(မေလ ၂၆ရက်မှာ စစ်တပ်က လယ်ဒိုမြို့နယ် ငဖယ်အင်းရွာကို တိုက်လေယာဉ်နဲ့ ဗုံးကြဲအပြီး တွေ့ရစဉ်။ ဓာတ်ပုံ - KNU)

ငါးဇွန်မြို့နယ်မှာ စစ်တပ်က ဒရုန်းနဲ့ဗုံးကြဲလို့ ပြည်သူ ၆ဦး သေဆုံး

မေ-၂၉၊ ၂၀၂၆။ ရှိန်း/People's Spring

မန္တလေးတိုင်း၊ ငါးဇွန်မြို့နယ်မှာ စစ်တပ်က ဒရုန်းနဲ့ဗုံးချကာ ကျေးရွာတွေကို စီးနင်းတာကြောင့် ပြည်သူ ၆ဦး သေဆုံးခဲ့ပြီး စစ်တပ် စစ်ကြောင်းက ဒီနေ့အထိ တပ်စွဲထားတယ်လို့ ဒေသခံတွေက ပြောပါတယ်။

မေလ၂၇ရက်က ငါးဇွန်မြို့ဘက်ကနေ ပျူစောထီးနဲ့ စစ်တပ်အင်အား ၁၀၀ လောက်ပါတဲ့ စစ်ကြောင်းဟာ ငါးဇွန်-မြင်းမူလမ်း(တာဘောင်)လမ်းအတိုင်း စစ်ကြောင်းထိုးလာပြီး သပြေသာ၊ ငါးလွန့်ရွာတို့ကို ဝင်ပြီး ပစ္စည်းတွေယူကာ ပတ်ဝန်းကျင်ကို ဒရုန်းနဲ့ ဗုံးတွေ လိုက်ချခဲ့တာလို့ သိရပါတယ်။

သေဆုံးခဲ့တဲ့ပြည်သူတွေဟာ ကုလားရွာနဲ့ ဓာတ်တော်ရွာတို့ကဖြစ်ပြီး အမျိုးသမီးတွေလည်း ပါဝင်တယ်လို့ ဒေသခံတွေက ပြောပါတယ်။

အဲဒီစစ်တပ်စစ်ကြောင်းကို တော်လှန်ရေးတပ်တွေက တိုက်ခိုက်ခဲ့ပြီး ကာကင်းကို ဝင်ပစ်ချိန်မှာ တော်လှန်ရေးရဲဘော်တစ်ဦး ကျဆုံးကာ တစ်ဦးထိခိုက်ဒဏ်ရာရခဲ့တယ်လို့လည်း ဒေသတွင်း သတင်းရင်းမြစ်က ပြောပါတယ်။

"သီတာယုမွန် ပျူတွေ၊ ကွန်မန်ဒိုစစ်ကြောင်း၊ စစ်သားနည်းနည်းနဲ့ ထိုးလာတယ်လို့ သိရတယ်။ အရင်ကတော့ ဒီဘက်ခြမ်းမှာ မကြာခဏတိုက်ပွဲဖြစ်တာရှိတယ်။ အခုလို ရက်ရှည်တပ်စွဲတာတော့ ဒါပထမဆုံးပဲ"လို့ ဒေသခံတစ်ဦးက ပြောပါတယ်။

စစ်တပ်စစ်ကြောင်းဟာ အဲဒီရွာမှာပဲ တပ်စွဲထားဆဲဖြစ်ကာ ပြည်သူအလောင်းတချို့ကိုလည်း မကောက်ယူနိုင်‌ခဲ့ဘူးလို့ သိရပါတယ်။

မေလ ၂၈ရက် မနေ့ကလည်း စစ်တပ်က ရေလည်သောင်ကျေးရွာကို အသေခံဒရုန်းနှစ်စီးနဲ့ ဗုံးကြဲတိုက်ခိုက်ခဲ့တယ်လို့ ဒေသခံတစ်ဦးက ပြောပါတယ်။

"ရေလည်သောင်ရွာကို မနေ့က နှစ်စီးကြဲတာ။ စစ်ရှောင်တွေ ရှိတဲ့ဘက်ပေါ့။ မနေ့ကတော့ အထိခိုက်မရှိဘူး”လို့ သူက ဆိုပါတယ်။

လက်ရှိလည်း အဲဒီစစ်ကြောင်းဟာ ကုလားရွာကျေးရွာအုပ်စုကို တပ်စွဲပြီး အနီးနားကျေးရွာတွေကို ဒရုန်းတွေနဲ့ ဗုံးကြဲကာ ပြည်သူတွေရဲ့ နေအိမ်ကပစ္စည်းတွေကို လုယက်နေတယ်လို့သိရပါတယ်။

မြန်မာနိုင်ငံဆိုင်ရာ ဂုဏ်ထူးဆောင်ကောင်စစ်ဝန် ရာထူးကို အိုက်စလန် ရုတ်သိမ်း

မေ-၂၉၊ ၂၀၂၆။ တေဇ/People's Spring

အိုက်စလန်နိုင်ငံရဲ့ မြန်မာနိုင်ငံဆိုင်ရာ ဂုဏ်ထူးဆောင် ကောင်စစ်ဝန်ရာထူးယူထားသူက EU ရဲ့ ဒဏ်ခတ်ပိတ်ဆို့မှုခံထားတဲ့ စစ်တပ်ရဲ့စီးပွားရေး လုပ်ငန်း‌တွေနဲ့ဆက်စပ်သူဖြစ်ကြောင်း Justice For Myanmar(JFM)ကတိုင်ကြားခဲ့ပြီးနောက် အိုက်စလန်နိုင်ငံခြားရေးဝန်ကြီးဌာနက အဲဒီရာထူးကို ရုတ်သိမ်းလိုက်ပါတယ်။

ဒီရာထူးခန့်အပ်ခံထားရတဲ့ ခရိုနီကိုကိုလတ်က EU ရဲ့ဒဏ်ခတ်ပိတ်ဆို့မှုစာရင်းမှာ ပါဝင်နေတဲ့ စစ်အုပ်စု တရားမဝင်ထိန်းချုပ်ထားတဲ့ မြန်မာ့သစ်လုပ်ငန်း (MTE)၊ စစ်တပ်ပိုင် မြန်မာ့စီးပွားရေးဦးပိုင်လီမိတက်(MEHL)တို့နဲ့ စီးပွားရေးအတူ လုပ်ဆောင်နေတဲ့ အသေးစိတ်အကြောင်းအရာတွေကို JFM က အိုက်စလန်နိုင်ငံခြားရေးဝန်ကြီးဆီကို မတ်လ ၂၇ ရက်မှာ ပေးပို့ခဲ့ပြီး ရာထူးကနေ ရုတ်သိမ်းပေးဖို့တောင်းဆိုခဲ့တယ်လို့ သတင်းထုတ်ပြန်ထားပါတယ်။

"အိုက်စလန်နိုင်ငံအနေနဲ့ အဆိုပါ ဂုဏ်ထူးဆောင်ကောင်စစ်ဝန် ခန့်အပ်မှုကြောင့် တကယ့်ကို ထိခိုက် နစ်နာမှုတွေကို ဖြစ်စေခဲ့ပါတယ်။ ဒါဟာ စစ်အုပ်စုကို မမှန်ကန်တဲ့ တရားဝင်မှုကို ပေးအပ်ခဲ့တာဖြစ်သလို စစ်အုပ်စုရဲ့ နိုင်ငံတကာရာဇဝတ်မှုတွေကို ငွေကြေးထောက်ပံ့ပေးနေတဲ့ ခရိုနီတစ်ဦးကို ကျောထောက် နောက်ခံပေးခဲ့ခြင်းလည်း ဖြစ်ပါတယ်။ ဂုဏ်ထူးဆောင်ကောင်စစ်ဝန်ရာထူးကို ရုပ်သိမ်းပေးဖို့ ကျွန်ုပ်တို့ရဲ့တောင်းဆိုချက်အပေါ် အိုက်စလန်နိုင်ငံက အလျင်အမြန် ဆုံးဖြတ်ဆောင်ရွက်ပေးခဲ့ခြင်းကို ကျွန်ုပ်တို့ကြိုဆိုလိုက်ပြီး၊ ဒီလုပ်ရပ်ဟာ အခြားသောအစိုးရတွေ လိုက်နာဆောင်ရွက်သင့်တဲ့ နမူနာကောင်းတစ်ခုလည်း ဖြစ်ပါတယ်"လို့ JFM ရဲ့ ပြောရေးဆိုခွင့်ရှိသူ မရတနာမောင်က ပြောပါတယ်

အိုက်စလန်နိုင်ငံရဲ့ မြန်မာနိုင်ငံဆိုင်ရာ ဂုဏ်ထူးဆောင်ကောင်စစ်ဝန် ရာထူးကို မေလ ၁၅ ရက်မှာ ရုတ်သိမ်းခဲ့တာလို့ အိုက်စလန်နိုင်ငံခြားရေးဝန်ကြီးဌာနက အသိပေးထားပါတယ်။

ကိုကိုလတ်က ‌MEHL နှင့် MTE တို့နဲ့ စီးပွားရေးဆက်ဆံမှု မရှိကြောင်း ငြင်းဆိုခဲ့ပြီး ၁၁ ပတ်ကြာတာဝန်ထမ်းဆောင်ပြီး‌နောက် ရာထူးကနေ နှုတ်ထွက်ခဲ့တယ်လို့ သိရပါတယ်။

ဒါပေမမဲ့ JFM ရဲ့ ဒီနေ့ မေလ၂၉ ရက်ထုတ်ပြန်တဲ့ အစီရင်ခံစာမှာတော့ ခရိုနီကိုကိုလတ်ရဲ့ KK Business Group က မြန်မာ့စီးပွားရေးဦးပိုင်လီမိတက်(MEHL)ဆီကနေ Central Hotel ကို ၁၅ နှစ် ငှားရမ်းလုပ်ကိုင်နေတာကို ၂၀၂၅ ဒီဇင်ဘာလမှာ စစ်တပ်ရဲ့စီးပွားရေး နဲ့ ကူးသန်းရောင်းဝယ်ရေးဝန်ကြီးဌာနဆီ ကိုကိုလတ်ကိုယ်တိုင် လက်မှတ်ရေးထိုး တင်သွင်းခဲ့တဲ့ သွင်းကုန်ခွင့်ပြုမိန့်လျှောက်လွှာနဲ့ အတည်ပြုထားပါတယ်။

ဒါ့အပြင် JFMက ရရှိထားတဲ့ လေလံ မှတ်တမ်း‌တွေအရ KK Business Group က စစ်တပ်ထိန်းချုပ်မှု‌အောက်က မြန်မာ့သစ်လုပ်ငန်းဆီကနေ ၂၀၂၂ ၊ ၂၀၂၃ မှာ ဝယ်ယူခဲ့တဲ့ ကုမ္ပဏီလေးဆယ်ကျော်ထဲမှာ အကြီးမားဆုံး ဝယ်ယူသူဖြစ်တယ်လို့လည်း ထောက်ပြထားပါတယ်။

"စစ်အုပ်စုထံ တင်သွင်းထားသော K K ကုမ္ပဏီများ၏ စာရွက်စာတမ်းများအရ အမေရိကန်၊ ကနေဒါနှင့် သြစတြေးလျနိုင်ငံတို့က ဒဏ်ခတ်ပိတ်ဆို့ထားသော မြန်မာ့နိုင်ငံခြားကုန်သွယ်မှုဘဏ်(MFTB)ရှိ ဘဏ်စာရင်းတစ်ခုမှတဆင့် စီးပွားရေးလုပ်ငန်းများ လုပ်ဆောင်လျက်ရှိသည်။" လို့ JFMက ဆိုပါတယ်။

ဒါကြောင့် ခရိုနီကိုကိုလတ်ရဲ့ KK Business Group ကို အမေရိကန်၊ ယူကေ၊ အီးယူ၊ ကနေဒါ ၊ သြစတြေးလျနိုင်ငံတွေ အနေနဲ့ ဒဏ်ခတ်ပိတ်ဆို့မှုတွေ ပြုလုပ်ဖို့ JFMက တောင်းဆိုထားပါတယ်။

(စစ်တပ်ခန့်နိုင်ငံခြားရေးဝန်ကြီးဟောင်းနဲ့ ခရိုနီကိုကိုလတ်တို့ကို တွေ့ရစဥ်။ ဓာတ်ပုံ - JFM)

မင်းဘူး-အမ်းလမ်းမှာ စစ်တပ်ထောက်ပို့ကားကို တော်လှန်ရေးပူးပေါင်းတပ် တိုက်ခိုက်စစ်သား၆ဦးသေ၊ ၃ဦး ဖမ်းမိ

■လက်နက်ခဲယမ်း​တွေသိမ်းဆည်းရရှိပြီး ၊စစ်ကားတစ်စီးကိုဖျက်ဆီး

မေ-၂၉၊၂၀၂၆။ ထားမြတ်/People’s Spring

မကွေးတိုင်း၊ မင်းဘူးမြို့နယ်၊ မင်းဘူး-အမ်း လမ်းပိုင်းပေါ်မှာ စစ်တပ်ရဲ့ ထောက်ပို့ကား တစီးကို တိုက်ခိုက်ခဲ့ရာ စစ်ကောင်စီသေဆုံးထိခိုက်ရှိခဲ့ပြီး လက်နက်ခဲယမ်းတွေ သိမ်းရခဲ့ကြောင်း အမျိုး
သားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက သတင်းဓာတ်ပုံတွေနဲ့အတူထုတ်ပြန်လိုက်ပါတယ်။

မေလ ၂၈ရက်မှာ စစ်တပ်ထောက်ပို့ယာဉ်ကို မင်းဘူး မြို့နယ် ပကဖ၊ CDF-Asho၊ NSA လူ့ဘောင်သစ် တပ်မတော်တို့က မိုင်းဆွဲတိုက်ခိုက်ရာ ရန်သူ (၆) ဦး သေဆုံး၊ (၃) ဦး ဖမ်းမိကာ လက်နက်ခဲယမ်းများ သိမ်းဆည်းရရှိခဲ့တာလို့ ဖော်ပြထားပါတယ်။

မိုင်းဆွဲတိုက်ခိုက်မှု အပြီးမှာ ထိတွေ့တိုက်ပွဲ မိနစ် ၂၀ ကြာဖြစ်ခဲ့ကြောင်း အသိပေးထားပါတယ်။

တိုက်ပွဲအပြီး စစ်တပ် ထံမှ အူဇီ (၃) လက်၊ MA-1 (၂) လက်၊ MA-2 (၁) လက်၊ ၅.၅၆ ကျည် လက်ဆွဲဘောက် (၁) လုံး၊ ၁၂၂ မမ MLRS ရော့ကတ် ပို့ယမ်း သေတ္တာ (၆) လုံး နဲ့ ၁၂၂ မမ MLRS ရော့ကတ်(၂၈)လုံးသိမ်းဆည်းရရှိခဲ့​ကြောင်း မှတ်တမ်း
ဓါတ်ပုံတွေနဲ့တကွ ဖော်ပြပါတယ်။စစ်တပ်ရဲ့ စစ်ကားကိုပါ​တော်လှန်​ရေးတပ်​တွေကတိုက်ခိုက်ဖျက်ဆီးနိုင်ခဲ့ပါတယ်။

အခုစစ်ဆင်ရေးဟာ စစ်ကောင်စီ စိုးမိုးနယ်မြေအတွင်း ရန်သူ့တပ်အနီးမှာ လုပ်ခဲ့တာ ဖြစ်ကြောင်း NUG ကာကွယ်ရေးက ထုတ်ပြန်ပါတယ်။ ဒါဟာ ပြည်သူ့ကာကွယ်ရေးအဖွဲ့ (ပကဖ)နဲ့ ပူးပေါင်းတပ်ဖွဲ့များရဲ့ တိုက်ခိုက်ရေး စွမ်းရည်ကို ပြသနိုင်ခဲ့ခြင်းဖြစ်တယ်လို့ ဖော်ပြပါတယ်။

NUG ကာကွယ်ရေး ပြည်သူ့ကာကွယ်ရေးတပ်
မတော်(PDF) စစ်ရုံးချုပ် ဒုတိယ စစ်ဦးစီးအရာရှိချုပ် ဒေါက်တာစိုးသူရဇော်ကလည်း နိုင်ငံတဝန်းတိုက်ပွဲတွေမှာ စစ်တပ်က အကျအဆုံးအထိအ
ခိုက်များစွာရှိနေကြောင်း မနေ့က မေလ ၂၈ရက်ညပိုင်းမှာ အသိပေးထားပါတယ်။

”စစ်မြေပြင်မှာ ရန်သူဘက်က အကျအဆုံး အင်
မတန်များပါတယ်။တနေရာ/ နှစ်နေရာမှာဘဲ ဒီလို ဖြစ်နေတာ မဟုတ်ပါဘူး ။မြန်မာတနိုင်ငံလုံးက စစ်ဂွင်အသီးသီးမှာ ရန်သူဘက်က အကျအဆုံး အထိအခိုက်ဟာ ကြောက်ခမန်းလိလိ ဖြစ်ပါတယ် ။ တရားဝင် သတင်းမထုတ်ပြန်ပေမယ့် ကျွန်တော်တို့ဆီ တက်လာတဲ့ Daily Report တွေအရ နေ့စဉ်တိုက်ပွဲအသီးသီးကနေ သိမ်းဆည်းရမိတဲ့ ရန်သူ့အလက် ၊ အလောင်းတွေဟာ မနည်းပါဘူး” လို့ ဒေါက်တာစိုးသူရဇော်ကပြောပါတယ်။

ဒါကြောင့် အာဏာသိမ်းစစ်တပ်ရဲ့ အတင်းအဓမ္မ စစ်သားစုဆောင်းမှု မခံရအောင် ရှောင်ဖို့၊ တကယ်
လို့ စုဆောင်းခံရရင် လွတ်အောင်ပြေးဖို့ ၊လွတ်လမ်းမရှာနိုင်ဘဲ စစ်မြေပြင် ရောက်လာရင် တော်
လှန်ရေးဘက် ကူးပြောင်းပြီး လက်နက်ချဖို့ တိုက်တွန်းထားပါတယ်။

နတ်ရေကန်ဗျူဟာကို ပို့မယ့်စစ်တပ်ထောက်ပို့ကားကို တော်လှန်ရေးတပ်တွေက စစ်တပ်ထိန်းချုပ်ဧရိယာထဲဝင်ရောက်တိုက်ခိုက်

မေ-၂၉၊၂၀၂၆။ယောနသံ၊ဟာနာဆန်/People's Spring

အာရက္ခတပ်တော်(AA)နဲ့ မဟာမိတ်တွေ ထိုးစစ်ဆင်တိုက်ခိုက်နေတဲ့နတ်ရေကန်ဗျူဟာကို ပို့မယ့် လက်နက်ခဲရးယမ်းတွေတင်ဆောင်လာတဲ့ကားကို PDF ပူးပေါင်းတပ်တွေကကြားဖြတ်တိုက်ခိုက်ခဲ့ပါတယ်။

မကွေးတိုင်း၊ မင်းဘူးမြို့နယ်၊ မင်းဘူး-အမ်း လမ်းပိုင်းပေါ်မှာ မင်းဘူး မြို့နယ် ပကဖ၊ CDF-Asho၊ NSA လူ့ဘောင်သစ်တပ်မတော်တို့ပူးပေါင်းပြီး တိုက်ခိုက်ခဲ့တာလို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ဒီနေ့မေလ၂၉ရက်နေ့မှာ သတင်းထုတ်ပြန်ပါတယ်။

တိုက်ခိုက်မှုက မေလ (၂၈) ရက်နေ့မှာဖြစ်ခဲ့ပြီးအဲဒီထောက်ပို့ကားဟာ နတ်ရေကန်ဗျူဟာကိုဦးတည်မောင်းနှင်နေတာဖြစ်ပြီး သတင်းအတိအကျရလို့ ဖြတ်တောက်တိုက်ခိုက်ခဲ့တာလို့ တော်လှန်ရေးရဲဘော်တစ်ဦးက ပြောပါတယ်။

"ကားကရေကန်ဗျူဟာကိုသွားမှာ။ရန်သူထိန်းချုပ်ထားတဲ့ဧရိယာထဲမှာကို ဝင်ဆော်တာ။ တော်လှန်ရေးအင်အားစုတွေပူးပေါင်းပြီး ချကြတာ"လို့ တိုက်ခိုက်တဲ့ဖြစ်စဉ်မှာပါဝင်တဲ့ တော်လှန်ရေးတပ်ဖွဲ့ထဲကရဲဘော်တစ်ဦးကပြောပါတယ်။

တိုက်ခိုက်မှုဟာ ရန်သူ့ စိုးမိုးနယ်မြေအတွင်း ရန်သူ့တပ်အနီးမှာ လုပ်ဆောင်ခဲ့ခြင်းဖြစ်ပြီး ပြည်သူ့ကာကွယ်ရေးအဖွဲ့ (ပကဖ) နှင့် ပူးပေါင်းတပ်ဖွဲ့တွေရဲ့ တိုက်ခိုက်ရေး စွမ်းရည်ကို ပြသနိုင်ခဲ့တယ်လို့ ကာကွယ်ရေးဝန်ကြီးဌာနက သတင်းထုတ်ပြန်ပါတယ်။

စစ်ကောင်စီတပ်ဖွဲ့ဝင်၆ ဦး သေဆုံး၊ ၃ ဦး ဖမ်းမိခဲ့ပြီး အူဇီ‌ သေနတ်၃လက်၊ MA-1၂လက်၊ MA-2 ၁ လက်၊ ၅.၅၆ ကျည် လက်ဆွဲဘောက် ၁ လုံး၊ ၁၂၂ မမ MLRS ရော့ကတ် ပို့ယမ်း သေတ္တာ ၆ လုံးနဲ့ ၁၂၂ မမ MLRS ရော့ကတ် ၂၈ လုံး သိမ်းဆည်းနိုင်ခဲ့တယ်လို့ဖော်ပြထားပါတယ်။

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်တွေနဲ့ ဒေသအသီးသီးမှာရှိနေတဲ့တော်လှန်ရေးတပ်တွေကြား ညှိနှိုင်းစရာတွေရှိနေပေမယ့် စစ်အာဏာရှင်ကိုပစ်မှတ်ထားပြီးတိုက်ခိုက်တဲ့တိုက်ပွဲတွေကို ပိုမိုဖော်ဆောင်လာနိုင်တယ်လို့CDF-Asho ပြောရေးဆိုခွင့်ရှိသူ ဆလိုင်းရိုချင်းက ပြောပါတယ်။

"ကျနော်တို့ရဲ့မူအရတော့ အာဏာရှင်သည်တဖွဲ့တည်းဖြစ်တယ်။သူတို့ကိုတိုက်ခိုက်ဖို့ မိတ်ဖက်ပဋိပက္ခတွေနည်းနိုင်သမျှနည်းအောင် ပူးပေါင်းဆောင်ရွက်မှုတွေလုပ်စေချင်တယ်။အချိန်ကြာလာတဲ့အမျှတော့ တစ်ဖွဲ့နဲ့တစ်ဖွဲ့ပိုပြီးပူးပေါင်းဆောင်ရွက်ကြရမယ်ဆိုတာ တော်လှန်ရေးတပ်တွေအချင်းချင်းကြားမှာ ပိုပြီးသိလာပါပြီ။ ကြိုးစားနေကြပါတယ်"လို့ ပြောပါတယ်။

ဒေသအသီးသီးမှာစစ်အာဏာရှင်ကိုပူးပေါင်းတိုက်ခိုက်ကြရင်း တိုက်ပွဲအတွေ့အကြုံတွေနဲ့ တော်လှန်ရေးတပ်ဖွဲ့ကြားမှာဖြစ်ပွားနေတဲ့သဘောထား ကွယ်လွဲမှုတွေကိုတွေကိုညှိနှိုင်းအဖြေရှာသွားနိုင်လိမ့်မယ်လို့ ဆလိုင်းရိုချင်းက မှတ်ချက်ပြုပါတယ်။

နတ်ရေကန်ဗျူဟာကုန်းဟာ မကွေးတိုင်း၊ ငဖဲမြို့နယ်အတွင်း ရခိုင်ပြည်နယ်၊ မကွေးတိုင်းနဲ့ ပဲခူးတိုင်းဆက်စပ်နေရာမှာရှိပြီး စစ်ရေးအရ အချက်အချာကျတဲ့ စစ်ကောင်စီရဲ့အမာခံစခန်းကြီးဖြစ်ပါတယ်။အခိုင်အမာကာကင်းစခန်ကြီး၁၀ခုထက်မနည်းရှိပြီးကာကင်းခန်းတွေကိုAAနဲ့ ပူးပေါင်းတပ်တွေက တိုက်ခိုက်သိမ်းယူထားပြီး ဗျူဟာကို ဦးတည်တဲ့စစ်ဆင်ရေးဆက်လက်ဖော်ဆောင်နေပါတယ်။

စစ်တပ်က နတ်ရေကန်ဗျူဟာကနေ၂မိုင်ခန့်အကွာမှာရှိတဲ့ အရှေ့မြောက်ဘက်က ပဇီရွာနဲ့အရှေ့‌တောင်ဘက်က ဂုတ်ကြီးရွာကို အင်အားဖြည့်ပြီး စစ်ကြောင်းထိုးဖို့ ကြိုးစားနေပါတယ်။ မြေပြင်မှာတိုက်ပွဲတွေပြင်းထန်နေပြီး စစ်ကောင်စီတပ်ကလေကြောင်းကနေ နေ့စဉ်ဗုံးကြဲနေတယ်လို့သိရပါတယ်။

စစ်တပ်ထောက်ပို့ကားတွေကို ဖြတ်တောက်တိုက်ခိုက်တဲ့စစ်ဆင်ရေးကိုမေလ ၂၈ ရက် နေ့လယ်ပိုင်းကကျောက်ပန်းတောင်းမြို့နယ်အခြေစိုက် အမှတ် (၁) ဒုံးစစ်ဆင်ရေးကွပ်ကဲမှုဌာနချုပ် (ဒစခ - ၁) လက်အောက်ခံ၊ အမှတ် (၆၀၉) ဒုံးတပ်ရင်း (ဒတရ - ၆၀၉) မှ ထွက်ခွာလာပြီး ငဖဲမြို့နယ်အတွင်း ပို့ဆောင်ဖို့ လုပ်နေစဉ်တော်လှန်ရေး ပူးပေါင်းတပ်တွေကတိုက်ခိုက်ခဲ့တာပါ။

အဲဒီ ထောက်ပို့ယာဉ်ပေါ်မှာ 122 MLRS Rockets (၁၂၂ မမ အတွဲလိုက်ပစ်ဒုံးကျည်များ) တင်ဆောင်လာခြင်းဖြစ်ပါတယ်။တိုက်ပွဲအတွင်း စစ်သား ၆ ဦး သေဆုံးကာ ၃ ဦးကို သုံ့ပန်းအဖြစ် ဖမ်းဆီးရမိခဲ့ကြောင်း သိရပါတယ်။ ဒါ့အပြင် အဲဒီစစ်အုပ်စုဆီကနေ MA 1 (၂) လက်၊ MA 2 (၁) လက်၊ MA 13 (သို့မဟုတ်) Uzi (၃) လက် အပါအဝင် လက်နက်၊ ခဲယမ်း အမြောက်အမြားကိုပါ သိမ်းဆည်းရမိခဲ့ကြောင်းမကွေးတိုင်း ပကဖ ကထုတ်ပြန်ပါတယ်။

မကွေးတိုင်းပကဖဟာ ရုပ်သံမှတ်တမ်းနဲ့တကွ ထုတ်ပြန်လိုက်တာဖြစ်ပြီး သေဆုံးသူတွေ၊ အရှင်ဖမ်းဆီးရမိတာတွေကိုပါ တွေ့ရပါတယ်။ သေဆုံးသူတွေနဲ့ အရှင်မိသူတွေရဲ့ ရာထူးတွေကို မသိရသေးပါဘူး။ ထုတ်ပြန်ချက်နဲ့ပတ်သက်ပြီး မင်းဘူး-စကု ပကဖထံ ဆက်သွယ်မေးမြန်းထားပြီး ပြန်လည်ဖြေကြားတာ မရှိသေးပါဘူး။

ယခုတိုက်ခိုက်မှုကို အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာနရဲ့ လမ်းညွှန်ချက်နဲ့ မင်းဘူး (စကု) မြို့နယ် ပကဖ၊ ချင်းကာကွယ်ရေးတပ် - အရှို (CDF – Asho) နဲ့ လူ့ဘောင်သစ်တပ်မတော် (NSA) တို့ ပူးပေါင်းကာ စစ်ဆင်ရေးဖော်ဆောင်ခဲ့ခြင်း ဖြစ်ကြောင်း သိရပါတယ်။

ပခုက္ကူမှာ ပေါ်တာဆွဲခံရတဲ့ စစ်မှုထမ်းတပ်သားသစ် ပကဖထံ အလင်းဝင်

မေ-၂၉၊ ၂၀၂၆။ ဟာနာဆန်/People's Spring

မကွေးတိုင်း၊ ပခုက္ကူမြို့နယ်၊ အမှတ်(၂၅၂)ခြေလျင်တပ်ရင်း ခလရ-၂၅၂ရဲ့ ပေါ်တာဆွဲခံရတဲ့ စစ်မှုထမ်းတပ်သားသစ် တစ်ဦး ပခုက္ကူအခြေစိုက် COBRA ONE Pakokku တပ်ဖွဲ့ထံ အလင်းဝင်လာခဲ့ပါတယ်။

မေလ ၂၈ ရက် မနေ့က မကွေးတိုင်း၊ ပခုက္ကူခရိုင်၊ ပခုက္ကူမြို့နယ်၊ တပ်မ(၁၀၁) လက်အောက်ခံ ခလရ(၂၅၂)က စစ်မှုထမ်းတပ်သားသစ် ပြည့်စုံဆိုသူဟာ ပခုက္ကူမြို့နယ်-ပကဖ လက်နက်ကြီးတပ်ဖွဲ့ COBRA ONE Pakokku ထံသို့ ဆက်သွယ်ပြီး အလင်းဝင်လာကြောင်း အဆိုပါ တပ်ဖွဲ့က အသိပေးပါတယ်။

"သူက စလင်းမြို့မှာ အလုပ်သွားရင်း ပေါ်တာအဆွဲခံရတာပါ။ သူက pageကနေ ဆက်သွယ်လာပြီး ထွက်ပြေးချင်လို့ ပြောလာတာပါ"လို့ COBRA ONE Pakokku တပ်ဖွဲ့ရဲ့ တာဝန်ရှိသူက ပြောပါတယ်။

အဲဒီအလင်းဝင်တပ်သားကို ချုပ်နှောင်တင်းကြပ်ခြင်းမရှိဘဲ လွတ်လပ်စွာဆုံးဖြတ်ပိုင်ခွင့်ပေးထားတယ်လို့ COBRA ONE Pakokku တပ်ဖွဲ့က ဆိုပါတယ်။

ခလရ(၂၅၂)တပ်တွင်းမှာ စစ်မှုထမ်းတပ်သားသစ်တွေကို ရခိုင်နယ်ဘက်သို့ ပို့ဆောင်နေပြီး တပ်အင်အားတွေမရှိတော့လို့ ပေါ်တာတွေ အတင်းလိုက်စွဲနေရကာ အတင်းအကြပ်သင်တန်းပေးပြီး ရှေ့တန်းလွှတ်နေတယ်လို့ ထွက်ပြေးလာတဲ့ တပ်သားသစ်တွေက ဆိုပါတယ်။

ပြီးခဲ့တဲ့ မတ်လ ၂၁ ရက်ကလည်း ပခုက္ကူမြို့၊ တပ်မ(၁၀၁)လက်အောက်ခံ ခလရ(၂၅၂)တပ်မှ စစ်ကောင်စီတပ်သားနဲ့ စစ်မှုထမ်းတပ်သားတို့ ၂ ဦးဟာ COBRA ONE Pakokku တပ်ဖွဲ့ထံ ဆက်သွယ်အလင်းဝင်ခဲ့ပါသေးတယ်။

(အလင်းဝင် စစ်မှုထမ်းတပ်သားအား တွေ့ရစဥ်။ ဓါတ်ပုံ-Cobra One)

မီဇိုရမ်ပြည်နယ်ရှိ စစ်ဘေးရှောင်စခန်းကို သွားရောက်လည်ပတ်ခဲ့တဲ့ ဂျိုရှုအာဗန်

မေ-၂၉၊ ၂၀၂၆။ သုည/People's Spring

UFC ဖလိုင်းဝိတ်တန်း ချန်ပီယံ ချင်းတိုင်းရင်းသား ဂျိုရှုအာဗန်ဟာ အိန္ဒိယနိုင်ငံ မီဇိုရမ်ပြည်နယ်ရှိ Sihhmui စစ်ဘေးရှောင်စခန်းကို ဒီနေ့ မေလ ၂၉ရက်မှာ သွားရောက်လည်ပတ်ခဲ့ပါတယ်။

ဗန်ရဲ့ လာရောက်လည်ပတ်မှုကို ပရိသတ်အများအပြား ကြိုဆိုနှုတ်ဆက်ခဲ့ကြပြီး စစ်ဘေးရှောင်ပြည်သူတွေကိုလည်း ဗန်က အားပေးစကား ပြောကြားခဲ့ပါတယ်။

ဗန် ကိုယ်တိုင်ဟာလည်း စစ်ဘေးရှောင်ဒုက္ခသည်ဘဝကနေ MMA လောကမှာ နာမည်အကျော်ကြားဆုံး UFC ရဲ့ ဖလိုင်းဝိတ်တန်းချန်ပီယံ ဖြစ်လာခဲ့သူ ဖြစ်ပါတယ်။

"ကိုယ်တိုင် ဒုက္ခသည် ဘဝကနေ UFC ချန်ပီယံ ဖြစ်လာသူ ဂျိုရှုအာဗန် ရောက်လာလို့ အရမ်းပျော်မိတယ်။ တကယ့်ကို နှလုံးသားလှတဲ့သူပါ။ မမျှော်လင့်ဘဲ အပြင်မှာ ဂုဏ်သရေရှိရှိ တွေ့ရတော့ တကယ်ကျေနပ်မိတယ်" လို့ ဗန်နဲ့ တွေ့ဆုံခွင့်ရခဲ့သူ Sihhmui စစ်ဘေးရှောင်စခန်းမှ ပြည်သူတစ်ဦးက ဆိုပါတယ်။

ဘဝမမေ့၊ ကျေးဇူးသိတတ်၊ ကြင်နာတတ်သော ဂျိုရှုအာဗန် ဒီ့ထက်ပို အောင်မြင်ပါစေလို့လည်း ပရိတ်သတ်အချို့က ဗန့်ကို ဂုဏ်ပြုမှတ်ချက်စကားဆိုခဲ့ပါတယ်။

မေလ ၂၆ ရက်ကလည်း ဗန်ဟာ မလေးရှားနိုင်ငံက ငယ်ဘဝပညာသင်ခဲ့တဲ့ကျောင်းကို သွားရောက်ခဲ့ပါသေးတယ်။

လွန်ခဲ့တဲ့ ၂၀၁၁ ခုနှစ်က ဂျိုရှုအာဗန်ဟာ အသက် ၁၀ နှစ်သား အရွယ်မှာ မိသားစုနဲ့အတူ မလေးရှားနိုင်ငံကို စစ်ဘေးရှောင်ရင်း အဲဒီ ချင်းဒုက္ခသည်များဆိုင်ရာ လူထုအခြေပြုကျောင်းကို တက်ရောက်ခဲ့တာ ဖြစ်ပါတယ်။

ဗန်ဟာ အဲဒီကျောင်းမှာ ၂ နှစ်ခန့် ပညာသင်ကြားခဲ့ပြီးအသက် ၁၂ နှစ်အရွယ် ၂၀၁၃ ခုနှစ်မှာတော့ အမေရိကန်နိုင်ငံ၊ တက္ကဆက်ပြည်နယ်၊ ဟူစတန်မြို့ကို ဒုက္ခသည်အစီအစဉ်နဲ့ ရွှေ့ပြောင်းအခြေချခွင့်ရခဲ့တာ ဖြစ်ပါတယ်။ ဒါကြောင့် UFC ချန်ပီယံဗန်ဟာ ငယ်စဥ်ပညာသင်ခဲ့တဲ့ကျောင်းကို ၁၃ နှစ်အကြာမှ သွားရောက်လည်ပတ်ခဲ့တာဖြစ်ပါတယ်။

မေလ ၂၅ရက်ကလည်း ဗန်နဲ့ အဆိုတော် ဖြူဖြူကျော်သိန်းတို့ဟာ မလေးရှားနိုင်ငံ ကွာလာလမ်ပူမြို့မှာ ပရိသတ်တွေ့ဆုံပွဲ (Meet & Greet) အစီအစဉ်ကို ပြုလုပ်ခဲ့ပါတယ်။ အဲဒီတွေ့ဆုံပွဲ အခမ်းအနားကို မလေးရှားနိုင်ငံ ကွာလာလမ်ပူမြို့ ICC Pudu Hall မှာ ည ၇ နာရီမှ ၁၀ နာရီအထိ ကျင်းပခဲ့တာဖြစ်ပြီး ပရိတ်သတ်တွေ ခန်းမပြည့်လျှံအောင် တက်ရောက်အားပေးကြတာ တွေ့ခဲ့ရပါတယ်။

ဂျိုရှုအာဗန်ဟာ UFC မှာ ချန်ပီယံခါးပတ်ရတဲ့ ပထမဆုံး အာရှတိုက်က ကစားသမားဖြစ်ပြီး ပထမဆုံးအရှေ့တောင်အာရှဖွား ဖိုက်တာလည်း ဖြစ်ပါတယ်။

ရုပ်သံ - Aidak Thlang

“ဒီနေ့ဘာဖြစ်ခဲ့လဲ”

ဒီနေ့(မေလ ၂၉ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️မင်းဘူး-အမ်းလမ်းပိုင်းမှာ စစ်တပ်ထောက်ပို့ယာဥ်တိုက်ခိုက်ခံရပြီး စစ်သား ၆ဦး သေဆုံး

မကွေးတိုင်း၊ မင်းဘူးမြို့နယ်၊ မင်းဘူး-အမ်း လမ်းပိုင်းပေါ်မှာ စစ်တပ်ရဲ့ ထောက်ပို့ယာဥ်တစ်စီးကို တိုက်ခိုက်ခဲ့ရာ သေဆုံးထိခိုက်ရှိခဲ့ပြီး လက်နက်ခဲယမ်းတွေ သိမ်းရခဲ့ကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက သတင်းဓာတ်ပုံတွေနဲ့အတူထုတ်ပြန်လိုက်ပါတယ်။ မေလ ၂၈ရက်မှာ စစ်တပ်ထောက်ပို့ယာဉ်ကို မင်းဘူးမြို့နယ် ပကဖ၊ CDF-Asho၊ NSA လူ့ဘောင်သစ်တပ်မတော်တို့က မိုင်းဆွဲတိုက်ခိုက်ရာ ရန်သူ (၆) ဦး သေဆုံး၊ (၃) ဦး ဖမ်းမိကာ လက်နက်ခဲယမ်းများ သိမ်းဆည်းရရှိခဲ့တာလို့ ဖော်ပြထားပါတယ်။ မိုင်းဆွဲတိုက်ခိုက်မှု အပြီး ထိတွေ့တိုက်ပွဲ မိနစ် ၂၀ ကြာဖြစ်ခဲ့ကြောင်းလည်း အသိပေးထားပါတယ်။ စစ်တပ်ဆီကနေ လက်နက် သုံးလက်နဲ့ ခဲယမ်းတွေ သိမ်းဆည်းရရှိခဲ့​ကြောင်း မှတ်တမ်းဓါတ်ပုံတွေနဲ့တကွ ဖော်ပြပါတယ်။ စစ်တပ်ရဲ့ထောက်ပို့ယာဥ်ကိုပါ တော်လှန်​ရေးတပ်​တွေက တိုက်ခိုက်ဖျက်ဆီးနိုင်ခဲ့ပါတယ်။ အခုစစ်ဆင်ရေးဟာ စစ်တပ် စိုးမိုးနယ်မြေအတွင်း ရန်သူ့တပ်အနီးမှာ လုပ်ခဲ့တာ ဖြစ်ကြောင်း NUG ကာကွယ်ရေးက ထုတ်ပြန်ပါတယ်။ ဒါဟာ ပြည်သူ့ကာကွယ်ရေးအဖွဲ့ (ပကဖ)နဲ့ ပူးပေါင်းတပ်ဖွဲ့များရဲ့ တိုက်ခိုက်ရေး စွမ်းရည်ကို ပြသနိုင်ခဲ့ခြင်းဖြစ်တယ်လို့ ဖော်ပြပါတယ်။

◾️SRFတပ် NUGရဲ့ကွပ်ကဲမှုကို ခံယူပြီး သဘောတူညီမှုရ

စစ်ကိုင်းတိုင်း၊ မင်းကင်းမြို့နယ် ပြည်သူ့ကာကွယ်ရေးအဖွဲ့(ပကဖ)နဲ့ ကျောင်းသားတော်လှန်ရေးတပ်တော်(SRF)တပ်ဖွဲ့ဝင်တွေ ဖြစ်ပွားခဲ့တဲ့ သဘောထားကွဲလွဲမှု သဘောတူညီမှုရရှိခဲ့ပြီး SRFတပ်က အမျိုးသားညီညွတ်ရေးအစိုးရ(NUG)ရဲ့ ကွပ်ကဲမှုအောက်ခံယူခဲ့ပါတယ်။ မေလ၂၈ရက် ညနေက မင်းကင်းမြို့နယ် ပြည်သူ့အုပ်ချုပ်ရေးအဖွဲ့၊ ပြည်သူ့ကာကွယ်ရေးအဖွဲ့၊ ကလေးခရိုင်တပ်ရင်းက တာဝန်ရှိသူတွေနဲ့ SRF ဥက္ကဌ ကိုစံတင်ထွန်းအပါအဝင် ဒုခေါင်းဆောင်၊ နိုင်ငံရေးဌာနတာဝန်ခံနဲ့ အဖွဲ့ဝင်တွေ တွေ့ဆုံဆွေးနွေးခဲ့ပြီး တော်လှန်ရေးကို ဆက်လက်လုပ်ကိုင်သွားဖို့ အပါအဝင် အချက် ၃ချက် သဘောတူညီခဲ့ကြတာပါ။ မင်းကင်းမြို့နယ် ပကဖက ဖမ်းဆီးထိန်းသိမ်းထားတဲ့ SRF ရဲဘော်တွေထဲက ပြစ်မှုကျူးလွန်ခြင်းမရှိတဲ့ ရဲဘော်တွေကို ပြန်လွှတ်ပေးဖို့၊ အမှုဖွင့်တိုင်ကြားခြင်းခံထားရတဲ့ SRF တပ်တော်က ရဲဘော်‌တွေကို အမျိုးသားညီညွတ်ရေးအစိုးရ(NUG)ရဲ့ ဥပဒေဘောင်အတွင်းကနေ ဖြေရှင်းသွားဖို့၊ SRFတပ်တော်မှ ပြစ်မှုကျူးလွန်ထားခြင်းမရှိတဲ့ ရဲဘော်တွေအနေနဲ့ NUG အစိုးရရဲ့ COC အမိန့်ပေးကွပ်ကဲမှုအောက်မှာ ဝင်ရောက်ပြီး တော်လှန်ရေးကို ဆက်လက်လုပ်ကိုင်သွားဖို့ သဘောတူညီခဲ့ကြောင်း မင်းကင်းမြို့နယ် ပကဖနဲ့ SRFက ဒီနေ့ မေလ၂၉ရက် မနက်ပိုင်းမှာ ပူးတွဲထုတ်ပြန်ကြေညာပါတယ်။ SRFတပ်တော်နဲ့ မင်းကင်းမြို့နယ်က တော်လှန်ရေးအဖွဲ့တွေရဲ့ ပဋိပက္ခဟာ SRF တပ်တော်ကို ဖြိုခွင်းခြင်းမဟုတ်ဘဲ ပြည်သူတွေက အမှုဖွင့်တိုင်ကြားထားတဲ့ အမှုတွေအရ ကျူးလွန်သူတွေကို ဥပဒေအတိုင်း ဆောင်ရွက်ကြခြင်းသာဖြစ်တယ်လို့လည်း ဖော်ပြထားပါတယ်။ တော်လှန်ရေးအဖွဲ့အစည်းနှစ်ခုအကြား ပြဿနာတွေပိုမို ကြီးထွားစေဖို့ ရည်ရွယ်ချက်နဲ့ လှုံ့ဆော်ရေးသား ထုတ်ပြန်နေကြတဲ့ အဖွဲ့အစည်းတွေ၊ လူပုဂ္ဂိုလ်တွေရဲ့ရေးသား ဖြန့်ဝေခြင်းက သူတို့ရဲ့ ထင်မြင်ယူဆချက်များသာဖြစ်ပြီး နှစ်ဖက်တော်လှန်ရေးအဖွဲ့အစည်းတွေရဲ့ ညီညွတ်ရေးကို ရှေးရှု၍လည်းကောင်း၊ တော်လှန်ရေးတစုံလုံးရဲ့ ညီညွတ်မှုကို ရှေးရှု၍လည်းကောင်း ညီညွတ်ရေးပြိုကွဲစေမယ့် ထုတ်ပြန်ချက်များ၊ အရေးအသားများ ဆက်လက်ထုတ်ပြန်ရေးသားခြင်း မပြုကြဖို့လည်း ပူးတွဲတိုက်တွန်းထားပါတယ်။

◾️လူသတ်မှုကျူးလွန်တဲ့ အထွေထွေအတွင်းရေးမှူးကို ဖမ်းဆီးထားတယ်လို့ CDF ဟားခါး ထုတ်ပြန်