မင်းလှမှာ စစ်တပ်ထံအညံ့ခံသွားသူရဲ့သတင်းပေးမှုကြောင့် အိမ်ဆောက်ပစ္စည်းလုပ်ငန်းရှင် တစ်ဦး ဖမ်းဆီးသတ်ဖြတ်ခံရပြီး နောက်ထပ်ပြည်သူ ၅ဦးထက်မနည်း ဖမ်းခံရ

စက်တင်ဘာ -၂၃၊၂၀၂၆။မိုမို/People's Spring

ပဲခူးတိုင်း၊ မင်းလှမြို့နယ်မှာ စစ်တပ်ထံ အညံ့ခံသွားသူရဲ့သတင်းပေးမှုကြောင့် အိမ်ဆောက်ပစ္စည်း လုပ်ငန်းရှင် တစ်ဦး ဖမ်းဆီးသတ်ဖြတ်ခံရပြီး နောက်ထပ်ပြည်သူ ၅ဦးထက်မနည်း ဖမ်းခံထားရတယ်လို့ ဒေသခံတချို့က ပြောပါတယ်။

စက်တင်ဘာ ၁၀ ရက်က မင်းလှမြို့၊ ဗိုလ်ရုံတန်းလမ်းက အိမ်ဆောက်ပစ္စည်းဆိုင်ပိုင်ရှင် ကိုဝေဖြိုးကို စစ်တပ်က ဖမ်းဆီးခဲ့ပြီးနောက် ရုပ်အလောင်းကို စက်တင်ဘာ၂၀ ရက် ညပိုင်းက မီးသဂြိုလ်လိုက်တယ်လို့ ဆိုပါတယ်။

"မင်းလှရဲစခန်းမှာ။အလောင်းတောင်ပြန်မရဘူး။သဂြိုလ်မယ့်နေ့ညရောက်မှ မိသားစုကို ခေါ်တာ။နောက်ထပ် ဖမ်းခံထားရတဲ့ အမျိုးသမီးတွေရော အမျိုးသား ငါးဦး၊‌ခြောက်ဦးလောက်ထိ ရှိတယ်"လို့ မင်းလှ မြို့ခံတစ်ဦးက ပြောပါတယ်။

ကိုဝေဖြိုးဟာ PDF ကို ထောက်ပံ့မှုနဲ့ စစ်တပ်လှုပ်ရှားမှု ကို ဖြန့်ဝေနေတယ်ဆိုပြီး စွပ်စွဲချက်နဲ့ ဖမ်းဆီးခံရပြီးနောက် သေနတ်လုခုခံလို့ ပစ်ခတ်စဉ်သေဆုံးခဲ့ရတာလို့ စစ်တပ်က မင်းလှမြို့ပေါ်မှာ သတင်းဖြန့်ထားပါတယ်။

ကိုဝေဖြိုးနဲ့ အတူ မင်းလှမြို့ဒေသခံ ၅ဦးထက်မနည်း ဖမ်းဆီးခံရမှုဟာ သာယာဝတီခရိုင် အမှတ်(၂) တပ်ရင်းက ထွက်ပြေးပြီး စစ်တပ်ထံအညံ့ခံသွားသူ ရဲဘော် အောင်ကိုကို(ခ)ရေခဲနဲ့ သက်ဆိုင်တယ်လို့ အခြေအနေကို သိရှိသူတချို့က ပြောပါတယ်။

"သူထွက်ပြေးတာ ၂ လကျော်လောက်ရှိပြီ။မင်းလှ တာကျိုးရွာသား။သူက တပ်ရဲ ရိက္ခာငွေတွေပါ ယူသွားတာ"လို့ သာယာ၀တီခရိုင်စစ်ရေးသတင်းရင်းမြစ်က ပြောပါတယ်။

အဲဒီဖြစ်စဉ်နဲ့ပတ်သက်လို့ သာယာဝတီခရိုင် အမှတ် (၂)တပ်ရင်းထံ လူထုနွေဦးက ဆက်သွယ်မေးမြန်းထားဆဲ ဖြစ်ပါတယ်။

လက်ရှိမှာ စစ်တပ်က ရဲကွန်မန်ဒိုနဲ့ ပြည်သူ့စစ်တွေအပါအ၀င် အင်အား ၄၀၀ ၀န်းကျင်နဲ့ မင်းလှနဲ့ လက်ပံတန်းမြို့နယ်တွေကို စစ်ကြောင်းထိုးနေတာကြောင့် မကြာခဏထိတွေ့တိုက်ပွဲတွေရှိနေတယ်လို့ တော်လှန်ရေးတပ်ဖွဲ့တွေက ဆိုပါတယ်။

တိုက်ပွဲတွေမှာ အာဏာသိမ်းစစ်တပ်ရဲ့ ရဲကွန်မန်ဒိုစစ်ကြောင်းမှူး အပါအ၀င် ထိခိုက်သေဆုံးသူ ၃၀ ၀န်းကျင်ရှိတယ်လို့ ဒေသခံစစ်ရေးသတင်းရင်း မြစ်တချို့က ‌ပြောထားပါတယ်။

(အာဏာသိမ်းစစ်တပ်ထံ ထွက်ပြေး အညံ့ခံသွားတဲ့ အောင်ကိုကို(ခ) ရေခဲ။ ဓာတ်ပုံ - သာယာဝတီခရိုင် အမှတ် (၂)တပ်ရင်း)

စစ်ကောင်စီက သံဃာတော်တွေကို UID နံပါတ်ထုတ်ပေးပြီး ထိန်းချုပ်ဖို့ စီစဥ်

စက်တင်ဘာ ၂၃၊ ၂၀၂၆။ ဇေအောင်/People's Spring

စစ်ကောင်စီက e-ID စနစ်နဲ့ ပြည်သူတွေကို တင်းကျပ်စွာစောင့်ကြည့်နေရာကနေ ယခုအခါ သံဃာထုကိုပါ ထိန်းချုပ်ဖို့ မန္တလေးမြို့က ရဟန်း၊ သာမဏေနဲ့ သီလရှင်တွေကို Unique ID နံပါတ် ထုတ်ပေးဖို့ ပြင်ဆင်နေကြောင်း သတင်းရရှိပါတယ်။

မန္တလေးတိုင်းအတွင်းမှာရှိတဲ့ သာသနာဝင်၊သာသနာနွယ်ဝင်တွေကို e-ID စနစ်ရဲ့ အခြေခံဖြစ်တဲ့ Unique ID (Unique Identification Number) (ဂဏန်း ၁၀ လုံးပါ အမျိုးသားအဆင့် စိစစ်ရေးနံပါတ်) ထုတ်ပေးသွားမယ်လို့ စစ်ကောင်စီရဲ့ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက တိုင်းသံဃနာယကအဖွဲ့ထံ လျှောက်ထားလိုက်တာပါ။

အီလက်ထရောနစ်မှတ်ပုံတင်စနစ် ဦးစီးဌာနရဲ့ စက်တင်ဘာ ၁၇ ရက်စွဲပါ ညွှန်ကြားချက်အရ မန္တလေးတိုင်း လဝက ရုံးက စက်တင်ဘာ ၁၉ ရက်နေ့မှာ တိုင်းသံဃနာယကဆရာတော်ကြီးတွေထံ အကြောင်းကြားစာ ပေးပို့ခဲ့တာဖြစ်ပြီး၊ လိုအပ်တာတွေ ပံ့ပိုးပေးဖို့ မြို့နယ် သံဃနာယကအဖွဲ့တွေကို ညွှန်ကြားပေးဖို့ပါ တောင်းဆိုထားပါတယ်။

စစ်ကောင်စီဟာ UID စနစ်ကိုသုံးပြီး ပြည်သူတွေရဲ့ သွားလာမှု၊ ငွေကြေးသုံးစွဲမှု၊ ဆက်သွယ်ရေးနဲ့အချက်အလက်တွေကို ပိုမိုတင်းကျပ်စွာ စောင့်ကြည့်ထိန်းချုပ်ဖို့ အဓိက ဦးတည်အသုံးချနေတာ ဖြစ်တယ်လို့ နည်းပညာကျွမ်းကျင်သူတွေက ပြောပါတယ်။

​စစ်ကောင်စီဟာ ဒီ e-ID နဲ့ Unique ID စနစ်ကို အသုံးပြုပြီး ပြည်သူတွေရဲ့ သွားလာလှုပ်ရှားမှုတွေကို တင်းကျပ်စွာ စောင့်ကြည့် ထိန်းချုပ်နေသလို ခုလို သံဃာထုဆီပါ တိုးချဲ့လာတာဟာ သံဃာတော်တွေရဲ့ လှုပ်ရှားဆောင်ရွက်မှုတွေကိုပါ စောင့်ကြည့်စိစစ် ဖိအားပေးဖို့ ရည်ရွယ်တာဖြစ်ကြောင်း သံဃာအချို့က မိန့်ပါတယ်။

"သက်သက် အနိုင်ကျင့်ဗိုလ်ကျဖို့ အရေးတွေ လုပ်နေကြတာပါ။ သာသနာမှတ်ပုံတင်တောင် လုပ်မပေးနိုင်တဲ့ မြို့နယ်သံဃာ့နာယကတွေ။ အခုက မြို့နယ်သံဃာ့နာယကတွေလို့သာ အမည်တပ်ခံရတာရယ်။ တံဆိပ်တုံးတွေဆို စစ်တပ်လက်အောက်ခံ ထွေအုပ်ရုံးတွေဆီမှာ ထားရတာ။ကကြိုးရုပ်တွေရယ်။ အဓမ္မ စစ်သားစုဆောင်းဖို့ လက်ကိုင်တုတ်အဖြစ် သုံးဖို့ပဲ ဖြစ်မှာပါ"လို့ ချောင်းဦးမြို့နယ်က သပိတ်ဆရာတော်က မိန့်ကြားပါတယ်။

လက်ရှိ မန္တလေးတိုင်းက ညွှန်ကြားစာတစ်ခုသာ ထွက်ပေါ်လာတာဖြစ်ပေမဲ့ တစ်နိုင်ငံလုံးက ရဟန်းသံဃာတွေအကုန်လုံး ပြုလုပ်ရမှာဖြစ်ကြောင်း သိရပါတယ်။

​လဝကရဲ့ စာထဲမှာတော့ ဘုန်းကြီးနဲ့ သီလရှင်တွေအနေနဲ့ နိုင်ငံကူးလက်မှတ် (Passport) လျှောက်တာ၊ ပြည်ပမှာ ဆေးကုတာ၊ ဘုရားဖူးထွက်တာနဲ့ ဘဏ်လုပ်ငန်းသုံးတာစတဲ့ ကိစ္စတွေမှာ အဆင်ပြေအောင် လုပ်ပေးတာလို့ အကြောင်းပြထားပါတယ်။

ဒါပေမဲ့ ဒီလုပ်ငန်းစဉ်ဟာ အသက် ၁၀ နှစ်အထက် လူတိုင်းရဲ့ ကိုယ်ရေးအချက်အလက် (Biographical Data) နဲ့ မျက်လုံးစကင်၊ လက်ဗွေ စတဲ့ ဇီဝဆိုင်ရာအချက်အလက် (Biometric Data) တွေကို ကောက်ယူကာ Database စနစ်ထဲ ထည့်သွင်းတာ ဖြစ်ပါတယ်။

Unique ID ကို စိစစ်ရေးကတ်တွေ၊ ပတ်စပို့တွေ၊ ဖုန်း SIM ကတ်တွေ၊ ဘဏ်အကောင့်တွေမှာ မဖြစ်မနေ ချိတ်ဆက်ခိုင်းခြင်းဖြင့် လူတစ်ဦးချင်းစီရဲ့ ခရီးသွားလာမှု၊ ငွေကြေးစီးဆင်းမှုနဲ့ ဆက်သွယ်ရေးဆိုင်ရာ အချက်အလက်တွေကို စောင့်ကြည့်နေတယ်လို့ သိရပါတယ်။

ဒါ့အပြင် စစ်မှုထမ်းဥပဒေအတွက် လူငယ်တွေရဲ့အသက်၊ နေရပ်လိပ်စာနဲ့ အခြားအချက်အလက်တွေကို Unique ID ဒေတာဘေ့စ်မှတစ်ဆင့် လွယ်ကူစွာ စိစစ်ပြီး အတင်းအကြပ် စစ်မှုထမ်းခိုင်းဖို့ ပစ်မှတ်ထား ရှာဖွေရာမှာ အသုံးချနေတယ်လို့ သိရပါတယ်။

အလားတူ CDM ဝန်ထမ်းတွေ၊ တော်လှန်ရေးအဖွဲ့အစည်းတွေနဲ့ ဆက်စပ်သူတွေရဲ့ Unique ID၊ ဘဏ်အကောင့်တွေကို ပိတ်သိမ်းတာ၊ မြို့ဝင်/ထွက် ဂိတ်တွေနဲ့ လေဆိပ်တွေမှာ Unique ID မှတစ်ဆင့် ကိုယ်ရေးအချက်အလက် စစ်ဆေးပြီး ဖမ်းဆီးတာတွေ ပြုလုပ်နေပါတယ်။

(UID ကတ်လုပ်ဖို့ လဝက၏ ညွှန်ကြားစာအား တွေ့ရစဥ်နဲ့ မန္တလေးမြို့က သံဃာသမဂ္ဂသပိတ်စစ်ကြောင်း။ ဓါတ်ပုံံ-CJ)

စစ်တပ်ချောဆွဲလို့ ဗန်းမော်ပါလာပြီးဆုံးရှုံးခဲ့ရတဲ့ ပုဂ္ဂလိကသင်္ဘောပိုင်ရှင်များအတွက် စိတ်မကောင်းဟုKIAဒုဗိုလ်ချုပ်ကြီးဂွန်မော်
ပြော

■တဦးတည်းသင်္ဘော ၄စီးထိဆုံးရှုံးရသူများရှိပြီး သင်္ဘောတစီး ကျပ်သိန်းရှစ်ထောင်မှသိန်းနှစ်သောင်းထိရှိကာ ​နွေဦး​တော်လှန်​ရေးရဲအရင်းအနှီးဟု အသိ​ပေး

စက်တင်ဘာ-၂၃၊၂၀၂၆။ထားမြတ်/People’s Spring

အာဏာသိမ်းစစ်တပ်က ချောဆွဲ(အတင်း
အဓမ္မခေါ်ယူ)လို့ ကချင်ပြည်နယ်ဗန်းမော်သို့ လိုက်ပါခဲ့ရပြီး သင်္ဘောတွေ ဆုံးရှုံးခဲံရတဲ့ ပုဂ္ဂလိက သင်္ဘောပိုင်ရှင်များ အတွက် စိတ်မကောင်းဖြစ်ရကြောင်း ကချင်လွတ်
လပ်ရေးတပ်မတော်(KIO/KIA) ခေါင်းဆောင်တဦးဖြစ်တဲ့ကချင်လွတ်လပ်ရေးကောင်စီ
(KIC)ဒုဥက္ကဋ္ဌ ဒုဗိုလ်ချုပ်ကြီးဂွန်မော်က ဒီကနေ့ ထုတ်ပြန်ပါတယ်။


သင်္ဘောပိုင်ရှင်းများသို့ ဆိုပြီးလိပ်မူထားတဲ့ စာကို ဒုဗိုလ်ချုပ်ကြီးဂွန်မော်က စက်တင်ဘာ ၂၃ရက်မှာ သူ့ရဲ့ ဖေ့စ်ဘွတ်ခ် ကတဆင့် ဖော်ပြခဲ့တာပါ။

“ပုဂ္ဂလိကသင်္ဘောပိုင်ရှင်များ နားလည်ပေးနိုင်မည်ဟု မျှော်လင့်ပါသည်။ နွေဦးတော်
လှန်ရေးကာလရဲ့ အရင်းအနှီးဖြစ်သည်မို့ စီးပွားများ ပြန်လည်တိုးပွားနိုင်ကြပါစေကြောင်း ဆုတောင်းမေတ္တာပို့ပါသည်။ မေတ္တာဖြင့်” ဟု ဗိုလ်ချုပ်ဂွန်မော်က ရေးသားထားပါတယ်။

ဒါ့အပြင်ပုဂ္ဂလိကသင်္ဘောပိုင်ရှင်များအနေနဲ့ သင်္ဘော၄စီးအထိဆုံးရှုံးရသူများပါရှိကြောင်း သိရတယ်လို့လည်း ဖော်ပြထားပါတယ်။ သင်္ဘောတစီးတန်ဖိုးမှာသိန်းပေါင်း (ရှစ် ထောင်) မှ သိန်းပေါင်း (နှစ် သောင်း) အထိ ရှိကြောင်း လည်း ဖော်ပြထားပါတယ်။ဒါ​
ကြောင့်သင်္ဘော၄စီးရှင်မှာ ကျပ်သိန်း​သောင်းချီဆုံးရှုံးခဲ့တာဖြစ်ပါတယ် ။

အာဏာသိမ်းစစ်တပ်ဟာ ကချင်ပြည်နယ်၊ဗန်​မော်မြို့ကို စစ်အင်အားဖြည့်တင်းဖို့ ၂၀၂၆ ဩဂုတ်လကုန်ပိုင်းကနေ စက်တင်ဘာလအတွင်း သင်္ဘောအစီးရေများစွာ အသုံးပြု ကြိုးပမ်းခဲ့ရာ ကသာ-ရွှေကူကြား၊ ရွှေကူ -ဗန်းမော်ကြားမှာ KIA ပူးပေါင်းတပ်က တိုက်ခိုက်ခဲ့သလို့ စစ်သင်္ဘောတွေအပါအဝင် သင်္ဘော အစီး ၂၀ ဝန်းကျင်ပျက်စီးခဲ့ရပါတယ်။ စစ်ကတပ်ဟာ ဗန်း​မော်က​နေ မန္တ​လေးပြန်တဲ့အခါ ကသာနဲ့ ရွှေကူမှာရှိတဲ့ အရပ်သားသင်္ဘောအများအပြားကို အသုံးပြုခဲ့တာလို့လည်း ကချင်စစ်ရေးသတင်းရင်းမြစ်အချို့ကပြောပါတယ်။ အလားတူ မန္တ​လေး​ဂေါ်ဝိန်ဆိပ်ကမ်းက​နေ ထွက်ခွာတဲ့အခါမှာလည်း ပုဂ္ဂလိက သင်္ဘော​တွေကို ​ချောဆွဲအသုံးပြုခဲ့တယ်လို့ လည်းမန္တ​လေးကလုပ်ငန်းရှင်အချို့က​ပြောပါတယ် ။

ဧရာဝတီမြစ်အတွင်း စစ်တပ်ရဲ့သင်္ဘောတစ်စီးကိုKIA ပူး​ပေါင်းတပ်ကတိုက်ခိုက်ဖျက်ဆီးလို့မီး​လောင်ကျွမ်း​နေစဥ်။ဓါတ်ပုံ-​ပေးပို့

ရက္ခိုင်တိုက်ပွဲဒဏ်ရာရရဲဘော်တွေကို စစ်သုံ့ပန်းအဖြစ်မခံဘဲ အချင်းချင်းပစ်သတ်ဖို့ စစ်တပ်က အမိန့်ပေးထားဟု AA ဖမ်းမိထားသူ ထွက်ဆို

“ဆေးကုလို့ရတဲ့လူဆိုရင်ကုမယ် ခေါ်ခဲ့ ဆွဲခဲ့ ကုလို့မရတဲ့ သူဆိုရင် ရန်သူ့လက်ထဲ အပါမခံနဲ့ သတ်ပစ်လိုက် အဲဒီလိုမျိုးပြောပါတယ်” - စစ်မှုထမ်းတပ်သားသစ် ရန်ငြိမ်းအောင်

စက်တင်ဘာ ၂၃၊ ၂၀၂၆။ထားမြတ်/People’s Spring

ရက္ခိုင်ပြည်နယ် စစ်ဆင်ရေးတိုက်ပွဲမှာ ထိခိုက်ဒဏ်ရာရသူတွေကို အာရက္ခတပ်တော်(AA)ထံ အပါမခံဘဲ အချင်းချင်း ပစ်သတ်ဖို့ စစ်တပ်အရာရှိတွေက ညွှန်ကြားထားတယ်လို့ AA ဖမ်းမိထားတဲ့ စစ်သုံ့ပန်း ၁ဦးဖြစ်တဲ့ ပြည်သူ့စစ်မှုထမ်း(ပစ)တပ်သား ရန်ငြိမ်းအောင် က ပြောပါတယ်။

ရက္ခိုင်ပြည်နယ် စစ်တွေ-ပုဏ္ဏားကျွန်းအစပ် တိုက်ပွဲမှာ စစ်ကောင်စီတပ်ဖွဲ့ဝင်တွေကို AAက ဖမ်းဆီးရမိခဲ့တဲ့ ဖြစ်စဉ်တွေ ဆက်တိုက်ရှိခဲ့ရာ စက်တင်ဘာ ၂၀ရက်က အမြင့်ကျွန်းကျေးရွာ မင်းချောင်းတံတားအနီးမှာ အဖမ်းခံရတဲ့ ပခုက္ကူအခြေစိုက်တပ်မ (၁၀၁) လက်အောက်ခံ ခလရ(၂၅၂)တပ်က တပ်သား ရန်ငြိမ်းအောင်က အခုလို ပြောပြတာဖြစ်ပါတယ်။

တပ်သား ရန်ငြိမ်းအောင်အနေနဲ့ ရှေ့ပြေးကင်းစောင့်နေချိန် အဖမ်းခံရတာလို့ ပြောပါတယ်။ သူ့ရဲ့ထွက်ဆိုချက်မှာ ကျည်ထိ ရဲဘော်တွေကို ဆေးကုမရတဲ့ အခြေအနေဆိုရင် အချင်းချင်း ပစ်သတ်ဖို့ စစ်ကောင်စီတပ်အရာရှိတွေက ညွှန်ကြားထားတယ်လို့ ပါရှိပါတယ်။

“ တိုက်ပွဲဖြစ်တဲ့နေရာမှာ ကျည်ထိတဲ့သူတွေ ကျည်သင့်တဲ့သူတွေကိုလည်း ဆေးကုလို့ရတဲ့လူဆိုရင်ကုမယ် ခေါ်ခဲ့ ဆွဲခဲ့ ကုလို့မရတဲ့ သူဆိုရင် ရန်သူ့လက်ထဲ အပါမခံနဲ့ သတ်ပစ်လိုက် အဲဒီလိုမျိုးပြောပါတယ်။” လို့ တပ်သား ရန်ငြိမ်းအောင်က ပြောပါတယ်။

ရန်သူကို သတ်နိုင်ရင်သတ်နိုင်သလို ဆုကြေးပေးမယ် မုန့်ဖိုးပေးမယ် ရာထူးတိုးပေးမယ်လို့ စစ်တပ်က မက်လုံးပေးထားတယ်လို့လည်း ပြောပြပါတယ်။

စစ်တပ်ဟာ စစ်တွေ-ပုဏ္ဏားကျွန်းအစပ် တိုက်ပွဲမှာ အထိနာတာကြောင့် အရာရှိတွေဟာ ပစတွေအပါအဝင် ငယ်သားတွေကို ကာကင်းအဖြစ်ထားပြီး ဆုတ်ခွာထွက်ပြေးတာတွေရှိတယ်လို့ စက်တင်ဘာ ၁၆ရက်က AA ဖမ်းမိခဲ့တဲ့ စစ်ကောင်စီတပ်ဖွဲ့ဝင် အချို့က ထွက်ဆိုပါတယ်။

စစ်တပ်အရာရှိတွေဟာ ကိုယ်ချင်းစာစိတ်မရှိ ငယ်သားတွေရဲ့ အသက်ကို စတေးနေတယ်လို့လည်း ပြောပြပါတယ်။

“သူတို့ကတော့ စက်ထဲကနေ စကားလေးတလုံးတည်းနဲ့ ဟေ့ရောင်တွေ ဒီဟာကို ရအောင်တိုက်မယ် ဂုဏ်သိက္ခာနဲ့ ဆိုင်တယ်တို့ ငါတို့တပ် နာမည်ရရမယ် တို့ အဲဒီလိုမျိုးတွေနဲ့ သူတို့ တိုက်တယ်ပေါ့” လို့ တပ်သား ရန်ငြိမ်းအောင်က ပြောပါတယ်။ ဒါပေမဲ့ တကယ်တိုးကြည့်တဲ့နေရာမျာ တိုးလို့မရဘဲ မလိုလားအပ်တဲ့ အသက်ဆုံးရှုံးမှုဖြစ်ခဲ့ရကြောင်းလည်း သူက ပြောပြပါတယ်။

“ကျနော်တို့နေရာမှာ သူတို့ သားသမီးတွေ သူတို့ ညီအကိုတွေ ဆိုရင် ခင်ဗျားတို့ ဘယ်လိုခံစားမလဲ လို့ ကျနော်မေးကြည့်ရမယ်” လို့ တပ်သားသစ်ရန်ငြိမ်းအောင်က ပြောပါတယ်။

စစ်တပ်ဟာ တပ်သားတွေကို တိုက်ပွဲဝင်ခိုင်းရာမှာလည်း မူးယစ်ဆေးသုံး တိုက်ပွဲဝင်ခိုင်းကြောင်း၊ အရက်သမားတွေလည်း ပါကြောင်း ပြောပါတယ်။

“နောက်တန်းမှာ ရဲတွေလာရောင်းတဲ့ အပိုင်းတွေ ရှိတယ်” လို့ တပ်သား ရန်ငြိမ်းအောင်က စစ်ကောင်စီတပ်သားတွေ မူးယစ်ဆေးရရှိမှု အခြေအနေကို ပြောပြပါတယ်။

စစ်တပ်အတွင်း ဖိနှိပ်မှုတွေကြောင့် ကျန်ခဲ့တဲ့ စစ်ကောင်စီတပ်ဖွဲ့ဝင်တွေအနေနဲ့ ကျန်းမာရေး ဂရုစိုက်ပြီး အခွင့်အခါ ကောင်းရင် ထွက်ပြေးကြဖို့လည်း တပ်သားသစ်ရန်ငြိမ်းအောင်က တိုက်တွန်းပါတယ်။

စစ်တွေ-ပုဏ္ဏားကျွန်း တိုက်ပွဲအတွင်း စစ်တပ်ရဲ့ ရုပ်အလောင်းတွေ၊ လက်နက်ခဲယမ်းတွေအများအပြား သိမ်းရထားကြောင်း AAက ဓာတ်ပုံမှတ်တမ်းတွေနဲ့အတူ ထုတ်ပြန်အသိပေးထားပါတယ်။


ရုပ်သံ - AA

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #စစ်သုံ့ပန်းအဖြစ်မခံရန်အမိန့် #AAဖမ်းဆီးရမိသူထွက်ဆိုချက် #ရခိုင်စစ်မျက်နှာ #စစ်ကောင်စီတပ်

အင်းတော်နဲ့ မဘိမ်းကို စစ်တပ် ဗုံးကြဲ

စက်တင်ဘာ-၂၃၊ ၂၀၂၆။ ‌ဇော်ရမ်း/People's Spring

စစ်ကိုင်းတိုင်း အင်းတော်မြို့နဲ့ ရှမ်းပြည်နယ် မဘိမ်းမြို့တို့ကို ဒီနေ့ မနက်ပိုင်းမှာ အာဏာသိမ်းစစ်တပ်က လေကြောင်းကနေ ဗုံးကြဲခဲ့ပြီး နောက်ထပ်လေယာဉ်ပျံသန်းမှုတွေရှိနေတာကြောင့် ဒေသခံတွေ လုံခြုံရေးသတိပြုကြဖို့ တော်လှန်ရေးရဲဘော်တွေက သတိပေးထားပါတယ်။

အင်းဝောာ်မြို့မှာ ဒီနေ့ စက်တင်ဘာ၂၃ရက် မနက် ၁၁နာရီခွဲခန့်က မြို့နယ်အတွင်း တိုက်ပွဲဖြစ်ပွားခြင်းမရှိဘဲ လေယာဉ်နဲ့ ဗုံးလာကြဲသွားတာလို့ မြို့ခံတွေက ပြောပါတယ်။

"စက်သုံးဆီထားတဲ့ခြံကို ကြဲသွားတာဖြစ်ပြီး ထိခိုက်ပျက်စီးမှုတွေရှိတယ်လို့ ပြောကြတယ်။ မီးလောင်တာကို ကျွန်တော်တို့ လှမ်းမြင်နေရတယ်။ လူတွေထိလားမသိဘူး။ မေးလို့မရသေးဘူး"လို့ အင်းတော်မြို့ခံတစ်ဦးက ပြောပါတယ်။

အင်းတော်မြို့အနီးက ရွာတစ်ရွာကို စစ်တပ်က ဗုံးကြဲသွားပြီး ထိခိုက်မှုအခြေအနေကို မေးမြန်းနေဆဲလို့ တော်လှန်ရေးရဲဘော်တစ်ဦးက ပြောပါတယ်။

"အခုတင် သတင်းဝင်လာတယ်။ တိုက်ပွဲမရှိဘဲ ကြဲသွားတာ။ နောက်ထပ်လေကြောင်းသတိပေးချက် ထုတ်ထားတယ်"လို့ သူက ပြောပါတယ်။

အင်းတော်မြို့ကို ကချင်လွတ်လပ်ရေးတပ်မတော်(KIA)၊ ကျောင်းသားတပ်မတော်(ABSDF)နဲ့ PDF ပူးပေါင်းတပ်တွေက ၂၀၂၅ ခုနှစ် ဧပြီ ၇ရက်မှာသိမ်းယူခဲ့တာပါ။ ဒါပေမဲ့၂၀၂၆ ခုနှစ် ဧပြီမှာ စစ်တပ်စစ်ကြောင်းတွေ ပြန်ဝင်လာပြီး မြို့ပေါ်ကို ပြန်လည်ထိန်းချုပ်ပြီးတဲ့နောက် ဘေးပတ်ဝန်းကျင်ရွာတွေမှာ တိုက်ပွဲတွေ ဆက်ဖြစ်ခဲ့ပါတယ်။

ပြီးခဲ့တဲ့ဇွန်လကုန်မှာ နဘားလမ်းဆုံအပါအဝင် အင်းတော်၊ မော်လူးနဲ့ ကသာမြို့အနီးက စစ်တပ် တပ်စွဲထားတဲ့နေရာတွေကို တော်လှန်ရေးတပ်တွေက ပြန်လည်ထိုးစစ်ဆင်တိုက်ခိုက်ခဲ့ပြီး စစ်တပ်စစ်ကြောင်းတွေ ပြန်လည်ဆုတ်ခွာသွားပါတယ်။

စစ်တပ်က ဒီရက်ပိုင်းမှာ စစ်ကိုင်းတိုင်းနဲ့ ဆက်စပ်နေတဲ့ ကချင်ပြည်နယ်ထဲက ရွှေကူ၊ ရှမ်းပြည်နယ် မြောက်ပိုင်းက မဘိမ်းမြို့နယ်ထဲကို လေကြောင်းကနေ မကြာခဏတိုက်ခိုက်နေပါတယ်။ စက်တင်ဘာလလယ်က ဖြစ်ပွားခဲ့တဲ့ ရွှေကူမြို့နယ်ထဲက တိုက်ပွဲတွေထဲမှာ စစ်တပ် အထိနာခဲ့တဲ့အတွက် ကျေးရွာတွေကို ပစ်မှတ်ထားပြီးဗုံးကြဲနေတာလို့ ဒေသခံတွေက ပြောပါတယ်။

မဘိမ်းမြို့နယ်ကို စက်တင်ဘာ ၂၂ရက် မနေ့က ဗုံးအလုံးရေ ၄၀ ကျော် ကြဲချခဲ့သလို ဒီနေ့ မနက်ပိုင်းမှာလည်း လေကြောင်းကနေ ထပ်မံတိုက်ခိုက်သွားတယ်လို့ သိရပါတယ်။ ဗုံးကြဲမှုကြောင့် ထိခိုက်မှုအခြေအနေအသေးစိတ်ကို မသိရသေးပါဘူး။ ဗုံးခိုကျင်းထဲမှာနေထိုင်ပြီး လေကြောင်းအန္တရာယ်ကို ရင်ဆိုင်နေရတယ်လို့ ဒေသခံတွေက ပြောပါတယ်။

KIAကတော့ လက်ရှိစစ်ရေး တင်းမာနေတဲ့ ဒေသတွေကို စစ်တပ်က ဗုံးကြဲတိုက်ခိုက်နိုင်တဲ့အတွက် လေကြောင်းအန္တရာယ်သတိပြုကြဖို့ သတိပေးထားပါတယ်။

(ရွှေကူမြို့နယ်ကို စက်တင်ဘာ တတိယပတ်မှာ စစ်တပ်ဗုံးကြဲအပြီး တွေ့ရစဉ်။ အင်း​တော်ကို Y-12 နဲ့ စက်တင်ဘာ၂၃ ရက်မှာ ဗုံးကြဲအပြီး တွေ့ရစဥ်။ ဓာတ်ပုံ-CJ )

သာယာဝတီထောင်မှာ နိုင်ကျဥ်းတွေ နှိပ်စက်ခံရပြီး ၃ ဦး တိုက်ပိတ်ခံရ

စက်တင်ဘာ ၂၃၊ ၂၀၂၆။ ဇေအောင်/People's Spring

ပဲခူးတိုင်း၊ သာယာဝတီထောင်မှာ နိုင်ငံရေးအကျဥ်းသားတွေကို ရိုက်နှက်နှိပ်စက်ပြီး ၃ ဦးတိုက်ပိတ်ခံထားရကာ ဆေးကုသခွင့်လည်း ပိတ်ပင်ထားကြောင်း နိုင်ငံရေးအကျဉ်းသားများ တရားမျှတရေးကွန်ရက်(Justice Network For Political Prisoners)က သတင်းထုတ်ပြန်ပါတယ်။

ယခု စက်တင်ဘာအတွင်း သာယာဝတီထောင်အတွင်းမှာ နိုင်ငံရေးအကျဉ်းသားတွေကို ရိုက်နှက်ညှဉ်းပန်းနှိပ်စက်ပြီး ခြေချင်းခတ်တိုက်ပိတ်ထားမှုအပေါ် ပြင်းထန်စွာကန့်ကွက်ရှုတ်ချပြီး တရားမျှတမှုရရှိရေး ဆောင်ရွက်သွားမှာဖြစ်ကြောင်း နိုင်ငံရေးအကျဉ်းသားများ တရားမျှတရေးကွန်ရက်-JNPPက ဒီကနေ့ စက်တင်ဘာ ၂၃ ရက်မှာ ထုတ်ပြန်ပါတယ်။

သာယာဝတီအကျဉ်းထောင်မှာ ထောင်ပိုင်လေးဦးအေးမင်းရဲ့ ဦးဆောင်ညွှန်ကြားမှုနဲ့ နိုင်ငံရေးအကျဉ်းသားတွေကို အကြောင်းမဲ့သံသယစွပ်စွဲကာ လူမဆန်စွာ အပြင်းအထန် ရိုက်နှက်ညှဉ်းပန်းနှိပ်စက်မှုတွေ ကျူးလွန်ခဲ့တာကို စုံစမ်းသိရှိရကြောင်း JNPP က အသိပေးပါတယ်။

အဲဒီလို အကြမ်းဖက်ရိုက်နှက်မှုတွေကြောင့် နိုင်ငံရေးအကျဉ်းသားတွေဟာ ဦးခေါင်းကွဲအက်တဲ့အထိ ပြင်းထန်တဲ့ဒဏ်ရာတွေ ရရှိထားကြပြီး နိုင်ငံရေးအကျဥ်းသားတွေဖြစ်တဲ့ ကိုနေလင်းလွင်၊ ကိုအောင်ခန့်ဇော်နဲ့ ကိုဇော်မျိုးထိုက်တို့ဟာ ဒဏ်ရာတွေ အပြင်းအထန်ရရှိထားတဲ့အပြင် ခြေကျင်းခတ်ကာ တိုက်ပိတ်ခံထားရကြောင်း JNPPက ထပ်မံအသိပေးပါတယ်။

"အပြင်က အကြမ်းဖက်တွေနဲ့ ဆက်သွယ်တယ်ဆိုတဲ့ စွပ်စွဲချက်တွေနဲ့ ရိုက်နှက် နှိပ်စက်တယ်လို့ သိရပါတယ်။ ဒဏ်ရာရ တိုက်ပိတ်ခံထားရတဲ့ နိုင်ငံရေးအကျဥ်းသား ၃ ဦးအပြင် အခြားနိုင်ငံရေး အကျဥ်းသားတွေလည်း ရှိပါတယ်။ စုစုပေါင်း အရေအတွက်တော့ အတိအကျမသိရပါဘူး။ လက်ရှိ ၃ ယောက်လုံး တိုက်ပိတ်ထားပါတယ်။ တစ်ဦးကတော့ ဒဏ်ရာကပြင်းထန်တဲ့အတွက် စိုးရိမ်ရတဲ့အခြေအနေ ရှိတယ်လို့လည်း သိရပါတယ်။ လက်ရှိအခြေအနေအရ ဆေးကုသခွင့်လည်း မရဘူးလို့ သိရပါတယ်"လို့ JNPP ရဲ့ တာဝန်ခံ မယုမိစံက ပြောပါတယ်။

ယခုလို အကျဉ်းထောင်အာဏာပိုင်တွေရဲ့ လုပ်ရပ်ဟာ လူ့အခွင့် အရေး ကြေညာစာတမ်းပါ အခြေခံမူတွေ၊ နိုင်ငံတကာ လူ့အခွင့်အရေးစံနှုန်းတွေနဲ့ ပြည်တွင်းတည်ဆဲဥပဒေတွေကို ပေါ်ပေါ်ထင်ထင် ချိုးဖောက်နေတာဖြစ်ကြောင်း၊ ဒါ့ကြောင့် JNPP အနေနဲ့ အကျဉ်းထောင်အတွင်း ဖြစ်ပျက်နေတဲ့ လူ့အခွင့်အရေးချိုးဖောက်မှုတွေကို ကုလသမဂ္ဂ မြန်မာနိုင်ငံဆိုင်ရာ လွတ်လပ်တဲ့ စုံစမ်းစစ်ဆေးရေးယန္တရား (IIMM) အပါအဝင် နိုင်ငံတကာ လူ့အခွင့်အရေးအဖွဲ့အစည်းတွေနဲ့ ချိတ်ဆက်ကာ အမြန်ဆုံးစုံစမ်းစစ်ဆေးသွားမှာဖြစ်ကြောင်း ထုတ်ပြန်ချက်မှာ ရေးသားထားပါတယ်။

ဒါ့အပြင် အပြစ်မဲ့နိုင်ငံရေးအကျဉ်းသားတွေအပေါ် လူမဆန်စွာ ကျူးလွန်ခဲ့ကြသူတွေကို ထိုက်တန်တဲ့ ပြစ်ဒဏ်တွေ ပေးအပ်အရေးယူနိုင်ရေးနဲ့ တရားမျှတမှု အပြည့်အဝရရှိရေးတို့အတွက် သက်ဆိုင်ရာ နိုင်ငံတကာအဖွဲ့အစည်းတွေနဲ့ ပူးပေါင်းပြီး တစိုက်မတ်မတ် ဆောင်ရွက်သွားမှာဖြစ်ကြောင်း အကျဉ်းသားများ တရားမျှတရေးကွန်ရက်က ထုတ်ပြန်ထားပါတယ်။

သာယာဝတီအကျဉ်းထောင်ဟာ နိုင်ငံရေးအကျဥ်းသားတွေကို ညှင်းပန်းနှိပ်စက်ရာမှာ နာမည်ကြီးတဲ့ထောင်တွေထဲ တစ်ခုအပါအဝင်ဖြစ်ပြီး သြဂုတ် ဒုတိယအပတ်ကလည်း ထောင်ပြောင်းလာရတဲ့ နိုင်ငံရေးအကျဉ်းသား ၁၀၀ဦးကို ထောင်အရာရှိတွေက အလုပ်သက်သာခွင့်အတွက် တစ်ဦး ကျပ် ၃သိန်းစီပေးဖို့ အတင်းအဓမ္မ တောင်းယူခဲ့ပြီး မပေးနိုင်တဲ့သူတွေကို မိလ္လာရေ သယ်ခိုင်းခဲ့ကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM)က သတင်းထုတ်ပြန်ခဲ့ပါသေးတယ်။

အာဏာသိမ်း ၅ နှစ်အတွင်း ထောင်တွင်း ကျန်းမာရေးစောင့်ရှောက်မှု မလုံလောက်လို့ နိုင်ငံတဝန်းက အကျဥ်းထောင်တွေထဲက နိုင်ငံရေးအကျဥ်းသား ၁၅၀ နီးပါး ကွယ်လွန်ခဲ့ကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)က ဇူလိုင်လအတွင်းက သတင်းထုတ်ပြန်ခဲ့ပါတယ်။

(သာယာဝတီထောင်ကို အပြင်ဘက်မှ မြင်တွေ့ရစဉ်။ ဓာတ်ပုံ − AAPP)

ကနီမြို့မှာ စစ်ကောင်စီတပ်ဖွဲ့ဝင်အချို့ PDF ဆီ အလင်းဝင်လာ

စက်တင်ဘာ-၂၃၊ ၂၀၂၆။ အိမ်သွင်/ People's Spring

စစ်ကိုင်းတိုင်း၊ ကနီမြို့ထဲမှာ တပ်စွဲထားတဲ့ စစ်ကောင်စီတပ်ဖွဲ့ဝင်အချို့ဟာ ပြည်သူ့ကာကွယ်ရေးတပ်ဖွဲ့တွေဆီ လက်နက်ချအလင်းဝင်လာတယ်လို့ သတင်းရရှိပါတယ်။

ကနီမြို့ပေါ်မှာ တပ်စွဲထားတဲ့ စစ်အုပ်စုထဲက တပ်ဖွဲ့ဝင် သုံးဦးနဲ့ မိသားစုဝင်အမျိုးသမီးတစ်ဦးဟာ စက်တင်ဘာလလယ်ပိုင်းမှာ လက်နက်ခဲယမ်းအချို့နဲ့အတူ ပြည်သူ့ကာကွယ်ရေးတပ်ဖွဲ့တွေဆီ ထွက်ပြေးလာခဲ့တယ်လို့ တော်လှန်ရေးတပ်ဖွဲ့တွေက ပြောပါတယ်။

"အလင်းဝင်လာတာက ကျနော်တို့နဲ့ချိတ်ဆက်နိုင်လို့။ သတင်းတွေကြားရသလောက် သူတို့တပ်စွဲထားတဲ့နေရာမှာ ကိုယ့်ကိုယ်ကိုယ်သတ်သေတဲ့သူတချို့ရှိတယ်လို့ သိရတယ်။ စက်တင်ဘာ ၂၀ရက်ကတစ်ယောက် အဲဒီလိုသေဆုံးသွားတယ်လို့ သတင်းအတိအကျပြန်ရတယ်"လို့ ကာကွယ်ရေးရဲဘော်တစ်ဦးက ပြောပါတယ်။

အလင်းဝင်လာတဲ့ လေးဦးမှာ သုံးဦးက စစ်ကောင်စီတပ်ဖွဲ့ဝင်တွေဖြစ်ပြီး တစ်ဦးက စစ်တပ်မိသားစုဝင်အမျိုးသမီးဖြစ်တယ်လို့ သိရပါတယ်။

ယင်းမာပင်ခရိုင်ထဲမှာ ပါဝင်တဲ့ ကနီမြို့မှာ စစ်တပ်က မြို့ပေါ်ကိုသာ ထိန်းချုပ်ထားနိုင်ပြီး ကျေးရွာတွေကိုတော့ တော်လှန်ရေးအင်အားစုတွေက ထိန်းချုပ်ထားတာဖြစ်ပါတယ်။

ကနီမြို့ကို ပြည်သူ့ကာကွယ်ရေးပူးပေါင်းတပ်တွေက ၂၀၂၄ ခုနှစ် မတ်လမှာ မြို့သိမ်းတိုက်ပွဲတိုက်ခိုက်ခဲ့ဖူးပါတယ်။ ၁၁ရက်ကြာတိုက်ပွဲအတွင်း မြို့ပေါ်ကို ထိန်းချုပ်နိုင်ခဲ့ပေမယ့် စစ်ကောင်စီက လေကြောင်းကနေ အပြင်းအထန်တိုက်ခိုက်လို့ ပြန်လည်ဆုတ်ခွာခဲ့ရပါတယ်။ အဲဒီကနီမြို့သိမ်းတိုက်ပွဲမှာ စစ်ကောင်စီဝင်(၄၇)ဦး သေဆုံးပြီး အလောင်း (၁၁)လောင်း ရရှိခဲ့တဲ့အထိ တိုက်ပွဲပြင်းထန်ခဲ့တာပါ။ တိုက်ပွဲအတွင်း ပြည်သူ့ကာကွယ်ရေးရဲဘော် ၁၁ဦးလည်းကျဆုံးခဲ့ပါတယ်။

လက်ရှိ ကနီမြို့မှာ ရောက်ရှိနေတဲ့ စစ်ကောင်စီစစ်ကြောင်းတွေကို မြို့စောင့်တပ်အနေနဲ့ ထားရှိပြီး ၂နှစ်ကျော်ကြာတဲ့အထိ အိမ်ပြန်ခွင့်မရသေးသူတွေလည်းရှိနေတယ်လို့ သိရပါတယ်။ ပြီးခဲ့တဲ့ ၂နှစ်ကျော်က ကနီမြို့သိမ်းတိုက်ပွဲမှာလည်း သေဆုံးခဲ့တဲ့ စစ်ကောင်စီ အရာရှိ‌တွေနဲ့တပ်ဖွဲ့ဝင်တွေကို စစ်တပ်က စွန့်ပစ်ခဲ့ပြီး မိသားစုဝင်တွေကိုလည်း ထောက်ပံ့ပေးဖို့ငြင်းဆန်ခဲ့တယ်လို့ သတင်းတွေ ထွက်ပေါ်ခဲ့ပါတယ်။

လက်ရှိမှာ ကနီမြို့နယ်အပါအဝင် ယင်းမာပင်ခရိုင်ထဲက ယင်းမာပင်၊ ပုလဲ၊ ဆားလင်းကြီးမြို့နယ်တွေမှာ တိုက်ပွဲဖြစ်ပွားခြင်းမရှိပေမယ့် စစ်ကောင်စီကမကြာခဏ ဗုံးကြဲတိုက်ခိုက်နေတဲ့အတွက် လေကြောင်းအန္တရာယ်သတိပြုကြဖို့ တော်လှန်ရေးတပ်ဖွဲ့တွေက သတိပေးထားပါတယ်။

(ကနီမြို့နယ်မှာ PDF ဆီ အလင်းဝင်လာတဲ့ စစ်ကောင်စီတပ်ဖွဲ့ဝင်အချို့ကို တွေ့ရစဉ်။ ဓာတ်ပုံ - CJ)

ရွှေကူနယ်မှာ စစ်သင်္ဘော လုံခြုံရေးလာတဲ့ စစ်တပ်စစ်ကြောင်းတွေ ပြန်ဆုတ်ခွာ

စက်တင်ဘာ ၂၃၊၂၀၂၆။ထားမြတ်/People’s Spring

ကချင်ပြည်နယ်၊ ရွှေကူမြို့နယ် ဝဲမဒေသအနီးက စစ်တပ်စစ်ကြောင်းတွေ စက်တင်ဘာ ၂၃ရက်မှာ ပြန်ဆုတ်ခွာသွားကြောင်း ကချင်စစ်ရေးသတင်းရင်းမြစ်က ပြောပါတယ်။

ဩဂုတ်လကုန်ပိုင်းမှာ ကချင်ပြည်နယ်၊ ဗန်းမော်မြို့ကို ရေကြောင်းကနေ စစ်အင်အားဖြည့်ဖို့ စစ်တပ်က ကြိုးပမ်းစဉ် ရွှေကူနယ်နဲ့ ဗန်းမော်မြို့နယ်မှာ စစ်တပ်က သင်္ဘောလမ်းကြောင်း လုံခြုံရေးအတွက် စစ်ကြောင်းတွေနဲ့ မြေပြင်ထိုးစစ်ဆင်ခဲ့တာ ဖြစ်ပါတယ်။

စစ်တပ်စစ်ကြောင်းတွေထဲက ရွှေကူမြို့နယ် ဝဲမဒေသအနီးရှိ တပ်မ(၃၃) လက်အောက်ခံ တပ်တွေနဲ့ ပူးပေါင်းတပ်တွေဟာ ဒီကနေ့ ဆုတ်ခွာသွားပြီး ရွှေကူ-ငါးအိုးလမ်းအတိုင်း ကာအစီးရေ ၃၀ကျော်နဲ့ ဆုတ်ခွာသွားတယ်လို့ ဆိုပါတယ်။

အဲဒီလို စစ်တပ်က ဆုတ်ခွာသွားလို့ KIA ပူးပေါင်းတပ်က နေရာယူတပ်စွဲထားတယ်လို့လည်း ကချင်စစ်ရေးသတင်းရင်းမြစ်က အသိပေးထားပါတယ်။

အခုလို စစ်တပ် ဆုတ်ခွာသွားတာဟာ စစ်ဆင်ရေးပြီးဆုံးတာကြောင့် ဖြစ်သလို တိုက်ပွဲမှာလည်း အထိနာ ရှုံးနိမ့်ခဲ့ကြောင်းလည်း စစ်ရေးသတင်းရင်းမြစ်က ပြောပါတယ်။

စစ်တပ်ဟာ ရွှေကူမြို့နယ် ဇင်းဘုံဒေသ၊ ဗန်းမော်မိုု့နယ် စင်းခန်းဒေသကိုလည်း မြေပြင်စစ်ကြောင်းတွေနဲ့ ထိုးစစ်ဆင်ခဲ့ပေမဲ့ စစ်တပ်ဘက်က တပ်ရင်းမှူးအချို့ အပါအဝင် စစ်ကောင်စီတပ်ဖွဲ့ဝင်တွေ သေဆုံးထိခိုက်များခဲ့ကြောင်း ကချင်စစ်ရေးသတင်းရင်းမြစ်တွေက ပြောထားပါတယ်။

အဲဒီလို မြေပြင်စစ်ကြောင်းတွေနဲ့ သင်္ဘောလမ်းကြောင်းလုံခြုံရေးတွေ လုပ်ဆောင်ခဲ့ပေမဲ့ ရည်မှန်းချက် မအောင်မြင်ခဲ့ဘဲ စစ်တပ်သင်္ဘော အစီး ၂၀ ဝန်းကျင်ကို KIA ပူးပေါင်းတပ်က တိုက်ခိုက်ဖျက်ဆီးနိုင်ခဲ့ပါတယ်။ စစ်သင်္ဘောတွေ အပါအဝင် သင်္ဘောတွေ နစ်မြုပ်တာ၊ မီးလောင်တာ ၊ ပျက်စီးတာတွေ ဖြစ်ခဲ့ပါတယ်။

အဓိက တိုက်ခိုက်ခံရတဲ့ နေရာတွေဟာလည်း ရွှေကူနဲ့ ဗန်းမော်မြို့နယ်ကြားမှာ ဖြစ်ပြီး စင်းခန်း၊ ဇင်းဘုံ၊ ဝဲမ ဒေသတွေမှာ စစ်တပ်သင်္ဘောတွေ နစ်မြုပ်မီးလောင်တာအများအပြားရှိခဲ့ပါတယ်။

စစ်တပ်ဟာ အရပ်သား သင်္ဘောတွေကိုပါ အတင်းအဓမ္မ ချောဆွဲ အသုံးပြုခဲ့တာကြောင့် ပျက်စီးခဲ့တဲ့ အထဲမှာ ပုဂ္ဂလိကပိုင်သ င်္ဘောတွေလည်းပါဝင်ခဲ့ပါတယ်။ အဲဒီလို ချောဆွဲခံရတဲ့သူတွေထဲမှာ တဦးတည်း သင်္ဘော ၄စီး ပျက်စီးဆုံးရှုံးရတဲ့ အခြေအနေရှိတယ်လို့ သိရကြောင်း KIA ဒုဗိုလ်ချုပ်ကြီးဂွန်မော်က ဒီကနေ့ အသိပေးထားပါတယ်။

သင်္ဘောပိုင်ရှင်များသို့ လိပ်မူထားတဲ့ ဒုဗိုလ်ချုပ်ကြီးဂွန်မော်ရဲ့ စာမှာ ပုဂ္ဂလိကသင်္ဘောပိုင်ရှင်များအတွက် စိတ်မကောင်းဖြစ်ရကြောင်း ဖော်ပြထားပြီး သင်္ဘောပိုင်ရှင်များ နားလည်ပေးနိုင်မယ်လို့ မျှော်လင့်ကြောင်း၊ နွေဦးတော်လှန်ရေးကာလရဲ့ အရင်းအနှီးဖြစ်တာမို့ စီးပွားများ ပြန်လည်တိုးပါနိုင်ကြပါစေကြောင်း ဆုတောင်းပေးထားပါတယ်။ သင်္ဘောတန်ဖိုးဟာ သိန်းပေါင်း ၈ထောင်ကနေ သိန်းပေါင်း ၂သောင်းထိ ရှိတယ်လို့လည်း အသိပေးထားပါတယ်။

စစ်တပ်ဟာ ကချင်ပြည်နယ်ကအပြန်မှာလည်း ကသာနဲ့ ရွှေကူနယ်က အရပ်သားပိုင်သင်္ဘောတွေကို အသုံးပြုပြီး စုန်ဆင်းသွားတာဖြစ်ပါတယ်။

(ကချင်ပြည်နယ်ကို တက်လာတဲ့ စစ်တပ် သင်္ဘောတွေကို တွေ့ရစဉ်။ ဓာတ်ပုံ - CJ)

အယ်လ်နီညိုကြောင့် ခြောက်လအတွင်း လူ
လေးသိန်းခွဲလောက် သေဆုံးနိုင်တယ်လို့
သိပ္ပံပညာရှင်​တွေခန့်မှန်း

စက်တင်ဘာ-၂၃၊၂၀၂၆။People's Spring

ကမ္ဘာပေါ်မှာ လက်ရှိကြုံတွေ့နေတဲ့ ပြင်းထန်တဲ့ အပူလှိုင်းဖြတ်မှု စူပါအယ်လ်နီညို ဖြစ်စဉ်ကြောင့် လာမယ့် ​ခြောက်လအတွင်း လူပေါင်း လေးသိန်းခွဲလောက်သေဆုံးနိုင်ကြောင်းသိပ္ပံပညာရှင်တွေစုပေါင်းရေးသားပြုစုထားတဲ့အစီရင်ခံစာ အသစ်တစ်ခုမှာ ခန့်မှန်းဖော်ပြထားပါတယ်။

အဲဒီ အစီရင်ခံစာကို ကမ္ဘာ့ရာသီဥတုဆိုင်ရာ သိပ္ပံပညာရှင်တွေစုပေါင်းရေးသားပြုစုခဲ့တာ ဖြစ်ပါတယ်။ အယ်လ်နီညိုဟာလာမယ့်လပိုင်းတွေအတွင်းအရှိန်ပိုမိုမြင့်တက်လာပြီး
အင်ဒိုနီးရှားကနေ အိန္ဒိယထိ အာရှတောင်ပိုင်း ဒေသတွေ၊ နိုက်ဂျီးရီးယားကနေ အမေရိကန်ထိ ကျယ်ပြန့်တဲ့ ရပ်ဝန်းကြီးတွေမှာ ပြင်းပြင်း
ထန်ထန်သက်ရောက်ထိခိုက်နိုင်ကြောင်း အစီ
ရင်ခံစာက သုံးသပ်ထားပါတယ်။

အပူကြောင့်သေဆုံးမှုတွေဟာ ဒေသအလိုက် အရမ်းများပြားလာနိုင်ပြီး သက်ဆိုင်ရာ အစိုး
ရတွေ၊ အာဏာပိုင်တွေ အနေနဲ့ လိုအပ်တဲ့ တုံ့ပြန်ကိုင်တွယ်မှု အစီအစဉ်တွေကို ကြိုတင် ပြင်ဆင် ရေးဆွဲထားဖို့လည်း တိုက်တွန်းခဲ့ပါတယ်။

လက်ရှိ အယ်လ်နီညို ဖြစ်စဉ်ဟာ အားအ
ကောင်းဆုံးအဆင့်ကိုရောက်ဖို့လပိုင်းလောက် လိုအပ်နေဆဲ ဖြစ်တာတောင်မှ ကမ္ဘာ့ဒေသ တချို့မှာ စံချိန်တင် အပူချိန် မြင့်တက်မှုတွေကို ကြုံနေရပါတယ်။

အယ်လ်နီညိုဟာ သဘာဝ ရာသီဥတု ဖြစ်စဉ်တစ်ခုလို့ ဆိုနိုင်ပေမယ့် ကမ္ဘာ့အပူချိန် မြင့်တက်လာမှုတွေကြောင့် ဒီနှစ် အယ်လ်နီညိုက သိသိသာသာ ပိုပြင်းထန်လာပါတယ်။

ခန့်မှန်းခြေအရ စက်တင်ဘာလကနေလာမယ့် ဖေဖော်ဝါရီလထိ အတောအတွင်း အယ်လ်နီညိုနဲ့ ဆက်စပ်လို့ ကမ္ဘာအနှံ့မှာ သေဆုံးသူ အရေအတွက် ၄၅၁၀၀၀ လောက် ရှိနိုင်တယ်လို့ အမေရိကန်နိုင်ငံ၊ ချီကာဂို တက္ကသိုလ်မှာ ရာသီဥတု သက်ရောက်မှု သုတေသနဌာနကို ထူထောင်ထားသူ ပရော်ဖက်ဆာ မိုက်ကယ်
ဂရင်းစတုန်းက ပြောပါတယ်။ သူဟာ အခု အစီရင်ခံစာမှာ အဓိက ဦးဆောင်ပါဝင်သူ တစ်ဦးပါ။

လာမယ့် ၆ လအတွင်းသေဆုံးသူ ဦးရေ လေး
သိန်းခွဲလောက်ထိ ရှိနိုင်တယ်လို့ ပညာရှင်တွေကခန့်မှန်းထားတဲ့အပြင်၂၀၂၇ဇွန်နဲ့ဇူလိုင်
လတွေမှာ အယ်လ်နီညိုကြောင့် သေပျောက်နှုန်းက ပိုတောင် မြင့်မားနိုင်သေးတယ်လို့ ဆိုပါတယ်။ ၆ လအတွင်း ရာသီဥတု ပူပြင်းမှုနဲ့ ဆက်စပ်တဲ့ သေဆုံးမှုတွေ အများဆုံး ကြုံ
တွေ့နိုင်တဲ့ နိုင်ငံတွေကတော့ နိုက်ဂျီးရီးယား၊ အင်ဒိုနီးရှား၊ ဆူဒန်၊ အိန္ဒိယနဲ့ ဘရာဇီးတို့ ဖြစ်နိုင်ကြောင်း ပညာရှင်တွေက သတိပေးထားပါတယ်။

သိပ္ပံပညာရှင်တွေကလက်ရှိ အယ်လ်နီညို ဖြစ်စဉ်ဟာ ထူးထူးကဲကဲ ပြင်းထန် ကြမ်း
တမ်းလွန်းကြောင်း ပြောဆိုထားပြီး တချို့ကတော့ ဂေါ်ဇီလာ အယ်လ်နီညိုလို့တောင် တင်စားကြပါတယ်။

အရေးပေါ် အခြေအနေတုံ့ပြန်မှုတွေ၊ပိုပြီး ကောင်းမွန်တဲ့ ပြင်ဆင်လေ့ကျင့်မှုတွေ စီစဉ်ထားနိုင်ရင်တော့ အယ်လ်နီညိုကြောင့် သေ
ဆုံးမယ့် အသက်တွေကို ထိထိရောက်ရောက် လျှော့ချနိုင်လိမ့်မယ်လို့ ဘာကလေမှာရှိတဲ့ ကယ်လီဖိုးနီးယား တက္ကသိုလ်ရဲ့ ပါမောက္ခ တစ်ဦးဖြစ်ပြီး အစီရင်ခံစာကို ပူးပေါင်း ရေး
သားခဲ့သူ ဒေါက်တာ တမ်မာ ကာလီတန်က ပြောကြားခဲ့ပါတယ်။

ပြင်းထန်တဲ့ ရာသီဥတုအခြေအနေတွေက
ကမ္ဘာ့ စားနပ်ရိက္ခာ ကဏ္ဍကိုပါ ထိခိုက်လာနိုင်ပြီး ကမ္ဘာ့စားနပ်ရိက္ခာ အဖွဲ့ကြီး (WFP)
ကတော့ အယ်လ်နီညို ဒဏ်ကြောင့် လူပေါင်း သန်း၅၀လောက်အကြီးအကျယ်ဆာလောင်
မွတ်သိပ်မှုပြဿနာမျိုးကြုံလာရနိုင်ကြောင်း သတိပေးထားပါတယ်။

၁၈၇၇ နဲ့ ၁၈၇၈ ခုနှစ်တွေမှာ ဖြစ်ပွားခဲ့တဲ့ အယ်လ်နီညို ဖြစ်စဉ်တုန်းကလည်း အငတ်ဘေး ဆိုက်မှုတွေ ကြုံခဲ့ပြီးဘရာဇီး၊အိန္ဒိယနဲ့တရုတ်
တို့မှာ ပြင်းပြင်းထန်ထန် သက်ရောက် ခံစားခဲ့ရသလို လူပေါင်း သန်း ၅၀ ကျော် သေကြေပျက်စီးခဲ့ဖူးကြောင်း သိရပါတယ်။

ကိုးကား-Guardian