အယ်လ်နီညိုကြောင့် ခြောက်လအတွင်း လူ
လေးသိန်းခွဲလောက် သေဆုံးနိုင်တယ်လို့
သိပ္ပံပညာရှင်​တွေခန့်မှန်း

စက်တင်ဘာ-၂၃၊၂၀၂၆။People's Spring

ကမ္ဘာပေါ်မှာ လက်ရှိကြုံတွေ့နေတဲ့ ပြင်းထန်တဲ့ အပူလှိုင်းဖြတ်မှု စူပါအယ်လ်နီညို ဖြစ်စဉ်ကြောင့် လာမယ့် ​ခြောက်လအတွင်း လူပေါင်း လေးသိန်းခွဲလောက်သေဆုံးနိုင်ကြောင်းသိပ္ပံပညာရှင်တွေစုပေါင်းရေးသားပြုစုထားတဲ့အစီရင်ခံစာ အသစ်တစ်ခုမှာ ခန့်မှန်းဖော်ပြထားပါတယ်။

အဲဒီ အစီရင်ခံစာကို ကမ္ဘာ့ရာသီဥတုဆိုင်ရာ သိပ္ပံပညာရှင်တွေစုပေါင်းရေးသားပြုစုခဲ့တာ ဖြစ်ပါတယ်။ အယ်လ်နီညိုဟာလာမယ့်လပိုင်းတွေအတွင်းအရှိန်ပိုမိုမြင့်တက်လာပြီး
အင်ဒိုနီးရှားကနေ အိန္ဒိယထိ အာရှတောင်ပိုင်း ဒေသတွေ၊ နိုက်ဂျီးရီးယားကနေ အမေရိကန်ထိ ကျယ်ပြန့်တဲ့ ရပ်ဝန်းကြီးတွေမှာ ပြင်းပြင်း
ထန်ထန်သက်ရောက်ထိခိုက်နိုင်ကြောင်း အစီ
ရင်ခံစာက သုံးသပ်ထားပါတယ်။

အပူကြောင့်သေဆုံးမှုတွေဟာ ဒေသအလိုက် အရမ်းများပြားလာနိုင်ပြီး သက်ဆိုင်ရာ အစိုး
ရတွေ၊ အာဏာပိုင်တွေ အနေနဲ့ လိုအပ်တဲ့ တုံ့ပြန်ကိုင်တွယ်မှု အစီအစဉ်တွေကို ကြိုတင် ပြင်ဆင် ရေးဆွဲထားဖို့လည်း တိုက်တွန်းခဲ့ပါတယ်။

လက်ရှိ အယ်လ်နီညို ဖြစ်စဉ်ဟာ အားအ
ကောင်းဆုံးအဆင့်ကိုရောက်ဖို့လပိုင်းလောက် လိုအပ်နေဆဲ ဖြစ်တာတောင်မှ ကမ္ဘာ့ဒေသ တချို့မှာ စံချိန်တင် အပူချိန် မြင့်တက်မှုတွေကို ကြုံနေရပါတယ်။

အယ်လ်နီညိုဟာ သဘာဝ ရာသီဥတု ဖြစ်စဉ်တစ်ခုလို့ ဆိုနိုင်ပေမယ့် ကမ္ဘာ့အပူချိန် မြင့်တက်လာမှုတွေကြောင့် ဒီနှစ် အယ်လ်နီညိုက သိသိသာသာ ပိုပြင်းထန်လာပါတယ်။

ခန့်မှန်းခြေအရ စက်တင်ဘာလကနေလာမယ့် ဖေဖော်ဝါရီလထိ အတောအတွင်း အယ်လ်နီညိုနဲ့ ဆက်စပ်လို့ ကမ္ဘာအနှံ့မှာ သေဆုံးသူ အရေအတွက် ၄၅၁၀၀၀ လောက် ရှိနိုင်တယ်လို့ အမေရိကန်နိုင်ငံ၊ ချီကာဂို တက္ကသိုလ်မှာ ရာသီဥတု သက်ရောက်မှု သုတေသနဌာနကို ထူထောင်ထားသူ ပရော်ဖက်ဆာ မိုက်ကယ်
ဂရင်းစတုန်းက ပြောပါတယ်။ သူဟာ အခု အစီရင်ခံစာမှာ အဓိက ဦးဆောင်ပါဝင်သူ တစ်ဦးပါ။

လာမယ့် ၆ လအတွင်းသေဆုံးသူ ဦးရေ လေး
သိန်းခွဲလောက်ထိ ရှိနိုင်တယ်လို့ ပညာရှင်တွေကခန့်မှန်းထားတဲ့အပြင်၂၀၂၇ဇွန်နဲ့ဇူလိုင်
လတွေမှာ အယ်လ်နီညိုကြောင့် သေပျောက်နှုန်းက ပိုတောင် မြင့်မားနိုင်သေးတယ်လို့ ဆိုပါတယ်။ ၆ လအတွင်း ရာသီဥတု ပူပြင်းမှုနဲ့ ဆက်စပ်တဲ့ သေဆုံးမှုတွေ အများဆုံး ကြုံ
တွေ့နိုင်တဲ့ နိုင်ငံတွေကတော့ နိုက်ဂျီးရီးယား၊ အင်ဒိုနီးရှား၊ ဆူဒန်၊ အိန္ဒိယနဲ့ ဘရာဇီးတို့ ဖြစ်နိုင်ကြောင်း ပညာရှင်တွေက သတိပေးထားပါတယ်။

သိပ္ပံပညာရှင်တွေကလက်ရှိ အယ်လ်နီညို ဖြစ်စဉ်ဟာ ထူးထူးကဲကဲ ပြင်းထန် ကြမ်း
တမ်းလွန်းကြောင်း ပြောဆိုထားပြီး တချို့ကတော့ ဂေါ်ဇီလာ အယ်လ်နီညိုလို့တောင် တင်စားကြပါတယ်။

အရေးပေါ် အခြေအနေတုံ့ပြန်မှုတွေ၊ပိုပြီး ကောင်းမွန်တဲ့ ပြင်ဆင်လေ့ကျင့်မှုတွေ စီစဉ်ထားနိုင်ရင်တော့ အယ်လ်နီညိုကြောင့် သေ
ဆုံးမယ့် အသက်တွေကို ထိထိရောက်ရောက် လျှော့ချနိုင်လိမ့်မယ်လို့ ဘာကလေမှာရှိတဲ့ ကယ်လီဖိုးနီးယား တက္ကသိုလ်ရဲ့ ပါမောက္ခ တစ်ဦးဖြစ်ပြီး အစီရင်ခံစာကို ပူးပေါင်း ရေး
သားခဲ့သူ ဒေါက်တာ တမ်မာ ကာလီတန်က ပြောကြားခဲ့ပါတယ်။

ပြင်းထန်တဲ့ ရာသီဥတုအခြေအနေတွေက
ကမ္ဘာ့ စားနပ်ရိက္ခာ ကဏ္ဍကိုပါ ထိခိုက်လာနိုင်ပြီး ကမ္ဘာ့စားနပ်ရိက္ခာ အဖွဲ့ကြီး (WFP)
ကတော့ အယ်လ်နီညို ဒဏ်ကြောင့် လူပေါင်း သန်း၅၀လောက်အကြီးအကျယ်ဆာလောင်
မွတ်သိပ်မှုပြဿနာမျိုးကြုံလာရနိုင်ကြောင်း သတိပေးထားပါတယ်။

၁၈၇၇ နဲ့ ၁၈၇၈ ခုနှစ်တွေမှာ ဖြစ်ပွားခဲ့တဲ့ အယ်လ်နီညို ဖြစ်စဉ်တုန်းကလည်း အငတ်ဘေး ဆိုက်မှုတွေ ကြုံခဲ့ပြီးဘရာဇီး၊အိန္ဒိယနဲ့တရုတ်
တို့မှာ ပြင်းပြင်းထန်ထန် သက်ရောက် ခံစားခဲ့ရသလို လူပေါင်း သန်း ၅၀ ကျော် သေကြေပျက်စီးခဲ့ဖူးကြောင်း သိရပါတယ်။

ကိုးကား-Guardian

ဒုက္ခသည်တွေ မြန်မာသို့ ပြန်မပို့ခင် ရာဇဝတ်မှုများနဲ့ အကြမ်းဖက်မှုများ ရပ်တန့်ရမယ်လို့ IIMM ထုတ်ပြန်

စက်တင်ဘာ-၂၃၊ ၂၀၂၆။ People’s Spring

ရိုဟင်ဂျာများအပါအဝင် မြန်မာနိုင်ငံရှိ အကြမ်းဖက်မှုတွေကနေ ထွက်ပြေးလွတ်မြောက်လာသူများကို နေရပ်သို့ပြန် မပို့ခင်မှာ ရာဇဝတ်မှုများနဲ့ အကြမ်းဖက်မှုများ ရပ်တန့်ရမယ်လို့ မြန်မာနိုင်ငံဆိုင်ရာလွတ်လပ်သော စုံစမ်းစစ်ဆေးမှုယန္တရား(IIMM)က ဒီနေ့ ထုတ်ပြန်ပါတယ်။

လတ်တလော ဒေသတွင်းအစိုးရတွေက ရိုဟင်ဂျာများအပါအဝင် မြန်မာနိုင်ငံရှိ အကြမ်းဖက်မှုတွေကနေ ထွက်ပြေးလွတ်မြောက်လာသူများ နေရပ်သို့ပြန်ပို့နိုင်ရေးနဲ့စပ်လျဥ်းတဲ့ ထုတ်ပြန်ကြေညာချက်များကို သတိပြုမိကြောင်းနဲ့ အဲဒီ နေရပ်ပြန်ပို့ခြင်းများ မတိုင်မီ မြန်မာနိုင်ငံတဝှမ်းရှိ ပြည်သူလူထုများ ပြင်းထန်စွာခံစားနေရတဲ့ ရာဇဝတ်မှုများနဲ့ အကြမ်းဖက်မှုများ ရပ်တန့်ရမှာဖြစ်တယ်လို့ IIMM က ဖော်ပြပါတယ်။

IIMM က စုဆောင်းထားတဲ့ အထောက်အထားတွေအရ မြန်မာနိုင်ငံတဝှမ်းမှာ ဆိုးရွားတဲ့ နိုင်ငံတကာရာဇဝတ်မှု ကျူးလွန်မှုတွေ ဆက်လက်ဖြစ်ပွားနေတယ်လို့ ဆိုပါတယ်။

ပြီးခဲ့တဲ့သီတင်းပတ်က မလေးရှားနိုင်ငံ ဝန်ကြီးချုပ်က သူ့နိုင်ငံမှာ ရောက်ရှိနေတဲ့ မြန်မာဒုက္ခသည်တွေကို ပြန်ပို့နိုင်ရေးအတွက် အာဏာသိမ်းခေါင်းဆောင် မင်းအောင်လှိုင်နဲ့ တွေ့ဆုံဆွေးနွေးဖို့ ရှိပြီး မလေးရှားကို လာရောက်ဖို့ ဖိတ်ကြားမယ်လို့ ပြောဆိုထားပါတယ်။

ကုလသမဂ္ဂလူ့အခွင့်အရေးကောင်စီက ဖွဲ့စည်းထားတဲ့ IIMM ကတော့ စက်တင်ဘာလဆန်းမှာ ကျင်းပတဲ့ ၆၃)ကြိမ်မြောက် ကုလသမဂ္ဂလူ့အခွင့်အရေးကောင်စီပုံမှန်အစည်းအဝေးမှာလည်း မြန်မာနိုင်ငံမှာ ကြီးလေးတဲ့ နိုင်ငံတကာရာဇဝတ်မှုတွေ ကျူးလွန်နေတဲ့ အကြိမ်ရေနဲ့ ပြင်းထန်မှုကလည်း ပိုပြီး မြင့်တက်နေကြောင်း သတိပေးထားပါတယ်။

မြန်မာစစ်တပ်အနေနဲ့ လေကြောင်းတိုက်ခိုက်မှုတွေကို ပိုပြီးအားထားနေပြီး အရပ်သားတွေက အဓိက ထိခိုက်နစ်နာရသူတွေ ဖြစ်နေတယ်လို့ IIMM အကြီးအကဲနီကိုလတ်စ်ခွန်ဂျန်က ကုလလူ့အခွင့်အရေးကောင်စီကို တင်ပြခဲ့ပါတယ်။

IIMM ရဲ့ ဒီနေ့ ထုတ်ပြန်ချက်မှာလည်း ရခိုင်ပြည်နယ်ရှိ အနေအထားမှာ ပြည်သူလူထုများအတွက် မတည်ငြိမ်ဘဲ အလွန်အမင်း အန္တရာယ်ရှိနေဆဲလို့ သတိပေးထားပါတယ်။

ပဋိပက္ခများအကြား ပြည်သူလူထုအနေနဲ့လည်း မကြာခဏ လေကြောင်းမှ ဗုံးကြဲတိုက်ခိုက်ခြင်း၊ လက်နက်ကြီးများဖြင့် ပစ်ခတ်ခြင်း၊ ဒရုန်းများဖြင့်တိုက်ခိုက်ခြင်း၊ မတရားဖမ်းဆီးချုပ်နှောင်ခြင်း၊ လိင်ပိုင်းဆိုင်ရာနှင့် ဂျန်ဒါအခြေပြု အကြမ်းဖက်မှုများ၊ နှိပ်စက် သတ်ဖြတ်ခြင်းများရဲ့သားကောင်များ ဖြစ်ကြရတယ်လို့ IIMMက ဖော်ပြပါတယ်။

နေရာအနံ့အပြားမှာ ပြည်သူလူထုအနေနဲ့ အခြေခံလိုအပ်ချက်များ မရှိဘဲ လူသားချင်းစာနာမှု အကူအညီများမှာလည်း ပိတ်ဆို့ခံနေရကြောင်း IIMM က ထုတ်ပြန်ပါတယ်။

(၂၀၁၇ စစ်တပ်ရဲ့တိုက်ခိုက်မှုတွေကြောင့် ဘင်္ဂလားဒေ့ရှ်သို့ ထွက်ပြေးသွားကြရတဲ့ ရိုဟင်ဂျာများကို တွေ့ရစဥ်။ ဓာတ်ပုံ - UNHCR)

နွားထိုးကြီးမြို့နယ် စစ်တပ် လေကြောင်းတိုက်မှု အဘွားအို ၂ဦး သေဆုံး

စက်တင်ဘာ၂၃-၂၀၂၆။ကတ်သရင်း/People's Spring

မန္တလေးတိုင်း၊ နွားထိုးကြီးမြို့နယ်၊မန်လည်ကျေးရွာကို စစ်တပ်က လေကြောင်းကနေ ‌ဗုံးကြဲတိုက်ခိုက်ခဲ့ရာ အဘွားအို၂ဦး သေဆုံးပြီး ၃ဦးဒဏ်ရာရကာ ဆက်တိုက်ဗုံးကြဲနေဆဲဖြစ်တယ်လို့ ဒေသခံတွေကပြောပါတယ်။

စက်တင်ဘာ၂၂ရက် မနေ့ညနေပိုင်းမှာ စစ်တပ်က မန်လည်ကျေးရွာတွင်းကို Mi-35 ၂စီး၊ Gyrocopter ၂စီးနဲ့ ဗုံးကြဲခဲ့တာလို့ သိရပါတယ်။

ဗုံးကြဲခံရမှုကြောင့် အသက် ၇၅နှစ်အရွယ် ဒေါ်ခင်ဒေါင်းညို၊ဒေါ်သိန်းပိုင်တို့ ၂ဦး ဗုံးဆံထိမှန်သေဆုံးပြီး ဉီး အောင်ကို၊ဦးမင်းနဲ့ ဒေါ်ယဉ်မာစန်းတို့ ဒဏ်ရာတွေရခဲ့တာလို့ သိရပါတယ်။

"အရင်ကတော့ လက်နက်ကြီးနဲ့ ထုလိုက် ဝေဟင်နဲ့ လာကြဲလိုက်၊စစ်ကြောင်းထိုးပြီးရွာမီးနဲ့ရှို့လိုက်နဲ့။မနေ့ကညနေကစကြဲနေတာ။အခုပဲGyrocopterနဲ့လာချပြန်ပြီခင်ဗျ ။ဗုံးခိုကျင်းထဲကကို ဝင်လိုက်ထွက်လိုက်နဲ့ပါ"လို့ ဒေသခံတစ်ဦးက ပြောပါတယ်။

ဒဏ်ရာရသူတွေအနက် ပြင်းထန်သူတွေလည်းရှိပြီး စစ်တပ်က စစ်ရေးလှုပ်ရှားမှုမရှိဘဲ ဗုံးကြဲခဲ့တာလို့ သိရပါတယ်။

လေကြောင်းတိုက်ခိုက်ခံရမှုကြောင့် ကျေးရွာအတွင်းက နေအိမ် ၁၀လုံးခန့် ပျက်စီးခဲ့ပြီး ယနေ့အထိ Gyrocopterတွေ နဲ့ ပျံဝဲနေဆဲဖြစ်တယ်လို့ ဒေသခံတွေက ပြောပါတယ်။

၈လတာအတွင်း လက်နက်ချအလင်းဝင် စစ်ကောင်စီတပ်သား ၁၄၀၀ ခန့်ရှိ

စက်တင်ဘာ ၂၃၊ ၂၀၂၆။ ထားမြတ်/People’s Spring

စစ်ကောင်စီတပ်သားတွေ အလင်းဝင်တာ၊ တိုက်ပွဲမှာ လက်နက်ချတာတွေ စတဲ့ ဖြစ်စဉ်တွေ ဆက်လက်ဖြစ်ပေါ်လျက်ရှိရာ အခုနှစ် ၈လတာအတွင်း စစ်တပ်ကနေ အလင်းဝင်သူ၊ လက်နက်ချသူနဲ့ စစ်သုံ့ပန်း စုစုပေါင်း ၁၄၀၀ ခန့်ရှိကြောင်း ပြည်သူပန်းတိုင်က အသိပေးထားပါတယ်။

ပြည်သူ့ပန်းတိုင်က ဒီကနေ့ စက်တင်ဘာ ၂၃ရက်မှာ ထုတ်ပြန်တဲ့ ၂၀၂၆ ဇန်နဝါရီ ကနေ ဩဂုတ်လကုန်အထိ ၈လတာအတွင်း အလင်းဝင်၊ လက်နက်ချနဲ့ စစ်သုံ့ပန်း စာရင်းများ လေ့လာဆန်းစစ်ချက် အစီရင်ခံစာနဲ့ အပတ်စဉ် တင်ဆက်နေတဲ့ စစ်တပ်ရဲ့ ပြေးဟပရောဂျက် ယခုတပတ် ဖော်ပြချက်တွေအရ အခုနှစ်အတွင်း စစ်ကောင်စီတပ်ဖွဲ့ဝင် ၁၄၀၀ ခန့်ဟာ လက်နက်ချတာ၊ အလင်းဝင်တာ၊ စစ်သုံ့ပန်းအဖြစ်ဖမ်းဆီးခံခဲ့ရတာဖြစ်ပါတယ်။ ဒါဟာ တော်လှန်ရေးတပ်တွေနဲ့ မီဒီယာတွေရဲ့ ထုတ်ပြန်ချက်၊ ဖော်ပြချက်တွေကို စုစည်းထားတာဖြစ်လို့ မြေပြင်မှာ အရေအတွက် ပိုများနိုင်ပါတယ်။

ပြည်သူ့ပန်းတိုင်က ထုတ်ပြန်တဲ့ အလင်းဝင်၊ လက်နက်ချနဲ့ စစ်သုံ့ပန်းစာရင်းများ လေ့လာဆန်းစစ်ချက် အစီရင်ခံစာ အရ ၈လတာအတွင်း စစ်ကောင်စီတပ်ဖွဲ့ဝင် ၁၂၄၄ ဦး ဟာ စစ်တပ်ကို နည်းလမ်းအမျိုးမျိုးနဲ့ စွန့်ခွာလာခဲ့တာ မှတ်တမ်းတင်နိုင်ခဲ့တယ်လို့ ဆိုပါတယ်။ အပတ်စဉ် တင်ဆက်နေတဲ့ ပြေးဟပရောဂျက် ယခုတပတ် ဖော်ပြချက်အရ စက်တင်ဘာ ပထမပတ်မှာ စစ်ကောင်စီ တပ်သား ၁၂၁ဦး ၊ စက်တင်ဘာ ဒုတိယပတ်မှာ စစ်ကောင်စီတပ်သာ ၃၃ဦး အလင်းဝင်၊လက်နက်ချ၊ ဖမ်းဆီးခံခဲ့ရတာဖြစ်ပါတယ်။ ဒါကြောင့် ၈လခွဲ ကျော် ကိုးလနီးပါးအတွင်း စစ်ကောင်စီတပ်ဖွဲ့ဘက်က ၁၄၀၀ ဦး လက်နက်ချ၊ အလင်းဝင်၊ စစ်သုံ့ပန်းအဖြစ် ဖမ်းဆီးခံခဲ့ရတာ တွေ့ရပါတယ်။

လအလိုက် အလင်းဝင်၊ လက်နက်ချ ဖမ်းဆီးခံရ အခြေအနေကိုလည်း ပြည်သူ့ပန်းတိုင်က ထုတ်ပြန်ခဲ့ရာ အခုနှစ်အတွင်း ဇွန်လမှာ စစ်ကောင်စီတပ်သား ၄၆၇ ဦးအထိ ရှိခဲ့ပြီး ပမာဏအများဆုံးဖြစ်ပါတယ်။

ဒါ့အပြင် စစ်ကောင်စီတပ်သား ၁၄၀၀ ခန့်အနက် စစ်သုံ့ပန်းအဖြစ် ဖမ်းဆီးခံရတဲ့ ပမာဏက ပိုများပြီး စုစုပေါင်း ၉၀၀ ကျော်ရှိပါတယ်။ လက်နက်ချ၊ ဖမ်းဆီးရမိနဲ့ အလင်းဝင် တဲ့ ဦးရေ အများဆုံးက မကွေးတိုင်းဖြစ်ပြီး ၄၁၅ဦး ရှိတာကြောင့် အခုနှစ်အတွင်း လက်နက်ချ၊ အလင်းဝင်၊ စစ်သုံ့ပန်း စုစုပေါင်းရဲ့ သုံးပုံတပုံနီးပါးရှိပါတယ်။

အဲဒီလို လက်နက်ချနဲ့ စစ်သုံ့ပန်းအဖြစ် ဖမ်းဆီးခံရတာဟာ တော်လှန်ရေးတပ်တွေဟာ စစ်တပ်ထောက်ပံ့ရေး လမ်းကြောင်းတွေကို ထိရောက်စွာ ဖြတ်တောက်ပိတ်ဆို့နိုင်ခြင်းကြောင့် စစ်ကောင်စီတပ်က အချိန်မီ စစ်ကူ မပို့နိုင်တော့တဲ့ အခြေအနေမှာ လက်နက်ချတဲ့ အခြေအနေတွေ ဖြစ်ပေါ်ခဲ့တာလို့ ဆိုပါတယ်။

ဒါ့အပြင် ရိက္ခာနဲ့ ဆေးဝါးပြတ်လပ်မှု၊ ခေါင်းဆောင်မှု ပြိုလဲတာ တွေကြောင့်လည်း လက်နက်ချ အညံ့ခံတာတွေ ဖြစ်ခဲ့ဟုဆိုပါတယ်။

စစ်တပ် ရှေ့တန်းစခန်းတွေမှာ ရိက္ခာ၊ သောက်သုံးရေနဲ့ ဆေးဝါးများ ပြတ်လပ်လာပြီး စိတ်ပိုင်းဆိုင်ရာ အလွန်အမင်း ယိုယွင်းပျက်စီးလာနေတယ်လို့ ဆိုပါတယ်။

အထက်အရာရှိတွေ စခန်းစွန့်ထွက်ပြေးတာတွေရှိခဲ့ပြီး အရာရှိငယ်တွေ လုပ်သက်ရင့် သန္ဓေစစ်သည် အနည်းငယ်နဲ့ စစ်မှုထမ်း ဥပဒေနဲ့ စစ်တပ်တွင်းရောက်လာတဲ့ တပ်သားသစ်တွေကို တိုက်ပွဲအတွင်း အသုံးချ နေရခြင်းကြောင့် သေဆုံးဒဏ်ရာရ မြင့်တက်ကာ အောက်ခြေအရာရှိ စစ်သည်တွေဟာ တိုက်ပွဲ ဝင်လိုစိတ် မရှိဘဲ လက်နက်ချရန် ဆုံးဖြတ်လာတာတွေ့ရကြောင်းလည်း ပြည်သူ့ပန်းတိုင်က ထုတ်ပြန်ပါတယ်။

စစ်ကောင်စီတပ်ဖွဲ့ဝင်တွေ စိတ်ဓာတ်ပိုင်းဆိုင်ရာ ပြိုလဲနေတာ ထင်ရှားတာကြောင့် ရှေ့တန်းစစ်မြေပြင်အထိ အလင်းဝင်သူတွေရဲ့ အခြေအနေမှန်တွေကို ထိရောက်စွာ အသိပေးတာ၊ CDM လှုံ့ဆော်မှုတွေ မြှင့်တင်တာ၊ လုံခြုံစွာ အလင်းဝင်နိုင်ရေး လမ်းကြောင်းတွေ ထောက်ပံ့ပေးတာ၊ စစ်ကောင်စီတပ်တွင်း စိတ်ဓာတ်ပြိုလဲမှု ပိုမြန်ဆန်စေမယ့် နည်းဗျူဟာမြောက်လုပ်ငန်းတွေ ရှေ့ဆက်လုပ်ဆောင်ဖို့လည်း ပြည်သူ့ပန်းတိုင် အကြံပြု ထားပါတယ်။

(ပြီးခဲ့တဲ့ ဇူလိုင်က မန္တလေးတိုင်းစစ်ဌာန ကွပ်ကဲမှုအောက်ရှိ မြင်းခြံခရိုင်စစ်ဌာနက ဖော်ဆောင်တဲ့ စစ်ဆင်ရေးအတွင်း ဖမ်းဆီးမိတဲ့ စစ်သုံ့ပန်းတွေ။ ဓာတ်ပုံ - PDF)

စစ်တပ် သေဆုံးမှုများနေချိန်ဖြစ်လို့ ပြည်သူတွေ လေကြောင်းရန်အထူးသတိပေးချက် KIO ထုတ်ပြန်

လူစုလူဝေးမလုပ်ဖို့၊ အိမ်တိုင်း ကတုတ်ကျင်းတူးဖို့၊ အရေးကြီးကိစ္စမရှိရင် ခရီးမသွားဖို့၊ လေကြောင်းသတင်း အချင်းချင်း အချိန်မီ သတင်းပေးကြဖို့ သတိပေးထား

စက်တင်ဘာ ၂၃၊၂၀၂၆။ထားမြတ်/People’s Spring

ကချင်လွတ်လပ်ရေးတပ်မတော်(KIO/KIA) ထိန်းချုပ်နယ်မြေက ပြည်သူတွေ လေကြောင်းရန် အထူးသတိရှိဖို့ KIO က ဒီကနေ့ ထုတ်ပြန် သတိပေးလိုက်ပါတယ်။

ကချင်ဘာသာနဲ့ ရေးသားထားတဲ့ အဲဒီစာကို ကချင်စစ်ရေးသတင်းရင်းမြစ်အချို့ကလည်း လူမှုကွန်ရက်ပေါ် ရေးသားဖော်ပြတာတွေ တွေ့ရပါတယ်။

ထုတ်ပြန်စာကို KIO ဗဟို အုပ်ချုပ်ရေးက ထုတ်ပြန်တာလို့ ကချင်သတင်းရင်းမြစ်တစ်ဦးက ပြောပါတယ်။

“ လေယာဉ်သတိပေးချက်နဲ့ လူစုလူဝေး မလုပ်ကြဖို့ ဟုတ်တယ်” လို့ ကချင်သတင်းရင်းမြစ်တစ်ဦးက ထုတ်ပြန်စာပါအကြောင်းအရာကို ပြောပြပါတယ်။

ကချင်စစ်ရေးသတင်းရင်းမြစ်ကလည်း အဲဒီစာဟာ KIO ဗဟို အုပ်ချုပ်ရေးရုံးချုပ်ကနေ လက်အောက်ရှိ ခရိုင်အုပ်ချုပ်ရေးရုံးနဲ့ လိုင်ဇာအထူးအုပ်ချုပ်ရေးရုံးတွေကို စက်တင်ဘာ ၂၂ရက်က ပေးပို့ခဲ့တဲ့ လေကြောင်းသတိပေးချက်နဲ့ ပတ်သက်တဲ့ ညွှန်ကြားစာလို့ ရှင်းပြပါတယ်။

“အဓိက အကြောင်းအရင်းခံကျတော့ အခုလိုင်းထဲမှာလည်း ပြန့်နေတဲ့ဟာ လိုင်ဇာတဝိုက်ကို နယ်စပ်ဒေသကို ဗုံးကြဲဖို့အတွက် တရုတ်ကို ခွင့်တောင်းပါတယ်ဆိုတဲ့ ကိစ္စရယ် ပြီးတော့မှ အခု သူတို့ရဲ့ ရေကြောင်းစစ်ဆင်ရေးမှာ သူတို့ အများကြီးကျရှုံးတဲ့အတွက် တနေရာရာမှာ ဂလဲ့စားချေလိမ့်မယ်ဆိုတာ ကျနော်တို့ တွက်မိပါတယ်။ အဲဒါကြောင့်မို့ ကျေးရွာအုပ်ချုပ်ရေးအဆင့်ထိ အဓိက ညွှန်ကြားတာက နံပါတ်တစ်က ဒီအချိန်မှာ လူစုလူဝေး ပျော်ပွဲရွှင်ပွဲတွေမလုပ်ဖို့ပေါ့” လို့ စစ်ရေး သတင်းရင်းမြစ်က ပြောပါတယ်။

နေအိမ်တိုင်းမှာ ကတုတ်ကျင်းတွေ တူးထားဖို့၊ သေရေးရှင်ရေး အရေးကြီးကိစ္စ မရှိရင် အဝေးခရီးသွားလာတာမလုပ်ဖို့။ လေကြောင်း သတင်းကို ကွန်ရက်အချင်းချင်း အချိန်မီသတင်းပေးဖို့ ကြဖို့ စတဲ့ အချက် လေးချက်ကိုညွှန်ကြားထားကြောင်း ရှင်းပါတယ်။

အခြား သတင်းရင်းမြစ်တစ်ဦးရဲ့ ရေးသားဖော်ပြချက်မှာလည်း လက်ရှိစစ်ရေးအခြေအနေအရ အာဏာသိမ်းအကြမ်းဖက်အဖွဲ့ဟာ စစ်ဆင်ရေးအကျ အရူံးများနေသောအချိန်ကာလဖြစ်လို့ KIO/KIA ထိန်းချုပ်နယ်မြေက ပြည်သူတွေအနေနဲ့ လေကြောင်း စစ်ဆင်ရေးနဲ့ ဒရုန်းဗုံးကြဲချခြင်းများအတွက် အထူးသတိပေး ထားတာလို့ ဆိုပါတယ်။

စစ်တပ်ဟာ ဩဂုတ်နဲ့ စက်တင်ဘာလမှာ ကချင်ပြည်နယ် ရွှေကူ၊ ဗန်းမော်မြို့နယ်အတွင်း မြေပြင်နဲ့ ရေကြောင်းတိုက်ပွဲတွေမှာ ထိခိုက်ဆုံးရှုံးများပြားခဲ့ပါတယ်။

ကချင်ကို စစ်အင်အားဖြည့်ဖို့ လာတဲ့သင်္ဘောတွေကို KIA ပူးပေါင်းတပ်က ကြားဖြတ်တိုက်ခိုက်ခဲ့ရာ စစ်သင်္ဘောတွေ အပါအဝင် သင်္ဘော ၂၀စီးလောက် ပျက်စီး၊ မီးလောင်၊ နစ်မြုပ်ခဲ့သလို မြေပြင်စစ်ကြောင်းတွေလည်း စစ်ကြောင်းပျက် တပ်လန်ခဲ့ရတာဖြစ်ပါတယ်။

(ဩဂုတ်လအတွင်း ကချင်းပြည်နယ်က တိုက်ပွဲတွေမှာ စစ်တပ်ထံက သိမ်းရတဲ့ လက်နက်ခဲယမ်းတွေ။ ဓာတ်ပုံ - Naw Tu Awng/FB)

KIO ဌာနချုပ် လိုင်ဇာအနီး နယ်စပ်တလျှောက် စစ်တပ်လေယာဉ်နဲ့ ၂ကြိမ် ကင်းထောက်၊ တရုတ်ဘက်ကလည်း နယ်စပ်တကြော လေယာဉ်ပျံသန်း

စက်တင်ဘာ ၂၃၊ ၂၀၂၆။ ရွက်ဝါ/People’s Spring

ကချင်လွတ်လပ်ရေးအဖွဲ့(KIO/KIA) ဌာနချုပ် လိုင်ဇာအနီး မြန်မာ-တရုတ်နယ်စပ်တလျှောက် အပါအဝင် KIO/KIA ထိန်းချုပ်နယ်မြေတွေကို အာဏာသိမ်းစစ်တပ်က ဒီကနေ့ စက်တင်ဘာ ၂၃ရက်မှာ ကင်းထောက်လေယာဉ်နဲ့ ၂ကြိမ် ပျံဝဲခဲ့ကြောင်း ကချင်စစ်ရေးသတင်းရင်းမြစ်က ပြောပါတယ်။

စက်တင်ဘာ ၂၃ရက် နေ့လည် ၁၂နာရီခွဲလောက်မှာ စစ်တပ်ဟာ နယ်စပ်တကြော ကင်းထောက်လေယာဉ် ပတ်ပျံသန်းခဲ့တာလို့ ဆိုပါတယ်။

“ တရုတ်နယ်စပ်မျဉ်းနဲ့ သိပ်မကွာဘူး။ အလော့ဘွမ် အဲဒီကနေ ဖြတ်ပြီးမှ ခရာဘွမ် အဲဒီတကြောကနေ ဖြတ်သွားပြီးမှ နန်ဆန်ယန်ဘက်ကို ဖြတ်သွားပါတယ်။ အဲဒါက ဂျက်တိုက်လေယာဉ်မဟုတ်ပါဘူး။ ကင်းထောက်လေယာဉ်ပါ” လို့ ကချင်စစ်ရေးသတင်းရင်းမြစ်က ပြောပါတယ်။

ဒုတိယအကြိမ်မှာလည်း စစ်တပ်လေယာဉ်ဟာ နန်ဆန်ယန်တကြောကို တပတ်လာပတ်ပြီးမှ ပြန်ဆင်းသွားတာလို့ ဆိုပါတယ်။

“ အဲဒီ နှစ်ကြိမ်ရှိခဲ့ပါတယ်။ နောက်တခုက အဲဒီ စကစ ကင်းထောက်လေယာဉ်လာပြီးနောက် ဆယ်မိနစ်လောက်ကြာတဲ့အခါ တရုတ်လေယာဉ်ကလည်း အဲဒီနယ်စပ်မျဉ်းနဲ့ ကပ်လျက် ကျနော်တို့ လိုင်ဇာဒေသတ၀ိုက်ကနေ သူ့ဘက်အခြမ်းကနေ ကင်းလှည့်တဲ့ဟာ တကြိမ်ရှိခဲ့ပါတယ်။ အဲဒါကတော့ ထူးခြားမှု ဖြစ်တာပေါ့” လို့ ကချင်စစ်ရေးသတင်းရင်းမြစ်က ပြောပြပါတယ်။

စစ်တပ်အနေနဲ့ မြန်မာ-တရုတ်နယ်စပ် လိုင်ဇာဒေသကို လေယာဉ်ပျံသန်းခြင်းမပြုမီ တရုတ်နိုင်ငံဘက်ကို အကြောင်းကြားထားတယ်ဆိုတဲ့ သတင်းတွေလည်းရှိပါတယ်။

“စကစ ဘက်က အဲဒီ နယ်စပ်နဲ့ သိပ်မကွာတဲ့နေရာမှာ လေယာဉ် လာပျံသန်းမယ်ဆိုပြီးမှ တရုတ် ကို အကြောင်းကြားထားတာနဲ့ တူပါတယ်။ အဲဒီ အခါကျတော့ စကစ လေယာဉ် လာတာနဲ့ အချိန်သိပ်မကြာ တရုတ်ကလည်း သူ့နယ်စပ်ကို ကာကွယ်တဲ့ ပုံစံတွေနဲ့ အမြဲတမ်းပျံနေကြပါ။ အမြဲတမ်းဆိုတာ အရေးကြီးတဲ့ အချိန်တွေပေါ့” လို့ ကချင်စစ်ရေးသတင်းရင်းမြစ်က တရုတ်ဘက်က လေယာဉ်ပျံသန်းပြမှု အပေါ် သုံးသပ်ပါတယ်။

အရင်ကလည်း စစ်တပ်ဟာ KIO ဌာနချုပ်နယ်မြေအနီးတ၀ိုက် လေယာဉ်တွေ ပျံသန်းတာ၊ လေကြောင်းဗုံးကြဲတာတွေ ပြုလုပ်ခဲ့ရာ တရုတ်ဘက်ကလည်း သတိပေး ပစ်ခတ်မှုတွေ ရှိခဲ့ပါတယ်။

အဲဒီလို အခြေအနေရှိခဲ့တာနဲ့ပတ်သက်ပြီး ကချင်စစ်ရေးသတင်းရင်းမြစ်က “လိုင်ဇာကို စကစ လေယာဉ်လာတဲ့ အချိန်မှာ တရုတ်က ပစ်တယ်ဆိုတာကတော့ လေယာဉ်ကနေ ပစ်တာမဟုတ်ဘူး။ သူတို့ တပ်စွဲထားတဲ့ နေရာကနေ လေကြောင်းရန် ကာကွယ်ရေး အမြောက်ကြီးတွေနဲ့ ပစ်တာပါ။ ဒါကလည်း သူ့ပိုင်နက်ထဲမှာပဲ ပစ်တာပါ။ စကစ လေယာဉ်ကို ပစ်တာမဟုတ်ဘူး။ ဒါဟာ တရုတ်ပြည်နယ်စပ်ဖြစ်သွားပါပြီဆိုတဲ့ဟာကို အချက်ပြအနေနဲ့ ဟိုးအမြင့်ကြီး ကောင်းကင်ကို ပစ်ပြတဲ့ အခြေအနေပဲရှိပါတယ်” လို့ ပြောပါတယ်။

အကယ်၍ စစ်တပ်က လိုင်ဇာမြို့ကို ဗုံးလာကြဲမယ်ဆိုပါက လိုင်ဇာနဲ့ ချောင်းငယ်တခုသာခြားတဲ့ တရုတ်ဘက်က ပြည်သူနေထိုင်ရာတွေလည်း သက်ရောက်မှု တစုံတရာရှိမှာ ဖြစ်ပါတယ်။

“ဟိုဘက်ကမ်းက တရုတ်ဘက်ကမ်းက ပြည်သူတွေအကုန်လုံးရွှေ့ပြောင်းသွားပြီဆိုတဲ့အခါကျလို့ရှိရင်တော့ အများကြီး စိုးရိမ်ရတဲ့ အခြေအနေကို ရောက်လာနိုင်တာပေါ့လေ။ အခုက အဲဒီ အခြေအနေ မရောက်ပါဘူး” လို့လည်း ကချင်စစ်ရေး သတင်းရင်းမြစ်က ပြောပါတယ်။

စစ်တပ်ဟာ ကချင်ပြည်နယ်ကို စစ်အင်အားဖြည့်ဖို့ ရေကြောင်းက သင်္ဘောတွေနဲ့ လာရောက်စဉ် KIA ပူးပေါင်းတပ်ရဲ့ ကြားဖြတ်တိုက်ခိုက်မှုတွေ ခံရလို့ သင်္ဘော အစီး ၂၀ ဝန်းကျင် ထိခိုက်ပျက်စီးမီးလောင် နစ်မြုပ်ခဲ့ရသလို သင်္ဘောလုံခြုံရေး စစ်ကြောင်းတွေလည်း အထိနာ တပ်ပျက်ခဲ့ရပါတယ်။

ဒါကြောင့် KIO ဌာနချုပ်ကို ဗုံးကြဲဖို့ စစ်တပ်ထောက်ခံသူတွေက ဝါဒဖြန့်တာတွေလည်း ရှိနေပါတယ်။

စစ်တပ် အကျအရှုံးများနေချိန်ဖြစ်လို့ ပြည်သူတွေလေကြောင်းရန် သတိပြုဖို့ KIOက ထုတ်ပြန်ခဲ့တဲ့ စာမှာ လူစုလူဝေးမလုပ်ဖို့၊ အိမ်တိုင်းကတုတ်ကျင်းတူးဖို့၊ အရေးကြီးကိစ္စမရှိရင် ခရီးမသွားဖို့၊ လေကြောင်းသတင်း အချင်းချင်း အချိန်မီ သတင်းပေးကြဖို့ သတိပေးထားပါတယ်။

(KIO/KIA ဌာနချုပ်ရှိရာ လိုင်ဇာမြို့ တနေရာအား မြင်တွေ့ရစဥ်။ ဓာတ်ပုံ - Kachinnet)

ယင်းမာပင်နဲ့ ရွှေဘိုမြို့နယ်မှာ သံအမတ်ကြီး ဦးကျော်မိုးထွန်းကို ထောက်ခံတဲ့ လှုပ်ရှားမှု ပြုလုပ်

စက်တင်ဘာ ၂၃၊၂၀၂၆။သုည/People's Spring

စစ်ကိုင်းတိုင်းက ယင်းမာပင်နဲ့ ရွှေဘိုမြို့နယ်တို့မှာ တော်လှန်သပိတ်အင်အားစုတွေ၊ ဒေသခံပြည်သူတွေက ပြည်သူ့သံအမတ်ကြီး ဦးကျော်မိုးထွန်းကို ထောက်ခံတဲ့ လှုပ်ရှားမှုတွေကို ဒီကနေ့ (စက်တင်ဘာ ၂၃) ပြုလုပ်ခဲ့ပါတယ်။

ယင်းမာပင်မြို့နယ်အတွင်းက ကျေးရွာတစ်ရွာမှာ တော်လှန်ပြည်သူတွေက (၈၁) ကြိမ်မြောက် ကုလသမဂ္ဂအထွေထွေညီလာခံအတွက် မြန်မာနိုင်ငံဆိုင်ရာ အမြဲတမ်းကိုယ်စားလှယ်အဖြစ် သံအမတ်ကြီး ဦးကျော်မိုးထွန်း ဆက်လက်တာဝန်ထမ်းဆောင်ရေးအတွက် ဆန္ဒထုတ်ဖော်ခဲ့ကြပါတယ်။

ရွှေဘိုမြို့နယ်မှာလည်း သပိတ်အင်အားစုက ဦးဆောင်ပြီး (၈၁) ကြိမ်မြောက် ကုလသမဂ္ဂ အထွေထွေညီလာခံမှာ သံအမတ်ကြီး ဦးကျော်မိုးထွန်း ဆက်လက်ကိုယ်စားပြုခွင့်ရရှိရေးအတွက် ကျေးရွာအလိုက် လက်ကမ်းစာစောင်တွေ ဖြန့်ဝေကာ အားပေးထောက်ခံမှု ပြသခဲ့ပါတယ်။

လက်ကမ်းစာစောင်တွေမှာ ကုလသမဂ္ဂ စင်မြင့်ကနေ မြန်မာပြည်သူတွေရဲ့ အသံနဲ့ လက်ရှိကြုံတွေ့နေရတဲ့ ဖိနှိပ်မှုတွေကို ဆက်လက်ဖော်ပြနိုင်ရေးအတွက် ဦးကျော်မိုးထွန်းကို UN မှာ ဆက်လက်တာဝန်ထမ်းဆောင်ခွင့်ပြုဖို့ တောင်းဆိုထားပါတယ်။

ဒါ့အပြင် မြန်မာပြည်သူတွေရဲ့ ဒီမိုကရေစီဆန္ဒကို လေးစားပေးဖို့နဲ့ ပြည်သူတွေရဲ့အသံကို မတိတ်ဆိတ်စေဖို့လည်း တောင်းဆိုထားပြီး ငါတို့သံအမတ်၊ ငါတို့အသံ ဆိုတဲ့ ဆောင်ပုဒ်နဲ့ တိုက်တွန်းထားပါတယ်။

ခရီးသွားတွေရဲ့ ဖုန်းတွေမှာ စစ်ဆေးရေးဂိတ်တွေက စစ်​​ဆေးမေးမြန်းနိုင်တဲ့ ဓါတ်ပုံနဲ့ ရုပ်သံတွေ ထည့်မလာဖို့ ခရီးသွားဝန်ဆောင်မှုအသင်း ကြေညာချက်ထုတ်

▪️စစ်တပ် အလိုကျထုတ်ပြန်တာဖြစ်ပြီး ပိုကျပ်တည်းအောင်ခြိမ်းခြောက်နေဟု ပြည်သူအချို့ပြော

စက်တင်ဘာ ၂၃၊ ၂၀၂၆။ဇေအောင်/People's Spring

ခရီးသွားပြည်သူတွေရဲ့ ဖုန်းတွေမှာ စစ်တပ်စစ်ဆေးရေးဂိတ်တွေက စစ်​​ဆေးမေးမြန်းနိုင်တဲ့ ဓာတ်ပုံနဲ့ ရုပ်သံတွေ ထည့်မလာဖို့ တားမြစ်ထားတဲ့ အချက်တွေ ပါဝင်တဲ့ ကြေညာချက်ကို ပြည်တွင်းဘုရားဖူးနဲ့ ခရီးသွားဝန်ဆောင်မှုအသင်းက ထုတ်ပြန်လိုက်ပါတယ်။

ခရီးသွားများတဲ့ရာသီဖြစ်တဲ့ သီတင်းကျွတ်ကာလ ရောက်ကာနီးအချိန်မှာ ပြည်တွင်းဘုရားဖူးနဲ့ ခရီးသွားဝန်ဆောင်မှုအသင်းကနေ ​ဘုရားဖူးယာဉ်တွေ ဘေးကင်းလုံခြုံစွာထွက်ခွာနိုင်ရေးနဲ့ လမ်းခရီးစဉ်အတွင်း လိုက်နာရှောင်ကြဉ်ရမည့်အချက်အလက်တွေဆိုပြီး စက်တင်ဘာ ၂၁ ရက်က ကြေညာချက်တစ်​စောင် ထုတ်ပြန်ခဲ့ပါတယ်။

အဲဒီကြေညာချက်မှာ ခရီးသည်တွေရဲ့ ဖုန်းထဲမှာ ဥပဒေနဲ့ မညီညွတ်တဲ့ ဓါတ်ပုံနဲ့ ဗွီဒီယိုတွေ မပါရှိစေရန်ဆိုတဲ့ ညွှန်ကြားချက်ကို ထည့်သွင်းရေးသားထားပါတယ်။ ဘယ်လို ဥပဒေနဲ့မညီညွတ်တာတွေဆိုတာကိုတော့ ရှင်းပြထားခြင်း မရှိပါဘူး။

ဒါ့အပြင် ခရီးသည်အားလုံး နိုင်ငံသားစိစစ်ရေးကတ်နဲ့ ရဲစခန်းကနေ ခရီးသွားထောက်ခံစာကိုလည်း ယူဆောင်လာဖို့ ညွှန်ကြားထားပါတယ်။

စစ်တပ်ရဲ့စစ်ဆေးရေးဂိတ်တွေဟာ ယခင်ကတည်းက ၎င်းတို့မသင်္ကာသူတွေရဲ့ ဖုန်းတွေကို ယူစစ်လေ့ရှိကြောင်း၊ ဒီထုတ်ပြန်ချက်တွေဟာ စစ်ကောင်စီအလိုကျ ခရီးသွားတွေကို ပိုမိုကျပ်တည်းအောင် စီစဥ်နေတာသာဖြစ်ကြောင်း ခရီးသွားလာနေကျ ပြည်သူအချို့က ပြောပါတယ်။

"ဒီထုတ်ပြန်ချက်တွေ မတိုင်ခင်ကလည်း တော်တော်လေးကိုကျပ်တယ်။ ခုနောက်ပိုင်းဆိုရင် မျက်လုံး Scan ဖတ်တာတွေ မန္တလေး၊ စစ်ကိုင်း၊ မုံရွာ၊ ရွှေဘို သွားတဲ့ ကားတွေမှာလည်း လာသမျှ လူတွေကို
မျက်လုံး Scan တွေဖတ် မှတ်ပုံတင်တွေဖတ် စာရင်းတွေသွင်းနေတာ။ တဖြည်းဖြည်းနဲ့ လူထုကို ချုပ်ကိုင်လာတဲ့ သဘောပေါ့ဗျာ"လို့ စစ်ကိုင်းနဲ့ မန္တလေးတိုင်း ခရီးသွားလာနေသူတစ်ဦးက ပြောပါတယ်။

ပြည်တွင်းဘုရားဖူးနှင့် ခရီးသွားဝန်ဆောင်မှုအသင်းကတော့ Guide ဧည့်လမ်းညွှန်တွေကိုလည်း လမ်းခရီးစစ်ဆေးရေးအဖွဲ့တွေနဲ့ အဆင်ပြေစွာ ပြောဆိုဆက်ဆံပြီး ပူးပေါင်းဆောင်ရွက်ဖို့ ထပ်မံညွှန်ကြားထားပါတယ်။

ယာဉ်ထွက်ချိန် မနက်(၅)နာရီနဲ့ နောက်ပိုင်းစတင်ထွက်ခွာဖို့နဲ့ ည ၈ နာရီကနေ ၁၀ နာရီအတွင်း စုရပ်သို့ ပြန်ရောက်ဖို့၊ ခရီးသွားစဉ် လမ်းခရီးထူးခြားဖြစ်စဉ်တွေကို အသင်းဝင်ဂိတ်အချင်းချင်း အသိပေးတာနဲ့ DPTOA Member Group ထဲစာရေးသားပို့ပြီး အသိပေးဖို့ ထပ်မံညွှန်ကြားထားပါတယ်။

ဒါ့အပြင် အသင်းဝင်ကတ်နဲ့ လုပ်ငန်းလိုင်စင်တွေကို မိတ္တူဆွဲပြီး ထွက်ခွာမယ့် ယာဉ်ပေါ်ယူဆောင်သွားဖို့၊ လုပ်ငန်းရှင်တွေအားလုံး ဟိုတယ်ခရီးရဲ့ ခရီးလှည့်လည်ရေး လိုင်စင် DPTOA ရဲ့ထောက်ခံချက်နဲ့ တိုင်းဒေသကြီးက ထုတ်ပေးတဲ့ လိုင်စင်ရယူထားဖို့၊ လုပ်ငန်းလိုင်စင်တွေ၂လအတွင်းလျှောက်ထားကြဖို့၊ ခရီးသည်တွေ အိမ်အပြန် အငှားယာဥ်ငှားပေးဖို့နဲ့ အဆက်အသွယ်လုပ်ဖို့ ညွှန်ကြားထားပါတယ်။

(ခရီးသွားယာဥ်အချို့အား တွေ့ရစဥ်။ ဓါတ်ပုံံ-ပြည်တွင်းဘုရားဖူးနှင့် ခရီးသွားဝန်ဆောင်မှုအသင်း)

“ဒီနေ့ဘာဖြစ်ခဲ့လဲ”

ဒီနေ့(စက်တင်ဘာ ၂၃ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️ပုဂ္ဂလိကသင်္ဘောပိုင်ရှင်တွေရဲ့ ဆုံးရှုံးမှုအပေါ် စိတ်မကောင်းဘူးလို့ KIA ဗိုလ်ချုပ်ဂွန်မော်ပြော

အာဏာသိမ်းစစ်တပ်က အတင်းအဓမ္မခေါ်ယူ ချောဆွဲလို့ ကချင်ပြည်နယ် ဗန်းမော်ကို လိုက်ပါခဲ့ရပြီး သင်္ဘောတွေ ဆုံးရှုံးခဲ့ရတဲ့ ပုဂ္ဂလိက သင်္ဘောပိုင်ရှင်တွေအတွက် စိတ်မကောင်းဖြစ်ရကြောင်း ကချင်လွတ်လပ်ရေးတပ်မတော်(KIO/KIA) ခေါင်းဆောင်တစ်ဦးဖြစ်တဲ့ ကချင်လွတ်လပ်ရေးကောင်စီ(KIC)ဒုဥက္ကဋ္ဌ ဒုဗိုလ်ချုပ်ကြီးဂွန်မော်က ဒီနေ့ စက်တင်ဘာ ၂၃ရက်မှာ ထုတ်ပြန်ပါတယ်။ သင်္ဘောပိုင်ရှင်းများသို့ ဆိုပြီး လိပ်မူထားတဲ့ စာကို ဒုဗိုလ်ချုပ်ကြီးဂွန်မော်က စက်တင်ဘာ ၂၃ရက်မှာ သူ့ရဲ့ ဖေ့စ်ဘွတ်ခ်ကတဆင့် ဖော်ပြခဲ့တာပါ။ ပုဂ္ဂလိကသင်္ဘောပိုင်ရှင်များ နားလည်ပေးနိုင်မယ်လို့ မျှော်လင့်ကြောင်းနဲ့ နွေဦးတော်လှန်ရေးကာလရဲ့ အရင်းအနှီးဖြစ်တာကြောင့် စီးပွားများ ပြန်လည်တိုးပွားနိုင်ကြပါစေကြောင်း ဗိုလ်ချုပ်ဂွန်မော်က ဆုမွန်ကောင်းတောင်းထားပါတယ်။ စစ်တပ်ချောဆွဲခဲ့တဲ့ ပုဂ္ဂလိကသင်္ဘောပိုင်ရှင်တွေအနေနဲ့ သင်္ဘော၄စီးအထိ ဆုံးရှုံးရသူများပါရှိကြောင်း သိရတယ်လို့လည်း ဖော်ပြထားပါတယ်။ သင်္ဘောတစ်စီးတန်ဖိုးမှာ သိန်းပေါင်း ရှစ်ထောင်ကနေ သိန်းပေါင်း နှစ်သောင်းအထိ ရှိကြောင်းလည်း ဖော်ပြထားပါတယ်။ ဒါ​ကြောင့် သင်္ဘော ၄စီးရှင်မှာ ကျပ်သိန်း​သောင်းချီ ဆုံးရှုံးခဲ့တာဖြစ်ပါတယ်။ တဖက်မှာလည်း စစ်တပ်ကို အခုလို သင်္ဘော​တွေ​ပေးအသုံးပြုတဲ့ လုပ်ငန်းရှင်တချို့မှာ စစ်တပ်ဆီက အကျိုးခံစားခွင့်ရသူ​တွေရှိတယ်လို့ ​တော်လှန်​ရေးရဲ​ဘော်အချို့က​ ပြောပါတယ်။

◾️ရွှေကူနယ်မှာ စစ်သင်္ဘောလုံခြုံရေးလာတဲ့ စစ်တပ်စစ်ကြောင်းတွေ ပြန်ဆုတ်ခွာ

ကချင်ပြည်နယ်၊ ရွှေကူမြို့နယ် ဝဲမဒေသအနီးက စစ်သင်္ဘော လုံခြုံရေးလာတဲ့ စစ်တပ်စစ်ကြောင်းတွေ ဒီနေ့ ပြန်လည်ဆုတ်ခွာ ကချင်စစ်ရေးသတင်းရင်းမြစ်က ပြောပါတယ်။ ဩဂုတ်လကုန်ပိုင်းမှာ ဗန်းမော်မြို့ကို ရေကြောင်းကနေ စစ်အင်အားဖြည့်ဖို့ စစ်တပ်က ကြိုးပမ်းစဉ် ရွှေကူနယ်နဲ့ ဗန်းမော်မြို့နယ်မှာ စစ်တပ်က သင်္ဘောလမ်းကြောင်း လုံခြုံရေးအတွက် စစ်ကြောင်းတွေနဲ့ မြေပြင်ထိုးစစ်ဆင်ခဲ့တာ ဖြစ်ပါတယ်။ စစ်တပ်စစ်ကြောင်းတွေထဲက ရွှေကူမြို့နယ် ဝဲမဒေသအနီးရှိ တပ်မ(၃၃) လက်အောက်ခံတပ်တွေနဲ့ ပူးပေါင်းတပ်တွေဟာ ဒီနေ့ ဆုတ်ခွာသွားပြီး ရွှေကူ-ငါးအိုးလမ်းအတိုင်း ကာအစီးရေ ၃၀ကျော်နဲ့ ဆုတ်ခွာသွားတယ်လို့ ဆိုပါတယ်။ အဲဒီလို စစ်တပ်က ဆုတ်ခွာသွားလို့ KIA ပူးပေါင်းတပ်က နေရာယူတပ်စွဲထားတယ်လို့လည်း ကချင်စစ်ရေးသတင်းရင်းမြစ်က အသိပေးထားပါတယ်။

◾️KIO ဌာနချုပ် လိုင်ဇာအနီး နယ်စပ်တလျှောက် စစ်တပ်လေယာဉ်နဲ့ ၂ကြိမ် ကင်းထောက်၊ တရုတ်ဘက်ကလည်း နယ်စပ်တကြော လေယာဉ်ပျံသန်း

ကချင်လွတ်လပ်ရေးအဖွဲ့(KIO/KIA) ဌာနချုပ် လိုင်ဇာအနီး မြန်မာ-တရုတ်နယ်စပ်တလျှောက် အပါအဝင် KIO/KIA ထိန်းချုပ်နယ်မြေတွေကို အာဏာသိမ်းစစ်တပ်က ဒီနေ့ စက်တင်ဘာ ၂၃ရက်မှာ ကင်းထောက်လေယာဉ်နဲ့ ၂ကြိမ် ပျံဝဲခဲ့ကြောင်း ကချင်စစ်ရေးသတင်းရင်းမြစ်က ပြောပါတယ်။ စက်တင်ဘာ ၂၃ရက် နေ့လယ် ၁၂နာရီခွဲလောက်မှာ စစ်တပ်ဟာ နယ်စပ်တကြော ကင်းထောက်လေယာဉ် ပတ်ပျံသန်းခဲ့တာလို့ ဆိုပါတယ်။ စစ်တပ်အနေနဲ့ မြန်မာ-တရုတ်နယ်စပ် လိုင်ဇာဒေသကို လေယာဉ်ပျံသန်းခြင်းမပြုမီ တရုတ်နိုင်ငံဘက်ကို အကြောင်းကြားထားတယ်ဆိုတဲ့ သတင်းတွေလည်းရှိပါတယ်။ စစ်တပ်လေယာဥ်တွေ ပျံသန်းအပြီး သိပ်မကြာခင်မှာလည်း တရုတ်ကလည်း သူ့နယ်စပ်ကို ကာကွယ်တဲ့ ပုံစံတွေနဲ့ နယ်စပ်တကြောလေယာဥ်ပျံသန်းတယ်လို့ သတင်းရင်းမြစ်က ပြောပါတယ်။

◾️စစ်တပ် သေဆုံးမှုများနေချိန်ဖြစ်လို့ ပြည်သူတွေ လေကြောင်းရန်အထူးသတိပေးချက် KIO ထုတ်ပြန်