စစ်တပ်အာဏာသိမ်းမှု​​ကြောင့် အမျိုးသမီးငယ်​တွေရဲ့ဘဝ​တွေကိုပိုမိုခက်ခဲကြပ်တည်း​စေခဲ့သလို အကာ
အကွယ်လည်းကင်းမဲ့​စေခဲ့ပါတယ်)

မြို့သာအနီးတိုက်ပွဲစစ်တပ်လေကြောင်းရန် ကာကွယ်ရေးတပ်ကဗျူဟာမှူး​သေဆုံး

စက်တင်ဘာ-၁၀၊၂၀၂၆။​ဇော်ဝင်း/People's Spring

မန္တလေးတိုင်းဒေသကြီး၊ တံတားဦးခရိုင်၊
ငါန်းဇွန်မြို့နယ်၊မြို့သာမြို့အနီးတိုက်ပွဲမှာ စစ်တပ်ရဲ့ လေကြောင်းရန် ကာကွယ်ရေးတပ်က ဗျူဟာမှူး သေဆုံးခဲ့တယ်လို့ မြေပြင်စစ်ရေးသတင်းရင်းမြစ်တချို့က ပြောပါတယ်။

ဒီကနေ့(စက်တင်ဘာ ၁၀ ရက်)မွန်းလွဲ ၂နာ
ရီ၀န်းကျင်မှာ လေကြောင်းရန် ကာကွယ်ရေးတပ်ဗျူဟာမှူး ယာဉ်တန်းကို တော်လှန်ရေးတပ်ဖွဲ့တွေက မြို့သာမြို့အနီး ကြားဖြတ်တိုက်ခိုက်ခဲ့တာလို့ ဆိုပါတယ်။

"ဗျူဟာမှူး ကျဆုံးတယ်။နန်းတွင်းထဲကို ည
နေကသယ်သွားတယ်"လို့ တံတားဦးခရိုင်
စစ်ရေးသတင်းရင်းမြစ်တဦးကပြောပါတယ်။

အခြားစစ်​ရေးသတင်းရင်းမြစ်တဦးကလည်း PDFတွေက စစ်တပ်ကားတန်းကို​စောင့်ပြီးတိုက်ခိုက်တာမှာ ဗျူဟာမှူးကားကို အဓိက ထားပစ်တာကြောင့် ဗျူဟာမှူးထသွားပြီးဆေးရုံပို့စဥ်လမ်းမှာ သေဆုံးတယ်လို့​ပြောပါတယ်။

ဒါ့အပြင် တံတားဦးလေဆိပ်ကို ပိတ်ထားပြီး တံတားဦးနဲ့ နွားထိုးကြီးကြားမှာဒီကနေ့ (စက်
တင်ဘာ ၁၀ ရက်)ညပိုင်းအထိ တိုက်ပွဲဖြစ်နေပါတယ်။ ​စစ်တပ်ဘက်က ဗျူဟာမှူးအပါ
အဝင်​သေဆုံး ဒဏ်ရာရသူ​တွေရှိသလိုတော်
လှန်​ရေးတပ်ဖွဲ့ဝင်အချို့လည်းထိခိုက်ကျ
ဆုံးမှုရှိတယ်လို့စုံစမ်းသိရပါတယ်။

"တံတားဦးနဲ့ နွားထိုးကြီးကြားကိုစစ်ကား အစီး ၇၀ လောက်နဲ့ဆင်းလာတယ်"လို့ တံ
တားဦးမြို့နယ် ပြည်သူ့ကာကွယ်ရေးအဖွဲ့နဲ့နီးစပ်သူကပြောပါတယ်။

သေဆုံးသွားတဲ့ လေကြောင်းရန် ကာကွယ်
ရေးတပ်ဗျူဟာမှူးနဲ့ နောက်ဆက်တွဲ အသေး စိတ်အချက် အလက်ကို လူထုနွေဦးက ဆက်
လက်စုံစမ်း​​နေဆဲ ဖြစ်ပါတယ်။

စစ်ရေးအချက်အလက်တွေအရတံတားဦးမြို့နယ်မှာအမှတ် (၃၀၂၇) လေကြောင်းရန်ကာကွယ်ရေးတပ်(လကတ-၃၀၂၇) အခြေ
စိုက်ထားပါတယ်။

အဓိကအားဖြင့် အနီးဝန်းကျင်ရှိ တံတားဦးလေတပ်စခန်းဌာနချုပ်နဲ့ မန္တလေးအပြည်ပြည်ဆိုင်ရာလေဆိပ်ကို လေကြောင်းရန်အန္တရာယ်တွေက ကာကွယ်ဖို့ ဖွဲ့စည်းထားတာဖြစ်ပါတယ်။

ဒီက​နေ့ မွန်းလွဲပိုင်းမှာ တံတားဦး​လေတပ်က
တိုက်​လေယာဥ်​​တွေ ထားတဲ့​နေရာကို PDF ​တွေက ဒရုန်းနဲ့တိုက်တာ​ကြောင့် တိုက်​လေယာဥ် ၄ စီးထိခိုက်ပျက်စီးခဲ့ပြီး ၂ စီးကလုံးဝပျက်စီးခဲ့တယ်လို့ ​တော်လှန်​ရေးသတင်းရင်းမြစ်​တွေက​ပြောပါတယ် ။ စစ်တပ်က​တော့ တံတားဦးခရီးသည်တင်​လေဆိပ်နဲ့အနီးဝန်းကျင်ကို PDF ​တွေကဒရုန်း ၆ စင်းနဲ့တိုက်ခိုက်​ပေမယ့် ဒရုန်း​တွေကိုတားဆီးဖျက်ဆီးနိုင်ခဲ့တယ်လို့လိမ်လည်ထုတ်ပြန်ပါတယ်။YAK-130 တိုက်​လေယာဥ်ကို FPV ဒရုန်းနဲ့ဖျက်ဆီးခဲ့တဲ့ရုပ်သံမှတ်တမ်းကိုလည်း စစ်​ရေးသတင်းရင်းမြစ်အချို့က ​ပေးပို့ပြီး တိုက်​လေယာဥ်ရပ်ထားတဲ့​နေရာကို ဒရုန်းကအနီးကပ်ပျံသန်းတိုက်ခိုက်​ဖောက်ခွဲတာကို
ထင်ထင်ရှားရှားမြင်​တွေ့ရပါတယ် ။

မုံရွာ-မန္တလေးလမ်းပိုင်းမှာ စစ်တပ်က ခရီးသွားတွေကို မိုင်းဆင်းရှာခိုင်းနေ

စက်တင်ဘာ ၁၁၊ ၂၀၂၆။ ဇေအောင်/People's Spring

စစ်ကိုင်းတိုင်း၊ မုံရွာ-မန္တလေးလမ်းပိုင်းမှာ အာဏာသိမ်းစစ်တပ်က ခရီးသွားတွေကို မိုင်းဆင်းရှာခိုင်းနေလို့ ပြည်သူတွေ အခက်တွေ့နေကြပါတယ်။

ဒီကနေ့ စက်တင်ဘာ ၁၁ရက် မနက်ပိုင်းက မုံရွာ-မန္တလေးလမ်းမကြီးပေါ် မုံရွာမြို့နယ်၊ မုံရွေးရွာရှိ တိုးဂိတ်ကနေ ကြေးမုံရွာထိပ်အထိ လမ်းပိုင်းမှာ အာဏာသိမ်းစစ်တပ်က တပ်ဖွဲ့ဝင်တွေ ရောက်ရှိနေပြီး ခရီးသွားယာဥ်တွေပေါ်က ပြည်သူတွေကို ဆင်းခိုင်းပြီး မိုင်းရှင်းခိုင်းနေကြောင်း ဒေသခံတွေက ပြောပါတယ်။

"တန်ပိုဂိတ်က စစ်တပ်က မုံရွေးစျေးထိပ် ကြေးမုံရွာထိပ်ထိ သွားလာတဲ့သူ ပြည်သူတွေကို မိုင်းတွေ ရှင်းခိုင်းနေတယ်"လို့ ဒေသခံတစ်ဦးက ပြောပါတယ်။

လက်ရှိမှာ မုံရွာ–ချောင်းဦးလမ်းပိုင်းရှိ မအူရွာ၊ မြေနဲရွာ၊ အောင်သာရွာနဲ့ မုံရွေး–ကြေးမုံရွာထိပ်တွေမှာ စစ်ကောင်စီတပ်တွေ ရောက်ရှိနေကြောင်း၊ အဆိုပါလမ်းပိုင်းကို ဖြတ်သန်းသွားလာသူတွေ သတိပြုသွားလာဖို့လိုကြောင်း မုံရွာမြို့နယ်သတင်းမှန်ပြန်ကြားရေးက သတိပေးပါတယ်။

စစ်တပ်ဟာ မုံရွာ-မန္တလေးလမ်းပိုင်းမှာ ဝမ်ပေါင် က ကြေးနီတွေ သယ်ဆောင်ချိန်နဲ့ လက်နက်နဲ့ရိက္ခာတွေ၊ စစ်အင်အားတွေ သယ်ဆောင်ချိန် လုံခြုံရေးတင်းကျပ်လေ့ရှိကြောင်း ဒေသခံတွေက ပြောပါတယ်။

ပြီးခဲ့တဲ့ သြဂုတ် ၂၇၊ ရက်ကလည်း မုံရွာ-မန္တလေးလမ်းမှာ ဝမ်ပေါင်က ကြေးနီတွေ သယ်လာတဲ့ စစ်ကောင်စီယာဥ်တွေ စုစုပေါင်း (၂၆)စီးဟာ စစ်ကိုင်းတပ်မ(၃၃)ဘက် ဦးတည် ဖြတ်သန်းလာလို့ လုံခြုံရေးတင်းကျပ်ခဲ့ပြီး လမ်းပိတ်ဆို့မှုတွေပါ ဖြစ်ပွားခဲ့ပါသေးတယ်။

အာဏာသိမ်းစစ်တပ်ယာဥ်တွေဟာ မုံရွာ-မန္တလေးလမ်းဖြတ်သန်းတိုင်း ဒေသတွင်းတော်လှန်ရေးအဖွဲ့တွေရဲ့ တိုက်ခိုက်ခံရမှုကြောင့် ခရီးသွားပြည်သူတွေရဲ့ကားကို တားဆီးပြီး ပြည်သူတွေကို မိုင်းဆင်းရှာခိုင်းတာ၊ လူသားဒိုင်းလုပ်တာတွေ ပြုလုပ်လေ့ရှိတယ်လို့ သိရပါတယ်။

(မုံရွာ-မန္တလေးလမ်း အုန်းတောလမ်းဆုံတွင် ဖြတ်သန်းသွားလာနေသော ယာဥ်များအား ပြီးခဲ့သည့် နှစ်အတွင်းက တွေ့ရစဥ်။ ဓါတ်ပုံံ-CJ)

ကိုဝင်းက နေပြည်တော်၊ ဇမ္ဗူသီရိမြို့နယ်၊ သုခတော်ဝင်အိမ်ရာမှာနေပြီး ကားအငှားလိုက်ပါတယ်။ ကိုဝင်းဟာ အပြောအဆိုမွန်ရည်တာ၊ လူမှုဆက်ဆံရေးကောင်းတာကြောင့် ရပ်ဝေးရပ်နီး ကားငှားကြသူ များပါတယ်။စက်တင်ဘာလဆန်းကဆိုရင် နေပြည်တော်ကနေ မန္တလေးမြို့အထိ စင်းလုံးငှားလို့ လိုက်ပို့ပေးခဲ့ရတယ်။ သူ့ဝန်ဆောင်မှုသဘောကျပြီး မန္တလေးလက်ဆောင် လက်ဖက်တွေရော၊ ထိုးမုန့်တွေရော ဝယ်ထည့်ပေးလိုက်သေးတယ်လို့ သူက Tiktok ကနေ ဂုဏ်ယူစွာ ပြောပြခဲ့တယ်။ “ကျေးဇူးအများကြီးတင်ပါတယ်အမရေ။ ခုလို ကျွန်တော့်ကားလေးကို ယုံယုံကြည်ကြည်နဲ့ ငှားစီးပြီး လက်ဆောင်တွေပေးတဲ့အတွက်”လို့ ပြောဆိုခဲ့တယ်။

စက်တင်ဘာလ ၆ ရက်နေ့က ကိုဝင်း ကားအငှားလိုက်ဖို့ ဖြစ်လာပါတယ်။ ကားငှားသူက နေပြည်တော်ကပါပဲ။ လူကုန်ကူးမှုတားဆီးနှိမ်နင်းရေးရဲတပ်ဖွဲ့က ရဲတပ်သား ရဲရင့်အောင်တဲ့။ သွားမှာက မိတ္ထီလာမြို့ကိုပါ။ ကောင်မ​​​လေး သွားတွေ့မှာတဲ့။ ကားခ လေးသိန်းနဲ့ စျေးတည့်ပြီး နှစ်ယောက်သား မိတ္ထီလာ ထွက်လာခဲ့ကြတယ်။

ညနေ ၄ နာရီခွဲလောက်မှာ အငှားယာဥ်မောင်း ကိုဝင်းရဲ့ မိသားစုက ကိုဝင်းဆီ ဖုန်းဆက်တယ်။ ဖုန်းက ကိုင်တယ်။ ဒါပေမယ့် ဖုန်းဖြေတဲ့သူက ကိုဝင်းမဟုတ်ဘူး။ တခြားယောကျာ်းတစ်ယောက်။ ခုမိတ္ထီလာမှာ။ ကားဆရာ အပြင်ခဏသွားနေတယ်လို့ ပြောတယ်။ မိသားစုက စိုးရိမ်ပြီးနောက်ထပ် ထပ်ဆက်တော့ ဖုန်းက စက်ပိတ်သွားပြီ။

အဲဒီနေ့ညနေပိုင်းမှာ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် (၂၇၉/၁) အနီး၊ အမြန်လမ်းနဲ့ ပေ ၃၀၀ ခန့်အကွာ၊ မန္တလေးဘက်သွားတဲ့ လမ်း အရှေ့ဘက်ခြမ်းမှာ နွားကျောင်းပြန်လာတဲ့ ​ကလေးတစ်ယောက်က လူသေအလောင်းတစ်လောင်း တွေ့လိုက်ရတယ်။ အဲဒီရုပ်အလောင်းဟ အငှားယာဥ်မောင်း ကိုဝင်းအလောင်း ဖြစ်နေခဲ့တာပါ။ သူ့အနီးမှာ ကားကို မတွေ့ရပါဘူး။

နောက်ဆုံးတော့ ကိုဝင်းကို မိတ္ထီလာမှာ ကောင်မလေးသွားတွေ့ဖို့ ကားငှားခဲ့တဲ့ လူကုန်တား ရဲတပ်ဖွဲ့က ရဲကိုယ်တိုင် သေနတ်နဲ့ ပစ်ခတ်ခဲ့တာလို့ ပေါ်ပေါက်တယ်။ သူဟာ ကားလုယူဖို့ ကိုဝင်းကို သေနတ်နဲ့ ပစ်သတ်ခဲ့တာလို့ သိရတယ်။ ရဲဟာ ကျွဲဂိမ်း အရမ်းဆော့တယ်လို့ သိရတယ်။စက်တင်ဘာ ၇ရက်မှာတော့ လုယက်သွားတဲ့ ကားနဲ့အတူ ဒုရဲအုပ်ရဲရင့်အောင်ကို ဖမ်းမိခဲ့ပါတယ်။

ရာဇဝတ်မှုတွေကို တားဆီးကာကွယ်ရမယ့်၊ ပြည်သူလူထုရဲ့ အသက်အိုးအိမ်စည်းစိမ်ကို လုံခြုံစိတ်ချရအောင် စောင့်ရှောက်ရမယ့် ရဲတပ်ဖွဲ့ဝင်ကိုယ်တိုင်က ရာဇဝတ်မှုကို ကျုးလွန်လိုက်တာပါ။ ဇာတ်လမ်းဟာ ဒီမှာတင်မပြီးသေးပါဘူး။ အသတ်ခံလိုက်ရတဲ့ အငှားယာဥ်မောင်း ကိုဝင်းဟာ နေပြည်တော်က ရဲမှူးအောင်မျိုးလတ်ရဲ့ တူသားတစ်ယောက် ဖြစ်နေခြင်းပါ။ သတ်တဲ့သူကလည်း ရဲဖြစ်သလို အသတ်ခံရသူကလည်း ရဲမှူးရဲ့ သား ဖြစ်နေခဲ့တာပါ။


https://www.ludunwayoo.com/feature-mm/2026/09/10/167938/

မန္တလေးလေဆိပ် ပိတ်ပြီး နိုင်ငံတကာခရီးစဉ်တွေအားလုံး ယာယီရပ်ဆိုင်းကြောင်း MAI ထုတ်ပြန်

စက်တင်ဘာ ၁၁၊၂၀၂၆။တာရာ/People's Spring

တံတားဦးလေတပ်စခန်းက တိုက်လေယာဉ်တွေ ဒရုန််းနဲ့ တိုက်ခိုက်ခံရပြီးနောက် အာဏာသိမ်းစစ်တပ်က မန္တလေးအပြည်ပြည်ဆိုင်ရာလေဆိပ်ကို ပိတ်လိုက်ပြီး နိုင်ငံတကာခရီးစဉ်အားလုံးကို ယာယီရပ်ဆိုင်းလိုက်တယ်လို့ MAI (Myanmar Airways International) လေကြောင်းလိုင်းက စက်တင်ဘာ ၁၀ ရက် ညပိုင်းမှာ ထုတ်ပြန်ပါတယ်။

စက်တင်ဘာ ၁၀ ရက်ညပိုင်းမှာ PDF ပူးပေါင်းတပ်တွေက တံတားဦးလေတပ်စခန်းရဲ့တိုက်လေယာဉ်တွေထားရှိရာကို ဒရုန်းတွေနဲ့ တိုက်ခိုက်ခဲ့တာ ဖြစ်ပါတယ်။

ထွက်ပေါ်လာတဲ့ တိုက်ခိုက်မှုရုပ်သံမှာ လေယာဥ် ၆စီးခန့် ထားရှိဖို့ ဆောက်လုပ်ထားတဲ့ လေယာဉ်ရုံရှိရာကို ပျံသန်းလာတဲ့ ဒရုန်းဟာ တိုက်လေယာဉ် ၁စီးရှိရာ ရှေ့တည့်တည့်က ဝင်ရောက်တိုက်ခိုက်ခဲ့တာကို တွေ့ရပါတယ်။ လေယာဉ်ကို ဒရုန်းနဲ့ တိုက်ခိုက်တဲ့ ရုပ်သံဖော်ပြထားသူ သတင်းရင်းမြစ်က တိုက်ခိုက်မှုကို ဒရုန်း ၆စီး အသုံးပြု စစ်ရေးဖော်ဆောင်ခဲ့တာလို့ ဆိုပါတယ်။

MAI လေကြောင်းလိုင်းက လုပ်ငန်းလည်ပတ်မှုဆိုင်ရာ အခြေအနေတွေကြောင့် မန္တလေးအပြည်ပြည်ဆိုင်ရာ လေဆိပ် ဆိုက်ကပ်မယ့် သို့မဟုတ် လေဆိပ်က ထွက်ခွာမယ့် နိုင်ငံတကာခရီးစဉ်တွေ အားလုံးကို နောက်ထပ်အသိပေးချက် မထုတ်ပြန်မီအထိ ယာယီရပ်ဆိုင်းထားမယ်လို့ ဆိုပါတယ်။

ရပ်ဆိုင်းထားတဲ့ကာလအတွင်း မန္တလေး လေဆိပ် ဆိုက်ကပ်ရန် သို့မဟုတ် လေဆိပ်က ထွက်ခွာရန် လျာထားတဲ့ MAI နဲ့ မင်္ဂလာလေကြောင်းလိုင်းတို့ရဲ့ ပြည်တွင်းခရီးစဉ်တွေအားလုံးကို ပြင်ဦးလွင်မြို့ရှိ အနီးစခန်းလေဆိပ် ပြောင်းလဲ ပြေးဆွဲသွားမယ်လို့ ဖော်ပြထားပါတယ်။

ခရီးစဉ်ထိခိုက်မှုရှိတဲ့ ခရီးသည်တွေအနေနဲ့ လက်မှတ်ခ အပြည့်အဝ ပြန်လည် ထုတ်ယူခြင်း၊ ခရီးစဥ်လမ်းကြောင်းကို အခမဲ့ ၁ကြိမ်ပြောင်းလဲနိုင်ခြင်း လုပ်တယ်လို့လည်း ဆိုပါတယ်။

ခရီးသွား အေဂျင်စီတွေ သို့မဟုတ် အွန်လိုင်း ကိုယ်စားလှယ်တွေက တစ်ဆင့် လက်မှတ်ဝယ်ယူထားတဲ့ ခရီးသည်တွေ အနေနဲ့ သက်ဆိုင်ရာ အေဂျင်စီများထံ တိုက်ရိုက် ဆက်သွယ်ရန်နဲ့ လေကြောင်းခရီးစဥ်တွေ ရပ်ဆိုင်းမှုအတွက် တောင်းပန်ထားပါတယ်။

(စက်တင်ဘာ ၁၀ ရက်ညပိုင်းမှာ PDF ပူးပေါင်းတပ်တွေက တံတားဦးလေတပ်စခန်းရဲ့တိုက်လေယာဉ်တွေထားရှိရာကို ဒရုန်းတွေနဲ့ တိုက်ခိုက်နေစဉ်။ ဓာတ်ပုံ - Screengrab)

■​ဆောင်းပါး

အသက် ၁၀ နှစ်မှ စတင်စုဆောင်းမည့် အထောက်အထားဒေတာ နှင့် စစ်မှုထမ်းအသက်အုပ်စုကို ခြေရာခံနိုင်မှု

●အင်တာနက်မလိုဘဲ အော့ဖ်လိုင်း စစ်ဆေးနိုင်သည့် Digital ID

-ဥဂ္ဂါ ရေးသားသည်။

အသက်၁၀နှစ်အရွယ်ကလေးတစ်ဦးရဲ့ လက်
ဗွေ၊ မျက်နှာနဲ့ ကိုယ်ရေးအချက်အလက်တွေကို စုဆောင်းထားခြင်းဟာ ယနေ့အတွက်သာ သက်ဆိုင်တဲ့ အချက်အလက်မဟုတ်ပါဘူး။ အဆိုပါ ဒေတာတွေဟာ အနာဂတ်မှာလည်း ဆက်လက်အသုံးပြုနိုင်တဲ့ အခြေခံအချက်
အလက်များ ဖြစ်လာနိုင်ပြီး၊ လူတစ်ဦးရဲ့ ကိုယ်ရေးအချက်အလက်၊ နေရပ်နဲ့ အခြားဆက်စပ်အချက်အလက်တွေကို ချိတ်ဆက်ဖော်ထုတ်နိုင်မယ့် အလားအလာရှိတာကြောင့် ကိုယ်ရေးလုံခြုံမှုနဲ့ ဒေတာလုံခြုံရေးအတွက် ကြီးမားတဲ့ စိုးရိမ်စရာအန္တရာယ်တစ်ရပ်ဖြစ်
လာနိုင်ပါတယ်။

ဒီအချက်ကြောင့် ဒီဂျစ်တယ် အထောက်
အထား(Digital ID)စနစ်ရဲ့အဓိကအရေးပါမှုဟာ နည်းပညာတိုးတက်မှုတစ်ခုတည်းမှာ မရှိဘဲ စုဆောင်းထားတဲ့ အချက်အလက်တွေကို ဘယ်သူက ဘယ်လိုအသုံးချမလဲဆိုတဲ့ အ
ချက်မှာ ရှိနေပါတယ်။

ကနေဒါနိုင်ငံအခြေစိုက် Biometric Update ရဲ့ ဖော်ပြချက်အရ မြန်မာစစ်အစိုးရ(မူရင်းအသုံးအနှုန်း)ဟာပြည်တွင်းစစ်တွေ ဆက်
လက်ဖြစ်ပွားနေပြီး နိုင်ငံတစ်ဝန်း လုံခြုံရေးအခြေအနေမတည်ငြိမ်နေတဲ့ကြားကအမျိုး
သားဒီဂျစ်တယ် အထောက်အထား (National Digital Identity Infrastructure) စနစ်ကိုအရှိန်မြှင့်တည်ဆောက်နေပါတယ်။

ဒီစနစ်မှာတော့ အင်တာနက်မလိုဘဲ စစ်ဆေးနိုင်တဲ့ကတ်စနစ်တွေ၊ဗဟိုပြုဇီဝဗေဒ အချက်
အလက် (Biometrics) စနစ်နဲ့ မိုဘိုင်း ဒီဂျစ်တယ် အထောက်အထား (Mobile Digital ID) တွေကိုပေါင်းစပ်အသုံးပြုသွားမှာဖြစ်ပါ
တယ်။ယင်းစနစ်ကို၂၀၃၀ခုနှစ်ဒစ်ဂျစ်တယ် စီးပွားရေး လမ်းပြမြေပုံ (Digital Economy Roadmap 2030) အကောင်အထည်ဖော်ရေးအတွက်အသုံးပြုရန်စီစဉ်ထားတယ်လို့ ဖော်
ပြထားပါတယ်။

နိုင်ငံတစ်ဝန်း တိုက်ပွဲတွေ ဖြစ်ပွားနေခြင်း၊ အင်တာနက်ဖြတ်တောက်မှုတွေ ရှိနေခြင်းနဲ့ နယ်မြေထိန်းချုပ်မှုတွေ ကွဲပြားနေတဲ့ အခြေ
အနေတွေကြောင့် အွန်လိုင်းချိတ်ဆက်မှု မလိုဘဲ အတည်ပြုနိုင်တဲ့(အွန်လိုင်းနှင့်အော့ဖ်လိုင်းနှစ်မျိုးလုံးအသုံးပြုနိုင်သည့် Hybrid အထောက်အထားစနစ်)ကိုအသုံးပြုဖို့စီစဉ်ထားတာဖြစ်တယ်လို့သတင်းမှာဖော်ပြထားပါတယ်။

ဒီရွေးချယ်မှုဟာ နည်းပညာပိုင်းအရ လက်ရှိအခြေအနေနဲ့ ကိုက်ညီအောင် ဆောင်ရွက်ထားတာလို့ ရှင်းပြထားပေမယ့် တစ်ဖက်မှာတော့ အင်တာနက်မရှိတဲ့ ဒေသတွေမှာတောင် လူတစ်ဦးချင်းစီရဲ့ အထောက်အထားကို အချိန်မရွေး စစ်ဆေးနိုင်မယ့် စနစ်တစ်ခုကို တည်ဆောက်လိုက်ခြင်းလည်း ဖြစ်လာပါတယ်။ စစ်ရေးပဋိပက္ခတွေ ဆက်လက်ဖြစ်
ပွားနေတဲ့အခြေအနေကြားကပင်ဒီစီမံကိန်း
အတွက် ရင်းနှီးမြှုပ်နှံမှုတွေကို အရှိန်မြှင့်လုပ်ဆောင်နေခြင်းက စစ်အုပ်စုအတွက် ဒီစနစ်ဟာ အရေးကြီးတဲ့ ဦးစားပေးစီမံကိန်းတစ်ခု ဖြစ်နေကြောင်း ပြသနေပါတယ်။

ဒါ့အပြင်စစ်အုပ်စုဟာ၂၀၂၆–၂၀၂၇ ဘဏ္ဍာ
ရေးနှစ်အတွက် အမျိုးသား အီး-အိုင်ဒီ (e-ID) စမတ်ကတစမ်းသပ်စီမံကိန်းကိုအကောင်
အထည်ဖော်ရန် အရည်အချင်းစစ် အကြိုတင်ဒါကို စတင်ခေါ်ယူ ခဲ့ပါတယ်။ ပထမအဆင့်အနေနဲ့ ကတ်ပေါင်း ၁၁၀,၀၀၀ ထုတ်
လုပ်ဖို့ စီစဉ်ထားပြီး ချစ်ပ် (Chip) ပါဝင်တဲ့ စမတ်ကတ်များနှင့် မြင်သာတဲ့ ဒီဂျစ်တယ် တံဆိပ် (Visible Digital Seal – VDS) ပါ စက္ကူကတ်များကို ထုတ်လုပ်သွားမှာ ဖြစ်ပါတယ်။ဒါ့အပြင် ပြည်တွင်းကုမ္ပဏီများကို နိုင်ငံတကာနည်းပညာကုမ္ပဏီများနဲ့ပူးပေါင်း
ပြီး တင်ဒါတွင် ဝင်ရောက်ယှဉ်ပြိုင်ရန် ဖိတ်ခေါ်ထားပါတယ်။

Biometric Updateကရရှိထားတဲ့လူဝင်မှုကြီး
ကြပ်ရေးနှင့် ပြည်သူ့အင်အားဝန်ကြီးဌာန (MoIP) ရဲ့ မူကြမ်းအရ အဆိုပါစနစ်မှာ နိုင်
ငံတကာ မြို့ပြလေကြောင်းအဖွဲ့ (ICAO) စံ
ချိန်မီပိုလီကာဗွန်နိတ်စမတ်ကတ်များကို အ
သုံးပြုသွားမည်ဖြစ်ပြီး၊ VDS စနစ်တွင် ဒစ်ဂျစ်တယ် လက်မှတ်ထိုးထားသော ဘားကုဒ် (Barcode) များကို အသုံးပြုထားသဖြင့် အင်တာနက်ချိတ်ဆက်မှုမရှိဘဲ စစ်ဆေးနိုင်မည် ဖြစ်ပါတယ်။ ထိုစနစ်ကို ဗဟို အိုင်ဒီ (UID) ဒေတာဘေ့စ်နှင့်လည်း တိုက်ရိုက် ချိတ်ဆက်ထားမည်ဟု ဖော်ပြထားပါတယ်။

ဒီနေရာမှာ အထူးသတိထားရမယ့်အချက်ကတော့ ဒီစနစ်ကို လူစစ်ဆေးရေးနဲ့ စောင့်ကြည့်ရေးစနစ် (PSMS) နဲ့ ချိတ်ဆက်ထားမယ်လို့ သတင်းမှာ ဖော်ပြထားတာ ဖြစ်ပါတယ်။ အဆိုပါစနစ်ကို စစ်မှုထမ်းရန် သတ်
မှတ်ခံရသူတွေကို စောင့်ကြည့်ဖို့၊ လူတစ်ဦးချင်းစီရဲ့ သွားလာမှုတွေကို စစ်ဆေးဖို့နဲ့ ဒေသအလိုက် ခရီးသွားလာခွင့်တွေကို ကန့်သတ်ဖို့ အသုံးပြုနိုင်တယ်လို့ ဆိုထားပါတယ်။ ဒါကြောင့် ဒီဂျစ်တယ် အထောက်အထားစနစ်ဟာ ဝန်ဆောင်မှုရယူဖို့အတွက်သာမက လူတွေရဲ့ လှုပ်ရှားမှုတွေကို စီမံထိန်းချုပ်နိုင်တဲ့ အခြေခံစနစ်တစ်ခုအဖြစ်လည်း အသုံးချနိုင်
ခြေရှိနေတယ်ဆိုတာ သတိပြုဖို့ လိုပါတယ်။

အဆိုပါ အီး-အိုင်ဒီ (e-ID)စနစ်ဟာအိန္ဒိယနိုင်ငံရဲ့ အာဒါ(Aadhaar)စနစ်ကို အခြေခံနမူနာယူထားပြီးအဖွင့်အရင်းအမြစ် (Open-source)

ဖြစ်တဲ့မိုဆစ်(MOSIP)ပလက်ဖောင်းကို အ
သုံးပြုထားပါတယ်။ဒီနည်းပညပလက်ဖောင်း
ကိုယ်တိုင်ကတော့ နိုင်ငံအများအပြားမှာ အ
သုံးပြုနေတဲ့ စနစ်တစ်ခု ဖြစ်ပါတယ်။ ဒါပေမယ့် အရေးကြီးတာက နည်းပညာကိုယ်တိုင်ရဲ့လုံခြုံမှုတစ်ခုတည်းမဟုတ်ဘဲ၊ဒီစနစ်ကို
ဘယ်သူကထိန်းချုပ်မလဲ၊ဘယ်လိုရည်ရွယ်
ချက်တွေအတွက် အသုံးပြုမလဲဆိုတဲ့ အချက်ပဲ ဖြစ်ပါတယ်။

MoIP ကတော့ “လမင်း စီမံချက်” လို့ခေါ်တဲ့ ရွှေ့လျားဝန်ဆောင်မှုနဲ့ ကျေးရွာတွေ၊ကျောင်း
တွေ၊ မြို့နယ်ရုံးတွေထိ ကွင်းဆင်းပြီး နိုင်ငံ
သားစိစစ်ရေးကတ်တွေနဲ့ ဂဏန်း ၁၀ လုံးပါ တစ်ဦးချင်း အိုင်ဒီ (UID) တွေကို ထုတ်ပေးနေပါတယ်။ ဒီအစီအစဉ်မှာ အသက် ၁၀ နှစ်နဲ့အထက် ကျောင်းသားတွေနဲ့ အသက် ၁၈ နှစ်နဲ့အထက်ပြည်သူတွေကိုအဓိကထားပြီးလက်
ဗွေ၊ မျက်နှာ စတဲ့ ဇီဝဗေဒ အချက်အလက်
(Biometrics)တွေကိုပါစနစ်တကျ စုဆောင်း
မှတ်တမ်းတင်နေကြောင်းဖော်ပြထားပါတယ်။

ဒီအချက်က သာမန် စာရင်းကောက်ယူခြင်းတစ်ခုထက် ပိုမိုနက်နဲတဲ့ အဓိပ္ပာယ်ရှိနေပါတယ်။ အသက် ၁၀ နှစ်အရွယ်ကတည်းက UID နဲ့ ချိတ်ဆက်ထားတဲ့ အချက်အလက်စနစ်ကြောင့် ကလေးတစ်ဦးရဲ့ အသက်အ
ရွယ်၊ နေရပ်နဲ့ အခြားဆက်စပ်အချက်အ
လက်တွေကို အချိန်ကြာမြင့်စွာ စီမံခန့်ခွဲနိုင်မယ့် အခြေအနေ ဖြစ်လာနိုင်ပါတယ်။ထိုကလေး အသက် ၁၈ နှစ်ပြည့်လာမယ့်အချိန်ကို ကြိုတင် သိရှိနိုင်သလို၊ နှစ်အလိုက် စစ်မှု
ထမ်းနိုင်တဲ့ အသက်အုပ်စုမှာ လူဦးရေ ဘယ်
လောက်ရှိလာမလဲ ဆိုတာကိုလည်း ခန့်မှန်းနိုင်တဲ့ အခြေအနေ ဖြစ်လာနိုင်ပါတယ်။ ထို့အပြင် ထိုသူရဲ့ နေရပ်၊ ကျောင်း၊ ဖုန်း၊ ဘဏ်အသုံးပြုမှု၊ ခရီးသွားလာမှုနဲ့ နောင်အလုပ်
အကိုင်ဆိုင်ရာ အချက်အလက်တွေကိုပါ တစ်
ဆက်တည်း ချိတ်ဆက်နိုင်မယ့် အခြေခံဒေတာစနစ်တစ်ခု တည်ဆောက်ထားခြင်းဖြစ်ပါတယ်။

ဒါ့ကြောင့် ယင်းစနစ်ဟာ အနာဂတ် လူငယ်မျိုးဆက်တွေရဲ့ ကိုယ်ရေးအချက်အလက်တွေကိုငယ်စဉ်ကတည်းကစုဆောင်းထားပြီး၊ နောင်အချိန်တွေမှာလည်းသူတို့ရဲ့အချက်အ
လက်တွေကို ဆက်လက်ခြေရာခံနိုင်မယ့် စ
နစ်တစ်ခု ဖြစ်လာနိုင်တာကြောင့် စိုးရိမ်စရာအဖြစ် မြင်လာရခြင်း ဖြစ်ပါတယ်။

စစ်အုပ်စုကတော့ ဒီဂဏန်း ၁၀ လုံးပါ အိုင်ဒီ (UID) ကို နေ့စဉ်ဘဝမှာ အရေးကြီးတဲ့ ဝန်
ဆောင်မှုတွေနဲ့ မဖြစ်မနေချိတ်ဆက်အသုံးပြု
ဖို့ သတ်မှတ်ထားပါတယ်။ ပတ်စ်ပို့ လျှောက်
ထားတာနဲ့ သက်တမ်းတိုးတာ၊ နယ်စပ်ဖြတ်ကျော်သွားလာတာ၊ ဆင်းကတ် (SIM Card) မှတ်ပုံတင်တာ၊ ဘဏ်အကောင့်ဖွင့်တာနဲ့ ပင်
စင်လစာထုတ်ယူတာတွေမှာUIDမရှိရင်ဆောင်ရွက်ခွင့်မရနိုင်တဲ့ အခြေအနေ ဖြစ်လာပါတယ်။

အဓိပ္ပာယ်ကတော့ လူတစ်ဦးရဲ့ နေ့စဉ်ဘဝမှာ မရှိမဖြစ်လိုအပ်တဲ့ ဝန်ဆောင်မှုအများစုကို အိုင်ဒီတစ်ခုတည်းနဲ့ ချိတ်ဆက်လိုက်တာဖြစ်ပြီး၊ အဲဒီအိုင်ဒီကနေတစ်ဆင့် လူတစ်ဦးရဲ့ လှုပ်ရှားမှုနဲ့ ဆက်စပ်အချက်အလက်တွေကို ပြန်လည်ဖော်ထုတ်နိုင်မယ့် အခြေအနေတစ်
ရပ်ကို ဖန်တီးလိုက်ခြင်း ဖြစ်ပါတယ်။

တစ်ဖက်မှာလည်း တစ်တော့ (TikTok) အပါ
အဝင်လူမှုကွန်ရက်တွေမှာအိမ်ထောင်စုဇယားအတုတွေ၊ ရက်ချိန်းယူကူပွန်အတုတွေ ရောင်းချတဲ့ လိမ်လည်မှုတွေ ပေါ်ပေါက်လာတာကြောင့် MoIP က ဖုန်းနံပါတ်တွေနဲ့ လူမှုကွန်ရက်အကောင့်အချို့ကို Blacklist ထဲ ထည့်သွင်းပြီး အရေးယူနေကြောင်း သတင်းမှာ ဖော်ပြထားပါတယ်။

ဒါက စနစ်သစ်တစ်ခု စတင်အသုံးပြုလာတဲ့အခါ အတုအယောင်ပြုလုပ်မှု၊ လိမ်လည်မှုတွေအပြင် ဒေတာလုံခြုံရေးဆိုင်ရာ စိန်ခေါ်မှုတွေပါ တစ်ပြိုင်နက်တည်း ပေါ်ပေါက်လာနိုင်ကြောင်း ပြသနေပါတယ်။

စစ်အုပ်စုရဲ့ အစီအစဉ်အရ ၂၀၂၇ ခုနှစ်ကနေ ၂၀၃၀ ခုနှစ်အတွင်း ဒီဂျစ်တယ် အထောက်
အထားကိုအီး-ကုန်သွယ်ရေး (e-Commerce)
၊ဘဏ်စနစ်၊ အခွန်စနစ်နဲ့ ဥပဒေရေးရာ ဝန်
ဆောင်မှုတွေမှာ အသုံးပြုမယ့် တစ်ခုတည်းသော အတည်ပြုစနစ် အဖြစ် တည်ဆောက်သွားဖို့ စီစဉ်ထားပါတယ်။

ဒီစနစ်ကိုအာဆီယံဒစ်ဂျစ်တယ်စီးပွားရေး သ
ဘောတူညီချက်(Digital Economy Framework Agreement – DEFA) နဲ့ ကိုက်ညီစေရန် ဆောင်ရွက်တာဖြစ်တယ်လို့ ဆိုထားပေမယ့်၊ နည်းပညာစနစ်တွေ တိုးချဲ့လာတဲ့ အရှိန်နဲ့ နှိုင်းယှဉ်ကြည့်မယ်ဆိုရင် ပြည်သူတွေရဲ့ ကိုယ်ရေးအချက်အလက် တွေကို ကာကွယ်ပေးမယ့် ဥပဒေနဲ့ အာမခံချက်တွေက
တော့ အားနည်းနေဆဲ ဖြစ်ပါတယ်။

Biometric Update က ထောက်ပြထားတဲ့ စိုး
ရိမ်စရာအချက်တွေထဲမှာပထမဆုံးအချက်ကတော့ဥပဒေစိုးမိုးမှု အားနည်းနေခြင်းဖြစ်ပါတယ်။ စစ်တပ်ရဲ့၂၀၀၈ ဖွဲ့စည်းပုံအခြေခံဥပ
ဒေ ပုဒ်မ ၃၅၇ နဲ့ ၂၀၁၇ကိုယ်ရေးအချက်အ
လက် ကာကွယ်ရေးဥပဒေတွေဟာ UID ဒေတာဘေ့စ်လို အရေးကြီးတဲ့ အချက်အလက်စနစ်ကို လုံလောက်စွာ အကာအကွယ်ပေးနိုင်မယ့် အာမခံချက် မရှိသေးကြောင်း ဖော်ပြထားပါတယ်။

ဒုတိယအချက်ကတော့ လွတ်လပ်တဲ့ စောင့်ကြည့်စစ်ဆေးရေး အဖွဲ့အစည်း မရှိခြင်း ဖြစ်ပါတယ်။ဒေတာတွေကို ဘယ်သူက အသုံးပြုမလဲ၊ ဘယ်အတိုင်းအတာအထိ အသုံးချခွင့်ရှိမလဲဆိုတာ ထိန်းကျောင်းနိုင်တဲ့ စနစ်မရှိရင်၊ ဒီအချက်အလက်တွေဟာ လူတစ်ဦးချင်းစီကို စောင့်ကြည့်ခြင်းနဲ့ ထိန်းချုပ်ခြင်းတွေအ
တွက် အသုံးချခံရနိုင်ပြီး၊ အာဏာပိုင်စနစ်တစ်ခုရဲ့ အခြေခံယန္တရားတစ်ခု ဖြစ်လာနိုင်ပါတယ်။

တတိယအချက်ကတော့ လူ့အခွင့်အရေးဆိုင်
ရာအန္တရာယ်ဖြစ်ပါတယ်။လူ့အခွင့်အရေး စောင့်ကြည့်ရေးအဖွဲ့ရဲ့ ၂၀၂၁ ခုနှစ် အစီရင်
ခံစာအရ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က စုဆောင်းထားတဲ့ရိုဟင်ဂျာဒုက္ခသည်တွေရဲ့ဇီဝဗေဒအချက်
အလက် တွေဟာဘင်္ဂလားဒေ့ရှ်ကတစ်ဆင့်
မြန်မာဘက်ကို ပေါက်ကြားခဲ့ဖူးကြောင်း ထောက်ပြထားပါတယ်။

ဒီဖြစ်ရပ်က ဇီဝဗေဒအချက်အလက် တွေဟာ တစ်ကြိမ်ပေါက်ကြားသွားရင် စကားဝှက် (Password) ကဲ့သို့ ပြန်လည်ပြောင်းလဲလို့ မရနိုင်တဲ့အတွက် အန္တရာယ်အလွန်ကြီးမားကြောင်း ပြသခဲ့ပါတယ်။ ဒါကြောင့် လက်ရှိ စုဆောင်းနေတဲ့ ဒေတာတွေကို လူတွေကို စောင့်ကြည့်ခြင်း၊ ဖမ်းဆီးခြင်း သို့မဟုတ် ဖိနှိပ်ခြင်းတွေအတွက် အသုံးချနိုင်မယ့် အခြေအနေကို လူ့အခွင့်အရေးအဖွဲ့တွေက စိုးရိမ်နေကြတာ ဖြစ်ပါတယ်။

ဒါကြောင့် အထူးသတိထားသင့်သူတွေက
တော့ အသက် ၁၀ နှစ်နဲ့အထက် ကျောင်းသားတွေ၊ မကြာမီ အသက် ၁၈ နှစ်ပြည့်မယ့် လူ
ငယ်တွေ၊ တက္ကသိုလ်ကျောင်းသားတွေ၊ နိုင်ငံခြားသွားလာဖို့ စီစဉ်ထားသူတွေ၊ ဘဏ်ဝန်ဆောင်မှုနဲ့ ဆင်းကတ် (SIM Card) အသုံး
ပြုသူတွေ၊ နိုင်ငံသားမှတ်ပုံတင်နဲ့ ပတ်စ်ပို့ဆိုင်ရာ ဝန်ဆောင်မှုတွေ လိုအပ်သူတွေ အပါ
အဝင် ပြည်သူအားလုံး ဖြစ်ပါတယ်။

မိဘများအနေဖြင့်လည်းမိမိတို့ကလေး​တွေရဲ့
ကိုယ်ရေးအချက်အလက်နဲ့ ဇီဝဗေဒအချက်
အလက်တွေ စုဆောင်းခံရခြင်းဟာ ယနေ့အတွက်သာ သက်ဆိုင်တဲ့ကိစ္စ မဟုတ်ဘဲ၊ နောင် ၁၀ နှစ်၊ ၂၀ နှစ်အထိ သက်ရောက်နိုင်တဲ့ အရေးကြီးတဲ့ ကိစ္စတစ်ရပ်ဖြစ်ကြောင်း နားလည်ထားရန် လိုအပ်ပါတယ်။

မြန်မာနိုင်ငံရဲ့လက်ရှိနိုင်ငံရေးနဲ့ ဥပဒေရေးရာ အခြေအနေအောက်မှာဒီဂျစ်တယ် အထောက်
အထား စနစ်ကို နည်းပညာတိုးတက်မှုတစ်ခုအဖြစ်သာ မမြင်သင့်ဘဲ၊ လူ့အခွင့်အရေး၊ ကိုယ်ရေးလုံခြုံမှုနဲ့ အနာဂတ်မျိုးဆက်တွေရဲ့ လွတ်လပ်ခွင့်အပေါ် ကြီးမားတဲ့ အကျိုးသက်
ရောက်မှုတွေ ဖြစ်ပေါ်လာနိုင်တဲ့ အလားအ
လာရှိတာကြောင့် ယင်းစနစ်က ဘယ်လိုသက်
ရောက်လာနိုင်မည်ကို ကြိုတင်သတိထားပြီး အလေးအနက် စောင့်ကြည့်ဖို့ လိုအပ်နေပြီ ဖြစ်ပါတယ်။ ။

ကိုးကား-

Biometric Update, “Myanmar’s digital ID strategy comes amid a fraught landscape

စစ်တွေတိုက်ပွဲမှာ အထိနာနေတဲ့ စစ်တပ်က ပုဏ္ဏားကျွန်းကို ဗုံးကြဲ၊ အမျိုးသမီးတစ်ဦးသေဆုံး

▪️ကျိန္တလီကိုလည်း မနေ့ညက ဗုံးကြဲခဲ့

စက်တင်ဘာ-၁၁၊ ၂၀၂၆။ ခိုင်မြတ်/ People's Spring

စစ်တွေတိုက်ပွဲမှာ အထိနာပြန်ဆုတ်နေရတဲ့ အာဏာသိမ်းစစ်တပ်ဟာ ဒီနေ့ စက်တင်ဘာလ ၁၁ ရက် မနက်အစောပိုင်းအချိန်မှာ ပုဏ္ဏားကျွန်းမြို့နယ် ကျောက်ဆိပ်ရွာထဲကို ဒရုန်းနဲ့ ဗုံးကြဲတိုက်ခိုက်ခဲ့တာကြောင့် သက်ကြီးပိုင်းအမျိုးသမီးတစ်ဦး သေဆုံးခဲ့ပါတယ်။

မနက်အာရုံတက်အချိန်မျာ FPV Drone နဲ့ လူနေရွာထဲ ဗုံးကြဲခဲ့တာဖြစ်ပြီး အသက် ၆၃ နှစ်အရွယ် စစ်ဘေးရှောင် အမျိုးသမီး ဒေါ်လှသန်းရီရဲ့ ဘယ်ဖက်ရင်အုံမှာ ထိမှန်၊ သေဆုံးခဲ့ရတာပါ။

“ပေါက်တောဘက်ကနေ စစ်ရှောင်ဖို့ ရောက်နေကြတာ သူတို့က အဘွားက ဂွင်ချင်း(ပွဲချင်းပြီး)သေသွားတယ်” လို့ ပုဏ္ဏားကျွန်းဒေသခံလူငယ်တစ်ဦးက ပြောပါတယ်။

ဗုံးကြဲခံရတဲ့ ကျောက်ဆိပ်ရွာဟာ စစ်တပ်နဲ့ အာရက္ခတပ်တော်(AA)တို့ နှစ်ဖက်တိုက်ပွဲဖြစ်ပွားနေတဲ့ နေရာနဲ့ ဆယ်မိုင်ကျော်ကွာဝေးပြီး ပုဏ္ဏားကျွန်းမြို့အနီး ဂူ၀ဘုရားတောင်ခြေရင်းက ကျေးရွာတခုဖြစ်ပါတယ်။ အဲဒီရွာမှာ ဒေသခံ ရွာသားတွေအပြင် စစ်ဘေးရှောင်ပြည်သူတွေလည်း အများအပြားနေထိုင်ကြတာပါ။

စစ်တပ်ဟာ ကျောက်ဆိပ်ရွာကို ဗုံးကြဲတဲ့အပြင် ကျောက်ဆိပ်ရွာရှေ့ ဂူ၀ဘုရား၊ ပုဏ္ဏားကျွန်းမြို့ပေါ် ရပ်ကွက်တွေ ရှိ စာသင်ကျောင်းနဲ့ နေအိမ်တွေ၊ အခြားအနီးတဝိုက်ကျေးရွာတွေကိုလည်း အခုရက်ပိုင်းအတွင်း လေကြောင်း၊ လက်နက်ကြီး၊ ဒရုန်းတွေနဲ့ တိုက်ခိုက်မှုတွေ ဆက်တိုက်လုပ်နေပါတယ်။

အခုလိုဗုံးကြဲနေတာဟာ စစ်တွေ - ပုဏ္ဏားကျွန်းအစပ်တိုက်ပွဲတွေမှာ အထိနာနေတာကြောင့် အရပ်သားပြည်သူတွေကိုပါ ပစ်မှတ်ထားလာနေတာဖြစ်တယ်လို့ ဒေသခံတွေက ပြောကြပါတယ်။

“ဒီရွာတွေမှာ ဘာ AA မှလည်း မရှိဘူး။ ရွာသားတွေ စစ်ရှောင်တွေ၊ ကလေးတွေပဲ ရှိတယ်။ စစ်တိုက်ရင်လည်း စစ်ကို စစ်လိုတိုက်လေ။ စစ်တွေဘက်မှာ တိုက်ပွဲဖြစ်နေတာ ဒီရွာတွေကို ကြဲစရာအကြောင်းကို မရှိဘူးလေ” လို့ ပုဏ္ဏားကျွန်းမြို့နယ်မှ လူမှုကူညီရေးလုပ်ငန်းတွေ လုပ်နေတဲ့ လူငယ်အမျိုးသမီးတစ်ဦးက ပြောပါတယ်။

စစ်တပ်ဟာ မနေ့က စက်တင်ဘာလ ၁၀ ရက်နေ့ညမှာလည်း ရခိုင်ပြည်နယ်တောင်ပိုင်း ဂွမြို့နယ် ကျိန္တလီမြို့ကို ဗုံးကြဲခဲ့ပြီး ထိခိုက်၊ သေဆုံးမှုအခြေအနေတွေကိုတော့ မသိရသေးပါဘူး။

“အခုလည်း လေယာဉ်ဝဲနေတယ် ဒီဘက်မှာ။ ကျိန္တလီမှာ ဒဏ်ရာရတဲ့သူတွေရှိတယ်လို့တော့ ကြားတယ်။ မသိရသေး” လို့ ဂွဒေသခံတစ်ဦးက ပြောပါတယ်။

လက်ရှိမှာ စစ်တွေမြို့နယ် ရွှေမင်းဂံရေတပ်စခန်းအနီးဝန်းကျင် ပုဏ္ဏားကျွန်းမြို့နယ်ဘက်ခြမ်းမှာ နှစ်ဖက်တိုက်ပွဲ ဖြစ်နေပြီး စစ်တပ်ဘက်က အထိနာနေတယ်လို့ မြေပြင်သတင်းရင်းမြစ်တွေက ပြောကြပါတယ်။ စစ်တပ်ဟာ ပြီးခဲ့ တဲ့ စက်တင်ဘာလ ၄ ရက်နေ့မှာ ၄၉၂၆ စစ်ဆေးရေးလို့နာမည်တပ်ပြီး စစ်တွေကနေ ပုဏ္ဏားကျွန်းမြို့နယ်ဘက် ခြမ်းကို စစ်ကြောင်းနှစ်ခုနဲ့ ထိုးစစ်ဆင်ခဲ့ပေမယ့် စစ်ကြောင်းတခုဟာ အကျအဆုံးများပြီး တိုက်ပွဲပထမနေ့မှာပဲ ပြန်လှည့်ခဲ့ရကာ နောက်ထပ်စစ်ကြောင်းတခုဟာလည်း ရှေ့မတိုးနိုင်ဖြစ်နေပါတယ်။

(ကျောက်ဆိပ်မှာ ဗုံးထိမှန်သေဆုံးသွားတဲ့ အမျိုးသမီး။ ဓါတ်ပုံ - ဖြူစင်ရင်ခွင်ဖောင်ဒေးရှင်း)

စစ်တွေရှေ့တန်းစစ်မျက်နှာတွေမှာ စစ်တပ်က ရိုဟင်ဂျာတွေ သုံးတိုက်ခိုင်းနေ

■"ဖမ်းတာကတော့အကြောင်းမျိုးစုံပြပြီးဖမ်း
တာပဲ။ ပြီးရင် ဘယ်သူမှ တရားရုံးလည်း မရောက်၊ ရဲစခန်းလည်းမရောက်ဘူး။စစ်တပ်ထဲပဲ ရောက်သွားတယ်"-စစ်​တွေမြို့ကရိုဟင်ဂျာလူငယ်တဦး

စက်တင်ဘာ-၁၁၊၂၀၂၆။ခိုင်မြတ်/ People's Spring

စစ်တွေမြို့နယ်နဲ့ ပုဏ္ဏားကျွန်းမြို့နယ်အစပ်မှာ အာရက္ခတပ်တော်(AA)နဲ့ ဖြစ်ပွားနေတဲ့ တိုက်ပွဲတွေအတွင်းမှာ အာဏာသိမ်းစစ်တပ်က မတရားဖမ်းဆီး၊ စစ်သင်တန်းပေးထားတဲ့ ရိုဟင်ဂျာတွေကို အသုံးပြုတိုက်ခိုင်းနေတယ်လို့ မြေပြင်သတင်းရင်းမြစ်တွေနဲ့ ဒေသခံတွေကပြောပါတယ်။

စစ်တွေမြို့နယ်အတွင်း ရိုဟင်ဂျာကျေးရွာတွေနဲ့ ဒုက္ခသည်စခန်းတွေမှ ဖမ်းဆီးထားတဲ့ ရိုဟင်ဂျာရာချီကို အခြေခံ စစ်သင်တန်းပေးထားပြီး အခုဖြစ်နေတဲ့ ရှေ့တန်းတိုက်ပွဲတွေမှာ အသုံးပြုနေတာလို့ ဆိုပါတယ်။

“ရှေ့တန်းမှာ မူဆလင်တွေ တွေ့ရတယ်ပြောကြတယ်။မျက်မြင်တွေ့ကြတာပေ့ါနော်။မူဆ
လင်အလောင်းတွေ ရတာတော့ မရှိသေးဘူး။ ဒါပေမယ့် စစ်ကြောင်းတိုင်း စစ်ကြောင်းတိုင်းမှာ မူဆလင်တွေပါတယ်။ မိုင်းရှိနိုင်တဲ့နေရာ တွေဆိုရင်သူတို့တွေကိုအရှေ့ကသွားခိုင်းတယ်၊ဓါးစာခံသဘောမျိုးပေ့ါ”လို့ ဒေသခံစစ်ရေးသတင်းရင်းမြစ်တ ဦးက ပြောပါတယ်။

လက်ရှိမှာ စစ်တွေမြို့နယ်ဘက်ကနေ AA ထိန်းချုပ်ထားတဲ့ ပုဏ္ဏားကျွန်းမြို့နယ်ဘက်နေရာတွေကို စစ်တပ်က အင်အားအလုံးအ
ရင်းသုံးကာ ထိုးစစ်ဆင်ဖို့ကြိုးစားနေတာဖြစ်ပြီး မြေပြင်မှာတော့ စစ်တပ်က အထိနာကာ ပြန်ဆုတ်နေ ရတယ်လို့ ဆိုပါတယ်။

စစ်တွေမြို့ခံတစ်ဦးကလည်း “ဟုတ်တယ်၊အဲလို ပြောကြတယ်။ကျွန်တော်တို့လည်း တွေ့တယ်။ယူနီဖောင်းဝတ်ထားတဲ့မူဆလင်တွေကို စစ်ကားအပြည့်နဲ့ ပို့နေတာ။အရင်နှစ်ရက်၊ သုံးရက်လောက်ကထင်တယ်။စစ်ကားနဲ့ ငါးစီးသွားတာမှာမူဆလင်ငါးဆယ်လောက် ပါ
သွားတယ်။ အကုန်လက်နက်အပြည့်အစုံနဲ့၊ ရှေ့တန်းပို့တာဖြစ်မယ်”လို့ပြောပါတယ်။

အာဏာသိမ်းစစ်တပ်ဟာ ရခိုင်ဒေသတိုက်ပွဲတွေစဖြစ်ချိန်ကတည်းက ရိုဟင်ဂျာတွေရာနဲ့ချီကို အတင်းအကြပ်ဖမ်းဆီး စစ်သင်တန်းပေးထားခဲ့တာဖြစ်ပြီး စစ်တွေတိုက်ပွဲအရှိန်မြင့်လာချိန် ၂၀၂၅ နှစ်ကုန်ပိုင်းနဲ့ ၂၀၂၆ နှစ်ဆန်းပိုင်းတို့မှာ လည်း ဒေသခံရိုဟင်ဂျာ ၂၀၀ ကျော်ကို ထမ်မံဖမ်းဆီး စစ်သင်တန်းပို့ခဲ့တယ်လို့ ဒေသခံရိုဟင်ဂျာတွေက ပြောပါတယ်။

“ဖမ်းတာကတော့ အကြောင်းမျိုးစုံပြပြီး ဖမ်းတာပဲ။ ပြီးရင် ဘယ်သူမှ တရားရုံးလည်း မရောက်၊ ရဲစခန်းလည်း မရောက်ဘူး။စစ်တပ်ထဲပဲ ရောက်သွားတယ်။ ရွာဘက်တွေမှာ အဖမ်းခံရတာများတယ်”လို့စစ်တွေမြို့မှာနေ
ထိုင်တဲ့ ရိုဟင်ဂျာလူငယ်တစ်ဦးက ပြောပါတယ်။

ပြီးခဲ့တဲ့ ၂၀၂၃ ရခိုင်ဒေသမှာ တိုက်ပွဲတွေစဖြစ်တုန်းကလည်း အာဏာသိမ်းစစ်တပ်ဟာ စစ်တွေဒေသခံရိုဟင်ဂျာရာချီကို စစ်သင်
တန်းပေးပြီး AA နဲ့ဖြစ်တဲ့ ရှေ့တန်းစစ်မျက်နှာတွေဆီ ပို့ခဲ့ကာ တိုက်ပွဲတွင်း သေဆုံး သွားတဲ့အလောင်းတွေကိုတောင် မိသားစုက ပြန်မရခဲ့ဘူးလို့ ဆိုကြပါတယ်။

AA ကလည်း ရသေ့တောင်မြို့နယ်အတွင်းက စစ်တပ်နဲ့ဖြစ်တဲ့ ရှေ့တန်းတိုက်ပွဲတွေမှာ ရိုဟင်ဂျာ (ထုတ်ပြန်တာမှာမူဆလင်လို့​ဖော်ပြ) အလောင်းတွေ တွေ့ခဲ့ရတယ်လို့ ဓါတ်ပုံတွေနဲ့တကွ ထုတ်ပြန်ခဲ့ဖူးပါတယ်။

စစ်တပ်ဟာ အခုစစ်တွေမြို့ တိုက်ပွဲပြင်းထန်လာချိန်မှာလည်း ရိုဟင်ဂျာတွေကို အသုံးချလာနိုင်တယ်လို့စစ်ရေးလေ့လာသူတွေနဲ့ ဒေ
သခံတွေက ပြောကြပါတယ်။

"ရိုဟင်ဂျာတွေက အခုလည်း ဓါးစာခံဘ၀နဲ့ပဲ နေရတာ။ ရခိုင်သားတွေမှာ တိုက်ပွဲဖြစ်ရင် ပြေးလို့ရသေးတယ်။ ကျွန်တော်တို့မှာ ပြေးစရာလည်း မရှိဘူး။ စစ်တပ်က ဖမ်းရင်လည်း ခံ၊ သတ်ရင်လည်း ခံရမယ့်အခြေအနေဖြစ်နေတယ်” လို့ စစ်တွေမြို့ခံ ရိုဟင်ဂျာလူငယ်က ပြောပါတယ်။

အာဏာသိမ်းစစ်တပ်ဟာ ကျောက်ဖြူမြို့နယ်မှာလည်း ကျောက်တလုံးရိုဟင်ဂျာဒုက္ခသည်စခန်းမှ ရိုဟင်ဂျာတွေကို တအိမ်တယောက်ကျ စစ်မှုထမ်းစေပြီး လုံခြုံရေးကင်းစခန်းတွေမှာ တာဝန်ချထားပါတယ်။ ဒါ့အပြင် ဘူးသီးတောင်၊ မောင်တောတိုက်ပွဲကာလတွေတုန်းကလည်း ရိုဟင်ဂျာလူငယ်အများအပြားကို စစ်သင်တန်းပေး၊ရှေ့တန်းပို့တိုက်ခိုက်
စေခဲ့ပါတယ်။

စစ်တပ်ဟာစက်တင်ဘာလ ၄ ရက်နေ့ကစပြီး စစ်တွေမြို့နယ် အမြင့်ကျွန်းတံတားကနေ ပုဏ္ဏားကျွန်းမြို့နယ် ကွမ်း တောင်ရွာဘက်ဆီ စစ်ကြောင်းတခု၊ ရွှေမင်းဂံရေတပ်စခန်းကနေ ပုဏ္ဏားကျွန်းမြို့နယ်ဘက် ရဲရိုးပြင်၊ ဆားပို့ တောင်၊ အောင်မြေကုန်းစတဲ့ ရွာတွေဘက်ထိ စစ်ကြောင်းတခု ထိုးစစ်ဆင်ခဲ့တာပါ။

အမြင့်ကျွန်းတံတားက တက်လာတဲ့စစ်
ကြောင်းဟာ ကွမ်းတောင်ရွာနားအရောက်မှာ အကျအဆုံးများပြီး တပ်လန် ဆုတ်ပြေးခဲ့ရကာအရင်ကစခန်းချနေခဲ့တဲ့အမြင့်ကျွန်းတံတားပေါ်ကနေပါဆုတ်ပြေးသွားခဲ့တယ်လို့ ဆိုပါတယ်။

အခုအခါ ရွှေမင်းဂံရေတပ်စခန်းကနေ ထွက်လာတဲ့စစ်ကြောင်းတခုပဲ ကျန်တော့ပြီး အဲဒီစစ်ကြောင်းဟာလည်း ရှေ့ မတိုးနိုင်တော့ဘဲ လေကြောင်း၊ လက်နက်ကြီးပစ်ကူတွေပေးကာ ဆားပို့တောင်ရွာဝန်းကျင်မှာပဲ တန့်နေတယ်လို့ မြေပြင်မှာရှိနေတဲ့ စစ်ရေးသတင်းရင်းမြစ်တဦးက ပြောပါတယ်။

အာဏာသိမ်းစစ်တပ်ဟာ ၄၉၂၆ စစ်ဆေးရေးလို့နာမည်တပ်ပြီး AA ထိန်းချုပ်နယ်မြေတွေဖြစ်တဲ့ပုဏ္ဏားကျွန်း၊ကျောက်ဖြူ၊မကွေး
တိုင်း မင်းတုန်း၊ ပဒါန်း၊ပဲခူးတိုင်းပန်းတောင်း၊ ဧရာ၀တီတိုင်း သာပေါင်း၊ ရေကြည်မြို့နယ်တို့မှာ ထိုးစစ်လုပ်နေပြီး စက်တင်ဘာ ၁၀ ရက်အထိတပတ်ကြာ ထိ AA စခန်းတခုမှ သိမ်းနိုင်တာမရှိဘဲ အထိနာတပ်ပြန်ဆုတ်ကာ စစ်တပ်စခန်းတွေ ထပ်ပါမသွားစေဖို့သာ ခံစစ်လုပ်နေကြရတယ်လို့ မြေပြင်သတင်းရင်း မြစ်တွေက ပြောပါတယ်။

အာဏာသိမ်းစစ်တပ်က၂၀၂၄ ခုနှစ်ကရခိုင်ပြည်နယ်မှာ ရိုဟင်ဂျာတွေကို စစ်သင်တန်းပေးနေစဥ်။ ဓါတ်ပုံ-CJ

ဗန်းမော်မှာ ကမ်းကပ်ထားတဲ့ စစ်တပ်ရေယာဉ်ကို KIA ပူးပေါင်းတပ် ဒရုန်းနဲ့ ထပ်မံတိုက်ခိုက်

ကမ်းကပ်ထားတဲ့သင်္ဘောအချို့နဲ့ မြစ်အတွင်းမောင်းပြေးတဲ့အမြန်ရေယာဉ်ငယ် တိုက်ခိုက်ခံရမှု ရုပ်သံ ထွက်ပေါ်

စက်တင်ဘာ ၁၁၊ ၂၀၂၆။ ထားမြတ်/People’s Spring

ကချင်ပြည်နယ်၊ ဗန်းမော်မြို့မှာ ကမ်းကပ်ရပ်နားထားတဲ့ စစ်တပ် ရေယာဉ်အချို့ကို ကချင်လွတ်လပ်ရေးတပ်မတော်(KIA) ပူးပေါင်းတပ်က ဒရုန်းနဲ့ ထပ်မံ တိုက်ခိုက်ခဲ့တယ်လို့ ကချင်စစ်ရေးသတင်းရင်းမြစ်က ပြောပါတယ်။

မြစ်ကမ်းဘေးကပ်ထားတဲ့ သင်္ဘောတွေထဲက ၁စီးကို ဒရုန်းနဲ့ တိုက်ခိုက်မှု ရုပ်သံနဲ့ မြစ်အတွင်း မောင်းပြေးတဲ့ အမြန်ရေယာဉ်ငယ်ကို ဒရုန်းနဲ့ လိုက်လံတိုက်ခိုက်တဲ့ ရုပ်သံထွက်ပေါ်လာရာ မြစ်ကမ်းဘေး ကပ်ထားတဲ့ ရေယာဉ်ကို တိုက်ခိုက်မှုဟာ ဗန်းမော်ရောက်သင်္ဘောကို တိုက်ခိုက်တာလို့ သတင်းရင်းမြစ်က ပြောပါတယ်။

“မနေ့က တိုက်ခိုက်တာရှိပါတယ်” လို့ ကချင်စစ်ရေးသတင်းရင်းမြစ်က ဗန်းမော်ကမ်းကပ် စစ်သင်္ဘော တိုက်ခိုက်မှု ဖြစ်စဉ်အပေါ် အတည်ပြုပါတယ်။

မြစ်အတွင်း အရှိန်နဲ့ မောင်းနေတဲ့ အမြန်ရေယာဉ်ငယ်တိုက်ခိုက်မှု အခြေအနေကိုတော့ ဆက်လက် စုံစမ်းနေဆဲပါ။ ရုပ်သံဖော်ပြချက်အရ မောင်းနှင်နေတဲ့ အမြန်ရေယာဉ်ငယ်ကို ပထမအကြိမ် ဒရုန်းနဲ့ တိုက်ခိုက်ရာ အမြန်ရေယာဉ်ငယ်ဘေး ပေါက်ကွဲပြီး နောက် အမြန်ရေယာဉ်ငယ်ဟာ ကမ်းဘေးကပ်စဉ် နောက်ထပ် ဒရုန်း ၁စီးနဲ့ ထပ်မံ တိုက်ခိုက်လို့ ထိခိုက်ခဲ့တာတွေ့ရပါတယ်။

အခြားသတင်းရင်းမြစ်တစ်ဦးကတော့ လတ်တလော ထွက်ပေါ်နေတဲ့ ရုပ်သံဟာ ရွှေကူမြို့နယ်အတွင်း ဖြစ်စဉ်လို့ ပြောပြပါတယ်။

ကမ်းကပ်သင်္ဘောအချို့နဲ့ အမြန်ရေယာဉ်ငယ်တိုက်ခိုက်ခံရမှု အခြေအနေနဲ့ပတ်သက်ပြီး KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံ စက်တင်ဘာ ၁၁ရက်မနက်မှာ ဆက်သွယ်မေးမြန်းရာ လတ်တလောအဲဒီဖြစ်စဉ်တွေကို မကြားသိရသေးဘူးလို့ ပြောပါတယ်။

စစ်တပ်ဟာ ကချင်ပြည်နယ် ဗန်းမော်မြို့ကို စစ်အင်အားဖြည့်ဖို့ ဩဂုတ်လကုန်ပိုင်းမှာ ပထမအသုတ် သင်္ဘောအုပ်စု တက်လာရာ KIA ပူးပေါင်းတပ်ရဲ့ တိုက်ခိုက်မှုကြောင့် ရေယာဉ် ၁၅စီးပါ သင်္ဘောအုပ်စုထဲက သင်္ဘောအများစုထိခိုက်ပျက်စီးနစ်မြုပ်ခဲ့ပါတယ်။

စစ်ရေးသတင်းရင်းမြစ်တွေရဲ့ ပြောပြချက်အရာ ဩဂုတ် ၂၇ရက် ကသာ-ရွေကူကြား တိုက်ခိုက်မှုမှာ စစ်တပ်သင်္ဘော ၁စီး ပျက်စီးခဲ့သလို ဩဂုတ် ၂၉ရက်ကနေ စက်တင်ဘာ ၉ရက်အကြား နှစ်ပတ်တာအတွင်း ပထမအသုတ်သင်္ဘောအုပ်စုက သင်္ဘော ၁၁စီး ပျက်စီးခဲ့တယ်လို့ ဆိုပါတယ်။

၁၁စီးထဲမှာ တိုက်ခိုက်ရေးသင်္ဘော ၃စီးပါဝင်တယ်လို့ ဆိုပါတယ်။

ဒါ့အပြင် စက်တင်ဘာ ဒုတိယပတ်မှာ ကချင်ပြည်နယ်ကို ဝင်လာတဲ့ ၆စီးပါ စစ်တပ်သင်္ဘောအုပ်စုက ၂စီးကိုလည်း KIA ပူးပေါင်းတပ်က တိုက်ခိုက်ခဲ့ပါသေးတယ်။ အဲဒီဒုတိယအသုတ်သင်္ဘောတွေ ရွှေကူမြို့မှာ ကမ်းကပ်ထားစဉ် ဒရုန်းနဲ့ တိုက်ခိုက်ခဲ့ရာ သင်္ဘော ၂စီး မီးလောင်ပျက်စီးခဲ့တာပါ။

ဒါကြောင့် စစ်တပ်ရဲ့ ပထမအသုတ်သင်္ဘောအုပ်စုက စစ်သင်္ဘောတွေအပါအဝင် ရေယာဉ် ၁၂စီး၊ ဒုတိယအသုတ် သင်္ဘောအုပ်စုက သင်္ဘော ၂စီး စုစုပေါင်း ၁၄စီးကို နှစ်ပတ်အတွင်းမှာ KIA ပူးပေါင်းတပ်က တိုက်ခိုက်ဖျက်ဆီးခဲ့တာဖြစ်ပါတယ်။သင်္ဘောအများစုဟာ ရွှေကူနဲ့ ဗန်းမော်မြို့ကြားမှာ တိုက်ခိုက်ဖျက်ဆီးခံရတာလည်းဖြစ်ပါတယ်။

စစ်တပ်က ကချင်ပြည်ကို စစ်အင်အားဖြည့်ဖို့ ရေကြောင်း၊ မြေပြင်၊ လေကြောင်း ထိုးစစ်ဆင်လာလို့ ဩဂုတ်လကုန်ပိုင်းနဲ့ စက်တင်ဘာလအတွင်းမှာ ဗန်းမော် စင်းခန်းတံတားဝန်းကျင်နဲ့ ရွှေ့ကူ ဇင်းဘုံဒေသ ဝန်းကျင်မှာ မြေပြင်တိုက်ပွဲတွေ ရေကြောင်းတိုက်ပွဲတွေနဲ့ လေကြောင်းတိုက်ခိုက်မှုတွေ ပြင်းပြင်းထန်ထန်ဖြစ်ပွားခဲ့တာပါ။


ရုပ်သံ - Ler Pyaw၊ Royal Kachin

လောင်းလုံမြို့နယ်မှာ စစ်တပ်စစ်ကြောင်းကို PDF ပူးပေါင်းတပ် ဒရုန်းနဲ့ တိုက်ခိုက်

စက်တင်ဘာ ၁၁၊ ၂၀၂၆။ထားမြတ်/People’s Spring

တနင်္သာရီတိုင်း၊ လောင်းလုံမြို့နယ်မှာ အင်အား ၁၀၀ ကျော်ပါ စစ်တပ်စစ်ကြောင်းကို ဒရုန်းနဲ့ တိုက်ခိုက်တာ၊ ကြားဖြတ်တိုက်ခိုက်တာတွေ လုပ်ဆောင်ခဲ့ကြောင်း ပြည်သူ့ကာကွယ်ရေးတပ်မတော်(PDF) တနင်္သာရီတိုင်းစစ်ဌာန ထားဝယ်ခရိုင် အမှတ်(၁)တပ်ရင်း သံမဏိလိပ်ပြာတပ်ခွဲက သတင်းထုတ်ပြန်ပါတယ်။

စက်တင်ဘာ ၈ရက်မှာ လောင်းလုံမြို့ကနေ ပြင်းထိန်ကျေးရွာကို ထွက်ခွာလာတဲ့ စစ်တပ်စစ်ကြောင်းကို ဒရုန်းဗုံးသီး ၉လုံးကြဲချတိုက်ခိုက်ခဲ့သလို စက်တင်ဘာ ၉ရက်မှာလည်း အဲဒီစစ်ကြောင်းကို ဒရုန်း ဗုံးသီး ၂၇လုံး ကြဲချတိုက်ခိုက်ခဲ့တယ်လို့ ဖော်ပြပါတယ်။

ဒါ့အပြင် စက်တင်ဘာ ၉ရက်မှာ ပြင်းထိန်ကျေးရွာကနေ ဝေဒီကျေးရွာဘက်ကို ထွက်ခွာလာတဲ့ စစ်ကြောင်းကို လမ်းပိုင်းတနေရာမှာ တိုက်ခိုက်ခဲ့ရာ ၁၅မိနစ်ခန့် အပြန်အလှန် တိုက်ပွဲဖြစ်ခဲ့ကြောင်း အသိပေးပါတယ်။ စက်တင်ဘာ ၁၀ရက်မှာလည်း ဝေဒီရွာကနေ ၀ဗျောကျေးရွာကို ထွက်လာချိန် ၅မိနစ်ခန့် အပြန်အလှန် တိုက်ပွဲဖြစ်ခဲ့ကြောင်း ထုတ်ပြန်ပါတယ်။

အဲဒီတိုက်ပွဲမှာ တော်လှန်ရေးရဲဘော် ၂ဦး ဒဏ်ရာရခဲ့သလို စစ်တပ်ဘက်ကလည်း ထိခိုက်သေဆုံးများပြားခဲ့ကြောင်း ဖော်ပြပါတယ်။

ဒါ့အပြင် တိုက်ပွဲသတင်းမှာ ရုပ်အလောင်းတစ်လောင်းရဲ့ ဓာတ်ပုံကို ဖော်ပြကာ ဒုဗိုလ်မှူးကြီးကျော်ဖြိုးအောင်လို့ ရေစာရေးသားထားပါတယ်။

စစ်တပ်ဘက်က ထိခိုက်ကျဆုံးအခြေအနေအပါအဝင် စစ်ဆင်ရေးနဲ့ပတ်သက်ပြီး မေးမြန်းဖို့ သံမဏိလိပ်ပြာတပ်ခွဲထံ ဆက်သွယ်ထားပြီး အဆက်အသွယ်မရသေးပါဘူး။

စစ်တပ်စစ်ကြောင်းကို ထားဝယ်ခရိုင်အမှတ်(၁)တပ်ရင်း သံမဏိလိပ်ပြာတပ်ခွဲ(SBF) အထူးပြောက်ကျားတပ်ဖွဲ့(SGF)၊ ကျောင်းသားတော်လှန်ရေးတပ်(SRF)တို့ ပူးပေါင်းတိုက်ခိုက်ခဲ့တာလို့ အသိပေးပါတယ်။

စစ်တပ်က အချိန်မရွေး စစ်ကြောင်းထိုးလာနိုင်တာကြောင့် ပြည်သူတွေအနေနဲ့ အသွားအလာအနေအထိုင် ဆင်ခြင်ကြဖို့ လည်း တိုက်တွန်းထားပါတယ်။

အရင်က ဒေသကာကွယ်ရေးတပ်ဖြစ်တဲ့ လောင်းလုံ သံမဏိလိပ်ပြာတပ်ဖွဲ့ဟာ အခုနှစ် ဇူလိုင်မှာ ထားဝယ်ခရိုင် အမှတ်(၁) တပ်ရင်းရဲ့ တပ်ခွဲအဖြစ် ပြောင်းလဲဖွဲ့စည်းလိုက်တဲ့ တပ်ဖြစ်ပါတယ်။ အရင်ကလည်း လောင်းလုံမြို့နယ်အတွင်း စစ်တပ် စစ်ကြောင်းတွေကို မဟာမိတ်တော်လှန်ရေးတပ်တွေနဲ့ ပူးပေါင်းတိုက်ခိုက်တာတွေရှိခဲ့ပါတယ်။