ပဲခူးတိုင်း၊ အုတ်ဖိုမြို့နယ်ကို စစ်ကြောင်းထိုး ဝင်ရောက်လာတဲ့ စစ်တပ်စစ်ကြောင်းကို ကာကွယ်ရေးပူးပေါင်းတပ်တွေက တိုက်ခိုက်ခဲ့ရာ စစ်တပ်ဘက်က စစ်ကြောင်းမှူးအပါအဝင် ၁၂ ဦး သေဆုံးခဲ့တယ်လို့ ပဲခူးအနောက်ရိုးမ ဗျူဟာ ၂၂ က ဇွန်လ ၂ ရက်မှာ သတင်းထုတ်ပြန်ပါတယ်။ ပြီးခဲ့တဲ့ မေလ ၂၂ရက် ညနေပိုင်းမှာ အုတ်ဖိုမြို့နယ်၊ ကျီးပြတ်ရွာကို စစ်ကြောင်းထိုးလာတဲ့ အာဏာသိမ်းစစ်တပ် တပ်ဖွဲ့ဝင်တွေဟာ အဲဒီကျေးရွာရှိ ပြည်သူပိုင် ခြံတစ်ခြံမှာ တပ်စွဲထားချိန် ဗျူဟာ (၂၂) ကွပ်ကဲမှုအောက်မှာရှိတဲ့ တပ်ရင်း တပ်ခွဲတွေက ဝင်ရောက်တိုက်ခိုက်ခဲ့တာလို့ သိရပါတယ်။ တော်လှန်ရေးတပ်ဖွဲ့တွေက စစ်တပ်တပ်စွဲထားတဲ့ ကျီးပြတ်ရွာကို ဒရုန်းကြဲချ တိုက်ခိုက်ပြီးနောက် ချေမှုန်းရေးအဖွဲ့တွေက ဝင်ရောက်တိုက်ခိုက်ခဲ့တာလို့ ဆိုပါတယ်။ တိုက်ပွဲ နှစ်နာရီခွဲလောက်အထိ ကြာမြင့်ခဲ့ပြီး စစ်တပ်ဘက်က ၁၂ ဦး သေဆုံးခဲ့ပြီး စစ်ကြောင်းမှူး ဗိုလ်တစ်ဦး ဒရုန်းထိမှန် သေဆုံးခဲ့တယ်လို့ ပဲခူးအနောက်ရိုးမဗျူဟာ ၂၂ ရဲ့ထုတ်ပြန်ချက်မှာ ဖော်ပြထားပါတယ်။

◾️ပေါက်နယ်က ပျူရွာတွေ တိုက်ခိုက်ခံရလို့ စစ်တပ် လေကြောင်းဗုံးကြဲ

မကွေးတိုင်း၊ ပေါက်မြို့နယ်က ပျူစောထီးကျေးရွာတွေ တိုက်ခိုက်ခံနေရလို့ စစ်တပ်က လေကြောင်းကနေ အပြင်းအထန်ခုခံနေတယ်လို့ ဒေသခံသတင်းရင်းမြစ်တွေက ပြောပါတယ်။ ဇွန်လ ၂ ရက် မနေ့ကစပြီး ပေါက်မြို့နယ် အရှေ့တောင်ဘက်ခြမ်းက စစ်တပ်အခြေပြု ကျေးရွာတွေနဲ့ စစ်တပ်စခန်းရှိတဲ့ နေရာတွေကို ဒေသခံတော်လှန်ရေးအဖွဲ့တွေက ထိုးစစ်ဆင်တိုက်ခိုက်နေတာလို့ ဆိုပါတယ်။ တော်လှန်ရေးတပ်တွေက ပျူစောထီးရွာတစ်ရွာကို ရရှိထားပြီး စစ်တပ်ရဲ့ စစ်ကူစစ်ကြောင်းကိုလည်း ကြားဖြတ်တိုက်ခိုက်နေတယ်လို့ ပေါက်မြို့နယ် စစ်ရေးသတင်းရင်းမြစ်က ဒီနေ့ စစ်ရေးအခြေအနေကို ပြောပါတယ်။ အာဏာသိမ်းစစ်တပ်က မနေ့က တစ်ရက်တည်း ဂျက်ဖိုက်တာနဲ့ Y12 ၁၀စီးထက်မနည်း သုံးပြီး ဗုံးတွေ ဆက်တိုက်ကြဲခဲ့ပြီး ဒီနေ့ မနက်ပိုင်းမှာလည်း Y12 နဲ့ ဗုံးလာကြဲတယ်လို့ အသက် ၃၀အရွယ် ပေါက်မြို့နယ်ဒေသခံတစ်ဦးက ပြောပါတယ်။

◾️မင်းတပ်မှာ တိုက်ပွဲဆက်ဖြစ်

ချင်းပြည်နယ်၊ မင်းတပ်မြို့နယ်အတွင်း စစ်တပ်က စစ်ကြောင်းထိုး ဝင်ရောက်နေတာကြောင့် တိုက်ပွဲတွေဆက်ဖြစ်နေတယ်လို့ ဒေသခံ သတင်းရင်းမြစ်က ပြောပါတယ်။ မေလကုန်ပိုင်းမှာ ချင်း-မကွေးအစပ်က စစ်တပ်စစ်ကြောင်းတွေဟာ မင်းတပ်မြို့နယ်အတွင်း ဝင်ရောက်ပြီး ကျေးရွာအချို့ကို မီးရှို့ဖျက်ဆီးတာ အပါအဝင် စစ်ရေးလှုပ်ရှားမှုတွေ လုပ်ဆောင်လာလို့ ချင်းတော်လှန်ရေး တပ်ဖွဲ့နဲ့ တိုက်ပွဲဖြစ်ပွားလျက်ရှိပါတယ်။ ဒေသခံတွေအနေနဲ့လည်း စစ်တပ် စစ်ကြောင်းတွေကို ရှောင်ရှားဖို့ လိုအပ်ကြောင်းလည်း သတင်းရင်းမြစ်က ပြောပါတယ်။ အာဏာသိမ်းစစ်တပ်ဟာ ချင်းပြည်သူ့အစည်းအရုံး(CPU/CPA)ထိန်းချုပ်ထားတဲ့ ချင်းတောင်ပိုင်းက ကန်ပက်လက်နဲ့ မင်းတပ်ကို ထိုးစစ်ဆင်နေလို့ ကန်ပက်လက်မှာ မေလ ၁၈ရက်က စ တိုက်ပွဲတွေ ဖြစ်နေသလို မင်းတပ်မှာတော့ မေလကုန်ပိုင်းကစ တိုက်ပွဲဖြစ်နေတာပါ။

◾️ချောင်းဦးက စစ်ရှောင်ရွာတွေကို စစ်တပ်လေကြောင်းတိုက်ခိုက်

စစ်ကိုင်းတိုင်း၊ ချောင်းဦးမြို့နယ်မှာ ဒေသခံပြည်သူတွေ စစ်ရှောင်နေရတဲ့ကျေးရွာတွေကို စစ်တပ်က ပါရာမိုတာ၊ ဂျွိုင်ရိုကော်ပတာတွေနဲ့ လေကြောင်းကနေ တိုက်ခိုက်လို့ နေအိမ်တွေနဲ့ စက်သုံးဆီဆိုင်တွေ မီးလောင်ပျက်စီးခဲ့ရကြောင်း ဒေသခံတွေက ပြောပါတယ်။ ဒီနေ့ ဇွန်လ ၃ ရက်မနက်ပိုင်းက မုံရွာမြို့အနောက်မြောက်တိုင်းစစ်ဌာနချုပ်(နမခ) တက်လာတဲ့ ပါရာမိုတာ ၃စီး၊ ဂွိုင်ရိုကော်ပတာ ၃စီး စုစုပေါင်း ၆စီးဟာ ချောင်းဦးမြို့နယ်က ဆင်မြေရွာနဲ့ ငါးလုံးတင်ကျေးရွာကို လေကြောင်းတိုက်ခိုက်ခဲ့ရာ နေအိမ်တွေနဲ့ ဓါတ်ဆီဆိုင်တစ်ဆိုင် ပျက်စီးသွားကြောင်း ဒေသခံတွေက ပြောပါတယ်။ ပျက်စီးတဲ့ နေအိမ်အရေအတွက်ကိုတော့ အတိအကျ မသိရသေးပါဘူး။ စစ်တပ်စစ်ကြောင်းဟာ မြို့ပေါ်ပြန်တက်သွားတယ်လို့ သတင်းထွက်နေပေမယ့် စိတ်မချရသေးတာကြောင့် ပြည်သူတွေ ရှောင်တိမ်းနေရဆဲဖြစ်ပြီး မြို့ပေါ်ကလည်း လက်နက်ကြီးတွေနဲ့ ပစ်ခတ်နေတယ်လို့ ဒေသခံတွေက ပြောပါတယ်။

◾️ဖရူဆိုမြို့နယ်က ကျေးရွာ ၃ရွာကို စစ်တပ် မီးရှို့ဖျက်ဆီး

ကရင်နီပြည်နယ်၊ ဖရူဆိုမြို့နယ် ကျေးရွာ ၃ရွာက နေအိမ် ၈၀ကျော်ကို အာဏာသိမ်းစစ်တပ်က မီးရှို့ဖျက်ဆီးခဲ့ကြောင်း ကရင်နီအမျိုးသားများကာကွယ်ရေးတပ်-KNDFက သတင်းထုတ်ပြန်ပါတယ်။ ၂၀၂၆ မတ်လကနေ မေလအတွင်း စစ်တပ်စစ်ကြောင်းတွေက ဖရူဆိုမြို့နယ်က ကျေးရွာ ၃ရွာကို မီးရှို့ဖျက်ဆီးခဲ့ကြတာလို့ အသိပေးပါတယ်။ မတ်လ ၂၈ရက်မှာ ဖရူဆိုမြို့နယ် ဘူးခူကျေးရွာက နေအိမ် ၁၆လုံး၊ မေလ ၆ရက်မှာ ထားလဲရွာက နေအိမ် ၆၀ ကျော်၊ မေလ ၇ရက်မှာ ပရယ်တော် ရွာက နေအိမ် ၄လုံးကို စစ်တပ်က အကြောင်းမဲ့ မီးရှို့ဖျက်ဆီးခဲ့တာလို့ မှတ်တမ်းပုံတွေနဲ့အတူ ဖော်ပြပါတယ်။ အာဏာသိမ်းစစ်တပ်ရဲ့ လုပ်ရပ်ဟာ စစ်ရာဇဝတ်မှု ကျူးလွန်ခြင်းဖြစ်ကြောင်း KNDFက ထုတ်ပြန်ပါတယ်။ စစ်တပ်ရဲ့ စစ်ကြောင်းတွေဟာ ဖရူဆို-ဘောလခဲ လမ်းမကြီးတလျှောက် ခြေကုပ်စခန်းများ၊ စစ်ကြောင်းများနဲ့ စစ်ရေးလှုပ်ရှားနေပြီး တော်လှန်ရေးတပ်တွေနဲ့ ထိတွေ့မှုများလည်း ရှိနေကြောင်း အသိပေးပါတယ်။

◾️ရမ်း‌ဗြဲမြို့စစ်ရှောင်စခန်း စစ်တပ် ဗုံးကြဲ၊ သက်ကြီးရွယ်အို ၂ဦး သေဆုံး

ရခိုင်ပြည်နယ်၊ ရမ်းဗြဲမြို့နယ်က စစ်ဘေးရှောင်စခန်းကို စစ်တပ်က လေကြောင်းကနေ ဗုံးကြဲလို့ သက်ကြီးရွယ်အို ၂ဦး သေဆုံးပြီး ၅ဦး ဒဏ်ရာရခဲ့ပါတယ်။ ဇွန်လ ၁ရက် မနက်ပိုင်းမှာ တောင်ကုတ်မြို့နယ်ကို လေကြောင်းကနေဗုံးကြဲပြီး ညပိုင်းမှာတော့ ရမ်းဗြဲမြို့နယ်ကို ဗုံးကြဲတာ ဖြစ်ပါတယ်။ ရမ်းဗြဲမြို့နယ်၊ ကြောင်ချတွင်းကျေးရွာက စစ်ဘေးရှောင်စခန်းနဲ့ ကျေးရွာဝန်းကျင်ကို ဂျက်ဖိုက်တာ ၂စီးနဲ့ ဗုံးကြဲသွားတာလို့ ဒေသခံသတင်းရင်းမြစ်က ပြောပါတယ်။ ဗုံးကြဲခဲ့တဲ့နေရာက တိုက်ပွဲလုံးဝမရှိဘဲ အရပ်သားပစ်မှတ်ကို သက်သက်ဗုံးကြဲခဲ့တာလို့ သတင်းရင်းမြစ်က ဆိုပါတယ်။

◾️ကျောက်လုံးကြီးတပ်စခန်း ပြန်ရဖို့ စစ်တပ်ထိုးစစ်ဆင်လာလို့ တိုက်ပွဲဖြစ်

ကရင်အမျိုးသားအစည်းအရုံး(KNU) မြိတ် -ထားဝယ်ခရိုင် တပ်မဟာ(၄)က သိမ်းပိုက်ထားတဲ့ လယ်မူလား(ပုလော)မြို့နယ် လယ်ဖဒို (ကျောက်လုံးကြီး)ရွာက တပ်စခန်းကို အာဏာသိမ်းစစ်တပ်က ပြန်ထိုးစစ်ဆင်လာလို့ တိုက်ပွဲဖြစ်ပွားခဲ့ကြောင်း KNU မြိတ်ထားဝယ်ခရိုင် သတင်းရင်းမြစ်က ပြောပါတယ်။ အင်အား ၈၀ကျော်ရှိတဲ့ ကျောက်လုံးကြီးစခန်းကို KNLA တပ်မဟာ(၄)က မေလ ၁၉ရက်မှာ စတင်ထိုးစစ်ဆင်ခဲ့ရာ တိုက်ပွဲ ၁၁ရက်မြောက် မေလ ၂၉မှာ တပ်စခန်းကို သိမ်းနိုင်ခဲ့တာပါ။ စစ်တပ်တပ်ဖွဲ့ဝင် အားလုံးနီးပါး ထွက်ပြေးသွားလို့ စခန်းသိမ်းရခဲ့တာဖြစ်ပြီး လက်နက်ခဲယမ်းအများအပြား ရရှိခဲ့ပါတယ်။ အခုလက်ရှိ သိမ်းထားတဲ့စခန်းက ဗျူဟာရဲ့ ကာကင်းဖြစ်ပြီး အဲဒီကာကင်းကို လက်လွှတ်လိုက်ရတော့ ဗျူဟာက ပြန်လာပြီးတော့ ပြန်ထိုင်ဖို့ အဲဒီမှာ တိုက်ပွဲဖြစ်တယ်လို့ KNU မြိတ်ထားဝယ်ခရိုင် သတင်းရင်းမြစ်က ပြောပါတယ်။

◾️ကျောက်ကြီးမြို့နယ်ကို စစ်တပ် လက်နက်ကြီး ပစ်ခတ်လို့ ကလေးငယ် အပါအဝင် ပြည်သူ ၃ဦးသေဆုံး

ကရင်အမျိုးသားအစည်းအရုံး(KNU) ညောင်လေးပင်ခရိုင် တပ်မဟာ(၃)နယ်မြေ ကျောက်ကြီးမြို့နယ်(လယ်ဒိုမြို့နယ်)မှာ အာဏာသိမ်းစစ်တပ်က လက်နက်ကြီးနဲ့ ပစ်ခတ်လို့ (၉)နှစ်အရွယ် မိန်းကလေးငယ် အပါအဝင် ပြည်သူ ၃ဦးသေဆုံးကာ အမျိုးသမီး ၁ဦး ဒဏ်ရာရရှိခဲ့ကြောင်း KNUက ဇွန်လ ၂ရက်မှာ သတင်းထုတ်ပြန်ပါတယ်။ မေလ ၃၀ရက်က စစ်တပ်ရဲ့ ခမရ(၂၆၄)တပ်ရင်းက ၁၅၅ ဟောင်ဝှစ်ဇာ လက်နက်ကြီးနဲ့ ကျောက်ကြီးမြို့နယ် အင်တိုင်းကုန်းကျေးရွာကို ပစ်ခတ်ခဲ့ရာ ကျေးရွာအတွင်း ကျရောက်ပေါက်ကွဲပြီး (၉)နှစ်အရွယ်မိန်းကလေးငယ် ၁ဦး၊ အသက် (၄၅)နှစ်အရွယ်အမျိုးသမီး ၁ဦးနဲ့ အသက် (၄၇)နှစ်အရွယ် အမျိုးသား ၁ဦး သေဆုံးကာ အသက် (၁၈)နှစ်အရွယ် မိန်းကလေး ၁ဦး ဒဏ်ရာရရှိခဲ့တာလို့ ဆိုပါတယ်။ အာဏာသိမ်းစစ်တပ်ဟာ ကျောက်ကြီးမြို့နယ်က ကျေးရွာတွေကို ပစ်မှတ်ထားပြီး လေကြောင်း၊ လက်နက်ကြီး၊ ဒရုန်း တိုက်ခိုက်မှုတွေ မကြာခဏ လုပ်ဆောင်ခဲ့လို့ ပြည်သူလူထု သေဆုံးထိခိုက်မှုတွေ အများအပြားရှိခဲ့ပါတယ်။

◾️စစ်ရေးကြောင့် မိုးညှင်းမြို့နယ်က လမ်းပိုင်းအချို့ ယာယီပိတ်ထား

ကချင်ပြည်နယ်၊ မိုးညှင်းမြို့နယ်အတွင်းက လမ်းပိုင်းအချို့ကို ရက်အကန့်အသတ်မရှိ ယာယီပိတ်လိုက်ကြောင်း ကချင်လွတ်လပ်ရေးတပ်မတော်(KIA) တပ်မဟာ(၉) တပ်ရင်း(၂၆)က ဇွန်လ ၂ရက်က ထုတ်ပြန်ပါတယ်။ လတ်တလော စစ်ရေး၊နိုင်ငံရေးကြောင့် KIA တပ်ရင်း(၂၆) နယ်မြေဖြစ်တဲ့ ညောင်ပင်-ချောင်း၀-ဆနွင်းကုန်း အင်းသာနဲ့ နမ့်မွန်းလမ်းပိုင်းကို ဇွန်လ ၂ရက်က စပြီး အများပြည်သူခရီးသွားလာခြင်း ဆိုင်ကယ် မော်တော်ယာဉ်ကြီးယာဉ်ငယ်များ ဖြတ်သန်းသွားလာခြင်းကို ယာယီပိတ်ထားတာလို့ အသိပေးပါတယ်။ KIA တပ်ရင်း (၂၆)ဟာ မေလ ၃၁ရက်ကလည်း မိုးညှင်းမြို့နယ် ဟိုပင်-ချောင်း၀၊ ဟိုပင်-ညောင်ပင်လမ်း တံတား စတဲ့နေရာတွေမှာလည်း ယာယီပိတ်ထားကြောင်း ကချင်ဘာသာနဲ့ ထုတ်ပြန်ခဲ့ပါသေးတယ်။

◾️EV ကား​ဈေးကွက်အတွက် စစ်တပ်က အခွန်​​လျှော့

အာဏာသိမ်းခေါင်းဆောင်မင်း​အောင်လှိုင်ရဲ့ သားနဲ့ သမီး အပါအ၀င် စစ်တပ်နဲ့ပတ်သက်သူတွေ လက်ဝါးကြီးအုပ်ထားတဲ့ လျှပ်စစ်ကား EV ကားတင်သွင်းတာမှာ အကောက်ခွန်နှုန်းကို လျှော့ချကင်းလွတ်ခွင့်ပေးလိုက်တယ်လို့ မော်တော်ယာဉ်ဈေးကွက်မှ သတင်းရရှိပါတယ်။ အာဏာသိမ်းစစ်တပ် ဖွဲ့စည်းထားတဲ့ ဘဏ္ဍာရေးနဲ့အခွန်ဝန်ကြီးဌာနက‌ လျှပ်စစ်ကားတွေနဲ့ပတ်သက်လို့ ယာဥ်အလုံးလိုက်တင်သွင်းတဲ့ CBU စနစ်၊ နိုင်ငံအတွင်း အပြီးအစီးတပ်ဆင်ထုတ်လုပ်တဲ့ CKD နဲ့ SKD စနစ် နဲ့ ဘက်ထရီလျှပ်စစ်သုံးယာဉ် Battery Electric Vehicle-BEV တွေရဲ့ အကောက်ခွန်နှုန်းတွေကို ဖြေလျှော့လိုက်တာဖြစ်ပါတယ်။ အလုံးလိုက်အရန်သင့်စီးမယ့် EV ကားတွေကို အရင်နှစ်က အခွန်က ၁၅ ရာခိုင်နှုန်းကနေ အခု ၅ရာခိုင်နှုန်း၊ SKD တို့ CKD တို့က အရင် ၅ရာခိုင်နှုန်း နဲ့ ၃ရာခိုင်နှုန်းက အခု လုံး၀ မကောက်တော့ဘူးလို့ မော်တော်ယာဥ်အရောင်းပြခန်းပိုင်ရှင်တစ်ဦးက ပြောပါတယ်။ ကြားရသလောက် ယာဉ်အိုယာဉ်ဟောင်းဈေးကွက်ကို ဖြုတ်ချပြီး EV ဈေးကွက်ကို ပိုမိုခိုင်မာအောင်လုပ်လာတာလို့ အဲဒီမော်တော်ယာဥ်အရောင်းပြခန်းပိုင်ရှင်က ပြောပါတယ်။ ဒါ့အပြင် လျှပ်စစ်သုံးယာဉ်တွေအတွက် အပိုပစ္စည်း နဲ့ ဆက်စပ်ပစ္စည်း တင်သွင်းမှုကို ကောက်ခံမယ့် အကောက်ခွန်နှုန်းတွေကိုလည်း ထက်၀က် နီးပါးလျှော့ချလိုက်တယ်လို့ ဆိုပါတယ်။ ယာဉ်အိုယာဉ်ဟောင်းတွေ မအပ်၊ အပ်ချင်အောင်နဲ့ ရောင်းမထွက်သေးတဲ့ ဆိပ်ကမ်းက EV တွေအတွက် ထုတ်ရ ပြုရ လွယ်သွားတယ်လို့ ဆယ်စုနှစ် တစ်ခုကြာ မော်တော်ယာဥ်အရောင်းအဝယ်လုပ်နေသူတစ်ဦးက ပြောပါတယ်။ လူထုဆန္ဒ ကို မကြည့်ဘဲ ကိုယ်ထင်ရာအတိုင်းရုပ်လုံးဖော်ကြတဲ့ အာဏာရှင်စရိုက်လို့လည်း သူက ဆက်ပြောပါတယ်။

အာဏာသိမ်း စစ်တပ် တပ်ချုပ်အသစ် ဗိုလ်ချုပ်ကြီးရဲဝင်းဦးလက်ထက် ပထမဆုံး ဖော်ဆောင်တဲ့ ကြည်း၊ရေ၊လေပူးပေါင်းစစ်ဆင်ရေးဟာရှုံးနိမ့်သွားပြီလို့ စစ်ရေးလေ့လာသူတွေက သုံးသပ်ကြပါတယ်။

တရုတ်စီမံကိန်း​တွေကိုအကာအကွယ်ယူပြီး စနဲမြို့ကို ပြန်သိမ်းယူဖို့ ကြည်း၊ရေ၊လေ စစ်ဆင်ရေးနဲ့ ထိုးစစ်ဆင်လာတဲ့ အာဏာသိမ်းစစ်တပ်ရဲ့စစ်​ကြောင်းတွေဟာ စစ်ဆင်ရေး ဆယ်ရက်ခန့်အကြာမှာပဲ အထိနာပြီး ပြန်ဆုတ်သွားပြီလို့ကျောက်ဖြူမြို့က သတင်းရင်းမြစ်တွေက ပြောပါတယ်။

၁၀၂၇ စစ်ဆင်ရေးနဲ့အတူ အာရက္ခတပ်တော်(AA) ထိန်းချုပ်ထားတဲ့ စနဲမြို့ကိုတန်ပြန်ထိုးစစ်ဆင်ဖို့ စစ်တပ်က ဧပြီလကတည်းက အင်အားဖြည့်ပြီး မေလ ၁၀ ရက်မှာစစ်ရေးစတင်ဖော်‌ဆောင်လာတာဖြစ်ပါတယ်။

စနဲမြို့ကနေ ၂၈ မိုင်ခန့်သာဝေးနဲ့ ကျောက်ဖြူမြို့နယ်၊ မဒေးကျွန်းအနီးက တောင်မော်ဦးရေတပ်စခန်းမှာ အင်အားတွေစုဖွဲ့ပြီး ကြည်း၊ရေ၊လေ စစ်ဆင်ရေးနဲ့ ထိုးစစ်ဆင်လာတာလို့ သိရပါတယ်။

"မဒေးကျွန်းမှာက တရုတ်ဓာတ်ငွေ့စီမံကိန်းရှိတယ်။တပ်တော်က အဲ့နေရာကို မတိုက်တော့ စစ်တပ်က အင်အားတွေ စိတ်ကြိုက်ဖြည့်တာ။ အခုကကြတော့ ပင်လယ်ရေကြောင်းကရော၊ လေ
ယာဉ်တွေရော၊‌ ခြေလျင်တပ်ရော စနဲကို ဦးတည်တိုက်တာ။တိုက်ပွဲတွေကအရမ်းပြင်းထန်ပြီးမှ ပြန်ဆုတ်သွားတာပါ"လို့ ကျောက်ဖြူမြို့ခံသတင်းရင်းမြစ်တစ်ဦးက ပြောပါတယ်။

တောင်မော်ဦးရေတပ်စခန်းဟာ ကျောက်ဖြူမြို့က ဓညဝတီရေတပ်ရဲ့ လက်အောက်ခံ စခန်းဖြစ်ပါတယ်။ စနဲမြို့နဲ့ တောင်မော်ဦးရေတပ်ကြားက အဝတောင်ရွာကို စစ်တပ်စစ်ကြောင်းအရောက်မှာ AAကပိတ်ဆို့တိုက်ခိုက်ခဲ့တာဖြစ်ပါတယ်။

"တနေ့တည်းမှာ၁၀၀လောက်သေတဲ့သတင်းလည်းကြားတယ်။ စနဲကိုလည်း ရေတပ်ကနေရော၊ လေယောဉ်နဲ့ပါ ဗုံးကြဲလို့ အပျက်အစီးအရမ်းများတယ်ဗျ။ဒီနေ့အထိနောက်ဆုံးကြားတာက စစ်တပ်က တောင်မော်ဦးဘက်ကို ပြန်ဆုတ်နေပြီကြားတယ်" လို့ စစ်​ရေးသတင်းရင်းမြစ်တဦးက မေလ၂၂ရက်
မနက်ပိုင်းမှာပြောပါတယ်။

https://youtu.be/a01-usnGZtU?si=2VgMzy-mhV15HLvM

တာမွေမှာ အသက် ၄၇အရွယ် ဆိုက္ကားသမား
ဦးမြင့်ဆိုင် စစ်မှုထမ်းအဖြစ် ရောင်းစားခံရ

■ဇနီးဖြစ်သူ​ဒေါ်ခင်စိုးရီက ခင်ပွန်းကိုပြန်လွတ်​ပေးဖို့ အာဏာသိမ်း​ခေါင်း​ဆောင်​တွေထံအသနားခံ

ဇွန် ၄၊ ၂၀၂၆။ဟာနာဆန်/People's Spring

ရန်ကုန်မြို့၊ တာမွေမြို့နယ်မှာ အသက် ၄၇အရွယ်ရှိ ဆိုက္ကားသမားတစ်ဦး စစ်မှုထမ်းအဖြစ် ရောင်းစားခံရကြောင်း သတင်းရရှိပါတယ်။

တာမွေမြို့နယ်မှာ ဆိုက္ကားနင်းနေတဲ့ အသက် (၄၇)နှစ်အရွယ် ဦးမြင့်ဆိုင်ဆိုသူဟာ ပြီးခဲ့တဲ့ မတ်လ ၁၆ ရက်က ပျောက်ဆုံးသွားခဲ့ပါတယ်။

အဲဒီနောက် ၂ လခန့်အကြာ ပြီးခဲ့တဲ့ မေလ ၁၀ ရက်မှာ မိသားစုဆီ ပြန်လည်ဆက်သွယ်လာခဲ့ပြီး လက်ရှိမှာ ရမည်းသင်း၊ အမှတ် (၃) စစ်အခြေခံလေ့ကျင့်ရေး သင်တန်းကျောင်း၊ ခွဲ (၁)မှာ ရောက်ရှိနေကြောင်း သိလိုက်ရတယ်လို့ ၎င်းရဲ့ ဇနီးဖြစ်သူ ဒေါ်ခင်စိုးရီက Tiktok လူမှုကွန်ရက်ကနေတစ်ဆင့် အာဏာသိမ်း​ခေါင်းမင်း​အောင်လှိုင် နဲ့ တပ်ချုပ်ရဲဝင်းဦးတို့ကို ဦးတည်ပြီး အသနားခံခဲ့တာဖြစ်ပါတယ်။

မေလ ၃၁ ရက်မှာ သင်တန်းကျောင်းသို့ ဇနီးဖြစ်သူ ဒေါ်ခင်စိုးရီနဲ့ အမျိုးသားရေးဆရာတော် ဦးဇောတိကတို့က သွားရောက်တွေ့ဆုံခဲ့ရာမှာ ဦးမြင့်ဆိုင်ကို သူယခင်သူကိုင်ဆောင်တဲ့ မှတ်ပုံတင်နံပါတ် ၈/မထန(နိုင်)၀၈၄၄၃၁ အစား မှတ်ပုံတင် အသစ် ၈/ရနခ (နိုင်) ၁၀၆၈၈၅ ဖြင့်လည်းကောင်း၊ အသက်ကိုလည်း ၁၃၄၁ ဖွား၊ အသက် ၄၇ နှစ်ရှိသူအား ၃၅ နှစ်သို့လည်းကောင်း ပြောင်းလဲထားပြီး ကိုင်ဆောင်သော မွေးသက္ကရာဇ် ၁၃၄၁ ဖွား၊ အသက် ၄၇ နှစ်ရှိသူအား မှတ်ပုံတင် အသစ် ၈/ရနခ (နိုင်) ၁၀၆၈၈၅ ဖြင့် မွေးသက္ကရာဇ်အား (၃၅) နှစ်အဖြစ် ပြောင်းလဲပြီး ကိုယ်ပိုင်နံပါတ် တ-၆၁၆၁၅၇၊ ကျောင်းသားနံပါတ် ၁၉၅ ဖြင့် သူ့ဆန္ဒမပါဘဲ သင်တန်းတက်နေရတယ်လို့ ၎င်းရဲ့ ဇနီးဖြစ်သူက အသိပေးပါတယ်။

အသေးစိတ်အား တာဝန်ရှိသူများမှ စိစစ်ကာ သားသမီး ၃ဦး ဟာလည်း ကျောင်းပညာရေးနဲ့ အားကိုးရာမဲ့ အမျိုးသမီးရဲ့ ကျန်းမာရေးတို့အား ထောက်ထားသောအားဖြင့် နှုတ်ထွက်ခွင့်ပြုဖို့ အသနားခံတင်ပြထားတာကို တွေ့ရပါတယ်။

ဇနီးသည်ဟာ အသနားခံစာကို ဖတ်ပြသွားခဲ့တာဖြစ်ပြီး ၎င်းအသနားခံစာမှာ ရောင်းစားခံရတယ်လို့ မပါပေမဲ့ ဖြစ်စဥ်အနေအထားအရ ရောင်းစားခံရတာသာဖြစ်နိုင်ကြောင်း လူမှုကွန်ရက် သုံးစွဲ
သူတွေက မှတ်ချက်ပြုပါတယ်။

အဆိုပါ ဆိုက္ကားသမားဟာ မကွေးတိုင်း၊ ရေနံချောင်းမြို့နယ်၊ နဂါးကျေးရွာအုပ်စု၊ နဂါးကျေးရွာကနေ ရန်ကုန်မြို့မှာ အလုပ်လာလုပ်ရင်း ခုလိုဖြစ်စဥ်ဖြစ်ပွားခဲ့တာဖြစ်ကြောင်း သိရပါတယ်။

ဒါ့အပြင် အသနားခံ video မှတပါး မည်သည့် မီဒီယာကိုမှ ပြောကြားမှာမဟုတ်ကြောင်း၊ ပေါ်တာဆွဲခြင်းမဟုတ်ဘဲ ပိုမို ရှုပ်ထွေးတဲ့ အခြေအနေသာဖြစ်ကြောင်း video တင်ထားသူက ရေးသားထားပါတယ်။

ရန်ကုန်မြို့မှာ နေအိမ်ပေါ်ပါတက်ပြီး ပေါ်တာဆွဲနေပြီး လူငယ်လူရွယ်တွေ မကြာခဏ ဖမ်းဆီးခံနေရပါတယ်။ စစ်မှုထမ်းပေါ်တာဆွဲတဲ့ဖြစ်စဥ်တွေကို စစ်အုပ်စုထောက်ခံတဲ့သူတွေ၊ အမျိုးသားရေးအဖွဲ့ မဘသတွေကအစ ​ပြန်လည်ဝေဖန်နေကြပါတယ်။

ဒါ့အပြင် မြို့နယ်တွေက လူမိုက်ဆိုသူတွေက နေ့ခင်းဘက်တွေအပြင် ညအချိန်တွေမှာ အဓိက လူငယ်၊လူရွယ်တွေ လိုက်လံရှာဖွေဖမ်းဆီးပြီး စစ်တပ်ရဲ့ စစ်မှုထမ်းရွေးချယ်ရေးအဖွဲ့ထံမှာ စစ်မှုထမ်းဖို့ ရောင်းစားနေတာတွေ လက်တလောမှာ ဖြစ်ပေါ်နေပါတယ်။

စစ်တပ်ဟာ ၂၀၂၄ ဧပြီကစတင်ခဲ့တဲ့ စစ်မှုထမ်းခေါ်ယူမှုဟာ ယခုအခါ အပတ်စဥ် (၂၅) ရောက်ရှိနေပြီဖြစ်ပါတယ်။

AAဖမ်းခဲ့တဲ့သင်္ဘောလှရွာသား၈၉ဦး
ကိုပြန်လွှတ်ပေး

■သင်္ဘောလှရွာသား ၃၀ ဦး
ခန့်ကိုမူပြန်မလွှတ်​သေး

ဇွန်-၄၊ ၂၀၂၆။ခိုင်မြတ်/People's Spring

စစ်မှုထမ်းဥပဒေနဲ့ဆက်စပ်တဲ့အစည်းအဝေးတခုမှာနားလည်မှုလွဲမှားပြီးဆူပူအုံကြွမှုလုပ်ခဲ့တယ်ဆိုတဲ့အကြောင်းပြချက်နဲ့ အာရက္ခတပ်တော်(AA)က ဖမ်းဆီးထားခဲ့တဲ့ရခိုင်ပြည်နယ်၊မောင်တောမြို့
နယ်သင်္ဘောလှရွာသားတွေထဲက ၈၉ ဦးကို ဇွန်လ ၃ ရက်နေ့မှာ ပြန်လွှတ်ပေးလိုက်ပါတယ်။

သက်ကြီးရွယ်အို၊အမျိုးသမီး၊ကလေးငယ်တွေအ
ပါအဝင် ရွာသားတရာကျော်ကို ပြီးခဲ့တဲ့ မေလ ၂၃ ရက်နေ့ကAAက ဖမ်းဆီးခဲ့တာဖြစ်ပါတယ်။ဖမ်း
ဆီးပြီး ၁၂ ရက်အကြာမှာ ပြန်လွှတ်ပေးခဲ့တာဖြစ်ပါတယ်။ ပြန်လွတ်လာသူတွေထဲမှာ အမျိုးသား ၂၈ ဦး၊ အမျိုးသမီး ၃၃ ဦးနဲ့ ကလေးငယ် ၂၈ ဦး ပါဝင်ပါတယ်။

“လူငယ်ပိုင်းတွေတချို့တော့ ပြန်မလွှတ်သေးဘူး။ သုံးဆယ်လောက် ကျန်အုံးမယ်။ ကြည့်ရတာ အဲဒါတွေကိုစစ်မှုထမ်းပို့ဖို့ ခေါ်ထားလိုက်တာထင်တယ်။ ပြန်လွှတ်ရင်လည်း လွှတ်လောက်တယ်။
မလွှတ်ဖို့တော့ များတယ်။ လွှတ် ရင် အကုန်လွှတ်
ပေးစေချင်တယ်” လို့ ဖြစ်စဥ်ကိုသိတဲ့ မောင်တောဒေသခံ လူငယ်တဦးက ပြောပါတယ်။

ရွာသားတွေ ဖမ်းဆီးခံခဲ့ရတဲ့ သင်္ဘောလှရွာဟာ သက္ကမ(ဒိုင်းနက်)လူမျိုးတွေ နေထိုင်တဲ့ကျေးရွာဖြစ်ပါတယ်။ ရိုဟင်ဂျာ လက်နက်ကိုင်အဖွဲ့တွေ လှုပ်
ရှားမှုရှိတဲ့ ဘင်္ဂလားဒေ့ရှ်နယ်စပ်မှာရှိတာကြောင့် ရပ်ရွာလုံခြုံရေးအတွက်စစ်သင်တန်းပေးဖို့ အ
စည်းအဝေးခေါ်၊ သွားဆွေးနွေးခဲ့တာဖြစ်တယ်လို့ AA နဲ့ နီးစပ်သူတွေက ပြောကြပါတယ်။

စစ်မှုထမ်းခေါ်ဖို့ ရွာသားတွေနဲ့ ဆွေးနွေးတဲ့အခါ ရွာသားတွေက နားလည်မှုလွဲမှားပြီး AA တပ်ဖွဲ့ဝင်တွေကို အကြမ်းဖက်မှုပုံစံနဲ့ တုတ်ဆွဲ၊ ဓါးဆွဲ ဆူပူအုံကြွမှုလုပ်ခဲ့တာကြောင့် ကလေး၊ အမျိုးသမီးတွေကိုပါ ဖမ်းဆီးခဲ့တာလို့ ဆိုပါ တယ်။

အဲဒီလိုအစည်းအဝေးအတွင်းAAကရွာသားတွေကို ရိုက်နှက်တာ၊ သေနတ်ဖောက်ခြိမ်းခြောက်တာတွေ ရှိခဲ့ပြီး ချက်ချင်းလွှတ်ပေးဖို့ သက္ကမလူမျိုးအဖွဲ့အစည်းတွေက ထုတ်ပြန်ချက်ထုတ်တောင်းဆိုခဲ့ကြပါတယ်။

ရခိုင်ပြည်နယ်အတွင်းက မြို့နယ် ၁၄ ခု၊ ချင်း
ပြည်နယ် ပလက်၀မြို့နယ်တို့ကို သိမ်းပိုက်ထားပြီး လက်ကျန်ကျောက်ဖြူနဲ့ စစ်တွေမြို့နယ်ကအာ
ဏာသိမ်းစစ်တပ်ကို ထိုးစစ်ဆင်နေတဲ့ အာရက္ခတပ်တော်(AA) ဟာ အရွယ်ရောက်သူတိုင်း စစ်မှုထမ်းရမယ့် အမျိုးသားကာကွယ်ရေးဆိုင်ရာအရေးပေါ်ပြဌာန်းချက်(NDEP)ကို ၂၀၂၅ ခုနှစ်ဆန်းပိုင်းမှာ ပြဌာန်းပြီးစစ်မှုထမ်းခေါ်ယူတာတွေ လုပ်နေခဲ့တာပါ။

အမျိုးသားဆိုရင် အသက် ၁၈ နှစ်ကနေ ၄၅ နှစ်ထိ၊ အမျိုးသမီးဆိုရင် ၁၈ နှစ်ကနေ ၃၅ နှစ်ထိ
၄၅ ရက် ကြာ စစ်သင်တန်းတက်ပြီး နှစ်နှစ်ကြာ စစ်မှုထမ်းရမယ့် အဲဒီဥပဒေမှာ ပြဌာန်းထားတာဖြစ်ပါတယ်။အဲဒီပြဌာန်းချက်ကို ရခိုင်ပြည်နယ်အတွင်းကမြို့နယ်အချို့မှာစတင်အကောင်အ
ထည်ဖော်နေတာပါ။ ရိုဟင်ဂျာလက်နက်ကိုင်အဖွဲ့တွေ လှုပ်ရှားမှုရှိပြီး ရွာသားတွေ မကြာခဏအ
သတ်ခံရတဲ့ ဘူးသီးတောင်၊ မောင်တော နယ်စပ်ဒေသတွေမှာတော့ စစ်မှုထမ်းလူဦးရေ တိုးခေါ်တာတွေ ရှိနေတယ်လို့ဒေသခံတွေကပြောပါတယ်။

မောင်တောခရိုင်မှ AA လက်အောက်ခံ ဝန်ထမ်းတဦးက “ဒီဘက်မှာကတော့ စစ်မှုထမ်းဆိုပေမယ့် အဓိက ရွာလုံ ခြုံရေးအတွက် ခေါ်တာပါ။ အဲဒါကို တချို့က နားလည်မှုလွဲတာပေ့ါ။ တပ်တော်ကလူတွေကလည်း စစ်သားတွေ ဆိုတော့ ပြေပြေလည်လည် မရှင်းပြဘူး။ဟိုဘက်ကလည်း နားလည်မှုလွဲ၊ ဒေါသထွက်ရင် ဒီဘက်ကလည်း ပြန် ဒေါသထွက်ဆိုတော့ မဖြစ်သင့်တာတွေ ဖြစ်သွားတာ” လို့ ပြောပါတယ်။

ဘင်္ဂလားဒေ့ရှ်နိုင်ငံနယ်စပ်မောင်တောခရိုင်အ
တွင်းမှာ ရိုဟင်ဂျာလက်နက်ကိုင်အဖွဲ့တွေ လှုပ်
ရှားမှုရှိပြီး ထင်းရှာ၊ ဟင်းခူး၊ စျေးဝယ်သွားလာကြတဲ့ ဒေသခံအရပ်သားတွေကို ဖမ်းဆီးတာ၊ သတ်
ဖြတ်တာ၊ AA စစ်ကြောင်းတွေကို ခြုံခို တိုက်ခိုက်တာတွေ မကြာခဏ လုပ်နေကြပါတယ်။