ဒရုန်းနည်းပညာ စစ်ရေးမှာအသုံးပြုမှု PDF က စစ်အုပ်စုထပ် ပိုမြင့်ဟု NUG ကာကွယ်ရေးဝန်ကြီးပြော

စက်တင်ဘာ ၁၄၊ ၂၀၂၆။ ထားမြတ်/People’s Spring

ပြည်သူ့ကာကွယ်ရေးတပ်မတော်(PDF) ရဲဘော် တွေအနေနဲ့ ဒရုန်းနည်းပညာ စစ်ရေးမှာ အသုံးပြုတာနဲ့ ပတ်သက်ပြီး စစ်အုပ်စုထက် ပိုသာကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်က ပြောပါတယ်။

ကာကွယ်ရေးဝန်ကြီးဌာနက စက်တင်ဘာ ၁၂ရက် ညပိုင်းမှာ ဖော်ပြခဲ့တဲ့ ဝန်ကြီးဦးရည်မွန်နဲ့ ဦးမင်းကိုနိုင်တို့ရဲ့ စစ်ရေးဆိုင်ရာ စကားဝိုင်းမှာ ဦးမင်းကိုနိုင်က စစ်တပ်အထိနာအောင် တိုက်ခိုက်နိုင်ခဲ့တဲ့ ဒရုန်းနည်းပညာနဲ့ပတ်သက်ပြီး အသိပေးရတာရှိရင် ပြောပြပေးဖို့ ဆွေးနွေးတဲ့အပေါ် ဝန်ကြီးက အခုလို ရှင်းပြခဲ့တာပါ။

“ဒရုန်းနည်းပညာ စစ်ရေးမှာ အသုံးပြုတာကတော့ ကျနော်တို့ PDF ရဲဘော်တွေ တော်တော်ရှေ့ရောက်တယ်လို့ပြောလို့ရပါတယ်။ဒီနည်းပညာကလည်း တနေ့ထက်တနေ့ ပြောင်းလဲ တိုးတက်နေတဲ့အနေအထားပေါ့။ ကျနော်တို့ ရဲဘော်တွေ လိုက်မီပါတယ် ကောင်းကောင်း။ နည်းပညာပိုင်းမှာကတော့ အကြမ်းဖက်စစ်အုပ်စုထက် ခေါင်းတလုံးပိုမြင့်တယ် လို့ပဲ ကျနော်တို့ မှတ်ယူပါတယ်” လို့ ဝန်ကြီးဦးရည်မွန်က ပြောပါတယ်။

လိုအပ်ချက်ကတော့ ရုပ်၀တ္ထုပိုင်းဖြစ်ကြောင်း လည်း ဝန်ကြီးက အသိပေးပါတယ်။

“ရုပ်၀တ္ထုပိုင်းကို လုံလုံလောက်လောက်ဖြည့်ဆည်းပေးနိုင်မယ်ဆိုရင် စစ်ရေးမှာ တော်တော်ကို သက်ရောက်မှု ကြီးလိမ့်မယ်လို့ မျှော်လင့်ထားတာ လည်းရှိပါတယ်။ ဒီအတွက်လည်း ကျနော်တို့ ကြိုးစားနေတယ်” လို့ NUGကာကွယ်ရေးဝန်ကြီးက ပြောပါတယ်။

ပြောက်ကျားစစ်လို့ပြောမယ်ဆိုရင် ဒီကနေ့ ပြောက်ကျားစစ်က နည်းပညာနဲ့ ပေါင်းစပ်ထားတဲ့ ပြောက်ကျားစစ်မျိုးဖြစ်လာကြောင်းလည်း အသိပေးပါတယ်။

" တော်လှန်ရေးရှေ့ခရီးမှာလည်း ဒရုန်းနည်းပညာရဲ့ အခန်းကဏ္ဍက ပိုပိုပြီး အရေးကြီးလာမှာပါ။ ဒီအတွက်လည်း ကျနော်တို့အားလုံး အတူတကွ ဝိုင်းပြီး ကြိုးစားကြဖို့ အရေးကြီးပါလိမ့်မယ်” လို့ ဝန်ကြီး ဦးရည်မွန်က ပြောပါတယ်။

ပြည်သူတွေက ဘဏ္ဍာရေးမှာ ဝိုင်းဖြည့်ကြရာမှာ ကိုယ့်အိပ်ကပ်လည်းဖောင်းအောင်(တော်လှန်ရေးတပ်တွေဘဏ္ဍာတောင့်တင်းအောင်) လုပ်ဆောင်ရမှာ ဖြစ်သလို ရန်သူစစ်ကောင်စီတပ်ရဲ့ အိပ်ကပ်လည်းပြားချပ်သွားအောင်(စစ်တပ်ထုတ်ကုန်တွေ သပိတ်မှောက်တာ အရှိန်မြှင့်ဖို့) လုပ်ရမယ်လို့လည်း ဦးမင်းကိုနိုင်က ပြောပါတယ်။

ဒါ့အပြင် တိုက်ပွဲတွေမှာ စစ်အုပ်စုအထိနာတဲ့ အခြေအနေတွေနဲ့ပတ်သက်ပြီး ပြည်သူက မျက်ဝါးထင်ထင်မမြင်ကြရတာမို့ နောက်ပိုင်း တိုက်ပွဲအောင်ပွဲမှန်သမျှ ပြည်သူကို ရသမျှ အသိပေးပြီး စနစ်တကျ ထုတ်ပြန်ပေးစေချင်ကြောင်း ဦးမင်းကိုနိုင်က ပြောပါတယ်။

အာဏာသိမ်းစစ်တပ်ဟာ PDF တွေနဲ့ မဟာမိတ်တွေရဲ့ ဒရုန်းတိုက်ခိုက်မှုကြောင့် အခု စက်တင်ဘာလနဲ့ ဩဂုတ်လအတွင်း တိုက်ပွဲတွေမှာ အထိနာလျက်ရှိပါတယ်။ ပြီးခဲ့တဲ့ ရက်ပိုင်းက စစ်တပ်ရဲ့ တံတားဦးလေတပ်စခန်းကို PDF တွေက ဒရုန်းနဲ့ ဝင်ရောက်တိုက်ခိုက်နိုင်ခဲ့သလို ကချင်ပြည်နယ်ကို စစ်အင်အားဖြည့်တင်းဖို့ ကြိုးပမ်းတဲ့ စစ်အုပ်စု သင်္ဘောတွေလည်း KIAနဲ့ KPDF ပူးပေါင်းတပ်တွေရဲ့ ဒရုန်းအပါအဝင် လက်နက်မျိုးစုံနဲ့ တိုက်ခိုက်မှုကြောင့် ကချင်ကိုသွားတဲ့ သင်္ဘောအများစု ထိခိုက်ပျက်စီး မီးလောင်၊ရေမြုပ်ခဲ့ရပါတယ်။ ဒါ့အပြင် မြေပြင်တိုက်ပွဲတွေမှာလည်း KIA ပူးပေါင်းတပ်ရဲ့ ဒရုန်းတိုက်ခိုက်မှုကြောင့် စစ်တပ်ဘက်က အထိနာလျက်ရှိပါတယ်။

PDFနဲ့ မဟာမိတ်တွေဟာ စစ်တပ်ရဲ့ ရဟတ်ယာဉ်တွေကိုပါ ဒရုန်းနဲ့ တိုက်ခိုက်ဖျက်ဆီးခဲ့တာတွေလည်းရှိခဲ့ပါတယ်။

(တံတားဦးလေတပ်စခန်းကို PDFတွေက ဒရုန်းနဲ့ တိုက်ခိုက်နေစဉ်။ ဓာတ်ပုံ - CJ)

လားရှိုးမှာ စစ်တပ်က လေယာဉ်အနိမ့်ပျံပြီး ကင်းထောက်

စက်တင်ဘာ ၁၄၊၂၀၂၆။အိမ်သွင်/People's Spring

ရှမ်းပြည်နယ်မြောက်ပိုင်း၊ လားရှိုးမြို့မှာ စက်တင်ဘာ ၁၃ရက်ညနေကနေ ညပိုင်းအထိ စစ်တပ်က ကင်းထောက်လေယာဉ် အနိမ့်ပျံသန်းခဲ့တယ်လို့ ဒေသခံတွေက ပြောပါတယ်။

လားရှိုးမြို့နဲ့ အနီးပတ်ဝန်းကျင်ကို ယခင်ကထက် အချိန်ပိုပြီး လေယာဉ်နဲ့ ကင်းထောက်နေတာလို့ ဒေသခံတစ်ဦးက ပြောပါတယ်။

" ပျံသန်းချိန်က အရင်ကထက် အချိန်ကြာတယ်။ ထူးဆန်းသလို ဖြစ်တာပေါ့။ ရှမ်းမြောက် စစ်ရေးအခြေအနေက တစ်နေ့ရွှေ၊ တစ်နေ့ငွေ"လို့ ၎င်းက ပြောပါတယ်။

လားရှိုးမြို့ဟာ လက်ရှိမှာ စစ်တပ် ထိန်းချုပ်ထားတဲ့ မြို့ဖြစ်ပါတယ်။မြန်မာအမျိုးသားဒီမိုကရက်တစ်မဟာမိတ်တပ်မတော်
(MNDAA)နဲ့ PDF ပါဝင်တဲ့ပူးပေါင်းတပ်တွေက ၂၀၂၄ ဩဂုတ်မှာ ၁၀၂၇ စစ်ဆင်ရေးနဲ့အတူလားရှိုးမြို့ကိုသိမ်းယူခဲ့ပြီး MNDAAက ထိန်းချုပ်ခဲ့ပါတယ်။

ဒါပေမယ့် ၂၀၂၅ ဧပြီမှာ တရုတ်အစိုးရအကူအညီနဲ့ စစ်တပ်က ပြန်တောင်းယူထားတာပါ။စစ်တပ်က မြို့ပေါ်ကိုသာ ထိန်းချုပ်ခွင့်ရထားပြီး ဘေးပတ်ဝန်းကျင်နေရာတွေကို MNDAAက ဆက်လက်ထိန်းချုပ် ထားပါတယ်။

စစ်တပ်ပြန်ထိန်းချုပ်ပြီးနောက်ပိုင်း ‌မြို့ပေါ်ကို ရှော့တိုက်ဒုန်းနဲ့ လေးကြိမ်တိုက်ခိုက်ခံထားရပါတယ်။

ဖေဖော်ဝါရီ ၇ရက်၊ဖေဖော်ဝါရီ ၁၁ရက်၊ဧပြီ ၂၃ရက်နဲ့ ဇူလိုင် ၉ရက်မှာ ပစ်ခတ်ခံခဲ့ရတာဖြစ်ပါတယ်။ဇူလိုင် ၉ရက်က ဖြစ်စဉ်မှာရပ်ကွက်(၆)က အရပ်သားအမျိုးသမီး ၁ဦးသေဆုံးပြီး ရပ်ကွက်(၁၀)က တစ်ဦးဒဏ်ရာရသွားပါတယ်။

စက်တင်ဘာ ၉ရက် ညနေကလည်း လားရှိုးမြို့၊ရပ်ကွက်(၄)ထဲမှာ ပေါက်ကွဲမှုဖြစ်ခဲ့ပါတယ်။

လားရှိုးမြို့မှာ သြဂုတ်တတိယပတ်ကစပြီး စစ်တပ် ကင်းထောက်လေယာဉ်ပျံသန်းမှုတွေပိုများလာတာလို့ ဒေသခံတွေကပြောပါတယ်။သြဂုတ်၂၈ရက်နဲ့ ၂၉ရက်က ကင်းထောက်လေယာဉ်နှစ်စီး နှစ်ရက်ဆက် အနိမ့်ပျံသန်းမှုရှိခဲ့တယ်လို့ လားရှိုးမြို့ဒေသခံတွေက ပြောပါတယ်။

(စစ်တပ်ကားတစ်စီးက နမခ အလံ အပါအဝင် အလံ နှစ်ခုတပ်ပြီး ၂၀၂၅ ဧပြီ ၂၂ ရက်ကလားရှိုးမြို့သို့ဝင်လာစဥ်။ ဓါတ်ပုံ-Nay Myo)

မြိုင်မြို့နယ်က ရေနံမှော်တွေကို စစ်တပ် မီးရှို့ဖျက်ဆီး

စက်တင်ဘာ-၁၄ ၊၂၀၂၆။ဖိုးသား/People's Spring

မကွေးတိုင်း၊ မြိုင်မြို့နယ်က ရေနံမြေ Well-1 နဲ့ ဝဲတူး Well-2 ဒေသအခေါ်အခေါ် (ဝဲလ်တမ်း၊ ဝဲလ်တူး ရေနံမှော်)ကို စစ်တပ်က မီးရှို့ဖျက်ဆီးနေတယ်လို့ ဒေသခံသတင်းရင်းမြစ်တချို့က ပြောပါတယ်။

တစ်ရက်ကို ရေနံစည် ထောင်ဂဏန်း၀န်းကျင်ထွက်တဲ့ အဲဒီ ရေနံမှော်တွေထဲက လုပ်ကွက်တွေနဲ့အနီးဆုံး တဲကြီးကျေးရွာမှာ ရက်၂၀ကြာအထိုင်ချတပ်စွဲထားတဲ့ စစ်တပ်က ရေနံတွင်းလုပ်ကွက်တွေကို မိုင်းခွဲ ဖျက်ဆီးတာနဲ့ မီးရှို့တာတွေ လုပ်နေတာလို့ ဆိုပါတယ်။

"စစ်ကြောင်းကတော့ ရေနံမြေကို မရမက ဖျက်မယ်လို့ ထင်တယ် ။အခုလည်း သူတို့(စစ်ကြောင်း) အတော်အထိနာနေပါတယ်"လို့ မြိုင်မြို့နယ်မြေပြင်သတင်းရင်းမြစ်က ပြောပါတယ်။

Well-1နဲ့ ဝဲတူး Well-2 ရေနံမြေကို ခေတ်အဆက်ဆက် အစိုးရက ထိန်းချုပ်ပြီး မိသားစုတစ်ပိုင်တစ်နိုင် ၊ ကန်ထရိုက်စနစ်တွေနဲ့ ရေနံတူးဖော်လုပ်ကိုင်ကြပြီး အာဏာသိမ်းပြီးနောက် ဒေသတွင်းတော်လှန်ရေးတပ်ဖွဲ့တွေက ထိန်းချုပ်ကာ လုပ်ငန်တွေဆက်လည်ပတ်နေတာ ဖြစ်ပါတယ်။

ဒါ့အပြင် စစ်တပ်ရဲ့လေကြောင်း‌တိုက်ခိုက်မှုတွေ နေ့စဉ်နီးပါးရှိနေကာ စစ်တပ်စစ်ကြောင်း ရွေ့လျားမှုအပေါ်မူတည်ပြီး မြေပြင်တိုက်ပွဲတွေလည်းရှိနေတယ်လို့ စစ်ရေးသတင်းရင်းမြစ်က အသိပေးပါတယ်။

ဒေသတွင်းတော်လှန်ရေးတပ်တွေရဲ့ အရင်းအမြစ်ဖြစ်တဲ့ ရေနံမှော်တွေကို ထိန်းချုပ်ဖို့ အာဏာသိမ်းစစ်တပ်က ဇွန်လဆန်းပိုင်းကစပြီး အင်အား ၅၀၀ ၀န်းကျင်နဲ့ စစ်ကြောင်းထိုးနေတာဖြစ်ပါတယ်။

ဝဲလ်ဝမ်း၊ဝဲလ်တူးရေနံမြေအပါအ၀င် ပေါက်နဲ့မြိုင် ဒေသအစပ်က ရေနံမှော်တွေကို ၂၀၂၄ မတ်လက တည်းက ဒေသအခြေစိုက် တော်လှန်ရေးအဖွဲ့တွေက တိုက်ခိုက်သိမ်းပိုက်ခဲ့တာဖြစ်ပါတယ်။

လက်ရှိတိုက်ပွဲတွေအတွင်းမှာလည်း စစ်တပ်စစ်ကြောင်းထံက လက်နက်ခဲယမ်းတွေ ရခဲ့တာရှိသလို တော်လှန်ရေးရဲဘော်တချို့လည်း ကျဆုံးထားပါတယ်။

စစ်တပ်စစ်ကြောင်းဟာ ၃လအတွင်း ကျေးရွာ ၁၀ ရွာထက်မနည်း မီးရှို့ခဲ့တာကြောင့် နေအိမ်အလုံး ၃၀၀ ကျော် ပျက်စီးခဲ့ပြီး အရပ်သားပြည်သူ ၃၀ နီးပါးကို သတ်ဖြတ်ထားပါတယ်။

ဒါ့အပြင် လက်ရှိစစ်တပ်တပ်စွဲထားတဲ့ တဲကြီးရွာအပါအ၀င် ရေနံမြေ၀န်းကျင် မြိုင်မြို့နယ်အနောက်ခြမ်းကျေးရွာ‌တွေက ပြည်သူ တစ်သောင်းကျော် ဘေးလွတ်ရာသို့ ထွက်ပြေးတိမ်းရှောင်နေကြရတယ်လို့ အရပ်ဘက်စစ်ရှောင်ကူညီရေးအဖွဲ့တွေရဲ့စစ်တမ်းအရ သိရပါတယ်။

(၂၀၂၆ မတ်လ ၃ရက်က လေကြောင်ကနေ ဗုံးကြဲတိုက်ခိုက်မှု​ကြောင့် မြိုင်မြို့နယ်က ရေနံမှော်ကျေးရွာက အပျက်အစီးများကို​တွေ့ရစဥ် ။ဓာတ်ပုံ - အညာ​မြေတပ်​ပေါင်းစု)

စက်တင်ဘာ ပထမပတ်အတွင်း အလင်းဝင်လက်နက်ချတဲ့ စစ်သား ၁၂၈ဦးရှိ

စက်တင်ဘာ ၁၄၊ ၂၀၂၆။ ထားမြတ်/People’s Spring

အာဏာသိမ်းစစ်ကောင်စီတပ်ဖွဲ့ဝင်တွေ တော်လှန်ရေးတပ်ဖွဲ့ဝင်တွေထံ အလင်းဝင်တာ၊ လက်နက်ချတာတွေ ဆက်လက်ရှိနေပြီး စက်တင်ဘာပထမပတ်အတွင်းမှာ အလင်းဝင်၊ လက်နက်ချ၊ စစ်သုံ့ပန်း စစ်သားနဲ့ ရဲ၊ ပြည်သူ့စစ် စုစုပေါင်း ၁၂၈ဦး ရှိဟု ပြည်သူ့ပန်းတိုင်က ထုတ်ပြန်ပါတယ်။

ပြည်သူ့ပန်းတိုင်က အပတ်စဉ်တက်ဆက်နေတဲ့ စကစရဲ့ ပြေးဟပရောဂျက် ယခုတပတ် အစီအစဉ် ဖော်ပြချက်မှာ စက်တင်ဘာ ပထမပတ်အတွင်း အလင်းဝင်ရောက်တဲ့ စစ်ကောင်စီတပ်ဖွဲ့ဝင်တွေရဲ့ အခြေအနေတွေကို အသိပေးထားတာပါ။

အလင်းဝင် လက်နက်ချ စစ်သုံ့ပန်းအဖြစ် ဖမ်းဆီးခံရမှု အခြေအနေကိုလည်း ဖော်ပြထားရာ စက်တင်ဘာ ပထမပတ်အတွင်း စစ်ကောင်စီတပ်သား ၁၂၈ဦးအနက် ၁၂၁ဦးဟာ စစ်သုံ့ပမ်းအဖြစ် ဖနမ်းဆီးခံရတာဖြစ်ပြီး ၇ဦးက အလင်းဝင်ပူးပေါင်းလာသူတွေဖြစ်တယ်လို့ ဆိုပါတယ်။

စစ်သုံ့ပန်း ၁၂၁ဦးအနက် ၁၁၈ဦးဟာ ကချင်ပြည်နယ်မှာ ဖြစ်ပြီး ၃ဦးက တနင်္သာရီတိုင်းက ဖြစ်ပါတယ်။ စစ်သုံ့ပန်း ၁၂၁ဦးအနက် ၃၄ဦးဟာ စစ်မှုထမ်းတပ်သားသစ်တွေလို့ ဖော်ပြပါတယ်။

ကချင်ပြည်နယ်မှာ စစ်သုံ့ပန်းအဖြစ် ဖမ်းဆီးခံရသူတွေဟာ စက်တင်ဘာ ၂ရက် ရွှေကူ-ဗန်းမော်ကြား ရေကြောင်းတိုက်ပွဲမှာ KIA ပူးပေါင်းတပ်က ဖမ်းမိခဲ့တာဖြစ်ပါတယ်။ စစ်တပ်သင်္ဘောတွေ ရွှေကူကနေ ဗန်းမော်ကို ဆန်တက်စဉ် KIA ပူးပေါင်းတပ်က ကြားဖြတ်တိုက်ခိုက်ခဲ့ရာ သင်္ဘောအချို့ဟာ စင်းခန်းတံတားအနီးမှာ တိုက်ခိုက်ခံရပြီး ကမ်းကပ်ကာ လက်နက်ချ အလင်းဝင်ခဲ့တာဖြစ်ပါတယ်။ အဲဒီလိုလက်နက်ချ အလင်းဝင်တဲ့ စစ်သုံ့ပမ်း ၁၅၁ဦး ရှိရာ စစ်ကောင်စီတပ်က ဗိုလ်ကြီး ၂ဦးအပါအဝင် လက်နက်ကိုင်တပ်ဖွဲ့ဝင် ၁၁၈ဦး ပါဝင်ပြီး ကျန်တာတွေကတော့ အမျိုးသမီးတွေ၊ ကလေးတွေနဲ့ အရပ်သားအချို့ဖြစ်ပါတယ်။

ဖမ်းမိစစ်သုံ့ပန်းတွေကို KIOက နိုင်ငံတကာ စစ်သုံ့ပန်း ဥပဒေနဲ့အညီ စောင့်ရှောက်ထားကြောင်း KIO/KIA သတင်းပြန်ကြားရေးဌာနက ဖော်ပြထားပါတယ်။

“စစ်သားတွေ စစ်တိုက်ရတာ၊ အသက်ပေးရတာ မထူးဆန်းပါဘူး။ ထူးဆန်းတာက ကိုယ်တိုင် ကာကွယ်ပေးမယ်လို့ သစ္စာဆိုထားတဲ့ ပြည်သူနဲ့ ပြန်တိုက်နေကြရတာပါ။စစ်သားတွေ ထောင်ပေါင်းများစွာ အသက်ပေးရ၊ ကိုယ်အင်္ဂါစွန့်ရ၊ မိသားစုတွေ သေကွဲ/ရှင်ကွဲ ကွဲပြီး ငရဲပွက်သလို ခံစားနေကြရတာ ဘာအတွက်ပါလဲ။စစ်တပ်က ကိုယ့်အလုပ်ကိုယ်မလုပ်ဘဲ နေရာတကာပါလို့ တိုင်းပြည်ပျက်ခဲ့ရကြောင်း ၂၁ ရာစု မြန်မာ့သမိုင်းသင်ခန်းစာမှာ သင် ဘယ်ဖက်က ပါမလဲ၊ ပြည်သူတွေ စောင့်ကြည့် မှတ်တမ်းတင်နေကြောင်း ပြည်သူ့ပန်းတိုင်က သတိပေးလိုပါတယ်” လို့ ပြည်သူ့ပန်းတိုင် ရဲ့ ဒီကနေ့ ထုတ်ပြန်ချက်မှာ ရေးသားထားပါတယ်။

ပြည်သူ့ပန်းတိုင်က ကောက်ယူထားတဲ့ မှတ်တမ်းများအရ ၂၀၂၅ ဇန်နဝါရီလမှ ၂၀၂၆ စက်တင်ဘာလ ပထမပတ် အထိ အလင်းဝင်ပူးပေါင်းနဲ့ လက်နက်ချ၊ စစ်သုံ့ပန်း စုစုပေါင်း ၃၉၄၉ ဦးထိရှိဟု အသိပေးထားပါတယ်။

(ဗန်းမော်မြို့တက်တဲ့စစ်သင်္ဘောအုပ်စုက ဖမ်းမိတဲ့ စစ်သုံ့ပန်းတွေကို တွေ့ရစဉ်။ ဓာတ်ပုံ - Screemgrab)

■​ဆောင်းပါး

သိပ္ပံပညာရှင်​​တွေကို အစွန်းရောက်ငလျင်ဖြစ်စဉ် လေ့လာခွင့်ရစေခဲ့တဲ့ "U-turn ပြန်ကွေ့တဲ့ ရှားပါး‘ဘူမရန်း’ငလျင်ကြီး

■၂၀၂၅ မတ် ၂၈ စစ်ကိုင်းငလျင်ကြီးက​ပေးတဲ့ ငလျင်သင်ခန်းစာသစ်

-ဥဂ္ဂါရေးသားသည်။

ကမ္ဘာကို တုန်လှုပ်စေခဲ့တဲ့ ၂၀၂၅ ခုနှစ် မတ်
လ ၂၈ ရက်နေ့ မြန်မာနိုင်ငံ၊စစ်ကိုင်းမြို့အနီးဗဟိုပြုလှုပ်ခတ်သွားခဲ့တဲ့ ငလျင်ကြီးဟာ လူပေါင်းထောင်နဲ့ချီ အသက်ဆုံးရှုံးစေခဲ့တဲ့သဘာဝဘေးအန္တရာယ်တစ်ခုသာမဟုတ်ပါဘူး။အဲဒီငလျင်ဟာကမ္ဘာတစ်ဝန်းက ငလျင်ပညာရှင်တွေကိုပါ အံ့အားသင့်စေခဲ့ပြီး နှစ်ပေါင်းများစွာ လက်ခံထားခဲ့တဲ့ ငလျင်လှုပ်ခတ်ပုံဆိုင်ရာ အယူအဆတချို့ကို ပြန်လည်သုံးသပ် စေခဲ့ပါတယ်။

အကြောင်းကတော့ဒီငလျင်ဟာ "Boomerang Supershear"လို့ ခေါ်တဲ့ အလွန်ရှားပါးတဲ့ ငလျင်လှုပ်ခတ်မှု ပုံစံမျိုး ဖြစ်ပေါ်ခဲ့တာကြောင့် ဖြစ်ပါတယ်။ တစ်နည်းအား
ဖြင့်ရှေကိုသာတိုးသွားရမယ့်ငလျင်ပြတ်ရွေ့ဟာရုတ်တရက်ယူတန်း (U-turn)​နောက်ပြန်ကွေ့လာတဲ့ထူးဆန်းတဲ့အပြုအမူကိုပြသခဲ့တာ​ကြောင့်ပါ။

မတ်လ ၂၈ ရက် မနက်ပိုင်းမှာစစ်ကိုင်းတိုင် ၊စစ်ကိုင်းမြို့အနီး နဲ့ ဗဟိုပြုပြီးပြင်းအား ရစ်ချာတာစ​ကေး ၇.၇ နဲ့ ၇.၉ အကြားရှိတဲ့အလွန်ပြင်းထန်တဲ့ငလျင်ကြီးလှုပ်ခတ်ခဲ့ပါတယ်။ငလျင်ကြီး လှုပ်ပြီး ၁၂ မိနစ်အကြာမှာပဲ မန္တလေးမြို့၊တံတားဦးမြို့နယ်မှာ ပြင်းအား
၆.၇ ရှိတဲ့​နောက်ဆက်တွဲငလျင်ကြီးထပ်မံလှုပ်ခတ်ပါတယ် ။

ဒီငလျင်ကြီယရဲ့ ရိုက်ခတ်မှုဟာ မြန်မာနိုင်
ငံတစ်ဝန်းသာမကအိမ်နီးချင်းနိုင်ငံတွေထိခံစားခဲ့ရပါတယ်။ထိုင်းနိုင်ငံမှာဆိုရင်ဆောက်လုပ်ဆဲအဆောက်အအုံတစ်လုံးတောင်ပြိုကျသွားခဲ့ရတဲ့အထိ သက်ရောက်မှု ပြင်းထန်ခဲ့ပါတယ်။

မြန်မာနိုင်ငံအတွင်းမှာတော့ အဆောက်အအုံပေါင်းများစွာပျက်စီးခဲ့ပြီးလမ်းပန်းဆက်
သွယ်ရေးနဲ့ အခြေခံအဆောက်အအုံတွေ အ
ကြီးအကျယ် ထိခိုက်ပျက်စီးသွားခဲ့တာကြောင့်မိသားစုပေါင်းများစွာအိုးမဲ့အိမ်မဲ့ ဖြစ်ခဲ့ရပါတယ်။

အာဏာသိမ်းစစ်တပ်ရဲ့တရားဝင်ထုတ်ပြန်ချက်အရလူ ၃,၇၇၀ကျော်သေဆုံးပြီး ၅,၀၀၀ ထက်မနည်း ဒဏ်ရာရရှိခဲ့တယ်လို့ ဆိုပေမဲ့ ဂြိုဟ်တုဓာတ်ပုံတွေနဲ့ပျက်စီးမှုအတိုင်းအ
တာတွေကို လေ့လာထားတဲ့ ပညာရှင်တွေကတော့ အမှန်တကယ် သေဆုံးသူ အရေအ
တွက်ဟာ ဒီထက် ပိုများနိုင်တယ်လို့ ခန့်မှန်းထားကြပါတယ်။

ဒီငလျင်ဖြစ်ပွားခဲ့တဲ့နေရာကမြန်မာနိုင်ငံရဲ့ အရေးအကြီးဆုံးပြတ်ရွေ့ကြောဖြစ်တဲ့စစ်ကိုင်းပြတ်ရွေ့ပေါ်မှာပါ။ငလျင်ဆိုင်ရာ အ
ချက်အလက်တွေနဲ့ မြေပြင်လေ့လာချက်တွေအရဒီငလျင်ဟာမြန်မာနိုင်ငံမြောက်ပိုင်းကနေ တောင်ပိုင်းကပ္ပလီပင်လယ်ပြင်အထိမိုင် ၇၅၀ ခန့် (ကီလိုမီတာ ၁,၂၀၀ ခန့်) ရှည်လျားတဲ့ စစ်ကိုင်းပြတ်ရွေ့ကြောရဲ့ ဗဟိုပိုင်းမှာ စတင်လှုပ်ခတ်ခဲ့တာ ဖြစ်ပါတယ်။ဒီပြတ်ရွေ့ဟာ အိန္ဒိ
ယ​ကျောက်ထုချပ် (Indian Plate)နဲ့ ယူရေးရှား​ကျောက်ထုချပ် (Eurasian Plate) တို့ ဆုံတွေ့ရာ နယ်နိမိတ်လည်း ဖြစ်ပါတယ်။

အိန္ဒိယ​ကျောက်ထုချပ်ဟာတစ်နှစ်ကို ၂ လက်
မ(၅၀ မီလီမီတာ)နီးပါးအရှိန်နဲ့ မြောက်ဘက်ကိုဆက်တိုက် တိုးဝင်နေပြီးဟိမဝန္တာတောင်
တန်းဒေသမှာ ယူရေးရှား​ကျောက်ထုချပ်နဲ့ တိုက်မိနေပါတယ်။ အဲဒီဖိအားတွေဟာ စစ်ကိုင်းပြတ်ရွေ့ပေါ်မှာ တဖြည်းဖြည်း စုပုံလာတာကြောင့် ဒီပြတ်ရွေ့ဟာ ပြင်းအား ၇ အထက်ရှိတဲ့ ငလျင်ကြီးတွေကို နှစ် ၇၀ ၊၈၀ ကြာရင်ဖြစ်ပေါ်တက်တဲ့ ပြတ်ရွေ့တစ်ခုအဖြစ် လူသိများပါတယ်။

ငလျင်လှုပ်ပြီးနောက်ပိုင်းဖြစ်ပေါ်ခဲ့တဲ့ ​နောက်
ဆက်တွဲ​မြေငလျင်(Aftershocks)တွေဟာ ဗဟိုချက်ရဲ့ တောင်ဘက်မှာ အဓိက ဖြစ်ပေါ်ခဲ့တာကြောင့် ပညာရှင်တွေက ပြတ်ရွေ့ဟာ တောင်ဘက်ကိုပဲ ဆက်ဖြန့်သွားတယ်လို့ က
နဦး ယူဆခဲ့ကြပါတယ်။

ဒါပေမဲ့ နောက်ပိုင်းမှာ ထူးခြားဆန်းကြယ်တဲ့ အချက်တစ်ခုကို တွေ့ရှိခဲ့တာက ဗဟိုချက်ရဲ့ မြောက်ဘက်မှာရှိတဲ့ ငလျင်တိုင်းတာရေးစက်တွေမှာ ပီ-လှိုင်း (P-wave) လို့ခေါ်တဲ့ ငလျင်ကနေ အမြန်ဆုံးနဲ့ ပထမဆုံး ရောက်ရှိလာတဲ့ လှိုင်းကို မှတ်တမ်းတင်နိုင်ခဲ့ပြီး စက္ကန့် ၂၀ လောက် အကြာမှာ အလွန်ပြင်းထန်တဲ့ လှိုင်းတွေကို ထပ်မံ ဖမ်းယူရရှိခဲ့တာပါ။ ဒါဟာ ပုံမှန်အားဖြင့် လမ်းကြောင်းတစ်ခုတည်းကိုသာ ဆက်သွားလေ့ရှိတဲ့ ငလျင်တွေနဲ့ လုံးဝမတူတဲ့ အပြုအမူဖြစ်နေပါတယ်။

ဒီထူးခြားမှုကို ဂျပန်နိုင်ငံ ဆူကူးဘတက္က
သိုလ် (University of Tsukuba) က သုတေ
သနအဖွဲ့က အသေးစိတ် ပြန်လည်လေ့လာခဲ့ပြီး ဆစ်စမီကာ (Seismica) ဂျာနယ်မှာ သု
တေသနစာတမ်းထုတ်ပြန်ခဲ့ပါတယ်။သူတို့ရဲ့ တွေ့ရှိချက်အရ ဒီငလျင်ဟာ အဆင့်ပေါင်းများစွာနဲ့ အလွန်ရှုပ်ထွေးတဲ့ ပုံစံနဲ့ လှုပ်ခတ်ခဲ့တာ ဖြစ်ပါတယ်။

အဓိက ထူးခြားချက်ကတော့ ငလျင်ပြတ်ရွေ့ဟာ ပုံမှန်လို ဦးတည်ချက်တစ်ခုတည်းကိုသာ ဆက်မသွားဘဲ စတင်ချိန်မှာ တောင်ဘက်ကို အရှိန်နဲ့ ရွေ့သွားပြီးနောက် ရုတ်တရက် အရှိန်မလျော့ဘဲ မြောက်ဘက်ကို ယူတန်း (U-turn) ပြန်ကွေ့လာခဲ့တာပါ။ ဒီဖြစ်စဉ်ကို ဘူမရန်း အကျိုးသက်ရောက်မှု (Boomerang Effect) လို့ အမည်ပေးထားပါတယ်။ ဘူမရန်း (Boomerang) ဆိုတာ ဩစတြေးလျ ဒေသခံတိုင်းရင်းသားတွေ အသုံးပြုခဲ့တဲ့ ပစ်လက်

နက်တစ်မျိုး ဖြစ်ပါတယ်။ ပစ်လိုက်တဲ့အခါ လေထဲမှာ ကွေ့ပတ်ပြီး ပစ်တဲ့သူဘက်ကို ပြန်လှည့်လာနိုင်တဲ့ ထူးခြားချက်ရှိတာကြောင့်
ဒီငလျင်ရဲ့ ပြန်ကွေ့လာတဲ့ လမ်းကြောင်းနဲ့ နှိုင်းယှဉ်ခေါ်ဆိုခဲ့တာ ဖြစ်ပါတယ်။

ဒီထက်ပိုပြီး အံ့ဩစရာကောင်းတာက အဲဒီပြတ်ရွေ့ဟာ အက်စ်လှိုင်း (S-wave) လို့ခေါ်တဲ့ ရှီးယားလှိုင်း (Shear wave) ရဲ့ အရှိန်ထက်တောင် ပိုမြန်တဲ့နှုန်းနဲ့ ရွေ့လျားခဲ့တာပါ။

ရှီးယားလှိုင်း (Shear wave) ဆိုတာ ငလျင်ဖြစ်ပေါ်တဲ့အခါ မြေထုအတွင်း ဖြတ်သန်းသွားတဲ့ ဒုတိယအမျိုးအစား ငလျင်လှိုင်းတစ်မျိုး ဖြစ်ပါတယ်။ ဒီလှိုင်းဟာ မြေသားတွေကို လှိုင်းသွားတဲ့ ဦးတည်ချက်နဲ့ ထောင့်မှန်အ
တိုင်း ဘေးတိုက်လှုပ်ရှားစေတဲ့အတွက် “ရှီးယား (Shear)” လို့ ခေါ်တာပါ။

ပုံမှန်အားဖြင့် ပြတ်ရွေ့ကြော (Fault) ကွဲထွက်ရွေ့လျားတဲ့ အရှိန်ဟာ ဒီရှီးယားလှိုင်းရဲ့ အရှိန်ထက် နှေးလေ့ရှိပါတယ်။ ဒါပေမဲ့ ဒီငလျင်မှာတော့ ပြတ်ရွေ့ကွဲထွက်မှုဟာ ရှီးယားလှိုင်းထက်တောင် ပိုမြန်တဲ့ အရှိန်နဲ့ ဖြန့်ကျက်သွားခဲ့ပါတယ်။

ဒီလို ပုံမှန်မဟုတ်ဘဲ ပြတ်ရွေ့ကွဲထွက်မှုအရှိန်က ရှီးယားလှိုင်းကို ကျော်လွန်သွားတဲ့ ဖြစ်စဉ်ကို ငလျင်ပညာရှင်တွေက စူပါရှီးယား ရပ်ချာ (Supershear rupture) လို့ ခေါ်ပါတယ်။
အလွယ်ပြောရရင် ပြတ်ရွေ့ကွဲထွက်ရွေ့လျားမှုဟာ ပုံမှန်ငလျင်တွေထက် အလွန်မြန်ဆန်တဲ့ အရှိန်နဲ့ ဖြန့်ကျက်သွားတဲ့ ရှားပါးဖြစ်စဉ်တစ်ခု ဖြစ်ပါတယ်။

ဒီငလျင်မှာတော့ ပြတ်ရွေ့ကြော မိုင် ၂၅၀ ခန့် (ကီလိုမီတာ ၄၀၀ ခန့်) ဟာ စက္ကန့် ၈၀ အတွင်းမှာတင်လှုပ်ခတ်သွားခဲ့ပါတယ်။

ဒီလိုဘူမရန်းစူပါရှီးယား (Boomerang Supershear) ပုံစံငလျင်မျိုးဟာ ကမ္ဘာပေါ်မှာ အလွန်ရှားပါးပြီး နားလည်ရခက်တဲ့ ဖြစ်စဉ်တစ်ခုအဖြစ်သတ်မှတ်ထားပါတယ်။ ဘာကြောင့် အန္တရာယ်ပိုများသလဲ ဆိုတော့ င
လျင်စွမ်းအင်တွေကို ဗဟိုချက်နဲ့ ဝေးတဲ့နေရာတွေအထိ ပိုမိုပြင်းထန်စွာ သယ်ဆောင်ပေး နိုင်တာကြောင့် မမျှော်လင့်ထားတဲ့ ဒေသတွေမှာတောင် ပျက်စီးမှု ကြီးမားလာနိုင်လို့ ဖြစ်ပါတယ်။

၂၀၂၅ ခုနှစ် မတ်လ ၂၈ ရက်နေ့က မန္တလေးငလျင်ဟာ မြန်မာပြည်သူတွေအတွက် မမေ့နိုင်တဲ့ ဝမ်းနည်းဖွယ် သဘာဝဘေးတစ်ခု ဖြစ်ခဲ့သလို သိပ္ပံလောကအတွက်လည်း ဆယ်စုနှစ်တစ်စုအတွင်းအရေးအပါဆုံးငလျင်လေ့
လာမှုတွေထဲက တစ်ခု ဖြစ်လာခဲ့ပါတယ်။

ငလျင်တစ်ခု ဘယ်လိုစတင်တယ်၊ ဘယ်လိုဖြန့်သွားတယ်ဆိုတဲ့ အယူအဆဟောင်းတွေကို ပြန်လည်စဉ်းစားစေခဲ့တဲ့ ဒီရှားပါးဘူမရန်း စူပါရှီးယား(Boomerang Supershear) ဖြစ်
စဉ်က နောင်တစ်ချိန် ကမ္ဘာ့နေရာအသီးသီးမှာ ဖြစ်လာနိုင်တဲ့ ငလျင်ကြီးတွေကို ပိုမိုတိကျစွာ ခန့်မှန်းနိုင်ဖို့၊ အန္တရာယ်လျှော့ချနိုင်ဖို့နဲ့ လူအသက်ပေါင်းများစွာကို ကယ်တင်နိုင်မယ့် သိပ္ပံဆိုင်ရာ အဖြေသစ်တွေ ရှာဖွေရာမှာ အရေးပါတဲ့ သော့ချက်တစ်ခု ဖြစ်လာနိုင်ပါတယ်။

ကိုးကားချက်များ - • Futura-Sciences
• University of Tsukuba သုတေသနစာတမ်း (Seismica Journal)

ဗန်းမော်ကပြန်ဆင်းလာပြီး KIA ပူးပေါင်းတပ်တိုက်ခိုက်လို့လွတ်လာတဲ့ စစ်တပ်သင်္ဘော ဇင်းဘုံမှာ ထပ်မံတိုက်ခိုက်ခံရပြီး နစ်မြုပ်

စက်တင်ဘာ ၁၄၊ ၂၀၂၆။ ထားမြတ်/People’s Spring

ကချင်ပြည်နယ်၊ ဗန်းမော်မြို့က ပြန်စုန်ဆင်းလာတဲ့ စစ်သင်္ဘောတွေကို ကချင်လွတ်လပ်ရေးတပ်မတော်(KIA) ပူးပေါင်းတပ်က ဗန်းမော်နဲ့ ရွှေကူမြို့နယ်ကြား မြစ်ကြောင်းတလျှောက်မှာ ကြားဖြတ်တိုက်ခိုက်ရာ စက်တင်ဘာ ၁၄ရက် မနက်မှာ စစ်တပ်သင်္ဘော ၁စီး ထပ်မံတိုက်ခိုက်ခံရပြီး နစ်မြုပ်သွားဟု ကချင်စစ်ရေးသတင်းရင်းမြစ်က ပြောပါတယ်။

စစ်တပ်ဟာ ဗန်းမော်မြို့ရှိ သင်္ဘောတွေနဲ့ စက်တင်ဘာ ၁၃ရက်မှာ ထပ်မံ စုန်ဆင်းလာရာ အဲဒီနေ့မှာ တိုက်ခိုက်ခံရပြီး သင်္ဘောအချို့ နစ်မြုပ်မီးလောင်ခဲ့တယ်လို့ သတင်းရင်းမြစ်က ပြောပါတယ်။

စက်တင်ဘာ ၁၃ရက်က တိုက်ခိုက်ခံရတဲ့ သင်္ဘော ၆စီး ရှိပြီး အဲဒီထဲက ၃စီးနစ်မြုပ်ကာ ၁စီးပျက်စီးခဲ့တယ်လို့ သတင်းရင်းမြစ်က ပြောပါတယ်။

မနေ့က သင်္ဘော ၆စီးလုံးထိခိုက်ခဲ့ပြီး ၄စီးနစ်မြုပ် ၂စီးမီးလောင်ခဲ့တယ်လို့ သတင်းရင်းမြစ်က ကနဦး ပြောထားပေမဲ့ ဒီမနက်မှာတော့ မနေ့က ထိခိုက်ခဲ့တဲ့ သင်္ဘောအရေအတွက်ဟာ ၄စီးသာရှိတယ်လို့ ပြန်လည်ပြင်ဆင် ပြောပါတယ်။

" ဗန်းမော်က ဆင်းလာတဲ့ သင်္ဘော ၁စီး ဒီမနက် ဇင်းဘုံနားမှာ မြုပ်သွားပြီ။ မနေ့က ၃ စီးမြုပ် ၁စီးပျက်စီး။ ဒီနေ့ ၁စီးဆိုတော့ ၅စီးပေါ့။မနေ့က လွတ်သွားတဲ့ဟာတွေ” လို့ ကချင်စစ်ရေးသတင်းရင်းမြစ်က ပြောပါတယ်။

အခြားသတင်းရင်းမြစ်တဦးကလည်း ဒီမနက် တိုက်ခိုက်ခံရတဲ့ သင်္ဘောဟာ မနေ့က ဗန်းမော်မြို့နယ် အောက်စာဝတီး တစ်ဝိုက် ဆူးပုတ်ကုန်းမှာ တိုက်ခိုက်ခံရလို့ စက်ပျက်ပြီး မျောလာတဲ့ သင်္ဘောဖြစ်တယ်လို့ ပြောပါတယ်။

အဲဒီသင်္ဘောဟာ ဒီမနက်စက်တင်ဘာ ၁၄ရက် တိုက်ခိုက်ခံရမှုမှာ ရေယာဉ် တိုက်ရိုက်ထိမှန် မီးလောင်နစ်မြုပ်သွားတာလို့ ဆိုပါတယ်။

လတ်လောမှာ စစ်သင်္ဘောတွေ ဖြတ်သန်းရာ ဗန်းမော်မြို့နယ် စင်းခန်းဒေသမှာ မြေပြင်တိုက်ပွဲတွေ တိုက်ပွဲတွေဆက်ရှိနေဆဲဖြစ်ကြောင်း ကချင်စစ်ရေးသတင်းရင်းမြစ်က ပြောပါတယ်။

“ဗန်းမော်ဘက်တော့ စစ်ရေး မထူးသေးဘူး။အခု စင်းခန်းနားမှာတော့ နေ့တိုင်း တိုက်ပွဲရှိတယ်” လို့ ကချင်စစ်ရေးသတင်းရင်းမြစ်က ပြောပါတယ်။

ဗန်းမော်မြို့ကို စစ်အင်အားဖြည့်ဖို့ ကြိုးပမ်းလာတဲ့ စစ်သင်္ဘော အများအပြားကို ရွှေကူနဲ့ ဗန်းမော်ကြားမှာ တိုက်ခိုက်ဖျက်ဆီးထားနိုင်ကြောင်း KIA သတင်းပြန်ကြားရေးဌာနက အသိပေးထားပါတယ်။

တိုက်ခိုက်ဖျက်စီးခဲ့တဲ့ သင်္ဘောအရေအတွက် အတိအကျ ထုတ်ပြန်တာမရှိပေမဲ့ စစ်ရေးသတင်းရင်းမြစ်တွေရဲ့ ပြောပြချက်အရ ၂၀၂၆ ဩဂုတ် ၂၇ရက်ကနေ စက်တင်ဘာ ၁၄ရက်အထိ စစ်သင်္ဘောတွေအပါအဝင် တွန်းသင်္ဘော၊ သံခွန်သင်္ဘော စုစုပေါင်း စစ်တပ်သင်္ဘော ၂၀စီးနီးပါးကို KIA ပူးပေါင်းတပ်က တိုက်ခိုက်ဖျက်ဆီးထားနိုင်ခဲ့ပြီဖြစ်ပါတယ်။

တိုက်ခိုက်ဖျက်ဆီးခံရတဲ့ သင်္ဘောအများစုဟာ ဗန်းမော် နဲ့ ရွှေကူကြား စင်းခန်းဒေသ၊ ဇင်းဘုံဒေသ တွေမှာ ဖြစ်ပါတယ်။ ရွှေကူကနေ ဗန်းမော်မြို့ကို သင်္ဘောတွေ ဆန်အတက်မှာ တိုက်ခိုက်ဖျက်ဆီးခံရတာရှိသလို ဗန်းမော်မြို့ကနေ ပြန်စုအဆင်းမှာလည်း တိုက်ခိုက်ဖျက်ဆီးခံရတာရှိပါတယ်။

အဲဒီလို တိုက်ခိုက်ခံရလို့ စစ်တပ်ဘက်က သေဆုံးထိခိုက်တာ၊ ရေထဲခုန်ချ ရေစီးနဲ့ မျောပါသွားတာ၊ KIA ပူးပေါင်းတပ်ထံ လက်နက်ချတာတွေ ရှိခဲ့ပါတယ်။

KIA ရဲ့ သတင်းထုတ်ပြန်ချက်အရ စက်တင်ဘာ ၂ရက် ရေကြောင်းတိုက်ပွဲမှာ စစ်တပ်က လက်နက်ချသူ ၁၅၀ ကျော်ရှိရာ အဲဒီထဲက ဗိုလ်ကြီး ၂ဦးအပါအဝင် ၁၁၈ဦးဟာ လက်နက်ကိုင်တပ်ဖွဲ့ဝင်တွေဖြစ်ပြီး ကျန်သူတွေကတော့ အမျိုးသမီး၊ ကလေးငယ်စတဲ့ တပ်မိသားစုဝင်နဲ့ အရပ်သားအချို့ဖြစ်တယ်လို့ ဆိုပါတယ်။ စစ်သုံ့ပန်းတွေကို ကောင်းမွန်စွာ စောင့်ရှောက်ထားကြောင်းလည်း KIA က ထုတ်ပြန်ထားပါတယ်။


(စစ်သင်္ဘောကို KIA ပူးပေါင်းတပ်က တိုက်ခိုက်ဖျက်ဆီးနေစဉ်။ ရုပ်သံ - CJ)

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ဗန်းမော်စစ်သင်္ဘော #ဇင်းဘုံတိုက်ခိုက်မှု #စစ်သင်္ဘောနစ်မြုပ်မှု #KIAပူးပေါင်းတပ်

စစ်ကိုင်းမှာ စစ်တပ်ယာဉ်တန်း တိုက်ခိုက်ခံရ

စက်တင်ဘာ ၁၄၊ ၂၀၂၆။ ဟာနာဆန်/People's Spring။

စစ်ကိုင်းမြို့နယ်မှာ စစ်တပ် ယာဉ်တန်းကို မိုင်းဆွဲတိုက်ခိုက်ရာ စစ်တပ်က ရမ်းသမ်းပစ်ခတ်မှုကြောင့် မြေပဲနှုတ်နေတဲ့ တောင်သူ ၁ ဦး သေဆုံးခဲ့ပါတယ်။

စက်တင်ဘာ ၁၃ ရက်က စစ်ကိုင်းမြို့၊ အမှတ်(၁၆)ရဲတပ်ရင်း အနီးမှာ မုံရွာမြို့အနောက်မြောက်တိုင်း စစ်ဌာနချုပ်(နမခ)ကနေ တပ်မ(၃၃) သွားတဲ့ ယာဉ်တန်း မိုင်းဆွဲတိုက်ခိုက်ခံရပြီး စစ်ကား ၁စီး ပျက်စီးသွားကြောင်း လင်းယုန်ညီနောင် ပြောက်ကျားတပ်ဖွဲ့(စစ်ကိုင်း)ရဲ့ တာဝန်ရှိသူက ပြောပါတယ်။

အဲဒီ ပျက်စီးသွားတဲ့ ကားကို ကရိန်းနဲ့ လာဆွဲချိန်မှာလည်း စစ်တပ်က လက်နက်ကြီး၊ လက်နက်ငယ်တွေနဲ့ ပတ်ဝန်းကျင်ကို ရမ်းသမ်းပစ်ခတ်ပြီး လမ်းကို အချိန်အတန်ကြာ ပိတ်ထားခဲ့ပါတယ်။ စစ်သားတွေက ကားပေါ်ကဆင်းပြီး ရမ်းသမ်းပစ်ခတ်ရင်း အသင့်ပြင်ထားတဲ့ မိုင်းကွင်းထဲ ဝင်လာတာမို့ ထပ်မံမိုင်းဆွဲတိုက်ခိုက်ခဲ့ကြောင်း လင်းယုန်ညီနောင် ပြောက်ကျားတပ်ဖွဲ့(စစ်ကိုင်း)ရဲ့ တာဝန်ရှိသူက ပြောပါတယ်။

"မိုင်းမိတဲ့အချိန်မှာပဲ ကားကြီး ၁စီးက လုံးဝ ပျက်စီးသွားတာ။ အချိန်အတော်ကြာမှ ‌ကရိန်းနဲ့ လာဆွဲသွားတာ။ ယာဉ်တန်းလာတဲ့အချိန် လုံခြုံရေး ယူပေးတဲ့ကောင်တွေပါ ကားကို မိုင်းမိတဲ့အချိန် သေတယ်၊ ကားပေါ်ကကောင်တွေ သေဆုံးထိခိုက်ရှိတယ်။ အဲ့နောက် ကင်းပုန်းနေရာတွေကို ၈၀ မမ လက်နက်ကြီးနဲ့ ပစ်တယ်။ အဲ့ဖြစ်စဉ်မှာလဲ သေဆုံးရှိတယ်။ အများဆုံး သေတာကကျ ယာဉ်တန်းကားပေါ်ကကောင်တွေ။ ပကားပေါ်ကနေ ဆင်းပီးတော့ပစ်တာ။ ပစ်ရင်းနဲ့ ကျနော်တို့ မိုင်းပွိုင့်ထဲကို ဝင်လာတာ၊ အဲ့အချိန် မိုင်းဆွဲလိုက်တာက အများကြီးကိုသေတာ"လို့ လင်းယုန်ညီနောင် ပြောက်ကျားတပ်ဖွဲ့(စစ်ကိုင်း)ရဲ့ တာဝန်ရှိသူက ပြောပါတယ်။

​ဒီဖြစ်စဉ်တွေအတွင်း စစ်တပ်က ထိခိုက်သေဆုံးမှုများပြီး စစ်တပ်ရဲ့ ရမ်းသမ်းပစ်ခတ်မှုကြောင့် မြေပဲနှုတ်နေတဲ့ တောင်သူ ၁ဦး သေဆုံးကာ နောက်တစ်ဦး ခြေထောက် သေနတ်မှန် ဒဏ်ရာရသွားခဲ့ကြောင်း အထက်ပါတာဝန်ရှိသူက ပြောပါတယ်။ စစ်အုပ်စုထိခိုက်မှုအခြေအနေတွေကိုတော့ အတည်ပြုလို့ မရသေးပါဘူး။

ကျည်တစ်တောင့် တစ်သောင်းနှုန်းနဲ့ ကူလို့ရတယ်လို့ဆိုတဲ့ လင်းယုန်ညီနောင် ပြောက်ကျားတပ်ဖွဲ့(စစ်ကိုင်း)ဟာ လက်ရှိ ကျည် ၃၀၀ဝ ကမ်ပိန်း ပြုလုပ်နေတယ်လို့ သိရပါတယ်။ စက်တင်ဘာ ၁၁ ရက်ကလည်း စစ်ဏမြို့ မြေစာရင်းရုံးနဲ့ သစ်တောရုံး ကြားမှာ ပါဆယ်မိုင်းတစ်လုံးနဲ့ ဖောက်ခွဲခဲ့ပြီး ဝန်ထမ်းတွေ CDM လုပ်ဖို့ သတိပေးခဲ့ပါသေးတယ်။

(ရုပ်သံ-လင်းယုန်ညီနောင် ပြောက်ကျားတပ်ဖွဲ့(စစ်ကိုင်း)

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #စစ်ကိုင်းစစ်ယာဉ်တန်း #မိုင်းဆွဲတိုက်ခိုက်မှု #စစ်ကိုင်းစစ်ရေး #စစ်ကောင်စီတပ် #မြန်မာ့စစ်ရေးသတင်း #SagaingConvoy #MilitaryConvoyAttack #SagaingConflict #MyanmarJunta #MyanmarNews

အင်းတော်ကြီးမှာ SNAတပ် စစ်ဆေးရေးဂိတ် ဗုံးကွဲပြီး ၅ဦး သေဆုံး

စက်တင်ဘာ ၁၄၊၂၀၂၆။ဇော်ရမ်း/People's Spring

ကချင်ပြည်နယ်၊ အင်းတော်ကြီးမြို့က စစ်တပ်ရဲ့ အထွေထွေအုပ်ချုပ်ရေးမှူးရုံးအနီးက ဂျိတ်လင်းစစ်ဆေးရေးဂိတ်မှာ တပ်စွဲထားတဲ့ စစ်တပ်လက်အောက်ခံ ရှမ်းနီ(SNA) တပ်ဖွဲ့ဝင် အချင်းချင်း ရန်ဖြစ်ပြီး လက်ပစ်ဗုံးပေါက်ကွဲလို့ ရှမ်းနီတပ်ဖွဲ့ဝင် ၅ဦး သေဆုံးတယ်လို့ ဒေသခံတွေက ပြောပါတယ်။

အဲ့ဒီဖြစ်စဉ်ဟာ စက်တင်ဘာ ၁၀ရက် ညက ဖြစ်ခဲ့ပြီး စစ်တပ်နဲ့ ရှမ်းနီတပ်က သတင်းမထွက်အောင် ဖုံးထားတယ်လို့ အင်းတော်ကြီးဒေသခံတစ်ဦးကပြောပါတယ်။

" လုံးတုံနဲ့ မိုင်းနောင်ရွာက SNA တပ်သားတွေ အချင်းချင်းဖြစ်တာ။ အရက်မူးတာလား၊ မူးယစ်ဆေးသုံးတာလားမသိဘူး။ လက်ပစ်ဗုံးခွဲပစ်လို့ ၅ယောက် ပွဲချင်းပြီး သေတယ်။ ၂ယောက်က မြစ်ကြီးနားဆေးရုံပို့ရတယ်"လို့ အင်းတော်ကြီးမြို့ ထွေအုပ်ရုံးနဲ့ နီးစပ်သူတစ်ဦးက ပြောပါတယ်။

နောက်ထပ်ဒေသခံတစ်ဦးကလည်း ဂျိတ်လင်းစစ်ဆေးရေးဂိတ်မှာ မိုင်းနောင်သားနဲ့ လုံးတုံးသား အချင်းချင်း လက်ပစ်ဗုံးအတူခွဲစားကြတယ်လို့ လူမှုကွန်ရက်ပေါ်တင်ပြီး နောက်ပိုင်းမှာ ပြန်ဖျက်သွားပါတယ်။

" စစ်တပ်ကရော SNA ကပါ သတင်းကို လိုက်ပိတ်နေတာ။ တင်ရင် အရေးယူမယ်လို့ ခြိမ်းခြောက်တာတွေရှိနေတယ်"လို့ မိုင်းနောင်ရွာဒေသခံတစ်ဦးက ပြောပါတယ်။

ဒီဖြစ်စဉ်နဲ့ ပတ်သက်ပြီး SNA က သတင်းထုတ်ပြန်ထားခြင်းမရှိသေးသလို အသေးစိတ်ကိုမေးမြန်းဖို့အတွက် ဆက်သွယ်လို့လည်းမရသေးပါဘူး။

ဂျိတ်လင်းစစ်ဆေးရေးဂိတ်ဟာ အင်းတော်ကြီး-ဖားကန့်လမ်းပေါ်က လုံးတုံစစ်ဆေးရေးဂိတ်အနီးမှာရှိပြီး မူလက ကချင်လွတ်လပ်ရေးတပ်မတော်(KIA)နဲ့ KPDF တပ်စွဲခဲ့တဲ့ဂိတ်ဖြစ်ပါတယ်။

ပြီးခဲ့တဲ့ ဇူလိုင်မှာ စစ်တပ်နဲ့ ရှမ်းနီတပ်က လေကြောင်းပစ်ကူနဲ့တိုက်ခိုက်ပြီး ပြန်သိမ်းယူထားတာလို့ ဒေသခံတွေက ပြောပါတယ်။

" တစ်လှည့်စီ တပ်စွဲနေတဲ့ ဂိတ်ပဲ။ အခုကတော့ SNA က ထိုင်ထားတယ်။ လက်ရှိစစ်ရေးအခြေအနေကတော့ ငြိမ်နေတယ်"လို့ ဒေသခံတစ်ဦးက ပြောပါတယ်။

SNA ဟာ စစ်wyfနဲ့ပူးပေါင်းပြီး တော်လှန်ရေးအင်အားစုတွေကို တိုက်ခိုက်နေတဲ့အဖွဲ့ဖြစ်ပါတယ်။

ကချင်ပြည်နယ်နဲ့ စစ်ကိုင်းတိုင်းကတိုက်ပွဲတွေမှာ စစ်တပ် စစ်ကြောင်းတွေနဲ့အတူ SNA တပ်တွေလည်း ပါဝင်နေပါတယ်။

အင်းတော်ကြီးမြို့ဟာ မိုးညင်းမြို့နယ်မှာပါဝင်ပြီး ဖားကန့်မြို့နယ်နဲ့လည်း ဆက်စပ်နေပါတယ်။ လက်ရှိမှာ မြို့ပေါ်ကိုထိန်းချုပ်ထားတဲ့ စစ်တပ်နဲ့ SNA က ဒေသခံလူငယ်တွေကို စစ်မှုထမ်းအတွက်လူသစ်စုဆောင်းဖမ်းဆီးတာတွေ ဆိုးရွားနေတယ်လို့ဒေသခံတွေက ပြောပါတယ်။

(စစ်တပ်လက်အောက်ခံ ရှမ်းနီ(SNA) တပ်ဖွဲ့ဝင်များ။ ဓာတ်ပုံ-SNA Army)

ဗန်းမော် ကောင်ဂျာယန်ရွာတိုက်ပွဲ စစ်တပ်စစ်ကြောင်းပျက်

▪️စစ်တပ် သေဆုံးသူများပြီး စစ်သုံ့ပန်းနဲ့ လက်နက်တွေ သိမ်းရ

စက်တင်ဘာ ၁၄၊ ၂၀၂၆။ ထားမြတ်/People’s Spring

ကချင်ပြည်နယ်၊ ဗန်းမော်မြို့နယ် ကောင်ဂျာယန် ကျေးရွာ စစ်ကြောင်းထိုးလာတဲ့ စစ်တပ်ကို ကချင်လွတ်လပ်ရေးတပ်မတော်(KIA) ပူးပေါင်းတပ်က တိုက်ခိုက်ခဲ့ရာ စစ်တပ်စစ်ကြောင်းတစ်ခုလုံးပျက်သွားပြီး အထိနာခဲ့ကြောင်း ကချင်စစ်ရေးသတင်းရင်းမြစ်က ပြောပါတယ်။

စက်တင်ဘာ ၁၂ရက် ညကတည်းက ကောင်ဂျာယန်ကျေးရွာမှာ တိုက်ပွဲဖြစ်ပွားခဲ့ရာ ဒီကနေ့ စက်တင်ဘာ ၁၄ရက်မနက်မှာ စစ်ကြောင်းတစ်ခုလုံးရှင်းလင်းနိုင်ခဲ့တယ်လို့ ဆိုပါတယ်။

“စစ်သုံ့ပန်းတောင် အယောက် ၂၀လောက်ဖမ်းရတာ။ သေတာကတော့ ၃၀ကျော်တယ်” လို့ ကချင်စစ်ရေးသတင်းရင်းမြစ်က ပြောပါတယ်။စစ်ကောင်စီတပ်ဖွဲ့ရဲ့ လက်နက်ခဲယမ်းတွေလည်း သိမ်းရကြောင်းလည်း အသိပေးပါတယ်။

KIA သတင်းပြန်ကြားရေးဌာနကလည်း ကောင်ဂျာယန်ဒေသ တိုက်ပွဲကို ကချင်ဘာသာနဲ့ ဖော်ပြခဲ့ရာ စစ်တပ်က ထိုးစစ်ဆင်လာတဲ့အပေါ် KIA ပူးပေါင်းတပ်က တိုက်ခိုက်ချေမှုန်းခဲ့တယ်လို့ အသိပေးထားပါတယ်။

စစ်တပ် အထိနာပြီးဆုတ်ခွာသွားတဲ့အပေါ် KIA ပူးပေါင်းတပ်က ဒရုန်း၊ လက်နက်ကြီးတွေနဲ့ ဆက်လက်တိုက်ခိုက်ခဲ့ကြောင်းလည်း ဖော်ပြထားပါတယ်။စစ်တပ်ဆုတ်ခွာသွားရာသို့ စစ်တပ်က လေကြောင်း ပစ်ကူပေးတိုက်ခိုက်ခဲ့တယ်လို့လည်း ဆိုပါတယ်။

KIA ပူးပေါင်းတပ်ဟာ ဗန်းမော်မြို့သိမ်းစစ်ဆင်ရေးကို ၂၀၂၄ ဒီဇင်ဘာကစတင်ခဲ့ရာ တိုက်ပွဲကြာမြင့်စွာ ဖြစ်ပွားလျက်ရှိပါတယ်။ စစ်ဆင်ရေးအစမှာ စစ်တပ်ရဲ့ တပ်ရင်းဌာနချုပ်အများအပြား မြို့ပေါ်က စစ်တပ်တပ်စခန်းနေရာအများအပြားကို KIA ပူးပေါင်းတပ်က သိမ်းပိုက်ထိန်းချုပ်နိုင်ခဲ့ပြီး ၂၀၂၅မှာ စစ်တပ်က ဗန်းမော်ကို ရေကြောင်းက စစ်အင်အားဖြည့်ပြီးနောက် အပြန်အလှန် ထိုးစစ်ဆင်မှုတွေ ရှိခဲ့ပါတယ်။

ဒီနှစ်မှာလည်း စစ်တပ်က ရေကြောင်းက အင်အားဖြည့်ခဲ့ရာ သင်္ဘောအများစုကို KIA ပူးပေါင်းတပ်က တိုက်ခိုက်ဖျက်ဆီးနိုင်ခဲ့ပေမဲ့ သင်္ဘောအချို့ ဗန်းမော်ကို ဆိုက်ကပ်နိုင်ခဲ့ပါတယ်။ လက်ရှိမှာ ဗန်းမော် ကပြန်ဆင်းတဲ့ စစ်သင်္ဘောတွေကို KIAက တိုက်ခိုက်လျက်ရှိသလို ဗန်းမော်မြို့နယ် စင်းခန်းရွာ အနီးမှာလည်း တိုက်ပွဲတွေ ဆက်တိုက်ပြင်းထန်လျက်ရှိပါတယ်။ စစ်တပ်က မြစ်ကြောင်းလုံခြုံရေး အရေးပါတဲ့ ဧရာ၀တီမြစ်ကူးတံတား(စင်းခန်း)ကို ပြန်ထိန်းချုပ်နိုင်ဖို့ ကြိုးပမ်းနေပေမဲ့ KIAက ဆက်လက်ထိန်းချုပ်ထားဆဲဖြစ်ပါတယ်။

(KIA ဂေါ်ရခါးတပ်ဖွဲ့ဝင်များကို သိမ်းပိုက်ထားတဲ့ စစ်တပ်စခန်းတစ်ခုရှေ့မှာ တွေ့ရစဉ်။ ဓာတ်ပုံ-Go Pal Rimal)

■အ​တွေးအမြင်

ကိုယ်တိုင်ရေးရာဇဝင်

ယောနသံ/People's Spring

UFC ဖိုက်တာဂျိုရှာဗန် နဲ့ ပန်တိုဂျာတို့ရဲ့ မ​ကျေပွဲ ချန်ပီယံခါးပတ်လုပွဲဒီတစ်ပါတ်ကြိုးဝိုင်းထဲမှာ ထိုးသတ်ဖို့ရှိပြီး ချန်ပီယံအစစ်က ဘယ်သူလဲဆိုတာ မကြာမီ အဖြေပေါ်ပါလိမ့်မယ်။ပြည်တွင်း နိုင်ငံရေးစင်မြင့်ပေါ်မှာတော့ ရေဘေးအကြောင်းပြုပြီး အမျိုးသားညီညွတ်​ရေးအစိုးရ-NUGနဲ့ အာဏာသိမ်းစစ်ကောင်စီတို့ကြား ဩဂုတ်လဆန်းက‌နေ စက်တင်ဘာလဆန်းအထိ ထိပ်တိုက်တွေ့ခဲ့ပါတယ်။

သဖန်းဆိပ်ဆည် နဲ့ ငဝန်မြစ် တို့က အရေး
ကြီးစာမေးပွဲမေးခွန်းတစ်စုံယူလာပြီး NUG အစိုးရနဲ့ စစ်ကောင်စီရှေ့ကို ပစ်ချလိုက်တာပါ။ငဝန်မြစ်ရေကာတာကျိုးကျလို့ဧရာဝ
တီတိုင်းမှာရေ ဘေးကြုံနေစဉ် စစ်ကိုင်းတိုင်းမှာလည်း သဖန်းဆိပ်ဆည်ရေ​လျှံပြီး သတိ​မ​ပေးဘဲ ရုတ်တရက်ဖောက်ချလို့ ဒေသခံသိန်းချီ ရေဘေးသင့်ခဲ့ပါတယ်။

စစ်ကိုင်းတိုင်း ဧရိယာကျယ်ကျယ်ထိန်းချုပ်ထားတဲ့ NUG အစိုးရက စစ်ကိုင်းတိုင်းရေဘေး ကယ်ဆယ်ရေးနဲ့ပြန်လည်ထူထောင်ရေးကို ဦးဆောင်ကိုင်တွယ်‌ခဲ့ပါတယ်။ဧရာ
ဝတီတိုင်းကိုအပြည့်အဝထိန်းချုပ်ထားတဲ့ စစ်တပ်ကလည်း ဧရာဝတီရေဘေးကို စီမံခန့်ခွဲခဲ့ပါတယ်။

လူထုကို ဗဟိုပြုတဲ့ အစိုးရတရပ်ရဲ့ အရည်
အချင်းတွေကိုစစ်ထုတ်တဲ့ ဒီပြိုင်ပွဲကို ၅မျဉ်း စောင်း နဲ့ ၁၄မျဉ်းစောင်းသားတွေက တိုက်ရိုက် Live ကြည့်ခွင့်ရခဲ့ကြပါတယ်။

●ဧရာဝတီရေဘေး လူလုပ်ဘေးလား သဘာဝဘေးလား

ဘာကြောင့် စိုက်ထူထားလဲဆိုတာ တိတိကျ
ကျမသိရတဲ့"ရိုးသား၊ကြိုးစားဧရာဝတီသား"
လို့ ရေးထားတဲ့ ဆိုင်းဘုတ်ကို ရန်ကုန်တိုင်းကနေဧရာဝတီတိုင်းထဲကိုဝင်တဲ့ ဗိုလ်မြတ်ထွန်းတံတားအဆင်း အဝေးပြေးလမ်းဆုံလမ်းခွမှာ မြင်ရပါလိမ့်မယ်။

အဲဒီဆိုင်းဘုတ် ပတ်ဝန်းကျင်မှာအရင်က မကြုံဖူးတဲ့ရေတွေဝင်နေပြီး ဧရာဝတီတိုင်းဟာ ကာလရှည်ရေဘေးသင့်တဲ့ ဒေသဖြစ်နေပါတယ်။

ဧရာဝတီတိုင်း၊ လေးမျက်နှာမြို့မှာ ပြီးခဲ့တဲ့ဇူလိုင်လ၃၀ရက်နေ့က ငဝန်မြစ်ရေကာတာကျိုးကျခဲ့ပါတယ်။ လေးမျက်နှာမြို့နယ်အပြင် ဘေးပတ်ဝန်းကျင်ဒေသတွေဖြစ်တဲ့ ဟင်္သာတ၊ ရေကြည်၊ ကျုံပျော်၊ သာပေါင်း၊ ကျောင်းကုန်း၊ ပန်းတနော်နဲ့ ငါးသိုင်းချောင်းမြို့နယ်တွေထဲကကျေးရွာတွေပါ ရေဝင်နေပါတယ်။၃၆နှစ်အတွင်း အဆိုးရွားဆုံးရေဘေးဒဏ်ကို ဒေသခံတွေ ရင်ဆိုင်နေရပါတယ်။

ရေကာဝာာမကျိုးခင်အခြေအနေမှာရေစိမ့်နေတာကို ဒေသခံတွေက ကြိုတင်သတင်း
ပေးပို့ခဲ့ပေမယ့် စစ်ကောင်စီရဲ့ဌာနဆိုင်ရာဝန်ထမ်းတွေက အချိန်မီလာမကြည့်ခဲ့ကြဘူးလို့ မြို့ခံတွေကပြောပါတယ်။

"လေးမျက်နှာမှာမြို့ပေါ်ရပ်ကွက်၅ ခုပဲရှိပေမယ့် မြို့ကြီးတွေမှာလို ဌာနဆိုင်ရာရုံးပေါင်းစုံရှိတယ်။ ဘာကြောင့်ဖွင့်ထားမှန်းလည်းမသိဘူး။အလုပ်လည်းမလုပ်ကြဘူး။ တာကျိုးတာကို ကျနော်တို့မြို့ခံတွေသံသယအများကြီးရှိတယ်"လို့လေးမျက်နှာမြို့ခံအမျိုးသားတဦးကပြောပါတယ်။

လေးမျက်နှာမြို့နယ်ဟာ ရခိုင်ရိုးမနဲ့ဆက်စပ်နေပြီးအာရက္ခတပ်တော်(AA)နဲ့ မဟာမိတ်တွေရဲ့ထိုးစစ်လမ်းကြောင်းကိုဖြတ်တောက်ချင်လို့ စစ်ကောင်စီက ရေကာတာကို တစ်ဖက်လက်နဲ့ ချိုးချခဲ့တာလို့ ဒေသခံတွေကိုယ်တိုင်သံသယရှိနေပါတယ်။

ရေကာတာကျိုးပြီးတဲ့နောက်မြို့နယ်၆ခုထက်မနည်းကဒေသခံတွေ သောင်းချီပြီး အိုးပစ်
အိမ်ပစ်ထွက်‌ပြေးခဲ့ကြရပါတယ်။ကျိုးကျတဲ့ ရေကာတာကို ရက်အနည်းငယ်အတွင်းပိတ်
ဆို့နိုင်မယ်လို့စစ်တပ်ခန့် ဧရာဝတီတိုင်းဝန်
ကြီးချုပ်ဦးအေးကျော်ကတလွဲပြောခဲ့ပါတယ်။ ဒါပေမယ့်တစ်လကျော်မှ ပိတ်နိုင်ခဲ့သလို အောင်မြင်စွာပိတ်ပြီးကြောင်းကြေညာပြီး နောက်တစ်နေ့မှာပဲပြန်ပွင့်ကျလို့ ဒေသခံတွေ နှစ်ထပ်ကွမ်း ဒုက္ခရောက်ခဲ့ပါတယ်။

ဧရာဝတီတိုင်းဟာ စပါးကျီဒေသဖြစ်တဲ့အလျှောက်စပါးခင်းတွေရေမြုပ်ခဲ့ပါတယ်။ ၁၄
ရက်အတွင်းရေပြန်ကျရင် ‌စပါးခင်းတွေမပျက်စီးနိုင်ဘူးလို့ စစ်အုပ်စုကသတင်းအမှားထုတ်ပြန်ခဲ့ပါတယ်။လက်ရှိမှာတစ်လကျော်ကြာအထိ ရေမြုပ်နေလို့ လယ်ဧကများစွာပျက်စီးခဲ့ပေမယ့် စစ်ကောင်စီရဲ့ ထုတ်ပြန်ချက်တွေမှာ လယ်သမားတွေပြန်လည်ထူ
ထောင်ရေးအတွက် တိကျတဲ့အစီအမံတွေပါဝင်မနေပါဘူး။

တာကျိုးပေါက်ကိုအောင်မြင်စွာပိတ်ပြီးကြောင်း စက်တင်ဘာလ၈ရက်နေ့ကကြေ
ညာချက်ပါ စာပိုဒ်တစ်ပိုဒ်ကို ဖတ်ကြည့်ပါ။ စစ်အာဏာရှင်ရဲ့ စရိုက်ကို မြင်ပါလိမ့်မယ်။

"ဖြစ်စဉ်စတင်သည်နှင့် ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးအေးကျော် ဦးဆောင်ကာ အရေးပေါ် ကယ်ဆယ်ရေးနှင့်တုံ့ပြန်ရေးအဖွဲ့များ စတင်စုဖွဲ့ခဲ့ပြီး အနောက်
တောင်တိုင်းစစ်ဌာနချုပ်မှ တပ်မတော်သားများ၊ မီးသတ်တပ်ဖွဲ့ဝင်များ၊ မြန်မာနိုင်ငံရဲတပ်ဖွဲ့ဝင်များနှင့် အနယ်နယ်အရပ်ရပ်မှ လူမှုကူညီရေးအသင်းအဖွဲ့များ စသည့်အဖွဲ့များပူးပေါင်း၍ အရေးပေါ်ကူညီကယ်ဆယ်ရေးလုပ်ငန်းများကို ဆောင်ရွက်ခဲ့ပြီး ပြည်သူများအား ယာယီရေရှောင်စခန်းများကို အချိန်မီ ပို့ဆောင်ပေးနိုင်ခဲ့သဖြင့် လူနှင့်တိရစ္ဆာန် ထိခိုက်မှုမရှိခဲ့ခြင်းဖြစ်သည်" တဲ့။

အမှန်တကယ် မြေပြင်မှာတော့ ဧရာဝတီတိုင်းရေဘေးမှာဒေသခံတွေဟာဆိုးရွားတဲ့လူမှုဒုက္ခတွေကိုရင်ဆိုင်နေရတာဖြစ်ပါတယ်။ ရေ

မြုပ်ရပ်ကွက်နဲ့ကျေးရွာတွေမှာနေထိုင်ကြရတဲ့သူတွေဟာ ရေကာတာတွေပေါ် နဲ့ ပုသိမ်
-ဟင်္သာတကားလမ်းဘေးမှာ တဲထိုးပြီးနေကြရဆဲဖြစ်သလို ရေမြုပ်ပြီး ပျက်စီးသွားတဲ့ စပါးခင်းတွေအတွက်လည်းဘာအကူအညီမှမရ​သေးဘဲအဖြေရှိမနေပါဘူး။ရေဘေးကြောင့် ပျက်စီးတဲ့ လယ်ဧကစာရင်းကိုမထုတ်ပြန်တဲ့စစ်ကောင်စီက သေဆုံးသူစာရင်းကိုလည်း မထုတ်ပြန်ပါဘူး။ ဒါပေမယ့် ရေ
ဘေးကြောင့် ဧရာဝတီတိုင်းမှာသေဆုံးသူ ၁၇ဦးထက်မနည်းရှိခဲ့ပါတယ်။ ဒါ့အပြင် ရေကြည်မြို့နယ်အတွင်း မိကျောင်းတစ်ကောင်တွေ့လို့ ဒေသခံတွေစိုးရိမ်ထိတ်လန့်ခဲ့ကြပေမယ့်စစ်အုပ်စုကလျစ်လျူရှုခဲ့ပါတယ်။
ဒေသခံတွေက ပိုက်တွေနဲ့ ဖမ်းဖို့ ကြိုးစားခဲ့ကြပေမယ့် ဖမ်းမမိပါဘူး။အဲဒီမိကျောင်းက ဒေသတွင်းကစီးပွားရေးလုပ်ငန်းရှင်တစ်ဦး တရားမဝင်မွေးမြုုထားတာကနေ လွတ်သွားတာမို့လို့ စစ်တပ်က မသိချင်ယောင်ဆောင်နေခဲ့တယ်လို့ဒေသခံတွေကပြောပါတယ်။

စစ်တပ်ခန့်ဝန်ကြီးချုပ်ဦးအေးကျော်ကလည်း ရေဘေးကူညီရေးကိုအကြောင်းပြပြီး ဓနုဖြူ၊ ညောင်တုန်း၊ပုသိမ်၊ကျုံပျော်၊ ဟင်္သာတနဲ့ လေးမျက်နှာမြို့တွေမှာ ဒေသခံစီးပွားရေးလုပ်ငန်းရှင်တွေနဲ့ တရုန်းရုန်း ဖြစ်နေခဲ့ပါတယ်။ဝာာကျိုးပေါက်မှာသုံးတဲ့ ယန္တရားတွေ၊ သံထည်တွေအတွက်စီးပွားရေးသမားတွေနဲ့ အကျိုးစီးပွား အပေးအယူရှိနေတယ်လို့ သ
တင်းတွေထွက်နေပါတယ်။

အာဏာသိမ်းခေါင်းဆောင်ဗိုလ်ချုပ်မှူးကြီးမင်းအောင်လှိုင်ကလည်းသူ့တပည့် ကျော်ကို အကာအကွယ်ပေးပါတယ်။ ဩဂုတ်လ ၉ရက်နေ့က စစ်ကောင်စီခေါင်းဆောင်ရဲ့ ဧရာဝတီတိုင်းခရီးစဉ်မှာ တိုင်းအစိုးရဟာ ပြည်သူတွေဘေးကင်းအောင် စီမံနိုင်ခဲ့တယ်လို့ဆိုခဲ့ပါတယ်။ရေပြန်လည်ကျဆင်းပြီးနောက်ပိုင်း ပြည်သူတွေအနေနဲ့ တစ်ဦးချင်းစီကြိုးစားအားထုတ်မှုနဲ့အတူပြန်လည်ထူ
ထောင်ရေးလုပ်ငန်းတွေ ဆောင်ရွက်မယ်ဆို မူလအခြေအနေကို အမြန်ဆုံးပြန်လည်ရောက်ရှိနိုင်မှာလို့ ပြောသွားပါတယ်။

အာဏာသိမ်းခေါင်းဆောင်နဲ့ဧရာဝတီတိုင်းဝန်ကြီးချုပ်ကတော့ဒေသခံတွေနဲ့တွေ့ဆုံတိုင်း"သဘာဝဘေးဆိုတာမမျှော်မှန်းနိုင်တဲ့ဘေး"လို့အာဂုံဆောင်ပြီးသူတို့မှာအားနည်း
ချက်မရှိခဲ့ကြောင်းဆက်တိုက်ဝါဒဖြန့်ပါတယ်။

လေးမျက်နှာရေဘေးကို မထိန်းချုပ်နိုင်သေးခင်မှာပဲ ဧရာဝတီတိုင်းအတွင်းညောင်တုန်းမြို့က ရေကာတာကလည်း အိကျပြီးကျိုးကျမယ့်အန္တရာယ်ကြောင့် လူအင်အားထောင်ချီသုံးပြီး အရေးပေါ် ပိတ်ဆို့နေကြရပြန်ပါတယ်။ ဧရာဝတီမြစ်ရေတိုက်စားမှု၊ အာဏာ
သိမ်းစစ်ကောင်စီလက်ထက်ပြင်ဆင်ခြင်းမရှိခဲ့တဲ့ တာတမန်တွေရဲ့ ကြံ့ခိုင်မှုမရှိတဲ့အခြေ
အနေတွေကြောင့် လက်ကျန်မိုးရာသီကို ဧရာ
ဝတီတိုင်းသားတွေ ကျောချမ်းနေကြရပါတယ်။

"ထမင်းတနပ် လျော့စားဖို့နဲ့ ဖရောင်းတိုင်ထွန်းပြီးနေဖို့ ပြောတဲ့ သ​​န္ဓေ နဲ့ လာတဲ့စစ်တပ်ဆိုတော့ ဘာမှ မျှော်လင့်လို့မရဘူး"လို့ လေး
မျက်နှာမြို့ခံတစ်ဦးကပြောပါတယ်။

●သဖန်းဆိပ်ဆည်ရေကို အံတုခြင်း

ဧရာဝတီတိုင်းမှာရေဘေး နဲ့ တချိန်တည်းမှာပဲ စစ်ကိုင်းတိုင်းမှာ ဆိုးရွားတဲ့ရေဘေးကြုံတွေ့ခဲ့ပါတယ်။ဒေသတွင်းမှာမိုးကြီးပြီးတဲ့နောက်ကျွန်းလှမြို့နယ်က သဖန်းဆိပ်ဆည်ဟာ ‌ ရေ
လျှံနေချိန် စစ်တပ်က ကြိုတင်မကြေညာဘဲ ဆည်ရေလွှတ်ချပြီး စစ်ဘေးရော ရေဘေးနဲ့ပါ စစ်ကိုင်းတိုင်းကိုဖျက်ဆီးတာလို့တော်လှန်
ရေးအင်အားစုတွေကကြေညာခဲ့ပါတယ်။

ဆည်အောက်ဖက်ကမြို့နယ်တွေဖြစ်တဲ့
ကန့်ဘလူ၊ခင်ဦး၊ရွှေဘို၊ဝက်လက်၊တန့်ဆည်၊ဒီပဲယင်း၊ဘုတလင်၊၊အရာတော်မြို့၊ရေဦးမြို့နယ်တွေအပြင် ဒေသတွင်းဆက်စပ်နေတဲ့ ကောလင်းနဲ့အင်းတော်မြို့နယ်တွေမှာလည်း ဩဂုတ်လ ၅ရက်နေ့ကစပြီး ရေဘေးကြုံ တွေ့ခဲ့ပါတယ်။

တိုက်ပွဲတွေနဲ့ လေကြောင်းတိုက်ခိုက်မှုတွေရှိနေတဲ့ကာလမှာ NUG အစိုးရနဲ့ စစ်ကိုင်းတိုင်းဖက်ဒရယ်ယူနစ်အစိုးရက ရေဘေးကယ်
ဆယ်ရေးအတွက် အမြန်အဖြေရှာခဲ့ကြပါတယ်။ ရေဘေးကယ်ဆယ်ရေးအတွက် "အရေးပေါ် တုံ့ပြန် ဆောင်ရွက်ရေး ပူးပေါင်းကော်မတီ (Joint Emergency Response Committee- JERC)" ကို ဖွဲ့စည်းပါတယ်။

စစ်ကိုင်းဖက်ဒရယ်ယူနစ်အတွင်း ရေကြီးရေလျှံမှုတွေကြောင့်စိုက်ပျိုးမြေအမြောက်အများရေနစ်မြုပ်ခဲ့ပြီးပြည်သူလူထု သောင်းပေါင်း များစွာအတွက် အရေးပေါ် အကူအညီတွေလိုအပ်တယ်လို့ လူထုနဲ့ နိုင်ငံတကာကို အသိပေးခဲ့ပါတယ်။JERC အနေနဲ့ ဘေးသင့်ပြည်သူ‌ တွေဆီ အရေးပေါ်ကယ်ဆယ်ရေးနှင့် လူသားချင်းစာနာမှု အကူအညီများ ကို ထိရောက်စွာ ပံ့ပိုးပေးဖို့၊ထိခိုက်ဆုံးရှုံးမှုနဲ့လိုအပ်ချက်တွေကို အချိန်နှင့်တပြေးညီ စု
စည်းပြီး ခွဲခြမ်းစိတ်ဖြာတုံ့ပြန်ဖို့၊ အကူအညီများ ထပ်နေမှု သို့မဟုတ် လစ်ဟာမှုမရှိအောင် ညှိနှိုင်းပေါင်းစပ် ဆောင်ရွက်ဖို့နဲ့ ပြန်လည်
ထူထောင်ရေး၊ ဘေးဒဏ်ကြံ့ကြံ့ခံနိုင်ရည်ရှိစေရေးအတွက် ရေရှည်တည်တံ့ မယ့် မူဝါဒတွေ အကောင်အထည်ဖော်မယ်လို့ အသိပေးခဲ့ပါတယ်။ဒါ့အပြင် မြို့နယ်အဆင့် လုပ်ငန်းအဖွဲ့များ ဖွဲ့စည်းကြီးကြပ်ခြင်း၊အခြေအနေအကဲဖြတ်ချက်များ စုစည်းခြင်းမျှတစွာ ဖြန့်ဝေရေး စီမံခြင်း၊နိုင်ငံတကာနှင့် ပူးပေါင်းဆောင်ရွက်ခြင်းနဲ့ ပြန်လည်ထူထောင်ရေး အစီအစဉ်များ ရေးဆွဲခြင်းတွေကို ဆောက်ရွက်မယ်လို့ ကြေငြာခဲ့ပါတယ်။လူသားချင်းစာနာမှု၊ တန်းတူညီမျှမှု၊ ပွင့်လင်းမြင်သာမှု၊ ဒေသခံဘတွေရဲ့ ပါဝင်မှုနဲ့ထိခိုက်လွယ်အုပ်စု တွေကို ဦးစားပေးမှုစတဲ့ မူတွေကို အခြေခံပြီး မြို့နယ်အလိုက် ဘေးအန္တရာယ်ကြောင့်