မန္တလေးမှာ သောင်းကျန်းနေတဲ့ ပျူစောထီးတပည့်တွေ သူ့နာမည်မသုံးဖို့ ပေါက်ကိုယ်တော် တားမြစ်

စက်တင်ဘာ ၂၁၊ ၂၀၂၆။ ဗေဒါ/People's Spring

မန္တလေးမြို့ပေါ်မှာ သောင်းကျန်းနေတဲ့ ပျူစောထီးတပည့်တွေကို သူ့နာမည်မသုံးဖို့ ပျူစောထီးခေါင်းဆောင် ပေါက်ကိုယ်တော်က တားမြစ်လိုက်ပါတယ်။

စစ်တပ်ထောက်ခံပြီး မန္တလေးမြို့မှာ ပျူစောထီးအဖွဲ​တွေ အများအပြား မွေးထုတ်ထားတဲ့ ပေါက်ကိုယ်တော်ဟာ မန္တလေးမြို့ပေါ်မှာ လူမိုက်စတိုင်နဲ့ ထင်ရာစိုင်း အနိုင်ကျင့် ဗိုလ်ကျနေတဲ့ ပျူစောထီးအဖွဲ့ဝင်တွေကို သူ့ရဲ့ Tiktok အကောင့်အသစ်ကနေ "ပေါက်ကိုယ်တော် တပည့်လို့ မပြောနဲ့။ အောက်တန်းကျလွန်းလို့"ဆိုပြီး ရေးသားကာ ရုပ်သံနဲ့တကွ ပြောဆိုခဲ့ပါတယ်။

"ပေါက်ကိုယ်တော်တို့တပည့်၊ ပေါက် ကိုယ်တော် တို့နာမည်သုံးတာ သိက္ခာကျသေးတယ်။ အောက်တန်းကျတဲ့အလုပ် လုပ်ကြတာလေ။ တို့အမည် နာမည်တော့ မသုံးပါနဲ့ကွာ။ နော်။ ဒီလိုစိတ်ဓါတ်မျိုးလည်း တပည့်မတော်ချင်ဘူး။ ဒီလိုအောက်တန်းကျတဲ့ စိတ်ဓါတ်မျိုး။ လူပါးဝတဲ့ စိတ်ဓာတ်မျိုးတွေ။ အထူးသဖြင့် ပေါက်ကိုယ်တော်တပည့်၊ ပေါက်ကိုယ်တော်တပည့် မလုပ်ကြနဲ့။ သိတဲ့အချိန်ကတော့ မလွယ်ဘူးသာမှတ်"လို့ ပေါက်ကိုယ်တော်က ပြောပါတယ်။

ဘယ်ကိစ္စကို ရည်ရွယ်ပြောဆိုတယ်ဆိုတာ မသိရပေမဲ့ ပေါက်ကိုယ်တော်ဟာ KTV နဲ့ပတ်သက်ပြီး ထည့်သွင်းပြောဆိုထားတာ တွေ့ရပါတယ်။

"မင်းတို့ကို ပြောချင်တာက ဆိုင်တိုင်းဆိုင်တိုင်းမှာ အပတ်အသက်တွေ ရှိတယ်။ ပတ်သက်ရာ ပတ်သက်ကြောင်း။ ကိုယ့်ကို လူမိုက်ကြီးတွေဆိုပြီး ထင်ရာမစိုင်းနဲ့။ ခေတ်ကာလက ကောင်းတာမဟုတ်ဘူး။ ထောင်ထဲဂျေးနေရမယ်။ ထောင်ထဲသွားနေရမယ်"လို့ ပေါက်ကိုယ်တော်က ပြောပါတယ်။

ဒါ့အပြင် ပြီးခဲ့တဲ့ရက်ပိုင်းကပဲ ပြည်ကြီးတံခွန်မြို့နယ်၊ မန္တလေးစက်မှုဇုန်မှာ ပျူစောထီးခေါင်းဆောင် မျိုးထွန်း ဦးဆောင်တဲ့အဖွဲ့ဟာ လူငယ်တွေကို စစ်မှုထမ်းဖို့အတွက် လိုက်လံဖမ်းဆီးခေါ်ဆောင်ပြီး မိသားစုဝင်တွေဆီကနေ ငွေညှစ်ခဲ့ပါသေးတယ်။

အဲဒီအဖွဲ့ဟာ အမရပူရမြို့နယ်၊ မြစ်ငယ်မြို့က လူငယ်တစ်ဦးကို ဖမ်းဆီးပြီး ၎င်းလူငယ်ရဲ့ မိသားစုဝင်တွေဆီကို ဆက်သွယ်ကာ ငွေကျပ် သိန်း ၃၅၀ နဲ့ လာရွေးဖို့၊ မရွေးရင် ခလရ (၉၅) တပ်ရင်းကို ပို့ဆောင်မယ်လို့ ခြိမ်းခြောက်ခဲ့တယ်လို့ သိရပါတယ်။

ခြိမ်းခြောက်ခံရတဲ့မိသားစုဟာ အခြား ပျူစောထီးအဖွဲ့တစ်ခုထံသို့ ဆက်သွယ်အကူအညီတောင်းကာ ငွေလာပေးမယ်ဆိုပြီး ချိန်းဆိုပြီးနောက် ငွေလာယူချိန်မှာ ဖမ်းဆီးလိုက်ကြောင်း သိရပါတယ်။

ပေါက်ကိုယ်တော်ဟာ မန္တလေးမှာ လက်နက်ကိုင် ပျူစောထီးတွေ သောင်းကျန်းနေကြောင်း ယခုလဆန်းကတည်းက ဝန်ခံထားပါတယ်။

"G2 (စစ်တပ်ဗိုလ်မှူး)ရဲ့ မွေးစားသားပေါ့နော်။ ငှက်ကြီးတောင် ဓားကြီးတွေကိုင်၊ ရှေ့မှာယူနီဖောင်းကြီးတွေပုံလို့ ပြည်သူ့စစ်တွေ။ ဂုဏ်သိက္ခာလည်း ကျတာပေါ့နော်" ပေါက်ကိုယ်တော်က ပြောပါတယ်။

မြို့ထဲမှာဆိုရင်လည်း ပြည်သူ့စစ်တွေဟာ ဆိုင်ကယ်တွေ၊ ကားတွေနဲ့ ယာဥ်တန်းနဲ့တကွ လက်နက်ကိုင်ကာ လှည့်လည်လေ့ရှိကြောင်း၊ ပျူစောထီးတွေရဲ့ အဲဒီအပြုအမူတွေကြောင့် ပြည်သူ့စစ်တွေကို အားပေးစကားပြောတာကို နားလိုက်ပြီလို့ ပေါက်ကိုယ်တော်က ပြောခဲ့ပါတယ်။

မန္တလေးမြို့မှာ အာဏာသိမ်းစစ်တပ်လက်အောက်ခံ ပျူစောထီးတွေဟာ စစ်ကောင်စီတပ်လိုပဲ ဒုစရိုက်သမားတွေဆီကနေ လိုင်းကြေးတောင်းတာ၊ လူငယ်တွေကို ပေါ်တာဆွဲတာ၊ ပစ္စည်းလုယက်တာတွေ ပြုလုပ်နေပါတယ်။

ပြီးခဲ့တဲ့ သြဂုတ် ၁၈ ရက်ကလည်း မန္တလေးမြို့၊ မဟာအောင်မြေကျောက်ဝိုင်းက ကုန်သည်တစ်ဦးဆီကနေလက်နက်ကိုင်ပျူစောထီးတွေက ကာလတန်ဖိုး ကျပ်သိန်း၅၀၀ တန်ဖိုးရှိတဲ့ ကျောက်စိမ်းလက်ဝတ်ရတနာတွေကို လုယက် ယူဆောင်သွားခဲ့ပါသေးတယ်။

စစ်တပ်နဲ့ ပျူတွေဟာ လူငယ်တွေကို ပေါ်တာဆွဲဖမ်းဆီးတာတွေ နေ့ရောညပါ ပြုလုပ်နေတဲ့အတွက် သတိပြုသွားလာနေရတယ်လို့ မြို့ခံတွေဆီက သိရပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ပေါက်ကိုယ်တော် #ပျူစောထီး #မန္တလေးသတင်း #စစ်ကောင်စီထောက်ခံသူများ #မြန်မာ့ရေးရာသတင်း #PaukKoyawdaw #PyuSawHtee #MandalayNews #JuntaSupporters #MyanmarNews

နွားထိုးကြီး - မြင်းခြံလမ်းပိုင်း စစ်တပ်စစ်ကြောင်းထိုး၊ ကျေးရွာတွေ အိမ်ထောင်စုစာရင်း ကောက်ယူ

စက်တင်ဘာ၂၁-၂၀၂၆။ကတ်သရင်း/ People's Spring

တံတားဦးလေတပ်တိုက်ခိုက်ခံရပြီးနောက် စစ်တပ်က စစ်ကြောင်းတွေ နွားထိုးကြီးမြို့နယ်အတွင်းဝင် ရောက်ကာ နွားထိုး- မြင်းခြံလမ်းပိုင်းက ကျေးရွာတချို့ကို ဝင်ရောက် တပ်စွဲပြီး အိမ်ထောင်စုစာရင်း ကောက်ယူနေတယ်လို့ ဒေသခံတွေကပြောပါတယ်။

စက်တင်ဘာ ၁၀ ရက်က စစ်တပ်ရဲ့ တံတားဦး လေတပ်စခန်းတိုက်ခိုက်ခံရပြီးနောက် စစ်တပ်က အင်အားအများအပြားနဲ့ နွားထိုးကြီးမြို့နယ်ဘက်ကိုစစ်ကြောင်းထိုးခဲ့တာလို့ သိရပါတယ်။

အဲဒီနောက် ခံတပ်ကုန်းနဲ့ ဖောင်ချဉ်းကျေးရွာက နေအိမ်တချို့ကို မီးဝင်ရှို့ခဲ့ပြီး နွားထိုး- မြင်းခြံလမ်းဘက်က ကျေးရွာတွေကို ဝင်ရောက်တပ်စွဲကာ အိမ်ထောင်စုစာရင်း ကောက်ယူတာ တွေပါပြုလုပ်နေတယ်လို့ ဒေသခံတွေက ပြောပါတယ်။

"ပေါ်တာကိစ္စ တွေပါလာတယ်ထင်တာပဲ။အဓိက နွားထိုး- မြင်းခြံလမ်းပိုင်းကိုပဲထိုး နေတာ။နနွင်း တော်ဘိုးရွာကို အင်အား၂၀၀ လောက် ရောက် နေတာ တော့သုံးရက် လောက်ရှိပြီ"လို့ ဒေသခံတစ်ဦးက ပြောပါတယ်။

စက်တင်ဘာ ၁၀ရက်က တိုက်ပွဲဖြစ်ပွားပြီးနောက်ပိုင်း လတ်တလော တိုက်ပွဲဖြစ်သံတွေငြိမ် နေပြီး စစ်တပ် စစ်ကြောင်းတွေကတော့ ဒီလမ်းပိုင်းတွေမှာ ရှိနေဆဲဖြစ်တယ်လို့ သိရပါတယ်။

(မြင်းခြံမြို့နယ်ကို စစ်တပ်က စစ်ကြောင်းထိုးပြီး နေအိမ်တွေ မီးရှို့နေတာကို ၂၀၂၅က တွေ့ရစဉ်။ ဓာတ်ပုံ - CJ)

ကော်သူးလေအဆင့်မြင့်ပညာရေးကောင်စီ ဖွဲ့စည်းကြောင်း KNU ကြေညာ

စက်တင်ဘာ ၂၁၊ ၂၀၂၆။ ထားမြတ်/People’s Spring

ကော်သူးလေအဆင့်မြင့်ပညာရေးကောင်စီကို အဆင့်မြင့်ပညာရေးအဖွဲ့အစည်းများ၊ အဆင့်မြင့်ပညာရေးဗျူရို ခေါင်းဆောင်များနဲ့ လွတ်လပ်သော ပညာရှင်များ ကိုယ်စားပြုတဲ့ အဖွဲ့ဝင် ၂၁ဦးနဲ့ ဖွဲ့စည်းလိုက်ကြောင်း ကရင်အမျိုးသားအစည်းအရုံး(KNU)က စက်တင်ဘာ ၂၁ရက်မှာ ထုတ်ပြန်ကြေညာပါတယ်။

ကော်သူးလေအဆင့်မြင့်ပညာရေးကောင်စီ ဥက္ကဋ္ဌအဖြစ် ဆရာမ နော်ဖောမူးကို တာဝန်ပေးခန့်အပ်ခဲ့ပြီး ဒုဥက္ကဋ္ဌအဖြစ် ဆရာစောကပီ၊ အတွင်းရေးမှူးအဖြစ် ဒေါက်တာ စောဟေဆိုသာကို တို့အား တာဝန်ပေးအပ်ထားကြောင်း အသိပေးပါတယ်။

အခုဖွဲ့စည်းလိုက်တဲ့ ကောင်စီအနေနဲ့ ကော်သူးလေပြည်သူများ(KNU အုပ်ချုပ်နယ်မြေအတွင်းရှိ ပြည်သူများ)အတွက် ပညာရေးအခွင့်အလမ်းများ တိုးချဲ့ပေးခြင်း၊ အဆင့်မြင့် ပညာရေးအဖွဲ့ အစည်း များရဲ့ စွမ်းဆောင်ရည်ကို အားကောင်းစေခြင်းနဲ့ ပြည်သူများရဲ့ လူမှုရေး၊ ယဉ်ကျေးမှု၊ စီးပွားရေးဖွံ့ ဖြိုးတိုး တက်မှုတို့အတွက် အထောက်အကူပြုရန် ရည်ရွယ်ဆောင်ရွက်သွား မယ်လို့ ဖော်ပြပါတယ်။

ကောင်စီရဲ့ လုပ်ငန်းတာဝန်များ ထိရောက်စွာအကောင်အထည်ဖော်နိုင်ဖို့ စံနှုန်းသတ်မှတ်ခြင်းနဲ့ အသိအမှတ်ပြုခြင်းကော်မတီ ၊ အရည်အသွေး အာမခံရေးကော်မတီ၊ သုတေသန၊ စည်းရုံးလှုံ့ဆော်ရေးနဲ့ မိတ်ဖက်ပူးပေါင်းဆောင်ရွက်ရေးကော်မတီ စတဲ့ ကော်မတီ သုံးရပ်ကို ဖွဲ့စည်းထားတယ်လို့ ဆိုပါတယ်။

နိုင်ငံရေးအကျပ်အတည်းများနဲ့ အခြားသော စိန်ခေါ်မှုများစွာ ရှိနေပေမဲ့ ကော်သူးလေအဆင့်မြင့်ပညာရေးကောင်စီ (KCHE) ကို ဖွဲ့စည်းတည်ထောင် နိုင်ခြင်းဟာ ကော်သူးလေအတွင်းနဲ့ ပြင်ပရှိ အဆင့်မြင့်ပညာရေး အုပ်ချုပ်မှုစနစ်၊ ပညာရေးအရည်အသွေး၊ အဖွဲ့အစည်းများအကြား ပူးပေါင်းဆောင်ရွက်မှုနဲ့ အပြန်အလှန်အသိအမှတ်ပြုမှုတို့ကို အားကောင်းစေရေး အတွက် အရေးပါတဲ့ မှတ်တိုင်တစ်ရပ် ဖြစ်ကြောင်း ထုတ်ပြန်ပါတယ်။

ကော်သူးလေအဆင့်မြင့်ပညာရေးကောင်စီဟာ အဆင့်မြင့်ပညာရေး ဖွံ့ဖြိုးတိုးတက်ရေးအတွက် ညှိနှိုင်း ဆောင် ရွက်ခြင်းနဲ့ မူဝါဒချမှတ်ရေးဆိုင်ရာ အခန်းကဏ္ဍများကို အဓိကတာဝန်ယူ ဆောင်ရွက်သွားမယ်လို့ အသိပေးပါတယ်။

ကော်သူးလေအဆင့်မြင့်ပညာရေးကောင်စီ ဖွဲ့စည်းတည်ထောင်ခြင်းဟာ ခိုင်မာပြီး အားလုံးပါဝင်နိုင်တဲ့ ဒေသတွင်းအဆင့်ချိတ်ဆက်ပူးပေါင်းဆောင်ရွက်နိုင်မယ့် အဆင့်မြင့်ပညာရေး စနစ်တစ်ရပ် တည် ဆောက်ဖော် ဆောင်ရန် ထားရှိထားသော ကတိကဝတ်နဲ့ ကြိုးပမ်းအားထုတ်မှုများကို ဖော်ပြတဲ့ အရေးပါသော ခြေလှမ်း တစ်ရပ် ဖြစ်ကြောင်း ထုတ်ပြန်ခဲ့ပါတယ်။

(ကရင်ပြည်နယ်စစ်ဘေးရှောင်စခန်းရှိ ကလေးငယ်များ။ ဓာတ်ပုံ - SBS)

ပေါက်တော၊ မင်းပြား၊ ဂွမြို့နယ်တို့ကို စစ်တပ်ဗုံးကြဲ၊တဦးသေပြီး နှစ်ဦး ဒဏ်ရာရ

စက်တင်ဘာ-၂၁၊၂၀၂၆။ခိုင်မြတ်/ People's Spring

စစ်တွေမြို့နယ်တိုက်ပွဲတွေမှာ အထိနာနေတဲ့ အာဏာသိမ်းစစ်တပ်ဟာ ဒီနေ့တရက်တည်းမှာ ရခိုင်ပြည်နယ်၊ ပေါက်တော၊ မင်းပြား နဲ့ ဂွမြို့နယ်တို့ကို ဗုံးကြဲခဲ့ပြီး အမျိုးသမီးတဦးသေဆုံးကာ ကျောင်းသားတဦး အပါအဝင် ​ဒေသခံပြည်သူနှစ်ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

စက်တင်ဘာလ ၂၁ ရက် မနက်အစောပိုင်းအချိန်မှာ ပေါက်တောမြို့နယ် တောင်းဖူးရွာထဲကိုစစ်တပ်က ဗုံးနှစ်လုံးကြဲချခဲ့ပြီး အမျိုး
သမီးတဦး သေဆုံးခဲ့ပါတယ်။ ဒါ့အပြင် မနက် ၁၁နာရီ ကျော်အချိန်မှာ ဂွမြို့နယ် ဆပ် သွားရွာကို ဗုံးထပ်ကြဲတာ​ကြောင့် အသက် ၁၄ နှစ်အရွယ်ကျောင်းသားတဦး နဲ့ အမျိုးသားတဦးတို့ ဒဏ်ရာရခဲ့ပါတယ်။

“ဘာမှမဆိုင်တဲ့ ရွာထဲကို ကြဲတယ်။ မိုက်ရိုင်းချက်က ပြောစရာစကားတောင် မရှိဘူး” လို့ ဂွမြို့နယ် ဒေသခံတဦးက ပြောပါတယ်၊

ဒါ့အပြင် စစ်တပ်ဟာစက်တင်ဘာ ၂၁ ရက်နေ့လယ် ၁၂ ကျော်အချိန်မှာလည်းမင်း ပြားမြို့နယ် သစ်ပုတ်တောင်ရွာအနီးတောင်တန်းတွေကို ဂျက်ဖိုက်တာနှစ်စီးနဲ့ဗုံးကြဲခဲ့ပါတယ်။

အဲဒီဗုံးကြဲမှုကြောင့်ထိခိုက်သေဆုံးထိခိုက်သူရှိ၊မရှိကိုတော့ မသိရသေးပါဘူး။ “ရွာထဲကို မကျဘူးလို့တော့ သိရတယ်။ တောင်တန်းတွေကို ပစ်တာ။ ဒီဘက်ရွာတွေက အရင်ကတည်း
က စစ်တပ်လည်း မရှိဘူး၊ တိုက်ပွဲလည်း မရှိတဲ့နေရာတွေ” လို့ မင်းပြားဒေသခံတဦးက ပြောပါတယ်။

စစ်တွေနဲ့ ပုဏ္ဏားကျွန်းမြို့နယ်အစပ်က ကာကင်းစခန်းတွေနဲ့ ခြေကုတ်နေရာတွေ ဆက်
တိုက်သိမ်းပိုက်ခံနေရပြီး အထိနာနေတဲ့ အာဏာသိမ်းစစ်တပ်ဟာ စစ်တွေ၊ ပုဏ္ဏားကျွန်းတို့နဲ့ ဆက်စပ်နေရာတွေအပြင် အခြားမြို့နယ်တွေ က အရပ်သားပြည်သူ​တွေ​နေထိုင်တဲ့ကျေးရွာတွေကိုပါ ဗုံးကြဲ၊ လက်
နက်ကြီးပစ်ခတ်တာတွေ ဆက်တိုက်လုပ်နေတာဖြစ်ပါတယ်။

စက်တင်ဘာလ ၂၀ ရက်နေ့မနက်ပိုင်းမှာလည်း ရသေ့တောင်မြို့နယ် မိုးစဲကမ်း ဇီးကိုင်းရွာကို စစ်တွေမြို့ တပ်ရင်းတွေကနေ လက်နက်ကြီးနဲ့ လှမ်းပစ်ခဲ့ပြီး ရွာထဲ ကျရောက်ပေါက်ကွဲကာအသက် ၇၂ နှစ်အရွယ် ဒေါ်အေးနုဖြူနဲ့ သူ့ရဲ့သမီးဖြစ်သူ ၄၂ နှစ်အရွယ် ဒေါ်မရွှေတင်တို့ သေဆုံးခဲ့ပါတယ်။

စစ်တပ်ရဲ့ ၄၉၂၆ စစ်ဆင်ရေးဆိုပြီး စက်တင်
ဘာ ၄ ရက်ကနေ စက်တင်ဘာ ၂၁ ရက်ထိ စစ်တပ်လက်ချက် ကြောင့် ရခိုင်ဒေသခံအရပ်သားပြည်သူအနည်းဆုံ ၇ ဦးသေဆုံးကာ ၈ ဦးထက်မနည်း ဒဏ်ရာရခဲ့ပြီဖြစ်တယ်လို့ ဒေသခံ တွေဆီက ပြောပါတယ်။

လက်ရှိမှာ ရွှေမင်းဂံရေတပ်စခန်းနဲ့ကပ်ရပ် ပုဏ္ဏားကျွန်းမြို့နယ် ရဲရိုးပြင်ရွာအနီးဝန်ကျင်၊ စစ်တွေမြို့နယ် အမြင့် ကျွန်း၊ တောကန်၊ ကံ့ကော်ကျွန်းဝန်းကျင်တို့မှာ စစ်တပ်နဲ့ AA
တို့ တိုက်ပွဲအပြင်းအထန်ဖြစ်ပွားနေပါတယ်။ တိုက် ပွဲနှစ်ပတ်တာကာလအတွင်း စစ်တပ်ဘက်က သေဆုံးသူ ရာနဲ့ချိရှိခဲ့ပြီလို့ စစ်ရေးသတင်းရင်းမြစ်တွေက ပြောပါတယ်။

ကချင်မှပြန်လာတဲ့စစ်သင်္ဘောတွေ​ပေါ်ကဒဏ်ရာရစစ်သား​တွေကို ပြင်ဦးလွင်စစ်ဆေးရုံပို့

စက်တင်ဘာ-၂၁၊၂၀၂၆။ရှိန်း/People's Spring

ကချင်ပြည်နယ်ကနေ ဧရာဝတီမြစ်အတိုင်း စုန်ဆင်းလာတဲ့စစ်သင်္ဘောတွေ ဒီက​နေ့ မနက်မှာ မန္တလေး ​ဂေါဝိန်ဆိပ်ကမ်းကိုဆိုက်ကပ်ပြီးဒဏ်ရာရစစ်သားအများစုကို ပြင်ဦးလွင်စစ်
ဆေးရုံကိုပို့ထားတယ်လို့ စစ်ရေးသတင်းရင်း
မြစ်တွေကပြောပါတယ်။

၂၀၂၅ခုနှစ်၊ဇူလိုင်လ ကတည်းက မန္တလေးမြို့က​နေ ဗန်းမော်မြို့ကိုပို့ထားတဲ့ စစ်သား​တွေထဲက ဒဏ်ရာရစစ်သားတွေပြန်ခေါ်လာတဲ့ စစ်သင်္ဘောတွေဟာ စက်တင်ဘာ ၂၁ရက်
မနက်ပိုင်းမှာ မန္တလေးဆိပ်ကမ်းကို ကပ်ခဲ့ပါတယ်။ဆိပ်ကမ်းမှာလူနာတင်ကားတွေအပါ
အဝင်ကားအစီးရေ ၂၀ လောက်နဲ့ မန္တလေးနန်းတွင်းထဲကိုစစ်သား​တွေကိုသယ်ဆောင်
ခဲ့တာဖြစ်ပါတယ်။ဒါ့အပြင် ၂၀၂၄ ကတည်းဗန်း​မော်ကိုပို့ထားတဲ့စစ်သားအချို့လည်းပြန်ပါတယ်လို့သတင်းရရှိပါတယ်။

"အပြန်မှာ တော်တော်ဆိုးတယ်အတိုက်ခံရတာ။ဒဏ်ရာ ရတဲ့သူ တွေလည်းများတယ်။အရင်ကတည်းကတိုက်ပွဲမှာဒဏ်ရာရတဲ့သူတွေနဲ့ တခြားသူနည်းနည်းတပ်အချိန်းလုပ်တာ လမ်းမှာလှိမ့်နေအောင်အဆော်ခံရတယ်"လို့ စစ်သားတဦးကပြောပါတယ်။

မန္တ​လေးမြို့မှာ ဒဏ်ရာရစစ်သားတွေ​ဆေးကုသဖို့ ဝန်ထမ်းအင်အားနဲ့ ဆေးအင်အားအလုံ အလောက်မရှိတာ ကြောင့် ပြင်ဦးလွင် စစ်
ဆေးရုံကိုချက်ချင်းပို့တာတွေလည်းရှိတယ်လို့ဒေသခံ တွေကပြောပါတယ်။

ဗန်းမော်မြို့ကိုပြန်ထိန်းချုပ်နိုင်ဖို့ စစ်တပ်က ၂၀၂၅ခုနှစ်မှာ ဧရာဝတီမြစ်ကြောင်းကနေ စစ်သားအင်အားထောင်ချီပို့ခဲ့တာဖြစ်ပါတယ်။ဗန်း​မော်မြို့မှာ တိုက်ပွဲ​တွေဆက်လက်
ဖြစ်ပွားခဲ့သလို တပ်အ​ပြောင်းအလဲလုပ်လို့ မန္တ​လေးပြန်လာချိန်မှာလည်း KIAနဲ့ ပူး​ပေါင်းတပ်တွေရဲ့တိုက်ခိုက်မှုကြောင့် စစ်တပ်သင်္ဘောတွေ မီးလောင်ခဲ့သလို ဒဏ်ရာရသူ တွေလည်းများခဲ့ပါတယ်။ ဒါ​ကြောင့် ဒဏ်ရာပြင်းထန်တဲ့စစ်သား​တွေကိုသပိတ်ကျင်းမြို့
မှာအ​ရေး​ပေါ် ချခဲ့​သေးတယ်လို့လည်း စုံစမ်းသိရပါတယ်။

ဩဂုတ်လ၂၁ရက်နဲ့ စက်တင်ဘာလ၄ ရက်နေ့ကလည်း နောက်ထပ် သင်္ဘောအစီးရေ စုစုပေါင်း၅၀ ကျော်နဲ့ စစ်တပ်က စစ်ကူနဲ့လက်နက်ခဲယမ်း၊ရိက္ခာ​တွေထပ်မံပို့ခဲ့ပေမယ့် KIAနဲ့ ပူး ပေါင်းတပ်က စစ်တပ်ရဲ့သင်္ဘောအစီးရေ (၂၀) ဝန်းကျင်ကိုတိုက်ခိုက်ဖျက်ဆီးနိုင်ခဲ့ပါတယ်။ဒါ့အပြင် စစ်တပ်သင်္ဘော ၂ စီးက တိုက်ခိုက်ခံရပြီး KIA ထံလက်နက်ချခဲ့ပါတယ် ။

ဧရာဝတီမြစ်​ကြောင်းတိုက်ပွဲမှာ စစ်တပ်ရဲ့သင်္ဘောအစီး (၂၀)ဝန်းကျင်တိုက်ခိုက်ခံခဲ့ရတဲ့အပြင် စစ်သားရာနဲ့ချီ ​သေဆုံး ၊ဒဏ်ရာရခဲ့ပါတယ် ။ဒါအပြင်စစ်သား နဲ့ စစ်သားမိ
သားစုဝင် စုစု​ပေါင်း ၁၅၀ ​ကျော် KIA ပူး​ပေါင်းတပ်ထံလက်နက်ချခဲ့ပါတယ် ။စစ်တပ်သင်္ဘော​တွေ လုံခြုံ​ရေး ယူ​ပေးတဲ့ ကြည်း​ကြောင်းက စစ်သား​တွေကိုလည်း KIA ပူး​ပေါင်းတပ်ကတိုက်ခိုက်လို့ ​သေဆုံး ဒဏ်ရာရသူများပြီးစစ်​ကြောင်းအချို့ ပျက်ခဲ့ပါတယ်။

#ဗန်းမော်မြို့သိမ်းတိုက်ပွဲ #ဧရာဝတီမြစ်
#ဂေါ်ဝိန်ဆိပ်ကမ်း
#ဒဏ်ရာရစစ်သားတွေပြင်ဦးလွင်စစ်ဆေးရုံပို့ #peoplesspring #ludunwayoo

ဗန်း​မော်က​နေ မန္တ​လေး​ဂေါ်ဝိန်ဆိပ်ကမ်းပြန်​ရောက်လာတဲ့ စစ်တပ်သင်္ဘောတစ်စီး။
ဓါတ်ပုံ-စစ်​ကောင်စီ

ဖက်ဒရယ်ဦးဆောင်ကောင်စီမှာ အမျိုးသမီးကိုယ်စားပြုပါဝင်ရေးကိစ္စ ဆွေးနွေး၊ သဘောတူညီချက်အချို့ရ

စက်တင်ဘာ ၂၁၊ ၂၀၂၆။ ထားမြတ်/People’s Spring

ဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင်ကောင်စီ (SCEF)မှာ အမျိုးသမီးကိုယ်စားပြုမှု ပါဝင်ရေး ဆွေးနွေးခဲ့ကြောင်း SCEFက ဒီကနေ့ စက်တင်ဘာ ၂၁ရက်မှာ ထုတ်ပြန်ခဲ့ပါတယ်။

အမျိုးသမီးမဏ္ဍိုင် ဖော်ဆောင်ရေးအတွက် SCEF အတွင်းရေးမှူးအဖွဲ့နဲ့ အမျိုးသမီးနိုင်ငံရေးအဖွဲ့အစည်းများဖြင့်ဖွဲ့စည်းထားတဲ့ SCEF အမျိုးသမီးကိုယ်စားပြုမဏ္ဍိုင်ဖွဲ့စည်းရေး ယာယီကော်မတီတို့ဟာ စက်တင်ဘာ ၁၉ရက်မှာ အစည်းအဝေး ကျင်းပခဲ့ရာ သဘောတူညီချက် ၂ချက်ရရှိခဲ့တယ်လို့ အသိပေးထားပါတယ်။

အစည်းအဝေးမှာ SCEFရဲ့ အမျိုးသမီးကိုယ်စားပြုမဏ္ဏိုင်မှာ အမျိုးသမီးနိုင်ငံရေးအဖွဲ့အစည်းအခြေပြု ကိုယ်စားပြုမှုအဖြစ် အမျိုးသမီးများအဖွဲ့ချုပ်(မြန်မာနိုင်ငံ)နဲ့ အမျိုးသမီးနိုင်ငံရေးအဖွဲ့အစည်းများ ပေါင်းစပ်စုဖွဲ့မှု ကိုယ်စားပြုအသီးသီး ရွေးချယ်စေလွတ်သောကိုယ်စားလှယ်များပါဝင်သွားမယ်လို့ သဘောတူညီခဲ့သလို ညှိနှိုင်းဆွေးနွေးရမယ့် အကြောင်းအရာများကို ဆက်လက်ဆွေးနွေးသွားမယ်လို့ သဘောတူညီခဲ့ကြောင်း SCEFက ထုတ်ပြန်ပါတယ်။

ဒီကနေ့ အစည်းအဝေးကို SCEF အတွင်းရေးမှူးအဖွဲ့ အဖွဲ့ဝင်များ၊ အမျိုးသမီးနိုင်ငံရေးအဖွဲ့အစည်းများ ဖြင့်ဖွဲ့စည်း ထားသော SCEF အမျိုးသမီးကိုယ်စားပြုမဏ္ဍိုင်ဖွဲ့စည်းရေး ယာယီကော်မတီမှ ကိုယ်စားလှယ်များ၊ SCEF မူဝါဒအကြံပေးအဖွဲ့အဖွဲ့ဝင်များနဲ့ အခြားတာဝန်ရှိသူများ တက်ရောက်ခဲ့တယ်လို့ အသိပေးထားပါတယ်။ SCEF အတွင်းရေးမှူးအဖွဲ့ ညှိနှိုင်းရေးမှူးဒေါက်တာဇော်ဝေစိုး၊ SCEF အတွင်းရေးမှူးအဖွဲ့မှ ဒေါ်ဇူးပဒုမ္မာနဲ့ SCEF အမျိုးသမီးကိုယ်စားပြုမဏ္ဍိုင်ဖွဲ့စည်းရေး ယာယီကော်မတီမှ ဒေါ်အေးဆောင်၊ နော်ဆဲဆဲတို့ အပါအဝင် နှစ်ဖက်တာဝန်ရှိသူတွေက အပြန်အလှန်ဆွေးနွေးခဲ့ကြတာလို့ ဆိုပါတယ်။

SCEF ကို အမျိုးသားညီညွတ်ရေးအစိုးရ(NUG)၊ ပြည်ထောင်စုလွှတ်တော်ကိုယ်စားပြုကော်မတီ(CRPH)၊ ကရင်အမျိုးသား အစည်းအရုံး(KNU)၊ ကချင်လွတ်လပ်ရေးအဖွဲ(KIO)၊ကရင်နီအမျိုးသားတိုးတက်ရေးပါတီ(KNPP)၊ချင်းအမျိုးသားတပ်ဦး(CNF) တို့နဲ့ ကနဦး ဖွဲ့စည်းထားတာပါ။ SCEF စုဖွဲ့မှုကို ဖက်ဒရယ်ယူနစ်၊ တိုင်းရင်းသားလက်နက်ကိုင်အဖွဲများ မဏ္ဍိုင် ၊ ပြည်သူ့လူထုကိုယ်စားပြုမဏ္ဍိုင်၊ အမျိုးသမီး ကိုယ်စားပြုမဏ္ဍိုင် စတဲ့ ထောက်တိုင်သုံးရပ် ဖွဲ့စည်းသွားမယ်လို့ အသိပေးထားပြီး အဖွဲ့ဝင်သစ်တွေ ပါဝင်လာရေး ဆောင်ရွက်လျက်ရှိရာ စစ်ကိုင်းဖက်ဒရယ်ယူနစ်၊ မန္တလေးဒေသနဲ့ မကွေးဖက်ဒရယ်ယူနစ်တို့ကို SCEFရဲ့ ပြည်နယ်/ဖက်ဒရယ်ယူနစ်/EROs ကိုယ်စားပြုမဏ္ဍိုင် အောက်ရှိ အဖွဲ့ဝင်အသစ်များအဖြစ် အတည်ပြုနိုင်ခဲ့ပြီးဖြစ်ပါတယ်။

(ဖက်ဒရယ်ဦးဆောင်ကောင်စီ-SCEFကိုထောက်ခံကြောင်း ကိုရီးယားရောက်မြန်မာတွေ ဆန္ဒပြနေစဉ်။ ဓာတ်ပုံ - MFDMC)

■​ဆောင်းပါး

ကုလသမဂ္ဂဆိုင်ရာ မြန်မာသံရုံးကို ခံတပ်တစ်ခုလို ကာကွယ်နေတဲ့ ဦးကျော်မိုးထွန်းနဲ့ ဒီမိုကရေစီ ဘက်တော်သားများ

-People's Spring

ဝေးကွာလှတဲ့ နိုင်ငံတစ်ခုမှာ ဖြစ်ပွားနေတဲ့ စစ်ရေး ပဋိပက္ခတွေရဲ့ တင်းမာမှုဟာ နယူးယောက်မြို့လယ်ပန်းခြံကြီး(Central Park)နဲ့ ဘလောက် တစ်ဝက်စာလောက်အကွာ၊ သဲ
ကျောက်တွေနဲ့ ဆောက်လုပ်ထားရာ လူနေတိုက် တစ်လုံးအထိ ကူးစက် ရောက်ရှိနေပါတယ်။

ငါးထပ်အဆောက်အအုံရဲ့အပေါ်ဆုံး နှစ်ထပ်မှာ အာဏာသိမ်း မြန်မာစစ်တပ်ကို သစ္စာခံတဲ့ အရာရှိတွေ နေထိုင်နေပါတယ်။ အောက်က သုံးထပ်ကတော့ အာဏာသိမ်း စစ်တပ်ကို တရားဝင် အစိုးရအဖြစ် လက်မခံဘဲအာဏာ ဖီဆန် ရပ်တည်နေတဲ့ သံအရာရှိ တစ်ဦးရဲ့ ပိုင်နက်လို့ သတ်မှတ်နိုင်ပါတယ်။

အဲဒီ သံအရာရှိကြီးကတော့ ဦးကျော်မိုးထွန်းပါပဲ။သူဟာ ၂၀၂၀ ပြည့်နှစ်၊ ကိုဗစ်ကပ်ရော
ဂါဆိုးကြီးဖိစီးနေတဲ့ကာလထဲမှာ ကုလသ
မဂ္ဂဆိုင်ရာ မြန်မာအစိုးရ ကိုယ်စားလှယ် အ
နေနဲ့ နယူးယောက်ကို ရောက်လာခဲ့ပါတယ်။ လပိုင်းလောက်အကြာမှာတော့ သူကိုယ်စားပြုတဲ့ ရွေးကောက်ခံမြန်မာအစိုးရကိုစစ်တပ်ကဖယ်ရှားပြီး အာဏာသိမ်းလိုက်ပါတော့တယ်။ အဲဒီအချိန်ကစပြီး ဦးကျော်မိုးထွန်းဟာ အာဏာသိမ်း စစ်ဗိုလ်ချုပ်တွေအတွက် အလုပ်လုပ်ပေးဖို့ အစဉ်တစိုက်ဖီဆန်ပြီး ငြင်းဆိုခဲ့ပါတယ်။

သူဟာ စစ်ခေါင်းဆောင်တွေကိုအာခံရပ်တည်ရင်းကုလသမဂ္ဂမှာရှိနေတဲ့သူ့ရဲ့ရာထူးနေရာကိုရော၊သူနေထိုင်ရာနေရာကိုပါ အလျှော့မပေးစတမ်း ကာကွယ်ထားခဲ့ပါတယ်။ အဲဒီ ခိုင်မာမြဲမြံတဲ့အားထုတ်မှုကပဲ မြန်မာနိုင်ငံရဲ့ ရှည်လျားကြမ်းတမ်းတဲ့ ဒီမိုကရေစီရေး ရုန်း
ကန်မှုတွေအတွက် ပြတင်းပေါက် တံခါးတစ်ချပ် ဖြစ်နေခဲ့ပါတယ်။

တစ်ချိန်တုန်းကဦးကျော်မိုးထွန်းရဲ့လက်
အောက်ကအမှုထမ်းတွေဖြစ်ခဲ့ပြီး အခုတော့ စစ်တပ်ကို သစ္စာခံသွားတဲ့ အရာရှိတွေရော၊ ဦးကျော်မိုးထွန်းရဲ့ အဖွဲ့သားတွေကပါ သူတို့ ထိန်းသိမ်းထားတဲ့ အဆောက်အအုံ အစိတ်
အပိုင်း နေရာတွေမှာ လူမရှိဘဲ ထွက်မသွားရဲကြပါဘူး။ ပြိုင်ဘက်တွေက ဒါကို အခွင့်
ကောင်းယူပြီး သော့ပြောင်းခတ်သွားတာမျိုး လုပ်မှာကိုနှစ်ဖက်စလုံးကစိုးရိမ်နေကြပါတယ်။

“သော့ကတော့ကျွန်တော်တို့ကိုင်ထားတာပါ”
လို့ မကြာသေးခင်က စာရေးသူက ကုလ
သမဂ္ဂရဲ့ မြန်မာကိုယ်စားလှယ် ရုံးဆီ သွား
ရောက်ချိန်မှာ ဦးကျော်မိုးထွန်းက ပြောပြပါတယ်။ အပေါ်ထပ်က မလိုလားစရာ အိမ်နီး
ချင်းတွေနဲ့ပတ်သက်လို့တော့“သူတို့က ကျွန်
တော်တို့ ဘာလုပ်သလဲဆိုတာကို တောက်
လျှောက် စောင့်ကြည့်နေတာဗျ။ ဒီနေ့ ခင်ဗျားလာတဲ့ အကြောင်းကိုလည်း သူတို့ အစီရင်ခံကြလိမ့်မယ်”လို့ ဦးကျော်မိုးထွန်းက ပြောပါတယ်။

စစ်တပ်ကအာဏာသိမ်းဖယ်ရှားလိုက်တဲ့ အ
ရပ်သား အစိုးရကို ကုလသမဂ္ဂက တရားဝင် မြန်မာ အစိုးရအဖြစ် သတ်မှတ်ထားဆဲပါ။ တစ်ဖက်မှာတော့အခုသီတင်းပတ်မှာကမ္ဘာ့ခေါင်းဆောင်တွေ တက်ရောက်ကြမယ့် ကုလ
သမဂ္ဂအထွေထွေညီလာခံမတိုင်ခင် ဦးကျော်မိုးထွန်းရဲ့ နေရာကို ဖိအားပေးဖို့ မြန်မာစစ်
တပ်က ပိုပြီး အရှိန်မြှင့် ကြိုးစားလာပါတယ်။

နိုင်ငံတကာ အသိအမှတ် ပြုမှုကို အငမ်းမရ လိုချင်နေတဲ့ အာဏာသိမ်းခေါင်းဆောင် မင်းအောင်လှိုင်ဟာ အတုအယောင် တစ်ခုအဖြစ် ကျယ်ကျယ်ပြန့်ပြန့် ဝေဖန်ခံနေရတဲ့ ရွေး
ကောက်ပွဲ တစ်ခုကို အသုံးချပြီး သူ့ကိုယ်သူ သမ္မတဂုဏ်ပုဒ် ကောက်တပ်ခဲ့ပါတယ်။ အဲဒီနောက်ပိုင်းမှာ သူဟာ တရုတ် သမ္မတ ရှီကျင့်ဖျင်၊ အိန္ဒိယ ဝန်ကြီးချုပ် နာယန်ဒရာ မိုဒီနဲ့ ရုရှားသမ္မတ ဗလာဒီမာ ပူတင်တို့လို နိုင်ငံခေါင်းဆောင်တွေနဲ့ ကော်ဇောနီ လျှောက်လမ်းပေါ် အတူလျှောက်ပြတဲ့ ပုံရိပ်တွေကို ဖန်တီးယူလာနေပါတယ်။

ပြီးခဲ့တဲ့ဇူလိုင်လမှာတော့အရပ်သားအစိုးရ မျက်နှာဖုံး တပ်ထားတဲ့ အာဏာသိမ်း စစ်တပ်ဟာ ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်ဆီကို စာတစ်စောင် ပေးပို့ခဲ့ပါတယ်။ အဲဒီစာထဲမှာတော့ ဦးကျော်မိုးထွန်းဟာ ကုလသမဂ္ဂမှာ ဆက်ရှိနေခွင့်ရဖို့ ဒေါ်လာ ၂.၆ သန်းလောက်ကို မလျော်မကန် အသုံးပြုခဲ့ကြောင်း စွပ်စွဲရေးသားထားပါတယ်။ စစ်
တပ်ဟာ ဦးကျော်မိုးထွန်းကို ဝရမ်းပြေး၊ သူခိုး၊ သစ္စာဖောက်စတဲ့ အသုံးအနှုန်းတွေနဲ့လည်း အမျိုးစုံ ပုတ်ခတ်ခဲ့ဖူးပါတယ်။ ဒီလထဲမှာတော့ အဲဒီ အပုပ်ချ ဝေါဟာရတွေကို စစ်တပ်က ပိုပြီး ဖောဖောသီသီ သုံးစွဲလာသ
လို ဦးကျော်မိုးထွန်းကို ဖမ်းဆီးဖို့ နိုင်ငံတကာ အပြည်ပြည်ဆိုင်ရာ ရဲတပ်ဖွဲ့ (အင်တာပိုလ်)နဲ့ပါ ချိတ်ဆက်ထားတယ်လို့ ပြောပါတယ်။

“ဒီနှစ်မှာသူတို့ကအစွမ်းကုန် ပုံအောပြီး ကြိုး
စားလာတာဗျ”လို့ ၂၀၂၁ ကတည်းက စစ်
တပ်က အသိအမှတ် မပြုကြောင်း ကြေညာတာ ခံထားရတဲ့ ဦးကျော်မိုးထွန်းက​ပြောပါတယ်။ ၂၀၂၁ နောက်ပိုင်း စစ်တပ်ဟာ သူ့
ပတ်စ်ပို့တ်ကို ပယ်ဖျက်ခဲ့သလို ကုလသမဂ္ဂဆိုင်ရာမြန်မာသံရုံးရဲ့ဘဏ်အကောင့်ကို ထိန်း
ချုပ် ပိတ်ဆို့ဖို့အကြိမ်ကြိမ်ကြိုးစားခဲ့ကြောင်း သူက ရှင်းပြပါတယ်။

စစ်တပ်ကို ဖီဆန်ခဲ့တဲ့ သူ့ရဲ့ အမှတ်ရစရာ အ
ကောင်းဆုံး အခိုက်အတန့် တစ်ခုကတော့ ၂၀၂၁ ခုနှစ်တုန်းက ကုလသမဂ္ဂ ဌာနချုပ်ထဲမှာမိန့်ခွန်း​ပြောရင်းစစ်အာဏာသိမ်းမှုကိုဆန့်ကျင်​ကြောင်းလက်သုံး​ချောင်း​ထောင်ခဲ့တာ ဖြစ်ပါတယ်။

ပြီးခဲ့တဲ့ ဇွန်လတုန်းက လုံခြုံရေး ကောင်စီ မိန့်ခွန်းမှာ ဦးကျော်မိုးထွန်းက လုံခြုံရေး ကောင်စီဟာ မြန်မာနဲ့ ပတ်သက်ပြီး အပ်နှင်းခံထားရတဲ့တာဝန်ဝတ္တရားတွေကို ပျက်ကွက်ခဲ့တယ်လို့ ထည့်သွင်းစွပ်စွဲခဲ့ပါတယ်။ ဒါပေမဲ့အဲဒီနောက်ပိုင်းနှစ်တွေနည်းတူ ဒီလမှာကျင်း
ပမယ့် ကုလသမဂ္ဂ အထွေထွေ ညီလာခံမှာလည်းပဲ ဦးကျော်မိုးထွန်းဟာ မိန့်ခွန်းပြောခွင့် ရဖွယ် မရှိပါဘူး။

၂၀၂၁ တုန်းက ဦးကျော်မိုးထွန်းဟာ သူ့အ
သက်ကို လုပ်ကြံမယ့် အခြေအနေ တစ်ခုကို ကြုံတွေ့ခဲ့ရဖူးပါတယ်။နောက်တော့သူ့အ
တွက် လပေါင်း အတော်ကြာအောင် အမေရိကန် အစိုးရက လုံခြုံရေး စီစဉ်ပေးခဲ့ရပါတယ်။“Costco (လက္ကား စျေးဝယ်စင်တာ)
ကိုတောင် ကျွန်တော်က ကျည်ကာ ဗင်ကားနဲ့ သွားခဲ့ရတာ”လို့ သူ့ရဲ့အပတ်စဉ်လိုအပ်တဲ့ ကုန်စုံတွေ သွားဝယ်ယူရတဲ့ အကြောင်းကို ဦးကျော်မိုးထွန်းက ပြောပြပါတယ်။

သူ့မိသားစုလည်း ထိခိုက်ခံစားရတာတွေ ရှိခဲ့တာပါပဲ။

နယူးယောက်မှာရှိတဲ့ သံအမတ်ကြီး အိမ်တော်မှာ သုတ်ထားတဲ့ ဆေးတွေထဲ ခဲဓာတ်တွေ ပါဝင်နေတာကြောင့် သူတို့ မိသားစု အ
နေနဲ့ အဲဒီမှာ ဆက်မနေသင့်ဘူးလို့ ကျန်းမာ
ရေးဆိုင်ရာ တာဝန်ရှိသူတွေက အကြံပေးပါတယ်။ဒါပေမဲ့ အိမ်ကိုစစ်တပ်ကသိမ်းယူသွားမှာကို စိုးရိမ်လို့ ဒါမျိုး အဖြစ်မခံနိုင်ကြောင်း ဦးကျော်မိုးထွန်းက ရှင်းပြခဲ့ပါတယ်။ဒီဆုံး
ဖြတ်ချက်ဟာအဲဒီတုန်းကတောက်တောက်
ပြေးတတ်စအရွယ် သားငယ်လေးကို ထိခိုက်စေနိုင်ကြောင်း ကျန်းမာရေး ပညာရှင်တွေက သတိပေးခဲ့ပါတယ်။ ဒါပေမဲ့ သူတို့မိသားစုက ဆက်နေခဲ့ပါတယ်။ နောက်တော့ အမေရိကန်ရောက် မြန်မာပြည်သူတွေရဲ့ စေတနာအ
လျောက် ဝိုင်းဝန်း အကူအညီပေးမှုနဲ့အတူ အိမ်ကို ဆေးပြန်သုတ်ခဲ့ကြပါတယ်။

အခုတော့သူ့သားလေးဟာအသက် ၇ နှစ် ရှိနေပြီဖြစ်ပြီးခဲဓာတ်နဲ့ ထိတွေ့မိခဲ့တဲ့ဒဏ်ကြောင့် စကားပြောဆိုမှု အပိုင်းမှာ ဖွံ့ဖြိုးမှု နည်းနည်း နောက်ကျနေကြောင်း ဦးကျော်မိုးထွန်းက ပြောပြပါတယ်။ သူ့မှာ ဆယ်ကျော်
သက်အရွယ် သမီးတစ်ယောက်လည်း ရှိပါတယ်။

သူ့ရုံးမှာတော့ ဦးကျော်မိုးထွန်းဟာ ထောက်ခံသူတွေဆီက ပေးပို့တဲ့ လက်ဆောင်တွေ၊ ပေး
စာတွေကို၊ အခမ်းအနား ပေါင်းစုံကနေ ရရှိခဲ့တဲ့ နာမည်ကတ်တွေကို သေချာ သိမ်းဆည်းထားပါတယ်။ အဲဒါတွေက သူဟာ မြန်မာနိုင်
ငံအတွက် အမှန်တကယ် ကိုယ်စားပြုပေးနေတယ် ဆိုတာကို သူ့ကိုယ်သူ ပြန်သတိပေးနေသလိုပါပဲ။ နံရံပေါ်မှာတော့ နိုင်ငံတော် အတိုင်
ပင်ခံ ပုဂ္ဂိုလ် ဒေါ်အောင်ဆန်းစုကြည်ရဲ့ ဓာတ်
ပုံပါတဲ့ ၂၀၂၀ ပြည့်နှစ် ပြက္ခဒိန်ဟောင်း တစ်ခုကို ချိတ်ဆွဲထားဆဲ ဖြစ်ပါတယ်။

သူဟာ အဲဒီကနေတဆင့် မြန်မာနိုင်ငံမှာ ရှိနေပြီး ကမ္ဘာပေါ်က အကြမ်းတမ်းဆုံး စစ်ရေးပဋိပက္ခတွေထဲက တစ်ခုမှာ ပါဝင်ရုန်းကန် လှုပ်ရှားနေသူတွေဆီ ပုံမှန် video callတွေ ခေါ်ပြီး ဆက်သွယ် စကားပြောခဲ့ပါတယ်။ ကြမ်းတမ်းခက်ထန်လှတဲ့ ပြည်တွင်းစစ်အ
တွင်း လူပေါင်း ၁ သိန်းကျော်လောက် သေ
ဆုံးခဲ့ပြီးပြီလို့ ယုံကြည်ရသလို ၄ သန်းကျော် နေရပ်စွန့်ခွာ ထွက်ပြေးခဲ့ရပါတယ်။ အဲဒီစစ်ပွဲဟာ အရပ်သားတွေအပေါ် ရက်ရက်စက်စက် ဖြိုခွင်းမှုကို ဗျူဟာတစ်ခုအဖြစ် ကျင့်သုံးတဲ့ စစ်တပ် နဲ့ ပြည်သူကို ကာကွယ်နေတဲ့ တော်
လှန်ရေး အင်အားစုတွေကြားမှာ ဖြစ်ပွားနေပါတယ်။

“ပြည်သူတွေအတွက်ရပ်တည်ပေးမယ့် သံ
အမတ်ကြီးက သူ(ဦးကျော်မိုးထွန်း) တစ်ယောက်ပဲ ကျန်တော့တာ”လို့ ကမ္ဘောဒီးယားနိုင်ငံ၊ ဖနွမ်းပင်မြို့ မြန်မာသံရုံးကနေ တော်
လှန်ရေးဖက်ကိုကူးပြောင်းခိုလှုံခဲ့ပြီးဦးကျော်မိုးထွန်းကို ကူညီပေးနေတဲ့ ဂျွန်ဆုက ပြောပါတယ်။

ဦးကျော်မိုးထွန်းကို ထောက်ခံ အားပေးနေပြီး အရင်က ယာဉ်မောင်းတစ်ဦးအဖြစ် အလုပ်လုပ်ခဲ့ဖူးတဲ့ ဦးသောင်းလှိုင်ကတော့ သံရုံးနဲ့ သံအမတ်ကြီး နေအိမ်မှာ လိုအပ်မယ့် အသေးစား ပြင်ဆင် မွမ်းမံမှုလေးတွေကို ကူညီလုပ်
ကိုင်ပေးနေပါတယ်။

“တတ်နိုင်သလောက်တော့သူ့ကို သက်တောင့်သက်သာလေးနေခွင့်ရစေချင်တယ်။ ဒါကြောင့်လည်း ကျွန်တော်တို့ ကူညီနိုင်တာလေးတွေကို ကူပေးနေတာပေါ့”လို့ ဦးသောင်းလှိုင်က ​ပြောပြပါတယ်။

အာဏာသိမ်းမှုဖြစ်အပြီးတစ်နှစ်ကျော်လောက် ကြာတဲ့ထိ ဦးသောင်းလှိုင်ဟာသံရုံးအဆောက်အအုံ အခန်းထဲမှာ ညအချိန် စစ်
တပ် လက်ပါးစေတွေဝင်မသိမ်းပိုက်နိုင်အောင်ကင်းစောင့်ခဲ့ပါတယ်။ဒီနေ့ကာလမှာတော့ ပိုငယ်ရွယ်ပြီး ဆန္ဒအလျောက် အဆိုပြုထားတဲ့ စေတနာ့ဝန်ထမ်းတွေက အဲဒီတာဝန်ကိုအစားထိုးယူထားပါတယ်။တစ်ဦးက ဆရာ
ဝန်ဖြစ်ပြီး နောက်နှစ်ယောက်ကတော့ Uber အငှားယာဉ်မောင်းတဲ့ သူတွေပါ။

၂၀၂၁ခုနှစ်စစ်အာဏာသိမ်းမှုအပြီးဝါရှင်တန်
ဒီစီ မြို့တော်မှာရှိတဲ့ မြန်မာသံရုံး တာဝန်ခံဟာ နယူးယောက်ထိ လာရောက်ပြီး ကုလသမဂ္ဂဆိုင်ရာ မြန်မာသံရုံးကို ထိန်းချုပ်နိုင်ဖို့ ကြိုး
စားခဲ့ပါတယ်။ ဒါပေမဲ့ နယူးယောက်မှာ ရှိနေတဲ့ မြန်မာတွေက သတင်းကြားကြားချင်း အပြေးအလွှား ရောက်လာပြီး သံရုံးကို ကာကွယ်ခဲ့တာကြောင့် စစ်တပ် လက်ပါးစေတွေ မအောင်မြင်ဘဲ ဆုတ်ခွာခဲ့ရကြောင်း ဦးသောင်းလှိုင်နဲ့ တခြား တက်ကြွလှုပ်ရှားသူတွေက ဆိုပါတယ်။

သိပ်မကြာခင် ညနေခင်း တစ်ခုမှာတော့ အ
ပေါ်ထပ်က စစ်တပ်အားပေး သံအရာရှိ နှစ်ယောက်ဟာ လှေကားအတိုင်း အောက်ဆင်းသွားခဲ့ပါတယ်။ သူတို့ဟာ ဦးသောင်းလှိုင်ကို ခပ်မြန်မြန် ကျော်သွားပြီး မျက်လုံးချင်း မဆုံအောင်သတိကြီးကြီးရှောင်လွှဲသွားခဲ့ပါတယ်။

ဦးကျော်မိုးထွန်းဟာ အမြဲတမ်းတော့ တော်
လှန်ရေးစိတ်ကိန်းအောင်းနေခဲ့သူမျိုးမဟုတ်ပါဘူး။၁၉၉၀ ပြည့်လွန်နှစ်တွေတုန်းကဆိုရင် သူက တည်ငြိမ်တဲ့ အလုပ်တစ်ခုကိုပဲ မျှော်
လင့်ခဲ့တာပါ။ဒါကြောင့် မတူညီတဲ့ စစ်အစိုးရတစ်ရပ်အုပ်စိုးနေတဲ့ ကာလမှာသူဟာ နိုင်ငံ
ခြားရေး ဝန်ကြီးဌာနမှာ ဝင်အလုပ်လုပ်ခဲ့ပါတယ်။

ငယ်ရွယ်တဲ့ သံအရာရှိလေး တစ်ဦးအဖြစ်
နယူးယောက်ကို ရောက်လာတုန်းက သူဟာ အာရှသားတွေ စုဝေးနေတတ်တဲ့ အများပြည်သူ သွားလာတဲ့နေရာတွေမှာသူ့ဇနီးကိုတောင်
မြန်မာလိုမပြောခဲ့ပါဘူး။အကြောင်းကတော့ တခြားမြန်မာတွေကသူ့ကိုအာရုံစိုက်မိလာမှာကိုစိုးရိမ်လို့ပါ။ “လူတွေက ကျွန်တော်တို့ကို သိပ်သဘောမကျခဲ့ဘူးလေ”လို့ အဲဒီတုန်းက စစ်အစိုးရ လက်အောက်ခံ အမှုထမ်း ဖြစ်နေခဲ့တာကို ရည်ညွှန်းပြီး သူကဆိုပါတယ်။

မြန်မာစစ်တပ်ကရိုဟင်ဂျာမွတ်ဆလင်တွေအပေါ် လူမျိုးသုဉ်း ရှင်းလင်းမှု စွပ်စွဲချက်တွေနဲ့ ပတ်သက်ပြီး သူ့ရဲ့ခုခံကာကွယ် ပြော
ဆိုမှုတွေကလည်း ခါးသီးတဲ့ ဝေဖန်မှုတွေကို ကြုံတွေ့စေခဲ့ဖူးပါတယ်။ (အမေရိကန် အစိုးရနဲ့ ကုလသမဂ္ဂက လူမျိုးသုဉ်း သတ်ဖြတ်မှု အဆင့်မျိုးလို့ သတ်မှတ်ခဲ့တဲ့ ကိစ္စကို အဲဒီလောက် အခြေအနေမျိုး မဟုတ်ဘူးလို့ ခုခံကာကွယ်ပေးခဲ့လို့ ဒေါ်အောင်ဆန်းစုကြည် ကိုယ်တိုင်လည်း အကြီးအကျယ် ဝေဖန်ခံခဲ့ရပါတယ်)

အဲဒီတုန်းကသူ့ရဲ့ရပ်တည်ချက်နဲ့ အခုအခါမှာတော့ ဦးကျော်မိုးထွန်းကခပ်ကင်းကင်း နေချင်ပုံရပါတယ်။“ဒီကိစ္စကို ကိုင်တွယ်ဖို့ အစိုး
ရမှာ လုပ်ပိုင်ခွင့် ကန့်သတ်ချက်တွေ ရှိခဲ့တယ်လေ။ဒါပေမဲ့သူတို့ တတ်နိုင်သမျှ အကောင်းဆုံးတော့ လုပ်ခဲ့ပါတယ်”လို့ ဦးကျော်မိုးထွန်းက ဆိုပါတယ်။

လက်ရှိကာလမှာ သူ့အတွက် အကြီးဆုံး စိန်
ခေါ်မှု တစ်ခုကတော့ ဘဏ္ဍာရေးပါပဲ။ သံရုံးရဲ့ ဘဏ်အကောင့်ထဲမှာကိန်းဂဏန်းတွေက အ
တော်လေး ပွန်းပဲ့ ကျဆင်းနေပါပြီ။ အသုံး
စရိတ်တွေကိုလည်းတစ်လကိုဒေါ်လာ ၂၀,၀၀၀ထိ လျှော့ချထားတယ်လို့ ဦးကျော်မိုးထွန်းက ပြောပါတယ်။ဥပမာသူက ဥယျာဉ်မှူး တစ်ဦးကို အလုပ်ထုတ်လိုက်ရပြီး အိမ်က မြက်ခင်းကို ကိုယ်တိုင် ရိတ်နေပါတယ်။ လစာလည်း ဆက်မယူတော့ဘဲ အစ်ကိုဖြစ်သူရဲ့ ထောက်ပံ့မှုမှာပဲ မှီခိုနေထိုင်နေပါတယ်။

“တကယ်တော့ ကျွန်တော် မွဲနေပြီဗျ”လို့ သူက ရယ်ရင်းနဲ့ ပြောပါတယ်။

ယာဉ်မောင်းအတွက် အချိန်ပိုကြေး မကုန်အောင် သူက သံရုံးရဲ့ အနက်ရောင် Cadillac ကားကိုလည်းကိုယ်တိုင်မောင်းပါတယ်။

တစ်ခုသော နေ့လယ်ခင်းမှာတော့ အစည်း
အဝေး တစ်ခုမှာ သဘာပတိ တာဝန်ယူရမှာမို့ ဦးကျော်မိုးထွန်းဟာ ကုလသမဂ္ဂ ဌာနချုပ်ဆီ သွားရောက်ခဲ့ပါတယ်။သူက ပါကင်ကနေ ကားကို မောင်းထွက်ပြီး ခဏပြန်ရပ်လိုက်ပါတယ်။ “ခဏလေးနော်”လို့ တခြားကားတွေကို လှမ်းပြောရင်း သူက ပါကင်နေရာ ဦးထားဖို့အတွက်အဖြူရောင်လမ်းတားတိုင်လေး တစ်
ခုကို ပါကင်နေရာမှာ ချန်ထားခဲ့ပါတယ်။

သုံးနာရီမပြည့်ခင်သူပြန်ရောက်လာပါတယ်။ ဒါပေမဲ့ သူချန်ထားတဲ့ လမ်းတားတိုင်ကို ဖယ်ပြီး တခြားကားတစ်စီးက ပါကင်နေရာမှာ ဝင်ရပ်ထားလိုက်ပါပြီ။ ကားပါကင် နေရာကို ဆုံး
ရှုံးခဲ့ရရင်တောင် ကုလသမဂ္ဂဆိုင်ရာ မြန်မာသံရုံးကတော့ ဦးကျော်မိုးထွန်းရဲ့ အပြည့်အဝ ထိန်းချုပ်မှုအောက်မှာ ဆက်ရှိနေဆဲ ဖြစ်ပါတယ်။ ။

(New York Times၏ Holding the Fort in Manhattan to Defy Coup Leaders in Myanmar ဆောင်းပါးကို People’s Springက ဆီလျော်အောင် ဘာသာပြန်ဆိုသည်)


#ဦးကျော်မိုးထွန်း #ကုလသမဂ္ဂ
#နယူးယောက်ကမြန်မာသံရုံ
#peoplesapring #ludunwayoo