စစ်တပ်က စစ်ရှောင်နေအိမ်တွေကို စျေးဖြတ် ရောင်းချနေ

မေ -၂၉ ၊၂၀၂၆။နော် /People's Spring

ပဲခူးတိုင်း၊ ကျောက်တံခါးမြို့နယ်မှာ အာဏာသိမ်းစစ်တပ်က စစ်ရှောင်ပြည်သူတွေရဲ့ နေအိမ်တွေ အလုံးလိုက် စျေးဖြတ်ပြီးရောင်းချနေတယ်လို့ ဒေသခံတွေက ပြောပါတယ်။

ကျောက်တံခါးမြို့နယ်၊ အရှေ့ခြမ်းကျေးရွာဖြစ်တဲ့ သမင်အင်းကုန်း၊ သဲဖြူရွာသစ်၊ အောက်တဲစု ကျေးရွာက စစ်ရှောင်ပြည်သူရဲ့ နေအိမ်တွေကို စစ်တပ်တပ်ဖွဲ့ဝင်တွေက အလုံးလိုက် စျေးဖြတ်ရောင်းချနေတယ်လို့ ဒေသခံတစ်ဦးက ပြောပါတယ်။

" အခုစစ်တပ်က အတိုအစဝယ်တဲ့သူတွေရယ် ပျူတွေရယ်ကိုခေါ်ပြီး ရွာထဲက အိမ်တွေကိုပြပြီး ဘယ်စျေးရမလဲဆိုပြီး ရောင်းနေတာ။ ပြီးရင် ဝယ်တဲ့သူတွေက အိမ်က သစ်တွေကအစ အကုန်ခွာယူပြီး ပဲခူးဘက်သွားရောင်းကြတယ်ဘပြောတယ်။မြေကြီးတောင် ယူလို့မရလို့ မဟုတ်ရင် ယူသွားကြဦးမှာ"လို့ ဒေသခံတစ်ဦးက ပြောပါတယ်။

မေလ ဒုတိယပတ်ကစလို့ ကျောက်တံခါးမြို့နယ် အရှေ့ခြမ်းနဲ့ စစ်တောင်းမြစ်အနောက်ဘက်ကမ်းကျေးရွာတွေကို စစ်တပ်က အင်အားထောင်ကျော်နဲ့ စစ်ကြောင်းထိုး ဝင်ရောက်လာခဲ့ပါတယ်။

အဲ့ဒီလို ဝင်ရောက်လာတာကြောင့် စစ်တပ်နဲ့ တော်လှန်ရေးတပ်တွေကြား နေ့စဥ်နီးပါး တိုက်ပွဲတွေဖြစ်ပွားနေတယ်လို့ သိရပါတယ်။

စစ်တပ် စစ်ကြောင်းထိုးနေတဲ့ စစ်တောင်းမြစ်ဝှမ်းအနီးက ကျေးရွာတွေဟာ KNU တပ်မဟာ(၃)နယ်မြေဖြစ်တဲ့ ကျောက်ကြီးမြို့နယ်ထဲမှာ ပါဝင်ပါတယ်။

စစ်တပ်က စစ်ကြောင်းထိုးနေတာအပြင် လက်နက်ကြီး၊ ဒရုန်း၊ လေယာဥ်တွေနဲ့ပါ နေ့စဥ် နေ့တိုင်း ပြည်သူလူထုကို ပစ်မှတ်ထား ပစ်ခတ်နေတယ်လို့ ကရင်အမျိုးသားအစည်းအရုံး(KNU) က ထုတ်ပြန်ထားပါတယ်။

မေလ ၂၆ ရက် နေ့လည်ပိုင်းမှာ ပိန်းဇလုတ်အခြေစိုက် ခလရ-၂၆၄ တပ်ရင်းက ၁၅၅ မမ ဟောင်ဝှစ်ဇာ လက်နက်ကြီး (၂)လုံး ပစ်ခတ်ခဲ့ရာ ကျွန်းကြီးကျေးရွာအတွင်း ကျရောက် ပေါက်ကွဲခဲ့ပြီး (၁)စောနေကော်ထူး (၅၂)နှစ်၊ (၂)စောစိန်ဝင်း (၆၁)နှစ် နဲ့ (၃)နော်အယ်လွဲ (၃၆)နှစ် တို့ ၃ ဦး ထိခိုက်ဒဏ်ရာရခဲ့တယ်လို့ KNU က ဒီနေ့ မေလ ၂၉ ရက်မှာ ထုတ်ပြန်ပါတယ်။

စစ်တပ်က စစ်ကြောင်းထိုးနေတာအပြင် လက်နက်ကြီး၊ ဒရုန်း၊ လေယာဥ်တွေနဲ့ပါ ပစ်ခတ်နေတဲ့အတွက် ကျောက်တံခါးမြို့နယ် အရှေ့ခြမ်းနဲ့ စစ်တောင်းမြစ်အနောက်ဘက်ကမ်းက သမင်အင်းကုန်း၊ သဲဖြူရွာသစ်၊ အောက်တဲစု ၊ ကညင်ကျိုး၊ ကြိတ်ကွင်းနဲ့ လေးအိမ်စုက ဒေသခံထောင်ချီဟာ ထွက်ပြေးတိမ်းရှောင်နေကြရပါတယ်။

အာဏာသိမ်းစစ်တပ်ဟာ ဆန့်ကျင်သူတွေကို မတရားပုဒ်မတပ် ဖမ်းဆီးထားသူတွေနဲ့ တိမ်းရှောင်နေသူတွေရဲ့ နေအိမ်တွေကို ချိတ်ပိတ်သိမ်းပြီးနောက် လေလံတင်ရောင်းချနေတာလည်း ပြုလုပ်နေပါတယ်။

ဒါအပြင် မတရားချိတ်ပိတ်သိမ်းထားတဲ့ နေအိမ်တွေကိုလည်း Non-CDM ဝန်ထမ်းတွေကို နေထိုင်ခွင့်ပြုနေတာလည်း ရှိပါတယ်။

(KNU တပ်မဟာာ (၃)နယ််မြေအတွင်းက စစ်ရှောင်ပြည်သူများ။ ဓာတ်ပုံ - KNU ( ပုံ - အဟောင်းအသုံးပြုထားပါသည်)

အင်းလေးဒေသကို ပအိုဝ်းပြည်သူ့စစ်(PNO) ရယူမယ့် လျှို့ဝှက်စာထွက်ပေါ်

မေ -၃၀၊၂၀၂၆။မိုမို/People's Spring

ရှမ်းပြည်နယ်၊ အင်းလေးဒေသကို စစ်တပ်လက် အောက်ခံ ပအိုဝ်းပြည်သူ့စစ်(PNO)က ရယူမယ့်လျှို့ဝှက်စာ ထွက်ပေါ်လာပါတယ်။

အခု ၂၀၂၆ ဧပြီ ၁၅ရက်စွဲနဲ့ ထိပ်တန်းလျှို့ဝှက်ညွှန်ကြားချက်မှာ အင်းလေးဒေသတွင်း ပအိုဝ်းအမျိုးသားရေးဆိုင်ရာ စည်းရုံးလှုံ့ဆော်မှုတွေ စနစ်တကျ ဆောင်ရွက်ဖို့နဲ့ ကိုယ်ပိုင်အုပ်ချုပ် ခွင့်ရအထူးဒေသ ဖြစ်လာစေရေး စတဲ့အချက် တွေ ပါ၀င်ပါတယ်။

အင်းလေးဒေသအတွင်းက ကျေးရွာတွေကို PNO ရဲ့ မူဝါဒ၊ လမ်းစဉ်တွေကို ထောက်ခံအားပေးတဲ့ ပအိုဝ်းလူမျိုးတွေဟာ ကျေးရွာလူကြီးဖြစ်လာစေဖို့အတွက် ဒေသခံပြည်သူတွေ ကြား စနစ်တကျ စည်းရုံးလှုံ့ဆော်မှုတွေ လုပ်ဖို့ လျှို့ဝှက်စာမှာ ဖော်ပြပါတယ်။

ဒါ့အပြင် ကိုယ်ပိုင်အုပ်ချုပ်ခွင့်ရဒေသ တိုးချဲ့ရေး အတွက် အင်းလေးဒေသကို ပအိုဝ်းကိုယ်ပိုင်အုပ်ချုပ်ခွင့်ရ အထူးဒေသတွင်း ထည့်သွင်းဖွဲ့စည်းရေးအတွက် လိုအပ်တဲ့အခြေခံအဆောက်အအုံတွေနဲ့ လူထုထောက်ခံမှု အင်အား‌ကို စည်းရုံးဆောင်ရွက်ဖို့ PNOက စီစဉ်ထားပါတယ်။

"အင်းလေးဒေသကိုရဖို့ PNO က အရင်ကတည်းက တောက်လျှောက်ကြိုးစားခဲ့တာ။ဒါပေမယ့် ၂၀၁၅ ပြည်သူ့အစိုးရ တက်လာတဲ့အချိန် ဒေသခံလူထုရဲ့ လွတ်လပ်တဲ့အမြင်အနည်းငယ်ရလာတယ်။တွေ့ရှိသိရှိလာတယ်။ ဒေသ‌တွင်းလူငယ်တွေ နိုင်ငံရေး တက်ကြွလှုပ်ရှားသူတွေက အဲဒီကိစ္စကို တွင်တွင်ကျယ်ကျယ်ပြောလာတာကြောင့် PNO ဘက်က ရပ်တန့်ခဲ့တာ။ဒီတခါကြတော့ အာဏာသိမ်းစစ်တပ်နဲ့ ပေါင်းပြီး ပြန်လုပ်ဖို့ကြိုးစားလာတာ"လို့ အင်းတိုင်းရင်းသားတစ်ဦးက လျှို့ဝှက်ညွှန်ကြားစာနဲ့ပတ်သက်ပြီး ပြောပါတယ်။

ကိုယ်ပိုင်အုပ်ချုပ်ခွင့်ရဒေသတွေဖြစ်တဲ့ ဆီဆိုင်နဲ့ ပင်လောင်းမြို့နယ်ကြားမှာရှိတဲ့ အင်းလေးဒေသ ရယူဖို့ နယ်မြေတစပ်တည်း ဖြစ်ဖို့အတွက် PNO ရဲ့ကြိုးပမ်းမှုဖြစ်တာကြောင့် ဒေသခံတွေအနေနဲ့ သတိကြီးစွာထားဖို့လည်း သူက တိုက်တွန်းပါတယ်။

"PNO က အခုလည်း အင်းလေး ဒေသမှာ စစ်ရေးလှုပ်ရှားနေတာပေါ့။ဒါပေမယ့် အထူးဒေသ ၆ ဖြစ်တဲ့ ဆီဆိုင်၊ဟိုပုန်း၊ပင်လောင်းကို သတ်မှတ် တဲ့အချိန်မှာ မပါဘူးလေ။အခုက ညောင်ရွှေ မြို့နယ်ရဲ့ အင်းလေးဒေသ တောင်ဘက်တခြမ်းကို အထူးဒေသထဲ ထည့်ဖို့များနေတာ"လို့ PNO ရဲ့ စစ်ရေးလှုပ်ရှားမှု နဲ့ အင်းလေး ဒေသကို ရယူမယ့် အခြေအနေကို ဒေသခံလူမှုအဖွဲ့အစည်းတာ၀န်ရှိသူက ပြောပါတယ်။

အင်းတိုင်းရင်းသား ၂သိန်းကျော်ရှိတဲ့ ရှမ်းပြည်နယ်တောင်ပိုင်း အင်းလေးဒေသကို အင်းတိုင်းရင်းသားတွေရဲ့ ကိုယ်ပိုင်အုပ်ချုပ်ခွင့်ရဒေသအဖြစ် ဒေသခံတွေက တောင်းဆိုနေတာလည်းရှိပါတယ်။

တိုင်းရင်းသား‌တွေအနေနဲ့ ကိုယ်ပိုင်အုပ်ချုပ်ခွင့်ရဒေသဖြစ်ဖို့ အနည်းဆုံးမြို့နယ် ၂ခုရှိဖို့ လိုအပ်ချက်ကြောင့် အင်းလေးဒေသမှာ လက်ရှိ ညောင်ရွှေမြို့နယ်တစ်ခုပဲရှိလို့ နမ့်ပန်မြို့ကို မြို့နယ်အဆင့် ပြန်လည်သတ်မှတ်ပေးရေး ကနဦး ကြိုးပမ်းနေတယ်လို့ သိရပါတယ်။

"အင်းလေးဒေသကို PNO က အုပ်ချုပ်မယ်ဆိုတော့ အင်းပါတီတွေ ဘယ်လိုတုန့်ပြန်မလဲဆိုတာ စိတ်ဝင်စားရာပါကျနော်တို့ကတော့ရှင်းတယ် ရန်သူနဲ့လက်တွတဲ့ ဘယ်အဖွဲ့အစည်းမဆို လက်ခံစရာအကြောင်းမရှိပါ"လို့ အင်းလေးဒေသခံတော်လှန်ရေးတပ်ဖွဲ့၀င်တစ်ဦးက ပြောပါတယ်။

အင်းလေးဒေသဟာ ပြည်တွင်း၊ပြည်ပ ခရီးသွားဧည့်သည်တွေအတွက် အထူးလည်ပတ်စရာ ဒေသ ဖြစ်ပေမယ့် ကိုဗစ်ကပ်ရောဂါနဲ့ စစ်တပ်အာဏာသိမ်းပြီးနောက်ပိုင်း ဒေသတွင်း ခရီးသွားလုပ်ငန်းအများစု ရပ်ဆိုင်းခဲ့ရပါတယ်။

ဒီကနေ့ ထွက်ရှိတဲ့ ထိပ်တန်းလျှို့ဝှက် ညွှန်ကြားချက်က အတုဖြစ်တယ်လို့ PNO က ဆိုပါတယ်။

PNO ဟာ ၁၉၉၁ က စစ်တပ်နဲ့ အပစ်ရပ် လက်မှတ်ထိုးခဲ့ပြီး ၂၀၀၉ မှာ လူမျိုးစု လက်နက်ကိုင်တပ် အဖြစ်ကနေ စစ်တပ်လက်အောက်ခံ ပြည်သူ့စစ်အသွင်ပြောင်းခဲ့သလို တော်လှန်ရေး အင်အားစုတွေကို စစ်တပ်နဲ့အတူ ပူးပေါင်း တိုက်ခိုက်နေပါတယ်။

အာဏာသိမ်းစစ်ခေါင်းဆောင်ရဲ့ အိန္ဒိယခရီးစဥ်အပေါ် ဆန္ဒပြပွဲ ဟန့်တားခံရ

▪️မင်းအောင်လှိုင်ခရီးစဥ်ဟာ မဖြစ်သင့်တဲ့ကိစ္စဖြစ်ပြီး အိန္ဒိယအစိုးရအနေနဲ့ သေချာစွာပြန်လည်စဥ်းစားသင့်ကြောင်း NUG နိုင်ငံခြားရေးဝန်ကြီးပြော

မေ-၃၀၊ ၂၀၂၆။ People’s Spring

အာဏာသိမ်းစစ်ခေါင်းဆောင်မင်းအောင်လှိုင်ရဲ့ အိန္ဒိယခရီးစဥ်ကို နယူးဒေလီရောက် မြန်မာတွေက ဆန္ဒပြဖို့ စီစဥ်ခဲ့ကြပေမယ့် အိန္ဒိယရဲတပ်ဖွဲ့က ခွင့်မပြုခဲ့ကြောင်း India For Myanmar တည်ထောင်သူ ကိုဆလိုင်းဒိုခါရ်က ပြောပါတယ်။

သမ္မတအမည်ခံ အာဏာသိမ်းခေါင်းဆောင်မင်းအောင်လှိုင်ရဲ့ စစ်တပ်က မြန်မာပြည်သူတွေကို လူမဆန်စွာသတ်ဖြတ်ခြင်း၊ ဖိနှိပ်ခြင်း၊ လူ့အခွင့်အရေးချိုးဖောက်မှုတွေ ကျူးလွန်နေတာကြောင့် မြန်မာပြည်သူလူထုကိုယ်စား နယူးဒေလီရောက်မြန်မာတွေက ငြိမ်းချမ်းစွာ ကန့်ကွက်ဆန္ဒပြဖို့ ရည်ရွယ်ခဲ့တာပါ။ ဆန္ဒပြပွဲအတွက် နယူးဒေလီရောက် မြန်မာတွေ ရာနဲ့ချီ ထွက်လာကြပေမယ့် ဆန္ဒပြပွဲစီစဥ်ထားတဲ့ နေရာအထိ သွားခွင့်မရဘဲ ဟန့်တားခံခဲ့ရတယ်လို့ ကိုဆလိုင်းဒိုခါရ်က ရှင်းပြပါတယ်။

“လူ ၂၀၀ ခန့် ထွက်လာကြပါတယ်။ ဒါပေမဲ့ ဆန္ဒပြပွဲ အမှန်တကယ် သွားချင်တဲ့ နေရာအထိတော့ မသွားရဘူးပေါ့နော်။ ဆန္ဒပြပွဲကတော့ အောင်မြင်တယ်လို့ ပြောရမှာပေါ့”လို့ သူက ပြောပါတယ်။

ဆက်လက်ပြီး ကိုဆလိုင်းဒိုခါရ်က “မင်းအောင်လှိုင်လို တကယ့်ရာဇဝတ်ကောင်ကို ကမ္ဘာ့အကြီးဆုံး ဒီမိုကရေစီနိုင်ငံရဲ့ အစိုးရအကြီးအကဲက level တူ ဆက်ဆံတာနဲ့ ဆန္ဒပြတဲ့သူတွေကို ဟန့်တားတာက ကမ္ဘာကြီးက အရမ်းစိတ်ပျက်စရာကောင်းနေပြီဆိုတာ ပေါ်လွင်နေတယ်လို့ ပြောချင်ပါတယ်”လို့ ဆိုပါတယ်။

နိုင်ငံတကာရာဇဝတ်သားအဖြစ် သတ်မှတ်ခံထားရသူ မင်းအောင်လှိုင်ဟာ ပြီးခဲ့တဲ့ ဧပြီမှာ စစ်တပ်ကြီးစိုးတဲ့ လွှတ်တော်ကနေ ခန့်အပ်တဲ့ သမ္မတရာထူးယူခဲ့ပြီး ဒီနေ့စတင်တဲ့ အိန္ဒိယခရီးစဥ်ဟာ သူ့ရဲ့ သမ္မတရာထူးနဲ့ ပထမဆုံးပြည်ပခရီးစဥ် ဖြစ်လာပါတယ်။

အဲဒီခရီးစဥ်နဲ့ပတ်သက်လို့ နယူးဒေလီရောက် မြန်မာပြည်သူများအနေနဲ့ လုံးဝလက်မခံနိုင်ဘဲ လူထုအင်အားအပြည့်နဲ့ ပြင်းပြင်းထန်ထန် ဆန့်ကျင်ကန့်ကွက်သွားဖို့ ပြင်ဆင်နေခဲဲ့ကြပါတယ်။

အစောပိုင်းက စစ်ခေါင်းဆောင်မင်းအောင်လှိုင်ဟာ ဇွန်လ ၁ရက်မှာ ပြုလုပ်ဖို့လျာထားတဲ့ International Big Cat Alliance Summit ကို တက်ရောက်ဖို့ စီစဥ်ထားခဲ့ပြီး အဲဒီထိပ်သီးညီလာခံကို ရွှေ့ဆိုင်းခဲ့တာကြောင့် အိန္ဒိယဝန်ကြီးချုပ် နာရန်ဒရာမိုဒီရဲ့ ဖိတ်ကြားချက်အရ မေလ ၃၀ရက်ကနေ ဇွန်လ ၃ရက်အထိ အိန္ဒိယခရီးစဥ် သွားရောက်တာဖြစ်ပါတယ်။

အိန္ဒိယနိုင်ငံခြားရေးဝန်ကြီးဌာနရဲ့ ထုတ်ပြန်ချက်အရ အာဏာသိမ်းစစ်ခေါင်းဆောင်ဟာ ဝန်ကြီးချုပ်နာရန်ဒရာမိုဒီနဲ့ ဇွန်လ ၁ရက်မှာ တွေ့ဆုံဆွေးနွေးမှာ ဖြစ်သလို စီးပွားရေးဖိုရမ်တစ်ခုကိုလည်း တက်ရောက်မယ်လို့ သိရပါတယ်။

မြန်မာနိုင်ငံဟာ အိန္ဒိယရဲ့ အိမ်နီးချင်းဦးစားပေးပထမမူဝါဒ၊ အရှေ့မျှော်ဝါဒကျင့်သုံးခြင်းမူဝါဒနဲ့ မဟာဆာဂါ(MAHASAGAR)မူဝါဒတွေနဲ့ ဆုံဆည်းရာအချက်အချာ နိုင်ငံဖြစ်တယ်လို့ အိန္ဒိယနိုင်ငံခြားရေးဝန်ကြီးဌာနက ဆိုပါတယ်။ ဒါ့အပြင် စစ်ခေါင်းဆောင်မင်းအောင်လှိုင်(မူရင်းထုတ်ပြန်ချက်မှာ သမ္မတဦးမင်းအောင်လှိုင်)ရဲ့တရားဝင်ခရီးစဥ်ဟာ နှစ်နိုင်ငံအကြား ကဏ္ဍစုံဆက်ဆံရေးတွေမှာ ပိုမိုအားကောင်း၊ နက်ရှိုင်းစေလိမ့်မယ်လို့ မျှော်လင့်ကြောင်း ထုတ်ပြန်ထားပါတယ်။

အာဏာသိမ်းစစ်ခေါင်းဆောင်ရဲ့ အိန္ဒိယခရီးစဥ်နဲ့ပတ်သက်လို့ အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီးဒေါ်ဇင်မာအောင်က ဒီခရီးစဥ်ဟာ မဖြစ်သင့်တဲ့ကိစ္စဖြစ်ပြီး အိန္ဒိယအစိုးရအနေနဲ့ သေချာစွာပြန်လည်စဥ်းစားသင့်ကြောင်း People’s Spring ကို မှတ်ချက်ပြုပါတယ်။ ကမ္ဘာ့အကြီးဆုံး ဒီမိုကရေစီနိုင်ငံ အိန္ဒိယက အခုလို အာဏာသိမ်းစစ်ခေါင်းဆောင်ကို ဖိတ်ကြားတွေ့ဆုံခြင်းအပေါ် NUG အနေနဲ့ အလွန်အမင်း စိုးရိမ်ကြောင်းလည်း နိုင်ငံခြားရေးဝန်ကြီး ဒေါ်ဇင်မာအောင်က ပြောပါတယ်။

ပြီးခဲ့တဲ့ မေလ တတိယပတ်အတွင်းက ည၈ နာရီလောက်မှာ ရန်ကုန်မြို့၊ ဒဂုံမြို့သစ်မှာနေတဲ့ စစ်ကောင်စီထောက်ခံတဲ့ အမျိုးသားတစ်ဦးဟာ ဆိုင်ကယ်လေးနဲ့ အမှတ်၂ လမ်းမကြီးပေါ်ကနေ မောင်းလာခဲ့တယ်။ ရိုးမရိပ်သာလမ်းအနီးအရောက်မှာ လူ ၃ ယောက်က သူ့ကိုတားပါတယ်။ အရပ်ဝတ်လား၊ ယူနီဖောင်းနဲ့လားဆိုတာကိုတော့ သူက ပြောမသွားပါဘူး။ လမ်းတဘက်ခြမ်းမှာလည်း ၃ ယောက်လောက်ရှိတယ်လို့ သူကဆိုတယ်။

“ ဆိုင်ကယ်ရှေ့က အသည်းအသန်တားပြီး ပိတ်ရပ်တယ်။ ကျွန်တော့်ကို ဆိုင်ကယ်ပေါ်က ဆွဲချဖို့လုပ်တယ်။ဟေ့ကောင်မင်းတို့ကဘယ်သူတွေလဲ ငါ့ကိုဘာလို့တားတာလဲမေးတော့ တာဝန်ရှိတဲ့သူတွေ” တဲ့။ “ ငါတို့က ဒဂုံအရှေ့က စစ်ကြောင်းမှူးရဲ့တပည့်တွေ သူခိုင်းလို့လုပ်နေတာ။” လို့ ဖြေတယ်။

https://www.ludunwayoo.com/feature-mm/2026/05/29/158444/

ကျောက်လုံးကြီးစခန်း သိမ်းတိုက်ပွဲ စစ်တပ် အားလုံးနီးပါး ထွက်ပြေး

▪️တိုက်ပွဲဝင်ရဲဘော်တွေနဲ့ အားပေးကူညီသူတွေကို KNU မြိတ်ထားဝယ်ခရိုင်နဲ့ တပ်မဟာ(၄) ဂုဏ်ပြု

မေ ၃၀၊ ၂၀၂၆။ ထားမြတ်/People’s Spring

ကရင်အမျိုးသားအစည်းအရုံး(KNU) မြိတ်ထားဝယ်ခရိုင် လယ်မူလားမြို့နယ်(ပုလောမြို့နယ်) လယ်ဖဒို(ကျောက်လုံးကြီး)ရွာ အခြေစိုက်စစ်တပ်စခန်းကို ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၄) ပူးပေါင်းတပ်က တိုက်ခိုက် သိမ်းပိုက်ရာ တပ်စခန်းရှိ အင်အား ၈၀ ကျော်အနက် အားလုံးနီးပါး ထွက်ပြေးသွားတယ်လို့ KNLA တပ်မဟာ(၄) သတင်းရင်းမြစ်က ပြောပါတယ်။

ကျောက်လုံးကြီးစခန်းကို မေလ ၁၉ရက်မှာ စတင်ထိုးစစ်ဆင်ခဲ့ရာ မေလ ၂၉ရက်မှာ သိမ်းပိုက်နိုင်ခဲ့တာဖြစ်ပြီး လက်နက်ခဲယမ်းတွေ ရရှိခဲ့ကြောင်း အသိပေးထားပါတယ်။

တိုက်ပွဲအတွင်း ထိခိုက်ကျဆုံး အခြေအနေတွေနဲ့ပတ်သက်ပြီး မေးမြန်းရာ KNLA တပ်မဟာ(၄) သတင်းရင်းမြစ်က “သေဆုံးမှုတွေရှိတယ်။ ထွက်ပြေးတာတော့ ပိုများတာပေါ့နော်။ အင်အား ၈၀ ကျော်မျာ အကုန်လုံးနီးပါး ထွက်ပြေးတာပေါ့။ ဒါပေမဲ့ လက်နက်ရိက္ခာအချို့ သိမ်းဆည်းရမိတာပေါ့” လို့ ပြောပါတယ်။

စခန်းသိမ်းအောင်မြင်မှုနဲ့ပတ်သက်ပြီး KNU မြိတ်ထားဝယ်ခရိုင် ဥက္ကဋ္ဌနဲ့ KNLA တပ်မဟာ(၄) တပ်မဟာမှူးတို့က ကျေးဇူးတင် ဒဂုဏ်ပြုလွှာ ထုတ်ပြန်ခဲ့ရာ တိုက်ပွဲဝင် ရဲဘော်တွေ၊ အားပေး ကူညီသူတွေ ဆုတောင်းပေးသူတွေကို ကျေးဇူးတင် ဂုဏ်ပြုကြောင်း ဖော်ပြပါတယ်။

ကျောက်လုံးကြီး ကျေးရွာအလယ်နဲ့ ကျေးရွာ ခရစ်ယာန် ဘုရားကျောင်းကုန်းမှာ နှစ်ပေါင်း ၂၀ကျော်ကြာ တပ်စွဲထားတဲ့ စစ်တပ်စခန်းကို KNU၊ KNLA တပ်မဟာ ၄, အမှတ်(၁)ဗျူဟာလက်အောက်ခံ KNDO တပ်ရင်း(၇), KNLA တပ်ရင်း(၁၁, ၂ဝ၃)၊ တပ်မဟာ(၄) Drone အဖွဲ့ တပ်ဖွဲ့ဝင်များနဲ့ မဟာမိတ် တော်လှန်ရေးအင်အားစုများ၊ ပြည်သူများကို မြိတ်ထားဝယ်ခရိုင်နဲ့ တပ်မဟာ(၄)က ဂုဏ်ပြုခဲ့တာပါ။

စစ်အာဏာရှင်စနစ်အပါအဝင် အာဏာရှင်စနစ် ချုပ်ငြိမ်းရေးနဲ့ ဖယ်ဒရယ်ပြည်ထောင်စု တည်ထောင်ပြီး ငြိမ်းချမ်းတဲ့ လူ့အဖွဲ့အစည်းကို ပြန်လည်တည်ဆောက်လိုတဲ့ လူငယ် ရဲဘော်ရဲဘက်များရဲ့ ပေးဆပ်မှုများကိုလည်း လေးစားစွာဖြင့် မှတ်တမ်းတင်အပ်ကြောင်း ဖော်ပြထားပါတယ်။

စုပေါင်းညီညွတ်သောအင်အားဖြင့် အခုကဲ့သို့ အောင်ပွဲရရှိစေရန် အဘက်ဘက်မှ ကူညီပံ့ပိုးသူ များ ၊ မိမိတို့ တိုက်ပွဲဝင် ရဲဘော်များဘေးရန်ကင်းဝေးစေရန်အတွက် ဝိုင်းဝန်း ဆုတောင်း မေတ္တာပို့သ၍ စိတ်ဓါတ်ခွန်အား ပံ့ပိုးပေးကြတဲ့ ပြည်သူတွေကို ကျေးဇူးတင်ဂုဏ်ပြုတယ်လို့ အသိပေးထားပါတယ်။