(ကချင်လွတ်လပ်ရေးတပ်မတော်(KIA)က ရဲဘော်တွေကို တွေ့ရစဉ်။ ဓာတ်ပုံ - AFP)

ထန်တလန်မှာ စစ်တပ် အင်အားဖြည့်ထားလို့ တိုက်ပွဲကြီးတွေ ဖြစ်လာနိုင်တယ်လို့ CNA သတိပေး

ဇွန် ၁၆၊ ၂၀၂၆။ ထားမြတ်/People’s Spring

ချင်းပြည်နယ်၊ ထန်တလန်မြို့နယ်မှာ အာဏာသိမ်းစစ်တပ်က အင်အားတွေ ဖြည့်တင်းထားလို့ တိုက်ပွဲတွေ ဖြစ်ပွားနိုင်ကြောင်း ချင်းအမျိုးသားတပ်မတော်(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြောပါတယ်။

ဟားခါးမြို့ကနေ အင်အား ၂၅၀ လောက်ပါတဲ့ စစ်တပ်ဟာ ဟားခါးနဲ့ ထန်တလန်မြို့နယ်ကြားရှိ မူလ တပ်တွေနဲ့ပေါင်းပြီး ထန်တလန်မြို့ကို အင်အားဖြည့်ဖို့ ကြိုးပမ်းလာလို့ ဇွန်လ ပထမပတ်မှာ ချင်းတော်လှန်ရေးတပ်တွေနဲ့ တိုက်ပွဲဖြစ်ခဲ့ပါတယ်။ ဇွန်လ ၅ရက်နဲ့ ၆ရက် တိုက်ပွဲတွေမှာ စစ်တပ်က အထိနာပေမယ့် ထန်တလန်မြို့ကို ဝင်ရောက်နိုင်ခဲ့ပြီး လက်ရှိမှာ စစ်ရေးတင်းမာနေတယ်လို့ ပြောပါတယ်။

" အခု နှစ်ဖက်တပ်က တပ်ဆိုင်ထားတာပေါ့။ ဆိုင်ထားပြီး သူတို့က တခါတခါမှာကျနော်တို့ ထဲ ခန့်မှန်းခြေနဲ့ ဒရုန်းတွေ ဘာတွေနဲ့ အနီးအနားကို လာကြဲတာတွေတော့ရှိတယ်” လို့ ဆလိုင်းထက်နီက ထန်တလန်မြို့မှာ ချင်းတော်လှန်ရေးတပ်တွေနဲ့ စစ်တပ်အကြား တပ်ဆိုင်ထားတဲ့ အခြေအနေကို အသိပေးပါတယ်။

စစ်တပ်ဟာ ထန်တလန်မြို့တခုလုံး ပြန်ထိန်းချုပ်နိုင်ဖို့၊ မြို့နယ်အတွင်း တော်လှန်ရေးတပ်တွေကို စစ်ရေးဖိအားပေးဖို့ ရည်မှန်းနေတဲ့ အခြေအနေလို့ ဆိုပါတယ်။

“ဒီဟားခါးကနေ တက်လာတာ ဘယ်လောက်အတိအကျ ဝင်သလဲတော့ မသိဘူးပေါ့ ဒါပေမဲ့ တပ်အင်အားတော့ ဖြည့်ထားတယ်လို့ ပြောလို့ရတယ်။ တိုက်ပွဲကတော့ ဘယ်အချိန်ဖြစ်မလဲပေါ့ ။ အဲဒီလို နှစ်ဖက်တပ်ဆိုင်ထားတော့ ဖြစ်လာနိုင်တဲ့ အခြေအနေ ရှိတယ်။ တိုက်ပွဲကြီးပေါ့” လို့ ဆလိုင်းထက်နီက ပြောပါတယ်။

လက်တလော ထန်တလန်မြို့မှာ စစ်တပ်က အင်အား ၄၀၀ ခန့်ရှိမယ်လို့ ခန့်မှန်းထားကြောင်းလည်း ဆလိုင်းထက်နီက ပြောပါတယ်။

အာဏာသိမ်းစစ်တပ်ဟာ ဧပြီလအတွင်းက ချင်းမြောက်ပိုင်း ဖလမ်းမြို့ကို ပြန်လည်ထိန်းချုပ်နိုင်ခဲ့ပြီးနောက် မေလဆန်းမှာ ဖလမ်းမှ ဟားခါးမြို့ကို စစ်အင်အားတွေဖြည့်တင်းခဲ့သလို ဇွန်လမှာ ထန်တလန်ကို ဆက်လက်ထိုးစစ်ဆင်အင်အားဖြည့်လာတာဖြစ်ပါတယ်။

မြေပြင်က စစ်အင်အားတွေဖြည့်နေသလို ထန်တလန်မြို့နယ်အပါအဝင် ချင်းပြည်နယ်အတွင်း လေကြောင်း တိုက်ခိုက်မှုတွေ လည်း စစ်တပ်က ဆက်လက်ပြုလုပ်နေဆဲဖြစ်ပါတယ်။

(တိုက်ပွဲတေါကြောင့် ပျက်စီးနေတဲ့ ထန်တလန်မြို့တွင်း တနေရာကို တွေ့ရစဉ်။ ဓာတ်ပုံ - VOC)

ရန်ကုန်မှာ နှင်းဆီလှုပ်ရှားမှုပြုလုပ်

ဇွန်-၁၆၊၂၀၂၆။သတိုး/People's Spring

လူထုခေါင်းဆောင် ဒေါ်အောင်ဆန်းစုကြည်ရဲ့ မွေးနေ့မှာ ပြုလုပ်မယ့် နှင်းဆီလှုပ်ရှားမှုကို လှုံ့ဆော်ပေးတဲ့အနေနဲ့ စစ်တပ်ရဲ့ လုံခြုံရေးတင်းကျပ်နေတဲ့ ရန်ကုန်မြို့မှာ နှင်းဆီလှုပ်
ရှားမှုကို ပြုလုပ်ခဲ့ပါတယ်။

ရန်ကုန်မြို့ရဲ့ အထင်ကရနေရာတွေဖြစ်တဲ့ ရန် ကုန်တက္ကသိုလ် ၊ ဘူတာကြီး ၊ ဗိုလ်ချုပ်အောင်ဆန်းဈေး ၊ မဟာဗန္ဓုလပန်းခြံ နဲ့ အင်လျားကန်ဘောင် စတဲ့နေရာတွေကို နှင်းဆီပန်းတွေနဲ့ဓာတ်ပုံတွဲရိုက်ပြီးလှုပ်ရှားမှုပြုလုပ်ခဲ့တာပါ။

နှင်းဆီလှုပ်ရှားမှုကို ဒေါ်အောင်ဆန်းစုကြည်ရဲ့ အသက်(၈၁)နှစ်ပြည့်မွေးနေ့ဖြစ်တဲ့ ဇွန်လ ၁၉ ရက်မှာ တစ်နိုင်ငံလုံးအတိုင်းအတာနဲ့ ပါဝင်ကြဖို့ တော်လှန်ရေးအင်အားစုတွေက တိုက်တွန်းထားတာပါ။

ဒီလှုပ်ရှားမှုမှာပါဝင်လိုသူတွေအနေနဲ့ ဇွန်လ ၁၉ ရက်မှာ နှင်းဆီပန်း(သို့မဟုတ်) ပန်းတစ်မျိုးမျိုးကို ဘုရားတင်တာ ၊ ပန်ဆင်တာ၊ အချင်းချင်းမျှဝေတာတွေပြုလုပ်ကြဖို့ ၊ အွန်လိုင်းကမ်ပိန်းအနေနဲ့ ပန်းဓာတ်ပုံတွေကို ဆိုရှယ်မီဒီယာမှာ မျှဝေတာ နဲ့ မြေပြင်လှုပ်ရှားမှုတွေအနေနဲ့လည်း နှင်းဆီပန်းတွေကိုင်ဆောင်ပြီးပါဝင်ကြဖို့ တိုက်တွန်းထားပါတယ်။

နှင်းဆီလှုပ်ရှားမှုတွေက စစ်တပ်ရဲ့ မတရားဖမ်း‌ဆီးမှုတွေကြုံရနိုင်တာကြောင့် ကိုယ်နေထိုင်တဲ့ဒေသရဲ့ လုံခြုံရေး အခြေအနေအပေါ်ကိုမူတည်ပြီး ပါဝင်ပေးကြဖို့ တော်လှန်ရေးအင်အားစုတွေက သတိပေးထားပါတယ်။

ဒီလှုပ်ရှားမှုက ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားတွေကို ချက်ချင်းလွှတ်ဖို့ ၊ စစ်တပ်က အဓမ္မပြဌာန်းထားတဲ့ စစ်မှုထမ်းဥပဒေကို ချက်ချင်းဖျက်သိမ်းဖို့ နဲ့ လူထုအားလုံးအတွက် ဦးဝင်းမြင့်က သမ္မတ ၊ ဒေါ်အောင်ဆန်းစုကြည်က အတိုင်ပင်ခံပုဂ္ဂိုလ်အနေနဲ့ အသိအမှတ်ပြုထားကြောင်းပြသချင်တာလို့ အသိပေးထားပါတယ်။

ရွှေကူမှာ စစ်တပ်က အရပ်သားတွေကို သတ်ဖြတ်နေ

ဇွန်-၁၆၊၂၀၂၆။စိုင်းနောင်/ People's Spring

ကချင်ပြည်နယ်၊ ရွှေကူမြို့နယ်မှာ စစ်တပ်စစ်ကြောင်းက သတ်ဖြတ်သွားတဲ့ ဒေသခံတွေရဲ့ ရုပ်အလောင်း ၈ လောင်းထက်မနည်း တွေ့ရှိပြီး လေကြောင်းပစ်ကူနဲ့ ဆက်စစ်ကြောင်းထိုးနေတယ်လို့ ဒေသခံတွေကပြောပါတယ်။

ရွှေကူမြို့နယ်က ကိုင်းရွာနဲ့ ရွှေဘုန်းမြင့်ကျေးရွာမှာ အရပ်သားတွေ သတ်ဖြတ်ခံရတာလို့ ဒေသခံတစ်ဦးက ပြောပါတယ်။

" စစ်ကြောင်းဝင်ပြီး ပြန်ထွက်တော့ အလောင်းတွေ တွေ့တာ။မိန်းကလေးတွေလည်း ပါတယ်ဗျ။ ခဏပဲ ဝင်ရဲတာ။စိတ်မချလို့ ပြန်ထွက်လာရတယ်"လို့ ရွှေကူမြို့ခံတစ်ဦးက ပြောပါတယ်။

တိုက်ပွဲတွေက မြို့ပြင်နဲ့ ‌ကျေးရွာတွေဘက်မှာဖြစ်နေပြီး မြို့ပေါ်မှာ အခြေအနေတည်ငြိမ်နေတယ်လို့ သိရပါတယ်။

မနေ့က ဇွန်လ ၁၅ရက်မှာ ကိုင်းရွာကို စစ်ကြောင်းဝင်စဉ် လေကြောင်းကနေဗုံးကြဲပြီး လက်နက်ကြီးနဲ့ပါ ပစ်ခတ်လို့ အရပ်သားနေအိမ်တွေ အများအပြားပျက်စီးခဲ့တယ်လို့ ဒေသခံတွေက ပြောပါတယ်။

ရွှေကူမှာ မြို့ခံတွေဘေးလွတ်ရာကိုကြိုတင် တိမ်းရှောင်ကြဖို့ ဇွန်လ ၈ရက်မှာ KIA က သတိပေးချက်ထုတ်ပြန်ပြီးနောက်ပိုင်း မြို့အနီးဝန်းကျင်ရွာတွေမှာ တိုက်ပွဲတွေဖြစ်တာပါ။

ရွှေကူမြို့ ၄လမ်းဆုံ၊ တော်လှန်ရွာ၊ ပန်းတင်ရွာနဲ့ငါးဘတ်ကြီးကျေးရွာတွေဘက်မှာ ဇွန်လ ၁၁ရက် မနက်ပိုင်းကစပြီး တိုက်ပွဲဖြစ်ပွားခဲ့ပြီး ထိခိုက်ပျက်စီးမှုတွေများတယ်လို့ ဒေသခံတွေက ပြောပါတယ်။

စစ်တပ်စစ်ကြောင်းတွေက ဗန်းမော်မြို့ဘက်ကို ဦးတည်နေပြီး ရွှေကူ၊ ဗန်း‌ဗော်ကြားမှာလည်း တိုက်ပွဲတွေဖြစ်နေတယ်လို့ သိရပါတယ်။

စစ်တပ်ဟာ ကချင်၊ စစ်ကိုင်း၊ မကွေးနဲ့ ချင်းပြည်နယ်ဘက်ကို စစ်ကြောင်းထိုးနေပြီး အရပ်သားတွေကို အကြမ်းဖက်သတ်ဖြတ်မှုတွေ ကျူးလွန်နေပါတယ်။ ပြီးခဲ့တဲ့ မေလလယ်ကလည်း မကွေးတိုင်းက မြစ်ခြေမြို့နယ်ကို စစ်ကြောင်းထိုးပြီး အရပ်သား ၄၀ကျော်ကို သတ်ဖြတ်သွားပါတယ်။

(တိုက်ပွဲကြောင့် ဘေးလွတ်ရာထွက်ပြေးတိမ်းရှောင်နေရတဲ့ ရွှေကူမြို့နယ်အတွင်းက စစ်ဘေးရှောင်များ ။ ဓာတ်ပုံ - ShweGu PDF)

ဒီပဲယင်းမှာ နှင်းဆီလှုပ်ရှားမှု ပြုလုပ်

ဇွန်-၁၆၊၂၀၂၆။သုည/People's Spring

စစ်ကိုင်းတိုင်း၊ ဒီပဲယင်းမြို့နယ်မှာ စစ်ကိုင်းဖက်ဒရယ်ယူနစ် CDM နိုင်ငံဝန်ထမ်းများကောင်စီက ဦးဆောင်ပြီး ဒေါ်အောင်ဆန်းစုကြည်ရဲ့ အသက် (၈၁)နှစ်ပြည့် မွေးနေ့အကြိုအဖြစ် နှင်းဆီလှုပ်ရှားမှုကို ဒီက​နေ့ (ဇွန် ၁၆)မှာ ပြုလုပ်ခဲ့ပါတယ်။

အဲဒီလှုပ်ရှားမှုကို စစ်ကိုင်းတိုင်းအတွင်းက CDM ဆရာ၊ဆရာမတွေနဲ့ ကျောင်းသား၊ ကျောင်းသူတွေ ပူးပေါင်းပါဝင်ခဲ့ပါတယ်။

နှင်းဆီလှုပ်ရှားမှုရဲ့ ဆောင်ပုဒ်အတိုင်း "အမေစု နဲ့ အတူ ဆက်လက်တိုက်ပွဲ ဝင်ကြ"၊ "အမေစု နဲ့တကွ နိုင်ငံရေးအကျဥ်းသားအားလုံး ခြွင်းချက်မရှိ ချက်ချင်းလွှတ်"၊ "အဓမ္မစစ်မှုထမ်း ဥပဒေ ချက်ချင်းဖျက်"၊ "ဦးဝင်းမြင့် သည် သမ္မတ၊ ဒေါ်အောင်ဆန်းစုကြည်သည် အတိုင်ပင်ခံပုဂ္ဂိုလ် ဖြစ်သည်" စတဲ့ လူထုရဲ့ သတင်းစကား (၃) ရပ်ကိုလည်း ဆန္ဒထုတ်ဖော်ခဲ့ပါတယ်။

ဒီကနေ့ မနက် ရန်ကုန်မြို့မှာလည်း စစ်တပ်ရဲ့ လုံခြုံရေးတင်းကျပ်နေတဲ့ကြားက လူထုခေါင်းဆောင် ဒေါ်အောင်ဆန်းစုကြည်ရဲ့ မွေးနေ့မှာ ပြုလုပ်မယ့် နှင်းဆီလှုပ်ရှားမှုကို လှုံ့ဆော်ပေးတဲ့ လှုပ်ရှားမှုကို ပြုလုပ်ခဲ့ပါတယ်။

နှင်းဆီလှုပ်ရှားမှုကို ဒေါ်အောင်ဆန်းစုကြည်ရဲ့ အသက်(၈၁)နှစ်ပြည့်မွေးနေ့ဖြစ်တဲ့ ဇွန်လ ၁၉ ရက်မှာ တစ်နိုင်ငံလုံးအတိုင်းအတာနဲ့ ပါဝင်ကြဖို့ တော်လှန်ရေးအင်အားစုတွေက တိုက်တွန်းထားတာပါ။

ဒီလှုပ်ရှားမှုမှာပါဝင်လိုသူတွေအနေနဲ့ ဇွန်လ ၁၉ ရက်မှာ နှင်းဆီပန်း(သို့မဟုတ်) ပန်းတစ်မျိုးမျိုးကို ဘုရားတင်တာ ၊ ပန်ဆင်တာ၊ အချင်းချင်းမျှဝေတာတွေပြုလုပ်ကြဖို့ ၊ အွန်လိုင်းကမ်ပိန်းအနေနဲ့ ပန်းဓာတ်ပုံတွေကို ဆိုရှယ်မီဒီယာမှာ မျှဝေတာ နဲ့ မြေပြင်လှုပ်ရှားမှုတွေအနေနဲ့လည်း နှင်းဆီပန်းတွေကိုင်ဆောင်ပြီးပါဝင်ကြဖို့ တိုက်တွန်းထားပါတယ်။

နှင်းဆီလှုပ်ရှားမှုတွေက စစ်တပ်ရဲ့ မတရားဖမ်းဆီးမှုတွေကြုံရနိုင်တာကြောင့် ကိုယ်နေထိုင်တဲ့ဒေသရဲ့ လုံခြုံရေး အခြေအနေအပေါ်ကိုမူတည်ပြီး ပါဝင်ပေးကြဖို့ တော်လှန်ရေးအင်အားစုတွေက သတိပေးထားပါတယ်။

တောင်တွင်းကြီးမှာ စစ်ကောင်စီတပ်ဖွဲ့ဝင်တွေရဲ့ အိမ်စီးကားတိုက်ခိုက်ရာ ဗိုလ်ကြီးအပါအ၀င် ၂ ဦး သေ

ဇွန်-၁၆၊၂၀၂၆။မိုမို/People's Spring

မကွေးတိုင်း၊ တောင်တွင်းကြီးမြို့နယ်မှာ စစ်ကောင်စီတပ်ဖွဲ့ဝင်တွေ လိုက်ပါတဲ့ အိမ်စီးကား တိုက်ခိုက်မှုအတွင်း ဗိုလ်ကြီးအပါအ၀င် ၂ ဦး သေဆုံးပြီး လက်နက်ခဲယမ်းတွေ ရရှိတယ်လို့ သတင်းရရှိပါတယ်။

တောင်တွင်းကြီးမြို့ ဆက်သွားကျေးရွာဘက်ကနေ စစ်တပ်ရဲ့ ဗိုလ်ကြီးအပါအဝင် ၄ ဦးလိုက်ပါလာတဲ့ အိမ်စီးကားကို ကိုးပင်-ဆက်သွားလမ်းပိုင်းတနေရာမှာ ဇွန်လ ၁၅ ရက်က တော်လှန်ရေးအဖွဲ့တွေက
ကြားဖြတ်တိုက်ခိုက်ခဲ့လို့ သိရပါတယ်။

အဲဒီတိုက်ခိုက်မှုအတွင်း စစ်တပ်ရဲ့ ဗိုလ်ကြီးအပါအဝင် ၂ဦး သေဆုံးပြီး G3 ၁ လက်၊MA3 ၁ လက်နဲ့ MA5 ၁ လက် သိမ်းဆည်းရမိခဲ့ပြီး ကား မီးရှို့ဖျက်ဆီးခဲ့ပါတယ်။

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနအောက်မှာရှိတဲ့ တပ်ရင်း၊တပ်ဖွဲ့တွေနဲ့ ပကဖတွေ စုဖွဲ့ထားတဲ့ ရိုးမဖိုက်တာစစ်ကြောင်းနဲ့အတူ သရက်ခရိုင် အမှတ် (၅)တပ်ရင်း၊မကွေးမြို့နယ် ပကဖ ၊ပုဏ္ဏဝတီပြည်သူ့ကာကွယ်ရေးအဖွဲ့၊ မကွေးတောင်တွင်းကြီး အထူးပြောက်ကျားတပ်ဖွဲ့ တို့က ပူးပေါင်းတိုက်ခိုက်ခဲ့ကြတာလို့ သိရပါတယ်။

တိုက်ခိုက်မှု ဖြစ်စဉ်နဲ့ပတ်သက်တဲ့ အသေးစိတ်အချက်တွေကို သရက်ခရိုင်တပ်ရင်း(၅)နဲ့ တောင်တွင်းကြီးမြို့နယ်က ကာကွယ်ရေးအဖွဲ့တွေကို လူထုနွေဦးက ဆက်သွယ်မေးမြန်းနေဆဲ ဖြစ်ပါတယ်။

ပြီးခဲ့တဲ့လကလည်း တောင်တွင်းကြီးမြို့နယ်က အမှတ်(၁၈)ကာကွယ်ရေးပစ္စည်းစက်ရုံ(ကပစ- ၁၈) ဗိုလ်ကြီး နဲ့ စစ်ကောင်စီတပ်သားတွေပါတဲ့ယာဉ်တန်းတွေ ကြားဖြတ်တိိုက်ခိုက်ခံရဖူးပါတယ်။

အဲဒါအပြင် ၂၀၂၆ ဇန်နဝါရီကလည်း နေပြည်တော် -တောင်တွင်းကြီးရထားလမ်းပိုင်းအနီးမှာ စစ်တပ်စစ်ကြောင်းကိုတိုက်ခိုက်မှုအတွင်းမှာလည်း ၄ ဦးသေပြီး လက်နက်တွေသိမ်းရတယ်လို့ ပြည်သူ့ကာကွယ်ရေးတပ်ဖွဲ့-ပုဏ္ဏဝတီ(တောင်တွင်းကြီး)က ထုတ်ပြန်ထားပါတယ်။

(စစ်ကောင်စီတပ်ဖွဲ့ဝင်တွေ လိုက်ပါတဲ့ ယာဉ်တိုက်ခိုက်မှုအတွင်း သိမ်းရတဲ့ လက်နက်တွေ။ ဓာတ်ပုံ - Screengrab)