(အာဏာသိမ်းခေါင်းဆောင်မင်းအောင်လှိုင်နဲ့ ထိုင်းအထက်လွှတ်တော်ဥက္ကဋ္ဌတို့ ဩဂုတ် ၇ရက်က တွေ့ဆုံစဥ်။ ဓာတ်ပုံ - EPA)

တာကျိုးလို့ရေဘေးသင့်နေတဲ့ ဧရာဝတီတိုင်းမှာ ကြံ့ခိုင်မှုမကောင်းတဲ့ ရေကာတာ ၂ခု ထပ်တွေ့လို့ အရေးပေါ် ပြုပြင်နေရ

ဩဂုတ်-၁၅၊၂၀၂၆၊ရွှေပြည်စိုး/People's Spring

လေးမျက်နှာမြို့က ငဝန်မြစ်ရေကာတာကျိုးလို့ မြို့နယ် ၅မြို့ထက်မနည်း ရေဘေးကြုံတွေ့နေစဉ် ဧရာဝတီတိုင်းအတွင်း နောက်ထပ် ရေကာတာ ၂ခု ကြံ့ခိုင်မှုမကောင်းလို့ အရေးပေါ် ပိတ်ဆို့ကာရံနေရပါတယ်။

ဧရာဝတီမြစ်ကမ်းဘေးမြို့နယ်တွေဖြစ်တဲ့ မြန်အောင်မြို့နဲ့ ဇလွန်မြို့တို့မှာ ရေကာတာကြံ့ခိုင်မှု စိတ်မချရတဲ့အန္တရာယ်ကြုံနေတာလို့ ဒေသခံတွေက ပြောပါတယ်။

ဧရာဝတီမြစ်ရေ စိုးရိမ်ရေမှတ်အထက်မြင့်တက်နေတဲ့မြန်အောင်မြို့မှာ အမှတ်(၁)ရပ်ကွက်အနီးက အုတ်နံရံနဲ့ကာထားတဲ့ ရေကာတာက ရေအမြင့် ၁ပေခန့်သာ လိုတော့ပြီး အတွင်းပိုင်းကနေ သဲအိတ်တွေနဲ့ ကာရံနေရပါတယ်။

မြန်အောင်မြို့တာမိုင် ၆/၃ အနီးမြေထိန်းကွန်ကရစ်နံရံ ပြိုမကျဖို့နဲ့ ရေမကျော်ဖို့အတွက် ဒေသခံလူထောင်ချီပြီး လုပ်အားပေးနေရတယ်လို့ မြို့ခံတစ်ဦးက ပြောပါတယ်။

မြန်အောင်တာမိုင် ၆/၃ နှင့်၆/၄ ကြား အရှေ့ဘက် ပေ ၂၅၀ ခန့်အကွာ အလျား (၇၆၅)ပေရှိ တာခြေထောက်မြေထိန်းကွန်ကရစ်နံရံ ကြံ့ခိုင်မှု လုပ်ဆောင်နေရတယ်လို့ စစ်ကောင်စီရဲ့ ဌာနဆိုင်ရာက ထုတ်ပြန်ထားပါတယ်။

ဒါ့အပြင် ဇလွန်မြို့မှာလည်း ဧရာဝတီမြစ်ရေစိုးရိမ်ရေမှတ်အထက်မြင့်တက်နေပြီး ညောင်ပင်သာရွာက ရေကာတာကို သဲအိတ်တွေနဲ့ ကာရံနေရတာဖြစ်ပါတယ်။

" လေးမျက်နှာအပြင် နောက်တစ်နေရာကသာထပ်ပြီးတာကြိုးသွားရင် ဧရာဝတီတိုင်းမလွယ်ဘူး။ အခုကတော့တကယ့်ကိုအရေးပေါ်အခြေနေပါ"လို့ ဇလွန်မြို့ခံတစ်ဦးက ပြောပါတယ်။

မြန်အောင်နဲ့ ဇလွန်ရေကာတာကျိုးပေါက်ခဲ့ပါက လက်ရှိရေဘေးကြုံနေတဲ့မြို့နယ်တွေအပြင် အနီးပတ်ဝန်းကျင်မြို့တွေဖြစ်တဲ့ ဟင်္သာတ၊ ဓနုဖြူ၊ အင်္ဂပူ၊ကွင်းကောက်မြို့နယ်တွေလည်း ရေကြီးနစ်မြုပ်မယ့်အန္တရာယ်ရှိနေပါတယ်။

ဒီနေ့ ဩဂုတ်လ ၁၅ရက် တိုင်းတာချက်အရ ဧရာဝတီမြစ်ရေဟာ လက်ရှိမှာ ဧရာဝတီတိုင်းအတွင်း ဆိပ်သာ၊ မြန်အောင်နဲ့ ဇလွန်မြို့နယ်တွေမှာ စိုးရိမ်ရေမှတ်အထက်ကို ၉လက်မကနေ ၁ပေခွဲခန့်အထိ ကျော်လွန်နေပါတယ်။

လေးမျက်နှာမြို့မှာ ပြီးခဲ့တဲ့ဇူလိုင် ၃၀ရက်က ငဝန်မြစ်ရေကာတာ ကျိုးကျခဲ့ပါတယ်။ လေးမျက်နှာမြို့နယ်အပြင် ဘေးပတ်ဝန်းကျင်ဒေသတွေဖြစ်တဲ့ အိုင်သပြု၊ ဟင်္သာတ၊ ရေကြည်၊ ကျုံကျော်နဲ့ ငါးသိုင်းချောင်းမြို့နယ်တွေထဲကကျေးရွာတွေပါ ရေဝင်နေပါတယ်။

မြစ်ရေတွေထပ်မံမြင့်တက်လာလို့ ရေကြီးနစ်မြုပ်မှု ပိုမိုဆိုးရွားနေပါတယ်။

မိုးလည်းဆက်ကြီးနိုင်တဲ့ သတိပေးချက်တွေနဲ့ မြစ်ရေတွေလည်း ဆက်တက်လာလို့ ဧရာဝတီတိုင်းအတွင်းရေကာတာတွေရဲ့ ကြံ့ခိုင်မှုအန္တရာယ်ကို ဒေသခံတွေ စိုးရိမ်နေကြပါတယ်။

လေးမျက်နှာရေကာတာကျိုးကျတဲ့ဖြစ်စဉ်ဟာ စစ်အုပ်စုက တမင်လုပ်ဆောင်ခဲ့တာလို့ ဒေသခံတွေကသံသယရှိနေသလို လက်ရှိရေးဘေးကယ်ဆယ်ရေးမှာလည်း အစီအစဉ်မကျတဲ့အတွက် စစ်အုပ်စုအပေါ်ကိုယုံကြည်မှုမရှိဘူးလို့ ဒေသခံတွေက ပြောဆိုနေကြပါတယ်။

လေးမျက်နှာမြို့ ရေဘေးမှာ စစ်ကောင်စီရဲ့ ထုတ်ပြန်ချက်နဲ့ မြေပြင်က ကယ်ဆယ်ရေးအဖွဲ့တွေရဲ့ ပြောဆိုချက်တွေဟာ ဆန့်ကျင်ဘက်ဖြစ်နေပါတယ်။

ဩဂုတ် ၅ရက်က ပုသိမ်မြို့ကိုရောက်လာ‌တဲ့ စစ်ကောင်စီ ဒုတိယသမ္မတက ရေဘေးဖြစ်ဖြစ်ချင်း ကယ်ဆယ်ရေးတွေ အပြည့်အဝလုပ်ဆောင်နိုင်ခဲ့တဲ့အတွက် အသေအပျောက်မရှိခဲ့ဘူးလို့ ပြောပါတယ်။

သူအဲ့ဒီလို ပြောနေချိန်မှာပဲ လေးမျက်နှာမြို့နယ်၊ အိုင်သပြုရွာလမ်းဆုံမှာ ရေဘေးသင့်ပြည်သူတွေကိုထမင်းထုပ်လိုက်ဝေတဲ့ လူငယ်တစ်ဦး ရေနစ်မြုပ်သေဆုံးခဲ့ပါတယ်။

ဩဂုတ်လ ၈ရက်က စစ်ခေါင်းဆောင်ဗိုလ်ချုပ်မှူးကြီးမင်းအောင်လှိုင်ရဲ့ ပုသိမ်ခရီးစဉ်မှာလည်း တိုင်းအစိုးရအဖွဲ့ဟာ ပြည်သူတွေဘေးကင်းအောင် စီမံနိုင်ခဲ့တယ်လို့ ပြောပြန်ပါတယ်။ လက်ရှိရေဘေးနဲ့ ရေကာနာတွေရဲ့ကြံ့ခိုင်မှုကို အဓိကစီမံကိုင်တွယ်နေတဲ့ ဧရာဝတီတိုင်းအစိုးရကလည်း လနဲ့ချီကြာမယ့်ရေဘေးကို ၁၄ရက်အတွင်း ရေပြန်ကျရင် စပါးတွေမပျက်စီးနိုင်ဘူးလို့ ထုတ်ပြန်ခဲ့ပါတယ်။

Elite ခရီးသည်တင်ယာဉ် ချောက်ထဲကျ၊ ခရီးသည်တွေ ဒဏ်ရာရ

ဩဂုတ်-၁၅၊၂၀၂၆။သတိုး၊သုည/People's Spring

ရန်ကုန် - မန္တလေး အမြန်လမ်းမှာ Elite ခရီးသည်တင်ယာဉ် တစ်စီး ယာဉ်မောင်းအိပ်ငိုက်ရာက တံတားအောက်ထိုးကျပြီး ခရီးသည် ၄ဦး ထိခိုက်ဒဏ်ရာရရှိခဲ့တယ်လို့ မီးသတ်တပ်ဖွဲ့က အသိပေးထားပါတယ်။

ဒီနေ့ (ဩဂုတ်၁၅) မနက် ၅ နာရီကျော်မှာ နေပြည်တော်ကနေ ရန်ကုန်မြို့ကိုထွက်ခွာလာစဉ် မိုင်တိုင် ၅၈/၁ အနီးမှာ Elite ခရီးသည်တင်ယာဉ်က ယာဉ်မောင်းအိပ်ငိုက်ပြီး လမ်းလယ်ကျွန်းဝင်တိုက်ကာတံတား‌အောက်ကို ထိုးကျတိမ်းမှောက်ခဲ့တာလို့ အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့က ထုတ်ပြန်ထားပါတယ်။

ယာဉ်ပေါ်မှာ ယာဉ်မောင်းအပါအဝင် ခရီးသည် ၁၅ ဦးလိုက်ပါလာတာဖြစ်ပြီး အမျိုးသား ၂ ဦး အမျိုးသမီး ၂ ဦး ထိခိုက်ဒဏ်ရာရရှိခဲ့တယ်လို့ မီးသတ်တပ်ဖွဲ့က ဆိုပါတယ်။

အမြန်လမ်းမှာ ဖြစ်တဲ့ယာဉ်တိမ်းမှောက်မှု အများစုက ယာဉ်မောင်းအိပ်ငိုက်တာကြောင့် ဖြစ်ပြီး ယာဉ်မောင်းတွေအနေနဲ့ ကား နှစ်နာရီဆက်တိုက်မောင်းပြီးတိုင်း ယာဉ်ရပ်နားစခန်းတွေမှာ ရပ်နားဖို့ အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ က အကြံပြုထားပါတယ်။

ဒါ့အပြင် ခရီးသည်တွေအနေနဲ့လည်း ထိုင်ခုံခါးပတ် ပတ်ကြဖို့ ၊ ယာဉ်အမျိုးအစားအလိုက် သတ်မှတ်မိုင်နှုန်းနဲ့ မောင်းနှင်ဖို့လည်း သတိပေးထားပါတယ်။

ပြီးခဲ့တဲ့ ဩဂုတ် ၅ ၊ ၆ နဲ့ ၇ ရက်မှာလည်း ရန်ကုန်-မန္တလေး အမြန်လမ်းမှာ ကုန်တင်ကားယာဉ်မောင်းတွေ အိပ်ငိုက်ပြီး ယာဉ်တိမ်းမှောက်တဲ့ ဖြစ်စဉ်တွေဖြစ်ခဲ့ကြောင်း အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ က သတင်းထုတ်ပြန်ထားပါတယ်။

■ရုပ်ရှင်ခံစားမှု

ခေတ်ဆိုးအမွေ
Raakh(၂၀၂၆)

ဝဇီရာ/People's Spring

၁၉၇၈ ခုနှစ်က အိန္ဒိယနိုင်ငံ၊ နယူးဒေလီမြို့ရဲ့ ညနေခင်းတစ်ခု။ဆူမန်နဲ့ ဆာဟေးဆိုတဲ့ မောင်နှမနှစ်ယောက်ဟာ အသံလွှင့်ရုံံကို သွားဖို့ ပြင်ဆင်နေကြတယ်။ အသံလွှင့်ရုံမှာ ဆူမန်ကသီချင်းဆိုရမှာပါ။မိခင်ကTaxi ခပေးလိုက်
တယ်။ညကျအဖေလာကြိုမယ်တဲ့။မောင်နှမ
နှစ်ယောက် ပျော်ပျော်ရွင်ရွှင်ပဲ ထွက်ခွာသွားတယ်။

ညဘက်ကျ မောင်နှမနှစ်ယောက်ရဲ့မိဘနှစ်ပါးဟာရေဒီယိုရှေ့ကနေသူ့သမီးလေး သီ
ချင်းဆိုမှာကို အားပေးဖို့ တမျှော်မျှော်နဲ့ စောင့်နေခဲ့တယ်။ ဒါပေမယ့် အစီအစဥ်သာ ပြီးသွားတယ်။ သူတို့သမီးလေးသီချင်းဆိုတာ လွှင့်မလာခဲ့ဘူး။

ဒါနဲ့ ဖခင်ဖြစ်သူလည်း ဆိုင်ကယ်လေးထုတ်ပြီးအသံလွှင့်ရုံဆီ ပြေးတော့တယ်။ဟိုရောက်တော့ သမီးလေးတို့မောင်နှမနှစ်ယောက်လုံး အသံလွှင့်ရုံကို ရောက်မလာခဲ့ဘူးတဲ့။ ဖခင်ကော မိခင်ပါ ခေါင်းမီးတောက်ရပြီ။

ရဲစခန်းသွားပြီး တိုင်ချက်ဖွင့်တယ်။ သူတို့အမှုကို လိုက်ရမှာက အတွေ့အကြုံနည်းသေးတဲ့ ရဲအရာရှိ ဂျေပရာကတ်ရှ်ပါ။ ဒါပေမယ့် သူက စိတ်အားထက်သန်မှုရှိသူပါ။ မောင်နှမနှစ်ယောက် ပျောက်ဆုံးမှုကို လိုက်လံစုံစမ်းဖော်ထုတ်ပါတယ်။ နောက်ဆုံးတော့ မောင်နှမနှစ်ယောက်ရဲရုပ်အလောင်းကို တောထဲတနေရာမှာ ရုပ်ပျက်ဆင်းပျက် တွေ့လိုက်ရပါတယ်။ ရဲအရာရှိဟာ တရားခံကို ဖမ်းဆီးရမိဖို့ ရေကုန်ရေခမ်း ကြိုးစားပါတော့တယ်။

ဒီဇာတ်လမ်းဟာ အဲဒီကာလက တကယ်ဖြစ်ခဲ့တဲ့ အဖြစ်အပျက်ကို စီးရီးအဖြစ် ပြန်လည်ရိုက်ကူးထားတာပါ။ အဓိက တရားခံ ဘာဘူအဖြစ် သရုပ်ဆောင်တဲ့ Akash Makhija ဟာ အတော်လေးရွံစရာကောင်းအောင် သရုပ်
ဆောင်သွားတာ တွေ့ရပါတယ်။ သူ့ကိုကြည့်ရတာ တကယ့်အောက်တန်းစားတစ်ယောက်ကို ကြည့်နေရသလိုပါ။ သူ့ရဲ့ သွေးအေးပြီး ကြောက်မက်ဖွယ်ကောင်းတဲ့ ဗီလိန်ဇာတ်
ကောင် ပုံစံကြောင့် ပရိသတ်တွေကြားမှာ အထူး ရေပန်းစား လူသိများလာခဲ့ပါသတဲ့။

ဒီဇာတ်ကားကြည့်ပြီး ဆွေးနွေးချင်တာက
တော့ လူတွေရဲ့ဘဝတွေအပေါ် နိုင်ငံရေးအခြေအနေက ဘယ်လောက်အထိ ရိုက်ခတ်သလဲဆိုတာပါ။ဘာဘူ ဘာကြောင့် ဒီလောက်အထိ ရက်စက်ခွင်၊ ဆိုးသွမ်းခွင့် ရခဲ့တာလဲ။

ဇာတ်ကားထဲမှာမပါတဲ့ အိန္ဒိယနိုင်ငံရဲ့ အဲဒီကာလ နိုင်ငံရေးအခြေအနေဟာ ဝန်ကြီးချုပ် အင်ဒီရာဂန္ဒီလက်ထက် ၁၉၇၅ ခုနှစ်ကနေ ၁၉၇၇ ခုနှစ်အထိ ၂၁ လတိတိ ကြာမြင့်ခဲ့တဲ့ နိုင်ငံတော် အရေးပေါ်အခြေအနေကျင့်သုံးခဲ့မှုကြီး ပြီးခါစအချိန် ဖြစ်ပါတယ်။

အရေးပေါ်ကာလအတွင်း အစိုးရရဲ့ ဖိနှိပ်ချုပ်
ချယ်မှုတွေ၊ လူ့အခွင့်အရေး ဆိုင်းငံ့ခံရမှုတွေကြောင့် ပြည်သူတွေကြားမှာ အစိုးရနဲ့ အာ
ဏာပိုင်တွေအပေါ် မကျေနပ်ချက်တွေ၊ စိုးရိမ်ပူပန်မှုတွေ အများကြီး ကျန်ရစ်နေခဲ့ပါတယ်။

အစိုးရပြောင်းလဲမှု၊ စီးပွားရေးကျပ်တည်းမှုနဲ့ အလုပ်လက်မဲ့ ပြဿနာတွေကြောင့် မြို့ကြီးတွေအထူးသဖြင့် နယူးဒေလီမြို့ မှာ လူငယ်တွေနဲ့ အလွှာပေါင်းစုံကြား မရေရာမသေချာမှုတွေ မြင့်တက်နေပါတယ်။ ရဲတပ်ဖွဲ့နဲ့ တရားဥပဒေ စိုးမိုးရေး ယန္တရားတွေအနေနဲ့လည်း ခေတ်ကာလရဲ့ဖိအားတွေ၊ရာဇဝတ်မှု အသစ်
အဆန်းတွေကို ရင်ဆိုင်ဖြေရှင်းနေရချိန် ဖြစ်ပါတယ်။

အရေးပေါ်အခြေအနေ ပြီးခါစ ကာလဖြစ်တာနဲ့အညီ အစိုးရယန္တရားနဲ့ ရဲတပ်ဖွဲ့တွေဟာ အပြောင်းအလဲတွေကြားမှာ ရှုပ်ထွေးနေပြီး စနစ်တကျ မရပ်တည်နိုင်သေးပါဘူး။ ဒီလို ဥပဒေစိုးမိုးရေး အားနည်းချက်နဲ့ ကွက်လပ်ကြီးတွေ ရှိနေတာက ရာဇဝတ်ကောင်တွေအ
တွက် "ငါတို့ ဒီပြစ်မှုကနေ လွတ်မြောက်နိုင်တယ်၊ ဘယ်သူမှ သေချာကိုင်တွယ်နိုင်မှာ မဟုတ်ဘူး" ဆိုတဲ့ ယုံကြည်ချက်ကို ပိုပေး
လိုက်သလို ဖြစ်စေပါတယ်။

​မြို့ပြကြီးတွေမှာ စီးပွားရေး ကျပ်တည်းမှု၊ အလုပ်လက်မဲ့ ပြဿနာနဲ့ မရေရာမသေချာမှုတွေ မြင့်မားနေချိန်မှာ လူငယ်တွေနဲ့ အလွှာပေါင်းစုံကြားထဲမှာ "ဘယ်လိုပဲဖြစ်ဖြစ် ရှင်သန်ရမယ်၊ ဖြတ်လမ်းနည်းနဲ့ ငွေရှာရမယ်" ဆိုတဲ့ အဆိုးမြင် စိတ်ဓာတ်တွေ ကိန်းအောင်းလာခဲ့ပါတယ်။ ဓနဥစ္စာ မညီမျှမှုနဲ့ လူမှုရေး ဖိနှိပ်မှုတွေက လူတွေရဲ့ ကိုယ်ကျင့်တရားကို ပျက်ပြားစေပြီး လူ့အသက်ကို တန်ဖိုးမထားတော့တဲ့ သွေးအေးတဲ့ စိတ်နေသဘောထားကို မွေးထုတ်ပေးလိုက်တော့တာပါ။

ကျနော်တို့ နိုင်ငံမှာလည်း စစ်တပ်ရဲ့ တကျော့ပြန်အာဏာသိမ်းမှု ၅ နှစ်ကျော်လာတဲ့အချိန် ဇာတ်ကားထဲက ဘာဘူတို့လို့ လူယုတ်မာတွေ အများကြီး ပေါ်ထွက်လာစေခဲ့တာ အများမျက်မြင်ပါ။ ပြည်သူတွေ အားကိုးရမယ့် ရဲ
တပ်ဖွဲ့ကလည်း ပြည်သူကို ရန်သူထင်ဖိနှိပ်၊ ခေတ်ပျက်ထဲငွေရှာဖို့ပဲခေါင်းထဲရှိနေခဲ့တယ်။ ကျနော်တို့ ပြည်သူတွေဟာ စစ်အာဏာရှင်အပြင် ခေတ်ဆိုးက မွေးဖွားပေးလိုက်တဲ့ လူယုတ်မာတွေကိုပါ ရင်ဆိုင်နေရတဲ့အချိန်ပါ။ ပြည်သူတွေဟာ ကိုယ့်လုံခြုံရေး ကိုယ်တာဝန်ယူနေရတဲ့အချိန် ရောက်နေပါတယ်။

စာဖတ်သူ။ သတိနဲ့နေပါ။ ကျနော်တို့ ပတ်
ဝန်းကျင်မှာ ဘာဘူလိူလူတွေ ဝိုင်းနေတယ်။

ဧရာဝတီတိုင်း၊ လေးမျက်နှာမြို့ဟာငဝန်မြစ်ဘေးမှာ ရှိပြီးမြို့နဲ့မြစ်ကို မြေသားရေကာတာနဲ့ ခြားထားပါတယ်။ငဝန်မြစ်ဟာ ဧရာဝတီမြစ်နဲ့ဆက်စပ်နေသလိုဘင်္ဂလားပင်လယ်
အော်ထဲလည်း စီးဆင်းပါတယ်။ ဇူလိုင်လတတိယလပတ်ကစပြီး ငဝန်မြစ်ရေဟာ မိုးရာသီကာလ ပုံမှန်အတိုင်း မြင့်တက်နေခဲ့ပါတယ်။

ဇူလိုင်လ၃၀ရက်နေ့ညမှာတော့ ငဝန်မြစ်ကမ်းဘေးကမြစ်ကျိုးကျေးရွာရဲ့တာမိုင်(၂၅ / ၃) အနီးအလျားပေ၅၀ခန့် ကျ်ိုးကျသွားပါတယ်။ရေတွေဟာ တာကျိုးပေါက်ကနေ မြို့အတွင်းပိုင်းကို ဒလဟော စီးဝင်ခဲ့ပါတယ်။ နောက်နေ့မှာတော့ တာကျိုးပေါက်ဟာပေ ၂၀၀ ကျော်အထိကျယ်သွားပြီး ၃၆နှစ်အတွင်း အဆိုးရွားဆုံးရေဘေးဒဏ်ကို ဒေသခံတွေ ရင်ဆိုင်ခဲ့ရပါတယ်။လေးမျက်နှာမြို့နယ်အပြင်ဘေးပတ်ဝန်းကျင်ဒေသတွေဖြစ်တဲ့ အိုင်သပြု၊ ဟင်္သာတ၊ ရေကြည်၊ ကျုံကျော်နဲ့ ငါးသိုင်းချောင်းမြို့နယ်တွေထဲကကျေးရွာတွေပါ ရေလွှမ်းခဲ့ပါတယ်။

တာကျိုးကျတဲ့ညနဲ့ နောက်ထပ် ၂ရက်အတွင်းအခြေအနေဟာ အရေးပေါ်ဖြစ်ခဲ့ပါတယ်။နာရီပိုင်းအတွင်း တရိပ်ရိပ်တက်လာတဲ့ရေကြောင့် ဒေသခံတွေဟာ ရေလွတ်ရာကို ရှာဖွေခဲ့ကြရပါတယ်။ ကယ်ဆယ်ရေးအဖွဲ့တွေကိုစောင့်ဆိုင်းခဲ့ကြရပါတယ်။အဲဒီအချိန်မှာပဲ လေးမျက်နှာမြို့နယ်ထဲကို ရဟတ်ယာဉ်နဲ့ Y12လေယာဉ်၊ ဂျက်ဖိုက်တာတချို့ဖြတ်ပျံပြီး ရခိုင်ရိုးမအခြေက ရွာတွေကို ဗုံးကြဲခဲ့တာပါ။ ရေ‌ဘေးကြောင့် ထိခိုက်သေဆုံးသူထက် ဗုံးကြဲတိုက်ခိုက်မှုတွေကြောင့် ထိခိုက်သေဆုံးသူကပိုများခဲ့ပါတယ်။ရက်ပိုင်းအတွင်းအရပ်သားသုံးဦးသေဆုံးပြီး ၁၆ဦးဒဏ်ရာရခဲ့ပါတယ်။

ငဝန်မြစ်ရေကာတာကျိုးကျတာက သွေးရိုး
သားရိုးမဟုတ်ဘူးလို့ဒေသခံတွေကယုံကြည်နေပါတယ်။ ” ရေကာတာကို မအလ ချိုးချတာ”၊ ” ဂျပုက တိုက်ပွဲအခြေအနေမကောင်းလို့ ရေဘေးဖြစ်အောင်လုပ်တာ” စသဖြင့် ဒေသခံတွေ တီးတိုးပြောဆိုနေကြပါတယ်။

ဒီနေရာမှာလေးမျက်နှာမြို့ရဲ့လက်ရှိ မြေပြင်အခြေအနေ၊ပထဝီဝင် အနေအထားနဲ့ ဒေသတွင်း နိုင်ငံရေးရာသီဥတုကိုအကြမ်းဖျင်းရှင်းပြပါမယ်။

လေးမျက်နှာမြို့နယ်ဟာ ရခိုင်ရိုးမ နဲ့လည်းဆက်စပ်နေပြီး ပုသိမ်-မုံရွာလမ်းလည်းဖြတ်သွားပါတယ်။၂၀၂၄ ဒီဇင်ဘာလမှာ ဂွမြို့ကို အာရက္ခတပ်တော်(AA) သိမ်းယူပြီးတဲ့နောက်
ပိုင်း ရခိုင်ပြည်နယ်နဲ့ဆက်စပ်နေတဲ့ ဧရာဝ
တီတိုင်းထဲကရွှေသောင်ယံ၊သာပေါင်း၊ ရေကြည် နဲ့ လေးမျက်နှာမြို့တွေမှာ တိုက်ပွဲတွေ စတင်ဖြစ်ပွားခဲ့ပါတယ်။စစ်တပ် တပ်စွဲထားတဲ့ရွာတချို့ကိုAA နဲ့ ပူးပေါင်းတပ်တွေ သိမ်းယူခဲ့ပါတယ်။လေးမျက်နှာမြို့နယ်ဟာ တခြားမြို့တွေလိုပဲ အာဏာသိမ်းစစ်တပ်အထိနာနေတဲ့ စစ်ရေးဧရိယာဖြစ်ပါတယ်။

ငဝန်မြစ်ရေဂါတာကျိုးမကျခင် တစ်လခန့်မှာ ယခင်တိုက်ပွဲတွေထက်ပိုပြင်းထန်ခဲ့ပြီး စစ်တပ်က လေကြောင်းပစ်ကူနဲ့ အသည်း
အသန်ခုခံနေရတာပါ။ဒါ့ကြောင့် AAရဲ့ထိုးစစ်ကို ဟန့်တားနိုင်ဖို့ ငဝန်မြစ်ရေကာတာကို စစ်အုပ်စုက တမင်ချိုးချခဲ့တယ်လို့ ဒေသခံ အများစုကယုံကြည်နေကြပါတယ်။

“ရေက သာမန်ပဲရှိသေးတာပါ။ထူးထူးကဲကဲတက်နေတာမဟုတ်သေးဘူး။နောက်ပြီးတော့ ဒါက ဒီနှစ်ရဲ့ပထမဆုံးမြစ်ရေတက်တာ။ပုံမှန်အခြေအနေမှာ တာကျိုးရိုးထုံးစံမရှိဘူး” လို့ လေးမျက်နှာမြို့ပေါ်မှာနေထိုင်သူတဦးကသုံးသပ်​ပြောပါတယ်။

၂၀၂၀ ရွေးကောက်ပွဲအနိုင်ရ လေးမျက်နှာမြို့နယ် ပြည်သူ့လွှတ်တော်ကိုယ်စားလှယ်
ဦးဇော်မင်းသိန်းကတော့ ဒီရေဘေးဟာ စစ်အုပ်စုက ရည်ရွယ်ချက်ရှိရှိ ဖန်တီးတာလို့ သတင်းမီဒီယာတွေကတစ်ဆင့်ထုတ်ဖော်ပြောဆိုထားပါတယ်။တာခြေအနီး ရေတိုက်စားပြီးပေါက်နေတာကိုဒေသခံတွေက တွေ့လို့ တာဝန်ရှိသူတွေကို အချိန်မီအကြောင်းကြားပေမယ့် မြို့ပေါ်ကနေသွားရင် ၅မိနစ်အတွင်း ရောက်တဲ့နေရာမှာ ရှိတဲ့အဆိုပါနေရာကို ဌာနဆိုင်ရာတွေကလုံလောက်တဲ့ကြိုတင်ကာကွယ်ရေး မလုပ်ခဲ့ဘူးလို့ ဦးဇော်မင်းသိန်းက ပြောပါတယ်။

တမင်လုပ်တာကို သဘာဝဘေးအဖြစ် ခေါင်းစဉ်တပ်ပြီးကယ်တင်ရှင်အဖြစ်ပုံဖော်နေတယ်လို့ ဆိုပါတယ်။ မြေပြင်တ်ိုက်ပွဲတွေအထိနာနေတာနဲ့ နိုင်ငံတကာဖိအားတွေ ပိုများလာချိန်မှာ လေးမျက်နှာရေဘေးကို ဖန်တီးတာလို့ ဒေသခံတွေကသုံးသပ်ကြပါတယ်။ စစ်အုပ်စုကတော့ အကျယ် ပေ ၃၀၀ ခန့်အထိ တာကျိုးသွားတာကိုတောင်တာကျိုးတယ်လို့ မထုတ်ပြန်ပါဘူး။ ” တာရေကျော်တာ” ၊ ” ရေဖြတ်စီးဆင်းတာ” လို့ပဲ ထုတ်ပြန်ပြီး စစ်အာဏာရှင်တွေရဲ့ထုံးစံအတိုင်းသူတို့ရဲ့အမှားကိုယုတ္တိမရှိတဲ့အသုံးအနှုန်းတွေနဲ့ ဖာထေးနေပါတယ်။


https://www.ludunwayoo.com/feature-mm/2026/08/15/165615/

မြစ်ရေတက်ပြီး မိုးကြီးနေလို့ လေးမျက်နှာရေဘေး ပိုဆိုးလာ

ဩဂုတ်-၁၅၊၂၀၂၆။ရွှေပြည်စိုး/People's Spring

လေးမျက်နှာမြို့နယ်မှာ ရေကာတာကျိုးပေါက်လို့ဖြစ်တဲ့ရေဘေးဟာ ဩဂုတ်ပထမလပတ်ထဲမှာ ရေအနည်းငယ်ပြန်ကျနေရာကနေ ယခုရက်ပိုင်း တကျော့ပြန် ရေမြင့်တက်လာပြီး အခြေအနေပိုဆိုးရွားလာပါတယ်။

ဧရာဝတီတိုင်း၊ လေးမျက်နှာမြို့မှာ ပြီးခဲ့တဲ့ဇူလိုင် ၃၀ရက်က ငဝန်မြစ်ရေ ကာတာကျိုးကျပြီး လေးမျက်နှာမြို့နယ်အပြင် ဟင်္သာတ၊ ရေကြည်၊ ကျုံပျော်နဲ့ ငါးသိုင်းချောင်းမြို့နယ်တွေကကျေးရွာတွေပါ ရေကြီးခဲ့ပါတယ်။

ဩဂုတ် ၃ရက်ကစပြီး ရေအနည်းငယ်ပြန်ကျနေတာကနေ ဒေသတွင်းမိုးကြီးမှုနဲ့ မြစ်ရေလည်း ပြန်တက်လာလို့ ဩဂုတ် ၁၃ရက်ကစပြီး ရေပြန်တက်လာတာပါ။

" ‌တာကျိုးကာစက မြုပ်တဲ့ရေထက် ပိုများနေပြီ။ လေးမျက်နှာရော ဒေသ‌တကြောလုံး ပြန်တက်လာတာ။ မူလထက် ၂ပေကျော်အထိ ရေတိုးလာလို့ စခန်းတွေ ထပ်ရွှေ့ရတယ်"လို့ လေးမျက်နှာမြို့ခံတစ်ဦးက ပြောပါတယ်။

ရေအတက်ကြမ်းလာလို့ မူလကယ်ဆယ်ရေးစခန်းတွေမှာ နေလို့မရတော့တဲ့အတွက် လေးမျက်နှာ၊ ရေကြည်၊ ကျုံပျော်နဲ့ ငါးသိုင်းချောင်းမြို့နယ်တွေထဲက ရေဘေးကယ်ဆယ်ရေးစခန်းအချို့ကို နေရာရွှေ့နေရတယ်လို့ သိရပါတယ်။

တာကျိုးပေါက်ကို ဌာနဆိုင်ရာတွေက စက််ယန္တရားတွေနဲ့ ပိတ်ဆို့နေပေမယ့် အလုပ်မတွင်ဘဲ မပိတ်နိုင်သေးဘူးလို့ ဒေသခံတွေကပြောပါတယ်။တာကျိုး‌ေပါက်ကိုSheet Pile ရိုက်ပြီး ကာရံတဲ့ လုပ်ငန်းလုပ်ဆောင်နေတယ်လို့ စစ်ကောင်စီက သတင်းထုတ်ပြန်ထားပါတယ်။

လက်ရှိမှာ ငဝန်မြစ်နဲ့ ဆက်စပ်နေတဲ့ ဧရာဝတီမြစ်ကလည်း ဧရာဝတီတိုင်းအတွင်း ဆိပ်သာ၊ မြန်အောင်နဲ့ ဇလွန်မြို့နယ်တွေမှာ စိုးရိမ်ရေမှတ်အထက်ကို ၉လက်မကနေ ၁ပေခွဲခန့်အထိ ကျော်လွန်နေပါတယ်။

မြန်အောင်မြို့၊ အမှတ်(၁)ရပ်ကွက်အနီးက အုတ်နံရံနဲ့ကာထားတဲ့ ရေကာတာကနေလည်း မြစ်ရေကျော်နေလို့ အတွင်းပိုင်းကနေ သဲအိတ် တွေကာနေရပါတယ်။

မြန်အောင်တာမိုင် ၆/၃ နဲ့ ၆/၄ ကြား အရှေ့ဘက် ပေ ၂၅၀ ခန့်အကွာ အလျား (၇၆၅)ပေရှိ တာခြေထောက်မြေထိန်းကွန်ကရစ်နံရံ ကြံ့ခိုင်ရေးကိုလုပ်ဆောင်နေရတယ်လို့ ဌာနဆိုင်ရာကသတင်းထုတ်ပြန်ထားပါတယ်။ဇလွန်မြို့၊ ညောင်ပင်သာရွာက ရေကာတာကို သဲအိတ်တွေနဲ့ ကာရံနေရပါတယ်။

မြန်အောင်နဲ့ ဇလွန်ရေကာတာ ကျိုးပေါက်ခဲ့ရင် လက်ရှိရေဘေးကြုံနေတဲ့မြို့နယ်တွေအပြင် အနီးပတ်ဝန်းကျင်မြို့တွေဖြစ်တဲ့ ဟင်္သာတ၊ ဓနုဖြူ၊ အင်္ဂပူ၊ကွင်းကောက်မြို့နယ်တွေလည်း ရေကြီးနစ်မြုပ်မယ့်အန္တရာယ်ရှိနေပါတယ်။

လေမျက်နှာမြို့ တာကျိုးပေါက်တဲ့ဖြစ်စဉ်မှာဟင်္သာတ၊ ရေကြည်၊ ကျုံ ပျော်နဲ့ ငါးသိုင်းချောင်းမြို့နယ်တွေထဲကကျေးရွာတွေပါ ရေကြီးနေသလို ဒါးကချောင်းအပါအဝင် ဒေသတွင်းက ချောင်းတွေလည်းရေဝင်လာလို့ အသုတ်၊ ပန်းတနော်မြို့တွေမှာလည်း အနိမ့်ပိုင်း တွေနစ်မြုပ်လာပြီလို့ ဒေသခံတွေကပြောပါတယ်။

ဧရာဝတီမြစ်ရေဟာ ကချင်ပြည်နယ်၊ စစ်ကိုင်းတိုင်း၊ မကွေးတိုင်း၊ မန္တလေးတိုင်းက မြစ်ကမ်း‌ ဘေးမြို့နယ်တွေမှာလည်း ပုံမှန်ထက်မြင့်တက်နေတဲ့အတွက် ဧရာဝတီတိုင်းမှာ မြစ်ရေထပ်မံမြင့်တက်လာနိုင်တဲ့အခြေအနေရှိနေပါတယ်။

လတ်တလောမှာ စစ်ကိုင်းတိုင်း၊ မကွေးတိုင်းနဲ့မန္တလေးတိုင်းမှာလည်း မြို့နယ်အချို့ရေဘေးကြုံနေပါတယ်။

မြန်မာနိုင်ငံအထက်ပိုင်းဒေသတွေမှာ နေ့စဉ် ရက်ဆက် မိုးသည်းထန်စွာ ရွာသွန်းခြင်းနဲ့ ဆည်ရေတွေ ဖောက်ထုတ်ခြင်းတို့ကြောင့် စစ်ကိုင်းယူနစ်၊ မန္တလေးယူနစ်၊ မကွေးယူနစ်နဲ့ ဧရာဝတီတိုင်းတို့ရှိ မြို့နယ်ပေါင်း ၂၁ ခုမှာ ရေလွှမ်းမိုးမှုများ ဖြစ်ပေါ်နေပြီး သေဆုံးသူ ၂၅ ဦး၊ ပျောက်ဆုံးသူ ၈ ဦးနဲ့ လူဦးရေ စုစုပေါင်း ၄၅၂,၆၆၃ ဦးခန့် ရေဘေးကြုံနေတယ်လို့အမျိုးသားညီညွတ်ရေးအစိုးရ၊လူမှုရေးရာ၊ အလုပ်သမားနဲ့လူသားချင်းစာနာထောက်ထားရေးဝန်ကြီးဌာန(MoSLHA)က ထုတ်ပြန်ထားပါတယ်။

ရေဘေးသင့်ပြည်သူတွေဟာ အကူအညီတွေလိုအပ်နေတယ်လို့လည်း MoSLHAက အသိ ပေးထားပါတယ်။

(လေးမျက်နှာမြို့ ရေတက်လာတာကို တိုင်းတာတဲ့ အမှတ်အသား တွေ့ရစဉ်။ ဓာတ်ပုံ - CJ)

စစ်ကိုင်းရေဘေး ရေပြန်ကျပေမဲ့ ရိက္ခာနဲ့ ဆေးဝါးအကူအညီ လိုအပ်နေ

သြဂုတ် ၁၅၊ ၂၀၂၆။ ဇေအောင်/People's Spring

စစ်ကိုင်းတိုင်းက ရေဘေးသင့်ဒေသတွေမှာ ရေပြန်လည်ကျဆင်းနေပေမဲ့ ရိက္ခာနဲ့ ဆေးဝါးအကူအညီတွေ လိုအပ်နေကြောင်း ရေဘေးကူညီနေသူတွေက ပြောပါတယ်။

​ရေ​ဘေးဒဏ် အဆိုးဆုံးရင်ဆိုင်​နေရတဲ့ စစ်ကိုင်းတိုင်းက မြို့နယ် ၁၃ မြို့နယ်မှာ ရေ​ကြီး​ရေလျှံ​မှူတွေ ဖြစ်ပွားခဲ့ရာမှာ ယခုရက်ပိုင်း ရေပြန်လည်ကျဆင်းလာပေမဲ့ စားနပ်ရိက္ခာနဲ့ ဆေးဝါးတွေ အရေး​ပေါ် လိုအပ်နေကြောင်း ရေဘေးကူညီနေသူတွေက ပြောပါတယ်။

"ရေဘေးအခြေအနေကတော့ အောက်ပိုင်းမြို့နယ်တွေကတော့ ကူညီနေရဆဲဖြစ်တယ်။ အဓိကကတော့ ရိက္ခာနဲဆေးဝါး အဓိကလိုမယ်လို့ ယူဆပါတယ်။ ပြီးရင်တော့ ပြန်လည်ထူထောင်ရေးအတွက်လည်း လိုအပ်ပါတယ်"လို့ ကူညီကယ်ဆယ်ရေး လုပ်နေတဲ့ စစ်ကိုင်းတိုင်း ဒေသ သပိတ်အင်အားစုမှ ကိုရှင်းသန့်က ပြောပါတယ်။

အလားတူ ရွှေဘိုပကဖ တာဝန်ရှိသူုကလည်း "ရေသန့်နဲ့ ဆေးဝါးတွေ အဓိက လိုအပ်ပါတယ်"လို့ ပြောပါတယ်။

ရေကြီးရေလျှံမှုကြောင့် လမ်းပိုင်းတွေလည်း ပျက်စီးသွားတာမို့ ရေဘေးကူညီမှုသွားတဲ့နေရာမှာ ကြန့်ကြာမှုတွေ ရှိနေတယ်လို့လည်း သိရပါတယ်။

ရေကြီးတဲ့ဒေသတွေဟာ စစ်တ​ပ်ရဲ့ အကြမ်းဖက်သတ်ဖြတ်မှုတွေ၊ စစ်ကြောင်းထိုးမီးရှိူ့မှုတွေ၊ လေကြောင်းတိုက်ခိုက်မှုတွေ အ​ကြိမ်ကြိမ်ခံခဲ့ရတဲ့ဒေသတွေ ဖြစ်ပါတယ်။

လက်ရှိ စစ်ကိုင်းတိုင်းက အဲဒီဒေသတွေမှာ ရေဘေးသင့် ပြည်သူ ၂၂၆,၀၀၀ ကျော်ရှိ​နေပါတယ်။ စစ်ကိုင်းတိုင်းမှာ ရေ​ဘေး​ကြောင့် သေဆုံးသူ ၂၃ ဦးထိရှိလာပြီး ၂ ဦး​ပျောက်ဆုံး​နေတယ်လို့ အမျိုးသားညီညွတ်ရေးအစိုးရ(NUG)၊ လူမှုရေးရာ၊အလုပ်သမားနဲ့ လူသားချင်းစာနာထောက်ထားရေးဝန်ကြီးဌာနက သြဂုတ် ၁၁ရက် ညပိုင်းမှာ ထုတ်ပြန်ခဲ့ပါတယ်။

သဖန်းဆိပ်ဆည်က ​ရေလွှတ်တာ၊ မိုးသည်းထန်စွာရွာသွန်းတာ​တွေ​ကြောင့် သဖန်းဆိပ်ဆည်​အောက်ဘက် မူးမြစ်ကမ်းတ​လျှောက်မြို့နယ်​တွေမှာ ​သြဂုတ် ၆ ရက်ကစပြီး ရေ​ဘေးရင်ဆိုင်​နေရတာဖြစ်ပါတယ်။

ဆောမြို့နယ်တိုက်ပွဲဖြစ်စဉ် PDF ထုတ်ပြန်၊ အလင်းဝင်လာသူတွေကို ကောင်းမွန်စွာ စောင့်ရှောက်ထား

ဩဂုတ်-၁၅ ၊၂၀၂၆။ဖိုးသား/People's Spring

မကွေးတိုင်း၊ ဆောမြို့နယ်တိုက်ပွဲမှာ လက်နက်ခဲယမ်းတွေ သိမ်းဆည်းရခဲ့ပြီး အလင်း၀င်လာတဲ့ စစ်မှုထမ်းတပ်သားတွေကို ကောင်းမွန်စွာထိန်းသိမ်းထားတယ်လို့ ပြည်သူ့ကာကွယ်ရေးတပ်မတော် (PDF)၊ဂန့်ဂေါခရိုင်စစ်ဌာနက ဒီကနေ့ ညပိုင်းမှာ ထုတ်ပြန်ပါတယ်။

မကွေးတိုင်းစစ်ဌာနကွပ်ကဲမှုအောက်က ဂန့်ဂေါခရိုင်စစ်ဌာနက ဇူလိုင် ၂၉ ရက်ကနေ ဩဂုတ် ၁ရက်အထိ ဖြစ်ပွားခဲ့တဲ့ တိုက်ပွဲဟာ ဆောမြို့တွင်းကနေ လောင်းရှည်မြို့ဘက်ကို စစ်ကူထွက်လာတဲ့စစ်တပ်စစ်ကြောင်းကို ဟန့်တား တိုက်ခိုက်ခဲ့တယ်လို့ ဆိုပါတယ်။

စစ်တပ်စစ်ကြောင်း အထိနာပြီး ရှေ့မတိုးနိုင်ဘဲ လန်ကျသွားခဲ့တဲ့အပြင် ခမရ (၅၇၃) တပ်ရင်းက တပ်သား နေမင်းထွန်း ကို အရှင်ဖမ်းဆီးရမိခဲ့ပြီး MA1 သေနတ် ၁လက် ကျည်ခဲယမ်းတွေ သိမ်းရခဲ့တယ်လို့ ထုတ်ပြန်ပါတယ်။

ဒါ့အပြင် အဲဒီစစ်ကြောင်းက ထပ်မံ အင်အားဖြည့်ပြီးပြန်လည် ထိုးစစ်ဆင်လာတာကို ခုခံတိုက်ခိုက်ခဲ့တဲ့ တိုက်ပွဲအတွင်း MA1 သေနတ် ၁ လက်နဲ့ ဖုန်း ၁ လုံးကို ထပ်မံ သိမ်းဆည်းရမိခဲ့တယ်လို့ ဖော်ပြပါတယ်။

စစ်တပ်စစ်ကြောင်း အထိနာပြီး ရှေ့မတိုးနိုင်ဘဲရှိတာကြောင့် တပ်ရင်းတပ်ဖွဲ့တွေက နယ်မြေရှင်းလင်းခဲ့ချိန်မှာ RPG7 အဖူး ၁၄ ခု နဲ့ ဆက်စပ်ပစ္စည်းတွေ ထပ်မံသိမ်းဆည်းရမိခဲ့တယ်လို့ ဆိုပါတယ်။

စစ်ဆင်ရေး ဆောင်ရွက်နေမှုကာလအတွင်း စစ်ကောင်စီတပ်သားတွေ ဘက်ပြောင်းခိုလှုံလာပြီး ကောင်းစွာ ထိန်းသိမ်းထားရှိကာ နေရပ်ပြန်လိုသူတွေကို မိသားစုဝင်တွေနဲ့ချိတ်ဆက် လွှဲပြောင်းပို့ဆောင်ပေးနေတယ်လို့လည်း အသိပေးပါတယ်။

မကွေးတိုင်း၊ ဆော - လောင်းရှည် လမ်းပိုင်းကို စစ်တပ်က ၄ ကြိမ်ထက်မနည်း ထိုးစစ်ဆင်မှုကို ပြည်သူ့ကာကွယ်ရေးတပ်မတော်(PDF)က ခုခံနိုင်ခဲ့ပြီး စစ်သုံ့ပန်းနဲ့ အလင်း၀င်များစွာ ရှိနေတယ်လို့ ဂန့်ဂေါခရိုင်စစ်ဌာန တာ၀န်ရှိသူကိုဇင်ကို၀င်းက ဩဂုတ် ၉ ရက်မှာ သူရဲ့လူမှုကွန်ရက်ကတဆင့် ပြောထားပါတယ်။

လက်ရှိ အချိန်ထိလည်း လူ ၊လက်နက်အင်အား အမြောက်အများအသုံးပြုတဲ့ စစ်တပ်ရဲ့ ထိုးစစ်ကို ဆော - လောင်းရှည် လမ်းမကြီးပေါ်မှာဘဲ ရအောင်ကာကွယ်နေတယ်လို့လည်း အသိပေးပါတယ်။

ဇူလိုင် ၁၆ ရက်က လောင်ရှည်မြို့ကနေ ဆောမြို့ကို အင်အား ၃၀၀ ခန့်နဲ့ တပ်မ (၉၉)က စစ်ကြောင်းထိုးခဲ့တာဖြစ်ပေမယ့် PDF ခရိုင်စစ်ဌာနနဲ့ တပ်ရင်းတပ်ဖွဲ့တွေရဲ့ တိုက်ခိုက်မှုကြောင့် ဆုတ်ခွာခဲ့ရပါတယ်။

ဒါ့အပြင် ဇူလိုင် ၂၅ ရက်ကလည်း အင်အား(၁၈၀) ဝန်းကျင်ပါတဲ့ စစ်တပ်စစ်ကြောင်းက လေကြောင်းပစ်ကူယူပြီး မြေပြင်၊ဝေဟင် ထိုးစစ်နဲ့ ဒုတိယအကြိမ် ထိုးစစ်ဆင်ခဲ့ပေမယ့် မကွေးတိုင်းစစ်ဌာန တပ်ရင်းတပ်ဖွဲ့တွေ အပြင်းအထန် ခုခံတိုက်ခိုက်ခဲ့တာကြောင့် အထိနာပြီး ထပ်မံဆုတ်ခွာသွားခဲ့တယ်လို့ မကွေးတိုင်းစစ်ဌာန ပြည်သူ့ကာကွယ်ရေးတပ်မတော်က ဇူလိုင် ၂၈ ရက်က ကနဦး ထုတ်ပြန်ထားဖူးပါတယ်။

အဲဒီဆုတ်ခွာသွားတဲ့ စစ်ကြောင်းတွေကို လိုက်လံတိုက်ခိုက်ပြီးနောက် နယ်မြေရှင်းလင်းရေးမှာ လက်နက်ခဲယမ်းတွေ၊ ရိက္ခာတင်ကား (၃) စီး၊ ရိက္ခာတွေနဲ့ စစ်အသုံးအဆောင်ပစ္စည်းတွေ သိမ်းဆည်းရမိခဲ့တယ်လို့ အသိပေးထားပါတယ်။

စစ်ဆင်ရေးလုပ်ငန်းတွေကို မကွေးတိုင်းစစ်ဌာနရဲ့ ကွပ်ကဲမှုအောက်ကနေ ဆောင်ရွက်နေပြီး တပ်ဖွဲ့ဝင်တွေကို တတ်စွမ်းသရွေ့ ကူညီဖေးမဖို့လည်း ဂန့်ဂေါခရိုင်စစ်ဌာနက မေတ္တာရပ်ခံထားပါတယ်။

မေလ ဒုတိယပတ်ကစပြီး ပေါက်မြို့နယ်အခြေစိုက် အမှတ်(၂၄)ကာကွယ်ရေးပစ္စည်းစက်ရုံ (ကပစ - ၂၄) နဲ့ လောင်းရှည်မြို့အခြေစိုက် ကပစ(၂၅) ကနေ စစ်တပ်က စစ်ကြောင်း ၂ခုသုံးပြီး ပေါက်မြို့ကတဆင့် ကျောက်ထုမြို့ နဲ့ လောင်းရှည်ကတဆင့် ဆောမြို့အတွင်း ဝင်ရောက်ခဲ့ပါတယ်။

ကျောက်ထုက စစ်ကြောင်းဟာ မင်းတပ်မြို့ကို ဦးတည်စစ်ဆင်နေပြီး ဆောမြို့က စစ်ကြောင်းက ကန်ပက်လက်မြို့ကို ထိုးစစ်ဆင်နေတာဖြစ်ပါတယ်။

တော်လှန်ရေးတပ်တွေရဲ့ ထောက်လှမ်းမှုအရ ချင်းတောင်ပိုင်း ထိုးစစ်ကို စစ်တပ်က တပ်မ (၅၅)၊ (၈၈) ၊ (၉၉) နဲ့ (၁၀၁) က ထုတ်နှုတ်တပ်ရင်းတွေရဲ့ အင်အား ၂၀၀၀ ၀န်းကျင်အထိ အသုံးပြုထားတယ်လို့ သိရပါတယ်။