ရခိုင်ပြည်နယ် အ​ခြေခံကုန်​ဈေးနှုန်းများ

-People's Spring

ရခိုင်ပြည်နယ်အတွင်း အ​ခြေခံကုန်စည်​တွေနဲ့ အ​ရေးကြီးကုန်စည်​တွေရဲ့ စစ်တပ်အာဏာမသိမ်းခင် ​ဈေးနှုန်း နဲ့ စစ်တပ်အာဏာသိမ်းပြီး​​နောက် ဒီ​နေ့ဈေးနှုန်း​တွေကို ​ဖော်ပြ​​ပေးထားပါတယ်။ ရခိုင်ပြည်နယ်မှာ ၁၇ မြို့နယ်ရှိတာမှာ အာရက္ခတပ်​တော် (AA)က ၁၄ မြို့နယ်ကိုသိမ်းပိုက်ထိန်းချုပ်ထားပါတယ်။ဒါ​ကြောင့် စစ်တပ်ထိန်းချုပ်နိုင်တာစစ်​တွေ၊​ကျောက်ဖြူ ၊မာန်​အောင်သုံးမြို့နယ်ပဲကျန်ပါတယ် ။ AA ထိန်းချုပ်​ဒေသ​တွေနဲ့ စစ်တပ် ထိန်းချုပ်​ဒေ
သ​တွေရဲ့ ​ဈေးနှုန်း​တွေကိုလည်း နှိုင်းယှဥ်​ဖော်ပြထားပြီး AA ထိန်းချုပ်​ဒေသ​တွေက ကုန်စည်အများစုမှာ ​ဈေးပိုသက်သာတာကို​တွေ့ရပါတယ် ။

#လူထု​​နွေဦး #People'sspring
#ရခိုင်ပြည်နယ် #ကုန်​ဈေးနှုန်း #AA

H&M အဝတ်အထည်တွေချုပ်တဲ့ ထန်းတပင်မြို့နယ်က သိုးမွေးစက်ရုံ စက်တင်ဘာလကုန်မှာ ပိတ်သိမ်းမယ်

စက်တင်ဘာ−၅၊၂၀၂၆။မိုမို/People's Spring

ကမ္ဘာကျော်အမှတ်တံဆိပ်ဖြစ်တဲ့ H&M အဝတ်အထည်တွေ ချုပ်တဲ့ ရန်ကုန်တိုင်း၊ ထန်းတပင်မြို့နယ်က Teng Hui Myanmar သိုးမွေးစက်ရုံ စက်တင်ဘာလကုန်မှာ ပိတ်သိမ်းတော့မယ်လို့ သိရပါတယ်။

၂၀၁၃ ကတည်းက စတင်ချုပ်ခဲ့တဲ့ Teng Hui Myanmar သိုးမွေးအထည်ချုပ်စက်ရုံဟာ H&M ကုမ္ပဏီရဲ့အ၀တ်အထည်တွေအတွက် ကုန်ကြမ်းနဲ့ အမှာစာမရတော့တာကြောင့် စက်ရုံပိတ်သိမ်းဖို့ ဖြစ်လာတာလို့ ဆိုပါတယ်။ လက်ရှိမှာ စက်ရုံလုပ်သား ၂၀၀၀ ကျော် ရှိပါတယ်။

လာမယ့်အောက်တိုဘာ ၁ ရက်မှာ အပြီးပိတ်သိမ်းမှာဖြစ်ပြီး စက်တင်ဘာ ၂၅ ရက်ကစတင်ကာ စက်ရုံပိတ်သိမ်းမှုကြောင့် အလုပ်ရပ်နားရမယ့် အလုပ်သမားတွေကို လုပ်သက်အလိုက် နစ်နာကြေးပေးသွားမယ်လို့ စက်ရုံက တရားဝင် ကြေညာပါတယ်။

လွန်ခဲ့တဲ့ ၄လခန့်ကလည်း H&M အ၀တ်အထည်တွေချုပ်နေရတဲ့ ရွှေပြည်သာမြို့နယ်က King Rich Fishion အထည်ချုပ်စက်ရုံဟာလည်း အမှာမရတော့တာကြောင့် ပိတ်သိမ်းခဲ့ရပါတယ်။

ဒေါ်လာငွေစီးဆင်းမှုကို ထိန်းချုပ်ဖို့ အထည်ချုပ်လုပ်ငန်းတွေရဲ့ ကုန်ကြမ်းတင်သွင်းမှုကို အာဏာသိမ်း စစ်တပ်က အခုနှစ် ဇွန်လမှာ ကန့်သတ်လိုက်ပါတယ်။

"လုပ်ငန်းစဉ်က စနေပြီး ။စက်ပစ္စည်း အပိုမှာရင်အော်ဒါအသစ် ရှိကြောင်းပြရမယ်။ ပို့ကုန်ဒေါ်လာအားလုံး နိုင်ငံခြား‌ ငွေရင်းနှီးမြုပ်နှံမှုထံက‌နေတဆင့်ငွေအားလုံးကို ဗဟိုဘဏ်ထံစာရင်းသွင်းပေးရတယ်။ လိုအပ်တဲ့ကစ္စည်းဒေါ်လာနဲ့ ၀ယ်ဖို့ဆိုရင် ကုန်သယ်ကြီးများအသင်းထံတင်ပြခွင့်ပြုချက်ရယူဖို့ ဒေါ်လာငွေပြရမယ်။အပ်ချုပ်စက်လို ပစ္စည်းတွေက ပြည် တွင်းမှာမရှိတဲ့ဟာလေ။CMP တွေရဲ့ဒုက္ခ မသေးတော့ဘူး"လို့ အထည်ချုပ်လုပ်ငန်းရှင်တစ်ဦးက ပြောပါတယ်။

ကျွမ်းကျင် အလုပ်သမားရှားပါးမှု၊ အလုပ်အပ်နှံရေး စိန်ခေါ်မှု၊ လျှပ်စစ်မီးရရှိရေး စိန်ခေါ်မှုတွေအပြင် ကုန်ကြမ်းပြတ်တောက်မှု မရှိစေဖို့အတွက် အထည်ချုပ်လုပ်ငန်းတွေ ရုန်းကန်ရမယ့် နောက်ထပ်စိန်ခေါ်မှုလို့ သူက ဆိုပါတယ်။

နှစ်စဉ် ပြည်ပတင်ပို့မှုကနေ ဒေါ်လာ ၄ ဘီလီယံ နဲ့ ၅ ဘီလီယံကြားရရှိတဲ့ အထည်ချုပ်လုပ်ငန်းကနေ ကုန်ကြမ်းပြန်လည်တင်သွင်းမှုအရ ဒေါ်လာ ၃ ဘီလီယံ ၀န်ကျင်ရှိတယ်လို့ သိရပါတယ်။

"ကန့်သတ်ချက်က ကုန်သွယ်မှုလိုငွေပြတာကြောင့်လဲ ပါကောင်းပါနိုင်ပေမယ့် ဒီပုံစံအတိုင်းဆို အထည် ချုပ်လုပ်ငန်းတွေ အသက်ရှုကြပ်ကြတော့မယ်။တဆက်တည်းမှာပဲ လုပ်ငန်းခွင်က အလုပ်သမားထုပါ အနည်းနဲ့အများသက်ရောက်လိမ့်မယ်"လို့ စီးပွားရေးလုပ်ငန်းရှင်တစ်ဦးက ပြောပါတယ်။

စစ်တပ်အာဏာသိမ်းပြီး ၅နှစ်အတွင်း အထည်ချုပ်ကဏ္ဍကနေ ထွက်ခွာသွားတဲ့ လုပ်ငန်း ၂၀၀ ကျော်ရှိခဲ့ပြီး လက်ရှိမှာ ပြည်တွင်း၊ပြည်ပ ရင်းနှီးမြှုပ်နှံတဲ့ အထည်ချုပ်စက်ရုံ ၆၀၈ ခုရှိပြီး တရုတ်နိုင်ငံသားပိုင်စက်ရုံ ၃၆၇ ခုရှိတယ်လို့ မြန်မာနိုင်ငံအထည်ချုပ်လုပ်ငန်းရှင်များအသင်းရဲ့ နောက်ဆုံးထုတ်ပြန်ချက်မှာ တွေ့ရပါတယ်။

စစ်တပ်အာဏာသိမ်းပြီးနောက်ပိုင်း ပြည်ပကုမ္ပဏီတွေထွက်ခွာသွားတာ၊နိုင်ငံခြားရင်းနှီးမြှုပ်နှံမှုတွေ မလာတော့တာကြောင့် နိုင်ငံခြားငွေရရှိဖို့ ဗိုလ်ချုပ်ကြီးအဆင့်ရှိသူတွေ စစ်တပ်ခန့်အပ်ထားတဲ့ ၀န်ကြီးတွေနဲ့ ၂၀၂၂ မှာ FESC ကို ဖွဲ့စည်းခဲ့ပြီးနောက်ပိုင်း ပြည်ပကုန်သွယ်မှုကနေရတဲ့ ဒေါ်လာငွေတွေနဲ့ ပြည်ပရောက် မြန်မာလုပ်သားတွေရဲ့ ငွေကြေးစီးဆင်းမှုကို ထိန်းချုပ်ခဲ့ပါတယ်။

ပို့ကုန်လုပ်ငန်းရှင်တွေရတဲ့ ဒေါ်လာငွေကို ရည်ညွှန်းစျေး(တစ်ဒေါ်လာကို ကျပ် ၂၁၀၀)လဲလှယ်ပြီး ဗဟိုဘဏ်ကို ပြန်အပ်ဖို့ စစ်ကောင်စီက ဖိအားပေးခဲ့ပါတယ်။

ပို့ကုန်ရငွေ ဒေါ်လာ သန်း ၁၀၀ ရှိပါက ၆၅ သန်းကို မြန်မာကျပ်ငွေ လဲလှယ်ဖို့သတ်မှတ်ခဲ့ပြီး နောက်ပိုင်းနှစ်တွေမှာ ရငွေရဲ့ တစ်ဝက် နဲ့ ၂၀၂၅မှာ ၂၅ ရာခိုင်နှုန်းနဲ့ အခုနှစ်မှာ ၁၅ ရာခိုင်နှုန်းကို မဖြစ်မနေ ပြန်သွင်းရပါတယ်။

လက်ရှိ ပြည်ပက စက်သုံးဆီ၊ဆေးဝါး နဲ့ ကုန်ချောပစ္စည်းအများစုဟာ အထည်ချုပ်လုပ်ငန်းရဲ့ပို့ကုန်၀င်ငွေ ကို စစ်တပ်က အသုံးပြုနေတာဖြစ်ပါတယ်။




𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
#ludunwayoo #လူထုနွေဦး #PS #People*sSpring #myanmar
#အထည်ချုပ်စက်ရုံပိတ်သိမ်း#Teng Hui Myanmar#H&M
#ထန်းတပင်မြို့

(ပိတ်သိမ်းတော့မယ့် ထန်းတပင်မြို့နယ်က Teng Hui Myanmar သိုးမွေးစက်ရုံ လုပ်သားတွေ။ ဓာတ်ပုံ − MSSK/FB)

စစ်တပ်ပြန်ကြားရေးနဲ့ စစ်လော်ဘီတွေပြောတာမယုံဘဲ စစ်သားတွေ အလင်းဝင်ကြဖို့ ပြည်သူ့ပန်းတိုင် တိုက်တွန်း

စက်တင်ဘာ ၅၊ ၂၀၂၆။ ထားမြတ်/People’s Spring

အာဏာသိမ်းစစ်တပ်ရဲ့ ပြန်ကြားရေးနဲ့ စစ်လော်ဘီတွေ ပြောသမျှ မယုံကြဘဲ စစ်သားတွေ အလင်းဝင်လက်နက်ချကြဖို့ ပြည်သူ့ပန်းတိုင်က တိုက်တွန်းလိုက်ပါတယ်။

ပြည်သူ့ပန်းတိုင်က အပတ်စဉ် တင်ဆက်နေတဲ့ စစ်တပ်ရဲ့ ပြေးဟပရောဂျက် ယခုတပတ် အစီအစဉ်ကို ဒီကနေ့ စက်တင်ဘာ ၅ရက်မှာ ဖော်ပြခဲ့ရာ ဩဂုတ်နောက်ဆုံးပတ်အတွင်း စစ်တပ်က အလင်းဝင်၊ ပူးပေါင်း လက်နက်ချ အခြေအနေကို အသိပေးရင် အခုလို တိုက်တွန်းလိုက်တာပါ။

“လူမှုကွန်ယက်ပေါ်က သတင်းတု၊ သတင်းမှားတွေကို မယုံကြည်ကြဖို့ တပ်ချုပ် ရဲဝင်းဦးက ပြောပါတယ်။ဟုတ်ပါတယ်၊ မယုံကြပါနဲ့။စစ်တပ်စိုးမိုးထားတယ်"ဆိုတဲ့ စစ်လော်ဘီချန်နယ်က တင်တဲ့သတင်းတွေကို ယုံပြီး လမ်းသလားမိလို့ PDF တွေဆီမှာ အဖမ်းခံလိုက်ရတဲ့ အရာရှိတွေ၊ ရဲတွေ၊ စစ်သားတွေ မနည်းတော့ပါဘူး။ အခုလည်း ဗန်းမော်သွားတဲ့ စစ်သင်္ဘောတွေ ဘာမှ မဖြစ်ပါဘူးဆိုပြီး စစ်လော်ဘီတွေ ပြောနေကြချိန်မှာ စင်းခန်းနား အတိုက်ခံရလို့ စစ်သင်္ဘောတွေ နစ်မြုပ်ပြီး စစ်သားတွေ ဧရာဝတီမြစ်ထဲ မျောနေကြပါတယ်။ ဉာဏ်ကူပြီး အလံဖြူထောင်သူတွေကတော့ အသက်ရှင်သန်ခွင့် ရသွားကြပါပြီ။ဟုတ်ပါတယ်၊ စစ်တပ်ပြန်ကြားရေးနဲ့ စစ်လော်ဘီတွေ ပြောသမျှ မယုံကြပါနဲ့။ စစ်သည်တွေ အလင်းဝင်ကြပါ၊ လက်နက်ချကြပါ။” လို့ ပြည်သူ့ပန်းတိုင်က ရေးသားထားပါတယ်။

ဩဂုတ်လ စတုတ္ထပတ်အတွင်း အလင်းဝင် ၊ လက်နက်ချသူ စစ်သား ၆ဦး အပါအဝင် ၂၀၂၅ ဇန်နဝါရီကနေ အခုနှစ် ဩဂုတ် စတုတ္ထပတ်အထိ အလင်းဝင် လက်နက်ချနဲ့ စစ်သုံ့ပန်း စုစုပေါင်း ၃၈၂၁ ဦး ရှိကြောင်း ပြည်သူ့ပန်းတိုင်က အသိပေးထားပါတယ်။

ပြည်သူ့ပန်းတိုင်က ဖော်ပြတဲ့ ဗန်းမော်မြို့ကို သွားတဲ့ စစ်သင်္ဘောတွေက အလံဖြူထောင် လက်နက်ချမှု ဖြစ်စဉ်ဟာ စက်တင်ဘာ ၂ရက်နေ့မှာ ဖြစ်ပွားခဲ့တာပါ။

စက်တင်ဘာ ၂ရက်မှာ ရွှေကူကနေ ဗန်းမော်မြို့ကို သွားတဲ့ စစ်သင်္ဘောအုပ်စုကို KIA ပူးပေါင်းတပ်က တိုက်ခိုက်ခဲ့ရာ သင်္ဘောတွေ ထိခိုက်နစ်မြုပ်ပြီး သင်္ဘော ၂စီးဟာ ကမ်းကပ် အလံဖြူထောင်လက်နက်ချခဲ့တာလို့ဆိုပါတယ်။

သတင်းရင်းမြစ်တွေရဲ့ ပြောပြချက်အရ စစ်သား ၁၅၀ ကျော်နဲ့ ရဲတွေ အပါအဝင် စစ်သုံ့ပန်း ၁၉၀ ခန့် ရှိပြီး လုံခြုံရာ ပြောင်းရွှေ့ထားပြီးဖြစ်တယ်လို့ ဆိုပါတယ်။ ဒါ့အပြင် စစ်သင်္ဘောတွေ ထိခိုက်နစ်မြှုပ်စဉ် ရေထဲခုန်ချ ရေထဲမျောပါတဲ့ စစ်ကောင်စီတပ်ဖွဲ့ဝင်တွေကိုလည်း KIA ပူးပေါင်းတပ်က ကမ်းကပ်စေပြီး ဖမ်းဆီးရမိတာတွေလည်းရှိပါတယ်။

(ကရင်ပြည်နယ်မှာ ကော်ဘရာစစ်ကြောင်းဆီ အလင်းဝင်လာတဲ့ စစ်ကောင်စီတပ်သားတွေကို ဗိုလ်မှူးစောဒါဘောနဲ့အတူ စက်တင်ဘာ ၄ရက်က တွေ့ရစဉ်။ ဓာတ်ပုံ − CJ)

■​ဆောင်းပါး

Tiktok ပေါ်က ကျားဖြန့်ဗိုလ်မှူးများ

-ထွန်းညိုဦး/People's Spring

ရန်ကုန်၊ မန္တလေးလို မြို့ကြီးတွေအပါအဝင် စစ်တပ်ထိန်းချုပ်ရာ ဒေ​​သတွေမှာ အာဏာ
သိမ်းစစ်တပ်နဲ့ ၎င်းလက်အောက်ခံ ပျူစောထီးတွေရဲ့ စစ်မှုထမ်းပေါ်တာဆွဲတာတွေ ဆိုးဆိုးရွားရွား ဖြစ်ပွားနေတဲ့အချိန် မြန်မာနိုင်ငံမှာ လူသုံးအများဆုံး ဆိုရှယ်မီဒီယာပလက်
ဖောင်းဖြစ်တဲ့ Tiktok မှာ ဗိုလ်မှူးအကောင့်တွေ အများအပြား ပေါ်ထွက်လာပါတယ်။ အကောင့်နာမည်တွေကတော့ ဗိုလ်မှူးသန့်ဇင်အောင်တဲ့။ သူရခန့်ပြည့်စုံတဲ့။ဗိုလ်မှူးကြီးထွန်းထွန်းနိုင်တဲ့။ ဗိုလ်မှူး ATH တဲ့။တခြားတခြား အကောင့်တွေလည်း အများကြီး ရှိပါသေးတယ်။

အဲဒီဗိုလ်မှူးဆိုသူတွေက ဝန်ဆောင်မှုပေးပါတယ်တဲ့။ ဘာဝန်ဆောင်မှုလဲဆိုတော့ စစ်မှု
ထမ်းပေါ်တာဆွဲခံရသူတွေကို ပြန်ထုတ်ပေးပါသတဲ့။ယုံကြည်မှ စကားလာပြောဆိုတာလည်း ပါ ပါသေးတယ်။

​သူတို့အကောင့်တွေကို သွားကြည့်လိုက်ရင်တော့ တကယ့် စစ်တပ်က အရာရှိဗိုလ်မှူးတွေရဲ့အကောင့်အစစ်အတိုင်းထင်မှတ်ရလောက်အောင် ဖန်တီးထားကြပါတယ်။ စစ်မှုထမ်းသင်တန်းကျောင်းထဲက ဗီဒီယိုတွေ၊ စစ်မှု
ထမ်း လေ့ကျင့်ရေးဆင်းနေတဲ့ ဗီဒီယိုတွေ၊ စစ်မှုထမ်းဥပဒေအကြောင်း ရေးသားထားတာတွေကို ဝေဝေဆာဆာ တင်ထားတာ တွေ့ရပါလိမ့်မယ်။ "သင်တန်းတက်နေတုန်းဆိုရင် တစ်ပတ်အတွင်း ပြန်ထုတ်ပေးပါတယ်" လို့လည်း စည်းရုံးတတ်ကြပါတယ်။

​အဲဒီအကောင့်တွေဟာ စစ်ကောင်စီတပ်သားတွေနဲ့ အရာရှိတွေရဲ့ TikTok အကောင့်တွေမှာ တင်ထားတဲ့ ယူနီဖောင်းဝတ် ဗီဒီယိုတွေ၊ ဌာနရုံးခန်းဗီဒီယိုတွေကို ဒေါင်းလုပ်လုပ်ပြီး ပြန်တင်ကြပါတယ်။ ဒါ့အပြင် စစ်မှုထမ်းပြီး ပြန်လာသူ တစ်ဦးတလေရဲ့ မိသားစုနဲ့အတူ ရိုက်ကူးပြီး တင်ထားတဲ့ ဗီဒီယိုဟောင်းတွေကိုလည်း ခိုးယူအသုံးပြုကြပါတယ်။ စစ်မှုထမ်းဥပဒေနဲ့ပတ်သက်ပြီး အချက်အလက်တွေကိုလည်း ကျွမ်းကျင်သူတစ်ယောက်လို နှံ့စပ်ပုံစံမျိုး ရေးသားပြီး ဥပဒေအကိုးအကားတွေကိုပါ မကြာခဏ ထည့်သွင်းလေ့ရှိပါတယ်။

စစ်မှုထမ်းအဖြစ် အဖမ်းခံရတဲ့အဆင့်ကနေ စစ်သင်တန်းကျောင်းရောက်နေဆဲ အဆင့်ထိ ငွေနဲ့ပြန်ထုတ်ပေးနိုင်တယ်လို့ ဆိုကြပါတယ်။ ကျန်းမာရေးမကောင်းလို့ ဆေးကျတဲ့ကင်း
လွတ်ခွင့်ပုံစံနဲ့ တရားဝင် ပြန်ထုတ်ပေးမယ်ဆိုပြီး လိမ်လည်ကြေညာကြတာ ဖြစ်ပါတယ်။

​တကယ်တော့ အဲဒီအကောင့်တွေဟာ ပေါ်တာဆွဲခံရလို့ စိုးရိမ်ပူပန်နေကြတဲ့ မိသားစုဝင်တွေရဲ့ အခက်အခဲကို အခွင့်ကောင်းယူပြီး ငွေကြေးလိမ်လည်နေတဲ့ အွန်လိုင်းငွေလိမ်ဂိုဏ်း (ကျားဖြန့်) တွေရဲ့ လက်ချက်သာ ဖြစ်ပါတယ်။ လက်ရှိမှာလည်း အဲဒီလို လိမ်လည်ခံရသူတွေ အများအပြားရှိနေပြီး ကျပ်သိန်းဆယ်ဂဏန်းကနေ ရာဂဏန်းအထိ လိမ်လည်ဆုံးရှုံးသွားခဲ့ရသူတွေ ရှိနေတယ်လို့ သိရပါတယ်။

​တကယ်တမ်းမှာလည်း စစ်မှုထမ်းပေါ်တာဆွဲခံရလို့မိသားစုတွေအနေနဲ့ နီးစပ်ရာအဆက်
အသွယ်တွေ၊ ငွေကြေးအမြောက်အမြားအ
သုံးပြုပြီး ပြန်ရွေးတဲ့ ဖြစ်စဉ်ဆိုးကြီးတွေက မြေပြင်မှာ အမှန်တကယ် ဖြစ်ပွားနေဆဲ ဖြစ်ပါတယ်။အဲဒီလိုနာကျင်စရာကောင်းတဲ့ လက်
တွေ့ဖြစ်ရပ်တွေကို အခွင့်ကောင်းယူပြီး စစ်
မှုထမ်း မိသားစုဝင်တွေရဲ့ စိုးရိမ်ပူပန်မှုကို ငွေရှာလမ်းအဖြစ် အသုံးချကာ TikTok ပေါ်ကနေ တစ်ဆင့် လိမ်လည်လှည့်ဖြားမှုတွေ ပိုမိုကြီးထွားလာနေပြီ ဖြစ်ပါတယ်။

နောက်တစ်ခုက မိမိ မိသားစုဝင်တစ်ယောက် ပေါ်တာဆွဲခံရလို့၊ ပျောက်ဆုံးသွားလို့ လူမှုကွန်ရက်တွေပေါ် တင်တဲ့အခါ မိသားစုဆီဆက်သွယ်ဖို့ ဖုန်းနံပါတ်တွေပါ တင်တတ်ကြပါတယ်။ အဲဒီအချိန်မှာမသမာသူတွေက ဆက်သွယ်ငွေညှစ်တာတွေ ကြုံရပါတော့တယ်။

TikTok၊ Facebook စတဲ့ လူမှုကွန်ရက်တွေပေါ်ကနေဖြစ်ဖြစ်၊ ပျောက်ဆုံးနေတဲ့ ကိုယ့်မိသားစုဝင် ပြန်တွေ့ပြီဆိုပြိး ဆက်သွယ်ရင်ဖြစ်ဖြစ် ငွေကြေးယူပြီး စစ်မှုထမ်းသင်တန်းကျောင်းထဲကနေ လူထုတ်ပေးမယ်၊ ဆေးကျခွင့်တင်ပေးမယ်ဆိုတဲ့ ဘယ်လိုအကောင့်၊ ဘယ်လိုပုဂ္ဂိုလ်ရဲ့ စကားကိုမှ လုံးဝမယုံကြည်ဖို့ လိုပါတယ်။ ၎င်းတို့ဟာ ငွေလိမ်ဂိုဏ်း (ကျားဖြန့်) တွေ သက်သက်သာ ဖြစ်ပါတယ်။

လိမ်လည်သူတွေဟာ မိသားစုဝင်တွေရဲ့ စိုး
ရိမ်ပူပန်မှုကို အသုံးချပြီး ငွေကြေးကို KPay၊ Wave Money ဒါမှမဟုတ် ဘဏ်အကောင့်တွေကတစ်ဆင့် ကြိုတင်လွှဲခိုင်းတတ်ပါတယ်။ လူကိုယ်တိုင် သေချာမတွေ့ရဘဲ ဘယ်
တော့မှ ငွေကြေးလွှဲပြောင်းပေးအပ်တာမျိုး လုံးဝ မပြုလုပ်သင့်ပါဘူး။

ပေါ်တာဆွဲခံရသူရဲ့ အချက်အလက်တွေ၊ မိသားစုရဲ့ ဖုန်းနံပါတ်၊နေရပ်လိပ်စာနဲ့ အ
ကျပ်အတည်းဖြစ်နေတဲ့ အခြေအနေတွေကို အွန်လိုင်းပေါ်မှာ အလွယ်တကူ မတင်ပြမိဖို့ သတိပြုရပါမယ်။ အဲဒီအချက်အလက်တွေကို လိမ်လည်သူတွေက နောက်ထပ် ခြိမ်း
ခြောက်ငွေတောင်းဖို့အတွက် ပြန်လည်အ
သုံးချတတ်ကြပါတယ်။

​လက်ရှိဖြစ်ပျက်နေတဲ့ မိသားစုတွေရဲ့ နာကျင်မှုကို အခွင့်ကောင်းယူပြီး ထပ်မံသွေးစုပ်နေတဲ့ အွန်လိုင်းလိမ်လည်မှုတွေအပေါ် ပြည်သူတစ်ဦးချင်းစီက အထူးသတိပြုဆင်ခြင်ကြဖို့ တိုက်တွန်းလိုက်ရပါတယ်။ ။



#စစ်မှုထမ်း #ကျားဖြန့် #စစ်သားဗိုလ်မှူး
#လူထု​နွေဦး #Ludunwayoo #Peoplesspring

Tiktok ​ပေါ်က​ငွေ​ကြေးလိမ်လည်​နေတဲ့
အ​ကောင့်​တွေ

■ရုပ်ရှင်ခံစားမှု

မေတ္တာထွေးလို့ နွေးပါစေ
Her Love Boils Bathwater(၂၀၂၆)

-ဝဇီရာ/People's Spring

ဖူတာဘဟာ သမီးဖြစ်သူ အဇူမီနဲ့ ရုန်းကန်နေရတဲ့ တစ်ကိုယ်တည်း မိခင်တစ်ယောက်ပါ။ ခင်ပွန်းဖြစ်သူက ဆုံးသွားတာတော့ မဟုတ်ဘူး။ လုံးဝအဆက်အသွယ်မရဘဲ ပျောက်ခြင်းမလှ ပျောက်သွားခဲ့တာ။ ဒါပေမယ့် ဖူတာဘဟာ စိတ်ဓါတ်ကြံ့ခိုင်လှပါတယ်။

​တစ်နေ့မှာ ဖူတာဘဟာ အလုပ်ထဲမှာ ရုတ်တရက်ကြီး မူးလဲသွားခဲ့တယ်။ ဆေးစစ်ချက်ရတော့ ဆရာဝန်ကပြောတယ်။ သူ့မှာ ကင်ဆာရောဂါ နောက်ဆုံးအဆင့်တဲ့။အသက်ရှင်ဖို့ လနည်းနည်းလေးပဲ ကျန်တော့တာကို သိလိုက်ရတယ်။

ဖူတာဘ ခေါင်းနပန်းကြီးသွားခဲ့တယ်။ သူမရှိတော့ရင် သမီးကလေးတစ်ယောက်တည်း လူ့လောကကြီးထဲ ဘယ်လိုဖြတ်သန်းမလဲလို့ စိတ်ပူသွားတယ်။သမီးကလေးကသူ့လိုမဟုတ်ဘူး။သူ့လောက်မသန်မာဘူး။ကျောင်း
မှာလည်း အတန်းတူကျောင်းသူတွေရဲ့ အနိုင်ကျင့်တာကိုလည်း ခံရတယ်။ ဖူတာဘဟာ သမီး​လေးကို သန်မာလာအောင် လေ့ကျင်ပေးတယ်။

သူဆုံးသွားပြီးနောက်ပိုင်း သမီးလေးတစ်
ယောက်တည်း မဖြစ်ရအောင် ခင်ပွန်းဖြစ်သူကို ရှာဖွေခဲ့တယ်။ ခင်ပွန်းဟာ နောက်ထပ်အိမ်ထောင်ကရတဲ့ သမီးကလေးနဲ့ ဒေသတခုမှာ နေနေခဲ့တာပါ။နောက်အိမ်ထောင်အမျိုး
သမီးကတော့ သူတို့ကိုချန်ထားပြီး အဝေးကိုထွက်သွားတာကြာပြီတဲ့။ ဖူတာဘဟာ ခင်
ပွန်းကိုကော နောက်အိမ်ထောင်ကရတဲ့ သမီးလေးကိုပါ အိမ်ပေါ်ခေါ်တင်ခဲ့တယ်။ မိသားစုအားလုံး စုစည်းပြီး ပိတ်ထားခဲ့ရတဲ့ ရေနွေးစိမ်ကန်လုပ်ငန်းကိုပြန်လည်လည်ပတ်ဖို့ ကြိုး
စားတယ်။

နောက်အိမ်ထောင်ကပါလာတဲ့ သမီးကလေးမှာလည်း စိတ်ဒဏ်ရာတွေနဲ့ပါ။ ဖူတာဘဟာ အဲဒီသမီးကလေးကိုလည်း သူ့သမီးရင်း​လိုပဲ သဘောထားပြီး နွေးထွေးမှုတွေ ပေးခဲ့တယ်။

သမီးကလေးနှစ်ယောက်နဲ့ ဖူတာဘ တစ်ညအိပ်ခရီး​လေး ထွက်ခဲ့တယ်။ လမ်းမှာလည်း စိတ်ဒဏ်ရာတွေနဲ့ လေလွင့်နေတဲ့ လူငယ်လေးတစ်ယောက်ကို လမ်းကြုံတင်ခဲ့သေးတယ်။ လူငယ်က ဘယ်ကိုသွားမယ်ဆိုတာ ဦးတည်ချက်မရှိဘူးဆိုလို့ မြောက်ပိုင်းဒေသကိုသွားဖို့ သူလမ်းညွှန်ခဲ့တယ်။ အဲဒီခရီးမှာပဲ သမီး​လေးရဲ့ ဘဝအစစ်အမှန်ကို အသိပေးလိုက်တယ်။ သူ့ရောဂါအခြေအနေကိုလည်း သမီးလေး သိသွားခဲ့တယ်။

သူဆေးရုံတက်နေချိန် သူ့ခင်ပွန်းကို ရှာပေးတဲ့ စုံထောက်ဆီကနေလည်း ဖူတာဘရဲ့ မိခင်သတင်းကြားခဲ့ရတယ်။ ဖူတာဘက အမေကို မမြင်ဖူးဘူး။ အမေ့ကို သူသိပ်မြင်ဖူးချင်ခဲ့တာ။ အမေ့သတင်းကြားတော့ အမေရှိတဲ့တိုကျိုကို လိုက်သွားကြတယ်။ ကားပေါ်ကဆင်းမယ်လုပ်တော့ သမီးဖြစ်သူက ဝှီးချဲယူပေးမယ်ပြောတယ်။ ဖူတာဘက နေပါစေ အမေစိတ်ပူသွားလိမ့်မယ်တဲ့။ အမေ့ရဲ့တုံံပြန်မှုကလည်း မျက်ရည်ကျစရာပါ။

တဖြည်းဖြည်းနဲ့ ဖူတာဘလည်း​ ဝေဒနာ ပြင်း
ထန်လာပြီးအခြေအနေပိုပိုဆိုးလာခဲ့တယ်။ ခင်ပွန်းဖြစ်သူကတော့ ဆေးလိပ်အသောက်မပျက်။ ပေါ့ပေါ့ပါးပါးပဲ။ ဆေးရုံကပြန်လာတဲ့သမီးကို အမေကဘာမှာလိုက်သေးလဲမေးတော့ "အရည်အချင်းမရှိတဲ့ ဖေဖေ့ဆီမှာ မိ
သားစုကို ထားခဲ့ရမှာကို တွေးမိလိုက်ရင် စိတ်မချနိုင်လွန်းလို့ အေးအေးဆေးဆေးတောင် သေလို့ရမှာ မဟုတ်ဘူးတဲ့"လို့ သမီးကဖြေတယ်။ ဖူတာဘရဲ့ နောက်ဆုံးအချိန်တွေ ရောက်လာတဲ့အခါမှာတော့....

ဘယ်လိုပဲ gender အရ တန်းတူသဘောထားပါတယ်ဆိုဆိုု အိမ်ထောင်မှုရေးရာမှာတော့ အမျိုးသမီးတွေဟာအမျိုးသားတွေထက် တာဝန်ယူမှု ပိုကိုပိုပါတယ်။

ဖူတာဘလို အရည်အချင်းမရှိတဲ့ ယောကျာ်းမျိုး ရလိုက်တဲ့ အမျိုးသမီးတွေအဖို့တော့ တစ်ဘဝလုံး ဝန်တွေပိတော့တာပါပဲ။

ဇာတ်ကားထဲမှာ အမျိုးသားဖြစ်သူဟာ အိမ်ထောင်သုံးဆက်ကျတဲ့သဘောပါ။ ဘာကြောင့် အိမ်ထောင်ဆက်များရတယ်ဆိုတာ မပြခဲ့ပေမဲ့ သူ့တာဝန်ကို အမျိုးသမီးကပါ ထမ်းခဲ့ရပါတယ်။ မိသားစုတွေမှာ တာဝန်သိသူတွေက တခြားသူတာဝန်​​တွေပါ ထမ်းရတဲ့အခါ ဝန်ပိုဖိစီးလှပါတယ်။

ဖူတာဘ မရှိတော့တဲ့ နောက်ပိုင်း ရေနွေးစိမ်ကန်လုပ်ငန်းလေးနဲ့ မိသားစုတွေ အဆင်ပြေပြေနေနိုင်ခဲ့တယ်။ ဖူတာဘ ပေးထားခဲ့တဲ့ မေတ္တာတွေနဲ့ မိသားစုတတွေ နွေးထွေးစေခဲ့တယ်။ တကယ်တော့ ချစ်ခြင်းမေတ္တာဆိုတာ ချစ်ပါတယ် ချစ်ပါတယ်လို့ တဖွဖွပြောနေဖို့ မလိုပါဘူး။ သူ့အနား ကိုယ်မရှိတော့ရင်တောင်မှ သူအဆင်ပြေနေတာကို မြင်ချင်တာ။ သူ ကိုယ့်အားကိုယ်ကိုးပြီး ကိုယ့်ခြေ
ထောက်ပေါ် မားမားမတ်မတ် ရပ်နိုင်တာကို မြင်ချင်တာ။ ဒါကိုပဲ မေတ္တာလို့ ခေါ်တာပါ။

​သေခြင်းတရားက ဘဝကို အဆုံးသတ်သွားစေနိုင်ပေမယ့်၊ စစ်မှန်တဲ့မေတ္တာကတော့ ကျန်ရစ်သူတွေရဲ့ ရင်ထဲမှာ အမြဲတမ်း အနွေးဓာတ်ပေးလို့ နေပါတယ်။ ဖူတာဘဟာ သူ့ရဲ့ ရေနွေးစိမ်ကန်လေးကို အပူချိန်ပြည့်ဝအောင် ထိန်းပေးခဲ့သလိုပဲ၊ သူ့ရဲ့ မေတ္တာကလည်း ပြိုကွဲလုနီးပါး ဖြစ်နေတဲ့ မိသားစုရဲ့ ဘဝတွေကို တစ်သက်တာစာ နွေးထွေးမှု ပေးသွားခဲ့ပါတော့တယ်။ ။

#ရုပ်ရှင်ခံစားမှု #ဝဇီရာ #လူထု​နွေဦး
#Her Love Boils Bathwater
#Peoplesspring

ဗန်းမော်စစ်ကူပို့တဲ့ စစ်သင်္ဘောတွေတိုက်ခိုက်ခံရမှု ဒရုန်းတပ်ဖွဲ့ကအရာရှိနဲ့ စစ်သားတွေပိုမို သေဆုံး

စက်တင်ဘာ၅၊၂၀၂၆၊ကတ်သရင်း/ People's Spring

မန္တလေးကနေ ဗန်းမော်မြို့ကိုသွားတဲ့ စစ်သ င်္ဘောတွေတိုက်ခိုက်ခံရမှုအတွင်း စစ်တပ်ရဲ့ ဒရုန်းတပ်ဖွဲ့အရာရှိနဲ့အခြားအဆင့်တွေ အများအပြားသေဆုံးခဲ့တယ်လို့ စစ်ရေးသတင်းအရင်းမြစ်တွေက ပြောပါတယ်။

ဗန်းမော်မြို့ကိုတက်သွားတဲ့ စစ်သင်္ဘောတွေ ရွှေကူမြို့အနီးမှာ အကြိမ်ကြိမ်တိုက်ခိုက်ခံရပြီး စစ်တပ်ရဲ့ မြောက်ပိုင်းတိုင်းစစ်ဌာနချုပ် လက်အောက်ခံ ဒရုန်းတပ်သားတွေ အများဆုံး သေဆုံးခဲ့တာလို့ သိရပါတယ်။

သေဆုံးတဲ့ ဒရုန်းတပ်ဖွဲ့တွေဟာ မြောက်ပိုင်းတိုင်းစစ်ဌာနချုပ်က ဗိုလ်အောင်ပြည့်ဖြိုး ၊တပ်ကြပ် တပ်မတော်ကွန်ပျူတာနှင့်နည်းပညာသိပ္ပံ အင်ဂျင်နီယာ ကျောင်း(MCTI)၂၄က တပ်သား တွေအပါအဝင် မကြာခင်ကမှ မိတ္ထီလာဒရုန်းသင်တန်းက နေဆင်းထားတဲ့ ဒရုန်းတပ်သားအများအပြား သေဆုံးခဲ့တာလို့ သိရပါတယ်။

စင်းခန်းတံတားအနီး စစ်သင်္ဘောတွေကို
KIAနဲ့ တော်လှန်ရေး ပူးပေါင်းတပ် တိုက်ခိုက်ချိန်မှာ လက်နက်ကြီးထိမှန် သေဆုံးခဲ့တာလို့ သိရပါတယ်။

"အရာရှိအလောင်းလည်းမရဘူးလို့ သိရတယ်။အိမ်ကပဲ သက်ပျောက်ဆွမ်းကပ်လိုက်ပြီ။ဒရုန်းတပ်ဖွဲ့ တွေလိုက်တဲ့ သင်္ဘောကအထိခိုက်အများဆုံးပဲလို့ သိရတယ်။နည်းပညာကျောင်းဆင်းနဲ့ DSA ဆင်းအရာရှိ တွေအကျပိုများတယ်"လို့ စစ်ရေး သတင်းအရင်းမြစ်တဦးက ပြောပါတယ်။

ဒရုန်းတပ်သားတွေ သေဆုံးမှုများပြီးတဲ့နောက် စစ်အုပ်စုက မန္တလေးမြို့ကနေ သင်္ဘောတွေနဲ့ အင်အားထပ်ပို့ဖို့ပြုလုပ်နေတာလို့ သိရပါတယ်။

ဩဂုတ် ၂၁ရက်က မန္တလေးမြို့၊ဂေါ်ဝိန်ဆိပ်ကမ်းကနေ ဗန်းမော်မြို့ကို စစ်သ�င်္ဘော ၁၇စီး ဆန်တက်ခဲ့ပြီး ရွှေကူမြို့အနီးမှာ KIA နဲ့PDFတွေနဲ့ အကြိမ်ကြိမ်တိုက်ခိုက်ခံရပြီး စက်တင်ဘာ၂ရက် နေ့မှ ရွှေကူမြို့ကနေ စစ်သင်္ဘော၆စီး ဆန်တက် နိုင်ခဲ့ပြီး စက်တင်ဘာ ၃ရက်မှာ ဗန်းမော် ဆိပ်ကမ်းကို ရောက်ရှိခဲ့တာလို့ သိရပါတယ်။

■ရသစာတမ်းငယ်

“သေ တူ ရှင် ဖက်”

◾အသက်

အမျက်အငြိုးပြည့်နှက်နေသော ကမ္ဘာမြေ
ကြီးပါလား။မိုးကော၊ ပိတောက်ကော နောက်
ကျသည်။ သည်ကြားထဲ မုန်တိုင်းများက ဝင်ရန်ရှိကြောင်း သတင်းထွက်လာသေး၏။

မတတ်နိုင်တော့... ဒီကာလများ၌ ငါပျော်ခဲ့ဖူးတာ အရက်ဝိုင်းတခုသာရှိသည်။ အတွေးများသည့်၊ စကားလုံးတွေလျှံထွက်နေသည့်အပြင် မျက်နှာများစုံသည့်နေရာလည်းဖြစ်ပြန်
သည်။ ငါ့မှာ ပိုက်ဆံမရှိပေ။ ဝိုင်းထဲ လူ
ခြောက်ယောက်ရှိပြီး ငါးယောက်မှာ ဟိုခြစ်ခြစ်ဒီခြစ်ခြစ်နဲ့ မျက်နှာငယ်များဖြင့်တောင်းခံနေရသည်။ ကျန်တဦးကား မိဘများက ပံ့ပိုးကူညီနေသည်ကိုး။ မတတ်နိုင်... ငါတို့အလုပ်က လစာမရ၊ သူများလှူကမ်းတာစားပြီး ဘဝတခု၊ အသက်တခုနဲ့ ပြန်ဆပ်ထားသည်။

သူများလှူစာကမ်းစာတွေကို ဘယ်တော့မှမဖြုန်းတီး၊ ဖြုန်းတီးသော်ငြား တပ်စိပ်မှူးက ချလေသည်။ ထိုနေ့မှာ ဖင်က ခရမ်းပုတ်ရောင်
နှင့် တမူထူးနေတတ်၏။လေပြင်းပြင်းတိုက်
လာလို့ အရက်ဝိုင်းကိုသိမ်း၊ ကိုယ်စီအဆောင်သို့ပြေးဝင်၊ရီဝေဝေဖြင့်ယိုစိမ့်နေသောမေတ္တာ
မဟုတ်သောမိုးရေများကို စတီးပန်းကန်လုံးများဖြင့် လိုက်ခံသည်။ကော်ဖီပါကင်အခွံနဲ့ ဓနိကြားသို့ ထိုးသိပ်သူက သိပ်၊ တပ်စိပ်မှူးမသိအောင် အရက်ဘူးသိမ်းသူက သိမ်း။

ရုတ်တရက် တံခါးချပ်မရှိတဲ့ တံခါးပေါက်ကို လေကောရေကော ပြေးဝင်လာကြပါရော။ မုန်တိုင်းကမဝင်သေး ပုံမှန်မိုးရွာနှုန်းနဲ့ပင် ဒီလောက်လှန်ထွက်နေရင် သတင်းထဲက နှစ်
လုံးပြူးမုန်တိုင်းသာဆို ဒီအဆောင်လေး အမိုးမလှန်ပါစေနဲ့ပင် ဆုတောင်းရတော့မည်။ မဟုတ်ပါက သူမ မချစ်သည့်အကြောင်းထက် ပိုဆိုးရော့မည်။

"ဒီည တန်းစီရှိဦးမှာလား"
ဤသည်က ၂၁နာရီမထိုးခင် မိုးရွာပြီဆို ကြားနေကျမေးခွန်း။ ကျန်းမာရေးကြောင့် မိုးရွာသည့်အချိန်များတွင် ၂၁နာရီတန်းစီကို ရပ်နား
၏။ အဆောင်တွင်း၌ သတိစွဲလျက်သာ 'သေတူရှင်ဖက်’ အား ဆိုကြသည်။

"သေ တူ ရှင် ဖက်”
"သေတူရှင်ဘက်၊ ဆောင်ရွက်မကင်း၊ အချင်းချင်းတွင် အခင်းကြီးငယ် ရှိကာဝယ်လည်း၊ မဖယ်မသွေ၊ ညီညာကုန်း၍၊ ရုန်းကြလေ။"
အဆောင်ထဲ၌ လူခြောက်ဦး အတူအိပ်၏။ လောလောလတ်လတ် အရက်သောက်ထားသည့်အတွက် ဝိုင်းမှစကားဆက်များက မပြတ်သေး။

"မင်းတို့ မနေ့က ရာဟု အိမ်ပြန်သွားတာသိကြပြီးပြီလား"

အမှောင်ထုထဲ ရီဝေဝေစိုက်ကြည့်ရင်း စဥ်းစားမိသည်။ ရဲဘော် ရာဟု အိမ်ပြန်သွားသည်။ သူနှင့်အတူ အခြားလူလေးဦးပါသွားသည်လည်း ကြားသည်။

"မနေ့ညက ရှေ့တန်းကကောင်တွေ ____စခန်းကိုကျားထိုးသေးတယ်တဲ့၊ အထိခိုက်တော့မကြားမိဘူး"

လက်ရှိ ဤလူခြောက်ဦးသည်လည်း ____စခန်းကိုသိမ်းရန် ကြိုးပမ်းရင်း ဒဏ်ရာရ၍ နောက်တန်းဌာနချုပ်တွင် ဆေးနားနေကြသူများဖြစ်သည်။ လက်နက်အစလေးများမှန်၍ မျက်နှာပျက်စီးနေသူတဦး၊ စနိုက်ပါထိ၍ လက်မောင်းရိုး ကြေမွသွားသူတဦး၊ မိုင်းထိ၍ ခြေတဖက်ပြတ်နေသူတဦး၊ ပေါင်တဖက်ထဲသို့ အစဝင်နေသူတဦး၊ မကြာသေးခင်ရက်ပိုင်းမှ ရောက်လာသော ခန္ဓာကိုယ်သို့ လက်နက်ကြီးအစပိုင်းလေးများမှန်၍ ရောက်လာသူ နှစ်ဦး။

လူတိုင်းက အချစ်နဲ့မကင်းသလို၊ လက်နက်စများကိုလည်း ရှောင်လွှဲလို့မရနိုင်ပေ။
"ငါလည်း ချစ်ပါတယ် အတုံလေးရဲ့။ စိတ်ချ နင့်ကိုပြန်မတွေ့ရသေးဘဲ ငါမသေဘူး။ နင်သာ ငါ့ကိုစောင့်နေ"

စနိုက်ပါထိ၍ လက်မောင်းရိုးကြေမွနေသူ ဖြစ်သည်။ လောလောဆယ်ကား ကျန်လက်တဖက်အကောင်းနှင့် အတုံံဟူသော မိန်းမပျိုလေးနှင့် ကျီဆယ်နေသည်။

ဖုန်းလိုင်းမရ၊ ကြယ်တာရာချိတ်ဆက်မှုဖြင့် ဆက်သွယ်နေရသည့်အတွက်လိုင်းမကောင်း၊ ထို့နှင့် ထိုကျူရှင်တက်နေသော အမျိုးသားကောင်းလေးခဗျာ အပြင်သို့ အသဲသန်ပြေး၊ ကြယ်တာရာမီနူးအပြားကြီးရှိရာသို့ ပြေးရ၏။

ကျန်သူများမှာ မိဘရှိသော တကောင်ကြွက်များ။ အချစ်နှင့်တော့ ကင်း၊ ဒုက္ခများကတော့ ဟင်း...။

ဒူးဆစ်အဆက်ပျောက်နေသောနေရာ​မှယား
၍ လှမ်းကုပ်ရသေးသည်။ မိုးတွင်း၊ ယားနာဖြစ်လျှင် ဘဝသေတာထက်ဆိုးသည်။ ဆေး
ဆရာများက မကုပ်ဖို့မှာသည်။ သို့သော် ယားနာ၏ယားယံမှုကား သူမ၏မျက်ဝန်းဝိုင်းဝိုင်းလေးများလိုပင် မျက်ကွယ်ပြုလို့်မရနိုင်ပေ။

ထို့ကြောင့် ကုပ်သည်။
ထို့အ​တွက် ယားနာများ အနာဖြစ်လာသည်။
ထို့နောက် ပြည်များတည်လာသည်။နောက်
ဆုံးတွင် ယား၍ ကုပ်ပြန်သည်။တဖက်ကု
တင်တွင်လည်း ကုပ်သံများ ကြားသည်။

လိုက်ဖ်ဘွိုင်က 99.9% ဘတ်တီးရီးယားတွေကို ကာကွယ်ပေးသည်ပြော၏။ ကျန် 1% မှာ ငါဖြစ်နေတဲ့ယားနာ ဖြစ်ပုံံရ၏။

တပ်ထဲတွင် ငါးနီတူနှင့် ပဲက main dish ၊ အသီးရွက်များက စျေးကြီးသည့်အတွက် တလ နှစ်ခါစားရ၏။ အမဲသား၊ ဝက်သားများကို တလတခါ ပွဲတည်ရ၏။

ကြုံတုန်း၍ပြောပြရလျှင်တော့ ဆီသပ်ထားသည့်ထဲ ပြုတ်ထားသည့်ပဲထည့်၊ လုံး၊ ရေထည့်၊ ပွတ်ပွတ်ဆူလျှင် ရှောက်ရွက်အနည်းငယ်ညှပ်ထည့်ပါက ထူးကဲသောတုံယမ်းအရသားမျိုးရနိုင်သည်။ ဘာမှတော့မဆိုင်... စစ်မေတဦးက သူမကောင်လေးနှင့် ထိုအကြောင်း
စကားနိုင်လုနေသည်ကိုကြား၍ ပြန်ပြောပြခြင်းဖြစ်သည်။

မကြာမှီ ကျူရှင်သွားတတ်သောအမျိုးသားကောင်းလေး ပြန်ရောက်လာ၏။ ထပ်၍မကြာမှီ မီးခြစ် ခြစ်သံနှင့်အတူ ဆေးလိပ်တလိပ် မီးညှိ၍ ကမ်းလာသည်။

နိဗ္ဗာန်ဘုံသို့မသွားဘဲ နိဗ္ဗာန်ရောက်သည်ဆိုတာ ဒါမျိုး။

ဒဏ်ရာရဆေးနားသည်လေ။ ဆေးလိပ်ကား အထူးကန့်သတ်ထားသော တားမြစ်ပစ္စည်း။
ကျွန်တော့်အချစ်က သူမအတွက်တားမြစ်စရာဖြစ်နေတာမျိုးပေါ့ဗျာ။ ။

(The Call -ခေါ်သံ"အွန်လိုင်းမဂ္ဂဇင်းမှာ
'အသက်' ရဲ့ "သေ တူ ရှင် ဖက်” ရသစာတမ်းငယ်ကို People's Spring ကပြန်လည်​ဖော်ပြ​ပေးတာဖြစ်ပါတယ်။အနုရသကဲပြီးတော်လှန်​ရေးအတွက်အ​ထောက်အကူပြုတဲ့ စာ​ပေကဏ္ဍမျိုးစုံကို "The Call - ​ခေါ်သံ" အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ https://www.facebook.com/profile.php?id=100087677882749... မှာလည်းသွား​ရောက်ဖတ်ရှုနိုင်ပါတယ်)

“ဒီနေ့ဘာဖြစ်ခဲ့လဲ”

ဒီနေ့(စက်တင်ဘာ ၅ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️စစ်သင်္ဘောတွေ တိုက်ခိုက်ခံရမှု ဒရုန်းတပ်ဖွဲ့က အရာရှိနဲ့ စစ်သားတွေ ပိုမို သေဆုံး

မန္တလေးကနေ ဗန်းမော်မြို့ကိုသွားတဲ့ စစ်သင်္ဘောတွေ တိုက်ခိုက်ခံရမှုအတွင်း စစ်တပ်ရဲ့ ဒရုန်းတပ်ဖွဲ့အရာရှိနဲ့ အခြားအဆင့်တွေ အများအပြားသေဆုံးခဲ့တယ်လို့ စစ်ရေးသတင်းအရင်းမြစ်တွေက ပြောပါတယ်။ ဗန်းမော်မြို့ကိုတက်သွားတဲ့ စစ်သင်္ဘောတွေ ရွှေကူမြို့အနီးမှာ အကြိမ်ကြိမ်တိုက်ခိုက်ခံရပြီး စစ်တပ်ရဲ့ မြောက်ပိုင်းတိုင်းစစ်ဌာနချုပ် လက်အောက်ခံ ဒရုန်းတပ်သားတွေ အများဆုံး သေဆုံးခဲ့တာလို့ သိရပါတယ်။ သေဆုံးတဲ့ ဒရုန်းတပ်ဖွဲ့တွေဟာ မြောက်ပိုင်းတိုင်းစစ်ဌာနချုပ်က ဗိုလ်အောင်ပြည့်ဖြိုး၊ တပ်ကြပ် တပ်မတော်ကွန်ပျူတာနှင့်နည်းပညာသိပ္ပံ အင်ဂျင်နီယာ ကျောင်း(MCTI)၂၄က တပ်သားတွေအပါအဝင် မကြာခင်ကမှ မိတ္ထီလာဒရုန်းသင်တန်းက နေဆင်းထားတဲ့ ဒရုန်းတပ်သားအများအပြား သေဆုံးခဲ့တာလို့ သိရပါတယ်။ စင်းခန်းတံတားအနီး စစ်သင်္ဘောတွေကို KIAနဲ့ တော်လှန်ရေး ပူးပေါင်းတပ် တိုက်ခိုက်ချိန်မှာ လက်နက်ကြီးထိမှန် သေဆုံးခဲ့တာလို့ သိရပါတယ်။

◾️မန္တလေးမြို့ကနေ စစ်သင်္ဘောအုပ်စု ထပ်တက်

မန္တလေးမြို့ကနေ အာဏာသိမ်းစစ်တပ်ရဲ့ သင်္ဘောအုပ်စု အစီးရေ ၃၀ ခန့် ဧရာဝတီမြစ်ကြောင်းအတိုင်း အထက်ဘက်ဆီ စက်တင်ဘာလ ၄ ရက် မနေ့က ညပိုင်းမှာ ထပ်မံ ဆန်တက်သွားပါတယ်။ မနေ့က ည ၉ နာရီခွဲလောက်မှာ မန္တလေးမြို့ ဧရာဝတီဆိပ်ကမ်းကနေ သင်္ဘော ၉စီးဝန်းကျင်စတင်ထွက်ခွာခဲ့ပြီး ဒီမနက်ပိုင်းမှာတော့ မတ္တရာမြို့နယ်အတွင်းဖြတ်သန်းခဲ့ပါတယ်။ ဒီမနက် ၇ နာရီလောက်မှာလည်း မန္တလေးမြို့ ပေပင်ဆိပ်ကမ်းကနေ နောက်ထပ် သင်္ဘောအစီး ၂၀ ဝန်းကျင်ဟာ ဒုတိယအသုတ်အနေနဲ့ ထပ်မံထွက်ခွာသွားတယ်လို့ သိရပါတယ်။ အဲဒီ သင်္ဘောအုပ်စု ဧရာဝတီမြစ်ကြောင်းအတိုင်း အထက်ဘက်ဆီ ဆန်တက်ကာ ကချင်ပြည်နယ် ဗန်းမော်မြို့ဆီ ဦးတည်နိုင်တယ်လို့ ဒေသတွင်းတော်လှန်ရေးအင်အားစုတွေက ယူဆထားပါတယ်။

◾️ဗန်းမော်မရောက်သေးတဲ့ လက်ကျန်သင်္ဘောတွေကို KIA ပူးပေါင်းတပ် ထပ်မံတိုက်ခိုက်

ကချင်ပြည်နယ်၊ ဗန်းမော်မြို့ကို တက်သွားတဲ့ စစ်သင်္ဘောအုပ်စုက ကျန်နေတဲ့ သင်္ဘောအချို့ဟာ စက်တင်ဘာ ၄ရက်မှာ စင်းခန်းဒေသကနေ အထက်ကို ဆက်လက်ထွက်ခွာရာ ကချင်လွတ်လပ်ရေးတပ်မတော်(KIA) ပူးပေါင်းတပ်က ထပ်မံ တိုက်ခိုက်ခဲ့လို့ ပျက်စီးမှုတွေရှိတယ်လို့ ကချင်စစ်ရေးသတင်းရင်းမြစ်က ပြောပါတယ်။ စစ်သင်္ဘောအုပ်စုဟာ စက်တင်ဘာ ၂ရက်မှာ ရွှေကူကနေ ဗန်းမော်မြို့ကို ထွက်ခွာစဉ် KIA ပူးပေါင်းတပ်က တိုက်ခိုက်ခဲ့လို့ သင်္ဘော ၅စီးထက်မနည်းထိခိုက်ပျက်စီးကာ အဲဒီအထဲက အချို့က နစ်မြုပ်တာ၊ မီးလောင်ပေါက်ကွဲတာတွေဖြစ်ခဲ့ပါတယ်။ ဒါ့အပြင် စက်တင်ဘာ ၄ရက် မနေ့ကလည်း KIA ပူးပေါင်းတပ်က စစ် သင်္ဘော ၃စီးထပ်မံ ဖျက်ဆီးနိုင်ခဲ့တယ်လို့ ကချင်စစ်ရေး သတင်းရင်းမြစ်က ပြောပါတယ်။ ဒီနေ့ မနက်ပိုင်းမှာလည်း ဗန်းမော်မြို့နယ် စင်းခန်းတံတား နဲ့ ဗန်းမော်မြို့ကြားမှာ စစ်တပ်သင်္ဘော ၁စီးကို KIA ပူးပေါင်းတပ်က ထပ်မံ တိုက်ခိုက်ခဲ့တယ်လို့ သိရပါတယ်။

◾️မင်းဘူးနယ်မှာ မသန်စွမ်းအမျိုးသမီးနဲ့ ကလေးငယ်ကို စစ်တပ် သတ်ဖြတ်

မကွေးတိုင်း၊ မင်းဘူးမြို့နယ် မုတ္တောကြီးကျေးရွာက မသန်စွမ်းအမျိုးသမီး ၁ဦး နဲ့ ကလေးငယ် ၁ဦးကို စစ်တပ်စစ်ကြောင်းက သတ်ဖြတ်သွားတယ်လို့ သိရပါတယ်။ ဒီနေ့ စက်တင်ဘာ ၅ရက် မနက် ၆နာရီ၀န်းကျင်မှာ အင်အား ၈၀နီးပါးပါတဲ့ စစ်တပ်စစ်ကြောင်းက မုတ္တောကြီးကျေးရွာကို ၀င်ရောက်စီးနင်းပစ်ခတ်ခဲ့တာလို့ ဒေသခံတချို့က ပြောပါတယ်။ အဲဒီဖြစ်စဉ်မှာ စကားမပြောနိုင်တဲ့ အသက် ၂၀ အရွယ် မသန်စွမ်း အမျိုးသမီး မဝေဝေဌေး နဲ့ (၁၃)နှစ်အရွယ် မောင်ဝိုင်းလမင်းအောင်တို့ဟာ ဝမ်းဗိုက်၊ ရင်အုံ၊ လည်ပင်းနဲ့ ခြေထောက်တွေမှာ ကျည်ဆံဒဏ်ရာတွေနဲ့ သေဆုံးခဲ့ရတယ်လို့ ဆိုပါတယ်။ ဒါ့အပြင် (၇)နှစ်အရွယ် ကလေးငယ် မအိသီရိအောင်လည်း စိုးရိမ်ဒဏ်ရာတွေ ရရှိခဲ့ပါတယ်။

◾️မြစ်ခြေမှာ စစ်တပ်ဗုံးကြဲလို့ အရပ်သား ၁၀ဦးထက်မနည်း ထိခိုက်သေဆုံး

မကွေးတိုင်း၊ မြစ်ခြေမြို့မှာ စစ်တပ်က လေကြောင်းကနေ ဗုံးကြဲတာကြောင့် အရပ်သား ၁၀ဦးထက်မနည်း ထိခိုက်သေဆုံးခဲ့တယ်လို့ ဒေသခံသတင်းရင်းမြစ်တချို့က ‌ပြောပါတယ်။ စက်တင်ဘာ ၄ ရက် မနေ့ မနက်ပိုင်းမှာ ပခုက္ကူမြို့နယ်၊ မြစ်ခြေမြို့က အမှတ်(၁) တိရစ္ဆာန်မွေးမြူရေးနဲ့ လေ့ကျင့်ရေးတပ်ကို မကွေးယူနစ်စစ်ကြောင်း-၁ တော်လှန်ရေးတပ်က ထိုးစစ်ဆင်ခဲ့ပြီးနောက် စစ်တပ်က လေကြောင်းကနေ နေရာအနှံ့ ဗုံးကြဲခဲ့တယ်လို့ ဆိုပါတယ်။ အာဏာသိမ်းစစ်တပ်ရဲ့ လေကြောင်းတိုက်ခိုက်မှုကြောင့် ပေါက်တောရွာက နှစ်ဦး၊ အိုင်ကြီးရွာက သုံးဦး သေဆုံးပြီး ကျန်တဲ့ဒဏ်ရာရသူတွေလည်း များတယ်လို့ မြစ်ခြေဒေသခံတစ်ဦးက ‌ပြောပါတယ်။ စစ်တပ်ဟာ မြစ်ခြေမြို့ကို ဂျိုင်ရိုကော်ပတာ ၅ စီး နဲ့ Mi35 ရဟတ်ယာဉ် ၁ စီးတို့နဲ့ တိုက်ခိုက်ခဲ့တာလို့ သိရပါတယ်။ မနေ့က တိုက်ပွဲမှာ နှစ်ဖက်ထိခိုက်‌သေဆုံးတာတွေရှိပြီး ဒီနေ့ စက်တင်ဘာ ၅ရက်အထိလည်း စစ်ရေးက မငြိမ်သေးဘူးလို့ ပခုက္ကူခရိုင်စစ်ရေးသတင်းရင်းမြစ်က ပြောပါတယ်။

◾️လွိုင်ကော်အရှေ့ခြမ်း စခန်းကုန်းတွေ မကျရေး စစ်‌တပ် လေကြောင်းသုံး

ကရင်နီပြည်နယ်၊ လွိုင်ကော်မြို့အရှေ့ဘက်ခြမ်းက စခန်းကုန်းတွေ မကျရေး စစ်‌တပ်က လေကြောင်းသုံးပြီး အပြင်းအထန်ခုခံနေတယ်လို့ ဒေသခံစစ်ရေးသတင်းရင်းမြစ်တချို့က ပြောပါတယ်။ လွိုင်ကော်-လွိုင်လင်လေးလမ်းပိုင်းအနီးက တပ်စခန်းကုန်းတွေကို ဩဂုတ်နောက်ဆုံးပတ်ကစပြီး ကရင်နီတော်လှန်ရေးပူးပေါင်းတပ်တွေက ထိုးစစ်ဆင်နေတာဖြစ်ပါတယ်။ အဲဒီထိုးစစ်ဆင်မှုအတွင်း လွယ်ထွယ်ရွာအနီးတဝိုက်က စခန်းကုန်းကို ဩဂုတ် ၂၆ ရက်မှာ ကရင်နီပူးပေါင်းတပ်တွေ ပြန်လည်သိမ်းယူနိုင်ခဲ့တယ်လို့ သိရပါတယ်။ ဒါ့အပြင် လွယ်ထွယ်ကျေးရွာရဲ့ တောင်ဘက်ခြမ်းက စစ်တပ်စခန်းကုန်းတွေ မကျရေးအတွက် စက်တင်ဘာ ၄ ရက် မနေ့က တစ်ရက်တည်းမှာပဲ လေကြောင်းကနေ ၃ကြိမ်ထက်မနည်း ဗုံးကြဲတိုက်ခိုက်ခဲ့တယ်လို့ စစ်ရေး သတင်းရင်းမြစ်က အသိပေးပါတယ်။ နောက်ထပ်စခန်းကုန်းတစ်ခု ထပ်ရတယ်ဆိုတာတော့ ကြားသိရပေမယ့် အတည်ပြုနိုင်ဖို့ လိုသေးတယ်လို့ အဲဒီသတင်းရင်းမြစ်က ပြောပါတယ်။ စစ်တပ် လေ‌ယာဉ်ကတော့ မနေ့က တောက်လျှောက်ကြဲတယ်လို့ သူက ဆိုပါတယ်။

◾️H&M အပ်ထည်တွေချုပ်တဲ့ အထည်ချုပ်စက်ရုံ ဒီလကုန် ပိတ်သိမ်းမယ်

ကမ္ဘာကျော်အမှတ်တံဆိပ်ဖြစ်တဲ့ H&M အဝတ်အထည်တွေ ချုပ်တဲ့ ရန်ကုန်တိုင်း၊ ထန်းတပင်မြို့နယ်က Teng Hui Myanmar သိုးမွေးစက်ရုံ စက်တင်ဘာလကုန်မှာ ပိတ်သိမ်းတော့မယ်လို့ သိရပါတယ်။ ၂၀၁၃ ကတည်းက စတင်ချုပ်ခဲ့တဲ့ Teng Hui Myanmar သိုးမွေးအထည်ချုပ်စက်ရုံဟာ H&M ကုမ္ပဏီရဲ့အ၀တ်အထည်တွေအတွက် ကုန်ကြမ်းနဲ့ အမှာစာမရတော့တာကြောင့် စက်ရုံပိတ်သိမ်းဖို့ ဖြစ်လာတာလို့ ဆိုပါတယ်။ လက်ရှိမှာ စက်ရုံလုပ်သား ၂,၀၀၀ ကျော် ရှိပါတယ်။ လာမယ့်အောက်တိုဘာ ၁ ရက်မှာ အပြီးပိတ်သိမ်းမှာဖြစ်ပြီး စက်တင်ဘာ ၂၅ ရက်ကစတင်ကာ စက်ရုံပိတ်သိမ်းမှုကြောင့် အလုပ်ရပ်နားရမယ့် အလုပ်သမားတွေကို လုပ်သက်အလိုက် နစ်နာကြေးပေးသွားမယ်လို့ စက်ရုံက တရားဝင် ကြေညာပါတယ်။ ပြီးခဲ့တဲ့ မေလက H&M အ၀တ်အထည်တွေချုပ်နေရတဲ့ ရွှေပြည်သာမြို့နယ်က King Rich Fashion အထည်ချုပ်စက်ရုံလည်း အမှာမရတော့တာကြောင့် ပိတ်သိမ်းခဲ့ရပါတယ်။

◾️ဒီပဲယင်းမှာ တိုက်ပွဲဖြစ်ပြီး စစ်တပ်က တပ်ကြပ် ၁ဦး သေဆုံး၊ သေနတ် ၁လက် သိမ်းရ

စစ်ကိုင်းတိုင်း၊ ဒီပဲယင်းမြို့နယ်မှာ စစ်တပ်နဲ့ တိုက်ပွဲဖြစ်ပွားပြီး စစ်တပ်က တပ်ကြပ် ၁ဦး သေဆုံးကာ MA-1 သေနတ် သိမ်းဆည်းရမိခဲ့ကြောင်း အဖြူရောင်ပြည်သူ့ကာကွယ်ရေးအဖွဲ့ရဲ့ တာဝန်ရှိသူက ပြောပါတယ်။ စက်တင်ဘာ ၂ ရက် မနက် ၁၁ နာရီ ၄၅ မိနစ်ခန့်က ဒီပဲယင်းမြို့ပေါ်ကနေ ရိက္ခာရှာ ထွက်လာတဲ့ အင်အား ၂၀ခန့်ပါ စစ်ကောင်စီတပ်ဖွဲ့ဝင်တွေနဲ့ ဒီပဲယင်းမြို့နယ် ပြည်သူ့ကာကွယ်ရေးအဖွဲ့ (ပ.က.ဖ) တိုက်နယ် (၁)၊ တိုက်နယ် (၂) တို့ ထိပ်တိုက်တွေ့ကာ ၁၅ မိနစ်ခန့် အပြန်အလှန် ထိတွေ့တိုက်ပွဲဖြစ်ပွားခဲ့ကြောင်း အဖြူရောင်ပြည်သူ့ကာကွယ်ရေးအဖွဲ့ရဲ့ တာဝန်ရှိသူတစ်ဦးက ပြောပါတယ်။ တိုက်ပွဲအတွင်း စစ်တပ်က တပ်ကြပ်အဆင့်ရှိသူတစ်ဦး သေဆုံးပြီး နောက်ထပ်တစ်ဦးလည်း ပြင်းထန်ဒဏ်ရာရရှိခဲ့ကြောင်း အဖြူရောင်ပြည်သူ့ကာကွယ်ရေးအဖွဲ့က ထုတ်ပြန်ပါတယ်။ အဲဒီနောက် ဒီနေ့ စက်တင်ဘာ ၅ ရက်မှာ တိုက်ပွဲဖြစ်ပွားခဲ့တဲ့နေရာသို့ ပြည်သူ့ကာကွယ်ရေးတပ်ဖွဲ့ဝင်တွေ သွားရောက် နယ်မြေရှင်းလင်းရာ သေဆုံးသွားတဲ့ တပ်ကြပ်ရဲ့ ရုပ်အလောင်းအပြင် MA-1 သေနတ် တစ်လက်ကိုပါ သိမ်းဆည်းရမိခဲ့ကြောင်း အဖြူရောင်ပြည်သူ့ကာကွယ်ရေးအဖွဲ့ရဲ့တာဝန်ရှိသူက ပြောပါတယ်။

◾️စစ်သားတွေ အလင်းဝင်ကြဖို့ ပြည်သူ့ပန်းတိုင် တိုက်တွန်း

အာဏာသိမ်းစစ်တပ်ရဲ့ ပြန်ကြားရေးနဲ့ စစ်လော်ဘီတွေ ပြောသမျှ မယုံကြဘဲ စစ်သားတွေ အလင်းဝင်လက်နက်ချကြဖို့ ပြည်သူ့ပန်းတိုင်က တိုက်တွန်းလိုက်ပါတယ်။ ပြည်သူ့ပန်းတိုင်က အပတ်စဉ် တင်ဆက်နေတဲ့ စစ်တပ်ရဲ့ ပြေးဟပရောဂျက် ယခုတပတ် အစီအစဉ်ကို ဒီကနေ့ စက်တင်ဘာ ၅ရက်မှာ ဖော်ပြခဲ့ရာ ဩဂုတ်နောက်ဆုံးပတ်အတွင်း စစ်တပ်က အလင်းဝင်၊ ပူးပေါင်း လက်နက်ချ အခြေအနေကို အသိပေးရင် အခုလို တိုက်တွန်းလိုက်တာပါ။ ဩဂုတ်လ စတုတ္ထပတ်အတွင်း အလင်းဝင် ၊ လက်နက်ချသူ စစ်သား ၆ဦး အပါအဝင် ၂၀၂၅ ဇန်နဝါရီကနေ အခုနှစ် ဩဂုတ် စတုတ္ထပတ်အထိ အလင်းဝင် လက်နက်ချနဲ့ စစ်သုံ့ပန်း စုစုပေါင်း ၃၈၂၁ ဦး ရှိကြောင်း ပြည်သူ့ပန်းတိုင်က အသိပေးထားပါတယ်။