(လူထုခေါင်းဆောင်ဒေါ်အောင်ဆန်းစုကြည် ကျန်းမာကြောင်း သက်သေပြပေးဖို့အတွက်ဆားလင်းကြီးမြို့နယ် လက်ပံတောင်းတောင်ပင်မသပိတ်မှ ဂန့်ဂေါမြို့နယ်ရှိတော်လှန်ပြည်သူများနှင့်အတူ" Proof of Life" လူထုလှုပ်ရှားမှုပြုလုပ်နေစဉ်။ ဓာတ်ပုံ - ဆားလင်းကြီးမြို့နယ်-လက်ပံတောင်းတောင်ပင်မသပိတ်)

စစ်တပ်ကDKBAနဲ့ BGF အင်းအား၃၀၀ ​ခေါ်ပြီး မင်းလက်ပံနဲ့ ဖလူးကို အင်အား၁၀၀၀​
လောက်နဲ့ထိုးစစ်ဆင်

■KNLA ကလည်းအင်အားဖြည့်ထားလို့
စစ်အုပ်စု ရှေ့မတိုးရဲ

■စစ်တပ်ထိုးစစ် ဒီတစ်ကြိမ်လန်ကျပါက
မြဝတီမြို့အတွက်အာမခံချက်မရှိဟုသုံးသပ်

ဇွန်-၂၉၊၂၀၂၆။ကိုဒီး/People's Spring

ကရင်ပြည်နယ်၊ မြဝတီမြို့တောင်ဘက်ခြမ်းက မင်းလက်ပံနဲ့ ဖလူးကျေးရွာကြီးတွေကို ထိန်းချုပ်ဖို့စစ်တပ်က DKBA နဲ့ BGF ခေါ်ပြီး တကျော့ပြန်ထိုးစစ်ဆင်တိုက်ခိုက်နေတယ်လို့
လူထု​နွေဦးရဲ့ကရင်စစ်ရေးသတင်းရင်းမြစ်တွေက ပြောပါတယ်။

စစ်တပ်ဟာ ပြီးခဲ့တဲ့ ဇွန်လ ၂၀ရက်ကစပြီး ယခင် ဒီမိုကရေစီအကျိုးပြုကရင်တပ်မ
တော် (DKBA)ရဲ့ ဗိုလ်ဘိအဖွဲ့နဲ့ ကရင်နယ်ခြားစောင့်တပ်(BGF)ရဲ့ ဗိုလ်မုတ်သုန်အဖွဲ့တွေကိုခေါ်ယူပြီး တော်လှန်ရေးတပ်တွေကို ထိုးစစ်ဆင်လာတာလို့ စုံစမ်းသိရတယ်။

ဗိုလ်ဘိအဖွဲ့က အင်အား ၁၀၀ လောက်နဲ့ ဗိုလ်မုတ်သုန်အဖွဲ့က အင်အား ၂၀၀ လောက် ခေါ်ယူပြီး စစ်တပ်နဲ့ အင်အားစုစုပေါင်း ၁၀၀၀ လောက်နဲ့ ထိုးစစ်ဆင်လာတာလို့ ကရင်စစ်ရေးသတင်းရင်းမြစ်တွေက ပြောပါတယ်။

"သူတို့ကလူစုပြီးထိုးဖို့လုပ်တော့ ဟိုက KNLA
က အဖွဲ့လိုက်ဆင်းလာတာ။သူတို့အခု ရှေ့မတိုးရဲဘဲလက်နက်ကြီးတွေနဲ့သာပစ်နေတယ်"
လို့ လူထုနွေဦးရဲ့ သတင်းရင်းမြစ်က ပြောပါတယ်။

ဇွန်လ၂၉ ရက်မှာစစ်တပ်ကမြဝတီမြို့စောင့်
တပ် (၂၇၅)တပ်ရင်းကနေ လက်နက်ကြီးတွေနဲ့ ပစ်ကူပေးနေတယ်လို့ မြဝတီမြို့ခံတွေက ပြောပါတယ်။

"အခုကို ၇ လုံးလောက်ရှိပြီ။မြဝတီမှာအဲဒီ အ
သံ မကြားရတာကြာပြီ"လို့ မြဝတီမြို့ခံတဦးက ပြောပါတယ်။

စစ်တပ်က DKBA ဗိုလ်ဘိအဖွဲ့ကို မင်းလက်ပံနေရာကို​ပေးမယ်လို့ မက်လုံးပေးပြီး တိုက်
ခိုက်နေတာလို့လည်း လူထုနွေဦးရဲ့ သတင်းရင်းမြစ်က ပြောပါတယ်။

စစ်တပ်က မင်းလက်ပံရွာနဲ့ ဖလူးကြီးရွာကြားက သူတို့ရဲ့ စခန်းဟောင်းထဲကို ပြန်သိမ်းယူနိုင်ဖို့နဲ့ ဖလူးလေးတောင်ကုန်း (ဒေသခံတွေအခေါ် တာကော်ကျိုး)ကို စိုးမိုးထိန်းချုပ်နိုင်ဖို့ ထိုးစစ်ဆင်နေတာဖြစ်ပြီးကရင်လွတ်မြောက်
ရေးတပ်မတော်(KNLA) ပူးပေါင်းတပ်ဖွဲ့တွေဘက်က ခုခံတိုက်ခိုက်နေတာ ဖြစ်ပါတယ်။

စစ်တပ်ဟာ မြဝတီမြို့တောင်ဘက်ခြမ်းက ဒေသတွေကို စိုးမိုးနိုင်ဖို့အတွက် မင်းလက်ပံ၊ ဖလူးကြီး၊ ဖလူးလေး ကျေးရွာတွေကို ပြန်သိမ်းဖို့ ပြီးခဲ့တဲ့ ၂၀၂၅ အောက်တိုဘာက
တည်းက စစ်ကြောင်း ၃ ကြောင်းနဲ့ ထိုးစစ်ဆင်ပေမယ့် ဒီကနေ့အထိ အဲဒီကျေးရွာတွေကို သိမ်းပိုက်နိုင်တာမရှိပါဘူး။

စစ်တပ်ရဲ့ တကျော့ပြန်ထိုးစစ်ဟာ လန်ကျသွားပါက ဒေသတွင်းမှာ အရေးပါတဲ့ မြဝတီမြို့အတွက်ပါ အာမခံချက်မရှိတော့ဘူးလို့ စစ်ရေးသတင်းရင်းမြစ်က ပြောပါတယ်။

"အခြေအနေက ဘယ်လိုပြောမလဲဆိုတော့ သူများတိုးချလာရင် မြဝတီမြို့ပါ အာမခံချက်မရှိဘူး ဖြစ်သွားမယ်။ ဟိုဘက်ကလည်း အင်အားအလုံးအရင်းနဲ့ လာတယ်။ ဒီတခါ ပြန်လှန်ကျရင် မြဝတီမြို့ပါ ပါသွားမှာ"လို့ ၎င်းက ဆက်ပြောပါတယ်။

လက်တလောမှာ မြန်မာ-ထိုင်းနယ်စပ်က စစ်
တပ်ရဲ့ ​အ​​​ရေးပါတဲ့ ဝေါ်လေဗျူဟာကုန်းတပ်စခန်းကို ကရင်လွတ်မြောက်ရေးတပ်မ
တော်(KNLA)ဦးဆောင်တဲ့တော်လှန်ရေးတပ်တွေက ထိုးစစ်ဆင်တိုက်ခိုက်​နေတာမှာ စစ်တပ်အထိနာနေတယ်လို့ လူထုနွေဦးရဲ့စစ်ရေးသတင်းရင်းမြစ်အချို့က ပြောပါတယ်။

ဘင်္ဂလားပင်လယ်အော်မှာ မုန်တိုင်းငယ်ဖြစ်လာနိုင်

■ကချင်ပြည်နယ်မှာ မိုးကြီးနေပြီး ရေဘေးဆက်ကြုံ

ဇွန်-၂၉၊၂၀၂၆။စိုင်းနောင်/People's Spring

ဘင်္ဂလားပင်လယ်အော်မှာ လာမယ့်ဇူလိုင်လဆန်းအတွင်း မုန်တိုင်းငယ်ဖြစ်လာနိုင်သလို ကချင်ပြည်နယ်မှာ မိုးကြီးနေပြီး ရေဘေးကြုံတွေ့ခဲ့တဲ့ မြို့နယ်တွေမှာ ရေပြန်တက်လာလို့ ဒေသခံတွေစိုးရိမ်နေကြပါတယ်။

ဖားကန့်၊ နမ္မတီး၊ မိုးကောင်း၊ မိုးညှင်းမြို့နယ်တွေမှာ ရေပြန်တက်လာပြီး ဖားကန့်မြို့နယ်အတွင်း တကျော့ပြန်ရေ ဘေးကြုံတွေ့
နေပါတယ်။

"ဥရုချောင်းရေက ပြန်တက်လာပြီး ရပ်ကွက်တချို့မှာရေပြန်ဝင်နေတယ်။ ပထမရေဘေးကကျရုံပဲရှိသေးတာ။ရက်ပိုင်းအတွင်းနောက်
ထပ်ရေ ဘေးကြုံနေရပါတယ်။ မိုးကလည်းဆက်ကောင်းနေတယ်"လို့ ဖားကန့်မြို့နယ်၊ ငှက်ပျောတောရပ်ကွက်မှာနေထိုင်သူတဦးကပြောပါတယ်။

ဖားကန့်မှာဇွန် ၂၇ရက်နေ့ညက မိုးကြီးပြီး ကမ်းပါးပြိုမှုနဲ့ နွံကန်ပြိုကျမှုတွေဖြစ်ခဲ့ပါတယ်။နန့်မှော်ရွာမှာ ကမ်းပါးပြိုလို့ လူဆယ်ဦးထက်မနည်းပျောက်ဆုံးခဲ့ပြီး ၇ဦးရဲ့ရုပ်အလောင်းကိုပဲပြန်လည်ရှာတွေ့ခဲ့တယ်လို့ သတင်းရရှိပါတယ်။

ဖားကန့်မှာ ဇွန်လ ၁၄ရက်ကနေစပြီး ရေကြီးခဲ့တာပါ။ ဇွန်လ ၂၂ရက်မှာ ရေပြန်ကျပေမယ့် ယခုတခါ နောက်တစ်ကြိမ်ရေ ဘေးကြုံတွေ့တာဖြစ်ပါတယ်။ ပထမအကြိမ်ရေကြီးစဉ်က ဇွန်လ၁၆ရက်နေ့နဲ့ ဇွန်လ၂၁ရက်နေ့မှာ တောင်ကျ ရေနဲ့ မြေပြိုလို့ လူနှစ်ဦးသေဆုံးခဲ့ပါတယ်။ လက်ရှိမှာလည်း လူနေကျေးရွာနဲ့ရပ်ကွက်တွေအတွင်း တောင်ကျ ရေတွေဆင်းနေလို့ အန္တရာယ်ရှိနေတယ်လို့ ဒေသခံတွေကပြောပါတယ်။

ဇွန်လ၂၇ရက်နေ့ကဖြစ်စဉ်မှာ စွန့်ပစ်မြေစာပုံတွေကနေဖြစ်တဲ့ နွံကန်ပြိုကျပြီး လူနေကျေး
ရွာတွေထဲကို ရွံ့နွံတွေနဲ့ရေတွေ စီးလာလို့ ထိခိုက်ပျပျက်စီးမှုများပြားတယ်လို့ ဒေသခံတွေကပြောပါတယ်။

နမ္မတီးမြို့မှာလည်း မနေ့က ချောင်းရေမြင့်တက်လာပြီး ကလေးငယ်တဦးရေနစ်သေဆုံးခဲ့တယ်လို့ မြို့ခံတွေကပြောပါတယ်။ ဇွန်လလယ်ကရေဘေးကြုံတွေ့ခဲ့တဲ့မိုးကောင်းမြို့မှာလည်း ရေပြန်မြင့်တက်လာနေပါတယ်။

ကချင်ပြည်နယ်အထက်ပိုင်းဒေသဖြစ်တဲ့ ပူတာအိုမြို့နယ်မှာ ယခုရက်ပိုင်းမိုးကြီးနေပြီး အောက်ပိုင်းဒေသတွေရေ ဘေးသတိပြုကြဖို့ မြို့ခံတွေကသတိပေးနေကြပါတယ်။ဧရာ
ဝတီမြစ်ရေဟာ မြစ်ကြီးနားမြို့မှာစိုးရိမ်ရေမှတ်ကိုတက်မလာသေးပေမယ့် ပုံမှန်ထက်ရေများနေပြီလို့ သတင်းရရှိပါတယ်။

ပဲခူးတိုင်းထဲကတောင်ငူမြို့အပါအဝင်မြို့
နယ်အချို့နဲ့ ရှမ်းပြည်နယ် မြောက်ပိုင်းကမူဆယ်မြို့မှာလည်း ဇွန်လ၂၈ရက်နေ့ ဒီနေ့ဇွန်လ၂၉ရက်နေ့မနက်ပိုင်းမှာ မိုးကြီးပြီး ရပ်
ကွက်အချို့ လမ်းပေါ်ရေကျော်နေတယ်လို့ သတင်းရရှိပါတယ်။

ဘင်္ဂလားပင်လယ်အော် အနောက်မြောက်ပိုင်းမှာ ဇူလိုင်လ(၄)ရက်နေ့ကစပြီး လေဖိအားနည်းရပ်ဝန်း ဖြစ်ပေါ်နိုင်ပြီး မုန်တိုင်းငယ်အဆင့်သို့ ရောက်ရှိလာနိုင်လို့ မြန်မာနိုင်ငံမှာမိုးဆက်ကောင်း နိုင်တယ်လို့အမျိုးသားညီ
ညွတ်ရေးအစိုးရ(NUG)၊လူမှုရေးရာ၊ အလုပ်
သမားနဲ့လူသားချင်းစာနာထောက်ထားရေးဝန်ကြီးဌာန(MoSLHA)က ဒီ‌နေ့ ဇွန်လ၂၉ရက်နေ့မှာ သတိပေးချက် ထုတ်ပြန်ထားပါတယ်။

ယခုရက်ပိုင်း မြန်မာနိုင်ငံတစ်ဝှမ်းနေရာအနှံ့
အပြား မိုးရွာနိုင်ပြီး ဇူလိုင်လ ၃ရက်နဲ့ ၅ရရက်မှာ ရခိုင်ပြည်နယ်၊ ဧရာဝတီတိုင်း၊ ရန်ကုန်
တိုင်း၊ တနင်္သာရီတိုင်း၊ ကရင်ပြည်နယ်နှင့် မွန်ပြည်နယ်တို့မှာ မိုးကြီးနိုင်တယ်လို့သတိ
ပေးထားပါတယ်။မိုးကြီးလို့ဖြစ်နိုင်တဲ့ရေ
ဘေးအပြင် လေပြင်းတိုက်ခတ်ခြင်း၊ လျှပ်တပြက် ရေလွှမ်းမိုးခြင်း၊ မိုးကြိုးပစ်ခြင်း၊ မြေပြိုခြင်း၊ တောင်ပြိုခြင်းနဲ့ကမ်းပါးပြိုခြင်းတွေ အထူးသတိပြု နေထိုင်ကြဖို့ MoSLHAက သတိပေးထားပါတယ်။

မိုးဗြဲမြို့အနီးတိုက်ပွဲ တော်လှန်ရေးတပ်တွေ စစ်သုံ့ပန်းနဲ့ လက်နက်တွေ သိမ်းရ

ဇွန်-၂၉၊၂၀၂၆။မိုမို/People's Spring

ရှမ်း-ကရင်နီပြည်အစပ် မိုးဗြဲမြို့အနီးမှာ ဖြစ်ပွားတဲ့တိုက်ပွဲအတွင်း လက်နက်ခဲယမ်းတချို့နဲ့ စစ်သုံ့ပန်း ၂ ဦး ဖမ်းဆီးရမိခဲ့တယ်လို့ မြို့ပြပြောက်ကျားတပ် Urban Task Force Aung Ban - UTF က ဒီကနေ့ဇွန်လ ၂၉ရက် ညပိုင်းမှာ ထုတ်ပြန်ပါတယ်။

ဇွန်လ ၂၈ရက်မှာ တိုက်ပွဲဖြစ်ခဲ့ပြီး ကရင်နီတော်လှန်ရေးတပ်ပေါင်းစုတွေစုဖွဲ့ထားတဲ့ Joint Operation Command(JOC)တော်လှန်ရေး အမှတ်(၁) စစ်ကြောင်းနဲ့ ပူးပေါင်းတိုက်ခိုက်ခဲ့တာလို့ သိရပါတယ်။

"မိုးဗြဲနဲ့ ဘုရားဖြူမှာ တိုက်ပွဲဖြစ်တယ်။ ကာကင်းတချို့ကို ချေမုန်းနိုင်ခဲ့တယ်။ ရန်သူ့သေဆုံး ထိခိုက်မှု့များပြီး ဆုတ်ခွါသွားတယ်။ လက်နက်ခဲယမ်းတချို့သိမ်းဆည်းရမိတယ်။သုံ့ပန်း ၂ယောက်မိတယ်"လို့ ကရင်နီတပ်ပေါင်းစု တာ၀န်ရှိသူက ပြောပါတယ်။ ကရင်နီတပ်ပေါင်းစုဘက်ကလည်း ထိခိုက်မှုတချို့ရှိတယ်လို့ သူက ဆက်ပြောပါတယ်။

မနေ့က မနက် ၄ နာရီခွဲခန့်ကစပြီး ကရင်နီ JOC တော်လှန်ရေးတပ်ပေါင်းစုက လွိုင်ကော်- မိုးဗြဲမြို့ နယ်ကြားက စစ်တပ် ကာကင်းစခန်းတွေကို နေ့လယ်ပိုင်းအထိ ထိုးစစ်ဆင်ခဲ့တယ်လို့ ဆိုပါတယ်။

အဲဒီကာကင်းစခန်းတွေဟာ ဒီးမော့ဆိုမြို့နယ်၊နန်းမယ်ခုံမြို့ကို ထိုးစစ်ဆင်ဖို့ စစ်တပ်က ပြင်ဆင်စုဖွဲ့ထားတဲ့နေရာတွေလို့ အသိပေးပါတယ်။

ကာကင်းစခန်းတွေသိမ်းခံရပြီးနောက်ပိုင်း စစ်တပ်က ဒီကနေ့ ဇွန်လ ၂၉ရက် နေ့လယ်ပိုင်းမှာ နန်းမယ်ခုံမြို့အနီးကို လေကြောင်းကနေ ဗုံး ၈ကြိမ်ကြဲခဲ့ပြီး နေအိမ်တချို့ ပျက်စီးခဲ့ပါတယ်။

အာဏာသိမ်းစစ်တပ်ရဲ့ ဝါဒဖြန့်တယ်လီဂရမ် အကောင့်တချို့မှာတော့ ဝါရီဆူးပလိုင်း၊ ဘုရားဖြူ နဲ့ ဘုရားနီရွာအနီးမှာ တိုက်ပွဲဖြစ်နေတယ်လို့ ဇွန်လ ၂၈ရက် နေ့လယ်ပိုင်းမှာ ရေးသားပါထားတယ်။

"နယ်‌မြေစိုးမိုးမှုကို ခြေကုတ်ယူထားတာဖြစ်တဲ့အတွက် ပြန်လည်ခြေမှုန်းတာဖြစ်ပါတယ်"လို့ မိုးဗြဲပြည်သူ့ကာကွယ်ရေးတပ်ဖွဲ့ တာ၀န်ရှိသူက ပြောပါတယ်။

မိုးဗြဲမြို့မှာရှိတဲ့ တော်လှန်ရေးတပ်တွေရဲ့ ရှေ့တန်းကင်းစခန်းနေရာ ထိုးစစ်ဆင်လာတဲ့ စစ်တပ်နဲ့ မေလ ၁၃ ရက်နဲ့ ဇွန်လ ၁၉ ရက်တွေမှာ တိုက်ပွဲတွေ ဖြစ်ခဲ့တယ်လို့ အမှတ် (၁) စစ်ဒေသ - အယ်လ်ဖာဇုန် (မိုးဗြဲဇုန်)က ပြီးခဲ့တဲ့ရက်ပိုင်းက ထုတ်ပြန်ထားပါတယ်။

အဲဒီတိုက်ပွဲတွေမှာလည်း စစ်သား ၁၉ ဦး ခန့် သေဆုံးပြီး လက်နက်ကြီး၊ လက်နက်ငယ်တွေ အပါအဝင် ခဲယမ်းတွေနဲ့ စစ်အသုံးအဆောင်ပစ္စည်းတချို့သိမ်းဆည်းရရှိခဲ့တယ်လို့ ထုတ်ပြန်ချက်မှာဖော်ပြပါတယ်။

စစ်တပ်က မိုးဗြဲမြို့ကတဆင့် ဒီးမော့ဆိုမြို့နယ်၊နန်းမယ်ခုံမြို့ကို ပြန် လည်ထိန်းချုပ်ဖို့ စစ်ကြောင်းထိုးနေပေမယ့် ကရင်နီတပ်ပေါင်းစုက ခုခံထားတာကြောင့် မိုးဗြဲ မြို့အနီးမှာပဲ ရပ်တန့်နေရပါတယ်။

"နန်းမယ်ခုံရရင် မိုးဗြဲ ၊လွိုင်ကော်နဲ့ ဒီမောဆိုရှေ့ခြမ်းကိုကောင်းကောင်းထိမ်းချုပ်လို့ရသွားမယ့်အခြေ အနေ"လို့ ကရင်နီစစ်ရေးသတင်းရင်းမြစ်က ပြောပါတယ်။

မိုးဗြဲမြို့နဲ့ မိုင် ၂၀ ၀န်းကျင်အကွာ မိုးဗြဲ - ဒီးမော့ဆိုမြို့နယ်ကြားမှာရှိတဲ့ နန်းမယ်ခုံမြို့ကို တော်လှန်ရေးတပ်တွေက ၂၀၂၃ နှစ်ကုန်ပိုင်းကစပြီး ထိန်းချုပ်ထားတာဖြစ်ပါတယ်။

မင်းတပ်မြို့အနီး စစ်တပ် လေကြောင်းဗုံးကြဲမှု မိန်းကလေးငယ် ၃ဦး သေဆုံး

ဇွန်-၂၉၊ ၂၀၂၆။ ထားမြတ်/People’s Spring

ချင်းပြည်နယ်၊ မင်းတပ်မြို့အနီး ကျေးရွာကို အာဏာသိမ်းစစ်တပ်က ဒီကနေ့ဇွန်၂၉ရက် မနက်မှာ လေကြောင်းကနေ ဗုံးကြဲတိုက်ခိုက်ခဲ့ရာ ကလေးငယ် ၃ ဦး သေဆုံးခဲ့တယ်လို့ မင်းတပ်ဒေသခံက အသိပေးပါတယ်။

သေဆုံးသွားတဲ့ ကလေးငယ်တွေဟာ အသက် (၇)နှစ်၊ (၈)နှစ်နဲ့ (၁၀)နှစ်အရွယ် မိန်းကလေးငယ်တွေ ဖြစ်တယ်လို့ ဆိုပါတယ်။

လေကြောင်းတိုက်ခိုက်မှုကြောင့် ဒဏ်ရာရသူတွေရှိတယ်လို့ ဒေသခံက အသိပေးထားပြီး နောက်ဆက်တွဲ အခြေအနေတွေ မေးမြန်းထားဆဲဖြစ်ပါတယ်။

အာဏာသိမ်းစစ်တပ်ဟာ ဒီကနေ့ ညနေပိုင်းမှာလည်း မင်းတပ်မြို့အရှေ့ခြမ်းနေရာတွေကို Y12 လေယာဉ်နဲ့ ၁၁ကြိမ် ဗုံးအလုံး ၃၀ ကျော်ထပ်မံ တိုက်ခိုက်ကြဲချခဲ့တယ်လို့ ဒေသခံက အသိပေးပါတယ်။

မင်းတပ်ဒေသခံက နေ့စဉ်ဖော်ပြနေတဲ့ စစ်တပ်ရဲ့ လေကြောင်း တိုက်ခိုက်မှုသတင်းတွေအရ ဇွန် ၂၃ရက်ကနေ ဒီကနေ့ ဇွန် ၂၉ရက်ညနေပိုင်းအထိ မင်းတပ်မြို့နယ်ကို စစ်တပ်က တိုက်လေယာဉ် Y12 လေယာဉ်နဲ့ အကြိမ်ပေါင်း ၁၀၀ ကျော် ၊ ဗုံးအလုံးရေ ၃၅၀ ကျော် ကြဲချတိုက်ခိုက်ခဲ့ပါတယ်။

စစ်တပ်ဟာ မင်းတပ်မြို့နယ်ကို မနက်အစော၊ ညအချိန် ၊ ညသန်းခေါင် အပါအဝင် အချိန်မရွေး အကြိမ်ပေါင်းများစွာ လေကြောင်း တိုက်ခိုက်နေတာပါ။

ချင်းပြည်သူ့အစည်းအရုံး(CPU/CPA) သိမ်းပိုက်ထားတဲ့ မင်းတပ်မြို့ကို စစ်တပ်က ၂၀၂၆ မေလကုန်က ထိုးစစ်ဆင်ခဲ့ရာ တိုက်ပွဲ၁လ ခန့်ကြာပြီးဖြစ်ပါတယ်။

တိုက်ပွဲသတင်း အသေးစိတ် အခြေအနေတွေ ထုတ်ပြန်တာ မရှိပေမဲ့ စစ်တပ်ရဲ့ လေကြောင်းပစ်ကူပေးမှုဟာ နေ့စဉ်ရှိနေပါတယ်။ လေကြောင်းတိုက်ခိုက်ရာမှာ တိုက်ပွဲမရှိတဲ့ အရပ်သား နေထိုင်ရာတွေကိုပါ ဗုံးကြဲခဲ့တာဖြစ်ပြီး ဖျက်အားပြင်း ဗုံးတွေအသုံးပြု တိုက်ခိုက်တာလည်းရှိပါတယ်။

စစ်တပ်ဟာ ချင်းပြည်သူ့အစည်းအရုံး သိမ်းပိုက်ထားတဲ့ ကန်ပက်လက်မြို့ ပြန်ရဖို့လည်း ထိုးစစ်ဆင်နေရာ အခါအားလျော်စွာ ကန်ပက်လက်မြို့နယ်ကို လေကြောင်းဗုံးကြဲတာတွေ ဆက်လက်ပြုလုပ်နေဆဲဖြစ်ပါတယ်။

(မင်းတပ်မြို့ကို ဗုံးကြဲဖို့လာတဲ့ စစ်တပ်ရဲ့ Y12လေယာဉ်ကို တွေ့ရစဉ်။ ဓာတ်ပုံ - Ĥkl Mindat/FB)

တော်လှန်ရေးတပ် အချင်းချင်းကြားပြဿနာ ညှိနှိုင်းဖို့ NUGနဲ့ NUCC ဆွေးနွေး

ဇွန် ၂၉၊ ၂၀၂၆။ထားမြတ်/People’s Spring

အမျိုးသားညီညွတ်ရေးအတိုင်ပင်ခံကောင်စီ (NUCC)နဲ့ အမျိုးသားညီညွတ်ရေးအစိုးရ(NUG) တို့ တွေ့ဆုံပြီး တော်လှန်ရေးအဖွဲ့အစည်းအချင်းချင်းကြား မြေပြင်ပဋိပက္ခများကိစ္စ ဆွေးနွေးညှိနှိုင်းခဲ့တယ်လို့ NUCCက သတင်းထုတ်ပြန်ပါတယ်။

ဇွန်လ ၂၈ရက် နေ့လည်ပိုင်းက တွေ့ဆုံခဲ့တာဖြစ်ပြီး NUG ကာကွယ်ရေးဝန်ကြီး နဲ့ အစိုးရအဖွဲ့ဝင်တွေ တက်ရောက်ခဲ့သလို NUCC ကောင်စီဝင်တွေ တက်ရောက်ခဲ့တယ်လို့ ဆိုပါတယ်။

ဆွေးနွေးပွဲဟာ ၃နာရီ ကြာမြင့်ခဲ့ပြီး တော်လှန်ရေးအဖွဲ့အစည်းအချင်းချင်းကြား မြေပြင်ပဋိပက္ခများနဲ့ ပတ်သက်ပြီး အခြေအနေတွေ မျှဝေတာ၊ မေးမြန်းဆွေးနွေးတာ၊ အကြံပြုတာတွေလုပ်ဆောင်ခဲ့တယ်လို့ ထုတ်ပြန်ပါတယ်။

NUCC အနေနဲ့ ဖက်ဒရယ်ဒီမိုကရေစီ ပဋိညာဉ်ပါ ပြဋ္ဌာန်းချက်များအရ ကူညီ ညှိနှိုင်းနိုင်မယ့် အခြေအနေများကို ဆွေးနွေးခဲ့ပြီး ရှေ့ဆက်ဆောင်ရွက်မယ့် လုပ်ငန်းစဉ်တွေကို ညှိနှိုင်းသတ်မှတ်ခဲ့ကြောင်း ဖော်ပြထားပါတယ်။

NUCC အနေနဲ့ NUGနဲ့ မတွေ့ဆုံမီ SRF, PLA, 96 Soldiers၊ စစ်ကိုင်း PDFစတဲ့ တပ်ဖွဲ့တွေက တာဝန်ရှိသူတွေနဲ့ တွေ့ဆုံဆွေးနွေးမေးမြန်းတာတွေရှိခဲ့တယ်လို့ ထုတ်ပြန်ပါတယ်။

တပ်က ရိက္ခာစုနေတဲ့ စစ်တွေမှာ ဆန်အပါ
အဝင် စားသောက်ကုန်တွေ စျေးအဆမတန်မြင့်တက်နေ

ဇွန်-၂၉၊၂၀၂၆။ခိုင်မြတ်/People’s Spring

အာဏာသိမ်းစစ်တပ်က ထိန်းချုပ်ထားတဲ့ ရခိုင်ပြည်နယ်မြို့တော် စစ်တွေမှာ စစ်တပ်က ရိက္ခာစု​နေတာ​ကြောင့် ဆန်အပါအဝင် စား
နပ်ရိက္ခာ၊ သားငါး နဲ့ စက်သုံးဆီရှားပါးလာပြီးစျေးတွေအဆမတန်တက်နေလို့ ဒေသခံတွေ က ပြောပါတယ်။

စစ်တပ်ကစစ်တွေမြို့အဝင်အထွက်ကို ပိတ်
ဆို့ထားတာကြောင့် မြို့ခံတွေဟာ ဆန်အပါ
အဝင်စားနပ်ရိက္ခာ၊ ကုန်စည်၊ ဆေးဝါးတွေအတွက် စစ်တပ်ခွင့်ပြုချက်နဲ့ ရန်ကုန်ကလာတဲ့ ကုန်သင်္ဘောတွေကိုသာ အားကိုးနေကြရတာပါ။ လက်ရှိမှာတော့ စစ်တွေမြို့ကို ကုန်
သင်္ဘောတွေအဝင်အထွက်ရှိပေမယ့် ပါလာတဲ့ဆန်နဲ့ ကုန်စည်အများစုကို တပ် ရိက္ခာအတွက် ယူနေကြတာကြောင့် စျေးတက်နေတာလို့ မြို့ခံတွေကပြောကြပါတယ်။

“သင်္ဘောတွေ အဝင်အထွက်ကတော့ ပုံမှန်ပဲ ရှိတယ်။ဒါပေမယ့် ပါလာတဲ့ဆန်အများစုကို တပ်ထဲယူသွားတယ်။တပ်ရိက္ခာတွေများနေတယ်။ အဲလိုဆိုတော့ ဆန်ဆိုင်တွေက ဆန်အများကြီးမရတော့ဘူး။ ဆန်အဓိက စျေးတက် တယ်။ နောက်စား ဆီတွေ၊ ဓါတ်ဆီတွေလည်း တက်တယ်” လို့ စစ်တွေမြို့မှာနေထိုင်တဲ့ ကုန်စုံဆိုင်ပိုင်ရှင်တဦးက ပြောပါတယ်။

စစ်တွေမြို့အနီးပတ်လည်မှာ အာရက္ခတပ်တော်(AA)ရဲ့ ထိုးစစ်ဆင်တွေကို ရင်ဆိုင်နေရချိန် အာဏာသိမ်းစစ်တပ် က အခုလို ရိက္ခာတွေ စုဆောင်းနေတာပါ။

စစ်တွေမြို့မှာ အရင်ကကျပ်နှစ်သိန်း ၊ ကျပ်နှစ်သိန်းသုံး​သောင်းဝန်းကျင်သာ ရှိခဲ့တဲ့ ဆန်တအိတ်ဟာ အခုအခါ ကျပ်သုံးသိန်းကနေ ကျပ်သုံးသိန်းနှစ်​သောင်း ဝန်းကျင်ထိ စျေးရှိပါတယ် ။ ဒါ့အပြင် အရင် ကျပ် ၁၀၀၀၀ ဝန်းကျင်ရှိခဲ့တဲ့ စားဆီတလီတာကို အခုအခါ ကျပ် ၁၂၀၀၀ ဝန်းကျင်စျေးရှိနေတယ်လို့ ဆိုပါတယ်။

ဒါ့အပြင် ဝက်သားတစ်ပိဿာကို ကျပ် ၁၀၀,၀၀၀၊ အမဲသားတစ်ပိဿာကို ကျပ် ၉၀,၀၀၀နဲ့ ငါးတပိဿာကို ကျပ် ၄၀,၀၀၀ ကနေ ကျပ် ၆၀,၀၀၀ ထိ စျေးရှိနေပြီး စက်သုံးဆီတလီတာကို ကျပ် ၁၉,၀၀၀ စျေးရှိနေတယ်လို့ မြို့ခံတွေက ပြောကြပါတယ်။

“ငါးတွေက စျေးတက်တာမရှိဘူး။အရင်က
တည်းက စျေးတက်နေတာ၊ အခုလည်း အဲဒီအတိုင်းပဲ၊ ငါးဖမ်းခွင့်က မရ ဘူးလေ” လို့ စစ်တွေမြို့ဘုမေရပ်ကွက်မှမူဆလင်အမျိုးသား
တဦးက ပြောပါတယ်။ အဲဒီလို အခြေအနေ
မှာငွေကြေးချမ်းသာသူတွေဟာစားသောက်
ကုန်တွေ အများအပြားဝယ်ယူပြီး စုဆောင်းနေကြတယ်လို့ ဆိုပါတယ်။

“တိုက်ပွဲတွေ ပြင်းလာတော့ပိုက်ဆံရှိတဲ့သူတွေကုန်စုကြတယ်။စားဖို့ရော၊ ရောင်းဖို့ရော နေမှာပေ့ါ။ မတတ်နိုင်တဲ့သူတွေကတော့ ငတ်
သူ ငတ်ကြတယ်။ (ဆန်)တရက်စာတောင် ပုံမှန်မဝယ်နိုင်တဲ့သူတွေအများကြီးပါ စစ်တွေ မြို့မှာ” လို့ စစ်တွေမြို့ပေါ် စစ်ဘေးရှောင်စခန်းတခုမှ အမျိုးသမီးတဦးက ပြောပါတယ်။

လက်ရှိမှာ စစ်တွေမြို့နဲ့ လေးမိုင်ဝန်းကျင်အကွာ ရွှေမင်းဂံရေတပ်စခန်း၊ ဒေသကွပ်ကဲမှုစစ်ဌာနချုပ်(ဒကစ စစ်တွေ)အနီး နာရီကန်ကျေးရွာတဝိုက်နဲ့ ပုဏ္ဏားကျွန်း၊ စစ်တွေအစပ်နေရာတွေမှာရှိတဲ့ စစ်တပ်စခန်းတွေကို AA က မြေပြင်ထိုးစစ်ဆင်နေပြီး လက်နက်ကြီးတွေနဲ့လည်း ပစ်ခတ်၊ တိုက်ခိုက်နေပါတယ်။
အဲဒီတိုက်ပွဲတွေအတွင်း AA က ရှေ့တန်းကာကင်းစခန်းအချို့ သိမ်းပိုက်ရရှိထားပြီး စစ်
တပ်ဘက်က အကျအဆုံး လည်း ရှိနေတယ်လို့ မြေပြင်သတင်းရင်းမြစ်တွေက ပြောကြပါတယ်။

“တိုက်ပွဲကတော့ ရှိနေတာပဲ။ ကိုယ့်ဘက်က အပြင်းအထန်အလုပ်လုပ်နေတာရှိတယ်။ စစ်တွေလို့မဟုတ်၊ နေရာ တိုင်းမှာ လုပ်နေတာပဲ။ စစ်ရေးအောင်မြင်မှုရတယ်၊ စစ်တွေမှာ စခန်းတွေသိမ်းရတာကျတော့ ထုတ်ပြောဖို့ စော သေးလို့ပါ”လို့ AA နဲ့ နီးစပ်တဲ့ စစ်တွေဒေသခံ စစ်ရေးသတင်းရင်းမြစ်တဦးကပြောပါတယ်။

ရခိုင်ဒေသတခုလုံးကို အပြီးပြတ်သိမ်းပိုက်သွားမယ်လို့ မကြာခဏထုတ်ပြောထားတဲ့ AA ဟာ ရခိုင်ပြည်နယ်အ တွင်းက လက်ကျန်မြို့ဖြစ်တဲ့ စစ်တွေကို ၂၀၂၆နှစ်ဆန်းကတည်းက
ထိုးစစ်တွေ မကြာခဏ လုပ်ပြီး ကာကင်းစ ခန်းတွေ သိမ်းယူနေခဲ့တာပါ။

အခုအခါ AA ဟာ စစ်တွေမြို့နယ် ရွှေမင်းဂံရေတပ်စခန်းအနီးဝန်းကျင်ရှိ ကံ့ကော်ကျွန်းအပါအဝင် ရှေ့တန်းကာ ကင်းစခန်းအချို့ကို သိမ်းပိုက်ထားပါတယ်။ စစ်တွေမြို့နယ်မှာ ဒကစ စစ်တွေ အခြေစိုက်ထားပြီး အခြားအခြေစိုက် တပ်ရင်းတွေ၊ လက်ရုံးတပ်တွေအပါအဝင် တပ်ရင်းတပ်ဖွဲ့ပေါင်း တဆယ်ဝန်းကျင်ရှိပါတယ်။

AA တပ်မှူးချုပ် ဗိုလ်ချုပ်ထွန်းမြတ်နိုင်က
တော့ ရခိုင်ပြည်နယ်အတွင်းက လက်ကျန်မြို့တွေဖြစ်တဲ့ ကျောက်ဖြူ၊ စစ်တွေနဲ့ မာန်အောင်မြို့နယ်တွေကို အခု ၂၀၂၆ နဲ့ ၂၀၂၇ တို့မှာ အပြီးပြတ်သိမ်းပိုက်သွားမှာဖြစ်ပြီး မပြီးပြတ်ခဲ့ ရင်လည်း မီးကုန်ယမ်းကုန်ကြိုးစားသွားမယ်လို့ ဆိုထားပါတယ်။

စစ်တွေမြို့ဈေးမှာ တွေ့ရတဲ့ ဈေး၀ယ်နေသူတွေ။ ။ ဓါတ်ပုံ-MOI

■​ဆောင်းပါး

တပ်မြို့တော်ထီလာက ပေါ်တာ

ဇေအောင်/People's Spring

ပြီးခဲ့တဲ့ ဇွန်လ ၂၅ ရက်နေ့က မိတ္ထီလာမြို့ကို ဖြတ်သန်းသွားခဲ့တဲ့ အမျိုးသမီးတစ်ဦးဟာ
မိတ္ထီလာရဲ့ပြောင်းလဲသွားတဲ့မြင်ကွင်းကို တအံ့တသြဖြစ်သွားခဲ့တယ်။ ရှမ်းကုန်းမြေမြင့်နဲ့ မြေပြန့်ဆက်သွယ်ရာဆုံမြို့ဖြစ်ပြီး တက္က
သိုလ်တွေ အမျိုးစုံစွာဖွင့်လှစ်ထားတာကြောင့် အာဏာသိမ်းကာလထဲမှာပဲ တခြားဒေသတွေနဲ့မတူ အမြဲစည်ကားနေခဲ့တဲ့ မြို့တော်ထီလာဟာ အခုတော့ သူမဟုတ်သယောင် လမ်းပေါ်မှာ လူသွားလူလာမရှိ တိတ်ဆိတ်ခြောက်ကပ်သွားလို့ပါ။

"ကိုဗစ်တုန်းကလိုပုံစံကြီး။ အိမ်ရောက်မှသိတာ ထီလာမှာ ပေါ်တာတွေဆွဲနေလို့တဲ့"လို့ သူက ပြောပြတယ်။

ဟုတ်ပါတယ်။ လေတပ်စခန်းဌာနချုပ်၊ တပ်
မ (၉၉) ခြေလျင်တပ်မဌာနချုပ် (တမခ ၉၉)၊ အမှတ်(၇၀၇)အမြောက်စခန်းကွပ်ကဲမှုဌာန
ချုပ်၊ အမှတ်(၁) ရှေ့တန်းအခြေချ ထောက်ပံ့နဲ့ ပို့ဆောင်ရေးတပ်ရင်း (ရထပ-၁) အပါအ
ဝင် အထူးစစ်ဆင်ရေးဆိုင်ရာ ထောက်ပို့တပ်
ဖွဲ့များအပါအဝင်စစ်ကောင်စီတပ်တွေ အများ
အပြား အခြေစိုက်ရာ “တပ်မြို့တော်” မိတ္ထီလာဟာ အာဏာသိမ်းကာလတစ်လျှောက် အခြားဒေသတွေလောက် ပေါ်တာဆွဲမှု မဆိုးရွားခဲ့ပေမဲ့ ယခု ဇွန်လ တတိယပတ်မှစတင်ကာ စစ်ကောင်စီတပ်က မြို့ပေါ်ရော ကျေးရွာများပါမချန် အင်အားအလုံးအရင်းနဲ့ ဆက်တိုက် ဖမ်းဆီးမှုတွေ ပြုလုပ်လာခဲ့တာပါ။

လာမယ့် ဇူလိုင်လမှာ စစ်မှုထမ်း အပတ်စဉ် (၂၆) ကိုစတင်ဖို့ ပြင်ဆင်နေတဲ့ စစ်အုပ်စုဟာယခုအခါ တပ်မြို့တော်ကိုပါ မြေလှန်ပြီး အင်
အားဖြည့်တင်းနေတာဖြစ်ပါတယ်။ စစ်ရေးအရ ရှုံးနိမ့်နေတဲ့ စစ်ကောင်စီဟာ စစ်အင်
အားလိုအပ်ချက်အရ ယခင်က မျက်ကွယ်ပြုခဲ့တဲ့ တပ်မြို့တော်ကိုပါမချန် ပေါ်တာဆွဲလာတာ ဖြစ်ပါတယ်။

-အိမ်ပေါ်ထိတက်ဖမ်းပြီး ဆိုင်ထဲအထိ ဝင်ဆွဲနေ

စစ်ကောင်စီတပ်ရဲ့ ဖမ်းဆီးမှုတွေဟာ မိတ္ထီလာမြို့မှာ နေ့စဉ်ရက်ဆက်မှာ နေရာအနှံ့ ဖြစ်ပွားနေကြောင်းမြို့ခံတွေကပြောပါတယ်။ ဇွန်လ ၂၄ ရက်ကနေစပြီး မြို့လယ် နာရီစင်၊ အမြန်လမ်းဆုံ၊ ဂွေ့ကြီးဆည်မြောင်းတံတားအနောက်ဘက်၊ နာဝရတ်ဆီဆိုင်တဝိုက်၊ သာစည်မြို့ရှောင်လမ်း၊ မိတ္ထီလာကန်တောင်ဘက်နဲ့ တံတားပေါ်တွေမှာ နေ့စဥ်ရက်ဆက် စောင့်ဆိုင်းဖမ်းဆီးခဲ့ကြောင်း မြို့ခံတွေက ပြောပါတယ်။

​ဒေသခံတွေရဲ့ ပြောပြချက်အရ စစ်ကောင်စီတပ်ဖွဲ့ဝင်တွေဟာ လမ်းမတွေပေါ်မှာသာမက လူနေအိမ်တွေနဲ့ဆိုင်တွေထဲအထိပါ ဝင်ရောက်ဖမ်းဆီးနေတာပါ။

​“နေ့ဘက်ဆို ဈေးထဲမှာ လူမရှိတော့ဘူး။ ဆိုင်တွေထဲအထိ ဝင်ဆွဲနေတာ။ မနက် ၁၀ နာရီလောက်ကတည်းက စဆွဲတာ ညနေအထိပဲ။ လမ်းထိပ် ကွမ်းယာတောင် ထွက်မဝယ်ရဲဘူး” ဟု မြို့ခံလူငယ်တစ်ဦးက ပြောပါတယ်။

မြို့ပေါ်တွေတင်မကဘဲ မိတ္ထီလာမြို့အနောက်ဘက် ဇရပ်ကုန်းရွာ အပါအဝင် ကျေးရွာတွေထဲအထိ ကားတွေနဲ့ ပတ်ကာ ဖမ်းဆီးနေတာကြောင့် နေ့ညမရွေး ထိတ်လန့်နေရကြောင်း ဒေသခံတွေက ပြောပါတယ်။

မိတ္ထီလာမြို့ကို ဖြတ်သန်းရမယ့်ယာဥ်တွေပေါ်မှာ အမျိုးသားတွေပါလာရင် ပေါ်တာဆွဲတဲ့သတင်းကြားတာနဲ့ ယာဥ်ကို ရောက်တဲ့နေရာမှာ ရပ်တန့်ထားလိုက်ရတယ်လို့ ဒေသခံတွေက ပြောပါတယ်။

■အသက်ကန့်သတ်ချက်မရှိ ဖမ်းဆီးမှုနဲ့ သိန်းရာချီ တောင်းတဲ့ ပြန်ပေးဆွဲမှု

​စစ်ကောင်စီက ထုတ်ပြန်ထားတဲ့ စစ်မှုထမ်းဥပဒေအရအသက် ၃၅ နှစ်အထိသာ သတ်
မှတ်ထားပေမဲ့လက်တွေ့မှာ အသက် ၅၀ နီး
ပါး အရွယ်ရှိသူတွေပါ ဖမ်းဆီးခံနေရကြောင်း ဒေသခံတွေက ပြောပါတယ်။

​“အသက် ၄၉ နှစ်အရွယ် ဦးလေးကြီးတစ်ယောက် ပါသွားတယ်။ ရွာထဲအထိ ဝင်ဆွဲသွားတာ” ဟု ဒေသခံတစ်ဦးက ပြောပါတယ်။

ဒါ့အပြင် ပေါ်တာဆွဲခံရသူတွေကို ပြန်လည်ရွေးယူရာမှာ ငွေကြေးအမြောက်အမြား ပေးနေရပြီးလတ်တလော မိတ္ထီလာမှာ ပေါ်တာဆွဲခံရသူတစ်ဦးပြန်လည်လွတ်မြောက်ဖို့အတွက် ငွေကြေးပေါက်ဈေးမှာ ကျပ်သိန်း ၁၀၀ မှ သိန်း ၁၅၀ အထိ ရှိနေကြောင်း ဒေသခံတွေဆီက သိရပါတယ်။

​▪︎စီးပွားရေးလုပ်ငန်းတွေ ရပ်ဆိုင်းကာ ဆိုင်တွေပိတ်ထားရ

လက်ရှိ စစ်ကောင်စီတပ်ဟာ ဆိုင်တွေထဲအထိ ဝင်ဆွဲနေတာကြောင့် မိတ္ထီလာမြို့ပေါ်ရှိ စီးပွားရေးလုပ်ငန်းတွေနဲ့ ဈေးဆိုင်အများစုဟာ ဆိုင်မဖွင့်ရဲတော့ဘဲ ပိတ်ထားရတဲ့အခြေအနေကို ရောက်ရှိနေတယ်လို့ ဒေသခံတွေက ပြောပါတယ်။ ဒါ့အပြင် မြို့ပေါ်မှာ ကျောင်းတက်နေတဲ့လူငယ်တွေလည်း ကိုယ့်ရွာကို ပြန်ပြေးနေရတယ်လို့ ၎င်းတို့က ပြောပါတယ်။

“အလုပ်တောင် မသွားရဲတော့ဘူး။ အိမ်ထဲက အိမ်ပြင်မထွက်ရဲဘူး။ လူတွေ တော်တော် စိတ်ဖိစီးနေကြပြီ၊ ဘာလုပ်ရမှန်းကို မသိတော့တာ”လို့ မိတ္ထီလာမြို့က လူငယ်က ပြောဆိုလိုက်ပါတယ်။