(စစ်ကိုင်းတိုင်းအတွင်း ရေကြီးနေတဲ့ နေရာအချို့ကို မြင်တွေ့ရစဉ်။ ဓာတ်ပုံ – YE-U Freedom Comrades – YFC)

ဂွမြို့နယ်ကို ညအချိန် စစ်တပ် ဗုံးထပ်ကြဲလို့ ကလေးငယ် ၂ဦးအပါအဝင် ပြည်သူ ၈ဦး သေဆုံး

▪️ရှုံးမဲမဲနေတဲ့ စစ်တပ်က နေ့ညမရွေး လေကြောင်းတိုက်ခိုက်နေလို့ လေကြောင်းရန် အချိန်ပြည့်ဂရုစိုက်ကြဖို့ AA ထပ်မံ တိုက်တွန်း

ဩဂုတ် ၁၄၊ ၂၀၂၆။ ထားမြတ်၊ခိုင်မြတ်/People’s Spring

ရက္ခိုင်ပြည်နယ်၊ ဂွမြို့နယ်ကို အာဏာသိမ်းစစ်တပ်က ဩဂုတ် ၁၃ရက် ညပိုင်းမှာ လေကြောင်းကနေ ထပ်မံဗုံးကြဲတိုက်ခိုက်ခဲ့ရာ ကလေးငယ် ၂ဦး အပါအဝင် ပြည်သူ ၈ဦးသေဆုံးခဲ့ကြောင်း အာရက္ခတပ်တော်(AA)က သတင်းထုတ်ပြန်ပါတယ်။

မနေ့ည ၁၁နာရီခွဲ အချိန်မှာ ဂွမြို့နယ် ကျိန္တလီမြို့ပေါ် ရပ်ကွက်တွေကို စစ်တပ်က တိုက်လေယာဉ်တွေနဲ့ ဗုံးကြဲခဲ့သလို ည ၁၁နာရီခန့်မှာလည်း ဂွမြို့နယ်ကိုင်းခုံကျေးရွာကို လေကြောင်းတိုက်ခိုက်ခဲ့ပါတယ်။

ကိုင်းခုံရွာတိုက်ခိုက်ခံရမှုအတွင်း အရပ်သားသေဆုံးမှုမရှိပေမယ့် ကျိန္တလီမြို့ပေါ် တိုက်ခိုက်ခံရမှုမှာ အသက် ၇နှစ်နဲ့ ၁၂နှစ် ကလေးနှစ်ဦး အမျိုးသမီး ၄ဦး အပါအဝင် ဒေသခံ ပြည်သူ ၈ဦး အစုလိုက်၊ အပြုံလိုက် သေဆုံးခဲ့ရတာလို့ AAက အသိပေးထားပါတယ်။

ဒါ့အပြင် နေအိမ် ၅လုံး နဲ့ သုံးဘီးဆိုင်ကယ် ၁စီး ပျက်စီးခဲ့သလို အခြားသော အရပ်သား ပြည်သူသေဆုံးထိခိုက်မှု ပျက်စီးမှုများ ရှိ၊မရှိ စုံစမ်းနေကြောင်း ဖော်ပြပါတယ်။

“တခါတည်းနဲ့ သေသွားတဲ့သူ ရှစ်ယောက်။ ဒဏ်ရာရတဲ့သူတွေလည်း ရှိနေတယ်။ အရေအတွက်တွေတော့ မသိရ သေးဘူး။ ဂွမြို့နယ်ကို ပတ်ကြဲသွားတာ မနေ့ညက တညလုံး အိပ်ဖို့တောင် မရဘူး” လို့ ဂွမြို့နယ်မှ လူမှုကူညီရေး လုပ်နေသူ ဒေသခံတစ်ဦးက ပြောပါတယ်။

အာဏာသိမ်းစစ်တပ်ဟာ မနေ့ညက ဗုံးကြဲခဲ့တဲ့ ကိုင်းခုံကျေးရွာကို ဩဂုတ် ၁၂ရက် ညပိုင်းကလည်း လေကြောင်း တိုက်ခိုက်ခဲ့ပါသေးတယ်။ အဲဒီတုန်းက လည်းအရပ်သားထိခိုက်မှု မရှိခဲ့ပါဘူး။

အာဏာသိမ်းစစ်တပ်ဟာ တိုက်ပွဲဖြစ်ပွားမှုမရှိတဲ့ မြို့ရွာတွေကို လေကြောင်း ဗုံးကြဲတာတွေ ဆက်တိုက်လုပ်ဆောင်နေတာဟာ ရှုံးမဲမဲနေတာဖြစ်တယ်လို့ အာရက္ခတပ်တော်က ထုတ်ပြန်ပါတယ်။

စစ်ကောင်စီဟာ AAနဲ့ မြေပြင်တိုက်ပွဲတိုင်းမှာ အထိနာနေတာလို့ ဖော်ပြပါတယ်။

အဲဒီလို အထိနာရှုံးမဲမဲနေတဲ့ စစ်တပ်ဟာ အပြစ်မဲ့ အရပ်သား ပြည်သူတွေအပေါ် နေ့ည အချိန်မရွေး လေကြောင်း ဗုံးကြဲတိုက်ခိုက်မှုများ ဆက်တိုက်ပြုလုပ်လျက်ရှိရာ အာရက္ခဒေသ တစ်ခုလုံး လေကြောင်းရန် အချိန်ပြည့် အထူးဂရုစိုက်ကြရန်လည်း AAက ထပ်မံ တိုက်တွန်းပါတယ်။

စစ်တပ်ဟာ AA သိမ်းပိုက်ထားတဲ့မြို့နယ်တွေ ပြန်လည်ရရှိရေးနည်းမျိုးစုံနဲ့ ကြိုးပမ်းလျက်ရှိရာ မကွေး၊ ပဲခူး၊ ဧရာ၀တီ စတဲ့ ရက္ခိုင်ပြည်နယ်နဲ့ အစပ်ဒေသတွေကနေ ထိုးစစ်ဆင်လျက်ရှိရာ AAနဲ့ တိုက်ပွဲတွေ ဖြစ်ပွားခဲ့ပါတယ်။ လတ်တလောမှာ ရက္ခိုင်-ဧရာ၀တီအစပ် ဒေသတွေမှာ တိုက်ပွဲတွေ ဆက်လက်ပြင်းထန်နေပါတယ်။ ဩဂုတ် ၁၂ရက်က ဧရာ၀တီတိုင်း ရေကြည်နဲ့ သာပေါင်းမြို့နယ်ထဲက နေရာ ၅ခုမှာ တိုက်ပွဲတွေဖြစ်ပွားခဲ့ရာ စစ်တပ် တပ်လန်သွားကြောင်းနဲ့ အလောင်းနဲ့ လက်နက်ခဲယမ်းတွေ ရရှိထားကြောင်း AAက အသိပေးထားပါတယ်။

စစ်တပ်ကလည်း တိုက်ပွဲဖြစ်ပွားရာနေရာတွေသာမက တိုက်ပွဲမရှိတဲ့ သံတွဲ၊ အမ်း၊ ဂွမြို့နယ်တွေကို လေကြောင်းတိုက်ခိုက်မှုတွေ ဆက်တိုက်လုပ်ဆောင်နေတာပါ။ ဩဂုတ် ၁၀ရက် က သံတွဲမြို့နယ် ကျောက်ကြီးရွာ ကို စစ်တပ်လေကြောင်းဗုံးကြဲခဲ့လို့ အရပ်သား ၁၆ဦးသေဆုံးကာ ၁၈ဦး ဒဏ်ရာရခဲ့တယ်လို့ AAက ထုတ်ပြန်ပါတယ်။

ဒါ့အပြင် ချင်းပြည်နယ် ပလက်၀မြို့နယ် ဆမီးမြို့ကိုလည်း စစ်တပ်က ဩဂုတ် ၁၂ရက်မှာ လေကြောင်းဗုံးကြဲခဲ့ရာ ကလေးငယ်တွေအပါအဝင် အရပ်သား ပြည်သူသေဆုံးထိခိုက်မှုများရှိခဲ့ပါတယ်။

စစ်တပ်က အရပ်သားပြည်သူတွေအပေါ် အခုလို ပစ်မှတ်ထားတိုက်ခိုက်မှုတွေကြောင့် ထိခိုက်သေဆုံးမှုတွေ ဆက် တိုက်ဖြစ်ပေါ်နေရခြင်းဟာ အထူးစိုးရိမ်ဖွယ်ရာဖြစ်ပြီး အရပ်သားတွေနေထိုင်ရာနေရာတွေကို တိုက်ခိုက်မှုတွေကို ပြင်းထန်စွာ ကန့်ကွက်ရှုတ်ချကြောင်း AAရဲ့ လူသား ချင်းစာနာထောက်ထားရေးနဲ့ ဖွံ့ဖြိုးရေးဆိုင်ရာပူးပေါင်းဆောင် ရွက်ရေးရုံး(HDCO) က ထုတ်ပြန်ထားပါတယ်။

ရခိုင်ဒေသတွင်း စစ်တပ်ရဲ့ တိုက်ခိုက်မှုတွေကြောင့် ဆက်လက်မြင့်တက်နေတဲ့ အရပ်သားသေဆုံးမှုတွေအပေါ် နိုင် ငံတကာအသိုင်းအဝိုင်းအနေနဲ့ အရေးတကြီးအာရုံစိုက်ဖို့၊ အရပ်သားတွေကို ကာကွယ်ဖို့အတွက် ကြိုးပမ်းမှုတွေ ပိုမို အားကောင်းစေဖို့နဲ့ နိုင်ငံတတာလူသားချင်းစာနာထောက်ထားမှုဥပဒေချိုးဖောက်မှုတွေအတွက် အမှန်တကယ် တာဝန်ခံမှုရရှိစေရေး လုပ်ဆောင်ကြဖို့လည်း HDCO က တိုက်တွန်းထားပါတယ်။

စစ်တပ်ဟာ မြန်မာနိုင်ငံအနှံ့မှာ စစ်ရေးပစ်မှတ်မဟုတ်တဲ့ အပြစ်မဲ့ပြည်သူတွေ နေထိုင်ရာ လူနေရပ်ကွက်၊ စာသင် ကျောင်းတွေ၊ စျေးတွေ၊ ဆေးရုံ၊ ဆေးခန်းတွေနဲ့ ဘာသာရေးအဆောက်အဦးတွေကို တိုက်လေယာဉ်အုပ်လိုက်နဲ့ နေ့စဉ်ရက်ဆက်ဗုံးကြဲတိုက်ခိုက်မှုတွေလုပ်ပြီး စစ်ရာဇဝတ်မှုတွေကို ပြောင်ပြောင်တင်းတင်းကျူးလွန်နေဆဲဖြစ်ပြီး အဲဒီတိုက်ခိုက်မှုတွေကြောင့် အပြစ်မဲ့အရပ်သားပြည်သူတွေ သေဆုံးမှု၊ ထိခိုက်ဒဏ်ရာရမှုတွေနဲ့ နေအိမ်အဆောက် အဦးတွေပျက်စီးမှုဟာလည်း နေ့စဉ်နဲ့အမျှ မြင့်တက်နေတာပါ။

ရခိုင်ပြည်နယ်မှာ ၂၀၂၆ ဇန်ဝါရီ ၁ ရက်ကနေ ဇွန်လကုန်ထိ ခြောက်လအတွင်း အာဏာသိမ်းစစ်တပ်ရဲ့လက် ချက်ကြောင့် အပြစ်မဲ့အရပ်သားပြည်သူ ၈၃ ဦး သေဆုံးပြီး ၁၈၇ ဦး ထိခိုက်ဒဏ်ရာရခဲ့တယ်လို့ AA ရဲ့ လူသားချင်း စာနာထောက်ထားရေးနဲ့ ဖွံ့ဖြိုးရေးဆိုင်ရာပူးပေါင်းဆောင်ရွက်ရေးရုံး(HDCO)က ထုတ်ပြန်ထားပါတယ်။

တောင်သာ တရုတ်ဓါတ်​ငွေ့ပိုက်လိုင်း စောင့်ဒုဗိုလ်တဦးကို PDF ​တွေပစ်ခတ်ရှင်းလင်း

ဩဂုတ်-၁၄၊၂၀၂၆။ကတ်သရင်း/People's Spring

မန္တလေးတိုင်း၊တောင်သာမြို့နယ်၊တရုတ်ဓါတ်​ငွေ့ပိုက်လိုင်းစောင့် ဒုဗိုလ်တဦးကို အရှင်ဖမ်းဖို့ကြိုးစဉ် ခုခံတာ ကြောင့် ပစ်ခတ်ဖမ်း
ဆီးခဲ့တယ်လို့ တောင်သာ People Defense Forceက ထုတ်ပြန်ထားပါတယ်။

ဩဂုတ်လ ၁၃ ရက် ၊မနက်၇နာရီမှာ ဝဲလောင်စခန်းကို အေးရွာ ဓါတ်​ငွေ့ပိုက်လိုင်းအထိုင်ဂိတ် က စစ်သား တွေ အရပ်ဝတ်နဲ့သွားလာ နေတယ်ဆိုတဲ့ သတင်း ကြောင့် တောင်သာ People Defense Force(TTA-PDF)တပ်သားတွေ ကင်းပုံးဝတ် စောင့်ဆိုင်းခဲ့ပါတယ်။

အဲဒီအချိန် အေးရွာဓါတ်​ငွေ့ပိုက်လိုင်းက နေ ဆိုင်ကယ်နဲ့ပြန်လာတဲ့စစ်တပ်ရဲ့၇၈(ကြည်း)
မှ ဒုဗိုလ်မောင်သိန်းကိုတားဆီးပြီး ဖမ်းဆီးဖို့ကြိုးစားပေမယ့်လက်ပစ်ဗုံးထုတ်ကာပြန်လည်ခုခံဖို့ကြိုးစားတာ ကြောင့် ပစ်ခတ်လိုက်ရတယ်လို့ ထုတ်ပြန်ထားပါတယ်။

"ဒီကောင့်ကိုချော့ခေါ်တာပါ။မရလို့ ပစ်လိုက်ရတာ"လို့ ဖြစ်စဉ်ကိုသိတဲ့ တော်လှန်ရေး ရဲ
ဘော်တဦးက ပြောပါတယ်။

ဒုဗိုလ်မောင်သိန်းဆီက နေလက်ပစ်ဗုံးတလုံး၊ဆိုင်ကယ်တစီး၊ငွေသားတချို့နဲ့ဗုံးတလုံးကိုသိမ်းဆည်းနိုင်ခဲ့တယ်လို့ TTA-PDF ကထုတ်ပြန်ထားပါတယ်။

မြန်မာ-တရုတ်ဓါတ်​ငွေ့ပိုက်လိုင်း ဖြတ်သန်းရာ​ဒေသ​တွေထဲက စစ်တပ်ထိန်းချုပ်​ဒေသ​တွေမှာစစ်တပ်က စစ်သား​တွေ ၊ရဲ​တွေကို ပိုက်လိုင်း​စောင့်စခန်း ထားပြီး​စောင့်ခိုင်းတာမှာ ​တောင်သာမှာလည်း ပိုက်လိုင်း​စောင့်စခန်းရှိတာဖြစ်ပါတယ် ။ တရုတ်က ရခိုင်ပြည်နယ် ​ကျောက်ဖြူက​နေ တရုတ်နိုင်ငံထိ​ သဘာဝဓါတ်​ငွေ့​ နဲ့​ရေနံ​တွေကိုအဲဒီပိုက်လိုင်းနဲ့သွယ်
တန်းရယူတာဖြစ်ပါတယ် ။

■​ဆောင်းပါး

ငါ့နွားတွေ ရေမမွန်းစေရ

ထွန်းညိုဦး/People's Spring

အညာရေဘေးမှာ လူတွေနဲ့အတူ ဒုက္ခ ခံကြရတာ နွားတွေပါ။ မြန်မြန်ဆန်ကြီး တဝေါဝေါနဲ့ တက်လာတဲ့ ရေတွေကြောင့် လူတွေတင်မက နွားတွေပါမျက်ကလူးဆန်ပြာဖြစ်ကြရတယ်။

အညာသူ အညာသားတွေဟာ ကိုယ်နဲ့အတူတူ နှစ်ပေါင်းများစွာ ရာသီမရွေး အတူတူ ရုန်း
ကန်ခဲ့ကြရတဲ့ ဒီနွား​တွေကို မထားခဲ့နိုင်ဘူး။ ဒီနွားတွေဟာ စစ်​​ဘေးရှောင်တော့လည်း အတူ
တူ ပြေးခဲ့ကြရသူတွေ။ စစ်တပ်က လက်နက်
ကြီးပစ်၊ လေကြောင်းကြဲရင်လည်း ပြည်သူတွေလိုပဲ သေဆုံးခဲ့ကြရတဲ့ နွားတွေ နည်းမှ မနည်းတာ။

"စပါးတွေ ရေမွန်းသွားလည်း ငါ့နွားတွေ ရေမမွန်းစေရဘူး။..စိုက်ထားတဲ့ သီးနှံတွေ ရေမျောသွားလို့ ပျက်စီးသွားပါစေ... ငါတို့မှာ နွားရှိနေသေးရင် လယ်ပြန်ထွန်လို့ ရသေးတယ်။ မြေပြင်ပြန်ပြုပြင်လို့ ရသေးတယ်။ နွားဆိုတာအညာသားယာသမားတွေအတွက်
တော့ ရိုးရိုးတိရိစ္ဆာန်မဟုတ်၊ ဘဝရဲ့ကျောရိုး ၊ စိုက်ပျိုးရေးရဲ့သွေးကြော နဲ့ မိသားစုအတွက် အားကိုးရာအိမ်သားတဦးလိုပါပဲ"လို့ ရွှေဘိုခရိုင် တပ်ရင်း အမှတ် (၁၇)က ရေးသားပါတယ်။

ဒါ့ကြောင့်ပဲ အညာသူအညာသားတွေဟာ ရေတွေရွာထဲဝင်လာတော့ နွားတွေကို ရေလွတ်ရာ ပို့ဖို့ စီစဥ်ရတယ်။ ရေမြင့်တက်လာချိန်မှာ နွားတွေကို တိုင်မှာ ကြိုးမချည်ထားရဘူး။ ကြိုးချည်ထားရင် ရေတက်လာတဲ့အခါ ရေမကူးနိုင်ဘဲရေနစ်သေဆုံးတတ်တယ်။ကြိုးဖြုတ်ပေးထားမှသာ နွားတွေအလိုအလျောက် ရေကူးပြီးရေလွတ်ရာကိုတက်နိုင်တာပါ။

ရေဘေးသင့်ဒေသတွေမှာ နွားတွေကို ကယ်
ဆယ်ထိန်းသိမ်းရတာဟာ လူတွေကို ကယ်
ဆယ်ရတာထက် ပိုမိုခက်ခဲပြီး အန္တရာယ်များပါတယ်။ နွားတွေဟာ ရေဘေးကြုံရတဲ့အခါ လန့်ဖျပ်ပြီး ရေထဲကူးခတ်ရင်း လမ်းပျောက်တာ၊ မောပန်းပြီး ရေနစ်တာတွေ ဖြစ်တတ်တာမို့ပါ။

အညာသူအညာသားတွေဟာ နွားတွေကို အုပ်စုလိုက် ရေကူးပြီး ရေလွတ်ရာပို့ဖို့ စီစဥ်ရတယ်။ ​နွားတွေဟာ ရေကူးကျွမ်းကျင်ပေမဲ့ရေစီးသန်ရင် ကူးရခက်ခဲတတ်တယ်။ ဒါ့ကြောင့် လူတွေက နွားတွေဘေးကနေ လှေနဲ့ရေစီးကြောင်းအတိုင်း ထိန်းကျောင်းပေးရတယ်။

အဲဒီလို ခက်ခက်ခဲခဲ စွန့်စွန့်စားစား နွားတွေကို ရေလွတ်ရာ ကယ်ထုတ်ရတယ်။ ကယ်ထုတ်ချိန်မှာပဲ ရေစီးသန်လို့ နွားတချို့ ကူးရင်း မျောပါသွားတာတွေရှိတယ်။ နွားရှင်​​တွေခမျာ ရေထဲ ခေါင်းကလေး မြုပ်ချည်ပေါ်ချည်နဲ့ မျောပါသွားတဲ့ နွားလေးကိုကြည့်ရင်း မျက်ရ​က်ပေါက်ပေါက် ကျကြရတယ်။ သို့ပေသိ နွားတွေက ရေကူးတတ်ကြတော့ ရေသာတလှည့်မှာ​ အသက်ရှင်အောင်ကူးနိုင်မယ်လို့ ယုံကြည်ကြတယ်။

ကျန်တဲ့နွား​တွေ ရေလွတ်ရာရောက်တော့ ရေထဲမျောသွားတဲ့ နွားလေးတွေကို ပြန်ရှာဖို့ မြစ်ရိုးတလျှောက် အောက်ဘက် လိုက်ကြရပြန်တာပေါ့။ အဲဒီမှာ နွားတွေကို ကယ်တင်ပေးထားကြသူတွေနဲ့လည်း ကြုံရသလို နွားတစ်ကောင် ဘယ်လောက်ဆိုပြီး ပြန်တောင်းကြတဲ့သူ အနည်းစုနဲ့လည်း ဆုံကြရပါသေးတယ်။

ရေလွတ်ရာကုန်းပေါ် နွားတွေရောက်တော့လည်း နွားစာအတွက်ကို ခက်ခက်ခဲခဲ သွားရှာပို့ရတယ်။ ရေကြီးချိန် နွားတွေ အစာရေစာ ငတ်မွတ်တတ်သလို ရေနောက်တွေ သောက်မိရင်လည်း ဝမ်းပျက်တတ်လို့ သန့်ရှင်းတဲ့ ရေချိုနဲ့ မြက်ခြောက်တွေ ကောက်ရိုးတွေရအောင် စီစဥ်ပေးရပြန်တယ်။ ရေကျပြီးရင်လည်း နွားတွေမှာ ရောဂါတွေ ဝင်လာတတ်လို့ ဂရုစိုက်ရပါဦးမယ်။

နွားစာပို့နေတုန်းတဝေါဝေါအသံကြားလို့ မော့
ကြည့်တော့ အာဏာသိမ်းစစ်တ​ပ်ရဲ့ လေယာဥ်ပါ။ လူတွေရော တိရိစ္ဆာန်တွေပါ ရေကြီးလို့ ဒုက္ခရောက်နေချိန်လေကြောင်းကနေရေဘေး
သင့်ပြည်သူတွေကို ပစ်ခတ်နေတုန်းပါ။ ဘယ်
လောက်ပဲအန္တရာယ်တွေများနေပါစေ။ အညာ
သူအညာသားတွေကတော့ သူတို့ နွားတွေအတွက် အစာရှာတုန်း ပို့ကြတုန်းပါ။

နွားတွေကို ကယ်ခဲ့ကြတဲ့ ရွှေဘိုခရိုင် တပ်
ရင်း အမှတ် (၁၇)ကတော့ "ရေတွေပြန်ကျသွားတဲ့တစ်နေ့။ ဒီနွားလေးတွေနဲ့ပဲ ရွှံ့နွံတွေကြားထဲမှာ ခြေခြေမြစ်မြစ် ပြန်ရုန်းကန်ကြမယ်"တဲ့။ ။

ဖွတ်တော်တွေကနေ ဘာအလုပ် လုပ်သလဲဆိုရင် “ကျွဲ”ဖြစ်အောင် လုပ်ကြတာပါ။ နားရှုပ်သွားကြပြီထင်ပါတယ်။ “အများညီ ‘ဤ’ ကို ‘ကျွဲ’ဖတ်”ဆိုတဲ့စကားပုံထဲက “ကျွဲ”ကို ဆိုလိုတာပါ။ ဖွတ်တွေ စုဝေးကြပြီး သူတို့လိုချင်တဲ့ “ကျွဲ”မရရအောင် ဖွတ်တော်ထဲကနေ ပုံဖော်ကြမှာကို ဆိုလိုတာပါ။

လက်ရှိဖွတ်တော်စတင်ခဲ့တာအခုဆိုရက် ၁၀၀ ကျော်လာခဲ့ပါပြီ။ ဒီဖွတ်တော်ကိုတော့ ဖွတ်ကထကြီးခင်ရီကဦးဆောင်ထားပါတယ်။ ဖွတ်ကထကြီးခင်ရီရဲ့ ကိုယ်ရေးအကျဉ်းကို ဖော်ပြရမယ်ဆိုရင် သူဟာ ဗိုက်ထဲမှာ ကျည် ခုနစ်တောင့်မြိုထားသူဖြစ်သလို စကားကိုလည်း ရွေးကောက်ပွဲမတိုင်မီတစ်မျိုး၊ ရွေးကောက်ပွဲပြီးတစ်မျိုး၊ နှစ်မျိုး တည်းသာ ပြောတတ်သူရယ်လို့ ထင်ရှားပါတယ်။

ပြီးတော့သူဟာကြေးစားတစ်ယောက်ဖြစ်ပါတယ်။ဘယ်လို ကြေးစားလဲဆို နိုင်ငံရေးခြေထိုးပေးတဲ့ကြေးစားပါ။ အရင်တုန်းကတော့ ၅၀၀၀ စား။ အခုလက်ရဲဇက်ရဲလူမိုက် ဂွတို လက်ထက် ကုန်စျေးနှုန်းတွေတက်တော့ သူလည်း စျေးတက်သွားပါတယ်။ အခုတော့ ၆၈၀၀ စားပါ။ ဘယ်နိုင်ငံရေး မှာမဆို ဘယ်ပုံခြေထိုးပေးရမလဲ။ နောက်ကျောကို ဘယ်လိုဓားနဲ့ထိုးပေးရမလဲပြော အကုန်ရတဲ့ ခင်ရီ။

နေ့စားပုတ် ပြတ်နဲ့လမ်းပေါ် လူခေါ်ထုတ်ပေးရမလား အင်အားဘယ်လောက်လိုသလဲ အကုန်ဖြစ်တဲ့ ခင်ရီ။ နိုင်ငံရေးအောက်လုံး ဘယ်နှလုံးထိုးပေးရမလဲ လာထားခင်ရီ။ ခင်ရီဆိုတာ အဲဒီ့လိုတစ်ရီတည်းရှိတယ်။ နှစ်ရီရှိရင် အပေါင်ဆိုင်ပို့ပစ်မယ် ဆိုတဲ့ လူမျိုး။

ကဲ…သူ့အကြောင်း ဒီလောက်နဲ့ရပ်ပြီး သူ့ရဲ့ဖွတ်တော်အကြောင်း ဆက်ကြဦးစို့ရဲ့။ ဖွတ်ကထကြီးခင်ရီဦးဆောင်တဲ့ဖွတ်တော်က ပုံမှန်အစည်းအဝေးဆိုပြီး ကျင်းပခဲ့တာ နှစ်ကြိမ်ပြီးခဲ့ပြီ။ ဖွတ်တော်အကြောင်းဆိုပေမယ့် ဦးစွာ ထူးတာကို ပြောရရင် ဖွတ်ကထကြီးအကြောင်းက စရမှာပဲ။ “အားလုံးထိုင်နိုင်ပါပြီ” ဆိုတဲ့စကား ဘယ်သူကပြော ပေးရမယ်မှန်းမသိလို့ ဖွတ်ကထကြီးခင်ရီခမျာသူကိုယ်တိုင်ထိုင်ရမလို ထရမလိုကြီးဖြစ်ပြီးသူ့တပည့်ကို တိုးတိုး တိတ်တိတ်လေသံလေးနဲ့လှမ်းမေး။ ကံဆိုးချင်တော့ မိုက်ခရိုဖုန်းက ဖွင့်ထားလျက်သားဖြစ်။ အဲဒီထက်ပိုကံဆိုး ချင်တော့ ရုပ်သံကပါ Live က ပြူးပြူးကြီးလွှင့်ထားဆိုတော့ ဘာပြောကောင်းမလဲ။

“လာလာချင်းဆောက်နှင့်ထွင်း”ဆိုသလို ဖွတ်တော်မှ မစသေး ဖွတ်ကထကြေးစားလူမိုက်ခင်ရီတစ်ယောက် နိုင်ငံတစ်ဝန်းလှည်းနေလှေ အောင်းမြင်းဇောင်းမကျန်အကုန်သိတဲ့ ဆယ်လီတန်းဖြစ်တော့တာပဲ။

ဒါက အဖွင့်လှခဲ့တဲ့ခင်ရီ့ဇာတ်။ သူဦးဆောင်တဲ့ ဖွတ်တော်ထဲမှာ နေ့စားခမှန်မှန်ရတဲ့သူတွေရှိသလို နေစားခ မှန်မှန်မရလို့ ကန့်လန့်တိုက်သူတွေလည်းရှိတယ်။ ဒီအကြောင်းပြောကြမယ်။ သူနဲ့လက်သင့်တဲ့အတွက် နေ့စားခ မှန်မှန်ရနေသူတွေကတော့ ထူးထူးထွေထွေပြောနေစရာမလိုဘူး ဖွတ်ကထ လက်မရွံကြေးစားလူမိုက် ခင်ရီ ချောင်းဟန့်ရင်တောင် ထောက်
ခံပါတယ်လို့ ထအော်တတ်တဲ့သူတွေ။ ပြောစရာရှိတာက ဖွတ်အစုအဝေးထဲမှာသာပါနေ တာ သူနဲ့လက်လည်း မသင့်၊ ပနံလည်း မစားသူတွေကတော့ အရွဲ့တလိုင်းလေးတွေ ရှိလာတာလည်း ဒီဖွတ်တော်မှာ တွေ့ရတယ်။


https://www.ludunwayoo.com/%E1%80%9E%E1%80%9B%E1%80%B1%E1%80%AC%E1%80%BA%E1%80%85%E1%80%AC/2026/08/13/165506/

ရှမ်းမြောက်ရှိ KIA တပ်ရင်း(၉)နယ်မြေကို စစ်တပ် ဗုံးကြဲ၊ နမ့်ဖက်ကာကိုလည်း လေယာဉ်ပျံဝဲ ခြိမ်းခြောက်

ဩဂုတ် ၁၄၊ ၂၀၂၆။ ထားမြတ်/People’s Spring

ရှမ်းပြည်နယ်မြောက်ပိုင်း မူဆယ်ခရိုင်အတွင်းရှိ ကချင်လွတ်လပ်ရေးတပ်မတော်(KIA) တပ်ရင်း(၉) နယ်မြေ ကို အာဏာသိမ်းစစ်တပ်က ဒီကနေ့ ဩဂုတ် ၁၄ရက်မှာ လေကြောင်း တိုက်ခိုက်ခဲ့ကြောင်း ကချင်သတင်းရင်းမြစ်က ပြောပါတယ်။

ဩဂုတ် ၁၄ရက် ညပိုင်း ၇နာရီခွဲဝန်းကျင်မှာ KIA ထိန်းချုပ်ထားတဲ့ ကွတ်ခိုင်မြို့နယ် နမ့်ဖက်ကာကျေးရွာကို စစ်တပ် တိုက်လေယာဉ်ပျံသန်းခြိမ်းခြောက်ခဲ့ပြီးနောက် KIA တပ်မဟာ(၆) တပ်ရင်း(၉) နယ်မြေကို လေကြောင်း တိုက်ခိုက်လာတာလို့ ဆိုပါတယ်။

“KIA တပ်ရင်း(၉)နယ်မြေမှာတော့ ဗုံးကြဲသွားပြီလို့ ကနဦးသိရှိရပါတယ်။ ဒီ တပ်ရင်း(၉)ဟာဆိုရင် KIA တောင်ပိုင်းတိုင်းစစ်ဌာနချုပ်နယ်မြေလည်းဟုတ်ပါတယ်။တောင်ပိုင်းတိုင်းစစ်ဌာနချုပ်ကို လုံခြုံရေးယူထားတဲ့ တပ်ရင်းလို့လည်းပြောလို့ရပါတယ်။ အဓိကတော့ ရှမ်းမြောက်မှာရှိနေတဲ့ KIA တပ်ဖွဲ့ တောင်ပိုင်းတိုင်းစစ်ဌာနချုပ်ကို အရင် လေကြောင်းကနေ ဖိအားစတင်ပေးလိုက်ပြီလို့ ရှုမြင်ပါတယ်။” လို့ ကချင်သတင်းရင်းမြစ်က ပြောပါတယ်။

စစ်တပ်က ရှမ်းမြောက်ရှိ KIA တပ်စခန်းတွေနဲ့ KIA ထိန်းချုပ်ဒေသက ပြည်သူလူထုတွေကို လေကြောင်းတိုက်ခိုက်မှုတွေ ဆက်လက်ပြုလုပ်ပြီး လေကြောင်းဖိအားပေးတာတွေ ဆက်လက်လုပ်ဆောင်လာနိုင်ခြေရှိတယ်လို့ သုံးသပ်ပါတယ်။

စစ်တပ်ဟာ ရှမ်းမြောက်မှာ တရုတ်အကူအညီနဲ့ ကိုးကန့်တပ်နဲ့ တအာင်းတပ်တို့ကို အပစ်ရပ်ထားရာ KIA တပ်ဖွဲ့သာ ကျန်ရှိနေတဲ့ အနေအထားဖြစ်ပါတယ်။

တဖက်မှာလည်း KIA ဟာ ကချင်ပြည်နယ်နဲ့ ကချင်-စစ်ကိုင်းအစပ်ဒေသတွေမှာ စစ်ကောင်စီတပ်ကို အထိနာအောင် တိုက်ခိုက်လျက်ရှိပါတယ်။

“စစ်ရေးနိုင်ငံရေး ရှုံးနိမ့်နေတဲ့အပြင် နိုင်ငံတကာ အဖွဲ့အစည်းတွေကြားမှာ စစ်ရာဇဝတ်မှု ကျူးလွန်ထားတယ်ဆိုတဲ့ နာမည်ဆိုးနဲ့ ကျော်ကြားနေတဲ့စစ်တပ်ကတော့ သူ့ဘက်ကတော့ စစ်ရေးအရ ရှုံးနိမ့်လာပြီဆိုရင်တော့ တော်လှန်ရေးတပ်ဖွဲ့တွေ ထိန်းချုပ်ထားတဲ့ မြို့တွေ ရွာတွေကို ရည်ရွယ်ချက်ရှိရှိ လေကြောင်းတိုက်ခိုက်လာနိုင်ခြေရှိတဲ့အတွက်ကြောင့် အကြမ်းဖက်စစ်တပ်ရဲ့ လေကြောင်းသတင်းတွေကို ဒေသခံ ပြည်သူလူထုတွေရော တော်လှန်ရေးတပ်ဖွဲ့တွေရော အချိန်နဲ့ တပြေးညီသတိပြုနေထိုင်ဖို့လိုပါတယ်” လို့ ကချင်သတင်းရင်းမြစ်က ပြောပါတယ်။

အာဏာသိမ်းစစ်တပ်ဟာ အာရက္ခတပ်တော်(AA) ထိန်းချုပ်နယ်မြေတွေကိုလည်း လေကြောင်း တိုက်ခိုက်တာတွေ အရှိန်မြှင့်လုပ်ဆောင်လျက်ရှိပါတယ်။

ရက္ခိုင်နဲ့ မကွေး၊ ရက္ခိုင်နဲ့ ဧရာ၀တီ၊ ရက္ခိုင်နဲ့ ပဲခူးအစပ်ဒေသတွေမှာ တိုက်ပွဲပြင်းထန်နေပြီး လတ်တလော ဧရာ၀တီ-ရက္ခိုင်အစပ်တိုက်ပွဲမှာ စစ်တပ်ဟာ အထိနာလျက်ရှိပါတယ်။ စစ်တပ်ဟာ တိုက်ပွဲဖြစ်ပွားရာနေရာတွေကိုသာမက တိုက်ပွဲမရှိတဲ့ AA ထိန်းချုပ်ထားတဲ့ သံတွဲ၊ ဂွ၊ အမ်းမြို့နယ်တွေကို လေကြောင်းတိုက်ခိုက်ခဲ့ရာ ကလေးငယ်တွေအပါအဝင် အရပ်သား ပြည်သူအများအပြား သေဆုံးထိခိုက်ခဲ့ရပါတယ်။

စစ်တပ်ဟာ ကိုးကန့်၊ တအာင်းတပ်တွေနဲ့ အပစ်ရပ်စဲခြင်းမပြုမီကလည်း တအာင်းတပ်ထိန်းချုပ်ရာ မြို့ရွာတွေ၊ ကိုးကန့်တပ်ထိန်းချုပ်ရာမြို့ရွာတွေကို လေကြောင်းစစ်ဆင်ရေးတွေ ဆက်တိုက်ပြုလုပ်ပြီး အရပ်သား ပြည်သူအများအပြားသေဆုံးထိခိုက်စေခဲ့တဲ့ လေကြောင်းတိုက်ခိုက်မှုတွေကို ကျူးလွန်ခဲ့ပါတယ်။

(ကချင်လွတ်လပ်ရေးတပ်မတော်(KIA)က ရဲဘော်တွေကို တွေ့ရစဉ်။ ဓာတ်ပုံ - AFP)

ပုသိမ်မြို့မှာ ဈေးဝယ်သွားရင်းပျောက်ဆုံးနေတဲ့ အမျိုးသမီး ၁၀ရက်အကြာမှာ ရုပ်အလောင်းတွေ့

ဩဂုတ်-၁၄၊၂၀၂၆။တေဇ/People's Spring

ဧရာဝတီတိုင်း၊ ပုသိမ်မြို့မှာဈေးဝယ်သွားရင်း ပျောက်ဆုံးခဲ့တဲ့ မိခင်ဖြစ်သူရဲ့ ရုပ်အလောင်းကို ၁၀ရက်အကြာမှာ တွေ့ရှိခဲ့တာကြောင့် စစ်ဆေးမှုတွေပြုလုပ်ပြီး မီးသဂြိုလ်ခဲ့တယ်လို့ သမီးဖြစ်သူက အသိပေးထားပါတယ်။

"ကျွန်မ အမေ DBကို မြောင်းမြမြို့အနီး ငါးမြင်းချောင်းမှာ မနေ့က(ဩဂုတ်၁၃) တွေ့ရှိခဲ့ပါတယ်။ မြောင်းမြဆေးရုံကြီးမှာပဲ ခွဲစိတ်စစ်ဆေးပြီး ပုသိမ်မီးသဂြိုလ်စက်မှာ ယနေ့(ဩဂုတ်၁၄)ပဲ သဂြိုလ်လိုက်ပါတယ်ရှင်။ အမှန်တကယ်ပဲ ဘဝတစ်ပါးကူးပြောင်းသွားပြီဖြစ် ကြောင်းအသိပေးချင်ပါတယ်။" လို့ သမီးဖြစ်သူရဲ့ လူမှုကွန်ရက်မှာ ရေးသားထားပါတယ်။

အသက် (၅၆) နှစ်အရွယ် ဒေါ်အေးအေးမြင့်က ဩဂုတ် ၄ရက်မနက်က ပုသိမ်ဈေးကြီးနားမှာ အထည်ဝယ်စရာရှိတယ်ဆိုပြီး ထွက်သွားရာက နေအိမ်ပြန်မရောက်လာခဲ့တာကြောင့် သမီးဖြစ်သူက လူမှုကွန်ရက်မှာ ပို့စ်တင်ပြီး အကူအညီတောင်းခံခဲ့တာ ဖြစ်ပါတယ်။

ဒေါ်အေးအေးမြင့်က မအူပင်နဲ့ သန်လျင်နည်းပညာတက္ကသိုလ်တွေမှာ ဆရာမအဖြစ်တာဝန်ထမ်းဆောင်ခဲ့ဖူးသူဖြစ်တာကြောင့် သူ့ရဲ့ တပည့်တွေကလည်း စိတ်မကောင်းကြောင်း ရေးသားထားကြပါတယ်။

ပြီးခဲ့တဲ့ရက်က ဒေါ်အေးအေးမြင့်‌ ပျောက်ဆုံးချိန်က ဝတ်ဆင်ထားတဲ့ အဝတ်အစားနဲ့ ခန္ဓာကိုယ်အချိုးအစားတူညီသူကို တွေ့ရှိတယ်လို့ Tik Tok အကောင့်တစ်ခုက တင်ခဲ့ပေမယ့် ကာယကံရှင်တွေ သွားရောက်ရှာဖွေချိန်မှာတော့ မတွေ့ခဲ့ပါဘူး။

သေဆုံးသူဟာ ပြန်ပေးဆွဲပြီး အသတ်ခံရတာ ဟုတ်၊မဟုတ်နဲ့ ဘာကြောင့် သေဆုံးတယ်ဆိုတာ လူထုနွေဦးက မသိရသေးပါဘူး။ ကာယကံရှင် မိသားစုထံကိုလည်း လူထုနွေဦးက ဆက်သွယ်မေးမြန်းနေဆဲ ဖြစ်ပါတယ်။

■အ​တွေးအမြင်

မင်းအောင်လှိုင်ကို အိပ်မက်ဆိုး မက်စေမယ့် တော်လှန်ခေါင်းဆောင်ရဲ့သတင်းစကား

-သျှိသျား ရေးသားသည်။

“ကျွန်တော်တို့အစိုးရအဖွဲ့အနေနဲ့ ‘လူ့အသက်ထက် အရေးကြီးတာဘာမှမရှိ’ဆိုတဲ့ခံယူချက်ကို ဦးထိပ်ထားပြီး”
ဒီစကား ဘယ်သူပြောတယ်ထင်ပါသလဲ။

NUGအစိုးရအဖွဲ့ထဲကခေါင်းဆောင် ဒါမှမ
ဟုတ် တိုင်းရင်းသား တော်လှန်​ရေးအဖွဲ့တွေထဲက ခေါင်းဆောင်တစ်ဦးတစ်ယောက်က ပြောခဲ့တဲ့စကား လုံးဝ(လုံးဝ) မဟုတ်ပါဘူး။ အာဏာသိမ်း ငါးနှစ်ကျော်ကာလအတွင်း ပြည်သူရှစ်ထောင်ကျော်ကိုရက်ရက်စက်စက်သတ်ဖြတ်ထားတဲ့ စစ်ခေါင်း ဆောင်မင်းအောင်လှိုင်က ပြောလိုက်တဲ့စကားပါ။

ဇူလိုင် ၃၁ ရက်နေ့တုန်းက သူ အဓမ္မစုဖွဲ့ပေးထားတဲ့ ပြည်ထောင်စုလွှတ်တော်မှာ နိုင်ငံ
တော်အခြေပြဆိုတဲ့ မိန့်ခွန်း ပြောတဲ့အထဲ
ဒီစကားကို ထည့်သွင်းပြောဆိုခဲ့တာပါ။ မင်းအောင်လှိုင် ဒီစကားကို ပြောထွက်ခဲ့တဲ့ ဇူလိုင် ၃၁ ရက် မွန်းလွဲ ၃ နာရီခန့်မှာပဲ သူ့လက်
အောက်စစ်တပ်က သံတွဲမှာ တိုက်လေယာဉ် နှစ်စီးနဲ့ ဗုံးသုံးလုံးကြဲချလို့ တစ်နှစ်ခွဲ အရွယ်ကလေးငယ်အပါအဝင် လေးဦးသေဆုံးပြီး နှစ်ဦး ဒဏ်ရာရတဲ့ဖြစ်စဉ် ဖြစ်ခဲ့ပါတယ်။ အဲဒီနေ့ ညနေပိုင်းမှာပဲ မလှိုင်နားက ဒဟတ်တန်း (တောင်)ရွာကို လေထီးနဲ့ လာရောက်ဗုံးကြဲလို့ အသက် (၆၀)အရွယ် အမျိုးသမီးတစ်ဦး သေဆုံးပြီး သုံးဦးထိခိုက် ဒဏ်ရာရခဲ့ပါတယ်။

အဲဒီရက်အလွန်နောက်တစ်ရက်ဖြစ်တဲ့သြဂုတ် ၁ ရက်နေ့မှာဆိုရင်လည်းမုံရွာမြို့ သစ်
ညိုပင်ရွာ ဘုန်းကြီးကျောင်း အနီး တိုက်လေ
ယာဉ်နဲ့ ဗုံးကြဲတိုက်ခိုက်လို့ ကလေးငယ်ငါးဦးအပါအဝင် ပြည်သူ ၁၂ ဦးထိခိုက်ဒဏ်ရာရရှိခဲ့သလို အဲဒီမုံရွာမြို့နဲ့ မိုင် ၃၀ ခန့်အကွာမှာရှိတဲ့ ကနီမြို့နယ်ထဲက ယာကြီးရွာကိုလည်း လေကြောင်းတိုက်ခိုက်ခဲ့တာ ကြောင့် အရပ်
သားအမျိုးသားတစ်ဦး သေဆုံးသွားတဲ့ဖြစ်စဉ်ရှိခဲ့ပါတယ်။

ဒီဖြစ်စဉ်တွေဟာ အထက်မှာပြောခဲ့သလို
“လူ့အသက်ထက်အရေးကြီးတာဘာမှမရှိ”ဆိုတဲ့စကားမင်းအောင်လှိုင်ပြောခဲ့တဲ့နေ့ပတ်ဝန်းကျင်က ဖြစ်စဉ်တချို့ကို ထုတ်နုတ်ပြထားတာပါ။ အဲဒီနေ့ရက်ရဲ့ ရှေ့နဲ့ နောက်ရက်တွေထဲ မှာလည်းအလားတူ လေကြောင်း
တိုက်ခိုက်မှု၊ ဗုံးကြဲချမှုတွေကြောင့် သေဆုံး၊ ဒဏ်ရာရခဲ့ကြတဲ့ အပြစ်မဲ့ပြည်သူ များစွာရှိခဲ့သလို အာဏာသိမ်းငါးနှစ်ကျော်ကာလအတွင်း မင်းအောင်လှိုင်ရဲ့လက်ပါးစေတွေကြောင့် သေဆုံး၊ ထိခိုက်ခဲ့ရတဲ့ပြည်သူ​ထောင်​သောင်းချီ ရှိ​နေပြီဖြစ်ပါတယ်။

ဒီလိုထိခိုက်၊ သေဆုံးဖြစ်စဉ်တွေကို စဉ်ဆက်မပြတ်စောင့်ကြည့်လေ့လာမှတ်တမ်းရယူနေတဲ့ နိုင်ငံရေးအကျဉ်းသား များကူညီစောင့်
ရှောက်ရေးအသင်း(AAPP)က မင်းအောင်
လှိုင်အာဏာသိမ်းခဲ့တဲ့ ၂၀၂၁ ခုနှစ် ဖေဖော်
ဝါရီလ ၁ ရက်နေ့ကနေ ဒီနှစ် ၂၀၂၆ ခုနှစ် ဇူလိုင်လ ၃၁ ရက်နေ့အထိ ငါးနှစ်ခွဲကာလအတွင်း အတည်ပြုပြီးသေဆုံးသူ စုစုပေါင်း ၈၂၂၂ ဦးရှိပြီး အတည်မပြုနိုင်သေးတဲ့သေဆုံးသူဦးရေက စုစုပေါင်း ၅၂၅၀ ခန့်ရှိတယ်လို့ ဖော်ပြပါတယ်။ ဒီတော့ “လူ့အသက်ထက် အရေးကြီးတာဘာမှမရှိ”ဆိုတဲ့ မင်းအောင်လှိုင်ရဲ့စကားအပေါ် ခပ်ရိုင်းရိုင်းတုံ့ပြန်ရရင် ခွေးပါးစပ်က နတ်စကားထွက်လေခြင်းလို့ ဆိုရပါလိမ့်မယ်။

အာဏာသိမ်းစစ်ခေါင်းဆောင်မင်းအောင်လှိုင်ရဲ့ ယုတ်မာရက်စက်မှုက ဒီလောက်တင်တော့ မဟုတ်ပါဘူး။ ဒီငါးနှစ် ကျော်ကာလအတွင်း ဒေသအများအပြားက နေအိမ်တွေကို မီးရှို့ဖျက်ဆီးခဲ့တာ၊အပြစ်မဲ့ပြည်သူသုံးသောင်း ကျော်ကို ထောင်သွင်းအကျဉ်းချ နှိပ်စက်ညှဉ်းပန်းခဲ့တာ၊ စစ်မှုထမ်းဥပဒေကို အသက်သွင်းပြီးတိုင်းပြည်ထဲက လူငယ်လူရွယ်အ
များအပြားကို အဓမ္မစစ်တိုက်ခိုင်းရင်း သေ
ဆုံးစေခဲ့တာ၊ ကိုယ့်အိုး၊ ကိုယ့်အိမ်၊ ကိုယ့်နိုင်ငံမှာ ငြိမ်းချမ်းစွာ နေထိုင်မရအောင်လုပ်ခဲ့တာ စတဲ့လုပ်ရပ်များစွာလည်း ရှိနေပါသေးတယ်။

နေဝင်းအာဏာသိမ်းကာလ၊ သန်းရွှေအာဏာ
သိမ်းကာလနဲ့ သူအာဏာသိမ်းခဲ့တဲ့ကာလတွေမှာ မတရားမှုကို ငုံ့မခံဘဲ ဆန့်ကျင်တော်လှန်ခဲ့ကြတဲ့ ပြည်သူလူထုကို ပညာရည်နိမ့်ကျလို့ အကြမ်းဖက်ခဲ့ကြတယ်ဆိုတဲ့ စကား
လုံး တွေနဲ့လည်း ​စော်ကားမော်ကားပြုခဲ့ပါသေးတယ်။ ငြိမ်းချမ်းစွာဆန္ဒထုတ်ဖော်နေသူတွေကိုလက်နက်အားကိုးနဲ့အကြမ်းဖက်သတ်
ဖြတ်ခဲ့တာဘယ်သူတွေလဲဆိုတာဖြစ်စဉ်၊ ဖြစ်
ရပ်တွေကနေ သက်သေထူထားပြီးသားပါ။ ဒီသက်သေတွေဟာ ပေါက်ပန်းလေးဆယ်စကားလောက်နဲ့ ဖျောက်ဖျက်ရတဲ့အရာမျိုး မဟုတ်ပါဘူး။

ဒီနိုင်ငံမှာတကယ်အကြမ်းဖက်နေတာ၊ ပြည်ဖျက်နေတာ၊ နိုင်ငံကိုချောက်ထဲဆွဲချနေတာ ဘယ်သူတွေလဲဆိုတာ သမိုင်းနဲ့ ချီပြီး နောက်
ပြန်ကြည့်ရင် ရှင်းရှင်းလင်းလင်းကြီးကို တွေ့မြင်နိုင်မှာ ဖြစ်ပါတယ်။ နိုင်ငံဘာကြောင့်အခုလို ချွတ်ခြုံကျတဲ့အခြေအနေနဲ့ ကြုံနေရသလဲဆိုတဲ့အဖြေကိုသိချင်ရင် နိုင်ငံကိုစစ်အာ
ဏာရှင်တွေဘယ်လောက်ကြာကြာအုပ်ချုပ်
ချယ်လှယ်ကုပ်သွေးစုပ်ခဲ့သလဲဆိုတဲ့ကာလကိုပြန်လှန်ကြည့်ရင် သိနိုင်မှာဖြစ်ပါတယ်။

အခုမင်းအောင်လှိုင်နဲ့ သူ့အပေါင်းအပါစစ်အုပ်စုဟာဘယ်လောက်အထိ ယုတ်မာရက်
စက်သလဲဆိုရင် အထက် အညာဒေသမှာ လတ်တလောရေကြီးနစ်မြှုပ်နေချိန် ကူညီကယ်ဆယ်ရမယ့်အစား လေယာဉ်နဲ့ ဗုံးကြဲတိုက်ခိုက် တာတွေကိုပဲ အားစိုက်လုပ်ဆောင်ခဲ့ပါတယ်။ ဒါ့အပြင်ရေဘေးသွားလှူမယ့်၊
ကူမယ့်သူတွေရဲ့ နေအိမ်တွေကိုလည်း ချိတ်ပိတ်ပစ်မယ်လို့ ခြိမ်းခြောက်ခဲ့ပြန်ပါသေးတယ်။