော ၊ ဝန်းသိုဘက်မှာပါဆက်ဖြစ်နေတယ်"လို့ တော်လှန်‌ရေး ရဲဘော်တစ်ဦးက ပြောပါတယ်။

စစ်တပ်ဟာ မန္တလေး-မြစ်ကြီးနားပြည်ထောင်စုလမ်းအတိုင်း တဆက်တည်းရှိနေတဲ့ ထီးချိုင့်-အင်းတော်-ကသာမြို့လမ်းပိုင်းကိုလည်း ထိန်းချုပ်ဖို့ကြိုးစားနေပါတယ်။ မြေပြင်စစ်ကြောင်းတွေကို ပြည်သူ့ကာကွယ်ရေးပူးပေါင်းတပ်ဖွဲ့တွေကတိုက်ခိုက်နေပြီး စစ်တပ်က လေကြောင်းကနေ မကြာခဏဗုံးကြဲနေပါတယ်။တိုက်ပွဲတွေကြောင့် အင်းတော်-ထီးချိုင့်လမ်း၊ အင်းတော် -ဝန်းသိုလမ်းက ဒေသခံတွေလည်း ဘေးလွတ်ရာမှာတိမ်းရှောင်နေကြရပါတယ်။

လက်ရှိမှာ စစ်တပ်က မြေပြင်စစ်ကြောင်းထိုးပြီး လေကြောင်းကနေလည်းဗုံးကြဲနေတယ်လို့ သိရပါတယ်။ပြီးခဲ့တဲ့ရက်ကတိုက်ပွဲတွေအတွင်းမြစ်ကြီးနား- ရွှေဘိုလမ်းပိုင်းနဲ့ဆက်စပ်တဲ့မဲဇာ-စက်တောကုန်း၊ နန့်သဲ၊ သံဘိုနဲ့ နောင်မိုးရွာတွေကို စစ်‌ကောင်စီက Y-12နဲ့ ဗုံးကြဲခဲ့တယ်လို့သိရပါတယ်။
လက်ရှိဒေသတွင်းစစ်ရေးအခြေအနေကြောင့် ဝန်းသိုမြို့နဲ့ဆက်စပ်နေတဲ့ဗန်းမောက်၊ ကောလင်းမြို့နယ်တွေထဲကရွာတွေမှာလည်း စစ်ကြောင်းအန္တရာယ်ကို နားစွင့်စောင့်ကြည့်ဖို့ တော်လှန်ရေးတပ်တွေကသတိပေးထားပါတယ်။ ဒါ့အပြင် ပင်လယ်ဘူးမြို့နယ်ထဲမှာလည်း လေကြောင်းအန္တရာယ်သတိပြုနေထိုင်ကြဖို့ ပြည်သူ့ကာကွယ် ရေးတပ်ဖွဲ့က သတိပေးထားပါတယ်။

လက်ရှိဖြစ်ပွားနေတဲ့ တိုက်ပွဲတွေမှာ စစ်မှုထမ်းသင်တန်းဆင်းအများအပြားပါဝင်ပြီး ထိခိုက်သေဆုံးမှုတွေများပြားနေကြောင်းနဲ့ စစ်‌ရေးသတင်းတွေကိုသင့်လျော်တဲ့အချိန်မှာ ထုတ်ပြန်သွားမယ်လို့အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ပြည်သူ့ကာကွယ်ရေးတပ်မတော် (စစ်ရုံးချုပ်)က အောက်တိုဘာ ၁၉ရက်မှာ ထုတ်ပြန်ထားပါတယ်။

(အင်းတော်ဒေသအခြေစိုက် PDF ရဲဘော်တွေကို တွေ့ရစဉ်။ ဓာတ်ပုံ - CJ)

တောင်ဦးရွာ SNAတပ်စခန်း KIA သိမ်းပိုက်၊ လက်နက်ကြီးကျည်အပါအဝင် ခဲယမ်းများသိမ်းရ

အောက်တိုဘာ ၂၃၊ ၂၀၂၆။ ထားမြတ်/People’s Spring

စစ်ကိုင်းတိုင်း၊ ဟုမ္မလင်းမြို့နယ် တောင်ဦးကျေးရွာရှိ စစ်တပ်လက်အောက်ခံ ရှမ်းနီတပ်(SNA) တပ်စခန်းမှ လက်နက်ခဲယမ်းများသိမ်းရကြောင်း ကချင်စစ်ရေးသတင်းရင်းမြစ်က ပြောပါတယ်။

SNA ရဲ့ တပ်မဟာ(၉၇၂) တပ်ရင်(၄) ဌာနချုပ် တောင်ဦးစခန်းကို KIA ပူးပေါင်းတပ်က အောက်တိုဘာ ၂၂ရက် ညပိုင်းမှာ သိမ်းပိုက်နိုင်ခဲ့ရာ အဲဒီစခန်းက သိမ်းရတဲ့ လက်နက်ခဲယမ်းတွေအနက် လက်နက်ကြီးကျည်တွေနဲ့ ဗုံးသီးတွေ အခြား စစ်သုံးပစ္စည်းတွေရဲ့ မှတ်တမ်းပုံကို ဒီကနေ့ အောက်တိုဘာ ၂၃ရက် ညနေပိုင်းမှာ ဖော်ပြလာတာပါ။

ကျည်ခဲယမ်းတွေအပြင် လက်နက်တွေလည်း ပါဝင်တယ်လို့ သတင်းရင်းမြစ်က ပြောပါတယ်။

စခန်းသိမ်းတိုက်ပွဲအတွင်း ထိခိုက်ကျဆုံးအခြေအနေတွေကိုတော့ ဆက်လက်စုံစမ်းနေဆဲပါ။

KIA ပူးပေါင်းတပ်အနေနဲ့ အောက်တိုဘာ ၁၉ရက် ကလည်း တောင်ဦးဒေသက SNA ခြေကုတ်ယူထားတဲ တာမယ်ပုတ်ရွာကိုလည်း သိမ်းပိုက်ခဲ့ရာ လက်နက်ခဲယမ်းများ ရရှိခဲ့ပါတယ်။ဒါ့အပြင် စက်တင်ဘာလကုန်ပိုင်းကလည်း ဖားကန့်မြို့နယ် ဆယ်ဇင်းဒေသ တောင်ယာကုန်းရွာအနီးရှိ SNA စခန်း ၂ခုကို KIA ပူးပေါင်းတပ်က သိမ်းပိုက်ခဲ့ပါတယ်။

စက်တင်ဘာလကုန်ပိုင်းမှာပဲ မိုးညှင်းမြို့နယ် အင်းတော်ကြီးဒေသ မှာ စစ်ကြောင်းထိုးလာတဲ စစ်ကောင်စီ တပ်နဲ့ SNA ပူးပေါင်းတပ်ကို KIA ပူးပေါင်းတပ်က တိုက်ခိုက်ခဲ့ရာ စစ်တပ်အထိနာခဲ့ပါတယ်။

KIAနဲ့ စစ်တပ်ဟာ လတ်တလောမှာ ဗန်းမော်၊ မိုးမိတ်၊ ခေါင်လန်ဖူးဒေသမှာလည်း တိုက်ပွဲဖြစ်တာ စစ်ရေးတင်းမာတာတွေရှိနေပါတယ်။

(SNA တပ်စခန်းသိမ်းပိုက်မှုက ရတဲ့ ကျည်ခဲယမ်းတွေ။ ဓာတ်ပုံ - ပေးပို့)

အိုကီနာဝါငြိမ်းချမ်းရေးဆု ချီးမြှင့်ခံရတဲ့ ဒေါက်တာစင်သီယာမောင်ကို CRPH ဂုဏ်ပြု

အောက်တိုဘာ ၂၃၊ ၂၀၂၆။ထားမြတ်/People’s Spring

ဂျပန်နိုင်ငံက ပေးအပ်ချီးမြှင့်တဲ့ (၁၃) ကြိမ်မြောက် အိုကီနာဝါငြိမ်းချမ်းရေးဆု (Okinawa Peace Prize) ကို လက်ခံရရှိခဲ့တဲ့ မယ်တော်ဆေးခန်းဦးဆောင်သူ ဒေါက်တာစင်သီယာမောင် အား လှိုက်လှိုင်လှဲလှဲ ဝမ်းမြောက်ဂုဏ်ယူကြောင်း ပြည်ထောင်စုလွှတ်တော်ကိုယ်စားပြုကော်မတီ(CRPH)က သဝဏ်လွှာ ပေးပို့ပါတယ်။

ဒေါက်တာစင်သီယာမောင်ဟာ ထိုင်း-မြန်မာနယ်စပ်တွင် မယ်တော်ဆေးခန်းကို တည်ထောင်ပြီး ရွှေ့ပြောင်းလုပ်သားများ၊ စစ်ဘေးရှောင်ဒုက္ခသည်များ၊ မိခင်နဲ့ ကလေးများ၊ ခြေလက်အင်္ဂါများ ရင်းနှီးပေးဆပ်ခဲ့ကြရသော ရဲဘော်များနဲ့ နွမ်းပါးရုန်းကန်နေရသူများအား လူသားချင်းစာနာထောက်ထားရေးဆိုင်ရာလုပ်ငန်းစဉ်များနဲ့ အခမဲ့ ကျန်းမာရေးစောင့်ရှောက်မှု လုပ်ငန်းများကို နှစ်ပေါင်း (၄၀) ကျော် လုပ်ဆောင်ခဲ့သူတဦးဖြစ်တယ်လို့ ဆိုပါတယ်။

“ဒေါက်တာစင်သီယာမောင်၏ ခေါင်းဆောင်မှု၊ လူသားဆန်သည့် ဂုဏ်အရည်အချင်းများ နှင့် ခွဲခြားဆက်ဆံမှုမရှိသော မွန်မြတ်သည့် လူသားအကျိုးပြု လုပ်ဆောင်ချက်များသည် မျိုးဆက် သစ်လူငယ်များအတွက် အားကျအတုယူဖွယ် ဂုဏ်ထူးဝိသေသများဖြစ်ပါသည်” လို့ သဝဏ်လွှာမှာ ဖော်ပြထားပါတယ်။

အခုအချိန်ထိတိုင် စာနာသောနှလုံးသား၊ ပြည့်ဝသော စိတ်ထားတို့ဖြင့် ဆက်လက် စွမ်းဆောင်ကြိုးစားဆောင်ရွက်နေတဲ့အတွက် ထိုက်တန် စွာ အသိအမှတ်ပြု ဂုဏ်ပြုခံရခြင်းဖြစ်ကြောင်း ဒေါက်တာစင်သီယာမောင် ဆုရရှိမှုအပေါ် CRPHက ဂုဏ်ပြုပါတယ်။

ချီးမြှင့်ခံရတဲ့ ငြိမ်းချမ်းရေးဆုဟာ ဒေါက်တာစင်သီယာမောင်အပါအဝင် သူမတည်ထောင်ထားသော မယ်တော်ဆေးခန်းမိသားစုများနဲ့ ဝန်းရံကူညီပူးပေါင်းလုပ်ဆောင် နေကြသော ပုဂ္ဂိုလ်များရဲ့ စုစည်းညီညွတ်မှုအင်အားတစ်ရပ်ကိုလည်း ဂုဏ်ပြုဖော်ညွှန်းလျက် ရှိကြောင်း သဝဏ်လွှာမှာ ဖော်ပြပါတယ်။
ဒေါက်တာ စင်သီယာမောင်သည် အနာဂတ်တွင်လည်း လူသားချင်းစာနာထောက်ထားရေးဆိုင်ရာ လုပ်ငန်းစဉ်များနဲ့ အခမဲ့ကျန်းမာရေးစောင့်ရှောက်မှုများကို ဆက်လက်အောင်မြင်စွာ ကြိုးစားလုပ်ဆောင်သွားနိုင်မယ်လို့ ယုံကြည်ကြောင်း CRPHက သဝဏ်လွှာပေးပို့ပါတယ်။

NUG ကျန်းမာရေးဝန်ကြီးဌာနကလည်း ဒေါက်တာစင်သီယာမောင် ဆုရရှိမှုအပေါ် ဂုဏ်ပြုကြောင်း အောက်တိုဘာ ၁၉ရက်မှာ ထုတ်ပြန်ခဲ့ပါတယ်။ ကျန်းမာရေးဝန်ကြီးဌာနအနေဖြင့် ဒေါက်တာစင်သီယာမောင်ရဲ့ ဦးဆောင်မှု၊ နှိမ့်ချရိုးသားမှုနဲ့ မည်သည့်ခွဲခြားဆက်ဆံမှုမျှမရှိဘဲ ကျန်းမာရေးလိုအပ်ချက်အပေါ် အခြေခံ၍ လူတိုင်းကို စောင့်ရှောက်ပေးရန် ခိုင်မာစွာ ရပ်တည်ဆောင်ရွက်မှုတို့ကို အထူးလေးစားတန်ဖိုးထားကြောင်း ဖော်ပြထားပါတယ်။

တရုတ်စာအသုံးပြုဖို့ ဖိအားပေးတာ၊ မြေသိမ်းဆည်းတာတွေ လုပ်နေတဲ့ MNDAA ရဲ့လုပ်ရပ် ရှမ်းအဖွဲ့အစည်း SSJAC ပြင်းထန်စွာ ကန့်ကွက်

▪️ကန့်ကွက်ချက်လျစ်လျူရှုရင် လိုအပ်တဲ့ နိုင်ငံရေး၊ လူမှုရေးဆိုင်ရာ တုံ့ပြန်မှုတွေလုပ်မယ်လို့ သတိပေး

အောက်တိုဘာ ၂၃၊ ၂၀၂၆။ ထားမြတ်/People’s Spring

ရှမ်းပြည်နယ်မြောက်ပိုင်းရှိ တိုင်းရင်းသားများရဲ့ အခြေခံရပိုင်ခွင့်နှင့် ယဉ်ကျေးမှုများအပေါ် အတင်းအကျပ် ခြိမ်းခြောက်လွှမ်းမိုးမှုများအား ပြင်းထန်စွာ ကန့်ကွက်ကြောင်း ရှမ်းပြည်တိုးတက်ရေးပါတီ(SSPP)နဲ့ ရှမ်းတိုင်းရင်းသားများဒီမိုကရေစီအဖွဲ့ချုပ်(SNLD)တို့ ပါဝင်စုဖွဲ့ထားတဲ့ ရှမ်းပြည်ပူးပေါင်းဆောင်ရွက်ရေးကော်မတီ (SSJAC)က ဒီကနေ့ ထုတ်ပြန်လိုက်ပြီး ကန့်ကွက်ချက်ကို လျစ်လျူရှုရင် နိုင်ငံရေး၊ လူမှုရေးအရ ပြင်းထန်စွာ တုံ့ပြန်မယ်လို့ သတိပေးပါတယ်။

ကိုးကန့်တပ်မတော်(MNDAA) အနေနဲ့ စစ်ရေးအခြေအနေအရ နယ်မြေစိုးမိုးမှုရယူပြီးနောက် ရပ်ရွာအေးချမ်းသာယာရေးနဲ့ တရားဥပဒေ စိုးမိုးရေးအတွက် အုပ်ချုပ်ရေးယန္တရားကို ယာယီအားဖြင့် အစားထိုးလည်ပတ်ခြင်းကို နားလည် လက်ခံပေးနိုင်ပေမဲ့ MNDAAက ဖော်ဆောင်နေတဲ့ လုပ်ရပ်တွေဟာ ဒေသခံပြည်သူတွေရဲ့ မူလအခွင့်အရေးကို ဆိုးရွားစွာ ထိခိုက်စေတာမို့ ပြင်းထန်စွာ ကန့်ကွက်ခဲ့တာလို့ ဖော်ပြပါတယ်။

MNDAA ကလုပ်ဆောင်နေတဲ့ ဘာသာစကားနဲ့ပတ်သက်ပြီး ဒေသခံတွေ ရင်းနှီးကျွမ်းဝင်မှု လုံး၀ မရှိတဲ့ ဘာသာစကားကို ရုံးသုံးအပြင် အများပြည်သူနဲ့ သက်ဆိုင်တဲ့နေရာတွေမှာ မဖြစ်မနေ အသုံးပြုဖို့ ဖိအားပေး စေခိုင်းတာ အပါအဝင် အချက် ၅ချက်အပေါ် SSJACက ကန့်ကွက်ခဲ့တာပါ။ ဘာသာစကားနဲ့ပတ်သက်ပြီး SSJAC ရဲ့ ထုတ်ပြန်ချက်မှာ အတိအလင်းဖော်ပြမထားပေမဲ့ MNDAAဟာ သူထိန်းချုပ်မြို့ရွာတွေမှာ ဆိုင်းဘုတ်တွေကို တရုတ်စာနဲ့ ရေးသားနေတာဖြစ်ပါတယ်။ အဲဒီလို ရေးသားမှုအပေါ် ရှမ်းလူငယ်အဖွဲ့အစည်းတွေကလည်း ကန့်ကွက်စာထုတ်ပြန်ထားပါတယ်။

မြေယာပိုင်ဆိုင်မှုနဲ့ပတ်သက်ပြီး ဘိုးဘွားစဉ်ဆက် ပိုင်ဆိုင်လုပ်ကိုင်လာခဲ့သော ဒေသခံတွေရဲ့ တည်ဆဲမြေယာ ပိုင်ဆိုင်မှုစနစ်များကို ဒေသခံလူထု သဘောဆန္ဒမပါဘဲ အတင်းအကျပ် ပြုပြင်ပြောင်းလဲတာနဲ့ သိမ်းဆည်းတာကို MNDAAက လုပ်ဆောင်နေတယ်လို့ ဆိုပါတယ်။

ဒါ့အပြင် နိုင်ငံခြားသားများ ဝင်ရောက်လွှမ်းမိုးမှုနဲ့ပတ်သက်ပြီး MNDAA က ပြဋ္ဌာန်းလိုက်သော မြေယာဥပဒေ အပါအဝင် အခြားအုပ်ချုပ်ရေးဥပဒေအရပ်ရပ်ဟာ နိုင်ငံခြားသားများ အတားအဆီးမရှိ ဝင်ရောက် လာနိုင်စေခြင်းနဲ့ နိုင်ငံခြားသားများ မြေပိုင်ဆိုင်ခွင့် ရရှိစေမယ့် တိုက်ရိုက်နဲ့ သွယ်ဝိုက် နည်းလမ်း များ ပေါ်ပေါက်နေစေတယ်လို့ ထုတ်ပြန်ပါတယ်။

သမိုင်းနဲ့ ယဉ်ကျေးမှုလက္ခဏာ နဲ့ပတ်သက်ပြီး သမိုင်းစဉ်ဆက် ခေါ်ဝေါ်သုံးစွဲလာခဲ့တဲ့ မြို့ရွာအမည်များနဲ့ အများပြည်သူနဲ့ သက်ဆိုင်တဲ့ ဆိုင်းဘုတ်အမျိုးမျိုးတို့ကို ဒေသခံများရဲ့ ယဉ်ကျေးမှုနဲ့ လုံးဝ သက်ဆိုင်ခြင်းမရှိသော အမည်နာမ၊ ဘာသာစကားများဖြင့် အတင်းအကျပ် အစားထိုးပြောင်းလဲ တာကို MNDAAက လုပ်ဆောင်နေကြောင်း ဖော်ပြထားပါတယ်။

ဒါ့အပြင် လွတ်လပ်စွာ ထုတ်ဖော်ပြောဆိုခွင့်ကို ချိုးဖောက်နေကြောင်းလည်း ပါရှိပါတယ်။ MNDAA ရဲ့ လုပ်ရပ်တွေကို ငြိမ်းချမ်းစွာ ကန့်ကွက်တဲ့ ဒေသခံများကို ဖမ်းဆီးခြင်း၊ ဖိနှိပ်ခြင်းနဲ့ ခြိမ်းခြောက်ခြင်းများ ပြုလုပ်ကာ နိုင်ငံသားအခွင့်အရေးနဲ့ လွတ်လပ်စွာထုတ်ဖော်ပြောဆိုခွင့်ကို ပြောင်ပြောင်တင်းတင်း ချိုးဖောက် နေကြောင်း SSJACက ထုတ်ပြန်ပါတယ်။

MNDAA က အဲဒီလို လုပ်ဆောင်နေတာဟာ ငြိမ်းချမ်းစွာ အတူယှဉ်တွဲ နေထိုင်ရေးမူကိုသာမက ဖက်ဒရယ်ပြည်ထောင်စုစနစ်ရဲ့ အခြေခံ မူများကိုပါ တိုက်ရိုက် ချိုးဖောက်ရာ ရောက်နေကြောင်း SSJACက ထုတ်ပြန်ပါတယ်။

ဒါ့အပြင် ဒေသခံပြည်သူများရဲ့ မြေယာပိုင်ဆိုင်ခွင့် အပါအဝင် အခြေခံ လူ့အခွင့်အရေးများကို ဆိုးရွားစွာထိခိုက်စေပြီး ဒေသတွင်းမှီတင်းနေထိုင်ကြသော တိုင်းရင်းသားညီနောင်များအကြား နားလည်မှုလွဲမှားခြင်း၊ ယုံကြည်မှု ပျက်ပြားခြင်းနဲ့ မလိုလားအပ်သော လူမျိုးရေးပဋိပက္ခများကို ကြီးထွားလာစေရန် တွန်းအားပေးသကဲ့သို့ ဖြစ်နေတယ်လို့ ဖော်ပြကာ လူထုဆန္ဒနဲ့ ဆန့်ကျင်တဲ့ လုပ်ရပ်တွေ ချက်ချင်း ရပ်တန့်ဖို့ တောင်းဆိုထားပါတယ်။

" ဤကန့်ကွက်ချက်ကို လျစ်လျူရှု၍ ဆက်လက်အကောင် အထည်ဖော် ဆောင်ရွက်နေမည်ဆိုပါက ဒေသခံပြည်သူများ၏ သမိုင်း၊ ယဉ်ကျေးမှု၊ အကျိုးစီးပွားနှင့် ရပ်တည်ခွင့်ကို ကာကွယ်ရန်အတွက် မိမိတို့အနေဖြင့် လိုအပ်သော နိုင်ငံရေး၊ လူမှုရေးဆိုင်ရာ တုံ့ ပြန်မှု များကို ပြင်းပြင်းထန်ထန် လုပ်ဆောင်သွားမည်ဖြစ်ကြောင်း အလေးအနက် သတိပေးထုတ်ပြန်အပ်ပါသည်” လို့ ဖော်ပြထားပါတယ်။
SSJAC ရဲ့ အခုထုတ်ပြန်ချက်ကို ရှမ်းတပ် SSPPကလည်း သူ့ရဲ့ သတင်းပြန်ကြားရေးဌာနကတဆင့် ဖော်ပြထားပါတယ်။

SSPP ဟာ ကိုးကန့်တပ် MNDAAနဲ့ မဟာမိတ်ဖြစ်ပြီး နှစ်ဖွဲ့စလုံးဟာ ပြည်ထောင်စုငြိမ်းချမ်းရေးဆွေးနွေးရေးကော်မတီ(FPNCC) အဖွဲ့ဝင် တွေလည်း ဖြစ်ကြပါတယ်။

ရှမ်းပြည်နယ်မြောက်ပိုင်း ရေရှည်အေးချမ်းရေးနဲ့ လူမျိုးစုများ အတူယှဉ်တွဲနေထိုင်ရေးနဲ့ပတ်သက်ပြီး ကိုးကန့်တပ်မတော်(MNDAA) ထံသို့ ရှမ်းလူငယ်အဖွဲ့အစည်း ၈ခု ကလည်း အောက်တိုဘာ ၉ရက်နေ့မှာ အိတ်ဖွင့်ပေးစာ တစောင် ပေးပို့ခဲ့ပါတယ်။

MNDAAထံသို့ စာပေးပို့တဲ့ ရှမ်းကျောင်းသားလူငယ် အဖွဲ့အစည်းတွေကတော့ Dai Youth Congress၊ Tai Youth Network၊ Tai Students’s Union၊ SL&CC-University Of Yangon၊ Tai Youths Network Japan၊ Global Shan Network၊ Tai National Community၊ A Lin Thit Organization တို့ ဖြစ်ပါတယ်။

ကိုးကန့်တပ်က ဒေသခံစာပေများကို ဖျောက်ဖျက်ခြင်း – ရှမ်း၊ တအာင်း/ပလောင် နဲ့ မြန်မာဘာသာစကားဖြင့် ရေးသားထားသော အများပြည်သူဆိုင်ရာ ဆိုင်းဘုတ်များကို တစ်ဖက်သတ် ဖြုတ်ချပြီး တရုတ်စာ ဆိုင်းဘုတ်များဖြင့်သာ အစားထိုးဆောင်ရွက်နေခြင်း တွေလုပ်ဆောင်နေတဲ့အပြင် သမိုင်းအမွေအနှစ်များကို လျစ်လျူရှုခြင်း ဖြစ်တဲ့ ရှမ်းစော်ဘွားများရဲ့ သမိုင်းဝင် နန်းတော်ဟောင်း တည်ရှိရာ သိန္နီမြို့ကဲ့သို့သော သမိုင်းအမွေအနှစ်နဲ့ ဘာသာရေး၊ ယဉ်ကျေးမှု အထွတ်အမြတ် နေရာများကို ထိန်းသိမ်းစောင့်ရှောက်မှု ကင်းမဲ့ခြင်း သို့မဟုတ် အသွင်သဏ္ဌာန် ပြောင်းလဲပစ်ခြင်းကို ကိုးကန့်တပ်က လုပ်ဆောင်ခဲ့ကြောင်း ရှမ်းလူငယ်အဖွဲ့တွေက ထုတ်ပြန်ပါတယ်။

ကိုးကန့်တပ်ရဲ့ လုပ်ဆောင်ချက်ဟာ မဟာဗျူဟာအရ ကြီးမားသော အမှားတစ်ခုဖြစ်ပြီး ကြိုးပမ်းတည်ဆောက် နေတဲ့ အုပ်ချုပ်ရေးကို ခိုင်မာစေမည် မဟုတ်ဘဲ မဟာမိတ် များအကြား ယုံကြည်မှုကိုသာ ပျက်စီးစေလိမ့်မယ်လို့ သတိပေးထားပါတယ်။
SSJAC နဲ့ရှမ်းအဖွဲ့တွေရဲ့ သဘောထားကြေညာချက်နဲ့ပတ်သက်ပြီး MNDAAထံ မေးမြန်းဖို့ ဆက်သွယ်ခဲ့ပေမဲ့ အဆက်အသွယ်မရသေးပါဘူး။

ကိုးကန့်တပ်ဟာ မဟာမိတ်တွေနဲ့အတူ ၁၀၂၇ စစ်ဆင်ရေးကို ဖော်ဆောင်ခဲ့ရာ ကိုးကန့်ဒေသသာမက သိန္နီ နဲ့လားရှိုးမြို့တွေကိုပါသိမ်းပိုက်နိုင်ခဲ့ပါတယ်။ နောက်ပိုင်းမှာ တရုတ်အစိုးရ ကြားဝင်မှုနဲ့ အာဏာသိမ်းစစ်တပ်နဲ့ အပစ်ရပ်စဲရေးလုပ်ဆောင်ခဲ့ရာ လားရှိုးမြို့ကို စစ်တပ်ထံ ပြန်လွှဲပေးခဲ့ပါတယ်။ အခု ၂၀၂၆ နွေမှာတော့ မဟာမိတ်အချင်းချင်း အငြင်းပွားမှုကို ကိုးကန့်တပ်က စစ်ရေးအရ ဖြေရှင်းကာ တအာင်းတပ်မတော်(TNLA) သိမ်းပိုက်ထားတဲ့ ကွတ်ခိုင်မြို့ကို ထိုးစစ်ဆင်တိုက်ခိုက်သိမ်းပိုက်ခဲ့ပါတယ်။

(ကိုးကန့်တပ်မတော်(MNDAA) က ရဲဘော်တွေကို တွေ့ရစဉ်။ ဓာတ်ပုံ - The Kokang)

သံအမတ်ကြီးဦးကျော်မိုးထွန်း ထောက်ခံရေးနဲ့ သီတင်းကျွတ်ဆီမီးသပိတ်လှုပ်ရှားမှုတွေ စစ်ကိုင်းတိုင်းမှာ ပြုလုပ်

အောက်တိုဘာ ၂၃၊၂၀၂၆။သုည/People's Spring

စစ်ကိုင်းတိုင်း ရွှေဘိုနဲ့ ဆားလင်းကြီးမြို့နယ်တို့မှာ တော်လှန်သပိတ်အင်အားစုတွေ၊ ဒေသခံပြည်သူတွေက မြန်မာနိုင်ငံရဲ့ ကုလသမဂ္ဂဆိုင်ရာ အမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း ဆက်လက်တာဝန်ထမ်းဆောင်နိုင်ရေးအတွက် ထောက်ခံဆန္ဒပြပွဲနဲ့ သီတင်းကျွတ်ဆီမီးသပိတ်လှုပ်ရှားမှုတွေကို ဒီကနေ့ (အောက်တိုဘာ ၂၃) ပြုလုပ်ခဲ့ပါတယ်။

ရွှေဘိုမြို့နယ်မှာ သပိတ်အင်အားစုနဲ့ ဒေသခံပြည်သူတွေက သံအမတ်ကြီးဦးကျော်မိုးထွန်းအား ကုလသမဂ္ဂမှာ ဆက်ရှိရေးအတွက် ထောက်ခံကြောင်း လူထုလှုပ်ရှားမှုကို ပြုလုပ်ခဲ့ကြပါတယ်။

ရွှေဘိုမြို့နယ်သပိတ်အင်အားစုက ဦးဆောင်ပြီးတော့ "Our Ambassador. Our Voice. Our Representative" စာသားကိုင်စွဲကာ ကုလသမဂ္ဂမှာ သံအမတ်ကြီး ဦးကျော်မိုးထွန်း ဆက်လက် နေရာရရှိရေးအတွက် ဆန္ဒထုတ်ဖော်ပြသခဲ့ပါတယ်။

မြန်မာပြည်သူလူထုအသံအစစ်အမှန်ကို ကမ္ဘာကြီးက သိနိုင်ဖို့ ဦးကျော်မိုးထွန်း ဆက်လက်နေရာရရှိရေးဟာ အရေးကြီးကြောင်းနဲ့ လူထုတရပ်လုံးရဲ့ အသံ စစ်မှန်စွာလွင့်ပျံနိုင်ဖို့ ဦးကျော်မိုးထွန်းနဲ့အတူ ရပ်တည်လှုပ်ရှားပေးကြဖို့ ရွှေဘိုမြို့နယ် သပိတ်အင်အားစုက တိုက်တွန်းနှိုးဆော်ခဲ့ပါတယ်။

ဆားလင်းကြီးမြို့နယ်မှာလည်း သပိတ်အင်အားစုက "Our Ambassador. Our Voice. Our Representative" စာသားကိုင်စွဲပြီး ကုလသမဂ္ဂသံအမတ်ကြီး ဦးကျော်မိုးထွန်း ဆက်လက်နေရာရရှိရေးအတွက် လူထုလှုပ်ရှားမှု ပြုလုပ်ခဲ့ကြပါတယ်။

အလားတူ ရွှေဘိုမြို့နယ် ကျေးရွာတစ်ရွာမှာလည်း သပိတ်အင်အားစုဝင်တွေနဲ့ တော်လှန်ပြည်သူတွေက သီတင်းကျွတ်အချိန်အခါမှာ မြတ်စွာဘုရားအားဆီမီးပူဇော်ခြင်း ပြုလုပ်ပြီး ဖယောင်းတိုင်နဲ့ ဆီမီးသပိတ် ပုံဖော်ထွန်းညှိကာ မြန်မာပြည်ကြီးအမြန်လွတ်မြောက်ပါစေကြောင်း ဆုတောင်းခဲ့ကြပါတယ်။