“ဒီနေ့ဘာဖြစ်ခဲ့လဲ”

ဒီနေ့(သြဂုတ် ၂၄ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️ပလက်၀မြို့နယ်ကို စစ်တပ်ဗုံးကြဲ၊ ကလေးအပါအ၀င် ၅ ဦးသေ၊ ၁၇ ဦးဒဏ်ရာရ

အာရက္ခတပ်တော်(AA)ထိန်းချုပ်ထားတဲ့ ချင်းပြည်နယ်၊ ပလက်၀မြို့နယ် စိမ့်ညှင်း၀ရွာကို အာဏာသိမ်းစစ်တပ်က ဒီနေ့ နေ့လယ်ပိုင်းမှာ ဂျက်ဖိုက်တာနှစ်စီးနဲ့ ဗုံးကြဲခဲ့တာကြောင့် ကလေးငယ်တွေအပါအဝင် ၅ ဦးသေဆုံးပြီး ၁၇ ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။ ဩဂုတ် ၂၄ ရက် နေ့လယ် ၁၂နာရီဝန်းကျင်မှာ ဂျက်ဖိုက်တာနှစ်စီးနဲ့ ပေါင် ၅၀၀အပါအ၀င် ဗုံး ၁၁ လုံး ကြဲချခဲ့တာဖြစ်ပြီး ကလေးတွေ စာသင်နေတဲ့ ဘုန်းတော်ကြီးကျောင်းနဲ့ ရွာထဲနေအိမ်တွေပေါ် ကျရောက်ပေါက်ကွဲခဲ့တာလို့ သိရပါတယ်။ သေဆုံးသူ ၅ ဦးထဲမှာ အသက် ၁ နှစ်နဲ့ ၁၀ နှစ်အရွယ် ကလေးငယ်နှစ်ဦးပါ၀င်ပြီး ဒဏ်ရာရသူတွေထဲမှာလည်း အသက် ၇ နှစ်ကနေ ၁၃ နှစ်ထိ ကလေးငယ် ၇ ဦးပါ၀င်ပါတယ်။

◾️ဖားကန့်မှာ စစ်အုပ်စုက အရပ်သား ၂၅ ဦးကို အစုလိုက်အပြုံလိုက် သတ်ဖြတ်မြေမြုပ်ထားတဲ့နေရာ ရှာတွေ့

ကချင်ပြည်နယ်၊ ဖားကန့်မှာ အာဏာသိမ်းစစ်တပ်နဲ့ ဝါရာဇွပ် ပြည်သူ့စစ်၊ ရှမ်းနီတပ်(SNA)အဖွဲ့ ကာလရှည်တပ်စွဲထားတဲ့ နေရာကို ဒေသခံတွေပြန်ဝင်ဖို့ ရှင်းလင်းစဉ် သတ်ဖြတ်ခံထားရတဲ့ ရုပ်အလောင်း၂၅ လောင်း မြှုပ်နှံထားတဲ့နေရာကို ရှာဖွေတွေ့ရှိခဲ့ပါတယ်။ ဖားကန့်မြို့ မှော်ဝမ်းလေး ကျေးရွာမှာ ဒီနေ့ သြဂုတ်၂၄ ရက် နေ့လယ်ပိုင်းက တွေ့ရှိခဲ့တာဖြစ်ပါတယ်။ မှော်ဝမ်းလေးကျေးရွာကို ပြီးခဲ့တဲ့၂၀၂၅ ခုနှစ် ဇွန်လဆန်းမှာ စစ်တပ်နဲ့ ဝါရာဇွပ်ပြည်သူ့စစ်၊ ရှမ်းနီတပ်(SNA)ပူးပေါင်းတပ်တွေဝင်ရောက်လာပြီး တပ်စွဲထားတာဖြစ်ပါတယ်။ လက်ရှိ ဩဂုတ်လလယ်မှာ အရပ်သားတွေပြန်လည်ဝင်ရောက်နေထိုင်ဖို့ဆိုပြီး ရပ်ကျေး အုပ်ချုပ်ရေးအဖွဲ့တွေနဲ့ဒေသခံတွေ ရှင်းလင်း‌ ရေးစတင်လုပ်ဆောင်ခဲ့ပါတယ်။

◾️ဝါရာဇွပ်ပြည်သူ့စစ်အဖွဲ့လုပ်ရပ် လူမဆန်ဘူးလို့ KIA တာဝန်ရှိသူပြော

အပြစ်မဲ့ပြည်သူလူထုကို သတ်ဖြတ်ပြီး မိသားစုကို အလောင်းပြန်မပေးတဲ့ မင်းဇေသန့်ဦးဆောင်တဲ့ ဝါရာဇွပ်ပြည်သူ့စစ်အဖွဲ့ရဲ့ လုပ်ရပ်ဟာ လူမဆန်တဲ့လုပ်ရပ်ဖြစ်တယ်လို့ ကချင်လွတ်လပ်ရေးအဖွဲ့(KIA) သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောပါတယ်။ ဩဂုတ် ဒုတိယပတ်က ကချင်ပြည်နယ် မြစ်ကြီးနား-တနိုင်းသွားလမ်း လီဒိုလမ်းမပေါ်က နောင်းမီရွာ ဒေသခံ ၄ဦးကို စစ်တပ်လက်အောက်ခံ ဝါရာဇွပ်ပြည်သူ့စစ်အဖွဲ့က ဖမ်းဆီးသတ်ဖြတ်ခဲ့တဲ့ လုပ်ရပ်နဲ့ပတ်သက်ပြီး အခုလို ပြောကြားလိုက်တာဖြစ်ပါတယ်။ လူမဆန်တဲ့ လုပ်ရပ်လို့ပဲ ပြောရမှာဖြစ်ပြီး အပြစ်မရှိတဲ့ ပြည်သူလူထုတွေကို သတ်ပြီးမှ အလောင်းမပေးဘူးဆိုတာက ကောင်းတဲ့လက္ခဏာတော့ မဟုတ်ပါဘူးလို့ ဗိုလ်မှူးကြီးနော်ဘူက ပြောပါတယ်။ ပြည်သူကို ချစ်တဲ့၊ နိုင်ငံတော်ကို ကာကွယ်တဲ့ အကျင့်စာရိတ္တတွေတော့ မဟုတ်ဘူးလို့ သူက ဆက်ပြောပါတယ်။

◾️စစ်တပ်လွှတ်တော်ဥက္ကဌရဲ့တူ ဌာနမှူးဦးဆောင်တဲ့ လာဘ်စားမှု ဆိုးရွားနေ

ရန်ကုန်မြို့၊ စာချုပ်စာတမ်းမှတ်ပုံတင်ရုံးမှာ စစ်တပ်လွှတ်တော်ဥက္ကဌ ဗိုလ်ချုပ်ကြီးဟောင်းအောင်လင်းဒွေးရဲ့ တူတော်စပ်သူ ဌာနမှူး မင်းသူအောင်ဦးဆောင်ပြီး လာဘ်စားနေမှုဟာ ဆိုးရွားနေတယ်လို့ ငွေတောင်းခံရသူတချို့က ပြောပါတယ်။ စာချုပ်စာတမ်းမှတ်ပုံတင်ရုံးဌာနမှူး မင်းသူအောင်က စာချုပ်စာတမ်းတွေစစ်ဆေးပါက လက်အောက်ဝန်ထမ်းကတဆင့် ငွေကြေးတောင်းခံနေတယ်လို့ ကိုယ်တိုင်ငွေပေးခဲ့ရသူတစ်ဦးက ပြောပါတယ်။ ပိုက်ဆံကို စာအိတ်နဲ့ ထည့်ပေးရပြီး ပိုက်ဆံနည်းရင် စာချုပ်တွေမှာ အချက်အလက်မပြည့်စုံသေးကြောင်းအပြစ်ရှာကာ ကြန့်ကြာအောင် ပြုလုပ်နေတယ်လို့ သူက ဆိုပါတယ်။ မင်းသူအောင်က သူ့လုပ်ပိုင်ခွင့်ကိုအသုံးချပြီး ငွေကြေးအမြောက်အမြားလက်ခံရယူနေတာလို့ ငွေတောင်းခံရသူတစ်ဦးက ပြောပါတယ်။ ဒါ့အပြင် သူဟာ ဗိုလ်ချုပ်ကြီးဟောင်းအောင်လင်းဒွေးတူအရင်းဖြစ်တာကြောင့် သူ့လုပ်ရပ်တွေကိုမကျေနပ်ရင် ကြိုက်တဲ့လူ၊ ကြိုက်တဲ့နေရာတိုင်လို့ရကြောင်း၊ ဂရုမစိုက်ကြောင်း ပြောတတ်တယ်လို့ ဌာနနဲ့ နီးစပ်တဲ့ သတင်းရင်းမြစ်က ပြောပါတယ်။ မင်းသူအောင် ဦးဆောင်ပြီး လာဘ်စားမှုတွေအကြောင်းကို ကြေးတိုင်နဲ့ မြေစာရင်းဦးစီးဌာန၊ရုံးချုပ်ကို တိုင်ကြားထားပေမယ့် အကြောင်းမထူးသေးဘူးလို့ သိရပါတယ်။

◾️မြိုင်မြို့နယ် ရေနံမြေအနီး တိုက်ပွဲပြင်းထန်နေ

မကွေးတိုင်း၊ မြိုင်မြို့နယ်အနောက်ခြမ်းက ရေနံမြေကို ထိန်းချုပ်ဖို့ ကြိုးပမ်းနေတဲ့ အာဏာသိမ်းစစ်တပ်နဲ့ တော်လှန်ရေးတပ်တွေ တိုက်ပွဲပြင်းထန်နေပြီး စစ်တပ်က လေကြောင်းကနေ ဗုံးကြဲနေတယ်လို့ ဒေသခံသတင်းရင်းမြစ်တချို့က ပြောပါတယ်။ အင်အား ၅၀၀ ခန့်နဲ့ သုံးလ၀န်းကျင်ကြာထိုးစစ်ဆင်နေတဲ့ စစ်တပ်ဟာ တော်လှန်ရေးတပ်တွေရဲ့ တားဆီးပိတ်ဆို့တိုက်ခိုက်မှုကြောင့် လေကြောင်းကနေ ပစ်ကူအသုံးပြုပြီး နေ့စဉ် တိုက်ခိုက်ဗုံးကြဲနေတယ်လို့ ဆိုပါတယ်။ မြိုင်မြို့နယ်အနောက်ပိုင်း တောင်စုံရွာ နဲ့ တဲကြီးကျေးရွာ အနီးတဝိုက်က ဝဲတူးရေနံမြေကို ထိန်းချုပ်ဖို့ စစ်တပ်က ကြိုးပမ်းနေတာလို့ အသိပေးပါတယ်။

◾️အင်အားဖြည့်လာတဲ့ စစ်သင်္ဘောတွေကို KIA ပူးပေါင်းတပ် ဒရုန်းနဲ့ တိုက်ခိုက်

ကချင်ပြည်နယ်ကို အင်အားဖြည့်တင်းဖို့ ကြိုးပမ်းလာတဲ့ စစ်သင်္ဘောအုပ်စုကို ကချင်လွတ်လပ်ရေးတပ်မတော်(KIA)နဲ့ ပြည်သူ့ကာကွယ်ရေးတပ်မတော်(PDF)ပူးပေါင်းတပ်တွေက ဒရုန်းနဲ့ တိုက်ခိုက်ခဲ့တယ်လို့ သတင်းရင်းမြစ်အချို့က ပြောပါတယ်။ စစ်တပ်သင်္ဘော ၆စီးကို တိုက်ခိုက်ခဲ့တာမှာ ၁စီး မီးလောင်ခဲ့တယ်လို့ ကနဦး သိရကြောင်း တော်လှန်ရေးတပ်နဲ့ နီးစပ်တဲ့ သတင်းရင်းမြစ်တစ်ဦးက ပြောပါတယ်။ ကချင်စစ်ရေးသတင်းရင်းမြစ်တစ်ဦးကလည်း တိုက်ခိုက်မှု ဖြစ်စဉ် အသေးစိတ် မသိရသေးပေမယ့် စစ်သင်္ဘောတွေ ကချင်ပြည်နယ်ဘက်ကို မရောက်သေးဘူးလို့ ပြောပါတယ်။ ရွှေကူမြို့ဘက်ကို အင်အားဖြည့်ဖို့လာတဲ့ စစ်သင်္ဘောတွေကို KIA ပူးပေါင်းတပ်က တိုက်ခိုက်ခဲ့တဲ့ ရုပ်သံကို 7Stars News ကလည်း ဖော်ပြပါတယ်။

◾️ပြည်ထောင်စုရန်ပုံငွေကနေ စစ်လက်နက်ဝယ်ယူတာအပါအဝင် စစ်ရေးဆိုင်ရာတွေမှာ မျှဝေသုံးစွဲနေဟု NUG ကာကွယ်ရေး ထုတ်ပြန်

အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာနအနေနဲ့ တပ်ရင်းရိက္ခာနဲ့ အထွေထွေအသုံးစရိတ်အပြင် အခြားသောစစ်လက်နက်ပစ္စည်းဝယ်ယူရေး၊ ထုတ်လုပ်ရေး၊ ရိက္ခာနဲ့ ဆေးဝါး၊ လေ့ကျင့်ရေး၊ စစ်ဆင်ရေးနဲ့ မဟာမိတ်မျှဝေမှုတွေကို ပြည်ထောင်စုရန်ပုံငွေမှ ရရှိသော ရန်ပုံငွေများမှ မျှဝေသုံးစွဲလျက်ရှိတယ်လို့ ထုတ်ပြန်ပါတယ်။ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနမှ ပြည်သူ့ကာကွယ်ရေးတပ်မတော် (PDF) တပ်ရင်း၊ တပ်ဖွဲ့များအား တပ်ရင်းထောက်ပံ့ပေးအပ်မှု အနှစ်ချုပ်ကို ဒီနေ့ ဩဂုတ် ၂၄ရက်မှာ ထုတ်ပြန်ခဲ့ရာ အခုလို ဖော်ပြထားတာပါ။ ပြည်သူ့တော်လှန်ရေးထောက်ပို့တပ် - PRF မှာ တာဝန်ထမ်းဆောင်တဲ့ ထောက်ပို့ငွေများ ကာကွယ်ရေးဝန်ကြီးဌာနမှတဆင့် မြေပြင်သို့ စနစ်တကျ စီးဆင်းမှုကို PRF ထောက်ပို့တပ်သားများ နဲ့ ပြည်သူလူထု သိရှိစေဖို့ အခုလို တင်ပြတာဖြစ်တယ်လို့ ဆိုပါတယ်။ ပြည်သူ့ကာကွယ်ရေးတပ်မတော် (PDF) စတင်ဖွဲ့စည်းချိန်ကစပြီး ဒီနေ့အထိ တပ်ရင်းရိက္ခာနဲ့ အထွေထွေအသုံးစရိတ်ကို (၃၈) ကြိမ် အထိ ပေးပို့ခဲ့တယ်လို့ ဆိုပါတယ်။ ဒီလို ပို့ဆောင်ရာမှာ ပြည်သူ့ကာကွယ်ရေးတပ်မတော် (PDF) တပ်ရင်း / စစ်ကြောင်း (၃၆၀) ကျော်ကို ပေးပို့ခဲ့တာဖြစ်ပြီး (၃၆) ကြိမ်မြောက်ကစပြီး ပကဖ တိုက်ခိုက်ရေးတပ်ရင်းတွေကိုပါ တိုးချဲ့ ပေးအပ်ခဲ့ကြောင်း ဖော်ပြပါတယ်။ တပ်ရင်းထောက်ပံ့တကြိမ်ပေးအပ်ရင် အရင်က ခန့်မှန်းအမေရိကန်ဒေါ်လာ ၉ သိန်းကျော် သုံးစွဲခဲ့ပြီး ၂၀၂၆ ခုနှစ်မှ စတင်ကာ ၁ ဒသမ ၃ သန်းအထိ တိုးမြှင့် သုံးစွဲနေကြောင်း အသိပေးပါတယ်။ စုစုပေါင်းတပ်ရင်းထောက်ပံ့စရိတ်တွေအားလုံးရဲ့ ၈၅ရာခိုင်နှုန်းဖြစ်တဲ့ ခန့်မှန်းအမေရိကန်ဒေါ်လာ သန်း (၃၀) ကျော်ကို PRF ရဲ့ ၄၆ လတာကာလအတွင်း (၂၀၂၁ ဒီဇင်ဘာမှ - ၂၀၂၅ စက်တင်ဘာအထိ ) ထောက်ပို့တပ်သားများတာဝန်ထမ်းဆောင်ထားတဲ့ ဘဏ္ဍာငွေတွေထဲက ထုတ်နုတ်သုံးစွဲခဲ့တာဖြစ်ကြောင်း ထုတ်ပြန်ပါတယ်။

◾️စစ်တပ်က ဒေသခံရိုဟင်ဂျာတွေဖမ်းပြီး စစ်သင်တန်းပေး၊ ရှေ့တန်း အင်အားထပ်ဖြည့်‌နေ

ရခိုင်ပြည်နယ်၊ စစ်တွေမြို့မှာ အာရက္ခတပ်တော်(AA)ရဲ့ မြေပြင်ထိုးစစ်တွေနဲ့ ရင်ဆိုင်နေရချိန် ရှေ့တန်းတပ်ရင်းတွေနဲ့ တပ်စခန်းတွေကို အာဏာသိမ်းစစ်တပ်က အင်အားရာချီထပ်ဖြည့်နေသလို ဒေသခံရိုဟင်ဂျာတွေ ဖမ်းဆီးပြီး စစ်သင်တန်းပေးနေတယ်လို့ သတင်းရရှိပါတယ်။ စစ်တွေမြို့ရဲ့ မြောက်ဘက်အစွန်ဆုံးမှာရှိတဲ့ ပါဒလိတ်တပ်ရင်း၊ ဒေသကွပ်ကဲမှုစစ်ဌာနချုပ်(ဒကစ-စစ်တွေ)အနီးမှာ ရှိတဲ့ နာရီကန်တပ်ရင်းနဲ့ မြို့အနောက်ဘက်က ရေချမ်းပြင်အနီးတပ်ရင်းတွေကို ဒီရက်ပိုင်းမှာ အင်အားဖြည့်နေတာလို့ ဒေသခံသတင်းရင်းမြစ်က ပြောပါတယ်။ ဒါ့အပြင် စစ်တပ်ဟာ ရန်ကုန်မြို့ကနေ စစ်သင်္ဘော၊ ကုန်တင်သင်္ဘောတွေနဲ့ စစ်တွေမြို့ဆီ လက်နက်ခဲယမ်း၊ အင်အားပို့ပြီး အဲဒီကနေတဆင့် ရှေ့တန်းတပ်ရင်းတွေကို အင်အားဖြည့်နေတာလို့ သိရပါတယ်။

◾️ဧရာဝတီတိုင်း ရေဘေးသင့်ဒေသတွေမှာ ကူးစက်ရောဂါ ဖြစ်ပွားနေ

ဧရာဝတီတိုင်းက ရေဘေးသင့်ဒေသတွေမှာ ဝမ်းရောဂါနဲ့ တခြားကူးစက်ရောဂါအချို့စတင်ဖြစ်ပွားနေပြီး ဘေးသင့်ပြည်သူတွေရဲ့ကျန်းမာရေးအတွက် အာဏာသိမ်းစစ်တပ်ရဲ့ ဌာနဆိုင်ရာက လုံလောက်တဲ့ကျန်းမာရေးစောင့်ရှောက်မှုမပေးဘူးလို့ ဒေသခံတွေက ပြောပါတယ်။ ငသိုင်းချောင်း၊ အိုင်သပြု၊ ရေကြည်၊ လေးမျက်နှာမြို့တွေက ပြည်သူတွေ ရေထဲမှာ တကယ်ဒုက္ခရောက်နေကြပြီး ကူးစက်ရောဂါတွေလည်းဖြစ်နေတာလို့ ကျန်းမာရေးဝန်ထမ်းတစ်ဦးက ပြောပါတယ်။ စစ်တပ်က ခန့်အပ်ထားတဲ့ ဧရာဝတီတိုင်းဝန်ကြီးချုပ် အေးကျော်ဟာ တိုင်းအတွင်း ကျန်းမာရေးဆိုင်ရာကဏ္ဍတွေမှာပါ ဝင်ရောက်စွက်ဖက်နေသလို အမှန်တကယ်လုပ်ဆောင်ရမယ့် ကျန်းမာရေးစောင့်ရှောက်မှုတွေကိုတော့ အကောင်အထည်ဖော်ပေးခြင်းမရှိဘူးလို့ဝေဖန်ခံနေရပါတယ်။ လက်ရှိ ဧရာဝတီတိုင်းမှာ ရင်ဆိုင်နေရတဲ့ ရေဘေးကြောင့် နေအိမ်မြုပ်နေသူတွေဟာ အဝေးပြေးလမ်းမတွေပေါ်မှာ ယာယီတဲထိုးနေကြရပါတယ်။ ဒါ့အပြင် ပုသိမ်ဆေးရုံမှာ ကိုဗစ်ကူးစက်ခံထားရတဲ့ လူနာ တွေ့ရှိထားပြီး ပြင်ပကို သတင်းမပေါက်ကြားဖို့ တိုင်းဝန်ကြိးချုပ်က အမိန့်ပေးထားတယ်လို့ ဆေးရုံနဲ့နီးစပ်တဲ့ဒေသခံတွေကပြောပါတယ်။

◾️စစ်ကိုင်းမှာ ရေဘေးကြောင့် ပျက်စီးသွားတဲ့ လမ်းတံတားတွေပြန်ပြင်ဖို့ ဒေသခံတွေ အခက်တွေ့နေ

စစ်ကိုင်းတိုင်းက ရေဘေးသင့်ကျေးရွာတွေမှာ ပျက်စီးသွားတဲ့လမ်းတံတားတွေကို ပြန်ပြင်ဖို့ ကုန်ကျစရိတ်မတတ်နိုင်တော့လို့ ဒေသခံတွေ သွားလာရေးအခက်အခဲတွေ့နေပါတယ်။ သြဂုတ်လဆန်းပိုင်းကတည်းက ရေကြီးရေလျှံခဲ့တဲ့ စစ်ဘေးသင့်ဒေသ ဖြစ်တဲ့ စစ်ကိုင်းတိုင်းက ရွှေဘို၊ ရေဦး၊ ခင်ဦး၊ တန့်ဆည်၊ ကန့်ဘလူ၊ အရာတော်၊ ဝက်လက်၊ ဒီပဲယင်း အစရှိတဲ့ မြို့နယ်တွေက ရေဘေးသင့်ဒေသတွေမှာ လက်ရှိ ရေပြန်ကျသွားပေမယ့် ရွာချင်းဆက်လမ်းတွေ၊ တာပေါင်လမ်းတွေနဲ့ ချောင်းကူးမြောင်းကူးတံတားတွေပါ ပျက်စီးသွားခဲ့ပြီး ပြုပြင်နိုင်ခြင်း မရှိ​​​သေးတာကြောင့် သွားလာရေးအခက်အခဲတွေ ရှိနေကြောင်း ဒေသခံတွေက ပြောပါတယ်။ လက်ရှိ ဝက်လက်နယ်ထဲမှာတင် ရေဘေးသင့်ကျေးရွာ ၂၅ရွာက လမ်းတွေ ရေတိုက်စားလို့ ပျက်စီးသွားခဲ့ပြီး ကုန်ကျစရိတ်မတတ်နိုင်သေးလို့ မပြင်နိုင်သေးဘူးလို့ ဒေသခံတွေက ပြောပါတယ်။

◾️ရေဖြူမှာ တရုတ်ကုမ္ပဏီက သတ္တုတူးဖော်ရေးအကြောင်းပြ ကျားဖြန့်လုပ်ငန်းလုပ်ဖို့ စီစဉ်နေ

တနင်္သာရီတိုင်း၊ ရေဖြူမြို့နယ်၊ ကံပေါက်ကျေးရွာမှာ တရုတ်ကုမ္ပဏီက သတ္တုတူးဖော်ရေးကို အကြောင်းပြပြီး ကျားဖြန့်လုပ်ငန်းလုပ်ကိုင်ဖို့ စီစဉ်နေတယ်လို့ တနင်္သာရီတိုင်းစစ်ဌာန၊ နည်းဗျူဟာ (၃၃) က ဒီနေ့ ထုတ်ပြန်ပါတယ်။ Delco ကုမ္ပဏီက တရုတ်နိုင်ငံသားရာနဲ့ချီခေါ်လာပြီး အာဏာသိမ်းစစ်တပ်နဲ့ ပူးပေါင်းကာ နောက်ထပ်အကြီးစား သတ္တုလုပ်ငန်း လုပ်ကိုင်ဖို့အတွက် ကံပေါက်ကျေးရွာတောင်ပေါ်မှာ အဆောက်အဦးတွေ ဆောက်လုပ်နေတာ ၃လ၀န်းကျင်ရှိပြီလို့ ဆိုပါတယ်။ အခုချိန်မှာ သတ္တုတူးဖော်ရေးကို အကြောင်းပြပြီး တရုတ်နိုင်ငံသားတွေနဲ့ ကျားဖြန့်လုပ်ငန်းရှင်တွေ ပါဝင်ပြီး လုပ်ငန်းတွေ လုပ်ဆောင်ဖို့ စီစဉ်နေတာကို သတင်းရရှိထားတယ်လို့ အသိပေးပါတယ်။

◾️တနင်္သာရီမြို့နယ်မှာ စစ်တပ် ပစ်ခတ်လို့ ပြည်သူ ၁ဦး ဒဏ်ရာရ

တနင်္သာရီတိုင်း တနင်္သာရီမြို့နယ်မှာ အာဏာသိမ်းစစ်တပ်က လက်နက်ကြီးနဲ့ ပစ်ခတ်လို့ အရပ်သား ၁ဦး ဒဏ်ရာရခဲ့ကြောင်း ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က သတင်းထုတ်ပြန်ပါတယ်။ ဩဂုတ် ၂၂ရက် ညပိုင်းက တနင်္သာရီမြို့နယ် ကျွဲထိန်းကုန်းရွာကို စစ်တပ်က လက်နက်ကြီးနဲ့ ပစ်ခတ်လို့ (၆၆)နှစ်အရွယ် အမျိုးသမီး ၁ဦး ဒဏ်ရာရခဲ့တာလို့ ဖော်ပြပါတယ်။ ပစ်ခတ်မှုကို စစ်တပ်ရဲ့ ခမရ(၅၆၁) တပ်ရင်းက တပ်ဖွဲ့ဝင်တွေက လုပ်ဆောင်ခဲ့တာဖြစ်တယ်လို့ ဆိုပါတယ်။ စစ်တပ်ဟာ ဩဂုတ် ၁၇ရက်ကလည်း တနင်္သာရီမြို့နယ် သဲဖြူရွာချောင်းဖျား(မဲ့ဝါးခီး) ဒေသက စစ်ရှောင်နေထိုင်ရာ နေအိမ်တွေကို မီးရှို့ဖျက်ဆီးခဲ့ပါတယ်။ စစ်တပ်ဟာ တနင်္သာရီတိုင်း ဘုတ်ပြင်းမြို့နယ်မှာလည်း တိုက်ပွဲမရှိဘဲ ပြည်သူ့နေအိမ်အချို့ကို မီးရှို့ဖျက်ဆီးခဲ့တယ်လို့ ပြည်သူ့ကာကွယ်ရေးတပ်မတော် ကော့သောင်းခရိုင် အမှတ်(၁)တပ်ရင်းက သတင်းထုတ်ပြန်ပါတယ်။

◾️မုံရွာမြို့မှာ နေ့စဥ် လူငယ်တွေ ပေါ်တာဆွဲခံနေရ

စစ်ကိုင်းတိုင်း၊ မုံရွာမြို့မှာ နေ့စဥ် လူငယ်တွေ ပေါ်တာဆွဲခံနေရပြီး တစ်ပတ်တစ်ကြိမ် တပ်မ(၃၃)ဆီ ပို့ဆောင်နေကြောင်း ဒေသခံတွေက ပြောပါတယ်။ အာဏာသိမ်းစစ်တပ်က မုံရွာမြို့ပေါ်မှာ နေ့စဥ် အိမ်စီးကားတွေနဲ့ လှည့်လည်ပြီး ပေါ်တာဆွဲလေ့ရှိရာ တစ်ရက်ကို လူငယ်တွေ ၃၀ ကျော် ပေါ်တာဆွဲခံနေရကြောင်း၊ ပေါ်တာဆွဲခံရတဲ့ အမျိုးသားတွေကို တစ်ပတ်တစ်ကြိမ် စစ်ကောင်စီတပ်ဖွဲ့ဝင်တွေ အသုံးပြုတဲ့ ကားကြီး ၈ စီးနဲ့ စစ်ကိုင်းမြို့ရှိ တပ်မ (၃၃)ဆီ ပို့ဆောင်နေကြောင်း မုံရွာမြို့နယ် သတင်းမှန်ပြန်ကြားရေးအဖွဲ့က ပြောပါတယ်။ အာဏာသိမ်းစစ်တပ်ဟာ အရင်က ညနေ ၅ နာရီနောက်ပိုင်း ပေါ်တာဆွဲလေ့ရှိပြီး စက်ရုံအလုပ်ရုံတွေဟာ အလုပ်သမားတွေ ပေါ်တာအဆွဲမခံရဖို့ စောဆင်းပေးခဲ့တာကြောင့် လက်ရှိမှာ နေ့လယ် ၂ နာရီခွဲကျော်ကတည်းက ပေါ်တာဆွဲနေကြောင်း ဒေသခံတွေက ပြောပါတယ်။ ဒါ့အပြင် အသက် ၁၈ နှစ်ကနေ ၃၅ နှစ်အတွင်း အမျိုးသားတွေရှိတဲ့ နေအိမ်တွေကို စစ်မှုထမ်းဖို့ အသိပေးစာတွေ ပေးပို့မှာဖြစ်ပြီး စာရရှိပြီးတဲ့နောက် လာရောက်ခြင်းမရှိပါက နေအိမ်အထိ လာရောက်ခေါ်ဆောင်မယ်ဆိုတဲ့သတင်းတွေလည်း ပျံ့နေတယ်လို့ မုံရွာမြို့နယ် သတင်းမှန်ပြန်ကြားရေးအဖွဲ့က ပြောပါတယ်။

◾️စစ်တပ်စခန်းတွေကို FPV အသေခံဒရုန်းတွေနဲ့ တိုက်ခိုက်ခဲ့တယ်လို့ဆို

စစ်တပ်ရဲ့အခြေစိုက်စခန်းတွေကို FPV အသေခံဒရုန်းတွေနဲ့ တိုက်ခိုက်ခဲ့တယ်လို့ အမှတ်(၉၉၂၅) တပ်ရင်း Rangoon Warriors PDF တာ၀န်ရှိသူက ပြောပါတယ်။ အဲဒီတိုက်ခိုက်မှုတွေက အမှတ် (၃၇)နည်းဗျူဟာ အထူးတိုင်းစစ်ဌာနရဲ့ စစ်ဆင်ရေးတွေမှာ အသုံးပြု တိုက်ပွဲဝင်ခဲ့တာလို့ ဆိုပါတယ်။ ဘယ်အချိန် ဘယ်နေရာတွေ ဘယ်လို တိုက်ခိုက်ခဲ့တယ် ဆိုတာကိုတော့ အသေးစိတ်ထုတ်ပြောဖို့ မရှိသေးဘဲ အကောင်းဆုံး ကြိုးစားတိုက်ပွဲဝင်နေဆဲ ဆိုတာကို သိစေချင်တယ်လို့ အသေခံဒရုန်းနဲ့တိုက်ခိုက်မှုတွေအကြောင်း သူက ရှင်းပြပါတယ်။ ဒါ့အပြင် စစ်တပ်ဂျန်ဘာတွေကို ကျော်နိုင်တာက နည်းပညာပိုင်းဖြစ်တယ်လို့ အမှတ် (၉၉၂၅) တပ်ရင်း Rangoon Warriors PDF တာ၀န်ရှိသူက ပြောပါတယ်။

◾️မန္တလေးကျောက်ဝိုင်း လုယက်မှုကျူးလွန်သူတွေ ပေါက်ကိုယ်တော်ရဲ့တပည့်ဦးဆောင်တဲ့ ပျူ​တွေဖြစ်နေ

မန္တလေးမြို့၊ မဟာအောင်မြေကျောက်ဝိုင်းက ကုန်သည်တစ်ဦးဆီကနေ လုယက်မှုကျူးလွန်သူတွေဟာ သင်္ကန်းဝတ်ပျူစောထီးခေါင်းဆောင် ပေါက်ကိုယ်တော်ရဲ့တပည့်ဦးဆောင်တဲ့ ပျူစောထီးအဖွဲ့ဖြစ်နေကြောင်း မြို့ခံတွေက ပြောပါတယ်။ ဩဂုတ် ၁၈ရက် မနက်၁၀နာရီခွဲခန့်က မန္တလေးမြို့၊ မဟာအောင်မြေ ကျောက်မျက်ရောင်းဝယ်ရေးစခန်း( ကျောက်ဝိုင်း)မှာ အရောင်းအဝယ်လုပ်နေတဲ့ ကျောက်ကုန်သည် ကိုထက်‌အောင်ဆိုသူကို အမျိုးသား၂ဦးက ပြည်သူ့စစ်တံဆိပ်ပါတဲ့ လက်မှတ်ကိုထုတ်ပြကာ စစ်ဆေးစရာရှိလို့ဆိုပြီး ကျောက်ဝိုင်းအပြင်ဘက်ကို ခေါ်ထုတ်သွားခဲ့ပါတယ်။ အဲဒီနောက် ကိုထက်အောင်ဆီကနေ ကျောက်စိမ်းအချောထည်၂ပွင့်၊ကျောက်စိမ်းဆွဲကြိုး၂ကုံး၊ ချွမ်အမျိုးအစား လည်ဆွဲ၁ကုံး၊ ချွမ်အမျိုးအစား လက်စွပ်၂ကွင်း၊ကျောက်စိမ်းနားကပ်၁စုံ စုစုပေါင်း ကာလတန်ဖိုး ကျပ်သိန်း ၅၀၀ တန်ဖိုးရှိတဲ့ ကျောက်စိမ်းလက်ဝတ်ရတနာတွေကို ယူဆောင်သွားခဲ့တယ်လို့ သိရပါတယ်။ အဲဒီလုယက်သူတွေထဲက ခိုင်းတဲ့သူနှစ်ဦးကို အဲဒီ‌နေ့ညနေမှာပဲ ဖမ်းမိခဲ့ပြီး ကိုယ်တိုင်ကျူးလွန်သူ ၂ဦးကိုတော့ စစ်ကိုင်းမြို့မှာ ဖမ်းမိခဲ့တာလို့ စစ်အုပ်စုနဲ့ နီးစပ်သူတွေဆီက သိရပါတယ်။