“ဒီနေ့ဘာဖြစ်ခဲ့လဲ”

ဒီနေ့(စက်တင်ဘာ ၁၆ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️ရွှေဘိုမှာ ဘုန်းကြီးကျောင်းရေသန့်စက်ဖွင့်ပွဲ စစ်တပ်ဗုံးကြဲမှု ကျောင်းထိုင်ဆရာတော် ပျံလွန်တော်မူ

စစ်ကိုင်းတိုင်း၊ ရွှေဘိုမြို့နယ်အနောက်ခြမ်းက နှမစားရစ်ကျေးရွာ ဘုန်းကြီးကျောင်း ရေသန့်စက်ဖွင့်ပွဲကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့ရာ ကျောင်းထိုင်ဆရာတော် ပျံလွန်တော်မူပြီး ပြည်သူ ၂ဦး သေဆုံးကာ ၈ဦးခန့် ထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။ စက်တင်ဘာ ၁၆ ရက် ဒီနေ့ နေ့လယ် ၁၂နာရီခွဲခန့်မှာ ရွှေဘိုမြို့နယ်အနောက်ခြမ်းက နှမစားရစ်ရွာ ဘုန်းကြီးကျောင်းမှာ ရေသန့်စက်ဖွင့်ပွဲပြုလုပ်ချိန် စစ်တပ်က လေကြောင်းကနေ ဗုံးကြဲတိုက်ခိုက်ခဲ့တာလို့ သိရပါတယ်။ တရွာလုံးသုံးတဲ့ ရေသန့်စက်ရုံအသေးစားလေးကို ကျောင်းထိုင်ဆရာတော်က ဦးစီးဆောက်လုပ်ပေးတာလို့ ဒေသခံတစ်ဦးက ပြောပါတယ်။ ပျံလွန်တော်မူတဲ့ ကျောင်းထိုင်ဆရာတော်ဟာ သက်တော် ၄၃နှစ်ရှိပြီး နောက်ထပ်အမျိုးသား ၂ဦးဟာ အသက်၆၀ ကျော်တွေဖြစ်ကာ ကျေးရွာရဲ့ရပ်မိရပ်ဖတွေဖြစ်တယ်လို့ သိရပါတယ်။

◾️ဒီးမော့ဆိုက မိဘမဲ့ကျောင်း စစ်တပ် အသေခံဒရုန်းနဲ့တိုက်ခိုက်မှု ကလေး ၁ဦး သေဆုံး၊ ၃ဦး ဒဏ်ရာရ

ကရင်နီပြည်နယ်၊ ဒီးမော့ဆိုမြို့နယ်အနောက်ခြမ်းမှာရှိတဲ့ မိဘမဲ့ကျောင်းကို စစ်တပ်က အသေခံဒရုန်း(ကာမီကာဇေ)နဲ့ တိုက်ခိုက်မှုကြောင့် ကလေး ၁ဦးသေဆုံးပြီး ၃ဦး ဒဏ်ရာရကာ ၂ဦးက အခြေအနေစိုးရိမ်ရတယ်လို့ ဒေသခံ‌နဲ့စစ်ရှောင်ကူညီသူတွေက ပြောပါတယ်။ ဒီနေ့ စက်တင်ဘာ ၁၆ ရက် ညနေ ၄နာရီခွဲ၀န်းကျင်မှာ ဒီးမော့ဆိုအနောက်ခြမ်းကို စစ်တပ်က ကာမီကာဇေဒရုန်း ၂စီးနဲ့ တိုက်ခိုက်ခဲ့ပြီး မိဘမဲ့ကျောင်းမှာ ဆော့ကစားနေတဲ့ ကလေးတွေ ထိမှန်ခဲ့တယ်လို့ ဆိုပါတယ်။ ကာမီကာဇေဒရုန်း ထိမှန်ခဲ့တဲ့နေရာမှာပဲ (၉)နှစ်အရွယ် ကလေး ၁ဦး သေဆုံးခဲ့ရပြီး ၃ဦး ထိခိုက်ဒဏ်ရာရတယ်လို့ ကရင်နီစစ် ရှောင်အရေးကူညီနေသူတစ်ဦးက အသိပေးပါတယ်။

◾️ကပစ(၁၆)အနီး တိုက်ပွဲဆက်ပြင်းထန်နေ

၄၉၂၆ စစ်ဆင်ရေးလို့ စစ်အုပ်စုက ကြွေးကြော်ပြီး စစ်ကြောင်းတွေတက်လာတဲ့ ပန်း‌တောင်းမြို့က ကပစ(၁၆)အနီးပတ်ဝန်းကျင်မှာ ဒီနေ့ တိုက်ပွဲတွေ ဆက်လက်ပြင်းထန်နေပြီး စစ်တပ်က လေကြောင်းကနေ ဗုံးကြဲနေတယ်လို့ ဒေသခံသတင်းရင်းမြစ်တွေက ပြောပါတယ်။ ကပစ(၁၆)အနီးက မသုန်ရွာနဲ့ ညောင်ကျိုးရွာပတ်ဝန်းကျင်မှာ စက်တင်ဘာ ၄ရက်ကစပြီး ဒီနေ့ စက်တင်ဘာ ၁၆ရက်အထိ မြေပြင်တိုက်ပွဲတွေ ပြင်းထန်နေခဲ့တာလို့ သိရပါတယ်။ စက်တင်ဘာ ၁၅ရက် မနေ့ မနက်ပိုင်းက တိုက်ပွဲမှာ စစ်တပ်ဘက်က ဗိုလ်မှူးဝေကမ္ဘာစိုး ဆိုသူအပါအဝင် ငါးဦးထက်မနည်းသေဆုံးခဲ့တယ်လို့ သိရပါတယ်။ ညောင်ကျိုးကျေးရွာက စစ်တပ်စခန်းကို အာရက္ခတပ်တော်(AA)နဲ့ ပူးပေါင်းတပ်တွေက စနိုက်ဘာ၊ လက်နက်ကြီး‌တွေနဲ့ပစ်ခတ်စဥ် သေဆုံးတာလို့ ဒေသခံသတင်းရင်းမြစ်တွေက ပြောပါတယ်။ ဗိုလ်မှူးဝေကမ္ဘာစိုးဟာ စစ်တပ်အသိုင်းအဝိုင်းမှာ ဗေဒင်ဆရာဝေကမ္ဘာစိုးလို့ လူသိများပါတယ်။ သူက ဗေဒင်ဟောပြီး နှစ်လုံးထီဂဏန်းပေးနေတာလို့ စစ်တပ်အသိုင်းအဝိုင်းက ဆိုပါတယ်။

◾️စစ်တပ်သင်္ဘောတွေကို KIA ပူးပေါင်းတပ် ထပ်မံ တိုက်ခိုက်

ကချင်ပြည်နယ်၊ ရွှေကူကနေ ဗန်းမော်မြို့ကို ဆန်တက်တဲ့ စစ်တပ်ရဲ့ သင်္ဘော ၃စီးနဲ့ ဗန်းမော်မြို့က ပြန်စုန်ဆင်းလာတဲ့ စစ်သင်္ဘော ၇စီးကို ကချင်လွတ်လပ်ရေးတပ်မတော်(KIA) ပူးပေါင်းတပ်က ဒီနေ့ စက်တင်ဘာ ၁၆ရက်မှာ ထပ်မံတိုက်ခိုက်ခဲ့ပါတယ်။ အဲဒီလိုတိုက်ခိုက်ရာမှာ သင်္ဘောအများစု ထိခိုက်ပျက်စီးပြီး ရေမြုပ်သွားတဲ့ သင်္ဘောတွေလည်းရှိတယ်လို့ ကချင်စစ်ရေးသတင်းရင်းမြစ်က ပြောပါတယ်။ စစ်တပ်ဟာ ဩဂုတ်လကုန်ပိုင်းနဲ့ စက်တင်ဘာအတွင်းမှာ ရွှေကူ-ဗန်းမော်အကြားမှာ KIA ပူးပေါင်းတပ်ရဲ့ တိုက်ခိုက်မှုကြောင့် စစ်သင်္ဘောတွေအပါအဝင် သင်္ဘော ၁၈စီးထက်မနည်း ထိခိုက်ပျက်စီးခဲ့ပါတယ်။ ဒါပေမဲ့ ဗန်းမော်မြို့ကို အင်အားဖြည့်ဖို့ ဆက်လက်ကြိုးပမ်းတာ၊ ဗန်းမော်မြို့က သင်္ဘောတွေ အောက်ဘက်ကို ဆက်လက်စုန်ဆင်းခဲ့လို့ KIA ပူးပေါင်းတပ်က လမ်းမှာ စောင့်ကြိုတိုက်ခိုက်ခဲ့တာပါ။ ဒီနေ့ မနက်တိုက်ခိုက်ခဲ့တဲ့ သင်္ဘော ၇ စီးလုံး တဝက်မြုပ် တဝက်ပေါ် ဖြစ်နေပြီး တချို့ ဘေးတစောင်းအနေအထားတွေ ဖြစ်ကုန်တယ်လို့ ကချင်စစ်ရေးသတင်းရင်းမြစ်က ပြောပါတယ်။ ဒါ့အပြင် ဗန်းမော်မြို့က စုန်ဆင်းလာတဲ့ ခလရ(၂၃၇) တပ်ရင်းမှူးလိုက်ပါတဲ့ စစ်သင်္ဘောတိုက်ခိုက်ခံရပြီး ရေနစ်မြုပ်သွားချိန်မှာ ခမရ(၃၂၀)တပ်ရင်းမှူး လိုက်ပါတဲ့ သင်္ဘောက ကိုယ်လွတ်ရုန်းမောင်းပြေးသွားတယ်လို့ ကချင်စစ်ရေးသတင်းရင်းမြစ် တချို့က ပြောပါတယ်။

◾️စစ်သင်္ဘောလုံခြုံရေးယူပေးတဲ့ Y-12လေယာဉ်ပစ်ခတ်ခံရ

ကချင်ပြည်နယ်၊ ရွှေကူ-ဗန်းမော်ကြား စစ်သင်္ဘောလုံခြုံရေးအတွက် ဗုံးလိုက်ကြဲ​​နေတဲ့ စစ်တပ်ရဲ့ Y12လေယာဉ်ကို ကချင်လွတ်လပ်ရေးတပ်မတော်(KIA) ပူးပေါင်းတပ်က ပစ်ခတ်ခဲ့ရာ ထိမှန် မီးခိုးအူသွားကြောင်း ကချင်စစ်ရေးသတင်းရင်းမြစ်က ပြောပါတယ်။ စက်တင်ဘာ ၁၆ရက် ဒီနေ့ မနက်ပိုင်းမှာ စစ်သင်္ဘောတွေဟာ ဗန်းမော်ဘက်ကနေ ရွှေကူမြို့ဘက်ကို စုန်းဆင်းလာတာရှိသလို ရွှေကူကနေလည်း ဗန်းမော်မြို့ဘက်ကို ဆန်တက်တာရှိကြောင်း သိရပါတယ်။ အဲဒီ စစ်သင်္ဘောတွေကို KIA ပူးပေါင်းတပ်က တိုက်ခိုက်ဖျက်ဆီးခဲ့တာရှိသလို စစ်တပ်ရဲ့သင်္ဘောလမ်းကြောင်းလုံခြုံရေးအတွက် လာတဲ့ လေယာဉ်ကိုလည်း တိုက်ခိုက်ခဲ့တာလို့ ကနဦးသတင်းရရှိခဲ့တာပါ။ စစ်တပ်ရဲ့ Y-12 လေယာဥ် ထိခိုက်ပြီး မီးခိုးတလူလူဖြစ်သွားတယ်လို့ ကချင်စစ်ရေးသတင်းရင်းမြစ်က ဖြစ်စဥ်ကို မြင်လိုက်တဲဲ့ ရွာသားတွေရဲ့ ပြောကြားချက်ကို ပြန်ရှင်းပြပါတယ်။ လေယာဥ်ပျက်ကျ၊ မကျ တိတိကျကျ မသိရသေးဘဲ တောင်ပေါ်ဘက်ကိုတော့ KIA က သွားရောက်စစ်ဆေးနေတယ်လို့ သတင်းရင်းမြစ်က ပြောပါတယ်။

◾️စစ်မှုထမ်းအတွက်လူဝယ်တဲ့​ အောင်ပန်းက ဗိုလ်ကြီးတစ်ဦး ဖမ်းဆီးခံရ

ရန်ကုန်မြို့က ဘောလုံးသမား ၁ဦးကို စစ်မှုထမ်းအစားထိုးဖို့ ကျပ်သိန်း ၇၀ နဲ့ ဝယ်ယူခဲ့တဲ့ ရှမ်းပြည်နယ်တောင်ပိုင်း၊ အောင်ပန်းမြို့ ကုတင်(၇၀၀)စစ်ဆေးရုံက ဆရာဝန် ဗိုလ်ကြီးတစ်ဦးကို စစ်တပ်က ဖမ်းဆီးထားတယ်လို့ လူထုနွေဦးက စုံစမ်းသိရပါတယ်။ ဖမ်းဆီးခံထားရတဲ့ ‌ဆရာဝန် ဗိုလ်ကြီးဟာ စစ်မှုထမ်းဖို့ လိုအပ်တဲ့ အရေအတွက်ကို လစဉ် ရန်ကုန်မြို့ကို သွားရောက်​ဝယ်​လေ့ရှိသူ ဖြစ်တယ်လို့ လူထုနွေဦးရဲ့ သတင်းရင်းမြစ်က ပြောပါတယ်။ ပြီးခဲ့တဲ့သြဂုတ်လကတော့ ရန်ကုန်ကနေ ဘောလုံးသမားဝယ်လာမိလို့ အဲဒီဗိုလ်ကြီးကို ဖမ်းထားတယ်လို့ သတင်းရင်းမြစ်က ပြောပါတယ်။ ဗိုလ်ကြီးဖမ်းဆီးခံရတဲ့ ရက်ပိုင်းဟာ ချင်းလန်းအက်ဖ်စီအသင်းရဲ့ ဘောလုံးသမားဖြစ်သူ ပါလုမ်း ပျောက်ဆုံးမှု ဖြစ်ပြီး​နောက်ပိုင်းနဲ့ တိုက်ဆိုင်နေပါတယ်။ လူထုနွေဦးရဲ့ သတင်းရင်းမြစ်က ရန်ကုန်မြို့ကနေ စစ်မှုထမ်းဖို့ ရောင်းစားခံရသူဟာ ဘောလုံးသမားတစ်ဦးလို့သာ အတည်ပြုပြီး ချင်းလန်းအက်ဖ်စီအသင်းရဲ့ ဘောလုံးသမား ပါလုမ်း ဟုတ်၊မဟုတ် အတည်မပြုပါဘူး။ ဒါပေမဲ့ ဖြစ်နိုင်တယ်လို့ မှတ်ချက်ပြုပါတယ်။ အောင်ပန်းမြို့ခံအခြားသတင်းရင်းမြစ်တစ်ဦးကတော့ အဖမ်းခံရတဲ့ ဗိုလ်ကြီးဝယ်မိတဲ့သူဟာ ပါလုမ်း ဖြစ်တယ်လို့ ​ပြောပါတယ်။

◾️ရန်ကုန်မှာ စားအုန်းဆီဈေး သတ်မှတ်ဈေးထက် ၂ဆလောက် မြင့်တက်

ရန်ကုန်မြို့မှာ စားအုန်းဆီဈေးတွေ သတ်မှတ်ဈေးထက် ၂ဆလောက် မြင့်တက်နေပြီး ရပ်ကွက်တွေမှာလည်း စားအုန်းဆီ ခွဲတမ်းဝယ်ယူရတာ ပိုခက်ခဲလာတယ်လို့ ဒေသခံတွေက‌ ပြောပါတယ်။ စားအုန်းဆီကို စစ်တပ်က သတ်မှတ်ထားတဲ့ဆိုင်တွေမှာ တစ်ပိဿာ ၇,၆၅၀ ကျပ်နဲ့ ရောင်းချပေမယ့် ဈေးကွက်ထဲမှာတော့ စားအုန်းဆီဈေးဟာ တစ်ပိဿာ ကျပ် ၁၈,၀၀၀ အထိ ဈေးပေါက်နေတာလို့ပြည်သူတွေက ပြောပါတယ်။ စစ်တပ်က ရပ်ကွက်တွေမှာ စားအုန်းဆီကို ၁၀ရက် တစ်ပိဿာနှုန်း ရောင်းချပေးနေတာဖြစ်ပြီး ဒီနောက်ပိုင်းမှာတော့ ခွဲတမ်းပြည့်အောင် ရောင်း‌မပေးနိုင်ဘူးလို့ လှိုင်မြို့နယ်မှာ နေထိုင်သူတစ်ဦးက ပြောပါတယ်။ ရပ်ကွက်တွေမှာ စားအုန်းဆီထုတ်ပေးဖို့အတွက် ခွဲတမ်းရရှိတဲ့ ပမာဏက နည်းလာတယ်လို့ လှိုင်မြို့နယ်က ရပ်ကွက်အုပ်ချုပ်ရေးမှုးရုံး အဖွဲ့ဝင်တစ်ဦးက ပြောပါတယ်။

◾️PDF ဇိုလဲန်းတပ်ဖွဲ့ထံက ထွက်ပြေးသွားတဲ့ စစ်သုံ့ပန်း ထက်ဝက်ခန့် လွတ်မြောက်၊ ၂၀ ဦးခန့် ပြန်ဖမ်းမိ

ချင်းညီနောင်အဖွဲ့ဝင် ချင်းဒေသကာကွယ်ရေးတပ်ဖြစ်တဲ့ PDF ဇိုလဲန်းတပ်ဖွဲ့က ထိန်းသိမ်းထားတဲ့ စစ်သုံ့ပန်း ၈၀ ဦးခန့် ထွက်ပြေးသွားရာ ထက်ဝက်ခန့်က စစ်တပ်ထံ ပြန်လည်ရောက်ရှိသွားပြီး ၂၀ဦးခန့်ကို ပြန်ဖမ်းမိထားကြောင်း ချင်းသတင်းရင်းမြစ်တစ်ဦးက ပြောပါတယ်။ ချင်းပြည်နယ်မြောက်ပိုင်း တီးတိန်မြို့နယ် အခြေစိုက် PDF ဇိုလဲန်းတပ်ဖွဲ့ရဲ့ ထိန်းသိမ်းရေးစခန်းမှာ ထိန်းသိမ်းထားတဲ့ စစ်ကောင်စီတပ်ဖွဲ့ဝင် သုံ့ပန်း ၈၀ ဦးလောက်ဟာ စက်တင်ဘာ ၁၃ရက် က အစောင့်ရဲဘော်တွေကို အလစ်အငိုက်တိုက်ခိုက်ပြီး ထွက်ပြေးသွားတာပါ။ ထွက်ပြေးသွားတဲ့ စစ်သုံ့ပန်းတွေ ပြန်လည်ဖမ်းဆီးရမိရေး လုပ်ဆောင်နေကြောင်း PDF ဇိုလဲန်း တာဝန်ရှိသူ တစ်ဦးက စက်တင်ဘာ ၁၄ရက်မှာ ပြောထားပါတယ်။ အဲဒီလို စစ်သုံ့ပန်းတွေ ပြန်ဖမ်းနိုင်ဖို့ ကြိုးပမ်းနေချိန်မှာပဲ စက်တင်ဘာ ၁၅ရက်မှာ အရာရှိ အပါအဝင် စစ်သုံ့ပန်း ၃၀ကျော် တီးတိန်မြို့ရှိ စစ်တပ်ထံ ပြန်ပူးပေါင်းနိုင်ပြီဆိုတဲ့ ပြောဆိုချက် တွေရှိသလို ထွက်ပြေးတဲ့ သုံ့ပန်း ၂၀ဦးလောက်ကိုလည်း ပြန်ဖမ်းမိတာရှိတယ်လို့ သိရပါတယ်။

◾️ရှမ်းတပ် RCSS နဲ့ စစ်တပ်စီ ထပ်မံ တွေ့ဆုံဆွေးနွေး

ရှမ်းတပ် RCSSနဲ့ စစ်တပ်ကိုယ်စားလှယ်တို့ စက်တင်ဘာ ၁၅ရက်က နေပြည်တော်မှာ တွေ့ဆုံဆွေးနွေးခဲ့ကြောင်း RCSSက သတင်းထုတ်ပြန်ပါတယ်။ အရင်ကလည်း စစ်ခေါင်းဆောင်မင်းအောင်လှိုင်အပါအဝင် စစ်တပ်ကိုယ်စားလှယ်တွေနဲ့ အကြိမ်ကြိမ် တွေ့ဆုံခဲ့ဖူးတဲ့ ရှမ်းပြည်ပြန်လည်ထူထောင်ရေးကောင်စီ(RCSS) ကိုယ်စားလှယ်တွေဟာ နေပြည်တော်ကို သွားရောက်ပြီး စက်တင်ဘာ ၁၅ရက်မှာ စစ်အုပ်စုနဲ့ ဆွေးနွေးပွဲ ထပ်မံကျင်းပခဲ့တာပါ။ ဆွေးနွေးပွဲကြောင့် နှစ်ဖက်အကြား ယုံကြည်မှု ပိုမြှင့်တင်နိုင်ခဲ့ကြောင်း RCSS ကိုယ်စားလှယ်အဖွဲ့ခေါင်းဆောင် ဗိုလ်မှူးကြီးစိုင်းငင်းက ပြောခဲ့တယ်လို့ RCSSက ထုတ်ပြန်ထားပါတယ်။ RCSS ဟာ စစ်တပ်နဲ့ တွေ့ဆုံဆွေးနွေးမှု မပြုလုပ်ခင်မှာ စစ်တပ်ကို တော်လှန်တိုက်ခိုက်နေတဲ့ ပအိုဝ်းတော်လှန်ရေးတပ် PNLO/PNLA တပ်ဖွဲ့ဝင် ၃၇ဦးနဲ့ သူတို့ရဲ့ မိသားစုတွေ ကို စစ်တပ် လက်အောက်ခံ ပြည်သူ့စစ်တပ်ဖွဲ့ PNOထံ အပ်နှံခဲ့ပါတယ်။

◾️တယ်လီနောအပေါ် စုံစမ်းစစ်ဆေးမှုတွေပြုလုပ်တဲ့အပေါ်ကြိုဆိုကြောင်း JFM နဲ့ ICJ Norway ထုတ်ပြန်

လူသားမျိုးနွယ်အပေါ် မြန်မာစစ်တပ် ကျူးလွန်ထားတဲ့ ရာဇဝတ်မှုတွေမှာ ကြံရာပါပတ်သတ်မှု၊ ဒဏ်ခတ်ပိတ်‌ဆို့မှု‌တွေကို ချိုးဖောက်မှုနဲ့ Telenor ကို စွဲချက်တင်တဲ့အပေါ် Justice For Myanmar(JFM) နဲ့ ICJ Norway က ကြိုဆိုကြောင်း အသိပေးထားပါတယ်။ နော်ဝေဥပဒေနဲ့ နိုင်ငံတကာဥပဒေတွေကို ချိုးဖောက်ခဲ့မှုတွေအတွက် တယ်လီနောအပေါ် အခုလို နောက်ဆုံးမှာ စုံစမ်းစစ်ဆေးမှုတွေ စတင်လုပ်ဆောင်ဖို့ နော်ဝေရဲတပ်ဖွဲ့ရဲ့ ဆုံးဖြတ်ချက်ကို Justice For Myanmar က ကြိုဆိုတယ်လို့ ဆိုပါတယ်။ တယ်လီနောက တရားမဝင်စစ်အုပ်စုဆီ ထောက်လှမ်းရေးဆော့ဝဲလ် လွှဲပြောင်းပေးခဲ့တာနဲ့ အရေးကြီးပြီး ထိရှလွယ်တဲ့ အချက်အလက်တွေ မျှဝေပေးခဲ့တာတွေကို သက်သေခံဖော်ပြနိုင်မယ့် အထောက်အထားမှတ်တမ်း အများအပြားကိုလည်း နော်ဝေရဲတပ်ဖွဲ့ကို ပေးပို့ထားပြီးဖြစ်တယ်လို့ JFM ရဲ့ပြောရေးဆိုခွင့်ရှိသူ မရတနာမောင်က ပြောပါတယ်။ တယ်လီနောအနေနဲ့ ပုဂ္ဂိုလ်ရေး အချက်အလက်တွေကို စစ်တပ်ကို ပေးခဲ့တာက စစ်တပ်ရဲ့ မတရားဖမ်းဆီးမှုတွေ ညှဉ်းပန်းနှိပ်စက်မှုတွေ၊ သတ်ဖြတ်မှုတွေနဲ့ ကွပ်မျက်မှုတွေကို အားပေးကူညီတာဖြစ်ပြီး မြန်မာပြည်သူတွေအပေါ် ထိခိုက်နစ်နာမှုတွေအတွက် တယ်လီနောက အပြည့်အဝ တာဝန်ခံစေရမှာ ဖြစ်တယ်လို့ မရတနာမောင်က ပြောပါတယ်။

ရွှေမင်းဂံရေတပ်စခန်းအနီး ရဲရိုးပြင်ရွာနားက စစ်ကြောင်းကိုAAတိုက်ခိုက်၊တိုက်ပွဲပြင်းနေ

■စစ်သားအချို့ထွက်​ပြေး ၊အချို့အလင်းဝင်

စက်တင်ဘာ-၁၆ ၊၂၀၂၆။ခိုင်မြတ်/People's Spring

စစ်တွေမြို့နယ်၊ရွှေမင်းဂံရေတပ်စခန်းကနေ ပုဏ္ဏားကျွန်းမြို့နယ်ဘက်ခြမ်းကို စစ်ကျွံလာတဲ့ အာဏသိမ်း စစ်တပ်စစ်ကြောင်းကို အာရက္ခတပ်တော်(AA)က တိုက်ခိုက်နေပြီး နှစ်ဖက်တိုက်ပွဲပြင်းထန်နေကာစစ်တပ်ဘက်ကထွက်
ပြေး၊ အလင်းဝင်သူအချို့ ရှိနေတယ်လို့ မြေ
ပြင်သတင်းရင်းမြစ်တွေကပြောပါတယ်။

AA ထိန်းချုပ်ရာ ပုဏ္ဏားကျွန်းမြို့နယ်ဘက်ကို အင်အားသုံးထိုးစစ်ဆင်ခဲ့ပေမယ့်ရှေ့မတိုးနိုင်ပြန်ဆုတ်ခဲ့ရပြီး ရွှေမင်းဂံရေတပ်စခန်းနဲ့ ချောင်းတဘက်ကမ်း ရဲရိုးပြင်ရွာနားမှာ တန့်နေတဲ့စစ်ကြောင်းကို AA ကစက်တင်ဘာလ ၁၆ ရက် မနက်အစောပိုင်းကနေ တိုက်ခိုက်နေတာပါ။

“ချောင်းကူးပြီးပြေးတဲ့သူပြေး၊လက်နက်ချတဲ့သူတွေချနဲ့ပဲ။တချို့ကောင်တွေရွှေမင်းဂံဘက်ကို ထွက်ပြေးကြ တယ်။ အလင်းဝင်တဲ့ကောင်တွေလည်းရှိတယ်။ပစတွေတော်တော်
များတယ်။ တိုက်ပွဲကတော့ ဆက်ဖြစ်နေပါ တယ်။ ဝါဘိုဘက်မှာလည်း ဖြစ်နေတယ်”လို့ AA နဲ့ နီးစပ်တဲ့ ​မြေပြင်မှသတင်းရင်းမြစ်က ပြောပါတယ်။

စက်တင်ဘာ ၁၆ ရက်တိုက်ပွဲအတွင်း စစ်တပ်ဘက်က ​သေဆုံးဒဏ်ရာရသူ​တွေရှိသလို ထွက်ပြေး၊ အလင်းဝင်သူလည်း အချို့ရှိတယ်လို့ စုံစမ်းသိရပါတယ်။စစ်တပ်ဟာ ပြီးခဲ့တဲ့ရက်ပိုင်းအတွင်းက ရွှေမင်းဂံရေတပ်စခန်းကနေ အင်အားရာချီနဲ့ ပုဏ္ဏားကျွန်းမြို့နယ်ဘက်ခြမ်း ရဲရိုးပြင်၊ ခမောင်းတောရွာဘက်ကို ထိုးစစ်ဆင်ခဲ့တာပါ။ဒါ​ပေမယ့် AA ရဲ့တိုက်
ခိုက်မှုကြောင့် ရဲရိုးပြင်ရွာနားထိ နောက်ပြန်ဆုတ် ခဲ့ရတာပါ။ ဒီနေ့မှာတော့ အဲဒီရဲရိုးပြင်နားက အဲဒီ စစ်ကြောင်းကိုပါ AA က ထပ်မံတိုက်နေတာဖြစ်ပါတယ်။

“ချောင်းလေး တခုပဲခြားတာ ရေတပ်နဲ့ဆိုရင် ဒီကောင်တွေကို ရှင်းပြီးရင်တော့ ရွှေမင်းဂံကို ရောက်ပြီ။ ကိုယ်လူ တွေလည်း ထိုးစစ်ပြန်လုပ်နေပြီဆိုတော့ ရွှေမင်းဂံထိ ထိုးနိုင်တယ်။ ရွှေမင်းဂံရရင်တော့စစ်တွေမြို့ထိလမ်းပေါက်
ပြီ”လို့ စစ်ရေးနဲ့နီးစပ်တဲ့ဒေသခံတဦးကပြောပါတယ်။

ဒါ့အပြင် စစ်တပ်က မြေပြင်စစ်ကြောင်းထိုးထားတဲ့ စစ်တွေမြို့နယ် ဝါဘိုကျွန်း မင်းလှရွာဝန်းကျင်မှာလည်း နှစ်ဖက် တိုက်ပွဲဖြစ်​နေပြီး တိုက်ပွဲပြင်းထန်​နေပါတယ်။AA က စစ်တပ်ရဲ့ ထိုးစစ်ဆင်လာတဲ့စစ်ကြောင်းတွေကို တိုက်
ခိုက်နေသလို စစ်တွေမြို့နယ် ပါဒလိတ် တပ်
ရင်းအနီးရှိ အမြင့်ကျွန်းရွာဝန်းကျင်၊ ဒေသကွပ်ကွဲမှုစစ်ဌာနချုပ် (ဒကစ စစ်တွေ)၊ ကျား
မသောက်တပ်ရင်းတို့ အနီး တောကန်ရွာဝန်း
ကျင်နဲ့ ကံ့ကော်ကျွန်းရွာအနီးဝန်းကျင်စခန်းတွေကိုပါ တန်ပြန်ထိုးစစ်ဆင်တိုက်ခိုက်နေတယ်လို့ မြေပြင်သတင်း ရင်းမြစ်တွေက ပြောပါတယ်။

အဲဒီလို တိုက်ပွဲပြင်းနေချိန် စစ်တပ်ဟာ စစ်တွေမြို့နယ်နဲ့ ဆက်စပ်နေတဲ့ ပုဏ္ဏားကျွန်း၊ ပေါက်တောမြို့နယ်တို့ကိုလေကြောင်းတိုက်
ခိုက်မှုတွေ ဆက်တိုက်လုပ်နေပြီးစက်တင်ဘာ ၁၆ ရက် နေ့လယ်ပိုင်းမှာပုဏ္ဏား ကျွန်းမြို့နယ်ဘက်ခြမ်းကို ဗုံးကြဲနေခဲ့တယ်လို့ ဒေသခံတွေက ပြောပါတယ်။

စစ်တပ်ဟာစက်တင်ဘာလ ၄ ရက်နေ့ကစပြီး စစ်တွေမြို့နယ် အမြင့်ကျွန်း၊ ရွှေမင်းဂံတို့ကနေ အင်အား ထောင်ဂဏန်းနဲ့ AA ထိန်းချုပ်ရာ ပုဏ္ဏားကျွန်းမြို့နယ်ဘက်ခြမ်းကို ထိုးစစ်ဆင်ခဲ့တာဖြစ်ပါတယ် ။အမြင့်ကျွန်းဘက် စစ်
ကြောင်းဟာ တိုက်ပွဲပထမရက်မှာပဲ အထိနာ နောက်ပြန်ဆုတ်သွားခဲ့ရပါတယ်။

စစ်တပ်ဟာ ၄၉၂၆ စစ်ဆင်ရေးလို့ နာမည်တပ်ပြီး ထိုးစစ်စခဲ့တဲ့ စက်တင်ဘာလ ၄ ရက်နေ့ကနေ စက်တင်ဘာ ၁၆ အထိနှစ်ပါတ်နီးပါးအတွင်း စစ်တွေစစ်မျက်နှာမှာ သေဆုံးရသူ နှစ်ရာကျော်ထိ ရှိပြီဖြစ်တယ်လို့ AA သတင်းရင်းမြစ်တွေကပြောပါတယ်။

ဒါ့အပြင် ကျောက်ဖြူ၊ မကွေးတိုင်း ပဒါန်း၊ မင်းတုန်း၊ ဧရာ၀တီတိုင်း ရေကြည်၊ သာပေါင်းမြို့နယ် တို့မှာလည်း စစ်တပ်ဘက်က အထိနာနေတယ်လို့ စစ်​ရေးသတင်းရင်းမြစ်​တွေက​ပြောပါတယ်။

အာဏာသိမ်းစစ်တပ်ဟာအာရက္ခတပ်တော်
(AA)သိမ်းပိုက်ထိန်းချုပ်ထားတဲ့ ရခိုင်
ပြည်နယ်နဲ့ ရခိုင်အစပ်နေရာ တွေကို ထိုးစစ်လုပ်နေပေမယ့် လက်တွေ့မှာတော့ နှစ်ပါတ်နီးပါးကြာတဲ့ထိ AA စခန်းတစ်ခုမှသိမ်းနိုင်တာမရှိဘဲ စစ်တပ်ရဲ့စခန်းတွေ ထပ်မပါသွားဖို့သာ ခံစစ်လုပ်နေကြရတယ်လို့ မြေပြင်သတင်းရင်းမြစ်တွေကပြောပါတယ်။



#အာရက္ခတပ်တော် #စစ်တွေမြို့
#ရွှေမင်းဂံရေတပ် #ရဲရိုးပြင်ရွာ
#peoplesspring #ludunwayoo

အာရက္ခတပ်​တော် တပ်ဖွဲ့ဝင်​တွေ။
ဓါတ်ပုံ-File

လေယာဉ်နဲ့ ဗုံးကြဲပြီးတခေါက်ဆင်းရင် စာအိတ်ညို တအိတ်ဟာ စားပွဲ ပေါ်မှာ စောင့်ကြို နေပါတယ်။ပြည်သူ့​တွေအသက်သတ် ပေးတဲ့ လေသူရဲကောင်းတ ယောက်အတွက်ဂုဏ်ပြုငွေပါ။

မြန်မာနိုင်ငံမှာ စစ်တပ်အာဏာမသိမ်းခင်က လေတပ်စခန်း ၁၁ ခုရှိပြီးအခု​နောက်ပိုင်းထပ်
မံတိုးချဲ့ထားတာ တွေနဲ့ဆိုရင် ၁၅ခုနဲ့အထက်ရှိပါတယ်။

အများဆုံးအသုံးပြုပြီးပြည်သူတွေကိုအဓိက သတ်ဖြတ်နေတဲ့လေတပ်စခန်း တွေကတော့ တံတားဦး လေတပ်စခန်း၊နေပြည်တော်(အေလာ လေတပ်)၊မိတ္ထီလာရှမ်းတဲလေတပ်၊‌‌မကွေးလေတပ်စခန်းတို့ဖြစ်ပါတယ်။

အာဏာသိမ်းစစ်တပ်ရဲ့လေတပ်ကအရာရှိတွေဟာ တခြားတပ် တွေထက်ပိုပြီးအခွင့် အရေးရပါတယ်။အရာရှိဆိုတာDSAကျောင်းဆင်း တပွင့်ကနေအထက်စပြီး ခေါ်တာပါ။

အခြေခံလစာအပြင်​လေယာဥ်​မောင်းတဦးအတွက် အပိုကြေးလစဥ် ၅၀,၀၀၀ ကျပ်ရှိပါတယ်။ဒါ့အပြင် ထမင်း၊ဟင်းဟာ တခြားတပ် တွေနဲ့မတူဘဲ ကောင်း ကောင်းမွန်မွန် ကျွေးသလို ကော်ဖီ၊အအေးနဲ့ ဘီစကွက်မုန့် အလျှံအပယ်ခံစားခွင့်ရှိပါတယ်။

အနားယူခွင့်ကလည်း ကြည်းတပ်​၊​ရေတပ်တွေထက်ပိုရသလို ၊ လုံခြုံ​ရေးမစိုးရိမ်ရတဲ့အ​ခြေအ​နေမှာဆိုရင် တရက်ခြားအပြင်ထွက်ခွင့်ပိုရတဲ့တပ်ဖြစ်တယ်လို့စစ်သားအချို့က​ပြောပါတယ်။

စစ်တပ်ရဲ့ လေတပ် အုပ်မှူးတဦးဟာ တလကို ကျပ်သိန်း ထောင်ချီပြီးဝင် ငွေရပါတယ်။​လေတပ်မှာ​လေသူရဲ(ခေါ်)လေယာဉ်မောင်း
(ဗိုလ်ကြီး)တွေကို အဖွဲ့တွေခွဲထားပါတယ်။

ဒီအဖွဲ့ တွေဟာကိုယ့်​လေယာဥ်​မောင်းဗုံးကြဲရမယ့်​နေ့တွေမှာ လေယာဉ်​ပေါ်တက်ဖို့ အသင့်အနေအထား စောင့်နေရတာပါ။ဗုံးကြဲဖို့အမိန့်ကျလာရင် အလှည့်ကျဂျူတီထွက်ရပြီး အခုနောက်ပိုင်းဆိုရင် တကြိမ်ကို ၂စီး၊၃စီး လေ
တပ်စခန်းတခုတည်းက ထွက်သလို မိတ္ထီလာ၊တံတားဦး၊နေပြည်တော် ​အေလာလေတပ်စခန်းတွေကနေ ‌‌ချိတ်ဆက်ပြီး တပြိုင်တည်း ဗုံးကြဲစစ်ဆင် ရေးပြုလုပ်တာ တွေလည်းရှိတယ်လို့စုံစမ်းသိရပါတယ်။

သူတို့ရဲ့ဝင်ငွေဟာလေယာဉ်ဆီရောင်းချမှု ခွဲတမ်းကနေရသလိုလေယာဉ်တက်တဲ့အ
ခေါက် အရေအတွက်အတိုင်းလည်းရပါတယ်။တပတ်ကို အရာရှိငယ်တဦးဟာ‌ ငွေကျပ် ၄သိန်းကနေ ၆သိန်းကျပ်အထိရ​လေ့ရှိပြီး အပတ်စဉ် ကြီးတဲ့ဗိုလ်ကြီး တွေဟာကျပ် ၇သိန်းကနေ ၁၀သိန်း ကျော်အထိရတယ်လို့ စုံစမ်းသိရပါတယ်။

ဒါဟာ လေယာဉ်ထွက်ဗုံးကြဲရတာနည်းတဲ့မကွေး လေတပ်စခန်းကစာရင်းဖြစ်ပြီး ဗုံးပိုကြဲရတဲ့ တံတားဦး လေတပ်စခန်းက အရာရှိတွေရဲ့ ဝင်ငွေ ဟာဒီထက်ပိုများနိုင်ပါတယ်။

“လူအ သေပျောက်များတဲ့အခါဆိုရင် ပစ်
မှတ်ထိတယ်ဆိုပြီးအပိုဆုကြေးတွေလည်းရတယ်။ချီးကျူးဂုဏ်ပြုဆိုလည်းလေတပ်က ကောင်တွေကပိုရလွယ်တယ်။စစ်သာမတိုက်တက်တာ လေပေါ်ကဗုံးကြဲရုံကို ရာထူးတက်ကြရင်လည်း ဒီကောင် တွေကပိုမြန်တယ်”လို့ ကြည်းတပ်အရာရှိတဦးက ပြောပြပါတယ်။

စစ်အုပ်စုအတွင်းချီးကျူးဂုဏ်ပြုတယ်ဆိုတာ ကာကွယ်ရေးဦးစီးချုပ်လက်မှတ်နဲ့ဂုဏ်ပြုမှတ်တမ်းဖြစ်ပြီး ဒီမှတ်တမ်းရထားသူ တွေဟာ ရာထူးတပ်ဖို့ပိုမြန်ပါတယ်။ဒီဝင်ငွေနဲ့ခံစားခွင့် တွေကြောင့် လေတပ်အရာရှိအများစုဟာ ပြည်သူ တွေကို ဗုံးကြဲသတ်ဖို့ လက်မရွံလူသတ်သမားအလုပ်ကို တက်တက်ကြွကြွလုပ်နေကြတာပါ။

(​ဆောင်းပါးအပြည့်အစုံကို မှတ်ချက်လင့်မှာ
ဖတ်ရှုနိုင်ပါတယ်)

#လေသူရဲ #စစ်တပ်လေယာဥ်မောင်း #ps
#လေတပ် #ဗုံးကြဲ #peoplesspring