ထားဝယ်ခရိုင် အမှတ်(၈၀၀၃)တပ်ရင်း စစ်သင်တန်းဆင်းပွဲကျင်းပ၊ ပြည်သူကို အသက်နဲ့ရင်းကာကွက်တက်ဖို့လိုဟု ထုတ်ပြန်

ဩဂုတ် ၂၄၊ ၂၀၂၆။ ထားမြတ်/People’s Spring

တနင်္သာရီတိုင်းစစ်ဌာန နည်းဗျူဟာ(၃၃) ကွပ်ကဲမှု့အောက်ရှိ ထားဝယ်ခရိုင်အမှတ်(၈၀၀၃)တပ်ရင်း ရဲ့ ပထမအကြိမ် စစ်ပညာခြေခံသင်တန်းပြီးဆုံးကြောင်း မှတ်တမ်းရုပ်သံနဲ့ မှတ်တမ်းဓာတ်ပုံတွေကို အဆိုပါတပ်ရင်းက ထုတ်ပြန်ပါတယ်။

သင်တန်းဆင်းပွဲ အခမ်းအနားကို ဩဂုတ် ပထမပတ်က ကျင်းပခဲ့တာဖြစ်ပြီး သင်တန်းဆင်းပွဲ ဓာတ်ပုံနဲ့ ရုပ်သံကို အခုမှ ဖော်ပြလာတာပါ။

" စစ်သားတစ်ယောက်ခံယူတက်ဖို့၊ အမိန့်နာခံတက်ဖို့၊ ရှေ့တန်းစစ်မြေပြင်မှာ ရန်သူကိုယ် လက်ဦးမှု့ရယူတက်ဖို့၊ ပြည်သူကို အသက်နဲ့ရင်းပြီးကာကွယ်တက်ဖို့၊ ပြည်သူကို ပြည်သူလို့မြင်တက်ဖို့” ကျင်းပတဲ့ သင်တန်းပြုလုပ်တာလို့ ထားဝယ်ခရိုင် အမျတ်(၈၀၀၃) တပ်ရင်းက ထုတ်ပြန်ပါတယ်။

သင်တန်းဆင်းရဲဘော်တွေကို တော်လှန်ရေးအမြင်၊ နိုင်ငံရေးအမြင် နှစ်ခုစလုံး ပူးတွဲလုပ်ဆောင်နိုင်ရန် ထားဝယ်ခရိုင် အမှတ်(၈၀၀၃) တပ်ရင်းမှူးက သင်ကြားပေးခဲ့ကြောင်းလည်း အသိပေးထားပါတယ်။

နိုင်ငံကို ချစ်တဲ့ စိတ် ပြည်သူကို ချစ်တဲ့စိတ် စစ်သင်တန်းဆင်း ရဲဘော်များအတွက် နိုင်ငံရေး အသိစိတ် ထပ်မံ သင်ကြားခဲ့တာလို့ ဆိုပါတယ်။

ထားဝယ်ခရိုင် အမှတ်(၈၀၀၃) တပ်ရင်းဟာ တနင်္သာရီတိုင်း လောင်းလုံမြို့နယ်အတွင်း စစ်ရေးလှုပ်ရှားနေတဲ့ တပ်ဖြစ်ပြီး မဟာမိတ်တွေနဲ့အတူ ပူးပေါင်းကာ စစ်ဆင်ရေးတွေ ဖော်ဆောင်ခဲ့ပါတယ်။
မေလနဲ့ ဇွန်လအတွင်းက လောင်းလုံမြို့နယ်အတွင်း စစ်ကြောင်းထိုးလာတဲ့ စစ်ကောင်စီတပ်ကို တော်လှန်ရေးပူးပေါင်းတပ်တွေနဲ့အတူ တိုက်ခိုက်ခဲ့ပါတယ်။

ဧရာဝတီတိုင်း ရေဘေးသင့်ဒေသတွေမှာ ကူးစက်ရောဂါ စတင်ဖြစ်ပွားနေ

ဩဂုတ်-၂၄၊၂၀၂၆။မိထက်/People's Spring

ဧရာဝတီတိုင်းက ရေဘေးသင့်ဒေသတွေမှာ ဝမ်းရောဂါနဲ့ တခြားကူးစက်ရောဂါအချို့စတင်ဖြစ်ပွားနေပြီ ဘေးသင့်ပြည်သူတွေရဲ့ကျန်းမာရေးအတွက် စစ်ကောင်စီရဲ့ ဌာနဆိုင်ရာက လုံလောက်တဲ့ကျန်းမာရေးစောင့်ရှောက်မှုမပေးဘူးလို့ ဒေသခံတွေက ပြောပါတယ်။

" ငသိုင်းချောင်း၊ အိုင်သပြု၊ ရေကြည်၊ လေးမျက်နှာမြို့တွေကို လာကြည့်။ ရေထဲမှာတကယ်ဒုက္ခရောက်နေကြတာ။ ကူးစက်ရောဂါတွေလည်းဖြစ်နေတာ။ ဒါတွေအတွက် လုံလောက်တဲ့ ဆေးဝါးတွေမရှိဘူး။ အခြေအနေပိုဆိုးလာရင် မနိင်မနင်းဖြစ်မှာပါ"လို့ ကျန်းမာရေးဝန်ထမ်းတစ်ဦးက ပြောပါတယ်။

ဧရာဝတီတိုင်း လေးမျက်နှာမြို့မှာ ပြီးခဲ့တဲ့ ဇူလိုင် ၃၀ရက်က ငဝန်မြစ် ရေကာတာကျိုးကျခဲ့ပြီး လေးမျက်နှာမြို့နယ်အပြင် ဟင်္သာတ၊ ရေကြည်၊ ကျုံ ပျော်နဲ့ ငါးသိုင်းချောင်းမြို့နယ်တွေထဲကကျေးရွာတွေပါ ရေကြီးခဲ့ပါတယ်။

လက်ရှိမှာ လေးမျက်နှာမြို့နယ်အတွင်း ရေအနည်းငယ်ပြန်ကျနေပေမယ့် ရေကြည်နဲ့ ငါးသိုင်းချောင်းမြို့နယ်အတွင်း ရေတက်နေလို့ ယခင်က မကြုံဖူးတဲ့ရေဘေးမျိုးကိုကြုံတွေ့နေရတယ်လို့ မြို့ခံတွေကပြောပါတယ်။ ရေဘေးကြောင့် သေဆုံးတဲ့လူဦးရေစာရင်းကိုလည်း တိုင်းဝန်ကြီးချုပ်ဦးအေးကျော်အမိန့်နဲ့ ဌာနဆိုင်ရာတွေကသတင်းထိန်ချန်ထားတယ်လို့ ဝေဖန်မှုတွေရှိနေပါတယ်။

စစ်တပ်က ခန့်အပ်ထားတဲ့ ဧရာဝတီတိုင်းဝန်ကြီးချုပ် အေးကျော်ဟာ တိုင်းအတွင်း ကျန်းမာရေးဆိုင်ရာကဏ္ဍတွေမှာပါ ဝင်ရောက်စွက်ဖက်နေသလို အမှန်တကယ်လုပ်ဆောင်ရမယ့်ကျန်းမာရေးစောင့်ရှောက်မှုတွေကိုတော့ အကောင်အထည်ဖော်ပေးခြင်းမရှိဘူးလို့ဝေဖန်ခံ နေရပါတယ်။ လက်ရှိ ဧရာဝတီတိုင်းမှာ ရင်ဆိုင်နေရတဲ့ ရေဘေးကြောင့် နေအိမ်မြုပ်နေသူတွေဟာ အဝေးပြေးလမ်းမတွေပေါ်မှာ ယာယီတဲထိုးနေကြရပါတယ်။

ဒါ့အပြင် ပုသိမ်ဆေးရုံမှာ ကိုဗစ်(COVID -19)ကူးစက်ခံထားရတဲ့ လူနာ တွေ့ရှိထားပြီး ပြင်ပကို သတင်းမပေါက်ကြားဖို့ တိုင်းဝန်ကြိးချုပ်က အမိန့်ပေးထားတယ်လို့ ဆေးရုံနဲ့နီးစပ်တဲ့ဒေသခံတွေကပြောပါတယ်။

ပုသိမ်ဆေးရုံမှာ တက်ရောက်ကုသနေတဲ့ နာတာရှည်ဝေဒနာရှင် ၁ဦးကို စစ်ဆေးရာကနေ ကိုဗစ်ရောဂါပိုးကူးစက်တာ စတင်တွေရှိခဲ့ပြီး လက်ရှ်ိမှာ ကူးစက်ခံရသူ ၅ဦးထက်မနည်းကို သီးသန့် ဆောင်မှာ ထားတယ်လို့ မြို့ခံတစ်ဦးက ပြောပါတယ်။

" ခွဲစိတ်ရမယ့်လူနာကို စစ်ဆေးရင်းတွေ့တာ။ ကျန်းမာရေးဝန်ထမ်းတွေက ဌာနဆိုင်ရာလမ်းကြောင်းကနေတဆင့် အထက်ကို တင်ပြတော့ တိုင်းဝန်ကြီးချုပ်ဦးအေးကျော်က သတင်းကို ထိန်းထားဖို့ အမိန့်ပေးတယ်။ ဝန်ထမ်းတွေလည်း စိတ်ပျက်လက်ပျက်လုပ်နေကြရတာ။ ဒီရောဂါက သာမာန်တုပ် ကွေးရောဂါဖြစ်သွားပြီလေ။ လူထုက သတိရှိရှိနေရအောင် ထုတ်ပြန်ပေးရမှာမဟုတ်ဘူးလား။
"လို့ ၎င်းက ပြောပါတယ်။

ကိုဗစ်(COVID -19) ရောဂါဟာ လက်ရှိမှာ အရေးပေါ်အခြေအနေမဟုတ်တော့ပေမယ့် ရောဂါကူးစက်ခံခဲ့ရသူတွေဟာ ကိုယ်ခံအားနည်းခြင်း၊မကြာခဏဖျားနာခြင်းနဲ့ ကူးစက်ခံထားရသူကတစ်ဆင့် အခြားသူတွေကိုအလွယ်တကူးစက်မှုတွေဆက်လက်ဖြစ်ပေါ်နေတဲ့အတွက် လိုအပ်တဲ့ကျန်းမာရေးဆိုင်ရာသတိပေးချက်တွေကို ထုတ်ပြန်ပေးဖို့လိုတယ်လို့ မြို့ခံတွေကပြောပါတယ်။

ကမ္ဘာ့ကပ်ရောဂါဖြစ်တဲ့ကိုဗစ်ရောဂါကို မြန်မာနိုင်ငံမှာ ၂၀၂၀ မတ်လကပထမဆုံး ကူးစက်လူနာစတင်တွေရှိခဲ့ပါတယ်။အဲဒီကာလ အမျိုးသားဒီမိုကရေစီအဖွဲ့ချုပ်ပါတီအစိုးရလက်ထက်မှာ လူအသေ အပျောက်နည်းအောင် ရောဂါကို ထိန်းချုပ်နိုင်ပေမယ့် ၂၀၂၁ ဖေဖော်ဝါရီမှာ စစ်တပ်ကနိုင်ငံတော်အာဏာကိုသိမ်းယူပြီးတဲ့နောက်ပိုင်း ရောဂါကူးစက်မှုအခြေအနေ ဆိုးရွားခဲ့ပါတယ်။
၂၀၂၁ ဇွန်လကစပြီး ကိုဗစ်တတိယလှိုင်းကို မြန်မာလူထု ဆိုးရွားစွာရင်ဆိုင်ခဲ့ရပြီး ‌အောက်ဆီဂျင်ပြတ်လပ်မှုကြောင့် လူထောင်ချီသေဆုံးခဲ့ပါတယ်။ အဲဒီအချိန်မှာ စစ်ကောင်စီက အောက်ဆီဂျင်ရရှိရေးဦးစားပေးမလုပ်ဆောင်ခဲ့ဘဲ သုသာန်ကို တိုးချဲ့ဆောက်လုပ်ဖို့ညွှန်ကြားခဲ့ဖူးပါတယ်။

လက်ရှိမှာတော့ ကိုဗစ်ရောဂါဟာ လူသေဆုံးစေတဲ့အထိမပြင်းထန်တော့သလို ရာသီတုပ်ကွေးအဆင့်သာ ရှိပါတော့တယ်။ ကမ္ဘာ့ကျန်းမာရေးအဖွဲ့ (WHO) ကလည်း အရေးပေါ် ကျန်းမာရေး အခြေအနေ (Global Health Emergency) မဟုတ်တော့ကြောင်း ကြေညာထားပါတယ်။ ဒါပေမယ့် မြို့နယ်အသီးသီးမှာ တုပ်ကွေးရောဂါကူးစက်ခံရသူတွေ ယခင်ကထက်များတယ်လို့ ကျန်းမာရေးဝန်ထမ်းတွေကပြောပါတယ်။

(ဧရာဝတီတိုင်းက ရေကြည်မြို့နယ်မှာ ရေကြီးနစ်မြုပ်နေမှုကို ဒီကနေ့ ဩဂုတ် ၂၄ရက်က တွေ့ရစဉ်။ ဓာတ်ပုံ - CJ)

စစ်တပ်စခန်းတွေကို FPV အသေခံဒရုန်းတွေနဲ့ တိုက်ခိုက်ခဲ့တယ်လို့ Rangoon Warriors PDF တာ၀န်ရှိသူ ပြော

ဩဂုတ်-၂၄၊၂၀၂၆။ဇော်၀င်း/People’s Spring

စစ်တပ်ရဲ့အခြေစိုက်စခန်းတွေကို FPV အသေခံဒရုန်းတွေနဲ့ တိုက်ခိုက်ခဲ့တယ်လို့ အမှတ်(၉၉၂၅) တပ်ရင်း Rangoon Warriors PDF တာ၀န်ရှိသူက ပြောပါတယ်။

အဲဒီတိုက်ခိုက်မှုတွေက အမှတ် (၃၇)နည်းဗျူဟာ အထူးတိုင်းစစ်ဌာနရဲ့ စစ်ဆင်ရေးတွေမှာ အသုံးပြု တိုက်ပွဲဝင်ခဲ့တာလို့ ဆိုပါတယ်။

" ဘယ်အချိန် ဘယ်နေရာတွေ ဘယ်လို တိုက်ခိုက်ခဲ့တယ် ဆိုတာကိုတော့ အသေးစိတ်ထုတ်ပြောဖို့ မရှိသေးဘူး။အကောင်းဆုံး ကြိုးစားတိုက်ပွဲဝင်နေဆဲ ဆိုတာကို သိစေချင်တယ်"လို့ အသေခံဒရုန်းနဲ့တိုက်ခိုက်မှုတွေအကြောင်း သူက ရှင်းပြပါတယ်။

ဒါ့အပြင် စစ်တပ်ဂျန်ဘာတွေကို ကျော်နိုင်တာက နည်းပညာပိုင်းဖြစ်တယ်လို့ အမှတ် (၉၉၂၅) တပ်ရင်း Rangoon Warriors PDF တာ၀န်ရှိသူက ပြောပါတယ်။

အမှတ် (၉၉၂၅) တပ်ရင်း – RANGOON WARRIORS PDF တပ်ရင်းဟာ အခု ၂၀၂၆ ဖေ‌ဖော်ဝါရီက ပြည်သူ့ကာကွယ်ရေးတပ်မတော်(PDF) အထူးတိုင်းစစ်ဌာနက ထပ်တိုးဖွဲ့စည်းလိုက်တဲ့ တပ်ရင်းသစ် ၃ခုအနက်က ၁ ခု ဖြစ်ပါတယ်။

၂၀၂၅ ဧပြီ ၃ရက်မှာ PDF စစ်ရုံးချုပ်က အထူးတိုင်း စစ်ဌာနကို ဖွဲ့စည်းအတည်ပြုခဲ့ရာ စတင်ဖွဲ့စည်းချိန်က တိုင်းစစ်ဌာနအောက် နည်းဗျူဟာ (၅) ခုရှိပြီး တရားဝင် ကွပ်ကဲမှုခံယူထားသော တိုက်ခိုက်ရေးတပ်ရင်း (၁၁) ရင်းနဲ့ ဒရုန်းလက်ရုံးတပ်ဖွဲ့ (၅) ဖွဲ့ ရှိခဲ့ပါတယ်။

ဒါ့အပြင် ပြည်သူ့ကာကွယ်ရေးအဖွဲ့ (ပကဖ) များဖြစ်သော ရန်ကုန်၊ ပဲခူး၊ မွန် ပကဖ တပ်ဖွဲ့များကို စနစ် တကျစုစည်းပြီး တိုက်ခိုက်ရေးစစ်ကြောင်း (၃) ကြောင်း ဖွဲ့စည်းနိုင်ခဲ့သလို ၂၀၂၅ ဒီဇင်ဘာမှာတေ့ အမှတ် (၈၀၀၁) တပ်ရင်းနဲ့ အမှတ် (၁၈၁၉) ဒရုန်းတပ်ဖွဲ့တို့ကို ထပ်တိုးဖွဲ့စည်းခဲ့ပါတယ်။

အထူးတိုင်းစစ်ဌာနဟာအမျိုးသားညီညွတ်ရေးအစိုးရ၊ကာကွယ်ရေးဝန်ကြီးဌာနအောက်မှာ ကရင်ပြည်နယ်နဲ့မွန်ပြည်နယ်မှာ အခြေပြု ဖွဲ့စည်းထားတဲ့ပြည်သူ့ကာကွယ်ရေးတပ်မတော်-PDF နည်းဗျူဟာ တွေ၊ တပ်ရင်း/တပ်ဖွဲ့‌ တွေ၊ ဒရုန်းလက်ရုံးတပ်ဖွဲ့‌ တွေ၊ပြည်သူ့ကာကွယ်ရေးအဖွဲ့ (ပကဖ)တွေနဲ့ စုဖွဲ့ထားသည့် တိုင်းစစ်ဌာနတခုဖြစ်ပါတယ်။

အထူးတိုင်း စစ်ဌာနဟာ ကရင်၊ မွန်ပြည်နယ်တွေမှာ အခြေပြုဖွဲ့စည်းထားတဲ့ PDF နည်းဗျူဟာတွေ တပ်ရင်းတပ်ဖွဲ့တွေ၊ ပကဖတွေနဲ့ စုဖွဲ့ထားတဲ့ တိုင်းစစ်ဌာနဖြစ်ပြီး KNU/KNLAတပ်တွေနဲ့အတူ ကရင်၊မွန်၊ ရေး-ထားဝယ်ဒေသတို့မှာစစ်ရေးဖော်ဆောင်နေသလိုပဲခူးတိုင်းစစ်ဌာန၊ ရန်ကုန်တိုင်းစစ်ဌာနတို့နဲ့ ပူးပေါင်းပြီးပဲခူးတိုင်းနယ်မြေအချို့မှာလည်း စစ်ရေးဖော်ဆောင်နေပါတယ်။

အထူးတိုင်းစစ်ဌာနမှာ ပြည်သူ့ကာကွယ်ရေးတပ်မတော် – PDF နည်းဗျူဟာ (၂၇)၊ နည်းဗျူဟာ (၃၂)၊ နည်းဗျူဟာ (၃၃)၊ နည်းဗျူဟာ (၃၆)၊ နည်းဗျူဟာ(၃၇) ၊ စုစုပေါင်း နည်းဗျူဟာ (၅) ခုနဲ့ စုဖွဲ့ထားပါတယ်။

(အမှတ်(၉၉၂၅) တပ်ရင်း Rangoon Warriors PDF က ရဲဘော်တွေကို တွေ့ရစဉ်။ ဓာတ်ပုံ - Rangoon Warriors PDF)

ကချင်ပြည်နယ် အင်အားဖြည့်လာတဲ့ စစ်သင်္ဘောတွေကို KIA ပူးပေါင်းတပ်က ဒရုန်းနဲ့ တိုက်ခိုက်၊ သင်္ဘော ၁စီး မီးလောင်

ဩဂုတ်၂၄၊၂၀၂၆။ထားမြတ်/People’s Spring

ကချင်ပြည်နယ်ကို အင်အားဖြည့်တင်းဖို့ ကြိုးပမ်းလာတဲ့ စစ်သင်္ဘောအုပ်စုကို ကချင်လွတ်လပ်ရေးတပ်မတော်(KIA)နဲ့ ပြည်သူ့ကာကွယ်ရေးတပ်မတော်(PDF) ပူးပေါင်းတပ်တွေက ဒရုန်းနဲ့ တိုက်ခိုက်ခဲ့တယ်လို့ သတင်းရင်းမြစ်အချို့က ပြောပါတယ်။

ကချင်ပြည်နယ် ရွှေကူမြို့ဘက်ကို အင်အားဖြည့်ဖို့လာတဲ့ စစ်သင်္ဘောတွေကို KIA ပူးပေါင်းတပ်က တိုက်ခိုက်ခဲ့တဲ့ ရုပ်သံကို 7Stars News က ဖော်ပြလာတဲ့ အခြေအနေနဲ့ ပတ်သက်ပြီး သတင်းရင်းမြစ်အချို့က အခုလို ရှင်းပြတာပါ။

“ပြောပြလာတဲ့ သတင်းအရတော့ လတ်တလော တက်လာတဲ့ သင်္ဘောတွေကို တိုက်ခိုက်ခဲ့တယ်လို့ သိရတယ်ဗျ။ ဖြစ်စဉ်နေရာကတော့ အတိအကျ မပြောပြသေးလို့ Comfirm မပေးနိုင်သေးပါဘူးဗျ။ ၆စီးကို ဝင်တိုက်ခဲ့ပြီး ၁စီး မီးလောင်သွားတာကိုတော့ ကနဦး သိထားရပါတယ်” လို့ တော်လှန်ရေးတပ်နဲ့ နီးစပ်တဲ့ သတင်းရင်းမြစ်တဦးက ပြောပါတယ်။

ကချင်စစ်ရေးသတင်းရင်းမြစ်တဦးကလည်း တိုက်ခိုက်မှု ဖြစ်စဉ် အသေးစိတ် မသိရသေးသလို စစ်သင်္ဘောတွေ ကချင်ပြည်နယ်ဘက်ကို မရောက်သေးဘူးလို့ ပြောပါတယ်။

“ဆော်ပလော်တော့ တီးနေကြတယ်။ထိရောက်တဲ့ ဖျက်ဆီးမှုတွေ မလုပ်နိုင်သေးဘူးထင်တယ်။ အဲဒါ(စစ်သင်္ဘောတွေကို ဒရုန်းနဲ့ တိုက်ခိုက်တဲ့ ရုပ်သံ)တွေက သပိတ်ကျင်းဝန်းကျင်က ရုပ်သံတွေ ထင်တယ်” လို့ ကချင်သတင်းရင်းမြစ်က ပြောပါတယ်။

ရုပ်သံပါအချက်အလက်တွေအရ ရေကြောင်းအတိုင်း တန်းစီမောင်းနှင်လာတဲ့ စစ်ကောင်စီသင်္ဘောတွေကို တော်လှန်ရေး ရဲဘော်တွေက ဒရုန်းနဲ့ ထိမှန်အောင် တိုက်ခိုက်နိုင်ခဲ့တာ တွေ့ရပါတယ်။

“မောင်းတဲ့ စက်ခန်းတိုက်မှာ … မင်းတည့်တည့်က သင်္ဘောရဲ့ နောက်က သင်္ဘော… ရှေ့ကနေ ကြိုသွား… နောက်က တွန်းတဲ့ကောင်နော်… နောက်က ရရင်နောက်က ပတ်တိုက်မယ်… မရရင် ရှေ့ကပဲ တိုက်… အဲဒီသင်္ဘောတိုက်… တိုက် “ လို့ တော်လှန်ရေးရဲဘော်တွေက သင်္ဘောကို ဒရုန်းနဲ့ တိုက်ခိုက်မှု ပြုလုပ်စဉ် ပြောဆိုနေတာကို ရုပ်သံမှာ ကြားရပါတယ်။

ဒါ့အပြင်နောက်ထပ် စစ်သင်္ဘောအချို့ကို ဒရုန်းနဲ့ ထပ်မံ တိုက်ခိုက်မှုတွေကိုလည်း ရုပ်သံမှာ တွေ့ရပါတယ်။

အာဏာသိမ်းစစ်တပ်ဟာ ကချင်ပြည်နယ်ဘက်က ဆုံးရှုံးနယ်မြေတွေ ပြန်လည်ထိန်းချုပ်နိုင်ဖို့ ကြိုးပမ်းနေပြီး စစ်အင်အားတွေ အလုံးအရင်း ဖြည့်တင်းတာ၊ စစ်ကြောင်းထိုးတာတွေ ပြုလုပ်လျက်ရှိပါတယ်။

အခုလို မန္တလေးဘက်ကနေ ကချင်ပြည်နယ်ဘက်ကို စစ်အင်အားဖြည့်ဖို့လာတဲ့ သင်္ဘောတွေရဲ့ သတင်းကို ကြားသိရပေမဲ့ ကချင်ပြည်နယ်အတွင်း မရောက်သေးလို့ သတင်းအချက်အလက်တွေ တိတိပပ မသိရသေးကြောင်း KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ဩဂုတ် ၂၃ရက်က ပြောပြထားပါတယ်။

လတ်တလောမှာ စစ်တပ်ဟာ ရွှေကူမှာ စစ်ကူအင်အားအလုံးအရင်းနဲ့ စစ်မျက်နှာ တွေဖွင့်ထိုးစစ်ဆင်နေလို့ တိုက်ပွဲတွေ နေ့စဉ်ပြင်းထန်နေကြောင်း ဗိုလ်မှူးကြီးနော်ဘူက ပြောပါတယ်။ စစ်တပ်ဘက်က လေကြောင်းကနေ အကြီးအကျယ် ဗုံးကြဲတာတွေ ၊ စစ်ကြောင်းထိုးတိုက်ခိုက်တာတွေရှိပေမဲ့ စစ်တပ် စစ်ကြောင်းတွေ ရှေ့မတိုင်းနိုင်သေးကြောင်းလည်း ဗိုလ်မှူးကြီးနော်ဘူက ဩဂုတ် ၂၂ရက်၊ ၂၃ရက် ရွှေ့ကူဒေသ စစ်ရေး အခြေအနေတွေကို ပြောပြထားပါတယ်။

(ကချင်ပြည်နယ်ကို ဆန်တက်လာတဲ့ စစ်သင်္ဘောတွေ။ ဓာတ်ပုံ - Lung Jung LA N)

စစ်ကိုင်းမှာ ရေဘေးကြောင့် ပျက်စီးသွားတဲ့ လမ်းတံတားတွေပြန်ပြင်ဖို့ ဒေသခံတွေအခက်တွေ့နေ

သြဂုတ် ၂၄၊ ၂၀၂၆။ ဇေအောင်/People's Spring

စစ်ကိုင်းတိုင်းက ရေဘေးသင့်ကျေးရွာတွေမှာ ပျက်စီးသွားတဲ့လမ်းတံတားတွေကို ပြန်ပြင်ဖို့ ကုန်ကျစရိတ်မတက်နိုင်တော့လို့ ဒေသခံတွေ သွားလာရေးအခက်အခဲတွေ့နေပါတယ်။

သြဂုတ်လဆန်းပိုင်းကတည်းက ရေကြီးရေလျှံခဲ့တဲ့ စစ်ဘေးသင့်ဒေသ ဖြစ်တဲ့ စစ်ကိုင်းတိုင်းက ရွှေဘို၊ ရေဦး၊ ခင်ဦး၊ တန့်ဆည်၊ ကန့်ဘလူ၊ အရာတော်၊ ဝက်လက်၊ ဒီပဲယင်း အစရှိတဲ့ မြို့နယ်တွေက ရေဘေးသင့်ဒေသတွေမှာ လက်ရှိ ရေပြန်ကျသွားပေမယ့် ရွာချင်းဆက်လမ်းတွေ၊ တာပေါင်လမ်းတွေနဲ့ ချောင်းကူးမြောင်းကူးတံတားတွေပါ ပျက်စီးသွားခဲ့ပြီး ပြုပြင်နိုင်ခြင်း မရှိ​​​သေးတာကြောင့် သွားလာရေးအခက်အခဲတွေ ရှိနေကြောင်း ဒေသခံတွေက ပြောပါတယ်။

"ကျန်းမာရေး၊ သီးနှံထုတ်ရေးအတွက် အခက်အခဲတွေဖြစ်နေတယ်။ အဲဒီလမ်းတွေ ပြန်ပြင်မယ်ဆို ကုန်ကျစရိတ်ကလည်း များမှာကြောင့်မို့လို့ တောင်သူတွေ မတက်နိုင်ကြတော့ဘူး"လို့ ဝက်လက်မြို့နယ် ရေဘေးသင့်ဒေသက ပြည်သူတစ်ဦးက ပြောပါတယ်။

လက်ရှိ ဝက်လက်နယ်ထဲမှာတင် ရေဘေးသင့်ကျေးရွာ ၂၅ရွာက လမ်းတွေ ရေတိုက်စားလို့ ပျက်စီးသွားခဲ့ပြီး ကုန်ကျစရိတ်မတက်နိုင်သေးလို့ မပြင်နိုင်သေးဘူးလို့ ဒေသခံတွေက ပြောပါတယ်။

စစ်ကိုင်းတိုင်းက ရေဘေးသင့်ဒေသတွေမှာ လက်ရှိ ရေပြန်လည်ကျဆင်းသွားပေမယ့် ရေဘေးသင့်ဒေသပြန်လည်ထူထောင်ရေးအတွက် အကူအညီတွေ လိုအပ်နေတယ်လို့ ရေဘေးသင့်ဒေသ ကူညီနေသူတွေက ပြောပါတယ်။

စစ်ကိုင်းတိုင်းက အဲဒီဒေသတွေမှာ ရေဘေးသင့် ပြည်သူ ၂၂၆,၀၀၀ ကျော်ရှိ​ခဲ့ပါတယ်။ စစ်ကိုင်း၊မန္တလေး၊ မကွေး၊ ဧရာဝတီတိုင်းနဲ့ ကရင်ပြည်နယ်တို့ရှိ မြို့နယ်ပေါင်း ၂၅ မြို့နယ်မှာ ရေကြီးရေလျှံမှုတွေ ဖြစ်ပွားနေပါတယ်။ ရေဘေးကြောင့် စုစုပေါင်း လူဦးရေ ၆၁၉,၇၆၈ ဦးခန့် ထိခိုက်ခံစားနေရပြီး သေဆုံးသူ ၃၂ ဦးနဲ့ပျောက်ဆုံးသူ ၂ ဦး ရှိနေကြောင်း အမျိုးသားညီညွတ်ရေးအစိုးရရဲ့ လူမှုရေးရာ၊ အလုပ်သမားနဲ့ လူသားချင်းစာနာထောက်ထားရေး ဝန်ကြီးဌာနက သြဂုတ် ၂၁ရက်က ထုတ်ပြန်ခဲ့ပါတယ်။

(ဝက်လက်မြို့နယ်အတွင်း ရေဘေးကြောင့် ပျက်စီးသွားသောလမ်းများအား တွေ့ရစဥ်။ ဓါတ်ပုံ-ဒေသခံ)

တနင်္သာရီမြို့နယ်မှာ စစ်တပ် ပစ်ခတ်လို့ ပြည်သူ ၁ဦး ဒဏ်ရာရ၊ ဘုတ်ပြင်းမှာ စစ်တပ်က နေအိမ်အချို့ မီးရှို့

ဩဂုတ် ၂၄၊ ၂၀၂၆။ ထားမြတ်/People’s Spring

တနင်္သာရီတိုင်း တနင်္သာရီမြို့နယ်မှာ အာဏာသိမ်းစစ်တပ်က လက်နက်ကြီးနဲ့ ပစ်ခတ်လို့ အရပ်သား ၁ဦး ဒဏ်ရာရခဲ့ကြောင်း ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က သတင်းထုတ်ပြန်ပါတယ်။

ဩဂုတ် ၂၂ရက် ညပိုင်းက တနင်္သာရီမြို့နယ် ကျွဲထိန်းကုန်းရွာကို စစ်တပ်က လက်နက်ကြီးနဲ့ ပစ်ခတ်လို့ (၆၆)နှစ်အရွယ် အမျိုးသမီး ၁ဦး ဒဏ်ရာရခဲ့တာလို့ ဖော်ပြပါတယ်။

ပစ်ခတ်မှုကို စစ်တပ်ရဲ့ ခမရ(၅၆၁) တပ်ရင်းက တပ်ဖွဲ့ဝင်တွေက လုပ်ဆောင်ခဲ့တာဖြစ်တယ်လို့ ဆိုပါတယ်။

စစ်တပ်ဟာ ဩဂုတ် ၁၇ရက်ကလည်း တနင်္သာရီမြို့နယ် သဲဖြူရွာချောင်းဖျား(မဲ့ဝါးခီး) ဒေသက စစ်ရှောင်နေထိုင်ရာ နေအိမ်တွေကို မီးရှို့ဖျက်ဆီးခဲ့ပါတယ်။ အဲဒီလို မီးရှို့တဲ့ စစ်ကောင်စီ စစ်ကြောင်းကို ကရင်အမျိုးသားလွတ်မြောက်ရေးတပ်မတော်(KNLA)နဲ့ ပူးပေါင်းတပ်က ဩဂုတ် ၁၉ရက်နဲ့ ၂၀ရက်နေ့တွေမှာ ကြားဖြတ်တိုက်ခိုက်ခဲ့တယ်လို့ ဒေသခံ သတင်းရင်းမြစ်က ပြောပါတယ်။ အဲဒီတိုက်ခိုက်မှုအတွင်း စစ်တပ်ဘက်က ထိခိုက်သူအချို့ရှိခဲ့တယ်လို့လည်း အသိပေးပါတယ်။

စစ်တပ်ဟာ တနင်္သာရီတိုင်း ဘုတ်ပြင်းမြို့နယ်မှာလည်း တိုက်ပွဲမရှိဘဲ ပြည်သူ့နေအိမ်အချို့ကို မီးရှို့ဖျက်ဆီးခဲ့တယ်လို့ ပြည်သူ့ကာကွယ်ရေးတပ်မတော် ကော့သောင်းခရိုင် အမှတ်(၁)တပ်ရင်းက သတင်းထုတ်ပြန်ပါတယ်။

ဘုတ်ပြင်းမြို့နယ်၊ ပြည်ကြီးမဏ္ဍိုင်မြို့၊ ရတနာပုံလမ်းပိုင်း (၅) မိုင်အနီး ဝန်းကျင်က ပြည်သူ့နေအိမ် ၃လုံးကို စစ်တပ်က အကြောင်းမဲ့မီးရှို့ခဲ့တာလို့ ဖော်ပြထားပါတယ်။

ကော့သောင်းခရိုင် အမှတ် (၁) တပ်ရင်းအနေဖြင့် ပြည်သူလူထု၏ အသက်အိုးအိမ် စည်းစိမ်ကို အစဉ်အမြဲ ကာကွယ်စောင့်ရှောက်သွားမည်ဖြစ်ပြီး၊ အာဏာရှင် စစ်တပ်ရဲ့ ပြည်သူအပေါ်ဖိနှိပ်ရက်စက်မှုများကို ပြည်သူများနဲ့အတူ လက်တွဲတိုက်ပွဲဝင်သွားမယ်လို့လည်း ထုတ်ပြန်ထားပါတယ်။

(စစ်တပ် ပစ်ခတ်မှုကြောင့် ထိမှန် ဒဏ်ရာရတဲ့ အမျိုးသမီးကို တွေ့ရစဉ်။ ဓာတ်ပုံ - KNU - Mergui-Tavoy District)

ရန်ကုန်မြို့စာချုပ်စာတမ်းမှတ်ပုံတင်ရုံးမှာ စစ်တပ်လွှတ်တော်ဥက္ကဌရဲ့တူ ဌာနမှူးဦးဆောင်တဲ့ လာဘ်စားမှု ဆိုးရွားနေ

ဩဂုတ်-၂၄၊၂၀၂၆။မိုမို/People's Spring

ရန်ကုန်မြို့၊ စာချုပ်စာတမ်းမှတ်ပုံတင်ရုံးမှာ စစ်တပ်လွှတ်တော်ဥက္ကဌ ဗိုလ်ချုပ်ကြီးဟောင်းအောင်လင်းဒွေးရဲ့ တူတော်စပ်သူ ဌာနမှူး မင်းသူအောင်ဦးဆောင်ပြီး လာဘ်စားနေမှုဟာ ဆိုးရွားနေတယ်လို့ ငွေတောင်းခံရသူတချို့က ပြောပါတယ်။

စာချုပ်စာတမ်းမှတ်ပုံတင်ရုံးဌာနမှူး မင်းသူအောင်က စာချုပ်စာတမ်းတွေစစ်ဆေးပါက လက်အောက်ဝန်ထမ်းကတဆင့် ငွေကြေးတောင်းခံနေတယ်လို့ ကိုယ်တိုင်ငွေပေးခဲ့ရသူတစ်ဦးက ပြောပါတယ်။

ပိုက်ဆံကို စာအိတ်နဲ့ ထည့်ပေးရပြီး ပိုက်ဆံနည်းရင် စာချုပ်တွေမှာ အချက်အလက်မပြည့်စုံသေးကြောင်းအပြစ်ရှာကာ ကြန့်ကြာအောင် ပြုလုပ်နေတယ်လို့ ၎င်းက ဆိုပါတယ်။

ရန်ကင်းမြို့နယ်မှာရှိတဲ့ စာချုပ်စာတမ်းမှတ်ပုံတင်ရုံးက မြေယာ၊ အိမ်နဲ့အဆောက်အအုံ ရောင်းဝယ်တာ၊ပေးကမ်းတာ၊ ပေါင်နှံတာနဲ့ ငှားရမ်းတာစတဲ့ ပိုင်ဆိုင်မှုဆိုင်ရာ စာချုပ်စာတမ်းတွေကို တရားဝင်မှတ်ပုံတင်ပေးပြီး လက်ဗွေနှိပ်စစ်ဆေးမှု၊ မှတ်တမ်းထိန်းသိမ်းမှု နဲ့ တရားဝင် ပိုင်ဆိုင်မှု အထောက်အထား ခိုင်မာစေဖို့ ဆောင်ရွက်ပေးတဲ့ ဌာနဖြစ်ပါတယ်။ ဌာနမှာ နောက်ဆုံးအဆင့်အတည်ပြုချက်ကို ဌာနမှူးက လက်မှတ်ထိုးပေးရတာဖြစ်ပါတယ်။

ဒါကြောင့် မင်းသူအောင်က သူ့လုပ်ပိုင်ခွင့်ကိုအသုံးချပြီး ငွေကြေးအမြောက်အမြားလက်ခံရယူနေတာလို့ ငွေတောင်းခံရသူတစ်ဦးက ပြောပါတယ်။

အထက်လူကြီးတွေလာရင် စားသောက်နေထိုင်တည်းခိုစရိတ်စီစဉ်ပေးရသလို စာအိတ်ထူထူနဲ့ ကန်တော့ရတာကြောင့် စာချုပ်စာတမ်းမှတ်ပုံတင်ရုံးမှာ မှတ်ပုံလာတင်သူတွေထံက ပိုက်ဆံတောင်းရတာလို့ မင်းသူအောင်က အကြောင်းပြတယ်လို့ သိရပါတယ်။

ဒါ့အပြင် သူဟာ ဗိုလ်ချုပ်ကြီးဟောင်းအောင်လင်းဒွေးတူအရင်းဖြစ်တာကြောင့် သူ့လုပ်ရပ်တွေကိုမကျေနပ်ရင် “ကြိုက်တဲ့လူ၊ ကြိုက်တဲ့နေရာတိုင်လို့ရတယ်၊ ဂရုမစိုက်ဘူး” ဆိုပြီး ပြောတတ်တယ်လို့ ဌာနနဲ့ နီးစပ်တဲ့ သတင်းရင်းမြစ်က ပြောပါတယ်။

စာချုပ်စာတမ်းရုံးမှာစာချုပ်တွေ မှတ်ပုံတင်ဖို့အတွက် အဆင့်ဆင့်လာဘ်စားမှုတွေများနေပြီး ကနဦးပြုလုပ်ရတဲ့ စာချုပ်စာရင်းသွင်းတာအပြင် တုံတင်ယူတဲ့ကောင်တာမှာထိုင်တဲ့ ဝန်ထမ်း‌တွေက အစ ပိုက်ဆံကိုစေတနာကြေးမဟုတ်ဘဲ သူတို့လိုချင်တဲ့ ငွေပမာဏကိုပြောပြီး တောင်းခံတာ၊အလှူငွေထည့်ဖို့ဆိုပြီး ငွေဖလားကို မသိမသာချထားတာတွေရှိနေတယ်လို့ မှတ်ပုံတင်သူတချို့က ပြောပါတယ်။

ဌာနမှူး မင်းသူအောင်ရဲ့အခန်းစောင့် အကြီးကောင်ဆိုသူ အငယ်တန်းစာရေးကလည်း ကိုယ်ပိုင်ကားအပြင် တက္ကစီယာဥ်ပါ ပိုင်ဆိုင်နေပြီလို့ စာချုပ်စာတမ်းမှတ်ပုံတင်ရုံးနဲ့နီးစပ်သူတစ်ဦးက ပြောပါတယ်။

မင်းသူအောင် ဦးဆောင်ပြီး လာဘ်စားမှုတွေအကြောင်းကို ကြေးတိုင်နဲ့ မြေစာရင်းဦးစီးဌာန၊ရုံးချုပ်ကို တိုင်ကြားထားပေမယ့် အကြောင်းမထူးသေးဘူးလို့ သိရပါတယ်။

"နောက်လ ၁ ရက်နေ့စမယ့် အိမ်ခြံမြေအရောင်းအဝယ်မှာ ရောင်းသူ၊ ဝယ်သူ နှစ်ဘက်လုံး အခွန်ဆောင်မှ မြေအမည်ပေါက် ပြောင်းခွင့်ရတော့မယ့်သတ်မှတ်ချက်ကြောင့်လည်း စာချုပ်စာတမ်းမှတ်ပုံတင်ရုံးက ငွေပိုရွှင်ဖို့ရှိတယ်"လို့ အိမ်၊ခြံ၊မြေအကျိုးဆောင်တစ်ဦးက ပြောပါတယ်။

အိမ်ခြံမြေ၊ အဆောက်အအုံ၊ တိုက်ခန်းတွေ ဝယ်ယူရောင်းချတဲ့ ကိစ္စတွေအတွက် စာချုပ်စာတမ်းမှတ်ပုံတင်ရုံးမှာ မှတ်ပုံတင်စာချုပ်ချုပ်ဆိုခြင်း ၊ မြို့ပြနှင့်အိမ်ရာဖွံ့ဖြိုးရေးဦးစီးဌာနနဲ့ရန်ကုန်မြို့တော်စည်ပင်သာယာရေးကော်မတီမှာ အမည်ပြောင်းလျှောက်ထားခြင်းတွေကိုဝယ်ယူသူရဲ့ ဝင်ငွေခွန်စည်းကြပ်ပြီးစီးမှု အထောက်အထားအပြင် ရောင်းချသူဘက်ကလည်း အခွန်ကင်းရှင်းကြောင်းထောက်ခံချက်ပုံစံ တင်ပြနိုင်မှဝယ်ယူသူကို အမည်ပြောင်းမှတ်ပုံတင်ပေးမယ်လို့ ပြည်တွင်းအခွန်များဦးစီးဌာနက ထုတ်ပြန်ထားပါတယ်။ အဲ့ဒီလုပ်ငန်းစဉ်ကို လာမယ့်စက်တင်ဘာ ၁ရက်မှာ စတင်ဆောင်ရွက်မယ်လို့ကြေညာထားပါတယ်။

ဒါကြောင့် စာချုပ်စာတမ်းမှတ်ပုံတင်ရုံးအပြင် သက်ဆိုင်တဲ့ဌာနဆိုင်ရာတွေမှာ လာဘ်စားမှုတွေပိုဆိုးလာလိမ့်လို့ ရန်ကုန်မြို့ခံတွေက ပြောပါတယ်။

စစ်တပ်က နိုင်ငံတော်အာဏာကိုသိမ်းယူပြီးနောက်ပိုင်း ဌာနဆိုင်ရာတွေမှာ အဂတိလိုက်စားမှုတွေ ဆိုးရွားနေတယ်လို့ လုပ်ငန်းရှင်တွေကပြောပါတယ်။ကမ္ဘာနိုင်ငံတွေရဲ့ အကျင့်ပျက်ခြစားမှုတွေကို စောင့်ကြည့် အကဲဖြတ်နေတဲ့ ဂျာမနီနိုင်ငံ အခြေစိုက် နိုင်ငံတကာပွင့်လင်းမြင်သာမှုရှိရေးအဖွဲ့(Transparency International) က ပြီးခဲ့တဲ့ဖေဖော်ဝါရီလမှာထုတ်ပြန်တဲ့ အစီရင်ခံစာမှာ မြန်မာနိုင်ငံဟာ အဂတိလိုက်စားမှု အညွှန်းကိန်းအတွက် အမှတ် ၁၀၀ မှာ ၁၆ မှတ်ပဲ ရပြီး နိုင်ငံပေါင်း ၁၈၂ နိုင်ငံထဲမှာ အဆင့် ၁၇၁ မှာ ရှိနေပါတယ်။ အာဆီယံဒေသတွင်းမှာရော အိမ်နီးချင်းနိုင်ငံတွေနဲ့ပါ နှိုင်းယှဉ်ရင် မြန်မာနိုင်ငံက အဆိုးဆုံး ဖြစ်နေပါတယ်။

ငွေတောင်းခံတာတွေ နဲ့ပတ်သက်လို့ စာချုပ်စာတမ်းမှတ်ပုံတင်ရုံးနဲ့ ကြေးတိုင်နှင့်မြေစာရင်းဦးစီးဌာနကို ဒီနေ့ ဩဂုတ် ၂၄ရက်မှာ လူထုနွေဦးက ဖုန်းနဲ့သုံးကြိမ်ဆက်သွယ်ခဲ့ပေမယ့် လက်ခံဖြေကြားတာ မရှိခဲ့ပါဘူး။

စစ်တပ်လွှတ်တော်မှာ လက်ရှ်ိအမျိုးသားလွှတ်တော်ဥက္ကဋ္ဌတာဝန်ယူထားတဲ့ အောင်လင်းဒွေးဟာ စစ်ကောင်စီက ၂၀၂၁ ခုနှစ်အာဏာသိမ်းပြီးနောက်ပိုင်း စစ်ခေါင်းဆောင် မင်းအောင်လှိုင်ရဲ့ အမိန့်တွေကို လက်မှတ်ရေးထိုးထုတ်ပြန်ပေးခဲ့တဲ့ စစ်ကောင်စီရဲ့အဓိက ထောက်တိုင်တစ်ဦးဖြစ်ပြီး အမေရိကန်နဲ့ ဥရောပနိုင်ငံတွေကလည်း အရေးယူ ပိတ်ဆို့ခံထားရသူဖြစ်ပါတယ်။

မြိုင်မြို့နယ်အနောက်ခြမ်း ရေနံမြေအနီးမှာ တိုက်ပွဲပြင်းထန်နေ

ဩဂုတ်-၂၄၊၂၀၂၆။ဖိုးသား/People's Spring

မကွေးတိုင်း၊ မြိုင်မြို့နယ်အနောက်ခြမ်းက ရေနံမြေကို ထိန်းချုပ်ဖို့ ကြိုးပမ်းနေတဲ့ အာဏာသိမ်းစစ်တပ်နဲ့ တော်လှန်ရေးတပ်တွေ တိုက်ပွဲပြင်းထန်နေပြီး စစ်တပ်က လေကြောင်းကနေ ဗုံးကြဲနေတယ်လို့ ဒေသခံသတင်းရင်းမြစ်တချို့က ပြောပါတယ်။

အင်အား ၅၀၀ ခန့်နဲ့ ၃လ ၀န်းကျင်ကြာထိုးစစ်ဆင်နေတဲ့ စစ်တပ်ဟာ တော်လှန်ရေးတပ်တွေရဲ့ တားဆီးပိတ်ဆို့တိုက်ခိုက်မှုကြောင့် လေကြောင်းကနေ ပစ်ကူအသုံးပြုပြီး နေ့စဉ် တိုက်ခိုက်ဗုံးကြဲနေတယ်လို့ ဆိုပါတယ်။

"ဒီနေ့ ညနေ(၃ နာရီခွဲ) အထိ ဆို ဂျက်ဖိုက်တာ နဲ့ ကြဲတာ ငါးကြိမ်ရှိပြီ။Y 12 နဲ့ရော ရဟတ်ယာဉ် တွေပါသုံးတာ မပါသေးဘူး"လို့ မြိုင်မြို့နယ်မြေပြင်သတင်းရင်းမြစ်က ပြောပါတယ်။

မြိုင်မြို့နယ်အနောက်ပိုင်း တောင်စုံရွာ နဲ့ တဲကြီးကျေးရွာ အနီးတဝိုက်က ဝဲတူးရေနံမြေကို ထိန်းချုပ်ဖို့ စစ်တပ်က ကြိုးပမ်းနေတာလို့ အသိပေးပါတယ်။

"ဝဲတူးပတ်လည်ကို ရောက်နေတယ်။ မှော်နှုတ်ခမ်းကိုရောက်နေပြီ"လို့ မြိုင်မြို့နယ် ဒေသခံတစ်ဦးက စစ်တပ်စစ်ကြောင်းအခြေအနေကို ပြောပါတယ်။

မြိုင်မြို့နယ်အနောက်ခြမ်းက ဝဲတူးရေနံမြေအပါအ၀င် ရေနံမှော်တွေကို ၂၀၂၄ မတ်လကတည်းက ဒေသအခြေစိုက်တော်လှန်ရေးအဖွဲ့တွေက တိုက်ခိုက်သိမ်းပိုက်ခဲ့တာဖြစ်ပါတယ်

ဇွန် နဲ့ဇူလိုင်လက တိုက်ပွဲတွေအတွင်း စစ်တပ်စစ်ကြောင်းထံက လက်နက်ခဲယမ်းတွေ ရခဲ့တာရှိသလို တော်လှန်ရေးရဲဘော်တချို့လည်း ကျဆုံးခဲ့ပါတယ်။

ပြီးခဲ့တဲ့ တစ်လတည်းမှာပဲ စစ်တပ်က မြိုင်ဒေသမှာ လေကြောင်းတိုက်ခိုက်မှုအကြိမ်ရေ ၂၄၀ ၀န်းကျင်ရှိခဲ့တယ်လို့ သိရပါတယ်။

ဒါ့အပြင် ကျေးရွာ ၈ရွာထက်မနည်း မီးရှို့ခံခဲ့ရတာကြောင့် နေအိမ်အလုံး ၂၀၀ ကျော် ပျက်စီးခဲ့ပြီး အရပ်သားပြည်သူ ၃၀ နီးပါးကို စစ်တပ်စစ်ကြောင်းက သတ်ဖြတ်ခဲ့ပါတယ်။

(အညာမြေတပ်ပေါင်းစုက ရဲဘော်တွေကို တွေ့ရစဉ်။ ဓာတ်ပုံ - အညာမြေတပ်ပေါင်းစု)