(စက်တင်ဘာ ၂၀ ရက်က စစ်တပ်ဗုံးကြဲမှုကြောင့် ပျက်စီးသွားခဲ့တဲ့ ပေါက်တောမြို့နယ် တောင်းဖူးဘုရား။ ဓါတ်ပုံ - AA Info Desk)

ရန်ကုန်-ပြည်လမ်းပိုင်းက စစ်တပ်ဂိတ်စခန်းကို တော်လှန်ရေးတပ်တွေ စီးနင်းတိုက်ခိုက်

စက်တင်ဘာ-၂၈၊၂၀၂၆။မိုမို/People's Spring

ရန်ကုန် - ပြည်လမ်းပိုင်းက အာဏာသိမ်းစစ်တပ်ဂိတ်စခန်းကို တော်လှန်ရေးတပ်တွေ ၀င်ရောက်စီးနင်း တိုက်ခိုက်ခဲ့တယ်လို့ သာယာ၀တီခရိုင် ပြည်သူ့ကာကွယ်ရေးတပ်တာ၀န်ရှိသူက လူထုနွေဦးကို ပြောပါတယ်။

မနေ့က(စက်တင်ဘာ ၂၇ရက်) မနက် ၄နာရီ၀န်းကျင်ကစပြီး အုတ်ဖိုမြို့နယ်၊ အိုးသည်ကုန်းမြို့၊ ဂုံညင်းတန်းတာဆုံ စစ်ဆေးရေးဂိတ်ကို စီးနင်းတိုက်ခိုက်ခဲ့မှုအတွင်း စစ်တပ်က ထိခိုက်မှုရှိတယ်လို့ ဆိုပါတယ်။

"ရန်ကုန်ပြည်လမ်းဆိုတော့ နေရာက သူတို့ (အာဏာသိမ်းစစ်တပ်)အတွက် အတော်အရေးပါတဲ့နေရာတစ်ခုပါ။စစ်ကြောင်းအလိုက် စစ်ကူလာလို့ ပြန်ဆုတ်ခဲ့ရတယ်"လို့ အထက်ပါတာ၀န်ရှိသူက တိုက်ခိုက်မှု ဖြစ်စဉ်ကို ရှင်းပြပါတယ်။

၁နာရီ၀န်းကျင်ကြာတိုက်ပွဲအတွင်း စစ်တပ်က ထိခိုက်မှုရှိပြီး အခြေအနေအသေးစိတ်ကိုတော့ စုံစမ်းဆဲလို့ အသိပေးပါတယ်။

"ပုံမှန်တွေ့နေကြအင်အားက ၁၅ ယောက်ကနေ ၂၀ ကြားရှိတယ်။ကားတွေကို ဆက်ကြေးတောင်းကြမ်းသလို ပေါ်တာဆွဲကြမ်းတဲ့ ပျူခေါင်းဆောင်စိုးမင်းဂိတ်ထိုင်ရာ စခန်းလဲဖြစ်ပါတယ်"လို့ အုတ်ဖိုဒေသခံတစ်ဦးက ဂုံညင်းတန်းတာဆုံဂိတ်အကြောင်းကို ပြောပါတယ်။

စစ်တပ်စစ်ကူစစ်ကြောင်းက ဂုံညင်းတန်းတာဆုံဂိတ် အရှေ့ဘက်ခြမ်းမှာရှိတဲ့ ဒီးဒူးပင်နဲ့ ဘုတ်သိုးကျေးရွာတွေဘက်ထိ ၀င်ရောက်ခဲ့ပြီး ဒေသခံ ၂ဦးကို ဖမ်းဆီးသွားတယ်လို့ သိရပါတယ်။ဖမ်းဆီးခံရတဲ့ ‌ပြည်သူ ၂ဦးနဲ့ပတ်သက်တဲ့နောက်ဆက်တွဲအခြေအနေကို လူထုနွေဦးက ဆက်လက်စုံစမ်းနေဆဲ ဖြစ်ပါတယ်။

အိုးသည်ကုန်းမြို့ အောက်ဘက်ခြမ်းမှာရှိတဲ့ မင်းလှနဲ့ လက်ပံတန်းမြို့နယ်တွေမှာလည်း စစ်တပ်စစ်ကြောင်းထိုးနေတာကြောင့် အခု စက်တင်ဘာထဲ တိုက်ပွဲတွေ မကြာခဏ ဖြစ်နေပါတယ်။

တော်လှန်ရေးအားကောင်းတဲ့ ပဲခူးရိုးမအနောက်ခြမ်းက လက်ပံတန်း၊မင်းလှ၊အုတ်ဖို၊နတ်တလင်း မြို့နယ်ကို နယ်မြေ အသာစီးရယူဖို့ အာဏာသိမ်းစစ်တပ်နဲ့ တော်လှန်ရေးတပ်တွေ အပြန်အလှန်ကြိုးစားနေပါတယ်။

ဒါကြောင့်လည်း တိုက်ပွဲတွေမကြာခဏ ဖြစ်နေပြီး ရန်ကုန်-ပြည် ကားလမ်းဘေးက စစ်တပ် ဂိတ်စခန်းတွေ၊ ကျေးရွာအချို့က စခန်းတွေနဲ့ စစ်တပ်ဂိတ်စခန်းတွေ အပါအ၀င် လက်ပံတန်းမြို့နယ်၊ ဆင်တလင်းကျေးရွာရှိ စစ်တပ် အထိုင်စခန်းကြီးတစ်ခုကို ပြီးခဲ့တဲ့နှစ်ကုန် ပိုင်းက တော်လှန်ရေးတပ်တွေ သိမ်းပိုက်ဖူးပါတယ်။

(ရန်ကုန်-ပြည်လမ်းပိုင်းက စစ်တပ်ဂိတ်စခန်းကို တော်လှန်ရေးတပ်တွေ စီးနင်းတိုက်ခိုက်နေစဉ်။ ဓာတ်ပုံ - Screengrab)

ဗန်းမော်မြို့က စစ်တပ် စခန်း ၁ခု သိမ်းပိုက်ခဲ့ဟု KIA ပြော

စက်တင်ဘာ၂၈၊၂၀၂၆။ထားမြတ်/People’s Spring

ကချင်ပြည်နယ်၊ ဗန်းမော်မြို့က စစ်တပ် နေရာယူနေတဲ့ စခန်း ၁ခုကို ကချင်လွတ်လပ်ရေးတပ်မတော်(KIA) ပူးပေါင်းတပ်က တိုက်ခိုက်သိမ်းပိုက်နိုင်ခဲ့ကြောင်း KIA သတင်းပြန်ကြားရေးဌာနက ဖော်ပြပါတယ်။

ဗန်းမော်မြို့ နမ့်ဖားကျေးရွာမှာ တပ်စွဲထားတဲ့ စစ်တပ်စခန်းကို စက်တင်ဘာ ၂၆ရက် ညနေပိုင်းမှာ သိမ်းပိုက်နိုင်ခဲ့တာလို့ ဆိုပါတယ်။

စက်တင်ဘာ ၂၇ရက်မှာလည်း ဗန်းမော်မြို့မှာ တိုက်ပွဲ ပြင်းထန်ခဲ့ပြီး စစ်တပ်က လေကြောင်း တိုက်ခိုက်မှု လုပ်ဆောင်ခဲ့တယ်လို့ အသိပေးပါတယ်။

လက်တလောမှာ စစ်တပ်ဟာ ဗန်းမော်မြို့တွင်း စစ်ရေးလှုပ်ရှားမှုတွေ ပြုလုပ်တာ လက်နက်ကြီးတွေနဲ့ ရမ်းသန်း ပစ်ခတ်တာတွေ လုပ်ဆောင်နေတယ်လို့ ဖော်ပြပါတယ်။

ကချင်သတင်းရင်းမြစ်အချို့ရဲ့ ပြောပြချက်အရ စက်တင်ဘာ လကုန်ပိုင်း ဗန်းမော်တိုက်ပွဲ အတွင်း စစ်ကောင်စီတပ်ထံက အလောင်း လက်နက် သိမ်းရတာ သုံ့ပမ်းတွေ ဖမ်းမိတာတွေရှိခဲ့တယ်လို့ ဆိုပါတယ်။
လူမှုကွန်ရက်မှာ ရေးသားဖော်ပြနေတဲ့ ဗန်းမော်တိုက်ပွဲအတွင်း စစ်တပ် ရဲ့သံချပ်ကာယာဉ်အချို့ သိမ်းရတယ်ဆိုတာ လတ်တလော ဖြစ်စဉ်တွေ မဟုတ်ဘူးလို့လည်း ကချင်စစ်ရေးသတင်းရင်းမြစ်က ပြောပါတယ်။

KIA ပူးပေါင်းတပ်ဟာ ဗန်းမော်မြို့သိမ်းတိုက်ပွဲကို ၂၀၂၄ ဒီဇင်ဘာက ဖော်ဆောင်ခဲ့ရာ ၂၀၂၅ နှစ်ဆန်းပိုင်း တိုက်ပွဲတွေအတွင်း စစ်ကောင်စီရဲ့ ဗန်းမော်အခြေစိုက် သံချပ်ကာတပ်ရင်း၊ တင့်ကား တပ်ရင်း၊ ခြေလျင်တပ်ရင်း အချို့အပါအဝင် တပ်စခန်းနေရာ အများအပြားကို သိမ်းပိုက်နိုင်ခဲ့ကာ သံချပ်ကာယာဉ်တွေကို သိမ်းရတာ တိုက်ခိုက်ဖျက်ဆီးနိုင်ခဲ့တာတွေ ရှိခဲ့ပါတယ်။

ဒါ့အပြင် ဗန်းမော်မြို့ကို စစ်ကူလာတဲ့ စစ်တပ်ရယာဉ်တွေကို တိုက်ခိုက်ဖျက်ဆီးတာ၊ စစ်အင်အားဖြည့်တင်းဖို့ ကြိုးပမ်းတဲ့ စစ်တပ်သင်္ဘောတွေကိုတိုက်ခိုက်ဖျက်ဆီးတာတွေလည်း KIA ပူးပေါင်းတပ်က လုပ်ဆောင်ခဲ့ပြီး စစ်တပ်ဟာ အထိနာခဲ့ပါတယ်။

(၂၀၂၅ ဇန်နဝါရီနောက်ဆုံးပတ်က ဗန်းမော်လေယာဉ်ကွင်းအတွင်း တွေ့ရသော KIA ၊ KPDF တပ်ဖွဲ့ဝင်များ။ ဓာတ်ပုံ - Screengrab)

မြင်းခြံမြို့ အေးမြသီတာစျေး မီးလောင်၊ ဆိုင်ခန်းနဲ့ ပွဲရုံတွေ မီးထဲပါ

စက်တင်ဘာ ၂၈၊ ၂၀၂၆။ဟာနာဆန်/People's Spring

မန္တလေးတိုင်း၊ မြင်းခြံမြို့၊ မီးသတ်ရုံးဘေးက အေးမြသီတာစျေး မီးလောင်မှုဖြစ်ပွားခဲ့ရာ ဆိုင်ခန်းနဲ့ ပွဲရုံတွေ မီးထဲပါသွားကြောင်း ဒေသခံတွေက ပြောပါတယ်။

မနေ့က စက်တင်ဘာ ၂၇ ရက် ည ၈ နာရီခန့်က မြင်းခြံမြို့နယ်၊ အမှတ်(၇)ရပ်ကွက်ရှိ အေးမြသီတာစျေး မီး​​လောင်ကျွမ်းမှုဖြစ်ပွားခဲ့ရာ နာရီဝက်ခန့် လောင်ကျွမ်းခဲ့ပြီး ဆိုင်ခန်းတွေနဲ့ ငရုတ်၊ ကြက်သွန် အစရှိတဲ့ ပွဲရုံတန်းတွေ မီးထဲပါသွားကြောင်း ဒေသခံအချို့က ပြောပါတယ်။

"တစ်ရုံလုံး ကုန်တာ။ မီးသတ်ရုံးကလည်း စျေးနဲ့ ကပ်ရပ်ပဲ"လို့ မြင်းခြံဒေသခံတစ်ဦးက ပြောပါတယ်။

မီးလောင်ကျွမ်းရတဲ့အကြောင်းအရင်းနဲ့ ပျက်စီးဆုံးရှုံးခဲ့တဲ့ ဆိုင်ခန်းအရေအတွက် မသိရသေးပါဘူး။

မြင်းခြံမြို့နယ်ဟာ အာဏာသိမ်းစစ်တပ်နဲ့ တော်လှန်ရေးအဖွဲ့တွေ တိုက်ပွဲမကြာခဏ ဖြစ်ပွားနေတဲ့ဒေသဖြစ်ပြီး မြို့ပေါ်မှာလည်း စစ်မှုထမ်းခေါ်ယူတာတွေရှိနေတဲ့အတွက် ပြပြည်သူတွေဟာ လုံခြုံရေးစိုးရိမ်နေရတဲ့အခြေအနေ ရှိနေတယ်လို့ သိရပါတယ်။

(အေးမြသီတာစျေး မီးလောင်နေစဥ် ဓါတ်ပုံံ - MFSD)

ရခိုင်ပြည်နယ်က မြို့နယ် ၈ခုကို စစ်တပ် ဆက်တိုက်ဗုံးကြဲ၊ အရပ်သားတွေ ထပ်မံသေဆုံး

စက်တင်ဘာ ၂၈၊ ၂၀၂၆။ ထားမြတ်/People’s Spring

အာရက္ခတပ်တော်(AA) ထိန်းချုပ်ထားတဲ့ ရခိုင်ပြည်နယ်က မြို့နယ် ၈ခုကို အာဏာသိမ်းစစ်တပ်က လေကြောင်းကနေ ဗုံးကြဲတိုက်ခိုက်မှုတွေ ဆက်တိုက်လုပ်ဆောင်ခဲ့လို့ ပြည်သူသေဆုံးထိခိုက်မှုတွေ ထပ်မံ ဖြစ်ပေါ်ခဲ့ကြောင်း AAက သတင်းထုတ်ပြန်ပါတယ်။

စက်တင်ဘာ ၁၇ရက်ကနေ ၂၇ရက်အထိ ၁၁ရက်တာ အတွင်း စစ်တပ်က မြောက်ဦး၊ သံတွဲ၊ ပုဏ္ဏားကျွန်း၊ ရသေ့တောင်၊ ပေါက်တော၊ဂွ၊ ကျောက်တော်၊ မင်းပြားနဲ့ အမ်း စတဲ့ မြို့နယ်တွေကို လေကြောင်းဗုံးကြဲတိုက်ခိုက်ခဲ့ကြောင်း အသိပေးထားပါတယ်။

AAက ဖော်ပြတဲ့ စာရင်းအရ ၁၁ရက်တာ အတွင်းလေကြောင်း တိုက်ခိုက်ခံရမှုကြောင့် အရပ်သားပြည်သူ ၆ဦးထက်မနည်းသေဆုံးကာ ၁၆ဦး ဒဏ်ရာရရှိခဲ့ပါတယ်။ သေဆုံးသူအများစုဟာ သက်ကြီးရွယ်အိုတွေဖြစ်ပြီး ပုဏ္ဏားကျွန်းနဲ့ ရသေ့တောင်မြို့နယ်မှာ နေထိုင်သူတွေ ဖြစ်ပါတယ်။ ဒဏ်ရာရသူတွေထဲမှာ ကလေးငယ်အချို့လည်း ပါဝင်ပါတယ်။

စစ်တပ်ဟာ စစ်မျက်နှာပြင်တိုင်း စစ်ရေးအရှုံးနဲ့ ရင်ဆိုင်နေရတာကြောင့်  အာရက္ခပြည်အနှံ မြိုရွာများအား ရှုံးမဲမဲကာ လေကြောင်း တိုက်ခိုက်နေတာလို့ ဆိုပါတယ်။   

စစ်ရေးပစ်မှတ်မဟုတ်တဲ့ စာသင်ကျောင်း၊ ဘာသာရေးအဆောက်အအုံ၊ ဆေးရုံ၊ ဆေးခန်း၊ စစ်ဘေးရှောင်နေရာနဲ့  အပြစ်မဲ့ပြည်သူများနေထိုင်ရာ နေရာများအား သူရဲဘောကြောင်စွာ နေ့စဉ် ရက်ဆက် နေ့ည လေကြောင်းဗုံးကြဲနေတာဖြစ်ကြောင်း ထိခိုက်ပျက်စီးမှုနဲ့ သေဆုံးထိခိုက် အခြေအနေ မှတ်တမ်းဓာတ်ပုံတွေ ဖော်ပြ အသိပေးထားပါတယ်။စစ်တပ်ရဲ့ တိုက်ခိုက်မှုကြောင့် အိမ်မွေးတိရိစ္ဆာန်တွေ သေဆုံးထိခိုက်မှုလည်း ရှိခဲ့ပါတယ်။
အာဏာသိမ်းစစ်တပ်ဟာ လာမယ့် ပွင့်လင်းကာလမှာ အခုထက်ပိုတဲ့ စစ်အင်အားတွေသုံးပြီး ကြည်း၊ရေ၊လေ ထိုးစစ်ကြီး လုပ်ဆောင်လာနိုင်လို့ စစ်မျက်နှာ ၇ခုမှာ တိုက်ပွဲတွေ ပိုပြင်းထန်နိုင်ဟု
အာရက္ခတပ်တော်(AA) ဒုစစ်ဦးစီးချုပ် ဒေါက်တာညိုထွန်းအောင်က စက်တင်ဘာ ၂၇ရက်မှာ ထုတ်ပြန်တဲ့ ရက္ခိုင်အမျိုးသားအဖွဲချုပ်(ULA/AA)ရဲ့ ပါတီစာဆောင်မှု အသိပေးထားပါတယ်။

အခုနှစ် မိုးနှောင်းရာသီမှာ စစ်တပ်က အရင်ထိုးစစ်ဆင်တိုက်ခိုက်နေတဲ့နေရာတွေဖြစ်တဲ့ စစ်တွေ၊ကျောက်ဖြူ၊ ရခိုင်-မကွေးအစပ်၊ အာရက္ခ-ပဲခူးအစပ်၊ ရခိုင်-ဧရာဝတီတိုင်းအစပ်၊ ချင်းပြည်-ပလက်ဝ-ရခိုင်အစပ်နဲ့ အာရက္ခကမ်းရိုးတန်းဖက်တွေမှာ လက်ရှိ အသုံးပြုနေတဲ့ စစ်အင်အားထက်နှစ်ဆ သုံးဆ တိုးပြီး ကြည်း၊ရေ၊လေထိုးစစ်ကြီးကိုတပြိုင်တည်းလုပ်လာနိုင်လိုစစ်ရိပ်စစ်ငွေ့သန်းလာနေတာကို တွေ့နေရတယ်လို ဒေါက်တာညိုထွန်းအောင်က ရခိုင်ဘာသာနဲ့ အသိပေးထားပါတယ်။

တနင်္သာရီတိုင်းက ရေဘေးသင့်ပြည်သူတွေကို တော်လှန်ရေးတပ်တွေ ကူညီကယ်ဆယ်နေ

စက်တင်ဘာ၂၈၊၂၀၂၆။အိမ်သွင်/People's Spring

တနင်္သာရီတိုင်းအတွင်း ရေဘေးသင့်ပြည်သူတွေအနေနဲ့ လိုအပ်တဲ့အကူအညီတွေ ဆက်သွယ်တောင်းခံနိုင်တယ်လို့ တော်လှန်ရေးအင်အားစုတွေကထုတ်ပြန်ထားပြီး ထိန်းချုပ်ဒေသတွေအတွင်း ကူညီကယ်ဆယ်ရေးလုပ်ငန်းတွေမှာပူးပေါင်းဆောင်ရွက်နေတယ်လို့ တော်လှန်ရေးရဲဘော်တွေက ပြောပါတယ်။

လောင်းလုံး၊ ထားဝယ်၊ သရက်ချောင်း၊ ရေဖြူ၊ မြိတ်မြို့နယ်တွေမှာ ရေဘေးကြုံတွေ့နေပြီး လောင်းလုံးမြို့ဟာ လက်ရှိမှာ ရေဘေးနဲ့ မြေပြိုမှုအဆိုးဆုံးကြုံတွေ့နေရတဲ့ မြို့နယ်ဖြစ်ပါတယ်။ကယ်ဆယ်ရေး အကူအညီတွေ အရေး ပေါ်လိုအပ်နေတယ်လို့ဒေသခံတွေပြောပါတယ်။

တစ်မြို့နယ်လုံးအတွက် လွှမ်းခြုံဆောင်ရွက်နိုင်ရန်ဖို့ အကန့်သတ်တွေ ရှိနေပေမယ့် အန္တရာယ်ရှိနိုင်တဲ့ ကျေးရွာတွေက ပြည်သူတွေကို ဘေးကင်းနေရာသို့ ရွှေ့ပြောင်းပေးပြီးလိုအပ်တဲ့ အကူအညီတွေပေးနေတယ်လို့ လောင်းလုံးမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ထားပါတယ်။ရေကြီး၊ တောင်ပြိုအန္တရာယ်ရင်ဆိုင်နေရတဲ့ ကျေးရွာတွေမှာ အကူညီပေးနေတဲ့ အဖွဲ့အစည်း‌ေတွ၊ ဒေသခံပြည်သူတွေအနေနဲ့ အကူအညီလိုအပ်ရင် ဆက်သွယ်တောင်းခံဖို့လည် လောင်းလုံးမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ထားပါတယ်။

လောင်းလုံးနဲ့ သရက်ချောင်းမြို့နယ်အတွင်း ရေဘေးရင်ဆိုင်နေရတဲ့ပြည်သူတွေကို လာရောက်ကူညီကြမယ့် ကယ်ဆယ်ရေးအဖွဲ့တွေ ဒေသတွင်းမှာ အဆင်ပြေပြေသွားရောက်နိုင်ဖို့အတွက်လည်း နည်းဗျူဟာ (၃၃)ကွပ်ကဲမှုအောက်ရှိ တပ်ရင်း၊တပ်ဖွဲ့တွေနဲ့ နယ်မြေခံတော်လှန်ရေးတပ်ဖွဲ့တွေ ပူးပေါင်းပါဝင်ကူညီကြဖို့ တနင်္သာရီတိုင်းစစ်ဌာန၊နည်းဗျူဟာ (၃၃)က ဒီကနေ့ စက်တင်ဘာ၂၈ရက် မနက်ပိုင်းမှာ ထုတ်ပြန်ထားပါတယ်။

ထားဝယ်အမျိုးသားအဖွဲ့ချုပ်ကလည်း စက်တင်ဘာ ၂၄ ရက်ကစတင်ပြီး မိုးသည်းထန်စွာ ရွာသွန်းမှုကြောင့် ထားဝယ်ဒေသတစ်ဝန်း နေရာအနှံ့အပြားမှာ ရေကြီးရေလျှံမှုနဲ့ တောင်ပြိုမှုတွေ ဖြစ်ပွားနေပြီး ဒေသခံပြည်သူတွေအတွက် အကူအညီတွေလိုအပ်နေတယ်လို့ ထုတ်ပြန်ထားပါတယ်။

လောင်းလုံးနဲ့ သရက်ချောင်းမြို့နယ်တွေမှာ ထိခိုက်ပျက်စီးမှုအများဆုံးဖြစ်ပြီး ဒီကနေ့ မနက်ပိုင်းအထိ အရေး ပေါ်အခြေအနေတွေဖြစ်နေသေးတယ်လို့ တော်လှန်ရဲဘော်တွေနဲ့ဒေသခံတွေကပြောပါတယ်။ဒီနေ့မနက်မှာလည်း လောင်းလုံးမြို့နယ်ရဲ့ အနောက်ဘက်တောင်တန်းဟာ ဆက်လက် မြေပြိုနေပြီး အနီးပတ်ဝန်းကျင်မှာနေသူတွေ ဘေးလွတ်ရာကို တိမ်းရှောင်နေကြရပါတယ်။

လက်ရှိ ရေ ဘေးကြုံတဲ့ဒေသတွေဟာ စစ်တပ်က မြို့ပေါ်တွေကိုသာထိန်းချုပ်ထားနိုင်ပြီး ပတ်ဝန်းကျင်ကျေးရွာတွေကို တော်လှန်ရေးတပ်ဖွဲ့တွေက ထိန်းချုပ်ထားတာဖြစ်ပါတယ်။ ရေဘေးနဲ့ မြေပ်ြိုမှုအဆိုးဆုံးရင်ဆိုင်နေရတဲ့လောင်းလုံးမြို့မှာ မြို့ပေါ်ကိုပဲ ကူညီရေးလုပ်နိုင်ပြီး ကျေးရွာတွေကို မသွားရောက်နိုင်ဘူးလို့ စစ်တပ်က ယမန်နေ့ ညပိုင်းမှာ သတင်းထုတ်ပြန်ထားပါတယ်။

" မြို့ပေါ်က မဆိုးရွားဘူး။ အခြေအနေကရွာတွေမှာ ဆိုးတာ။ မိုးက မရပ်တော့ ရှေ့ဆက်ပြီး ကြောက်နေရတယ်"လို့ လောင်းလုံးမြို့ခံတစ်ဦးက ပြောပါတယ်။

သရက်ချောင်းမြို့နယ်မှာ ကြာအင်း ၊ ကြက်စာပြင် ၊ ကထီးဝ၊ညောင်ဇင်၊သူရဲတောင် ၊ ကင်းရှေ့ ၊ စော်ဖျား ၊သင်ကျွန်း၊ ဥတ္တူရွာ ၊ မဲနယ်အိုးရွာတွေမှာ ရေဘေးဆိုးရွားနေပြီ လူသေဆုံးမှုတွေလည်းရှိတယ်လို့ဒေသခံတွေကပြောပါတယ်။

ယခုရက်ပိုင်းမှာ ထိုင်းနိုင်ငံဘက်ကနေရွေ့လျားလာတဲ့ လေဖိအားနည်းရပ်ဝန်းကြောင့် မြန်မာနိုင်ငံဘက်မှာ မိုးကြီးပြီး တနင်္သာရီတိုင်းမှာ ရေဘေးနဲ့ မြေပြိုမှုဘေးရင်ဆိုင်နေရပါတယ်။ တနင်္သာရီတိုင်း၊ မွန်ပြည်နယ်၊ ကရင်ပြည်နယ်၊ ကရင်နီပြည်နယ်၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ ရခိုင်ပြည်နယ်၊ မကွေးတိုင်း၊စစ်ကိုင်းတိုင်းနဲ့မန္တလေးတိုင်းတို့တွင် မိုးသည်းထန်စွာရွာသွန်းနိုင်တယ်လို့အမျိုးသားညီညွတ်ရေးအစိုးရ၊လူမှုရေးရာ၊ အလုပ်သမားနဲ့လူသားချင်းစာနာထောက်ထားရေးဝန်ကြီးဌာန(MoSLHA) က သတိပေးထားပါတယ်။

(ထားဝယ်မြို့ပေါ် က ဘုမ္မော်ရပ်ကွက်ရုံး လမ်းဆုံရေကြီးနေတာကို တွေ့ရစဉ်။ ဓာတ်ပုံ - Thet Paing Soe/FB)

ဘန်ကောက်မှာရေဘေးကြုံနေရချိန် ဂျက်စကီးစီးပြတဲ့အမျိုးသားဖမ်းခံရ၊
ဗီဒီယို ကူရိုက်ပေးတဲ့အမျိုးသားလည်း ကြံရာပါအဖြစ်ထိန်းသိမ်းခံရ

စက်တင်ဘာ - ၂၈ ၊၂၀၂၆

ထိုင်းနိုင်ငံ၊ ဘန်ကောက်မြို့တော်က ရေကြီးနေတဲ့ လမ်းမကြီးတစ်ခုမှာ ရေပေါ်လျှပ်ပြေးဆိုင်ကယ် (ဂျက်စကီး) လျှောက်စီးနေတဲ့ အမျိုးသား အဖမ်းခံလိုက်ရပါတယ်။

ဘန်ကောက်ရဲ့ ရေလွှမ်းနေတဲ့ ဖက်ချာဘူရီ လမ်းမကြီးပေါ်မှာ ဂျက်စကီးတစ်စီး ဟိုဟိုဒီဒီ လှည့်လည်မောင်းနှင်နေတဲ့ ဗီဒီယိုဟာ လူမှုကွန်ရက်ပေါ်မှာ အတော်လေး လူပြောများခဲ့ပါတယ်။ ဒါပေမဲ့ အဲဒီ ဂျက်စကီး ပိုင်ရှင်ဟာ စက်တင်ဘာ ၂၇ ရက်နေ့မှာတော့ အဖမ်းခံခဲ့ရပါတယ်။

ဗီဒီယိုထဲမှာတော့ သူဟာ ဂျက်စကီးကို ခပ်ကြမ်းကြမ်း ချိုးကွေ့တာမျိုး အစွမ်းပြပြီး စီးနင်းနေတာကြောင့် လူအများရဲ့ စိတ်ဝင်စားမှုကို ရရှိခဲ့ပါတယ်။ တစ်ဖက်မှာလည်း အနီးတဝိုက်မှာ နေထိုင်သူတွေက သူ့ရဲ့လုပ်ရပ်က စိတ်အနှောင့်အယှက် ဖြစ်စရာ ကောင်းတယ်ဆိုပြီး ရဲတိုင်ခဲ့တာကြောင့် အသက် ၂၈ နှစ်အရွယ် အမျိုးသားဟာ အဖမ်းခံခဲ့ရတာ ဖြစ်ပါတယ်။

ဆွန်ကီယက်ဆီရီဆိုတဲ့ Facebook အကောင့်ပိုင်ရှင်ဟာ BKK Driftလို့ အညွှန်းစာ တပ်ထားတဲ့ ဗီဒီယို တစ်ခုမှာ ရေဖုံးနေတဲ့လမ်းပေါ် ဂျက်စကီး စီးနေပုံကို စတင် ဝေမျှခဲ့ပါတယ်။ သူ့ရဲ့ ဂျက်စကီးက အရှိန်နဲ့ မောင်းသွားတဲ့အခါ ပလက်ဖောင်းတွေ၊ လူသွားစင်္ကြံ တံတားတွေနဲ့ လမ်းဘေး နံရံတွေကို ရေတွေ စဉ်ကုန်တာ တွေ့ရပါတယ်။ တချို့ကားတွေက ရေလွှမ်းနေတဲ့လမ်းကို ဖြတ်မောင်းဖို့ ကြိုးစားရင်း တချို့ကားတွေကတော့ အင်ဂျင်ထဲ ရေဝင်လို့ ထိုးရပ်ထားရတဲ့ အချိန်မှာ သူက ဂျက်စကီးနဲ့ အစွမ်းပြနေခဲ့တာပါ။

အခုတော့ မက္ကာဆန်မြို့နယ် ရဲတပ်ဖွဲ့က အဲဒီဂျက်စကီးသမားကို အများပြည်သူ အနှောင့်အယှက် ဖြစ်စေမှု၊ ယာဉ်ကြော အနှောင့်အယှက် ဖြစ်စေမှုတွေနဲ့ ဖမ်းဆီးထားပါတယ်။ သူ့ရဲ့ နာမည်ကိုတော့ ရဲတွေက မထုတ်ပြန်ပါဘူး။ ဗီဒီယို ကူရိုက်ပေးခဲ့သူ အမျိုးသားကလည်း ကြံရာပါအဖြစ် အထိန်းသိမ်း ခံခဲ့ရပါတယ်။

ကနဦး စုံစမ်းမေးမြန်းမှုတွေမှာတော့ ဂျက်စကီးသမားက သူဟာ နိုင်ငံရပ်ခြားမှာ ဘွဲ့ရခဲ့သူဖြစ်ပြီး အခုလိုလုပ်တာက ထိုင်းမှာ ပြစ်မှုမြောက်မှန်း မသိဘူးလို့ ထွက်ဆိုထားပါတယ်။ သူက ခက်ခဲနေတဲ့ ကာလမှာ လူတွေ သဘောကျ ပျော်ရွှင်အောင် လုပ်ပေးချင်တဲ့ ဆန္ဒပဲ ရှိခဲ့တယ်လို့လည်း ပြောပါတယ်။

လောလောဆယ်တော့ ရဲတွေက ဂျက်စကီးကိုလည်း ထိန်းသိမ်းထားပြီး အဲဒီသိမ်းဆည်းမှု တရားဝင်စေဖို့ တရားရုံး ခွင့်ပြုချက် တောင်းခံသွားမယ်လို့လည်း သိရပါတယ်။

ကိုးကား - Bangkok Post ၊ ရုပ်သံ - ဆိုရှယ်မီဒီယာ

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ဘန်ကောက်ရေဘေး #ဂျက်စကီးစီးသူအဖမ်းခံရ #ထိုင်းနိုင်ငံသတင်း #နိုင်ငံတကာသတင်း #BangkokFloods #JetSkiArrested #BangkokFloodJetSki #ThailandNews #WorldNews
#ဗီဒီယိုရိုက်ကူးသူဖမ်းဆီးခံရ #ကြံရာပါအဖြစ်ထိန်းသိမ်းမှု #ထိုင်းနိုင်ငံသတင်း #နိုင်ငံတကာသတင်း #CameramanArrested #AccompliceDetained #ThailandNews #WorldNews

ဒီးမော့ဆိုအနောက်ခြမ်းကို စစ်တပ်က လေကြောင်းတိုက်ခိုက်မှု ဆက်တိုက်လုပ်နေ

စက်တင်ဘာ -၂၈၊၂၀၂၆။ဇော်၀င်း/People's Spring

ကရင်နီပြည်နယ်၊ ဒီးမော့ဆိုမြို့နယ်အနောက်ခြမ်းကို အာဏာသိမ်းစစ်တပ်က လေကြောင်းတိုက်ခိုက်မှုတွေ ဆက်တိုက်လုပ်နေတယ်လို့ ဒေသခံတချို့က ပြောပါတယ်။

ဒီကနေ့(စက်တင်ဘာ ၂၈ ရက်)မနက်ပိုင်းကတည်းကနေ နေ့လယ် ၁၂ နာရီခွဲခန့်အထိ အရပ်သားတွေနေထိုင်ရာ ကျေးရွာတွေနဲ့ စစ်ရှောင်ပြည်သူတွေ ရှိတဲ့နေရာတွေကို ပစ်မှတ်ထားတဲ့ လေကြောင်း တိုက်ခိုက်မှု ၄ ကြိမ်ထက်မနည်းရှိနေတယ်လို့ ဆိုပါတယ်။

" ဘာတိုက်ပွဲမှ မရှိဘူး။အဲဒီဘက်က စစ်ရှောင်တွေ အများစုနေကြတာ"လို့ လေကြောင်းတိုက်ခိုက်ခံရတဲ့ နေရာအကြောင်း သိရှိတဲ့ ကရင်နီဒေသခံတစ်ဦးက ‌ပြောပါတယ်။

အာဏာသိမ်းစစ်တပ်ရဲ့ လေကြောင်းတိုက်ခိုက်မှုတွေ၊ ဒရုန်း၊လက်နက်ကြီးနဲ့ ပစ်ခတ်မှုတွေဟာ နေ့စဉ်နီးပါး လုပ်နေပြီး အရပ်သားတွေကို ပစ်မှတ်ထားနေတာလို့ ကရသ်နီအမျိုးသားများကာကွယ်ရေးတပ် KNDF တာ၀န်ရှိသူက လူထုနွေဦးကို အသိပေးပါတယ်။

"လေကြာင်းတိုက်ခိုက်မှု၊ ဒရုန်း လက်နက်ကြီးတိုက်ခိုက်မှုတွေကတော့ ဒီးမော့ဆို၊ ဖရူဆို မြို့နယ်တွေမှာ ခစိပ်စိပ်ဖြစ်နေပါတယ််ခင်ဗျ။ အရပ်သားတွေကို ပစ်မှတ်ထားပြီးတော့ စစ်ကောင်စီဘက်က တိုက်ခိုက်တာပေါ့"လို့ သူက ပြောပါတယ်။

အခုစက်တင်ဘာ အတွင်းမှာ စစ်တပ်ရဲ့လေကြောင်းတိုက်ခိုက်မှုတွေကြောင့် ဒီးမော့ဆို၊လွိုင်ကော် နဲ့ မော်ချီး ဒေသမှာ ကလေးငယ်တွေ အပါအ၀င် အရပ်သား ၂၀ ကျော် ထိခိုက်သေဆုံးထားပါတယ်။

လက်ရှိ စစ်တပ်ဟာ မိုးဗြဲမြို့ကနေ ဒီးမော့ဆိုမြို့နယ်ဘက်ကို စစ်ကြောင်းထိုးနေသလို ဒီးမော့ဆိုမြို့အနီးမှာလည်း တော်လှန်ရေးတပ်တွေနဲ့ မကြာခဏ ထိတွေ့မှုရှိပါတယ်။

စစ်တပ်စစ်ကြောင်းဟာ တော်လှန်ရေးတပ်တွေရဲ့ခုခံမှုကြောင့် ရှေ့မတိုးနိုင်ဘဲ ရှမ်း-ကရင်နီနယ်စပ် အပါအ၀င် ဒီးမော့ဆို၊လွိုင်ကော် မြို့နယ် နေရာတချို့ကို ဒရုန်းတွေနဲ့ ဗုံးကြဲတာ လက်နက်ကြီးနဲ့ ပစ် ခတ်တာတွေ ရှိနေပါတယ်။

ရုပ်သံ - Karenni Hope


𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ဒီးမော့ဆိုလေကြောင်းတိုက်ခိုက်မှု #စစ်ကောင်စီလေကြောင်းတိုက်ခိုက်မှု #ကယားစစ်ရေး #ကရင်နီစစ်ရေး #မြန်မာ့စစ်ရေးသတင်း

နာဂဒေသမှာ လူငယ်တစ်ဦးကို သိန်း ၃၅၀နဲ့ ဝယ်ပြီး စစ်သင်တန်းပို့

စက်တင်ဘာ-၂၈၊ ၂၀၂၆။ ဇော်ရမ်း/People's Spring

နာဂ ကိုယ်ပိုင်အုပ်ချုပ်ခွင့်ရဒေသ၊ လေရှီးမြို့မှာ စစ်အုပ်စုက လူထုဆီက အတင်းအကျပ်တောင်းယူခဲ့တဲ့ ကျပ်သိန်း၃၅၀နဲ့ လူငယ်တစ်ဦးကို ဝယ်ပြီး စစ်မှုထမ်းသင်တန်းဆီ ပို့ဆောင်လိုက်တယ်လို့ သတင်းရရှိပါတယ်။

ဆွမ္မရာမြို့ကနေ လေရှီးမြို့ကိုသွားတဲ့ ကားဆရာနဲ့ ယာဉ်နောက်လိုက် စုစုပေါင်း၁၁ဦးကို စစ်ကောင်စီက ဖမ်းပြီး အဲ့ဒီ ၁၁ဦးဆီကနေ တောင်းယူတဲ့ ငွေနဲ့ စစ်မှုထမ်းသင်တန်းတက်မယ့်လူငယ်တစ်ဦးကို ဝယ်သွားတာလို့ ဒေသခံတွေကပြောပါတယ်။

"ပြန်ပေးဆွဲသလို ဖမ်းပြီး ငွေတောင်းတာ။ လူတွေရော ကားတွေရော ဖမ်းပြီး ပြန်ပေးဆွဲတာ။ အခုက လူကို ကျေးကျွန်လို့ အရောင်းအဝယ်လုပ်သွားတာ"လို့ ဒေသခံတစ်ဦးက ပြောပါတယ်။

စက်တင်ဘာ ၂၃ရက်က ဖမ်းဆီးတာဖြစ်ပြီး ကားကိုးစီးအနက် တစ်ချို့ကို ကျပ်သိန်း၄၀၊ တချို့ကို ၄၅သိန်း တောင်းယူပြီးမှ လူတွေကို ပြန်လွှတ်ပေးတာလို့ သတင်းရရှိပါတယ်။

"အကုန်ပြန်လွတ်ဖို့ဆိုရင် လူတစ်ယောက်အစားထိုးပေးရမယ်လို့တောင်းတယ်။ လူမပေးနိုင်တော့ ပိုက်ဆံတောင်းတယ်။ အဲဒီပိုက်ဆံနဲ့ လူဝယ်ပြီးထည့်လိုက်တယ်။ ဒါက နာဂဒေသမှာ လူမဆန်တဲ့လုပ်ရပ်ကိုလုပ်တာပဲ"လို့ ဒေသခံတစ်ဦးက ပြောပါတယ်။

ဒီလုပ်ရပ်ကို ဦးဆောင်ခဲ့သူတွေက လေရှီးမြို့နယ်ဒုမြို့နယ်အုပ်ချုပ်ရေးမှူး ဦးအောင်ချမ်း၊ ဒုရဲအုပ်ဂျော့စိုင်းနဲ့ လေရှီးမြို့နယ်က ကြံ့ခိုင်ရေးပါတီရဲ့ ၂၀၁၀ -၂၀၁၅ အမတ်ဟောင်း ဦးရှီးသီးတို့ဖြစ်တယ်လို့ သိရပါတယ်။

စက်တင်ဘာ၂၃ရက် မနက်မှာ ဦးရှီးသီးက ဒေသတွင်းကုန်စည်သယ်ယူပို့ဆောင်နေတဲ့ ကားကိုးစီးကို စစ်ဆေးဖို့အတွက် သူ့အိမ်ရှေ့ကို မောင်းလာခိုင်းပြီး အိမ်အရောက်မှာ စစ်ကောင်စီတပ်ဖွဲ့ဝင်တွေက အသင့်စောင့်ဆိုင်းပြီး ဖမ်းဆီးခဲ့တာလို့ လေရှီးမြို့ခံတစ်ဦးက ပြောပါတယ်။

ဖမ်းဆီးခံရသူတွေ ပြန်လည်လွတ်မြောက်ရေးအတွက် နာဂယဉ်ကျေးမှုအဖွဲ့အစည်းတွေက လိုက်လံညှိနှိုင်းခဲ့ကြရပါတယ်။

" ၁၁ယောက်လုံး ပြန်လွတ်လာပေမယ့် တခြား ရွာက နာဂလူငယ်တစ်ယောက်ကတော့ ပါသွားပြီ။ အခုဆို ဘယ်သူမှလည်းခရီးမထွက်ရဲကြတော့ဘူး"လို့ နာဂဒေသခံတစ်ဦးက ပြောပါတယ်။

စစ်ကိုင်းတိုင်းထဲမှာ ပါဝင်တဲ့ နာဂကိုယ်ပိုင်အုပ်ချုပ်ခွင့်ရဒေသဟာ လမ်းပန်းဆက်သွယ်ရေးခက်ခဲပြီး ဒေသခံတွေဟာ ကုန်စျေးနှုန်းကြီးမြင့်မှုဒဏ်ကို ရင်ဆိုင်နေကြရပါတယ်။ စစ်ကောင်စီက ကုန်စည်သယ်ယူပို့ဆောင်ရေးလမ်းကြောင်းကနေစောင့်ပြီး စစ်မှုထမ်းဖို့ လူငယ်တွေဖမ်းဆီးနေတဲ့အတွက် အခက်အခဲတွေပိုပြီးကြုံတွေ့နေရတယ်လို့ဒေသခံတွေက ပြောပါတယ်။

နိုင်ငံအနှံ့ စစ်မှုထမ်းအင်အားလိုအပ်နေတဲ့စစ်ကောင်စီက နာဂကိုယ်ပိုင်အုပ်ချုပ်ခွင့်ရဒေသမှာလည်း အသက်၁၈နှစ်အထက် လူငယ်တွေကို စစ်မှုထမ်းစာရင်းသွင်းပြီး လိုက်လံဖမ်းဆီးမှုတွေရှိတယ်လို့ သိရပါတယ်။ စစ်မှုထမ်းစာရင်းမှာပါတဲ့ လူငယ်တွေကို လေရှီးမြို့နယ်တရားရုံးက ဖမ်းဝရမ်း ထုတ်ပြီး စစ်ကောင်စီနဲ့ ရဲတပ်ဖွဲ့ဝင်တွေက လိုက်လံဖမ်းဆီးမှုတွေရှိတယ်လို့ ဒေသခံတွေကပြောပါတယ်။

လေရှီးမြို့နယ်အတွင်း နေထိုင်ကြတဲ့ ပြည်သူတွေ၊ လူငယ်တွေအနေနဲ့ မလိုအပ်ဘဲ ခရီးမထွက်ကြဖို့နဲ့ စစ်မှုထမ်းစာရင်းမှာ ပါဝင်ပြီး ဖမ်းဝရမ်းထုတ်ခံထားရသူတွေအနေနဲ့ လုံခြုံရေးအထူး ဂရုပြုကြဖို့ ဒေသခံတွေအချင်းချင်းတိုက်တွန်းသတိပေးနေကြပါတယ်။

(နာဂဒေသ ဆွမ္မရာမြို့အဝင်မုဒ်ဦးကို တွေ့ရစဉ်။ ဓာတ်ပုံ - စကစ)

ကျောက်တော် ကစ္ဆပနဒီတံတားအနီးနဲ့အိန္ဒိယစျေး ဝန်းကျင်ကိုစစ်တပ်ဗုံးကြဲ ပြည်သူ​သေဆုံးထိခိုက်မှုများ

■ သံတွဲမြို့နဲ့ငပလီကမ်း​ခြေကိုလည်း စစ်တပ်ဗုံးကြဲ

စက်တင်ဘာ-၂၈၊၂၀၂၆။ခိုင်မြတ်/People’s Spring။

အာဏာသိမ်းစစ်တပ်က ရခိုင်ပြည်နယ်၊ ကျောက်တော်မြို့ပေါ်နဲ့ သံတွဲမြို့၊ ငပလီမြို့ပေါ်တို့ကို ဒီနေ့ နေ့လယ်ပိုင်းမှာ ဗုံးကြဲခဲ့ပြီး သေဆုံး၊ ထိခိုက်သူ ဆယ်ချီရှိနိုင်တယ်လို့ ဒေသခံတွေက ပြောကြတယ်။

စက်တင်ဘာလ ၂၈ ရက်နေ့လယ် ၁၂ နာရီကျော်အချိန်မှာ ကျောက်တော်မြို့ရှိ လူစည်ကားတဲ့ ကစ္ဆပနဒီ တံတားအနီးဝန်းကျင်နဲ့ အိန္ဒိယစျေးဝန်းကျင် တို့ကို စစ်တပ်ကဗုံးကြခဲ့ပြီး လမ်းသွားလမ်းလာပြည်သူတွေနဲ့ စျေးရောင်းစျေးဝယ်လုပ်နေသူတွေ အများအပြားသေဆုံး ထိခိုက်ခဲ့တယ်လို့ ​ဒေသခံ​တွေက​ပြောပါတယ်။

“အရေအတွက်တွေ မသိသေးဘူး။ သေတာက တဆယ်လောက်တောင်ရှိမလားပဲ၊ ငါးယောက်ကတော့ confirm လုပ်လို့ရတယ်။ ဒဏ်ရာရတာလည်း တော်တော်များမယ်။ အစတွေဆိုရင် နေရာအနှံ့ပဲ” လို့ ကျောက်တော်ဒေသခံ တဦးက ပြောပါတယ်။

အဆိုပါဗုံးကြဲမှု​ကြောင့်ပြည်သူ​သေဆုံးထိခိုက်မှု​တွေရှိတယ်လို့ AA ကလည်းထုတ်ပြန်ထားပါတယ် ။

ဒါ့အပြင် ဒီနေ့ ၁၂ နာရီခွဲကျော်အချိန်မှာ သံတွဲမြို့ပေါ်နဲ့ သံတွဲမြို့နယ် ငပလီကမ်းခြေကိုလည်း စစ်တပ် ဗုံးကြဲခဲ့ ပြီး အထိအခိုက်အခြေအနေတွေကိုတော့ မသိရသေးပါဘူး။

ဒါ့အပြင် စစ်တပ်ဟာ ဒီနေ့မနက်ပိုင်း ၇ နာရီကျော်အချိန်က လည်း မင်းပြားမြို့နယ် စွန်ရဲ၊ ကြောင်ရှည်ချောင်းရွာတို့ကို ဗုံးကြဲခဲ့တာကြောင့် ၁ ဦး သေဆုံးကာ ၇ ဦးထက်မနည်း ဒဏ်ရာရခဲ့ပါတယ်။

“ဒဏ်ရာပြင်းလို့ ဆေးရုံရောက်တာနဲ့ တယောက်သေသွားတယ်။ စစ်တွေဘက်မှာလည်း အခုထိ လေယာဉ်တွေ ဝဲ နေတယ်” လို့ ပေါက်တောမြို့နယ်မှ ဒေသခံတဦးက ပြောပါတယ်။

၄၉၂၆ စစ်ဆင်ရေးလို့ ကြွေးကြော်ပြီး ရခိုင်ထိုးစစ်အတွင်း ရှေ့တန်းစစ်မျက်နှာတွေမှာ စစ်တပ်ဘက်ကသေဆုံးထိခိုက်မှုများနေပြီးအထိနာ​​​​နေပြီး စစ်တပ်ဟာ အရပ်သား​တွေကိုပစ်မှတ်ထားပြီး မြို့ရွာတွေကိုလေကြောင်း၊ လက်နက်ကြီးတွေနဲ့ ဆက်တိုက် တိုက်ခိုက်လာတာဖြစ်ပါတယ်။

လက်ရှိမှာ စစ်တွေမြို့နယ်အတွင်း တိုက်ပွဲပြင်းထန်နေပြီး စစ်တပ်ဘက်က ​အထိနာနေပြီး တပ်စခန်းတွေ လည်းဆက်တိုက်လက်
လွှတ်နေရတယ်လို့ ဒေသခံတွေက ပြောပါတယ်။

လူထုနွေဦးက ကောက်ယူပြုစုထားတဲ့အ
ချက်အလက်တွေအရ စစ်တပ်ရဲ့ စစ်ဆင်ရေးစတဲ့ စက်တင်ဘာ ၄ ရက်နေ့ ကနေ၂၇ ရက်နေ့ထိ သုံးပတ်ကျော်ကာလအတွင်း စစ်တပ်လက်ချက်ကြောင့် သေဆုံးရတဲ့ ရခိုင်ဒေသခံ အရပ် သားပြည်သူ ၉ ဦးနဲ့ ထိခိုက်ဏ်ရာရသူ ၂၉ ဦးထက်မနည်း ရှိသွားခဲ့ပြီဖြစ်ပါတယ်။ ဒီစာရင်းထဲမှာဒီ​နေ့ ဗုံးကြဲခံရပြီး​သေဆုံးထိခိုက်
သူ​တွေမပါဝင်​သေးပါဘူး။