ရသေ့တောင်က စစ်တပ်ဗုံးကြဲတဲ့နေရာအနီးက နွားတွေ ရုတ်တရက် သေဆုံးနေ

▪️မသင်္ကာဖွယ်ရာဖြစ်ရပ်အဖြစ် သတ်မှတ်ပြီး စစ်ဆေးနေကြောင်း AA ကျန်းမာရေးဌာန ထုတ်ပြန်

ဩဂုတ် ၂၄၊ ၂၀၂၆။ ခိုင်မြတ်/ People's Spring

ရသေ့တောင်မြို့နယ်အတွင်း စစ်တပ်က ဗုံးကြဲချခဲ့တဲ့ နေရာတွေနဲ့ ပတ်ဝန်းကျင်အနီး စားကျက်တွေမှာ လွှတ်ထားတဲ့ နွားတွေအကြောင်းအရင်းမရှိဘဲ ရုတ်တရက် တကောင်ပြီး တကောင် သေဆုံးနေတာကြောင့် အကြောင်းအရင်းကို စစ်ဆေးနေတယ်လို့ အာရက္ခတပ်တော် (AA)ရဲ့ကျန်းမာရေးဌာနက ဩဂုတ် ၂၅ ရက်မှာ ထုတ်ပြန်ပါတယ်။

အရင်က အဲဒီနေရာတွေမှာ အခုလို တိရစ္ဆာန်တွေ သေဆုံးတဲ့ ဖြစ်စဉ်မျိုးမရှိခဲ့ဘဲ စစ်တပ်ဗုံးကြဲပြီးနောက်မှသာ အဲဒီ ဝန်းကျင်စားကျက်တွေမှာ တွေ့လာရတာလို့ ဆိုပါတယ်။

အခုလို နွားတွေသေဆုံးနေရတာနဲ့ပက်သက်လို့ AA ကျန်းမာရေးဌာန၊ မှုခင်းရေးရာ ဆေးပညာဌာနခွဲအနေနဲ့ ထူး ခြားဖြစ်စဉ်၊ မသင်္ကာဖွယ်ရာ ဖြစ်ရပ်တခုအဖြစ်သတ်မှတ်ပြီး အထူးဂရုပြုစစ်ဆေးနေကာ သေဆုံးရတဲ့အကြောင်းအ ရင်းကို စစ်ဆေးအဖြေရှာဖွေ၊ ထုတ်ပြန်သွားမယ်လို့ AA ကျန်းမာရေးဌာနက ဆိုပါတယ်။

“ဗုံးကနေတဆင့် ဓါတုအဆိပ်သင့်တာ ဖြစ်နိုင်တယ်။ ဗုံးကြဲပြီး ကျန်ခဲ့တဲ့ အဆိပ်ငွေ့တွေ လေထဲပြန့်သွားတာ၊ ယမ်း မှုန့်တွေ၊ ခဲဓါတ်တွေ စားကျက်ထဲပြန့်သွားတာတွေပေ့ါ။ နောက် အစာအိမ်လမ်းကြောင်းဆိုင်ရာရောဂါတွေကြောင့် လည်း သေနိုင်တယ်။ မြက်နုတွေထဲမှာ နိုက်ထရိတ်ဓါတ်အလွန်များပြီးတော့ အဆိပ်သင့်တာမျိုး” လို့ တိရိစ္ဆာန် ဆေးကုဆရာဝန်တဦးက ပြောပါတယ်။

လက်ရှိမှာ စစ်တပ်က ရခိုင်ပြည်နယ်ကို လေကြောင်းကနေ ဗုံးကြဲတိုက်ခိုက်တာ၊ လက်နက်ကြီးနဲ့ပစ်ခတ်တာတွေနေ့စဉ်နဲ့အ မျှ လုပ်ဆောင်နေပြီး ဗုံးကြဲချခံရတဲ့နေရာတွေမှာ ဗုံးသီးထဲ ပါဝင်တဲ့ ယမ်းတွေဟာ မိုးရာသီဖြစ်တဲ့အတွက် မိုးရေနဲ့ အတူ ပတ်ဝန်းကျင်နေရာတွေကိုပျံ့နှံ့ ရောက်ရှိသွားတတ်ကြောင်း၊ ဗုံးကြဲဖြစ်စဉ်တွေဖြစ်ပြီးတဲ့နောက် အဆိပ် သင့် မှုဖြစ်စဉ်တွေ ဖြစ်လေ့ဖြစ်ထရှိတတ်ကြောင်း AA ကျန်းမာရေးဌာန ထုတ်ပြန်ချက်မှာ ပါရှိပါတယ်။

အခုလိုမျိုး ကျွဲ၊နွား တိရစ္ဆာန်တွေသေဆုံးနေတာတွေ့ခဲ့ရင် နီးစပ်ရာအုပ်ချုပ်ရေးဌာန၊ DLEPS(ရဲ)ဌာနတို့ကို ချက် ချင်း အကြောင်းကြားကြဖို့နဲ့ လေကြောင်းတိုက်ခိုက်ခံရတဲ့နေရာအနီးတဝိုက်က အသီးအနှံ၊ စားသောက်ဖွယ်ရာ တွေကို စားသောက်တာ၊ ကျွဲ၊ နွား၊ ဆိတ်၊ ဝက်၊ ကြက်စတဲ့တိရစ္ဆာန်တွေကို ဗုံးကြဲခံရတဲ့နေရာတွေအနီး လွှတ် ကျောင်းတာ မလုပ်ကြဖို့လည်း တိုက်တွန်းထားပါတယ်။
စစ်တပ်ဟာ ရခိုင်ပြည်နယ်အတွင်းက မြို့နယ်တွေကို နေ့စဉ်နီးပါး လေကြောင်းကနေ ဗုံးကြဲတာတွေ လုပ်နေပြီး အပြစ်မဲ့အရပ်သားတွေနဲ့ ကျွဲ၊ နွားတိရစ္ဆာန်သေဆုံးရမှုတွေ ဆက်တိုက်ရှိနေတာပါ။

ကရင်နီပြည်နယ် ဒီမော့ဆိုမြို့နယ်အနောက်ခြမ်းမှာလည်း ပြီးခဲ့တဲ့ ၂၀၂၅ မေလအတွင်းက စစ်တပ်ဗုံးကြဲမှု ကြောင့် ဗုံးကြဲပြီးနာရီပိုင်းအတွင်း ဒေသခံအချို့ မူးဝေတာ၊ အန်တာစတဲ့ အဆိပ်သင့်မှုတွေ ခံစားခဲ့ကြရတယ်လို့ ဒေသခံတွေက ပြောထားကြပါတယ်။

ဒ့ါအပြင် ရှမ်းပြည်နယ်တောင်ပိုင်း မိုးဗြဲမြို့တိုက်ပွဲအတွင်းမှာလည်း စစ်တပ်က အဆိပ်ငွေ့ဗုံးတွေအသုံးပြုတိုက် ခိုက်ခဲ့တဲ့အပြင် မြို့အနီးချောင်းနဲ့ မြောင်းတွေမှာ အဆိပ်ရည်တွေထည့်ထားခဲ့တယ်လို့ ကရင်နီပူးပေါင်းတပ်ဖွဲ့ဝင်တွေက ပြောထားပါတယ်။

(ရသေ့တောင်မှာ သေဆုံးနေတဲ့ နွားတွေကို တွေ့ရစဉ်။ ဓာတ်ပုံ - APM)

သရက်ချောင်းမြို့နယ်က ဒေသခံတွေရဲ့ ကားနဲ့ ဆိုင်ကယ်တွေ စစ်တပ် သိမ်းယူ၊ နေအိမ်တွေ မီးရှို့

ဩဂုတ် ၂၆၊ ၂၀၂၆။ ထားမြတ်/People’s Spring

တနင်္သာရီတိုင်း၊ သရက်ချောင်းမြို့နယ်က ကျေးရွာတွေကို စစ်ကြောင်းထိုးလာတဲ့ စစ်တပ်ဟာ ဒေသခံတွေပိုင်ဆိုင်တဲ့ ကားအချို့နဲ့ ဆိုင်ကယ်တွေကို ယူဆောင်သွားသလို နေအိမ်အချို့ကိုလည်း မီးရှို့ဖျက်ဆီးခဲ့ကြောင်း ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က သတင်းထုတ်ပြန်ပါတယ်။

ဩဂုတ် ၁၀ရက်ကနေ ၂၀ရက် အတွင်း စစ်တပ်က သရက်ချောင်းမြို့နယ်က ကျေးရွာတွေကို စစ်ကြောင်းထိုး တာ၊ လူ့အခွင့်အရေးချိုးဖောက်မှုတွေ ကျူးလွန်တာ စတဲ့ အခြေအနေတွေကို အသိပေးဖော်ပြထားတာဖြစ်ပါတယ်။

စစ်တပ်ဟာ သရက်ချောင်းမြို့နယ် တောင်ဇင်းကျေးရွာအုပ်စုအတွင်းရှိ ရှင်မုတ္ထီး၊ ရောင်းမော်ရွာမှတစ်ဆင့် ဆေးဖြတ်ကုန်းရွာ၊ ကင်းရှေ့ရွာ၊ မိုးရွှေကုန်းရွာ၊ စော်ဖျားရွာ၊ ကျောက်လှေကားရွာ၊ ကထီးဝရွာ၊ ထီးဖဒို(ပဒတ်ချောင်း)ရွာ၊ လော်မူဖ(လောင်းမင်းဘ)ရွာ တို့အတွင်းသို့ စစ်ကြောင်းထိုး ဝင်ရောက်လာခဲ့ပြီး ပြည်သူလူထုများအား ရန်သူ သဖွယ်ပစ်မှတ်ထားတိုက်ခိုက်တာ၊ လူသားဒိုင်းအဖြစ် ဖမ်းဆီးတာတွေ လုပ်ဆောင်ခဲ့ကြောင်း ဖော်ပြပါတယ်။

ပြည်သူတွေကို ဖမ်းဆီးပြီး လမ်းပြခိုင်းတာ၊ ထမင်းချက်ခိုင်းတာတွေ စစ်တပ်က လုပ်ဆောင်ခဲ့တယ်လို့ ဆိုပါတယ်။

ဒါ့အပြင် ထီးဖဒို(ပဒတ်‌ ချောင်း)ရွာအတွင်းရှိ ပြည်သူပိုင် ကား ၂စီး၊ ထော်လာဂျီ ၂စီး၊ ဆိုင်ကယ် အစီး (၃၀)တို့အား ယူဆောင်သွားသလို ကထီးဝကျေးရွာ အတွင်းရှိ နေအိမ် (၁)လုံးနဲ့ ကျောက်လှေကားကျေးရွာအတွင်းရှိ နေအိမ် (၄)လုံး တို့အား မီးရှို့ဖျက်ဆီးခဲ့ကြောင်း ထုတ်ပြန်ပါတယ်။

စစ်တပ် လက်နက်ကြီးပစ်ခတ်မှုကြောင့် ကျောက်လှေကားရွာက နေအိမ် ၁လုံး ပျက်စီးခဲ့ကြောင်းလည်း ဖော်ပြပါတယ်။

အာဏာသိမ်းစစ်တပ်ဟာ အာဆီယံဘုံသဘောတူညီချက်ကို လိုက်နာဆောင်ရွက်ခြင်း မရှိဘဲ နိုင်ငံတစ်၀န်းရှိ အပြစ်မဲ့ အရပ်သားပြည်သူများကို လေယာဉ်များ၊ ဒရုန်းများ၊ လက်နက်ကြီးများဖြင့် တိုက်ခိုက်တာ၊ အရပ်သားပြည်သူတွေကို ဖမ်းဆီးသတ်ဖြတ်တာတွေ နေ့စဉ်နဲ့အမျှ ကျူးလွန်လျက်ရှိကြောင်းလည်း KNUက ထုတ်ပြန်ပါတယ်။

ဓာတ်ပုံ - KNU - Mergui-Tavoy District

ပုသိမ်ကြီးမှာ ကိုရင်နဲ့သံဃာအပါး ၇၀ ကျော် အစာအဆိပ်သင့်

သြဂုတ် ၂၆၊ ၂၀၂၆။ မေရီ/People's Spring

မန္တလေးမြို့၊ ပုသိမ်ကြီးမြို့နယ်၊ ပေါက်စိမ်းသာမဏေကျော်စာသင်တိုက်မှာ အစာအဆိပ်သင့် မှုဖြစ်လို့ ကိုရင်တွေနဲ့သံဃာအပါး ၇၀ ကျော် ဆေးရုံပို့ထားရ​ကြောင်း ဒေသခံတွေက ပြောပါတယ်။

ဒီကနေ့ သြဂုတ် ၂၆ ရက် မနက်ပိုင်းက မန္တလေးမြို့၊ ပုသိမ်ကြီးမြို့နယ်၊ အုန်းချောကျေးရွာရှိ ပေါက်စိမ်းသာမဏေကျော်ကျောင်းမှာ စာသင်သား ကိုရင်တွေနဲ့ သံဃာတော်တွေ ဆွမ်းဘုဥ်းပေးစဥ် အစာအဆိပ်သင့်မှုဖြစ်ပွားခဲ့ကြောင်း ဒေသခံတွေက ပြောပါတယ်။

"ဆေးရုံပို့ရတဲ့အထဲ ကိုရင်အပါး ၃၀ ကျော်ပါတယ်။ တစ်ကျောင်းလုံးနီးပါး ဖြစ်တာပြောတယ်"လို့ ဒေသခံတစ်ဦးက ပြောပါတယ်။

အဲဒီအစာအဆိပ်သင့်မှုကြောင့် မန္တလေးဆေးရုံကြီးကို အပါး၃၀၊ ကျောက်မီးတိုက်နယ်ဆေးရုံမှာ ၄၆ပါး ပို့ထားရပြီး မစိုးရိမ်ရဘူးလို့ မြန်မာနိုင်ငံလူမှုကယ်ဆယ်ရေးအဖွဲ့ (မန္တလေး)ထံက သိရပါတယ်။

အဆိုပါ စာသင်တိုက်မှာ စာသင်သား ၁၆၀ ကျော်ရှိတယ်လို့ သိရပါတယ်။ အစာအဆိပ်သင့်မှူ ဖြစ်ပွားရတဲ့အကြောင်းရင်းကိုတော့ မသိရသေးပါဘူး။

ညောင်တုန်းရေကာတာ အိကျလို့ လူအင်အားထောင်ချီသုံးပြီး အရေးပေါ် ပိတ်ဆို့နေရ

▪️ဧရာဝတီတိုင်းမှာ ၁လခန့်အတွင်း ၄ခုမြောက်ရေကာတာ အန္တရာယ်ကြုံရခြင်းဖြစ်

ဩဂုတ်-၂၆၊၂၀၂၆။ဇော်ရမ်း/People's Spring

ဧရာဝတီတိုင်း ၊ ညောင်တုန်းမြို့နယ်က ရေကာတာ အိကျပြီးကျိုးကျမယ့်အန္တရာယ်ကြောင့် လူအင်အားထောင်ချီသုံးပြီး အရေးပေါ် ပိတ်ဆို့နေရပါတယ်။

မအူပင်ခရိုင်၊ ညောင်တုန်းမြို့နယ်၊ ချောင်ဖျားကျေးရွာမှာရှိတဲ့ ညောင်တုန်းကျွန်းတာ(ဧရာဝတီမြစ်ခွဲ) ဆည်မြောင်းရေကာတာဟာ ဩဂုတ် ၂၅ရက်နံနက်ပိုင်းမှာ အိပဲ့ကျလာလို့ အဲဒီနေရာကိုရောက်ရှိနေတဲ့လူမှုရေးအဖွဲ့တွေက ပြောပါတယ်။

အလျား ပေ၃၀၀ပေ၊ အနံပေ ၆၀ခန့်အထိ အိကျသွားလို့ စိုးရိမ်စရာအခြေအနေဖြစ်တယ်လို့ ဆိုပါတယ်။

"အိကျတာသိသိချင်း သဲအိတ်တွေချတာ။ဧရာဝတီတိုင်းနဲ့ ရန်ကုန်တိုင်းကလူရေးအဖွဲ့တွေလည်းရောက်လာတယ်။ ဒေသခံတွေလည်းအင်အားများများနဲ့လုပ်နေတယ်။ စုစုပေါင်းအင်အား၂၀၀၀လောက်ရှိတယ်။ အခုထိ အရေးပေါ်လုပ်နေရတဲ့အခြေအနေဖြစ်ပါတယ်" လို့ အရပ်ဖက်ကူညီရေးအဖွဲ့တာဝန်ရှိသူတစ်ဦးက ဒီနေ့သြဂုတ်လ၂၆ရက်မနက်ပိုင်းမှာ ပြောပါတယ်။

အဲဒီရေကာတာဟာ ရေဝဲတိုးမှုကြောင့် တာအိပဲ့ကျမှုဖြစ်ပွားတာလို့ စစ်တပ် လက်အောက်ခံ ဧရာဝတီတိုင်းအစိုးရက သတင်းထုတ်ပြန်ထားပါတယ်။

လက်ရှိ အိကျနေတဲ့ဟာ ကျိုးပေါက်ရင် ညောင်တုန်းမြို့နယ်၊ မအူပင်မြို့နယ်နဲ့ ရန်ကုန်တိုင်း လှိုင်သာယာမြို့နယ်အထိ ရေဝင်ရောက်နိုင်တယ်လို့ဒေသခံတွေက ပြောပါတယ်။

ယခုဖြစ်ရပ်ဟာ ဧရာဝတီတိုင်းအတွင်းမှာ ဇူလိုင်လကုန်နဲ့ ဩဂုတ်နောက်ဆုံး ရက်သတ္တပတ် အအတွင်း လေးခုမြောက် ရေကာတာခြိမ်းခြောက်မှုအန္တရာယ် ဖြစ်ပါတယ်။

ဧရာဝတီတိုင်း လေးမျက်နှာမြို့မှာ ပြီးခဲ့တဲ့ဇူလိုင် ၃၀ရက်က ငဝန်မြစ်ရေကာတာ အိကျရာကနေ ကျိုးကျသွားပြီး လေးမျက်နှာမြို့နယ်အပြင် ဟင်္သာတ၊ ရေကြည်၊ ကျုံပျော်၊ ကျောင်းကုန်းနဲ့ ငါးသိုင်းချောင်းမြို့နယ်တွေမှာ ရေဘေးကြုံတွေ့နေပါတယ်။

သြဂုတ်လဆန်းပိုင်းမှာ မြန်အောင်မြို့၊ အမှတ်(၁)ရပ်ကွက်အနီးက အုတ်နံရံနဲ့ကာထားတဲ့ ရေကာတာကနေလည်း မြစ်ရေကျော်နေလို့ သဲအိတ်တွေနဲ့ အရေးပေါ် ပိတ်ဆို့ကာရံခဲ့ရပါတယ်။

ဇလွန်မြို့၊ ညောင်ပင်သာရွာက ရေကာတာကိုလည်း လူအင်အားထောင်ချီသုံးပြီး သဲအိတ်တွေနဲ့ ကာရံခဲ့ရပါတယ်။

လေးမျက်နှာမြို့က ငဝန်မြစ်ရေကာတာ စတင်အိကျခဲ့စဉ် ကြိုတင်သတင်းပို့ခဲ့ပေမယ့် စစ်တပ် လက်အောက်ခံဌာနဆိုင်ရာတွေက လုံလောက်တဲ့ကြိုတင်ကာကွယ်ရေးမလုပ်ဆောင်ခဲ့တဲ့အတွက် ကျိုးကျခဲ့တယ်လို့ ဒေသခံတွေက ပြောပါတယ်။

ရေ‌ဘေးကြိုတင်ကာကွယ်ရေးနဲ့ကယ်ဆယ်ရေးအတွက် စစ်တပ်က အရည်အချင်းမမီဘူးလို့ ဒေသခံတွေက ဝေဖန်နေ ကြပေမယ့် အာဏာသိမ်းစစ် ခေါင်းဆောင်မင်းအောင်လှိုင်ကတော့ ဧရာဝတီတိုင်းအစိုးရအဖွဲ့ဟာ ရေဘေးကြိုတင်ကာကွယ်ရေးကို သေချာလုပ်ဆောင်နိုင်ခဲ့တယ်လို့ ပြောထားပါတယ်။

ဒါပေမယ့် ရေဘေးဟာပိုမို ဆိုးရွားလာပြီး ဟင်္သာတ၊ရေကြည်၊ငသိုင်းချောင်း၊ ကျုံပျော်၊ ကျောင်းကုန်း၊ သာပေါင်းမြို့နယ်တွေအထိ ရေတွေဝင်ရောက်လာလို့ ရေကြီးနှစ်မြုပ်တဲ့ဧရိယာ ပိုမိုကျယ်ပြန့်နေပါတယ်။

လက်ရှိ အရေးပေါ်အခြေအနေဖြစ်နေတဲ့ ညောင်တုန်းရေကာတာကာ ပိတ်ဆို့ပြင်ဆင်ရေးအတွက်လည်း ဒေသခံတွေနဲ့အရပ်ဘက်အဖွဲ့စည်းတွေက အဓိကလုပ်ဆောင်နေတာ ဖြစ်ပါတယ်။

" ကျတော်တို့ မြို့ခံတွေတော်တော်စိုးရိမ်နေကြတယ်။ အဲဒီတာ မကျိုးအောင် လုပ်အားသွားပေးနေကြတယ်။ တာတွေက ထိန်းသိမ်းမှုမရှိတော့ ကြံ့ခိုင်မှုမကောင်းဖြစ်နေတာ"လို့ ညောင်တုန်းမြို့ခံတစ်ဦးကပြောပါတယ်။ ညောင်တုန်းမြို့ဟာ ဧရာဝတီတိုင်းနဲ့ရန်ကုန်တိုင်းဆက်သွယ်ထားတဲ့ ကားလမ်းမပေါ်မှာ ရှိပါတယ်။

မြင်းခြံမြို့နယ်၊စံပြရွာအထိုင်စခန်းကို တော်လှန်ရေးပူးပေါင်းတပ် တွေသိမ်းယူ

ဩဂုတ်-၂၆၊၂၀၂၆။ကတ်သရင်း/People's Spring

မန္တလေးတိုင်း၊မြင်းခြံမြို့နယ်၊စံပြကျေးရွာက စစ်တပ်အထိုင်စခန်းကိုတော်လှန်ရေးပူး
ပေါင်းတပ် တွေက ဒီနေ့မနက်ပိုင်းမှာ တိုက်
ခိုက်သိမ်းယူနိုင်ခဲ့တယ်လို့ မြင်းခြံမြို့နယ်၊ပြည်သူ့ကာကွယ်ရေးအဖွဲ့(ပကဖ) သတင်းပြန်ကြား ရေးတာဝန်ခံက​ပြောပါတယ်။

ဩဂုတ်လ၂၆ရက်၊မနက်၄နာရီ ဝန်းကျင်မှာ မြင်းခြံမြို့ရဲ့အရှေ့မြောက်ဘက်နွားထိုး- မြင်းခြံလမ်းပိုင်းက စံပြရွာမှာအထိုင်ချထားတဲ့ စစ်တပ်အထိုင်စခန်းကိုတော်လှန်​ရေးပူး
ပေါင်းတပ်​တွေကတိုက်ခိုက်သိမ်းယူခဲ့တာ
ဖြစ်ပါတယ်။

တော်လှန်ရေး တပ်ဖွဲ့တွေ ဝင်ရောက်တိုက်
ခိုက်ချိန်မှာ စစ်သားနဲ့ပျူ​စောထီးတွေအားလုံး ထွက်ပြေးခဲ့ပြီး နေရာမှာ သွေးကွက် တွေနဲ့ ဘတ်ထရီ၊ဆိုလာချပ်တွေကျန်ခဲ့ပါတယ်။အဲ ဒီနေရာကို တော်လှန်ရေးတပ် တွေကရှင်း
လင်းခဲ့တယ်လို့ သိရပါတယ်။

"ဘေးနားက စစ်တပ်အထိုင်ရွာတွေနဲ့နီးတယ်။ကင်းရွာဆို မီတာ၄၀၀ လောက်ပဲဝေးတာ။ဒါပေမယ့်ဘယ်ကောင်မှထွက်မလာရဲဘူး။တော်
လှန်ရေးပူးပေါင်းအဖွဲ့ တွေကအထိခိုက်မရှိပြန်ဆုတ်လာနိုင်ပါတယ်"လို့ အထက်ပါတာ
ဝန်ခံက ဆက်ပြောပါတယ်။

တော်လှန်ရေး တပ်တွေ ပြန်ဆုတ်ခွာလာပြီးတဲ့နောက် မနက်၁၀နာရီလောက်မှာစစ်တပ်က အင်အားပြန်ဖြည်ပြီး စံပြရွာအတွင်းကို ပြန်ဝင်ကာအနီးပတ်ဝန်းကျင် ရွာ တွေကို ကင်းလှည့်တာ တွေလည်းလုပ်ခဲ့တယ်လို့ စုံစမ်းသိရပါတယ်။

နွားထိုးကြီး- မြင်းခြံလမ်းပိုင်းကို စစ်တပ်က ၂၀၂၅ခုနှစ်၊ဩဂုတ်လက ပြန်လည်ထိန်းချုပ်ခဲ့ပြီး ကျေးရွာအများစုမှာ အထိုင်ချတပ်စွဲထားတယ်လို့ သိရပါတယ်။

အဆိုပါစစ်ဆင်​ရေးကို မြင်းခြံမြို့နယ်ပကဖ၊ဗိုလ်ဆားပျောက်ကြားတပ်ဖွဲ့၊ပြည်သူ့ကြယ်တပွင့်၊မြင်းခြံ 35 ပျောက်ကြားတပ်ဖွဲ့၊အညာဖက်ဒရယ် ထနောင်းစစ် ကြောင်းတို့ပူး ပေါင်းတိုက်ခိုက်ခဲ့တာဖြစ်ပါတယ်။

မြင်းခြံ ပကဖ တပ်ဖွဲဝင်​တွေ(ပုံ​ဟောင်းဖြစ်ပါတယ်) ။ဓါတ်ပုံ-မြင်းခြံပကဖ

တန့်ဆည်နဲ့ ကောလင်းဒေသက ရေဘေးသင့်ပြည်သူတွေကို သပိတ်အင်အားစုတွေ ထောက်ပံ့

သြဂုတ် ၂၆၊၂၀၂၆။သုည/People's Spring

စစ်ကိုင်းတိုင်း တန့်ဆည်နဲ့ ကောလင်းမြို့နယ်က ရေဘေးသင့်ပြည်သူတွေကို သပိတ်အင်အားစုဝင်ရဲဘော်တွေက စားနပ်ရိက္ခာကူညီထောက်ပံ့တာ​တွေနဲ့ ကျန်းမာရေးစောင့်ရှောက်တာတွေ ဒီက​နေ့ (သြဂုတ် ၂၆) ပြုလုပ်ပေးခဲ့ပါတယ်။

စစ်ကိုင်းတိုင်း တန့်ဆည်မြို့နယ်အတွင်းက စစ်ဘေးရှောင်ရင်း ရေဘေးပါ ထပ်မံကြုံတွေနေရတဲ့ ရေဘေးသင့် ပြည်သူတွေကို Myingyan GZ Group က ကူညီထောက်ပံ့ခဲ့ပါတယ်။

တန့်ဆည်မြို့နယ်အတွင်းက သာဂေါင်ကြီး၊ ကမ်းဖြူ၊ ဝက်တိုး ကျေးရွာတွေ အပါအဝင် လိုအပ်နေတဲ့ ပြည်သူတွေအတွက် ဆေးဝါးနဲ့ ရိက္ခာတွေ သွားရောက်ကူညီပေးခဲ့ပါတယ်။

ဒါ့အပြင် ပြည်သူတွေကို ဆေးကုသပေးတာ၊ ကျန်းမာရေးစောင့်ရှောက်မှုပေးတာနဲ့ လိုအပ်တဲ့ အကူအညီတွေကို ပေးအပ်ခဲ့တယ်လို့ Myingyan GZ Group က ဖော်ပြထားပါတယ်။

ယင်းထောက်ပံ့မှုဟာ Myingyan GZ Group (စင်္ကာပူ ၊ မလေးရှား ၊ ကိုရီးယားရောက်) ရဲဘော်တွေမှထောက်ပို့ကူညီငွေကို မြေပြင်ရဲဘော်တွေမှ ကိုယ်စားသွားရောက်ကာ ရေဘေးသင့်၊ စစ်ဘေးရှောင် ပြည်သူတွေထံ အကူအညီပေးခဲ့ခြင်း ဖြစ်ကြောင်း Myingyan GZ Group က ဆိုပါတယ်။

ကောလင်းမြို့နယ်အတွင်း ရေဘေးသင့် စစ်ရှောင်ပြည်သူတွေကို ကောလင်းမြို့နယ် ပြည်သူ့အုပ်ချုပ်ရေးအဖွဲ့ က ဆန်နဲ့ ရိက္ခာခြောက်တွေကို သြဂုတ် ၂၅ ရက်က ကူညီထောက်ပံမှု ပြုလုပ်ပေးခဲ့ပါတယ်။

ရေဘေးသင့်ပြည်သူတွေကို ကူညီထောက်ပံ့ရာမှာ လမ်းခရီးအခြေအနေ၊ အချိန်၊ ပစ္စည်း ပြင်ဆင်နေမှုအရ ပြည်သူတွေဆီ အချိန် နဲ့ တပြေးညီ မရောက်ရှိနိုင်တာကို နားလည်ခွင့်လွှတ်ပေးဖို့အတွက် ကောလင်းမြို့နယ် ပြည်သူ့အုပ်ချုပ်ရေးအဖွဲ့ က မေတ္တာရပ်ခံထားပါတယ်။

အဲဒီထောက်ပံ့မှုကို ကောလင်းမြို့နယ် ပြည်သူ့အုပ်ချုပ်ရေးအဖွဲ့၊ မြို့နယ်ပြည်သူ့ကာကွယ်ရေးအဖွဲ့၊ ခရိုင်လူသားစာနာ၊ သယံဇာတတာဝန်ခံ၊ ပြည်သူ့ဆက်ဆံရေး၊ လူမှုရေးရာ ၊ အရပ်ဖက် ပရဟိတအဖွဲ့တို့ ပူးပေါင်းဆောင်ရွက်ခဲ့တာ ဖြစ်ပါတယ်။

“ဒီနေ့ဘာဖြစ်ခဲ့လဲ”

ဒီနေ့(သြဂုတ် ၂၆ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️ညောင်တုန်း ရေကာတာ အိကျလို့ အရေးပေါ် ပိတ်ဆို့နေရ

ဧရာဝတီတိုင်း ၊ ညောင်တုန်းမြို့နယ်က ရေကာတာ အိကျပြီး ကျိုးကျမယ့် အန္တရာယ်ကြောင့် လူအင်အားထောင်ချီသုံးပြီး အရေးပေါ် ပိတ်ဆို့နေရပါတယ်။ မအူပင်ခရိုင် ညောင်တုန်းမြို့နယ် ချောင်ဖျားကျေးရွာမှာရှိတဲ့ ညောင်တုန်းကျွန်းတာ ဆည်မြောင်းရေကာတာဟာ ဩဂုတ် ၂၅ရက် မနေ့က မနက်ပိုင်းမှာ အိပဲ့ကျလာတယ်လို့ အဲဒီနေရာကိုရောက်ရှိနေတဲ့လူမှုရေးအဖွဲ့တွေက ပြောပါတယ်။ အလျား ပေ ၃၀၀ပေ၊ အနံပေ ၆၀ခန့်အထိ အိကျသွားလို့ စိုးရိမ်စရာအခြေအနေဖြစ်တယ်လို့ ဆိုပါတယ်။ အဲဒီလို အိကျတာကို သိသိချင်း သဲအိတ်တွေချနေပြီး စုစုပေါင်းအင်အား ၂,၀၀၀ လောက်နဲ့ အရေးပေါ်လုပ်ဆောင်နေရတဲ့အခြေအနေဖြစ်တယ်လို့ ကူညီရေးအဖွဲ့တာဝန်ရှိသူတစ်ဦးက ဒီနေ့ သြဂုတ် ၂၆ရက် မနက်ပိုင်းမှာ ပြောပါတယ်။

◾️ရေကာတာတွေ ရေယိုနေမှု လူမှုကွန်ရက်ပေါ်တင် ဖြန့်ဝေသူ အရေးယူမယ်လို့ စစ်တပ် ခြိမ်းခြောက်

ဧရာဝတီတိုင်းမှာ ရေကာတာတွေ ရေယိုစိမ့်နေတာကို လူမှုကွန်ရက်ပေါ်တင် ဖြန့်ဝေသူကို အရေးယူမယ်လို့ စစ်တပ်လက်အောက်ခံဌာနဆိုင်ရာတွေက ဒေသခံတွေကို ဖိအားပေး ခြိမ်းခြောက်ထားပါတယ်။ ဧရာဝတီတိုင်းဟာ ဧရာဝတီမြစ်အပြင် ငဝန်မြစ်၊ တိုးမြစ်နဲ့ ဒါးကချာင်းအပါအဝင် ချောင်းတွေ၊ မြောင်းတွေဖြတ်သန်းစီးဆင်းနေပြီး မြို့ရွာတွေကို မြေသားတာတမံတွေနဲ့ ကာရံထားတာပါ။ ဧရာဝတီတိုင်း လေးမျက်နှာမြို့မှာ ပြီးခဲ့တဲ့ ဇူလိုင် ၃၀ရက်က ငဝန်မြစ်ရေကာတာကျိုးကျသွားနောက်ပိုင်း တိုင်းအတွင်း ဒေသခံတွေက သူတို့ဒေသမှာရှိတဲ့ တာတမံတွေရဲ့ကြံ့ခိုင်ခိုင်မှုအပေါ် လိုက်လံကြည့်ရှုပြီး ရေယိုစိမ့်တဲ့နေရာတွေကို လူမှုကွန်ရက်ပေါ်တင်ပြီး သတိပေးကြပါတယ်။ ဓနုဖြူ၊ ဇလွန်၊ဟင်္သာတနဲ့ မြန်အောင်မြို့မှာ ရေကာတာယိုစိမ့်နေကြောင်း Tiktok ပေါ်တင်တဲ့ ဒေသခံ ၄ ဦးကို စစ်တပ် ဌာနဆိုင်ရာတွေက ခေါ်ယူစစ်ဆေးခဲ့တယ်လို့ သိရပါတယ်။

◾️မြင်းခြံနယ် စစ်တပ်အထိုင်စခန်းကို တော်လှန်ရေးပူးပေါင်းတပ်တွေ သိမ်းယူ

မန္တလေးတိုင်း၊ မြင်းခြံမြို့နယ်၊ စံပြကျေးရွာက စစ်တပ်အထိုင်စခန်းကို တော်လှန်ရေးပူးပေါင်းတပ်တွေက ဒီနေ့ မနက်ပိုင်းမှာ တိုက်ခိုက်သိမ်းယူနိုင်ခဲ့တယ်လို့ မြင်းခြံမြို့နယ်၊ ပြည်သူ့ကာကွယ်ရေးအဖွဲ့(ပကဖ) သတင်းပြန်ကြားရေး တာဝန်ခံက​ ပြောပါတယ်။ ဩဂုတ် ၂၆ရက် မနက်၄နာရီ ဝန်းကျင်မှာ မြင်းခြံမြို့ရဲ့အရှေ့မြောက်ဘက် နွားထိုးကြီး-မြင်းခြံလမ်းပိုင်းက စံပြရွာမှာ အထိုင်ချထားတဲ့ စစ်တပ်အထိုင်စခန်းကို တော်လှန်​ရေးပူးပေါင်းတပ်​တွေက တိုက်ခိုက်သိမ်းယူခဲ့တာဖြစ်ပါတယ်။ တော်လှန်ရေး တပ်ဖွဲ့တွေ ဝင်ရောက်တိုက်ခိုက်ချိန်မှာ စစ်သားနဲ့ ပျူ​စောထီးတွေ အားလုံး ထွက်ပြေးခဲ့ပြီး နေရာမှာ သွေးကွက်တွေနဲ့ ဘတ်ထရီ၊ ဆိုလာချပ်တွေ ကျန်ခဲ့ပါတယ်။ အဲဒီနေရာကို တော်လှန်ရေးတပ်တွေက ရှင်းလင်းခဲ့တယ်လို့ သိရပါတယ်။

◾️စစ်တပ်စခန်းကို KNDO တိုက်ခိုက်ရာ စစ်သားတွေ လက်နက်ထား ထွက်ပြေး

တနင်္သာရီတိုင်း၊ မြိတ်မြို့နယ် မဇောကျေးရွာအုပ်စု တုံးဗျောရွာမှာ တပ်စွဲထားတဲ့ စစ်တပ်ကို ကရင်အမျိုးသားအစည်းအရုံး(KNU) တပ်မဟာ(၄)လက်အောက်ခံ ကရင်အမျိုးသားကာကွယ်ရေးတပ်(KNDO) က ဝင်ရောက်တိုက်ခိုက်ခဲ့ရာ လက်နက် ၄လက် သိမ်းရခဲ့တယ်လို့ KNU မြိတ်ထားဝယ်ခရိုင်က သတင်းထုတ်ပြန်ပါတယ်။ ဩဂုတ် ၂၄ရက် မွန်းလွဲပိုင်းမှာ တုံးဗျောရွာအတွင်း တပ်စွဲထားတဲ့ စစ်ကောင်စီတပ်သားတွေကို KNDO တပ်ရင်း(၇) တပ်ခွဲ(၃)က ဝင်ရောက်တိုက်ခိုက်ခဲ့တာလို့ ဆိုပါတယ်။ ပြောက်ကျားနည်းနဲ့ ဝင်တိုက်ခဲ့တာလို့ KNU မြိတ်ထားဝယ်ခရိုင် သတင်းရင်းမြစ်က ပြောပါတယ်။ စစ်သားတွေ လက်နက်ထားထွက်ပြေးသွားတာဖြစ်ကြောင်း အသိပေးပြီး တိုက်ပွဲမှာ ထိခိုက်ကျဆုံးမရှိဘူးလို့ ပြောပါတယ်။ အဲဒီ စစ်ဆင်ရေးမှာ စစ်သားတွေဆီက MA1(၁) လက်၊ MA2(၂)လက်၊ MA11(၁)လက်နဲ့ ခဲယမ်းအချို့ သိမ်းရခဲ့ကြောင်း KNU မြိတ်ထားဝယ်ခရိုင်က ထုတ်ပြန်ပါတယ်။

◾️ရသေ့တောင်မှာ စစ်တပ်ဗုံးကြဲအပြီး နွားတွေ ရုတ်တရက် သေဆုံး

ရခိုင်ပြည်နယ်၊ ရသေ့တောင်မြို့နယ်အတွင်း စစ်တပ်က ဗုံးကြဲချခဲ့တဲ့ နေရာတွေနဲ့ ပတ်ဝန်းကျင်အနီး စားကျက်တွေမှာ လွှတ်ထားတဲ့ နွားတွေ အကြောင်းအရင်းမရှိဘဲ ရုတ်တရက် သေဆုံးခဲ့တယ်လို့ သိရပါတယ်။ အာဏာသိမ်းစစ်တပ်ဗုံးကြဲအပြီး နွားတွေ တကောင်ပြီး တကောင် သေဆုံးနေတာကြောင့် အကြောင်းအရင်းကို စစ်ဆေးနေတယ်လို့ အာရက္ခတပ်တော်(AA)ရဲ့ကျန်းမာရေးဌာနက ဩဂုတ် ၂၅ ရက်မှာ ထုတ်ပြန်ပါတယ်။ အရင်က အဲဒီနေရာတွေမှာ အခုလို သေဆုံးတဲ့ ဖြစ်စဉ်မျိုးမရှိခဲ့ဘဲ စစ်တပ်ဗုံးကြဲပြီးနောက်မှသာ အဲဒီ ဝန်းကျင်စားကျက်တွေမှာ နွားတွေ သေဆုံးတာ တွေ့လာရတာလို့ ဆိုပါတယ်။ အခုလို နွားတွေသေဆုံးနေရတာနဲ့ပက်သက်လို့ AA ကျန်းမာရေးဌာန၊ မှုခင်းရေးရာ ဆေးပညာဌာနခွဲအနေနဲ့ ထူးခြားဖြစ်စဉ်၊ မသင်္ကာဖွယ်ရာ ဖြစ်ရပ်တခုအဖြစ် သတ်မှတ်ပြီး အထူးဂရုပြုစစ်ဆေးနေကာ သေဆုံးရတဲ့အကြောင်းအရင်းကို စစ်ဆေးအဖြေရှာဖွေ၊ ထုတ်ပြန်သွားမယ်လို့ AA ကျန်းမာရေးဌာနက ဆိုပါတယ်။

◾️ရွှေကူမြို့မှာ တိုက်ပွဲ ဆက်ဖြစ်

ကချင်ပြည်နယ်၊ ရွှေကူမြို့နယ်အတွင်းမှာ ကချင်လွတ်လပ်ရေးတပ်မတော်(KIA)နဲ့ စစ်တပ်အကြား တိုက်ပွဲတွေ ဆက်ဖြစ်နေကြောင်း ကချင်စစ်ရေးသတင်းရင်းမြစ်က ပြောပါတယ်။ စစ်တပ်ဟာ KIA သိမ်းပိုက်ထားတဲ့ ဒေသတွေကို ပြန်ထိန်းချုပ်နိုင်ဖို့ ရွှေကူမြို့ကနေ စစ်ကြောင်း ၄ခုနဲ့ အခုရက်ပိုင်းမှာ ထိုးစစ်ဆင်နေလို့ တိုက်ပွဲတွေ နေ့စဉ်ဖြစ်ပွားနေတာပါ။ လက်ရှိမှာ ဧရာ၀တီမြစ်အရှေ့ခြမ်းမှ စစ်ကြောင်း ၃ ခု၊ ဧရာ၀တီမြစ်အနောက်ခြမ်းမှာ စစ်ကြောင်း ၁ခုက KIA ထန်းချုပ်ထားတဲ့ စင်းခန်းလမ်းဘက်ကို ထိုးစစ်ဆင်နေရာ တော်လှန်ရေး ပူးပေါင်းတပ်က ခုခံတိုက်ခိုက်နေတယ်လို့ ဆိုပါတယ်။ ဒါ့အပြင် ဩဂုတ် ၂၆ရက် မနက်က စစ်ကိုင်းတိုင်း ထီးချိုင့်မြို့နယ်ကနေ အထက်ကို ဆန်တက်လာတဲ့ စစ်သင်္ဘောအုပ်စုဟာ အဲဒီနေ့ညပိုင်းမှာ ကသာမြို့မှာ ရပ်နားထားပြီး ဒီနေ့မှာ ဆက်လက်ထွက်ခွာခြင်းမရှိ ရပ်နားထားဆဲဖြစ်ကြောင်း ကချင်စစ်ရေးသတင်းရင်းမြစ်က ပြောပါတယ်။

◾️စစ်တပ်ယာဉ်တန်းကို KIA ကြားဖြတ်တိုက်ခိုက်

ကချင်ပြည်နယ်၊ မြစ်ကြီးနား-တနိုင်းသွား လီဒိုလမ်းမပေါ်မှာ စစ်တပ်ယာဉ်တန်းကို ကချင်လွတ်လပ်ရေးတပ်မတော်(KIA)က ကြားဖြတ်တိုက်ခိုက်ခဲ့ရာ ထိခိုက်မှုရှိခဲ့တယ်လို့ ကချင်စစ်ရေးသတင်းရင်းမြစ်က ပြောပါတယ်။ ကချင်စစ်ရေးသတင်းတွေ ဖော်ပြနေတဲ့ 7Stars Newsက လီဒိုလမ်းမပေါ်က နောင်းမီကျေးရွာအဝင်မှာ စစ်တပ် ယာဉ် ၆ စီးပါ ယာဉ်တန်းကို KIA ပူးပေါင်းတပ်က ကြားဖြတ်တိုက်ခိုက်ခဲ့ပြီး စစ်တပ်က ၁၀ဦး သေဆုံးခဲ့တယ်လို့ ဖော်ပြပါတယ်။ ကချင်စစ်ရေးသတင်းရင်းမြစ်ကလည်း စစ်တပ်ယာဥ်တန်းကို KIA က ကြားဖြတ်တိုက်ခိုက်ခဲ့ပြီး စစ်တပ် တပ်ဖွဲ့ဝင်တွေ သေဆုံးခဲ့တယ်လို့ ပြောပါတယ်။ စစ်တပ်ယာဉ်တန်းဟာ ဩဂုတ် ၂၅ရက်မနက်မှာ မြစ်ကြီးနားမြို့ကနေ ထွက်ခွာလာတာဖြစ်ပြီး အဲဒီယာဥ်တန်းကို တနိုင်းဒေသအခြေစိုက် KIA တပ်မဟာ(၂) တပ်ရင်း(၁၄) တပ်ဖွဲ့ဝင်တွေက ကြားဖြတ်တိုက်ခိုက်ခဲ့တာလို့ ဆိုပါတယ်။

◾️တောင်တွင်းဒေသတိုက်ပွဲ စစ်တပ်စစ်ကြောင်း အထိနာ

စစ်ကိုင်းတိုင်း၊ မင်းကင်းမြို့နယ်၊ တောင်တွင်းဒေသမှာ စစ်တပ်စစ်ကြောင်းကို ကြားဖြတ်တိုက်ခိုက်ခဲ့မှုအတွင်း ခဲယမ်းတွေ သိမ်းဆည်းရရှိခဲ့တယ်လို့ မင်းကင်းမြို့နယ်ပြည်သူ့ကာကွယ်ရေးအဖွဲ့က ဒီနေ့ ညပိုင်းမှာ ထုတ်ပြန်ပါတယ်။ စစ်တပ်က အင်အား ၃၀၀ ကျော်နဲ့ မုံရွာ–ယာကြီး–မင်းကင်း–ကလေးဝ လမ်းပိုင်းကို စစ်ကြောင်းထိုးလာစဉ် တော်လှန်ရေးတပ်တွေက မင်းကင်းမြို့နယ် တောင်တွင်းဒေသမှာ ဇွန်လ ၂၃ ရက်ကနေ ၂၅ ရက်အထိ ၉ ကြိမ် ထက်မနည်းကြားဖြတ်တိုက်ခိုက်ခဲ့တာလို့ မင်းကင်းပကဖ တာ၀န်ရှိသူက ပြောပါတယ်။ ဒါပေမဲ့ စစ်တပ်စစ်ကြောင်းက မင်းကင်းမြို့နယ် ကျောက်မော်ကျေးရွာက အသက်(၄၅)နှစ် အရွယ် အရပ်သား ၁ဦးကို ခေါင်းဖြတ်သတ်ဖြတ်ခဲ့တယ်လို့ အသိပေးပါတယ်။ တိုက်ပွဲအတွင်း စစ်တပ်က ၇ဦး သေဆုံးပြီး ၈ဦးခန့် ဒဏ်ရာရရှိတယ်လို့ မင်းကင်းပကဖက ဆိုပါတယ်။ ဒါ့အပြင် ၆၀ မမ နဲ့ ၄၀ မမ ဗုံးသီးတွေအပါအဝင် ခဲယမ်းတွေနဲ့ ဖောကား ၁စီး အပြင် စစ်အသုံးအဆောင်တွေ အများအပြား သိမ်းရတယ်လို့ သိရပါတယ်။

◾️သရက်ချောင်း ဒေသခံတွေရဲ့ ကားနဲ့ ဆိုင်ကယ်တွေ စစ်တပ် သိမ်းယူ၊ နေအိမ်တွေ မီးရှို့

တနင်္သာရီတိုင်း၊ သရက်ချောင်းမြို့နယ်က ကျေးရွာတွေကို စစ်ကြောင်းထိုးလာတဲ့ စစ်တပ်ဟာ ဒေသခံတွေပိုင်ဆိုင်တဲ့ ကားအချို့နဲ့ ဆိုင်ကယ်တွေကို ယူဆောင်သွားသလို နေအိမ်အချို့ကိုလည်း မီးရှို့ဖျက်ဆီးခဲ့ကြောင်း ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က သတင်းထုတ်ပြန်ပါတယ်။ ဩဂုတ် ၁၀ရက်ကနေ ၂၀ရက် အတွင်း စစ်တပ်က သရက်ချောင်းမြို့နယ်က ကျေးရွာတွေကို စစ်ကြောင်းထိုးတာ၊ လူ့အခွင့်အရေးချိုးဖောက်မှုတွေ ကျူးလွန်တာ စတဲ့ အခြေအနေတွေကို အသိပေးဖော်ပြထားတာဖြစ်ပါတယ်။ စစ်တပ်ဟာ သရက်ချောင်းမြို့နယ် တောင်ဇင်းကျေးရွာအုပ်စုအတွင်းရှိ ရှင်မုတ္ထီး၊ ရောင်းမော်ရွာမှတစ်ဆင့် ဆေးဖြတ်ကုန်းရွာ၊ ကင်းရှေ့ရွာ၊ မိုးရွှေကုန်းရွာ၊ စော်ဖျားရွာ၊ ကျောက်လှေကားရွာ၊ ကထီးဝရွာ၊ ထီးဖဒို(ပဒတ်ချောင်း)ရွာ၊ လော်မူဖ(လောင်းမင်းဘ)ရွာ တို့အတွင်းသို့ စစ်ကြောင်းထိုး ဝင်ရောက်လာခဲ့ပြီး ပြည်သူလူထုများအား ရန်သူ သဖွယ်ပစ်မှတ်ထားတိုက်ခိုက်တာ၊ လူသားဒိုင်းအဖြစ် ဖမ်းဆီးတာတွေ လုပ်ဆောင်ခဲ့ကြောင်း ဖော်ပြပါတယ်။

◾️စစ်တပ်ကို အရေးယူမှုတွေ တိုးမြှင့်ဖို့ ဩစတြေးလျအစိုးရကို FSU တိုက်တွန်း