ကချင်နဲ့ ရခိုင်မှာ စစ်ဦးကျိုးပြီး​နောက်စစ်တပ်အင်္ဂါစဉ်အဆင့်(၃)နေရာလှုပ်ခတ်လာ

■ကြည်း၊ ရေ၊လေညှိကွပ်ဗိုလ်ချုပ်ကြီးကိုကိုဦးကို ပြည်ထဲရေးဝန်ကြီးအဖြစ်ပူးတွဲခန့်အပ်

■အရပ်ဘက်ပါ ကန်ထုတ်ခံလိုက်ရပြီးအရပ်ဘက်ရောစစ်ဘက်ပါမင်း​အောင်လှိုင်ကလုပ်ချင်သလိုလုပ်​နေပြီး မ​​​ကျေလည်မှုများ​နေပြီဟုစစ်​ရေးအကဲခတ်အချို့သုံးသပ်

စက်တင်ဘာ-၁၇၊၂၀၂၆။ယောနသံ/People's Spring

ကချင်နဲ့ရခိုင်ပြည်နယ်ကို ကြည်းရေလေစစ်ဆင်ရေးနဲ့ ထိုးစစ်ဆင်​ပေမယ့် ဧရာဝတီမြစ်​ကြောင်းတိုက်ပွဲမှာစစ်ရှုံးခဲ့ပြီး​နောက်အာဏာ
သိမ်းခေါင်းဆောင်မင်းအောင်လှိုင်က ကြည်း၊ ရေ၊ လေ ညှိနှိုင်းကွပ်ကဲရေးမှူးဗိုလ်ချုပ်
ကြီးကိုကိုဦး ကိုပြည်ထဲရေးဝန်ကြီးအဖြစ် အရပ်ဖက်ရာထူးပူးတွဲခန့်အပ်လိုက်ပါတယ်။

ပြည်ထဲရေးဝန်ကြီးဒုတိယဗိုလ်ချုပ်ကြီးညွန့်ဝင်းဆွေကို စစ်ဘက်မူလတာဝန်တွေပြန်ထမ်းဆောင်ဖို့နဲ့ ဗိုလ်ချုပ်ကြီး ကိုကိုဦးကို ပြည်ထဲ
ရေးဝန်ကြီး အဖြစ်ခန့်အပ်လိုက်တယ်လို့ စက်
တင်ဘာလ၁၇ရက်နေ့ညမှာ စစ်အုပ်စုကကြေညာတာဖြစ်ပါတယ်။

ဗိုလ်ချုပ်ကြီး ကိုကိုဦးကို ပြည်ထဲရေးဝန်ကြီး အဖြစ်ခန့်အပ်လိုက်တာက စစ်ဘက်တာဝန်တွေကို လျှော့ချလိုတာလို့ နေပြည်တော်စစ်ရေးသတင်းရင်းမြစ်က သုံးသပ်ပါတယ်။

"ဒုဗိုလ်ချုပ်ကြီးညွန့်ဝင်းဆွေကိုစစ်ဘက်ကို ပြန်ပို့တာက မထူးခြားဘူး။ ဗိုလ်ချုပ်ကြီး ကိုကိုဦးကိစ္စကတော့ထူးခြားတယ်။အရပ်ဘက်တာဝန်တွေပိုယူခိုင်းပြီး စစ်ဖက်တာဝန်တွေကိုလျှော့ချလိုက်တာ။ ဘာကြောင့်လဲဆိုတော့ အခုကချင် နဲ့ ရခိုင်မှာ စစ်ရှုံးနေတာကို ထိပ်ပိုင်းမှာ အစာမကျေကြဘူးဖြစ်နေပြီ အချင်းချင်းလည်း ငြိနေကြပုံရတယ်"လို့
​နေပြည်​တော်ကစစ်​ရေးရင်းမြစ်ကသုံးသပ်ပါတယ်။

လက်ရှိမှာ စစ်တပ်ထိပ်ပိုင်းတာဝန်ရှိသူတွေဖြစ်တဲ့ တပ်ချုပ် ဗိုလ်ချုပ်ကြီးရဲဝင်းဦး၊ ဒုတပ်ချုပ် ဗိုလ်ချုပ်ကြီး ကျော်စွာလင်း၊ ကွပ်ကဲရေးမှူး(ကြည်း၊ ရေ၊ လေ)ဗိုလ်ချုပ်ကြီးကိုကိုဦးတို့ဟာ ဆက်ဆံရေးမပြေလည်ကြဘဲ စစ်ဦးကျိုး​နေတဲ့စစ်ဆင်ရေးတွေမှာ တစ်ဖက်နဲ့တစ်ဖက် အပြစ်ဖို့နေကြတယ်လို့ စစ်တပ်အသိုင်းအဝိုင်းမှာသုံးသပ်မှုတွေရှိနေပါတယ်။

သြဂုတ်လကုန်ပိုင်းနဲ့စက်တင်ဘာလမှာကချင်
ပြည်နယ်၊ဗန်းမော်မြို့ကို စစ်ကူနဲ့ လက်နက်ခဲယမ်းရိက္ခာ​တွေပိုဖို့စစ်သင်္ဘောတွေကို မန္တ​လေးမြို့ ​ဂေါဝိန်ဆိပ်ကမ်းက​နေ ​လေ​ကြောင်းပစ်ကူ ၊ကြည်း​ကြောင်းစစ်ကူ​တွေနဲ့​စေလွှတ်ခဲ့​ပေမယ့် ကချင်လွတ်လပ်ရေးတပ်မတော်
( KIA)နဲ့ မဟာမိတ်တွေပိတ်ဆို့တိုက်ခိုက်မှု​ကြောင့် စစ်တပ်ရဲ့သင်္ဘော အစီး ၂၀ ​ကျော်ဖျက်ဆီးခံရပြီးစစ်သားရာချီ​သေဆုံးကာ စစ်သားအများအပြားအလံဖြူ​ထောင်လက်
နက်ချပြီး စစ်တပ်စစ်ရှုံးခဲ့ပါတယ်။

စက်တင်ဘာလဆန်းကတည်းကတိုက်ပွဲတွေအပြင်းအထန်ဖြစ်ခဲ့ပြီး စစ်အုပ်စုရဲ့ သင်္ဘောအစီး‌ ရေ၂ဝ ​ကျော်ကို ဖျက်ဆီးနိုင်ခဲ့တယ်လို့ KIAက စက်တင်ဘာလ၁၆ရက်နေ့ညမှာ သတင်းထုတ်ပြန်ထားပါတယ်။ ဧရာဝတီမြစ်ထဲမှာ နောက်ထပ် စစ်ရေယာဉ်တွေ ရှိနေပြီး KIA၊KPDF ပူးပေါင်းတပ်တွေက ဆက်လက်တိုက်ခိုက်နေဆဲဖြစ်ပါတယ်။နောက်ထပ်စစ်တပ်ရဲ့သင်္ဘောတွေဖျက်ဆီးခံရတယ်လို့လည်းသတင်းတွေထွက်ပေါ်နေပါတယ်။ သင်္ဘောတွေ ဖျက်ဆီးခံရတဲ့အပြင် အရာရှိတွေအပါအဝင် စစ်ကောင်စီတပ်ဖွဲ့ဝင်အများအပြားသေဆုံးသလို စစ်သုံ့ပန်း ရာချီပြီး KIA၊KPDFထံ လက်နက်ချ အလင်းဝင်ခဲ့တယ်လို့ ကချင်သတင်းရင်းမြစ်က ပြောပါတယ်။

မြို့သိမ်းတိုက်ပွဲဆင်နွှဲခံ​နေရတဲ့ ဗန်းမော်က စစ်တပ်ရင်းတွေကို ပြင်ဆင်ဖို့ သင်္ဘောတွေနဲ့ သယ်သွားတဲ့ ဒေါ်လာသန်းချီတန်ကြေးရှိတဲ့ ဆောက်လုပ်ရေးပစ္စည်းတွေနဲ့ အမြှောက်အပါအဝင်လက်နက်ခဲယမ်း‌အများအပြားလည်း ဆုံးရှုံးခဲ့တယ်လို့ စုံစမ်းသိရပါတယ်။​မြေပြင်စစ်ကူစစ်​ကြောင်း​တွေလည်း စစ်​ကြောင်းပျက်တယ်အထိ တိုက်ခိုက်ခံရတယ်။ အခုလို ရုပ်ပျက်ဆင်းပျက်အထိနာနေတာက စစ်ရေးဗျူဟာ ညံ့ဖျင်းလို့ဖြစ်တာလို့ စစ်တပ်အသိုင်းအဝိုင်းကအပြင်းအထန်ဝေဖန်နေကြပါတယ်။

ရခိုင်ပြည်နယ်မှာ စစ်အုပ်စုအထိနာနေပါတယ်။ ပြီးခဲ့တဲ့ စက်တင်ဘာလ ၄ ရက်နေ့ကစပြီးရခိုင်ပြည်နယ် စစ်‌တွေနဲ့ ကျောက်ဖြူမြို့နယ်အတွင်းထဲက AA ထိန်းချုပ်နယ်မြေတွေအပြင် ပုဏ္ဏားကျွန်းမြို့နယ်နဲ့ မကွေးတိုင်း၊ပဲခူးတိုင်း၊ ဧရာ၀တီတိုင်းနယ်စပ်တွေကို ၄၉၂၆ စစ်ဆင်ရေးလို့ ကြွေးကြော်ပြီး စစ်တပ်က ထိုးစစ်ဆင်ပါတယ်။ အဲဒီတိုက်ပွဲတွေမှာလည်းအာရက္ခတပ်​တော်ရဲ့ဖြတ်​တောက်ပိတ်ဆို့တိုက်လိုက်မှု​ကြောင့် နှစ်ပါတ်ကြာတဲ့တိုင် စခန်းတစ်ခုမှမသိမ်းနိုင်ဘဲစစ်တပ်စစ်​ကြောင်းအချို့ ​သေဆုံး ဒဏ်ရာရသူများပြီး ​နောက်ပြန်ဆုတ်​ပြေးရသလို ၊စစ်တပ်စခန်း​တွေ ပါမသွားဖို့ ခံစစ်နဲ့ ပြန်ခုခံ​နေတဲ့ အ​ခြေအ​နေ​​ရောက်​နေတယ်လို့ ​​မြေပြင်စစ်​​ရေးသတင်းရင်းမြစ်​တွေက​ပြောပါတယ်။
ရခိုင်ပြည်နယ်တန်ပြန်ထိုးစစ်ဟာ ​သေဆုံးဒဏ်ရာရသူ၊ထွက်​ပြေးသူ ၊အလင်းဝင်သွားသူများပြီး စစ်ဦးကျိုးသွားတဲ့အ​ခြေအ​နေမို့စစ်တပ်ထိပ်ပိုင်းခေါင်းဆောင်တွေကြား အချင်းချင်းသဘောထားကွဲလွဲနေကြတယ်
လို့ နေပြည်‌တော် သတင်းရင်းမြစ်ကပြောပါတယ်။

စစ်​ရေးအကဲခတ်အချို့က​တော့ ဗိုလ်ချုပ်ကြီးကိုကိုဦးဟာ အရပ်ဖက်ကို ရည်ရွယ်
ချက်ရှိရှိရွှေ့ပြောင်းခံရတာဖြစ်ပြီး တစ်ချိန်ချိန်မှာတပ်မတော်ကာကွယ်ရေးဦးစီးချုပ်ဖြစ်နိုင်တယ်ဆိုတဲ့အိပ်မက်လည်း ပျက်ပြယ်သွားပြီလို့ သုံးသပ်ပြောကြားပါတယ်။

စစ်​ရေးအကဲခတ်တစ်ဦးက​လည်း "အင်္ဂါစဉ်အရ ညှိကွပ်က နောက်ရောက်ရုံတင်မကပဲ အရပ်ဘက်ပါ ကန်ထုတ်ခံလိုက်ရပြီ။အရပ်ဘက်ရော စစ်ဘက်ပါ မအလက လှန်ချင်သလို လှန်၊ မှောက်ချင်သလို မှောက်လုပ်​နေတာ"လို့အာ​ဏာသိမ်း​ခေါင်း​​ဆောင်ကစစ်အုပ်စုအတွင်း လုပ်ချင်သလိုလုပ်​နေတာကို​ပြောပါတယ် ။ဒီအ​ခြေအ​နေ​တွေ​ကြောင့်စစ်အုပ်စုထိပ်ပိုင်း​ခေါင်း​ဆောင်​တွေကြားအာ
ဏာသိမ်း​ခေါင်း​ဆောင်ကိုမ​ကျေမလည်မှု​တွေ ရှိ​နေပြီလို့သုံးသပ်ရတယ်လို့သူကဆက်​ပြောပါတယ် ။

#ညှိကွပ် #ဗိုလ်ချုပ်ကြီးကိုကိုဦး
#ပြည်ထဲရေးဝန်ကြီး
#ကချင်ရခိုင်မှာစစ်ဦးကျိုး
#peoplesspring #ludunwayoo

စစ်တွေတိုက်ပွဲမှာ စစ်တပ်ရဲ့ ခြေကုတ်နေရာအချို့ကို AA သိမ်းပိုက်

စက်တင်ဘာ-၁၇၊၂၀၂၆။ခိုင်မြတ်/People's Spring

စစ်တွေနဲ့ ပုဏ္ဏားကျွန်းမြို့နယ်အစပ်တိုက်ပွဲတွေအတွင်းအာဏာသိမ်းစစ်တပ်ရဲ့ကာကင်း
အပါအဝင် ခြေကုတ်နေရာအချို့ကို အာရက္ခတပ်တော်(AA)က သိမ်းပိုက်ရရှိထားပြီး တိုက်
ပွဲတပါတ်ကျော်အတွင်း ​နေရာ​လေးခုထက်မနည်းရှိပြီဖြစ်တယ်လို့ မြေပြင်သတင်းရင်း
မြစ်တွေက ပြောပါတယ်။

အာဏာသိမ်းစစ်တပ်ဟာ ၄၉၂၆ စစ်ဆင်ရေးလို့ဆိုပြီး စစ်တွေမြို့နယ်ဘက်ကနေ AA ထိန်း
ချုပ်ရာ ပုဏ္ဏားကျွန်းမြို့ နယ်ဘက်ဆီကို စက်
တင်ဘာလ ၄ ရက်နေ့ကစတင်ထိုးစစ်ဆင်နေခဲ့တာဖြစ်ပါတယ်။ဒါ​ပေမယ့်စစ်တပ်စစ်​ကြောင်း​တွေကို အာရက္ခတပ်​တော်က ဖြတ်​တောက်တိုက်ခိုက်တာ​ကြောင့် ​ရှေ့မတိုးနိုင်ဘဲနောက်ပြန်ဆုတ်ပြေးနေရပြီး စစ်တပ်စခန်း​နေရာအချို့ကိုပါသိမ်းပိုက်နိုင်နေတာဖြစ်ပါတယ်။

စစ်တပ်အခြေချနေထိုင်ခဲ့တဲ့ အမြင့်ကျွန်းတံ
တား၊ ရွှေမင်းဂံရေတပ်စခန်းအနီး ကံကော်ကျွန်းဝန်းကျင်ကာကင်းနဲ့ စစ်ဆင်ရေးနောက်ပိုင်း ပုဏ္ဏားကျွန်းမြို့နယ်အတွင်း စစ်တပ်ခြေကုတ်နေရာယူထားခဲ့တဲ့ စပါးထား၊ ဆားပို့တောင်၊ ခမောင်းတောရွာဝန်း
ကျင်တို့က နေရာအချို့ကို AA က သိမ်းပိုက်ရထားတာလို့ AA နဲ့နီးစပ်တဲ့ မြေပြင်သတင်း ရင်းမြစ်က ပြောပါတယ်။

“ကိုယ့်ဘက်ကရထားတာတွေရှိပါတယ်။စပါး
ထားဘက်ကနေရာတွေရတယ်။တခြားလည်း ရထားတာတွေရှိ တယ်။ အကုန်လုံး ထုတ်ပြောဖို့မကောင်းလို့ပါ။အစပိုင်းမှာတော့ သူ့ဘက်က ရလိုက်၊ ကိုယ့်ဘက်က ရလိုက်ပဲ၊ အခု တော့ ဒီကောင်တွေရှေ့မတိုးနိုင်တော့ဘူး။ ပိတ်နေပြီ”လို့၎င်းကဆက်​ပြောပါတယ်။

စစ်တပ်ဟာ စစ်တွေမြို့နယ် အမြင့်ကျွန်းတံ
တားနဲ့ ရွှေမင်းဂံရေတပ်စခန်းတို့ကနေ ပုဏ္ဏားကျွန်းမြို့နယ်ဘက်ဆီ အင်အားထောင်ချီသုံးပြီး ​လေ​ကြောင်း ၊ရေတပ်သ​ဘော်​တွေနဲ့ လက်နက်ကြီးပစ်ကူ​ပေးကာ မြေပြင်ထိုးစစ်ဆင်ခဲ့တာဖြစ်ပါတယ်။ အမြင့်ကျွန်းဘက်ကလာတဲ့ စစ်ကြောင်းဟာ တိုက်ပွဲပထမရက်မှာပဲနောက်ပြန်ဆုတ်သွားခဲ့ရပြီးအရင်ကတည်း
ကအထိုင်ချခဲ့တဲ့တံတားပေါ်ကနေပါ နောက်
ဆုတ်သွားခဲ့ ရတာဖြစ်ပါတယ်။

ရွှေမင်းဂံဘက်ကတက်လာတဲ့စစ်ကြောင်းကဝါဘိုကျွန်းအနီးအောင်မြေကုန်း၊ ဆားပို့တောင်၊ ရဲရိုးပြင်ရွာဝန်းကျင်မှာပဲ ရှိနေသေးပါတယ်။ ဒါပမေယ့် ရှေ့မတိုးနိုင်တော့ဘဲ AA ရဲ့ တန်ပြန်ထိုးစစ်ကို ခုခံနေရပြီး နေ့တိုင်း သေ ဆုံးသူဆယ်ဂဏန်းနဲ့ အထိနာနေကာ လက်
နက်ချအလင်းဝင်သူတွေပါ ရှိနေတယ်လို့ မြေ
ပြင်သတင်းရင်းမြစ်တွေကပြောပါတယ်။

လက်ရှိမှာ စစ်တွေမြို့နယ် ရွှေမင်းဂံရေတပ်စခန်းကနေ ပုဏ္ဏားကျွန်းမြို့နယ်ဘက်ခြမ်းကို စစ်ကျွံရောက်လာတဲ့ အာဏာသိမ်းစစ်တပ်ရဲ့ အဲဒီစစ်ကြောင်းနဲ့ AA တို့ ရဲရိုးပြင်ရွာအနီးတိုက်ပွဲပြင်းထန်နေတယ်လို့ စုံစမ်းသိရပါတယ်။ “ကိုယ့်ဘက်က အသာစီးရထားတယ်။ သူတို့ ရှေ့တိုးလို့မရတော့ဘူး။ (AA ရဲ့)ထိုးစစ်ကို မခံနိုင်ရင်သူ့အလိုလိုဆုတ်ပြေးသွား လိမ့်
မယ်။ ပြေးတဲ့ကောင်တွေလည်း ရှိတယ်” လို့ အခြားစစ်ရေးသတင်းရင်းမြစ်တဦးကပြောပါတယ်။

AAက ပုဏ္ဏားကျွန်းမြို့နယ်ဘက်ခြမ်းကို ရောက်လာတဲ့ စစ်တပ်စစ်ကြောင်းတွေကို တိုက်ခိုက်နေသလို စစ်တွေ မြို့နယ်ပါဒလိတ်တပ်ရင်အနီးရှိအမြင့်ကျွန်းရွာဝန်းကျင်၊ ဒေသ
ကွပ်ကွဲမှုစစ်ဌာနချုပ်(ဒကစ စစ်တွေ)၊ကျားမ
သောက်တပ်ရင်းတို့အနီး တောကန်ရွာဝန်း
ကျင်နဲ့ ကံ့ကော်ကျွန်း၊ ဇော်မတက်ရွာအနီးဝန်းကျင်စခန်းတွေကိုပါ ထိုးစစ်ဆင်တိုက်
ခိုက်နေပြီး စစ်တပ်ဘက်က အထိနာနေတယ်လို့ စစ်ရေးသတင်းရင်းမြစ်တွေက ပြောထားကြပါတယ်။

မြေပြင်တိုက်ပွဲမှာ အထိနာနေတဲ့ စစ်တပ်ဟာ စစ်တွေမြို့နယ်နဲ့ ဆက်စပ်နေတဲ့ပုဏ္ဏားကျွန်း၊
ပေါက်တောမြို့နယ်တို့ကိုလေကြောင်း၊ လက်
နက်ကြီးတွေနဲ့ ပစ်ခတ်၊ တိုက်ခိုက်တာတွေ ဆက်တိုက်လုပ်နေပါတယ်။စက်တင်ဘာ ၁၇ ရက် မနက်ပိုင်းနဲ့ ညနေပိုင်းမှာလည်း ပုဏ္ဏားကျွန်းမြို့နယ်အတွင်းက တိုက်ပွဲနဲ့ ဆက်စပ်နေရာ တွေကို လေယာဉ်အုပ်လိုက်သုံး ဗုံးကြဲခဲ့ပြီး နေ့လယ်ပိုင်းမှာ မြောက်ဦးမြို့ဝန်းကျင်ကိုပါ ဗုံးကြဲခဲ့ပါတယ်။

“တိုက်ပွဲမှာ တော်တော်နာနေတယ် ပြောကြတယ်။ သိလည်း သိသာတယ်။ လေယာဉ်နဲ့ ဗုံးကြဲနေတာ ငါးရက်လောက် ဆက်တိုက်ရှိနေပြီ။တရက်မပျက်သေးဘူး”လို့ပုဏ္ဏားကျွန်းမြို့နယ်မှ ဒေသခံတဦးက ပြောပါတယ်။

စစ်တပ်ဟာ၄၉၂၆စစ်ဆင်ရေးလို့နာမည်တပ်ပြီး ထိုးစစ်စခဲ့တဲ့ စက်တင်ဘာလ ၄ ရက်နေ့ကနေ ဒီနေ့ထိ နှစ်ပတ် အတွင်း စစ်တွေစစ်
မျက်နှာမှာ သေဆုံးရသူ ရာနဲ့ချီရှိပြီဖြစ်တယ်လို့ AA သတင်းရင်းမြစ်တွေက ပြောထား ကြပါတယ်။

ဒါ့အပြင် ကျောက်ဖြူ၊ မကွေးတိုင်း ပဒါန်း၊ မင်းတုန်း၊ ဧရာ၀တီတိုင်း ရေကြည်၊ သာပေါင်းမြို့နယ် တို့မှာလည်း စစ်တပ်ဘက်က ​သေဆုံးထိခိုက်သူ​တွေ၊လက်နက်ချသူ​တွေများနေတယ်လို့ စစ်​ရေးသတင်းရင်းမြစ်​တွေက​ပြောပါတယ်။

အာဏာသိမ်းစစ်တပ်ဟာ အာရက္ခတပ်တော်
(AA)သိမ်းပိုက်ထိန်းချုပ်ထားတဲ့ ရခိုင်ပြည်
တွင်းနဲ့ ရခိုင်အစပ်နေရာ တွေကို ထိုးစစ်လုပ်နေပေမယ့် လက်တွေ့မှာတော့ နှစ်ပတ်ကြာတဲ့ထိ AA စခန်းကို သိမ်းနိုင်တာမရှိဘဲ သူတို့ရဲ့ စခန်း တွေနဲ့ ခြေကုတ်နေရာတွေသာ ထပ်ပြီးလက်လွှတ်နေရတာပါ။

အာရက္ခတပ်​တော်က ရခိုင်ပြည်နယ်မှာ စစ်​တွေ၊​ကျောက်ဖြူ ၊မာန်​အောင် မြို့နယ်တို့မှအပ ကျန် ၁၄ မြို့နယ် နဲ့ ချင်းပြည်နယ်က
ပလက်ဝမြို့နယ်တို့ကိုသိမ်းပိုက်ထိန်းချုပ်ထားပါတယ် ။စစ်​တွေနဲ့​ကျောက်ဖြူကစစ်တပ်စခန်း​တွေကိုလည်းထိုးစစ်ဆင်တိုက်ခိုက်​နေတာဖြစ်ပါတယ် ။

အမ်းမြို့မှာအ​ခြေစိုက်တဲ့ အ​နောက်ပိုင်းတိုင်းစစ်ဌာနချုပ်(နပခ)သိမ်းတိုက်ပွဲကို ၂၀၂၄ ခုနှစ်မှာ AAတပ်ဖွဲ့ဝင်​တွေဆင်နွှဲ​နေကြစဥ်။ ။ဓါတ်ပုံ-AA Infodesk

ကချင်က ပြန်စုန်ဆင်းတဲ့ စစ်တပ်သင်္ဘောတွေ စစ်ကိုင်းအဝင် ထပ်မံတိုက်ခိုက်ခံရပြီး ၁စီးနစ်မြုပ်

▪️ဗန်းမော်ကို စစ်အင်အားဖြည့်ဖို့ ကြိုးပမ်းတဲ့ စစ်တပ်ရဲ့ မြစ်ကြောင်းစစ်ဆင်ရေး ကျရှုံးမှုများခဲ့၊ ဇင်းဘုံဒေသမှာ စစ်တပ် ဆက်ရှိနေလို့ စစ်ရေးတင်းမာ

စက်တင်ဘာ ၁၈၊ ၂၀၂၆။ ထားမြတ်/People’s Spring

ကချင်ပြည်နယ်၊ ရွှေကူ-ဗန်းမော်ကြား မြစ်ကြောင်း တိုက်ပွဲမှာ ထိခိုက်ဆုံးရှုံးမှုများခဲ့တဲ့ စစ်တပ်ဟာ စက်တင်ဘာ ၁၇ရက်မှာ ရွှေကူမြို့မှာရှိတဲ့ အရပ်သားသင်္ဘောတွေကို သုံးပြီး မန္တလေးဘက်သို့ ပြန်စုန်ဆင်းသွားရာ စစ်ကိုင်းအဝင် ကသာမြို့နယ် မိုးတားလေးဒေသမှာ ထပ်မံတိုက်ခိုက်ခံရပြီး သင်္ဘော ၁စီးထိခိုက်နစ်မြုပ်သွားတယ်ဟု ကချင်စစ်ရေးသတင်းရင်းမြစ်က ပြောပါတယ်။

ကချင်ပြည်နယ်က ပြန်စုန်ဆင်းသွားတဲ့ သင်္ဘောအုပ်စုကို ကချင်လွတ်လပ်ရေးတပ်မတော်(KIA) ပူးပေါင်းတပ်က စက်တင်ဘာ ၁၇ရက်ညနေပိုင်းမှာ တိုက်ခိုက်ခဲ့တာဖြစ်ပြီး လူတွေအပါအဝင် သင်္ဘောနစ်မြုပ်သွားတာလို့ ဆိုပါတယ်။

စစ်တပ် အနေနဲ့ ဩဂုတ်လကုန်ပိုင်းနဲ့ စက်တင်ဘာလအတွင်းမှာ ကချင်ပြည်နယ်ကို စစ်အင်အားဖြည့်တင်းဖို့ သင်္ဘောတွေ အသုတ်လိုက် ဆန်တက်ခဲ့ရာ KIA ပူးပေါင်းတပ် တိုက်ခိုက်လို့ ကသာနဲ့ ရွှေကူကြားမှာ သင်္ဘော ၁စီး နစ်မြုပ်ခဲ့ပြီး ရွှေကူနဲ့ ဗန်းမော်ကြားမှာ သင်္ဘော ၂၀စီးခန့် နစ်မြုပ်ခဲ့တယ်လို့ ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနနဲ့ ကချင်စစ်ရေးသတင်းရင်းမြစ်တွေက ပြောပါတယ်။

ရွှေကူမြို့က ဆန်တက်တဲ့ သင်္ဘောတွေရော၊ ဗန်းမော်က ပြန်စုန်ဆင်းတဲ့ သင်္ဘောတွေရောပါ တိုက်ခိုက်ခံရတာဖြစ်ပြီး နစ်မြုပ်တာ၊ မီးလောင်တာ၊ ကမ်းကပ်လက်နက်ချတာတွေရှိသလို ဗန်းမော်မြို့ကို ဆိုက်ကပ်နိုင်ခဲ့တဲ့ သင်္ဘောအချို့လည်း ရှိခဲ့ပါတယ်။

အဲဒီလို ထိခိုက်ပျက်စီးမှုများပြားခဲ့ပေမဲ့ စစ်တပ်ဟာ စက်တင်ဘာ ၁၇ရက် နေ့လည်ပိုင်းမှာ ကချင်ပြည်နယ်ကနေ မန္တလေးဘက်ကို သင်္ဘော ၁၉စီးနဲ့ စုန်ဆင်းသွားတယ်လို့ စစ်ရေးသတင်းရင်းမြစ်က ပြောပါတယ်။ ဒီလို သင်္ဘောတွေအများစုနဲ့ ပြန်စုန်ဆင်းနိုင်တာဟာ ရွှေကူမြို့မှာ ရှိနေတဲ့ အရပ်သားသင်္ဘောတွေကို အသုံးပြုသွားတာလို့ စစ်ရေးသတင်းရင်းမြစ်က ပြောပြပါတယ်။

“KIAနဲ့ PDF အခွန်ရှောင် အရပ်သား ကုန်တင်သင်္ဘောတွေကို အခကြေးငွေနဲ့ ခေါ်သွားတဲ့ သဘောပါ။ ကသာ၊ ရွှေကူမှာ အရပ်သား သင်္ဘောတွေ အများကြီးရှိတယ်” လို့ကချင်စစ်ရေးသတင်းရင်းမြစ်က ပြောပါတယ်။

စစ်တပ်ရဲ့ ကချင်ပြည်နယ်ကို ရေကြောင်းက စစ်အင်အားဖြည့်ဖို့ ကြိုးပမ်းမှုဟာ အပြည့်အ၀ အောင်မြင်မှု မရှိခဲ့ဘဲ ကျဆုံးခဲ့တယ်လို့ လည်း KIA ပူးပေါင်းတပ်က စစ်တပ်သင်္ဘောတွေများစွာ ထိခိုက်အောင် တိုက်ခိုက်နိုင်ခဲ့တဲ့ အခြေအနေပေါ် စစ်ရေး သတင်းရင်းမြစ်က သုံးသပ်ပါတယ်။

ဒါအပြင် လက်ရှိမှာ စစ်တပ်ရဲ့စစ်ကြောင်းတွေ ရွှေကူမြို့နယ် ဇင်းဘုံဒေသအောက်ဘက်မှာ ရှိနေသေးလို့ စစ်ရေး အခြေအနေဟာ စောင့်ကြည့်ရတဲ့ အနေအထားဖြစ်တယ်လို့ စစ်ရေးသတင်းရင်းမြစ်က ပြောပါတယ်။

စစ်တပ်ဟာ သင်္ဘောတွေ စတင်လာရောက်ချိန်ကတည်းက မြစ်ကြောင်းလုံခြုံရေး အရေးပါတဲ့ ရွှေကူမြို့နယ် ဇင်းဘုံရွာအနီး ဝန်းကျင်နဲ့ ဗန်းမော်မြို့နယ် စင်းခန်းတံတား အနီးဝင်းကျင်နေရာတွေကို မြေပြင်စစ်ကြောင်းတွေပို့ ထိုးစစ်ဆင်ခဲ့တာပါ။ ဒါပေမဲ့ KIA ပူးပေါင်းတပ်ရဲ့ တိုက်ခိုက်မှုကြောင့် ဇင်းဘုံနဲ့ စင်းခန်းဒေသ တိုက်ပွဲတွေမှာ စစ်တပ်အထိနာခဲ့ပါတယ်။ ဇင်းဘုံမှာ စစ်ကြောင်းသုံးကြောင်းနဲ့ ဝင်ရောက်တဲ့ စစ်ကောင်စီတပ်တွေ တပ်လန်ဆုတ်ခွာခဲ့ရတယ်လို့လည်း စစ်ရေးသတင်းရင်းမြစ်တွေက ပြောပါတယ်။

(ဗန်းမော်မြို့နားမှာ တွေ့ရတဲ့ စစ်သင်္ဘောကို စက်တင်ဘာ ၃ရက်က တွေ့ရစဉ်။ ဓာတ်ပုံ - CJ)

စစ်တပ်ထောက်ခံတဲ့ သံဃာ ၂ပါးရဲ့ Tiktok အကောင့် ဖယ်ရှားခံရ

စက်တင်ဘာ ၁၈၊ ၂၀၂၆။ ဗေဒါ/People's Spring

စစ်တပ်လက်အောက်ခံ ပျူစောထီးအဖွဲ့ခေါင်းဆောင် ပေါက်ကိုယ်တော်နဲ့ စစ်တပ်ထောက်ခံတဲ့ အမျိုးသားရေးအစွန်းရောက် သံဃာ ဦးသုစိတ္တရဲ့ Tiktok အကောင့်တွေ ဖယ်ရှားခံလိုက်ရပါတယ်။

ဦးသုစိတ္တ(မျိုးချစ်သမဂ္ဂ)နဲ့ ပေါက်ကိုယ်တော်တို့ရဲ့ Tiktok အကောင့်တွေ ဖယ်ရှားခံလိုက်ရကြောင်း ၎င်းတို့ ကိုယ်တိုင် ဝန်ခံထားပါတယ်။

"ဘုန်းဘုန်းတစ်ပါးတည်း မဟုတ်ပါဘူး။ ဘုန်းဘုန်းသူငယ်ချင်း ပေါက်ကိုယ်တော် အရှင်ဝိရိယာဝံသရဲ့အကောင့် သူကမနက်ပျက်၊ ကိုယ်က ညနေပျက်၊ သူကလွန်ခဲ့တဲ့ တစ်နာရီဆို ကိုယ်ကနောက် နာရီဝက်ဆိုပျက်။ ဘုန်းဘုန်းတို့ရဲ့ အကောင့်တွေကို သီးသန့်များ group တွေဖွဲ့၊ reoprt တွေ တင်နေကြတာလား။ ဝိုင်းထုနေကြတာလားပေါ့နော်"လို့ ထပ်မံဖွင့်လိုက်တဲ့ အကောင့်သစ်ကနေ ဦးသုစိတ္တက ပြောပါတယ်။

အလားတူ ပျူစောထီးခေါင်းဆောင် ပေါက်ကိုယ်တော်ကလည်း ၎င်းရဲ့ Tiktok အကောင့်ပျက်သွားတဲ့အတွက် ပျူစောထီးချိုကြီးရဲ့ အကောင့်ကနေ ခေတ္တဝင်သုံးခဲ့ရတယ်လို့ ဆိုပါတယ်။

"ပေါက်ကိုယ်တော်ရဲ့အမည်နဲ့ ပေါက်ကိုယ်တော်ရဲ့အကောင့်တွေက လုံးဝလုံးဝ သုံးမရတဲ့အတွက်ကြောင့် မောင်မြင့်ချို ကျောင်းလာကန်တော့တဲ့အချိန်မှာ သူ့အကောင့်လေးက တော်တော်မာတယ် ခိုင်တယ်ဆိုလို့ သုံးကြည့်တာပါ"လို့ ပေါက်ကိုယ်တော်က ပြောပါတယ်။

ဦးသုစိတ္တဟာ Tiktok ကနေ အခြားဘာသာဝင်တွေနဲ့ ပတ်သက်တဲ့ ပြင်းထန်တဲ့ ဟောပြောချက်တွေ၊လူမျိုးရေး၊ ဘာသာရေးကိစ္စတွေမှာ တင်းမာတဲ့ အမုန်း စကားတွေကို ပြောဆိုခဲ့သူလို့ ဝေဖန်ခံနေရသူပါ။ အရင်ကလည်း စစ်တပ်ထောက်ခံပွဲတွေ မကြာခဏလုပ်လေ့ရှိပါတယ်။ လက်ရှိမှာ ၎င်းတို့ရဲ့ မျိုးချစ်​မြန်မာ ရဟန်းတော်များ သမဂ္ဂဆိုတဲ့အဖွဲ့ဟာ ရန်ကုန်နဲ့ မန္တလေးမြို့က ဗလီတွေ ပြန်လည်တည်ဆောက်မှုကိစ္စတွေမှာ လိုက်လံတားမြစ်နေတယ်လို့ သိရပါတယ်။

ပေါက်ကိုယ်တော်ကတော့ အာဏာသိမ်းစစ်တပ်ထောက်ခံကာ ပျူစောထီးအဖွဲ့တွေ ဦးဆောင် ဖွဲ့စည်းပေးတာ၊ စစ်တပ်ကို ထောက်ခံပြီး စစ်ကောင်စီကို တော်လှန်သူတွေကို ဆန့်ကျင်ပြောဆိုတာတွေ ပြုလုပ်နေသူဖြစ်ပါတယ်။

ဒေါ်အောင်ဆန်းစုကြည်လွတ်မြောက်ရေး ပြည်သူတွေပါဝင်ပေးဖို့ ကင်မ် တောင်းဆို

စက်တင်ဘာ-၁၈၊၂၀၂၆။တေဇ/People's Spring

မိခင် ဒေါ်အောင်ဆန်းစုကြည် လွတ်မြောက်ရေးအတွက် မိခင်ရဲ့ နာမည် ၊ အကြောင်းအရာတွေကို ပြောပြီး ပါဝင်ပေးကြဖို့ သားဖြစ်သူ ကင်မ်အဲရစ်‌(ခ)ကိုထိန်လင်းက တောင်းဆိုထားပါတယ်။

"ကျွန်တော်နဲ့အတူ ရပ်တည်ပေးပါ။ မေမေရဲ့နာမည်ကို ပြောပါ။မေမေ့အကြောင်းကို မျှဝေပါ။ မေမေ့ လွတ်လပ်ခွင့်အတွက် တောင်းဆိုပါ။" လို့ ကင်မ်က သူ့ရဲ့ လူမှုကွန်ရက်မှာ ရေးသားထားတာပါ။

ကင်မ်က မိခင်ဖြစ်သူအသက်ရှင်ကြောင်း တောင်းဆိုတဲ့ Proof Of Life ကမ်ပိန်းကို ပြုလုပ်ခဲ့ပြီး ပြည်တွင်း၊ ပြည်ပက ပြည်သူတွေရဲ့ တောင်းဆိုမှုတွေကြောင့် စစ်တပ်က ဒေါ်အောင်ဆန်းစုကြည်ကို ICRC နဲ့ တွေ့ဆုံခွင့်ပေးခဲ့ရပါတယ်။

အဲဒီနောက်မှာတော့ နောက်တဆင့်အနေနဲ့ မိခင်ဖြစ်သူ လွတ်မြောက်ရေး တောင်းဆိုတဲ့ Free Her ကမ်ပိန်းကို ဆက်လက်လုပ်ဆောင်နေတာဖြစ်ပါတယ်။

"ကျွန်တော့် မေမေ ဒေါ်အောင်ဆန်းစုကြည်ဟာ အသက် ၈၁ နှစ်ရှိပါပြီ။ မေမေဟာ မိသားစုနဲ့ အဆက်အသွယ်ဖြတ်ခံထားရပြီး ဓားစာခံအဖြစ် ရှိနေဆဲပါ။ကျွန်တော် မေမေနဲ့ မတွေ့ရသေး၊ စကားပြောခွင့် မရသေးပါဘူး။မေမေရဲ့ ဘဝမှာ လွတ်လပ်ခွင့်ကို နှစ်ပေါင်းများစွာ လုယူခံထားနေရပါတယ်။မေမေ့ အချိန်တွေ အများကြီး ဆုံးရှုံးပြီးပါပြီ။
မေမေ့ကို လွှတ်ပေးဖို့ အချိန်တန်ပါပြီ။" လို့ ကင်မ်ကတောင်းဆိုထားပါတယ်။

နိုင်ငံတော်ရဲ့အတိုင်ပင်ခံပုဂ္ဂိုလ် လူထု‌ခေါင်းဆောင် ဒေါ်အောင်ဆန်းစုကြည်က စစ်တပ်အာဏာသိမ်းတဲ့ ၂၀၂၁ ဖေဖော်ဝါရီ ၁ ရက်ကတည်းက မတရား ဖမ်းဆီး ထိန်းသိမ်းခံခဲ့ရတာဖြစ်ပြီး လက်ရှိအချိန်အထိ အကျဉ်းကျခံနေရတာ ၂၀၅၆ ရက် ပြည့်မြောက်ပြီဖြစ်ပါတယ်။

ထိုင်းက ဖမ်း၀ရမ်းထုတ်ထားတဲ့ BGF အမှတ်(၄)တပ်နယ်မှူးစောမုတ်သုန် ရာထူးတိုးနဲ့ မွေးနေ့ပွဲ စည်ကားစွာ ကျင်းပနေ

စက်တင်ဘာ-၁၈၊၂၀၂၆။မိုမို/People's Spring

ထိုင်းနိုင်ငံက ဖမ်း၀ရမ်းထုတ်ထားတဲ့ မြ၀တီမြို့နယ်အခြေစိုက် ကရင်နယ်ခြားစောင့်တပ် (BGF) အမှတ်(၄)တပ်နယ်မှူး စောမုတ်သုန်က ဗိုလ်မှူးချုပ်အဆင့်ရာထူးတိုးပြီး ဂုဏ်ပြုပွဲအတူ မွေးနေ့ပွဲ အထိမ်းအမှတ်တွေ ပြုလုပ်နေတယ်လို့ ဒေသခံအချို့က ပြောပါတယ်။

ပြီးခဲ့တဲ့ရက်သတ္တပတ်ကစပြီး ‌စောမုတ်သုန်အတွက် အထိမ်းအမှတ်အခမ်းအနား‌တွေကို BGF အမှတ်(၄) တပ်နယ်မှာ နေ့စဉ်ကျင်းပနေသလို ဘတ်သောင်းဂဏန်းမှ သိန်းဂဏန်း အထိ ဆုကြေးနဲ့ လောင်းကြေး တွေရှိခဲ့တဲ့ အလွတ်တန်းပိုက်ကျော်ခြင်းပြိုင်ပွဲကျင်းပခဲ့တယ်လို့ ဆိုပါတယ်။

"တပ်နယ်မှူးကနေ စစ်ဒေသမှူး ဖြစ်သွားတယ်။အရင် ဗိုလ်မှူးကြီးကနေ ဗိုလ်မှူးချုပ်အဆင့် ဖြစ်သွားတယ်။နောက်ပြီးသူ့မွေးနေ့ နဲ့ကလည်း ကပ်နေတော့ သူနဲ့ဆက်စပ်တဲ့သူတွေဆို ပိုက်ဆံတွေပါကြဲတာရှိတယ်"လို့ မြ၀တီမြို့ခံတစ်ဦးက ပြောပါတယ်။

ဒါ့အပြင် အလွတ်တန်းပိုက်ကျော်ခြင်းပြိုင်ပွဲ အတွက်လည်း စောမုတ်သုန် တက်ရောက်တာမတွေ့ရပေမယ့် BGF ထိပ်‌ပိုင်းခေါင်းဆောင်းတချို့ ရောက်လာခဲ့ပြီး စောချစ်သူရဲ့သား စောချစ်ချစ် အပါအ၀င် BGF အမှတ်(၄) တပ်နယ်အရာရှိတွေက ‌ဘတ်သောင်းဂဏန်းကနေ ကျပ်သိန်း ရာနဲ့ချီ ဆုပေးခဲ့တယ်လို့ မြေပြင် အခြေအနေမြင်ခဲ့သူက ပြောပါတယ်။

"မြန်မာ့ပိုက်ကျော်ခြင်းလောက တစ်လျှောက်မှာ အခုလောက် ပိုက်ဆံတွေ ပလူပျံတာ တခါမှမရှိခဲ့ဘူး။BGF ခေါင်းဆောင်ပိုင်းတချို့က ပိုက်ကျော်ခြင်း ဝါဿနာပါတာနဲ့ အခု အထိမ်းအမှတ်အချိန်နဲ့တိုက်ဆိုင်သွားတာ လည်းပါတယ်"လို့ သူက ပြောပါတယ်။

စစ်တပ်ရဲ့ဖွဲ့စည်းပုံအရ နယ်ခြားစောင့်တပ်တွေရဲ့ ရာထူးအကြီးဆုံးက ဗိုလ်မှူးကြီးအဆင့်ကအမြင့်ဆုံးဖြစ်ပေမယ့် BGFတပ်ဖွဲ့က ကရင်အမျိုးသားတပ် (KNA)အဖြစ် အသွင်းပြောင်းပြီးနောက် ထိပ်ပိုင်းခေါင်းဆောင်တွေက ရာထူးတွေကို သတ်မှတ်ရယူတာလို့ သိရပါတယ်။

" စောချစ်သူတို့ KNA ပြောင်းတော့ ရာထူးတွေက စစ်တပ်က ခန့်ပေးတာမဟုတ်တော့ပဲ ကိုယ့်ဘာသာကိုယ်ခန့်နဲ့ စောချစ်သူက ဗိုလ်ချုပ်အဆင့်ထိ ဖြစ်သွားပါတယ်။မုတ်သုန်တို့ BGF က KNA ကို အများအမြင်မှာ တရား၀င်အရ မပြောင်းပေမယ့် တကယ်တမ်းတော့ နောက်ကွယ်မှာ KNA ဖွဲ့စည်းပုံအတိုင်း လိုက်ပါပြောင်းလဲနေပါတယ်။ ဒါကြောင့် မုတ်သုန်က စစ်ဒေသမှူးဆိုတော့ ဗိုလ်မှူးချုပ်ရာထူးပေးလိုက်တာပါ"လို့ BGF တပ်အခြေအနေကို နားလည်သိရှိသူက ပြောပါတယ်။

စောမုတ်သုတ်ဟာ ထိုင်းနိုင်ငံမှာ လူစုလူဝေးပြုလုပ်မှု နဲ့ လူကုန်ကူးမှုတွေ ပြုလုပ်တာကြောင့် အခုနှစ် ဇူလိုင် ၂၇ ရက်မှာ ဘန်ကောက်မြို့ ထိုင်းရာဇဝတ်တရားရုံးက ဖမ်းဝရမ်းအမိန့်ထုတ်ပြန်ခဲ့ပါတယ်။

ဗိုလ်မှူးကြီးစောမုတ်သုန်ဟာ ထိုင်း-မြန်မာ နယ်ခြားကော်မတီမှာလည်းပါဝင်သူတစ်ဦး ဖြစ်ပါတယ်။ စောချစ်သူတို့ BGF တပ်ဖွဲ့က ကရင်အမျိုးသားတပ် (KNA)က အသွင်းပြောင်းတဲ့အထဲမှာလိုက်ပါပြောင်းလဲခြင်းမရှိပဲ စစ်တပ်လက်အောက်ခံအဖြစ်နဲ့သာ ဆက်ရှိနေခဲ့သူဖြစ်ပါတယ်။

ဒါ့အပြင် မြ၀တီမြို့ပေါ်ရပ်ကွက်နဲ့ မြ၀တီတောင်ဘက် စောမုတ်သုန်ထိန်းချုပ်တဲ့ အင်ကြင်းမြိုင်၊ မဲထော်သလေးရွာတွေဘက်မှာရှိတဲ့ အွန်လိုင်းလိမ်လည်မှု(ကျားဖြန့်)တွေဟာ စောမုတ်သုန်လက်အောက်ခံ BGF တပ်ဖွဲ့ဝင်တွေရဲ့အကာအကွယ်နဲ့ ကျယ်ပြန့်စွာ ဆက်လက်လည်ပတ်နေတယ်လို့ ဒေသခံတွေက ပြောပါတယ်။

ဒါ့အပြင် တရားမဝင် ထိုင်းကုန်သွင်းယူတာတွေ၊ လောင်းကစားလုပ်ငန်းတွေ စတဲ့ ရာဇဝတ်မှု လုပ်ငန်း၊မှောင်ခိုလုပ်ငန်းတွေကိုလည်း လုပ်ကိုင်နေတယ်လို့ဒေသခံအချို့က ဆိုပါတယ်။ ဒါပေမယ့် ရာဇဝတ်မှုလုပ်ငန်းတွေက ရရှိလာတဲ့ငွေတွေနဲ့ အလှူအတန်းတွေကို လုပ်ပြနေလေ့ရှိပြီး ငြိမ်းချမ်းရေးစကားကိုလည်း တွင်တွင်ပြောနေသူတစ်ဦးလည်းဖြစ်တယ်လို့ ဒေသတွင်း သတင်းရင်းမြစ်အချို့က ပြောပါတယ်။

လက်ရှိ မြ၀တီမြို့တောင်ဘက်က ဖလူး၊ မင်းလက်ပံဒေသမှာ စစ်တပ်ရဲ့ စစ်ရေးလှုပ်ရှားမှုတွေမှာလည်း ဗိုလ်မှူးကြီးစောမုတ်သုန်တို့ BGF တပ်နယ်(၄)အဖွဲ့က စစ်တပ်နဲ့ပေါင်းပြီး တော်လှန်ရေးတပ်တွေကိုတိုက်ခိုက်နေတာဖြစ်တယ်။

ကရင်နယ်ခြားစောင့်တပ် (BGF)ရဲ့ခေါင်းဆောင် ဗိုလ်မှူးကြီး စောချစ်သူနဲ့ဒုတိယဗိုလ်မှူးကြီး စောမုတ်သုန်၊ ဗိုလ်မှူးစောတင်ဝင်းတို့ကို ဖမ်းဝရမ်း ထုတ်နိုင်ဖို့အတွက် ထိုင်းအထူးထောက်လှမ်းရေး ဌာန (DSI)က ၂၀၂၅ နှစ်ဆန်းပိုင်းမှာ အထောက်အထားတွေနဲ့အတူ ထိုင်းရှေ့နေချုပ်ရုံးဆီ တင်ပြ တောင်းဆိုခဲ့ဖူးပါတယ်။

၂၀၂၅ ဖေဖော်ဝါရီတုန်းကလည်း DSI ဟာ BGF ခေါင်းဆောင် ၃ဦးကို နိုင်ငံခြားသားတွေအပေါ် လူကုန်ကူးတဲ့ ရာဇဝတ်မှုတွေနဲ့ ဆက်နွယ်ပတ်သက်ကြောင်း စွပ်စွဲပြီး ဖမ်းဝရမ်း ထုတ်နိုင်ဖို့ တင်ပြခဲ့ဖူးပေမယ့် အထောက်အထား မခိုင်လုံလို့ဆိုတဲ့ အကြောင်းပြချက်နဲ့ ပယ်ချခံခဲ့ရပါတယ်။

ထိုင်းအစိုးရဟာ အမေရိကန် FBI နဲ့ ကျားဖြန့်တိုက်ဖျက်ရေးအပါအဝင် နယ်စပ်ဖြတ်ကျော်ရာဇဝတ်မှုတွေတိုက်ဖျက်ရေးအတွက် ပိုမိုပူးပေါင်းဆောင်ရွက်ကြဖို့ မကြာသေခင်ကသဘောတူညီမှုရရှိထားပါတယ်။

(BGF အမှတ်(၄)တပ်နယ်မှူးစောမုတ်သုန် ရာထူးတိုးနဲ့ မွေးနေ့ပွဲမှာ ပိုက်ကျော်ခြင်းပြိုင်ပွဲကို တွေ့ရစဉ်။ ဓာတ်ပုံ - CJ)

ရေစကြို-ပခုက္ကူလမ်းပိုင်းမှာ စစ်တပ်က မြေမြုပ်နင်းမိုင်းတွေ ထောင်ထား

စက်တင်ဘာ-၁၈၊၂၀၂၆။ဖိုးသား/People's Sprin

မကွေးတိုင်း၊ရေစကြိုမြို့နယ်၊ ရေစကြို-ပခုက္ကူလမ်းပိုင်းမှာ စစ်တပ်က မြေမြုပ်နင်းမိုင်းတွေ ထောင်ထားတယ်လို့ ရေစကြိုမြို့နယ်ပြည်သူ့ကာကွယ်ရေးအဖွဲ့(ပကဖ) က ဒီကနေ့ ထုတ်ပြန်ပါတယ်။

ရေစကြိုမြို့နယ် ဆင်ချောင်းကျေးရွာမှာရှိတဲ့ စစ်တပ်ဟာ ရေစကြို-ပခုက္ကူလမ်းပိုင်း ၁၂မိုင်နဲ့ ဆင်ချောင်းကျေးရွာလမ်းဘေးမှာ မြေမြုပ်နင်းမိုင်းတွေ ထောင်ထားတာလို့ ဆိုပါတယ်။

"လက်ရှိမှာ လေးလုံးလောက် တွေ့ထားတယ်။နောက်ထပ် ဆက်ရှာဖွေနေတယ်။ကတ္တရာလမ်းဘေး ဝဲယာတွေ မှာ တွေ့ရတယ်"လို့ ရေစကြို ပကဖ တာ၀န်ရှိသူက ပြောပါတယ်။

ဒါ့ကြောင့် ခရီးသွားပြည်သူတွေအနေနဲ့ ရေစကြို-ပခုက္ကူလမ်းပိုင်း ကားလမ်းဘေးဘက် သွားလာရင် အထူးဂရုစိုက်ကြဖို့လည်း အသိပေးပါတယ်။

စစ်တပ်အာဏာသိမ်းပြီးနောက်ပိုင်း မြန်မာနိုင်ငံဟာ မြေမြှုပ်မိုင်းကြောင့် လူသေဆုံးသူစံချိန်သစ်နဲ့ ကမ္ဘာမှာ ထိပ်ဆုံးနိုင်ငံ ဖြစ်နေပါတယ်။

မြန်မာနိုင်ငံမှာ မြေမြှုပ်မိုင်းကြောင့် ၁နှစ်ကို သေဆုံးဒဏ်ရာရသူ လူဦးရေ တစ်ထောင်ကျော်အထိရှိနေတယ်လို့ သိရပါတယ်။

စစ်တပ်ဟာ သူတို့တပ်စွဲထားတဲ့နေရာတွေ အတိုက်မခံရေးရေး အတွက် မြေမြှုပ်မိုင်းကို အလွန်အကျွံသုံးစွဲကာ တော်လှန်ရေးတပ်တွေရဲ့ ထိုးစစ်ကို ခုခံနေတယ်လို့လည်း အညာဒေသတော်လှန်ရေးရဲဘော်တစ်ဦးက ဆိုပါတယ်။

"သူတို့(စစ်တပ်)အများဆုံးသုံးနေတာ ၁၄ မိုင်းတွေ။ တပ်စွဲခဲ့တဲ့နေရာတိုင်းမှာ နေရာပေါ်မူတည်ပြီး အနည်း ဆုံး ၂၀ ကနေ ၃၀ ကြားတွေ့ရတယ်။အထူးသဖြင့် ကျေးရွာတွေထဲ ထောင်တဲ့ မိုင်းတွေကြောင့် စစ်ရှောင် တွေ ပြန်၀င်ရင် ထိကြတာများတယ်"လို့ သူ့အတွေ့ အကြုံကို ရှင်းပြပါတယ်။

လက်ရှိ ရေစကြိုမြို့နယ်မှာ စစ်တပ်ရဲ့လေကြောင်းတိုက်ခိုက်မှုတွေ မကြာခဏ ရှိနေပြီး ဒေသခံပြည်သူတွေအနေနဲ့ သတိပြုနေထိုင်ကြဖို့လည်း တော်လှန်ရေးတပ်တွေက တိုက်တွန်းထားပါတယ်။

ရေစကြိုမြို့ ဖူလုံရွာအနီးမှာ စစ်တပ်ရဲ့ ခြေလျင်တပ်ရင်းတွေဖြစ်တဲ့ အမှတ် -၂၅၆၊၂၅၇၊ ၂၅၈ တပ်ရင်းတွေ အခြေစိုက်ထားပါတယ်။


ရုပ်သံ - ရေစကြို ပကဖ

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ရေစကြိုပခုက္ကူလမ်း #စစ်ကောင်စီမြေမြှုပ်မိုင်း #မိုင်းအန္တရာယ် #မကွေးစစ်ရေး #မြန်မာ့စစ်ရေးသတင်း #YesagyoPakokkuRoad #JuntaLandmines #MineDanger #MagwayConflict #MyanmarConflict #MyanmarNews