စစ်တပ်က တစ်ဦးသေ နောက်တစ်ဦးဖမ်း ရှေ့တန်းပို့မယ့် ဗျူဟာသုံးနေလို့ စစ်သည်တွေ ကိုယ့်ဘ၀ ကိုယ်ကယ်ဆယ်ကြဖို့ ပြည်သူ့ပန်းတိုင် တိုက်တွန်း

စက်တင်ဘာ၂၀၊ ၂၀၂၆။ ထားမြတ်/People’s Spring

အာဏာသိမ်းစစ်တပ်ဟာ စစ်သားတွေရဲ့ အသက်ကိုစတေးပြီး အသေခံ စစ်ဗျူဟာ အသုံးပြုနေတာဖြစ်လို့ အသုံးချခံနေရတဲ့ စစ်သည်တွေအနေနဲ့ ကိုယ့်ဘ၀ ကိုယ်ကယ်ဆယ်ကြဖို့ လိုအပ်ကြောင်း ပြည်သူ့ပန်းတိုင်က တိုက်တွန်းလိုက်ပါတယ်။

ပြည်သူ့ပန်းတိုင်က အပတ်စဉ် တင်ဆက်နေတဲ့ စစ်ကောင်စီရဲ့ "ပြေးဟပရောဂျက် ယခုတစ်ပတ်" အစီအစဉ်မှာ အခုလို တိုက်တွန်းခဲ့တာဖြစ်ပါတယ်။

စစ်တပ်ဟာ အတင်းအဓမ္မ စစ်သားစုဆောင်းထားတဲ့ ပြည်သူ့စစ်မှုထမ်း ခေါ် ပစတွေကို 'သမင်'မွေးလိုက် ရှေ့တန်းပို့ပြီး တော်လှန်ရေး'ကျား'တွေ စားခိုင်းလိုက် လုပ်နေကြောင်း ဖော်ပြထားပါတယ်။

“အခြေခံစစ်ပညာတောင် ဘာမှန်းမသိသေးတဲ့ လသားစစ်သည်တွေကို ရှေ့တန်းလွှတ်ရင် အသက်ဆုံးရှုံးမှုတွေ များနိုင်တာ ဉာဏ်ရှိသူတိုင်း သိပါတယ်။တစ်ယောက်သေရင် နောက်ထပ်တစ်ယောက် ဖမ်းပြီး ရှေ့တန်းပို့မယ့် အသေခံစစ်ဗျူဟာမှာ အသုံးချခံနေရတဲ့ စစ်သည်တွေအနေနဲ့ ကိုယ့်ဘဝကိုယ် ကယ်ဆယ်ကြဖို့ ပြည်သူ့ပန်းတိုင်က ထပ်မံတိုက်တွန်းလိုက်ပါတယ်” လို့ ပြည်သူ့ပန်းတိုင်က ထုတ်ပြန်ပါတယ်။

ပြည်သူ့ပန်းတိုင်ရဲ့ ဖော်ပြချက်အရ စက်တင်ဘာ ဒုတိယပတ်အတွင်း အလင်းဝင်ပူးပေါင်းနဲ့ လက်နက်ချ စစ်သုံ့ပန်း စုစုပေါင်း ၃၃ဦး ရှိပြီး အဲဒီထဲက ၃၀ ဦးဟာ ကချင်ပြည်နယ် ကဖြစ်တယ်လို့ အသိပေးထားပါတယ်။ မှတ်တမ်းတွေအရ ၂၀၂၅ ခုနှစ် ဇန်နဝါရီလမှ ၂၀၂၆ ခုနှစ် စက်တင်ဘာလ ဒုတိယပတ် အထိ အလင်းဝင်ပူးပေါင်းနဲ့ လက်နက်ချ၊ စစ်သုံ့ပန်း စစ်ကောင်စီတပ်ဖွဲ့ဝင် စုစုပေါင်း - ၃၉၈၂ ဦးရှိတယ်လို့ ဖော်ပြထားပါတယ်။

စစ်တပ်ဟာ ၂၀၂၁ ကနေ ၂၀၂၄ အတွင်း သူတို့ရဲ့ အမာခံတိုက်ခိုက်ရေးအင်အား အများစု ချေမှုန်းခံရပြီးနောက် ၂၀၂၄ ဖေဖော်ဝါရီကစတင်ကာ ပြည်သူ့စစ်မှုထမ်း ဥပဒေ (ခေါ်) အဓမ္မစစ်သား စုဆောင်းတဲ့ အစီအစဉ်ကို အကောင်အထည်ဖော်ခဲ့ရာ အရပ်သား လူငယ်များ အဓမ္မ စစ်သားစုဆောင်းခံခဲ့ရကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက ယခု စက်တင်ဘာလမှာ ထုတ်ပြန်ပါတယ်။ စစ်တပ်ဟာ ၂၀၂၄ကနေ ၂၀၂၆ ဩဂုတ်အထိ စစ်မှုထမ်း အပတ်စဉ်(၂၇)ခု ဖွင့်လှစ်ကာ အင်အား ၁၃၅၀၀၀ ကျော်ကို အဓမ္မ စုစည်းကာ အဲဒီ အင်အားတွေ အသုံးချ လူလှိုင်းစစ်ဆင်ရေးတွေနဲ့ နိုင်ငံအနှံ့ ထိုးစစ်ဆင် တိုက်ခိုက်နေတာဖြစ်တယ်လို့ ဆိုပါတယ်။

စစ်တပ်ရဲ့ စစ်ကြောင်းတွေမှာ ပြည်သူ့စစ်မှုထမ်း အင်အား ၈၀ ရာခိုင်နှုန်းခန့်အထိ ပါဝင်နေတာ တွေ့ရပြီး ပစ အင်အား သိန်းချီ အလောင်းအစားပြုကာ ကမူးရှုးထိုး ထိုးစစ်ဆင်နေပေမဲ့ စစ်မျက်နှာတိုင်းမှာ လိုရာမရောက်ဘဲ တော်လှန်ရေးအဖွဲ့တွေရဲ့ တိုက်ခိုက်ချေမှုန်းမှုကြောင့် ဆုံးရှုံးထိခိုက်များပြားနေကြောင်း NUG ကာကွယ်ရေးက ထုတ်ပြန်ပါတယ်။

၂နှစ်တာ ကာလအတွင်း စစ်တပ်က သေဆုံးသူ ၂သောင်းကျော်(၂၀၃၈၃ ဦး)၊ ဒဏ်ရာရသူ ၉၇၀၀ ကျော် ရှိခဲ့သလို ပြည်သူ့ရင်ခွင်ခိုလှုံသူ ၃,၈၀၀ ကျော်၊ မိမိအစီအစဥ်ဖြင့် အကြမ်းဖက်စစ်တပ်ကို စွန့်ခွာထွက်ပြေးသူ(တပ်ပြေး) နှစ်သောင်းခန့် ရှိခဲ့ကြောင်း ကာကွယ်ရေးဝန်ကြီးဌာနက ထုတ်ပြန်ပါတယ်။

စစ်တပ်ရဲ့ ထိခိုက်ဆုံးရှုံးမှုတွေအနက် အများစုဟာ အဓမ္မစစ်သားစုဆောင်းခံရသူ ပြည်သူ့စစ်မှုထမ်း(ပစ)တွေ ဖြစ်တာ တွေ့ရတယ်လို့ ဖော်ပြပါတယ်။ ဒါ့အပြင် ကာကွယ်ရေးဝန်ကြီးဌာနက ဖမ်းမိထားတဲ့ စစ်သုံ့ပန်း (၅၃၆) ဦးရှိတယ်လို့ ဆိုပါတယ်။

NUG ကာကွယ်ရေးဝန်ကြီး ဦးရည်မွန်ကလည်း မလွှဲမရှောင်သာလို့ အဓမ္မ စစ်သားစုဆောင်းခံရပါက အခြေအနေပေးတာနဲ့ စစ်အုပ်စုတပ်ကို ဘယ်လိုစွန့်ခွာရမယ်ဆိုတာ စဉ်းစားကြရန် ပြည်သူ့စစ်မှုထမ်းတပ်သားသစ်တွေကို တိုက်တွန်းပါတယ်။

" စစ်မြေပြင်ရောက်ပြီဆိုရင်တော့ သက်ညှာလို့တော့ရမှာ မဟုတ်ဘူး"လို့ ဝန်ကြီး ဦးရည်မွန်က သတိပေးပြီး ပြည်သူ့စစ်လူငယ်တွေအနေနဲ့ ဒါကို ကောင်းကောင်းသိမယ်လို့ ယူဆတာကြောင့် စစ်တပ်ကို စွန့်ခွာဖို့ တိုက်တွန်းပါတယ်။


(စက်တင်ဘာလဆန်းက ကချင်ဒေသတိုက်ပွဲမှာ ဖမ်းဆီးခံရတဲ့ စစ်ကောင်စီ တပ်ဖွဲ့ဝင်တွေကို ဗန်းမော်မြို့နယ် စင်းခန်းတံတားအောက်မှာ တွေ့ရစဉ်။ ဓာတ်ပုံ - Screengrab)

ဗန် နဲ့ ပန်တိုဂျာပွဲ UFC 331ရဲ့အ​ကောင်းဆုံးပွဲ​​ဟု​ရွှေးချယ်

■အပိုဆု​ကြေး​ဒေါ်လာ တစ်သိန်းစီဆွတ်ခူး

စက်တင်ဘာ-၂၀၊၂၀၂၆။​နေ့သစ်/People's
Spring

ဗန် နဲ့ ပန်တိုဂျာ တို့ရဲ့ ငါးချီပြည့် အကြိတ်
အနယ်ထိုးသတ်ခဲ့တဲ့မ​ကျေပွဲဟာ UFC 331 ရဲ့ အ​ကောင်းဆုံးပွဲ (Fight of the Night) အဖြစ် ​ရွေးချယ်ခံရပြီး ကစားသမားတဦးစီ အပိုဆု​ကြေး ​ဒေါ်လာ တစ်သိန်းစီ ဆွတ်ခူးသွားတယ်လို့ UFC က​ကြေညာပါတယ် ။

အသက် ၂၄ နှစ်အရွယ်လက်ရှိ ချန်ပီယံ ဗန်က အသက် ၃၆ နှစ်အရွယ် ချန်ပီယံ​ဟောင်း ပန်တိုဂျာရဲ့ ဦး​ခေါင်းပိုင်းထိ​အောင် လက်သီးချက် ၁၄၀ တိုင်ထိုးနိုင်ခဲ့ပါတယ် ။ပန်တိုဂျာက​တော့ ဦး​ခေါင်းပိုင်းထိုးချက် ၉၉ ချက်ပဲရခဲ့ပါတယ် ။ ခြုပ်ကွက်နဲ့ အနိုင်ရဖို့ ကြိုးစားတဲ့ ပန်တိုဂျာကို ဗန်က အ​ကောင်းဆုံးခုခံပြီး​ဘောက်ဆင်စွမ်းရည်ဘယ်​လောက်ထက်မြတ်တယ်ဆိုတာပြသနိုင်ခဲ့တဲ့ပွဲလို့ သိုင်း​ပေါင်းစုံပြိုင်ပွဲအားကစားကျွမ်းကျင်သူ​တွေကသုံးသပ်ပါတယ်။

ဒိုင်လူကြီး သုံးဦးက ဗန်ကို ၅၀ မှတ်-၄၅ မှတ်၊ ၄၉ မှတ်- ၄၆ မှတ်၊ ၄၈ မှတ်- ၄၇ မှတ်နဲ့အနိုင်​ပေးခဲ့တာပါ ။

ပွဲအပြီးမှာဗန်က ပထမပွဲတုန်းကကံ​ကောင်းလို့အနိုင်ရခဲ့တာလို့ ​ဝေဖန်မှု​တွေကိုသက်​သေပြနိုင်ခဲ့ပြီလို့​ပြောပါတယ် ။

"ပထမပွဲတုန်းက​တော့ ကျွန်​တော်မ​တော်တဆအနိုင်ရခဲ့တာလို့ လူ​တော်​တော်များများ​ပြောကြတယ် ။အခု​​ရော သံသယဝင်ကြပါဦး" လို့​ပြောခဲ့ပါတယ် ။

ပန်တိုဂျာကိုလည်း ​လေးစားအသိအမှတ်ပြု
တယ်လိုဗန်က​ပြောခဲ့ပါတယ် ။"သူ့အပေါ် ကျွန်တော့်ဘက်က လေးစားမှုကလွဲပြီး ဘာမှမရှိပါဘူး”လို့​ပြောတာပါ ။

ဒီနိုင်ပွဲ​ကြောင့် ဗန်ဟာ UFC ပြိုင်ပွဲမှာ ၁၂ ပွဲကစား ၁၁ ပွဲနိုင် ၁ ပွဲရှုံးမှတ်တမ်းရရှိထားပြီး ပန်တိုဂျာက ၁၉ ပွဲယှဥ်ပြိုင်ထားပြီး ၁၄ ပွဲနိုင်
၅ ပွဲရှုံးမှတ်တမ်းရရှိထားပါတယ်။



#ဗန် #ပန်တိုဂျာ #UFC331
#fightofthenight
#peoplesspring #ludunwayoo

ရွှေကူမှာ နယ်မြေဆုံးရှုံးမှုများလာတဲ့ စစ်တပ်က ရွာတွေကို လေကြောင်းတိုက်ခိုက်နေဟု KIA ပြော

စက်တင်ဘာ ၂၀၊ ၂၀၂၆။ ထားမြတ်/People’s Spring

ကချင်ပြည်နယ်မှာ ကချင်လွတ်လပ်ရေးတပ်မတော်(KIA) ပူးပေါင်းတပ် တိုက်ခိုက်သိမ်းပိုက်ထားတဲ့ နယ်မြေ များလာပြီး စစ်တပ် ဆုံးရှုံးမှုများလာလို့ အများပြည်သူ ကျေးရွာတွေကို ဗုံးကြဲတိုက်ခိုက်မှု ဆက်တိုက် ပြုလုပ်နေကြောင်း KIA သတင်းပြန်ကြားရေးဌာနက ဖော်ပြပါတယ်။

စက်တင်ဘာ ၁၉ရက်ည KIA ပြန်ကြားရေးဌာနရဲ့ ဖော်ပြချက်မှာ ရွှေကူမြို့မှာ တိုက်ပွဲတွေ ဆက်တိုက်ဖြစ်နေသလို စစ်တပ်ရဲ့ လေကြောင်းတိုက်ခိုက်မှုကြောင့် အရပ်သားအချို့ သေဆုံးထိခိုက်မှု ရှိခဲ့တဲ့ အခြေအနေကို ဖော်ပြပြီး အထက်ပါအတိုင်း အသိပေးထားတာပါ။

KIA တပ်မဟာ(၁၁)၊ တပ်ရင်း(၁၂) နယ်မြေ ရွှေကူမြို့နယ်မှာ စက်တင်ဘာ ၁၇ရက်က ပြည်သူနေထိုင်ရာ ကျေးရွာတွေကို စစ်တပ်က လေကြောင်းဗုံးကြဲခဲ့ရာ အရပ်သား ၂ဦးသေဆုံးကာ ၃ဦး ဒဏ်ရာရခဲ့ကြောင်း အသိပေးပါတယ်။

စက်တင်ဘာ ၁၈ရက် ညပိုင်းကလည်း ရွှေကူမြို့နယ် မြို့ကုန်းရွာကို စစ်တပ်က လေယာဉ်ဗုံးကြဲခဲ့ရာ ပြည်သူ ၃ဦးသေဆုံးပြီး ၉ဦး ဒဏ်ရာရခဲ့ကြောင်း ဖော်ပြပါတယ်။

ထိခိုက်ဒဏ်ရာရသူတွေကို KIA ပူးပေါင်းတပ်က ဆေးကုသပေးနေတယ်လို့လည်း အသိပေးပါတယ်။
စစ်တပ်ရဲ့ လေကြောင်း တိုက်ခိုက်မှုတွေကြောင့် ပြည်သူ့နေအိမ်အချို့ ထိခိုက်ပျက်စီးခဲ့ရကြောင်းလည်း ဖော်ပြပါတယ်။

စစ်တပ်ဟာ ကချင်ပြည်နယ် ဗန်းမော်ကို ရေကြောင်းက စစ်အင်အားဖြည့်ဖို့ ကြိုးပမ်းလာလို့ ဩဂုတ်လကုန်ပိုင်းနဲ့ စက်တင်ဘာလအတွင်းမှာ ရွှေကူ-ဗန်းမော်ကြားမှာ မြေပြင်တိုက်ပွဲတွေအပြင် ရေကြောင်း တိုက်ပွဲတွေပါ ဖြစ်ပွားခဲ့တာပါ။

ဗန်းမော်မြို့ကို စစ်အင်အားဖြည့်ဖို့ လာတဲ့ စစ်သင်္ဘောတွေ အဆန်၊ အစုန်သင်္ဘောတွေကို KIAက ကြားဖြတ်တိုက်ခိုက်ခဲ့ရာ စစ်တပ်အထိနာခဲ့ပါတယ်။ ပြီးခဲ့တဲ့ သုံးပတ်တာအတွင်း KIA ပူးပေါင်းတပ်ရဲ့ တိုက်ခိုက်မှုတွေကြောင့် စစ်ကောင်စီသင်္ဘော အစီး ၂၀ ခန့် ထိခိုက်နစ်မြုပ် မီးလောင်ပျက်စီးမှုတွေရှိခဲ့ကြောင်း KIA က အသိပေးထားပါတယ်။


(စစ်သင်္ဘောက ပစ်ခတ်လို့ ဧရာဝတီမြစ်ဘေးက ကျေးရွာ မီးလောင်နေတာကို စက်တင်ဘာလဆန်းပိုင်းက တွေ့ရစဉ်။ ဓာတ်ပုံ - Lung Jung LA N)

တောင်သာမှာ ရေကြီးလို့ သီးနှံတွေ ပျက်စီး

စက်တင်ဘာ၂၀၊ ၂၀၂၆။ ဟာနာဆန်/People's Spring

မန္ဆလေးတိုင်း၊ မြင်းခြံခရိုင်၊ တောင်သာမြို့နယ်၊ ဆီမီးကန်ကျေးရွာအုပ်စုမှာ ချောင်းရေကြီးလို့ ကျေးရွာထဲ ရေဝင်ပြီး သီးနှံတွေ ရေမြုပ်ပျက်စီးခဲ့ပါတယ်။

တောင်သာမြို့နယ်၊ ဆီမီးကန်ကျေးရွာမှာ စက်တင်ဘာ ၁၉ ရက် မနက် ၃ နာရီကျော်ကတည်းက ရွာသွန်းခဲ့တဲ့မိုးကြောင့် ဆီမီးကန်ချောင်းရေလျှံပြီး ဆီမီးကန်ကျေးရွာအုပ်စုက ကျေးရွာတွေ နေအိမ်​တွေအထိ ရေတွေဝင်လာလို့ အမြန်ရွေ့ပြောင်းခဲ့ရကြောင်း ဒေသခံ​တွေက ပြောပါတယ်။

"အနှစ်လေးဆယ်ကျော်နေလာတာ တခါမှ ချောင်းရေမလာဖူးပါဘူး"လို့ ဒေသခံတစ်ဦးက ပြောပါတယ်။

အမြန်မရွှေ့လိုက်နိုင်တဲ့ နေအိမ်တွေကတော့ ပစ္စည်းတွေ ရေထဲမျောပါဆုံးရှုံးသွားကြောင်း သိရပါတယ်။
ရေကြီးမှုကြောင့် ဆီမီးကန်ကျေးရွာအုပ်စုက ပဲခင်းတွေအပါအဝင် စိုက်ပျိုးထားတဲ့သီးနှံခင်းအများအပြား ရေမြုပ်ပျက်စီးခဲ့ကြောင်း ဒေသခံတွေက ပြောပါတယ်။

စစ်တပ်ထိန်းချုပ်ထားတဲ့ မိုးလေဝသနဲ့ ဇလဗေဒညွှန်ကြားမှုဦးစီးဌာနကတော့ နောက် ၂ ရက်အတွက်ခန့်မှန်းချက်ထုတ်ပြန်ထားရာမှာ ရန်ကုန်တိုင်း၊မန္တလေးတိုင်း၊ ပဲခူးတိုင်း၊ မကွေးတိုင်း၊ ဧရာဝတီတိုင်း၊ တနင်္သာရီတိုင်း၊ကရင်ပြည်နယ်၊ မွန်ပြည်နယ်နဲ့ ရခိုင်ပြည်နယ်တွေမှာ နေရာကွက်ပြီး မိုးကြီးနိုင်တယ်လို့ သိရပါတယ်။

ပြီးခဲ့တဲ့ သြဂုတ်အတွင်းက စစ်ကိုင်း၊မန္တလေး၊ မကွေး၊ ဧရာဝတီတိုင်းနဲ့ ကရင်ပြည်နယ်တို့ရှိ မြို့နယ်ပေါင်း ၂၅ မြို့နယ်မှာ ရေကြီးရေလျှံမှုတွေ ဖြစ်ပွားခဲ့ပါတယ်။ ရေဘေးကြောင့် စုစုပေါင်း လူဦးရေ ၆၁၉,၇၆၈ ဦးခန့် ထိခိုက်ခံစာခဲ့ရပြီး သေဆုံးသူ ၃၂ ဦးနဲ့ပျောက်ဆုံးသူ ၂ ဦး ရှိခဲ့ကြောင်း အမျိုးသားညီညွတ်ရေးအစိုးရရဲ့ လူမှုရေးရာ၊ အလုပ်သမားနဲ့ လူသားချင်းစာနာထောက်ထားရေး ဝန်ကြီးဌာနက သြဂုတ် ၂၁ရက်က ထုတ်ပြန်ခဲ့ပါတယ်။


(ရေကြီးနေ၍ နေအိမ်များမှ ပစ္စည်းများအား ရွှေ့ပြောင်းနေသော ပြည်သူများအား တွေ့ရစဥ် ဓါတ်ပုံံ-ScreenGrab)

■အ​တွေးအမြင်

ကျေးဇူးပါ မအေးအေးခိုင်

ဝဇီရာ/People's Spring

ပြီးခဲ့တဲ့တပတ်က လူမှုကွန်ရက်စာမျက်နှာမှာ အမေရိကန်နိုင်ငံ၊ San Francisco Bay Area မှာ ကျင်းပခဲ့တဲ့ "အဝေးရောက် နတ်မင်းများ ဂီတနှင့်သရော်ပြဇာတ် အထူးဖျော်ဖြေပွဲ"
အကြောင်း သတင်းတွေ မြင်ခဲ့ရတယ်။

အဝေးရောက် အနုပညာရှင်တွေဟာ ကျွန်​တော်တို့နိုင်ငံအတွက်ကျရာကဏ္ဍကနေ ဆက်
လက်တာဝန်ယူပေးနေကြတာ မကြာခဏ မြင်တွေ့ရလို့ ကျေနပ်မိပါတယ်။ အဲဒီပွဲမှာ ထပ်ပြီး ကျေနပ်စရာတစ်ခု ထပ်တွေ့ရပါတယ်။ အဲဒါကတော့ ဇာတ်ပို့အနုပညာရှင်
မအေးအေးခိုင်တစ်ယောက် ပြည်တော်ဝင်သီချင်းမှာ ကပြဖျော်ဖြေခဲ့တာပါ။

မအေးအေးခိုင်ဟာ မောင်နှမသုံးယောက်ရှိတဲ့အနက်အငယ်ဆုံးပါ။မအေးအေးခိုင်ရဲ့ခင်ပွန်း ဟာ သားလေး (၆) နှစ်သား အရွယ်မှာက
တည်းက ဆုံးပါးသွားခဲ့တာပါ။ မအေးအေးခိုင်ရဲ့ အကိုတွေအမတွေကလည်း ပြည့်စုံကြတယ်။ ဒါပေမယ့် မအေးအေးခိုင် ပေါ့ပေါ့လေး မနေခဲ့ပါဘူး။

မြန်မာ့ရုပ်ရှင်လောကမှာ ဇာတ်ပို့သရုပ်ဆောင်တွေထဲ ကားရိုက်များသူတွေထဲ ပါဝင်တဲ့ မအေးအေးခိုင်ဟာ ငွေကိုကြိုးစားရှာ၊ ချွေတာစုပြီး သားလေး ကျောင်းစရိတ် ရှာဖွေခဲ့တယ်လို့ သိရတယ်။ အကိုအမတွေရဲ့ စောင့်ရှောက်မှု၊ သူ့ရဲ့ကြိုးစားအားထုတ်မှုတွေနဲ့ သားလေးကို အမေရိကန်ပြည်​ထောင်စုမှာ ကျောင်းထားခဲ့တယ်။

အနုပညာလုပ်ငန်းတွေပါ ရပ်ဆိုင်းခဲ့ရတဲ့ ကို
ဗစ်ကာလမှာ မအေးအေးခိုင်ဟာ လက်ဖက်လည်းရောင်းခဲ့တယ်။ အာလူးကြော်လည်း ရောင်းခဲ့တယ်။ ဆန်လည်းရောင်းခဲ့တာပဲ။ သူက စျေးရောင်းတာကို ဝါသနာပါခဲ့တာ။

ဒီကာလအတွင်း မအေးအေးခိုင် ပျောက်​နေခဲ့တာ ကြာပါပြီ။ မအေးအေးခိုင်ဟာ ဒီကာလအတွင်းမှာပဲ အမေရိကန်မှာ ကျောင်းတက်နေတဲ့ သူ့သားလေးဆီ သွားရောက်နေထိုင်ခဲ့တာလို့ သိရတယ်။ ပြန်ပေါ်လာတဲ့အချိန်မှာတော့ မအေးအေးခိုင်ဟာ ပရိသတ်တွေကို Surprise အကြီးကြီး တိုက်သွားခဲ့တာပါ။

အမေရိကန်မှာ ပြုလုပ်ခဲ့တဲ့ ဖျော်ဖြေပွဲမှာ မအေးအေးခိုင်ဟာ သဇင်ပန်းတွေဝေနေအောင်ပန်ပြီး အနီရဲရဲမင်းသမီးဝတ်စုံလေးနဲ့ ပြည်တော်ဝင်သီချင်းမှာ ကပြခဲ့ပါတယ်။ အမကပြနေတာလေး ကြည့်ရင်း မျက်ရည်ဝဲခဲ့ရပါတယ်။ ကြည်နူးလိုက်တာ။ ကျေနပ်လိုက်တာ။ ကျေးဇူးတင်လိုက်တာ။

တကယ်ဆို မိသားစုဝင်တွေကလည်း အဆင်
ပြေကြတဲ့သူတွေ။ လွတ်ရာကျွတ်ရာနေရာမှာ မအေးအေးခိုင်တစ်ယောက် အေးအေးဆေး
ဆေး နေမယ်ဆို နေခွင့်ရတဲ့အနေအထားပါ။ ဘယ်သူကမှလည်း ဘာမှပြောမှာမဟုတ်ပါဘူး။ ဒါပေမယ့် မအေးအေးခိုင် မနေခဲ့ပါဘူး။ ပြည်သူတွေဟာ သူတို့ချစ်ခဲ့အားပေးခဲ့ရတဲ့
မအေးအေးခိုင်ကို ခုလိုပြည်သူ​တွေနဲ့အတူရပ်တည်​ပေးခဲ့တာကို မြင်တွေ့လိုက်ရတာကို အံ့သြကြတယ်။ ဝမ်းမြောက်ဝမ်းသာဖြစ်ကြတယ်။ နောက်ပြီး ကျေးဇူးတွေပါ တင်ခဲ့ကြပါတယ်။

မအေးအေးခိုင်ရေ။ ဒီကာလဟာ ပြည်သူတွေကိုအကြမ်းဖက် ဖိနှိပ် ရက်စက်နေတဲ့ စစ်တပ်ကို ပူးပေါင်းနေကြတဲ့၊ ပြည်သူတွေ ဒုက္ခတွေရောက်နေချိန် ပြည်သူ့မျက်နှာ တစက်လေးမှ မထောက်ကြတဲ့ ရုပ်ရှင်၊ ဂီတ၊ သဘင် အနုပညာရှင်​တွေကြောင့် ကျွန်​တော်တို့ ပြည်သူ​တွေအတော်လေးအသည်းကွဲခဲ့ရတဲ့ကာလကြီးပါ။ ပြည်သူတွေအားပေးခဲ့လို့ တောက်ကြွားခဲ့ရတဲ့ အနုပညာရှင်တွေဟာ မိုးထဲရေထဲလည်းရောက်ရော ပြည်သူ့မျက်နှာကိုမကြည့်တော့ဘဲ စစ်တပ်ဘက်ကနေ ပြည်သူကို စော်
ကားနေကြတာများ ရက်ရက်စက်စက်ပါ။

မအေးအေးခိုင်တို့လို ပြည်သူ့မျက်နှာ ကြည့်ပေးကြတဲ့ ရုပ်ရှင်၊ ဂီတ၊ သဘင်၊ စာပေ အနုပညာရှင်တွေရှိနေသေးတာ ကျနော်တို့ ဝမ်းမြောက်ဂုဏ်ယူပြီး အားတက်ရပါတယ်။

မအေးအေးခိုင်ရေ။ မအေးအေးခိုင်ရဲ့ အနု
ပညာသက်တမ်း နှစ်ပေါင်း သုံးဆယ်ကျော်မှာပေါ့။နှစ်သုံးဆယ်ကျော်ကာလအတွင်း မအေး
အေးခိုင် ဇာတ်ပို့ပေးခဲ့တဲ့ ဇာတ်ကားပေါင်း ထောင်ချီ ရှိမှာပါ။ မင်းသမီး သူငယ်ချင်းအခန်း၊ အိမ်အကူခန်း၊ အဒေါ်အခန်း၊ အမအခန်း အမျိုးစုံံပေါ့။ မအေးအေးခိုင် ဇာတ်ပို့ပေးခဲ့လို့ ဇာတ်ကားတွေ ပိုပြီး ဇာတ်ရှိန်တက်သွားစေခဲ့မှာ အမှန်ပါ။

အခုလည်း မအေးအေးခိုင်ဟာ ကျရာနေရာကနေ ဇာတ်ပို့ပေးခဲ့တာပါ။ ဒါပေမယ့် ဒီတခါ ဇာတ်ပို့ပေးလိုက်တာက သာမန်ရုပ်ရှင်ဇာတ်
ကားတစ်ကား မဟုတ်ပါဘူး။ မအေးအေးခိုင်ရဲ့သားလေးတွေလို လူငယ်ပေါင်းမြောက်များစွာရဲ့အနာဂတ်အတွက်ကြီးစွာသောအပြောင်း
အလဲတွေ ကြုံရမယ့် ခေတ်တခေတ်ကိုရောက်ဖို့ အကောင်းဆုံး ဇာတ်ပို့ပေးခဲ့လိုက်နိုင်တာပါ။

ကျေးဇူးများစွာ တင်ရပါတယ် အမရေ။ အမကခဲ့တဲ့သီချင်းလေးထဲလိုပဲ အခါတော်ရောက်ချိန်လည်း နီးလာပြီမို့ အတူတူ ပျော်ပျော်ပါးပါး ပြည်တော်ဝင်ကြရအောင်နော်။ ။

ဓါတ်ပုံ - Za Zayanda Zyd

#မအေးအေးခိုင် #ဇာတ်ပို့
#အဝေးရောက်နတ်မင်းများဂီတနှင့်သရော်ပြဇာတ်အထူးဖျော်ဖြေပွဲ
#peoplesspring #ludunwayoo