ရုပ်သံ - သရက်ခရိုင်အမှတ် (၄) တပ်ရင်း

မုံရွာမှာ မိုးကောင်းပြီး သစ်ပင်လဲပိလို့ ကား ၂စီး ပျက်စီး

ဇွန်-၁၊ ၂၀၂၆။ဇေအောင်/People's Spring

စစ်ကိုင်းတိုင်း၊ မုံရွာမြို့မှာ မိုးကောင်းပြီး သစ်ပင်လဲပိလို့ ကား ၂စီး ပျက်စီးခဲ့ကြောင်း ဒေသခံတွေက ပြောပါတယ်။

ဒီကနေ့ ဇွန်လ ၁ ရက် မနက် ၉နာရီခန့်က မုံရွာမြို့မှာ မိုးသည်းပြီး သာစည်လမ်း၊ မီးပွိုင့်အနီးက သစ်ပင်ပြိုလဲတာကြောင့် ဖြတ်သန်းသွားလာတဲ့ ကား ၂စီးပိမိခဲ့ကြောင်း ဒေသခံတွေက ပြောပါတယ်။

"ဟွန်ဒါဖစ်တစ်စီးနဲ့ လိုက်ထရပ်တစ်စီး ပိသွားတာ။ လိုက်ထရပ်က ပိုပျက်စီးတယ်။ လူထိခိုက်မှုမရှိဘူး"လို့ ဒေသခံတစ်ဦးက ဆိုပါတယ်။

ယခု ရက်တစ်ပတ်အတွင်း စစ်ကိုင်းတိုင်း အထက်ပိုင်း၊ တနင်္သာရီတိုင်း၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်၊ ကရင်ပြည်နယ်နှင့် မွန်ပြည်နယ်တို့မှာ နေရာကွက်ပြီး မိုးကြီးနိုင်ကြောင်း၊ လေပြင်းတိုက်ခတ် ခြင်း၊ လျှပ်စီးလက်ခြင်း၊ မိုးကြိုးပစ်ခြင်း၊ မြေပြိုခြင်း၊ တောင်ပြိုခြင်းနဲ့ ကမ်းပါးပြိုခြင်းတွေ ဖြစ်ပေါ် နိုင်လို့ အထူးသတိပြု နေထိုင်သင့်ကြောင်း အမျိုးသားညီညွတ်ရေးအစိုးရ (NUG) ရဲ့ လူမှုရေးရာ အလုပ်သမားနဲ့ လူသားချင်းစာနာထောက်ထားရေး ဝန်ကြီးဌာနက သတိပေးထားပါတယ်။

မြစ်ကြီးနား အင်အားဖြည့်တဲ့ယာဉ်အစီး ၂၀၀ခန့်ပါ စစ်တပ်ယာဉ်တန်း KIA တိုက်ခိုက်

-" အားလုံးဟန့်တားနိုင်တဲ့ အနေအထားတော့ မရဘူးပေါ့။ သူတို့လည်း တိုက်ပွဲဖြစ်ပြီးမှ ရုန်းကန်ပြီး ပြန်ထွက်လာတာဖြစ်ပါတယ်" - ဗိုလ်မှူးကြီးနော်ဘူ

ဇွန်-၁၊၂၀၂၆။ထားမြတ်/People’s Spring

ကချင်ပြည်နယ်၊ မြစ်ကြီးနားမြို့ရှိ မြောက်ပိုင်းတိုင်းစစ်ဌာနချုပ်(မပခ)ကို အာဏာသိမ်းစစ်တပ်က ယာဉ်အစီးရေ ၂၀၀ ခန့်နဲ့ အင်အားဖြည့်တင်းလာလို့ ခုခံတိုက်ပွဲတွေရှိခဲ့တယ်လို့ ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ဒီကနေ့ ဇွန် ၁ရက် မနက်မှာ ပြောပါတယ်။

" ယာဉ်တန်းတွေကို တိုက်ခိုက်တာတော့ရှိပါတယ်။ နန့်စီးအောင်ဘက်မှာ လည်း တိုက်ခိုက်မှုတွေရှိပါတယ်။ ဒါပေမဲ့ အားလုံးဟန့်တားနိုင်တဲ့ အနေအထားတော့ မရဘူးပေါ့။ သူတို့လည်း တိုက်ပွဲဖြစ်ပြီးမှ ရုန်းကန်ပြီး ပြန်ထွက်လာတာဖြစ်ပါတယ်” လို့ ဗိုလ်မှူးကြီးနော်ဘူက ပြောပါတယ်။

မေလ ၃၁ရက်မှာ မန္တလေးမြို့ဘက်ကနေ မြစ်ကြီးနားမြို့ကို စစ်တပ်ယာဉ် အစီး ၂၀၀ ဝန်းကျင် ဝင်လာတဲ့ သတင်းနဲ့ပတ်သက်ပြီး ဗိုလ်မှူးကြီးနော်ဘူက အခုလို ရှင်းပြတာဖြစ်ပါတယ်။

" ဒီမော်တော်ယာဉ်တွေက အဓိက ဘာကို တင်တယ်ဆိုတာတော့ သေချာ ပြည့်ပြည့်စုံစုံတော့ သတင်းမကြားရသေးဘူး။ သူတို့ရဲ့ စစ်လက်နက်တွေလား ရိက္ခာတွေလား လူအင်အားတွေလား ဆိုတာ အသေးစိတ်တော့ မသိရသေးပါဘူး” လို့ ဗိုလ်မှူးကြီးနော်ဘူက ပြောပါတယ်။

ဒါပေမဲ့ စစ်တပ်ဘက်က ယာဉ်တွေ ဝင်ရောက်လာတဲ့အပေါ် အချက် ၂ချက် သုံးသပ်မိကြောင်း ပြောပါတယ်။

“ပထမကတော့ ကျနော်တို့ ကချင်ပြည်နယ်မှာ ကုန်းလမ်းဆက်သွယ်မှု လည်း အခက်အခဲတွေ အများကြီးရှိတဲ့အခါကျတော့ စားနပ်ရိက္ခာတွေ တခြားသော လိုအပ်တဲ့ဟာတွေ အခုကတည်းက ထောက်ပို့ထားတာလည်းဖြစ်နိုင်တာပေါ့။ မိုးတွင်းအတွက်ပေါ့လေနော်။ နောက်တခုကတော့ သူတို့ စစ်ဆင်ရေး ဖော်ဆောင်ဖို့ လိုအပ်တာတွေကို သူတို့ ပြင်ဆင်ထားတာလည်း ဖြစ်နိုင်တာပေါ့။ သူတို့ ရက် ၁၀၀ စီမံကိန်းထဲမှာ ကျနော်တို့ ကချင်ပြည်နယ် မြို့နယ် ၅ခုကို သူတို့ စစ်ဆင်ရေးလုပ်ဖို့ သူတို့ ပြောထားတာရှိတယ်လေ။ ဆိုတော့ အဲဒါအတွက် သူတို့ လိုအပ်တာတွေ ပြင်ဆင်ထားတာလည်းဖြစ်နိုင်ပါတယ်” လို့ ဗိုလ်မှူးကြီးနော်ဘူက ပြောပါတယ်။

အာဏာသိမ်းစစ်တပ်ဟာ ဆုံးရှုံးနယ်မြေတွေ ပြန်ရဖို့ ကြိုးပမ်းနေပြီး နေရာဒေသ အသီးသီးကို စစ်အင်အားအလုံးအရင်းနဲ့ ထိုးစစ်ဆင်နေတာဖြစ်ပါတယ်။ အဲဒီလို ထိုးစစ်ဆင်ရာမှာ ကချင်ပြည်နယ်ဘက်ကိုလည်း စစ်အင်အားတွေ ဖြည့်တင်းတာ အင်အားအလုံးအရင်းနဲ့ စစ်ကြောင်းထိုးတာတွေကြောင့်ရွှေကူမြို့နယ်ဘက်မှာ တိုက်ပွဲတွေ ဆက်တိုက်ပြင်းထန်နေပါတယ်။

“ရွှေကူငါးအိုးဘက်မှာ တိုက်ပွဲရှိပါတယ်။ သူတို့ ထိုးစစ်ဆင်တာလည်း အခုထက်ထိ ပြန်ရုတ်တာမရှိသေးဘူး။ ဆိုတော့ အချိန်မရွေး နေ့တိုင်းလို တိုက်ပွဲတွေဖြစ်ပါတယ်။ တခြားနေရာမှာကတော့ ပြင်းပြင်းထန်ထန် တိုက်ပွဲရှိတာ အခုတပတ်ကတော့ မရှိဘူး” လို့ ဗိုလ်မှူးကြီးနော်ဘူက ကချင်ဒေသ လတ်တလော စစ်ရေး အခြေအနေကို ပြောပါတယ်။

စစ်တပ်က ရိက္ခာယာဉ်တန်းတွေ ဖြတ်သန်းသွားပါက ကားလမ်းတွေပိတ်ပြီး ရပ်တန့်ပေးရတာကြောင့် ကုန်တင်ယာဉ်တွေနဲ့ ခရီးသည်တင်ယာဉ်တွေဟာ သွားလာရေးအခက်တွေ့နေရပါတယ်။

ကချင်ပြည်နယ်ကိုဝင်​ရောက်လာတဲ့စစ်တပ်ယာဥ်တန်းကို​မေလကုန်ပိုင်းမှာ​တွေ့ရစဥ်။ဓါတ်ပုံ-CJ

မိခင်ရဲ့မွေးနေ့အတွက် ၈၁ ကီလိုမီတာ စကိတ်စီးမယ့် ကင်မ်

ဇွန်-၁၊၂၀၂၆။သတိုး/People's Spring

စစ်တပ်ရဲ့မတရားဖမ်းဆီးခံထားရတဲ့ လူထုခေါင်းဆောင် ဒေါ်အောင်ဆန်းစုကြည်ရဲ့ (၈၁) နှစ်ပြည့်မွေးနေ့ အမှတ်တရအတွက် ၈၁ ကီလိုမီတာ စကိတ်စီးသွားမယ်လို့ သားဖြစ်သူ ကင်မ်အဲရစ်(ခ)ကိုထိန်လင်း ကပြောပါတယ်။

"မြန်မာနိုင်ငံမှာ မွေးနေ့ဆိုရင် လက်ဆောင် ပေးတတ်ကြပါတယ်။မေမေရဲ့ ၈၁ နှစ်မြောက် မွေးနေ့ အတွက် တစ်ခုခု လုပ်ချင်ပါတယ်။မနှစ်က ကျွန်တော် ၈ ရက်အတွင်း ၈၀ ကီလိုမီတာ ပြေးခဲ့ပါတယ်။ဒီနှစ်မှာတော့ တစ်ရက်တည်းနဲ့ ၈၁ ကီလိုမီတာ စကိတ်စီးသွားမှာပါ။" လို့ ဒီနေ့(‌ဇွန်၁) မှာ ကင်မ်ရဲ့ဖေ့စ်ဘွတ်ခ်ကနေ ဗီဒီယိုဖိုင်နဲ့ အသိပေးထားတာပါ။

ဒါ့အပြင် စစ်တပ်အနေနဲ့ ဒေါ်အောင်ဆန်းစုကြည် အသက်ရှင်နေကြောင်း သက်သေပြဖို့ ပြုလုပ်နေတဲ့ Proof Of Life လှုပ်ရှားမှုမှာ ပါဝင်ကြဖို့ တိုက်တွန်းထားပါတယ်။

"ပါဝင်သူ များလာလေလေ၊ ကျွန်တော်တို့ရဲ့ စုပေါင်းအသံ ပိုမိုကျယ်လောင်လာလေလေ၊ အမှန်တရားကို တောင်းဆိုတဲ့ ကမ္ဘာကြီးရဲ့ အသံကို လျစ်လျူရှုဖို့ ပိုခက်ခဲလာလေလေ ဖြစ်ပါတယ်။
ကျွန်တော်တို့ အတူတကွ မျှော်လင့်ချက်ကို တည်ဆောက်နိုင်ပါတယ်။ အမှန်တရားအတွက် တောင်းဆိုသံကို ပိုမိုကျယ်လောင်စေနိုင်ပါတယ်။" လို့ ကင်မ်က ပြောပါတယ်။

ဇွန် ၁၉ မှာ ကျရောက်မယ့် ဒေါ်အောင်ဆန်းစုကြည်ရဲ့ ၈၁ နှစ်ပြည့်အမှတ်တရ အနေနဲ့ ပြည်သူတွေဘက်က ၈၁ နဲ့ သက်ဆိုင်တဲ့ လှုပ်ရှားမှုတွေကို ဇွန် ၁ ကနေ ၁၉ ရက်အတွင်းပြုလုပ်ကြဖို့ တိုက်တွန်းထားပါတယ်။

Proof Of Life ကမ်ပိန်းကို ဧပြီ တတိယပတ်မှာကင်မ် ဦးဆောင်ပြီး စတင်ခဲ့ပေမယ့် စစ်တပ်ဘက်ကတစ်စုံတစ်ရာ ထုတ်ပြန်တာမျိုးမရှိသေးပါဘူး။

"ရိုးရှင်းတဲ့ မေးခွန်းတစ်ခုကို အတူတကွ မေးကြရအောင်။"ကျွန်တော့်မေမေ အသက်ရှင်နေသေးရဲ့လား?" " လို့ ကင်မ်က မေးခွန်းထုတ်ထားပါတယ်။

နမ့်ခမ်းပေါက်ကွဲမှု အိုးအိမ်မဲ့သွားသူတွေအတွက်
အရေးပေါ် အကူအညီလိုအပ်

ဇွန်-၁၊၂၀၂၆။ဇော်ရမ်း/People’s Spring

ရှမ်းပြည်နယ်မြောက်ပိုင်း၊ နမ့်ခမ်းမြို့နယ် ၊ကောင်းတပ်ရွာမှာ မေလ ၃၁ရက်ကပေါက်ကွဲမှုကြောင့် အိမ်ခြေ ၂၀၀ ခန့် ထိခိုက်ပျက်စီးသွားခဲ့ပြီး အိုးမဲ့အိမ်မဲ့ဖြစ်သွားသူတွေအတွက် အကူအညီတွေပေးကြဖို့ ဒေသခံလူမှုကူညီရေးအဖွဲ့တွေကတောင်းဆိုပါတယ်။

ပေါက်ကဲမှုဖြစ်စဉ်မှာ ဒေသခံပြည်သူ ၅၅ဦး သေဆုံးပြီး ၇၀ ဦးကျော် ဒဏ်ရာရရှိခဲ့တယ်လို့ တအာင်းပြည်ကောင်စီ(TLC) ကထုတ်ပြန်ထားပါတယ်။ ပေါက်ကွဲမှုဖြစ်တဲ့နေရာရဲ့ပတ်ချာလည်က အိမ်တစ်ရာကျော် ပျက်စီးခဲ့ပြီး နောက်ထပ်တစ်ရာကျော်ခန့်က အနည်းငယ်ပျက်စီးခဲ့တယ်လို့ ကယ်
ဆယ်ရေးကူညီလုပ်ဆောင်နေသူကပြောပါတယ်။

အသေးစိတ်အတည်မပြုနိုင်သေးပေမယ့် လူ‌ဦး
ရေ ၅၀၀ နီးပါးဟာ အိုးမဲ့အိမ်မဲ့အခြေအနေရင်ဆိုင်လိုက်ရတာမို့ အကူအညီတွေ အရေးပေါ် လိုအပ်နေတဲ့အခြေအနေလို့သိရပါတယ်။

"အသက်သေဆုံးသွားတဲ့သူတွေကိုတော့ရှင်အောင်ပြန်လုပ်လို့မရတော့ဘူး။ရှင်သန်ကျန်ရစ်ခဲ့တဲ့သူတွေအတွက်အကူအညီတွေအများကြီးလိုနေတယ်။ဒါကအရေးပေါ်အခြေအနေဖြစ်နေတာပါ"လို့ နမ့်ခမ်းမြို့ခံတဦးကပြောပါတယ်။

ပေါက်ကွဲမှုကြောင့် သေဆုံးသူဦးရေဟာ ဇွန်လ ၁ရက်မနက်အထိ ကလေးငယ်အချို့အပါအဝင် အမျိုးသား ၃၅ဦး၊ အမျိုးသမီး၂၀ဦးရုပ်အလောင်း
တွေ့ရှိထားပြီး အပျက်အစီးတွေကြားမှာ ဆက်
လက်ရှာဖွေနေဆဲဖြစ်ပါတယ်။

"၅၅ဦး သဂြိုလ်ပြီးပြီ။အပိုင်းအစတွေနဲ့အလောင်းမရသေးတာ ရှာနေဆဲ။ ကျန်သေးတယ်"လို့ ပြောပါတာကယ်ဆယ်ရေးကူညီလုပ်ဆောင်နေသူတစ်ဦးကပြောပါတယ်။

ဒဏ်ရာရသူ ၇၀ ကျော်ကိုလည်း နမ့်ခမ်းဆေးရုံမှာ တင်ပို့ကုသထားပြီး သွေးအပါအဝင် အကူအညီတွေလိုအပ်နေပါတယ်။

တအာင်းပြည်ကောင်စီ(TLC) ကလည်း နေရာဒေသ အသီးသီးရှိ ပြည်သူများအနေဖြင့် ကောင်းတပ်ရွာ ပြည်သူတွေ အမြန်ဆုံး ပြန်လည်ထူထောင်နိုင်ရေးအတွက် ပေါက်ကွဲမှုဖြစ်စဉ်ကြောင့် ထိခိုက်သေဆုံးသူတို့ရဲ့ကျန်ရစ်သူမိသားစုဝင်​တွေ၊ ထိ
ခိုက်ဒဏ်ရာရ သူများနဲ့ နေအိမ်အဆောက်အအုံများ ပြန်လည်တည်ဆောက်ဖို့ တတ်စွမ်းသမျှ ဝိုင်းဝန်းကူညီပံ့ပိုးဖေးမ​ပေးကြဖို့လည်းတိုက်တွန်းထားပါတယ်။

အိမ်ပျက်စီးလို့ နေစရာမရှိတော့သူတွေကို တအောင်းတပ် TNLAက နေရာချထား‌ရေးဆောက်ရွက်နေပေမယ့် အကူအညီတွေ လိုအပ်နေတယ်လို့ သိရပါတယ်။ရွာလုံးကျွတ်နီးပါး အိုးမဲ့၊အိမ်မဲ့ဖြစ်ရပြီး အဲဒီအတွက် ကူညီပေးနိုင်ဖို့ မြို့ခံတွေကလည်း ကြိုးပမ်းနေတယ်လို့ ဒေသခံတွေကပြောပါတယ်။

တအာင်းအမျိုးသားလွတ်​မြောက်​ရေးတပ်မ
တော်(TNLA)ခေါင်းဆောင်ပိုင်းအနေနဲ့ ပေါက်ကွဲမှုဖြစ်စဉ်အကြောင်းရင်းအမှန်ကိုအသေးစိတ်စုံစမ်းစစ်ဆေးပြီး ဖြစ်စဉ်အပေါ် တာဝန်ခံမှု တာဝန်ယူမှု အပြည့်ရှိရန်၊ တာဝန်ရှိသူများကို ဥပဒေနှင့်အညီ အရေးယူဆောင်ရွက်ပေးရန်၊ ပြန်လည် ထူထောင်ရေးလုပ်ငန်းတွေ အမြန်ဆုံး ဆောင်ရွက်ပေးရန်နဲ့ မည်သည့်ကိစ္စရပ်မျိုးကိုမဆို ပြုလုပ်ပါက ပြည်သူလူထု အန္တရာယ်ကင်းရှင်း‌‌ရေးနဲ့ လုံခြုံ
ရေးအား အထူးဂရုပြုလုပ်ဆောင်ရန် တအာင်းပြည်ကောင်စီက ထုတ်ပြန်ထားပါတယ်။

ပေါက်ကွဲမှု​ကြောင့် ပြိုကျပျက်စီးသွားတဲ့အိမ်အတွင်းက​လေးငယ်တဦးကို​တွေ့ရစဥ်။
ဓါတ်ပုံ-TWO

အင်းတော်မြို့အနီး တိုက်ပွဲတွေပြင်ထန်နေပြီး စစ်တပ် သေဆုံးမှုများ

ဇွန်-၁၊၂၀၂၆၊ရှိန်း/ People's Spring

စစ်ကိုင်းတိုင်း၊အင်းတော်မြို့နယ်အနောက်ခြမ်းမှာ ကချင်လွတ်လပ်ရေးတပ်မတော် (KIA)အပါအဝင် PDF ပူးပေါင်းတပ်တွေနဲ့ စစ်တပ်တို့ နေ့စဉ်တိုက်ပွဲတွေပြင်းထန်နေပြီး စစ်တပ်က အကျဆုံးများကာ အရာရှိတွေလည်း ဒဏ်ရာပြင်းပြင်းထန်ထန်ရထားတယ်လို့ တော်လှန်ရေးတပ်တွေက ပြောပါတယ်။

အင်းတော်မြို့ရဲ့ အနောက်ဘက်က ကျေးရွာတွေမှာတိုက်ပွဲဖြစ်နေတာဖြစ်ပြီး စစ်တပ်က ခံစစ်အနေနဲ့သာခုခံနေတယ်လို့ ဆိုပါတယ်။

" စကစဘက်က အရာရှိတွေ အပါအဝင်အထိခိုက် တော်တော်များတယ်လို့ အတွင်းသတင်းရထားတာရှိတယ်။ဒီဘက်ကလည်း ဒရုန်းတွေ၊ လက်နက်ကြီးတွေနဲ့ ထိုးစစ်ဆင်နေသလို စကစဘက်ကလည်း နေ့တိုင်း လေကြောင်းနဲ့ ထွက်ပေါက် ရအောင်လုပ်နေတယ်"လို့ တိုက်ပွဲမှာပါဝင်တဲ့ တော်လှန်ရေးတပ်နဲ့ နီးစပ်သူတစ်ဦးက အခြေအနေကို ရှင်းပြပါတယ်။

စစ်တပ်က တပ်စိတ်တချို့လည်း ပိတ်မိနေတာရှိပြီး လေယာဉ်ပစ်ကူနဲ့ ဖောက်ထွက်ဖို့ကြိုးစားနေတယ်လို့ သိရပါတယ်။

"အခြေအနေကတော့ သူ့ဘက်က တိုးလိုက်၊ကိုယ့်ဘက်က တိုးလိုက်ပဲ။မနေ့ကတော့ တိုက်ပွဲငြိမ်နေတယ်"လို့ တော်လှန်ရေးတပ်ဖွဲ့ဝင်တစ်ဦးက ပြောပါတယ်။

လက်ရှိမှာ အင်းတော်မြို့အတွင်းကို ပြည်သူတွေလည်း ပြန်မဝင်ရဲသေးဘူးလို့ သိရပါတယ်။

မော်လူးမြို့ကိုတော့ ဒီတပတ်နောက်ဆုံးထာပြီး ပြည်သူတွေ မြို့ထဲဝင်ကြဖို့နဲ့ မဝင်ရင် နေအိမ်တွေ ချိတ်ပိတ်မယ်လို့ စစ်တပ်က ခြိမ်းခြောက်သတင်းလွှင့်ထားပါတယ်။

မေလ ၃၁ရက် မနေ့ကမနက်ပိုင်းမှာ စစ်တပ်က မော်လူးမြို့အနီးကို လေယာဉ်နဲ့ ဗုံးကြဲသွားတယ်လို့ သိရပါတယ်။

(၂၀၂၅ ဧပြီက အင်းတော်မြို့သိမ်းတိုက်ပွဲအတွင်း တော်လှန်ရေးတပ်တွေ သိမ်းရတဲ့ လက်နက်ခဲယမ်းတွေ။ ဓာတ်ပုံ - Padang Nsen)

မန်ချက်စတာ ယူနိုက်တက်အသင်းရဲ့ အိုးထရက်ဖို့ဒ် (Old Trafford)၊ ဘာစီလိုနာအသင်းရဲ့ ကမ့်နူး (Camp Nou) နဲ့ ရီရဲလ်မက်ဒရစ်အသင်းတို့ရဲ့ ဆန်တီယာဂို ဘာနေဗျူး အစရှိတဲ့ ကမ္ဘာကျော်ဘောလုံးအားကစားကွင်းကြီးတွေ အကြောင်းကို ဘောလုံးဝါသနာအိုးတိုင်း သိကြပါလိမ့်မယ်။

ကွင်းထဲမှာအံ့မခန်းအားပေးနေကြတဲ့ပရိသတ်တွေ၊ ခမ်းနားထည်ဝါလှတဲ့အနုပညာမြောက် ဗိသုကာလက်ရာတွေနဲ့ ပြည့်နှက်နေတဲ့ ဒီဘောလုံးကွင်းကြီးတွေဟာ အလွန်အင်မတန် ကြီးကျယ်ခမ်းနားလွန်းလှပါတယ်။ အဲဒီဘောလုံးအားကစာကွင်းကြီးတွေထဲ ကိုယ်တိုင်းမရောက်ဖူးရင်တောင် တီဗွီဖန်သားပြင်ပေါ်မှာ မြင်ရတဲ့ မြင်ကွင်းတွေနဲ့တင် ဘယ်လောက်တောင် ကြီးကျယ်ခမ်းနာလိုက်သလဲဆိုတာ ပေါ်လွင်နေပါပြီ။

ဒါပေမဲ့လည်း အဲဒီကမ္ဘာကျော်ဘောလုံး အားက
စားကွင်းကြီးတွေ ပိုင်ဆိုင်မထားဘဲ ကမ္ဘာပေါ်က ဘယ်ဘောလုံးကွင်းမှာမှ မရှိနိုင်တဲ့ အံ့ဩမင်သက်စရာ ထူးခြားတဲ့ ဘောလုံးကွင်းတစ်ခုဟာ မြန်မာ
နိုင်ငံရဲ့ ဝေးလံခေါင်သီလှတဲ့ နယ်စပ်ဒေသက ရွာလေးတစ်ရွာမှာ တည်ရှိနေတယ်ဆိုတာကိုတော့ သိရှိသူ နည်းကြပါလိမ့်မယ်။

အဲဒါကတော့မြန်မာ-အိန္ဒိယနယ်စပ်စည်းပေါ်မှာ ကွက်တိကျရောက်နေတဲ့ လုံဝသင်္ခရွာက ဘောလုံးကွင်းလေးပဲ ဖြစ်ပါတယ်။လုံဝသင်္ခရွာဟာစစ်ကိုင်း
တိုင်း နာဂကိုယ်ပိုင်အုပ်ချုပ်ခွင့်ရဒေသထဲက လဟယ်မြို့နယ်မှာ တည်ရှိတာဖြစ်ပြီး နှစ်နိုင်ငံ နယ်
စပ်စည်းမျဉ်းက ရွာလယ်ခေါင်ကနေ ဖြတ်သန်းသွားတာပါ။

ဒီဘောလုံးကွင်းလေးထဲမှာဘောလုံးကန်နေတဲ့ ရွာကလူငယ်တွေဟာ ဂိုးတစ်ဖက်ကို ဂိုးသွင်းလိုက်ရင် မြန်မာနိုင်ငံ ဘက်ခြမ်းကို ဂိုးသွင်းလိုက်တာဖြစ်ပြီး နောက်ထပ် ဂိုးတစ်ဖက်ကို သွင်းလိုက်ရင်တော့ အိန္ဒိယနိုင်ငံဘက်ခြမ်းကို သွင်းလိုက်တာမျိုးပါ။ နယ်စပ်မျဉ်းဟာ ဘောလုံးကွင်းရဲ့ အလျားလိုက် ခပ်စောင်းစောင်အနေအထားနဲ့ ဖြတ်သွားပြီး ဂိုးတစ်ဖက်က မြန်မာဘက်ခြမ်းနဲ့ တစ်ဖက်က အိန္ဒိယဘက်ခြမ်းမှာ ရှိနေတာပါ။

“ကျနော်တို့က တစ်ရွာတည်းဆိုတော့ မြန်မာခြမ်း၊ အိန္ဒိယခြမ်း မခွဲခြားဘူးလေ”လို့ ဘောလုံးကန်တဲ့အခါ အတူတူကန်ကြတဲ့အကြောင်း လုံဝသင်္ခရွာသား ကိုဂတ်ဖားက ပြောပါတယ်။


https://www.ludunwayoo.com/feature-mm/2026/06/01/158699/

မြိုင် လက်ယက်မရွာကို စစ်တပ် အသေခံဒရုန်းနဲ့တိုက်ခိုက်၊ ပြည်သူအချို့ဒဏ်ရာရ

ဇွန်-၁၊၂၀၂၆။ဟာနာဆန်/People's Spring

မကွေးတိုင်း၊ မြိုင်မြို့နယ်က လက်ယက်မစံပြကျေးရွာ တိုက်နယ်ဆေးရုံအနီးကို စစ်တပ်က အသေခံဒရုန်း၂စီးနဲ့ တိုက်ခိုက်လို့ ပြည်သူအချို့ဒဏ်ရာရပြီး နေအိမ် ၁လုံး ပျက်စီးခဲ့ပါတယ်။

ဒီကနေ့ ဇွန်လ ၁ ရက် မနက် ၁၂ နာရီခန့်က မြိုင်မြို့နယ်၊ လက်ယက်မ(စံပြ)ကျေးရွာအရှေ့တောင်ပိုင်း ဆေးရုံ တောင်ဘက်တစ်လမ်းကျော်ကို မုံရွာမြို့၊ အနောက်မြောက်တိုင်း စစ်ဌာနချုပ်ကနေ တက်လာတဲ့ အသေခံ ဒရုန်း ၂ စီးနဲ့ တိုက်ခိုက်ခဲ့ကြောင်း ဒေသခံတွေက ပြောပါတယ်။

အဲဒီတိုက်ခိုက်မှုကြောင့် အမျိုးသမီး ၂ ဦး ထိခိုက်ဒဏ်ရာရရှိပြီး နေအိမ် ၁ လုံး ပျက်စီးသွားကြောင်း ဒေသခံတွေက ပြောပါတယ်။

"ဆေးရုံက မလည်ပတ်ဘူး။ ဆေးရုံက အဟောင်းကြီးပဲ။ အဲအတိုင်းကြီးပဲ ပစ်ထားတာ။ ဘယ်သူမှမနေကြဘူး"လို့ ဒေသခံတစ်ဦးက ပြောပါတယ်။

လက်ယက်မကျေးရွာအနီးမှာ ကန်နီပျူစောထီးကျေးရွာရှိပြီး အဲဒီပျူရွာဟာ စီးပွားရေးကောင်းတဲ့ လက်ယက်မစံပြကျေးရွာကို ယခင်ကတည်းက ပြိုင်ဘက်ရွာလို့ သဘောထားတဲ့အတွက် အဲဒီအငြှိုးတွေနဲ့ပါ စစ်တပ်ကို မကြာခဏ တိုက်ခိုက်ခိုင်းနေတာလို့ ယူဆဖွယ်ရှိကြောင်း အညာမြေအရပ်ဖက်အဖွဲ့အစည်းမြိုင်ရဲ့ တာဝန်ရှိသူ ဆရာထွေးက ပြောပါတယ်။

"ကန်နီပျူရွာကနေ လက်ယက်မကို တိုက်ခိုက်ဖို့၊ ဖြိုဖျက်ပစ်ဖို့ စစ်တပ်လော်ဘီတွေက တင်တာလည်းရှိတယ်။"လို့ ဆရာထွေးက ပြောပါတယ်။

လက်ယက်မကျေးရွာဟာ အာဏာသိမ်းကာလအစောပိုင်းက စစ်တပ်စစ်ကြောင်းတွေ စထိုးစဥ်ကတည်းက မီးရှို့ခံရတဲ့ ကျေးရွာဖြစ်ပြီး အိမ်ခြေ ၅၀၀ ကျော် ပြာကျခဲ့ပါတယ်။ ဒါ့အပြင် လေကြောင်းတိုက်ခိုက်မှုတွေလည်း မကြာခဏ တိုက်ခိုက်ခံရဖူးပါတယ်။

ဒီကနေ့မနက်ပိုင်းကပဲ မြိုင်မြို့နယ်တောင်ပိုင်း တကစ-၃ ဒေသအခေါ် စက်မှု-၂ကနေ စစ်တပ်စစ်ကြောင်းတစ်ကြောင်း ထွက်လာပြီး ကုန်းရွာအတွင်း ဝင်ရောက်ကာ နေအိမ်တွေကို မီးရှို့ဖျက်ဆီးကြောင်း ဒေသခံတွေက ပြောပါတယ်။

(တိုက်ခိုက်ခဲ့သော အသေခံဒရုန်း၏ အပိုင်းအစများ၊ ပျက်စီးသွားသော နေအိမ်။ ဓါတ်ပုံ-ဒေသခံပေးပို့)

တောင်သာနယ်ကို စစ်ကြောင်း ၃ကြောင်းနဲ့ စစ်တပ် ဝင်နေ၊ နေအိမ်အချို့ မီးရှို့ဖျက်ဆီး

ဇွန်-၁၊၂၀၂၆၊ရှိန်း/ People's Spring

မန္တလေးတိုင်း၊တောင်သာမြို့နယ်ကို စစ်တပ်က စစ်ကြောင်း ၃ကြောင်းနဲ့ ထိုးလာပြီး လေယာဉ်နဲ့ ဗုံးကြဲတာ၊ လက်နက်ကြီးတွေနဲ့လည်း ပစ်ခတ်နေတယ်လို့ ပြည်သူတချို့ထိခိုက်ဒဏ်ရာရခဲ့တယ်လို့ ဒေသခံ တွေက ပြောပါတယ်။

မေလ ၃၁ရက်က ကျောက်ပန်းတောင်းမြို့နယ်ဘက်ကနေ စစ်ကြောင်းတစ်ကြောင်းထိုးလာပြီး မြင်းခြံကုန်းရွာဘက်ရောက်နေတယ်လို့ သိရပါတယ်။

ဘုရားလှကျေးရွာဘက်ကလာတဲ့ စစ်ကြောင်းဟာလည်း ခြုံကြီးရွာကနေ ညောင်တိုကျေးရွာဘက်ကို စစ်ကြောင်းထိုးလာပြီး နေအိမ်တချို့မီးရှို့ဖျက်ဆီးထားတယ်လို့ သိရပါတယ်။

ဒါ့အပြင် ဝဲလောင်- တောင်သာလမ်းပိုင်းက စစ်ကြောင်းကလည်း ကိုင်းချောင်းတံတားထိပ်မှာ ဂိတ်ချပြီး လမ်းသွားလာနေတဲ့ ခရီးသွားပြည်သူတွေဆီကနေ ပိုက်ဆံတောင်းနေတယ်လို့ ဒေသခံတွေက ပြောပါတယ်။

မေလ ၃၁က် ည ၇နာရီမှာလည်း တံတားကျေးရွာရဲ့အရှေ့ဘက်က မုန်ရိးရွာရဲ့တာဝါတိုင်အနီးကို စစ်တပ်က လေကြောင်းတိုက်ခိုက်သွားတာမို့ ထိခိုက်ဒဏ်ရာရသူ‌တွေ ရှိတယ်လို့ သိရပါတယ်။

လက်ရှိအချိန်အထိ အဲဒီစစ်ကြောင်းတွေနဲ့ တော်လှန်ရေးတပ်တွေ တိုက်ပွဲဖြစ်ပွားမရှိဘဲ စစ်တပ်က နတ်စောင့်ခွဲရုံ၊နွားထိုးကြီးမြို့ဘက်ကနေ ဟောင်ဝစ်ဆာနဲ့ ပစ်ခတ်တာတွေလည်းရှိ တယ်လို့ သိရပါတယ်။

" ဘာလို့စစ်ကြောင်း တွေထိုးလဲဆိုတာတော့ ခန့်မှန်းရခက်ပါတယ်။ကြားတာကတော့ စာသင်ကျောင်းတွေ ပြန်ဖွင့်ဖို့ ဖိအားပေးတယ်လို့လည်း ပြောတယ်။တဖက်မှာလည်း NUGစာသင်ကျောင်းတွေ မဖွင့်‌ အောင် ကျေးရွာတွေဘက်က စာသင်ကျောင်းတွေကို ဟောင်ဝစ်ဆာတွေနဲ့ပစ်တယ်"လို့ ဒေသခံက ပြောပါတယ်။

ဇွန်လ ၁ရက် ဒီနေ့မနက်ပိုင်းကပစ်ခတ်တဲ့ ဟောင်ဝစ်ဆာ ၅လုံးမှာ ၂လုံးဟာ တောင်သာမြို့နယ်က စာသင်ကျောင်းပေါ် ကျပြီး ကျောင်းဆောင်ပျက်စီးခဲ့တယ်လို့ သိရပါတယ်။

စစ်အာဏာရှင်စနစ်က ပုံစံမျိုးစုံနဲ့ ဒုက္ခပေးနေတာဖြစ်လို့ ညီညွတ်မှုပြပြီး နိုင်ငံနဲ့ ပြည်သူကို ဝိုင်းစောင့်ရှောက်ဖို့ NUG ယာယီသမ္မတ တိုက်တွန်း

စစ်အုပ်စုကိုနိုင်ငံရေးအရ ပိတ်ဆို့နိုင်ဆဲ၊စစ်ရေးအရဖိအားပေးနိုင်ဆဲဖြစ်ပေမယ့် အရှိတရားရှုမြင်ပြီး ပူးပေါင်းမှုတိုးမြှင့်ဖို့ အရေးကြီးဟု CRPH ဥက္ကဋ္ဌပြော

ဇွန်-၁၊ ၂၀၂၆။ ထားမြတ်/People’s Spring

ခေတ်အဆက်ဆက် နှစ်ပေါင်းများစွာ အမြစ်တွယ်လာတဲ့ စစ်အာဏာရှင်စနစ်ဟာ ပြည်သူလူထုကို ပုံစံမျိုးစုံ ဒုက္ခပေးနေတာ တွေ့နေရပြီး တော်လှန်ရေးအင်အားစုတွေအနေနဲ့ ပြည်သူ့ဒုက္ခတွေ အမြန်ဆုံး နိဂုံးချုပ်အောင် ဝိုင်းဝန်းကြိုးစားဖို့ လိုအပ်ကြောင်း အမျိုးသားညီညွတ်ရေးအစိုးရ(NUG) ယာယီသမ္မတ ဒူဝါလရှီးလက တိုက်တွန်းပြောကြားပါတယ်။

ဒီကနေ့ ဇွန်လ ၁ရက်မှာ ကျင်းပတဲ့ ပြည်ထောင်စုလွှတ်တော် ဒဿမအကြိမ် အစည်းအဝေးမှာ ယာယီသမ္မတက မိန့်ခွန်းပြောကြားခဲ့ရာ ၂၀၂၁ စစ်အာဏာသိမ်းမှု နောက်ပိုင်း နိုင်ငံ၊စီးပွားရေး အခြေအနေ ဆိုးရွားလာမှု ပြည်သူလူထုရဲ့ နေ့စဉ်ဘ၀ နိမ့်ကျယိုယွင်းလာမှုနဲ့ ပြည်သူလူထုရဲ့ လုံခြုံမှု လုံး၀နီးပါး ဖျက်ဆီးခံရမှု အခြေအနေတွေကို ပြောပြကာ ဒီအခြေအနေတွေက လွတ်မြောက်ရေး ၀ိုင်းကြိုးပမ်းဖို့ အခုလို တိုက်တွန်းခဲ့တာဖြစ်ပါတယ်။

စစ်အာဏာရှင်စနစ်ဆိုးကပေးတဲ့ အထွေထွေသော ဒုက္ခတွေကို ပြည်သူတရပ်လုံးက ခါးစည်းခံနေရပြီး စစ်အာဏာရှင်ဟာ စစ်တပ်အကျိုးစီးပွားနဲ့ အာဏာအကျိုးစီးပွားအတွက် နိုင်ငံနဲ့ ပြည်သူကို နင်းချစတေးနေတာ စိတ်မကောင်းစွာ တွေ့ရတယ်လို့ ယာယီသမ္မတက ပြောပါတယ်။

“ကျနော်တို့ နိုင်ငံမှာ စစ်အာဏာသိမ်းမှု ဖြစ်လိုက်တိုင်း နောက်ဆက်တွဲဆိုးကျိုးတွေကို နှစ်ပေါင်းများစွာ ခံစားခဲ့ကြရပါတယ်။ အခုလည်း ၂၀၂၁ စစ်အာဏာသိမ်းမှုက ကျနော်တို့ နိုင်ငံကို ကမ္ဘာ့အလယ်မှာ မျက်နှာမဖော်ဝံ့အောင်ဖြစ်စေခဲ့ပါတယ်။ ကျနော်တို့ အနေနဲ့ စုစည်းညီညွတ်မှုကို ပြသပြီး မိမိတို့ တိုင်းပြည်နဲ့ ပြည်သူကို ဝိုင်းဝန်းစောင့်ရှောက်ကြဖို့ ဖြစ်ပါတယ်” လို့ ယာယီသမ္မတက ပြောပါတယ်။

ဒါ့အပြင် တော်လှန်ရေးမဟာမိတ်အင်အားစုတွေကို ဦးဆောင်မှု ထီးရိပ်တခုတည်းအောက်မှာ ၀ိုင်းဝန်းပုံဖော်ဖို့ ရည်ရွယ်ပြီး ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ(SCEF)ကို ဖွဲ့စည်းထားကြောင်း ယာယီသမ္မတက ပြောကြားပြီး လွှတ်တော်ကိုယ်စားလှယ်တွေအနေနဲ့ SCEF ရဲ့ ဦးဆောင်မှု တိုးတက်စေရေး ၀ိုင်းဝန်းကူညီပေးဖို့ တိုက်တွန်းခဲ့ပါတယ်။

ပိုမိုစုဖွဲ့မှုအားကောင်းတဲ့ ဦးဆောင်ကောင်စီတစ်ခုဖြစ်အောင် ထပ်မံ တိုးချဲ့ဖို့ လုပ်ဆောင်နေကြောင်းလည်း အသိပေးပါတယ်။

“အဲဒီအတွက် ကျနော်တို့အားလုံးမှာ ညီညွတ်မှုနဲ့ ကြံ့ကြံ့ခံနိုင်စွမ်းက အရေးကြီးပါတယ်။ ညီညွတ်မှုမရှိရင် ကျနော်တို့မှာ ကြံ့ကြံ့ခံနိုင်စွမ်း နိမ့်ပါးလာမယ်ဆိုတာ သတိချပ်ဖို့ ဖြစ်ပါတယ်။ ကြံ့ကြံ့ခံနိုင်စွမ်း ဘယ်လောက်ပဲရှိသည်ဖြစ်စေ ညီညွတ်မှုမရှိရင် ကျနော်တို့ဟာ ပြိုလဲဖို့ လွယ်ကူနိုင်ပါတယ်။ ကျနော်တို့ အနေနဲ့ အင်မတန်အကဲဆက်ပြီး အချိုးအကွေ့မြန်ဆန်တဲ့ ဒီလို အချိန်မျိုးမှာ မိမိတို့ရဲ့ နိုင်ငံရေးအသိ သတိကို မြဲမြဲမြံမြံဆုပ်ကိုင်ပြီး ပူးပေါင်းဆောင်ရွက်ကြဖို့ ဖြစ်ပါတယ်” လို့ ယာယီသမ္မတက ပြောကြားပါတယ်။

ပြည်ထောင်စုလွှတ်တော်နာယကအဖြစ်တာဝန်ယူခဲ့တဲ့ ပြည်ထောင်စုလွှတ်တော်ကိုယ်စားပြုကော်မတီ(CRPH) ဥက္ကဋ္ဌ ဦးအောင်ကြည်ညွန့်ကလည်း ညီညွတ်ရေး အရေးကြီးသလို ညီညွတ်မှုနဲ့ ထိရောက်တဲ့ ပူးပေါင်းဆောင်ရွက်မှုတွေကလည်း အင်မတန် အရေးကြိးတယ်လို့ လွှတ်တော်အစည်းအဝေးမှာ အမှာစကား ပြောကြားခဲ့ပါတယ်။

“ခိုင်မာတဲ့ ညီညွတ်မှု၊ အားကောင်းတဲ့ ပူးပေါင်းဆောင်ရွက်မှုတွေနဲ့အတူ ကျွန်တော်တို့ရဲ့ ဘုံရည်မှန်းချက်ကို အောင်မြင်အောင် စွမ်းဆောင်နိုင်လိမ့်မယ်လို့ ယုံကြည်ပါတယ်။ အခုအချိန်ဟာ ဘက်ပေါင်းစုံမှာ အားနည်းချက်တွေ ရှိနေဆဲ ဖြစ်ပါတယ်။ ဒါပေမယ့် အားသာချက်တွေကိုလည်း မြင်ကြဖို့ လိုပါတယ်။ စစ်ရေးအရ နယ်မြေတွေ လက်လွတ်လိုက်တာတွေ ရှိနေပေမယ့် တစ်နိုင်ငံလုံးအတိုင်းအတာနဲ့ စစ်အုပ်စုကို ဖိအားပေးနိုင်နေဆဲ ဖြစ်ပါတယ်။ နိုင်ငံရေးအရလည်း ပိတ်ဆို့နိုင်နေဆဲ ဖြစ်ပါတယ်။ ဒါပေမယ့် အရှိတရားကို ရှုမြင်ပြီး အနာဂတ်မှာ ဘယ်လို ပူးပေါင်းမှုတွေ တိုးကြမလဲဆိုတာ စဉ်းစားကြဖို့ကလည်း အရေးတကြီးကိစ္စရပ်အဖြစ် ရှိနေပြီ ဖြစ်ပါတယ်” လို့ ဦးအောင်ကြည်ညွန့်က ပြောပါတယ်။

ပြည်ထောင်စုနဲ့ ပြည်နယ်/ဖက်ဒရယ်ယူနစ်တွေရှိ လွှတ်တော်အချင်းချင်း၊ အင်းအာစုအချင်းချင်း ပူးပေါင်းမှုတွေလိုသလို တစ်နိုင်ငံလုံးအတိုင်းအတာနဲ့လည်း ပူးပေါင်းမှုတွေ လိုအပ်ကြောင်း ဦးအောင်ကြည်ညွန့်က ပြောကြားပြီး CRPH အနေနဲ့ SCEF မှာ ပါဝင်ခဲ့မှုဟာ ရည်မှန်းချက်အောင်မြင်ဖို့ ရည်မှန်းချက်တူတဲ့ မဟာမိတ် အင်အားစုတွေနဲ့ လက်တွဲကြိုးပမ်းမှု ဖြစ်တယ်လို့ အသိပေးပါတယ်။

“ဒီလိုပူးပေါင်းမှုဟာ ပြည်သူတွေမျှော်လင့်နေတဲ့ အနာဂတ်ကို သယ်ဖော်ပေးနိုင်မယ့် ပူးပေါင်းဆောင်ရွက်မှုအဖြစ်လည်း မျှော်လင့်ယုံကြည်ပါတယ်” လို့ ဦးအောင်ကြည်ညွန့်က ပြောကြားပါတယ်။

လူထုရဲ့ ခေါင်းဆောင် နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ပြောလေ့ရှိသလို ကိုယ်လျှောက်တဲ့လမ်းကို မျှော်လင့်ချက်၊ ယုံကြည်ချက်အတိုင်း ဆက်လျှောက်ကြဖို့ လိုသလို အလုပ်တွေနဲ့သာ အားလုံးရဲ့ မျှော်လင့်ချက်က အောင်မြင်နိုင်မယ်ဆိုတာ အားလုံးလည်း သိရှိထားကြပြီးဖြစ်လို့ အလုပ်တွေ ပိုလုပ်နိုင်ဖို့ ကြိုးပမ်းဖို့၊ အခြားသော မဟာမိတ်တွေနဲ့ ပူးပေါင်းပြီးလည်း တော်လှန်ရေးအောင်မြင်ရေးအလုပ်တွေကို ဖော်ဆောင်သွားနိုင်ဖို့ လိုအပ်မှုကြောင်း CRPH ဥက္ကဋ္ဌက မှာကြားခဲ့ပါတယ်။

NUG ပြည်ထောင်စုဝန်ကြီးချုပ် မန်းဝင်းခိုင်သန်းကလည်း SCEFဖွဲ့စည်းနိုင်မှုဟာ
နိုင်ငံရေးရင့်ကျက်မှု၊ အပြန်အလှန်ယုံကြည်မှုနဲ့ စုပေါင်းတာဝန်ယူမှုကို ထင်ဟပ်ပြသနိုင်ခဲ့တဲ့ အရေးကြီးသော ခြေလှမ်းဖြစ်ကြောင်း ပြောပါတယ်။

SCEF အနေဖြင့် စစ်မဟာဗျူဟာပေါင်းစပ်ညှိနှိုင်းကွပ်ကဲရေး အပါအဝင် နိုင်ငံခြားရေး၊ အုပ်ချုပ်ရေး၊ ဘဏ္ဍာရေးနဲ့ အနာဂတ်ဖက်ဒရယ်ဒီမိုကရေစီပြည်ထောင်စု တည်ဆောက်ရေး ဟူသော အဓိကကဏ္ဍကြီး (၄) ရပ်ကို ဦးတည်လျက် အရှိန်အဟုန်ကောင်းမွန်စွာ ချီတက်နေကြောင်း ဝန်ကြီးချုပ်က ပြောကြားပြီး အမျိုးသားညီညွတ်ရေးအစိုးရအနေဖြင့်လည်း နိုင်ငံရေးနည်းလမ်းများသာမက စစ်ရေး၊ နိုင်ငံခြားရေး၊ ဘဏ္ဍာရေး၊ လူသားချင်းစာနာထောက်ထားမှုနဲ့ အုပ်ချုပ်ရေးဆိုင်ရာ နည်းလမ်းများဖြင့် ဘက်ပေါင်းစုံမှ ဆောင်ရွက်နေတယ်လို့ အသိပေးပါတယ်။

အကြမ်းဖက်စစ်အုပ်စုအား အပြီးတိုင် အမြစ်ပြတ်ချေမှုန်းနိုင်ရေး ပြည်တွင်းပြည်ပ နိုင်ငံရေးလှုပ်ရှားမှုများကို အချိတ်အဆက်မိမိ ပူးပေါင်းဆောင်ရွက်ပြီး နိုင်ငံရေးဖိအားများ ပိုမို တိုးမြှင့်ဆောင်ရွက်ကြဖို့နဲ့ အတုအယောင်နိုင်ငံရေးထွက်ပေါက်များ၊ တရားဝင်မှု ရရှိရေး လှည့်ဖြားလုပ်ဆောင်နေတဲ့ ကြိုးပမ်းချက်များအား အားလုံးဝိုင်းဝန်း ဆန့်ကျင်ကြဖို့ တိုက်တွန်းပါတယ်။