(အာဏာသိမ်းစစ်တပ်က စစ်ဆေးရေးလုပ်ပြီး ဆိုင်ကယ်တွေကို သိမ်းဆည်းနေစဉ်။ ဓာတ်ပုံ - CJ။ ပုံအဟောင်း ဖြစ်ပါတယ်)

■အ​တွေးအမြင်

ရန်ကုန်မှာ ရန်ကုန် ဘယ်မှာလဲ

-လင်းဆက်ငြိမ်းချမ်း ​ရေးသားသည်။


ရန်ကုန်ဟာ မိုးချုပ်တာနဲ့ ညနက်သွားတော့တယ်လို့ ညီငယ်တစ်ဦးကဆိုတော့ အဲဒီစကားရဲ့ အဓိပ္ပါယ်ကို ကျနော်နားလည်ဖို့ ခပ်နက်နက် ဆက်တွေးရတယ်။

ဒါပေမဲ့၊အာဏာသိမ်းအပြီးကိုဗစ်အလွန်ကတည်းက ရန်ကုန်ကနေ ဆုတ်ခွာခဲ့ရသူဆိုတော့ ပစ္စက္ခရန်ကုန်ကို အလုံးစုံငုံမိဖို့ ဘယ်လွယ်တော့မလဲ။ ဒါနဲ့ ဘာကိုဆိုလိုတာလဲလို့ မေးကြည့်မိ။ နောက် ၃မိနစ်အကြာမှာ ကျနော့်ရဲ့မက်ဆင်ဂျာထဲည၈နာရီကျော်ဆိုတဲ့စာသားနဲ့အတူ ဓာတ်ပုံ၃ပုံ အပြေးရောက်လာတယ်။

သူ့တိုက်ပေါ်ကနေ ရိုက်လိုက်တဲ့ဓာတ်ပုံတွေ။ လမ်းမပေါ် လျှပ်စစ်မီးက လင်းနေပေမဲ့ ခွေး တွေသာ ဟိုတစ်စု ဒီတစ်ကောင်။ပြီးတော့ ခပ်ပျပျမြင်ရတဲ့လူတစ်ယောက်ဒါပဲ။ည၈နာရီကို စွန်းရုံရှိသေး၊တစ်ချိန်ကဒီအိမ်ရာကြီးရဲ့ ည၈
နာရီဆိုတာ လူတရုန်းရုန်းနဲ့ စည်ကားနေခဲ့တာ ကိုယ်ကိုယ်တိုင် လည်း ကောင်းကောင်း သိခဲ့ဖူးတာကြောင့် အံ့အားသင့်မိ။

"လူမစည်တော့မှန်း သိပေမဲ့ အခုလောက်ဆိုးလိမ့်မယ်လို့ မထင်ထားဘူး”

“ဟုတ်တယ်အစ်ကို၊ ဘယ်သူမှ ကိစ္စအရေးမကြီးဘဲ ဒီအချိန် အပြင်မထွက်တော့ဘူး။ကျနော် တို့ ဖြတ်သန်းခဲ့တဲ့ ရန်ကုန်ညတွေ မရှိတော့တာ ကြာပြီ”လို့ ညီငယ်က ပြောပြတော့ တစ်ချိန်က ဝင်း ပခဲ့တဲ့ ရန်ကုန်ညတွေကို ပြန်ငေးမိတယ်။

မှတ်မိသေးတယ်။သတင်းဂျာနယ်တွေခေတ်တစ်ခေတ်ထူခဲ့တဲ့ ၂၀၁၀ပတ်လည်လောက် တုန်းကတစ်ပတ်မှာတစ်ကြိမ် ည ၉ နာရီခွဲ၊၁၀နာရီ ဖောင်ပိတ်ပြီးတဲ့အခါ တစ်နေကုန် ခေါင်းတွေ အုံခဲ့သမျှကျနော်တို့အဖွဲ့သားတွေ ၁၉ လမ်းသို့ သုတ်သုတ်ချီ။ခြစ်တောက်နေတဲ့ လည်ချောင်းထဲ ဘီယာ အေးအေးလေး စီးဝင်သွားရင်ကို စမ်းချောင်းထဲ ဒိုင်ဗင်ထိုးချလိုက်သလို စိတ်တွေကအလိုလိုကြည်သွားတော့တယ်။
ည ၉ နာရီခွဲ၊၁၀နာရီဆိုတာ ၁၉လမ်းအတွက်တော့ အခုမှ ညနေစောင်းတယ်ဆိုရုံပဲ။လမ်းဘေး မှာ ဖွဲ့စည်းထားတဲ့ ဝိုင်းမှာ ကံကောင်းထောက်မစွာနဲ့ ဝိုင်းခွင့်ရလိုက်ရင် လွတ်လပ်လေပြေကို ထွေး လိုက်ရသလို လူတစ်ကိုယ်လုံး ပေါ့ပါးလို့။

၁၉လမ်းဆိုတာ လူမျိုးမရွေး၊ဘာသာမရွေး၊ အဆင့်အတန်းမခွဲ၊အသွေးအရောင်စုံလှတဲ့ ပျိုမဒီ တို့ကလည်း ၁၉လမ်းထဲရောက်ရင် အ
လိုလိုလှနေရော့သလား ငေးလိုက်တိုင်း လှနေတာမို့ ကျနော်တို့ ရဲ့ ဝိုင်းသိမ်းချိန်ဟာ ၁၂နာရီရဲ့ ဟိုဘက်တောင် ရောက်ချင်ချင်။

နောက်တစ်ရက်မနက် အေးအေးဆေးဆေးနှပ်ချင်ရင်အိမ်ပြန်တယ်။ ဂျက်လိုမြန်တဲ့ အောက် ဆိုဒ်ကားတွေက သာကေတကနေ သီရိမင်္ဂလာဈေးဟောင်းထိ တစ်ညလုံး အ
ဆက်မပြတ်။အဲဒီတုန်းကသီရိမင်္ဂလာဈေးဟောင်းဆိုတာကို မဖျက်သိမ်းရသေး၊ ရောင်းပန်းဝယ်ပန်း ကောင်းတုန်းမို့ သီရိမင်္ဂလာဈေးဟောင်းရောက်ရင် လူတွေ တရုန်းရုန်း တအုံးအုံးနဲ့ နှုတ်ခမ်းနီထူထူဈေးကွက်ကလည်း တော်တော် အလုပ်ဖြစ်ကြတဲ့ပုံ။

ကွယ်လွန်သွားပြီဖြစ်တဲ့ မိတ်ဆွေကဗျာဆရာဟိန်းမြတ်ဇော်က တော့ သီရိမင်္ဂလာဈေး ရောက်ရင်သူ့ဖောက်သည်ဆိုင်ထဲဝင် ဘီအီးတစ်ပိုင်းနဲ့ နောက်တစ်ဖြတ်။ အိပ်ချင်လာရင် စားပွဲမှာပဲ ခေါင်းစိုက်ပြီး ကျိုးလိုက်။ မနက်
၂နာရီခွဲ၊၃နာရီလောက်ဆို စားပွဲထိုးလေး က ဇက်ကြောလေးဘာလေးဆွဲပေးပြီး ‘ထတော့ အစ်ကို’လို့ နှိုးပေးသေးသတဲ့။ အဲဒီတော့မှပဲ ကိုယ့် လူက မျက်နှာလေးဘာလေးသစ်၊ဈေးထဲကို ဝင်ကာ အိမ်အတွက် ဈေးပေါတဲ့ဟင်း
သီးဟင်းရွက်တွေ ဝယ်ကာ လှိုင်သာယာကားပေါ်တက်။ အိမ်ပြန်ရောက်တော့ မနက်၄နာရီကျော်။

ကျနော်ကတော့သီရိမင်္ဂလာဈေးဟောင်းရောက်ရင် လှိုင်သာယာကားပေါ်တက်၊ အခု ဖွင့်နေ တဲ့ လှိုင်မြို့နယ်ထဲက သီရိမင်္ဂလာဈေးသစ် မရောက်ခင်မှာဆင်း။အိမ်ပြန်ရောက်ချိန်က သန်းခေါင် ကျော် ၁နာရီဆိုပေမဲ့ စိတ်ထဲမှာ လုံခြုံမှုမရှိဘူးလို့ တစ်ခါမှ မခံစားမိ။တစ်ခါ
တစ်ရံ ၁၉လမ်းကနေ အိမ်ပြန်ဖို့ ပျင်းလာရင် ရန်ကုန်မြို့ထဲကို ဘက်ဂီယာပြန်ထိုးပြီး ရုံးမှာပဲနှပ်လိုက်ရုံ။ဒုတိယအာဏာရှင်သန်းရွှေခေတ်ဆိုပေမဲ့ ရန်ကုန်မြို့ရဲ့ ညသန်းခေါင်ယံဟာ လမ်း သလားရတာ ကြောက်သွေးမဝင်မိ။

ကြံ့ဖွံ့အစိုးရလက်ထက်မှာလည်း အဲဒီလိုပဲ။ NLDအစိုးရလက်ထက်၊ ခေတ်သစ်ဆီ ရှေ့သို့ချီနေ တဲ့ ငါတို့အစိုးရဆိုတဲ့မာန်က ပြည်သူ့ရင်ထဲမှာ ကျစ်ကျစ်လစ်လစ်။ ၁၉လမ်းဆိုတာ ရန်ကုန်ရောက် နိုင်ငံခြားသားတွေအတွက် ညတွေမှာ လမ်းသလားရမယ့်တစ်နေရာအဖြစ် တလူလူလွင့်လို့။

“အခုတော့ ည၇နာရီကျော်ရင်မြို့ထဲမှာတောင် လိုင်းကားရဖို့ မသေချာတော့ဘူး”လို့ ပြောတဲ့ ညီငယ်ရဲ့အသံက နားထဲကို ကန့်လန့်ဖြတ် ဝင်လာတယ်။လိုင်ကားရဖို့ မသေချာသလို ကိုယ့်ဘဝကိုယ် ပြန်ရပါ့မလားဆိုတဲ့စိတ်ကလည်း တထိတ် ထိတ်ပဲလို့ ညီငယ်က ဆက်ပြောတော့ နားစွင့်ရပြန်တယ်။

“ပေါ်တာဆိုတာ ၄၀ကျော် ၅၀လည်း ဆွဲနေတယ်”လို့ ညီငယ်က ထပ်ပြောမှ ကိုယ့်ဘဝကိုယ် ပြန်ရပါ့မလားဆိုတဲ့စကားရဲ့ အဓိပ္ပါယ်ကို ခပ်ရေးရေး သဘောပေါက်လာတယ်။

မြန်မာမှာ နာမည်ဆိုးနဲ့ ကျော်ကြားလွန်းလှတဲ့ ပေါ်တာ။ရန်ကုန်မှာဆွဲလိုက်တဲ့ ပေါ်တာတွေ က သောက်သောက်လဲ။လူမှုကွန်ရက်ပေါ် လူပျောက်ကြော်ငြာတွေဖွေးလို့။ စစ်တပ်ကလည်းဆွဲ၊ ရဲ ကလည်း ဆွဲ၊ ပျူစောထီး၊ ရပ်ကွက်အုပ်ချုပ်ရေး၊ ပြီးတော့ စစ်တပ်နဲ့ချိတ်ဆက်ထားတဲ့ လူဆွဲဂိုဏ်း တွေလည်း ပွလို့။

“အခုဆွဲနေတဲ့ ပေါ်တာဆိုတာကမှတ်ပုံတင်ကြည့်ပြီးဆွဲနေတာမဟုတ်ဘူး။ည၇ နာရီ ကျော်ရင်ကျနော်အပြင်မထွက်ရဲတော့ဘူး”
လို့ အသက်၅၀ကျော်အရွယ် တောင်ဥက္ကလာမှာနေတဲ့ မိတ်ဆွေရင်းတစ်ယောက်က ပြောပြတာ အမှတ်ရတယ်။

ပြီးတော့ ၂၀၂၅လောက်ကထင်တယ်။ ငယ်သူငယ်ချင်းပြောပြဖူးတဲ့ အဖြစ်ဆိုးကလည်း ဦးနှောက်ထဲတန်းဝင်လာတယ်။ငယ်သူငယ်
ချင်းရဲ့ မိတ်ဆွေက အသက်၅၅နှစ်ကျော်အရွယ်၊လူက လည်း ဗိုက်ဆွဲဆွဲ၊ရောဂါဘယတွေကလည်း အစုံအလင်။လူမြင်ရုံနဲ့ အသက်
ကြီးရုံတင်မက ကျန်းမာ ရေးကလည်း မစွံမှန်း သိသာနေပေမဲ့ ည၇နာရီကျော်အချိန် မော်လမြိုင်မြို့ထိပ်ဂိတ်အဖြတ်မှာ ဆွဲစေ့ ခံလိုက်ရတယ်။ စစ်မှုထမ်းသင်တန်းရောက်သွားတယ်။ပြေးတောင်မပြေးနိုင်တဲ့ ၅၀ကျော်မှန်း သင် တန်းဆရာတွေသိလို့ ငွေ၁၀သိန်းကျော်ဖန်ပြီးအိမ်ပြန်ခွင့်ပြုလိုက်တယ်လို့ ကြားခဲ့ဖူးတယ်။

ရန်ကုန်မှာ ပေါ်တာဆိုတာ တစ်ယောက်မိရင် သိန်း၂၀မက ကိုယ့်အတွက်ကျန်တာမို့ စစ်အုပ် စုဝင်တွေအတွက် တွက်ခြေအကိုက်ဆုံး စီးပွားရေးလုပ်ငန်းဖြစ်လာတယ်။အဲဒါကြောင့်လည်း လှိုင်မြို့ နယ်ထဲက ရပ်ကွက်တချို့မှာအုပ်ကြီးလက်ပါးစေဆိုက်ကားသ
မားတွေက ညဘက် ဆိုက်ကားစီးလူ ငယ်တွေကို ပေါ်တာဆွဲကာ ငွေလမ်းဖြောင့်လို့ ကျော့ကော့နေသတဲ့။

ကားတစ်စီး၊လူ၃ယောက်၊ ဓားကိုယ်စီ တုတ်အသင့် လူပြတ်တဲ့နေရာတွေနဲ့ ညဦးပိုင်း တွေမှာ စောင့်ဖမ်း၊ကံကောင်းရင် တစ်ရက်တည်းနဲ့ ၃-၄ယောက်။ ကားလေးတစ်စီးရင်းရုံနဲ့ တစ်ရက်တာ သိန်း ဂဏန်းဆယ်ချီ ဝင်ငွေရဖို့ဆိုတာ တခြား ဘယ်အလုပ်ရှိမလဲ။

ရန်ကုန်မှာကိုယ့်အတွက်ကိုယ်အသက်လုရှူနေကြရတာဆိုတော့ ကိုယ့်ရှေ့မှာ ရိုက်နှက်ပြီး ကားပေါ်တင်သွားတာမြင်လည်း ကိုယ့်အန္တ
ရာယ်ကိုယ်ကြည့်ရှောင်ကာ ဝင်မပါရဲ။ အဲဒါကြောင့် လည်း ရန်ကုန်မှာ ပေါ်တာဆွဲရတာ သိပ်လွယ်နေကြတဲ့ပုံ။

"လူနာတင်ကားနဲ့တောင် ဆွဲနေတာဆိုတော့ လမ်းမပေါ်ရောက်တာနဲ့ ကျားပေါတဲ့ တောထဲ ရောက်သွားတဲ့အတိုင်းပဲ။ဖုန်းလည်းမကြည့်ရဲဘူး။ငေါင်လည်း မငေါင်ရဲဘူး။မျက်စိရှင်ရှင်ထားပဲ”လို့ ဒဂုံတောင်မှာနေတဲ့

အသက်၄၀အရွယ်မိတ်ဆွေက ပြောတယ်။
မြို့စွန်ဘက်သွား လူသိပ်မပါတဲ့ လိုင်းကားတွေပေါ် ပေါ်တာတက်ဆွဲနေတဲ့သတင်းတွေလည်း ထွက်နေတာကြောင့် အလုပ်ကအပြန် ကားပေါ်မှာ ထိုင်စရာရလည်း မအိပ်ရဲတော့။ကားပေါ်မှာ လူ များလာရင် ခါးပိုက်နှိုက်ကို သတိထားရပေမဲ့ ပေါ်တာကို ပိုကြောက်ရတာမို့ ခရီးသည် လျော့မသွား စေဖို့သာ တိုးတိုး
တိတ်တိတ် ကြိတ် ဆုတောင်းရတယ်လို့ ဆိုတယ်။

ရန်ကုန်မှာကြက်ဥတစ်လုံး ၇၅၀၊ မိသားစုဝမ်းစိုဖို့ ဝေးစွ၊ ရက်မပျက် ထမင်းနပ်မှန်ရေး ကို တောင် အလူးအလဲ ရူးပြဲနေအောင် ရုန်းနေရ။အလုပ်သွား အလုပ်ပြန် ရန်ကုန်မြို့တွင်းနဲ့ ဒဂုံ တောင်လူပေါင်းသောင်းခြောက်ထောင် သွား
လာနေတယ်ဆိုပေမဲ့ အခန့်မသင့်လို့ ပေါ်တာမိရင် ပွဲပြီးသွားနိုင် တာကြောင့် သားရဲတွင်းထဲ အလုပ်ဆင်းနေရသလိုမျိုး။ ဖြစ်နိုင်ရင် ရန်ကုန်မှာ မနေချင်တော့ဘူးလို့ သူက ဆက်ပြောတယ်။

ရန်ကုန်မှာ ပြေးစရာမြေမရှိတဲ့ ဘဝများစွာ။ ရန်ကုန်မှာ ကိုယ့်ဘဝကိုယ် ဘယ်မှာ သွားရှာရမ လဲလို့ ရန်ကုန်သားတွေက ညည်းကြတယ်။ရန်ကုန်မှာဘဝတွေတောင်တတောက်တောက်
ပျောက်ဆုံးနေတာ ရန်ကုန်မှာညတွေ ပျောက်
ဆုံးသွားတာ ဘယ်ဆန်းလိမ့်မလဲ။

ရန်ကုန်မှာရန်ကုန်လည်းပျောက်ဆုံးနေတယ်။ ရန်ကုန်မှာရန်မကုန်သေးတော့လည်းခြစ် ခြစ်တောက် ပူနေဦးမှာပဲ။ ဒါပေမဲ့၊ရန်ကုန်ဟာ ဗုံးတွေ တဝုန်းဝုန်းကြဲခဲ့တဲ့ဒုတိယကမ္ဘာစစ်တုန်းက လည်း မသေ၊ အင်းစိန်နား တိုက်ပွဲဖြစ်နေတဲ့ ရန်ကုန်အစိုးရခေတ်မှာတောင် ရန်ကုန်မှာ ရုပ်ရှင်ပြ မပျက်။ ရန်ကုန်ဟာ ဘယ်တုန်းကများ သေခဲ့ဖူးသလဲလို့ မေးခွန်းထုတ်သူတွေလည်း ရှိတယ်။

ရန်ကုန်မှာ လက်သီးကို ကျစ်ကျစ်ပါဆုပ်ထားကြဖို့ လိုမယ်။ ရန်ကုန်ဟာ ပြန်လာပါလိမ့်မယ်။ ။

စစ်မှုထမ်းတပ်သား ၂ဦး KNU တပ်မဟာ(၇)ထံ လက်နက်နဲ့ အလင်းဝင်

ဩဂုတ်-၂၀၊ ၂၀၂၆။ထားမြတ်/People’s Spring

စစ်တပ်ရဲ့ စစ်မှုထမ်းတပ်သား (၂)ဦး လက်နက်နဲ့ အလင်းဝင်လာကြောင်း ကရင်အမျိုးသားအစည်းအရုံး(KNU) တပ်မဟာ(၇) ဘားအံ(ဖားအံ)ခရိုင်က ထုတ်ပြန်ပါတယ်။

ဩဂုတ် ၁၅ရက်က ခမရ(၃၅၇) တပ်ရင်းက စစ်ကောင်စီတပ်သား ၂ဦးဟာ လက်နက်တွေ ယူလာပြီး KNU ရဲ့ ကရင်အမျိုးသားလွတ်မြောက်‌ရေးတပ်မတော် (K.N.L.A) တပ်မဟာ(၇) ထံ လက်နက်ချ အလင်းဝင် ဘက်ပြောင်းခိုလှုံလာတာလို့ ဖော်ပြထားပါတယ်။

အလင်းဝင်လာသူ ၂ဦးဟာ စစ်တပ်က အတင်းအဓမ္မစစ်သားစုဆောင်းထားသူတွေဖြစ်တယ်လို့ ဆိုပါတယ်။

MA ၂လက်၊ ကျည်ဘောက် ၆ ခု၊ကျည်ဆံ ၂၀၀ နဲ့ ကျည်ကာ ၂ထည်ယူဆောင်လာတဲ့ တပ်သား ၂ဦးကို ကျပ် ၁၀ သိန်းစီ ဆုချီးမြှင့်ခဲ့ကြောင်းလည်း အသိပေးပါတယ်။

ဒါ့အပြင် အကြောင်းအမျိုးမျိုးကြောင့် မတရားစစ်မှုထမ်း ခိုင်းစေခံရတဲ့ စစ်ကောင်စီတပ်တွင်းက တပ်သားတွေအနေနဲ့ နီးစပ်ရာ တော်လှန်ရေးတပ်တွေထံ ရရာနည်းနဲ့ လက်နက်ချ အလင်းဝင် ပူးပေါင်းကြဖို့လည်း KNUက ထပ်မံ တိုက်တွန်းခဲ့ပါတယ်။

KNU တပ်မဟာ(၇)အပါအဝင် KNU ခရိုင်နဲ့ တပ်မဟာ အသီးသီးမှာ အာဏာသိမ်းစစ်ကောင်စီတပ်သားတွေ တဦးချင်းဖြစ်စေ အဖွဲ့လိုက်ဖြစ်စေ လက်နက်ယူလာပြီးဖြစ်စေ လက်နက်မဲ့ ဖြစ်စေ အလင်းဝင်ရောက်မှုတွေ မကြာခဏ ရှိခဲ့ပါတယ်။

(အလင်းဝင်လာတဲ့ စစ်မှုထမ်းတပ်သား ၂ ဦး။ ဓာတ်ပုံ - KNU-Hpa-An District)

တကောင်းဒေသမှာ စစ်တပ်ယာဉ်တန်းကို မန္တလေး PDF ကြားဖြတ်တိုက်ခိုက်

ဩဂုတ် ၂၀၊ ၂၀၂၆။ ထားမြတ်/People’s Spring

မန္တလေးတိုင်း၊ သပိတ်ကျင်းမြို့နယ် တကောင်းမြို့အနီးမှာ စစ်တပ်ယာဉ်တန်းကို မန္တလေးပြည်သူ့ကာကွယ်ရေးတပ်မတော်(MDY PDF)က ကြားဖြတ်တိုက်ခိုက်ခဲ့တယ်လို့ တော်လှန်ရေးသတင်းရင်းမြစ်က ပြောပါတယ်။

သပိတ်ကျဉ်းအခြေစိုက် စစ်တပ်ရဲ့ အမှတ်(၁၃) တန်းမြင့်လေ့ကျင့်ရေးသင်တန်းကျောင်း (တတက-၁၃)က ထွက်လာတဲ့ စစ်ယာဉ်တန်းကို တိုက်ခိုက်ခဲ့ရာ ယာဉ် ၁စီးထိခိုက်ခဲ့တယ်လို့ ဆိုပါတယ်။

တိုက်ခိုက်တာကတော့ တကောင်းမြို့အနီး (၃)မိုင်နေရာ ဝန်းကျင်မှာ ဖြစ်တယ်လို့ သတင်းရင်းမြစ်က ပြောပါတယ်။ အသေးစိတ်အခြေအနေကိုတော့ ဆက်လက်စုံစမ်းနေဆဲပါ။

စစ်ယာဉ် ၁၂ စီး အနက် ၁စီး ရရှိခဲ့ပြီး ၁၁စီးဟာ တကောင်းမြို့ကို ရောက်ရှိသွားပြီလို့လည်း တော်လှန်ရေး သတင်းရင်းမြစ်က ပြောပါတယ်။

မန္တလေး PDF (အထူးလှုပ်ရှားတပ်မ)အနေနဲ့ မိတ်ဖက်တော်လှန်ရေးအင်အားစုတွေနဲ့ လက်တွဲပြီး စစ်ဆင်ရေးတွေကို အပြည့်အ၀ ဖော်ဆောင်သွားမှာ ဖြစ်ကြောင်း ဇူလိုင် ပထမပတ်မှာ ထုတ်ပြန်ကြေညာအသိပေးထားပါတယ်။

တပ်တခုလုံးအတိုင်းအတာ ပြန်လည်စုဖွဲ့ လေ့ကျင့်နေတာကြောင့် စစ်ဆင်ရေးတွေကို အကန့်အသတ်နဲ့ ဖော်ဆောင်နိုင်ခဲ့တဲ့ အခြေအနေကနေ စုဖွဲ့လေ့ကျင့်မှုတွေ ပြင်ဆင်မှုတွေ ပြုလုပ်နိုင်ခဲ့ပြီးဖြစ်လို့ စစ်ဆင်ရေးတွေ ဖော်ဆောင်သွားမယ်လို့ အသိပေးခဲ့တာဖြစ်ပါတယ်။

(မန္တလေးပြည်သူ့ကာကွယ်ရေးတပ်မတော်(MDY PDF)က ရဲဘော်တွေ စစ်ရေးလေ့ကျင့်နေစဉ်။ ဓာတ်ပုံ -MDY PDF)

တောင်မော်ဦးတိုက်ပွဲမှာဆုတ်ပြေးတဲ့စစ်တပ်ကို AAလိုက်လံတိုက်ခိုက်

■တိုက်ပွဲ​တွေပြင်းထန်နေပြီး ​တောင်​မော်ဦး​ရေတပ်နဲ့ပိုနီးလား

ဩဂုတ်-၂၀၊၂၀၂၆။ခိုင်မြတ်/People's Spring

ကျောက်ဖြူမြို့နယ်၊တောင်မော်ဦးရေတပ်စ
ခန်းအနီးတိုက်ပွဲမှာ တပ်လန်ဆုတ်ခွာသွားတဲ့ အာဏာသိမ်းစစ်တပ် စစ်ကြောင်းတွေကို အာရက္ခတပ်တော်(AA)က လိုက်လံတိုက်ခိုက်နေပြီး တောင်မော်ဦးရေတပ်နဲ့ တမိုင်ကျော်အ ကွာမှာ တိုက်ပွဲပြင်းထန်နေတယ်လို့ မြေပြင်သတင်းရင်းမြစ်တွေက ပြောပါတယ်။

အာဏာသိမ်းစစ်တပ်ဟာဩဂုတ်လဆန်းကစပြီးအင်အားနှစ်ရာဝန်းကျင်နဲ့ စစ်ကြောင်းထိုး လာခဲ့ရာ အဲဒီစစ်ကြောင်းကို AA က ခုခံတိုက်
ခိုက်ခဲ့တာကြောင့် စစ်တပ်ဘက်က ဆယ်ချီသေဆုံးကာ တပ်လန် နောက်ဆုတ်သွားခဲ့တာပါ။

“လွန်ခဲ့တဲ့တပတ်လောက်က ​ေးတွေ ဆုတ်ပြေးသွားလို့သူတို့စခန်းကုန်းတခုကိုယ့်ဘက်ကရလိုက်တာရှိတယ်။အဲဒီကနေ ရှေ့တိုးပြီး လိုက်တိုက်နေတာ။ တိုက်ပွဲကတော့ နေ့တိုင်းပြင်းနေတယ်။အသေးစိတ် ပြောဖို့ စောသေး တယ်။ ကိုယ့်ဘက်က အရှေ့ကို တော်တော်ရောက်သွားပြီလို့တော့ ပြောလို့ရတယ်” လို့ မြေပြင်မှာ ရှိနေတဲ့ AA နဲ့ နီးစပ်တဲ့စစ်ရေးသတင်းရင်းမြစ်တဦးက ပြောပါတယ်။

လက်ရှိမှာ အ၀တောင်ကျေးရွာအနီးဝန်းကျင်မှာတိုက်ပွဲဖြစ်နေတာဖြစ်ပြီး အချို့တိုက်ပွဲတွေကတော့ အ၀တောင် ရွာအကျော် တောင်မော်ဦးရေတပ်စခန်းအနီးသို့ ရောက်နေကာ တောင်မော်ဦးရေတပ်စခန်းနဲ့ဆိုရင် တမိုင်ကျော် သာ ဝေးတော့တယ်လို့ ဆိုပါတယ်။

တောင်မော်ဦးရေတပ်စခန်းကနေတဆင့် အ၀တောင်စခန်းတွေဆီ အင်အားဖြည့်ပြီး စစ်ကြောင်းထိုး၊ ထိုးစစ်ဆင် လာတဲ့ စစ်တပ်နဲ့ AA တို့ရဲ့ ပြီးခဲ့တဲ့ ဩဂုတ်လ ၁၁ ရက်နေ့တိုက်ပွဲအတွင်း စစ်တပ်ဘက်က ဆယ်ချီသေဆုံး၊ ထိခိုက် ခဲ့တာဖြစ်ပါတယ်။

“အဲတုန်းက အင်အားနှစ်ရာလောက်မှာ တော်
တော်များများ ထိသွားတယ်။ ဒဏ်ရာရတာ ပိုများတယ်။ကျောက်ဖြူ ပြည်သူ့ဆေးရုံမှာတောင် ဆေးကုနေကြရတယ် ကြားတယ်” လို့ ကျောက်ဖြူမြို့ခံတဦးက ပြောပါတယ်။

အထိနာနေတဲ့စစ်တပ်ဟာ တောင်မော်ဦးရေတပ်စခန်းကို ထပ်မံအင်အားဖြည့်ဖို့ ပြင်ဆင်နေကြောင်း ကြား သိရပြီး ရေတပ်စခန်းဆီ စစ်သင်္ဘောအဝင်အထွက်တွေနေ့စဉ်ရှိနေတယ်လို့ မြေပြင်စစ်ရေးသတင်းရင်းမြစ်တွေက ပြောပါတယ်။

ကျောက်ဖြူမြို့ပေါ်ကနေဓည၀တီရေတပ်စ
ခန်းဘက်သို့ သွားရာ မင်းတက်တောင်လမ်း
ဆုံအနီးဝန်းကျင်က မင်းပြင်၊ သိုင်းချောင်းနဲ့ ပြိုင်းစေ့ကေကျေးရွာတို့ဘက်မှာတော့ အခုရက်ပိုင်း တိုက်ပွဲတွေ ငြိမ်သက်နေတယ်လို့ ဒေသခံတွေ က ပြောပါတယ်။

“အရင်ကတော့မင်းပြင်ဘက်ရော၊ပြိုင်းစေ့ကေဘက်ကရော တပြိုင်တည်း အင်အားဖြည့်ပြီး စစ်ကြောင်းထိုးလာတာ၊ တောင်မော်ဦးဘက်မှာ အထိနာနေတဲ့အခါ ဒီဘက်တွေမှာ တိုက်ပွဲငြိမ်နေတယ်။ ကြည့်ရတာ တော်တော်အထိ နာသွားတယ်ထင်တယ်” လို့ မင်းပြင်ဘက်မှာ နေထိုင်တဲ့ ဒေသခံတဦးက ပြောပါတယ်။

ကျောက်ဖြူမြို့နယ်အတွင်းကနယ်မြေအများ
စုကို လက်လွှတ်ထားရပြီး ရေတပ်စခန်းနှစ်ခု(ဓည၀တီ၊ တောင်မော် ဦး)တို့နဲ့ မြို့အနီးဝန်းကျင်တပ်ရင်းတွေမှာသာအခြေစိုက်နိုင်တော့တဲ့ စစ်တပ်ဟာ တောင်မော်ဦး၊ မင်းပြင်တို့ဘက် ကနေ အင်အားအလုံးအရင်းသုံးကာ AA ထိန်းချုပ်နယ်မြေတွေကို ပြန်ထိန်းချုပ်နိုင်ဖို့ မကြာခဏကြိုးစားနေခဲ့တာပါ။

ဒါပေမယ့် တောင်မော်ဦးရေတပ်စခန်းကနေ ကျောက်ဖြူ -ရမ်းဗြဲဆုံရာ စနဲမြို့ထိ သိမ်း
ပိုက်ဖို့ ရည်ရွယ်ချက်နဲ့ ထိုး စစ်ဆင်လာတဲ့ စစ်ကြောင်းကတော့ တပ်ဦးကျိုးပြီး အကြိမ်
ကြိမ်ပြန်လှည့်နေရပါတယ်။ အလားတူပဲ မင်းပြင်၊ သိုင်း ချောင်းကျေးရွာအနီးရှိ စစ်တပ်စစ်ကြောင်းတွေဟာ AA ရဲ့ ဒရုန်း၊ လက်နက်
ကြီးတွေနဲ့ တိုက်ခိုက်မှုကြောင့် အထိနာ ကာ ရှေ့မတိုးနိုင်ဖြစ်နေတယ်လို့ သိရပါတယ်။

အဲဒီလိုအထိနာနေတဲ့စစ်တပ်ဟာ ကျောက်ဖြူ
မြို့နယ်အတွင်းက အရပ်ဘက်လူနေကျေးရွာတွေကို လေကြောင်း၊ လက်နက်ကြီးတွေနဲ့ နေ့စဉ်နီးပါး ပစ်ခတ်တိုက်ခိုက်နေပြီး အရပ်
သားထိခိုက်၊ သေဆုံးမှုတွေ ရှိနေပါတယ်။ ဒါ့အပြင် ကျောက်ဖြူပင်လယ်ပြင်အတွင်း သွား
လာနေကြတဲ့ကုန်တင်၊ခရီးသည်တင်စက်လှေတွေ၊ ငါးဖမ်းစက်လှေတွေကို လည်း ဖမ်းဆီးတာတွေ လုပ်နေပါတယ်။

လက်ရှိမှာ ကျောက်ဖြူမြို့နယ်အတွင်း အာ
ဏာသိမ်းစစ်တပ်ရဲ့ ဓည၀တီရေတပ်စခန်း၊ တောင်မော်ဦးရေတပ်စခန်း ၊ အမှတ်(၃၂)ရဲတပ်ရင်း၊ ခမရ ၅၄၂၊ ခမရ ၅၄၃၊ ခလရ ၃၄ တို့ကျန်ရှိ​နေပါတယ် ။ AA တပ်မှူးချုပ် ဗိုလ်
ချုပ်ထွန်းမြတ်နိုင်က​​တော့ ရခိုင်ပြည်နယ်အတွင်းကလက်ကျန်မြို့တွေဖြစ်တဲ့ကျောက်
ဖြူ၊ စစ်တွေနဲ့ မာန်အောင်မြို့နယ်တွေကို အခု ၂၀၂၆ နဲ့ ၂၀၂၇ တို့မှာ အပြီးပြတ်သိမ်းပိုက်
သွားမှာဖြစ်ပြီး မပြီးပြတ်ခဲ့ ရင်လည်း မီးကုန်
ယမ်းကုန်ကြိုးစားသွားမယ်လို့ ​ပြောထားပါတယ်။

■သ​ရော်စာ

YBS ပေါ်က ငွေစုပ်ဖုတ်ကောင်များ

-သျှိသျှား ရေးသားသည်။

YBS ကားတွေပေါ်မှာ ငွေစုပ်ဖုတ်ကောင်တွေ သောင်းကျန်းနေတယ်။

မိတ်ဆွေ...သင်နားကြားလွဲတယ်လို့ မထင်လိုက်ပါနဲ့။ သွေးစုပ်ဖုတ်ကောင်တွေမဟုတ်ပါဘူး။ ငွေစုပ်ဖုတ်ကောင် တွေလို့ ပီပီသသပြောလိုက်တာပါ။ ရန်ကုန်မြို့မှာ နေ့တဓူဝပြေးဆွဲနေတဲ့ YBS ကားတွေပေါ်မှာ အဲဒီငွေစုပ်ဖုတ် ကောင်တွေ သောင်းကျန်းနေတဲ့အ
ကြောင်း နေရာမျိုးစုံကနေ ကြားသိလာရပါတယ်။

YBS ကားတွေပေါ်၊ YBS မောင်းနှင်သွားလာရာလမ်းကြောင်းတစ်လျှောက်နဲ့ ယုတ်စွအဆုံး အဲဒီ YBSယာဉ်လိုင်းတွေကိုကြပ်မတ်စီမံအုပ်
ချုပ်နေပါတယ်ဆိုတဲ့ YRTC အမည်ရ YBS ခေါင်းကိုင်ကြီးတွေရဲ့ ရုံးခန်းတွေထဲအထိ အဲဒီငွေစုပ်ဖုတ်ကောင်တွေ ရောက်နေကြတာပါ။

သူတို့တွေဘယ်လိုရောက်လာပြီးဘယ်လို
တွေသောင်းကျန်းနေ ကြပါသလဲ။YBSကား
တွေပေါ် သူတို့ ဘယ်လိုလိုက်လာသလဲ။ အဲဒီငွေစုပ်ဖုတ်ကောင်တွေဟာ အသွင်ယူ၊ အသွင်ပြောင်းနိုင်ကြ တဲ့ အစွမ်းရှိပါတယ်။ သူတို့ကို YBS ကားတွေပေါ်မှာဆိုရင် ယာဉ်မောင်းတွေလို အသွင်ယူ၊ အသွင်ပြောင်းနေထိုင်ကြ တာကို တွေ့ရပါတယ်။ သူတို့ဟာ အဲ့ဒီလိုအသွင်ပြောင်းထားကြပြီးတဲ့နောက် ကားပေါ်တက်လာတဲ့ ခရီးသည်တွေ ဆီက ပိုက်ဆံကို ရတဲ့နည်းနဲ့စတင်စုပ်ယူပါတယ်။

Cash Box ဆိုတဲ့ ငွေထည့်ပုံးဆီလှမ်းနေတဲ့လက်ထဲက ငွေကိုဦးအောင်ဖြတ်ယူပါတယ်။ ၃၀၀ တန်၊ ၄၀၀ တန်ခရီးအတွက် ခရီးသည်က ၅၀၀ ကျပ်တန်ထုတ်ပေးတဲ့အခါတွေမှာ လည်းအကြွေမရှိဘူးဆိုတဲ့အကြောင်းပြချက်နဲ့ ပိုငွေပြန်မအမ်းဘဲ ခရီးသည်အိတ်ထဲက ငွေကိုရတဲ့နည်းနဲ့ စုပ်ယူပါ သေးတယ်။

အဲဒီငွေစုပ်ဖုတ်ကောင်တွေဟာ ဘယ်လောက်အထိဆိုးသလဲဆို ခရီးစရိတ်ကို စနစ်တကျနဲ့ပေးချေနိုင်ဖို့ ငွေကုန် ကြေးကျခံဖန်တီးပေးထားတဲ့ ကတ်နဲ့ဖြတ်ပြီးငွေပေးချေရတဲ့စက်တွေကိုလည်းသူတို့ကဖျက်ဆီးထားပြီး ကတ်နဲ့ ဖြတ်မရအောင် လုပ်ထားကြပါသေးတယ်။ တချို့ယာဉ်လိုင်းတွေမှာဆို အဲဒီကတ်ဖြတ်
စက်တွေမရှိ၊မတပ်ဆင်အောင်ကိုပါလုပ်ထားနိုင်စွမ်းရှိပါတယ်။

နောက်တစ်ခုက YBS တွေပေါ်မှာ စပယ်ယာ
မတင်ဆောင်ရဘူးဆိုတဲ့တင်းကျပ်တဲ့စည်း
ကမ်းချက်ရှိတာမို့ သူတို့ အစား ယာဉ်မောင်းတွေရဲ့ ကြင်သူဇနီးမယားများက ယာဉ်မောင်းကြီးတွေ သွားလမ်းသာ၊ လာလမ်းဖြောင့်ကြစေဖို့ အပင်ပန်းခံလိုက်ပါကူညီကြပါတယ်။ အဲဒီကြင်သူဇနီးမယားများကိုလည်း ငွေစုပ်ဖုတ်ကောင်တွေက အလွတ်မပေးပါဘူး။ သူတို့ခန္ဓာကိုယ်ထဲ ဝင်ပူးကပ်ပြီးနောက် တက်လာသမျှ ခရီးသည်တွေဆီက ငွေစက္ကူတွေ Cash Box ထဲ မရောက်စေဘဲ သူတို့က ဦးစွာအလျင် စုပ်ယူလိုက်ကြပြန်ပါတယ်။

အဲ...ငွေတွေ Cash Box ထဲရောက်သွားတော့ရော ကိစ္စရှိသလားဆိုတော့ မရှိပါဘူး။ အဲဒီငွေစုပ်ဖုတ်ကောင်တွေဟာယာဉ်မောင်းတွေထံတစ်ဖန်ပြန်လည်ဝင်ရောက်ပူးကပ်ပြီး မည်သို့မည်ပုံပြုလုပ်လိုက်သည်မသိ Cash Box ပုံးကို ခတ်ထားတဲ့သော့တံ ယာဉ်မောင်းကြီးတို့လက်ထဲ “ဥုံဖွ” ဆိုရောက်လာကြပြီးသကာလ ကြိုက်တဲ့နေရာ၊ ကြိုက်တဲ့ အချိန်မှာ Cash Box ထဲကနေ သဘောရှိနိုင်ကြပါသေးတယ်။ အဲ့သလောက်ထိ ဆိုးသွမ်းနေတဲ့ ငွေစုပ်ဖုတ်ကောင် တွေပါ။ YBS လောကမှာ သူတို့ ဝင်မပူးကပ်နိုင်တာဆိုလို့ လိုင်စင်မဲ့ကားတွေနဲ့ လိုင်းပြေးနေနိုင်ကြတဲ့ အာဏာရှင် ဟောင်းနေဝင်းမြေးတစ်စုပဲရှိပါတယ်။

YBS တွေသွားရာလမ်းတစ်လျှောက်မှာဆိုရင်လည်း အချိန်မှတ်လို့အမည်တွင်ကြတဲ့ YBS ရှေ့ကားနဲ့ နောက်ကား ကြား အကွာအဝေးကို မှတ်တမ်းပြုပြီး YBS တစ်စီးနဲ့ တစ်စီးကြား သတင်းပေးပို့သူတွေအဖြစ်လည်း ငွေစုပ်ဖုတ် ကောင်တွေက အသွင်ယူထားကြပြန်ပါသေးတယ်။ ဒီမှာတော့ လိုက်ပါစီးနင်းကြတဲ့ခရီး
သည်ဆီကငွေကို တိုက်ရိုက်ယူတာမျိုးမဟုတ်ဘဲ ဆိုခဲ့ပါယာဉ်မောင်းများဆီကမှတစ်ဆင့် ရယူကြပါတယ်။ အဲဒီအချိန်မှတ်တွေဆိုတာဟာ လည်း တစ်ယောက်စ၊ နှစ်ယောက်စမဟုတ်ဘဲ မှတ်တိုင်တိုင်းနီးပါးလိုလိုမှာရှိနေတာမျိုးဆိုတော့ သူတို့ရဲ့ နေ့စဉ် စုပ်ယူအားကလည်း မသေးလှပါဘူး။

ဒီနေရာမှာ YBS ခေတ်ဦးကာလတုန်းက အဲဒီငွေစုပ်ဖုတ်ကောင်တွေ ငွေစုပ်ကြမ်းခဲ့လို့ ကားပေါ်ကနေ စက်ဘီးပေါ် ရောက်သွားကြရရှာတဲ့ ခရီးသွားပြည်သူတစ်စုအကြောင်းလည်း ကြားညှပ်ပြောလိုပါတယ်။ ခရီးစဉ်တစ်ဖြတ် ၂၀၀ ကျပ်၊ လိုရာခရီးရောက်ဖို့ YBS စနစ်သစ်အရအနည်းဆုံးအသွားနှစ်ဖြတ်စီး၄၀၀ ကျပ်၊ အပြန်နှစ်ဖြတ်စီး ၄၀၀ ကျပ်၊ အသွားအပြန်ပေါင်း ၈၀၀ ကျပ်၊ တချို့ သုံးလေးဖြတ်စီးမှရောက်တဲ့ခရီးမျိုးတွေနဲ့ တစ်နေ့လုပ်မှ တစ်
နေ့စားရတဲ့ နေ့စားဝင်ငွေနဲ့ မကိုက်တော့တာကြောင့် မွေးရာပါ ခြေထောက်နှစ်ချောင်းကို အားပြုရင်း နေ့စားအလုပ်တွေဆီ စက်ဘီးစုတ်လေးတွေ ဖုန်သုတ်စီးနင်း အသက်ဆက်ခဲ့ကြရတဲ့ လူတစ်စုပါ။

အခုလည်းသူတို့ရှိနေပါတယ်။ မနက်တစ်ချိန်၊ ညနေတစ်ချိန် အစုအဖွဲ့လိုက် စက်ဘီးလေးတွေ ဂျောက်ဂျက်... ဂျောက်ဂျက်နင်းရင်း ရန်ကုန်မြို့ရဲ့ လမ်းမတွေထက် သွားလာနေတဲ့ ငွေစုပ်ဖုတ်ကောင်တွေရဲ့ သားကောင်ဟောင်း တွေကို တွေ့ကြရမှာပါ။ အခုကာလမှာတော့ အရင်လိုမဟုတ်တော့ဘဲ ခရီးစဉ်တစ်ဖြတ် ၄၀၀ ကျပ်အထိဖြစ်လာသလို အရင်နဲ့မတူ ငွေစုပ်ဖုတ်ကောင်တွေရဲ့ စုပ်ချက်တွေကလည်း တစ်နေ့ထက်တစ်နေ့ကြမ်းလာပြီဆိုတော့ သူတို့ ခမျာ နင်းလက်စစက်ဘီးခြေနင်းပြားကိုပဲ ဖိနပ်ပါးတဲ့အထိ ဆက်ပြီးဖိနင်းနေကြရဦးမှာပေါ့။

အဲဒီငွေစုပ်ဖုတ်ကောင်တွေဟာ ငွေကို ဘယ်
လောက်အထိစုပ်ယူသလဲဆိုရင် YBS ကြပ်
မတ်စီမံအုပ်ချုပ်တဲ့ ခေါင်းကိုင်ကြီးတွေ၊ YBS အုံနာတွေ၊ YBS ယာဉ်မောင်းတွေတောင် မိမိတို့ကားတွေကို ပြုပြင်နိုင်စွမ်းမရှိလောက်အောင် အထိကို စုပ်ယူကြတာလို့ ဒင်းတို့ဆီက ညည်းသံထွက်လာပါတယ်။ ဒီလိုနဲ့ တချို့ YBSကားတွေဆို မိုးမြင်၊လေမြင်၊ကောင်းကင်
ပြာပြာကြီးကိုကြည့်ရင်း လိုက်ပါစီးနင်းနိုင်တဲ့အခွင့်အရေးတွေရကြသလို တချို့ကားတွေဆို ကြမ်း ပေါက်ကျွံကျတဲ့အထိပါပဲ။ တလောကပဲ ကြမ်းကျွံလို့ ဒလမှာကလေးတစ်ယောက် အသက်ဆုံးရှုံးရတဲ့အထိဆိုတာ အားလုံးအသိပဲမဟုတ်ပါလား။ မိုးရွာတုန်း မိုးရေးချိုးချင်သူတွေလည်း အဲဒီ YBS တွေကိုစီးပါလို့ အကြံပြုလိုပါ တယ်။

ဒီအားနည်းချက်ကိုသိတဲ့ YBS ငွေစုပ်ဖုတ်
ကောင်တွေဟာ အတင့်ရဲကာ နောက်တစ်ဆင့်တိုးလို့ အလွန်ကြမ်းတဲ့ အကွက်တစ်ခုကို ခင်းလာပြန်ပါတယ်။ အဲဒါကတော့ YBS ကားတွေ ပျက်စီးချို့ယွင်းနေပါတယ်ဆိုတဲ့အကြောင်း ပြချက်နဲ့ ပြုပြင်ဖို့လိုပါတယ်ဆိုတဲ့ဆင်ခြေကိုကိုင်ဆွဲရင်း နေ့စဉ်ခရီးသွားပြည်သူသိန်းနဲ့ချီသူတွေထံက ငွေကိုအချီ ကြီးစုပ်ယူဖို့ကြံတဲ့ အကွက်ကျဲကြီးကို ဟော့ဒီလိုခင်းလာပါတယ်။

အဲဒါကတော့ YBS နဲ့ပတ်သက်ပြီး ဆိုပိုင်၊ ပြောပိုင်၊ လုပ်ပိုင်ခွင့်ရှိတဲ့ YBS ခေါင်းကိုင်ကြီး ဦးလျန်ကျင့်မန်ဆိုသူထံ ဝင် ရောက်ပူးကပ်လိုက်ကြတာပါပဲ။ နေ့လည်စာစားပြီးနောက် YRTC ရုံးခန်းထဲက သူ့စားပွဲခုံမှာ သူ့ဟာသူအေးအေး လူလူ အဆီရစ်ပြီး အိပ်ငိုက်နေတဲ့ ဦးလျန်ကျင့်မန်ထံ သူတို့ဝင်ပူးကပ်ပြီးနောက် ဦးလျန်ကျင့်မန်ဟာ အိတ်ကပ်ထဲ
ထည့်ထားတဲ့ ဖုန်းကို ထုတ်ယူပြီး ဗိုက်ဗာကနေတစ်ဆင့် လက်သင့်ရာမီဒီယာတွေထံ စာတချို့ရိုက်ပို့လိုက်ပါတယ်။

ဒီလိုနဲ့ မကြာမီမှာပဲ ဆိုရှယ်မီဒီယာပေါ်မှာ “YBS တွေ စျေးတက်မယ်”ဆိုတဲ့သတင်းဟာ ပြည်သူလူထုကြား အုတ် အော်သောင်းနင်းဖြစ်လာတော့တာပါပဲ။နဂိုကမှငွေစုပ်ဖုတ်
ကောင်တွေရဲ့ဒဏ်ကို လှိမ့်နေအောင်ခံထားရတဲ့ ခရီး သွားတွေခမျာ ဒီသတင်းကြားပြီး မူးသူမူး၊ မိုက်သူမိုက်၊ ငိုသူငို၊ အော်သူအော်၊ ဆဲသူဆဲနဲ့ဖြစ်ကုန်ကြတော့တာပေါ့။ ဘာကြောင့် အခုလိုတိုးကောက်ရတာလဲလို့ မေးကြည့်ကြတဲ့အခါ ပျက်နေတဲ့ YBS တွေ ပြင်ချင်လို့ပါဆိုတော့ စောစောက မူးနေ၊ မိုက်နေ၊ ငိုနေသူတွေတောင် ထဆဲရတဲ့အထိဖြစ်ကုန်ပြန်တာပေါ့။

ဒါပေမယ့် ဦးလျန်ကျင့်မန်ဆိုတာ တစ်လျန်ကျင့်မန်တည်းရှိတာလေ။ ဘာရမလဲ...အဲဒီငွေစုပ်ဖုတ်ကောင်တွေ အကြောင်းကို ကောင်း
ကောင်းနောကျေနေပြီဖြစ်တဲ့ သူဟာ သူ့ဆီကို ဖုတ်ကောင်တွေဝင်စီးပြီး ၃၆ နာရီမပြည့်ခင် မှာပဲ အဲဒီကောင်တွေ သူ့ခန္ဓာကိုယ်ထဲကနေ အမြန်ခွာအောင် ဂါထာမန္တန်တွေနဲ့ မန်းမှုတ်နှင်ထုတ်လိုက်ပြီးနောက် “မဟုတ်ပါဘူး။ မလုပ်ပါဘူး။ မင်းထင်သလို မယုတ်မာဘူး”ဆိုတဲ့ စာသားတွေပါတဲ့ ကြေညာချက်တစ်စောင်ကို အလျင်အမြန်ပဲလက်မှတ်ထိုး ထုတ်ပြန်လိုက်ပါတော့တယ်။

ဟူး...တော်သေးလို့။ ဦးလျန်ကျင့်မန်ကယ်ပေလို့။ အလွန်တရာမှ ပါးရည်နပ်ရည်ရှိစွာနဲ့ ငွေစုပ်ဖုတ်ကောင်တွေကို အချိန်မီနှင်ထုတ်လိုက်နိုင်လို့သာပေါ့။ နို့မဟုတ်ရင် YBS ကိုအားပြုနေကြရရှာတဲ့ လူတစ်စု YBS ကို ကျောခိုင်းရဦး တော့မှာ။ဒီအရေးကနေ ဦးလျန်ကျင့်မန်ကြောင့် သီသီလေးကပ်လွတ်လာရတာပါလား။

ဦးလျန်ကျင့်မန် လည်း အာဏာသိမ်းဖက်ဆစ်​ကောင်​တွေလက်​အောက်မှာ ဒီရာထူးနဲ့ တာဝန်ယူထားသူမို့ ​ခေသူမဟုတ် ။ဖက်ဆစ်စစ်တပ် လုပ်သလို စာ ၂ ​စောင်ထုတ်လိုက်ရုံနဲ့လူကြမ်းက​နေ မင်းသားလုပ်တဲ့ အကွက်​တွေ သူ့
​ကောင်း​ကောင်းသင်ယူးထားပြီးပြီမဟုတ်ပါလား ။ ။

မလှိုင်မှာ စစ်တပ်က ကျေးရွာတွေ မီးရှို့ပြီး တန်ဖိုးကြီးပစ္စည်းတွေ သိမ်းယူ

သြဂုတ် ၂၀၊ ၂၀၂၆။ဇေအောင်/People's Spring

မန္တလေးတိုင်း၊ မလှိုင်မြို့နယ်မှာ အာဏာသိမ်းစစ်တပ် စစ်ကြောင်းက ကျေးရွာ ၇ ရွာကျော်က နေအိမ် ၃၀ ကျော် မီးရှို့ဖျက်ဆီးပြီး ယာဥ်တွေအပါအဝင် တန်ဖိုးကြီးပစ္ည်းတွေ သိမ်းယူသွားကြောင်း ဒေသခံတွေက ပြောပါတယ်။

​ကျောက်ပန်းတောင်းနဲ့ တောင်သာမြို့နယ်ဘက်ကတဆင့် သြဂုတ် ၁၇ ရက် မနက်ပိုင်းမှာ မလှိုင်မြို့နယ်အတွင်း စတင်ဝင်ရောက်လာတဲ့ စစ်တပ်စစ်ကြောင်းဟာ ဖိုးကြွယ်၊ တောင်ရိုးတဲ၊ လယ်ဗျား၊ ရေပေါ်၊ မိတ်ကုန်း၊ ကျောက်တန်း၊ မုံပင် စတဲ့ ကျေးရွာတွေကို ဝင်ရောက် မီးရှို့တာတွေ၊ တန်ဖိုးကြီးပစ္စည်း အဓမ္မသိမ်းယူတာတွေ ပြုလုပ်ခဲ့ကြောင်း လူထုသတင်းကွန်ရက်-မလှိူင်မြို့ရဲ့ တာဝန်ရှိသူက ပြောပါတယ်။

အဲဒီစစ်ကြောင်း မီးရှို့ဖျက်ဆီးမှုကြောင့် တောင်ရိုးတဲရွာနဲ့ လယ်ဗျားရွာက နေအိမ် ၆ လုံး၊ မိတ်ကုန်းရွာက နေအိမ် ၇ လုံး၊ ​ကျောက်တန်းရွာလမ်းတလျှောက် တောထဲက တဲအိမ် ၄ လုံး၊ ကျောက်တန်းရွာက နေအိမ် ၁၅ လုံးခန့်၊ မုံပင်ရွာက နေအိမ် ၂ လုံး စုစုပေါင်း ၃၄ လုံးခန့် ပျက်စီးခဲ့ကြောင်း ၎င်းက ပြောပါတယ်။

ဒါ့အပြင် လက်နက်ကြီးနဲ့ ပစ်ခတ်မှုကြောင့် ကျောက်တန်းရွာ အလယ်ကျောင်းဘုန်းကြီးကျောင်းရှိ စေတီတစ်ဆူ ထိခိုက်ပျက်စီးခဲ့ကြောင်း သိရပါတယ်။

ဖိုးကြွယ်၊ တောင်ရိုးတဲ၊ လယ်ဗျား၊ ကျောက်တန်း ရွာတွေမှာတော့ စစ်တပ်က သေနတ်ပြခြိမ်းခြောက်ပြီး ပြည်သူတွေဆီက ရွှေ၊ ငွေ၊ ဆိုင်ကယ်၊ ဖုန်းတွေနဲ့ ဖောကားတစ်စီး သိမ်းယူသွားတယ်လို့ ဒေသခံတွေက ပြောပါတယ်။

"အိမ်တွေမီးရှို့ရုံတင်မကဘူး။ အိမ်ကြီး၊အိမ်ကောင်းတွေဆို အတွင်းသော့ရိုက်ချိုးပြီး ရှိသမျှ နှမ်း၊ဆန်၊ဟင်းချက်စရာ၊အဝတ်စား၊အိုးခွက်ပန်းကန်ကအစယူသွားပြီး အိမ်ထဲရှိသမျှအကုန် ဖျက်ဆီးတာ"လို့ ဒေသခံတစ်ဦးက ပြောပါတယ်။

ဒါ့အပြင် မလှိုင်မြို့ပေါ်မှာပါ ပြည်သူတွေဆီကနေ ဆိုင်ကယ်နဲ့ ဖုန်းတွေသိမ်းယူနေလို့ ပြည်သူတွေ စိုးရိမ်ပြီး မြို့မစျေးကြီးကို ညနေ ၄ နာရီမှာ အရေးပေါ် ပိတ်သိမ်းခဲ့ရတယ်လို့ သိရပါတယ်။

အဲဒီစစ်ကြောင်းဟာ ကျောက်ပန်းတောင်းနဲ့ တောင်သာနယ်မှာလည်း ယခုလိုပဲ တန်ဖိုးကြီးပစ္စည်းတွေ သိမ်းယူတာ၊ ရွာတွေကို မီးရှို့တာတွေ ပြုလုပ်ခဲ့ကြောင်း၊ ဒီကနေ့ ငြဂုတ် ၂၀ ရက် မနက်မှာတော့ ၁၂ဘီးကားကြီး ပါ မော်တော်ယာဥ် ၁၂စီးနဲ့ မိတ္ထိလာမြို့ ဘက်သို့ ထွက်ခွာသွားကြောင်း သတင်းရရှိပါတယ်။

(ကျောက်တန်းကျေးရွာမှာ စစ်တပ် ရှို့တဲ့မီးငြှိမ်းသတ်နေတဲ့ ဒေသခံ တစ်ဦး။ ဓာတ်ပုံံ-ဒေသခံ)

စစ်တပ်က ဇူလိုင်တိုက်ပွဲအတွင်း ၃၀၀ကျော် သေဆုံးဟု NUG ကာကွယ်ရေး ထုတ်ပြန်

ဩဂုတ် ၂၀၊၂၀၂၆။ ထားမြတ်/People’s Spring

စစ်တပ်ရဲ့ ဇူလိုင်တိုက်ပွဲတွေအတွင်း ထိခိုက်သေဆုံးမှု အချက်အလက်တွေကို အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက ထုတ်ပြန်ခဲ့ရာ အရာရှိအပါအဝင် သေဆုံးသူ ၃၁၅ဦး ရှိတယ်လို့ ဖော်ပြပါတယ်။

NUG ကာကွယ်ရေးက စုစည်းထားတဲ့ စာရင်းတွေအရ စစ်ကောင်စီဘက်က သေဆုံးသူ ၃၁၅ဦး၊ ဒဏ်ရာရသူ ၄၇၃ဦး ရှိတယ်လို့ ဆိုပါတယ်။ ဒါ့အပြင် သေဆုံး၊ ဖမ်းမိနဲ့ ဒဏ်ရာရသူတွေထဲမှာ အရာရှိ ၂၉ဦး ပါဝင်ကြောင်း ဖော်ပြထားပြီး အသေးစိတ် အချက်အလက်တွေကိုတော့ ဖော်ပြမထားပါဘူး။
ဒါ့အပြင် စစ်တပ်စခန်းကို တိုက်ခိုက်မှု ၁၆ကြိမ်ပြုလုပ်ခဲ့ရာ စခန်းသိမ်းပိုက်နိုင်မှု ၁၀ကြိမ်ရှိခဲ့တယ်လို့ အသိပေးပါတယ်။

ပြည်သူ့ကာကွယ်ရေးတပ်မတော်(PDF) ရဲ့ ထုတ်ပြန်ချက်ရ ဇူလိုင်လအတွင်း မကွေးတိုင်း ဆောမြို့နယ်အတွင်းတိုက်ပွဲတွေမှာ စစ်ကောင်စီတပ် အထိနာခဲ့သလို စစ်ကောင်စီတပ်ရဲ့ လက်နက်ခဲယမ်းတွေ သိမ်းဆည်းရရှိခဲ့တာရှိပါတယ်။

ဒါ့အပြင် ဇူလိုင် ၂၅ရက်က မကွေး-ကံပြား-နေပြည်တော်လမ်းပေါ်ရှိ ရွှေဗန်း ရဲစခန်းနဲ့ စစ်ကောင်စီတပ် ဂိတ်စခန်းကို PDF ပူးပေါင်းတပ်က တိုက်ခိုက်ချေမှုန်းခဲ့ရာ စစ်တပ်သေဆုံးထိခိုက်မှုများရှိသလို လက်နက်ခဲယမ်းများသိမ်းရခဲ့ပါတယ်။

ဇူလိုင်လဆန်းကလည်း မန္တလေးတိုင်း မလှိုင်မြို့နယ် အိမ်ကြီးတောရွာကို စစ်ကြောင်းထိုးလာတဲ့ စစ်တပ်စစ်ကြောင်းကို PDF၊ ပကဖ ပူးပေါင်းတပ်က တိုက်ခိုက်ခဲ့ရာ စစ်တပ်ဘက်က သေဆုံးသူအချို့ရှိသလို ၁၀ဦး လက်နက်ချခဲ့ပြီး လက်နက်မျိုးစုံ အလက် ၂၀ သိမ်းရခဲ့ပါတယ်။

စစ်တပ်ရဲ့ သေဆုံးထိခိုက် အခြေအနေတွေအပြင် စစ်ကောင်စီတပ်က အရပ်သားတွေအပေါ် အကြမ်းဖက်မှု ဖြစ်စဉ်တွေကိုလည်း ထုတ်ပြန်ပါတယ်။

စစ်တပ်လက်ချက်ကြောင့် အရပ်သား ၂၀၃ ဦးသေဆုံးခဲ့ပြီး ဒဏ်ရာရသူ ၂၈၄ ဦး ရှိတယ်လို့ ဖော်ပြပါတယ်။ သေဆုံးသူတွေထဲမှာ ကလေးငယ် ၁၆ဦး ပါဝင်တယ်လို့လည်း အသိပေးထားပါတယ်။
ဒါ့အပြင် စစ်တပ်ရဲ့ ဖျက်ဆီးမှုတွေကြောင့် ဘာသာရေးအဆောက်အဦးနဲ့ ပညာရေးအဆောက်အအုံတွေ အပါအဝင် နေအိမ် ၅၆၀ ကျော်ပျက်စီးခဲ့ရကြောင်း ဖော်ပြပါတယ်။

စစ်တပ်ဟာ အရပ်သားတွေအပေါ် ပစ်မှတ်ထားတဲ့ လေကြောင်း တိုက်ခိုက်မှု၊ လက်နက်ကြီး တိုက်ခိုက်မှုတွေ မကြာခဏ လုပ်ဆောင်နေလို့ နိုင်ငံတဝန်း ဒေသအသီးသီးမှာ အရပ်သားသေဆုံးထိခိုက်မှုတွေ မကြာခဏ ဖြစ်ပေါ်ခဲ့ရပါတယ်။

ကာကွယ်ရေးဝန်ကြီးဌာနရဲ့ ထုတ်ပြန်ချက်မှာတော့ တော်လှန်ရေးတပ်ဖွဲ့တွေဘက်က ထိခိုက်ကျဆုံး အခြေအနေတွေတော့ အသိပေးထားတာမရှိပါဘူး။

(မြင်းခြံခရိုင်စစ်ဌာန ဖော်ဆောင်တဲ့ ပြီးခဲ့တဲ့ ဇူလိုင်လအတွင်း တိုက်ပွဲမှာ ဖမ်းမိတဲ့ စစ်သုံ့ပန်းတွေနဲ့ သိမ်းရတဲ့ လက်နက်ခဲယမ်းတွေ။ ဓာတ်ပုံ - ပြည်သူ့ကာကွယ်ရေးတပ်မတော်-PDF)

စစ်တပ်စခန်းချခဲ့တဲ့ အင်းဒင်ရွာမှာ စစ်ကျန်ဗုံးသီးပေါက်ကွဲလို့ ကလေးငယ် ၁၀ ဦး ဒဏ်ရာရ

ဩဂုတ် ၂၀၊ ၂၀၂၆။ ခိုင်မြတ်/ People's Spring

အာဏာသိမ်းစစ်တပ်က အထိုင်စခန်းချခဲ့တဲ့ ရခိုင်ပြည်နယ်၊ မောင်တောမြို့နယ်တောင်ပိုင်း အင်းဒင်ကျေးရွာမှာ ဒီ နေ့ ဩဂုတ် ၂၀ ရက် မနက်ပိုင်းက စစ်ကျန်ဗုံးသီးပေါက်ကွဲလို့ ကလေးငယ် ၁၀ ဦး ထိခိုက်ဒဏ်ရာရသွားခဲ့ပြီး အချို့မှာ စိုးရိမ်ရတယ်လို့ ဒေသခံတွေက ပြောပါတယ်။

ဒီနေ့ မနက် ၁၁ နာရီဝန်းကျင်ခန့်က ကလေးငယ်တစ်စု ဗုံးသီးကို ထုခွဲကစားကြရာကနေ ပေါက်ကွဲမှုဖြစ်ပြီး ထိခိုက် ဒဏ်ရာရသွားခဲ့တာပါ။

“ ရွာအနားက ကောက်လာကြတာထင်တယ်။ ဒီနားမှာက နယ်ခြားစောင့်စခန်းရှိခဲ့တယ်လေ။ အဲဒီမှာ မိုင်းတွေ လည်း အများကြီးထောင်ထားခဲ့ကြတာ။ အဲဒီနားက ရလာတာ ဖြစ်နိုင်တယ်။ ကလေးတွေဆိုတော့ ကစားနေကျအ တိုင်း ကစားနေရင်းနဲ့ ပေါက်ကွဲသွားတာ” လို့ မောင်တောဒေသခံတစ်ဦးက ပြောပါတယ်။

စစ်ကျန်လက်နက်ပေါက်ကွဲလို့ ထိခိုက်ဒဏ်ရာရသွားတဲ့ ကလေးငယ်တွေဟာ KG တန်းကနေ ၄တန်းအရွယ် ကလေးငယ်တွေဖြစ်ပြီး အဲဒီထဲက အချို့ဟာ ဒဏ်ရာပြင်းထန်ကာ စိုးရိမ်ရတယ်လို့ ဆိုပါတယ်။

“ဆေးရုံကိုတော့ ပို့ ထားပြီ” လို့ အဆိုပါမောင်တောဒေသခံက ဆိုပါတယ်။

အခု စစ်ကျန်လက်နက်ပေါက်ကွဲခဲ့တဲ့ အင်းဒင်ကျေးရွာမှာ အမှတ်(၆)နယ်ခြားစောင့်တပ်ဖွဲ့ခွဲ(နခခ-၆) အခြေစိုက်ခဲ့ ပြီး အာဏာသိမ်းပြီးနောက်ပိုင်းမှာ နယ်ခြားစောင့်ရဲတွေအပြင် အင်အားရာဂဏန်းရှိ စစ်တပ်ပါအထိုင်ချခဲ့ပါတယ်။

အဲဒီစခန်းကို အာရက္ခတပ်တော်(AA)က သိမ်းပိုက်ပြီးနောက် စစ်တပ် တပ်ဆုတ်ထွက်ပြေးသွားခဲ့ပြီး စစ်ကျန်လက် နက်တွေနဲ့ မိုင်းတွေ ကျန်နေခဲ့တာလို့ ဒေသခံတွေက ဆိုပါတယ်။

ရခိုင်ပြည်နယ်မှာ စစ်ကျန်လက်နက်ပေါက်ကွဲမှုကြောင့် ထိခိုက်၊ သေဆုံးရသူတွေ အများအပြားရှိနေပြီး AA ကလည်း တိုက်ပွဲလက်ကျန်မိုင်းတွေကို အပြည့်အ၀ရှင်းလင်းပေးနိုင်ခြင်းမရှိသေးပါဘူး။

AA ကတော့ ရခိုင်ပြည်အတွင်း ရှိနေတဲ့ မိုင်းနဲ့ စစ်ကျန်လက်နက်တွေကို တတ်နိုင်သလောက် ရှင်းလင်း၊ ဖယ်ရှားနေပေမယ့် စက်ကိရိယာတွေ လုံလောက်၊ ပြည့်စုံမှုမရှိတာကြောင့် အပြည့်အ၀ ရှင်းလင်းပေးနိုင်ဖို့ အခက်အခဲရှိနေတယ်လို့ ဆိုထားပါတယ်။

မိုင်းရှင်းလင်းရေးအထောက်အကူပြုပစ္စည်းကိရိယာတွေကို အိမ်နီးချင်းနိုင်ငံတွေ၊ နိုင်ငံတကာအဖွဲ့အစည်းတွေ အနေနဲ့ အကူအညီပေးနိုင်ရင်တော့ မိုင်းရှင်းလင်းရေးလုပ်ငန်းတွေကို ပိုပြီးတော့ အရှိန်အဟုန်မြင့် လုပ်ဆောင်နိုင်မယ်လို့ AA က ပြောထားပါတယ်။

မိုင်းရှင်းလင်းမှုအားနည်းတဲ့အပြင် မိုင်းနဲ့ပက်သက်တဲ့ အသိပညာပေးမှုကလည်း ရခိုင်ပြည်မှာ အားနည်းမှုရှိနေတယ်လို့ ဒေသခံတွေက ပြောပါတယ်။

“စစ်ကျန်လက်နက်နဲ့ ပတ်သက်ပြီး ကိုယ့်အစိုးရက ပညာပေး ဆိုင်းဘုတ်တွေ ကပ်တာတွေအပြင် ကျောင်းတွေမှာ လည်း ကလေးတွေကို ဆရာ၊ ဆရာမတွေက ဒါတွေကို တွေ့ရင် မကိုင်ဖို့ ၊ မထုခွဲဖို့ စသဖြင့် မဖြစ်မနေ အသိပညာ ပေးပြောပြဖို့လည်း လိုအပ်ပါတယ်၊ ကလေးတွေက စူးစမ်းတတ်တော့လေ” လို့ ပုဏ္ဏားကျွန်းမြို့နယ်မှ အလယ် တန်းပြဆရာမတဦးက ထောက်ပြပါတယ်။

မိုင်းနဲ့ စစ်ကျန်လက်နက်တွေကို ရှင်းလင်းပေးဖို့၊ အသိပညာပေးဖို့လိုအပ်သလို မိုင်းနဲ့ စစ်ကျန်လက်တွေကြောင့် ကိုယ်လက်အင်္ဂါဆုံးရှုံးခဲ့ရ သူတွေအတွက်လည်း ခြေတု၊ လက်တု ထောက်ပံ့ပေးဖို့နဲ့ စိတ်ပိုင်းဆိုင်ရာကုစားပေးဖို့ လည်း လိုအပ်နေတယ်လို့ မသန်စွမ်းအရေးလှုပ်ရှားသူတွေက ထောက်ပြကြပါတယ်။

ရခိုင်ပြည်နယ်မှာ ၂၀၂၃ နိုဝင်ဘာ ၂၃ ရက်ကနေ ၂၀၂၅ ဖေဖော်ဝါရီ ၂၀ ရက်အထိ မိုင်းနဲ့စစ်ကျန်လက်နက် ကြောင့် သေဆုံးရသူ ၅၁ ဦး၊ဒဏ် ရာရသူ ၂၈၅ ဦး ရှိခဲ့တယ်လို့ AA ရဲ့အချက်အလက်တွေမှာ ဖော်ပြပါတယ်။

(ရခိုင်ပြည်နယ်မှာ တွေ့ရတဲ့ မိုင်းအန္တရယ် သတိပေးဆိုင်းဘုတ်။ ဓာတ်ပုံ - CJ)

KNU ဥက္ကဋ္ဌနဲ့ ဝန်ကြီးဦးတင်ထွန်းနိုင်တို့ ပါဝင်တဲ့ SCEF ခေါင်းဆောင်တွေ ဂျပန်မီဒီယာတွေနဲ့ တွေ့ဆုံ

ဩဂုတ် ၂၀၊ ၂၀၂၆။ ထားမြတ်/People’s Spring

ဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင်ကောင်စီ (SCEF) ခေါင်းဆောင်တွေရဲ့ ဂျပန်နိုင်ငံခရီးစဉ်မှာ ဂျပန်နိုင်ငံရှိ သတင်းမီဒီယာများ၊ သတင်းသမားများနဲ့ တွေ့ဆုံကာ SCEF စုဖွဲ့မှု အကြောင်း၊ ရှေ့လုပ်ငန်းစဉ် နဲ့ ရည်မှန်းချက်တွေကိုရှင်းလင်းပြောကြားခဲ့တယ်လို့ အမျိုးသားညီညွတ်ရေးအစိုးရ(NUG) ဂျပန်နိုင်ငံဆိုင်ရာကိုယ်စားလှယ်ရုံးက ထုတ်ပြန်ထားပါတယ်။

SCEF ဦးဆောင်သူတဦးဖြစ်တဲ့ ကရင်အမျိုးသားအစည်းအရုံး(KNU) ဥက္ကဋ္ဌ ပဒိုစောကွယ်ထူးဝင်နဲ့ အမျိုးသားညီညွတ်ရေးအစိုးရ ပြည်ထောင်စုဝန်ကြီး ဦးတင်ထွန်းနိုင်တို့ ပါဝင်တဲ့ SCEF တာဝန်ရှိသူတွေဟာ ဩဂုတ် ၈ရက်မှာ ဂျပန်နိုင်ငံရောက် မြန်မာနိုင်ငံသားတွေနဲ့ တွေ့ဆုံခဲ့သလို ဩဂုတ် ၁၀ရက်မှာ မီဒီယာတွေ့ဆုံပွဲ သတင်းစာရှင်းလင်းပွဲ ကျင်းပခဲ့တာပါ။

သတင်းစာရှင်းလင်းပွဲမှာ SCEF စုဖွဲ့ခဲ့တဲ့ နောက်ခံ၊ လက်ရှိဆောင်ရွက်နေတဲ့ လုပ်ငန်းစဉ်၊ ဖက်ဒရယ်ဒီမိုကရေစီပြည်ထောင်စု တည်ဆောက်ရေးအတွက် ရှေ့ဆက်ဆောင်ရွက်သွားမယ့် အစီအစဉ်တွေနဲ့ ရည်မှန်းချက်တွေ ရှင်းလင်းခဲ့သလို ဂျပန်နိုင်ငံရှိ သတင်းမီဒီယာများနဲ့ သတင်းသမားများက မြန်မာနိုင်ငံရဲ့ လက်ရှိအခြေအနေ၊ ဖက်ဒရယ်ဒီမိုကရေစီနိုင်ငံတော် တည်ဆောက်ရေးလုပ်ငန်းစဉ်များတွင် SCEF ရဲ့ နိုင်ငံရေး အခန်းကဏ္ဍတွေနဲ့ပတ်သက်ပြီး မေးမြန်းခဲ့တာကို တာဝန်ရှိသူတွေက ပြန်လည်ဆွေးနွေးဖြေကြားခဲ့ကြောင်း အသိပေးပါတယ်။

ဂျပန်မီဒီယာများအနေနဲ့ မြန်မာနိုင်ငံရဲ့ဒီမိုကရေစီရေးနဲ့ ဖက်ဒရယ်ဒီမိုကရေစီပြည်ထောင်စု တည်ဆောက်ရေးဆိုင်ရာ အခြေအနေတွေ ပိုသိနားလည်စေဖို့ အခုတွေ့ဆုံပွဲဟာ အရေးပါတဲ့ အခွင့်အလမ်းဖြစ်ကြောင်းလည်း အမျိုးသားညီညွတ်ရေးအစိုးရ ဂျပန်နိုင်ငံဆိုင်ရာ ကိုယ်စားလှယ်ရုံး က ထုတ်ပြန်ပါတယ်။

SCEF ခေါင်းဆောင်တွေဟာ ဂျပန်နိုင်ငံရောက် မြန်မာတွေနဲ့ တွေ့ဆုံရာမှာလည်း ဖက်ဒရယ်ဒီမိုကရေစီပြည်ထောင်စုပေါ်ထွန်းရေးအတွက်ကြိုးပမ်း ဆောင်ရွက်နေမှုတွေ ရှင်းပြခဲ့သလို ဂျပန်ရောက်မြန်မာတွေရဲ့ မေးမြန်းချက်၊ အကြံပြုချက်၊ သဘောထားအမြင်တွေ အပေါ် အပြန်အလှန် ဆွေးနွေးခဲ့ကြတယ်လို့ ဆိုပါတယ်။

(SCEF ခေါင်းဆောင်တွေရဲ့ ဂျပန်နိုင်ငံခရီးစဉ်မှာ ဂျပန်သတင်းမီဒီယာတွေနဲ့ တွေ့ဆုံနေစဉ်။ ဓာတ်ပုံ - NUG)