ရန်ကုန် မြို့နယ်လေးခုမှာ လေပြင်းကြောင့် သစ်ပင်တွေလဲ

စက်တင်ဘာ-၁၄၊၂၀၂၆။ရောင်နီ/People's Spring

ရန်ကုန်မြို့မှာ ဒီနေ့(စက်တင်ဘာ၁၄) နေ့လည်ပိုင်းက လေပြင်းတိုက်ခတ်မှုကြောင့် မြို့နယ်လေးခုမှာသစ်ပင်လဲကျတဲ့ ဖြစ်စဉ်တွေဖြစ်ခဲ့ပြီး လမ်းပိတ်မှုတွေဖြစ်ခဲ့တယ်လို့ ဒေသခံတွေကပြောပါတယ်။

နေ့လည် ၂နာရီကျော်မှာ ကမာရွတ်မြို့နယ် တက္ကသိုလ်ရိပ်သာလမ်းမပေါ်မှာ ကား ၂စီးပေါ် သစ်ပင်လဲကျခဲ့ပြီး ယာဉ်ကြောပိတ်ဆို့မှုတွေ ဖြစ်ခဲ့ပါတယ်။

လှည်းတန်းလမ်းဆုံ အနီးမှာဖြစ်တာကြောင့် ယာဉ်ကြောပိတ်ဆို့မှု ဆိုးရွားခဲ့ပြီး ကမာရွတ်မြို့နယ်မီးသတ်စခန်းက ရှင်းလင်းရေးလုပ်ဆောင်ပေးခဲ့တယ်လို့ မီးသတ်တပ်ဖွဲ့က ထုတ်ပြန်ထားပါတယ်။

"တက္ကသိုလ်ရိပ်သာလမ်း လှည်းတန်းမီးပွိုင်း အနီး သစ်ပင်လဲ ကားတစီး ပိနေ ။ အင်းယားလမ်း စိမ်းလန်းစိုပြေအနီး သစ်ပင်လဲ ကားတစီး ပိနေ ။သထုံလမ်းထဲ သစ်ပင်လဲ ဆိုင်ပိနေ ၊ရှောင်ရှားသွားလာနိုင်ရန်"လို့ ဖေ့စ်ဘွတ်ခ်အသုံးပြုသူတစ်ဦးက နေ့လည် ၃ နာရီမှာ ကိုယ်တိုင်‌မြင်‌တွေ့ခဲ့ရတဲ့ အခြေအနေကို အသိပေးထားပါတယ်။

နေ့လည် ၂ နာရီခွဲကျော်မှာတော့ ကြည့်မြင်တိုင်မြို့နယ် ဈေးကြီးလမ်းမှာ သစ်ပင်လဲကျမှုဖြစ်ခဲ့ပြီး ကြည့်မြင်တိုင်မီးသတ်က သွားရောက်ရှင်း‌လင်းပေးခဲ့တယ်လို့ သိရပါတယ်။

ဒါ့အပြင် နေ့လည် ၃ နာရီလောက်မှာတော့ ရန်ကင်းမြို့နယ် မြောက်မြင်းပြိုင်ကွင်းလမ်းမှာ သစ်ပင်လဲကျခဲ့ပြီး ဓာတ်တိုင်တွေပါလဲကျခဲ့ကာ YBS ကား ၁စီးပေါ်ကို ပိမိမလိုဖြစ်ခဲ့တယ်လို့ ဒေသခံတစ်ဦးကပြောပါတယ်။

ဒီဖြစ်စဉ်ကိုလည်း သက်ဆိုင်ရာမြို့နယ်မီးသတ်တွေက သွားရောက်ကူညီခဲ့တယ်လို့ ဆိုပါတယ်။

၃ နာရီ‌ကျော်လောက်မှာတော့ ကမာရွတ်မြို့နယ် ဗဟိုလမ်းမပေါ်မှာ သစ်ပင်လဲကျမှုဖြစ်ပြီး လမ်းပိတ်ဆို့မှုတွေဖြစ်ခဲ့တာကြောင့် နယ်မြေခံမီးသတ်တွေက သွားရောက်ကူညီခဲ့တယ်လို့ သိရပါတယ်။

နောက်ထပ်ဖြစ်စဉ်ကတော့ နေ့လည် ၃ နာရီခွဲကျော်မှာ မရမ်းကုန်းမြို့နယ် ရန်ကြီးအောင်လမ်းမှာ သစ်ပင်လဲကျတာဖြစ်ပြီး ‌နယ်မြေခံမီးသတ်တွေက သွားရောက်ရှင်းလင်းပေးခဲ့တယ်လို့ သတင်းထုတ်ပြန်ထားပါတယ်။

ဒီရက်ပိုင်း ရန်ကုန်မြို့ရဲ့ မြို့နယ်တော်တော်များများမှာ သစ်ပင်လဲကျမှုတွေဖြစ်နေပြီး လေးပြင်းတိုက်ချိန်နဲ့ မိုးရွာချိန်တွေမှာ သစ်ပင်ရှိတဲ့လမ်းတွေကို ရှောင်သင့်ကြောင်း ဖေ့စ်ဘွတ်ခ်အသုံးပြုသူတွေက အချင်းချင်းသတိပေးထားကြပါတယ်။

ဇူလိုင်ကလည်း ဗဟန်းမြို့နယ်မှာ ကားပေါ်ကို သစ်ပင်လဲကျပြီး အမျိုးသားတစ်ဦးသေဆုံးတဲ့ ဖြစ်စဉ်ဖြစ်ခဲ့ပါတယ်။

စစ်တပ်လက်နက်ကြီး​ကြောင့်
စဉ့်ကူးကစစ်​ရှောင်လင်မယားနှစ်ဦးဒဏ်ရာရ

စက်တင်ဘာ-၁၄၊၂၀၂၆။ကတ်သရင်း/People's Spring

မန္တလေးတိုင်း၊စဉ့်ကူးမြို့နယ်အနောက်ခြမ်းရှိကျွန်းကြီးရွာမှာတပ်စွဲထားတဲ့ စစ်တပ်က ဒီက​နေ့မနက်ပိုင်းမှာလက်နက်ကြီးနဲ့ ပစ်ခတ်ခဲ့တာ​​ကြောင့် ဝက်လက်မြို့နယ်အရှေ့ခြမ်းကိုကျပြီး လင်မယားနှစ်ဦး ဒဏ်ရာရရှိခဲ့ပါတယ်။

စက်တင်ဘာလ၁၄ရက် နေ့၊မနက် ၉ နာရီ ကျော်မှာကျွန်းကြီးရွာမှာ တပ်စွဲထားတဲ့ စစ်
တပ်က ရွာရဲ့ အနောက်ဘက်ကို လက်နက်
ကြီးနဲ့ ရမ်းသမ်းပစ်ခတ်ခဲ့တာပါ။အဲဒီလက်
နက်ကြီးဟာ ဝက်လက်မြို့နယ်အရှေ့ခြမ်းရွာသာရွာရဲ့ မြောက်ဘက်ကိုကျပြီးစစ်ရှောင် လင်မယားနှစ်ဦး ထိမှန်ခဲ့တာလို့သိရပါတယ်။

"ထိတဲ့အမျိုးသမီးက တော့လက်ကောက်ဝတ်ပြတ်သွားတယ်ပြောတယ်။သူ့ယောကျာ်းလည်း လက်ထိတယ်တဲ့။မနက်က ကျွန်းတွေပေါ်လည်း ဒရုန်း တွေဝဲတယ်"လို့ ဒေသခံတဦးက ပြောပါတယ်။

လက်နက်ကြီး ထိမှန်သူတွေဟာ စဉ့်ကူးမြို့
နယ်အနောက်ခြမ်း၊ကြက်တူရွေး ရွာကဖြစ်ပြီး စစ်ရှောင်ရင်းအလုပ်လုပ်​နေတုန်းမှာ လက်
နက်ကြီးကျည် ထိခဲ့တာဖြစ်ပါတယ်။

ကြက်တူ​ရွေးရွာကိုစစ်တပ်က ဒရုန်းနဲ့ဗုံးကြဲတာကြောင့် ပြည်သူတချို့သေဆုံးဒဏ်ရာရပြီးတဲ့နောက် ဒေသခံတွေဟာရွာမှာမ​နေရဲ​တော့ဘဲရှောင်တိမ်းနေထိုင် နေကြတယ်လို့ ဒေသခံ တွေက ပြောပါတယ်။

စဉ့်ကူးမြို့နယ်အနောက်ခြမ်းမှာ စစ်တပ်ရဲ့ ဒရုန်းနဲ့တိုက်ခိုက်မှု ကြောင့် ဩဂုတ်လအတွင်းမှာ ပြည်သူ၃ဦး ထပ်မနည်း သေဆုံးခဲ့တယ်လို့ ​ဒေသခံ​တွေက​ပြောပါတယ်။

(

လက်နက်ကြီးကျည်ဒဏ်ရာရတဲ့စစ်​ရှောင်အမျိုးသမီးနဲ့ ​ဒေသခံအချို့ကို​တွေ့ရစဥ်။
ဓါတ်ပုံ-​ပေးပို့

နန်းမယ်ခုံမြို့အနီးကို စစ်တပ် ပစ်ခတ်တိုက်ခိုက်နေ၊ အရပ်သားတချို့ ထိခိုက်သေဆုံး

စက်တင်ဘာ -၁၄၊၂၀၂၆။ဇော်၀င်း/People's Spring

ကရင်နီပြည်နယ်၊ဒီးမော့ဆိုမြို့နယ်၊ နန်းမယ်ခုံမြို့အနီးကို စစ်တပ်က ဒရုန်းနဲ့ လက်နက်ကြီးတွေနဲ့ ပစ်ခတ်တိုက်ခိုက်နေပြီး အရပ်သားတချို့ထိခိုက်သေဆုံးမှုရှိတယ်လို့ ဒေသခံသတင်းရင်းမြစ်တချို့က ပြောပါတယ်။

ဒီကနေ့(စက်တင်ဘာ ၁၄ ရက်)နေ့လယ်ပိုင်းကတည်းက နန်းမယ်ခုံမြို့အနီးက ကျေးရွာတွေကို ဒရုန်း၊လက်နက်ကြီးနဲ့ ပစ်မှတ်ထားတိုက်ခိုက်နေတဲ့အပြင် ညပိုင်းအထိ ဒရုန်းတွေ ပျံဝဲနေဆဲလို့ ဆိုပါတယ်။

"သာယပ်ရွာက သတ်လတ်ပိုင်းအမျိုးသားတစ်ဦး ဒရုန်းထိပြီးဆုံးတယ်။နောက်နှစ်ဦးလည်း ဒဏ်ရာရတယ် ကြားတယ်"လို့ ဒီးမော့ဆိုမြို့နယ်စစ်ရေးသတင်းရင်းမြစ်က ပြောပါတယ်။

မိုးဗြဲမြို့ကနေ စစ်ကြောင်းထိုးနေတဲ့ စစ်တပ်စစ်ကြောင်းဟာ တော်လှန်ရေးတပ်တွေရဲ့ခုခံမှုကြောင့် ရှေ့ဆက်မတိုးနိုင်ဘဲ ဒရုန်းတွေနဲ့ ဗုံးကြဲတာ လက်နက်ကြီးနဲ့ ပစ်ခတ်တာတွေကြောင့် ဒေသတွင်းပြည်သူတွေအနေနဲ့ သတိပြုနေထိုင်ကြဖို့လည်း ကရင်နီတော်လှန်ရေးရဲဘော်တစ်ဦးက ပြောပါတယ်။

"နန်းမယ်ခုံ မြို့နယ်တဝိုက် ဒီနေ့ည ဒရုန်းသွားလာတာ တွေ့မြင်နေရပါတယ် ကြားနေရပါတယ် ကြဲချတယ်လို့လည်း သတင်းတွေရတယ်။လုံခြုံရာမှာ ပုန်းခိုနေကြပါ"လို့ သူက ပြောပါတယ်။

အခုစက်တင်ဘာ ၁၁ ရက်မှာ ရှမ်း-ကရင်နီ ပြည်နယ်အစပ် မိုးဗြဲမြို့ကနေ စစ်တပ်စစ်ကြောင်း ထိုးလာတာကြောင့် တိုက်ပွဲတွေ ပြန်ဖြစ်နေတယ်လို့ ဒေသခံစစ်ရေးသတင်းရင်းမြစ်တချို့က လူထုနွေဦး ကို ပြောထားပါတယ်။

မိုးဗြဲမြို့ကနေ အနောက်ဘက်ခြမ်း လွယ်ယင်းတောင်ခြေကို စစ်တပ်က စစ်ကြောင်းထိုးလာတာဖြစ်ပြီး လက်နက်ကြီးပစ်ခတ်မှုတွေလည်း ရှိနေတယ်လို့ ဆိုပါတယ်။

အာဏာသိမ်းစစ်တပ်က လွယ်ယင်းမင်္ဂလာကျေးရွာကတဆင့် နန်းမယ်ခုံမြို့ ဆင်တောင်ကျေးရွာအထိ ခြေကုပ်ယူပြီး မိုးဗြဲ-နန်းမယ်ခုံလမ်းမကြီးကို ထိန်းချုပ်ဖို့ ကြိုးစားနေတာ ဖြစ်ပါတယ်။

အခုတစ်ကြိမ်အပါအ၀င် ၃လအတွင်းစစ်တပ်ရဲ့ ထိုးစစ်ဆင်မှု ၄ကြိမ်ရှိခဲ့ပါတယ်။အရင် ၃ကြိမ်စလုံးမှာ ထိခိုက်သေဆုံးမှုတွေကြောင့် မိုးဗြဲမြို့ကို ပြန်ဆုတ်ခွာခဲ့ရပါတယ်။

"လွယ်ယင်းတောင်ခြေ ဆင်တောင် နန်းမယ်ခုံ တကြောထဲ။အဲဒီတကြောနဲ့မိုးဗြဲမြို့ကြားမှာ ဖါလိုင်ရွာရှိတယ်။သူတို့က ဖါလိုင်ကိုရချင်တာ ဖါလိုင်ရရင် နန်းမယ်ခုံကို နီးပြီ။ဖါလိုင်ကိုမရတော့ မိုးဗြဲအနောက်ဘက် လွယ်ဝိုင်းနဲ့ လွယ်ယင်းဘက်ကို ပတ်ထိုးနေတာ"လို့ မြေပြင်သတင်းရင်းမြစ်က စစ်တပ်စစ်ကြောင်းထိုးနေတဲ့ အခြေအနေကို ရှင်းပြပါတယ်။

ပြီးခဲ့တဲ့လ နောက်ဆုံးပတ်က အင်အား ၁၅၀ နဲ့ ၂၀၀ နီးပါး နဲ့ စစ်တပ်က လွယ်ယင်းတောင်ခြေကို ချဉ်းကပ်ဖို့ထိုးစစ်ဆင်ခဲ့ပြီး ဒရုန်း၊ လက်နက်ကြီးပစ်ကူတွေနဲ့ လေကြောင်း ဗုံးကြဲတိုက်ခိုက်မှုတွေပါ လုပ်ခဲ့ပေမယ့် ထိခိုက်သေဆုံးသူများတာကြောင့် ပြန်ဆုတ်ခွာသွားခဲ့ပါတယ်။

အဲဒီတိုက်ပွဲမှာ စစ်တပ်ဘက်က ထိခိုက်သေဆုံးသူ ၁၀ ဂဏန်းထက်မနည်းရှိပြီး ရဲဘော်တချို့ ဒဏ်ရာရခဲ့တယ်လို့ မိုးဗြဲပြည်သူ့ကာကွယ်ရေးတပ်MBPDF က ထုတ်ပြန်ထားပါတယ်။

အာဏာသိမ်းစစ်တပ်က မိုးဗြဲမြို့ကို ပြီးခဲ့တဲ့နှစ်လယ်ပိုင်းက ပြန်ထိန်းချုပ်ခဲ့ပေမယ့် မြို့အနီးတဝိုက်ကို တော်လှန်ရေးတပ်တွေက ပိတ်ဆို့ထားပါတယ်။

နန်းမယ်ခုံမြို့ကို တော်လှန်ရေးတပ်တွေက ၂၀၂၃ နှစ်ကုန်ပိုင်းကစပြီး ထိန်းချုပ်ထားတာဖြစ်ပါတယ်။

(ကရင်နီပြည်နယ် နေရာတစ်နေရာကို တိုက်ခိုက်ခဲ့တဲ့ စစ်တပ်ရဲ့ အသေခံဒရုန်း အပိုင်းအစတွေကို တွေ့ရစဉ်။ ဓာတ်ပုံ - Nge Lay)

မန္တလေးမြို့လယ်မှာ ဓါးပြတိုက်ခံရ

စက်တင်ဘာ ၁၄၊ ၂၀၂၆။မေရီ/People's Spring

မန္တလေးမြို့လယ်မှာ အာဏာသိမ်းစစ်တပ် တပ်စွဲထားရာနေရာအနီးက နေအိမ်တစ်အိမ် ဓါးပြတိုက်ခံရပြီး ရွှေတွေနဲ့ ငွေသားတွေ ပါသွားကြောင်း Voice Of Mandalay အဖွဲ့က ပြောပါတယ်။

ဒီကနေ့ စက်တင်ဘာ ၁၄ ရက် ညနေ ၅ နာရီခွဲခန့်က မန္တလေးမြို့၊ ချမ်းအေးသာစံမြို့နယ်၊ ၈၁ လမ်း၊ ၂၆ လမ်းနဲ့ ၂၇ လမ်းကြား၊ မြ၀တီဘဏ်နဲ့ မျက်နှာချင်းဆိုင်ဗလီ၀င်းအတွင်း ဒေသအခေါ် ရွှေတိုက်ဝင်းအတွင်းက နေအိမ်တစ်အိမ် ဓားပြတိုက်ခံရပြီး ရွှေနဲ့ငွေတွေပါသွားခဲ့ကြောင်း မန္တလေးမြေပြင်ကင်းထောက်အဖွဲ့ဖြစ်တဲ့ Voice Of Mandalay အဖွဲ့က ပြောပါတယ်။

"ဓါးပြတိုက်ခံရတဲ့ ဝင်းနားက မြဝတီဘဏ်မှာလည်း စစ်တပ်အစောင့်ဂိတ်ရှိတယ်။ ၂၆ လမ်းနဲ့ လမ်း ၈၀ ထောင့်မှာလည်း ကင်းရှိတယ်"လို့ မန္တလေးမြို့ခံတစ်ဦးက ပြောပါတယ်။

ဓားပြတိုက်မှုဖြစ်စဥ်နဲ့ပတ်သက်ပြီး အသေးစိတ်မသိရသေးပါဘူး။

ဓားပြတိုက်ခံရမှု ဖြစ်ပွားပြီးနောက် စစ်သားတွေနဲ့ ရဲတွေ ရောက်လာပြီး စစ်ဆေးမေးမြန်းတာတွေ ပြုလုပ်သွားတယ်လို့ သိရပါတယ်။

မန္တလေးမြို့မှာ စစ်တပ်အာဏာသိမ်းပြီးနောက်ပိုင်း ဥပဒေစိုးမိုးမှုမရှိတော့ဘဲ ရွှေဆိုင်တွေ၊ ဘဏ်တွေကအစ မကြာခဏ ဓါးပြတိုက်ခံနေရကြောင်း မြို့ခံတွေဆီက သိရပါတယ်။

မင်းတုန်းမြို့နယ် စစ်တပ်လေကြောင်းတိုက်ခိုက်မှု ကလေးငယ်တွေအပါအ၀င်ပြည်သူ ‌‌၆ ဦးသေဆုံး၊ ၅ ဦး ဒဏ်ရာရ

စက်တင်ဘာ-၁၄ ၊၂၀၂၆။ဖိုးသား/People's Spring

မကွေးတိုင်း၊ မင်းတုန်းမြို့နယ်မှာ အာဏာသိမ်းစစ်တပ်ရဲ့လေကြောင်းတိုက်ခိုက်မှုကြောင့် ကလေးငယ်တွေအပါအ၀င် ‌‌ပြည်သူ ၆ဦးသေဆုံးပြီး ၅ဦး ဒဏ်ရာရရှိတယ်လို့ သရက်ခရိုင်အမှတ်(၄) တပ်ရင်း တာ၀န်ရှိသူက လူထုနွေဦးကို ပြောပါတယ်။

စစ်ရေးပစ်မှတ်မဟုတ်တဲ့ အရပ်သားပြည်သူတွေကို လေကြောင်းကနေ ဗုံးကြဲတိုက်ခိုက်သတ်ဖြတ်မှုဖြစ်စဉ်က ဇွန်းကျကျေးရွာမှာ မနေ့က(စက်တင်ဘာ ၁၃ ရက်) ညနေပိုင်းမှာ ဖြစ်ပွားခဲ့တာလို့ ဆိုပါတယ်။

" က‌ပစ ၁၂ ကနေ ညနေ ၄နာရီလောက်မှာ ပါရာမော်တာသုံးစီးတက်လာတယ်။ဇွန်းကျဘက်ကို ပျံသန်းတယ်လို့ ကျွန်တော်တို့ ကြားရတယ်။ဇွန်းကျ ကျေးရွာဆိုတာက ဖုန်းလိုင်းမမိ၊အင်တာနက်လိုင်းမရတာမျိုးနေရာတွေပါ။ရွာက ဒီလိုဟာမျိုးလည်းမကြုံဖူးဘူး။သူတို့ဆီလာတယ်လို့လည်း မထင်ကြဘူး။ရွာအ၀န်းအဝိုင်းထဲကြဲချခံရပြီး အိမ်တွေနဲ့ အနီးတဝိုက်နဲ့နောက်ဘုန်းကြီးကျောင်းရှေ့တွေမှာ ကျရောက်ပေါက်ကွဲခဲ့တယ်"လို့ အထက်ပါတာ၀န်ရှိသူက ဖြစ်စဉ်ကို ရှင်းပြပါတယ်။

သရက်မြို့နယ်အခြေစိုက် စစ်တပ်ရဲ့ ကာကွယ်ရေးပစ္စည်းစက်ရုံ (ကပစ-၁၂)က တက်လာတဲ့ ပါရာမော်တာ(စက်တပ်လေထီး) ၃စီးနဲ့ ဗုံး ၈ လုံးကြဲချတိုက်ခိုက်မှုကြောင့် အသက်(၇၀)အရွယ် ဒေါ်ပစာ၊မခင်ဝေဇင်မိုး အသက် (၁၇)နှစ်၊မနွယ်နွယ်ဝင်း အသက် (၂၅)နှစ် ၊ မထက်သဇင်လှိုင် အသက် (၁၁)နှစ် ၊မငုဝါလှိုင် အသက် (၁၀)နှစ် နဲ့ မောင်ကောင်းထက်ကျော် အသက် (၁၅)နှစ် စုစုပေါင်း ၆ ဦး သေဆုံးခဲ့ရတယ်လို့ အသိပေးပါတယ်။

ဒါ့အပြင် မမာလာ ၊ မောင်မင်းထက်ဦး၊ မောင်ချစ်မဝ ၊မမြမှုးမေနဲ့ မသင်းသင်းလှိုင်တို့ ဒဏ်ရာရရှိခဲ့ပါတယ်။

ဒါဟာ အပြစ်မဲ့အရပ်သားပြည်သူတွေ နေထိုင်ရာနေရာကို လေကြောင်းကနေ ရည်ရွယ်ချက်ရှိရှိ စစ်တပ်ရဲ့ အကြမ်းဖက်တိုက်ခိုက်မှုနဲ့ စစ်ရာဇဝတ်မှုများ ကျူးလွန်တာလို့ သရက်ခရိုင်တပ်ရင်း(၄) တာ၀န်ရှိသူက ဆိုပါတယ်။

"ဇွန်းကျရွာက အိမ်ခြေနည်းနည်းလေး။မင်းတုန်းရဲ့ အနောက် တောင်ဘက်ခြမ်းမှာ။အခု လက်ရှိ
တိုက်ပွဲ ဖြစ်တဲ့နေရာတွေနဲ့ ဝေးပါတယ်။ဝေးတဲ့အပြင် အဲဒီရွာတဝိုက်မှာလည်း တခါမှ တိုက်ပွဲ ဖြစ်တာမျိုးမရှိခဲ့ဘူး"လို့ မင်းတုန်းမြို့နယ် စစ်ရေးသတင်းရင်းမြစ်က ပြောပါတယ်။

အာဏာသိမ်းစစ်တပ်ဟာ မင်းတုန်းမြို့အနောက်ဘက်ခြမ်းကနေ ရခိုင်ရိုးမပေါ်တက်ဖို့ ကြိုးစားနေပေမယ့် စစ်ကြောင်းရဲ့ အရာရှိတွေအပါအ၀င် သေဆုံးသူများနေပြီး နေ့စဉ်နီးပါး လေကြောင်းကနေ ဗုံးကြဲနေတယ်လို့ မြေပြင်သတင်းရင်းမြစ်တချို့က အသိပေးပါတယ်။

ဒါ့အပြင် အခု စက်တင်ဘာလဆန်းတိုက်ပွဲတွေမှာ တပ်မ (၅၅) လက်အောက်ခံ တပ်ရင်းတွေထဲက တပ်ရင်းမှူး ၂ဦးဖြစ်တဲ့ ဒုဗိုလ်မှူးကြီး တင်မျိုးထွဋ်နဲ့ ဒုဗိုလ်မှူးကြီး မြတ်သင်းကျော် သေဆုံးတယ်လို့ နေပြည်တော်ကစစ်ရေးသတင်းရင်းမြစ်က ပြောထားပါတယ်။

အာရက္ခတပ်တော် (AA)သိမ်းပိုက်ထားတဲ့ ရခိုင်ပြည်နယ်တောင်ကုတ်မြို့ကို ဦးတည်ပြီး မင်းတုန်းမြို့နယ်အနောက်ဘက်ရခိုင်ရိုးမကတဆင့် စစ်တပ်စစ်ကြောင်းတွေကဝင်ရောက်ဖို့ကြိုးပမ်းနေတာပါ။

အဲဒီစစ်ကြောင်းတွေကို တပ်မ(၅၅)က ဗျူဟာမှူးဗိုလ်မှူးကြီးအောင်ဇော်မင်းဦးစီးပြီး အင်အား ၁၀၀၀ ကျော်နဲ့ ဝင်ရောက်နေတာကြောင့် ဇွန်လဆန်းပိုင်းကတည်းက တိုက်ပွဲတွေပြင်းထန်နေပြီး စစ်တပ်စစ်ကြောင်းတွေသေဆုံး ဒဏ်ရာရသူများပြီး ရှေ့မတိုးနိုင်ဘဲလန်ကျနေတာဖြစ်ပါတယ် ။

ပြီးခဲ့တဲ့ ဩဂုတ်လနောက်ဆုံးပတ်က မင်းတုန်းမြို့အနောက်ခြမ်းကို ရောက်လာတဲ့ စစ်တပ် စစ်ကြောင်းကို ကြားဖြတ်တိုက်ခိုက်ခဲ့တဲ့ တိုက်ပွဲအတွင်း စစ်သုံ့ပန်း ၅ဦး ဖမ်းမိကာ လက်နက်ခဲယမ်းနဲ့အလောင်းတချို့ သိမ်းဆည်းရရှိတယ်ခဲ့လို့ သရက်ခရိုင်အမှတ်(၄) တပ်ရင်းက သတင်းထုတ်ပြန်ထားပါတယ်။

(စစ်တပ်လေကြောင်းတိုက်ခိုက်မှုကြောင့် သေဆုံးသူ တချို့ကို တွေ့ရစဉ်။ ဓာတ်ပုံ - သရက်ခရိုင်အမှတ်(၄) တပ်ရင်း)

ရန်ကုန်မှာ စက်တင်ဘာ ၂ပတ်အတွင်း ဖမ်းဆီးပေါ်တာဆွဲခံရသူ ၉၀ ကျော်ရှိ

စက်တင်ဘာ-၁၄၊၂၀၂၆။သတိုး/People's Spring

ရန်ကုန်မြို့ရဲ့ မြို့နယ်တွေမှာ စက်တင်ဘာ ၂ပတ်အတွင်း မတရားဖမ်းဆီးပေါ်တာဆွဲခံရသူ ၉၀ ကျော် ရှိတယ်လို့ မြေပြင်ကင်းထောက်အဖွဲ့တွေနဲ့ ဒေသခံတွေက ပြောပါတယ်။

ရန်ကုန်မြေပြင်သတင်းတွေကို ဖော်ပြနေတဲ့ Rangoon Scout Network-RSN ရဲ့ဖော်ပြချက်တွေအရ စက်တင်ဘာ ၁ ရက်ကနေ ၁၃ ရက်အတွင်း မတရားဖမ်းဆီးခံရသူ ၉၂ ဦးရှိတယ်လို့ သိရပါတယ်။

"အခုနှစ်ပတ်ထဲ အဆွဲအရမ်းများနေပါတယ်။အရင်လတွေ ထက်ပိုများပါတယ်။ပုံမှန်ဆို စစ်မှုထမ်းအမှတ်စဉ်သစ် စသွားပြီးရင် ၂ ပတ်လောက် ခဏပြန်ငြိမ်သွားတတ်ပေမယ့် ခုတခေါက်မှာတော့ မငြိမ်ပဲ ဆက်ဆွဲနေတုန်းပါပဲ"လို့ RSN ရဲ့တာဝန်ရှိသူက ပြောပါတယ်။

ကြည့်မြင်တိုင်၊ စမ်းချောင်း၊ ဒေါပုံ၊ ဗိုလ်တထောင်၊ မင်္ဂလာတောင်ညွန့်၊ မရမ်းကုန်း၊ မြောက်ဒဂုံ၊ မြောက်ဥက္ကလာ၊ လှိုင်အင်းစိန် ၊ကမာရွတ်၊ တာမွေ၊ လှိုင်သာယာ ၊သန်လျင်၊ သာကေတ၊ တာမွေ၊ တောင်ဒဂုံ၊ ပုဇွန်တောင်နဲ့ လသာမြို့နယ်တွေမှာ ဖမ်းဆီးပေါ်တာဆွဲမှုတွေပြုလုပ်ခဲ့တာလို့ RSN ရဲ့ထုတ်ပြန်ချက်မှာဖော်ပြထားပါတယ်။

ဖမ်းဆီးခံရသူအများစုက လမ်းမပေါ်မှာသွားလာနေစဉ် ဖမ်းဆီးခံရသူ ၈၂ ဦးရှိပြီး ရှောင်တခင်စစ်တာ ၊ နေအိမ်အထိ ဝင်ရောက်ဖမ်းဆီးတာ ၁၀ ဦးရှိတယ်လို့ ဆိုပါတယ်။

ဒီအချက်အလက်တွေက သတင်းရရှိတဲ့ အရေအတွက်ဖြစ်ပြီး မြေပြင်မှာ အခုအရေအတွက်ထက်ပိုများနိုင်တယ်လို့ ဒေသခံကင်းထောက် အဖွဲ့တွေကပြောထားပါတယ်။

လှိုင်မြို့နယ်မှာ စက်တင်ဘာ ၁၃ ရက်က ဈေးဝယ်နေ တဲ့လူငယ် ၁ဦးကို ကားတစ်စီးပေါ်က လူ ၃ဦးဆင်းလာပြီး ဖမ်းဆီးသွားတာရှိတယ်လို့ ဒေသခံတစ်ဦးက ပြောပါတယ်။

"ညနေက အဖမ်းခံရတဲ့လူတွေ ပြန်လွတ်လာပြီလို့ကြားတယ်။ ပိတောက်ချောင်းရဲစခန်းမှာ တစ်ယောက်သုံးသိန်းနဲ့ ပြန်ရွေးရတယ်တဲ့။ "လို့ ဒေသခံတစ်ဦးက ပြောပါတယ်။

ဒါ့အပြင် ဒီနေ့(စက်တင်ဘာ ၁၄)မှာလည်း ရထားလမ်းနားမှာ ဘီယာ‌ထိုင်သောက်နေသူ ၃ဦးကို အဓမ္မ ဖမ်း‌ဆီးသွားတယ်လို့ အခြားဒေသခံတစ်ဦးက ပြောပါတယ်။

စစ်တပ်ရဲ့မတရားဖမ်းဆီးတဲ့ ဖြစ်စဉ်တွေကြောင့် မြို့နယ်‌တော်တော်များများမှာ ည ၈ နာရီနောက်ပိုင်း လူအသွားအလာတော်တော်နည်းသွားပြီး ဈေးဆိုင်တွေလည်း စောစောပိတ်သိမ်းကြတယ်လို့ ဒေသခံတွေက ပြောပါတယ်။

( ရန်ကုန်မြို့လယ်မှာတွေ့ရတဲ့ စစ်တပ်လက်အောက်ခံ ရဲများ။ ဓာတ်ပုံ-AFP)

ဦးကျော်မိုးထွန်းကို ကုလမှာ ဆက်အသိအမှတ်ပြုရေး ဩစတြေးလျရောက် မြန်မာတွေတောင်းဆိုဆန္ဒပြ

စက်တင်ဘာ ၁၄၊၂၀၂၆။သုည/People's Spring

ဩစတြေးလျနိုင်ငံ မဲလ်ဘုန်းမြို့မှာ ပြည်ပရောက် မြန်မာတွေ စုပေါင်းပြီး ကုလသမဂ္ဂဆိုင်ရာ သံအမတ်ကြီး ဦးကျော်မိုးထွန်းကို မြန်မာပြည်သူတွေကိုယ်စား ဆက်လက်အသိအမှတ်ပြုခန့်အပ်ထားပေးဖို့ တောင်းဆိုဆန္ဒပြပွဲကို စက်တင်ဘာ ၁၃ ရက်က ပြုလုပ်ခဲ့ပါတယ်။

ဩစတြေးလျရောက် မြန်မာတွေက ဦးကျော်မိုးထွန်းရဲ့ ကုလသမဂ္ဂဆိုင်ရာ ကိုယ်စားပြုမှု ဆက်လက်အသိအမှတ်ပြုရေး၊ ဒေါ်အောင်ဆန်းစုကြည်နဲ့နိုင်ငံရေးအကျဉ်းသားတွေ လွတ်မြောက်ရေးနဲ့အရပ်သားပြည်သူများအပေါ် တိုက်ခိုက်မှုတွေ ရပ်တန့်ရေးတို့ကို တောင်းဆိုဆန္ဒပြခဲ့ကြပါတယ်။

ဒါ့အပြင် ကင်မ်အဲရစ် ဦးဆောင်ပြုလုပ်တဲ့ ဒေါ်အောင်ဆန်းစုကြည် လွတ်မြောက်ရေးအတွက် Free Her Campaign ကိုလည်း လုပ်ဆောင်ခဲ့ကြပါတယ်။

ယင်းဆန္ဒပြပွဲမှာ ပြည်ပရောက်တွေ၊ တက္ကသိုလ်ကျောင်းသားကျောင်းသူတွေနဲ့ နွေဦးတော်လှန်ရေး တက်ကြွလှုပ်ရှားသူတွေ ပူးပေါင်းပါဝင်ခဲ့ကြပါတယ်။