(မန်းလေးမြို့ဂေါဝန်ဆိပ်ကမ်းက ဆန်တက်လာတဲ့ စစ်သင်္ဘောအုပ်စု။ ဓာတ်ပုံ - ပကဖ၊ ဝက်လက်မြို့နယ်၊ NUG)

(၇၈)နှစ်မြောက် ကရင်နီအမျိုးသားအာဇာနည်နေ့ ကျင်းပ

စက်တင်ဘာ -၈၊၂၀၂၆။ဇော်၀င်း/People's Spring

(၇၈)နှစ်မြောက် ကရင်နီအမျိုးသားအာဇာနည်နေ့ အခမ်းအနားကို ကရင်နီအမျိုးသားတိုးတက်ရေးပါတီ
KNPP/KA ထိန်းချုပ်ရာနယ်မြေမှာ ဒီကနေ့ (စက်တင်ဘာ ၈ရက်) ကျင်းပခဲ့ပါတယ်။

အခမ်းအနားကို ကရင်နီအမျိုးသားတိုးတက်ရေးပါတီကခေါင်းဆောင်တွေ၊ကရင်နီပြည်အစိုးရ တာဝန်ရှိသူတွေ ၊တပ်ဗိုလ် တပ်မှူး၊ ရဲဘော် ရဲမေတွေ၊ဌာနဆိုင်ရာတာဝန်ခံတွေ ၊ကျောင်းသူကျောင်းသား၊ လူငယ်အမျိုးသမီးနဲ့ ပြည်သူလူထု အင်အား ၂၀၀ ကျော် တက်ရောက်ခဲ့တယ်ပါတယ်။

အခမ်းအနားမှာ နိုင်ငံတော်အလံအလေးပြုတာ၊ နိုင်ငံတော်သီချင်းသီဆိုဂုဏ်ပြုတာ၊ကျဆုံးခဲ့တဲ့အာဇာနည်တွေကို အလေးပြုတာနဲ့ ကရင်နီအမျိုးသားအာဇာနည်နေ့ မိန့်ခွန်းပြောတာနဲ့ ပေးပို့လာတဲ့ သဝဏ် လွှာတွေကို ဖတ်ကြားတာတွေလုပ်ခဲ့တယ်လို့ KNPP ရဲ့ သတင်းပြန်ကြားရေးဌာန KnIC က အသိပေးပါတယ်။

ဖဆပလအစိုးရက ကရင်နီအမျိုးသားအစည်းအရုံး ဥက္ကဌဖြစ်သူ ဂိုဘီတူရီ (ကရင်နီခုခံတော်လှန်ရေးခေါင်းဆောင်)ကို ရက်စက်ယုတ်မာစွာသတ်ဖြတ်ခဲ့သတဲ့ ၁၉၄၈ စက်တင်ဘာ ၈ ရက်ကို ဂုဏ်ပြုပြီးကရင်နီအမျိုးသားအာဇာနည်နေ့ကို သတ်မှတ်ခဲ့တာဖြစ်ပါတယ်။

ဂိုဘီတူရီက အစပြုပြီး သီးခြားလွတ်လပ်တဲ့ ကရင်နီပြည်ရဲ့တွန်းလှန်တိုက်ပွဲတွေနဲ့ ဒီကနေ့ ကိုယ်ပိုင်ပြဌာန်းခွင့် အခွင့်အရေး၊တန်းတူရေး၊ဒီမိုကရေစီအရေး၊ စစ်အာဏာရှင်နဲ့ အာဏာရှင်မှန်သမျှ လက်အောက်က လွတ်မြောက်ရေးထိသမိုင်းတလျှောက် အသက်သွေးချွေးတွေ ပေးဆပ်အနစ်နာခံခဲ့တဲ့ ကရင်နီအာဇာနည်သူရဲကောင်းတွေ ၊ရဲဘော်‌တွေနဲ့ ပြည်သူလူထုကို အောက်မေ့သတိရဂုဏ်ပြုတာလို့လည်း KnIC က ဆိုပါတယ်။

ဒါ့အပြင် ကရင်နီပြည်သူတွေဟာ အခက်အခဲတွေကြားကနေ လူမှုအသိုင်းအဝိုင်းကို ပြန်လည် တည်ဆောက်နေပြီး အကျပ်အတည်းတွေကြားက အကူအညီလိုအပ်သူတွေကို စောင့်ရှောက်တာ လူမှုအဖွဲ့အစည်းတွေ ပြန်လည်ထူထောင်တာနဲ့ အနာဂတ် နိုင်ငံရေးနဲ့ အုပ်ချုပ်ရေးစနစ်အတွက် ပါဝင် ဆောင်ရွက်ပြီး အာဇာနည်တို့ရဲ့ အိပ်မက်ကို အကောင်အထည်ဖော်နေတယ်လို့ KNPP ရဲ့ သ၀ဏ်လွှာမှာဖော်ပြပါတယ်။

ရည်မှန်းချက်က အာဏာကို လူနည်းစု လက်ထဲတွင် စုစည်းထားတဲ့ စနစ်တစ်ခုမဟုတ်ဘဲ လူထု ဆန္ဒနဲ့အခွင့်အရေးတွေကို အခြေခံတဲ့၊ တန်းတူညီမျှမှု၊ ကိုယ်ပိုင်ပြဋ္ဌာန်းခွင့်ကို အာမခံပေးနိုင်တဲ့ ဖက်ဒရယ် ဒီမိုကရေစီစနစ်ကို တည်ဆောက်ရေးလို့ အသိပေးပါတယ်။

အဲဒီအနာဂတ်ကို တည်ဆောက်ခြင်းက အာဇာနည်တို့ရဲ့ မြင့်မြတ်တဲ့ ပေးဆပ်မှုကို အဓိပ္ပာယ်ရှိစေမယ့် အကောင်းဆုံး နည်းလမ်း ဖြစ်တယ်လို့လည်း KNPP က ပြောပါတယ်။

လွတ်မြောက်ရေးခရီးက ရှည်လျားကြမ်းတမ်းမှုတွေရှိနေပေမယ့် စည်းလုံးညီညွတ်မှုနဲ့ ဆက်လက် လျှောက်လှမ်းကြရင် တရားမျှတမှု၊ တန်းတူညီမျှမှုနဲ့ ကိုယ်ပိုင်ပြဋ္ဌာန်းခွင့်တွေကို အခြေခံတဲ့ ဖက်ဒရယ်ဒီမိုကရေစီ နိုင်ငံသစ်တည်ဆောင်နိုင်မယ်လို့ တိုက်တွန်းထားပါတယ်။

MNDAAထိန်းချုပ်​ဒေသ သိန္နီမြို့မှာ
ပေါက်ကွဲမှုဖြစ်

စက်တင်ဘာ-၈၊၂၀၂၆။ရွှေပြည်စိုး/People's Spring

မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)ထိန်းချုပ်ထားတဲ့ ရှမ်း
ပြည်နယ်မြောက်ပိုင်း သိန္နီမြို့မှာဒီနေ့ မနက်အစောပိုင်းက ပေါက်ကွဲမှုဖြစ်ခဲ့ပါတယ်။

သိန္နီမြို့နယ်၊ စယ်အူရွာမှာ စက်တင်ဘာလ ၈ရက် မနက် ၅နာရီကျော်က ပေါက်ကွဲတာဖြစ်ပြီး လက်ရှိမှာ MNDAA တပ်ဖွဲ့ဝင်တွေ လာစစ်ဆေးနေတယ်လို့ ဒေသခံတွေကပြောပါတယ်။

"လေယာဉ်ပစ်တယ် စစချင်းပြောပေမယ့် အခုကယမ်းသိုလှောင်ရုံပေါက်ကွဲတယ်လို့ ပြောကြတယ်။အပျက်အစီးတော့ရှိတယ်။ ကိုးကန့်တွေ( MNDAAတပ်ဖွဲ့ဝင်များ)ကပိတ်ထားတော့ ဘာမှ ထပ်မသိရဘူး"လို့ သိန္နီမြို့ခံတဦးကပြောပါတယ်။

သိန္နီမြို့ဟာ ၂၀၂၃အောက်တိုဘာလ ၂၇ရက်ကစတင်တဲ့ ၁၀၂၇ စစ်ဆင်ရေးနဲ့အတူ MNDAAက သိမ်းပိုက်ထိန်းချုပ်ထားတဲ့ မြို့ဖြစ်ပါတယ်။MNDAAဟာအာရက္ခတပ်တော်
(AA)၊TNLA တို့နဲ့အတူ ရှမ်းပြည်နယ်မြောက်ပိုင်းမှာဖော်ဆောင်ခဲ့တဲ့ ၁၀၂၇စစ်ဆင်ရေးနဲ့အတူ လားရှိုး၊ လောက်ကိုင်၊ ချင်းရွှေဟော်၊ မုန်းကိုး၊ ဖောင်းဆိုင်၊ ကုန်းကြမ်း၊ ပန်လုံ၊ ကွမ်းလုံ၊ သိန္နီ၊ တာမိုးညဲ၊ပန်ဆိုင်း မြို့တွေကိုသိမ်းပိုက်ထားပါတယ်။

တရုတ်အစိုးရရဲ့ဖိအားကြောင့် လားရှိုးမြို့ကို ၂၀၂၅ ခုနှစ် ဧပြီလမှာစစ်ကောင်စီထံကျည်
၁ ချက်မ​ဖောက်ဘဲ ပြန်လွှဲပေးခဲ့ရပြီး အပစ်ရပ်ထားပါတယ်။ သိန္နီမြို့နဲ့ TNLA ဆီကနေ ပြန်ယူထားတဲ့ကွတ်ခိုင်မြို့ကိုလည်းပြန်ပေးဖို့ စစ်ကောင်စီက ဖိအားပေးနေပါတယ်။

MNDAAကတော့ထိန်းချုပ်မြို့နယ်တွေမှာ အုပ်ချုပ်ရေး ယန္တရားအခိုင်အမာပြင်ဆင်ပါတယ်။ကိုးကန့်ဒေသကို အထူးဒေသ(၁) အ
ဖြစ်သတ်မှတ်ထားပြီးမြို့တော်အဖြစ်လောက်
ကိုင်နဲ့ ကွတ်ခိုင်၊ သိန္နီ၊လောက်ကိုင်၊ မုံးကိုးခရိုင်ဆိုပြီးခရိုင် (၄) ခု၊ မြို့တော် (၁) ခုအဖြစ် ဖွဲ့စည်းထားပါတယ်။

ဒီနေ့ ပေါက်ကွဲမှုနဲ့ ပတ်သက်ပြီး MNDAA က သတင်းထုတ်ပြန်ထားခြင်းမရှိသေးပါဘူး ။

သိန္နီမြို့တ​နေရာကို ၂၀၂၅
ခုနှစ်မှာ​တွေ့ရစဥ်။ဓါတ်ပုံ-The Kokang

KIA ဒုဗိုလ်ချုပ်ကြီးခေါင်လွမ်း တော်လှန်ရေးဂုဏ်ဆောင်ဘွဲ့ရရှိမှု ဝမ်းမြောက်ကြောင်း စစ်ဒေသ(၁) ထုတ်ပြန်

အမှတ်(၁) စစ်ဒေသစတင်ထူထောင်ခဲ့သူဖြစ်သလို အသဲရောဂါ ခံစားရသည့်တိုင် မြို့ပေါ် ဆေးကုမသွားဘဲ တော်လှန်ရေးတာဝန်ထမ်းဆောင်ခဲ့

စက်တင်ဘာ ၈၊ ၂၀၂၆။ ထားမြတ်/People’s Spring

အမှတ်(၁) စစ်ဒေသစတင်တည်ထောင်ခဲ့တဲ့ ကချင်လွတ်လပ်ရေးတပ်မတော် (KIA) ဒုတိယဗိုလ်ချုပ်ကြီး ခရောင်ခေါင်လွမ်းကို အမျိုးသားညီညွတ်ရေးအစိုးရ (NUG)က ပြည်သူ့တော်လှန်ရေး ဂုဏ်ဆောင်ဘွဲ့ ဂုဏ်ပြုချီးမြှင့်ခဲ့တဲ့အပေါ် ဝမ်းမြောက်ကြောင်း အမှတ်(၁) စစ်ဒေသက ထုတ်ပြန်ပါတယ်။

ဒုဗိုလ်ချုပ်ကြီး ခေါင်လွမ်းအပါအဝင် PDF ရဲဘော်တွေ မဟာမိတ်တွေ စုစုပေါင်း ၁၈၀၀ ဦးနီးပါးကို အမျိုးသားညီညွတ်ရေးအစိုးရက စက်တင်ဘာ ၇ရက်နေ့မှာ ဘွဲ့၊ တံဆိပ်တွေ ပေးအပ်ခဲ့တာပါ။ အဲဒီ အထဲမှာ ပြည်သူ့တော်လှန်ရေး ဂုဏ်ဆောင်ဘွဲ့ ချီးမြှင့်ခံရသူ ၁ဦး သာပါဝင်ပြီး အဲဒီဆုကို ၂၀၂၄ခုနှစ်က ကွယ်လွန်သွားတဲ့ KIA စစ်ဦးစီးချုပ် ဒုဗိုလ်ချုပ်ကြီး ခေါင်လွမ်းက ရရှိခဲ့တာပါ။

ဒုဗိုလ်ချုပ်ကြီးခေါင်လွမ်းဟာ ဗဟိုကွပ်ကဲရေးနဲ့ ပေါင်းစပ်ညှိနှိုင်းရေးကော်မတီ (C3C) ရဲ့ ကွပ်ကဲမှုဖြင့် PDF တိုင်းတာဝန်ခံများဦးစီးတဲ့ စစ်ကိုင်းတိုင်း၊ မကွေးတိုင်း၊ မန္တလေးတိုင်းတို့ပါဝင်တဲ့ အမှတ် (၁) စစ်ဒေသအား ၂၀၂၁ စက်တင်ဘာ ၁၇ ရက်မှာ စတင်ဖွဲ့စည်းစဉ် စစ်ဒေသကို ဦးဆောင်ခဲ့သူဖြစ်ပါတယ်။

အမှတ် (၁) စစ်ဒေသအနေနဲ့ ဒုဗိုလ်ချုပ်ကြီး ခေါင်လွမ်းရဲ့ ဦးဆောင်မှုအောက်မှာ မဟာမိတ်တပ်များနဲ့ ပူးပါင်းတိုက်ပွဲဝင်ကာ အောင်ပွဲများစွာရရှိကာ နယ်မြေစိုးမိုးမှုများ ရယူလာနိုင်ခဲ့ကြောင်းလည်း ဖော်ပြပါတယ်။

“တစ်ဘက်တွင်လည်း ဒုဗိုလ်ချုပ်ကြီး ရုတ်ခရောင် ခေါင်လွမ်း သည် ၂၀၂၃ ခုနှစ်တွင် အသည်းရောဂါဝေဒနာအား စတင်ခံစားလာရပြီဖြစ်သော်လည်း မြို့ပေါ်သို့ ဆေးကုသရန်မသွားဘဲ တပ်မဟာ-၈ ထဲ၌ PDF ရဲဘော်များဖြင့် အတူတကွ ရုန်းကန်နေထိုင်ခဲ့ပြီး တော်လှန်‌ရေး တာဝန်များထမ်းဆောင်ရင်း ၂၀၂၄ ခုနှစ်၊ မေလ (၁၃) ရက်နေ့တွင် ရောဂါဖြင့် ကွယ်လွန်ခဲ့သည်။ကွယ်လွန်ချိန်အထိ စစ်အာဏာရှင်တော်လှန်ရေးတာဝန်များကို ရွပ်ရွပ်ချွံချွံ ထမ်းဆောင်ခဲ့သည့် ဒူကဘာ့ကြီး ခေါင်လွမ်း အား ပြည်သူ့တော်လှန်ရေး ဂုဏ်ဆောင်ဘွဲ့ ချီးမြှင့်ခြင်းအပေါ် မိမိတို့ အမှတ် (၁) စစ်ဒေသအနေဖြင့် များစွာဂုဏ်ယူဝမ်းမြောက်ရပါသည်” လို့ စစ်ဒေသ(၁)ရဲ့ ဒီကနေ့ ထုတ်ပြန်ချက်မှာ ရေးသားထားပါတယ်။

စစ်ဒေသမှ ရဲဘော်များအနေနဲ့လည်း ဒုဗိုလ်ချုပ်ကြီးခေါင်လွမ်းလို စစ်အာဏာရှင်တော်လှန်‌ရေးကို မဆုတ်မနစ်သော စိတ်ဓာတ်ဖြင့် ဆက်လက်တိုက်ပွဲဝင်သွားမယ်လို့ သစ္စာပြုကြောင်းလည်း အမှတ်(၁) စစ်ဒေသက ထုတ်ပြန်ပါတယ်။

အခု NUGက ဆု၊တံဆိပ်တွေ ပေးအပ်ရာမှာ အမှတ် (၁) စစ်ဒေသက ဆုတံဆိပ် ၅၀နီးပါး ရရှိခဲပါတယ်။ ပြည်သူ့တော်လှန်ရေး သူရဲကောင်းဘွဲ့ (၁) ဆု၊ တပ်ရင်းများနဲ့ ရဲဘော် တစ်ဦးချင်းအနေဖြင့် ပြည်သူ့သားကောင်းဆု (၂၅) ဆု၊ ပြည်သူ့ဇာနည်ဆု (၁၉) ဆု၊ တော်လှန်ရေး အမှုထမ်းကောင်းတံဆိပ် (၂) ဆု ဖြစ်ပါတယ်။

ပြည်သူ့ခုခံတွန်းလှန်စစ် (၅) နှစ်ပြည့်မှာ အမှတ် (၁) စစ်ဒေသအတွင်း အမျိုးမျိုးသော စွန့်လွှတ်အနစ်နာခံမှုများဖြင့် တာဝန်ထမ်းဆောင်ခဲ့ကြတဲ့ ရဲဘော်တစ်ဦးချင်းကို အမှတ် (၁) စစ်ဒေသရဲ့ ပြည်သူ့တော်လှန်ရေး သူရဲကောင်းဘွဲ့နဲ့အတူ ချီးကျူးဂုဏ်ပြုကြောင်းလည်း ထုတ်ပြန်ပါတယ်။

NUG က စစ်ဘက်ဆိုင်ရာ သူရဲကောင်းဘွဲ၊ ဆုနဲ့ တံဆိပ်တွေချီးမြှင့် အပ်နှင်းခံရသူ စုစုပေါင်း ၁၇၉၂ ဦးရှိရာ PDFတပ်ဖွဲ့မှ ၁၄၄၂ဦး၊ ပြည်သူ့ကာကွယ်ရေးအဖွဲ့မှ ၃၂၄ဦး၊ မဟာမိတ်တော်လှန်ရေးအဖွဲ့များက ၂၆ဦး ပါဝင်ပါတယ်။

အမြန်လမ်းမှာ စစ်ကောင်စီလူကုန်တားဒုရဲအုပ်က ယာဉ်မောင်းကိုသတ်ပြီး ကားလုယက်

လူသတ် ကားလုယက်တဲ့ ဒုရဲအုပ်က ကျွဲဂိမ်းဆော့သူဟုဆို

စက်တင်ဘာ -၈၊၂၀၂၆။ရွှေပြည်စိုး၊မိုမို/People's Spring

နေပြည်တော်မှာ ကားအငှားဝန်ဆောင်မှုလုပ်ငန်းရှင်တစ်ဦးကို စစ်ကောင်စီလက်အောက်ခံလူကုန်တား ရဲတပ်ဖွဲ့က အရာရှိက သေနတ်နဲ့ ပတ်သတ်ပြီး ကားလုယူမှုဖြစ်ခဲ့တယ်လို့ သတင်းရရှိပါတယ်။

ဇမ္ဗူသီရိမြို့နယ်၊ သုခတော်ဝင်အိမ်ရာမှာ ကားအငှားဝန်ဆောင်မှုလုပ်ကိုင်နေတဲ့ ကိုဝင်းကို ဆိုသူကို နေပြည်တော်လူကုန်ကူးမှုတားဆီးနှိမ်နင်းရေးရဲတပ်ဖွဲ့မှ ဒုရဲအုပ်ရဲရင့်အောင်က သတ်ဖြတ်ခဲ့တာလို့ ရဲတပ်ဖွဲ့ သတင်းရင်းမြစ်ကပြောပါတယ်။

" ဒုရဲအုပ်ရဲရင့်အောင်က ကျွဲဂိမ်းအရမ်းဆော့တယ်လို့ သိရတယ်။ ရဲအရာရှိအဖြစ် ကားငှားပြီး ကျူးလွန်တာဗျ။ ဒီကိစ္စက လူကုန်တားတပ်ဖွဲ့မှူးအထိ ဂယက်ရိုက်နေတယ်။ ဒါပေမယ့် တိုးတိုးကျိတ်ကျိတ်တဲ့ ပြီးသွားမှာပါပဲ"လို့ ဒုရဲမှူးအဆင့်ရှိ နေပြည်တော်ရဲသတင်းရင်းမြစ်ကပြောပါတယ်။

ဖြစ်စဉ်က စက်တင်ဘာ ၆ရက်မှာ ဖြစ်ခဲ့တာပါ။ ဒုရဲအုပ်ရဲရင့်အောင်က ကိုဝင်းကိုဆီ ချိတ်ဆက်ပြီး မိတ္တိလာမြို့ကို ကားငှားပါတယ်။ ကိုဝင်းကိုက မောင်းပို့ပေးဖို့နဲ့ ကားငှားခအတွက် ကျပ် ၄သိန်း ပေးဖို့ သဘောတူကြပါတယ်။

မိတ္ထိလာမြို့ကို သွားရောက်စဉ် ရန်ကုန်-မန္တလေးအမြန်လမ်းမကြီး မိုင်တိုင်အမှတ် ၂၇၉အနီးမှာ ဒုရဲအုပ်ရဲရင့်အောင်က ကိုဝင်းကို ကို သေနတ်နဲ့ ပစ်သတ်ပြီး လမ်းမဘေး ယာခင်းထဲမှာ အလောင်းစွန့်ပစ်တာလို့ သိရပါတယ်။

ကိုဝင်းကိုရဲ့ ရုပ်အလောင်းကို စက်တင်ဘာ ၆ရက် ညနေမှာ နွားကျောင်းသားကတွေ့ပြီး ရပ်ကျေးအုပ်ချုပ်ရေးမှုးကတဆင့် ရဲတပ်ဖွဲ့နဲ့ မိသားစုဝင်တွေက သိရတာပါ။

စက်တင်ဘာ ၇ရက်မှာတော့ လုယက်သွားတဲ့ ကားနဲ့အတူ ဒုရဲအုပ်ရဲရင့်အောင်ကို ဖမ်းမိပြီး ဆက်လက်စစ်ဆေးနေတယ်လို့ သတင်းရရှိပါတယ်။

" မိတ္ထိလာလို စစ်တပ်မြို့မှာ ရဲက ပြန်ပြီး လူသတ်ဓားပြတိုက်နေတာဆိုတော့ ဘာမှ မလုံခြုံဘူး။ ပြောဖို့စကားတောင်မရှ်ိဘူး"လို့ မိတ္ထီလာမြို့ခံတစ်ဦးက‌ပြောပါတယ်။

"ရန်ကုန်-မန္တလေးအမြန်လမ်း မိုင်တိုင် ၂၇၉/၁ ။ရန်ကုန်ကနေ မန္တလေးသွားလမ်းဘက်ခြမ်းလမ်းဘေးမှာ သေဆုံးခဲ့တာ။ဘော်ဒီကို သွားသယ်ပြီး မိတ္ထီလာ ပြည်သူ့ဆေးရုံကြီးကို ပို့ခဲ့တယ်"လို့မေတ္တာပါရမီ ပရဟိတအသင်း တာဝန်ရှိသူက ပြောပါတယ်။

လူသတ်မှုနဲ့ အမှုဖွင့်ခံထားရတဲ့ ဒုရဲအုပ်နဲ့ပတ်သက်လို့ နေပြည်တော် လူကုန်ကူးမှုတားဆီး နှိမ်နင်းရေးရဲဌာနကို လူထုနွေဦးက ဒီကနေ့ နေ့လယ်အထိ သုံးကြိမ်ထက်မနည်းဆက်သွယ်ခဲ့ပေမယ့် ဖုန်းပြန်လည်ဖြေကြားတာမရှိပါဘူး။

စစ်တပ်နဲ့ ဆက်ဆံရေး ပုံမှန်ပြန်ဖြစ်စေဖို့ ကြိုးပမ်းမှုတွေ မလုပ်ဆောင်ကြဖို့ ကုလမဟာမင်းကြီးပြော

▪️မြန်မာ့အရေးကို နိုင်ငံတကာရာဇဝတ်ခုံရုံး(ICC)ကို လွှဲပြောင်းပေးဖို့ ထပ်မံတိုက်တွန်း

စက်တင်ဘာ-၈၊ ၂၀၂၆။ People’s Spring

မြန်မာစစ်တပ်နဲ့ ဆက်ဆံရေး ပုံမှန်ပြန်ဖြစ်စေဖို့ ကြိုးပမ်းမှုတွေ မလုပ်ဆောင်ကြဖို့ ကုလသမဂ္ဂလူ့အခွင့်အရေးဆိုင်ရာ မဟာမင်းကြီးက တိုက်တွန်းပြောကြားလိုက်ပါတယ်။

စက်တင်ဘာ ၇ရက် မနေ့က ကျင်းပခဲ့တဲ့ ၆၃ ကြိမ်မြောက် ကုလသမဂ္ဂလူ့အခွင့်အရေးကောင်စီပုံမှန်အစည်းအဝေးမှာ မဟာမင်းကြီး ဗိုကာတာ့ခ်က မြန်မာစစ်တပ်အနေနဲ့ နိုင်ငံတကာဥပဒေအရ သူရဲ့ တာဝန်ဝတ္တရားများကို လိုက်နာဆောင်ရွက်နေကြောင်း သက်သေအထောက်အထား မရှိဘဲ စစ်တပ်နဲ့ ဆက်ဆံရေး ပုံမှန်ပြန်ဖြစ်စေဖို့ ကြိုးပမ်းမှုတွေ မပြုလုပ်ကြဖို့ တိုက်တွန်းသတိပေးခဲ့တာပါ။

“နောက်ပြီး မြန်မာပြည်သူတွေရဲ့ ဒီမိုကရေစီ၊ တရားမျှတမှုနဲ့ လူ့အခွင့်အရေး တောင်းဆိုမှုတွေမှာ ကမ္ဘာ့နိုင်ငံအားလုံးအနေနဲ့ နိုင်ငံရေးအရရော ငွေကြေးအရပါ ကူညီထောက်ပံ့ပေးကြဖို့ ကျွန်တော် တိုက်တွန်းတောင်းဆိုပါတယ်”လို့ ကုလလူ့အခွင့်အရေးဆိုင်ရာမဟာမင်းကြီးက ပြောကြားပါတယ်။

မြန်မာနိုင်ငံရဲ့ ပိုမိုဆိုးရွားလာနေတဲ့ လူ့အခွင့်အရေး အကျပ်အတည်းကို ဖြေရှင်းဖို့ နှစ်ပေါင်းများစွာကြာတဲ့တိုင်း နိုင်ငံတကာရဲ့ ကြိုးပမ်းအားထုတ်မှုတွေ မအောင်မြင်ခဲ့ဘူးလို့ ဗိုကာတာ့ခ်က ပြောပါတယ်။

ကုလလူ့အခွင့်အရေးဆိုင်ရာ မဟာမင်းကြီးက မြန်မာ့အရေးအခြေအနေကို နိုင်ငံတကာရာဇဝတ်ခုံရုံး(ICC)ကို လွှဲပြောင်းပေးဖို့လည်း ကောင်စီအဖွဲ့ဝင်နိုင်ငံတွေကို တိုက်တွန်းခဲ့ပါတယ်။

မြန်မာနိုင်ငံသို့ လက်နက်၊ ခဲယမ်း၊ လေယာဉ်ဆီနဲ့ အရပ်ဘက်ရော စစ်ဘက်ပါ အသုံးပြုနိုင်တဲ့ ကုန်စည်များ(dual-use items)လွှဲပြောင်းရောင်းချပေးပို့မှုများကို ရပ်တန့်ကြဖို့လည်း အဖွဲ့ဝင်နိုင်ငံတွေကို မဟာမင်းကြီးက ထပ်မံတိုက်တွန်းခဲ့ပါတယ်။

မြန်မာစစ်တပ်ရဲ့ လေကြောင်းတိုက်ခိုက်မှုတွေက အရပ်သားပြည်သူ သေဆုံးမှုတွေရဲ့ အဓိက အကြောင်းအရင်းအဖြစ် ဆက်ရှိနေဆဲလို့ ဗိုကာတာ့ခ်က ပြောပါတယ်။

ယုံကြည်ရတဲ့ရင်းမြစ်တွေရဲ့ အဆိုအရ အစီရင်ခံနေစဥ်ကာလအတွင်း အရပ်သား ၁,၂၀၀ ကျော် သတ်ဖြတ်ခံခဲ့ရပြီး တကယ့်မြေပြင်သေဆုံးမှုအရေအတွက်က ၃,၀၀၀ ကျော်နိုင်တယ်လို့ ဆိုပါတယ်။

မနေ့က မြန်မာ့အရေးအပြန်အလှန်ဆွေးနွေးမှုအစီအစဥ်မှာ ဗြိတိန်ရဲ့ လူ့အခွင့်အရေးဆိုင်ရာ သံအမတ်ကြီး အယ်လီနောဆန်းဒါးကလည်း မိန့်ခွန်းပြောကြားခဲ့ပြီး လေကြောင်းတိုက်ခိုက်မှုတွေက ကျောင်းများ၊ ဆေးရုံများနဲ့ ဘာသာရေးဆိုင်ရာအဆောက်အအုံများကို ထိခိုက်ပျက်စီးစေသလို အရပ်သားပြည်သူ သေဆုံးမှုတွေရဲ့ အဓိက အကြောင်းအရင်းဖြစ်နေတယ်လို့ ပြောပါတယ်။

မြန်မာစစ်တပ်ရဲ့ အဓမ္မစစ်သားစုဆောင်းမှု၊ မီးရှို့ဖျက်ဆီးမှုနဲ့ မတရားဖမ်းဆီးထိန်းသိမ်းမှုများကြောင့် နေရပ်စွန့်ခွာထွက်ပြေးရသူဦးရေမှာ ၃ ဒသမ ၆ သန်းကျော်အထိ မြင့်တက်လာခဲ့ကြောင်းလည်း ဗြိတိန်သံအမတ်ကြီးက ပြောပါတယ်။

ဗြိတိန်ဟာ မြန်မာပြည်သူအားလုံးအတွက် တာဝန်ယူမှု၊ တာဝန်ခံမှုရှိစေရေး ကတိကဝတ်ကို ဆက်လက်ကိုင်စွဲထားကြောင်းလည်း အယ်လီနောဆန်းဒါးက ပြောပါတယ်။

ဒါ့အပြင် မှတ်တမ်းတင်ထားတဲ့ ကျူးလွန်ချိုးဖောက်မှုတွေအတွက် ပြစ်မှုကျူးလွန်သူများကို တာဝန်ခံမှုရှိစေရမယ်လို့လည်း ဗြိတိန်သံအမတ်ကြီးက သတိပေးခဲ့ပါတယ်။

မြစ်ခြေက ကြောင်ပန်းခုံရွာ စစ်တပ် ဝင်စီးပြီး နေအိမ်တွေ မီးရှို့

စက်တင်ဘာ-၈၊၂၀၂၆။ကတ်သရင်း/People's Spring

မကွေးတိုင်း၊ ပခုက္ကူမြို့နယ်၊ မြစ်ခြေမြို့က ရှစ်မျက်နှာဘုရားမှာ တပ်စွဲထားတဲ့ စစ်တပ်ဟာ မြို့တွင်းက ကြောင်ပန်းခုံကျေးရွာ ဝင်ရောက်စီးနင်းမီးရှို့ခဲ့ပြီး မီးငြှိမ်းတဲ့ ဒေသခံတွေကိုပါ သေနတ်နဲ့လိုက်လံ ပစ်ခတ်ခဲ့တယ်လို့ မြို့နယ်လူသားစာနာ တာဝန်ခံက ပြောပါတယ်။

စက်တင်ဘာ ၇ရက် နေ့လည် ၂နာရီက ရှစ်မျက်နှာဘုရားမှာ အထိုင်ချတပ်စွဲထားတဲ့ စစ်တပ်က ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ကြောင်ပန်းခုံကျေးရွာက နေအိမ်တွေ ဝင်ရောက်မီးရှို့ခဲ့တာလို့ သိရပါတယ်။

ဒေသခံပြည်သူတွေက နေအိမ်တွေ မီးဝင်ငြှိမ်းချိန်မှာ သေနတ်နဲ့လိုက်လံပစ်တာလို့ မီးမငြှိမ်းနိုင်ဘဲ နေအိမ် ၁၂ လုံး မီး လောင်ကျွမ်းခဲ့တယ်လို့ သိရပါတယ်။

" မနေ့က ဖြစ်တာပါ။ပြည်သူ‌ အထိခိုက်မရှိပါဘူး။နေအိမ်၁၂လုံးမီး လောင်တယ်လို့ သိထားရပါတယ်။လက်ရှိကတော့ စစ်တပ်က အရင်နေရာမှာဘဲ ရှိတုန်းပါ။မြို့ထဲမှာ ဒီတနေရာပဲတပ်စွဲထားပါတယ်"လို့ မြို့နယ်လူသားစာနာတာဝန်ခံက ပြောပါတယ်။

မြစ်ခြေမြို့ရှစ်မျက်နှာဘုရားမှာ စစ်တပ်က ဇွန်လကတည်းက ဝင်ရောက်ကာ တပ်စွဲထားတယ်လို့ သိရပါတယ်။

တပ်စွဲတဲ့ နေရာနဲ့ အနည်းငယ်ဝေးတဲ့ မြို့တွင်းနေရာတချို့ကိုတော့ပြည်သူ တွေပြန်လည်ဝင်ရောက် နေထိုင်နေကြပြီး ဒီနေ့အထိတော့ မြို့ရဲ့ပြည်သူ ၄၀ရာခိုင်နှုန်းဟာ စစ်ဘေးရှောင်နေရဆဲဖြစ်တယ်လို့ မြို့နယ်လူသားစာနာ တာဝန်ခံက ပြောပါတယ်။

မေလ ၁၁ရက်ကစတင်ကာ မြစ်ခြေမြို့ကို စစ်တပ် ဝင်ရောက်ခဲ့ပြီး အမျိုးသမီးတွေအပါအဝင် ပြည်သူ ၄၀ ခန့်ကို မီးရှို့သတ်ဖြတ်ခဲ့တယ်လို့ ဒေသခံတွေက ပြောပါတယ်။

အဲဒီအချိန်ကတည်းက ‌‌‌‌‌‌‌‌‌‌ဒေသခံတွေတိမ်းရှောင်နေခဲ့ရပြီး မေလ ၃၁ရက်မှာ စစ်ကြောင်းပြန်ထွက်ကာ နယ်မြေရှင်းလင်းပြီးတဲ့နောက် တော်လှန်ရေးတပ်တွေက ဇွန်လ ၃ရက်မှာ ကျေးရွာအတွင်း ပြည်သူတွေကို ပြန်ဝင်ခိုင်းခဲ့တယ်လို့ သိရပါတယ်။

အဲဒီနောက် ဇွန်လ ၁၀ရက်မှာ မြစ်ခြေရဲစခန်းကို တော်လှန်ရေးတပ်တွေက သိမ်းပိုက်လိုက်ပြီးနောက်စစ်တပ်က လေကြောင်းကနေ ဗုံးကြဲခဲ့သလို စစ်ကြောင်းတွေ မြို့ထဲပြန်ဝင်ရောက်တပ်စွဲထားလို့ ဒေသခံ တွေဟာ ဒီ‌နေ့အထိထပ်မံ ရှောင်တိမ်းနေရတာလို့ သိရပါတယ်။

(မြစ်ခြေမြို့နယ်အတွင်း ဒေသခံများ၏နေအိမ်များကို စစ်ကောင်စီတပ်ကမီးရှို့ဖျက်ဆီးနေတာကို ၂၀၂၅ ဇန်နဝါရီက တွေ့ရစဉ်။ ဓါတ်ပုံ-TT)

မန်ယူ ဂန္ထဝင်ကစားသမားတွေရဲ့ မြန်မာခရီးစဉ် ဖျက်သိမ်းရေး လက်မှတ်ရေးထိုး လှုပ်ရှားမှုပြုလုပ်

စက်တင်ဘာ ၈၊၂၀၂၆။သုည/People's Spring

အင်္ဂလန်ပရီးမီးယားလိဂ်ကလပ် မန်ချက်စတာယူနိုက်တက်ရဲ့ ဂန္တဝင်ကစားသမားတွေရဲ့ မြန်မာနိုင်ငံခရီးစဉ် ဖျက်သိမ်းရေးအတွက် ဗြိတိန်နိုင်ငံ မန်ချက်စတာမြို့ရှိ မြန်မာတွေက ဦးဆောင်ပြီး လက်မှတ်ရေးထိုးတဲ့ လှုပ်ရှားမှု ပြုလုပ်နေကြပါတယ်။

နာမည်ကျော် ဘောလုံးကစားသမားတွေရဲ့ ခရီးစဉ်ဟာ မြန်မာစစ်အာဏာရှင်အဖွဲ့က လက်ရှိဖြစ်ပွားနေတဲ့ လူသားချင်းစာနာထောက်ထားမှုဆိုင်ရာ အကျပ်အတည်းအတွင်း တည်ငြိမ်မှုနဲ့တရားဝင်မှု ရှိသလို ပြသဖို့အတွက် အသုံးချနိုင်ကြောင်း ဖော်ပြထားပါတယ်။

မြန်မာနိုင်ငံဟာ လက်ရှိမှာ တရားမဝင် စစ်အာဏာသိမ်းအဖွဲ့ရဲ့ ထိန်းချုပ်မှုအောက်မှာ ရှိနေပြီး အပြစ်မဲ့ ပြည်သူတွေ အထူးသဖြင့် ကလေးငယ်တွေအပါအဝင် လူပေါင်းများစွာကို နေ့စဉ် အကြမ်းဖက်မှုတွေ၊ အိုးအိမ်စွန့်ခွာ ထွက်ပြေးရမှုတွေနဲ့ အကြမ်းဖက်ဖိနှိပ်မှုတွေကို ရင်ဆိုင်နေရကြောင်း ထောက်ပြထားပါတယ်။

ဒီလိုကာလအတွင်း မန်ယူရဲ့ ဂန္တဝင်ကစားသမားတွေ ဖြစ်တဲ့ ရိုင်ယန်ဂစ်၊ ဘာဘာတော့ဗ်၊ အန်ဒါဆန်နဲ့ အီဗရာတို့က အောက်တိုဘာ ၃၀ ရက်မှ နိုဝင်ဘာ ၁ ရက်အထိ ရန်ကုန်မြို့မှာ နေထိုင်ပြီး ပရိသတ်တွေနဲ့ တွေ့ဆုံဖို့ စီစဉ်နေတာ ဖြစ်ပါတယ်။

လက်မှတ်ရေးထိုးလှုပ်ရှားသူတွေက မန်ယူဂန္တဝင်ကစားသမားတွေကို စီစဉ်ထားတဲ့ ခရီးစဉ်ကို ပြန်လည်သုံးသပ်ပေးဖို့ တောင်းဆိုထားပြီး မန်ယူအသင်း စီမံခန့်ခွဲသူတွေနဲ့ ဂန္ထဝင် ကစားသမား တစ်ဦးချင်းစီတို့ထံသို့လည်း စာရေးသားပေးပို့ တောင်းဆိုထားပါတယ်။

ဒါ့အပြင် မန်ယူဂန္တဝင်ကစားသမားတွေအနေနဲ့ မြန်မာပြည်သူတွေနဲ့အတူ ရပ်တည်ကြောင်း ပြသနိုင်ဖို့ စစ်အာဏာရှင်အဖွဲ့ရဲ့ ဖိတ်ကြားမှုကို ငြင်းပယ်ပေးပြီး ၎င်းတို့ရဲ့ ဂုဏ်သတင်းနဲ့ ပုံရိပ်ကို စစ်အာဏာရှင်အဖွဲ့က အသုံးချခြင်းမှ ကာကွယ်ပေးဖို့လည်း တိုက်တွန်းတောင်းဆိုထားပါတယ်။

ယင်းခရီးစဉ်ကို ဖျက်သိမ်းခြင်းဟာ မြန်မာပြည်သူတွေနဲ့ တကမ္ဘာလုံးရှိ မြန်မာတွေ စည်းလုံးညီညွတ်မှုကို ပြသတဲ့ အားကောင်းသော သတင်းစကားတစ်ရပ် ဖြစ်လာမှာ ဖြစ်ပြီး မန်ချက်စတာ ယူနိုက်တက်အသင်းနဲ့ ၎င်းရဲ့ ပရိသတ်တွေ တန်ဖိုးထားတဲ့ အခြေခံမူတွေကိုလည်း ထင်ဟပ်စေမှာ ဖြစ်ကြောင်းလည်း ဖော်ပြထားပါတယ်။

“မန်ယူပရိသတ်တစ်ယောက်ဆိုပြီး ကိုယ့်နိုင်ငံမှာ လာစေချင်ပေမယ့်လည်း စစ်ကောင်စီရဲ့ ပုံရိပ်အတု အသုံးချပြီး အေးချမ်းနေကြောင်း ပြသချင်တာမို့ ဒီခရီးစဉ်ကို ဖျက်သိမ်းစေချင်ပါတယ်။ ဒါ့ကြောင့်လည်း ကိုယ်တတ်နိုင်တဲ့အားနဲ့ လက်မှတ်ရေးထိုးမှုမှာ ပါဝင်ထားပါတယ်။ ဘာတွေပဲ စကစ က လုပ်ဆောင်နေပါစေ နိုင်ငံမှာ ပုံမှန်ပြန်မဖြစ်သေးဘူး ဆိုတာကို မြန်မာပြည်တွင်းမှာ နေတဲ့သူတိုင်း သိပြီးသား ဖြစ်ကြပါတယ်။ မသိသေးရင်လည်း သတိမမူဘဲ မနေထိုင်ကြဖို့ ပြောလိုပါတယ်” လို့ ရန်ကုန်မြို့ရှိ မန်ယူပရိသတ်တစ်ဦးက ပြောပါတယ်။

လက်မှတ်ရေးထိုးတောင်းဆိုလိုသူတွေအနေနဲ့ https://www.change.org/p/urge-former-man-utd-players-to-cancel-myanmar-visit?recruiter=1251799249&recruited_by_id=bb4e2820-86ca-11ec-8677-0d8d5157787f&utm_source=share_petition&utm_campaign=share_petition&utm_medium=copylink&share_id=9wLjDFfQ7X ကနေ ဝင်ရောက်လုပ်ဆောင်နိုင်ပါတယ်