ကျောက်တော်မြို့ စစ်တပ်ဗုံးကြဲမှု ပြည်သူတွေအစုလိုက်သေဆုံးမှုအပေါ် ဝမ်းနည်းကြောင်း ချင်းတပ် CNF ထုတ်ပြန်

အောက်တိုဘာ ၂၊ ၂၀၂၆။ ထားမြတ်/People’s Spring

ရခိုင်ပြည်နယ်၊ ကျောက်တော်မြို့ရှိ အရပ်သားပြည်သူများအပေါ် လေကြောင်းတိုက်ခိုက်ခဲ့တဲ့ အာဏာသိမ်းစစ်တပ်ရဲ့ လုပ်ရပ်ကို ကန့်ကွက်ရှုတ်ချကြောင်း ချင်းအမျိုးသားတပ်ဦး(CNF)က ထုတ်ပြန်ခဲ့ပြီး အသက်ဆုံးရှုံးခဲ့ရတဲ့ ပြည်သူများ၊ မိသားစုဝင်များနဲ့အတူ ဝမ်းနည်းကြေကွဲရကြောင်း ဖော်ပြပါတယ်။

စစ်တပ်က စက်တင်ဘာ ၂၈ရက်မှာ ကျောက်တော်မြို့ကို လေကြောင်းဗုံးကြဲခဲ့ရာ ပြည်သူ ၅၀ သေဆုံးကာ ၆၀ နီးပါး ဒဏ်ရာရခဲ့တာပါ။

သေဆုံးသူတွေထဲမှာ ကလေးငယ်တွေ ကိုယ်ဝန်ဆောင်မိခင်တွေလည်း ပါဝင်ခဲ့ပြီး စစ်တပ်ရဲ့ အခုလို အရပ်သား ပြည်သူအပေါ် ပစ်မှတ်ထား တိုက်ခိုက်မှုဟာ သူရဲဘောကြောင်တဲ့ လုပ်ရပ်ဖြစ်တဲ့အပြင် ရပ်စက်ကြမ်းကြုတ်တဲ့ စစ်ရာဇဝတ်မှုနဲ့ လူသားမျိုးနွယ်အပေါ် ကျူးလွန်တဲ့ အကြမ်းဖက်မှု လုပ်ရပ်ဖြစ်လို့ ပြင်းထန်စွာ ရှုတ်ချကြောင်း CNFက ထုတ်ပြန်ပါတယ်။

“အကြမ်းဖက်စစ်အုပ်စု၏ ဗုံးကြဲတိုက်ခိုက်မှုကြောင့် အသက်ဆုံးရှုံးခဲ့ကြရသော ပြည်သူများ ၏ မိသားစုဝင်များနှင့်ထပ်တူ ဝမ်းနည်းကြေကွဲရပါသည်။ ထိခိုက်ဒါဏ်ရာရရှိသူ ပြည်သူများလည်း အမြန်ဆုံး သက်သာကျန်းမာပါစေကြောင်း ဆုတောင်းမေတ္တာပို့ပါသည်” လို့ ဖော်ပြထားပါတယ်။

ချင်းအမျိုးသားတပ်ဦး(CNF)အနေနဲ့ စစ်အာဏာရှင်စနစ် အမြစ်ပြုတ်ရေးနဲ့ ဆင်နွှဲနေတဲ့ ပြည်သူ့တော်လှန်ရေး အောင်မြင်ရေးအတွက် ဘုံရည်မှန်းချက်တူတဲ့ တော်လှန်ရေးအင်အားစုတွေနဲ့ လက်တွဲပြီး ဆက်လက်တိုက်ပွဲဝင်သွားမယ်လို့ ထုတ်ပြန်ပါတယ်။

ပြည်သူတွေ အစုလိုက်၊အပြုံလိုက်သေဆုံးထိခိုက်မှု ဖြစ်ခဲ့တဲ့ ကျောက်တော်မြို့ စစ်တပ်လေကြောင်းဗုံးကြဲမှုကို ပြည်တွင်း၊ ပြည်ပ အဖွဲ့အစည်းများက ကန့်ကွက်ရှုတ်ချကြောင်း ဖော်ပြနေပေမဲ့ စစ်အုပ်စုဟာ ကျောက်တော်မြို့ အပါအဝင် အာရက္ခတပ်တော်(AA) ထိန်းချုပ်ထားတဲ့ ရက္ခိုင်ပြည်နယ်က မြို့နယ်တွေကို လေကြောင်းဗုံးကြဲတာတွေ ဆက်လက်ပြုလုပ်နေဆဲပါ။

စက်တင်ဘာ ၃၀ရက်နဲ့ အောက်တိုဘာ ၁ရက်နေ့တွေမှာ စစ်တပ်ဟာ AA ထိန်းချုပ်ထားတဲ့ ရသေ့တောင်၊ ကျောက်တော်၊ ပုဏ္ဏားကျွန်း၊ ပေါက်တော၊ သံတွဲမြို့တွေက စစ်ရေးပစ်မှတ်မဟုတ်တဲ့ နေရာတွေကို တိုက်လေယာဉ်အုပ်နဲ့ ဗုံးကြဲတိုက်ခိုက်နေကြောင်း AAက ထုတ်ပြန်ထားပါတယ်။

ဒါ့အပြင် စစ်တပ်ဟာ ရေကြီး၊ မြေပြိုမှုတွေ ဖြစ်လို့ ပြည်သူသေဆုံးထိခိုက်မှုတွေ ရှိခဲ့တဲ့ တနင်္သာရီတိုင်း ထားဝယ်မြို့နယ်၊ သရက်ချောင်းမြို့နယ်တွေက ကျေးရွာတွေကို လေကြောင်းဗုံးကြဲတိုက်ခိုက်တာတွေလည်း လုပ်ဆောင်ခဲ့ပါတယ်။ သဘာ၀ဘေးသင့် ပြည်သူတွေကို ကူညီတာမရှိတဲ့အပြင် လေကြောင်းဗုံးကြဲတိုက်ခိုက်တဲ့ စစ်ကောင်စီတပ်ရဲ့ လုပ်ရပ်ဟာ လူမဆန်တဲ့ လုပ်ရပ်ဖြစ်တယ်လို့ တနင်္သာရီတိုင်းအခြေစိုက် တော်လှန်ရေးအင်အားစုတွေက ထုတ်ပြန် ခဲ့ပါတယ်။

(ကျောက်တော်မြို့ကို စစ်တပ်ဗုံးကြဲတိုက်ခိုက်အပြီး မြင်ကွင်း။ ဓာတ်ပုံ - AA)

လောင်းလုံးမှာရေဘေးကူညီနေတဲ့လူမှုကယ်
ဆယ်ရေးအဖွဲ့ကို စစ်တပ်ဖမ်းဆီးထားဟု​ဒေသခံ​တွေ​ပြော

​အောက်တိုဘာ-၂၊၂၀၂၆။ရွှေပြည်စိုး/
People's Spring

ရေဘေးနဲ့မြေပ်ြိမှုဘေးကြုံတွေ့နေတဲ့ လောင်း
လုံမြို့နယ်ကျောက်နီမော်ရွာကိုသွားရောက်
တဲ့လူမှုကယ်ဆယ်ရေးအဖွဲ့တစ်ဖွဲ့ကိုစစ်တပ်ကဖမ်းဆီးထားတယ်လို့သတင်းရရှိပါတယ်။

စက်လှေနဲ့သွားရောက်တဲ့ကူညီကယ်ဆယ်ရေးအဖွဲ့ကိုထားဝယ်မြစ်ဝနဲ့ဆက်စပ်တဲ့နေရာမှာမနက်၁၀နာရီခွဲခန့်ကဖမ်းဆီးသွားတာလို့ လောင်းလုံးမြို့ခံတစ်ဦးကပြောပါတယ်။

"ဖမ်းသွားတာဟုတ်တယ်။ကျွန်မတို့ကစိတ်ပူနေပြီ။ကျောက်နီမော်မှာအကူအညီတွေအ
ရမ်းလိုလို့ သွားကြတာ။အခုဆို တခြားလူမူရေးအဖွဲ့တွေလည်းနောက်ကြောင်းကိုပြန်ခေါက်နေရတယ်"လို့ဒေသခံသတင်းရင်းမြစ်ကပြောပါတယ်။

ဖမ်းဆီးခံရတဲ့လူမှုရေးအဖွဲ့အမည်နဲ့ အရေ
အတွက်ကိုလတ်တလောမှာပြောပြလိုခြင်းမရှိသေးဘူးလို့၎င်းကပြောပါတယ်။စစ်ကောင်
စီကသရက်ချောင်းမြို့နယ်ထဲမှာလည်းလူမှုကူညီအဖွဲ့တွေကို ဖိအားပေးစစ်ဆေးနေလို့ နောက်ပြန်လှည့်ရတဲ့အဖွဲ့တွေရှိတယ်လို့ဒေသ
ခံတွေကပြောပါတယ်။လတ်တ​လောမှာ ဖမ်း
ဆီးခံထားရတဲ့အဖွဲ့နဲ့ ပတ်သက်တဲ့အချက်အ
လက်အ​သေးစိပ်ကို​တော့မသိရ​သေးပါဘူး။

တနင်္သာရီတိုင်းစစ်ဌာန ၊နည်းဗျူဟာ(၃၃)၊ဗျူ
ဟာမှုးစောဒါးကိုကလည်း "တောကျဲဘက်က​​နေဆင်းပြီးလောင်းလုံမြို့နယ်၊ကျောက်နီ​မော်
ဖက်​လှေနဲ့သွားတဲ့ကယ်ဆယ်​ရေးအဖွဲ့ကို​ရေ
တပ်စစ်သ​​​ဘော်မှပစ်ခတ်ပြီးကယ်ဆယ်​ရေးအဖွဲ့ကိုဖမ်းဆီးထားတယ် .2.9.2026 ။
11:00 am"လို့ လူမှုကွန်ရက်မှာရေးထားထားပါတယ်။

တနင်္သာရီတိုင်းအတွင်းထိုင်းနိုင်ငံဖက်ကလေ
ဖိအားနည်းရပ်ဝန်းအရှိန်ကြောင့်မိုးကြီးပြီး စက်တင်ဘာလ၂၆ရက်နေ့ကစတင်ကာဘေး
ကြုံတွေ့ခဲ့တာပါ။လောင်းလုံးနဲ့သရက်ချောင်းမြို့ဟာရေဘေးနဲ့မြေပြိုမှုအဆိုးဆုံးကြုံတွေ့နေရပါတယ်။တောင်ပြိုမှုနဲ့ ရေကြီးရေလျှံမှုကြောင့်ထားဝယ်ဒေသတစ်ခုလုံးမှာစုစုပေါင်း
၃၂ ဦးသေဆုံးကြောင်းအတည်ပြုထားနိုင်ပြီးလူနေအိမ်နဲ့ဘာသာရေးအဆောက်အဦးတွေ
အပါအဝင်အဆောက်အဦးပေါင်း(၃၀၀)ဝန်း
ကျင်၊ငါးဖမ်းလှေအစီးရေ (၅၀)ဝန်းကျင်ပျက်
စီးဆုံးရှုံးခဲ့ရတယ်လို့ ထားဝယ်အမျိုးသားအ
ဖွဲ့ချုပ်ကထုတ်ပြန်ထားပါတယ်။အပျက်အစီး
စာရင်းဆက်လက်တိုးလာနိုင်ပြီးဒေသခံတွေ
အတွက်အကူအညီတွေလိုအပ်နေတယ်လို့ ထုတ်ပြန်ထားပါတယ်။

လက်ရှိရေဘေးကြုံတဲ့ဒေသတွေဟာ စစ်ကောင်စီက မြို့ပေါ်တွေကိုသာထိန်းချုပ်ထားနိုင်ပြီးပတ်ဝန်းကျင်ကျေးရွာတွေကိုတော်လှန်
ရေးတပ်ဖွဲ့တွေကထိန်းချုပ်ထားတာဖြစ်ပါတယ်။

ရေဘေးနဲ့ မြေပ်ြိမှု ဘေးကြုံတွေ့နေတဲ့ ဒေသတွေကို စစ်‌ကောင်စီတပ်တွေကပြည်သူအ
သွင်ယူပြီး စိမ့်ဝင်နေတဲ့အတွက်ကယ်ဆယ်ရေးအဖွဲ့အစည်းတွေအနေနဲ့ အလံဖြူထောင်သွားလာခြင်းမပြုကြဖို့ တနင်္သာရီတိုင်းစစ်ဌာနနည်းဗျူဟာ(၃၃)က အောက်တိုဘာလ
၁ ရက်နေ့မှာထုတ်ပြန်ထားပါတယ်။ထားဝယ်ခရိုင်၊လောင်းလုံးမြို့နယ်နဲ့ သရက်ချောင်းမြို့နယ်အတွင်းရှိ ဘေးသင့်ဒေသတွေဆီ အနယ်နယ် အရပ်ရပ်မှ ပရဟိတအဖွဲ့တွေ လူမှုကယ်ဆယ်ရေး အဖွဲ့တွေနဲ့ ထောက်ပံ့မှုပြု
လုပ်ပေးနေတဲ့ ပြည်သူ့အဖွဲ့အစည်းတွေက ကုန်းလမ်း၊ ရေလမ်းနဲ့ ဝင်ရောက်ကူညီစောင့်
ရှောက်ပေးနေကြောင်းနဲ့ လာရောက်တဲ့ ကူညီကယ်ဆယ်ရေးအဖွဲ့တွေကို အလံဖြူထောင်ပြီးသွားလာကြဖို့စစ်ကောင်စီကဖိအားပေးထားပြီးပြည်သူအသွင်ယူစိမ့်ဝင်နေတယ်လို့ ထုတ်ပြန်ချက်မှာဖော်ပြထားပါတယ်။

လက်ရှိဒေသတွင်းလုံခြုံရေးအခြေအနေတွေကြောင့်ဘေးသင့်ပြည်သူတွေကိုကူညီကယ်
ဆယ်ရေးမှာအခက်အခဲတွေကြုံတွေ့နေတယ်လို့ လူမှုကူညီ ရေးအဖွဲ့အချို့ကပြောပါတယ်။

လောင်းလုံမြို့နယ် ၊​ ကျောက်​နီ​မော်ရွာမှာ စက်တင်ဘာ လကုန်ပိုင်းက​ရေကြီးစဥ်။
ဓါတ်ပုံ-​ဒေသခံ

ရှေးဟောင်းမြို့တော်ပုဂံမှာ မီးပုံးပျံလွှတ်တင်မှု အန္တရာယ်ရှိကြောင်း ပညာရှ​င်​နဲ့ ​ဒေသခံ​တွေ​ပြော

အောက်တိုဘာ ၂၊ ၂၀၂၆။ဇေအောင်/People's Spring

ယူနက်စကိုစာရင်းဝင် ‌‌ရှေးဟောင်းမြို့တော်ပုဂံဒေသမှာ လာမယ့်သီတင်းကျွတ်ကာလ မီး
ပုံးပျံ ၃၀၀၀ဝ လွှတ်မယ့်အစီအစဥ်ဟာ ရှေး
ဟောင်းအမွေအနှစ်တွေအတွက်အန္တရာယ်
ရှိနေကြောင်း ရှေးဟောင်းအ​မွေအနှစ်ထိန်း
သိမ်း​ရေးပညာရှင်နဲ့ ​ဒေသခံ​တွေက ဝေဖန်ထားပါတယ်။

စစ်တပ်ရဲ့ ပေါ်တာဆွဲဖမ်းဆီးမှုတွေ၊ ဓားပြတိုက် လူပြန်ပေးဆွဲမှုတွေကြောင့် ခရီးသွား သိသိသာသာလျော့ကျသွားတဲ့ ပုဂံဒေသမှာ ခရီးသွားတွေကို ဆွဲဆောင်တဲ့အနေနဲ့ လာမယ့် သီတင်းကျွတ်ကာလမှာ မီးပုံးပျံအလုံးသုံး​သောင်းလွှတ်တင်ဖို့ စီစဥ်​နေပြီး အဲဒီအ​ပေါ် ​ဒေသခံ​အချို့ကလည်း​ဝေဖန်​နေကြပါတယ်။

ပုဂံမှာ မီးပုံးပျံ ၃၀၀၀၀ လွှတ်တင်တာဟာ များပြားတဲ့ ပမာဏတစ်ခုဖြစ်ပြီး ဒေသအတွက် မီးဘေးလည်း စိုးရိမ်ရကြောင်း၊ ဒါ့အပြင် စစ်တပ်ရဲ့ ပေါ်တာဆွဲ ဖမ်းဆီးမှုအတွက် ထောင်ချောက်လည်း ဖြစ်နိုင်တာကြောင့် လူငယ်တွေ မသွားကြဖို့ ညောင်ဦးမြို့နယ် လူငယ်ခေါင်းဆောင် ကိုမျိုးမြတ်ကျော်က သတိပေးပါတယ်။

"ခေတ်ကာလ လူငယ်လူရွယ် ကိုယ့်ကြောင့် စကစ လက်ထဲ ခင်ဗျားကိုယ်တိုင် အလိုတူ
အလိုပါ ထည့်ချင်ကြတာလား လို့ မေးခွန်း
ထုတ်ချင်ပါတယ်။ အခု အုပ်ချုပ်နေတဲ့ မင်းဆိုးလား ကောင်းလား သိဖို့လိုမယ်။ လူငယ်တွေ ကို ခင်ဗျားတို့ကြောင့် ‌အနာဂတ် ရည်
မှန်းချက် တွေ မပျက်စီးစေချင်ပါဘူး ။ပွဲဖြစ်ရင် နောင်ဖြစ်လာမယ့်အရာတွေ ဘယ်သူမှ တာဝန်ယူမှာမဟုတ် ကိုယ်တိုင်ခံရမှာ။ ဖြစ်သွားရင်လည်း ဝမ်းနည်းပူဆွေးဖြစ်ကြရမှာ"လို့ ကိုမျိူးမြတ်ကျော်က ပြောပါတယ်။

ပုဂံဒေသဟာ ပူပြင်းခြောက်သွေ့တဲ့ဒေသဖြစ်ပြီး ရှေးဟောင်းစေတီပုထိုးတွေ၊ ထန်းရွက်မိုး ထန်းရွက်ကာ တဲအိမ်တွေ၊ ဝါးကပ်ထရံအိမ်တွေများတဲ့အတွက် မီးပုံးပျံ ပျက်ကျလာခဲ့ရင် မီးလောင်မှာကို စိုးရိမ်နေရတယ်လို့ ဒေ
သခံတွေကတညီတညွတ်တည်းပြောပါတယ်။

"မီးလောင်မှာကို စိုးရိမ်တာ။ ပုဂံက ခြောက်
သွေ့တဲ့ရာသီဥတုမို့လို့"လို့ ဒေသခံတစ်ဦးက ပြောပါတယ်။

အောက်တိုဘာ ၁ ရက် ညပိုင်းကလည်း ပုဂံမြို့ မြင်းကပါရွာအတွင်း မီးပုံးပျံပျက်ကျကာ ထနောင်းပင်ပေါ် လောင်ကျွမ်းခဲ့တယ်လို့ ဒေသခံတွေက ပြောပါတယ်။

Outstanding Universal Value ရှိကြောင်း ကမ္ဘာကအသိအမှတ်ပြုထားတဲ့ ပုဂံယဉ်ကျေးမှုလွင်ပြင်ကြီးမှာ မြန်မာနိုင်ငံရဲ့ မူလအစ စေတီပုထိုးဘုရားကျောင်းကန်များ၊ မြေပေါ်မြေအောက်အမွေအနှစ်များ၊ သစ်သား၊ဝါး၊ ကျူထရံ အဆောက်အအုံများ၊ သစ်ပင်များ၊ ကောက်ပဲသီးနှံများ၊ ချုံနွယ်ပိတ်ပေါင်းများ၊ လောင်စာဆီများ တစ်စုတစ်ဝေးတည်းရှိနေသောနေရာဖြစ်ကြောင်းနဲ့ အရေးပေါ်လာပါက မီးသတ်ကားတွေတောင် မဝင်နိုင်တဲ့​ နေရာတွေ အများအပြား ရှိနေကြောင်း​ရှေး​ဟောင်းအ​မွေအနှစ်ထိန်းသိမ်း​ရေးပညာရှင်ဒေါ်ဥမ္မာမျိုးက လူမှုကွန်ရက်မှာ ရေးသားထားပါတယ်။

"ရန်သူမျိုးငါးပါးထဲမှာတစ်ပါးအပါအဝင်ဖြစ်တဲ့မီး နဲ့မှ အမွေအနှစ်ဒေသကိုအလှဆင်ချင်သူများ၊ ပျော်ရွှင်ချင်သူများ၊ ငွေရှာချင်သူ
များကြောင့် အမွေအနှစ်ရော လူများပါ ထိခိုက်ပျက်စီးနိုင်သည့်ဖြစ်ပေါ်လာနိုင်သော အန္တရာယ်များကိုလွယ်ကူစွာတွေးဆနိုင်ပါတယ်"လို့ ဒေါ်ဥမ္မာမျိုးက ရေးသားထားပါတယ်။

ဒေါ်ဥမ္မာမျိုးကို လူထုနွေဦးက ဆက်​သွယ်မေးမြန်းနိုင်ဖို့ ကြိုးစား​နေ​ပေမယ့်ဆက်သွယ်လို့မရ​သေးပါဘူး။

ပုဂံဒေသကို ၂၀၁၉ ဇူလိုင်က အဇာဘိုင်ဂျန်နိုင်ငံမှာ ပြုလုပ်ခဲ့တဲ့ ယူနက်စကိုရဲ့ ကမ္ဘာ့အမွေအနှစ် ကော်မတီအစည်းအဝေးမှာ ကမ္ဘာ့အမွေအနှစ်စာရင်းအဖြစ် ထည့်သွင်းသတ်မှတ်ခဲ့တာ ဖြစ်ပါတယ်။

ပုဂံရဲ့ တဖက်ကမ်း ပခုက္ကူမြို့နယ်၊ မြစ်ခြေဒေသမှာလည်း ပြီးခဲ့တဲ့ ဇွန်လဆန်းက ပြည်သူ ၄၀ ကျော် ဖမ်းဆီးသတ်ဖြတ်ခံခဲ့ရဖူးပြီး နေအိမ်ရာချီ မီးရှို့ဖျက်ဆီးခံလိုက်ရပါတယ်။ ဇူလိုင် ၁၀ ရက်ကလည်း ညောင်ဦးနဲ့ နယ်ချင်းဆက်နေတဲ့ ချောက်မြို့နယ်မှာ တော်လှန်ရေးရဲဘော် ၂၃ ဦး သတ်ဖြတ်ခံခဲ့ရပါတယ်။ ညောင်ဦးမြို့နယ်မှာ စစ်ရှောင်တွေလည်း ရှိနေပါတယ်။

(ရှေးဟောင်းမြို့တော်ပုဂံမှာ မီးပုံးပျံ လွှတ်တင်ရန် လေ့ကျင့်နေကြစဉ်။ ဓာတ်ပုံ - Naingtun Win/Fb)

ရန်ကုန်က ကွန်ဒို ကြိုပွိုင့်ပြသာနာတာဝန်ယူ​ဖြေရှင်း​ပေးမည့်သူမရှိဖြစ်​နေ

အောက်တိုဘာ-၂၊၂၀၂၆။ဇော်၀င်း /People's Spring

ဒေါ်လာတစ်သန်း၀န်းကျင်တန်တဲ့ အခန်းတွေ အပါအ၀င် ရန်ကုန်မြို့က ကွန်ဒိုတွေမှာ ကြိုပွိုင့် ၀ယ်ယူထားသူတွေ အခန်းရဖို့ မရေမရာဖြစ်နေပြီးတာဝန်ယူ၊တာဝန်ခံကာဖြေရှင်းပေမယ့် သူမရှိဖြစ်နေတယ်လို့ နစ်နာသူတွေက လူထုနွေဦးကို ပြောပါတယ်။

လတ်တလောလူထုနွေဦးက ရရှိထားတဲ့အချက်အလက်တွေအရ ရန်ကုန်မြို့က နာမည်ကြီး ကွန်ဒိုတွေ ဖြစ်တဲ့ ရန်ကင်းမြို့နယ်၊ ကမ္ဘာအေးဘုရားလမ်းနဲ့ ကန်ဘဲ့လမ်းထောင့်က The Central Tower 8 ၊ သာကေတမြို့နယ်၊ ရှုခင်းသာမြို့ပတ်လမ်းအနီးက Emerald Bay အဆင့်မြင့်ကွန်ဒိုမီနီယံစီမံကိန်းက အခန်းတွေ နဲ့ အလုံမြို့နယ်က The Park Projectကွန်ဒိုတွေဟာ ဆောက်လုပ်နိုင်ခြင်းမရှိသေးဘဲ ကြိုပွိုင့်၀ယ်ယူထားမိသူတွေဆီက ငွေတောင်းခံတာတွေဆက်ရှိနေတယ်လို့ဝယ်ယူထားသူ​​တွေက​ပြောပါတယ်။

"အင်လျား view ပါတဲ့အခန်းတွေက အနည်းဆုံးဒေါ်လာလေးသိန်းကနေဒေါ်လာတစ်သန်းထိရှိတယ်။နောက်ပြီးကြိုပွိုင့်ပေးရတဲ့လစဉ် ကြေးကလည်းအပြင်ဒေါ်လာပေါက်ဈေး(မြန်မာငွေလဲနှုန်းအတိုင်း)သွင်းရတယ်။ နိုင်ငံခြားသားတွေလည်းပါတယ်။သူတို့ဆိုရင်လည်းတရားစွဲထားတာတွေပါ ရှိတယ်။နစ်နာသူ ၁၀၀ ကျော် ကျော်လောက်ရှိတယ်။‌ရှေ့မှာသွင်းထားတဲ့ငွေတွေဆုံးမှာစိုးလို့ ငွေဆက်သွင်းနေတဲ့လူတစ်စုက သပ်သပ်ရှိနေသေးတယ်။ကျွန်တော်ဆို ၂၀၂၂ ကတည်းကနေ အခုချိန်ထိ အခန်းခရဲ့ ၆၀ ရာခိုင်နှုန်းအထိ ပေးသွင်းပြီးပြီ"လို့ The Central Tower 8မှာ ကြိုပွိုင့်၀ယ်ယူထားတဲ့ အမျိုးသားတစ်ဦးက သူရဲ့‌ဖြစ်စဉ်ကို ရှင်းပြပါတယ်။

ဒါ့အပြင် စက်တင်ဘာ ၃၀ ရက်က The Central Tower 8 ရုံးခန်းကို ကြိုပွိုင့်၀ယ်ယူထားသူ‌တွေစုပြီး သွားရောက်မေးမြန်းကာ ဖြေရှင်းပေးဖို့တောင်းဆိုမှုကိုလည်း ကုမ္ပဏီဘက်က လျစ်လျူရှုခဲ့တယ်လို့သူကဆက်​​ပြောပါတယ်။

"ထွက်လည်းမတွေ့ဘူး။ဘာမှလည်းမလုပ်ပေးဘူး။ဆောက်လုပ်ရေးဘယ်နေ့ပြီးမလဲ အခန်းဘယ်တော့အပ်မလဲ ဆိုတာ သူတို့တွေတောင် မသိတဲ့ အခြေအနေ"လို့ အထက်ပါအမျိုးသားကဆက်ပြောပါတယ်။

ဖြစ်စဉ်နဲ့ပတ်သက်ပြီး The Central Tower 8 ကိုတည်ဆောက်တဲ့ တရုတ်နိုင်ငံသား အိမ်ခြံမြေကျွမ်းကျင်သူ စတီဖင် ဆိုသူပိုင်တဲ့ Marga Group ရဲ့ Marga Land mark Development ကုမ္ပဏီကို လူထုနွေဦးကသုံးကြိမ်ထက်မနည်းဆက်သွယ်ခဲ့ပေမယ့် အကြောင်းပြန်တာမရှိခဲ့ပါဘူး။

လက်ရှိမှာ စရံငွေပေးသွင်းထားတဲ့ကွန်ဒိုအခန်းတွေနဲ့ပတ်သက်လို့ ဥပဒေကြောင်းအရ အကာအကွယ်ဖြစ်နိုင်မယ့် သတင်းစာတွေထဲ အသိပေးကြေညာထားပြီး ‌ဆောက်လုပ်မယ့် ကုမ္ပဏီဘက်က တဖက်သတ် စာချုပ်ဖျက်သိမ်းတာ၊ ထပ်ဆင့်ရောင်းချတာ တွေ မရှိအောင် တားမြစ်ကန့်ကွက်တာမျိုးသာ လုပ်နိုင်တယ်လို့ ကြိုပွိုင့်၀ယ်ယူထားသူ‌တချို့က ဆိုပါတယ်။

"တရားရုံးတွေမှာ တရားစွဲဆိုထားတာလည်း ဘာမှမထူးဘူး။ဌာနဆိုင်ရာတွေစာပို့ထားတာလည်းအကြောင်းပြန်တာမရှိသေးဘူး"လို့ The Park Project ကွန်ဒိုမှာ အခန်းတခန်းငွေကြိုသွင်း၀ယ်ယူထားတဲ့ အမျိုးသမီးတစ်ဦးက ပြောပါတယ်။

အခုဖြစ်စဉ်တွေက စီးပွားရေးအသိုက်အ၀န်းကို ရိုက်ခတ်နိုင်ပြီး ဆောက်လုပ်ရေးနဲ့ အိမ်‌ခြံမြေလောကရဲ့နာတာရှည်ရောဂါဖြစ်ကာ စားသုံးသူ(၀ယ်ယူသူ)အကျိုးစီးပွားကို ကာကွယ်ဖို့ အစီအမံတွေ အရေးပေါ်လိုအပ်နေတဲ့ အခြေအနေဖြစ်တယ်လို့ စီးပွားရေးအကြံပေး တစ်ဦးကသုံးသပ်​ပြောကြားပါတယ်။

"ကွန်ဒိုတိုက်ခန်းတွေကို မဆောက်လုပ်မီ ကြိုပွိုင့်စနစ်နဲ့ ကြိုတင်ရောင်းချတာဟာ developer တွေအတွက် ဆောက်လုပ်ရေးအရင်းအနှီးလွယ်ကူစွာရရှိစေသလို၊ဝယ်သူတွေအတွက်လည်းဈေးနှုန်းသက်သာစွာ ရွေးချယ် ဝယ်ယူခွင့်ရစေတဲ့ အခွင့်အရေးတစ်ခု ဖြစ်ပါတယ်။ဒါပေမဲ့မြေပြင်မှာ အဆောက်အအုံအမှန်တကယ်မပေါ်ပေါက်လာခင် စာရွက်ပေါ်က အစီအမံကိုပဲယုံပြီး ငွေကြိုပေးရတာဖြစ်တဲ့အတွက် ပရောဂျက်ရပ်တန့်သွားတာ၊ ဆောက်လက်စတန်းလန်းနဲ့ developer ဒေဝါလီခံသွားတာ၊ အချိန်မီ မအပ်နှံနိုင်တာနဲ့ ဝယ်သူဆီကရတဲ့ငွေကို အခြားစီမံကိန်းတွေမှာ လှည့်သုံးလိုက်တာစတဲ့ အန္တရာယ်ကြီးမားတဲ့ ငွေကြေးဆုံးရှုံးမှုတွေနဲ့ ကြုံတွေ့ရတတ်ပါတယ်"လို့ သူက ပြောပါတယ်။

ဒါကြောင့် ကွန်ဒိုကြိုပွိုင့်စနစ်တွင် ဝယ်ယူသူတွေအကျိုးစီးပွားကို ကာကွယ်ဖို့အတွက် တည်ဆောက်မယ့်(developer )ရဲ့နာမည်ဂုဏ် သတင်းတစ်ခုတည်းအပေါ် ယုံကြည်ရုံနဲ့ မလုံလောက်ဘဲ ငွေကြေးကို သီးသန့်အကောင့်ထဲထိန်းချုပ်ထားတာ၊ဆောက်လုပ်မှုအဆင့်အလိုက်သာ ထုတ်ယူစေတာ နဲ့ တတိယအဖွဲ့အစည်း (ဘဏ်/အာမခံ) ရဲ့ တာဝန်ခံမှု ထားရှိတဲ့ငွေကြေးနစ်နာမှု ကင်းဝေးစေမယ့်စနစ်ဖြစ်ထွန်းလာဖို့ သူက တိုက်တွန်းပါတယ်။

တဖက်မှာလည်း စစ်တပ်အာဏာသိမ်းပြီး​နောက်ပိုင်းပြည်တွင်းဆောက်လုပ်ရေးလောက အကျပ်အတည်းတွေ့ နေပါတယ်။ စစ်တပ်ကပြည်ပက ဆောက်လုပ်ရေးပစ္စည်းတင်သွင်းခွင့်တားမြစ်ထားတာနဲ့ ငွေကြေးဖောင်းပွတာ​ကြောင့် ​ဆောက်လုပ်​ရေးသုံးပစ္စည်း​တွေ ​ဈေးကြီးကုန်သလို ၊စစ်မှုထမ်းစုဆောင်းမှုကြောင့်လုပ်သားရှားပါးတာတွေကြောင့်ဆောက်လုပ်ရေးလုပ်ငန်း​တွေဟာ ကြိုပွိုင့်နဲ့​ရောင်းထားတဲ့​ဈေးနဲ့ မ​ရောင်းနိုင်​တော့နဲ့အ​ခြေအ​နေ ကြုံ​နေကြတယ်လို့ လုပ်ငန်းရှင်တချို့ကပြောပါတယ်။

"အိမ်ဆောက်ပစ္စည်းရဲ့အခြေခံဖြစ်တဲ့ သံချောင်း တွေသွင်းခွင့်မရတော့ဘူး။အရင် တစ်တန် ၁၆ သိန်းက အခု သိန်း ၆၀ ဖြစ်နေတယ်။ဒါကြောင့် အခုလိုအချိန်မှ သွင်းကုန်ပါမစ်တွေ ခက်ခဲတာ နဲ့ ဈေးကွက်မှာပစ္စည်းတွေ၀ယ်မရတာ၊ရှားပါးတာ ကြုံနေရတယ်။အဲဒီပြဿနာတွေအပြင် လုပ်သားအင်အားထုရှားပါးနေတာကလည်း ‌ဆောက်လုပ်ရေးလောက က ပိုဆိုးရွာလာတယ်"လို့ ဆောက်လုပ်ရေးလုပ်ငန်းရှင်တစ်ဦးက ပြောပါတယ်။

ဒါကြောင့် ​ဆောက်လုပ်​ရေးကုမ္ပဏီ​တွေ ဆက်မလုပ်နိုင်​တော့ဘဲ ရပ်နားသွားတာ​တွေရှိပါတယ်။ စက်တင်ဘာလထဲမှာပဲ ဆောက်လုပ်ရေးကုမ္ပဏီသုံးခုထက်မနည်းစာရင်းရှင်းလင်းဖျက်သိမ်းကြောင်းကြေညာခဲ့သလို ဆောက်လုပ်ရေးလောကဟာ ရေရှည် ပိုဆိုးလာနိုင်တယ်လို့ လုပ်ငန်းရှင်​တွေက ​ပြောပေးပါတယ်။

စစ်တပ်အာဏာသိမ်းမှုကြောင့်ပြည်ပရင်းနှီးမြှပ်နှံမှုနည်းပါးတာ၊ပြည်ပချေးငွေမရတာ၊ကုန်သွယ်ရေးကျဆင်းတာ စတာတွေကြောင့် စစ်တပ်က နိုင်ငံခြားငွေနည်းပါးတာကိုအကြောင်းပြပြီးပြည်ပကကုန်ပစ္စည်းတင်သွင်းမှုတွေအားလုံးကို တင်းကြပ်ကန့်သတ်ထားတာဖြစ်ပါတယ်။စားသောက်ကုန်၊ဆေးဝါးကအစ ဆောက်လုပ်ရေးသုံးပစ္စည်းတွေကိုပါ ကန့်သတ်တားမြစ်နေတာဖြစ်ပါတယ်။

ရန်ကုန်မြို့မှာ စစ်တပ်အာဏာမသိမ်းခင် ၂၀၂၁ ဇန်နဝါရီလကုန်မှာ ဘီလပ်မြေတစ်အိပ် ၆၀၀၀ ကျပ်သာရှိပေမယ့် အခုအခါ သုံးဆကျော်ဈေးတက်သွားပြီ တစ်အိတ် ၂၀၀၀၀ ကျော်ရှိနေပြီဖြစ်ပါတယ် ။နယ်တွေမှာတော့ ဈေးနှုန်းကပိုကြီးပါတယ် ။

အာဏာသိမ်းစစ်တပ်လက်အောက်မှာ ပြည်သူတွေဟာ ဘဏ်တွေမှာ ငွေအပ်ထားရတာကိုမယုံကြည်တဲ့အပြင် ၊ငွေကြေးဖောင်းပွမှုကြောင့် ငွေသားအနေနဲ့မထားချင်ကြဘဲ ၊အိမ်ခြံမြေဝယ်ယူစုဆောင်းသူတွေရှိတဲ့အတွက် ဝယ်လိုအားကရှိနေတယ်လို့စုံစမ်းသိရပါတယ်။

ဒါ့အပြင် အခုနာက်ပိုင်း ပြည်တွင်းမှာ ပိုမိုများပြားလာတဲ့ ကျားဖြန့်လုပ်ငန်း(အွန်လိုင်းငွေလိမ်လုပ်ငန်း)တွေကလည်း အိမ်ခြံမြေဝယ်ယူပြီး တရားမဝင်ရတဲ့ငွေ(ငွေမည်း)ကို တရားဝင်ဖြစ်အောင်(ငွေဖြူဖြစ်အောင်)အိမ်ခြံမြေဝယ်ယူတာတွေရှိတယ်လို့ လုပ်ငန်းရှင်အချို့ကပြောပါတယ် ။

ဒါ့အပြင် ရန်ကုန်မြို့ဆောက်လုပ်ရေလောကမှာ ရပ်ကွက်တွေထဲမှာ ကန်ထရိုက်တာတွေ၊စစ်တပ်ခန့်အုပ်ချုပ်ရေးမှူးတွေ ၊ရန်ကုန်စည်ပင် ယာအုံက အကျင့်ပျက်သူတွေပေါင်းပြီး အများပြည်သူပိုင်မြေတွေမှာရော ၊ ပုဂ္ဂလိကပိုင်မြေတွေပေါ်မှာရော ကန်ထရိုက်တိုက်တွေကြိုပွိုင့်နဲ့ ရောင်းပြီး ဆောက်လုပ်နေကြတာမှာ အချင်းချင်းပြန်တိုင်တဲ့အတွက် စစ်တပ်လက် အောက်ခံ စရဖ နဲ့ စစစ တို့ကပါ လိုက်စစ်ပြီး ဆောက်ပြီးတိုက်တွေကို တရာမဝင်ဆောက်တယ်ဆိုပြီး နေထိုင်ခွင့်ချမပေးဘဲ ပါဝင်သူတွေကို ဖမ်းဆီးစစ်ဆေးတဲ့ အရှုပ်အထွေးတွေလည်းဖြစ်ပွားနေပါတယ် ။

ကျောက်တော်မြို့ကို စစ်တပ်က လေယာဉ် ၈စီးနဲ့ ထပ်မံ ဗုံးကြဲ

လေကြောင်းတိုက်ခိုက်မှု ဆက်လုပ်လို့ သံဃာနဲ့ စစ်ရှောင်အပါအဝင် ပြည်သူသေဆုံးထိခိုက်မှုများရှိဟု AA ထုတ်ပြန်

အောက်တိုဘာ ၂၊ ၂၀၂၆။ ထားမြတ်/People’s Spring

အာဏာသိမ်းစစ်တပ်က ရခိုင်ပြည်အနှံ့ စစ်ရေးပစ်မှတ်မဟုတ်တဲ့ နေရာတွေကို ဆက်တိုက်ဗုံးကြဲကာ စစ်ရာဇဝတ်မှုများကို ပြောင်ပြောင်တင်းတင်းဆက်လက်ကျူးလွန်နေလို့ သံဃာနဲ့ စစ်ရှောင်တွေအပါအဝင် ပြည်သူလူထု သေဆုံးထိခိုက်မှုများ ရှိခဲ့ကြောင်း အာရက္ခတပ်တော်(AA)က ထုတ်ပြန်ပါတယ်။

စက်တင်ဘာ ၂၈ရက်မှာ စစ်တပ်က ကျောက်တော်မြို့ကို လေကြောင်းကနေ ဗုံးကြဲခဲ့လို့ ပြည်သူ ၅၀ဦး သေဆုံးကာ ၅၇ ဦး ဒဏ်ရာရရှိခဲ့ရာ အဲဒီ ဖြစ်စဉ်အပြီးမှာ စစ်တပ်က ကျောက်တော်၊ ပုဏ္ဏားကျွန်း၊ သံတွဲ၊ ရသေ့တောင်၊ ပေါက်တော မြို့နယ်တွေကို လေကြောင်းဆက်လက် ဗုံးကြဲနေတဲ့ အခြေအနေကို အသိပေးခဲ့တာပါ။

စက်တင်ဘာ ၃၀ရက်ညပိုင်းက ပုဏ္ဏားကျွန်းမြို့ကို စစ်တပ် ဗုံးကြဲလို့ ၄နှစ်အရွယ် ကလေးငယ် အပါအဝင် စစ်ရှောင် ၃ဦး ဒဏ်ရာရရှိခဲ့သလို အဲဒီညမှာပဲ ရသေ့တောင်မြို့နယ် ကူတောင်ကျေးရွာအနီး လေကြောင်းဗုံးကြဲမှု ဖြစ်စဉ်မှာလည်း အမျိုးသား ၁ဦးသေဆုံးကာ သူ့ရဲ့ ဇနီး ဒဏ်ရာရရှိခဲ့ပါတယ်။

စက်တင်ဘာ ၃၀ရက်ညသန်းခေါင်မှာ စစ်တပ်က ပေါက်တောမြို့ပေါ်နဲ့ ကျေးရွာအချို့ကို Y12နဲ့ ဗုံး အလုံးရေ ၃၀ ခန့် ကြဲချတိုက်ခိုက်ခဲ့ရာ အမျိုးသမီး ၃ဦး ဒဏ်ရာရရှိကာ ဘုန်းကြီးကျောင်းနဲ့လူနေအိမ်တွေ ပျက်စီးခဲ့ကြောင်း AAက ထုတ်ပြန်ပါတယ်။

အောက်တိုဘာ ၁ရက်မှာလည်း စစ်တပ်ဟာ ကျောက်တော် ကို လေကြောင်းတိုက်ခိုက်မှု ထပ်မံ ပြုလုပ်ခဲ့ရာ သကြားစက်ကျေးရွာ ကျောင်းထိုင်ဆရာတော် ထိခိုက်ဒဏ်ရာရရှိပြီး ဘုန်းကြီးကျောင်းပျက်စီးခဲ့ရပါတယ်။ စစ်ကောင်စီတပ်ဟာ ကျောက်တော် သစ်တစ်ပုံဆည်အနီးဝန်းကျင်နဲ့ သကြားစက်ကျေးရွာ ဘုန်းကြီးကျောင်းအနီးဝန်းကျင်ကို ဂျက်တိုက်လေယာဉ် (၇) စီး၊ Y-12 လေယာဉ်တစ်စီးတိုနဲ့ ဗုံးအလုံးရေ ၄၀ ခန့်ကြဲချခဲ့တာလို့ ထုတ်ပြန်ပါတယ်။

အောက်တိုဘာ ၁ရက်မှာပဲ စစ်တပ်ဟာ သံတွဲမြို၊ အမှတ် (၆) ရပ်ကွက်၊ ဗောဓိကုန်းဈေးအနီးကို တိုက်လေယာဉ်နဲ့ ဗုံးကြဲခဲ့ရာ ပြည်သူ ၂ဦး ဒဏ်ရာရရှိခဲ့ပါတယ်။

ဒီကနေ့ အောက်တိုဘာ ၂ရက် မနက်အစောမှာလည်း စစ်တပ်က ပုဏ္ဏားကျွန်းမြို့နယ် အောင်ဖြူပြင်ကျေးရွာမှ ကားဝပ်ရှော့ကို တိုက်လေယာဉ်နဲ့ဗုံးကြဲခဲ့ရာ ကားဝပ်ရှော့ပိုင်ရှင်ရဲ့ ဇနီးနဲ့ လုပ်သား အချို့ အပါအဝင် ၃ဦး ဒဏ်ရာရရှိခဲ့ပါတယ်။

စစ်တပ်ရဲ့လေကြောင်းဗုံးကြဲမှုတွေကြောင့် ပြည်သူတွေ အစုလိုက်၊ အပြုံလိုက်သေဆုံးထိခိုက်ခဲ့ရတဲ့ ကျောက်တော်မြို့ ဗုံးကြဲတိုက်ခိုက်မှု လုပ်ရပ်အပေါ် ပြည်တွင်းပြည်ပက ကန့်ကွက်ရှုတ်ချမှုတွေရှိနေတဲ့ ကြားက စစ်တပ်ဟာ ရခိုင်ပြည်နယ်က မြို့တွေကို နေ့စဉ်ရက်ဆက် လေကြောင်း တိုက်ခိုက်နေတာဖြစ်ပါတယ်။

(ရခိုင်ပြည်နယ်ကို စစ်တပ်ဗုံးကြဲလို့ အဆောက်အဦးတစ်ခု ပျက်စီးနေတာကို တွေ့ရစဉ်။ ဓာတ်ပုံ - AA)

သဖန်းဆိပ်ဆည်ရေလွှတ်လို့ထိုင်းမှာရေမကြီးနိုင်ကြောင်းထိုင်းမိုးလေဝသဌာနရှင်းလင်း​နေရ

​အောက်တိုဘာ-၂၊၂၀၂၆။People's Spring

မြန်မာဖက်ကသဖန်းဆိပ်ဆည်ရေလွှတ်လို့ ထိုင်းဖက်ခြမ်းမှာရေကြီးမှာမဟုတ်ဘူးလို့ ထိုင်းမိုးလေဝဌာန(TMD)ကရှင်းလင်းထုတ်ပြန်ခဲ့ပါတယ်။

ထိုင်းနိုင်ငံဟာလောလောလတ်လတ် ရေကြီးမှုတွေနဲ့ ကြုံတွေ့ထားရပါတယ်။အိမ်နီးချင်း မြန်မာနိုင်ငံဖက်ကသဖန်းဆိပ်ဆည်ရေလွှတ်လိုက်တယ်ဆိုတဲ့ သတင်း​တချို့ကြောင့် ထိုင်းမှာရေကြီးမလားဆိုတဲ့စိုးရိမ်မှုတွေ ပေါ်ပေါက်
လာတာကြောင့် TMDက ပြန်လည် ဖြေရှင်းခဲ့တာဖြစ်ပါတယ်။

အောက်တိုဘာ ၁ ရက်နေ့က TMDရဲ့ ထုတ်ပြန်ချက်မှာတော့ သဖန်းဆိပ်ဆည်ဟာ ထိုင်းနိုင်ငံနဲ့ သီးခြားစီ တည်ရှိရာ မြစ်တစ်ခုပေါ်မှာ တည်ဆောက်ထားတာလို့ ဖော်ပြထားပါတယ်။ အဲဒီဆည်ဟာ စစ်ကိုင်းတိုင်း ဒေသကြီး၊ ကျွန်းလှမြို့နယ်ထဲက မူးမြစ်ပေါ်မှာ တည်ရှိပါတယ်။ ဆည်ရဲ့ အောက်ဖက်မှာ စီးဆင်းတဲ့ မူးမြစ်ဟာ နောက်ဆုံးမှာ ဧရာဝတီ မြစ်ထဲကို စီးဝင်သွားတာကြောင့် ထိုင်းနိုင်ငံနဲ့ ဘယ်လိုမှ ပတ်သက်မှု မရှိပါဘူးလို့ TMDက ရှင်းပြထားပါတယ်။

မြန်မာဖက်မှာ သဖန်းဆိပ်ဆည် ရေလွှတ်တဲ့ သတင်းကြောင့် ထိုင်းပြည်သူတွေ အနေနဲ့ စိုးရိမ်စရာ မလိုကြောင်း၊ ဆည်ရဲ့ တည်နေရာဟာ ထိုင်းနဲ့ ဘယ်လိုမှ ပတ်သက်ဆက်နွှယ်မှု မရှိကြောင်း TMDက ပြောပါတယ်။

တစ်ချိန်တည်းမှာပဲ ထိုင်းနိုင်ငံရဲ့ ရာသီဥတု အခြေအနေတွေက အချိန်နဲ့အမျှ အပြောင်း
အလဲတွေ ဖြစ်နေနိုင်ပြီး ပြည်တွင်းက မိုးရွာသွန်းမှု အခြေအနေတွေကိုတော့ အနီးကပ် ဆက်လက် စောင့်ကြည့်ဖို့လိုကြောင်း TMDက ထောက်ပြထားပါတယ်။

မိုးလေဝသ သတင်းတွေ၊ ရာသီဥတု အခြေ
အနေတွေနဲ့ ပတ်သက်ရင် ကောလာဟလတွေကြောင့် အထိတ်တလန့် ဖြစ်မယ့်အစား TMD
ရဲ့တရားဝင်ထုတ်ပြန်ချက်တွေကိုပဲယုံကြည်
ကြဖို့လည်းဌာနကတိုက်တွန်းထားခဲ့ပါတယ်။

ကိုးကား: The Nation

၂၀၂၆ သြဂုတ်လဆန်းမှာ သဖန်းဆိပ်ဆည်​ရေလွှတ်​နေစဥ် ။ဓါတ်ပုံ-File

ပူတာအိုရေခဲတောင်ဒေသမှာ ဆေးမြစ်ရှာတဲ့ အမျိုးသားသုံးဦး တောင်ပေါ်ကနေ ပြုတ်ကျသေဆုံး

​အောက်တိုဘာ-၂၊၂၀၂၆။ဇော်ရမ်း/People's Spring

ကချင်ပြည်နယ်၊ ပူတာအိုရေခဲတောင်ဒေသမှာဆေးမြစ်ရှာတဲ့ညီအစ်ကိုနှစ်ဦးအပါအဝင်သုံးဦးတောင်ပေါ်ကနေပြုတ်ကျပြီးသေဆုံးခဲ့တယ်လို့ ဒေသခံအချို့ကပြောပါတယ်။

ခနောင်မွန်မြို့နယ်၊မခွမ်ကျေးရွာကညီအစ်ကိုနှစ်ဦးနဲ့ ကဆန်ခူးကျေးရွာကအမျိုးသားတ
ဦးဟာ စက်တင်ဘာလ၂၉ရက်နေ့နဲ့ စက်တင်
ဘာလ၃၀ရက်နေ့မှာတောင်ပေါ်ကနေပြုတ်ကျသေဆုံးခဲ့တာလို့ သိရပါတယ်။

ဒေသခံတွေက ရုပ်အလောင်းလိုက်လံရှာဖွေခဲ့ကြပြီး ပြန်လည်တွေ့ရှိခဲ့တယ်လို့လည်း သေ
ဆုံးသူတွေရဲ့သူငယ်ချင်းအချို့ကပြောပါတယ်။

ပူတာအို ရေခဲတောင်ဒေသဟာဝေးလံခေါင်
ဖျားဒေသဖြစ်ပြီး လမ်းပန်းဆက်သွယ်ရေးအလွန်ခက်ခဲပါတယ်။ဒေသခံတွေဟာ အ
သက်​မွေးဝမ်း​ကြောင်းအတွက် တောင်ယာစိုက်ပျိုးခြင်းနဲ့ ‌ဆေးမြစ်ရှာဖွေခြင်းလုပ်ငန်းတွေလည်း လုပ်ဆောင်ကြပါတယ်။

ရှီးပဒီးအပါအဝင် ဆေးဖက်ဝင်အပင်တွေ၊ သဘာဝသစ်ဥသစ်ဖု ၊သစ်မြစ်တွေထွက်ရှိပြီး တောင်နံရံတွေမှာလိုက်ပြီး တူးဖော်ရှာဖွေတဲ့ လုပ်ငန်း တွင်ကျယ်ပါတယ်။တောင်ကမ်းပါး၊ချိုင့်ဝှမ်း၊တောင်ထိပ်လို အန္တရာယ်များတဲ့နေရာတွေထိလိုက်လံရှာဖွေရတာကြောင့် ပြုတ်ကျသေဆုံးတဲ့ ဖြစ်ရပ်တွေလည်း နှစ်
စဥ်ရှိနေပါတယ်။

●ပြင်ဆင်ချက် -
ကနဦး​ဖော်ပြချက်မှာ ရွာအမည်မှား​နေတဲ့အတွက် ပြန်လည်ပြင်ဆင်ထားပါတယ် ။

ပူတာအို ရေခဲ​တောင်မှာ ​ဆေးမြစ်ရှာ​ဖွေ​
​​​​နေသူတဦး ။ဓါတ်ပုံ-Synchang Zeng's FB

လေကြောင်းသတင်း ပြည်သူတွေအသိပေးဖို့ မြို့နယ် ၅၀မှာ လုပ်မယ့် ပြည်သူ့ရေဒါပရောဂျက်မှာ ပါဝင်ကြဖို့ ဝန်ကြီး ဒေါက်တာဇော်ဝေစိုး တိုက်တွန်း

အောက်တိုဘာ ၂၊ ၂၀၂၆။ ထားမြတ်/People’s Spring

အာဏာသိမ်းစစ်တပ်ရဲ့ လေကြောင်းတိုက်ခိုက်မှုမှ ပြည်သူတွေ ရှောင်ရှားနိုင်ရေး လေယာဉ်လာရာလမ်းကြောင်းတွေ၊ လေယာဉ်ရောက်ရှိရာနေရာတွေကို အသိပေးမယ့် ပြည်သူ့ရေဒါပရောဂျက်ကို မြို့နယ် ၅၀ ခုအတွက် လုပ်ဆောင်သွားဖို့ရှိလို့ ပြည်သူတွေ ပါဝင်ပေးကြဖို့ အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးချုပ်ရုံးဝန်ကြီး ဒေါက်တာဇော်ဝေစိုးက တိုက်တွန်းလိုက်ပါတယ်။

စစ်တပ်က အရပ်သား ပြည်သူတွေကို ပစ်မှတ်ထားတဲ့ လေကြောင်းတိုက်ခိုက်မှုတွေ ပိုတိုးလုပ်လာတဲ့ အခြေအနေမှာ တော်လှန်ရေးဘက်ကလည်း ပြည်သူတွေ လေကြောင်းတိုက်ခိုက်မှုကြောင့် ထိခိုက်မှု လျော့နည်းစေရေး ကြိုးပမ်းလျက်ရှိရာ ပြည်သူ့ရေဒါပရောဂျက်ရဲ့ အစီအစဉ်နဲ့ ဆက်သွယ်ရေးစခန်းတွေ ကို မြို့နယ် ၅ခုမှာ တည်ဆောက်ပြီး လူထုတွေကို လေကြောင်းသတင်း အချိန်နဲ့ တပြေးညီ အသိပေးနိုင်အောင် ကြိုးပမ်းနေတာဖြစ်ပါတယ်။


“လူမဆန်ရက်စက်ကြမ်းကြုတ်သတ်ဖြတ်မှုမှ အကာအကွယ်ပေးကြ” လို့ ဝန်ကြီး ဒေါက်တာ ဇော်ဝေစိုးကသူ့ရဲ့ ဖေ့စ်ဘွတ်ခ်ကတဆင့် ပြည်သူတွေ ပါဝင်ဖို့ တိုက်တွန်းနှိုးဆော်ထားပါတယ်။

ပြည်သူ့ရေဒါပရောဂျက်နဲ့ ပြည်သူတွေကို ကာကွယ်ကြဖို့၊ ပြည်သူ့ရေဒါပရောဂျက်မှာ ပါဝင်ခြင်းဖြင့် စစ်ရာဇဝတ်ကောင်များ ဖက်ဆစ်လေတပ်ရဲ့ လူမဆန် ရက်စက်ကြမ်းကြုတ်သတ်ဖြတ်မှုမှ အကာအကွယ်ပေးကြဖို့ ဝန်ကြီးက ရေးသားထားပါတယ်။

ပြည်သူ့ရေဒါစနစ်ကို ပြည်သူ့စွမ်းအားနဲ့ တည်ဆောက်ကြ ပြီး ရွာတိုင်း မြို့တိုင်း နေရာတိုင်းမှာ အချက်ပေး သံချောင်း၊ အချက်ပေး တုံးမောင်း၊ အချက်ပေး ခရာသံ ပေးနိုင်ဖို့ လူအင်အား ငွေအင်အား ပစ္စည်းအင်အားနဲ့ ပါဝင်ကြဖို့လိုအပ်တယ်လို့ ဝန်ကြီးက ပြောပါတယ်။

အခု ပရောဂျက်မှာ မြို့နယ် ၅၀ခုအတွက် တမြို့နယ်လျင် စက်သွယ်ရေးစခန်း ၅ခုတည်ဆောက်မှာ ဖြစ်တယ်လို့ ဆိုပါတယ်။ အဲဒီအတွက် အထိုင်စက်တလုံး ၂၀သိန်းကျပ်၊ လက်ကိုင်စက်တလုံး ၃သိန်းကျပ်၊ အော်ပရေတာ ၁ဦး တစ်လ ၁သိန်းကျပ် တစ်နေ့ လေးဦး စတဲ့ ကုန်ကျစရိတ်တွေရှိကြောင်း အသိပေးပါတယ်။

အဲဒီလို တည်ဆောက်ပြီးပါက စစ်တပ်လေယာဉ် တက်လာတာနဲ့ တပြိုင်နက်တည်း ပြည်သူကို အသိပေးကြမှာလို့ ဆိုပါတယ်။ စစ်တပ်လေယာဉ် ဘယ်မှာပျံနေလဲ ၊ ဖက်ဆစ်လေယာဉ်လာရာလမ်းကြောင်းနဲ့ လေယာဉ် အနီးအနား ရောက်ရှိနေမှု တို့ကို အသိပေးသွားမှာ လို့ ဝန်ကြီးဒေါက်တာဇော်ဝေစိုးက ရှင်းပြထားပါတယ်။

အာဏာသိမ်းစစ်တပ်ဟာ စစ်ရေးအရ ရှုံးနိမ့်မှုတွေ ကြုံရတဲ့အခါ အရပ်သားတွေကို ပိုမိုပစ်မှတ်ထားတဲ့ လေကြောင်းတိုက်ခိုက်မှုတွေလုပ်ဆောင်လျက်ရှိပြီးလတ်တလော ရခိုင်ပြည်နယ်မှာ စစ်တပ်လေကြောင်း တိုက်ခိုက်မှုကြောင့် ပြည်သူအစုလိုက်အပြုံလိုက် သေဆုံးထိခိုက်ခဲ့တဲ့ ဖြစ်စဉ်တွေ မကြာခဏ ဖြစ်ပေါ်လျက်ရှိပါတယ်။

စစ်တပ်ဟာ တိုက်ပွဲဖြစ်ပွားမှုမရှိတဲ့ ပြည်သူနေထိုင်ရာတွေသာမက သဘာ၀ဘေးကြုံနေရတဲ့ ဘေးသင့်ဒေသတွေကိုပါ မရှောင် လေကြောင်းဗုံးကြဲတာတွေ လတ်တလော လုပ်ဆောင်နေတာဖြစ်ပါတယ်။

(PDF ရဲဘော်တွေနဲ့အတူ တွေ့ရတဲ့ ဝန်ကြီး ဒေါက်တာဇော်ဝေစိုး။ ဓာတ်ပုံ - Zaw Wai Soe/Fb)

ဘောလခဲမြို့နယ်က စစ်တပ်စခန်း ၁ခုကို ကရင်နီတပ်ပေါင်းစု သိမ်းပိုက်

▪️လက်နက်ခဲယမ်းနဲ့ စစ်သုံ့ပန်းတချို့ ရဟုဆို

အောက်တိုဘာ-၂ ၊၂၀၂၆။ဇော်၀င်း /People's Spring

ကရင်နီပြည်နယ်၊ ဘောလခဲမြို့နယ်က အာဏာသိမ်းစစ်တပ်စခန်း ၁ခုကို ကရင်နီတပ်ပေါင်းစုက သိမ်းပိုက်ခဲ့ပြီး လက်နက်ခဲယမ်းတွေနဲ့ စစ်သုံ့ပန်းတချို့ ရရှိတယ်လို့ ကရင်နီစစ်ရေးသတင်းရင်းမြစ်တချို့က လူထုနွေဦးကို ပြောပါတယ်။

စက်တင်ဘာ နောက်ဆုံးပတ်ကသိမ်းနိုင်ခဲ့တဲ့ အဲဒီစခန်းဟာ ၀မ့်မလန်းကျေးရွာအနီးကဖြစ်ပြီး ကရင်နီတပ်ဖွဲ့တွေ ပူးပေါင်းထိုးစစ်ဆင်ရရှိခဲ့တာလို့ ဆိုပါတယ်။

"BPDF(ဘောလခဲမြို့နယ်ပြည်သူ့ကာကွယ်ရေးတပ်ဖွဲ့) အပါအဝင် တပ်ပေါင်းစုကနေ စစ်ကောင်စီရဲ့ စခန်း တစ်ခုကို သိမ်းတာပါ။လက်နက်ခဲယမ်း အချို့ သိမ်းဆည်းရမိပြီး သုံးပန့် ၃ယောက် မိတယ်"လို့ BPDF တာ၀န်ရှိသူက အတည်ပြုပါတယ်။

လက်ရှိစစ်ရေးအရလည်း ဖရူဆို-ထားလဲ - နန်းဖဲ-ဘောလခဲကို ဆက်သွယ်ထားတဲ့ လမ်းကြောင်းတစ်လျှောက် အခြေအနေတင်းမာမှုတွေရှိနေတယ်လို့ ကရင်နီစစ်ရေးသတင်းရင်းမြစ်တစ်ဦးက အသိပေးပါတယ်။

"ဒီရက်ပိုင်း ဖရူဆို ၊ဒီးမော့ဆို ၊ဘောလခဲ ဖက်တွေကို လေကြောင်း တိုက်ခိုက်မှုတွေ ရှိပါတယ်။ဖား ဆောင်း ဖက်မှာလဲ ဒီရက်ပိုင်း လက်နက်ကြီးနဲ့ ပစ်ခတ်နေတာတွေ ရှိတယ်"လို့ သူက ပြောပါတယ်။

ပြီးခဲ့တဲ့နှစ်က ဘောလခဲမြို့နယ်မှာရှိတဲ့ အာဏာသိမ်းစစ်တပ် ကာကင်းစခန်း ၅ခု ကို ကရင်နီတပ်ပေါင်းစုက သိမ်းပိုက်နိုင်ခဲ့ဖူးပါတယ်။

စစ်ဘက်သတင်းအချက်အလက်တွေအရ ဘောလခဲမြို့မှာ စစ်ကောင်စီရဲ့ အခြေချစစ်ဗျူဟာ ၊ခမရ (၄၂၉)၊ခမရ (၄၃၀) နဲ့ ခလရ (၃၃၇)တို့ရှိတဲ့ အပြင် ရှမ်းပြည်နယ်အခြေစိုက် စစ်ဆင်ရေးကွပ်ကဲမှုဌာနချုပ် စကခ (၂)လက် အောက်ခံတပ်ရင်းတချို့အားဖြည့်ထားတာရှိပါတယ်။

ဒါ့အပြင် ရှမ်းပြည်နယ် ခိုလမ်မြို့အခြေစိုက် အရှေ့အလယ်ပိုင်းတိုင်းစစ်ဌာနချုပ်ကို လွိုင်ကော်မြို့မှာ ပြောင်းလဲအခြေချလိုက်တာကြောင့် မကြာမီ ကာလတွေမှာ စစ်ရေးပြင်းထန်မှုတွေရှိလာနိုင်တယ်လို့ ဒေသခံစစ် ရေးသတင်ရင်းမြစ်နဲ့‌မြေပြင်တော်လှန်ရေးတပ်တာ၀န်ရှိသူတွေက လူထုနွေဦးကို ‌ပြောထားပါတယ်။

လက်ရှိ ကရင်နီပြည်နယ်နဲ့ ထိုင်းနယ်စပ် မယ်စဲ့၊ရှားတောမြို့နယ် နဲ့ သတ္တုထွက်ရှိရာ မော်ချီးဒေသတွေကို ကရင်နီပူးပေါင်းတပ်တွေက အလုံးစုံသိမ်းပိုက်ထားပြီး ဒီးမော့ဆို၊ ဖားဆောင်း၊ ဘောလခဲ ၊ဖရူဆိုနှင့် မိုးဗြဲမြို့အနီးတဝိုက်ကို ထိန်းချုပ်ထားဆဲလို့ သိရပါတယ်။

(ဘောလခဲ PDF တပ်ရင်းအမှတ်-1105 တပ်ရင်းက ရဲဘော်တွေကို တွေ့ရစဉ်။ ဓာတ်ပုံ - Bawlakhe PDF)

ဝက်လက်မှာ သံအမတ်ကြီး ဦးကျော်မိုးထွန်းကို ထောက်ခံကြောင်း ဆိုင်းဘုတ်တွေ စိုက်ထူ

အောက်တိုဘာ ၂၊၂၀၂၆။သုည/People's Spring

စစ်ကိုင်းတိုင်း ဝက်လက်မြို့နယ်အတွင်းက အဝေးပြေးလမ်းမကြီးတွေပေါ်မှာ သပိတ်တိုက်ပွဲဦးဆောင်ကော်မတီက ပြည်သူ့အသံနဲ့ ပြည်သူ့သဘောထားကို ဦးစားပေးရပ်တည်ပေးနေတဲ့ ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းရဲ့ ရုပ်ပုံပါ ဆိုင်းဘုတ်တွေ စိုက်ထူပြီး ဒီကနေ့ (အောက်တိုဘာ ၂) လှုပ်ရှားမှု ပြုလုပ်ခဲ့ကြပါတယ်။

မြန်မာပြည်သူတွေ ရင်ဆိုင်ကြုံတွေ့နေရတဲ့ အခက်အခဲတွေနဲ့ ပြည်သူတို့ရဲ့ အသံကို ကမ္ဘာက သိရှိအောင် ကိုယ်စားပြုဖော်ပြပေးနေတဲ့ သံအမတ်ကြီး ဦးကျော်မိုးထွန်းကို ကုလသမဂ္ဂ (UN) မှာ ဆက်လက်တာဝန်ထမ်းဆောင်ခွင့်ရရှိရေးအတွက် ပြည်သူ့ကိုယ်စား ဝက်လက်မြို့နယ် လူထုသပိတ်တိုက်ပွဲ ဦးဆောင်ကော်မတီက စိုက်ထူခဲ့တာ ဖြစ်ပါတယ်။

မြန်မာပြည်သူ​တွေရဲ့ အသံကို ကိုယ်စားပြုဖော်ပြနိုင်ဖို့ သံအမတ်ကြီး ဦးကျော်မိုးထွန်း ဆက်လက် ကိုယ်စားပြုခွင့်ရရှိရေးက အရေးကြီးသကဲ့သို့ ဆက်လက်တာဝန်ထမ်းဆောင်နိုင်ရန်အတွက် မြန်မာပြည်သူတွေရဲ့ ထောက်ခံတဲ့ အသံဟာလည်း အလွန်အရေးပါကြောင်း ဝက်လက်သပိတ်က အသိပေးခဲ့ပါတယ်။

ဒါ့အပြင် ဝက်လက်မြို့နယ် လူထုသပိတ်တိုက်ပွဲ ဦးဆောင်ကော်မတီက မြန်မာပြည်သူတွေရဲ့ အသံကို မတိတ်ဆိတ်စေရေး၊ သံအမတ်ကြီး ဦးကျော်မိုးထွန်းကို UN မှာ ဆက်လက် တာဝန်ထမ်းဆောင်ခွင့်ပြုရေး၊ မြန်မာပြည်သူတွေရဲ့ ဒီမိုကရေစီ ဆန္ဒကို လေးစားလိုက်နာပေးရေးနဲ့ "ဦးကျော်မိုးထွန်းသည်သာလျှင် ငါတို့၏ တရားဝင် သံအမတ်ဖြစ်သည်၊ ငါတို့ သံအမတ် - ငါတို့ အသံ" ဟု ကြွေးကြော်သံတွေနဲ့အတူ ဆန္ဒထုတ်ဖော်ခဲ့ပါတယ်။