ဖားကန့် ဆယ်ဇင်းဒေသက စစ်တပ်လက်အောက်ခံ SNA တပ်စခန်း ၂ခုကို KIA သိမ်းပိုက်

စက်တင်ဘာ ၃၀၊ ၂၀၂၆။ ထားမြတ်/People’s Spring

ကချင်ပြည်နယ်၊ ဖားကန့်မြို့နယ် ဆယ်ဇင်းဒေသမှာ တပ်စွဲထားတဲ့ စစ်တပ် လက်အောက်ခံ ရှမ်းနီးတပ် SNA စခန်း ၂ခုကို ကချင်လွတ်လပ်ရေးတပ်မတော်(KIA) ပူးပေါင်းတပ်က တိုက်ခိုက်သိမ်းပိုက်ခဲ့ကြောင်း ကချင်စစ်ရေးသတင်းရင်းမြစ်က ပြောပါတယ်။

စက်တင်ဘာ ၂၈ရက် မနက်ပိုင်းက ဆယ်ဇင်းဒေသ တောင်ယာကုန်းရွာမှာရှိတဲ့ SNA စခန်း ၂ခုကို သိမ်းပိုက်နိုင်ခဲ့တာလို့ သတင်းရင်းမြစ်က ပြောပါတယ်။

SNAနဲ့ ရှမ်းနီ ပြည်သူ့စစ်တွေနဲ့ တိုက်ပွဲတွေ ဆက်လက် ပြင်းထန်လာနိုင်ခြေရှိကြောင်းလည်း သတင်းရင်းမြစ်က အသိပေးပါတယ်။

စစ်တပ် လက်အောက်ခံ SNAနဲ့ ရှမ်းနီပြည်သူ့စစ်တွေဟာ ကချင်ပြည်နယ် ဖားကန့်မြို့နယ်၊ မိုးညှင်းမြို့နယ် စစ်ကိုင်းတိုင်း ဟုမ္မလင်း၊ ဗန်းမောက် မြို့နယ်တွေ အပါအဝင် ကချင်-စစ်ကိုင်းအစပ်ဒေသတွေမှာ ရှိပြီး စစ်ကောင်စီနဲ့ ပူးပေါင်းကာ တော်လှန်ရေးတပ်တွေကို တိုက်ခိုက်နေတာဖြစ်ပါတယ်။

ဆယ်ဇင်းဒေသ SNA စခန်း ၂ခု သိမ်းပိုက်နိုင်မှုမှာ လက်နက်ခဲယမ်းအချို့ ရရှိတယ်လို့ အခြား သတင်းရင်းမြစ်တစ်ဦးကလည်း အသိပေးထားပါတယ်။

SNA စခန်းသိမ်းပိုက်နိုင်မှု အပါအဝင် ကချင်ဒေသ စစ်ရေး အခြေအနေတွေနဲ့ ပတ်သက်ပြီး KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံ ဆက်သွယ်ထားဆဲဖြစ်ပါတယ်။

KIA နဲ့ စစ်တပ်တွေဟာ စက်တင်ဘာလအတွင်းမှာ ဗန်းမော်၊ ရွှေကူ၊ မိုးညှင်းအင်းတော်ကြီးဒေသ၊ ရှမ်းမြောက် မိုးမိတ်မြို့အနီး ဒေသတွေမှာ တိုက်ပွဲတွေဖြစ်ပွားခဲ့ရာ စစ်တပ်စခန်းအချို့ကို KIA ပူးပေါင်းတပ်က သိမ်းပိုက်ရရှိခဲ့ပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ဖားကန့်တိုက်ပွဲ #ဆယ်ဇင်းစခန်းသိမ်းပိုက်မှု #KIA #SNA #ကချင်ပြည်နယ်စစ်ရေး #မြန်မာ့စစ်ရေးသတင်း #HpakantBattle #SezinCampCaptured #KachinIndependenceArmy #ShanniNationalArmy #KachinConflict #MyanmarConflict #MyanmarNews

မလေးရှားရောက်ဒုက္ခသည်တွေ မြန်မာဆီဘယ်လိုပြန်ပို့ခံရလဲ

စက်တင်ဘာ - ၃၀ ၊၂၀၂၆

ကြိုတင်ကြေညာထားတဲ့အတိုင်းရွှေ့ပြောင်းဒုက္ခသည်ဦးရေ ၁,၅၀၀ လောက်ကိုမြန်မာဆီပြန်ပို့တဲ့အစီအစဉ်ကို မလေးရှားက(စက်တင်ဘာ ၂၉ ရက်) မှာ စတင် အကောင်အထည်ဖော်လိုက်ပါတယ်။

ရိုဟင်ဂျာ အများစု ပါဝင်တယ်လို့ ယုံကြည်ရတဲ့ ဒုက္ခသည် ၁,၅၀၀ ဝန်းကျင်လောက်ကို ပထမ အသုတ်အဖြစ် မြန်မာဆီ ပြန်ပို့ဖို့ မလေးရှား အစိုးရက ပြန်ပို့လိုက်တာပါ။

မလေးရှား ဝန်ကြီးချုပ် အန်ဝါ အီဘရာဟင်က မလေးရှားရောက် ဒုက္ခသည်တွေထဲက ဆန္ဒအလျောက် နေရပ်ပြန်လိုသူ ၅,၀၀၀ လောက်ကို လက်ခံဖို့ အာဏာသိမ်း မြန်မာစစ်တပ်က သဘောတူ လက်ခံထားကြောင်း ဇူလိုင်လတုန်းက ပြောကြားဖူးပါတယ်။

စက်တင်ဘာ ၂၉ ရက်မှာတော့ ရဲအစောင့်အရှောက်တွေနဲ့အတူ ဒါဇင်နဲ့ချီ များပြားတဲ့ ဘတ်စ်ကားတွေဟာ မလေးရှားနိုင်ငံ အနောက်မြောက်ဖက်က လူမွတ် ရေတပ်စခန်းနားက မက်ဂျ်လစ် ပါဘန်ဒါရန် မန်ဂျွန် အားကစားရုံကြီးဆီ ဆက်တိုက် ရောက်ရှိလာနေခဲ့ပါတယ်။

အာဏာပိုင်တွေက အားကစားရုံထဲကိုတော့ သတင်းထောက်တွေကို ဝင်ခွင့် မပေးပါဘူး။

အားကစားကွင်းထဲ စုဝေးရောက်ရှိနေတဲ့ ဒုက္ခသည်တွေရဲ့ အချက်အလက်တွေကို မှတ်တမ်းတင်ပြီးရင်တော့ ရေတပ်စခန်းဆီ လွှဲပြောင်းပေးပြီး အဲဒီကမှ မြန်မာဖက်ဆီ သင်္ဘောနဲ့ ပြန်ပို့တာပါ။

မလေးရှားအာဏာပိုင်တွေဘက်က ထုတ်ပြန်လာတဲ့ ဓာတ်ပုံမှာတော့ ဆိပ်ကမ်းမှာ ဆိုက်ကပ်ထားတဲ့ အာဏာသိမ်းမြန်မာရေတပ်ရဲ့စစ်ရေယာဉ်တွေဖြစ်တဲ့မုတ္တမ ၊ ဆင်ဖြူရှင်စစ်ရေယာဉ်နှစ်စီးပေါ်လူတွေတင်ပေးဖို့ပြင်ဆင်နေတာတွေ့ရပါတယ်။

အစောပိုင်း သတင်းတွေတုန်းက မလေးရှားဟာ ရိုဟင်ဂျာ အများစုပါဝင်တဲ့ ရွှေ့ပြောင်း ဒုက္ခသည် ၁,၅၀၀ ကို မြန်မာဖက် ပြန်ပို့မယ်လို့ ဖော်ပြခဲ့ဖူးပေမယ့် လက်ရှိ ပြန်ပို့မယ့်သူတွေက ရိုဟင်ဂျာတွေလား ဆိုတာကို မလေးရှား အာဏာပိုင်တွေက ရှင်းလင်း ပြောဆိုထားတာ မရှိပါဘူး။

မြန်မာကနေ မလေးရှားကို ရောက်ရှိနေတဲ့ ဒုက္ခသည် ၁၉,၀၀၀ ထဲမှာ သုံးပုံနှစ်ပုံလောက်ကတော့ ရိုဟင်ဂျာတွေ ဖြစ်တယ်လို့ ကုလသမဂ္ဂ (UN)က ထုတ်ပြန်ထားပါတယ်။

မလေးရှားမှာ ရိုဟင်ဂျာတွေနဲ့ ဒေသခံ လူ့အဖွဲ့အစည်းတွေကြား ပဋိပက္ခ အခြေအနေ တချို့ကလည်း ဒုက္ခသည်တွေကို မြန်မာဖက် ပြန်ပို့ဖို့ မလေးရှား အစိုးရအပေါ် ဖိအားပိုများလာစေခဲ့ပါတယ်။

လဆန်းပိုင်းမှာတော့ အာဏာသိမ်း မြန်မာစစ်တပ်က ပြည်ပရောက် နိုင်ငံသားတွေကို ဘေးကင်းပြီး ဂုဏ်သိက္ခာရှိရှိ နေရပ်ပြန်လာခွင့် ရစေမယ်လို့ အာမခံခဲ့ပါတယ်။

ပြီးတော့ ဝန်ကြီးချုပ် အန်ဝါက သူဟာ ဒုက္ခသည်တွေကို ပြန်ပို့ရေးကိစ္စ ဆွေးနွေး ညှိနှိုင်းဖို့အတွက် အာဏာသိမ်း စစ်ခေါင်းဆောင် ဘဝကနေ ကိုယ်တိုင်ခန့် သမ္မတ ရာထူး ရယူထားသူ မင်းအောင်လှိုင်ကို မလေးရှားဆီ ဖိတ်ခေါ်မယ်လို့ အတည်ပြုထားပါတယ်။

ကိုးကား - AFP

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #မလေးရှားရောက်မြန်မာများ #ဒုက္ခသည်များပြန်ပို့ခံရမှု #မလေးရှားလူဝင်မှုကြီးကြပ်ရေး #စစ်ကောင်စီသံရုံး #လူ့အခွင့်အရေး #မြန်မာ့ရေးရာသတင်း #MyanmarRefugeesInMalaysia #DeportationToMyanmar #ImmigrationDepot #UNHCRMalaysia #HumanRights #MyanmarNews

ရေကြီး၊ မြေပြိုဘေးအဆိုးဆုံးကြုံရတဲ့ကဒက်ငယ်ထိန်ရွာမှာ အ​ရေး​ပေါ်အကူအညီ​တွေလို​နေဆဲ

စက်တင်ဘာ-၃၀၊၂၀၂၆။အိမ်သွင်/People's Spring

ထားဝယ်ဒေသအတွင်းရေကြီးရေလျှံမှုနဲ့ တောင်ပြိုမှုတွေမှာ လောင်းလုံမြို့နယ်ထဲက ကဒက်ငယ်ထိန်ကျေးရွာဟာထိခိုက်ပျက်စီးမှုအများဆုံးဖြစ်ခဲ့တဲ့ကျေးရွာတွေမှာပါဝင်ပါတယ်။

မြေပြိုမှုကြောင့်ပျောက်ဆုံးနေသူကိုရှာဖွေနေစဉ် ဒီနေ့မနက်ပိုင်းမှာ နေအိမ်တစ်အိမ်ထဲကနေ ငြီးတွားသံကြားလို့ ရှာဖွေကယ်ဆယ်ရေးအဖွဲ့​တွေက ရှာ​ဖွေကယ်ဆယ်​ရေးလုပ်နေကြတာဖြစ်ပါတယ်။

တောင်ပြိုမှုနဲ့ ရေကြီးရေလျှံမှုကြောင့် ထားဝယ်ဒေသတစ်ခုလုံးမှာ စုစုပေါင်း ၃၂ ဦးသေဆုံးကြောင်း အတည်ပြုထားနိုင်ပြီး ပျောက်ဆုံးနေသူတွေဒါဇင်နဲ့ချီပြီးရှိနေသေးတယ်လို့ ထားဝယ်အမျိုးသားအဖွဲ့ချုပ်ကစက်တင်ဘာလ၃၀ ရက်မနက်ပိုင်းမှာ ထုတ်ပြန်ထားပါတယ်။

ကဒက်ငယ်ထိန်ကျေးရွာတစ်ခုတည်းမှာ ရေဘေးနဲ့ မြေပြိုဘေးကြောင့် သေဆုံးသူ ၁၅ဦးရှိပြီး ၁၀ဦးရဲ့ ရုပ်အလောင်းကိုရှာဖွေတွေ့ရှိထားပါတယ်။ ငါးဦးပျောက်ဆုံးနေဆဲဖြစ်ပါတယ်။

လမ်းပန်းဆက်သွယ်ရေးအခက်အခဲနဲ့ ကယ်ဆယ်​ရေး​ထောက်ကူယန္တရားလိုအပ်ချက်တွေကြောင့် အ​ရေး​ပေါ်ရှာဖွေကယ်ဆယ်ရေး နှောင့်နှေးနေတဲ့အတွက် အသက်ရှင်ကျန်ပြီးပိတ်မိ​နေသူ​တွေရှိ​သေးရင် အချိန်မီမကယ်တင်နိုင်မှာ စိုးရိမ်နေတယ်လို့ လောင်းလုံးမြို့ဒေသခံတွေကပြောပါတယ်။

တနင်္သာရီတိုင်းအတွင်း ရေဘေးနဲ့ မြေပြိုမှုဘေးရင်ဆိုင်နေရတဲ့ ဒေသတွေမှာ ရှာဖွေကယ်ဆယ်ရေးအပါအဝင်အရေးပေါ်အကူအညီတွေလိုအပ်နေတယ်လို့ အမျိုးသားညီညွတ်ရေးအစိုးရကလည်း ထုတ်ပြန်ထားပါတယ်။ PDF နဲ့​တော်လှန်​ရေးအင်အားစု​တွေကလည်းကယ်ဆယ်​ရေးလုပ်ငန်း​တွေမှာ ဝင်​ရောက်ကူညီ​နေကြပါတယ် ။

ထားဝယ်ဒေသတွင်း ရေဘေးနဲ့ တောင်ပြိုမှုကြောင့် ပျက်စီးဆုံးရှုံးမှုတိုးလာ

▪️ကူညီကယ်ဆယ်ရေးအခက်ကြုံနေဆဲ

စက်တင်ဘာ-၃၀၊ ၂၀၂၆။ ဇော်ရမ်း/People's Spring

ထားဝယ်ဒေသအတွင်း ရေကြီးရေလျှံမှုနဲ့ တောင်ပြိုမှုတွေကြောင့် ပျက်စီးဆုံးရှုံးမှုစာရင်းတိုးလာပြီး ကူညီကယ်ဆယ်ရေးအဖွဲ့တွေ မရောက်နိုင်သေးတဲ့နေရာတွေ ရှိသေးတယ်လို့ ထားဝယ်အမျိုးသားအဖွဲ့ချုပ်က ဒီနေ့ ထုတ်ပြန်ပါတယ်။

တောင်ပြိုမှုနဲ့ ရေကြီးရေလျှံမှုကြောင့် ထားဝယ်ဒေသတစ်ခုလုံးမှာ စုစုပေါင်း ၃၂ ဦးသေဆုံးကြောင်း အတည်ပြုထားနိုင်ပြီး လူနေအိမ်နဲ့ ဘာသာရေးအဆောက်အဦးတွေ အပါအဝင် အဆောက်အဦးပေါင်း ၃၀၀ ဝန်းကျင်၊ ငါးဖမ်းလှေအစီးရေ ၅၀ ဝန်းကျင် ပျက်စီးဆုံးရှုံးခဲ့ရတယ်လို့ ထုတ်ပြန်ထားပါတယ်။

စက်တင်ဘာ ၂၉ရက် မနေ့က အထိ ရရှိခဲ့တဲ့ စာရင်းတွေအရ ထားဝယ်ဒေသတစ်ခုလုံးမှာ ပျက်စီးခဲ့တဲ့ အဆောက်အဦး ၂၆၀ ကျော်ရှိတာကနေ စာရင်းထပ်တိုးလာတာဖြစ်ပါတယ်။ အပျက်အစီးစာရင်း ဆက်လက်တိုးလာနိုင်ပြီး ဒေသခံတွေအတွက် အကူအညီတွေလိုအပ်နေတယ်လို့ ထားဝယ်အမျိုးသားအဖွဲ့ချုပ်က အသိပေးပါတယ်။

သေဆုံးသူ ၃၂ဦးကို အတည်ပြုထားနိုင်ပြီး ပျောက်ဆုံးနေသူ ဒါဇင်နှင့်ချီ ရှိနေဆဲဖြစ်ပါတယ်။ ကား၊ ဆိုင်ကယ်နဲ့ အခြားသော စက်ယန္တယားတွေ၊ တိရိစ္ဆာန်တွေလည်း ထိခိုက်သေဆုံးမှုရှိနေပြီး ဆက်သွယ်ရေးနဲ့ လမ်းပန်းဆက်သွယ်ရေး အခက်အခဲကြောင့် အတည်ပြုနိုင်ခြင်းမရှိသေးဘူးလို့ အသိပေးထားပါတယ်။

ထိုင်းနိုင်ငံဖက်က လေဖိအားနည်းရပ်ဝန်းအရှိန်ကြောင့် တနင်္သာရီတိုင်း လောင်းလုံး၊ ထားဝယ်၊ သရက်ချောင်း၊ ရေဖြူ၊ မြိတ်မြို့နယ်တွေမှာ စက်တင်ဘာ၂၆ရက်ကစပြီး ရေဘေးကြုံတွေ့နေတာပါ။ လောင်းလုံးနဲ့ သရက်ချောင်းမြို့ဟာ ရေဘေးနဲ့ မြေပြိုမှု အဆိုးဆုံးကြုံတွေ့နေရပါတယ်။

လမ်းပန်းဆက်သွယ်ရေးအခက်အခဲနဲ့ ယန္တရားလိုအပ်ချက်တွေကြောင့် ရှာဖွေကယ်ဆယ်ရေး နှောင့်နှေးနေတာအတွက် စိုးရိမ်နေတယ်လို့ လောင်းလုံးမြို့ဒေသခံတွေကပြောပါတယ်။

"ကျမတို့ ရွာမှာဆိုရင် မြေပိနေသူတချို့ရှိနေသေးတယ်။ ကယ်ဖို့က အရမ်းခက်ခဲနေတာ။ မသေဆုံးသင့်ဘဲ သေဆုံးရတာတွေအတွက် စိတ်မကောင်းဘူး။ အနယ်နယ်အရပ်ရပ်က အကူအညီတွေ လိုအပ်ပါတယ်"လို့ လောင်းလုံးမြို့ ကဒက်ငယ်ထိန်ရွာဒေသခံတစ်ဦးက ပြောပါတယ်။

အမျိုးသားညီညွတ်ရေးအစိုးရကလည်း တနင်္သာရီတိုင်းအတွင်း ရေဘေးနဲ့ မြေပြိုမှုဘေးရင်ဆိုင်နေရတဲ့ ဒေသတွေမှာ ရှာဖွေကယ်ဆယ်ရေးအပါအဝင် အရေးပေါ်အကူအညီတွေလိုအပ်နေတယ်လို့ မနေ့ညမှာ ထုတ်ပြန်ပါတယ်။ ဘေးသင့်ပြည်သူတွေအတွက် အရေးပေါ်နေရာထိုင်ခင်း၊ အစားအစာ၊ သန့်ရှင်းသောသောက်သုံးရေ၊ ဆေးဝါးနဲ့ ကျန်းမာရေးစောင့်ရှောက်မှု၊ ‌သွားလာပို့ဆောင်ရေးအကူအညီတွေ အရေးပေါ် လိုအပ်နေတယ်လို့ ဆိုပါတယ်။ ရေလွှမ်းမိုးခံရတဲ့ ကျေးရွာတွေမှာ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ နယ်မြေတပ်ရင်းတွေက ရှာဖွေကယ်ဆယ်ရေးနဲ့ အပျက်အစီး ရှင်းလင်းရေးလုပ်ငန်းများ ဆောင်ရွက်နေတယ်လို့လည်း အသိပေးထားပါတယ်။

ထားဝယ်ဒေသအတွင်း ရေအနည်းငယ်ပြန်ကျနေပေမယ့် မြေပြိုနိုင်တဲ့အန္တရာယ်ရှိနေသေးတဲ့အတွက် ဒေသခံတွေ အလျင်စလို ပြန်လည်နေထိုင်ခြင်းမပြုကြဖို့နဲ့ မိုင်းအန္တရာယ်လည်းသတိပြုကြဖို့လည်း ထားဝယ်အမျိုးသားအဖွဲ့ချုပ်က တိုက်တွန်းထားပါတယ်။

လက်ရှိ ရေဘေးကြုံတဲ့ဒေသတွေဟာ စစ်ကောင်စီက မြို့ပေါ်တွေကိုသာ ထိန်းချုပ်ထားနိုင်ပြီး ပတ်ဝန်းကျင်ကျေးရွာတွေကို တော်လှန်ရေးတပ်ဖွဲ့တွေက ထိန်းချုပ်ထားတာဖြစ်ပါတယ်။ ရေဘေးသင့်ပြည်သူတွေအနေနဲ့ လိုအပ်တဲ့အကူအညီကိုဆက်သွယ်တောင်းခံနိုင်တယ်လို့ တော်လှန်ရေးအင်အားစုတွေက ထုတ်ပြန်ထားပြီး ထိန်းချုပ်ဒေသတွေအတွင်း ကူညီကယ်ဆယ်ရေးလုပ်ငန်းတွေမှာပူးပေါင်းဆောင်ရွက်နေတယ်လို့ တော်လှန်ရေးရဲဘော်တွေကပြောပါတယ်။

တောင်မြေပြိုမှုတွေဆက်ရှိနေပြီး အခက်အခဲတွေကြားကနေ ကူညီကယ်ဆယ်ရေးလုပ်ဆောင်နေတယ်လို့ အရပ်ဖက်အဖွဲ့အချို့ကပြောပါတယ်။ ဒေသအသီးသီးက ပရဟိတအဖွဲ့တွေအနေနဲ့လည်း ထားဝယ်ဒေသကို လာရောက်ကူညီကြဖို့ တောင်းဆိုထားကြပါတယ်။ လက်ရှိရင်ဆိုင်နေရတဲ့ရေဘေးနဲ့မြေပြိုမှုဘေးဟာ ဒေသခံတွေအတွက် ထိခိုက်ဆုံးရှုံးမှုအလွန်ကြီးမားခဲ့ပြီး ပြန်လည်ထူထောင်ရေးအတွက် အကူအညီတွေလိုအပ်တယ်လို့ ဒေသခံတွေက ပြောပါတယ်။

တပ်စခန်းဗုံးကြဲခံရမှု ဖမ်းခံရတဲ့ရဲဘော်တွေနဲ့ ဘက်ပြောင်းသူတွေရဲ့ ထွက်ဆိုချက်ကြောင့်ဟု အထူးတိုင်းစစ်ဌာန ထုတ်ပြန်

စက်တင်ဘာ ၃၀၊ ၂၀၂၆။ထားမြတ်/People’s Spring

ပြည်သူ့ကာကွယ်ရေးတပ်မတော်၊ အထူးတိုင်းစစ်ဌာနရဲ့ ဆက်သွယ်ရေးစခန်း လေကြောင်းကနေ ဗုံးကြဲတိုက်ခိုက်ခံရတာဟာ ရန်သူက ဖမ်းမိသွားတဲ့ တပ်ပြေး၊နှုတ်ထွက် ရဲဘော်တွေနဲ့ ရန်သူ့ထံ ဘက်ပြောင်း ခိုလှုံသွားသူတွေရဲ့ သတင်းပေးထွက်ဆိုချက်ဟာ အဓိကအကြောင်းအရင်းဖြစ်တယ်လို့ စုံစမ်းသိရကြောင်း အထူးတိုင်းစစ်ဌာနက သတင်းထုတ်ပြန်ပါတယ်။

စက်တင်ဘာ ၂၄ရက်က အထူးတိုင်းစစ်ဌာန တပ်စခန်းကို စစ်တပ် တိုက်လေယာဉ် ၂စီးက ဗုံးသီး ၄လုံး ကြဲချခဲ့ရာ ၂လုံး ထိမှန်ခဲ့လို့ လုံခြုံရေး တပ်ဖွဲ့ဝင် ၂ဦး၊ ဆက်သွယ်ရေးရဲဘော် ၂ဦး ၊ CDM တပ်ကြပ်ကြီ ၁ဦး စုစုပေါင်း ၅ဦး ကျဆုံးကာ ၃ဦး ဒဏ်ရာရခဲ့တယ်လို့ အသိပေးပါတယ်။

အခုလို ဗုံးကြဲခံရတဲ့ အကြောင်းအရင်းကို ထုတ်ပြန်တာဟာ လေကြောင်းတိုက်ခိုက်ခံရမှု ဖြစ်စဉ်နဲ့ ပတ်သက်ပြီး စစ်တပ်က အချင်းချင်း သွေးကွဲစေရန် ဝါဒဖြန်ချိနေတာကြောင့် ဖြစ်တယ်လို့လည်း အထူးတိုင်း စစ်ဌာနက ဖော်ပြထားပါတယ်။

လေကြောင်းတိုက်ခိုက်ခံရမှုကြောင့် အထူးတိုင်းစစ်ဌာန တိုင်းကွပ်ကဲရေးမှူး ရဲဘော်အောင်စံရှားနဲ့ CDM အရာရှိ ဗိုလ်မှူးတင်လင်းအောင်တို့ ဒဏ်ရာရရှိခဲ့တယ်လို့ သတင်းရင်းမြစ်အချို့က ပြောပေမဲ့ အခုထုတ်ပြန်ချက်မှာတော့ ဖြစ်စဉ်နဲ့ပတ်သက်တဲ့ အသေးစိတ် အချက်အလက်တွေ ဖော်ပြမထားပါဘူး။

PDF တပ်မှူးတစ်ဦးကတော့ ကွပ်ကဲရေးမှူး ရဲဘော်အောင်စံရှား ဒဏ်ရာရခဲ့ပေမဲ့ အသက်အန္တရာယ် စိုးရိမ်စရာမရှိဘူးလို့ စက်တင်ဘာ ၂၄ရက်က ပြောထားပါတယ်။

ဒါ့အပြင် အထူးတိုင်းစစ်ဌာန တိုင်းကွပ်ကဲရေးမှူး ရဲဘော်အောင်စံရှားက လေကြောင်းတိုက်ခိုက်ခံရအပြီး နောက်တနေ့မှာ ပြုလုပ်တဲ့ အထူးတိုင်းစစ်ဌာနရဲ့ ရန်ပုံငွေ ရှာဖွေရေးကမ်ပိန်းကတဆင့် စာနဲ့ သတင်းစကား ပြောကြားခဲ့ရာ စိတ်မပူကြဖို့ အတူတူ သန်မာကြစို့ဟု တိုက်တွန်းထားတာရှိပါတယ်။

အထူးတိုင်းစစ်ဌာန ရဲဘော်တွေကလည်း လေကြောင်းတိုက်ခိုက်ခံရချိန်မှာ ခွန်အားရှိကြောင်း ပြသကြရမှာ ဖြစ်ကြောင်း ပြောကြားကာ လုပ်စရာရှိတာ ဆက်လုပ်သွားမယ်လို့ ရန်ပုံငွေရှာဖွေမှု ကမ်ပိန်းမှာ ပြောကြားကာ ပြည်သူတွေအနေနဲ့ ၀ိုင်းဝန်း ပါဝင်ပေးကြဖို့ တောင်းဆိုထားပါတယ်။

(အထူးတိုင်းစစ်ဌာနက ရဲဘော်တွေကို တွေ့ရစဉ်။ ဓာတ်ပုံ - အထူးတိုင်းစစ်ဌာန)

စစ်ကိုင်းတံတားမှာ မီနီအိုးဝေသမား ပေါ်တာဆွဲခံရ

စက်တင်ဘာ-၃၀၊ ၂၀၂၆။ဟာနာဆန်/People’s Spring

စစ်ကိုင်းတံတားမှာ မီနီအိုးဝေသမားတစ်ဦး စစ်မှုထမ်းဖို့ ပေါ်တာဆွဲခံရပြီး အိုးဝေကိုပါ သိမ်းဆည်းခံလိုက်ရကြောင်း စစ်ကိုင်းဒေသခံအချို့က ပြောပါတယ်။

ပြီးခဲ့တဲ့ စက်တင်ဘာ တတိယပတ်အတွင်းက စစ်ကိုင်းမြို့အထွက် ရတနာပုံတံတား စစ်ဆေးရေးဂိတ်မှာ မန္တလေးမြို့ဘက်ကနေ မီနီအိုးဝေ သုံးဘီးယာဥ်မောင်းနှင်လာတဲ့ အသက် ၃၀ ကျော် အမျိုးသားတစ်ဦးကို အာဏာသိမ်းစစ်တပ်က စစ်မှုထမ်း ပေါ်တာဆွဲသွားခြင်းဖြစ်ကြောင်း စစ်ကိုင်းမြို့ခံအချို့က ပြောပါတယ်။

"သူက စစ်ကိုင်းဘက်ကို အလုပ်ကိစ္စရှိလို့လာတာကို ပေါ်တာဆွဲခံလိုက်ရတာ။ အိုးဝေလည်းသိမ်းသွားတယ်"လို့ စစ်ကိုင်းမြို့ခံတစ်ဦးက ပြောပါတယ်။

အိုးဝေသမားကို စစ်မှုထမ်းသင်တန်းကျောင်းကို ချက်ချင်းပို့ဆောင်လိုက်တယ်လို့ မြို့ခံအချို့က ပြော​ပါတယ်။ ရတနာပုံတံတားက စစ်ဆေးရေးဂိတ်တွေဟာ လူငယ်တွေကို စစ်မှုထမ်းပေါ်တာဆွဲလေ့ရှိတာကြောင့် လူငယ်တွေ အသွားအလာနည်းပါးသွားကြောင်း သိရပါတယ်။

အာဏာသိမ်းစစ်တပ်ဟာ လာမယ့် အောက်တိုဘာမှာ စစ်မှုထမ်းအပတ်စဥ် (၂၉)ကို စတင်ဖို့ ကြိုးစားနေပါတယ်။ ဒါကြောင့် ရန်ကုန်၊ မန္တလေးအပါအဝင် မြို့ကြီးတွေမှာ စစ်မှုထမ်းဆင့်ခေါ်တာ၊ ပေါ်တာဆွဲဖမ်းဆီးတာတွေ ဆက်တိုက် ပြုလုပ်နေပါတယ်။

အာဏာသိမ်း စစ်တပ်ဟာ ၂၀၂၄ ဇူလိုင်ကနေ ၂၀၂၆ သြဂုတ်အတွင်း ပြည်သူ့စစ်မှုထမ်း(ပစ) အပတ်စဥ် (၂၇) ခု ဖွင့်လှစ်ခဲ့ပြီး အင်အား (၁၃၅,၀၈၀) ခန့်ကို အဓမ္မစုစည်းခဲ့ကြောင်း၊ ယခုအခါ ၎င်းအင်အားကို အသုံးချပြီး လူလှိုင်းစစ်ဆင်ရေးတွေနဲ့ နိုင်ငံအနှံ့ထိုးစစ်ဆင် တိုက်ခိုက်နေပြီး စစ်တပ်ရဲ့ စစ်ကြောင်းတွေမှာ ပြည်သူ့စစ်မှုထမ်း(ပစ) အင်အား (၈၀) ရာခိုင်နှုန်းခန့်အထိ ပါဝင်နေတာကို တွေ့ရတယ်လို့ NUG ကာကွယ်ရေးဝန်ကြီးဌာနက ပြီးခဲ့တဲ့ စက်တင်ဘာ ၁၈ ရက်က အသိပေးခဲ့ပါတယ်။

စစ်တပ်ရဲ့ ထိုးစစ်အခြေအနေကိုကြည့်ရင် ပြည်သူ့စစ်မှုထမ်း(ပစ) သိန်းချီ အင်အားကို အလောင်းအစားပြုပြီး ကမူးရှုးထိုး ထိုးစစ်ဆင် ဆောင်ရွက်နေပေမဲ့ ဘယ်စစ်မျက်နှာမှာမှ လိုရာမရောက်ဘဲ ပြည်သူ့တော်လှန်ရေးအဖွဲ့အစည်းတွေရဲ့ ထိရောက်တဲ့ တိုက်ခိုက်ချေမှုန်းမှုတွေကြောင့် ထိခိုက်ဆုံးရှုံးမှု အလွန်များပြားနေတာကို တွေ့ရကြောင်း၊ ၎င်းထိခိုက်ဆုံးရှုံးမှုတွေအနက် အများစုမှာ အဓမ္မစစ်သားစုဆောင်းခံရသူ ပြည်သူ့စစ်မှုထမ်း(ပစ)များ ဖြစ်တာကိုလည်း တွေ့ရကြောင်း NUG ရဲ့ ကာကွယ်ရေးဝန်ကြီးဌာနက အသိပေးပါတယ်။

ဒါ့ကြောင့် အရွယ်ရောက်ပြီး လူငယ်တွေ အနေနဲ့လည်း စစ်အုပ်စုရဲ့ အဓမ္မစစ်သားစုဆောင်းခံရမယ့်အရေးကို နည်းလမ်းစုံသုံးပြီး ရှောင်ရှားကြဖို့ လိုအပ်နေကြောင်း NUG ရဲ့ ကာကွယ်ရေးဝန်ကြီးဌာနက ထပ်မံ အသိပေးပါတယ်။

(စစ်ကိုင်းမြို့အဝင် စစ်တပ်စစ်ဆေးရေးဂိတ်ကို တွေ့ရစဥ်။ ဓာတ်ပုံ - စစ်ကောင်စီ)

အမရပူရမှာ ဒုဋ္ဌဝတီမြစ်ကမ်းပြိုလို့ နေအိမ် ၅ လုံးပြိုကျပြီး နေအိမ်တွေ အရေးပေါ် ရွှေ့ပြောင်းရ

စက်တင်ဘာ ၃၀၊ ၂၀၂၆။ မေရီ/People's Spring

မန္တလေးတိုင်း၊ အမရပူရမြို့နယ်၊ ဥယျာဥ်တော်ကျေးရွာမှာ ဒုဋ္ဌဝတီမြစ်ကမ်းပါးပြိုလို့ နေအိမ် ၅ လုံး ပြိုကျခဲ့ပြီး ကျန်နေအိမ်တွေလည်း အရေးပေါ် ရွှေ့ပြောင်းနေရကြောင်း ဒေသခံတွေက ပြောပါတယ်။

ဒီကနေ့ မနက်ပိုင်းက အမရပူရမြို့နယ်၊ ဥယျာဥ်တော်ကျေးရွာ၊ ဒုဋ္ဌဝတီမြစ်ကမ်းဘေးရှိ နေအိမ် ၅ လုံး ကမ်းပါးပြိုကျမှုဖြစ်ပွားခဲ့ကြောင်း ဒေသခံတွေက ပြောပါတယ်။ "လူတွေမပါဘူး။ အကုန်အိကျသွားတာ"လို့ ဒေသခံတစ်ဦးက ပြောပါတယ်။

ဒေသခံတွေအဆိုအရ ယမန်နေ့က မိုးသည်းထန်စွာသွန်းတာအပြင် ယမန်နေ့ညပိုင်းက အင်အားအနည်းငယ်ရှိတဲ့ မြေငလျင်တစ်ခုလည်း လှုပ်ခတ်သွားခဲ့တာကြောင့် မြေပြိုကျမှုတွေ ဖြစ်ပွားတာဖြစ်နိုင်ကြောင်း ပြောဆိုနေကြပါတယ်။

လက်ရှိ ကမ်းပါးပြိုကျရာအနီးဝန်းကျင်က ကျန်တဲ့နေအိမ်တွေကိုလည်း အရေးပေါ် ရွှေ့ပြောင်းပေးနေကြောင်း မြန်မာနိုင်ငံလူမှုကယ်ဆယ်ရေးအဖွဲ့ (မန္တလေးတိုင်းရုံး)က ထုတ်ပြန်ထားပါတယ်။

လက်ရှိ ထားဝယ်မြို့နယ်မှာလည်း ရေကြီးရေလျှံမှုနဲ့ တောင်ပြိုမှုတွေဖြစ်ပွားနေပြီး ပြည်သူ ၃၂ ဦး သေဆုံးကာ လူနေအိမ်နဲ့ ဘာသာရေးအဆောက်အဦးတွေ အပါအဝင် အဆောက်အဦးပေါင်း ၃၀၀ ဝန်းကျင်၊ ငါးဖမ်းလှေအစီးရေ ၅၀ ဝန်းကျင် ပျက်စီးဆုံးရှုံးခဲ့ရတယ်လို့ ထားဝယ်အမျိုးသားအဖွဲ့ချုပ်က ထုတ်ပြန်ထားပါတယ်။