မုံရွာခရိုင်တပ်ရင်း(၁၅)ရင်းမှူး​ဟောင်း၊ချောင်းဦး(6+1)တပ်ပေါင်းစုတပ်​ရေးဗိုလ်ပျံလွှား စစ်တပ်နဲ့ပူး​ပေါင်းသွားပြီး​နောက် စစ်တပ်က​လေ​​​ကြောင်းမှတိုက်ခိုက်လို့ပြည်သူ​သေဆုံးထိခိုက်မှုများ

အောက်တိုဘာ၂-၂၀၂၆။ကတ်သရင်း/ People's Spring

စစ်ကိုင်းတိုင်း၊ချောင်းဦးမြို့နယ်က မုံရွာခရိုင်တပ်ရင်း(၁၅)ရဲ့တပ်ရင်းမှူးဟောင်း၊လက်ရှိ ချောင်းဦးမြို့နယ်(6+1)တပ်ပေါင်းစုရဲ့တပ်​ရေးဗိုလ် ပျံလွှား (​ခေါ်) ဝေဇင်အောင် (ခ) ဝေကြီး ဟာ စစ်တပ်နဲ့ ပေါင်းသွားပြီးနောက် မုံရွာခရိုင်အတွင်းက နေရာတချို့ကို စစ်တပ်ကဗုံးကြဲခဲ့တာကြောင့် ပြည်သူအများအပြား​သေဆုံး ဒဏ်ရာရခဲ့တယ်လို့ ဒေသခံတွေကပြောပါတယ်။

အောက်တိုဘာလ၁ရက် ညနေပိုင်းမှာ ပျံလွှားဟာ စစ်တပ်နဲ့ ပေါင်းသွားတယ်လို့ ​ဒေသခံနဲ့စစ်​ရေးသတင်းရင်းမြစ်​တွေက​ပြောပါ
ပါတယ်။ ဒါ​ပေမယ့်အချို့က အဖမ်းခံရတာလို့​ပြောတာလည်းရှိပါတယ် ။

အောက်တိုဘာလ ၁ရက်ညနေ ၆ နာရီအချိန်
ခန့်မှာ မုံရွာမြို့နယ်၊ မြေနဲကျေးရွာ (စစ်တပ်ရှိ) နဲ့ အောင်သာကျေးရွာကြား မုံရွာ - မန္တလေး လမ်းပိုင်းအား ဖြတ်ကူးစဥ်စစ်တပ်က ပစ်
ခတ်ဖမ်းဆီးသွားတယ်လို့ ကနဦးသတင်း
ထွက်ခဲ့​ပေမယ့် အမှန်မှာ စစ်တပ်ဂိတ်သို့သွား​ရောက်ပူး​ပေါင်းခဲ့တာလို့စစ်​ရေးသတင်းရင်းမြစ်အချို့က​ပြောပါတယ်။

၎င်းနဲ့အတူကျပ်သိန်းတစ်ရာကျော်နဲ့သေနတ် (၁ ) လက်ပါသွားတယ်လို့ စစ်​ရေးသတင်းရင်းမြစ်အချို့က​ပြောပါတယ်။

ဒေသခံတော်လှန်ရေးတပ်ဖွဲ့ဝင်တဦးကလည်း
"အခုလောလောဆယ်သူတ‌ယောက်တည်း ပေါင်းသွားတယ်လို့သတင်းရတယ်။သူပေါင်းပြီးတဲ့နောက်နေခဲ့တဲ့နေရာ နဲ့ ဆေးရုံကို ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ဗုံးကြဲသွားတယ်။တပ်ရင်းကရဲဘော်တွေကအရင်ကတည်းကတပ်ပေါင်းစုဖွဲ့ထားပြီးပြီမို့အဆင်
ပြေပါတယ်"လို့ ပြောပါတယ်။

ပျံလွှားဆိုသူဟာမုံရွာခရိုင်တပ်ရင်း(၁၅)
စတင်တည်​ထောင်စဥ်က တပ်ရင်းမှူးအဖြစ်တာဝန်ယူခဲ့​ပေမယ့် ချောင်းဦးမြို့နယ်မှာ ​​တော်လှန်​ရေးအဖွဲ့ ခုနှစ်ဖွဲ့ ပူး​ပေါင်းပြီး
(6+1)တပ်ပေါင်းစုဖွဲ့ပြီးနောက်ပျံလွှားဟာ တပ်ရေးဗိုလ်အဖြစ် တာဝန်ယူထားတာဖြစ်ပါတယ်။ပျံလွှားစစ်တပ် နဲ့​ပေါင်းပြီး​တော့ ဒီနေ့ည​နေပိုင်းမှာ စစ်တပ်က​လေ​ကြောင်းက​နေ ဆက်တိုက်လာ​ရောက်တိုက်ခိုက်ခဲ့တာလို့
​တော်လှန်​ရေးတပ်ဖွဲ့ဝင်အချို့က​ပြောပါတယ်။

ပျံလွှားစစ်တပ်နဲ့​ပေါင်းသွားပြီး​နောက် ဒီ​နေ့ ညနေ ပိုင်းမှာ‌ချောင်းဦးမြို့နယ်၊ ထန်းတောကုန်းရွာအနီးဝန်းကျင်ကို စစ်တပ်က​လေ​ကြောင်းက​နေ ၇ကြိမ်တိုက်ခိုက်ခဲ့တဲ့အတွက် ပြည်သူ (၈) ဦးသေဆုံးပြီး (၇) ဦးဒဏ်ရာရခဲ့တယ်လို့ကနဦးသတင်းရရှိပါတယ် ။ဒဏ်ရာရသူ​တွေထဲမှာ ၅ ဦးကပြင်းထန်တယ်လို့ ​ဒေသခံအချို့က​ပြောပါတယ်။

ဒါ့အပြင် မုံရွာခရိုင်၊အရာတော်မြို့နယ်တောင်
ခြမ်း၊ ကံရင်းရွာကိုလည်းစစ်တပ်က လေ
ကြောင်းမှတိုက်ခိုက်ခဲ့ပြီး ပြည်သူ (၂) ဦးဒဏ်ရာရခဲ့တယ်လို့စစ်​ရေးသတင်းရင်းမြစ်အချို့က​ပြောပါတယ် ။

စစ်တပ်က အရာတော်မြို့နယ်တောင်ခြမ်းကို
တံတားဦးကတက်လာတဲ့ ဂျက်ဖိုက်တာဖြင့်ည​နေ ၄နာရီ ၄၀မိနစ်မှာတစ်ကြိမ်၊ မိတ္ထီလာရှမ်းတဲကတက်လာတဲ့ဂျက်ဖိုက်တာဖြင့်
ည​နေ ၄ နာရီ ၄၅ မိနစ်တစ်ကြိမ်လေကြောင်းမှတိုက်ခိုက်ခဲ့ပါတယ် ။

ဒါ့အပြင် ချောင်းဦးမြို့နယ်အတွင်းကိုလည်း မိတ္ထီလာရှမ်းတဲ​လေတပ်ကတက်တဲ့ ဂျက်ဖိုက်တာ ၂စီး နဲ့ ည​နေ ၄ နာရီ ၅၀ မိနစ် ခန့်၊ ၄ နာရီ ၄၃မိနစ် ခန့်၊ ၄ နာရီ ၄၅ မိနစ် ခန့်၊ ၄ နာရီ ၅၉ မိနစ် ခန့် တို့မှာ စုစုပေါင်းဗုံး ၄ ကြိမ် ဗုံးကြဲခဲ့ပါတယ်။ ဒါ့အပြင်ညောင်ဦးလေဆိပ်တက် MI -35 တစ်စီးကလည်း ည​နေ ၅ နာရီ ၅ မိနစ်အချိန် မှာချောင်းဦး မြို့နယ်အတွင်း လေ
ကြောင်းက​နေတိုက်ခိုက်ခဲ့ပါ​သေးတယ် ။

ပျံလွှားဟာ စစ်တပ်နဲ့ပူး​ပေါင်းသွားတာ​
ကြောင့်သူနဲ့​ဖေစ်ဘွခ်အပါအဝင် လူမှုကွန်ယက်မှာ Friend ဖြစ်​နေရင် unfriend လုပ်ထားကြဖို့ ​တော်လှန်​ရေးတပ်ဖွဲ့ဝင်နဲ့ ပြည်သူအချို့ကြား အပြန်အလှန်သတိ​ပေး​​နေကြပါတယ်။

ပျံလွှား (​ခေါ်) ဝေဇင်အောင် (ခ) ဝေကြီး။
ဓါတ်ပုံ-ပျံလွှား​ဖေစ်ဘွခ်

စစ်တပ်ကလေယာဉ်နဲ့ ဗုံးကြဲတိုက်ခိုက်လို့ ဗိုက်ထဲကကလေးပါမကျန် သေဆုံးသွားခဲ့ကြရတဲ့အရပ်သားပြည်သူတွေနဲ့သူတို့ရဲ့ ကျန်ရစ်မိသားစုတွေ ပူဆွေးသောကရောက် ငိုကြွေးနေကြတဲ့အပေါ် ဘယ်လိုသဘောထား အမြင်ရှိပါသလဲ။

ဒီမေးခွန်းတွေအတွက်အဖြေကို စစ်တပ်လော်ဘီတစ်ယောက်ကတော့ စောလျင်စွာပဲ လူသိရှင်ကြား ထုတ်ဖော် ဖြေဆိုထားပါတယ်။

မပုတုဆိုသူ စစ်တပ်လော်ဘီ အမျိုးသမီးတစ်ဦးပါ။ ကျောက်တော်ကို အာဏာသိမ်းစစ်တပ်က ဗုံးကြဲတိုက်ခိုက်တဲ့သတင်းတွေကြားပြီးချိန် ချက်ချင်းဆိုသလိုပဲ “ဒီနေ့သောက်တဲ့ ရခိုင်မုန့်တီကပိုပြီးအရသာရှိတယ်။ မိုးအေး

အေးနဲ့ ဆွေးရတာ ဖီးလ်ပဲ”ဆိုတဲ့ စကားနဲ့အတူ ရခိုင်မုန့်တီကို စားပြတဲ့ဗီဒီယိုကလစ်တစ်ခု TikTok မှာ တင်ခဲ့သလို အဆိုတော်ကိုင်ဇာရဲ့ “ကစ္ဆပနဒီလှိုင်းသံ” ဆိုတဲ့သီချင်းကိုလည်းနောက်ခံအဖြစ်ထည့်သုံးထားပါသေးတယ်။အဲဒီနေ့မှာပဲ နောက်ထပ်ဗီဒီယိုကလစ်တစ်ခုကို TikTok မှာ ထပ်တင်လာခဲ့ပြီး အဲဒီထဲမှာလည်းအတော်လေးဆိုးဝါးတဲ့ စကားလုံးအသုံးအနှုန်းတွေနဲ့အတူ ထိခိုက်သေဆုံးရတဲ့ ပြည်သူတွေအပေါ် စော်ကားပြော ဆိုမှုတွေ ပြုထားပါသေးတယ်။

ပြည်သူတွေထိခိုက်သေဆုံးရလို့ စိတ်မကောင်းဖြစ်၊ ဝမ်းနည်းနေချိန် ဒီဗီဒီယိုကလစ်တွေကို တွေ့လိုက်ရတော့ စိတ်ထဲမှာအတော်လေးနေလို့မကောင်းဖြစ်ခဲ့ရပါတယ်။ အကြောင်းရင်းက ကျောက်တော်ဖြစ်စဉ်နဲ့ပတ်သက်ပြီး အာဏာသိမ်း စစ်တပ်ရဲ့ စစ်ရာဇဝတ်မှုမြောက်တဲ့ အကြမ်းဖက်တိုက်ခိုက်မှုအပေါ် ပြည်သူတစ်ယောက်အနေနဲ့ တားမြစ်ဆန့်ကျင်ရမယ့်အစား၊ ကန့်ကွက်ရှုတ်ချရမယ့်အစား အကြမ်းဖက်မှုအပေါ် စိတ်လိုလက်ရ အားပေးအား မြှောက်လုပ်လာတဲ့အတွက်ကြောင့်ပါ။ “သူက နဂိုကတည်းက စစ်တပ်အားပေး ထောက်ခံသူပဲ”ဆိုတာမျိုးနဲ့ ဖြေ သိမ့်တွေးတွေးပေးလို့ မရပါဘူး။ ဒါဟာ လက်နက်ကိုင်တပ်ဖွဲ့ချင်းဖြစ်တဲ့ တိုက်ခိုက်မှုမဟုတ်ပါဘူး။ ပြည်သူလူထု အပေါ် ရည်ရွယ်ချက်ရှိရှိ အကြမ်းဖက်တိုက်ခိုက်တာ၊ အပြစ်မဲ့ပြည်သူ အစုလိုက်အပြုံလိုက် ရက်ရက်စက်စက် အသတ်ခံလိုက်ရတာသာဖြစ်ပါတယ်။ ဒါကြောင့်လည်း ကုလအပါအဝင် နိုင်ငံတကာက လက်မခံဘဲ ဝိုင်းဝန်း ကန့်ကွက်ရှုတ်ချနေကြတာပါ။

နောက်တစ်ယောက်ရှိပါသေးတယ်။ စစ်တပ်လော်ဘီကျော်မျိုးမင်းပါ။သတင်းသမားအမည်ခံ ကျော်မျိုးမင်းဟာ ဖြစ်စဉ်ဖြစ်ရပ်တွေအပေါ် ချဉ်းကပ်တဲ့အခါ စစ်တပ်ထောက်ခံသူပီပီ စစ်တပ်ဘက်ကို အသာစီးအကြည့်၊ တစ်ဖက်စောင်းအမြင်တွေနဲ့ ကြည့်မြင်ပြောဆိုချက်တွေကြောင့် ဝေဖန်ခံရမှုတွေနဲ့ ကြုံရသူတစ်ယောက်ဖြစ်ပါတယ်။ အခု ကျောက်တော်ဖြစ်စဉ်မှာလည်း သူဟာထိုနည်းတူပါပဲ။

အာဏာသိမ်းစစ်တပ်က လေယာဉ်နဲ့ဗုံးကြဲတဲ့အပေါ် သူက “ဒုတိယကမ္ဘာစစ်ကတည်းက တစ်နိုင်ငံနဲ့တစ်နိုင်ငံ။ ဒေသတစ်ခုနဲ့တစ်ခု။ စစ်တပ်တစ်တပ်နဲ့တစ်တပ်။ မြို့တစ်မြို့နဲ့ တစ်မြို့။ တစ်ဖွဲ့နဲ့တစ်ဖွဲ့ တိုက်ကြခိုက်ကြတဲ့ အခါမှာ ကိုယ့်မှာရှိတဲ့ အားသာမှုကို အသုံးချပြီးပဲ တိုက်တယ်။ ဘယ်သူ ကမှတော့ ကိုယ့်မှာ ဓားရှိလျက်နဲ့ လက်သီးနဲ့ ပြေးမထိုးဘူး။ ကိုယ့်မှာသေနတ်ရှိလျက်နဲ့သေချာတယ် ဘောလ်ပင်လေးနဲ့လှမ်းမထိုးဘူး”ဆိုတဲ့စကားကို ပြောခဲ့ ပါတယ်။

ဒီနေရာမှာ ကျော်မျိုးမင်းကို တစ်ခုပဲမေးချင်တာက အခုအာဏာသိမ်းစစ်တပ်ဗုံးကြဲခဲ့တဲ့နေရာဟာ စစ်ရေး ပစ်မှတ်နေရာလား။ အများပြည်သူတွေ သွားလာကျင်လည်နေထိုင်ရာနေရာလားဆိုတဲ့တစ်ချက်ကိုပဲ အရင်ဖြေ ကြည့်စေချင်တာပါ။

အခုအာဏာသိမ်းစစ်တပ် ဗုံးကြဲခဲ့တဲ့နေရာဟာ ဓား-ဓားချင်း၊ သေနတ်-သေနတ်ချင်း ယှဉ်ခုတ်၊ ယှဉ်ပစ်ရမယ့်နေရာ မဟုတ်နေဘူးဆိုတာ မြန်မာလူထုသာမက ကမ္ဘာကပါသိပါတယ်။ ဒီကျောက်တော်ဖြစ်စဉ်မှာ မပုတုလို၊ ကျော်မျိုး မင်းလို အကြမ်းဖက်အားပေး၊ စစ်ရာဇဝတ်မှုအပေါ် ထောက်ခံတဲ့အခြားသော စစ်တပ်လော်ဘီများစွာလည်း ရှိနေပါ သေးတယ်။ သူတို့ဟာ စစ်တပ်ကကျူးလွန်တဲ့ စစ်ရာဇဝတ်မှုတိုင်းမှာဆန့်ကျင်တားမြစ်၊ကန့်ကွက်ရှုတ်ချရမယ့်အစားအားပေးအားမြှောက်ပြုသူတွေအဖြစ် အခိုင်အမာတည်ရှိနေသူတွေပါ။

အာဏာသိမ်းစစ်တပ် လေယာဉ်နဲ့ဗုံးကြဲတိုက်ခိုက်ခဲ့တဲ့ နာမည်ကြီးဖြစ်စဉ်တွေဖြစ်တဲ့ လက်ယက်ကုန်း၊ အနန့်ပါ၊ ပဇီကြီး၊ မုန်လိုင်ခက်၊ ကျောက်တော်တို့အပါအဝင် အာဏာ
သိမ်းစစ်တပ်ဘက်က လူအစုလိုက်အပြုံ
လိုက်သတ်ဖြတ် မှု၊ အကြမ်းဖက်မှုဖြစ်စဉ်တိုင်းမှာ စစ်တပ်လော်ဘီတွေဟာ အဲဒီသူတို့ထောက်ခံတဲ့စစ်တပ်ဘက်ကိုသာ ဖာထေး ဝန်းရံပေးခဲ့ရုံသာမက နောက်ထပ်၊ နောက်
ထပ်သော စစ်ရာဇဝတ်မှုတွေ ကျူးလွန်လာအောင်၊ လူအစုလိုက်အပြုံ လိုက်သတ်ဖြတ်မှုတွေကို လက်မရွံ့ကျူးလွန်လာအောင် သွေးထိုးလှုံ့ဆော်ပေးနေသူတွေဖြစ်တယ်ဆိုတာ သူတို့ရဲ့ ပြောဆိုချက်၊ ရပ်တည်ချက်တွေကနေ သိသာထင်ရှားစွာ တွေ့မြင်ရပါတယ်။

ဒီတော့ အာဏာသိမ်းစစ်ခေါင်းဆောင်မင်းအောင်လှိုင်ဦးဆောင်တဲ့ စစ်တပ်က ကျူးလွန်လာသမျှ စစ်ရာဇဝတ်မှုတွေ တိုင်းမှာ အဲဒီစစ်တပ်လော်ဘီတွေဟာလည်း ပူးတွဲတရားခံတွေဖြစ်တယ်ဆိုတာပါပဲ။


https://www.ludunwayoo.com/opinion-mm/2026/10/02/169843/

လူတစ်ယောက်ဟာ သူ့ရဲ့အမြင်၊ သူ့ရဲ့ယုံ
ကြည်ချက်၊ သူ့ရဲ့လူ့ဂုဏ်သိက္ခာနဲ့ လွတ်လပ်စွာ အသက်ရှင်နိုင်တဲ့ နိုင်ငံတစ်နိုင်ငံဖြစ်ဖို့ ပြန်တည်ဆောက်ခွင့်ရကြမှာပါ။ အဲဒီအလုပ်ကို ဘယ်အာဏာရှင်တစ်ယောက်ကမှ လွယ်လွယ်နဲ့တော့ ခွင့်ပြုမှာမဟုတ်ပါဘူး။ ပြည်သူတွေကိုယ်တိုင်၊ ပညာရှင်တွေကိုယ်တိုင်၊ လူငယ်တွေကိုယ်တိုင်၊ နိုင်ငံခြားရောက်နေတဲ့ မြန်မာတွေကိုယ်တိုင် တစ်ယောက်တစ်ဖက်ကပါဝင်ပြီးတည်ဆောက်နိုင်မယ့်နေ့ ရောက်လာမယ်လို့ ယုံကြည်ပါတယ်။

တစ်နေ့ကျရင် ဒီနေ့တွေကို ပြန်မှတ်မိကြမယ်။ မီးမလာတဲ့ညတွေကို။ ဈေးတက်လို့မဝယ်နိုင်ခဲ့တဲ့နေ့တွေကို။ ဆေးရှာမတွေ့လို့ စိတ်ပူခဲ့ရတဲ့အချိန်တွေကို။ ကျောင်းမတက်နိုင်ခဲ့တဲ့ ကလေးတွေကို။ နိုင်ငံခြားထွက်သွားတဲ့ သူငယ်ချင်းတွေကို။မိသားစုနဲ့ ဝေးကွာသွားတဲ့သူတွေကို။ ဆုံးရှုံးခဲ့ရတဲ့သူတွေကို။

အဲဒီအချိန်မှာ တစ်ယောက်ကိုတစ်ယောက် ပြန်ပြောကြမယ်။ “ဒီအရာတွေကို ငါတို့ မေ့မသွားဘူး။ ဒါပေမယ့် ဒီအရာတွေကြောင့် ငါတို့နိုင်ငံကိုလည်း မစွန့်လွှတ်ဘူး”လို့။ နိုင်ငံတစ်နိုင်ငံရဲ့ အနာဂတ်ဆိုတာ အာဏာရှိသူတစ်ယောက်ရဲ့လက်ထဲမှာပဲ ရှိတာမဟုတ်ဘူး။ စိတ်ပျက်နေတဲ့ပြည်သူတစ်ယောက်ရဲ့ မျှော်လင့်ချက်ထဲမှာလည်း ရှိပါတယ်။ နိုင်ငံခြားမှာ အလုပ်လုပ်နေရတဲ့ လူငယ်တစ်ယောက်ရဲ့ အိပ်မက်ထဲမှာလည်း ရှိပါတယ်။ CDM ဆရာမတစ်ယောက်ရဲ့ လက်ထဲမှာလည်း ရှိတယ်။ တောထဲမှာဆေးကုသပေးနေတဲ့ ဆရာဝန်တစ်ယောက်ရဲ့ လက်ထဲမှာလည်း ရှိတယ်။ ကိုယ့်ရဲ့မြေယာကို စွန့်ခွာပြေးရတဲ့ တောင်သူတစ်ယောက်ရဲ့ လက်ထဲမှာလည်း ရှိပါတယ်။ PDF လူငယ်လေးတယောက်ရဲ့ လက်ထဲမှာလည်း ရှိပါတယ်။ ပြီးတော့ ဒီနေ့အခြေအနေကို မကျေနပ်ပေမယ့် မနက်ဖြန်အတွက်မျှော်လင့်ချက်ကိုမစွန့်လွှတ်သေးတဲ့ ငါတို့အားလုံးရဲ့လက်ထဲမှာလည်း ရှိပါတယ်။

တစ်နေ့တော့ ပြန်တည်ဆောက်ကြမယ်။ တို့ရဲ့ သားသမီးတွေ အေးအေးချမ်းချမ်းနဲ့ လူဖြစ်ခွင့်ရဖို့၊ လူတ်ိုင်း ကိုယ်တိုင် လူသားတစ်ယောက်လို ဂုဏ်သိက္ခာရှိရှိ နေနိုင်ဖို့။ ပြီးတော့ “ဒီနိုင်ငံဟာ ငါတို့နိုင်ငံပဲ” လို့ ပြန်ပြောနိုင်ဖို့အတွက်။

အဲဒီနေ့ရောက်တဲ့အခါခံခဲ့ရတဲ့နာကျင်မှုတွေဟာအလဟဿဖြစ်မနေစေရဘူး။ဘာလို့လဲဆိုတော့ပြန်တည်ဆောက်မယ့်မြန်မာနိုင်ငံဟာအရင်လိုပဲပြန်ဖြစ်ဖို့မဟုတ်ဘဲ၊အရင်ထက် ပိုကောင်းတဲ့ နိုင်ငံဖြစ်ဖို့ ဖြစ်ရမယ်။


https://www.ludunwayoo.com/opinion-mm/2026/09/28/169464/

AA ထိုးစစ်အရှိန်မြင့်လာပြီး စစ်တွေနဲ့ ကျောက်ဖြူမှာ တိုက်ပွဲပြင်းထန်နေ

●စစ်တွေက စစ်တပ်ရဲ့ စခန်းငယ်တခုကို
AAထပ်မံသိမ်းပိုက်

အောက်တိုဘာ-၃၊၂၀၂၆။ခိုင်မြတ်/People's Spring

ရခိုင်ပြည်နယ်အတွင်းစစ်တပ်ထိန်းချုပ်ထားတဲ့သုံးမြို့နယ်ထဲမှ စစ်တွေနဲ့ ကျောက်ဖြူမြို့ နယ်ကစစ်စခန်း​တွေကို အာရက္ခတပ်တော်
(AA)က အရှိန်အဟုန်မြင့် ထိုးစစ်ဆင်နေပြီး မြေပြင်တိုက်ပွဲတွေ ပြင်းနေကြတယ် လို့ AA သတင်းရင်းမြစ်တွေနဲ့ ဒေသခံတွေက ပြောပါတယ်။

ကလေးငယ်တွေအပါအဝင် အရပ်သားပြည်သူ ၅၁ ဦး သေဆုံးပြီး ၆၀ ကျော်ဒဏ်ရာရခဲ့တဲ့ စစ်တပ်ရဲ့ကျောက်တော်မြို့ဗုံးကြဲမှုအပြီးမှာ AA က ထိုးစစ်အရှိန်ကို မြင့်လာခဲ့တာဖြစ်ပါတယ်။

“ကိုယ့်ဘက်က ပြင်းပြင်းထန်ထန်ထိုးစစ်လုပ်နေတယ်။စစ်တွေမှာရော၊ ကျောက်ဖြူမှာရော တိုက်ပွဲပြင်းနေတယ်။စစ်တွေမှာဆိုရင် တောကန်၊သိန်းတန်၊နာရီကန်ဘက်မှာတပြိုင်တည်း ထိုးနေတယ်လို့ သိရတယ်။ကျောက်ဖြူ မှာလည်း စစ်မျက်နှာနှစ်ခုလောက်မှာ တိုက်ပွဲဖြစ်နေတယ်” AA နဲ့ နီးစပ်တဲ့ သတင်းရင်းမြစ်တဦးက ပြောပါတယ်။

စစ်တွေမြို့နယ်အတွင်း စက်တင်ဘာလ​နောက်ဆုံးပါတ်မှာတိုက်ပွဲတွေခတ္တရပ်နေခဲ့ရာစက်တင်ဘာ ၃၀ ရက်ကစ တိုက်ပွဲပြန်ဖြစ်ခဲ့ တာဖြစ်ပါတယ်။​အောက်တိုဘာလဆန်းမှာ စစ်တပ်စစ်ကြောင်းတွေရှိနေတဲ့ ဝါဘိုကျွန်း၊ ကွမ်းတောင်ရွာအနီးဝန်းကျင်နဲ့ စစ်တပ်ကာကင်း တွေရှိရာ ကံ့ကော်ကျွန်း၊ သိန်းတန်၊ ရာတန်၊ နာရီကန်ရွာဝန်းကျင်တို့မှာ တိုက်ပွဲဖြစ်နေကြတယ်လို့ ဆိုပါတယ်။

“စစ်တပ်ကကျွံလာတဲ့စစ်ကြောင်းတွေနဲ့လည်း တိုက်ပွဲဖြစ်နေတယ်။ တဖက်မှာလည်း ကိုယ့်ဘက်က ရှေ့တက်ပြီး ထိုးစစ်လုပ်နေတယ်။ ကံ့ကော်ကျွန်းနားတိုက်ပွဲမှာ အောင်မြင်မှုရတာတွေရှိတယ်၊နောက်မှ တရားဝင် ထုတ်ပြန် မယ်ထင်တယ်” လို့ မြေပြင်မှာ ရှိနေတဲ့ AA နဲ့ နီးစပ်သူ ဒေသခံသတင်းရင်းမြစ်တဦးက ပြောပါတယ်။

ကံ့ကော်ကျွန်းအနီးတိုက်ပွဲမှာစစ်တပ်ရဲ့ အ
ထိုင်ချစခန်းငယ်တခုကို AA က သိမ်းပိုက်ရရှိခဲ့တယ်လို့စုံစမ်းသိရပါတယ်။ ဒါ​ပေမယ့်တိုက် ပွဲအခြေအနေအသေးစိတ်တွေကိုတော့ မသိရ​သေးပါဘူး။စက်တင်ဘာ ၃၀ ရက်နေ့ကလည်း စစ်တွေမြို့နယ် ဝါဘိုကျွန်း၊ကွမ်းတောင်ရွာအနီးတဝိုက်ရှိ အင်အား သုံးဆယ်ဝန်းကျင်ရှိ စစ်တပ်စစ်ကြောင်းတခုလုံးပြုတ်သွား​အောင် AA တပ်ဖွဲ့ဝင်​တွေကတိုက် နိုင်ခဲ့တယ်လို့လည်း မြေပြင်သတင်းရင်းမြစ်တွေကပြောပါတယ်။

အလားတူကျောက်ဖြူမြို့နယ်မှာလည်း တောင်မော်ဦးရေတပ်စခန်းရဲ့ကာကင်း အ၀တောင်ရွာဝန်းကျင် နဲ့ မင်းပြင်ရွာဝန်းကျင်တို့မှာ တိုက်ပွဲဖြစ်နေတယ်လို့ စစ်ရေးသတင်းရင်းမြစ်တွေက ပြောပါတယ်။

“တိုက်ပွဲပြင်းနေတယ်လို့ပြောပါတယ်။စစ်
တပ်ကလည်း လေယာဉ်နဲ့ ချနေတာလည်းနှစ်ရက်ဆက်တိုက်ရှိပြီ။စနဲနားက ရွာတွေကိုပဲ ကြဲနေတာ။အဲဒီရွာတွေမှာလူတော့မရှိပေမယ့် အိမ်တွေကတော့ အပျက်အစီးရှိတယ်”လို့ ကျောက်ဖြူဒေသခံတဦးက ပြောပါတယ်။

အာဏာသိမ်းစစ်တပ်ဟာ ပြီးခဲ့တဲ့ စက်တင်
ဘာလ ၂၈ ရက်နေ့မှာ ကျောက်တော်မြို့ပေါ်ရှိ အိန္ဒိယစျေးနဲ့ ကစ္ဆပနဒီတ တားပေါ်တို့ကို ဂျက်ဖိုက်တာနဲ့ ပေါင်ငါးရာဗုံးနှစ်လုံး ကြဲချခဲ့တာကြောင့် မွေးခါနီး ကိုယ်ဝန်ဆာင်အမျိုးသ မီး၊ မွေးပြီးစ မိနစ်ပိုင်းအကြာ ရင်သွေးငယ်နဲ့ ဒေသခံရိုဟင်ဂျာတွေအပါအဝင်အရပ်သားပြည်သူ ၅၁ ဦး သေဆုံးပြီး ၆၀ ကျော်ဒဏ်ရာရခဲ့ပါတယ်။

အဲဒီလို ကြီးမားပြီး စစ်ရာဇဝတ်မှုမြောက်တဲ့၊ အစုလိုက်အပြုံလိုက်သေဆုံးစေတဲ့ အကြမ်း
ဖက်ဗုံးကြဲ တိုက်ခိုက်မှုဖြစ် စဉ်တွေအတွင်း အမိန့်ပေးသူ၊ အမိန့်လိုက်နာပြီးပစ်ခတ်တိုက်ခိုက်သူတွေနဲ့ ပါဝင်ပက်သက်သူတွေအားလုံး၊ ပက်သက်ဆက်နွယ်တဲ့ အဖွဲ့အစည်းတွေအားလုံးကို အထူးမှတ်တမ်းတင်ထားသလို တူညီပြီး ထိုက်တန်တဲ့ တုံ့ပြန်မှုမျိုး မနှေးမကြာအချိန်အတွင်း လက်တုံ့ပြန်သွားမယ်လို့ အာရက္ခတပ်တော်(AA)က ထုတ်ပြန်ထားပါတယ်။

အဲဒီလို ထုတ်ပြန်ပြီးနောက်မှာပဲ AA ဟာ စစ်တွေနဲ့ ကျောက်ဖြူမြို့နယ်အတွင်းရှိ စစ်တပ်စခန်းတွေကို ထိုးစစ်အရှိန် မြင့်ကာ တိုက်ခိုက်လာတာဖြစ်ပါတယ်။

“တိုက်ပွဲတွေကတော့အခုထက် ပြင်းလာနိုင်တယ်လို့ မြင်တယ်။စစ်တပ်ကလည်းအလျော့မပေးဘူး၊ ပြည်သူတွေ ကို လိုက်သတ်နေတယ်။ AA ကလည်း တုံ့ပြန်မယ်လို့ပြောထားပြီဆိုတော့သူတို့စကားအတိုင်းလုပ်လိမ့်မယ်။ ဒါဆို ရင် တိုက်ပွဲက ပြင်းလာဖို့ပဲ ရှိတယ်။ ပြည်သူတွေအနေနဲ့လည်း ပြင်ဆင်ထားကြဖို့လိုမယ်” လို့ ရခိုင်ဒေသခံစစ်ရေး လေ့လာသူတဦးက ပြောပါတယ်။

စစ်တပ်က ရခိုင်ပြည်နယ်မှာ စစ်​တွေ၊​ကျောက်ဖြူ ၊မာန်​အောင် သုံးမြို့နယ်ကိုပဲထိန်းချုပ်ထားနိုင်​တော့ပြီး ကျန် ၁၄ မြို့နယ်နဲ့ ချင်းပြည်နယ်ကပလက်ဝမြို့နယ်ကို AA ကသိမ်းပိုက်ထိန်းချုပ်ထားတာဖြစ်ပါတယ်။

စစ်တပ်ဟာရခိုင်ပြည်နယ် စစ်တွေ၊ ကျောက်
ဖြူ၊ ရခိုင်ရိုးမအရှေ့ဘက်ခြမ်း မကွေးတိုင်း ပဒါန်း၊ မင်းတုန်း၊ ပဲခူး တိုင်း ပန်းတောင်၊ ဧရာ၀တီတိုင်း ရေကြည်၊ သာပေါင်းမြို့နယ်တို့ကနေ AA ထိန်းချုပ်ရာဒေသတွေကို ပြီးခဲ့တဲ့ စက်တင်ဘာ ၄ ရက်နေ့ကစကာ ၄၉၂၆ စစ်ဆင်ရေးဆိုပြီး တန်ပြန်ထိုးစစ်ဆင်နေခဲ့တာဖြစ်ပါတယ်။

တန်ပြန်ထိုးစစ်တလနီးပါးအတွင်း စစ်တပ်ဟာAA စခန်း​တွေကိုသိမ်းနိုင်တာမရှိဘဲ စစ်တွေမြို့နယ်အတွင်းက စစ်တပ်စခန်း ၉ ခု၊ ကျောက်ဖြူမြို့နယ်အတွင်းကစခန်း ၁ ခု၊ မင်းတုန်းမြို့နယ်အတွင်းက ၁ ခု ၊ စုစုပေါင်း တပ်စခန်း ၁၁ ခုထက်မနည်းကို လက်လွှတ်ခဲ့ရပါတယ် ။တိုက်ပွဲ​တွေအတွင်းစစ်တပ်ဘက်က အကျအဆုံးတွေလည်း ရာချီ ရှိနေပြီဖြစ်တယ်လို့ မြေပြင်သတင်းရင်းမြစ်တွေက ပြောထားပါတယ်။

အဲဒီလို တပ်စခန်းတွေ လက်လွှတ်၊ အထိနာနေတဲ့ စစ်တပ်ဟာ လေယာဉ်အုပ်လိုက်အသုံးပြုကာ တိုက်ပွဲဆက်စပ် နေရာတွေအပြင် ရခိုင်ပြည်နယ်အတွင်းက အရပ်သားနေရာတွေကိုပါ လေကြောင်းဗုံးကြဲမှုတွေ ဆက်တိုက်လုပ်နေတာဖြစ်ပါတယ်။

လူထုနွေဦးကကောက်ယူပြုစုထားတဲ့အ
ချက်အလက်တွေအရ စစ်တပ်ရဲ့ စစ်ဆင်ရေးစတဲ့ စက်တင်ဘာ ၄ ရက်နေ့အောက်တိုဘာ ၂ ရက်နေ့ထိ တလနီးပါးအတွင်း စစ်တပ်လက်
ချက်ကြောင့် သေဆုံးရတဲ့ ရခိုင်ဒေသခံပြည်သူ ၆၂ ဦးနဲ့ ထိခိုက်ဏ်ရာရသူ ၁၀၈ ဦးထက်မနည်း ရှိ​နေပြီဖြစ်ပါတယ်။

သံတွဲမြို့နယ် ၊ငပလီကမ်း​​ခြေ ကို အာရက္ခတပ်​တော်သိမ်းပိုက်ခဲ့စဥ်က AA တပ်ဖွဲ့ဝင်​တွေ။ဓါတ်ပုံ-AA Info Desk

■​ဆောင်းပါး

"ဈေးရောင်းရတာထက် ကျားမြီးသာပြေးဆွဲချင်တယ်"

Zack/People's Spring

"ပြေးကြ..ပြေးကြ"

ဒီအသံတွေထွက်ပေါ်နေတာက စစ်ဘေးကြောင့် ပြေးနေရတဲ့ ကျေးရွာတွေမှာလို့ထင်ပါသလား။

မဟုတ်ပါဘူး။

မြန်မာနိုင်ငံရဲ့ စီးပွားရေးမြို့တော်လို့ သတ်
မှတ်ထားတဲ့ ရန်ကုန်မြို့မှာဖြစ်နေတာပါ။

ဘာကြောင့်လဲဆိုတော့ အပေါ် အောက် အပြာရောင်တူညီဝတ်စုံတွေ ဝတ်ထားသူတွေ လာတာကြောင့် ဈေးသည်တွေ အချင်းချင်းထွက်
ပြေးဖို့သတိပေးနေကြတာပါ။

ရှင်းရှင်းလင်းလင်းပြောပြရရင်တော့ စစ်တပ်လက်အောက်ကနေ ပြည်သူတွေကို အနုနည်းနဲ့ နှိပ်စက်နေတဲ့ စည်ပင်ဝန်ထမ်းတွေပါ။

ဒီဖြစ်စဉ်အစကတော့သမ္မတရာထူကိုမတရား
ရယူထားတဲ့အာဏာသိမ်းခေါင်းဆောင်ရဲ့စနက်ပါ။သမ္မတရူးမင်းအောင်လှိုငရဲ့ ရက် ၁၀၀ စီမံချက် အကျိုးဆက်ပါ။

ရက် ၁၀၀ စီမံချက်ဆိုတာက ရန်ကုန်မြို့ရဲ့ မြို့နယ်တွေက လမ်းဘေး ဝဲ ၊ ယာတွေမှာ စားဝတ်နေရေးအတွက် ဈေးရောင်းချသူတဲ့ အခြေခံ လူတန်းစားပြည်သူတွေအပေါ် သက်
ရောက်မှု အများဆုံးလို့ ပြောရင်လည်းမမှားပါဘူး။

"ဈေးရောင်းရတာထက် ကျားမြီးသာပြေးဆွဲချင်တယ်"လှ်ိုင်မြို့နယ်မှာ လမ်းဘေးဈေး
ရောင်းနေတဲ့ အမျိုးသမီးတစ်ဦးက သူမခံစားချက်ကိုပြောပါတယ်။လမ်းဘေးဈေး
ရောင်းသူတွေ ဈေးခင်းပြီးချိန်မှ အပြာဝတ်​တွေလာပြီဆိုရင်ပြန်သိမ်းရတာအကြိမ်ကြိမ်။

ရက် ၁၀၀ စီမံချက်ကာလကစလို့အခုချိန်ထိ
လမ်းမဘေးက ရေ‌မြောင်းတွေကို ကျော်ပြီးဆိုင်ထွက်ရင် စည်ပင်တွေက သိမ်းမယ်လို့ ကြေညာထားတာပါ။

တချို့ဆိုင်တွေက နေကာအနေနဲ့ သုံးထားတဲ့ အမိုးတွေကိုတောင်လက်မခံပါဘူး။အပြာဝတ်​တွေလာချိန် အမိုးတွေချထားရငဖျက်မှာစိုးတာကြောင့် အမိုးတွေကို တင်လိုက်ချလိုက် လုပ်နေကြတာလည်း အလုပ်တစ်ခုဖြစ်လာပါတယ်။

တစ်ခါတစ်လေဆိုရင် စည်ပင်ကားတွေနဲ့လာပြီး သူတို့သတ်မှတ်ထားတဲ့နေရာကိုကျော်နေလို့ဆိုပြီး ပစ္စည်းမှန်သမျှကောက်တင်သွားကြတာပါ။ဒါကြောင့် လမ်းဘေးမှာ ဈေးရောင်းရသူတွေက ကျီးလန့်စာစား ဖြစ်နေကြတာပါ။

"ဒီခေတ်မှာဈေးရောင်းလို့လည်းမချမ်းသာပါဘူး။ သူတို့ကအကုန်သိမ်းတော့ အရင်းပြုတ်ပြီးပိုဒုက္ခရောက်ရတာပေါ့" လို့ လမ်းဘေးမှာ အသုပ်စုံရောင်းချသူတစ်ဦးကရင်ဖွင့်ပါတယ်။

စစ်တပ်အာဏာသိမ်းပြီး အ​ခြေခံပြည်သူ​တွေစားဝတ်​နေ​ရေးပိုခက်ခဲကျပ်တည်းလာချိန်မှာ ဝမ်းတထွာအတွက် ​ဈေး​ရောင်းတဲ့​ဈေးသည်​တွေဟာ အုပ်ချုပ်​နေတယ်ဆိုတဲ့စစ်အုပ်စုဆီက ဘာအကူအညီမရဘဲ ပိုခက်ခဲကြပ်တည်း​​အောင်သာအလုပ်ခံ​နေရတာပါ ။

ရန်ကုန်ရဲ့ မြို့နယ်တွေက ရပ်ကွက်တိုင်းရဲ့ လမ်းမပေါ်မှာ မနက်တစ်ကြိမ် ညနေတစ်ကြိမ် ဟင်းသီးဟင်းရွက် ၊ သား ငါးကစလို့ တိုလီ
မိုလီပစ္စည်း ရောင်းချသူတွေရှိကြပါတယ်။

ဒီဈေးသည်တွေက ဈေးတွေထဲအထိမသွားနိုင်တဲ့ ရပ်ကွက်ထဲက ပြည်သူတွေ အတွက်လည်း အားကိုးရာတစ်ခုပါပဲ။

"ရောင်းတဲ့သူတွေတင်မဟုတ်ဘူး။ ဝယ်တဲ့လူတွေပါ အဆင်မပြေဖြစ်တာ" လို့ လှိုင်မြို့နယ်မှာ‌ နေထိုင်သူတစ်ဦးက ‌ ပြောပါတယ်။

ဒါကြောင့် ပြည်သူတွေကိုယ်တိုင်ကစစ်တပ်လက်​အောက်ခံစည်ပင်တွေလာတာမြင်ရင် ဈေးသည်တွေကို သတိပေးတာမျိုးလုပ်ကြပါတယ်။အချင်းချင်းရိုင်းပင်းကြတာပါ။တချို့ပြည်သူ​တွေဆိုရင် ဆိုင်သိမ်းတာ ပစ္စည်းတွေ ရွှေ့တာက အစ ကူညီပေးတာတွေရှိပါတယ်။

တစ်နိုင်ငံလုံးအတိုင်းအတာနဲ့ နေ့စဉ် အကြမ်း
ဖက်မှုတွေ လုပ်ဆောင်နေတဲ့ စစ်တပ်ကတော့ ပြည်သူတွေရဲ့ ခက်ခဲမှုတွေကို လျစ်လျူရှုဆဲပါပဲ။စစ်တပ်က နယ်တကာလှည့်ပြီး တိုက်​လေယာဥ်​တွေနဲ့ ဗုံးပတ်ကြဲ ပြည်သူ​တွေကိုသတ်ဖြတ်​နေသလို ရန်ကုန်မြို့မှာလည်း စစ်တပ်လက်​အောက်ခံ စည်ပင်ဝန်ထမ်း​တွေက လမ်း​ဘေး​ဈေးသည်​တွေကို ရက် ၁၀၀ စီမံချက် ဆိုတာစကတည်းက မကြာခဏ နှိပ်ကွပ်​နေပါ​တော့တယ် ။ ။

ရန်ကုန်မြို့ တ​နေရာက လမ်း​ဘေး​ဈေးသည်​တွေနဲ့ စစ်တပ်​လက်​အောက်ခံစည်ပင်ဝန်ထမ်း​တွေ ။ဓါတ်ပုံ-လူထု​နွေဦး

KIA ထိန်းချုပ် ပန်ဝါဒေသက တရုတ်လုပ်ငန်းရှင်ပိုင် ယမ်းဂိုဒေါင်ပေါက်ကွဲ၇ဦးသေ၊ ၁၁ဦး ဒဏ်ရာရ

အောက်တိုဘာ-၃၊၂၀၂၆။ထားမြတ်/People’s Spring

ကချင်လွတ်လပ်ရေးတပ်မတော်(KIA) သိမ်း
ပိုက်ထိန်းချုပ်ထားတဲ့ကချင်ပြည်နယ် ချီဖွေမြို့နယ်၊ပန်ဝါဒေသကတရုတ်ကုမ္ပဏီပိုင် ယမ်းဂိုဒေါင်ပေါက်ကွဲမှုဖြစ်ပြီး ၇ ဦးသေဆုံးကာ ၁၁ဦး ဒဏ်ရာရရှိခဲ့တယ်လို့ ကချင်သ
တင်းရင်းမြစ်အချို့က ပြောပါတယ်။

အောက်တိုဘာ ၂ရက် နေ့လည်ပိုင်းက ပန်ဝါဒေသ လဂွေရွာ စာသင်ကျောင်းအနီးမှာ ပေါက်ကွဲမှု ဖြစ်ခဲ့တာလို့ သိရပါတယ်။

“သေတာ ၇ယောက် ဒဏ်ရာရ ၁၁ယောက်။ တရုတ်ကုမ္ပဏီတစ်ခုရဲ့ယမ်းဂိုဒေါင် ပေါက်
ကွဲသွားတာ။စာသင်ကျောင်းနားမှာ။ စာသင်
ကျောင်း အကုန်ပျက်စီးတယ်” လို့ ကချင်သတင်းရင်းမြစ်တဦးကပြောပါတယ်။

အခြားကချင်စစ်ရေးသတင်းရင်းမြစ်တဦးကလည်း “တရုတ်လုပ်ငန်းရှင်တွေရဲ့ အရပ်ဖက်သုံး အမိုးနီးယားနိုက်ထရိတ် မတော်တဆ ပေါက်ကွဲမှုပါ” လို့ ပြောပါတယ်။

အဲဒီ ပေါက်ကွဲမှုဟာ ပြင်းထန်ခဲ့တာကြောင့် စာသင်ကျောင်းအဆောက်အအုံ၊ ကျောင်းဝန်ထမ်းတွေရဲ့ နေအိမ် အဆောက်အအုံတွေ အပါအဝင် နေအိမ်များစွာ ပျက်စီးခဲ့ကြောင်း ကချင်နဲ့ ရှမ်း​မြောက်က သတင်း​တွေကို​ဖော်ပြ​ပေး​နေတဲ့ 7Stars Newsက ဖော်ပြထားပါတယ်။ ဒဏ်ရာရသူတွေထဲမှာ အသက်အန္တရာယ် စိုးရိမ်ရသူတွေလည်း ပါဝင်တယ်လို့ အသိပေးထားပါတယ်။

ဒါ့အပြင် ယမ်းဂိုဒေါင် ပေါက်ကွဲမှုနဲ့ ပတ်
သက်ပြီးတာဝန်ရှိသူ ဂိုဒေါင်ပိုင်ရှင်အား ကချင်လွတ်လပ်ရေးအဖွဲ့(KIO) ရဲတပ်ဖွဲ့မှ ထိန်းသိမ်းထားကာ နစ်နာသူများ တရားမျှတမှုရရှိရေးစုံစမ်းစစ်ဆေးသွားမယ်လို့လည်း 7Stars News က ဖော်ပြထားပါတယ်။

အခုလို ယမ်းဂိုဒေါင်ပေါက်ကွဲမှုဖြစ်စဉ်မျိုးဟာ အခြားတိုင်းရင်းသားတပ်တွေဖြစ်တဲ့ ၀တပ်(UWSA)၊ မိုင်းလားတပ်(NDAA)၊ ကိုးကန့်တပ်(MNDAA)၊ တအာင်းတပ်(TNLA) နယ်မြေတွေမှာလည်း ဖြစ်ပွားခဲ့ဖူးပါတယ်။ အခုနှစ်ပိုင်းအတွင်း UWSA၊ TNLAနဲ့ MNDAA တို့ရဲ့ နယ်မြေအတွင်း ဖြစ်ပွားခဲ့တဲ့ ပေါက်ကွဲမှုတွေမှာ လူသေဆုံးထိခိုက်အများအပြားရှိခဲ့ပါတယ်။

"UWSA ၊ TNLA ၊ MNDAA ထိန်းချုပ်နေရာတွေပြီးရင် အခု KIA ထိန်းချုပ်ဒေသမှာ ထပ်ပြီလာတာဟာ စိုးရိမ်စရာပါ ပြည်သူတွေရဲ့ ဘေးကင်းလုံခြုံရေးကို ဦးစားပေးသင့်တယ်
အောက်ခြေမှာ ပြောထားပါတယ်ဆိုတာနဲ့မပြီးဘူး အစကတည်းက ပြည်သူတွေရှိတဲ့နေရာမှာ ယမ်း လက်နက်သိုလှောင်ရုံတွေ လုံးဝ မထားဖို့ ဥပဒေစည်းကမ်းချထားရမှာဖြစ်တယ်"လို့လည်း သတင်းရင်းမြစ်ကပြောပါတယ်။

လက်နက်ခဲယမ်းတွေနဲ့ပတ်သက်ပြီးလက်
နက်ကိုင်တပ်ဖွဲ့တွေဘက်က အခွန်ငွေရရှိခြင်းထက် ပြည်သူတွေဘေးကင်းရေးကို တာဝန်ယူမှုတာဝန်ခံမှုရှိစွာ လုပ်ဆောင်ကြဖို့လည်း ကချင်ပြည်သူအချို့က တိုက်တွန်းပါတယ်။



#KIA #ပန်ဝါ #ပန်ဝါယမ်းဂိုဒေါင်ပေါက်ကွဲ
#peoplesspring #ludunwayoo

ယမ်းဂို​ဒေါင်​ပေါက်ကွဲပြီး​နောက်မြင်ကွင်း။
ဓါတ်ပုံ-​ပေးပို့

မန္တလေးမှာ လျှပ်စစ်မီးပေးမှု အချိန်ပိုင်းစနစ်ပြန်ဖြစ်

အောက်တိုဘာ ၃၊ ၂၀၂၆။ ဇေအောင်/People's Spring

မန္တလေးမြို့မှာ ဒီကနေ့ အောက်တိုဘာ ၃ရက်ကစပြီး လျှပ်စစ်ဓာတ်အားပေးမှု ထက်ဝက် လျှော့ချလိုက်ပြီး အချိန်ပိုင်းစနစ် ပြန်ဖြစ်သွားကြောင်း လျှပ်စစ်ရုံးတွေရဲ့ ထုတ်ပြန်ချက်အရ သိရပါတယ်။

မန္တလေးမြို့က မြို့နယ် ၇ မြို့နယ်လုံးမှာ ဒီကနေ့ အောက်တိုဘာ ၃ ရက်ကစတင်ပြီး အချိန်ပိုင်း လျှပ်စစ်ဓါတ်အား ဖြတ်တောက်မှာ​ဖြစ်ကြောင်း သက်ဆိုင်ရာ လျှပ်စစ်ရုံးအသီးသီးက အသိပေးကြေညာပါတယ်။

လျှပ်စစ်ဓာတ်အားဖြတ်တောက်မယ့်ဇယားအရ A နဲ့ B ဆိုပြီး အုပ်စုခွဲထားမှာဖြစ်ပြီး ၄ နာရီလာ၊ ၄ နာရီပိတ် စနစ်နဲ့ တစ်နေ့လျှင် စုစုပေါင်း ၁၂ နာရီ သာ လျှပ်စစ်မီး ရရှိတော့မှာ ဖြစ်ပါတယ်။ အာဏာသိမ်းစစ်တပ်ဟာ မန္တလေးမြို့ကို လျှပ်စစ်ဓါတ်အားပေးဝေမှု ထက်ဝက် လျှော့ချလိုက်တာဖြစ်ပါတယ်။

"ပြောတော့ ခွဲတမ်းဆိုပြီး မီးဖြတ် ချင် သလိုဖြတ်နေတာ။ ပေးတာ အချိန်လဲမမှန်ဘူး။ သူတို့ စာထုတ်ထားသလို ဘယ်အချိန်လာမယ်ဆိုပြီး လာမယ့်အချိန်ကျ မနေ့ညထဲကပျက်နေတာ။ အခုမနက်ထိပဲ"လို့ ချမ်းအေးသာဇံမြို့နယ်မှာ နေထိုင်တဲ့ အမျိုးသမီးတစ်ဦးက ပြောပါတယ်။

အာဏာသိမ်းစစ်တပ်ဟာ ပြီးခဲ့တဲ့ နွေရာသီ မတ်လက တစ်ရက် ၈ နာရီ မီးဖြတ်ခဲ့ပေမယ့် ယခု နွေရာသီမရောက်သေးတဲ့အချိန်မှာပဲ နွေရာသီထက်ပင် ပိုမိုဖြတ်တောက်တော့မှာ ဖြစ်ပါတယ်။ လက်ရှိ အယ်နီညိုကြောင့် မန္တလေးမြို့မှာ ရာသီဥတု ပူပြင်းနေချိန် လျှပ်စစ်မီး ပိုဖြတ်တာကို မြို့ခံတွေ ဝေဖန်နေကြပါတယ်။

​လက်ရှိမှာ နိုင်ငံအနှံ့အပြား လျှပ်စစ်မီးပုံမှန်မရရှိတဲ့အပြင် လောင်စာဆီဈေးနှုန်းတွေလည်း မြင့်တက်နေတာကြောင့် ပြည်သူတွေရဲ့ နေ့စဉ်လူနေမှုဘဝနဲ့ ကုန်ထုတ်လုပ်မှုကဏ္ဍတွေမှာပါ ကြီးမားတဲ့ အခက်အခဲတွေနဲ့ ရင်ဆိုင်နေရပါတယ်။

(မန္တလေးမြို့ ချမ်းအေးသာစံမြို့နယ် တစ်နေရာအား ညပိုင်းအချိန်တွေ့ရစဉ်။ ဓာတ်ပုံ - CJ)

ချောင်းဦးမြို့နယ် စစ်တပ်လေကြောင်းတိုက်ခိုက်မှု စစ်ရှောင် ၂ဦး သေဆုံး

အောက်တိုဘာ ၃-၂၀၂၆။မိုမို၊ကတ်သရင်း/ People's Spring

စစ်ကိုင်းတိုင်း၊ ချောင်းဦးမြို့နယ်မှာ အာဏာသိမ်း စစ်တပ်လေကြောင်းတိုက်ခိုက်မှုကြောင့် စစ်ဘေးရှောင်ပြည်သူ ၂ဦးသေဆုံးခဲ့ရကြောင်း ဒေသခံသတင်းရင်းမြစ်တချို့က လူထုနွေဦးကို ပြောပါတယ်။

မုံရွာခရိုင်တပ်ရင်း(၁၅)ရဲ့တပ်ရင်းမှူးဟောင်း၊ လက်ရှိ ချောင်းဦးမြို့နယ်(6+1)တပ်ပေါင်းစုရဲ့တပ်ရေးဗိုလ်ပျံလွှား (ခေါ်) ဝေဇင်အောင်ဟာ စစ်တပ်ထံ အညံ့ခံသွားပြီးနောက် မုံရွာခရိုင်အတွင်းက နေရာတချို့ကို မနေ့က(အောက်တိုဘာ ၂ ရက်)ညနေပိုင်းကတည်းက လေကြောင်းကနေ ဗုံးကြဲခဲ့တိုက်ခိုက်ခဲ့တာလို့ ဆိုပါတယ်။

"စစ်ဘေးရှောင်စခန်းအကုန်လုံးနီးပါး ပျက်စီးသွားတယ်။ ဗုံးကြဲခံရတဲ့ နေရာမှာ အမျိုးသား ၂ဦးဆုံး။တစ်ဦး ဒဏ်ရာရတယ်" လို့ မုံရွာခရိုင် အမှတ်(၁၂)တပ်ရင်း တာ၀န်ရှိသူတစ်ဦးက မနေ့က ညနေပိုင်းလေကြောင်း တိုက်ခိုက်ခံရမှုဖြစ်စဉ်ကို ရှင်းပြပါတယ်။

ဒါ့အပြင် ‌ဒီကနေ့ အောက်တိုဘာ ၃ရက် မနက်ပိုင်းကတည်းက ဂျက်ဖိုက်တာ နဲ့ ရဟတ်ယာဉ်တွေ ၄စီးထက်မနည်းသုံးကာ စစ်တပ်ရဲ့ လေကြောင်းခြိမ်းခြောက်မှုတွေ ဆက်ရှိနေတယ်လို့ ချောင်းဦးမြို့နယ်စစ်ရေးသတင်းရင်းမြစ်က အသိပေးပါတယ်။

"လေကြောင်းတိုက်ခိုက်မှုတွေက လာနိုင်သေးတယ်။ဒီမနက်တင် လေးစီးလောက်ဝဲနေတာ"လို့ သူက ပြောပါတယ်။

အောက်တိုဘာ ၁ရက် ညနေပိုင်းမှာ ပျံလွှားဟာ စစ်တပ်ထံ အညံ့ခံသွားတယ်လို့ ဒေသခံနဲ့စစ်ရေးသတင်းရင်းမြစ်တွေက ပြောပါတယ်။ ၎င်းဟာ ကျပ်သိန်း ၁၀၀ကျော်နဲ့သေနတ် ၁လက်ပါသွားတယ်လို့ သိရပါတယ်။

ဒေသခံတော်လှန်ရေး ရဲဘော် တစ်ဦးကလည်း "အခုလောလောဆယ်သူတ‌ယောက်တည်း ပေါင်းသွားတယ်လို့ သတင်းရတယ်။သူပေါင်းပြီးတဲ့နောက် နေခဲ့တဲ့နေရာ နဲ့ ဆေးရုံကို ဗုံးကြဲသွားတယ်။တပ်ရင်းကရဲဘော်တွေကအရင်ကတည်းကတပ်ပေါင်းစုဖွဲ့ထားပြီးပြီမို့အဆင်ပြေပါတယ်"လို့ ပြောပါတယ်။

ပျံလွှားဟာ မုံရွာခရိုင်တပ်ရင်း(၁၅) စတင်တည်ထောင်စဥ်က တပ်ရင်းမှူးအဖြစ်တာဝန်ယူခဲ့ပေမယ့် ချောင်းဦးမြို့နယ်မှာ တော်လှန်ရေးအဖွဲ့ ၇ဖွဲ့ ပူးပေါင်းပြီး (6+1)တပ်ပေါင်းစုဖွဲ့ပြီးနောက် ပျံလွှားဟာ တပ်ရေးဗိုလ်အဖြစ် တာဝန်ယူထားတာဖြစ်ပါတယ်။

ဒါ့အပြင် ချောင်းဦးမြို့နယ်၊ ထန်းတောကုန်းရွာအနီးဝန်းကျင်နဲ့ အရာတော်မြို့နယ်တောင်ခြမ်း၊ ကံရင်းကျေးရွာကိုလည်းစစ်တပ်က လေကြောင်းတိုက်ခိုက်ခဲ့ရာ ပြည်သူ (၂) ဦးဒဏ်ရာရခဲ့တယ်လို့စစ်ရေးသတင်းရင်းမြစ်အချို့က ပြောပါတယ်။

လေကြောင်းဆိုင်ရာသတင်းအချက်အလက်တွေအရ စစ်တပ်က အရာတော်မြို့နယ်တောင်ခြမ်းကိုတံတား ဦးကတက်လာတဲ့ ဂျက်ဖိုက်တာနဲ့ မနေ့က ညနေ ၄နာရီ ၄၀မိနစ်မှာ ၁ကြိမ်၊ မိတ္ထီလာရှမ်းတဲကတက်လာတဲ့ဂျက်ဖိုက်တာနဲ့ ညနေ ၄ နာရီ ၄၅ မိနစ်မှာ ၁ကြိမ်တိုက်ခိုက်ခဲ့ပါတယ်။

ဒါ့အပြင် ချောင်းဦးမြို့နယ်လည်း မိတ္ထီလာရှမ်းတဲလေတပ်ကတက်တဲ့ ဂျက်ဖိုက်တာ ၂စီး နဲ့ လေကြောင်တိုက်ခိုက်ခဲ့ပါသေးတယ်။

(စစ်ကိုင်းတိုင်း၊ ချောင်းဦးမြို့နယ်မှာ အာဏာသိမ်း စစ်တပ်လေကြောင်းတိုက်ခိုက်အပြီး ပျက်စီးမှုများ။ ဓာတ်ပုံ -ပေးပို့)

ရသေ့တောင်ကိုစစ်တပ်ဗုံးကြဲပြန်၊ကျောင်းသူ
အပါအဝင်၂ ဦးသေဆုံးပြီး ၁၂ ဦးထက်မ
နည်းဒဏ်ရာရ

■သေဆုံး၊ ဒဏ်ရသူတွေထပ်တိုးလာနိုင်​သေး

အောက်တိုဘာ-၃၊၂၀၂၆။ခိုင်မြတ်/People's Spring

စစ်တပ်ကဒီနေ့မနက်အစောပိုင်းမှာရသေ့တောင်မြို့ ပေါ်နဲ့ မြို့အနီးတဝိုက်ကျေးရွာတွေကိုY12 နဲ့ ဗုံးကြဲခဲ့တာကြောင့်ကျောင်းသူတဦးအပါအဝင် ၂ ဦးသေဆုံးပြီး ၁၂ ဦးထက်မနည်း ဒဏ်ရာရခဲ့တယ်လို့ကနဦးသတင်းရရှိပါတယ်။

အောက်တိုဘာလ ၃ ရက်၊မနက်၁နာရီကျော်အချိန်မှာရသေ့တောင်မြို့ပေါ် စိုက်ပျိုးရေးရုံးဝန်းကျင်၊ အရှေ့ တောင်ရပ်ကွက်၊ တောင်ရင်းတန်းရပ်ကွက်၊ ကမ်းနားလမ်းတလျှောက်နေရာတွေနဲ့ မြို့အနီးရှိ ပြားချောင်းကြီး၊ ပြင်ခေါင်ရွာတို့ကိုစစ်တပ်က Y-12 ​လေယာဥ်နဲ့
ဗုံးအလုံးတဆယ်ကျော်ကြဲချခဲ့တာဖြစ်ပါတယ်။

“Y12အသံကိုယ်တိုင်ကကြောက်စရာကောင်းတယ်။တညလုံးမအိပ်နိုင်ဘူး။လယ်ကွင်းတွေမှာ သွားအိပ်သူအိပ် လုပ်နေရတယ်။ ညဆိုရင် လေယာဉ်ကလာပြီ။ နေ့တိုင်းလာပါတယ်အခုရက်ပိုင်း”လို့ ရသေ့တောင်မြို့အနီးနေထိုင်သူတဦးက ပြောပါတယ်

ဗုံးကြဲမှုကြောင့် တောင်ရင်းတန်းရပ်ကွက်မှာ ကျောင်းလာတက်နေတဲ့ အသက် ၁၅ နှစ်အရွယ် ကျောင်းသူ မမိုးမိုးနွယ်နဲ့ ပြားချောင်းကြီးရွာမှ အသက် ၇၀ အရွယ် ဦးအောင်ကျော်သာတို့သေဆုံးခဲ့ပါတယ်။ဒါ့အပြင်မနက် ၁ နာ ရီခွဲလောက်မှာတော့ စစ်တွေမြို့နယ်နဲ့အစပ် ရသေ့တောင်မြို့နယ် အငူမော်ရွာကို ထပ်မံ ဗုံး
ကြဲခဲ့ပြီး အဲဒီရွာမှ ဒေသ ခံ ၃ ဦး ဒဏ်ရာရခဲ့ပါတယ်။

“ချက်ချင်းသေဆုံးတာ၂ ယောက်၊ဒဏ်ရာရတာ ၁၂ ယောက်လို့စာရင်းရထားပါတယ်။ စာရင်းသေချာမလုပ်နိုင်သေးတဲ့အတွက် ထပ်
တိုးတာတွေ ရှိနိုင်သေးတယ်။ဒဏ်ရာပြင်းတဲ့သူတွေကိုလည်း ညတွင်းချင်း ဆေးရုံပို့ထားပါ တယ်” လို့ ရသေ့တောင်ဒေသခံ အုပ်ချုပ်ရေးဌာန ဝန်ထမ်းတဦးက ပြောပါတယ်။

ဒါ့အပြင် စစ်တပ်ဟာအောက်တိုဘာလ ၃ ရက် မနက်အစောပိုင်းကလည်း ပုဏ္ဏားကျွန်းမြို့နယ် အောင်ဖြူပြင်ရွာ ကို ဗုံးကြဲခဲ့တာကြောင့်အဲဒီရွာမှ အရပ်သားပြည်သူ ၂ ဦး ဒဏ်ရာရပြီး နေအိမ်တွေလည်း ပျက်စီးခဲ့ရပါတယ်။

အလားတူ စစ်တပ်ကအောက်တိုဘာ ၁ ရက်နေ့ နေ့လယ်ပိုင်းမှာလည်းကျောက်တော်မြို့နယ် ဇီးချောင်းဆည်အနီးတဝိုက်၊ သကြားစက် ဘုန်းတော်ကြီးကျောင်း၊ ကျောက်ဖြူမြို့နယ် စနဲမြို့အနီးတဝိုက်နဲ့ သံတွဲမြို့ပေါ် အမှတ်(၆)ဗောဓိကုန်းရပ်ကွက်တို့ ကို ဗုံးကြဲခဲ့တာကြောင့် ကျောက်တော်မြို့မှ သံဃာတော် ၁ ပါးနဲ့ သံတွဲမြို့မှ ဒေသခံ ၂ ဦးတို့ ဒဏ်ရာရခဲ့ပါတယ်။

ဒါ့အပြင် စက်တင်ဘာ ၃၀ ရက်နေ့ကလည်း ပေါက်တော၊ ရသေ့တောင်၊ ပုဏ္ဏားကျွန်းမြို့နယ်တို့ ဗုံးကြဲခဲ့တာကြောင့် ၁ ဦးသေဆုံး ပြီး ၁၀ ဦးထက်မနည်း ဒဏ်ရာရပါတယ်။

စစ်တွေတိုက်ပွဲအတွင်း စစ်ကြောင်းလိုက် သေဆုံးပြီး တပ်စခန်းတွေလက်လွှတ်နေရတဲ့ စစ်တပ်ဟာ စစ်တွေနဲ့ ထိ စပ်နေတဲ့ ရသေ့တောင်၊ ပုဏ္ဏားကျွန်း၊ ပေါက်တောမြို့နယ်တို့အပြင် ပြည်သူ​တွေ​နေထိုင်တဲ့ မြို့၊ရွာတွေကို လေကြောင်းကနေ ဗုံးတွေ ဆက်တိုက်ကြဲချတိုက်ခိုက်နေတာဖြစ်ပါတယ်။

ပြီးခဲ့တဲ့ စက်တင်ဘာ ၂၈ ရက်နေ့ကလည်း ကျောက်တော်မြို့ပေါ် အိန္ဒိယစျေးနဲ့ ဂစ္ဆပနဒီတံတားတို့ကို ပေါင်ငါးရာ ဗုံးနှစ်လုံးကြဲချတိုက်ခဲ့တာကြောင့် ကိုယ်ဝန်ဆောင်မိခင်၊ ကလေးငယ်၊ အမျိုးသမီး၊ ရိုဟင်ဂျာတွေအပါအဝင် အပြစ် မဲ့အရပ်သားပြည်သူ ၅၀​ကျော်သေဆုံးပြီး ၆၀ ကျော် ဒဏ်ရာရခဲ့ပါတယ်။

လူထုနွေဦးက စု​ဆောင်းထားတဲ့အချက်အ
လက်တွေအရစက်တင်ဘာ ၄ ရက်နေ့ ကနေ အောက်တိုဘာ ၃ ရက်နေ့မနက်ပိုင်းထိ တစ်လခန့်အတွင်း ရခိုင်ပြည်နယ်မှာ စစ်တပ်ဗုံး
ကြဲလို့ ၊လက်နက်ကြီးနဲ့ပစ်ခတ်လို့သေဆုံးခဲ့တဲ့ပြည်သူ ၆၄ ဦးနဲ့ ထိခိုက်ဏ်ရာရသူ ၁၂၉ ဦးထက်မနည်း ရှိ​နေပြီဖြစ်ပါတယ်။

ရခိုင်ပြည်နယ်၊​ကျောက်​တော်မြို့နယ်က ဘုန်းကြီး​ကျောင်းကို စစ်တပ်ဗုံးကြဲလို့ အပျက်အစီး​တွေကို ​
တွေ့ရစဥ်။
ဓါတ်ပုံ-AA Info Desk

ခမောက်ကြီးမြို့နယ်မှာစစ်ကြောင်းဝင်လာလို့ ထိုင်းဘက်ကို ထွက်ပြေးတဲ့ စက်လှေတိမ်းမှောက်ပြီး စစ်ရှောင်နှစ်ဦးသေဆုံး

​အောက်တိုဘာ-၃၊၂၀၂၆။ဇော်ရမ်း/People's Spring

တနင်္သာရီတိုင်း၊ခမောက်ကြီးမြို့နယ်မှာစစ်
တပ်စစ်ကြောင်း ဝင်လာလို့ကြောက်လန့်ပြီး ထိုင်းနိုင်ငံဖက်ကို ထွက်ပြေးတဲ့ စက်လှေ တိမ်းမှောက်ပြီးဒေ
သခံနှစ်ဦးသေဆုံးသွားတယ်လို့ ကော့သောင်းမြို့နယ်ပြည်သူ့ကာကွယ်ရေးအဖွဲ့ကထုတ်ပြန်ပါတယ်။

ခမောက်ကြီးမြို့နယ်အတွင်းစစ်တပ်တွေ စစ်
ကြောင်းထိုးဝင်ရောက်မှုနဲ့ ပြည်သူတွေကို ဖမ်းဆီးတာတွေ၊ မီးရှို့ဖျက်ဆီးတာတွေနဲ့ ပတ်သက်ပြီးလို့ ကော့သောင်းမြို့နယ်ပြည်သူ့ကာကွယ်ရေးအဖွဲ့ကအောက်တိုဘာလ(၃)
ရက်မှာ ထုတ်ပြန်တာပါ။

ကော့သောင်းတပ်နယ်နဲ့ ခမောက်ကြီးတပ်
နယ်ကနေ စက်တင်ဘာလ ၃ ရက်နေ့ကစပြီး ထွက်လာတဲ့ အင်အား ၁၅၀ခန့်ပါစစ်တပ်စစ်​ကြောင်းဟာ ဒေသတွင်းမှာ အရပ်သားတွေကို ဖမ်းဆီးတာ၊ နေအိမ်တွေကို မီးရှို့ဖျက်ဆီးတာတွေလုပ်နေတယ်လို့ ​ဖော်ပြထားပါတယ်။

ခမောက်ကြီးမြို့နယ်၊အောင်ချမ်းသာကျေး
ရွာ၊လုံးဖောကျေးရွာတို့မှာ ဒေသခံ ၁၃ဦးထက်မနည်းကို ဖမ်းဆီးခဲ့ပြီး စစ်ကြောင်းနဲ့အတူ ခေါ်ဆောင်ထားတယ်လို့ အသိပေးထားပါတယ်။

စက်တင်ဘာလ ၂၇ရက်နေ့မှာလုံးဖောကျေး
ရွာအတွင်း ဝင်လာလို့ဒေသခံ​တွေထွက်ပြေးတိမ်းရှောင်ခဲ့ကြရပြီးထိုင်းနိုင်ငံဘက်သို့ စက်လှေနဲ့ ထွက်ပြေးစဉ် စက်လှေတိမ်းမှောက်လို့ ပြည်သူနှစ်ဦး သေဆုံးခဲ့တယ်လို့ ကော့သောင်းမြို့နယ်ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။ ဖမ်းဆီးခံထားရတဲ့ အရပ်သားတွေနဲ့ပတ်သက်ပြီး နောက်ဆက်တွဲအခြေအနေကိုမသိရသေးပါဘူး။

စစ်တပ်စစ်ကြောင်းကို ပြည်သူ့ကာကွယ်ရေးတပ်ဖွဲ့တွေကလည်းတိုက်ခိုက်နေပါတယ်။စက်တင်ဘာလ ၅ရက်နေ့တက အောင်ချမ်းသာကျေးရွာအနီးမှာ မိုင်းဆွဲတိုက်ခိုက်ခဲ့တဲ့အတွက် စစ်သားလေးဦး သေဆုံးပြီး ၁၀ဦးထက်မနည်းဒဏ်ရာ ရသွားတယ်လို့ လို့ ကော့သောင်းမြို့နယ်ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။

စစ်တပ်ကစစ်ကြောင်းထိုးနေသလိုလူ့အခွင့်
အရေး ချိုးဖောက်မှုတွေ ဆက်လက်ကျူး
လွန်တယ်အတွက်ဒေသခံပြည်သူတွေ စစ်ရေးသတိ၊ စစ်ရေးအသိ အမြဲမပြတ် ရှိကြဖို့လည်း တိုက်တွန်းထားပါတယ်။

တနင်္သာရီတိုင်းအတွင်းလောင်းလုံး၊ ထား
ဝယ်၊ သရက်ချောင်း၊ ရေဖြူ၊ မြိတ်မြို့နယ်တွေမှာထိုင်းနိုင်ငံဖက်က လေဖိအားနည်းရပ်ဝန်းအရှိန်ကြောင့် စက်တင်ဘာလ၂၆ရက်နေ့ကစပြီး ရေဘေးကြုံတွေ့နေတာပါ။ လောင်းလုံးနဲ့ သရက်ချောင်းမြို့ဟာ ရေဘေးနဲ့ မြေပြိုမှုအဆိုးဆုံးကြုံတွေ့နေရပြီး ဒေသခံတွေအတွက် အရေးပေါ်အကူအညီတွေလို
အပ်နေပါတယ်။

ရေဘေးသင့်‌ ဒေသတွေမှာ စစ်ကောင်စီက စစ်ကြောင်းထိုးပြီးအရပ်သားတွေကိုဖမ်းဆီးနေသလို ထားဝယ်မြို့နယ်က လူငယ်တွေကိုလည်း ပေါ်တာစွဲဖမ်းဆီးနေပါတယ်။ဘေးသင့်ဒေသတွေကိုလည်း လေကြောင်းတိုက်
ခိုက်မှုတွေလည်းဆက်တိုက်လုပ်နေပါတယ်။

စက်တင်ဘာလ၃၀ရက်နေ့က ထားဝယ်အရှေ့တောဒေသ ရေဝိုင်းရွာကို လေယာဉ်နဲ့ဗုံးကြဲခဲ့ပြီး အောက်တိုဘာလ၁ရက်နေ့မှာတော့ သ
ရက်ချောင်းမြို့နယ်ထဲကို လေကြောင်းကနေဗုံးကြဲပြီး စက်သေနတ်နဲ့ပါ ပတ်ချာလည်ပစ်ခတ်သွားတယ်လို့ ဒေသခံတွေကပြောပါတယ်။ထားဝယ်ခရိုင်ထဲက ရေဖြူမြို့နယ်နဲ့လောင်းလုံးမြို့နယ်ထဲမှာလည်း မြေပြင်စစ်
ကြောင်းဝင်ရောက်လာတဲ့အတွက် ဒေသခံတွေတိမ်းရှောင်နေကြရတယ်လို့သိရပါတယ်။

ရေဘေးနဲ့ မြေပ်ြိုမှု ဘေးကြုံတွေ့နေတဲ့ ဒေသတွေကို စစ်‌တပ်က ပြည်သူအသွင်ယူပြီး စိမ့်ဝင်နေတဲ့အတွက်လည်း ကယ်ဆယ်ရေးအဖွဲ့အစည်းတွေအနေနဲ့ အလံဖြူထောင်သွားလာခြင်းမပြုကြဖို့ တနင်္သာရီတိုင်းစစ်ဌာနနည်း
ဗျူဟာ(၃၃)က ထုတ်ပြန်ထားပါတယ်။

ဒေသခံတွေ သဘာဝဘေးရင်ဆိုင်နေရချိန်မှာလေကြောင်းတိုက်ခိုက်တဲ့လုပ်ရပ်အပေါ် ကန့်
ကွက်ရှုတ်ချကြောင်းတနင်္သာရီဖက်ဒရယ်ယူ
နစ် ဖော်ဆောင်ရေးကောင်စီကလည်း ထုတ်ပြန်ထားပါတယ်။

အာဏာသိမ်းစစ်တပ်ကစစ်သား​တွေ။
ဓါတ်ပုံ-စစ်​ကောင်စီ