တိုက်ခိုက်ခံရတဲ့ ရန်ကုန်-ပြည်လမ်းပိုင်းနေရာကို စစ်တပ်စစ်ကြောင်းထိုးလာ

ဇွန်-၁၇၊၂၀၂၆။မိုမို/People's Spring

အာဏာသိမ်းစစ်တပ်အရာရှိတွေ တိုက်ခိုက်ခံရတဲ့ တောင်တွင်းကြီးမြို့နယ်က ရန်ကုန်-ပြည်လမ်းပိုင်းကို စစ်တပ်က စစ်ကြောင်းထိုးလာတယ်လို့ ဒေသခံစစ်ရေးသတင်းရင်းမြစ်တချို့က ပြောပါတယ်။

စစ်တပ်စစ်ကြောင်းက ရန်ကုန်-ပြည်လမ်းပိုင်းပေါ်က ပရပ်ကြယ်ရွာရဲစခန်းအနီး ရောက်နေတယ်လို့ ဆိုပါတယ်။

"အင်အား ၇၀ ကျော်ပါတယ်လို့ ကနဦး သိရတယ်။လက်ရှိ ရွာတွေက ဘုန်ကြီးကျောင်းတွေမှာ တပ်ဖြန့်ထားတယ်"လို့ ပုဏ္ဏ၀တီပြည်သူ့ကာကွယ်ရေးတပ်ဖွဲ့တာ၀န်ရှိသူ ကိုဗေဒါက ပြောပါတယ်။

အဲဒီစစ်ကြောင်းမှာ အမှတ်(၁၈)ကာကွယ်ရေးပစ္စည်းစက်ရုံ (ကပစ-၁၈ )နဲ့ အမှတ်(၇၀စစ်အခြေခံ
လေ့ကျင်ရေးတပ်က စစ်သားတွေပါဝင်တယ်လို့ အသိပေးပါတယ်။

"တိုက်ပွဲဖြစ်တဲ့ ရွာနီးစပ်ချုပ်ကို စစ်ကြောင်းပတ်ထိုးနေတာ။ပတ်မွှေနေတယ်။အရပ်သားတွေ ဖမ်းဆီးခံရတယ်လို့တော့ မကြားရသေးဘူး"လို့ တောင်တွင်းကြီးမြို့နယ် စစ်ရေးသတင်းရင်းမြစ်က ပြောပါတယ်။

ပြီးခဲ့တဲ့ ဇွန်လ ၁၅ ရက်က ရန်ကုန်-ပြည်လမ်းမကြီးပေါ် ကိုးပင်-ဆတ်သွား လမ်းပိုင်းတနေရာမှာ စစ်တပ်အရာရှိတွေပါတဲ့ ကား ၂စီးကို တော်လှန်ရေးတပ်တွေက ကြားဖြတ်တိုက်ခိုက်ခဲ့တာဖြစ်ပြီး ဗိုလ်ကြီးအပါအ၀င် ၄ဦး သေပြီး လက်နက်ခဲယမ်းတချို့ ရရှိခဲ့ပါတယ်။

တော်လှန်ရေးတပ်တွေရဲ့စုပေါင်း စစ်ဆင်ရေးမှာ စစ်တပ်က သေဆုံးခဲ့သူတွေထဲက ဗိုလ်ကြီးစောသန်းထွန်းဟာ တောင်တွင်းကြီးမြို့နယ်ထွေအုပ်ရုံးမှာ တာ၀န်ကျသူဖြစ်ပြီး တပ်မ(၈၈) လက်အောက်ခံတပ်ရင်းက ဖြစ်တယ်လို့ သိရပါတယ်။

ပြီးခဲ့တဲ့ မေလကလည်း တောင်တွင်းကြီးမြို့နယ်က ကပစ-၁၈ရဲ့ ဗိုလ်ကြီးနဲ့ စစ်သားတွေလိုက်ပါတဲ့ယာဉ်တန်းတွေ ကြားဖြတ်တိိုက်ခိုက်ခံရဖူးပါတယ်။

အဲဒါအပြင် ၂၀၂၆ ဇန်နဝါရီကလည်း နေပြည်တော် -တောင်တွင်းကြီးရထားလမ်းပိုင်းအနီးမှာ စစ်တပ်စစ်ကြောင်းကိုတိုက်ခိုက်မှုမှာ လေးဦးသေပြီး လက်နက်တွေရတယ်လို့ ပြည်သူ့ကာကွယ်ရေးတပ်ဖွဲ့-ပုဏ္ဏဝတီ(တောင်တွင်းကြီး)က ထုတ်ပြန်ထားပါတယ်။

(တိုက်ခိုက်ခံရတဲ့ စစ်ကောင်စီယာဥ်နဲ့ သိမ်းရခဲ့တဲ့ လက်နက်ခဲယမ်းအချို့အား တွေ့ရစဥ်။ ဓါတ်ပုံ-Nay Pyi Taw PDF)

CDF ဇိုဖေဌာနချုပ်ကို စစ်တပ်က တိုက်ခိုက်မှုတွေ ဆက်လုပ်လာနိုင်ဟု CNF ပြော

ဇွန် ၁၇၊ ၂၀၂၆။ ထားမြတ်/People’s Spring

ချင်းပြည်နယ်၊ ထန်တလန်မြို့နယ်အခြေစိုက် ချင်းဒေသကာကွယ်ရေးတပ်(CDF) ဇိုဖေ ဌာနချုပ်ကို စစ်တပ်က လေယာဉ်နဲ့ အပြင်းအထန် ဗုံးကြဲခဲ့သလို တိုက်ခိုက်မှုမျိုး အာဏာသိမ်းစစ်တပ်က ထပ်မံ လုပ်ဆောင်လာနိုင်တာကို တွက်ဆထားပြီးဖြစ်ကြောင်း ချင်းအမျိုးသားတပ်ဦး(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြောပါတယ်။

ချင်းပြည်ကောင်စီအဖွဲ့ဝင်ဖြစ်တဲ့ CDF ဇိုဖေ ဌာနချုပ်ကို စစ်တပ်က ဇွန်လ ၁၁ရက်မှာ တိုက်လေယာဉ်၊ Y12 လေယာဉ် စုစုပေါင်း လေယာဉ် ၈ စီးနဲ့ ဗုံးသီး အလုံး ၆၀ ကျော်ကြဲချတိုက်ခိုက်ခဲ့တာပါ။ အချိန်တနာရီခွဲအတွင်း အကြိမ်ပေါင်း ၁၅ကြိမ်ထက်မနည်း တိုက်ခိုက်ခဲ့တာဖြစ်ပြီး ဗုံးသီး ၆၀ ကျော်ထဲမှာ ပေါင် ၅၀၀ ဖျက်အားပြင်းဗုံး ၁၁လုံး အသုံးပြု တိုက်ခိုက်ခဲ့ဟု ဇိုဖေရမ် ကောင်စီက အသိပေးထုတ်ပြန်ထားပါတယ်။

စစ်တပ်ရဲ့ လေကြောင်းတိုက်ခိုက်မှုမှာ ဇိုဖေရန် ကျန်းမာရေးဌာန အတွင်းရေးမှူးဖြစ်သူ အမျိုးသမီး ၁ဦး ကျဆုံးခဲ့ပြီး ၃ဦး ဒဏ်ရာရရှိခဲ့ပါတယ်။ အခုလို ပြည်တွင်းပဋိပက္ခမှာ ရက်စက်ကြမ်းကြုတ်စွာ လေကြောင်းတိုက်ခိုက်မှုပြုလုပ်ခြင်းကို ပြင်းထန်စွာ ရှုတ်ချကြောင်း ဇိုဖေရမ်ကောင်စီ က ထုတ်ပြန်ပါတယ်။

အာဏသိမ်းစစ်တပ်ရဲ့ အခုလို လေယာဉ်တွေနဲ့ အပြင်းအထန် ဗုံးကြဲတာဟာ စစ်ခေါင်းဆောင် မင်းအောင်လှိုင်ရဲ့ အိန္ဒိယ ခရီးစဉ်မှာ ပြောသလို PDF အပါအဝင် ဒေသကာကွယ်ရေးတပ်တွေ ကို ဦးစွာ ရှင်းလင်းမယ်ဆိုတဲ့ ပြောဆိုချက်ကို ဖော်ဆောင်နေတာဖြစ်ကြောင်း ဆလိုင်းထက်နီက ပြောပါတယ်။

ဒါ့အပြင် ချင်းအမျိုးသားတပ်မတော်(CNA) အပါအဝင် အခြားတော်လှန်ရေးတပ်တွေ ရဲ့ ဌာနချုပ်တွေ အခုလို ပစ်မှတ်ထား တိုက်ခိုက်တာတွေ လုပ်ဖို့ စစ်အုပ်စုက မူလကတည်းက ချမှတ်ထားပြီးဖြစ်တာ တွက်လို့ရကြောင်းလည်း ဆလိုင်းထက်နီက ပြောပါတယ်။ စစ်တပ်ရဲ့ အခုလို တိုက်ခိုက်မှုတွေဟာ နယ်မြေစိုးမိုးရေး၊ အဓိက ကျတဲ့ လမ်းကြောင်းတွေ စိုးမိုးရေး ရည်ရွယ်ချက်ကို ဖော်ဆောင်ဖို့ ကြိုးပမ်းတာ ဖြစ်တယ်လို့ ဆလိုင်းထက်နီက ပြောပါတယ်။

“သူကတေ့ မြို့ကနေ တဆင့်မြို့နယ်ကို အဲဒီလိုမျိုး စိုးမိုးဖို့ဆိုတာ သူတို့ရဲ့ အရင်ကတည်းက ချပြီးသားဖြစ်တယ်။” လို့ ဆလိုင်းထက်နီက ပြောပါတယ်။

စစ်တပ်ရဲ့ ထိုးစစ်ဆင်မှု၊ စစ်ရေးလှုပ်ရှားမှုတွေအပြင် ပြင်ဆင်စရာရှိတာ ပြင်ဆင်ပြီး လက်လက် တွန်းလှန်သွားရမယ်လို့လည်း ဆလိုင်းထက်နီက ပြောပါတယ်။

စစ်တပ်ဟာလက်ရှိမှာ ဒရုန်းတွေသုံးပြီး စစ်မှုထမ်းတပ်သားသစ်တွေ ပျူစောထီးတွေ၊ ပြည်သူ့စစ်တွေ စတဲ့ အင်အားတွေ ရင်းပြီး လူလှိုင်းစစ်ဆင်ရေးတွေ ဖော်ဆောင်နေတာဖြစ်တာဖြစ်လို့ တော်လှန်ရေးဘက်ကလည်း အတက်နိုင်ဆုံး လုပ်စရာရှိတာ ဆက်လုပ်သွားမှာဖြစ်ကြောင်း ရှင်းပြပါတယ်။

(၂၀၂၆ ဇွန်လဆန်းက ချင်းပြည်နယ်ကို စစ်တပ်က တိုက်လေယာဉ်နဲ့ ဗုံးကြဲနေစဉ်။ ဓာတ်ပုံ - Screengrab)

မင်းတပ်မြို့နယ်ကို စစ်တပ်က လေယာဉ်နဲ့ ဗုံးအလုံး ၇၀ခန့် ကြဲတိုက်ခိုက်

ဇွန်-၁၇၊ ၂၀၂၆။ ထားမြတ်/People’s Spring

ချင်းပြည်နယ် မင်းတပ်မြို့နယ်အရှေ့ခြမ်း တနေရာကို အာဏာသိမ်းစစ်တပ်က ဒီကနေ့ ဇွန် ၁၇ရက် မနက်မှာ လေယာဉ်နဲ့ ဗုံးအလုံး ၇၀ ခန့် ကြဲချတိုက်ခိုက်ခဲ့ကြောင်း မင်းတပ်ဒေသခံက အသိပေးပါတယ်။

ဒီမနက် ၇နာရီကနေ စတင်ပြီး ၁နာရီကျော်အတွင်း စစ်တပ်က Y12 လေယာဉ်နဲ့ ၁ကြိမ် ဗုံးသီး ၄လုံးတွဲ ဗုံးတွေနဲ့ ၁၇ကြိမ် တိုက်ခိုက်ခဲ့တာလို့ ဆိုပါတယ်။

စစ်တပ်ဟာ မင်းတပ်မြို့နယ်ကို အခု ဇွန်လအတွင်းမှာ လေကြောင်းကနေတိုက်ခိုက်မှု နေ့စဉ်နီးပါး ပြုလုပ်နေတာဖြစ်ပါတယ်။

မင်းတပ်မြို့ ပြန်ထိန်းချုပ်ဖို့ စစ်တပ်က မေလကုန်မှာ စတင်ထိုးစစ်ဆင်ခဲ့ရာချင်းတော်လှန်ရေး ပူးပေါင်းတပ်တွေရဲ့ ခုခံမှုကြောင့် မြေပြင်တိုက်ပွဲတွေ ဖြစ်ပွားနေတာပါ။

စစ်တပ်ဟာ မင်းတပ်တိုက်ပွဲအတွင်း လေကြောင်း ပစ်ကူပေးတိုက်ခိုက်တာတွေရှိသလို တဖက်မှာလည်း တိုက်ပွဲဖြစ်ပွားမှုမရှိတဲ့ ပြည်သူလူထုနေအိမ်တွေကို ပစ်မှတ်ထား တိုက်ခိုက်ဖျက်ဆီးတာတွေလည်း လုပ်ဆောင်ခဲ့တယ်လို့ မင်းတပ်ဒေသခံက ပြောပါတယ်။

ဒေသခံရဲ့ အသိပေးချက်အရ ဇွန်လ ၁၆ရက် ညက မင်းတပ်မြို့ပေါ် တနေရာကို ၂ကြိမ်၊ ဇွန် ၁၆ရက်မနက်က မင်းတပ်မြို့နယ် အရှေ့ခြမ်း တနေရာကို ၄ကြိမ်၊ ဇွန်လ ၁၅ရက်က မင်းတပ်မြို့ အရှေ့ခြမ်း တနေရာကို ၄ကြိမ်၊ မနက်ပိုင်းမှာ ၃ကြိမ်၊ ဇွန်လ ၁၄ရက်က ၅ကြိမ်၊ ဇွန်လ ၁၃ရက်က ၅ကြိမ်၊ ဇွန်လ ၁၂ရက်မှာ ၃ကြိမ် ဗုံးကြဲတိုက်ခိုက်ခဲ့ပါတယ်။

ဒါကြောင့်ဇွန်လ ၁၂ရက်ကနေ ဒီကနေ့မနက်အထိ စစ်တပ်က မင်းတပ်မြို့နယ်ကို လေကြောင်း တိုက်ခိုက်မှု အကြိမ်ပေါင်း ၄၀ကျော် ပြုလုပ်ခဲ့ပြီး ကြဲချတိုက်ခိုက်ရာမှာလည်း ဖျက်အားပြင်း ပေါင် ၅၀၀ ဗုံးတွေကိုပါအ သုံးပြုခဲ့တာ တွေ့ရပါတယ်။

ချင်းပြည်နယ်တောင်ပိုင်းက မင်းတပ်နဲ့ ကန်ပက်လက်မြို့ပြန်ရဖို့ စစ်တပ်က ထိုးစစ်ဆင်နေတာကို ချင်းတောင်ပိုင်းဒေသတခုလုံးထိန်းချုပ်ထားတဲ့ ချင်းပြည်သူ့အစည်းအရုံး(CPU/CPA)နဲ့ မဟာမိတ်တွေက ခုခံနေတာဖြစ်ပါတယ်။

“စစ်ကော်မရှင်တပ်တွေကတော့ နယ်မြေတွေ ပြန်သိမ်းတယ် နယ်မြေတွေ ပြန်ချဲ့ဖို့ လုပ်တဲ့နေရာမှာ အရင်ကထက်ပိုပြီးမှ ကြမ်းတမ်းလာတယ်။ အရင်ကထက် ပို မိုက်ရူးရဲဆန်လာတယ်။ အရင်ကထက် ပိုပြီးမှ သွေးရူးသွေးတန်းဆန်လာတာမျိုးတွေ့ရပါတယ်။ သူတို့ လေကြောင်း တိုက်ခိုက်တဲ့အခါမှာဖြစ်စေ မြေပြင်စစ်ကြောင်းထိုးတဲ့ အခါမှာ ဖြစ်စေပေါ့နော် အကုန်လုံးကို မဲမဲမြင်ရာ သတ်တာ ဖြတ်တာ မီးရှို့တာတွေပေါ့နော်။ ပြီးတော့မှ သူတို့ရဲ့ ပြည်သူ့စစ်ကိုသော်လည်းကောင်း တခြား စစ်ကော်မရှင်တပ်တွေမှာ တချို့ အခြေအနေတွေမှာ မူးယစ်ဆေးဝါးတွေ သုံးပြီးမှ စိတ်ကိုပြောင်းလဲစေတဲ့ ဆေးတွေ အဲဒါမျိုးတွေ သုံးပြီးမှ အလွန်အကျွံထိုးတက်တဲ့ ပုံစံမျိုးတွေ တွေ့ရပါတယ်။” လို့ CPU/CPA အထွေထွေအတွင်းရေးမှူး ဆလိုင်းယောမာန်က ဇွန် ပထမပတ်မှာ ပြောပြထားပါတယ်။

CPU/CPA အနေနဲ့ စစ်ရေးသတင်းလုံခြုံရေးအရ တိုက်ပွဲအခြေအနေတွေ အသိပေးထုတ်ပြန်တာကို လိုအပ်မှလုပ်ဆောင်သွားမယ်လို့လည်း အသိပေးထားပါတယ်။

ဒါပေမဲ့ စစ်တပ်အနေနဲ့ လေယာဉ်သုံးရင် သူတို့ အကြပ်အတည်းကြုံနေရတာ မှန်းဆနိုင်ကြောင်းလည်း ဆလိုင်းယောမာန်က ပြောပါတယ်။

“ချင်းပြည်တောင်ပိုင်းထိုးစစ်မှာတော့ ကျနော်တို့အတွက် အခွင့်အရေးအများဆုံး တပ်လန်သွားအောင် လုပ်ဖို့ အခွင့်အရေးအများဆုံးနေရာ ဒီနေရာပဲဖြစ်တယ်။ အဲဒါကို ကျနော်တို့ ၀ိုင်းဝန်းအားစိုက်ကြမယ်ဆိုရင် တကယ်တပ်လန်သွားအောင်လုပ်နိုင်ဖို့ ဖြစ်နိုင်ခြေအများဆုံး ဒီနေရာပဲရှိတယ် ဆိုတာပေါ့။ ဒါကို အားလုံးအားစိုက်ကြဖို့လိုမယ်” လို့ ဆလိုင်းယောမာန်က ပြောပါတယ်။

(၂၀၂၆ ဇွန်လ ၁၄ရက်က မင်းတပ်မြို့နယ် အရှေ့ခြမ်းက တနေရာကို စစ်တပ်က လေကြောင်းကနေ ဗုံးကြဲအပြီး ဒေသခံတွေရဲ့ နေအိမ်တွေ ပျက်စီးနေစဉ်။ ဓာတ်ပုံ - Ĥkl Mindat)

ဝက်လက်နယ် စစ်တပ်လေကြောင်းတိုက်မှု ကိုယ်ဝန်သည်မိခင်အပါအဝင် အနည်းဆုံး ၃ဦးသေဆုံး

ဇွန်-၁၇၊ ၂၀၂၆။ ကတ်သရင်းနှင်း/People's Spring

စစ်ကိုင်းတိုင်း၊ ဝက်လက်မြို့နယ် ညောင်ပင်ကြီးတောရွာကို စစ်တပ်က လေကြောင်းတိုက်ခိုက်ခဲ့တာကြောင့် ကိုယ်ဝန်သည်မိခင်အပါအဝင် အမျိုးသမီး ၃ဦး သေဆုံးကာ ဒဏ်ရာရသူ အများအပြားရှိတယ်လို့ ဒေသခံတွေက ပြောပါတယ်။

ဇွန်လ ၁၇ ရက် ဒီနေ့ နေ့လယ်ပိုင်းမှာ စစ်တပ်က ဂျက်ဖိုက်တာနဲ့ ညောင်ပင်ကြီးတောရွာကို အကြောင်းမဲ့ လေကြောင်းတိုက်ခိုက်ခဲ့တာဖြစ်ပြီး ကိုယ်ဝန်သည်မိခင်နဲ့ သူ့ရဲ့ သမီးငယ်၊ နောက်ထပ်အမျိုးသမီးတစ်ဦးတို့ သေဆုံးသွားပြီး ထိခိုက်ဒဏ်ရာရသူ အများအပြားရှိကာ ဒဏ်ရာပြင်းထန်သူတွေလည်းရှိတယ်လို့ သိရပါတယ်။

"ကိုယ်ဝန်သည်အမျိုးသမီးနဲ့ သူ့ရဲ့ သမီးဖြစ်သူရယ်၊ နောက်ထပ်အမျိုးသမီးရယ်၊ သုံးဦး သေဆုံးတယ်။ အဲဒီမှာ ကိုယ်ဝန်သည်အမျိုးသမီးရဲ့ သမီးက ခေါင်းပြတ်သွားတာ။ ခေါင်းကို ဖောက်မှန်သွားတာ။ သားအမိ၂ယောက် ဖက်လျက်လေး သေသွားတာ။ နောက်ထပ် အမျိုးသမီးလည်းခေါင်းပြတ်တယ်။ ဗိုက်ပွင့်သွားတဲ့သူလည်း ရှိသေးတယ်။ သေတာကတော့ ဗိုက်ထဲက ကလေးရောဆို ၄ယောက်ပေါ့"လို့ ဒေသခံတစ်ဦးက ပြောပြပါတယ်။

နောက်ဆက်တွဲသတင်းအရ သေဆုံးသူ ထပ်တိုးပြီး အရေအတွက်ကို People’s Springက ဆက်လက်စုံစမ်းနေဆဲပါ။

စစ်တပ်က ဝက်လက်မြို့နယ်ကို အကြောင်းမဲ့ ဆက်တိုက်ဗုံးကြဲနေပြီး မနေ့ကလည်း အသေခံဒရုန်းတွေနဲ့ ဗုံးကြဲခဲ့တာမို့ မိခင်ဖြစ်သူ သေဆုံးပြီး သား၊သမီးနှစ်ဦး ထိခိုက်ဒဏ်ရာရခဲ့ပါတယ်။

ကပစ-၂၁နဲ့ လေကြောင်းရန်ကာကွယ်ရေးတပ် ယာဉ်တန်းတိုက်ခံရ၊ ဗိုလ်ကြီးအပါအ၀င် ၁၀ ဦး သေဆုံး

ဇွန် -၁၇၊၂၀၂၆။ဖိုးသား/People's Spring

မကွေးတိုင်း၊ဆိပ်ဖြူမြို့နယ်မှာ စစ်တပ်ရဲ့ အမှတ်(၂၁)ကာကွယ်ရေးပစ္စည်းစက်ရုံ (ကပစ-၂၁)နဲ့ လေကြောင်းရန်ကာကွယ်ရေးတပ် ယာဉ်တန်းတိုက်ခံရပြီး ဗိုလ်ကြီးအပါအ၀င် ၁၀ ဦးသေဆုံးတယ်လို့စစ်ရေးသတင်းရင်းမြစ်တချို့က လူထုနွေဦးကို ပြောပါတယ်။

မနေ့က(ဇွန် ၁၆ ရက်) ညနေပိုင်းက ဆိပ်ဖြူမြို့ပေါ်က ထွက်လာတဲ့ စစ်ကောင်စီတပ်သား ၂၀ ဦးခန့်ပါတဲ့ ၆ ဘီးကား ၁စီးနဲ့ ဗိုလ်ကြီး ၁ဦး လိုက်ပါလာတဲ့ အိမ်စီးကားကို ဆိပ်ဖြူမြို့အထွက်မှာ တော်လှန်ရေးပူးပေါင်းအဖွဲ့တွေက ကြားဖြတ်တိုက်ခိုက်ခဲ့ကြတယ်လို့ ဆိုပါတယ်။

"ကပစ(၂၁)နဲ့ အမှတ်(၉)လေကြောင်းရန်တပ်က ပူးပေါင်းပြီး ထွက်လာတာကို ကြားဖြတ်တိုက်တာ "လို့ ဆိပ်ဖြူမြောက်ပိုင်း (NSP) ပြည်သူ့ကာကွယ်ရေးအဖွဲ့ (ပကဖ) တာ၀န်ရှိသူ ကိုသူရိန်က လူထုနွေဦးကို ပြောပါတယ်။

တိုက်ခိုက်မှုအတွင်း MA1 ၅လက်၊ MA2 ၁လက်၊ MA3 ၁လက်၊ MA5 ပစ္စတို ၁လက်၊ ကျည်အိမ် ၁၈ခု၊ ၅.၅၆ ကျည် ၂၄၀တောင့်၊ လက်ပစ်ဗုံး ၂လုံး နဲ့ဆက်စပ်ပစ္စည်းတွေ သိမ်းဆည်းရရှိတယ်လို့ အသိပေးပါတယ်။

"မနေ့က ခံလိုက်ရတော့ ဒီနေ့ မြို့အနီးနားတဝိုက်ကို ၀င်မွှေနေကြတယ်။အင်အား ၂၀၀ လောက်ရှိတယ်"လို့ ဆိပ်ဖြူမြို့နယ်တော်လှန်ရေးတပ်ဖွဲ့၀င်တစ်ဦးက ပြောပါတယ်။

ဆိပ်ဖြူမြို့နယ်မှာ စစ်တပ်ရဲ့ကာကွယ်ရေးပစ္စည်းရုံး ကပစ (၂၁၊ ၂၂) နဲ့ အမှတ်(၉)လေကြောင်းရန်ကာ ကွယ်ရေးကွပ်ကဲမှုစစ်ဆင်ရေးဌာနချုပ်(လစခ) တို့ရှိပါတယ်။

အမှတ်(၂၁) ကာကွယ်ရေးပစ္စည်းစက်ရုံ(ကပစ -၂၁)က လေတပ်သုံးဗုံးတွေထုတ်ပြီး အမှတ် (၂၂) ကာကွယ်ရေးပစ္စည်းစက်ရုံ(ကပစ ၂၂ )က လက်နက်တွေ ထုတ်နေတာဖြစ်ပါတယ်။

အခု ဇွန်လဆန်းပိုင်းကစပြီး စစ်တပ်က တပ်မ (၅၅၊၈၈၊၉၉)နဲ့ (၁၀၁) ၄ခုအထိသုံးပြီး ဆိပ်ဖြူမြို့နယ် ကပစ(၂၂)စက်ရုံကို အင်အားဖြည့်နေတယ်လို့ မြေပြင်သတင်းရင်းမြစ်တွေက ပြောထားပါတယ်။

အဲဒီအင်အား ၁,၅၀၀ ဝန်းကျင်ရှိတဲ့ စစ်ကြောင်းဟာ ပေါက်မြို့နယ်နဲ့ ဆောမြို့နယ် တွေကို ဖြန့်ခွဲရောက်ရှိနေပြီး တချို့က ဆိပ်ဖြူမြို့နယ်ထဲမှာပဲ ရှိသေးတယ်လို့ သိရပါတယ်။

(တိုက်ခိုက်မှုအတွင်း သိမ်းရတဲ့ လက်နက်ခဲယမ်းတွေနဲ့ တော်လှန်ရေးရဲဘော်တွေ။ ဓာတ်ပုံ - ပကဖ အသံ)

စစ်မှုထမ်းဖို့ပေါ်တာဆွဲခံထားရသူ ၇ဦး ရေဦးပကဖထံ ထွက်ပြေးလာ

ဇွန်-၁၇၊၂၀၂၆။စိုင်းနောင်/People's Spring

စစ်မှုထမ်းဖို့အတွက် စစ်တပ်က ပေါ်တာဆွဲဖမ်းဆီးထားသူ ၇ဦး ထွက်ပြေးလွတ်မြောက်လာတဲ့အတွက် ကူညီစောင့်ရှောက်ထားတယ်လို့ ရေဦးမြို့နယ်ပြည်သူ့ကာကွယ်ရေးအဖွဲ့(ပကဖ)က သတင်းထုတ်ပြန်ပါတယ်။

စစ်မြေပြင်ကို လိုက်ဖူးတဲ့သူတချို့အပါအဝင် သက်လတ်ပိုင်းအမျိုးသား ၇ဦးဟာ တော်လှန်ရေးတပ်တွေထံ ချိတ်ဆက်ပြီး ထွက်ပြေးလာတာလို့ သိရပါတယ်။

" ၆ယောက်က ၁စု၊ ၁ယောက်က ၁စု ထွက်ပြေးလာတာပါ။ အိမ်‌ထောင်ရှိသူတချို့လည်း ပါတယ်။ သူတို့က သူတို့ဒေသကို ပြန်သွားလို့ မရတော့ဘူးဆိုတော့ လောလောဆယ် ကျတော်တို့ ထိန်းချုပ်ဒေသမှာပဲ အလုပ်အကိုင်ရှာပေးရမှာပေါ့"လို့ ရေဦးမြို့နယ်ပြည်သူ့ကာကွယ်ရေးအဖွဲ့က တာဝန်ရှိသူတစ်ဦးကပြောပါတယ်။။

ထွက်ပြေးလာသူတွေဟာ အသက် ၃၀ခန့်အရွယ်အမျိုးသားတွေဖြစ်ပါတယ်။ သူတို့ထဲမှာ စစ်ကိုင်းတိုင်းအတွင်း စစ်ကောင်စီရဲ့လဝကရုံးမှာ မှတ်ပုံတင်သွားလုပ်ရင်းစစ်မှုထမ်းစုဆောင်းခံရသူ၊ အိမ်မှာနေရင်းညဘက် ဝင်ဖမ်းပြီးစစ်သားစုဆောင်းခံရသူတွေပါတယ်လို့ သိရပါတယ်။

စစ်တပ်က စစ်မှုထမ်းဥပဒေကိုအသုံးပြုပြီး ဒေသပေါင်းစုံမှာ အတင်းအကျပ်စစ်သားစုဆောင်းတာတွေပြုလုပ်နေပါတယ်။ တော်လှန်ရေးတပ်ဖွဲ့တွေထိန်းချုပ်ထားတဲ့မြို့နယ်တွေကို စစ်တပ်က စစ်မှုထမ်းသင်တန်းဆင်းအင်အားတွေအများအပြားသုံးပြီး စစ်ကြောင်းထိုးနေပါတယ်။

စစ်တပ်ဟာ စစ်မှုထမ်း အပတ်စဥ် (၂၆)ကို စတင်နေပြီဖြစ်ကြောင်း သိရပါတယ်။

(စစ်မှုထမ်းဖို့ စစ်တပ်ရဲ့ ခေါ်ဆောင်ခံရသူတွေကို တွေ့ရစဉ်။ ဓာတ်ပုံ - စစ်ကောင်စီ)

ရွှေကူမှာ စစ်တပ်က တော်လှန်ရေးတပ်အသွင်ယူ ပုံမှားရိုက်နေလို့ ပြည်သူတွေ သတိနဲ့သွားလာနေထိုင်ဖို့ ရွှေ့ကူ PDF သတိပေး

ဇွန်-၁၇၊ ၂၀၂၆။ ထားမြတ်/People’s Spring

ကချင်ပြည်နယ်၊ ရွှေကူမြို့နယ်မှာ အာဏာသိမ်းစစ်တပ်က ဒေသတွင်း တော်လှန်ရေးတပ်ဖွဲ့တွေ ဖြစ်တဲ့ ကချင်လွတ်လပ်ရေးတပ်မတော်(KIA)၊ ကချင်ဒေသ ပြည်သူ့ကာကွယ်ရေးတပ်(KPDF) တပ်ဖွဲ့တွေရဲ့ ဝတ်စုံတွေ နဲ့ သတင်းရယူစုံစမ်းတာ၊ ပုံမှားရိုက်တာတွေ လုပ်ဆောင်နေကြောင်း ရွှေကူ KPDFက ဒီကနေ့ ထုတ်ပြန် သတိပေးပါတယ်။

စစ်တပ်ဟာ ရွှေကူမြို့နယ်ကို အင်အားအလုံးအရင်းနဲ့ စစ်အင်အားဖြည့်တင်းတာ စစ်ရေးလှုပ်ရှားတာတွေ ပြုလုပ်နေတာဖြစ်ပါတယ်။

“ အကြမ်းဖက်စစ်ကော်မရှင် တပ်သားများသည် KIA/ K-PDF ဝတ်စုံများကို ဝတ်ဆင်အသုံးပြုကာ တိုက်ပွဲဖော်ဆောင်ခြင်း၊ စစ်ရေးလှုပ်ရှားခြင်းများလည်း ပြုလုပ်လျက်ရှိပါသည်။ အကြမ်းဖက်စစ်ကော်မရှင်တပ်၏ ရိုင်းစိုင်းယုတ်မာမှုနှင့် ရက်စက်ကြမ်းကြုတ်မှုကို မိဘပြည်သူများ အနေဖြင့် မြင်ကြားသိရှိ ခံစားနေရဆဲဖြစ်သည်။ ထို့ကြောင့် မိဘပြည်သူများအနေဖြင့် အသိနှင့်သတိ ဆင်ခြင်ကာ သွားလာနေထိုင်ကြရန်၊ အကြမ်းဖက်စစ်ကော်မရှင်တပ်နှင့် ဝေးဝေးနေကာ ရှောင်ရှားနေထိုင်ကြရန် လေးစားစွာ အသိပေးအပ်ပါသည်” လို့ ရွှေကူ KPDF ရဲ့ ထုတ်ပြန်ချက်မှာ ပါရှိပါတယ်။

စစ်တပ်ရဲ့ တော်လှန်ရေးတပ်အသွင်ဆောင်လုပ်ဆောင်မှုဟာ ကချင်ဒေသသာမက အခြားဒေသတွေမှာလည်း ရှိခဲ့ပြီး တော်လှန်ရေးတပ်တွေကို ပုံဖျက်တာ၊ ပြည်သူအထင်မှားအောင်လုပ်ဆောင်တာတွေရှိခဲ့ပါတယ်။

“KIA နဲ့ PDF အပေါ် ပြည်သူတွေ အထင်မှားလာအောင်ညယုံကြည်မှုနည်းလာအောင် စကစက နည်းလမ်းပေါင်းစုံကြိုးပမ်းနေတယ်လို့မြင်တယ်” လို့ ကချင်သတင်းရင်းမြစ်က ရွှေကူနယ်အတွင်း စစ်တပ်ရဲ့ လုပ်ရပ်အပေါ် မှတ်ချက်ပြုပါတယ်။

ဒါ့အပြင် KIA သိမ်းထားတဲ့ မဘိမ်းမြို့နဲ့ KIA ပူးပေါင်းတပ်က မြို့သိမ်းစစ်ဆင်ရေး ဖော် ဆောင်နေတဲ့ ကချင်ပြည်နယ်၊ ဗန်းမော်မြို့ကို ထိန်းချုပ်နိုင်ဖို့ စစ်တပ်က စစ်ရေးလှုပ်ရှားမှု တိုးမြှင့်လုပ်ဆောင်လျက်ရှိပါတယ်။

အခြားသတင်းကချင်စစ်ရေးသတင်းရင်းမြစ်ကလည်း စစ်ကောင်စီဟာ ဗန်းမော်ကို စစ်ကူပို့ဖို့ ကြိုးပမ်းနေရာ ရွှေကူဒေသမှာ စစ်ကြောင်းသုံးကြောင်း လှုပ်ရှားနေပြီး စစ်ကြောင်းတကြောင်းကဗန်းမော်ကိုဦးတည်နေတာလို့ ပြောပါတယ်။

စစ်တပ်ဟာ ရွှေကူ ၊ ဗန်းမော်မြို့ကို ပြန်ထိန်းချုပ်နိုင်ဖို့ မဘိမ်းမြို့နယ် ငါးအိုးဒေသကနေ စစ်ကြောင်းအများအပြားနဲ့ စစ်အင်အားဖြည့်တင်းနေလို့ မေလဆန်းကနေ အခုထိ ငါးအိုး-ရွှေကူကြား တိုက်ပွဲတွေ ပြင်းထန်နေပါတယ်။

စစ်တပ်ဟာ ရှမ်းမြောက်က KIA သိမ်းထားတဲ့ နမ့်ဖက်ကာ နဲ့ လက်ရှိ ကိုးကန့်တပ် နေရာယူထားတဲ့ ကွတ်ခိုင်၊ တအာင်းတပ် နေရာယူထားတဲ့ နမ့်ခမ်း စတဲ့ဒေသတွေ ပြန်ထိန်းချုပ်နိုင်ဖို့ ကြိုးစားနေကြောင်း ကချင်သတင်းရင်းမြစ်က ပြောပါတယ်။

(ကချင်ပြည်နယ်အတွင်း လှုပ်ရှားနေတဲ့ KPDF တပ်ဖွဲ့အဝင်အချို့ကို ၂၀၂၅ မေလအတွင်းက တွေ့ရစဉ်။ ဓာတ်ပုံ- Sirinda)

စစ်မှုထမ်းစုဆောင်းခံရသူ ၇ဦး ပျူတွေကို ရိုက်နှက်ပြီး ထွက်ပြေးလွတ်မြောက်လာ

ဇွန်-၁၇၊ ၂၀၂၆။ ဖိုးသား/People's Spring

စစ်ကိုင်းတိုင်း၊ ရေဦးမြို့နယ်မှာ စစ်မှုထမ်းစုဆောင်းခံရသူတွေက ပျူစောထီးတွေကို ရိုက်နှက်ပြီး ထွက်ပြေးလွတ်မြောက်လာတယ်လို့ သတင်းရရှိပါတယ်။

လွတ်မြောက်လာတဲ့ စစ်မှုထမ်းစုဆောင်းခံရသူ ခုနှစ်ဦးကို ကူညီစောင့်ရှောက်ထားတယ်လို့ ရေဦးမြို့နယ် ပြည်သူ့ကာကွယ်ရေးအဖွဲ့(ပကဖ)တာ၀န်ရှိသူက ဆိုပါတယ်။

"ပျူအစောင့် သုံးယောက်ကို ရိုက်နှက်ပြီး ထွက်ပြေးလာတာ။ ဖြစ်စဉ်က အခုလ ၁၄ ရက်နေ့က”လို့ သူက ပြောပါတယ်။

စစ်မှုထမ်းစုဆောင်းခံရသူတွေကို ရေဦးမြို့ပေါ် အထက ၂ မှာ စစ်တပ်က ထားရှိပြီး အဲဒီကတဆင့် အနောက်မြောက်တိုင်း စစ်ဌာနချုပ် (နမခ)ကို ပို့ဆောင်တယ်လို့ အသိပေးပါတယ်။

ထွက်ပြေးလွတ်မြောက်လာသူတွေထဲမှာ မှတ်ပုံတင်လုပ်ရင်း ဖမ်းဆီးခံရတာ၊ ခရီးသွားရင်း ဖမ်းခံရတာနဲ့ နေအိမ်ပေါ်တက်ပြီး စစ်မှုထမ်းစုဆောင်းခံရသူတွေ ဖြစ်တယ်လို့ သိရပါတယ်။

"တစ်ယောက်က ရေဦးမြို့မှာ မှတ်ပုံတင်သွားလုပ်ရင်းအဖမ်းခံရ။ နောက်တစ်ယောက်က ခရီးသွားရင်း စစ်ကိုင်းမှာ ကားပေါ်က ဆွဲချ ခံရ။ကျန်ငါးယောက်က အိမ်ထဲအထိဝင်ရောက်ပြီး ပေါ်တာအဆွဲခံရတာ"လို့ လွတ်မြောက်လာတဲ့ စစ်မှုထမ်းစုဆောင်းခံရသူခုနှစ်ဦး အကြောင်းကို ရေဦး ပကဖ တာ၀န်ရှိသူက ရှင်းပြပါတယ်။

၂၀၂၄ ခုနှစ် ဖေဖော်ဝါရီလကစပြီး ပြည်သူ့စစ်မှုထမ်းဥပဒေကို အာဏာသိမ်းစစ်တပ်က အသက်သွင်းခဲ့ပြီးနောက် အပတ်စဉ်တစ်ခုကို လူ ၅,၀၀၀ နှုန်းနဲ့ အဓမ္မတပ်သားသစ်စုဆောင်းမှုက လက်ရှိမှာ အပတ်စဉ် ၂၅အထိ ရောက်နေပြီဖြစ်ပါတယ်။

(အဓမ္မစစ်မှုထမ်းဥပဒေနဲ့ စုဆောင်းခံရသူတွေကို တွေ့ရစဉ်(ပုံဟောင်း)။ ဓာတ်ပုံ - စကစ)

ကျောက်တော်မြို့ကို စစ်တပ်က လေယာဉ်အုပ်စုနဲ့ ဗုံးကြဲ၊ ကလေးငယ်အပါအဝင် ပြည်သူ ၁၂ ဦး သေဆုံး

▪️ပြည်သူ ၂၀ နီးပါးဒဏ်ရာရ၊ သေဆုံးသူ ထပ်တိုးနိုင်ဟုဆို

ဇွန် ၁၇၊ ၂၀၂၆။ ခိုင်မြတ်/ People's Spring

ရခိုင်ပြည်နယ်၊ ကျောက်တော်မြို့ကို စစ်တပ်က ဒီကနေ့ ညနေပိုင်းမှာ ဂျက်ဖိုက်တာ ၅ စီးနဲ့ ၁နာရီနီးပါးကြာ ဗုံးပတ်ကြဲ တိုက်ခိုက်ခဲ့လို့ ကလေးငယ်အပါအ၀င် အရပ်သား ၁၂ ဦး သေဆုံးပြီး ၂၀ နီးပါး ဒဏ်ရာရခဲ့တယ်လို့ ဒေသခံတွေက ပြောပါတယ်။

ဒီနေ့ ဇွန်လ ၁၇ ရက် ညနေ ၂ နာရီ ၅၀ မိနစ်ဝန်းကျင်ကနေ ၃ နာရီ ၄၅ မိနစ်၀န်းကျင်အထိ မြို့ရှိ လမ်းမတော်၊ ပိုက်သည်၊ ရွာမရပ်ကွက်တို့နဲ့ ဂစ္ဆပနဒီတံတားအောက်ခြေတလျှောက်တို့ကို ဗုံးအလုံးရေ ၁၀ ကျော် ကြဲချခဲ့တာပါ။

"အခုထိ သိရတာ သေတာ ၁၂ယောက်၊ ဒဏ်ရာရတာ ၂၀နီးပါးရှိပြီ၊ အသေအပျောက်များတော့ အရေအတွက် အတိအကျမသိသေးဘူး။ အထိအခိုက် တော်တော်များတယ်"လို့ ကျောက်တော်မြို့ခံ လူငယ်တစ်ဦးက ပြောပါတယ်။

အာဏာသိမ်းစစ်တပ်ဟာ ပိုက်သည်ရပ်ကွက်ရှိ ဈေးဆိုင်တွေ၊ ကုန်တွေရှိတဲ့ ယာယီဈေးနဲ့ လူနေရပ်ကွက်တွေကို ဗုံးကြဲခဲ့တာဖြစ်ပြီး အရပ်သားပြည်သူတွေ သေဆုံးရတဲ့အပြင် ဆိုင်ခန်းနဲ့ လူနေအိမ်တွေ မီးလောင်ကျွမ်းခဲ့တယ်လို့ ဆိုပါတယ်။

"ခေါင်းထက်မှာ ဘယ်နှစ်စီးမှန်းမသိဘူး ပတ်လိုက် ကြဲလိုက် ကြဲချသွားတာ။ ကြောက်တာ ငိုတောင်ငိုကြတယ်၊ အခုလောက် ကြောက်ဖို့ကောင်းတာ မကြုံဖူးသေးဘူး။ ဆိုင်က အလုပ်သမားတွေ သေသွားတယ်။ ဒဏ်ရာရတာလည်း မနည်းဘူး၊ ခြေပြတ်သူပြတ်၊ ပေါင်ထိသူထိနဲ့" လို့ ပိုက်သည်ရပ်ကွက်မှ အမျိုးသမီးတစ်ဦးက ပြောပါတယ်။

လက်တလောမှာ ဗုံးကြဲလို့ မီးလောင်သွားတဲ့ နေအိမ်၊ ဆိုင်ခန်းတွေကို မီးငြှိမ်းသတ်နေပြီး အသေအပျောက်တွေကိုလည်း ကောက်ယူ၊ ပြုစုနေတယ်လို့ သိရပါတယ်။

"လမ်းမတော်ရပ်ကွက်က မြစ်ဟိုဘက်မှာဆိုတော့ သေချာမသိရသေးဘူး။ တမြို့လုံးကို ကြဲသွားတာဆိုတော့ အသေအပျောက်မရှိရင်တောင် နှစ်ဆယ်၊ သုံးဆယ် ရှိမယ်ထင်တယ်"လို့ ကျောက်တော်မြို့မှာ နေထိုင်တဲ့ နောက်ထပ်ဒေသခံတစ်ဦးက ပြောပါတယ်။

အာဏာသိမ်းစစ်တပ်ဟာ ပြီးခဲ့တဲ့ ဇွန်လ ၁၅ ရက်ကလည်း ဂွမြို့နယ်က ကျိန္တလီမြို့ ၊ရမ္မာကျွန်းကျေးရွာကို ဗုံးကြဲခဲ့တာကြောင့် အရပ်သား ၂ဦး သေဆုံးပြီး ကလေးငယ်အပါအ၀င် ရှစ်ဦး ဒဏ်ရာရခဲ့ပါတယ်။

စစ်တပ်ဟာ တိုက်ပွဲတွေအတွင်း အထိနာတိုင်း အခုလိုမျိုး အရပ်သားတွေကို ဗုံးကြဲတိုက်ခိုက်လေ့ရှိပြီး ဒါဟာ စစ်ရာဇ၀တ်မှုကို ပြောင်ပြောင်တင်းတင်း ချိုးဖောက်ရာ ရောက်တယ်လို့ AA ပြောခွင့်ရ ဦးခိုင်သုခက ပြောထားပါတယ်။

ရခိုင်ပြည်နယ်မှာ အခုရက်နောက်ပိုင်း ဂျက်တိုက်လေယာဉ် သုံးစီး (သုံးစီးအထက်)နဲ့ ကင်းထောက်လေ ယာဉ်တွေ တပြိုင်တည်းသုံးပြီး လေကြောင်းတိုက်ခိုက်မှုတွေ အရင်ကထက် ပြင်းပြင်းထန်ထန် လုပ်လာတာကြောင့် လေကြောင်းအန္တရာယ်ကို အထူးသတိထားကြဖို့ AA က အသိပေးထားပါတယ်။