၂၀၂၆ ၊ဖေဖော်ဝါရီ ၂၄ ရက်နေ့ကပုဏ္ဏားကျွန်းမြို့နယ် ယိုးငူရွာကို စစ်တပ်ကဗုံးကြဲ
ခဲ့စဥ်။ ။ဓါတ်ပုံ - Wai Hun Aung

စိုင်းစိုင်းခမ်းလှိုင် မန္တလေးရှိုးပွဲ မြို့အစွန်ရွှေ့လိုက်လို့ မသွားရဲတဲ့ပရိသတ်အချို့ လက်မှတ်တွေစျေးလျှော့ပြန်ရောင်း

စက်တင်ဘာ ၃၊ ၂၀၂၆။ မေရီ/People's Spring

ပေါ်တာဆွဲဖမ်းဆီးတာတွေ ဆိုးရွားနေတဲ့ မန္တလေးမြို့မှာ စိုင်းစိုင်းခမ်းလှိုင်ရှိုးပွဲ ပြုလုပ်ဖို့ စီစဥ်နေပြီး ရှိုးပွဲကို မြို့အစွန်ရွှေ့လိုက်တာကြောင့် လက်မှတ်ဝယ်ထားတဲ့ ပရိသတ်အချို့မသွားရဲတော့ဘဲ လက်မှတ်တွေစျေးလျှော့ပြီး ပြန်ရောင်းနေရကြောင်း မြို့ခံအချို့က ပြောပါတယ်။

၂၀၂၁ အာဏာသိမ်းပြီးနောက်ပိုင်း ပြည်သူ့ဘက်က ရပ်တည်ခြင်းမရှိဘဲ အနုပညာလှုပ်ရှားမှုတွေ ဆက်လုပ်နေလို့ Boycott လုပ်ဖို့ တိုက်တွန်းခံရတဲ့ စိုင်းစိုင်းခမ်းလှိုင်ဟာ သူ့ရဲ့ မန္တလေးရှိုးပွဲကို စက်တင်ဘာ ၆ ရက်မှာ မန္တ​လေးမြို့၊ ချမ်းမြသာစည်မြို့နယ်က မန္တလာသီရိ အားကစားကွင်းမှာ ပြုလုပ်ဖို့ စီစဥ်ထားခဲ့တယ်လို့ သိရပါတယ်။ စိုင်းစိုင်းခမ်းလှိုင်ရှိုးပွဲကြည့်ပြီး တည်းခိုဖို့အတွက် မန္တလာသီရိ အားကစားကွင်းအနီးက ဟိုတယ်တွေပါ Booking တွေ ပြည့်ခဲ့တယ်လို့ ပရိသတ်အချို့က ပြောပါတယ်။

ဒါပေမယ့် ပွဲရောက်ဖို့ တစ်ပတ်ခန့် အလိုမှာတော့ ကျင်းပတဲ့နေရာကို ပြောင်းရွှေ့လိုက်ရကြောင်း စိုင်းစိုင်းခမ်းလှိုင်က အသိပေးခဲ့ပါတယ်။

ထပ်မံ​ပြောင်းရွေ့လိုက်တဲ့နေရာဟာ ချမ်းအေးသာစံမြို့နယ်၊ ၂၈ လမ်းနဲ့ ၂၉ လမ်းကြား၊ ၅၃ လမ်းမှာရှိတဲ့ The First Mandalay Event Park ဖြစ်ပါတယ်။ ကျင်းပမယ့်နေရာဟာ မြို့အစွန်ကျပြီး ၎င်းနေရာတဝိုက်ဟာ နေ့ခင်းမှာတင် မကြာခဏ လုယက်မှုတွေ ဖြစ်ပွားလေ့ရှိတာကြောင့် သွားဖို့စီစဥ်ထားသူအချို့ မသွားရဲတော့လို့ ကျပ်ငါးသောင်းတန်လက်မှတ်တွေကို လေးသောင်းခွဲကျပ်နဲ့ စျေးလျှော့ကာ ပြန်ရောင်းနေရကြောင်း မန္တလေးမြို့ခံအချို့က ပြောပါတယ်။

"အဲဘက်တွေက နေ့ခင်းဘက်တောင် လုယက်နေတဲ့နေရာတွေ။ ညဆို ပိုတောင်မသွားသင့်တဲ့နေရာမျ်ိုးတွေ။ ပွဲပြီး ပြန်လာမယ့်သူတွေ အရမ်း အန္တရာယ်များတယ် "လို့ မန္တလေးမြို့ခံတစ်ဦးက ပြောပါတယ်။

စိုင်းစိုင်းခမ်းလှိုင်ကတော့ လက်မှတ်ဝယ်ယူထားပြီး နေရာပြောင်းရွှေ့လိုက်ရလို့ မလာနိုင်တဲ့သူတွေကို ဒီကနေ့ စက်တင်ဘာ ၃ ရက် နောက်ဆုံးထားပြီး ပွဲစီစဥ်တဲ့ကုမ္ပဏီကို ဆက်သွယ်ကာ ငွေပြန်ထုတ်နိုင်တယ်လို့ ထပ်မံ အသိပေးပါတယ်။

ဒါပေမယ့် ပွဲစီစဥ်တဲ့ လုပ်ငန်းဟာ အကြောင်းပြန်တာ နှောင့်နှေးနေတာကြောင့် မသွားဖြစ်တဲ့သူအချို့ဟာ လက်မှတ်တွေကို ကိုယ့်အစီအစဥ်နဲ့ကို ပြန်လည်ရောင်းချနေရကြောင်း ပရိသတ်အချို့က ပြောပါတယ်။

စိုင်းစိုင်းခမ်းလှိုင်ရှိုးပွဲ သွားကြည့်မယ်လို့ ဆိုတဲ့ ပရိသတ်တွေလည်း အများအပြား ရှိနေပြီး ကျင်းပမယ့်နေရာတဝိုက်က ဟိုတယ်တွေ ပြည့်နေတယ်လို့ သိရပါတယ်။

မန္တလေးမြို့မှာ ယခုလက်ရှိ စစ်မှုထမ်းပေါ်တာဆွဲတာတွေ နေ့ရောညပါ ပြုလုပ်နေပြီး အသွားအလာဆင်ခြင်နေရကြောင်း မြို့ခံတွေက ပြောပါတယ်။ ဒါ့အပြင် ညဘက်မှာ ပျူစောထီးတွေ လက်နက်ကိုင်ဆောင်သောင်းကျန်းပြီး လုယက်တာတွေပါ ဖြစ်ပွားနေတယ်လို့ မြို့ခံတွေက ပြောပါတယ်။

(ရှိူးပွဲကျင်းပမည့် The First Mandalay Event Park က စတိတ်စင်အား တွေ့ရစဥ်။ ဓာတ်ပုံံ-ဒေသခံ)

ရခိုင်ပြည်နယ် အ​ခြေခံကုန်​ဈေးနှုန်းများ

-People's Spring

ရခိုင်ပြည်နယ်အတွင်း အ​ခြေခံကုန်စည်​တွေနဲ့ အ​ရေးကြီးကုန်စည်​တွေရဲ့ စစ်တပ်အာဏာမသိမ်းခင် ​ဈေးနှုန်း နဲ့ စစ်တပ်အာဏာသိမ်းပြီး​​နောက် ဒီ​နေ့ဈေးနှုန်း​တွေကို ​ဖော်ပြ​​ပေးထားပါတယ်။ ရခိုင်ပြည်နယ်မှာ ၁၇ မြို့နယ်ရှိတာမှာ အာရက္ခတပ်​တော် (AA)က ၁၄ မြို့နယ်ကိုသိမ်းပိုက်ထိန်းချုပ်ထားပါတယ်။ဒါ​ကြောင့် စစ်တပ်ထိန်းချုပ်နိုင်တာ စစ်​တွေ ၊​ကျောက်ဖြူ ၊
မာန်​အောင်သုံးမြို့နယ်ပဲကျန်ပါတယ် ။ AA ထိန်းချုပ်​ဒေသ​တွေနဲ့ စစ်တပ် ထိန်းချုပ်​ဒေ
သ​တွေရဲ့ ​ဈေးနှုန်း​တွေကိုလည်း နှိုင်းယှဥ်​ဖော်ပြထားပြီး AA ထိန်းချုပ်​ဒေသ​တွေက ကုန်စည်အများစုမှာ ​ဈေးပိုသင်သာတာကို​တွေ့ရပါတယ် ။

#လူထု​​နွေဦး #People'sspring
#ရခိုင်ပြည်နယ် #ကုန်​ဈေးနှုန်း #AA

■အ​တွေးအမြင်


ဝမ်းနည်းစရာ ကင်ဆာသတင်းကောင်း

-ငြိမ်း ရေးသားသည်။

ကင်ဆာနဲ့ပတ်သက်ရင်ကျွန်တော်တို့ဆီ ရောက်လာတတ်တာက သတင်းဆိုးချည်းဖြစ်ပါတယ်။ ဘယ်သူကတော့ ဘယ်ကင်ဆာအမျိုးအစားနဲ့ ဘာဖြစ်နေပြီဆိုတာမျိုးပေါ့။ အဲဒီထက်ဆိုးတဲ့သတင်းဆိုရင်တော့ လပိုင်းပဲခံတော့မယ်၊ ရက်ပိုင်းပဲခံတော့မယ်၊ သေသွားပြီဆိုတဲ့သတင်းမျိုးကြားကြရပါမယ်။

ဒီကနေ့ကာလမှာ ကင်ဆာနဲ့ပတ်သက်တဲ့ သ
တင်းတွေ၊ အကြောင်းအရာတွေဟာ နေ့စဉ်နီးပါး မကြားချင်လဲ ကြားရ၊ မသိချင်လည်း သိနေရ၊ မကြုံချင်လည်း ကြုံနေရတဲ့ အခြေ
အနေတစ်ရပ်အထိ ရောက်လာပါတယ်။

ကင်ဆာရောဂါ နဲ့ ဆုံးပါးသွားကြရတဲ့ ထင်
ရှားကျော်ကြားသူတွေရဲ့ နာရေးသတင်းတွေဟာလည်း ဆက်တိုက်ဆိုသလိုပါပဲ။နောက်
ကြောင်းပြန်ကြည့်လို့ မှတ်မိသလောက်ဆို မန္တလေးတိုင်းဝန်ကြီးချုပ် ဒေါက်တာ ဇော်မြင့်မောင်၊ ကရင်အမျိုးသားအစည်းအရုံး(KNU) ဒုတိယဥက္ကဋ္ဌဟောင်း ပဒိုနော်စီဖိုးရာစိန်၊ ပြည်သူ့လွှတ်တော် ကိုယ်စားလှယ်ဟောင်းဦးဦးလှစော၊ စာရေးဆရာအကြည်တော်၊ စာရေးဆရာငြိမ်းအေးအိမ်၊ စာရေးဆရာမောင်သာချို၊ဒါရိုက်တာ မင်းထင်ကိုကိုကြီး စတဲ့သူ​တွေဟာကင်ဆာနဲ့ပဲ ဘဝကို ဇာတ်သိမ်းသွားကြရတာပါ။

နိုင်ငံ့ခေါင်းဆောင်တွေထဲကဆိုရင် ဗြိတိန်ရဲ့တတိယမြောက်ချားလ်စ်ဘုရင်၊ အမေရိကန်သမ္မတဟောင်းဂျိုးဘိုင်ဒန်တို့ဟာလည်း ကင်
ဆာရောဂါကို ခံစားနေကြရပါတယ်။ ဒီကနေ့ကာလမှာဆိုရင် ထင်မှတ်မထားတဲ့ အသက်အပိုင်းအခြား တွေဖြစ်တဲ့ ဆယ်ကျော်သက်အရွယ်တွေမှာလည်း ကင်ဆာဖြစ်ပွားမှုက အ
တော်လေးများလာတာကို လေ့လာချက် တွေကနေ သိရသလို ကလေးငယ်တွေကိုတောင် အဲဒီကင်ဆာကခြိမ်းခြောက်လာနေပါတယ်။

အခုဆိုမိသားစုတွေထဲမှာတောင် ကင်ဆာနဲ့ကင်းကွာတဲ့ မိသားစုရယ်လို့ခပ်ရှားရှားအခြေ
အနေဖြစ်လာပါပြီ။စာရေးသူတို့မိသားစုအ
ဝန်းအဝိုင်းထဲကို ကြည့်မယ်ဆိုရင်လည်း ကင်ဆာနဲ့သေဆုံးခဲ့ရတဲ့ ဆွေမျိုးတွေ မနည်းတော့ ပါဘူး။ ရင်သားကင်ဆာ၊ အူမကြီးကင်
ဆာ၊ အဆုပ်ကင်ဆာစတဲ့ ကင်ဆာအမျိုးအစားလည်း စုံပါတယ်။ ကင်ဆာကြောင့်ပဲ မျက်စိအောက်တင် ပျောက်ကွယ်သွားကြရတဲ့ အသိမိတ်ဆွေ၊သူငယ်ချင်းတွေမနည်းတော့ပါဘူး။ပတ်ဝန်းကျင်မိသားစုတွေထဲမှာလည်း ကင်ဆာကြောင့် စိတ်ဒုက္ခရောက်ရသူ၊ ကင်ဆာကြောင့် ဝေဒနာခံစား နေရသူ များစွာကို တွေ့မြင်နေရပါတယ်။

ဒီကင်ဆာရဲ့ခြိမ်းခြောက်မှု၊ကင်ဆာရဲ့အန္တ
ရာယ်တွေနဲ့ပတ်သက်ပြီးလည်းမကြာသေးခင်ကမှ သတင်းမီဒီယာတွေ ကနေ ဆောင်းပါးတွေ၊ သတင်းတွေ တွင်တွင်ကျယ်ကျယ်ထုတ်
လုပ်ဖော်ပြခဲ့ကြပါသေးတယ်။ကမ္ဘာ့ကျန်းမာ
ရေး အဖွဲ့(WHO)နဲ့အပြည်ပြည်ဆိုင်ရာကင်
ဆာသုတေသနအေဂျင်စီ(IARC)တို့က ဇူလိုင် ၈ ရက်နေ့မှာ ပူးပေါင်းထုတ် ပြန်လိုက်တဲ့ အစီ
ရင်ခံစာနဲ့ပတ်သက်ပြီး ကင်ဆာရဲ့ ခြိမ်း
ခြောက်လာမှုတွေကို ရေးခဲ့ကြတာပါ။

"၂၀၂၆ ခုနှစ် ကမ္ဘာလုံးဆိုင်ရာကင်ဆာရောဂါအခြေအနေအစီရင်ခံစာ"ခေါင်းစဉ်နဲ့ထုတ်ပြန်လိုက်တဲ့ WHO နဲ့ IARC တို့ရဲ့ အစီရင်ခံစာထဲမှာ ကင်ဆာဟာ ကမ္ဘာကို ဘယ်လောက်အထိ ခြိမ်းခြောက်လာနေသလဲဆိုတာကို မြင်ရမယ့် ကိန်းဂဏန်းအချက်အလက်တွေပါဝင်ပါတယ်။ ဒီဆောင်းပါးမှာ အဓိကပြောချင်တဲ့ ကင်ဆာသတင်းကောင်းတစ်ခု ကို မပြောပြခင် သတင်းဆိုးတချို့ကို ဦးစွာအရင် ပြောပြချင်ပါတယ်။

ကမ္ဘာတစ်ဝန်းနှစ်စဉ်ကင်ဆာလူနာသစ် ၂၀ ဒသမ ၆ သန်းလောက်တွေ့ရှိရပြီးသေဆုံးသူ ၁၀ သန်းခန့်ရှိကြောင်း၊ကင်ဆာကြောင့် နေ့စဉ်လူပေါင်း ၂၆,၀၀၀ ကျော် အသက်ဆုံးရှုံးနေပြီး ကမ္ဘာတစ်ဝန်းရှိ လူသန်းပေါင်းများစွာဟာ အဲဒီရောဂါကြောင့် ရုပ်ပိုင်းဆိုင်ရာ၊ စိတ်ပိုင်းဆိုင်ရာနဲ့ ငွေကြေးပိုင်းဆိုင်ရာ ဝန်ထုပ်ဝန်ပိုးတွေကို ရင်ဆိုင်နေကြရကြောင်း၊ မြန်မာမှာဆိုရင်လည်း နှစ်စဉ်ကင်ဆာလူနာသစ် ၈၀,၀၀၀ ကနေ ၉၀,၀၀၀ ဝန်းကျင်ကြားတွေ့ရှိနေရပြီး သေဆုံးသူက ၆၀၀၀၀ ဝန်းကျင်ရှိကြောင်းဆိုတဲ့ ကြောက်မက်ဖွယ်ကိန်းဂဏန်းအချက်
အလက်တွေကို WHO နဲ့ IARC တို့ရဲ့ အစီရင်
ခံစာထဲမှာ တွေ့ရမှာ ဖြစ်ပါတယ်။

ဒါ့အပြင် လာမယ့်၂၀၅၀ ခုနှစ်ဆိုရင် ကင်ဆာ
လူနာသစ် ၃၅ သန်းနီးပါးအထိ မြင့်တက်လာမယ်၊ ကမ္ဘာ့လူဦးရေရဲ့ ၉၂ ရာခိုင်နှုန်းခန့်ဟာ မိမိကိုယ်တိုင်ကင်ဆာဖြစ်ခြင်း ဒါမှမဟုတ် မိမိနဲ့နီးစပ်တဲ့ မိသားစုဝင်တစ်ဦးဦး ကင်ဆာဖြစ်ခြင်း ကနေတစ်ဆင့် ဒီရောဂါရဲ့ သက်
ရောက်မှုကို ကြုံတွေ့ခံစားရမယ်ဆိုတဲ့ အစီ
ရင်ခံစာထဲက ကိန်းဂဏန်းတွေဟာ လည်း ဝေဒနာကို ထပ်ဆင့်တိုးစေပါတယ်။

ကင်ဆာနဲ့ပတ်သက်တဲ့ သတင်းဆိုးတွေ ပြောပြီးပြီဆိုတော့ အခုသတင်းကောင်းဘက်ကို လှည့်လိုက်ချင်ပါတယ်။ WHO နဲ့ IARC တို့ ပူးတွဲအစီရင်ခံစာထုတ်ပြန်ခဲ့ပြီး ရက်ပေါင်း ၄၂ ရက်အကြာမှာ ထုတ်ပြန်လာတဲ့သတင်းကတော့ ကင်ဆာရောဂါကာကွယ်ဆေး စမ်း
သပ်မှုနောက်ဆုံးအဆင့်အောင်မြင်ပြီဆိုတဲ့ သတင်းပါပဲ။

ကင်ဆာကာကွယ်ဆေးဆိုတာကအခုမှ စမ်း
သပ်အောင်မြင်တာတော့မဟုတ်ပါဘူး။ သူ့ရဲ့ ရှေ့မှာလည်းအောင်မြင်ခဲ့တဲ့ကြိုတင်ကာကွယ်ဆေးတွေ၊ ကုသကာကွယ်ဆေးတွေရှိခဲ့ပေမယ့် အခုပြောမယ့်ဆေးက ထုတ်လုပ်
မှုကုန်ကျ စရိတ်ပိုင်းမှာ ရှေ့ကဆေးတွေထက် အတော်လေးသက်သာနိုင်ပြီး ထုတ်လုပ်ရေးပိုင်းမှာလည်း မြန်မြန်နဲ့ များများ ထုတ်လုပ်နိုင်မှာမို့ လူတိုင်းလက်လှမ်းမီလာနိုင်တဲ့အခြေ

အနေမှာရှိနေတဲ့အတွက် ဝမ်းသာစရာသတင်း
ကောင်း အဖြစ် ရပ်တည်လာခဲ့တာပါပဲ။

ဒီဆေးက ကင်ဆာမဖြစ်အောင် ကြိုတင်ကာကွယ်တဲ့ဆေးမဟုတ်ဘဲကင်ဆာဖြစ်ပွားပြီးနောက်ကုသတဲ့နေရာ၊ပျံ့ပွားမှုမဖြစ်အောင်၊ ပိုမိုဆိုးဝါးမလာအောင်ကာကွယ်တားဆီးတဲ့နေရာမှာ သုံးတဲ့ဆေးဖြစ်ပါတယ်။ ဒီဆေးက ကင်ဆာပြန်လည်ဖြစ်ပွားမှုကို လျှော့ချနိုင်သလို ကင်ဆာကျိတ်ပျံ့နှံ့မှုကိုလည်း တားဆီးပေးတဲ့ စွမ်းရည်တွေနဲ့ ပြည့်မီတယ်လို့ ဆိုပါတယ်။

ဒီဆေးကို Moderna နဲ့ Merck ကုမ္ပဏီတို့က mRNA နည်းပညာကိုအခြေပြုထုတ်လုပ်ထားတာ ဖြစ်ပါတယ်။ mRNA နည်းပညာအသုံး
ပြုကင်ဆာကာကွယ်ဆေးတွေထဲ Phase 3 ကိုပထမဆုံးစမ်းသပ်အောင်မြင်သွားတဲ့ဆေး၊ လူထောင်နဲ့ချီကိုစမ်းသပ်ထားတဲ့ဆေးလို့လည်းဆိုပါတယ်။ ဒီအဆင့်ဟာစမ်းသပ်မှုနောက်ဆုံးအဆင့်ဖြစ်ပြီး ထုတ်လုပ်မှုအပိုင်းမှာ ခွင့်ပြုချက်ရဖို့ဆိုတဲ့အဆင့်သာကျန်ပါတယ်။

ဒီကာကွယ်ဆေးနဲ့ပတ်သက်ပြီးကင်ဆာကိုအောင်နိုင်တော့မယ်လို့မျှော်လင့်တာက mRNA နည်းပညာကို အသုံးပြု ပြီး ကာကွယ်
ဆေးထုတ်လုပ်နိုင်တော့မယ့်ပထမဆုံး ကင်
ဆာကာကွယ်ဆေးဖြစ်ပြီး မြန်မြန်ဆန်ဆန် ထုတ်လုပ် နိုင်တဲ့ အတွက်ကြောင့် ကင်ဆာကိုကာကွယ်ကုသရာမှာ လူတိုင်းလက်လှမ်းမီနိုင်မယ့် အနေအထားကိုဖြစ်လာတာ၊ အနာဂတ်မှာ လူတွေကင်ဆာကို အနိုင်ယူလာနိုင်တော့မယ်ဆိုတဲ့ အဓိပ္ပာယ်ပါပဲလို့ ကျန်းမာရေးဗဟုသုတတွေကို မျှဝေပေးနေတဲ့ ဒေါက်တာသူရိန်လှိုင်ဝင်းကလည်း ဒီကင်ဆာကာကွယ်
ဆေးနဲ့ပတ်သက်ပြီး သူ့ရဲ့ Facebook စာမျက်
နှာကနေတစ်ဆင့် ပို့စ်တင်ပြီး အသိပေးထားပါတယ်။

“mRNA နည်းပညာဆိုတာက ကိုဗစ်ကာကွယ်
ဆေးထုတ်တဲ့နည်းပညာလိုမျိုးပါ။Phase 3 စမ်းသပ်မှုအတွင်း ဒီနည်းပညာကိုအသုံးပြုပြီး အရေပြားကင်ဆာဖြတ်တောက်ထားပြီးသား လူနာတွေမှာ ကာကွယ်ဆေးဖော်တယ်။ ရလာတဲ့ ကာကွယ်ဆေးကို အဲဒီကင်ဆာလူနာတွေမှာ ထိုးပေးတယ်။ ဒီလူတွေ အရေပြားကင်ဆာ ပြန်မဖြစ်လာတော့အောင် ကာကွယ်နိုင်သွားတယ်”လို့လည်း သူက ဆိုထားပါတယ်။

အဆုတ်ကင်ဆာ၊ ဆီးအိမ်ကင်ဆာနဲ့ ကျောက်
ကပ်ကင်ဆာတွေမှာပါ ဒီဆေးကို ဆက်လက်စမ်းသပ်နေပြီးနောက် ၁၀ နှစ်လောက်အတွင်းမှာ လူသားတွေကင်ဆာကို အောင်နိုင်တော့မှာပါ။ လူတိုင်း လက်လှမ်းမီတဲ့အနေအထားမှာ ကင်ဆာကုသခွင့်ရနိုင်တော့မှာပါလို့လည်း ဒေါက်တာသူရိန်လှိုင်ဝင်းက သုံးသပ်ပြထားပါသေးတယ်။

ကင်ဆာနဲ့ပတ်သက်ပြီး သတင်းဆိုးတွေထွက်လာပြီးနောက် မကြာမီမှာပဲအခုလို သတင်း
ကောင်းတစ်ခုကလည်း ကျွန်တော်တို့ဆီ ရောက်ရှိလာတာပဲဖြစ်ပါတယ်။ဒါဟာအ
ထက်မှာပြောခဲ့သလိုပဲ နေ့စဉ်နီးပါး ကင်ဆာကပေးတဲ့ သတင်းဆိုးတွေကြားဖြတ်သန်းနေရသူတို့အတွက်အသက်ရှူချောင်စေတဲ့ သ
တင်းကောင်းတစ်ခုဖြစ်ပါတယ်။ကင်ဆာနဲ့
ပတ်သက်ပြီး သတင်းကောင်းလည်း မဟုတ်သလို သတင်းဆိုးလည်းမဟုတ်တဲ့ ဝမ်းနည်းစရာသတင်း တစ်ခုနဲ့ ဒီစာကို အဆုံးသတ်ချင်ပါတယ်။

အဲဒါကတော့ WHO နဲ့ IARC တို့ရဲ့ပူးတွဲထုတ်ပြန်တဲ့အစီရင်ခံစာထဲမှာကင်ဆာအတွက် သတင်းဆိုးတွေ ဘယ်လောက်ပါနေနေ။ Moderna နဲ့ Merck တို့ဆီကနေ ထုတ်ပြန်လာတဲ့ ကင်ဆာနဲ့ပတ်သက်တဲ့ သတင်းက ဘယ်
လောက်ကောင်းနေနေ ဒီကိုလ်ဂျင်တို့၊ air-x တို့ကိုတောင်အလျင်မီအောင်မရနိုင်တဲ့ အာ
ဏာရှင်လက်အောက်က ကျွန်တော်တို့ မြန်
မာနိုင်ငံသားတွေအတွက်တော့ ဝမ်းနည်းစရာသတင်းပဲ ဖြစ်ပါလိမ့်မယ်။ ။

ရွှေဘိုမြို့နယ်က ရေဘေးသင့်ပြည်သူတွေကို သပိတ်အင်အားစုက ကျန်းမာရေးစောင့်ရှောက်မှု ပေး

စက်တင်ဘာ ၂၊၂၀၂၆။သုည/People's Spring

စစ်ကိုင်းတိုင်း၊ ရွှေဘိုမြို့နယ်အတွင်းက ရေဘေးသင့်ပြည်သူတွေကို ရွှေဘိုမြို့နယ် သပိတ်အင်အားစုဝင်တွေက ကျန်းမာရေး စောင့်ရှောက်မှုတွေ ဒီကနေ့ (စက်တင်ဘာ ၂) ပြုလုပ်ပေးခဲ့ပါတယ်။

စစ်ကိုင်းဒေသသပိတ်အင်အားစု နဲ့ ရွှေဘိုမြို့နယ်သပိတ်အင်အားစု Mobile Medical Team တို့ပူးပေါင်းပြီး ရေဘေးသင့်စစ်ရှောင်ပြည်သူတွေကို လိုအပ်တဲ့ ဆေးဝါးထောက်ပံ့တာ ၊ ကျန်းမာရေးစောင့်ရှောက်မှုပေးတာတွေကို ပြုလုပ်ခဲ့ကြတာပါ။

ဒါ့အပြင် စက်တင်ဘာ ၁ ရက်ကလည်း BTS JUNGKOOK ရဲ့ (၂၉) နှစ်ပြည့် မွေးနေ့အလှူအဖြစ် TaeKook World MM page မှ စုပေါင်းလှူဒါန်းသော ကူညီထောက်ပံ့မှုတွေကို စစ်ကိုင်းတိုင်းဒေသ သပိတ်အင်အားစုနဲ့ ရွှေဘိုမြို့နယ် သပိတ်အင်အားစုတို့ ပူးပေါင်း လှူဒါန်းပေးခဲ့ပါတယ်။

ရွှေဘိုမြို့နယ်မှ ရေဘေးသင့် ပြည်သူတွေကို စားနပ်ရိက္ခာ၊ ငါးသေတ္တာဗူး၊ ဆီ၊ ကြက်ဥ၊ ရိက္ခာခြောက်၊ ရေသန့်နဲ့ ဓာတ်ဆားတွေကို ကူညီထောက်ပံ့ခဲ့ကြပါတယ်။

ရေဘေးသင့် စစ်ရှောင်တွေအတွက် ဆေးဝါးနဲ့ စားနပ်ရိက္ခာ အကူအညီတွေ လိုအပ်နေဆဲ ဖြစ်တဲ့အတွက် ဝိုင်းဝန်းကူညီကြဖို့အတွက်လည်း ရွှေဘိုမြို့နယ် သပိတ်အင်အားစုက တိုက်တွန်းနှိုးဆော်ထားပါတယ်။

“ဒီနေ့ဘာဖြစ်ခဲ့လဲ”

ဒီနေ့(စက်တင်ဘာ ၃ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️လေးမျက်နှာမှာ နောက်ထပ်ရေကာတာ ၁ခု အိကျ

ငဝန်မြစ်ရေကာတာကျိုးကျလို့ လနဲချီပြီး ရေဘေးကြုံတွေ့နေတဲ့ ဧရာဝတီတိုင်း၊ လေးမျက်နှာမြို့မှာ နောက်ထပ်ရေကာတာ ၁ခု အိကျသွားလို့ သဲအိတ်တွေနဲ့ အရေးပေါ်ပိတ်ဆို့နေရပြီး ဒေသခံတွေ စိုးရိမ်နေကြပါတယ်။ လေးမျက်နှာမြို့နယ် ထိန်ငူကျေးရွာအနီးရှိ ငဝန်ရေကာတာ မိုင် ၂၀အနီးမှာ ဒီနေ့ စက်တင်ဘာ ၃ရက် မနက်ပိုင်းက တာအိကျတာလို့ ဒေသခံတွေက ပြောပါတယ်။ ပထမတခါလိုပဲ၊ တာအခြေအနေမကောင်းတဲ့အကြောင်း ဌာနဆိုင်ရာတွေကို အကြောင်းကြားထားပေမယ့် လုံလောက်တဲ့ အကူအညီ ရောက်မလာဘူးလို့ ဒေသခံတစ်ဦးက ပြောပါတယ်။ ဒီနေ့ မနက်အိကျသွားတော့မှ သဲအိတ်တွေ အရေးပေါ်ကာနေကြတယ်လို့ သူက ရှင်းပြပါတယ်။ အိကျတဲ့တာနေရာကို ဟင်္သာတခရိုင်က မီးသတ်တပ်ဖွဲ့ဝင်တွေနဲ့ ဆည်မြောင်းဝန်ထမ်းတွေ သဲအိတ်ဖို့ခြင်း၊ ဝါးတုတ်ရိုက်ခြင်းလုပ်ငန်းတွေလုပ်ဆောင်နေတယ်လို့ မြန်မာနိုင်ငံမီးသတ်တပ်ဖွဲ့က သတင်းထုတ်ပြန်ထားပါတယ်။ လေးမျက်နှာမြို့မှာ ပြီးခဲ့တဲ့ဇူလိုင် ၃၀ရက်က ငဝန်မြစ်ရေကာတာကျိုးကျခဲ့ပြီး လေးမျက်နှာမြို့နယ်အပြင် ဟင်္သာတ၊ ရေကြည်၊ ကျုံပျော်နဲ့ ငါးသိုင်းချောင်း၊ ကျောင်းကုန်း၊ ပန်းတနော်၊ အသုတ်မြို့နယ်ဘက်မှာ ရေကြီးနေပါတယ်။ ရေဘေးကြောင့် သေဆုံးသူဦးရေလည်း ၁၅ဦးထက်မနည်းရှိလာပြီဖြစ်ပါတယ်။

◾️ရေကြီးနေတဲ့ ရေကြည်မြို့မှာ မိချောင်းတွေ့လို့ ‌ဖမ်းဆီးဖို့ ကြိုးပမ်းနေ

ဧရာဝတီတိုင်း၊ လေးမျက်နှာမြို့က ငဝန်မြစ်ရေကာတာကျိုးပြီး ရေကြီးနစ်မြုပ်မှုကြုံတွေ့နေတဲ့ ရေကြည်မြို့မှာ မိချောင်းတစ်ကောင် တွေ့ရှိတာကြောင့် ဒေသခံတွေဟာ ရေဘေးကယ်ဆယ်ရေးအဖွဲ့တွေနဲ့အတူ ဖမ်းဆီးနိုင်ရေးကြိုးပမ်းနေတယ်လို့ သိရပါတယ်။ ရေကြည်မြို့၊ သရက်ပင်လှရွာမှာ ဒီနေ့ စက်တင်ဘာ ၃ရက် ည၇နာရီခန့်က အရှည် ၁၀ ပေခန့်ရှိတဲ့ မ်ိချောင်းတစ်ကောင်ကို ဒေသခံတွေက တွေ့လိုက်တာကြောင့် နေအိမ်တွေမှာ မနေရဲတော့ပဲ နေရာရွှေ့ပြောင်းနေကြတယ်လို့ ကယ်ဆယ်ရေးအဖွဲ့ဝင်တစ်ဦးက ပြောပါတယ်။ ရေဘေးကယ်ဆယ်ရေး အရပ်ဖက်အဖွဲ့ဝင်အချို့ကလည်း သရက်ပင်လှကျေးရွာမှာ မိကျောင်းတွေ့တယ်လို့ သတင်းရတဲ့အတွက် အဲဒီကျေးရွာကိုသွားရောက်နေကြတယ်လို့ လူမှုကွန်ရက်မှာ ရေးသားထားကြပါတယ်။

◾️ပုဏ္ဏားကျွန်းမြို့နယ်ကို စစ်တပ် ဗုံးကြဲ

ရခိုင်ပြည်နယ်မြောက်ပိုင်းရှိ အာဏာသိမ်းစစ်တပ်ရဲ့ တခုတည်းသော ထိန်းချုပ်နယ်မြေ စစ်တွေနဲ့ ထိစပ်နေတဲ့ ပု ဏ္ဏားကျွန်းမြို့နယ်က နေရာအချို့ကို ဒီနေ့ နေ့လယ်ပိုင်းမှာ စစ်တပ်က ဂျက်ဖိုက်တာတွေနဲ့ ဗုံးပတ်ကြဲနေတယ်လို့ ဒေသခံတွေက ပြောပါတယ်။ ပုဏ္ဏားကျွန်းမြို့နယ် ကွမ်းတောင်၊ ပဒေသာကျေးစတဲ့ရွာတွေနဲ့ အနီးတဝိုက် နေရာတွေကို ဂျက်ဖိုက်တာနှစ်စီးနဲ့ ဗုံးကြဲနေတာလို့ သိရပါတယ်။ အခုဗုံးကြဲမှုကြောင့် အရပ်သားထိခိုက်၊ သေဆုံးမှုတွေ ရှိနိုင်ပြီး အခြေအနေမသိရသေးဘူးလို့ ပုဏ္ဏားကျွန်းမြို့နယ် လူငယ်တစ်ဦးက ပြောပါတယ်။ ပဒေသာဘက်မှာဆိုရင် လယ်လုပ်နေတဲ့သူတွေလည်း ရှိနေတာကြောင့် စိုးရိမ်ရတယ်လို့ သူက ဆက်ပြောပါတယ်။ အာရက္ခတပ်တော်(AA)ဟာ စစ်တွေမြို့နယ် ပတ်လည်မှာရှိတဲ့ ရသေ့တောင်၊ ပုဏ္ဏားကျွန်း၊ ပေါက်တောမြို့နယ်တို့ကို သိမ်းပိုက်ထားပြီး လက်ရှိမှာလည်း စစ်တွေမြို့နယ်အတွင်းက စစ်တပ်စခန်းတွေကို ဝန်းရံပိတ်ဆို့၊ တိုက်ခိုက်နေတာပါ။

◾️လေကြောင်း ရေကြောင်းရန် သတိပြုကြဖို့ AAအရေးပေါ် ထုတ်ပြန်
​
ရခိုင်ပြည်နယ် ဂွ၊ ကျိန္တလီနဲ့ ဂျိတ်တောမြို့အနီးပတ်ဝန်းကျင်ကို အာဏာသိမ်းစစ်တပ်က ပင်လယ်ပြင်မှာ တပ်စွဲထားတဲ့ စစ်သင်္ဘောတွေပေါ်ကနေ လက်နက်ကြီးတွေနဲ့ ပစ်ခတ်နေလို့ ဒေသခံပြည်သူတွေအနေနဲ့ လေကြောင်း၊ ရေကြောင်းရန်ကို အထူးသတိထားကြဖို့ AAက အရေးပေါ်သတိပေးချက်ထုတ်ပြန်ပါတယ်။ ဒီနေ့ စက်တင်ဘာ ၃ရက် မနက်ပိုင်းကစပြီး ပစ်ခတ်တိုက်ခိုက်နေတာလို့ အာရက္ခတပ်တော်(AA)က ထုတ်ပြန်ပါတယ်။ စစ်တပ်က ဂွမြို့ကို တိုက်ခိုက်ဖို့အတွက် ရွှေသောင်ယံအပါအဝင် ဧရာဝတီတိုင်းကနယ်စပ်မြို့နယ်တွေကို အင်အားဖြည့်နေပါတယ်။ ပြီးခဲ့တဲ့သြဂုတ် ၂၇ရက်က ရွှေသောင်ယံမြို့ကို ဖြတ်သွားတဲ့ ရခိုင်-ဧရာဝတီကမ်းခြေပတ်လမ်းပေါ်ကနေ စစ်ကားအစီးရေ ၅၀ခန့်ဖြတ်သွားပြီး ရွှေသောင်ယံကမ်းခြေမှာလည်း စစ်သင်္ဘောဆယ်စီးကျော် တပ်စွဲခဲ့ပါတယ်။ အဲဒီသင်္ဘောတွေပေါ်ကနေ စစ်တပ်က လက်နက်ကြီးနဲ့ပစ်ခတ်နေတာလို့ သိရပါတယ်။

◾️စစ်အာဏာသိမ်းမှုက ပြည်သူတွေရဲ့ စိတ်ကျန်းမာရေးအပေါ် ဆိုးရွားစွာ သက်ရောက်

မြန်မာနိုင်ငံမှာ စစ်တပ်အာဏာသိမ်းပြီးနောက်ပိုင်း ဖြစ်ပေါ်လာတဲ့ ဘက်ပေါင်းစုံ အကျပ်အတည်းတွေကြောင့် ပြည်သူတွေရဲ့ စိတ်ကျန်းမာရေးအပေါ် ဆိုးရွားစွာ သက်ရောက်မှုရှိနေကြောင်း စိတ်ကျန်းမာရေးအထောက်အပံ့ပေးရေးအဖွဲ့ဖြစ်တဲ့ Narrative Powerက ဖော်ပြပါတယ်။ Narrative Powerဟာ မြန်မာနိုင်ငံမှာ စစ်အာဏာသိမ်းပြီးနောက်ပိုင်းဖြစ်ပေါ်လာခဲ့တဲ့ နိုင်ငံရေး၊ လူမှုရေး၊ စီးပွားရေးအကျပ်အတည်းများနဲ့ လုံခြုံရေးအခြေအနေတွေကြောင့် ပြည်သူတွေရဲ့ စိတ်ကျန်းမာရေးအပေါ် သက်ရောက်လာတဲ့ ထိခိုက်မှုတွေကို ကုစားလျှော့ချနိုင်ဖို့၊ ကူညီဖို့ စတင်တည်ထောင်ခဲ့တဲ့ စိတ်ကျန်းမာရေးအထောက်အပံ့ပေးရေးအဖွဲ့အစည်းတစ်ခု ဖြစ်ပါတယ်။ အဲဒီအဖွဲ့က ၂၀၂၅ ခုနှစ် နိုဝင်ဘာ ၁ ရက်ကနေ ၂၀၂၆ ခုနှစ် ဇူလိုင် ၁ ရက်အထိ ၈ လအတွင်း မြန်မာနိုင်ငံအတွင်းနေထိုင်သူ ၈၁၄ ဦးရဲ့ စစ်တမ်းအချက်အလက်တွေကို အခြေခံပြီး နိုင်ငံရေးပဋိပက္ခ၊ စစ်အာဏာသိမ်းမှု၊ စစ်မှုထမ်းဥပဒေ၊ စီးပွားရေးအခက်အခဲ၊ ပညာရေးလက်လှမ်းမမီမှု၊ လွတ်လပ်စွာထုတ်ဖော်ပြောဆိုခွင့် ကန့်သတ်ခံရမှုနဲ့ သဘာဝဘေးအန္တရာယ်တို့က စိတ်ကျန်းမာရေးအပေါ် ဖြစ်ပေါ်စေတဲ့သက်ရောက်မှုတွေကို လေ့လာထားတာဖြစ်ပါတယ်။ ​လေ့လာချက်အရ နိုင်ငံရေးပဋိပက္ခနဲ့ စစ်အာဏာသိမ်းမှုဟာ ပျမ်းမျှ ရမှတ် ၄.၄၄မှတ်နဲ့ ပြည်သူတွေရဲ့ စိတ်ကျန်းမာရေးအပေါ် အမြင့်ဆုံး သက်ရောက်မှုရှိတဲ့ဖိအားအဖြစ် ထွက်ပေါ်လာတယ်လို့ ဆိုပါတယ်။

◾️ဗန်းမော်ကို စစ်တပ်ရေယာဉ် ၆စီး ဝင်ရောက်

ကချင်ပြည်နယ် ဗန်းမော်မြို့ကို အာဏာသိမ်းစစ်တပ် ရေယာဉ် ၆စီး ဒီနေ့ စက်တင်ဘာ ၃ရက်မှာ ဝင်ရောက်နိုင်ခဲ့တယ်လို့ ကချင်စစ်ရေးသတင်းရင်းမြစ်က ပြောပါတယ်။ စက်တင်ဘာ ၂ရက် မနေ့က ရွှေကူ-ဗန်းမော်ကြား ရေလမ်းကြောင်းမှာ စစ်သင်္ဘောတွေ အပါအဝင် ရေယာဉ်တွေကို KIAက တိုက်ခိုက်ခဲ့ပါတယ်။ ဒါပေမဲ့ ကျန်နေတဲ့အထဲက ရေယာဥ် ၆စီး ဗန်းမော်ကို ဝင်ရောက်နိုင်တာဖြစ်ပါတယ်။ စက်လှေအမြန်ယာဥ် ၆စီး ရောက်သွားတာလို့ ကချင်စစ်ရေးသတင်းရင်းမြစ်က ဆိုပါတယ်။ အာဏာသိမ်းစစ်တပ်ဟာ ဗန်းမော်ကို စစ်အင်အားဖြည့်ဖို့ စစ်သင်္ဘောတွေ အပါအဝင် ရေယာဉ် ၁၅စီးနဲ့ တက်လာခဲ့ပြီး လမ်းမှာ တိုက်ခိုက်ခံရမှုတွေကြောင့် ၆စီးသာ ဗန်းမော်ကို ဝင်ရောက်နိုင်တာဖြစ်ပါတယ်။ KIA နဲ့ ပူးပေါင်းတပ်တွေရဲ့ ပစ်ခတ်တိုက်ခိုက်မှုကြောင့် ဩဂုတ် ၂၇ရက် ကသာ-ရွှေကူကြား စစ်သင်္ဘော ၁စီး၊ ဩဂုတ် ၂၉ရက် ရွှေကူ-ဗန်းမော်ကြား စစ်သင်္ဘောတစီး၊ စက်တင်ဘာ ၂ရက် ရွှေကူ-ဗန်းမော်ကြား စစ်သင်္ဘော ၃စီး ထိခိုက်ပျက်စီးနစ်မြုပ်ခဲ့တယ်လို့ ကချင်စစ်ရေးသတင်းရင်းမြစ်တွေက ပြောပါတယ်။

◾️ချင်းတွင်းမြစ်အတွင်းက မိချောင်းစစ်ဆင်ရေး စစ်သင်္ဘော ၁စီး နစ်မြုပ်၊ ၅စီး ပျက်စီးဟု မော်လိုက်ခရိုင်ရင်း(၃) ထုတ်ပြန်

ချင်းတွင်းမြစ်အတွင်းမှာ စစ်တပ်ရဲ့ ၂၈ စီးပါ စစ်ရေယာဉ်အုပ်စုကို တိုက်ခိုက်ခဲ့တဲ့ ‘မိချောင်းစစ်ဆင်ရေး’မှတ်တမ်းထုတ်ပြန်လိုက်ပြီး စစ်သင်္ဘော ၁စီး နစ်မြုပ်ကာ ၅စီးပျက်စီးကြောင်း ဖောင်းပြင်မြို့နယ်အခြေစိုက် မော်လိုက်ခရိုင်အမှတ်(၃)တပ်ရင်းက သတင်းထုတ်ပြန်ပါတယ်။ ပြည်သူ့ကာကွယ်ရေးတပ်မတော်၊ အမှတ် (၁) စစ်ဒေသ၊ မော်လိုက်ခရိုင်၊ အမှတ် (၃) တပ်ရင်း (ဖောင်းပြင်မြို့နယ်အခြေစိုက်) ကွပ်ကဲမှုနဲ့ ဇူလိုင်လအတွင်းက ချင်းတွင်းမြစ်ကြောင်းအတိုင်း ဆန်တက်လာတဲ့ စစ်တပ်ရဲ့ စစ်ရေယာဉ်တန်းကို ရေကြောင်းစစ်ဆင်ရေးအဖြစ် တိုက်ခိုက်ခဲ့ပါတယ်။ ချင်းတွင်းမြစ်အထက်ပိုင်း ပူးပေါင်းတပ်ဖွဲ့တွေက ရေကြောင်းစစ်ဆင်ရေးအနေနဲ့တိုက်ခိုက်ခဲ့မှုကြောင့် စစ်သင်္ဘော ၁စီး နစ်မြုပ်ခဲ့ပြီး ၅စီး ထိခိုက်ပျက်စီးခဲ့တယ်လို့ မော်လိုက်ခရိုင်အမှတ်(၃)တပ်ရင်းက အသိပေးပါတယ်။ စစ်တပ်က အရာရှိတွေ၊အခြားအဆင့်တွေနဲ့ အခြားဌာနဝန်ထမ်း၊ စစ်မှုထမ်းတပ်သားတွေ စုစုပေါင်း သေဆုံးထိခိုက်သူ ၂၃ ဦးကို အတည်ပြုနိုင်ခဲ့တယ်လို့ မော်လိုက်ခရိုင်အမှတ်(၃)တပ်ရင်းရဲ့ ထုတ်ပြန်ချက်မှာ ဖော်ပြပါတယ်။ သေဆုံးနဲ့ထိခိုက်မှုအရေအတွက်ကို သီးခြားခွဲပြထားတာ မတွေ့ရပါဘူး။ ပစ်ခတ်ခံရပြီး နစ်မြုပ်ခဲ့တဲ့ ရေယာဉ်နဲ့ ပတ်သက်တဲ့အချက်အလက်တွေနဲ့ ရေအောက်နစ်မြုပ်သွားတဲ့ စစ်သားတွေရဲ့ ဖြစ်စဥ်တွေကို ဆက်လက်ထုတ်ပြန်မယ်လို့ မော်လိုက်ခရိုင် အမှတ် (၃) တပ်ရင်းက အသိပေးပါတယ်။

◾️မလှိုင်မြို့နယ်မှာ စစ်တပ်ရဲ့ အသေခံဒရုန်းကြောင့် အရပ်သားတစ်ဦး သေဆုံး၊ တစ်ဦးဒဏ်ရာရ

မန္တလေးတိုင်း၊ မလှိုင်မြို့နယ်ကို စစ်ကြောင်းထိုးနေတဲ့ စစ်တပ်က ဒရုန်းနဲ့ ကျေးရွာတွင်း ဗုံးကြဲခဲ့တာကြောင့် ဆည်ကွဲကျေးရွာက အမျိုးသားတစ်ဦး သေဆုံးပြီး အမျိုးသမီးတစ်ဦး ပြင်းထန်ဒဏ်ရာရခဲ့တယ်လို့ ဒေသခံတွေက ပြောပါတယ်။ ထမ္မကြီးရွာက ပြည်သူ့စစ်ခေါင်းဆောင်ဆိုသူအပါအဝင် ပြည်သူ ၁၂ဦး သတ်ဖြတ်ခံရပြီးနောက် စစ်ကြောင်းထိုးလာတဲ့ စစ်အုပ်စုဟာ မနေ့က ယာကြီးကုန်းရွာမှာ ညအိပ်တပ်စွဲခဲ့ပြီး ညပိုင်းမှာ ကာမီကာဇေအသေခံဒရုန်းတွေနဲ့ ဗုံးတွေ လိုက်ကြဲခဲ့တယ်လို့ သိရပါတယ်။ စက်တင်ဘာ ၂ရက် မနေ့က ည၉နာရီမှာ အဲဒီစစ်ကြောင်းက ဆည်တိုအုပ်စု၊ ဆည်ကွဲကျေးရွာကို ဒရုန်းနဲ့ ဗုံးကြဲခဲ့တာကြောင့် ဦးချစ်ကို သေဆုံးပြီး ဇနီးဖြစ်သူဒေါ်ဝိုင်း ထိမှန်ဒဏ်ရာရခဲ့တာလို့ သိရပါတယ်။ စစ်တပ်ရဲ့ အဲဒီစစ်ကြောင်းဟာ ဒီနေ့ မနက်၄နာရီခွဲမှာ ဩဇာခြံကျေးရွာကို ဝင်ခဲ့ပြီး လက်ရှိ ဂွေးညိုဝင်းရွာကို ဝင်ရောက်သွားတယ်လို့ သိရပါတယ်။

◾️စစ်အုပ်စုသတ်ဖြတ်မှုများကြောင့် သြဂုတ်အတွင်း ကလေးငယ် ၂၅ ဦးအပါအဝင် ပြည်သူ ၂၀၀ ကျော် သေဆုံး

စစ်အုပ်စုရဲ့ အစုလိုက်၊အပြုံလိုက် သတ်ဖြတ်မှုများနဲ့ လေကြောင်းတိုက်ခိုက်မှုများကြောင့် ဩဂုတ်အတွင်း ကလေးငယ် ၂၅ ဦးအပါအဝင် ပြည်သူ ၂၀၀ ကျော် သေဆုံးခဲ့ကြောင်း အမျိုးသားညီညွတ်ရေးအစိုးရက ဒီနေ့ စက်တင်ဘာ ၃ ရက်မှာ သတင်းထုတ်ပြန်ပါတယ်။ ပြီးခဲ့တဲ့ ဩဂုတ် တစ်လအတွင်း စစ်အုပ်စုဟာ နိုင်ငံဒေသ အသီးသီးက အရပ်သားပြည်သူတွေအပေါ် စစ်ရာဇဝတ်မှုပေါင်းများစွာကို စနစ်တကျ ပြင်းပြင်းထန်ထန် ကျူးလွန်ခဲ့ပြီး စုစုပေါင်း လူ့အခွင့်အရေးချိုးဖောက်မှုဖြစ်စဉ် (၅၂၈) မှု ကျူးလွန်ခဲ့တာကို မှတ်တမ်းကောက်ယူထားရှိနိုင်ခဲ့တယ်လို့ အမျိုးသားညီညွတ်ရေးအစိုးရက အသိပေးပါတယ်။ စစ်အုပ်စုဟာ တရားလက်လွတ်သတ်ဖြတ်မှု၊ အတင်းအဓမ္မဖမ်းဆီးမှုနဲ့ ကိုယ်ပိုင်ပစ္စည်းတွေ ဖျက်ဆိးခံရခြင်းတို့ အပါအဝင် ချိုးဖောက်မှုပေါင်းများစွာ ကျူးလွန်ခဲ့ပြီး မန္တလေးဒေသဟာ (၁၁၀) မှုနဲ့ အများဆုံး ချိုးဖောက်ခံခဲ့ရကြောင်း ထုတ်ပြန်ချက်မှာ ဖော်ပြပါတယ်။ စစ်အုပ်စု ကျူးလွန်တဲ့ အစုလိုက်၊အပြုံလိုက်သတ်ဖြတ်မှုဖြစ်စဉ်တွေဟာ ဒေသ (၄)ခုမှာ (၈) မှု ဖြစ်ပွားခဲ့ပြီး ပြည်သူ ၆၈ ဦး သေဆုံးခဲ့ရပါတယ်။ အဲဒီအထဲမှာ အသက် ၁၈ နှစ်အောက် ကလေးငယ် ၇ ဦး ပါဝင်ခဲ့ကြောင်း NUG ရဲ့ ထုတ်ပြန်ချက်မှာ အသိပေးပါတယ်။

◾️မန္တလေးမှာ နေအိမ်တစ်လုံးကို ဝင်စီးပြီး တရုတ်နိုင်ငံသားတွေအပါအဝင် လူ ၁၀ ဦးခန့်ကို စစ်တပ်ဖမ်းဆီး

မန္တလေးမြို့ ၊မဟာအောင်မြေမြို့နယ်ထဲက နေအိမ်တစ်လုံးကို စက်တင်ဘာ ၂ရက်က အာဏာသိမ်းစစ်တပ်က ဝင်ရောက်စီးနင်းပြီး တရုတ်နိုင်ငံသားတွေအပါအဝင် လူ ၁၀ ဦးခန့်ကို ဖမ်းဆီးသွားတယ်လ်ို့ မြို့ခံတွေဆီက သိရပါတယ်။ ကျားဖြန့် ( အွန်လိိုင်းငွေလိမ်) လုပ်ငန်းလုပ်ကိုင်တယ်ဆိုပြီး မနေ့ မနက် ၁၀ နာရီခန့်က စစ်တပ် ၊ ရဲ နဲ့ ပြည်သူ့စစ်ခေါ် ပျုစောထီးတွေက အဲဒီနေအိမ်ကို ဝင်ဖမ်းသွားတာပါ။ ဖမ်းခံရသူ ၁၀ ဦးဝန်းကျင်မှာ တရုတ်နိုင်ငံသားအချို့ပါဝင်ပြီး မြန်မာနိုင်ငံသား အမျိုးသား၊အမျိုးသမီး လူငယ်ပိုင်းတွေ၊လူလတ်ပိုင်းတွေ လည်းပါကြတယ်လို့ သိရပါတယ်။ အဲဒီနေအိမ်မှာ ကျားဖြန့်လုပ်ကိုင်တယ်လို့ သတင်းတွေ ထွက်နေခဲ့တာဖြစ်ပြီး လတ်တလောမှာတော့ ဖမ်းဆီးထားသူတွေကို ဘယ်ပုဒ်မတွေနဲ့ အမှုဖွင့်ထားတယ်ဆိုတာ မသိရသေးပါဘူး။

◾️ဇင်းဘုံနဲ့ စင်းခန်းတံတားမှာ မြေပြင်တိုက်ပွဲ ပြင်းထန်နေ

ကချင်ပြည်နယ်၊ ရွှေကူမြို့နယ် ဇင်းဘုံကျေးရွာအနီးဝန်းကျင်နဲ့ ဗန်းမော်မြို့နယ် စင်းခန်းတံတား အနီးတွေမှာ ဒီနေ့ စက်တင်ဘာ ၃ရက် မနက်ပိုင်းမှာ တိုက်ပွဲတွေ ပြင်းထန်နေကြောင်း ကချင်စစ်ရေးသတင်းရင်းမြစ်က ပြောပါတယ်။ စက်တင်ဘာ ၂ရက်က ရွှေကူ-ဗန်းမော်မြို့နယ်အကြား ရေကြောင်း တိုက်ပွဲမှာ စစ်သင်္ဘောတွေ ထိခိုက်ဆုံးရှုံးမှုများပြားပြီး သေဆုံး၊ ဒဏ်ရာရနဲ့ လက်နက်ချသူများခဲ့တဲ့ စစ်တပ်ဟာ ဒီနေ့မှာ ဇင်းဘုံဘက်ကို မြေပြင်ထိုးစစ်ဆင်သလို စင်းခန်းတံတားနေရာကိုလည်း လက်ကျန်သင်္ဘောနဲ့ ကမ်းကပ်ပြီး ထိုးစစ်ဆင်လာတာလို့ ဆိုပါတယ်။ တဖက်မှာလည်း ဗန်းမော်မြို့အနီး ရေနီဒေသမှာ ကမ်းကပ်ရပ်နားခဲ့တဲ့ လက်ကျန် စစ်သင်္ဘောတွေဟာလည်း ဗန်းမော်မြို့ကို ဆက်လက်ထွက်ခွာသွားတယ်လို့ ပြောပါတယ်။ စစ်တပ်ဟာ စင်းခန်းတံတားကို သိမ်းပိုက်ထိန်းချုပ်လိုပြီး စစ်ရေးလှုပ်ရှားမှုတွေ အရင်ကတည်းက လုပ်ဆောင်နေတာဖြစ်ပါတယ်။

◾️စစ်သင်္ဘောတွေတိုက်ခိုက်ခံရမှု စစ်သားတွေ ရေစီးနဲ့ မျောပါနေ

ကချင်ပြည်နယ်၊ ဗန်းမော်မြို့ကို တက်တဲ့ စစ်သင်္ဘောတွေကို ကချင်လွတ်လပ်ရေးတပ်မတော်(KIA) ပူးပေါင်းတပ်က တိုက်ခိုက်ခဲ့ရာ စစ်သင်္ဘောတွေ ထိခိုက်နစ်မြုပ်ပြီး သင်္ဘောပေါ်ပါ စစ်သားတွေ ရေစီးနဲ့မျောပါလာတာကို ကချင်သတင်းရင်းမြစ်အချို့က ဖော်ပြတဲ့ ရုပ်သံမှာ တွေ့ရပါတယ်။ စက်တင်ဘာ ၂ရက် ရွှေကူမြို့နယ်၊ ဇင်းဘုံရွာနဲ့ ဗန်းမော်မြို့ စင်းခန်းတံတားကြားမှာ KIA တိုက်ခိုက်လို့ စစ်သင်္ဘော ၃စီး နစ်မြုပ်ပျက်စီးခဲ့ပြီး ၂စီး အလံဖြူထောင်ခဲ့တယ်လို့ KIA သတင်းပြန်ကြားရေးဌာနက ဖော်ပြပါတယ်။ ထိခိုက်ပျက်စီး မီးလောင်တဲ့သင်္ဘောတွေက စစ်သားတွေဟာ ရေထဲခုန်ချခဲ့ကြပြီး အချို့တွေက ရေပုံးတွေ ပေပါတွေအသုံးပြု ရေစီးနဲ့မျောလာလို့ ရှင်းလင်းရေးလုပ်ဆောင်ခဲ့တယ်လို့ ကချင်စစ်ရေး သတင်းရင်းမြစ်က ပြောပြပါတယ်။ ဒီနေ့ ထွက်ပေါ်လာတဲ့ ရုပ်သံမှာ စစ်သားတွေ ရေစီးနဲ့ မျောလာတာ ကူးလာတာကို KIA ပူးပေါင်းတပ်က ကမ်းကိုကပ်ဖို့ အော်ပြောနေတာ ကြားရပါတယ်။ ရေစီးနဲ့အတူ မျောလာတဲ့ ပစ္စည်းအများအပြားကိုလည်း ရုပ်သံမှာ တွေ့ရပါတယ်။

◾️KIA က စစ်သင်္ဘော ၃စီးကို တိုက်ခိုက်သိမ်းပိုက်ပြီး ၂စီး အလံဖြူထောင်

ရွှေကူမြို့ကနေ ဗန်းမော်မြို့ကိုဆန်တက်လာတဲ့ စစ်တပ်ရဲ့ စစ်သင်္ဘောအချို့ကို KIA ပူးပေါင်းတပ်များက တိုက်ခိုက်သိမ်းပိုက်ခဲ့ကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနက စက်တင်ဘာ ၂ရက် မနေ့ ညပိုင်းမှာ သတင်းဖော်ပြပါတယ်။ စက်တင်ဘာ ၂ရက်က ဆန်တက်လာတဲ့ စစ်သင်္ဘောတွေကို ရွှေကူမြို့နယ် ဇင်းဘုံကျေးရွာ နဲ့ ဗန်းမော်မြို့နယ် စင်းခန်းတံတား အကြားမှာ တိုက်ခိုက်ခဲ့ရာ စစ်သင်္ဘော ၁စီးရေထဲမြုပ်သွားပြီး ၁စီး မီးလောင်ပျက်စီးသွားတယ်လို့ ဖော်ပြပါတယ်။ နောက်ပြီး စင်းခန်းတံတားအောက်မှာ စစ်သင်္ဘော ၁စီးထပ်မံ တိုက်ခိုက်ခံရပြီး နောက်ထပ် သင်္ဘော ၂စီးကလည်း ကမ်းစပ်နားကပ်လာကာ အလံဖြူထောင် အဖမ်းခံလိုက်ရကြောင်း ဖော်ပြခဲ့တာပါ။ ဒ့ါအပြင် လုံခြုံရေးယူပေးတဲ့ စစ်တပ်ရဲ့ စပိဘုတ် ၂ စီးကိုလည်း KIA ပူးပေါင်းတပ်များက စင်းခန်းတံတားအထက် မြလယ်နားမှာ လိုက်လံပစ်ခတ်တိုက်ခိုက်ခဲ့တယ်လို့ ဆိုပါတယ်။ စစ်သင်္ဘောမှာ လိုက်ပါလာတဲ့ စစ်သုံ့ပန်း ၁၀၀ ကျော်ကိုလည်း KIA ပူးပေါင်းတပ်များက ဖမ်းဆီးရမိထားတယ်လို့ အတည်ပြုပါတယ်။

◾️ရန်ကုန်မှာ အမျိုးသား ၁ဦး ကား ၁စီးနဲ့ အတူ ထပ်ပျောက်ပြန်

ပေါ်တာဆွဲဖမ်းဆီးမှုတွေ ဆိုးဆိုးရွားရွား ဖြစ်ပွားနေတဲ့ ရန်ကုန်မြို့မြောက်ဥက္ကလာပမြို့နယ်မှာ အမျိုးသား ၁ဦး ကား ၁စီးနဲ့အတူ ပျောက်ဆုံးမှုဖြစ်ပွားခဲ့ပါတယ်။ မကွေးကျောင်းဆရာတော်လို့ လူသိများတဲ့ မဘသခေါင်းဆောင် ဦးပါမောက္ခရဲ့ Tiktok အကောင့်မှာ မြောက်ဥက္ကလာပမြို့နယ်မှာ ကား ၁စီးနဲ့ အမျိုးသား ၁ဦး ပျောက်ဆုံးသွားတဲ့အကြောင်း မိသားစုဝင်တွေက လာရောက်အကူအညီတောင်းခဲ့တဲ့ရုပ်သံကို တင်ခဲ့ပါတယ်။ စက်တင်ဘာ ၁ ရက် ည ၉ နာရီဝန်းကျင်က မြောက်ဥက္ကလာပမြို့နယ်၊ ဝေဘာဂီရပ်ကွက်နားမှာ အသက် ၃၇ နှစ်အရွယ် ကိုအောင်စိုးမင်းဆိုသူဟာ ကားနံပါတ် BGO 34Q 5624 Hi Jet အဖြူရောင်ကားနဲ့ အဆက်အသွယ်မရတော့ဘဲ ပျောက်ဆုံးသွားတာဖြစ်ကြောင်း မိသားစုဝင်တွေက ဆရာတော်ကို လျှောက်ခဲ့ပါတယ်။