လောက်ကိုင်မှာကျင်းပတဲ့လမုန့်စားပွဲမှာ AAနဲ့ TNLA၊MNDAA ခေါင်းဆောင်တွေတက်ရောက်

စက်တင်ဘာ-၂၆၊၂၀၂၆။ထားမြတ်/People’s Spring

ကိုးကန့်တပ်မတော်(MNDAA)ရဲ့ လောက်ကိုင်မြို့မှာ ကျင်းပတဲ့ လမုန့်စားပွဲကို ​မြောက်ပိုင်းမဟာမိတ်ညီ​နောင်သုံး​ဖော်ဖြစ်တဲ့ အာရက္ခတပ်တော်(AA)၊ တအာင်တပ်မတော်(TNLA)နဲ့ MNDAA ထိပ်ပိုင်းခေါင်းဆောင်တွေ အတူ
တကွတက်ရောက်ခဲ့ကြပါတယ်။

စက်တင်ဘာ ၂၅ရက်က ပြုလုပ်တဲ့ အခမ်း
အနားမှာ ကိုးကန့်ခေါင်းဆောင် ဖုန်တဲရင်၊ TNLA ဥက္ကဋ္ဌ ဗိုလ်ချုပ်ကြီးတားအိုက်ဘုန်းနဲ့ ဒုဥက္ကဋ္ဌတာခူးလန်း၊ AA ဒုစစ်ဦးစီးချုပ်ဒေါက်တာညိုထွန်းအောင်တို့ တက်ရောက်ခဲ့ကြောင်း ကိုးကန့်သတင်းပြန်ကြားရေးက တ
ရုတ်ဘာသာနဲ့ ထုတ်ပြန်တဲ့ သတင်းမှာမှတ်
တမ်းဓာတ်ပုံတွေ ​ဖော်ပြထားပါတယ်။

ညီနောင်မဟာမိတ်တွေဖြစ်ကြတဲ့ ကိုးကန့်၊တအာင်း၊ရက္ခိုင်တပ်ဖွဲ့တွေအနက်ကိုးကန့်နဲ့ တအာင်းတပ်တွေဟာ ရှမ်းမြောက်ဒေသ နယ်
မြေဆိုင်ရာ အငြင်းပွားမှုနဲ့ပတ်သက်ပြီး အခုနှစ်မတ်လမှာ တိုက်ပွဲတွေ ဖြစ်ပွားခဲ့ပြီးနောက် နှစ်ဝက်ခန့်အကြာမှာ ကိုးကန့်တပ်က ပြုလုပ်တဲ့ လမုန့်စားပွဲကို TNLA ထိပ်ပိုင်းခေါင်း
ဆောင်တွေ တက်ရောက်လာတဲ့ အခြေအနေလည်းဖြစ်ပါတယ်။

ကိုးကန့်တပ်ဟာTNLAထိန်းချုပ်ထားတဲ့ ကွတ်ခိုင်မြို့ကို ထိုးစစ်ဆင်တိုက်ခိုက်သိမ်း
ပိုက်ခဲ့တာဖြစ်ပါတယ်။

ညီနောင်မဟာမိတ် သုံးဖွဲ့အနက် AAဟာ အာ
ဏာသိမ်းစစ်တပ်ကို လက်ရှိအချိန်ထိတိုက်
ခိုက်နေဆဲဖြစ်ပြီး MNDAAနဲ့ TNLA တို့က
တော့ စစ်ကောင်စီနဲ့ အပစ်ရပ်စဲရေးလုပ်ဆောင်ထားကြပါတယ်။

ဒါ့အပြင် အာဏာသိမ်းစစ်ခေါင်းဆောင် မင်းအောင်လှိုင်ကဟန်ပြလုပ်ဆောင်နေတဲ့ ငြိမ်း
ချမ်းရေးဖိတ်ခေါ်မှုမှာလည်း TNLAနဲ့ MNDAA တို့က လက်ခံခဲ့ပြီး နှစ်ဖွဲ့လုံးက ခေါင်းဆောင်တွေဟာ နေပြည်တော်ကို သွား
ရောက်ကာစစ်အုပ်စုနဲ့ဆွေးနွေးမှုတွေ ပြုလုပ်ခဲ့ပါတယ်။

အဲဒီလို ကိုးကန့်နဲ့ တအာင်းတပ်က စစ်အုပ်စုနဲ့ ဆွေးနွေးနေချိန် အာဏာသိမ်းစစ်တပ်ဟာ အာရက္ခတပ်တော် AA ထိန်းချုပ်ရာ မြို့နယ်တွေကိုလေကြောင်းဗုံးကြဲတိုက်ခိုက်မှုတွေ ဆက်တိုက်ပြုလုပ်ခဲ့လို့ အရပ်သား ပြည်သူသေဆုံးထိခိုက်မှုတွေ အများအပြား ဖြစ်ပေါ်လျက်ရှိပါတယ်။ဒါ့အပြင်စစ်တပ်က AA ထိန်းချုပ်​ဒေသ​တွေကို စက်တင်ဘာ ၄ ရက်ကစပြီးအင်အားအများအပြားသုံးပြီးတန်ပြန်ထိုးစစ်ဆင်ဖို့ကြိုးစား​ပေမယ့် စစ်တပ်စစ်​ကြောင်း​တွေ ​ရှေ့မတိုးနိုင်ဘဲ ​လန်ကျပြီးစစ်ဦးကျိုးကာ စစ်တပ်စခန်း​တွေကို AA ကပြန်သိမ်းပိုက်​နေပါတယ် ။

မြန်မာ့အရေး ကမ္ဘာ့အာရုံစိုက်မှုကနေ ပျောက်ကွယ်သွားမယ့် အန္တရာယ်နဲ့ ရင်ဆိုင်နေရကြောင်း ကုလအတွင်းရေးမှူးချုပ်ပြော

■ကမ္ဘာ့ခေါင်းဆောင်တွေမိန့်ခွန်းမှာ မြန်မာ့အရေးကို ထိုင်း၊ဘင်္ဂလားဒေ့ရှ်၊တီမောလက်စ်
တေတို့ ထည့်ပြော၊ တရုတ်ထည့်မပြော

စက်တင်ဘာ-၂၆၊ ၂၀၂၆။သော်မွန်/People’s Spring

လက်ရှိကျင်းပနေတဲ့ (၈၁)ကြိမ်မြောက် ကုလ
သမဂ္ဂအထွေထွေညီလာခံ ကမ္ဘာ့ခေါင်းဆောင်တွေမိန့်ခွန်းပြောကြားတဲ့ သီတင်းပတ်(High Level Week)အတွင်းမြန်မာ့အရေးနဲ့ပတ်
သက်လို့ ကုလသမဂ္ဂအတွင်းရေးမှူးချုပ်အပါ
အဝင် ခေါင်းဆောင်တချို့က ထည့်သွင်းပြောကြားခဲ့ကြပါတယ်။

စစ်တပ်အာဏာသိမ်းထားတဲ့ မြန်မာနိုင်ငံမှာ အကြမ်းဖက်မှုများ မြင့်တက်လာခြင်း၊ လူအများအပြား အိုးအိမ်စွန့်ခွာ ထွက်ပြေးရခြင်းနဲ့ နယ်စပ်ဖြတ်ကျော် ဒုစရိုက်မှုများ ကျယ်ပြန့်လာခြင်းတို့ ရှိနေပေမယ့် ကမ္ဘာ့အာရုံစိုက်မှုကနေ ပျောက်ကွယ်သွားမယ့် အန္တရာယ်နဲ့ ရင်
ဆိုင်နေရတယ်လို့ ကုလသမဂ္ဂအတွင်းရေးမှူးချုပ် အန်တိုနီယိုဂူတာရက်စ်က သူ့မိန့်ခွန်းမှာ ထည့်သွင်းပြောကြားပါတယ်။

“မြန်မာပြည်သူတွေကို မေ့လျော့မထားသင့်ပါဘူး။ငြိမ်းချမ်းရေးဖော်ဆောင်မှု၊ အရပ်သားပြည်သူများကို အကာအကွယ်ပေးမှု၊ လူသားချင်းစာနာမှု အကူအညီများ ဝင်ရောက်ခွင့်ပြုမှုနဲ့ တာဝန်ခံမှုရှိစေရေးဆိုင်ရာကြိုးပမ်းအား
ထုတ်မှုများကို နိုင်ငံတကာအသိုက်အဝန်းအနေနဲ့ ဆက်လက်ထောက်ခံပံ့ပိုးပေးဖို့ လို
အပ်ပါတယ်”လို့ ကုလအတွင်းရေးမှူးချုပ်က တိုက်တွန်းပြောဆိုပါတယ်။

ကမ္ဘာ့ခေါင်းဆောင်တွေ မိန့်ခွန်းမပြောကြားမီ အတွင်းရေးမှူးချုပ်ပြောကြားခဲ့တဲ့ မိန့်ခွန်းမှာ မြန်မာ့အရေး၊ ဆူဒန်အရေး၊ ယူကရိန်းအရေးတို့နဲ့ ဆက်စပ်လို့ အရပ်သားပြည်သူတွေကို ခြွင်းချက်မရှိ အကာအကွယ်ပေးဖို့၊ လူသားချင်းစာနာမှုအကူအညီတွေ အဟန့်အတားမရှိ ဝင်ရောက်ခွင့်ပြုပေးဖို့၊ နျူကလီးယားမပြန့်ပွားရေးနဲ့ လက်နက်ဖျက်သိမ်းရေးတို့ ချက်
ချင်းဆောင်ရွက်ဖို့ အချက်တွေလည်း ပါဝင်ပါတယ်။

မြန်မာ့အရေးနဲ့ပတ်သက်လို့ အိမ်နီးချင်း ထိုင်းနိုင်ငံနဲ့ ဘင်္ဂလားဒေ့ရှ်နိုင်ငံဝန်ကြီးချုပ်တွေက ထည့်သွင်းပြောကြားပါတယ်။

ထိုင်းဝန်ကြီးချုပ်အနုတင်က အိမ်နီးချင်းနိုင်ငံမှာဖြစ်ပေါ်နေတဲ့စိန်ခေါ်မှုတွေကိုဖြေရှင်းဆောင်ရွက်ပေးဖို့ ကတိကဝတ်က မြန်မာ့အ
ရေး ချဥ်းကပ်ဆောင်ရွက်မှုရဲ့ လမ်းညွှန်ဖြစ်တယ်လို့ ဆိုပါတယ်။

ဒါပေမဲ့ မြန်မာနိုင်ငံငြိမ်းချမ်းရေး၊ အမျိုးသား
ပြန်လည်သင့်မြတ်ရေးနဲ့ မြန်မာပြည်သူတွေ ဦးဆောင်တဲ့၊မြန်မာပြည်သူတွေပိုင်ဆိုင်တဲ့
(Myanmar led and Myanmar owned)
ရေရှည်တည်တံ့တဲ့အဖြေတစ်ခုထွက်ပေါ်ရေးကို ထိုင်းနိုင်ငံကထောက်ခံအားပေးတယ်လို့ ဝန်ကြီးချုပ်အနုတင်က ပြောပါတယ်။

မြေပြင်မှာ လက်တွေ့ကျတဲ့ တိုးတက်မှုတွေ ပေါ်ထွက်လာစေဖို့ တွန်းအားပေးနေတဲ့တချိန်တည်းမှာ အာဆီယံမူဘောင်အတွင်းကဖြစ်စေ၊သက်ဆိုင်ရာမိတ်ဖက်နိုင်ငံတွေနဲ့ ပေါင်း
စပ်ညှိနှိုင်းပြီးဖြစ်စေ အပြုသဘောဆောင်ပြီး ချိန်ညှိထားတဲ့ ပြန်လည်ထိတွေ့ဆက်ဆံမှုမျိုးကို ယုံကြည်ကြောင်းလည်း အနုတင်က ပြောပါတယ်။

ထိုင်းနိုင်ငံက ကမ္ဘောဒီးယားအရေးနဲ့ မြန်မာ့အရေး နှစ်ခုစလုံးမှာ ဆွေးနွေးပွဲတွေ ဖြစ်ပေါ်
လာစေရေးနဲ့ တိုးတက်မှုတွေကို လက်တွေ့ ရရှိနိုင်စေရေး ဖော်ဆောင်ပေးဖို့ ဖြစ်တယ်လို့ အနုတင်ကကုလညီလာခံမှာ ပြောပါတယ်။

ဘင်္ဂလားဒေ့ရှ်ဝန်ကြီးချုပ်ရာမန်ကလည်း မြန်မာနိုင်ငံကနေ နေရပ်စွန့်ခွာထွက်ပြေးလာကြရတဲ့ ရိုဟင်ဂျာ ၁ ဒသမ ၂သန်းကျော်ကို ခိုလှုံခွင့်ပေးထားရတာ ၉ နှစ်ကျော်ရှိလာပြီဖြစ်ပြီးရိုဟင်ဂျာအကျပ်အတည်းရဲ့မူလဇာစ်
မြစ်နဲ့ အစပြုရာဟာ မြန်မာနိုင်ငံဖြစ်တယ်လို့ ပြောပါတယ်။

ရိုဟင်ဂျာအကျပ်အတည်းအတွက်တခုတည်း
သော ဖြေရှင်းနည်းမှာ နေရပ်စွန့်ခွာလာရတဲ့ ရိုဟင်ဂျာတွေကို သူတို့ရဲ့မူရင်းဇာတိဖြစ်တဲ့ မြန်မာနိုင်ငံကိုစောလျင်စွာနဲ့ ဘေးကင်းလုံခြုံစွာ ပြန်လည်ရောက်ရှိနိုင်ဖို့ ဖြစ်တယ်လို့ ဘင်္ဂလားဒေ့ရှ်ဝန်ကြီးချုပ်က ပြောပါတယ်။

ကုလသမဂ္ဂနဲ့ နိုင်ငံတကာအသိုင်းအဝိုင်းအနေနဲ့ ရိုဟင်ဂျာတွေကို သူတို့နေရပ်ကို ပြန်လည်
မပို့ဆောင်နိုင်ခင်ကာလအတွင်း အသက်ကယ်ဆယ်ရေးဆိုင်ရာ အကူအညီပေးရေးအစီအစဥ်တွေ ဆက်လက်ဆောင်ရွက်ပေးကြဖို့ ဝန်ကြီးချုပ်ရာမန်က တိုက်တွန်းပါတယ်။

ဒါ့အပြင် နိုင်ငံတကာအသိုင်းအဝိုင်းအနေနဲ့ ရိုဟင်ဂျာပြည်သူတွေအတွက် တရားမျှတမှုကို အာမခံမပေးနိုင်ပါက မဝေးတော့တဲ့အနာဂတ်မှာကြီးမားတဲ့ လူသားချင်းစာနာမှုဆိုင်ရာ ဘေးဒုက္ခကြီးတစ်ခုအဖြစ် ပြောင်းလဲသွားနိုင်တယ်လို့ ဘင်္ဂလားဒေ့ရှ်ဝန်ကြီးချုပ်က သ
တိပေးပါတယ်။

တီမောလက်စ်တေသမ္မတရာမို့ဟော်တာကလည်း ဒီကနေ့ကမ္ဘာပေါ်မှာ အဆိုးရွားဆုံး လူသားချင်းစာနာမှုဆိုင်ရာ ဘေးဒုက္ခကြီးတစ်ခု ဖြစ်နေတဲ့ ဆူဒန်နိုင်ငံရဲ့ အခြေအနေကို လေ့လာကြည့်ရှုဖို့ သတိပေးရင်း တောင်ဆူဒန်၊ ကွန်ဂိုဒီမိုကရက်တစ်သမ္မတနိုင်ငံ၊ အာဖဂန်နစ္စတန်၊ မြန်မာနဲ့ ယီမင်နိုင်ငံတို့ရဲ့ အခြေ
အနေတွေကို လေ့လာကြည့်ရှုကြဖို့ကုလညီ
လာခံမှာ ထည့်သွင်းပြောကြားပါတယ်။

တီမောလက်စ်တေးသမ္မတအနေနဲ့ မြန်မာ
နိုင်ငံကို မေ့လျော့မသွားစေဖို့ ကမ္ဘာကြီးကို သတိပေးရင်း မြန်မာပြည်သူတွေနဲ့အတူ ရပ်တည်ပေးတဲ့အတွက်ကျေးဇူးတင်ကြောင်း အမျိုးသားညီညွတ်ရေးအစိုးရ NUG ယာယီသမ္မတဒူဝါလရှီးလကထုတ်ပြန်ထားပါတယ်။

တီမောသမ္မတရာမို့ဟော်တာအနေနဲ့ မြန်
မာနိုင်ငံသားတွေအပေါ် ခိုင်မာသော ထောက်
ခံအားပေးမှုနဲ့ စည်းလုံးညီညွတ်မှုတို့အတွက် ကျေးဇူးတင်ကြောင်း NUG ယာယီသမ္မတက ဆိုပါတယ်။

(၈၁)ကြိမ်မြောက်ကုလသမဂ္ဂအထွေထွေညီလာခံ High Level Week မှာ တရုတ်နိုင်ငံရဲ့ ဒုတိယသမ္မတ တက်ရောက်မိန့်ခွန်းပြောကြားခဲ့ပြီး မြန်မာ့အရေးနဲ့ပတ်သက်လို့ တစုံတရာ ထည့်သွင်းပြောကြားခြင်းမရှိပါဘူး။ တရုတ်ဒုတိယသမ္မတက အရှေ့အလယ်ပိုင်းနဲ့ ပင်လယ်ကွေ့နိုင်ငံများအရေး၊ ပါလက်စတိုင်းအရေး၊ ယူကရိန်းအရေးနဲ့ ကျူးဘားအရေးတို့ကိုတော့ ထည့်သွင်းပြောကြားတာ တွေ့ရပါတယ်။

စစ်တပ်အာဏာသိမ်းမှုကို ဆန့်ကျင်ပြီး မြန်
မာပြည်သူလူထုနဲ့အတူ ရပ်တည်တဲ့ ကုလ
သမဂ္ဂဆိုင်ရာမြန်မာအမြဲတမ်းကိုယ်စားလှယ်သံအမတ်ကြီး ဦးကျော်မိုးထွန်းက High Level Week မှာ တက်ရောက်မိန့်ခွန်းပြောကြားခြင်းမရှိပေမယ့်(၈၁)ကြိမ်မြောက် ကု
လသမဂ္ဂအထွေထွေညီလာခံဖွင့်ပွဲအခမ်း
အနားကို တက်ရောက်ခဲဲ့ပါတယ်။​ ဒါ့အပြင် လာမယ့်သီတင်းပတ်မှာ စတင်မယ့် ကုလ
သမဂ္ဂအထွေထွေညီလာခံမျက်နှာစုံညီအ
စည်းအဝေးတွေနဲ့ ကုလသမဂ္ဂ ပင်ပကော်မတီတွေရဲ့အစည်းအဝေးတွေမှာတက်ရောက်သွားမယ်လို့ သိရပါတယ်။

ကုလသမဂ္ဂအတွင်းရေးမှူးချုပ် နဲ့ ထိုင်း၊
ဘင်္ဂလားဒေ့ရှ်၊တီမောလက်စ်တေနိုင်ငံ​ခေါင်း​ဆောင်​တွေက(၈၁)ကြိမ်မြောက်ကုလသမဂ္ဂအထွေထွေညီလာခံမှာ မိန့်ခွန်း​ပြောကြားစဥ်။ ။ဓါတ်ပုံ-UN

မင်းတုန်းတိုက်ပွဲစစ်သားတစ်ဆယ်​​ကျော်
AA ထံလက်နက်ချအညံ့ခံ

■စစ်တပ်က ပစ​တွေကိုမူးယစ်​ဆေး​ကြွေးပြီး​ရှေ့ကတက်တိုက်ခိုင်းလို့ ဖမ်းမိသူ​တွေမှာ​ဆေး​သုံးစွဲထားသူ​တွေပါ​နေ

စက်တင်ဘာ-၂၆၊၂၀၂၆။ခိုင်မြတ်/ People's Spring

မကွေးတိုင်း၊မင်းတုန်းမြို့နယ်၊သဖန်ရောင်ရွာအနီးမှာ အာဏာသိမ်းစစ်တပ်နဲ့ အာရက္ခတပ်တော်(AA)ပူးပေါင်းအဖွဲ့တို့ တိုက်ပွဲအပြင်း
အထန်ဖြစ်ပွားနေပြီး တိုက်ပွဲအတွင်းစစ်တပ်ဘက်က လက်နက်ချအညံ့ခံလာ တဲ့ စစ်သုံ့
ပန်း တဆယ်ကျော် အရှင်ဖမ်းမိထားတယ်လို့ မြေပြင်သတင်းရင်းမြစ်တွေကပြောပါတယ်။

မင်းတုန်းမြို့နယ်သဖန်ရောင်နဲ့ ကံကြိုးရွာအနီးဝန်းကျင်တို့မှာ တိုက်ပွဲအပြင်းအထန်ဖြစ်နေတာဖြစ်ပြီး စစ်တပ်ဘက်က​သေဆုံးဒဏ်
ရာရသူများပြီယအထိနာနေကာ အရှင်ဖမ်းမိသူတွေပါ ရှိနေတာလို့ စုံစမ်းသိရပါတယ်။

“သုံ့ပန်းတွေ ရထားတာရှိတယ်။ ပထမတိုက်ပွဲတုန်းက သုံ့ပန်းတွေရော၊ အခုနောက်ပိုင်းသုံ့
ပန်းတွေရာ တဆယ် ကျော်လောက် ရှိမယ်။
မကြာခင်တော့ Info Desk ကနေ အင်တာဗျူးတွေ ထုတ်ပြန်မယ်ထင်တယ်”လို့ AA နဲ့ နီးစပ်တဲ့မြေပြင်သတင်းရင်းမြစ်တဦးကပြောပါတယ်။

မင်းတုန်းတိုက်ပွဲအတွင်းဖမ်းဆီးရမိသူအများစုဟာ စိတ်ကြွရူးသွပ်ဆေးပြားအလွန်အကျွံ သုံးစွဲထားသူတွေဖြစ်ပြီး တိုက်ပွဲအရှေ့ဆုံးထိ ပို့ခံရတဲ့ ပြည်သူ့စစ်(ပစ)တွေဖြစ်တယ်လို့ အထက်ပါပုဂ္ဂိုလ်က​ပြောပါတယ်။

“စစ်မှုထမ်းသစ်တွေတော်တော်များလာတယ်။အခုဖမ်းရတဲ့ကောင်တွေဆိုရင် တိုက်ပွဲဖြစ်တော့ ဘယ်ပြေးလို့ပြေး ရမှန်းမလဲ၊ ဟိုငေး၊ ဒီငေးနဲ့ ကျန်နေခဲ့တဲ့ကောင်တွေ။ စကားတောင် ကောင်းကောင်းမွန်မွန် မပြောနိုင်ဘူး။ မူးယစ်ဆေးတွေ ပေးပြီး တိုက်ခိုင်းထားတာ” လို့ AA သတင်းရင်းမြစ်က ပြောပါတယ်။

အခုရက်ပိုင်းတိုက်ပွဲတွေအတွင်းစစ်တပ်ဘက်ကလက်နက်ချအညံ့ခံသူတွေ ရှိသလို တိုက်ပွဲအတွင်းသေဆုံးသူလည်းတဆယ်ဝန်းကျင်ရှိတယ်လို့ ဆိုပါတယ်။

“နောက်တန်းကအင်အားထပ်ဖြည့်ပြီး တက်လာကြလို့ တိုက်ပွဲဖြစ် နေတာပါ။ဒီမနက်
(စက်တင်ဘာ ၂၆)ထိ တိုက်ပွဲဖြစ်ကြတယ်။ စခန်းတွေ ရတာတော့ မရှိသေးပါဘူး” လို့ အဆိုပါသတင်းရင်းမြစ်ကဆက်ပြောပါတယ်။

ပြီးခဲ့တဲ့ စက်တင်ဘာလ ၂၁ ရက်နဲ့ ၂၂ ရက်တို့အတွင်း မင်းတုန်းမြို့နယ် ကံကြိုးကျေးရွာအနီးရှိ စစ်တပ်ရဲ့ ပွိုင့် ၉၄၈ ကုန်းအနီးမှာ တိုက်ပွဲတွေဖြစ်ခဲ့ပြီး အဲဒီတိုက်ပွဲမှာလည်း စစ်တပ်ဘက်က သေဆုံးသူ သုံးဆယ်ဝန်း
ကျင်ရှိခဲ့ပြီး လက်နက်ခဲယမ်းတွေအများအ
ပြားAA ကသိမ်းဆည်းရခဲ့ပါတယ်။

အခုအခါတပ်ဆုတ်ပြေးနေတဲ့စစ်တပ်နဲ့ တိုက်
ပွဲထပ်ဖြစ်နေတာဖြစ်ပြီး မင်းတုန်းမြို့နယ်အတွင်း စစ်တပ်က လေ ကြောင်း၊ လက်နက်
ကြီးပစ်ခတ်မှုတွေ ဆက်တိုက်ရှိနေပါတယ်။ အဲဒီလို တိုက်ပွဲတွေနဲ့ စစ်တပ်ရဲ့ လေကြောင်း၊ လက်နက်ကြီးပစ်ခတ်မှုတို့ကြောင့်အနီးဝန်း
ကျင်ကျေးရွာတွေက ဒေသခံတွေ ဘေးလွတ်ရာတိမ်းရှောင်နေကြရသလိုကုန်စည်သယ်ယူရေးလမ်းကြောင်းပိတ်နေပါတယ်။

ဒါအပြင် စစ်တပ်က AA ထိန်းချုပ်ရာဒေသတွေဆီထိုးစစ်ဆင်ဖို့ ကြိုးစားနေတဲ့ စစ်တွေတိုက်ပွဲအတွင်းမှာလည်း စစ် တပ်ဘက်က အလောင်းတချို့နဲ့အရှင်ဖမ်းမိသူအချို့ရှိတယ်လို့ မြေပြင်သတင်းရင်းမြစ်တွေက ပြောပါတယ်။

“ကွမ်းတောင်ဘက်နဲ့ ဝါဘိုဘက်မှာပြင်းနေတယ်။အလောင်းတချို့ရတယ်။ အရှင်ရတာလည်း နှစ်ယောက်၊ သုံး ယောက်ရှိတယ်” စစ်တွေဒေသခံ AA နဲ့ နီးစပ်တဲ့ သတင်းရင်းမြစ်က ပြောပါတယ်။

ကျောက်ဖြူမြို့နယ်မှာတော့တိုက်ပွဲ​​တွေပြန်ငြိမ်သက်နေပြီး စစ်တပ်ဘက်က အင်အားဖြည့်ကာ တောင်မော်ဦးရေတပ်အနီး အ၀
တောင်ကနေ စစ်ကြောင်းထိုးဖို့ ပြင်ဆင်နေတယ်လို့ သိရပါတယ်။

အလားတူပဲ AA ထိန်းချုပ်ရာ ရခိုင်ပြည်နယ်ဘက်ကို ဝင်ဖို့ ကြိုးစားတဲ့ ရခိုင်ရိုးမအရှေ့ဘက်ခြမ်း မကွေးတိုင်း ပဒါန်း မြို့နယ် နတ်ရေကန်စစ်မျက်နှာနဲ့ ဧရာ၀တီတိုင်း ရေကြည်၊ သာပေါင်းမြို့နယ်တို့မှာလည်း နှစ်ဖက်တိုက်ပွဲတွေဖြစ်ပါတယ်။

စစ်တပ်ဟာ ၄၉၂၆ စစ်ဆင်ရေးလို့ နာမည်တပ်ပြီး ရခိုင်ပြည်နယ် စစ်တွေ၊ ကျောက်ဖြူနဲ့ ရခိုင်ပြည်ဝင်ပေါက် မကွေးတိုင်း ပဒါန်း၊ မင်းတုန်း၊ ပဲခူးတိုင်း ပန်းတောင်၊ ဧရာ၀တီတိုင်း ရေကြည်၊ သာပေါင်းမြို့နယ်တို့ကနေ AA ထိန်း ချုပ်ရာနေရာတွေကို စက်တင်ဘာ ၄ ရက်နေ့ကစကာ ထိုးစစ်ဆင်ဖို့ ကြိုးစားနေခဲ့တာဖြစ်ပါတယ်။

အဲဒီလို လေကြောင်း၊ ရေကြောင်းပစ်ကူပေးပြီး မြေပြင်က အင်အားအလုံးအရင်းနဲ့ ထိုး
စစ်ဆင်ဖို့ ကြိုးစားပေမယ့် လက်တွေ့မှာတော့ အထိနာနောက်ပြန်ဆုတ်ရပြီး စစ်ဆင်ရေး သုံးပတ်ကျော်အတွင်း စစ်တပ်ဘက်က သေ
ဆုံးသူ ရာချီရှိပြီဖြစ်တယ်လို့ AA နဲ့ နီးစပ်တဲ့ဒေသခံစစ်ရေးလေ့လာသူတွေကပြောပါတယ်။

မင်းတုန်းမြို့နယ်အတွင်း စက်တင်ဘာ တတိယပါတ်အတွင်းတိုက်ပွဲမှ AA ကသိမ်းဆည်းရရှိတဲ့လက်နက်ခဲယမ်း​တွေ/
​စစ်​တွေ-ပုဏ္ဏားကျွန်းအစပ်တိုက်ပွဲမှAA သိမ်းရတဲ့လက်နက်ခဲယမ်း​တွေနဲ့ စစ်သုံ့ပန်း​တွေ။ဓါတ်ပုံ-AA Infodesk

နမ့်မွန်းမြို့က KBC ခရစ်ယာန်ဘုရားကျောင်းမှာ စစ်တပ်လက်အောက်ခံ SNAက စစ်သင်တန်းဆင်းပွဲပြုလုပ်

စက်တင်ဘာ ၂၇၊ ၂၀၂၆။ ထားမြတ်/People’s Spring

ကချင်ပြည်နယ်၊ မိုးညှင်းမြို့နယ် နမ့်မွန်းမြို့က ကချင်နှစ်ခြင်းခရစ်ယာန်အဖွဲ့ချုပ်(KBC) ရဲ့ ဘုရားကျောင်းဝင်းအတွင်းမှာ အာဏာသိမ်းစစ်တပ်လက်အောက်ခံ ရှမ်းနီတပ် (SNA) စစ်သင်တန်းဆင်းပွဲ အခမ်းအနား ပြုလုပ်ခဲ့ကြောင်း ကချင်သတင်းရင်းမြစ်အချို့က ပြောပြပါတယ်။

စစ်တပ်လက်အောက်ခံ SNAက ဘုရားကျောင်းဝင်းအတွင်း စစ်အင်အားအများအပြားစုဝေးတက်ရောက်တဲ့ အခမ်းအနား တရပ်ကျင်းပနေတဲ့ မှတ်တမ်းဓာတ်ပုံအချို့နဲ့ ဘုရားကျောင်းဝင်းအတွင်းကခုန်နေတဲ့ ရုပ်သံ အချို့ အခုရက်ပိုင်းထွက်ပေါ်လာတဲ့အပေါ် ကချင်သတင်းရင်းမြစ်က ရှင်းပြတာပါ။

“ဟိုပင်ကနေအင်းတော်ကြီးသွားလမ်းကနမ့်မွန်းမြို့ KBC ဘုရားကျောင်းမှာ SNA အဖွဲ့တွေလုပ်နေတာပါ” လို့ သတင်းရင်းမြစ်က ပြောပါတယ်။

အဲဒီဒေသမှာရှိတဲ့ ကချင်လူမျိုးတွေ စစ်ရှောင်နေရချိန်မှာ ဘုရားကျောင်းဝင်းထဲမှာ အခုလိုစစ်သင်တန်းတွေ ပြုလုပ်တာ၊ ကခုန်တာတွေ ပြုလုပ်တာဖြစ်တယ်လို့လည်း သတင်းရင်းမြစ်က ပြောပါတယ်။ ဒီလုပ်ရပ်ဟာ လူမျိုးရေး၊ ဘာသာရေး အရ ပြဿနာ ဖြစ်စေဖို့ ရည်ရွယ်ချက်ရှိရှိ လုပ်ဆောင်တယ်လို့ မြင်ကြောင်းလည်း မှတ်ချက်ပြုပါတယ်။

SNAဟာ အာဏာသိမ်းပြီးနောက် စစ်တပ်အလိုကျ စစ်တပ်ရဲ့ စစ်ဆင်ရေးတွေမှာ ပါဝင်နေတဲ့ တပ်ဖွဲ့တခုဖြစ်ပါတယ်။ SNA ဟာ ကချင်လွတ်လပ်ရေးတပ်မတော်(KIA)နဲ့တိုက်ပွဲတွေ ဖြစ်ခဲ့သလို ကချင်လူမျိုးတွေကို ပစ်မှတ်ထားဖမ်းဆီးတာ အပါအဝင် လူ့အခွင့်အရေးချိုးဖောက်မှုတွေ ကျူးလွန်တဲ့ သတင်းတွေလည်း အများအပြားရှိခဲ့ပါတယ်။

အခုလို ခရစ်ယာန်ဘုရားကျောင်းမှာ စစ်သင်တန်းပေး၊သီချင်းဖွှင့် ပျော်ပါးကခုန်ခဲ့တဲ့လုပ်ရပ်ဟာ ဘာသာရေးအရ ယုံကြည်မှုအပေါ် စော်ကားတာ၊ရန်စ စိန်ခေါ်တာ၊ဘာသာရေး လူမျိုးရေး ပဋိပက္ခ များ ဦးတည်စေဖို့လူမဆန်စွာ ဖန်တီးတာလို့ ကချင်အသိုင်းအဝိုင်းကရေးသားဖော်ပြတာတွေလည်းရှိပါတယ်။

“လူမှန်ရင် လူစိတ်ရှိရင် မလုပ်သင့်ပါဘူးဒေသခံ လူမျိုးများကို အနိုင်ကျင့် မောင်းထုတ်ပစ်ပြီး အဲဒီဒေသခံများရဲ့ အလှူငွေများနဲ့ ဆောက်လုပ်ထားတဲ့ ဘာသာရေး အဆောက်အအုံဖြစ်တဲ့ ခရစ်ယာန် ဘုရားကျောင်းထဲ စစ်သင်တန်းဆင်းပွဲ ပြုလုပ်တာ၊ ခရစ်ယာန်ဘာသာနဲ့ ဆန့်ကျင်ဖက်ဖြစ်တဲ့ မူးရစ်ဆေးဝါး အရက်သေစာ သောက်စားမူးရူးပြီး အရှက်မဲ့စွာ ပျော်ပါး ကခုန်ကြတဲ့ လုပ်ရပ်ဟာ ကမ္ဘာမှာ ရှမ်းနီတပ် SNA ပဲ ရှိလိမ့်မယ်လို့ ထင်ပါတယ်။ အင်းတော်ကြီးဒေသက ၎င်း နမ့်မွန်း ကချင်နှစ်ခြင်း ခရစ်ယာန် ဘုရားကျောင်းဝင်ဟာ ရှမ်းနီ ပသစများရဲ့ အတင်း အဓမ္မလုယူခံရရုံမက ဒေသခံ ရာချီကို မောင်းထုတ်ပစ်ပြီး ဘုရားကျောင်းဝင်းကို စစ်သင်တန်းပေးတဲ့ ကွင်းအဖြစ် အသုံးပြုပြီး ဘုရားကျောင်းကိုတော့ စစ်သင်တန်းဆင်းပွဲနဲ့ ပျော်ပွဲရွှင်ပွဲတွေ ပြုလုပ်အသုံးချနေကြတာ ၅ နှစ်ခန့် ရှိလာပြီလို့ ဒေသခံများ ပြောပါတယ်” လို့ ကချင်သတင်းရင်းမြစ်တဦးက ရေးသားထားပါတယ်။

SNA တပ်ဖွဲ့ဟာ စက်တင်ဘာလလယ်ကလည်း မြစ်ကြီးနားက နေဖားကန့်ကို ပြန်လာတဲ့ ဒေသခံကျောက်လုပ်ငန်းရှင် ကချင် အမျိုးသားတဦးကို KIA အရာရှိဟု စွပ်စွဲ ဖမ်းဆီးထားတာလည်းရှိခဲ့ပါတယ်။


(နမ့်မွန်းမြို့က KBC ခရစ်ယာန်ဘုရားကျောင်းမှာ စစ်တပ်လက်အောက်ခံ SNAက စစ်သင်တန်းဆင်းပွဲပြုလုပ်နေစဉ်။ ဓာတ်ပုံ - Kachin Soldiers)

စစ်တပ်အင်အားသစ်တွေ ဝင်လာပြီးနောက် ဗန်းမော်မှာ နေ့စဉ်နီးပါး တိုက်ပွဲပြင်းထန်နေကြောင်း KIA ပြော

စက်တင်ဘာ ၂၇၊ ၂၀၂၆။ ထားမြတ်/People’s Spring

ကချင်ပြည်နယ်၊ ဗန်းမော်မြို့ကို စစ်အင်အားသစ်တွေဝင်ရောက်လာပြီးနောက် အခုရက်ပိုင်းမှာ နေ့တိုင်းလိုလိုတိုက်ပွဲပြင်းထန်နေကြောင်း ကချင်လွတ်လပ်ရေးတပ်မတော်(KIO/KIA) သတင်းပြန်ကြားရေးဌာနက ဖော်ပြပါတယ်။

တိုက်ပွဲ ၁နှစ်ခွဲကျော် ဖြစ်ပွားခဲ့တဲ့ ဗန်းမော်မြို့မှာ စစ်တပ်က စစ်သင်္ဘောတွေနဲ့ အင်အားဖြည့်တင်းတာ၊ စစ်ပန်းနေတဲ့ တပ်သားအချို့ကို တပ်ပြောင်းတာတွေ စစ်တပ်ဘက်က ပြုလုပ်ခဲ့ပြီး မြေပြင်ထိုးစစ်ဆင်မှုတွေလုပ်ဆောင်လာတာလို့ဆိုပါတယ်။

လတ်တလောမှာ ဗန်းမော်တက္ကသိုလ်၊ တာမိုင်းလုံ၊ ဟန်တဲ၊ညောင်ပင်သာ စတဲ့ဒေသတွေ ဘက်သို့စစ်ကောင်စီတပ်တွေ စစ်ကြောင်းထိုးလာလို့ မြေပြင်တိုက်ပွဲဖြစ်ပွားခဲ့ပြီး စစ်တပ်နဲ့ KIA အပြန်အလှန် ထိုးစစ်ဆင်တာ၊ အပြန်အလှန်တ ပ်ဆုတ်ရတာ စတဲ့ အခြေအနေလို့ အသိပေးပါတယ်။

မြေပြင်တိုက်ပွဲမရှိတဲ့ အချိန်တွေမှာဆိုရင်လည်း စစ်တပ်ဟာ ဒရုန်းနဲ့ တိုက်ခိုက်တာ၊ တာဝေးပစ် လက်နက်ကြီးတွေနဲ့ ပစ်ခတ်တာ၊ လေယာဉ်ဗုံးကြဲတာတွေ ပြုလုပ်နေကြောင်းလည်း ဖော်ပြပါတယ်။

လတ်တလောမှာ ဗန်းမော်မြို့မှ အပ ကချင်ပြည်နယ် အခြားဒေသတွေမှာမြေပြင်တိုက်ပွဲတွေဖြစ်တာ မရှိဘူးလို့လည်း အသိပေးပါတယ်။ ဒါပေမဲ့ ဖားကန့်ဒေသ၊ ဧရာ၀တီမြစ်ရိုးတလျှောက် စင်းခန်း၊ဇင်းဘုံ တ၀ိုက်မှာစစ်တပ်က လေကြောင်းဗုံးကြဲတာတွေ ရံဖန်ရံခါ ဆက်လုပ်နေကြောင်း ဖော်ပြပါတယ်။

အာဏာသိမ်းစစ်တပ်ဟာ ဩဂုတ်လကုန်နဲ့စက်တင်ဘာမှာ ဗန်းမော်နဲ့ရွှေကူမြို့နယ် တိုက်ပွဲတွေအတွင်း အထိနာခဲ့ပါတယ်။

ဗန်းမော်မြို့ကို ရေကြောင်းက စစ်အင်အားဖြည့်ဖို့ ကြိုးပမ်းလာတဲ့အပေါ် KIA ပူးပေါင်းတပ်က စစ်သင်္ဘောတွေကို ကြားဖြတ်တိုက်ခိုက်တာ၊ စစ်ကောင်စီရဲ့ မြေပြင်စစ်ကြောင်းတွေကိုတိုက်ခိုက်တာတွေပြုလုပ်ခဲ့တာဖြစ်ပါတယ်။ အဲဒီလိုတိုက်ခိုက်ခဲ့လို့ စစ်တပ်သင်္ဘော အစီး ၂၀ ဝန်းကျင် ထိခိုက်ပျက်စီးနစ်မြုပ် မီးလောင်တာတွေရှိခဲ့သလို မြေပြင် စစ်ကြောင်းတွေဟာလည်း စစ်ကြောင်းပျက် တပ်လန်တာ၊ စစ်သုံ့ပန်းတွေဖမ်းရတာတွေရှိခဲ့ပါတယ်။


(ကချင်ပြည်နယ်၊ ဗန်းမော်မြို့တနေရာကို ၂၀၂၅က တွေ့ရစဉ်။ ဓာတ်ပုံ - CJ)

■အ​တွေးအမြင်

ငါတို့ရဲ့နိုင်ငံကို တစ်နေ့တော့ ပြန်တည်ဆောက်ကြမယ်

-အေးခိုင်ဦး ရေးသားသည်။

မြန်မာနိုင်ငံသားတို့ ငရဲကျရောက်ခဲ့ရတာ ခုဆို ရက်ပေါင်း နှစ်ထောင်ကျော်ခဲ့ပါပြီ။ ပြည်သူ့အစိုးရလက်ထက်က ၅ နှစ်တာကာလကို ပြန်တွေးမိတိုင်း အခုချိန်မှာ ပိုပြီးတန်ဖိုးထားမိတယ်။ အဲဒီအချိန်တုန်းကတော့ နေ့စဉ်ဘဝမှာ ကိုယ်လုပ်စရာရှိတာကို ကိုယ်အေးအေးချမ်းချမ်း လုပ်ကိုင်ရင်း ပုံမှန်လူတစ်ယောက်လိုပဲ နေထိုင်ခဲ့ကြနိုင်တယ်။ မိသားစုအတွက် အလုပ်လုပ်မယ်၊ စားဝတ်နေရေးအတွက် ရှာ
ဖွေမယ်၊ ကိုယ့်အနာဂတ်အတွက် စီစဉ်မယ်ဆိုတဲ့ သာမန်ဘဝလေးကို စိတ်အေးလက်အေး ဖြတ်သန်းနိုင်ခဲ့တယ်။ကိုယ့်ဘဝထဲကို အ
ကြောင်းမဲ့ ဝင်ရောက်ပြီး ဒုက္ခပေးမယ့်သူတွေ၊ မနက်ဖြန်ဘာဖြစ်မလဲဆိုပြီး စိုးရိမ်နေရတာမျိုးတွေ မရှိသလောက်ပါပဲ။

အဲဒီလိုဘဝမျိုးကို ကိုယ်တိုင်နေခဲ့ဖူးတဲ့အ
တွက် အခုအချိန်နဲ့ ပြန်နှိုင်းယှဉ်မိတိုင်း ပိုပြီးရင်နာမိတယ်။တစ်ချိန်က သာမန်လို့ ထင်ခဲ့တဲ့ လုံခြုံမှု၊ စိတ်အေးချမ်းမှုနဲ့ကိုယ့်ဘဝကို ကိုယ်
ပိုင်ဆုံးဖြတ်ပြီး နေထိုင်ခွင့်ရတာတွေဟာ တ
ကယ်တော့ အလွန်တန်ဖိုးရှိတဲ့အရာတွေ ဖြစ်နေခဲ့တာကို အခုမှ ပိုနားလည်လာတယ်။ လူတစ်ယောက်အနေနဲ့ ကိုယ့်မိသားစုနဲ့အတူ ကြောက်ရွံ့မှုကင်းကင်း၊ စိုးရိမ်မှုကင်းကင်း ပုံမှန်ဘဝမှာနေခွင့်ရဖို့ကလူသားတိုင်းရဲ့ အခွင့်
အရေးပါ။

ဒီရက် နှစ်ထောင်ကျော်အတွင်း ကိုယ့်ဘဝကိုကိုယ်ပြန်ကြည့်မိတယ်။မနက်မိုးလင်းလို့ အိမ်တံခါးကိုဖွင့်လိုက်တာနဲ့ ရောက်သွားတဲ့အ
တွေးက ဒီနေ့ ဘာတွေဖြစ်ဦးမှာလဲ၊ ဘာတွေကြားရဦးမှာလဲ၊ ဘယ်သူတွေ ဒုက္ခဖြစ်ကြဦးမှာလဲ ဆိုတဲ့ အတွေးမျိုးတွေက ခေါင်းထဲအရင်ရောက်လာရတယ်။ စိတ်နှလုံးမချမ်းမြေ့ခြင်းနဲ့ပဲမနက်ခင်းတိုင်းဟာစခဲ့တယ်။ အရင်တုန်းကမနက်အိပ်ရာထတာနဲ့ဒီနေ့လုပ်ရမယ့်အလုပ်တွေလုပ်မယ်၊ တွေ့ရမယ့်သူတွေ တွေ့မယ်၊ ညနေစာအတွက် စီစဉ်မယ်။ ဒီလောက်ပါပဲ။ဘဝဟာ ပုံမှန်လည်ပတ်နေခဲ့တယ်။ အခု
တော့ အဲဒီလို မဟုတ်တော့ဘူး။မီးလာမလား။ ဈေးတက်ဦးမှာလား။ ဆေးလိုရင် ရပါ့မလား။ အလုပ်က ဆက်ရှိပါ့မလား။ မိသားစုဝင်တွေ ဘေးကင်းပါ့မလား။ ကိုယ့်သားသမီးတွေရဲ့ အနာဂတ်က ဘယ်လိုဖြစ်လာမလဲ။ ဒီလို‌တွေနဲ့ တစ်နေ့ပြီးတစ်နေ့ ကိုယ့်ခေါင်းထဲမှာ လည်
ပတ်နေတယ်။

ကိုယ့်နိုင်ငံကောင်းပြီလို့ ထင်ခဲ့ဖူးပါတယ်။ နိုင်ငံ့ခေါင်းဆောင်တွေနဲ့ နိုင်ငံရေးသမားတွေက ဦးဆောင်ပြီး နိုင်ငံ့အရေးလုပ်ကြမယ်။ ကိုယ်က ကိုယ့်အလုပ်ကိုယ်လုပ်ပြီး မိသားစုကို ကျွေးမွေးမယ်။သားသမီးတွေကသူတို့ဘဝအတွက် အနာဂတ်တွေ တည်ဆောက်မယ်။ ဘဝတွေဟာ သာယာပြီလို့ မျှော်လင့်ခဲ့တယ်။နောင်သားသမီးမြေးမြစ်တို့အတွက်နိုင်ငံဟာ အေးချမ်းပြီလို့ပေါ့။အခုတော့မင်းအောင်လှ်ိုင် သမတရူးတာနဲ့ တနိုင်ငံလုံး ချောက်ထဲ ကျရုံသာမက ငရဲထဲပါ ကျ ရ တော့တာပါပဲ။

စာသင်ကျောင်းတွေကို ဗုံးကြဲ၊ ဆေးရုံတွေကို ဗုံးကြဲ၊ ဘုန်းကြီးကျောင်းတွေကို ဗုံးကြဲ၊ စစ်ဘေးရှောင်တွေကို ဗုံးကြဲ။ အသက်သေဆုံးရတာ ကလေးငယ်လေးတွေကနေ အဖိုးအဖွား ထိ အရွယ်မျိုးစုံ၊ လူမျိုးမရွေး ဘာသာမရွေး။ ရှင်ကွဲ သေကွဲ ကွဲရတဲ့ မိသားစုတွေ၊ သားသ
မီးဆုံးရှုံးရတဲ့ မိဘတွေ၊ မိဘဆုံးရှုံးရတဲ့ သား
သမီးတွေ၊ ဇနီး ခင်ပွန်း ဆုံးရှုံးရသူတွေ၊ အိုး
အိမ်ဆုံးရှုံးရသူတွေ၊ ပညာရေးကို စွန့်လွှတ်လိုက်ရတဲ့လူငယ်တွေ။အသက်မွေးဝမ်း
ကျောင်းကို စွန့်လွှတ်လိုက်ရသူတွေ၊ကိုယ့်မှာအပြစ်မရှိပါပဲနဲ့ ရောက်လာရတဲ့ ဒုက္ခတွေဟာ ငရဲတမျှ။

အခြေခံလိုအပ်ချက်ဖြစ်တဲ့ စားဝတ်နေ‌ရေးရဲ့ ကြပ်တည်းဒုက္ခမှာက တနိုင်ငံလုံး။ ဟိုတုန်းက လျှပ်စစ်မီးမှန်မှန်ရခဲ့ဖူးပါတယ်။ဘဝတွေဟာ အဆင်ပြေချောမွေ့ခဲ့တဲ့အချိန် ရှိခဲ့ဖူးပါတယ်။အခုတော့ မီးလာတဲ့အချိန်ကို စောင့်ရတဲ့ဘဝ။ မီးလာရင် အိမ်ကလူတိုင်းက ကိုယ့်အလုပ်ကိုယ် အမြန်လုပ်ကြရတယ်။ ဖုန်းအားသွင်းရတယ်။Power bank အားသွင်းရတယ်။ ရေတင်ရတယ်။ အလုပ်လုပ်လို့ရရင် အလုပ်လုပ်တယ်။ တစ်ခါတလေ မီးလာတဲ့အချိန်ကိုတောင် မိသားစုအတွက် ရှားပါးတဲ့အခွင့်အရေးတစ်ခုလို ဖြစ်လာရတယ်။

ဈေးထဲသွားတဲ့အခါလည်း အရင်လို မဟုတ်တော့ဘူး။ဟိုဟာဘယ်လောက်လဲ။ဒီဟာ ဘယ်လောက်လဲ။ မနေ့ကနဲ့ ဒီနေ့ ဘာလို့ဈေးကွာနေတာလဲ။ ကိုယ်လိုချင်တာကို ဝယ်တာထက် ကိုယ်တတ်နိုင်တာကို ရွေးဝယ်လာရတယ်။ တစ်ချိန်က အသားဟင်းစားမလား၊ ငါးစားမလားဆိုတာ စဉ်းစားခဲ့ကြတယ်။ အခုတော့ ဟင်းတစ်ခွက်လျှော့မလား၊ ထမင်းတစ်နပ် လျှော့မလားဆိုတာ စဉ်းစားရတဲ့မိသားစုတွေအများကြီး။ အဲဒီအချိန်မှာ “စီးပွားရေးကျဆင်းတယ်”ဆိုတဲ့စကားလုံးကသိပ်မကြီး
မားတော့ဘူး။ဘာဖြစ်လို့လဲဆိုတော့ အဲဒီစ
ကားရဲ့ အဓိပ္ပာယ်ကို ကိုယ့်မီးဖိုချောင်ထဲမှာ ကိုယ်မြင်နေရလို့ပဲ။

ဆေးဝါးအကြောင်းဆိုရင်တော့ ပိုပြီးရင်နာတယ်။ကျန်းမာရေးကောင်းနေတဲ့လူတစ်ယောက်က ဆေးတစ်လုံး ရှာမရတာကို အ
လွယ်တကူ ခံစားမိချင်မှ ခံစားမိမှာပါ။ ဒါပေမယ့်နေ့တိုင်းဆေးသောက်ရတဲ့လူတစ်ယောက်အတွက်တော့ ဆေးတစ်လုံးဆိုတာ သာမန်ပစ္စည်းမဟုတ်ဘူး။အသက်ရှင်ဖို့လိုတဲ့အရာ။ဆေးဆိုင်တစ်ဆိုင်ကနေ တစ်ဆိုင်ကို လိုက်ရှာရတာ။ရမရ မေးရတာ။ ဈေးကြီးနေရင်တောင် ဝယ်ရတာ။ မဝယ်နိုင်ရင် ဘာဖြစ်မလဲဆိုတာ မစဉ်းစားရဲတာ။ ဒီလိုအရာတွေကို ကိုယ်တိုင်မြင်လာရတဲ့အခါ “နိုင်ငံတစ်နိုင်ငံရဲ့ ကျန်းမာရေးစနစ်”ဆိုတာဘာအဓိပ္ပာယ်လဲဆိုတာနားလည်လာတယ်။ကိုယ့်နိုင်ငံရဲ့ အဖြစ်ဆိုးကိုလည်း ပို

ရင်နာရတယ်။

ပညာရေးအကြောင်းဆိုရင်လည်း အင်မတန် ရင်နာစရာကောင်းလှပါတယ်။ ကလေးတစ်ယောက်ဟာ လူအဖြစ်မွေးဖွားခဲ့ရတာ သူ့အ
ပြစ်ဘာမှမရှိပါဘူး။ ဘယ်အချိန်မှာ ဘယ်သူက အာဏာယူမလဲ ဆိုတာလည်း သူရွေးခဲ့တာမဟုတ်ဘူး ။ ဘယ်နေရာမှာ စစ်ဖြစ်မလဲဆိုတာလည်း သူ‌ရွေးခဲ့တာ မဟုတ်ပါဘူး ။ ဒါပေမယ့် အကျိုးဆက်ကိုတော့ သူက ခံနေရတယ်။ ကျောင်းမတက်နိုင်တာ။ပုံမှန်စာမသင်နိုင်တာ။ဆရာ၊ ဆရာမတွေနဲ့ ပုံမှန်မတွေ့နိုင်တာ။ သူ့အသက်အရွယ်မှာ ရသင့်တဲ့ ပညာ
ရေးအခွင့်အရေးတွေ ဆုံးရှုံးသွားတာ။ ဆုံးရှုံးသွားတဲ့ စာသင်ချိန်တွေကို ဘယ်တော့ ဘယ်
လိုပြန်ဖြည့်လို့ရမလဲဆိုတာမသိပါဘူး။ ဒါပေမယ့် သိတာတစ်ခုတော့ရှိပါတယ်။ ကလေး
တွေရဲ့ အနာဂတ်ကိုပျက်စီးစေပြီး နိုင်ငံတစ်
နိုင်ငံကို ပြန်ကောင်းအောင် တည်ဆောက်
လို့ မရဘူးဆိုတာပါပဲ။

လူငယ်တွေကလည်း တစ်ယောက်ပြီးတစ်ယောက် ထွက်သွားကြပြီ။ တချို့က ပညာ
သင်ဖို့။ တချို့က အလုပ်လုပ်ဖို့။ တချို့က မိသားစုကို ထောက်ပံ့ဖို့။ တချို့က ကိုယ့်ဘဝကိုယ်လုံခြုံအောင်လုပ်ဖို့။တချို့ကမင်းအောင်
လှိုင်ကို တော်လှန်ဖို့။ လူငယ်တစ်ယောက်ဟာ သူ့ဘဝကို ကောင်းကောင်း တည်ဆောက်ချင်တာ သဘာဝပါပဲ၊လူငယ်တယောက်ရဲ့ တာ
ဝန်ပါပဲ။ လူငယ်တွေ သူတို့ရဲ့အနာဂတ်ကို သူတို့နိုင်ငံထဲမှာ တည်ဆောက်လို့မရတဲ့နိုင်ငံ၊ လူငယ်တွေ ဆက်နေလို့မရတော့တဲ့ နိုင်ငံ ဖြစ်သွားရတယ်။

ဒါပေမယ့် ဒီအရာတွေကြားထဲမှာမယုံကြည်ချင်တာတစ်ခုရှိပါတယ်။ “မြန်မာနိုင်ငံက
တော့ ပြီးသွားပြီ” ဆိုတဲ့စကား။ မပြီးသေးဘူးလို့ ထင်ပါတယ်။အာဏာရှင်ဟာ အဆုံးထိ ဒီအတိုင်းပြီးသွားရိုး ထုံးစံမရှိပါ။ အာဏာရှင်ဟာ ကျဆုံးမှာပါ။သူ့အချိန်ဟာ တနေ့ ​ရောက်
လာမှာ။ နိုင်ငံမှာ ပျက်စီးသွားတာတွေ အများကြီးရှိတယ်။ဆုံးရှုံးသွားတာတွေလည်းအများ
ကြီးရှိတယ်။ပြန်ပြင်ရမယ့်အရာတွေကလည်း မနည်းဘူး။ဒါပေမယ့်လူတွေ ရှိနေသေးတယ်။ ကလေးတွေ ရှိနေသေးတယ်။ လူငယ်တွေ ရှိနေသေးတယ်။ဆရာဝန်တွေ ရှိနေသေးတယ်။ ဆရာ၊ ဆရာမတွေ ရှိနေသေးတယ်။ အင်ဂျင်
နီယာတွေ ရှိနေသေးတယ်။တောင်သူတွေ ရှိနေသေးတယ်။ အလုပ်သမားတွေ ရှိနေသေးတယ်။ နိုင်ငံခြားကို ရောက်နေတဲ့ မြန်မာတွေလည်း ရှိနေသေးတယ်။ အရေးအကြီးဆုံးက ဒီနိုင်ငံကို လွတ်မြောက်စေချင်တဲ့စိတ် ရှိနေသေးတယ်။ဒါကြောင့် တစ်နေ့နေ့မှာ ပြန်တည်ဆောက်ခွင့်ရကြမယ်။

လူတစ်ယောက်ဟာ သူ့ရဲ့အမြင်၊ သူ့ရဲ့ယုံ
ကြည်ချက်၊ သူ့ရဲ့လူ့ဂုဏ်သိက္ခာနဲ့ လွတ်လပ်စွာ အသက်ရှင်နိုင်တဲ့ နိုင်ငံတစ်နိုင်ငံဖြစ်ဖို့ ပြန်တည်ဆောက်ခွင့်ရကြမှာပါ။ အဲဒီအလုပ်ကို ဘယ်အာဏာရှင်တစ်ယောက်ကမှ လွယ်လွယ်နဲ့တော့ ခွင့်ပြုမှာမဟုတ်ပါဘူး။ ပြည်သူတွေကိုယ်တိုင်၊ ပညာရှင်တွေကိုယ်တိုင်၊ လူ
ငယ်တွေကိုယ်တိုင်၊ နိုင်ငံခြားရောက်နေတဲ့ မြန်မာတွေကိုယ်တိုင် တစ်ယောက်တစ်ဖက်ကပါဝင်ပြီးတည်ဆောက်နိုင်မယ့်နေ့ ရောက်
လာမယ်လို့ ယုံကြည်ပါတယ်။

တစ်နေ့ကျရင် ဒီနေ့တွေကို ပြန်မှတ်မိကြမယ်။ မီးမလာတဲ့ညတွေကို။ ဈေးတက်လို့
မဝယ်နိုင်ခဲ့တဲ့နေ့တွေကို။ ဆေးရှာမတွေ့လို့ စိတ်ပူခဲ့ရတဲ့အချိန်တွေကို။ ကျောင်းမတက်နိုင်ခဲ့တဲ့ ကလေးတွေကို။ နိုင်ငံခြားထွက်သွားတဲ့ သူငယ်ချင်းတွေကို။မိသားစုနဲ့ ဝေးကွာသွားတဲ့သူတွေကို။ ဆုံးရှုံးခဲ့ရတဲ့သူတွေကို။

အဲဒီအချိန်မှာ တစ်ယောက်ကိုတစ်ယောက် ပြန်ပြောကြမယ်။ "ဒီအရာတွေကို ငါတို့ မေ့မသွားဘူး။ ဒါပေမယ့် ဒီအရာတွေကြောင့် ငါတို့နိုင်ငံကိုလည်း မစွန့်လွှတ်ဘူး”လို့။ နိုင်ငံတစ်
နိုင်ငံရဲ့ အနာဂတ်ဆိုတာ အာဏာရှိသူတစ်ယောက်ရဲ့လက်ထဲမှာပဲ ရှိတာမဟုတ်ဘူး။ စိတ်ပျက်နေတဲ့ပြည်သူတစ်ယောက်ရဲ့ မျှော်
လင့်ချက်ထဲမှာလည်း ရှိပါတယ်။ နိုင်ငံခြားမှာ အလုပ်လုပ်နေရတဲ့ လူငယ်တစ်ယောက်ရဲ့ အိပ်မက်ထဲမှာလည်း ရှိပါတယ်။ CDM ဆရာမတစ်ယောက်ရဲ့ လက်ထဲမှာလည်း ရှိတယ်။ တောထဲမှာဆေးကုသပေးနေတဲ့ ဆရာဝန်တစ်ယောက်ရဲ့ လက်ထဲမှာလည်း ရှိတယ်။ ကိုယ့်ရဲ့မြေယာကို စွန့်ခွာပြေးရတဲ့ တောင်သူတစ်ယောက်ရဲ့ လက်ထဲမှာလည်း ရှိပါတယ်။ PDF လူငယ်လေးတယောက်ရဲ့ လက်ထဲမှာလည်း ရှိပါတယ်။ ပြီးတော့ ဒီနေ့အခြေအနေကို မကျေနပ်ပေမယ့် မနက်ဖြန်အတွက်မျှော်လင့်ချက်ကိုမစွန့်လွှတ်သေးတဲ့ ငါတို့အားလုံးရဲ့လက်ထဲမှာလည်း ရှိပါတယ်။

တစ်နေ့တော့ ပြန်တည်ဆောက်ကြမယ်။ တို့ရဲ့ သားသမီးတွေ အေးအေးချမ်းချမ်းနဲ့ လူဖြစ်ခွင့်ရဖို့၊ လူတ်ိုင်း ကိုယ်တိုင် လူသားတစ်ယောက်လို ဂုဏ်သိက္ခာရှိရှိ နေနိုင်ဖို့။ ပြီးတော့ “ဒီနိုင်ငံဟာ ငါတို့နိုင်ငံပဲ” လို့ ပြန်ပြောနိုင်ဖို့အတွက်။

အဲဒီနေ့ရောက်တဲ့အခါခံခဲ့ရတဲ့နာကျင်မှုတွေဟာအလဟဿဖြစ်မနေစေရဘူး။ဘာလို့လဲ
ဆိုတော့ပြန်တည်ဆောက်မယ့်မြန်မာနိုင်ငံဟာအရင်လိုပဲပြန်ဖြစ်ဖို့မဟုတ်ဘဲ၊အရင်ထက် ပိုကောင်းတဲ့ နိုင်ငံဖြစ်ဖို့ ဖြစ်ရမယ်။ ။

စစ်​ရှောင်ရင် စာသင်ကြား​နေတဲ့က​လေး
ငယ်​တွေ။ ဓါတ်ပုံ-The Guardian

မင်းပြား၊ အမ်းနဲ့ ကျောက်ဖြူမြို့နယ်တို့ကို စစ်တပ်ဗုံးကြဲ

■လူနေရပ်ကွက်နဲ့အကျဉ်းစခန်းကိုကျရောက်
ပေါက်ကွဲပြီးသေဆုံးထိခိုက်သူတချို့ရှိနေ

စက်တင်ဘာ-၂၇၊၂၀၂၆။ခိုင်မြတ်/People’s Spring။

အာဏာသိမ်းစစ်တပ်ကရခိုင်ပြည်နယ်မင်းပြားမြို့ပေါ်၊ အမ်းမြို့နယ် ဒလက်ချောင်းရှိ အကျဉ်းစခန်းနဲ့ ကျောက်ဖြူ မြို့နယ်အတွင်းက မင်းကြောင်းချောင်းတံတားတို့ကို ဗုံးကြဲခဲ့တာကြောင့် ထိခိုက်၊သေဆုံးသူတွေ ရှိခဲ့တယ်
လို့ ဒေသခံတွေက ပြောပါတယ်။

စက်တင်ဘာလ၂၇ရက်မနက်အစောပိုင်းအ
ချိန်မှာမင်းပြားမြို့ပေါ် စျေးဟောင်းပိုင်းရပ်
ကွက်နဲ့ အနီးဝန်းကျင် တောင်တန်းတွေကို ထောက်ပို့လေယာဉ် Y12 နဲ့ ဗုံးအလုံး တဆယ်ဝန်းကျင်ကြဲခဲ့တာဖြစ်ပြီး စျေးဟောင်းပိုင်းရပ် ကွက်မှ သက်ကြီးအမျိုးသားတဦးဒဏ်
ရာရခဲ့ပါတယ်။

“၁၂ နာရီကျော်ပြီ။ တချို့အိပ်နေကြပြီ။ အဲဒီအချိန်မှာ လာကြဲတာ။ အိမ်တချို့ပျက်သွားတယ်။ဦးလေး တယောက်လည်း ဒဏ်ရာရတယ်”လို့မင်းပြားမြို့ခံတဦးကပြောပါတယ်။

ဒါ့အပြင် ဒီနေ့မနက်ပိုင်းမှာပဲ အမ်းမြို့နယ် ဒလက်ချောင်းရှိ အာရက္ခတပ်တော်(AA)ရဲ့ အကျဉ်းစခန်းကိုလည်း ဂျက်ဖိုက်တာနှစ်စီးနဲ့ ဗုံးကြဲခဲ့ပါသေးတယ်။ “အထိအခိုက်တွေ ရှိတယ်ကြားတယ်။ အဲဒီမှာ စစ်တပ်က သုံ့ပန်း တွေလည်း ရှိတယ်” လို့ AA နဲ့ နီးစပ်တဲ့ အမ်းဒေသခံတဦးက ပြောပါတယ်။

စစ်တပ်ကအထိနာပြီးတပ်ပြန်ဆုတ်ရတဲ့ ကျောက်ဖြူမြို့နယ်မှာလည်း ကျောက်ဖြူ - ရမ်းဗြဲအစပ်ရှိ မင်းကြောင်းချောင်းတံတားနဲ့ အနီးဝန်းကျင်တွေကိုလည်းစက်တင်ဘာလ ၂၆ ရက်နေ့ညမှာ ဗုံးကြဲခဲ့ပြီး အဲ ဒီဗုံးကြဲမှုကြောင့် မင်းကြောင်းချောင်းတံတား ပျက်စီးခဲ့တယ်လို့ သိရပါတယ်။

“တောင်မော်ဦးဘက်က ရှေ့တိုးလို့မရတဲ့အခါ ရေကြောင်းကနေ ကမ်းတက်ဖို့ကြိုးစားနေတာ။အရင်ကလည်းနှစ်ကြိမ်၊သုံးကြိမ်ရှိပြီ ဒီတံတားကို ဗုံးကြဲတာ”လို့ ရမ်းဗြဲဒေသခံတဦးက ပြောပါတယ်။

စစ်တပ်ဟာစက်တင်ဘာ၂၆ ရက်နေ့မှာပဲ ရခိုင်ပြည်နယ်တောင်ပိုင်း ဂွမြို့နယ် ကျိန္တလီမြို့နဲ့ ရေကျော် ကျေးရွာရှိ ဘုန်းတော်ကြီးကျောင်းတို့ကို ဗုံးကြဲခဲ့တာကြောင့် အရပ်သားပြည်သူ ၃ ဦးထိခိုက်ဒဏ်ရာရပြီး ဘုန်းတော်ကြီးကျောင်းတခုလုံးလည်း ပျက်စီးခဲ့ပါတယ်။

စက်တင်ဘာလ၂၅ ရက်မနက်အစောပိုင်းကလည်း စသ်တပ်ကကျောက်တော်မြို့ပေါ်နဲ့အနီးဝန်းကျင်တို့ကိုဗုံးကြဲတိုက်ခိုက်ခဲ့လို့က
လေးငယ်တွေအပါအဝင် ၈ဦး ထက်မနည်း ထိခိုက်ဒဏ်ရာရသွားခဲ့ပါသေးတယ်။

၄၉၂၆ စစ်ဆင်ရေးလို့ ကြွေးကြော်ပြီး ရခိုင်ထိုးစစ်အတွင်း ရှေ့တန်းစစ်မျက်နှာတွေမှာ စစ်တပ်ဘက်က နေ့စဉ်ဆယ် ချီသေဆုံးမှုရှိနေတဲ့ စစ်တပ်ဟာ အရပ်သားလူ နေကျေးရွာတွေကိုလည်းလေကြောင်းကဗုံးကြဲတာ၊လက်
နက်ကြီးတွေနဲ့ ဆက်တိုက်ပစ်ခတ်နေတာဖြစ်ပါတယ်။

လူထုနွေဦးက ကောက်ယူပြုစုထားတဲ့အချက်
အလက်တွေအရ စစ်တပ်ရဲ့ စစ်ဆင်ရေးစတဲ့ စက်တင်ဘာ ၄ ရက်နေ့ ကနေ ဒီနေ့ ၂၇ ရက်နေ့ထိ သုံးပတ်ကျော်ကာလအတွင်း စစ်တပ်လက်ချက်ကြောင့် သေဆုံးရတဲ့ ရခိုင်ဒေသခံ အရပ်သားပြည်သူ ၉ ဦးနဲ့ ထိခိုက်ဏ်ရာရသူ ၂၁ ဦးထက်မနည်း ရှိသွားခဲ့ပြီဖြစ်ပါတယ်။