အာရက္ခတပ်​တော်(AA)တပ်ဖွဲ့ဝင်​တွေကို
ရခိုင်-မ​ကွေးအစပ်မှာ ၂၀၂၅ စက်တင်ဘာလက​တွေ့ရစဥ်။ဓါတ်ပုံ-AA Infodesk

“ဒီနေ့ဘာဖြစ်ခဲ့လဲ”

ဒီနေ့(စက်တင်ဘာ ၂ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️ဗန်းမော်တက်တဲ့ စစ်သင်္ဘော ၂စီး အလံဖြူထောင်

ကချင်ပြည်နယ်၊ ရွှေကူမြို့ကနေ ဗန်းမော်မြို့ဆီ ဦးတည် တက်လာတဲ့ စစ်သင်္ဘောအုပ်စုထဲက သင်္ဘော ၂စီးဟာ အလံဖြူထောင်ပြီး ကမ်းကပ်ခဲ့ကြောင်း ကချင်စစ်ရေးသတင်းရင်းမြစ်က ပြောပါတယ်။ ဒီနေ့ စက်တင်ဘာ ၂ရက် မနက်အစောမှာ စစ်သင်္ဘောတွေဟာ ရွှေကူကနေ ဗန်းမော်မြို့ဆီ ဒုတိယအကြိမ် ထပ်မံထွက်ခွာလာရာ KIA ရဲ့တိုက်ခိုက်မှုကြောင့် စစ်သင်္ဘော ၁စီးနစ်မြုပ်ကာ ၂စီး ပျက်စီးခဲ့ပါတယ်။ အဲဒီလို အထိအခိုက်အပျက်အစီး ရှိလာတဲ့ အခြေအနေမှာ စစ်သင်္ဘော ၂စီးဟာ အလံဖြူထောင်ကမ်းကပ်ခဲ့တာလို့ ဆိုပါတယ်။ နစ်မြုပ်သွားတဲ့ စစ်သင်္ဘောမှာ လူတွေပါသွားတယ်လို့လည်း ဆိုပါတယ်။ ဒါဟာ စစ်သင်္ဘောအုပ်စုတွေထဲက ကချင်ပြည်နယ်ကို စစ်အင်အားဖြည့်တင်းမှု ပြုလုပ်တဲ့ကာလတလျှောက် ပထမဆုံး အလံဖြူထောင်တဲ့ အခြေအနေလည်းဖြစ်ပါတယ်။ ဒီနေ့ ရွှေကူ- ဗန်းမော်ကြား တိုက်ပွဲမှာ စစ်တပ် တပ်ဖွဲ့ဝင်တွေကို အရှင်ဖမ်းဆီးခံရတာ ရှိသလို သေဆုံးထိခိုက်တွေလည်း များပြားခဲ့ပါတယ်။ သင်္ဘောတွေ အထိနာရုံသာမက မြေပြင်စစ်ကြောင်းလည်း တပ်လန်သွားတယ်လို့ ကချင်စစ်ရေးသတင်းရင်းမြစ်က ပြောပါတယ်။ ဩဂုတ် ၂၇ရက်မှာ စစ်ကိုင်းတိုင်း ကသာမြို့ကနေ ကချင်ပြည်နယ် ရွှေကူမြို့ကို စစ်သင်္ဘောတွေ စတင်ဝင်လာတာဖြစ်ပါတယ်။ အဲဒီလို ဝင်လာကတည်းက KIAပူးပေါင်းတပ်က တိုက်ခိုက်ခဲ့ရာ တပတ်တာအကြာ စစ်သင်္ဘော ၆စီး သုံးမရအောင် လုံး၀ ပျက်စီးသွားခဲ့ကြောင်း ကချင်သတင်းရင်းမြစ်တွေရဲ့ ပြောပြချက်အရ သိရပါတယ်။ ဒီနေ့မနက်ပိုင်းကနေ နေ့ခင်းပိုင်းအထိ စစ်သင်္ဘော ၄စီး လုံး၀ပျက်စီးခဲ့တာလည်းဖြစ်ပါတယ်။ အထိနာတဲ့ စစ်တပ်ကလည်း လေကြောင်းတိုက်ခိုက်မှုတွေကို လေယာဉ်အစီးရေများစွာနဲ့ ပြုလုပ်နေတယ်လို့ သတင်းရင်းမြစ်တွေက အသိပေးထားပါတယ်။

◾️စစ်သင်္ဘောပေါ်က အလံဖြူထောင်တဲ့ စစ်သား ၁၀၀ ​ကျော်ကို KIA ပူးပေါင်းတပ်က လုံခြုံရာပို့ဆောင်

ကချင်ပြည်နယ် ရွှေကူ-ဗန်းမော်ကြား အလံဖြူထောင်တဲ့ စစ်သား ၁၀၀ ​ကျော်ကို ကချင်လွတ်လပ်ရေးတပ်မတော်(KIA) ပူးပေါင်းတပ်က လုံခြုံဘေးကင်းရာ ပို့ဆောင်​ပေးခဲ့ရ​ကြောင်း စစ်​ရေးသတင်းရင်းမြစ်​​တွေက ​ပြောပါတယ်။ စက်တင်ဘာ ၂ ရက် မနက်အစောမှာ တက်လာတဲ့ စစ်သင်္ဘောအုပ်စုကို KIA ပူးပေါင်းတပ်က တိုက်ခိုက်ခဲ့ရာ စစ်သင်္ဘောအပါအဝင် စစ်သင်္ဘော ၄စီး လုံး၀ ပျက်စီးသွားပြီး စစ်သုံ့ပန်းများစွာ အလံဖြူထောင်လက်နက်ချခဲ့ပါတယ်။ အလံဖြူထောင်တဲ့ စစ်သင်္ဘောဟာ စင်းခန်းတံတားအနီးမှာ ထိခိုက်ပျက်စီးခဲ့တဲ့ သင်္ဘောဖြစ်ပြီး စစ်သား ၆၀ ကျော် ပါဝင်တယ်လို့ စစ်ရေးသတင်းရင်းမြစ်က ပြောပါတယ်။ ဒါ့အပြင် အခြားစစ်သင်္ဘော ​တစ်စီးကလည်း အလံဖြူ​ထောင်လက်နက်ချသူ​တွေရှိပြီး စစ်သုံ့ပန်း ၁၀၀ ​ကျော်တယ်လို့ အခြားစစ်​ရေးရင်းမြစ်က​ပြောပါတယ်။ သတင်းရင်းမြစ်က ပေးပို့လာတဲ့ ရုပ်သံမှာလည်း စင်းခန်းတံတားအောက်လို့ ယူဆရတဲ့ နေရာက စစ်သားတွေကို KIA ပူးပေါင်းတပ်က နေရာရွှေ့ပြောင်းနေတာ တွေ့ရပါတယ်။

◾️ရခိုင်တက်ဖို့ ကြိုးစားတဲ့ စစ်ကြောင်းတွေ တိုက်ခိုက်ခံရ

အာရက္ခတပ်တော်(AA) ပူးပေါင်းတပ်ဖွဲ့တွေ သိမ်းပိုက်ထားတဲ့ ရခိုင်ပြည်နယ်နဲ့အစပ် စစ်မျက်နှာတွေဆီ အင်အားထောင်ချီသုံးပြီး တန်ပြန်ထိုးစစ်ဆင်လာတဲ့ အာဏာသိမ်းစစ်တပ်ဟာ ကြားဖြတ်တိုက်ခိုက်ခံရတာကြောင့် ဆယ်ချီသေဆုံးကာ အလင်းဝင်သူတွေလည်း အများအပြားရှိနေတယ်လို့ မြေပြင်သတင်းရင်းမြစ်တွေက ပြောပါတယ်။ ရခိုင်အစပ် ရိုးမအရှေ့ဘက်ခြမ်း မကွေးတိုင်း၊ငဖဲမြို့နယ် နတ်ရေကန်အနီး ပဇီကျေးရွာဝန်းကျင်နဲ့ မင်းတုန်းမြို့နယ် သဖန်ရောင်ရွာဝန်းကျင်တို့မှာ AA ပူးပေါင်းတပ်ဖွဲ့က ကြားဖြတ်တိုက်ခိုက်နေတာဖြစ်ပြီး တိုက်ပွဲပြင်းထန်နေတယ်လို့ ဆိုပါတယ်။ သတင်းရထားသလောက် ပဇီဘက်မှာ အလောင်းနှစ်ဆယ်ကျော်လောက်ရလိုက်ပြီး အလောင်းမရဘဲ သေတာလည်း အများကြီးရှိမှာလို့ AAနဲ့နီးစပ်တဲ့ သတင်းရင်းမြစ်တစ်ဦးက ပြောပါတယ်။ စစ်တပ်စစ်ကြောင်းမှာ ထွက်ပြေးနေသူတွေ၊ လက်နက်ချသူတွေလည်း ရှိနေတာကြောင့် စစ်ကြောင်းတကြောင်းလုံး ဖရိုဖရဲဖြစ်နေတာလို့ အဲဒီသတင်းရင်းမြစ်က ဆိုပါတယ်။ ဒါ့အပြင် စစ်တပ်ဟာ ရခိုင်ပြည်ဝင်ပေါက်ဖြစ်တဲ့ မင်းတုန်း-အမ်း သစ်ထုတ်လမ်းကနေလည်း အင်အားအလုံးအရင်းနဲ့ စစ်ကြောင်းထိုးနေပြီး မင်းတုန်းမြို့နယ် သဖန်ရောင်အနီးဝန်းကျင်မှာ တိုက်ပွဲဖြစ်နေတယ်လို့ သိရပါတယ်။ တိုက်ပွဲအပြင်းအထန်ဖြစ်​နေပြီး အခြေအနေအသေးစိတ်ကို မသိရသေးဘူးလို့ ဒေသခံသတင်းရင်းမြစ်တွေက ပြောပါတယ်။

◾️KNDF ပထမအကြိမ်ညီလာခံကို AA စစ်ဦးစီးချုပ်နဲ့ ကလလတ ဥက္ကဋ္ဌတို့ အွန်လိုင်းက တက်ရောက်

ကရင်နီအမျိုးသားများကာကွယ်ရေတပ် -KNDF ရဲ့ ပထမအကြိမ် ညီလာခံကို AA စစ်ဦးစီးချုပ် ဗိုလ်ချုပ်ထွန်းမြတ်နိုင်နဲ့ ကရင်နီပြည်လူမျိုးပေါင်းစုံ လွတ်မြောက်ရေးတပ်ဦး(ကလလတ)ဥက္ကဋ္ဌ ဗိုလ်ချုပ်ထွန်းကျော်တို့ အွန်လိုင်းကတဆင့် တက်ရောက်ခဲ့ပါတယ်။ ဒီနေ့ ညပိုင်းမှာ KNDF က ထုတ်ပြန်တဲ့ ဓာတ်ပုံမှတ်တမ်းတွေအရ ပထမအကြိမ် ညီလာခံကို ၂၀၂၆ သြဂုတ် ၂၈ရက်နဲ့ ၂၉ ရက်တွေမှာ ကရင်နီပြည်တစ်နေရာမှာ ကျင်းပပြုလုပ်ခဲ့တယ်လို့ ဆိုပါတယ်။ ညီလာခံကို ဗဟိုကော်မတီဝင်တွေ၊ စစ်ဒေသမှူးတွေ၊ ဌာနမှူးတွေ ၊ တပ်ရင်းမှူးတွေ ၊ ရုံးဦးစီးမှူးတွေနဲ့ တပ်ဖွဲ့ဝင် စုစုပေါင်း အမျိုးသား (၉၁) ဦး၊ အမျိုးသမီး (၁၄) ဦး၊စုစု‌ ပေါင်း (၁၀၅) ဦး တက်ရောက်ခဲ့တယ်လို့ အသိပေးပါတယ်။ ညီလာခံမှာ KNDF ရဲ့ အရင်ကာလလုပ်ငန်းစဥ်တွေနဲ့ စစ်ရေး ၊နိုင်ငံရေးရပ်တည်ချက်တွေကို ပြန်လည်သုံးသပ်ခဲ့ကြပြီး အနာဂတ်တပ်တည်ဆောက်မှုဆိုင်ရာ ရှေ့လုပ်ငန်းစဉ်တွေ ၊ စစ်ရေး ၊ နိုင်ငံရေး ဦးတည်ချက်‌တွေ ဆုံးဖြတ်ချမှတ်ခဲ့တယ်လို့ သိရပါတယ်။

◾️ဆိပ်ဖြူနယ် အဓိကလမ်းပိုင်းတွေကို စစ်တပ် စစ်ကြောင်းထိုး

လေယာဉ်နဲ့ကြဲချတဲ့ ဗုံးတွေထုတ်လုပ်နေတဲ့ မကွေးတိုင်း၊ ဆိပ်ဖြူမြို့နယ်က အဓိကလမ်းပိုင်းတွေကို စစ်တပ်က စစ်ကြောင်းထိုးနေတယ်လို့ ဒေသခံစစ်ရေးသတင်းရင်း မြစ်တွေက ပြောပါတယ်။ ဆိပ်ဖြူမြို့နယ်မှာ စစ်တပ်ရဲ့ကာကွယ်ရေးပစ္စည်းစက်ရုံ ကပစ-၂၁၊ ကပစ-၂၂)နဲ့ အမှတ်(၉)လေကြောင်းရန်ကာကွယ်ရေးကွပ်ကဲမှုစစ်ဆင်ရေးဌာနချုပ်(လစခ)တို့ ရှိပါတယ်။ ကပစ -၂၁က လေတပ်သုံး ဗုံးတွေထုတ်ပြီး ကပစ-၂၂ မှာ လက်နက်တွေ ထုတ်နေတာ ဖြစ်ပါတယ်။ စစ်ရေးအချက်အလက်တွေအရ စစ်တပ်ထိန်းချုပ်ထားတဲ့ ကပစ စက်ရုံ ၂၅ ခုအနက် လေ‌ယာဉ်ဗုံးသီးတွေ ထုတ်လုပ်နိုင်တာ ဆိပ်ဖြူမြို့အနောက်ခြမ်းမှာရှိတဲ့ ကပစ (၂၁) တစ်ခုပဲရှိပါတယ်။ အဲဒီ ကပစ-၂၁ကို ယမ်းတွေ ပို့ဆောင်တာလုပ်သလို စက်ရုံကနေ လေယာဉ်ဗုံးသီးတွေ ထုတ်ပြီးပြီ ဆိုရင်လည်း ပြန်သယ်ဆောင်တာမျိုး ရှိတယ်လို့ ဆိပ်ဖြူအခြေစိုက် တော်လှန်ရေးတပ်ဖွဲ့ တာ၀န်ရှိသူက ပြောပါတယ်။ အဲဒီလို သယ်တာကို ဝေဟင်ကင်းရော မြေပြင်ကင်းရောယူရုံသာမက စစ်ကြောင်းလည်း ထိုးတာကြောင့် မြေပြင်မှာ ရှုပ်နေတဲ့ အခြေအနေဖြစ်တယ်လို့ အဲဒီတာဝန်ရှိသူက ဆက်ပြောပါတယ်။ ဆိပ်ဖြူနယ်က ပုသိမ်-မုံရွာ၊ ဆော-ဆိပ်ဖြူ နဲ့ ဆိပ်ဖြူ-ပေါက် လမ်းပိုင်းတွေမှာ စစ်တပ် ကင်းတွေချတာနဲ့ စစ်ကြောင်းထိုးတာတွေ ရှိနေတယ်လို့ အသိပေးပါတယ်။

◾️မြန်မာတွေကို စစ်တပ်လက်ပြန်မအပ်ဖို့ ထိုင်းဝန်ကြီးချုပ်ဆီ တောင်းဆို

စစ်တပ်ကို တရားဝင်မှုပေးနိုင်တဲ့လုပ်ရပ်တွေ ရှောင်ရှားဖို့နဲ့ ဒုက္ခသည်တွေကို အဓမ္မပြန်လည်ပို့ဆောင်တာတွေကနေကာကွယ်ပေးဖို့ ထိုင်းဝန်ကြီးချုပ်ဆီကို တောင်းဆိုတဲ့လှုပ်ရှားမှုကို ပြည်ပရောက် မြန်မာတွေက ဒီနေ့ စက်တင်ဘာ ၂ ရက်မှာ သက်ဆိုင်ရာ ထိုင်းနိုင်ငံသံရုံးတွေရှေ့မှာ တပြိုင်နက်လုပ်ဆောင်ခဲ့ကြပါတယ်။ အဲဒီလှုပ်ရှားမှုကို ဗြိတိန်၊ ပြင်သစ်၊ အမေရိကန်၊ ဩစတြေးလျ၊ ဂျပန်နိုင်ငံ‌တွေက ထိုင်းနိုင်ငံသံရုံးတွေရှေ့မှာ တပြိုင်နက် ဆန္ဒထုတ်ဖော်ခဲ့ပြီး ထိုင်းဝန်ကြီးချုပ်ထံကို အိတ်ဖွင့်‌ပေးစာ ပေးပို့ခဲ့ကြတာလို့ စစ်အာဏာသိမ်းမှု ဆန့်ကျင်ရေးကော်မတီ-ကိုရီးယားက အသိပေးထားပါတယ်။ ကိုရီးယားနိုင်ငံမှာ ဒေသစံတော်ချိန် နေ့လယ် ၁၁ နာရီက ထိုင်းသံရုံးရှေ့မှာ မြန်မာအဖွဲ့အစည်း ကိုယ်စားလှယ်တွေနဲ့ ကိုရီးယားအရပ်ဘက်အဖွဲ့အစည်း ကိုယ်စားလှယ်တွေ ပါဝင်ပြီး အဲဒီလှုပ်ရှားမှုကို ပြုလုပ်ကြတယ်လို့ သိရပါတယ်။ ထိုင်းဝန်ကြီးချုပ်ကိုပေးပို့တဲ့ တောင်းဆိုစာမှာ ထိုင်းနိုင်ငံရဲ့ ဆယ်စုနှစ်များစွာ ပံ့ပိုးပေးခဲ့တဲ့ လူသားချင်းစာနာထောက်ထားမှုဆိုင်ရာ အကူအညီတွေအတွက် ကျေးဇူးတင်‌ကြောင်းနဲ့ တရားမဝင်အာဏာသိမ်းကာ အရပ်သားတွေအပေါ် ကျယ်ကျယ်ပြန့်ပြန့် ပြစ်မှုကျူးလွန်နေတဲ့ မင်းအောင်လှိုင်နဲ့ လတ်တလော ထိတွေ့ဆက်ဆံမှုတွေအပေါ် စိုးရိမ်ပူပန်မှု‌တွေကို ထောက်ပြထားတယ်လို့ ထုတ်ပြန်ချက်မှာ ဖော်ပြထားပါတယ်။ ဒါ့အပြင် ထိုင်းနိုင်ငံ ဝန်ကြီးချုပ်ရုံးက ထုတ်ပြန်လိုက်တဲ့ ပြည်နှင်ဒဏ်ပေးခြင်းဆိုင်ရာ စည်းမျဉ်းသစ်ကြောင့် မြန်မာနိုင်ငံသားတွေ ပြန်လည်ပို့ဆောင်ခံရရင် ဖိနှိပ်ချုပ်ချယ်မှု၊ မတရားဖမ်းဆီးထိန်းသိမ်းမှု၊ ညှဉ်းပန်းနှိပ်စက်မှု သို့မဟုတ် အဓမ္မစစ်သားစုဆောင်းခံရမှု‌တွေနဲ့ ရင်ဆိုင်ရနိုင်ကြောင်း သတိပေးထားတယ်လို့ ထုတ်ပြန်ထားပါတယ်။

◾️ကနီမှာ စစ်တပ်သတ်ဖြတ်မှုကြောင့် ၄လအတွင်း ပြည်သူ ၁၅ ဦးထက်မနည်း သေဆုံး

စစ်ကိုင်းတိုင်း၊ ကနီမြို့နယ်မှာ အာဏာသိမ်းစစ်တပ်ရဲ့လေကြောင်းတိုက်ခိုက်မှုနဲ့ စစ်ကြောင်းထိုး သတ်ဖြတ်မှုတွေကြောင့် ၄လအတွင်း စိတ်ကျန်းမာရေးမကောင်းသူတွေ အပါအဝင် ပြည်သူ ၁၅ ဦးထက်မနည်းသေဆုံးခဲ့ကြောင်း ဒေသခံတွေက ပြောပါတယ်။ အာဏာသိမ်းစစ်တပ်က ကနီမြို့နယ်၊ မုံရွာ-ချောင်းမ-ယာကြီး-ကလေးဝကားလမ်းမှာ ဧပြီ ၂၈ ရက်ကစပြီး စစ်ကြောင်းထိုးခဲ့ရာ စက်တင်ဘာ ၁ ရက်အထိ ၄လကျော် ကာလအတွင်း ကနီမြို့နယ်တွင်း ကျေးရွာပေါင်း (၃၅)ရွာ ရောက်ရှိခဲ့ပါတယ်။ အဲဒီစစ်ကြောင်း ရောက်ရှိချိန် လေကြောင်းပစ်ခတ်မှု ၂၂ ကြိမ်ထက်မနည်း ရှိခဲ့ပြီး လေကြောင်းပစ်ခတ်မှုကြောင့် အသက် ၂၆နှစ်၊ ၃၇နှစ်နဲ့ ၂၂ နှစ်အရွယ် အမျိုးသား ၃ ဦးနဲ့ အသက် ၅၁ နှစ်အရွယ် အမျိုးသမီး တစ်ဦး၊ အခြား အမျိုးသား ၂ ဦး သေဆုံးခဲ့ရကြောင်း ကနီမြို့နယ်က တက်ကြွလှုပ်ရှားသူ ကိုပြည့်အောင်နိုင်(ကနီ)က ပြောပါတယ်။ ဒါ့အပြင် ​စစ်ကြောင်းက ဖမ်းဆီးသတ်ဖြတ်ခဲ့လို့ အသက်၇၈ နှစ် ၊ ၆၀နှစ် ၊ ၄၁နှစ် ၊၃၈နှစ် ၊ ၃၁ နှစ်၊ ၃၀ နှစ်၊ ၂၅ နှစ်စတဲ့ အမျိုးသား ၇ ဦး ထပ်မံ သေဆုံးခဲ့ကြောင်း သူက ဆက်ပြောပါတယ်။

◾️၁၄ နှစ် အရွယ်မိန်းကလေးငယ်ကို အဓမ္မပြုကျင့်ထွက်ပြေးနေသူကို နှစ်လကျော်အကြာမှာ ဖမ်းမိ

ရခိုင်ပြည်နယ် ကျောက်တော်မြို့နယ်၊ ရမ်းချောင်းဒေသမှာ အသက် ၁၄ နှစ်အရွယ် မိန်းကလေးငယ်ကို အဓမ္မပြုကျင့်ပြီး ထွက်ပြေးလွတ်မြောက်နေခဲ့သူကို နှစ်လကျော်အကြာမှာ ဖမ်းဆီးရမိခဲ့ပြီး ရာဇသတ်ကြီးဥပဒေပုဒ်မ ၃၇၆၊ ၃၇၇ တို့နဲ့ တရားစွဲတင်ထားတယ်လို့ အာရက္ခတပ်တော်(AA)ရဲတပ်ဖွဲ့က ထုတ်ပြန်ပါတယ်။ ပြီးခဲ့တဲ့ ဧပြီ ၇ ရက်က ရမ်းချောင်းဒေသမှာ ခြံစောင့်အငှားလုပ်ကိုင်နေသူရဲ့သမီးကို ခြံပိုင်ရှင်ဖြစ်သူ အသက် ၅၅ နှစ်အရွယ် ဦးမောင်အေးလှက အဓမ္မပြုကျင့်ခဲ့တာဖြစ်ပြီး အခုအခါ သူ့ကို မြောက်ဦးခရိုင်တရားရုံးမှာ တရားစွဲ တင်ထားတယ်လို့ ဆိုပါတယ်။ ဦးမောင်အေးလှဟာ နှစ်လကျော်ကြာထွက်ပြေးလွတ်မြောက်နေခဲ့ပြီး ဇူလိုင် ၃၀ ရက်မှာမှ ရဲတပ်ဖွဲ့က ဖမ်း ဆီးရမိခဲ့တာပါ။ သူဟာ ပြစ်မှုကျူးလွန်ခဲ့တာ မှန်ကန်ကြောင်း ဝန်ခံထွက်ဆိုပြီး သူကျူးလွန်ခဲ့တာတွေကို တရားရုံးမှာ ဖြောင့်ချက်ပေးမယ်လို့ ပြောဆိုထားတယ်လို့လည်း ရဲထုတ်ပြန်ချက်မှာ ဖော်ပြထားပါတယ်။

◾️တိုင်းနဲ့ပြည်နယ် ၆ခုက မြို့နယ်အချို့ မိုးကြီးပြီး ရေဘေးကြုံနေ

ဧရာဝတီတိုင်း၊ စစ်ကိုင်းတိုင်း၊ ပဲခူးတိုင်း၊ ရန်ကုန်တိုင်း၊ တနင်္သာရီတိုင်းနဲ့ ချင်းပြည်နယ်က မြို့နယ်အချို့မှာ မိုးကြီးပြီး ရေဘေးနဲ့ မြေပြိုမှုဘေး ရင်ဆိုင်နေရပါတယ်။ စစ်ကိုင်းတိုင်း၊ ကလေးမြို့အပြင် ဒေသချင်းဆက်စပ်နေတဲ့ ချင်းပြည်နယ် တီးတိန်၊ ခိုင်ကမ်း၊ဟားခါးမြို့၊ ရန်ကုန်တိုင်းက လှည်းကူးမြို့၊ ပဲခူးတိုင်းက ပဲခူးမြို့၊ တနင်္သာရီတိုင်းက တနင်္သာရီ၊ ပုလောမြို့တွေနဲ့ ဧရာဝတီတိုင်းက မြို့နယ် ၇ခုထက်မနည်းမှာ ရေဘေးကြုံတွေ့နေတယ်လို့ ဒေသခံတွေက ပြောပါတယ်။ အဲဒီတိုင်းနဲ့ပြည်နယ်တွေမှာ မိုးကြီးနေတဲ့အပြင် မြစ်ရေတွေလည်းပုံမှန်ထက်မြင့်တက်နေပါတယ်။

◾️ဒုက္ခသည်တွေ မြန်မာဆီ ပြန်ပို့မယ့် မလေးရှားရဲ့ အစီအစဉ်နဲ့ လုံးဝမပတ်သက်ကြောင်း UNHCRပြော

မြန်မာဒုက္ခသည်တွေကို နေရပ်ပြန်ပို့မယ်ဆိုတဲ့ မလေးရှား အစိုးရရဲ့ အစီအစဉ်နဲ့ ပတ်သက်ဆက်စပ်မှု လုံးဝမရှိကြောင်း ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR)က ထုတ်ပြန်ခဲ့ပါတယ်။ မလေးရှား ပြည်ထဲရေး ဝန်ကြီးဌာနက စက်တင်ဘာ ၂၉ ရက်ကျရင် ပထမအသုတ်အဖြစ် မြန်မာဒုက္ခသည် ၁,၄၇၆ ဦးကို နေရပ်ပြန်ပို့မယ်လို့ ပြီးခဲ့တဲ့ သီတင်းပတ်မှာ ပြောကြားခဲ့ပါတယ်။ အစောပိုင်းတုန်းက မလေးရှား ဝန်ကြီးချုပ် အန်ဝါ အီဘရာဟ်က အာဏာသိမ်း မြန်မာစစ်တပ်ဟာ မလေးရှားကို ရောက်နေတဲ့ ရိုဟင်ဂျာ ဒုက္ခသည် ၅,၀၀၀ ကို ပြန်လည် လက်ခံဖို့ သဘောတူထားကြောင်း မှတ်ချက်ပေးထားဖူးပါတယ်။ ပထမအသုတ် ပြန်ပို့မယ့်သူ ၁,၅၀၀ နီးပါးမှာ ရိုဟင်ဂျာဒုက္ခသည်အရေ အတွက် ဘယ်လောက် ပါဝင်မလဲ ဆိုတာကိုတော့ တိတိကျကျ မသိရပါဘူး။ မလေးရှားမှာ ရောက်ရှိခိုလှုံနေတဲ့ ရိုဟင်ဂျာဒုက္ခသည်တွေနဲ့ ဒေသခံတွေကြား ပဋိပက္ခတွေ ပေါ်ပေါက်လာတဲ့နောက် မလေးရှားအစိုးရက ရိုဟင်ဂျာဒုက္ခသည်တွေကို မြန်မာနိုင်ငံ ပြန်ပို့ဖို့ အားထုတ်လာတာ ဖြစ်ပါတယ်။ UNHCRကတော့ အဲဒီကိစ္စမှာ ပါဝင်ပတ်သက်မှု လုံးဝမရှိကြောင်း ငြင်းဆိုထားပြီး လက်ရှိ ပြည်တွင်းစစ် ဖြစ်ပွားပြီး နိုင်ငံရေး မတည်ငြိမ်တဲ့ မြန်မာဆီ ဒုက္ခသည်တွေကို ပြန်ပို့တာက သူတို့ရဲ့ လုံခြုံရေးအပေါ် ထိခိုက် ခြိမ်းခြောက်လာနိုင်တယ်လို့ သတိပေးခဲ့ပါတယ်။

◾️သံအမတ်ကြီးဦးကျော််မိုးထွန်းကို ဆက်လက်အသိအမှတ်ပြုဖို့ ဖားကန့်ပြည်သူတွေ တောင်းဆို

စက်တင်ဘာမှာ ကျင်းပမယ့် (၈၁)ကြိမ်မြောက် ကုလသမဂ္ဂအထွေထွေညီလာခံမှာ မြန်မာပြည်သူတွေကို ကိုယ်စားပြုတဲ့ မြန်မာနိုင်ငံဆိုင်ရာကုလသမဂ္ဂ သံအမတ်ကြီး ဦးကျော်မိုးထွန်းကိုဆက်လက်အသိအမှတ်ပြုဖို့ တိုက်တွန်းတဲ့ လူထုလှုပ်ရှားမှုကို ကချင်ပြည်နယ် ဖားကန့်မြို့ မှာ ဒီနေ့ ပြုလုပ်ခဲ့ပါတယ်။ ဒီလှုပ်ရှားမှုမှာ ဖားကန့်မှော်လှည့်သပိတ်အဖွဲ့နဲ့ အတူ ပြည်သူတွေလည်း ပါဝင်ခဲ့ကြပြီး သံအမတ်ကြီး ဦးကျော်မိုးထွန်းကို UN credential committee ကဆက်လက်အသိအမှတ်ပြုဖို့ တောင်းဆိုခဲ့ကြတာပါ။ “Our UN Ambassador is HE U Kyaw Moe Htun” “Our UN Ambassador HE U Kyaw Moe Htun True Voice of Myanmar”စတဲ့ စာတန်းတွေကို ကိုင်ဆောင်ပြီး လှုပ်ရှားမှုပြုလုပ်ခဲ့တာပါ။ ဒါ့အပြင် UN Credential Committee အနေနဲ့ စစ်တပ်က အမည်စာရင်းပေးထားတဲ့ သံအမတ်အတုကို အသိအမှတ်လုံးဝ မပြုဖို့လည်း တောင်းဆိုခဲ့ကြပါတယ်။

နေပြည်တော်ကလာတဲ့ အမိန့်ကို ဂရုမစိုက်တတ်တဲ့၁၀၂၇စစ်ဆင်ရေးဖိုက်တာMNDAA
က ရှမ်းမြောက်မှာ စစ်တပ်နဲ့ အုပ်ချုပ်ရေးအာဏာပြိုင်ပွဲကို အသံတိတ်စစ်မျက်နှာဖွင့်လှစ်လိုက်ပါတယ်။

နေပြည်တော်ကိုဗဟိုပြုအာဏာတည်ထားတဲ့ အာဏာသိမ်းစစ်တပ်နဲ့အထူးဒေသ(၁)ရဲ့အဓိ
ပတိ MNDAA တို့ ဒီတကြိမ်ထိပ်တိုက်တွေ့တာက ရှမ်းစော်ဘွားတွေရဲ့ ဘူမိနက်သန် သီပေါနယ်မှာပါ။ရှီကျင့်ဖျင်ငြိုငြင်မှာစိုးကြတဲ့အတွက် နှစ်ဖက်စလုံးက သေနတ်ပြောင်းဝကနေ ကျည်မထွက်ရဲပေမယ့် နယ်မြေစိုးမိုးရေးကိုကျိတ်လုပ်ရင်း အသံတိတ်ဗုံးတစ်လုံးစီကိုင်ထားကြပါတယ်။

စစ်တပ် အရှက်ကွဲခဲ့တဲ့ ၁၀၂၇ စစ်ဆင်ရေးအလွန် စစ်တပ်နဲ့ MNDAAကြားက ပြဿနာပေါင်းများစွာထဲက အခုနောက်ဆုံးတစ်ခုက ဩဂုတ်လဆန်းမှာ စတင်ပါတယ်။ သီပေါမြို့နယ်ထဲက စာသင်ကျောင်း ၁၇ ကျောင်းကို လုံခြုံရေး စိတ်မချရဘူးဆိုတဲ့အကြောင်းပြချက်နဲ့ သြဂုတ်လဆန်းပိုင်းမှာ စစ်အုပ်စုကပိတ်လိုက်ပါတယ်။အဲ့ဒီထဲမှာMNDAAထိန်း
ချုပ်ဒေသထဲက ကျောင်း ၁၀ကျောင်းပါဝင်ပါတယ်။

ဒီအမိန့်ဟာ တိုင်းမှူးအဆင့်ကမဟုတ်ဘဲ နေ
ပြည်တော်က တိုက်ရိုက်လာတာလို့ ကိုးကန့်သတင်းရင်းမြစ်တွေက ပြောပါတယ်။ ဒါကို MNDAA က အာခံလိုက်ပြီး ကျောင်းတွေကို ပြန်ဖွင့်ဖို့ စီစဉ်ပါတယ်။ အဲ့ဒီခြေအနေမှာပဲ စစ်တပ်ကသြဂုတ်လ၂၉ရက်နေ့မှာ ကျောင်းတွေလာဖွင့်ပြန်ပါတယ်။ ဒါတွေကို သီပေါမြို့က အမတ်ဦးဆောင်ပြီး ဆောင်ရွက်ခဲ့တာလို့ဒေသခံတွေကပြောပါတယ်။

သြဂုတ်လ၃၁ရက်နေ့မှာတော့ သီပေါမြို့နယ်ထဲကဆွတ်လန်း၊မြို့ဟောင်း၊ နမ့်ပျဉ်၊ကောင်းလန်း၊နားညု၊ပန်ညု၊ ဆောင်ကြဲ စတဲ့ အခြေ
ခံပညာအထက်တန်းကျောင်း (၇) ကျောင်းကို ဖွင့်လှစ်မယ်လို့ MNDAAက တရားဝင်ထုတ်ပြန်လာပါတယ်။အထူးဒေသ(၁) ပညာရေးဌာနကဒေသတွင်းပညာသင်ကြားမှုအဆက်
မပြတ်စေရေးအတွက် သိန္နီခရိုင်အတွင်းရှိ အခြေခံပညာကျောင်း တွေဆက်လက်ဖွင့်လှစ်နေတယ်လို့ ဆိုပါတယ်။

၂၀၂၅-၂၀၂၆ ပညာသင်နှစ်မှာအလက(စံလောင်း)၊ အလက (ကုန်းသာ) နဲ့ အလက (နမ့်အွန်) ကျောင်းတွေ ဖွင့်လှစ်ပေးနိုင်ခဲ့ပြီး ယခု ၂၀၂၆-၂၀၂၇ ပညာသင်နှစ်မှာ ကုံးမုံ၊ ကွန်ခိုက်၊ မြို့ဟောင်း၊ ဆွတ်လန်းနှင့် ပန်ညု ဒေသရှိ အခြေခံပညာကျောင်းတွေကို ဆက်
လက်ဖွင့်လှစ်သွားမယ်လို့ ကြေညာပါတယ်။ အဲဒီကျောင်းတွေကို လက်ရှိသင်ရိုးညွှန်းတန်းအတိုင်းသင်ဖို့MNDAA ကစီစဉ်ထားပါတယ်။

“စစ်တပ်က ပြန်ဖွင့်လိုက်တဲ့ကျောင်းတွေကို မနေ့က ကိုးကန့်အရာရှိတွေ၊ ကျောင်းဆရာတွေရောက်လာတယ်။ ဒီကျောင်းတွေကို သူတို့ဆက်ဖွင့်မယ်လို့ပြောတယ်။ ကျတော်ထင်တယ်။ စစ်တပ်ဖက်က ပညာရေးဝန်ထမ်းတွေ ပြန်ထွက်ရလိမ့်မယ်”လို့ သီပေါမြို့ခံတဦးကပြောပါတယ်။

စစ်ကောင်စီရွေးကောက်ပွဲမှာဝင်ရောက်ယှဉ်
ပြိုင်ခဲ့တဲ့သီပေါအမတ်ကလည်း မနေ့က ကျောင်းတွေဖွင့်ခဲ့ပေမယ့် ဒီနေ့တော့အခက်အခဲတချို့ရှိနေပြီး ညှိနှိုင်းနေတယ်လို့ လူမှုကွန်ရက်မှာရေးသားထားပါတယ်။ လက်
ရှိဖြစ်ပွားနေတဲ့အခြေအနေတွေနဲ့ပတ်သက်လို့ စစ်ကောင်စီရဲ့လုပ်ကိုင်ဆောင်ရွက်ပုံတွေဟာ ဒေသခံပြည်သူတွေအပေါ် စေတနာမဲ့တယ်လို့မြို့ခံတွေကဝေဖန်ပါတယ်။

“အဲဒီဒေသကကိုးကန့် ထိန်းချုပ်ထားတာဆိုပေမယ့် စစ်တပ်ကကျောင်းတွေဖွင့်ခွင့်ရထားတာကနေ လုံခြုံရေးအကြောင်းပြပြီးပိတ်လိုက်တာ။ ကလေးတွေအကုန်ဒုက္ခရောက်ကုန်တယ်။အဲ့ဒီတော့ ကိုးကန့်က ပြန်ဖွင့်မယ်လို့လုပ်ခါမှ စစ်တပ်က ‌ရောက်လာပြန်တယ်။ စေတနာရှိလို့ ကျောင်းလာဖွင့်ပေးတာမဟုတ်ဘူး။ နယ်မြေတွေလက်လွှတ်ရမှာစိုးလို့ လာဖွင့်တာ”လို့ သီပေါဒေသခံတစ်ဦးကပြောပါတယ်။

ဒီဖြစ်ရပ်ကတရုတ်အစိုးရရဲ့ ဖိအားကြောင့် အပစ်ရပ်ပြီး နယ်မြေတွေကိုထိန်းချုပ်နိုင်ရေးအတွက် တိုးတိုးကြိတ်ကြိတ်ဆွေးနွေး နေတာကနေ နှစ်ဘက်ကြား ပြဿနာတွေရှိနေတာကို လူသိရှင်ကြားဖြစ်စေတဲ့ ဒုတိယမြောက် ဖြစ်
ရပ်ပါ။လူသိခဲ့တဲ့ပထမဖြစ်ရပ်ကသီပေါ
-လားရှိုးလမ်းပိုင်းမှာရှိတဲ့ ဒုဌဝတီတံတား နယ်‌မြေလုပွဲပါ။



https://www.ludunwayoo.com/feature-mm/2026/09/01/167147/

ရန်ကုန်မြို့ရဲ့ အ​ခြေခံကုန်​ဈေးနှုန်း​တွေ

People's Spring

ရန်ကုတ်မြို့ရဲ့ အ​ခြေခံ​ဈေးနှုန်း​တွေဟာ စစ်တပ်အာဏာမသိမ်းခင်ကနဲ့ နှိုင်းယှဥ်ရင်
သုံး ၊​လေးဆက​နေ ၁၀ ဆ​ကျော်အထိ ​ဈေး​တွေတက်လာတာကို​တွေ့ရပါတယ် ။

#ကုန်​ဈေးနှုန်း #ရန်ကုန် #လူထု​​နွေဦး

မန္တလေးမြို့က ရပ်ကွက်ဓမ္မာရုံတစ်ခုမှာ လူ
လတ်ပိုင်းအမျိုးသမီးတွေနဲ့လူကြီးပိုင်း အမျိုး
သမီးကြီးတွေ စုဝေးကာ ထိုင်နေကြတယ်။ သူတို့ဘေးနားမှာတော့ အရွယ်ကောင်း သား
ယောကျာ်းလေးတချို့ကပ်ထိုင်နေတယ်။ စစ်
မှုထမ်းမဲနှိုက်ဖို့အတွက် သားအမိတွေ ရောက်
လာကြတာပါ။ သားတွေကော မိခင်တွေပါ မျက်နှာတွေ မကောင်းလှဘူး။

အသက် ငါးဆယ်ကျော်အရွယ် မိခင်တစ်ယောက်ဆိုရင် စကားတောင်မပြောနိုင်ဘူး။ သူ့သားကလေး နံပါတ်စဥ် စောစောမပေါက်ရအောင် ရသမျှ ဘုရားစာတွေ တတွတ်တွတ် ရွတ်ဆိုနေခဲ့တယ်။နာမည်ခေါ်လိုက် အမှတ်စဥ် အော်လိုက် အသံကြားထဲမှာ မိခင်တွေဟာ ရင်တွေ ဗလောင်ဆူနေခဲ့ပါတယ်။

မန္တလေးမြို့မှာ သားတွေ စစ်မှုထမ်းဖို့ မိခင်တွေကိုယ်တိုင် မဲနှိုက်ပေးနေရပြီး မိခင်တွေ စိတ်သောကရောက်နေရကြောင်း ဒေသခံတွေက ပြော​ပါတယ်။

“နံပါတ်စဥ် စောကျတဲ့သူတွေဆို မအေတွေ ငိုယိုနေကြတာ”လို့ မဲနှိုက်ခဲ့တဲ့ရပ်ကွက်တစ်ခုက မိခင်တစ်ဦးက ဆိုပါတယ်။ ဒါ့အပြင် ရောဂါအခံရှိတဲ့ မိခင်တွေဆိုရင် သွေးတိုးတာ၊ မူးလဲကျတာတွေပါ ဖြစ်ပွားနေတယ်လို့ ဒေသ
ခံတွေက ပြောပါတယ်။

သြဂုတ်လမှာ မန္တလေးမြို့က ချမ်းမြသာစည် နဲ့ အမရပူရမြို့နယ်တွေမှာ ရပ်ကွက်တိုင်းနီး
ပါးစစ်မှုထမ်းဖို့ မဲနှိုက်နေရပြီးမိခင်တွေကိုယ်
တိုင် မဲနှိုက်ပေးနေရတဲ့အတွက် စိတ်သောကတွေရောက်နေရတာပါ။လာ​ရောက်မဲနှိုက်ခြင်းမရှိတဲ့ မိဘတွေကိုတော့ ၎င်းတို့ကိုယ်စား ကျေးရွာအုပ်ချုပ်ရေးအဖွဲ့က မဲနှိုက်သွားမယ်လို့ ကြေညာ ခြိမ်း​ခြောက်ပါတယ်။ မိခင်တွေလည်း သွားလည်းနားမထောင်ရဲသလို မသွားရင်လည်း ဖြစ်ချင်သလိုဖြစ်သွားမှာ စိုးရိမ်ကြတာကြောင့်အရဲစွန့်သွားခဲ့ကြရတယ်လို့ မိခင်တွေက ပြောပါတယ်။

မဲနှိုက်တဲ့အခါ ပြည်တွင်းမှာရှိတဲ့သား​တွေအပြင် ပြည်ပ​ရောက်​နေတဲ့ သား​တွေအတွက်ပါစစ်တပ်က ဖိအား​ပေး မဲနှိုက်ခိုင်း​နေတာပါ။

အာဏာသိမ်းစစ်တပ်ဟာရပ်ကွက်တွေထဲ စစ်မှုထမ်း မဲနှိုက်တာအပြင် ပေါ်တာဆွဲတာကိုလည်း မရပ်ပါဘူး။ မန္တလေးမြို့ပေါ်မှာနေ့ရောညပါ စစ်မှုထမ်း (စမထ) ဆွဲဖမ်းဆီးမှုများပြားနေပြီးအရင်လိုငွေပေးရွေးရန်မလွယ်ကူတော့ဘူးလို့စုံစမ်းသိရပါတယ်။အိမ်စီကားတွေနဲ့ ပြန်ပေးဆွဲသလို ဖမ်းဆီးနေကြောင်း မြို့ခံတစ်ဦးက ပြောပါတယ်။

စစ်အုပ်စုဟာ မန္တလေးတိုင်းထဲက ဝမ်းတွင်း၊ ညောင်ဦး၊ကျောက်ပန်းတောင်းနဲ့ရန်ကုန်တိုင်း
ကမြို့နယ်တွေမှာလည်းပေါ်တာဆွဲမှု​တွေဆက်တိုက်ပြုလုပ်နေ​တာပါ။

https://www.ludunwayoo.com/feature-mm/2026/09/02/167196/

ရုရှားအစိုးရကဆောင်ရွက်မယ့်ထားဝယ်အ
ထူးစီးပွားရေးဇုန် (Dawei Special Economic Zone-SEZ) စီမံကိန်းအနီးတစ်ဝိုက်မှာ စစ်ကောင်စီကအကြီးစားစစ်ဆင်ရေးတွေလုပ်နေပြီး အရပ်သားတွေကို ဖမ်းဆီးသတ်ဖြတ်နေလို့ ဒေသခံထောင်ပေါင်းများစွာ ထွက်ပြေးနေကြရတယ်လို့ Fortify Rightsက ထုတ်ပြန်ပါတယ်။

တနင်္သာရီတိုင်း၊ ရေဖြူမြို့နယ်ရှိ အဲ့ဒီစီမံကိန်းနယ်မြေတစ်ဝိုက်မှာ အရပ်သားတွေကို ဖမ်း
ဆီးညှဉ်းပန်းနှိပ်စက်ခြင်း၊သတ်ဖြတ်ခြင်းနဲ့ ကျေးရွာတွေ၊ နေအိမ်တွေကိုမီးရှို့ဖျက်ဆီးနေတယ်လို့Fortify Rightsအဖွဲ့ကသက်သေအ
ထောက်အထားတွေနဲ့အတူစုံစမ်းဖော်ထုတ်လိုက်တာပါ။

၂၀၂၆ ခုနှစ် ဇူလိုင်လအတွင်း လူသားချင်းစာနာထောက်ထားမှု အကူအညီပေးနေတဲ့ The Ants အဖွဲ့ဝင် သုံးဦးအပါအဝင် အနည်း
ဆုံး အရပ်သား ငါးဦး သတ်ဖြတ်ခံရပြီး ဒေ
သခံထောင်ပေါင်းများစွာ နေရပ်စွန့်ခွာ ထွက်
ပြေးခဲ့ရတယ်လို့ ​ဖော်ပြထားပါတယ်။

The Ants (Humanitarian Aids Team-
Tanintharyi ) အဖွဲ့က အဖွဲ့တာဝန်ခံ ကိုအယ်သာ၊ ဘဏ္ဍာရေးမှူး ကိုလီယွန်၊ စီမံကိန်း ညှိ
နှိုင်းရေးမှူး ကိုသားငယ်နဲ့ ဒေသခံအမျိုးသားတစ်ဦးကို စစ်အုပ်စုက ဇူလိုင်လ ၉ ရက်မှာ ဖမ်းဆီးသွားပြီး သတ်ဖြတ်တာလို့ ဖြစ်စဉ်ကို သိရှိသူတွေက ပြောပါတယ်။ဒီဖြစ်စဉ်နဲ့ပတ်
သက်လို့ Fortify Rightsကလည်း သက်သေ
၄ ဦးကို တွေ့ဆုံမေးမြန်းပြီး စုံစမ်းဖော်ထုတ်အတည်ပြုထားပါတယ်။

The Antsအဖွဲ့ကိုဒေသခံလူငယ်တွေက ၂၀၂၄ ခုနှစ်အောက်တိုဘာလတွင် ဖွဲ့စည်းခဲ့ပြီး စစ်ဘေးရှောင်ပြည်သူတွေကို အရေးပေါ်ကူညီထောက်ပံ့ခြင်း၊ မြေမြှုပ်မိုင်းနဲ့ လေ
ကြောင်းတိုက်ခိုက်မှုအန္တရာယ်များအကြောင်း အသိပညာပေးခြင်းတွေ လုပ်ဆောင်နေတဲ့အဖွဲ့ဖြစ်ပါတယ်။

“ကျွန်တော်ကိုယ်တိုင်အလောင်းတွေကို မြင်ခဲ့တာ။သူတို့လည်ပင်းတွေ လှီးခံထားရတယ်။ မျက်နှာတွေကလည်းရိုက်ခံထားရလို့ ကြေမွနေတာပဲ။သူတို့အမြဲဝတ်နေကျအဝတ်အစားတွေကိုကြည့်ပြီးတော့ပဲ ဘယ်သူဘယ်ဝါဆိုတာ ခွဲခြားနိုင်ခဲ့တာ” လို့ ကိုအယ်သာအပါ
အဝင်လေးဦးသတ်ဖြတ်ခံရမှုနဲ့ပတ်သက်ပြီး CDM ကျောင်းဆရာတစ်ဦးဖြစ်သူလီယိုက Fortify Rightsကို ထုတ်ဖော်ပြောကြားခဲ့ပါတယ်။

အရပ်သားတစ်ဦး သတ်ဖြတ်ခံရမှုနဲ့ပတ်သက်ပြီးလည်း ကိုလီယိုက “သူ့ကို တခြားရွာတစ်ရွာကနေ ဖမ်းလာပြီးPDFယူနီဖောင်းဝတ်ပေးထားတာ။သူက အနောက်ဆန်းချီရွာက ရွာသားပါ။ ခြံတစ်ခြံမှာ အလုပ်လုပ်တယ်။ သူ့ကို ကြိုးတုပ်ထားပြီး နားကို သေနတ်နဲ့ ပစ်သတ်ထားတာ” လို့ ထပ်မံပြောဆိုထားပါတယ်။

ဒီဖြစ်စဉ်မှာ The Ants အဖွဲ့ဝင် သုံးဦး ဆက်လက်ဖမ်းဆီးခံထားရဆဲဖြစ်တယ်လို့ Fortify Rights က ဖော်ပြထားပါတယ်။ The Ants အဖွဲ့ဝင်တွေ ဖမ်းဆီးခံရချိန်က လက်ပ်တော့၊ ဖုန်းနဲ့ အလုပ်ဆိုင်ရာအချက်အလက်တွေ သိမ်းထားတဲ့ အီလက်ထရွန်နစ်ပစ္စည်းတွေလည်းစစ်တပ်လက်ထဲပါသွားလို့နောက်
ဆက်တွဲလုံခြုံရေးအခြေအနေကိုစိုးရိမ်နေရတယ်လို့ ပြန်လည်လွတ်မြောက်လာသူတွေကပြောထားပါတယ်။



https://www.ludunwayoo.com/feature-mm/2026/09/02/167234/

ရွှေကူ-ဗန်းမော်ကြားတိုက်ပွဲ စစ်သင်္ဘော ၃စီး တိုက်ခိုက်သိမ်းပိုက်ပြီး ၂စီး အလံဖြူထောင်၊ စစ်သုံ့ပန်း ၁၀၀ ကျော် ဖမ်းမိဟု KIA ပြော

စက်တင်ဘာ ၃၊ ၂၀၂၆။ ထားမြတ်/People’s Spring

ရွှေကူမြို့ကနေ ဗန်းမော်မြို့ကိုဆန်တက်လာတဲ့ စစ်တပ်ရဲ့ စစ်သင်္ဘောအချို့ကို KIA ပူးပေါင်းတပ်များက တိုက်ခိုက်သိမ်းပိုက်ခဲ့ကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနက စက်တင်ဘာ ၂ရက်ညပိုင်းမှာ သတင်းဖော်ပြပါတယ်။

စစ်တင်ဘာ ၂ရက်က ဆန်တက်လာတဲ့ စစ်သင်္ဘောတွေကို ရွှေကူမြို့နယ် ဇင်းဘုံကျေးရွာ နဲ့ ဗန်းမော်မြို့နယ် စင်းခန်းတံတား အကြားမှာ တိုက်ခိုက်ခဲ့ရာ စစ်သင်္ဘော ၁စီးရေထဲမြုပ်သွားပြီး ၁စီး မီးလောင်ပျက်စီးသွားကြောင်း ၊စင်းခန်း တံတားအောက်မှာ စစ်သင်္ဘော ၁စီးထပ်မံ တိုက်ခိုက်ခံရပြီး နောက်ထပ် သင်္ဘော ၂စီးကလည်း ကမ်းစပ်နားကပ်လာကာ အလံဖြူထောင် အဖမ်းခံလိုက်ရကြောင်း ဖော်ပြခဲ့တာပါ။

ဒ့ါအပြင် လုံခြုံရေးယူပေးတဲ့ စစ်တပ်ရဲ့ စပိဘုတ် ၂ စီးကိုလည်း KIA ပူးပေါင်းတပ်များက စင်းခန်းတံတားအထက် မြလယ်နားမှာ လိုက်လံပစ်ခတ်တိုက်ခိုက်ခဲ့တယ်လို့ ဆိုပါတယ်။

စစ်သင်္ဘောမှာ လိုက်ပါလာတဲ့ စစ်သုံ့ပန်း ၁၀၀ ကျော်ကိုလည်း KIA ပူးပေါင်းတပ်များက ဖမ်းဆီးရမိထားတယ်လို့ အတည်ပြုပါတယ်။

ရွှေကူနဲ့ စင်းခန်းတံတားအကြား ဇင်းဘုံကျေးရွာမှာ နေရာယူထားတဲ့ စစ်တပ်ကို KIA ပူးပေါင်းတပ်က ဩဂုတ် ၂၉ရက်နဲ့ ၃၀ရက်မှာ တိုက်ခိုက်မောင်းထုတ်နိုင်ခဲ့ကြောင်းဖော်ပြပါတယ်။

ဇင်းဘုံကျေးရွာက ဒုတိယမြစ်ကျဉ်း အရှေ့ဘက်ကမ်းမှာ တည်ရှိပြီး စစ်တပ်ရဲ့ အမြဲတမ်း အခြေစိုက်စခန်းမဟုတ်ဘဲ မြစ်ကြောင်းအတိုင်း ဆန်တက်လာမယ့် စစ်သင်္ဘောတွေ လုံခြုံရေးအတွက် ရွှေကူမြို့ဘက်ကနေ စက်လှေငယ်တွေနဲ့ အင်အားဖြည့်တင်းကာ အခိုင်အမာနေရာယူထားတဲ့ စခန်း ဖြစ်တယ်လို့ ဆိုပါတယ်။

စစ်တပ်ဟာ သင်္ဘောလမ်းကြောင်းပွင့်ရေးအတွက် ဩဂုတ် ၃၀ရက် တရက်တည်းမှာ ဒုတိယမြစ်ကျဉ်း အရှေ့ဘက်နဲ့ အနောက်ဘက် မြစ်ကမ်းဘေးတလျှောက်ကို လေကြောင်းက ဗုံး ၂၈ကြိမ် ကြဲချတိုက်ခိုက်ခဲ့ကြောင်းလည်း ဖော်ပြပါတယ်။

KIA ပူးပေါင်းတပ်ဟာ ကချင်ပြည်နယ်ကို ရေကြောင်းအတိုင်း အင်အားဖြည့်လာတဲ့ စစ်ကောင်စီတပ်ရဲ့ သင်္ဘောအုပ်စုကို အခုနှစ်မှာ မနှစ်ကထက် ပိုမိုအထိနာအောင် တိုက်ခိုက်နိုင်ခဲ့တယ်လို့ KIA စစ်ရေးသတင်းတွေ ဖော်ပြနေတဲ့ 7Stars News ရဲ့စက်တင်ဘာ ၂ရက် အသိပေးထားပါတယ်။

၂၀၂၅မှာ စစ်တပ်က ဗန်းမော်စစ်မျက်နှာကို စစ်ကူရိက္ခာများပို့ဆောင်စဉ် စစ်သင်္ဘော ၅စီးကို ပစ်ခတ်ဖျက်ဆီးနိုင်ခဲ့ပြီး အခု ၂၀၂၆ မှာတော့ စစ်တပ်သင်္ဘော ၉စီးအထိ ပစ်ခတ်ဖျက်ဆီးနိုင်ခဲ့တယ်လို့ ဖော်ပြထားပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar
#စစ်သင်္ဘောအုပ်စု#KIA#စစ်သုံ့ပန်း