လူမစည်တော့တဲ့ ရန်ကုန် ၁၉ လမ်း

မေ-၂၈၊၂၀၂၆။ရောင်နီ/People's Spring

စစ်တပ်က ရက် ၁၀၀ စီမံချက်ဆိုပြီး ရန်ကုန်မြို့ထဲကလမ်းမတွေပေါ်ကို ဆိုင်ဖွင့်ခွင့်မပေးတာကြောင့် ညဘက်တွေမှာ စည်ကားလေ့ရှိတဲ့ရန်ကုန်မှာလူသိများတဲ့ ၁၉ လမ်းမှာ ခြောက်ကပ်နေပါတယ်။

လမ်းမပေါ်မှာ ဆိုင်ဖွင့်ခွင့်မရတာကြောင့် လမ်းမပေါ်မှာရှင်းလင်းနေပြီး ဆိုင်အများစုမှာလည်း လူ
အနည်းငယ်သာ စားသောက်နေကြတာတွေ့ရပါတယ်။ဆိုင်အများစုက ဝန်ထမ်းတွေက ဧည့်သည်ခေါ်ဖို့ ဆိုင်ရှေ့တွေအထိထွက်နေကြတာကိုလည်း ​တွေ့ရပါတယ်။

လသာမြို့နယ်က၁၉ လမ်းသာမကပဲ ‌လမ်း ၂၀ ဘက်မှာလည်း ည ဦးပိုင်းမှာတင်လူတွေရှင်းလင်းနေတာပါ။လမ်း၂၀ ကနာမည်ကြီးတဲ့ ဆန်ပြုတ်ဆိုင်မှာ လူရှင်းနေသလို အခြားဆိုင်တွေမှာလည်း စားသုံးသူတွေ မရှိပါဘူး။

ရန်ကုန်မြို့မှာ စစ်မှုထမ်းအကြောင်းပြ ပေါ်တာဆွဲတာနဲ့ လူငယ်တွေကို အဓမ္မဖမ်းဆီးတဲ့ ဖြစ်စဉ်တွေ ဆက်တိုက်ဖြစ်နေတာကြောင့် လူတွေရှင်းနေတာလည်းဖြစ်နိုင်ပါတယ်။

ရန်ကုန်မြို့မှာ ရက် ၁၀၀ စီမံချက်ခေါင်းစဉ်နဲ့ မြို့နယ်တိုင်းမှာ လမ်းဘေးဈေးဆိုင်တွေကိုလည်း မထွက်ဖို့စစ်တပ်လက်အောက်ခံ စည်ပင်တွေက ဖိအားပေးနေတာပါ။လမ်းဘေးဈေးသည်တွေကို ရှင်းလင်းတာက အခြေခံလူတန်းစားတွေအပေါ် သက်ရောက်မှုကြီးပြီး စီမံချက်လာချိန်ဆို ဆိုင်တွေ မခင်းပဲ ပြေးနေရတယ်လို့ လမ်းဘေးဈေး
သည်တစ်ဦးကပြောပါတယ်။

ဒါ​ပေမယ့် ပြည်သူအချို့က​တော့ စစ်တပ်လက်​အောက်ခံဌာန​တွေဟာ​နေရာအချို့မှာသာလုပ်ရဲပြီး တရုတ်တန်းလို​နေရာ​တွေမှာ​တော့မလုပ်ရဲဘူးလို့​ပြော​နေကြပါတယ် ။

စစ်တပ်က ရန်ကုန်အပါအဝင် စစ်တပ်ထိန်းချုပ်မှု​အောက်ကမြို့ရွာ​တွေမှာ အခုနှစ်ပိုင်း စည်ကား​ပျော်ရွှင်​နေကြတယ်ဆိုတဲ့ပုံရိပ်ကိုပြသဖို့ ဘုရားပွဲ​တော်​တွေ ၊ဇာတ်ပွဲ​တွေ ၊​ဘောလုံးပွဲ​တွေ ၊အားက
စားပြိုင်ပွဲ​တွေ ၊​ မာရသွန်အ​ပြေးပြိုင်ပွဲ​တွေ စတဲ့​ပျော်ပွဲရွှင်ပွဲ​တွေကို အကြိမ်ကြိမ်လုပ်ခိုင်းခဲ့ပါတယ်။အခုအခါမှာလည်း ရက် ၁၀၀ စီမံချက်ဆိုပြီး ဆိုင်​တွေကိုလမ်း​ပေါ်ထွက်​ရောင်းတာကိုတားမြစ်ပြန်တာဖြစ်ပါတယ်။

ရန်ကုန် ၁၉ လမ်းဟာ ရန်ကုန်မှာညပိုင်းအချိန်​တွေမှာ ပြည်တွင်းသာမက နိုင်ငံခြားသား​တွေပါဘီယာဆိုင်ထိုင်သူ​တွေ ၊ စား​သောက်သူ​တွေနဲ့​ စည်ကား​လေ့တဲ့လမ်းဖြစ်ပြီး အခုလိုစစ်တပ်ကလုပ်တာ​ကြောင့် ရန်ကုန် Night Life ​ပျော်ရွှင်စရာပိုနည်းလာပြီဆို ပြည်သူအချို့ကဆိုပါတယ်။ ဒါ​ပေမယ့်တချိန်တည်းမှာ အခုလပိုင်းအတွင်း ရန်ကုန်မှာ ညမထွက်ရအမိန့်ကိုစစ်တပ်ကရုပ်သိမ်းတယ်ဆိုပြီး ​ပေါ်တာဆွဲတာ​တွေပိုဆိုးဝါးလာလို့ ပြည်သူ​တွေအတွက်ရန်ကုန်ည​တွေဟာ ပိုအန္တရာယ်များလာတယ်လို့ပြည်သူ​တွေက​ပြောပါတယ်။

အာဏာသိမ်းစစ်တပ်ရဲ့အခုအစီအစဥ်အ​ပေါ် စာဖတ်သူ​တွေရဲ့အမြင်ကိုလည်းမှတ်ချက်မှာ ​ဆွေး​နွေးနိုင်ပါတယ် ။

ညောင်ဦးမြိုနယ်ထဲစစ်ကြောင်းထိုးနေတဲ့
စစ်တပ်က တပ်သား ၁ဦးကို PDF ဖမ်းမိ

■စစ်တပ်ကထပ်မံစစ်ကြောင်းထိုးဖို့ အင်အားဖြည့်လာတယ်လို့ ပကဖ ပြော

မေ-၂၈၊၂၀၂၆။ဒီဒီး/People’s Spring

ရှေးဟောင်းယဉ်ကျေးမှုမြို့တော်ပုဂံ၊ညောင်ဦးမြို့နယ်က ငါ့သရောက်နယ်မြေမှာ စစ်ကြောင်းထိုးနေတဲ့ စစ်တပ်က တပ်သား ၁ဦးကို အရှင်ဖမ်းမိတယ်လို့ Earthquake People’s Defence Force က ထုတ်ပြန်ပါတယ်။

ငါ့သရောက်နယ်မြေမှာ စစ်ကြောင်းထိုးနေတဲ့ စစ်
တပ်က တပ်သား မျိုးထက်ဇော်ကို မေလ ၂၆ရက်မှာ ဖမ်းမိခဲ့တာဖြစ်ပြီး MA -1 သေနတ် ၁လတ်နဲ့ ကျည် ၁၀၀တွေ သိမ်းဆည်းရရှိခဲ့တယ်လို့ အသိ
ပေးပါတယ်။

ငါ့သရောက်နယ်မြေမှာ စစ်ကြောင်းထိုးနေတဲ့ စစ်
တပ်က တိုက်ခိုက်ခံရပြီးနောက် စစ်သား ၂၀ လောက်ဟာ လက်နက်တွေယူပြီးထွက်ပြေးနေတယ်လို့ ပုဂံဘီလူးတပ်လို့ခေါ်တဲ့ ညောင်ဦးမြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ရှိသူက လူထုနွေဦးကို ပြောပါတယ်။

ပြီးခဲ့တဲ့ မေလ ၂၄ရက်က ငါ့သရောက်နယ်မြေမှာ အင်အား ၃၀၀ လောက်နဲ့ စစ်ကြောင်းထိုးနေတဲ့ စစ်တပ်ကို ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး)၊ Popa Production and Guerrila Force (PPGF)၊ညောင်ဦးခရိုင်တပ်ရင်း ၁၊ ညောင်ဦးခရိုင် တပ်ရင်း ၅၊ ညောင်ဦးခရိုင်အထူးတိုက်ခိုက်ရေး၊ People Democratic Army(PDA) ၊ငါ့သရောက်တိုက်နယ်ပြည်သူ့ကာကွယ်ရေးအဖွဲ့(ပုဂံကြီးအဖွဲ့) နဲ့ ညောင်ဦးခရိုင်ပြည်သူ့ကာကွယ်ရေးအဖွဲ့ (မိုးမခ ​ပြောက်ကျား
တပ်)တို့က ပူးပေါင်းတိုက်ခိုက်ခဲ့ကြပါတယ်။

အဲဒီတိုက်ပွဲအတွင်းမှာ စစ်တပ်ကစစ်သား ၇ဦးဟာ လက်နက်​တွေယူပြီးထွက်ပြေးသွားကြတာလို့ ညောင်ဦးပကဖကပြောပါတယ်။အဲဒီနောက် စစ်
တပ်က နောက်ပြန်ဆုတ်ပြီး ကျေးရွာတွေအတွင်း နားနေချိန် စစ်သား ၁၀ ဦးကျော်လောက်ဟာ ထပ်
မံထွက်ပြေးသွားကြတာလို့ ညောင်ဦး ပကဖက ပြောပါတယ်။

"ဖမ်းမိတာက တခြားအဖွဲ့တွေကလည်း ဖမ်းမိထားတာ ရှိတယ်။ သတင်းမထုတ်သေးလို့သာ။ တိုက်ပွဲဖြစ်တော့ သူတို့က နောက်ပြန်ပတ်ဆုတ်ပြေးကြတော့ အဲဒီမှာ တခြားတပ်ဖွဲ့တွေက ဖမ်းမိထားတာတွေရှိတယ်"လို့ညောင်ဦးပကဖတာဝန်ရှိသူကပြော
ပါတယ်။

ထွက်ပြေးကြတဲ့ စစ်သားတွေဟာ စစ်မှုထမ်းတပ်
သားသစ်တွေ အများစုဖြစ်တယ်လို့ စုံစမ်းသ်ိရပြီး ၅ ဦးလောက်လို့ မဟာမိတ်တပ်တွေက လက်နက်တွေနဲ့အတူ ဖမ်းမိထားတယ်လို့လည်း ဆက်ပြောပါတယ်။

မေလ ၂၄ရက်က ငါ့သရောက်နယ်မြေ ဖလန်ကန်ကျေးရွာနားမှာ ဖြစ်ပွားခဲ့တဲ့ တိုက်ပွဲမှာလည်း စစ်
တပ်က ထိခိုက်သေဆုံးမှုရှိခဲ့တယ်လို့ ၎င်းက ဆက်ပြောပါတယ်။

ဒါ့အပြင် ပုပ္ပါးဒေသဘက်က စစ်တပ်ကလည်း စစ်ရေးလှုပ်ရှားမှု လုပ်နေတယ်လို့ ၎င်းကဆက်ပြောပါတယ်။

ဒါ့အပြင် စစ်တပ်က ညောင်ဦးမြို့နယ်ကို ထပ်မံစစ်ကြောင်းထိုးဖို့ ဒီကနေ့ မေလ ၂၈ရက်မှာ အင်အားဖြည့်တင်းလာတယ်လို့ ညောင်ဦး ပကဖ တာဝန်ရှိသူက ပြောပါတယ်။

" စစ်တပ်က စစ်ကြောင်းဆက်ထိုးဖို့ ပြင်နေတာ ရှိတယ်။ ဒီနေ့ပဲ ညောင်ဦးမြို့ကို စစ်ကား ၂၁စီးဝင်လာတာ ရှိတယ်။ သူတို့ အင်အားတိုးပြီး ထိုးမယ်ထင်တယ်"လို့ ညောင်ဦး ပကဖ တာဝန်ရှိသူက ပြောပါတယ်။

ပုဂံ၊ညောင်ဦးမြို့နယ်က ငါ့သရောက်နယ်မြေမှာ စစ်တပ်က မကြာခဏစစ်ကြောင်းထိုးနေပြီး ကျေး
ရွာတွေ မီးရှို့ဖျက်ဆီးနေပါတယ်။

ငါ့သရောက်နယ်မြေမှာ စစ်ကြောင်းထိုးနေတဲ့ စစ်တပ်က တပ်သား ၁ဦးကို PDF က ဖမ်းမိထားစဉ်။ ဓာတ်ပုံ - Earthquake People’s Defence Force

ဒေါ်အောင်ဆန်းစုကြည်မွေးနေ့ အထိမ်းအမှတ် လူထုလှုပ်ရှားမှုတွေမှာပါဝင်​ပေးကြဖို့ ကင်မ်တိုက်တွန်း

မေ-၂၈၊၂၀၂၆။သတိုး/People's Spring

စစ်တပ်ရဲ့ မတရားဖမ်းဆီးခြင်းခံထားရတဲ့ လူထုခေါင်းဆောင် ဒေါ်အောင်ဆန်းစုကြည်ရဲ့ (၈၁)နှစ်ပြည့် အထိမ်းအမှတ် လူထုလှုပ်ရှားမှုတွေမှာ ပါဝင်​ပေးကြဖို့ သားဖြစ်သူ ကင်မ်အဲရစ်(ခ) ကိုထိန်လင်းက တိုက်တွန်းလိုက်ပါတယ်။

"အခုလာမဲ့ ဇွန်လမှာ ကျွန်တော့်မေမေ နိုဘယ်ငြိမ်းချမ်းရေးဆုရှင် ဒေါ်အောင်ဆန်းစုကြည်ရဲ့
၈၁ နှစ်မြောက်မွေးနေ့ အနေနဲ့ မေမေ သက်ရှိထင်ရှားရှိကြောင်း သက်သေပြဖို့ ကမ္ဘာလုံးဆိုင်ရာ စိန်ခေါ်တောင်းဆိုမှုမှာ ပါဝင်ပေးပါ။ခြေလှမ်း ၈၁၀၀၀ လျှောက်လို့ရပါတယ်။ကီလိုမီတာ ၈၁ ပြေးနိုင်ပါတယ်။မိုင် ၈၁ စက်ဘီးစီးလို့လည်းရပါတယ်။ဒါမှမဟုတ် ကိုယ့်အတွက် အဓိပ္ပါယ်ရှိတဲ့နည်းတစ်ခုခုနဲ့ ပါဝင်နိုင်ပါတယ်။"လို့ မေ ၂၈ ရက်ညမှာကင်မ်ကဗီဒီယိုဖိုင်နဲ့တောင်းဆိုထားပါတယ်။

ဇွန် ၁၉ ရက်မှာကျရောက်မယ့် ဒေါ်အောင်ဆန်းစုကြည် မွေးနေ့အတွက်လူထုလှုပ်ရှားမှုတွေကို ဇွန် ၁ ရက်နေ ၁၉ ရက်အတွင်းပြုလုပ်ဖို့ တောင်းဆိုထားတာပါ။

"အာဏာလုပြီး ငါးနှစ်ကျော်ကြာပြီးနောက်မှာတောင် မေမေသက်ရှိထင်ရှားရှိနေသးရဲ့လား ဆိုတဲ့ လွတ်လပ်စွာ အတည်ပြုထားတဲ့ သက်သေကို တစ်ကမ္ဘာလုံး သိခွင့်မရသေးပါဘူး"လို့ ကင်မ်ကပြောပါတယ်။

ဒေါ်အောင်ဆန်းစုကြည်ကို စစ်တပ်က ဧပြီ ၃၀ ရက်မှာ နေပြည်တော်အကျဉ်းထောင်ကနေ သတ်
မှတ်ထားတဲ့ နေအိမ်ကို ရွှေ့ပြောင်းခဲ့တယ်လို့ သာသတင်းထုတ်ပြန်ထားပါတယ်။ ဒါပေမယ့် ဘယ်နေရာမှာထားရှိတယ်ဆိုတာမသိရပါဘူး။ဒါ့အပြင် ဓာတ်ပုံ ၁ပုံသာထုတ်ပြန်ထားပြီးဒေါ်အောင်ဆန်းစုကြည်ရဲ့ လက်တလောအခြေအနေကိုလည်း မသိရသေးပါဘူး။

သတ်မှတ်ထားတဲ့နေအိမ်ကိုပြောင်းရွှေ့တဲ့ဆိုတဲ့ထုတ်ပြန်ချက်မှာ ဓာတ်ပုံ ၁ပုံ ပါဝင်ပေမယ့် ဘယ်အချိန် ဘယ်နေရာမှာ ရိုက်ကူးထားတယ်ဆိုတာ ဘယ်သူမှ အတည်မပြုနိုင်ပါဘူး။

ဒါ့ကြောင့် ဒေါ်အောင်ဆန်းစုကြည် သက်ရှိထင်ရှားရှိနေသေးကြောင်း သက်သေပြဖို့ ပြည်သူတွေက Proof Of Life ကမ်ပိန်းကို ဧပြီ ၂၁ရက်ကစတင်ပြီး တောင်းဆိုမှုတွေ ပြုလုပ်နေတာပါ။ ဒါပေမယ့်စစ်တပ်ကတော့ တိကျထင်ရှားတဲ့ သက်သေထုတ်ပြခြင်းမျိုးမရှိသေးပါဘူး။

ပြီးခဲ့တဲ့နှစ်က ကျရောက်တဲ့ ဒေါ်အောင်ဆန်းစုကြည် မွေနေ့မှာလည်းသားဖြစ်သူ ကင်မ်အပါအဝင် ပြည်သူတွေက ၈၀ နဲ့ သက်ဆိုင်တဲ့ လူထုလှုပ်ရှားမှုတွေပြုလုပ်ခဲ့ပါတယ်။

"Tiktok သုံးစွဲတဲ့အခါ လုံခြုံရေး သတိရှိပါ"

‣ အကောင့်ကို Private လုပ်ထားပါ။ သင့်ကို Follow လုပ်ထားတဲ့သူတွေသာ သင့်ဗီဒီယိုတွေကို ကြည့်ရှုနိုင်မှာဖြစ်ပါတယ်။

‣ သင့်အကောင့်ကို တခြားသူတွေဆီ Suggest မလုပ်အောင်ပိတ်ပါ။
သင့်ဖုန်း Contact list ထဲက မိတ်ဆွေတွေ သို့မဟုတ် Facebook သူငယ်ချင်းတွေဆီ သင့်အကောင့်ကို Tiktok က လိုက်ပြပေးနေတတ်ပါတယ်။ ဒါကို ပိတ်လို့ရပါတယ်။

‣ သင့်ဗီဒီယိုတွေကို သူများ Download ဆွဲလို့မရအောင်ပိတ်ပါ။
အကယ်၍ သင်က ဗီဒီယိုတွေကို လူအများကြည့်စေချင်ပေမယ့် လုံခြုံရေးလည်း စိတ်ပူတယ်ဆိုရင်တော့ Public အကောင့် ပဲထားပြီး Privacy Setting ထဲမှာ Comment ပေးနိုင်သူ ဒါမှမဟုတ် Message ပို့နိုင်သူတွေကို "Friends Only" ပြောင်းထားတာက ပိုပြီး မျှတတဲ့ နည်းလမ်းဖြစ်ပါလိမ့်မယ်။

‣ Interaction များကို ကန့်သတ်ပါ။
သူစိမ်းတွေ သင့်ကို Message ပို့တာ၊ သင့်ဗီဒီယိုကိုယူပြီး Duet/Stitch လုပ်တာတွေကို ပိတ်ထားနိုင်ပါတယ်။
Privacy အောက်က Comments, Mention and Tags, Direct Messages, Duet, Stitch စတဲ့အပိုင်းတွေမှာ "Everyone" အစား "Friends" သို့မဟုတ် "No one" လို့ ပြောင်းထားပါ။

‣ Active Status ကို ပိတ်ပါ။
သင် အွန်လိုင်းတက်နေတာကို သူငယ်ချင်းတွေ မသိစေချင်ရင် ပိတ်ထားလို့ရပါတယ်။ ​

‣ Profile View ကို ပိတ်ပါ။
သင်က သူများ Profile ကို သွားကြည့်ရင် သူတို့သိသွားတတ်သလို၊ သင့်ကို ဘယ်သူလာကြည့်လဲဆိုတာကိုလည်း မြင်နေရတတ်ပါတယ်။ ဒါကို မလိုချင်ရင် ပိတ်ထားပါ။

‣ Ad Personalization ကို ပိတ်ပါ။
​TikTok က သင့်ရဲ့ အပြုအမူတွေပေါ်မူတည်ပြီး ကြော်ငြာပြတာကို သဘောမကျရင် ပိတ်ထားနိုင်ပါတယ်။

​တခုအကြံပြုချင်ပါသေးတယ်။ သင့်ရဲ့ Location (တည်နေရာ) ကိုလည်း TikTok က အမြဲမသိနေအောင် ဖုန်းရဲ့ System Setting ထဲမှာ TikTok အတွက် Location Access ကို "Never" သို့မဟုတ် "Ask Next Time" ပြောင်းထားဖို့ မမေ့ပါနဲ့။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #tiktok #တစ်တော့ #လုံခြုံရေး

ရွှေကူ-ငါးအိုး-မဘိမ်းနယ်တကြော တိုက်ပွဲပြင်းထန်နေ

▪️ကချင်ဒေသ အခြားနေရာ ၅ခုမှာလည်း စစ်ရေးတင်းမာနေဟု KIA ပြော

မေ-၂၉၊ ၂၀၂၆။ ထားမြတ်/People’s Spring

ကချင်ပြည်နယ်၊ ရွှေကူမြို့နယ်နဲ့ ရှမ်းမြောက် မဘိမ်းမြို့နယ်အကြား ရွှေကူ - ငါးအိုး-မဘိမ်းမြို့နယ်တကြောမှာ လတ်တလော နေ့စဉ်တိုက်ပွဲတွေပြင်းထန်နေကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ဒီကနေ့ မေလ ၂၉ရက်မနက်မှာ ပြောကြားခဲ့ပြီး ကချင်နဲ့ စစ်ကိုင်း နေရာဒေသ အချို့မှာ စစ်ရေးတင်းမာနေတယ်လို့ အသိပေးပါတယ်။

KIAနဲ့ ပူးပေါင်းတပ်များရှိရာ ဒေသတွေမှာ လတ်တလော စစ်ရေး အခြေအနေကို မေးမြန်းရာ ဗိုလ်မှူးကြီးနော်ဘူက ရွှေကူ-ငါးအိုး-မဘိမ်း ဒေသ၊ မန္တလေး-မြစ်ကြီးနားလမ်းမကြီးတကြော ကသာ-နဘား၊ မော်လူး-မော်ဟန်ဒေသ ၊ ဝိုင်းမော်ဒေသ၊ ဗန်းမော်ဒေသ၊ ဖားကန့်ဒေသနဲ့ အင်းတော်ကြီးဒေသ စစ်ရေး အခြေအနေတွေကို အခုလို ရှင်းပြတာဖြစ်ပါတယ်။

" ကျနော်တို့ ကချင်ပြည်နယ်ရဲ့ စစ်ရေး အခြေအနေကတော့ လောလောဆယ် ရွှေကူ -ငါးအိုး -မဘိမ်း အဲဒီတကြောတဝိုက်မှာ နေ့တိုင်း တိုက်ပွဲ တွေဖြစ်ပါတယ်။ ပိုပြီးမှ တိုက်ပွဲပြင်းထန်တဲ့နေရာလို့ ပြောလို့ရပါတယ်။နောက်တခုကတော့ ကသာ-နဘားပေါ့ မော်လူး-မော်ဟန် အဲဒီ မြစ်ကြီးနား -မန္တလေး လမ်းမကြီး တကြောမှာလည်း စစ်ရေး အခြေအနေကတော့ တင်းမာတဲ့ အနေအထားဖြစ်ပါတယ်”လို့ ဗိုလ်မှူးကြီးနော်ဘူက ပြောပါတယ်။

မန္တလေး-မြစ်ကြီးနားလမ်းတကြောမှာ လတ်လော တိုက်ပွဲပြင်းထန်တာ မရှိပေမယ့် ပြီးခဲ့တဲ့ သတင်းပတ်မှာ တိုက်ပွဲတွေရှိခဲ့တယ်လို့ အသိပေးပါတယ်။

"လွန်ခဲ့တဲ့ သတင်းပတ်လောက်မှာတော့ အဲဒီနေရာမှာ တိုက်ပွဲရှိခဲ့ပါတယ်။ ဒါပေမဲ့ ဒီတပတ်မှာတော့ အချင်းချင်း စောင့်ကြည့်နေတဲ့ အနေအထားဖြစ်ပါတယ်။ စစ်ကော်မရှင်ဘက်ကလည်း အဲဒီလမ်းတွေကို ပြန်ပြီးမှ ထိန်းချုပ်နိုင်ဖို့အတွက် သူတို့လည်း လုံခြုံရေးတွေကို တင်းတင်းကြပ်ကြပ်ချထားတာတွေ့ရပါတယ်။ တင်းကြပ်ထားတဲ့ သူတို့ လုံခြုံရေးတွေကို KIAနဲ့ တခြားသော ပူးပေါင်း မဟာမိတ်အဖွဲ့တွေ ပေါင်းပြီးမှ ဝင်တိုက်တဲ့ တိုက်ပွဲတွေရှိခဲ့ပါတယ်။ အခုလောလောဆယ်ကတော့ တိုက်ပွဲတော့မရှိဘူး ဒါပေမဲ့ စစ်ရေး အခြေအနေက တင်းမာတဲ့ အနေအထားဖြစ်ပါတယ်” လို့ ဗိုလ်မှူးကြီးနော်ဘူက ပြောပါတယ်။

ဝိုင်းမော်နဲ့ ဗန်းမော်မြို့နယ်တွေမှာလည်း တိုက်ပွဲပြင်းထန်တာ မရှိပေမယ့် စစ်ရေးတင်းမာတဲ့ အနေအထားလို့အသိပေးပါတယ်။

" ဝိုင်းမော်ဘက်မှာလည်း သိပ်ပြီးမှ ပြင်းထန်တဲ့ တိုက်ပွဲတော့မရှိပါဘူး။ ဒါပေမဲ့ အချိန်မရွေး တိုက်ပွဲဖြစ်နိုင်ခြေရှိတဲ့ နေရာဒေသဖြစ်ပါတယ်။ ဗန်းမော်မှာလည်း အဲဒီလိုပါပဲ သိပ်ပြီးမှ ပြင်းထန်တာ မရှိဘူး။ ဒါပေမဲ့ လက်နက်ကြီး ဒရုန်းတွေနဲ့ KIAနဲ့ ပူးပေါင်းတပ်တွေ နေရာယူထားတဲ့ နေရာတွေကို ကင်းထောက်ပြီးမှ ပစ်တာတွေရှိပါတယ်။ တခါတလေ သူတို့ အရေးကြီးမယ်လို့ ယူဆတဲ့ ရပ်ကွက်တွေမှာတော့ မြေပြင်ကနေ ထိုးတာတွေရှိပါတယ်။” လို့ ဗိုလ်မှူးကြီးနော်ဘူက ပြောပါတယ်။

ဖားကန့်ဒေသမှာ တိုက်ပွဲမဖြစ်တာ တပတ်ခန့်ရှိပြီလို့လည်း ပြောပြပါတယ်။

“ ဒါပေမဲ့ သူတို့ ဒရုန်းနဲ့ လက်နက်ကြီးနဲ့ ရမ်းသန်းပစ်ပြီးမှ ပြည်သူလူထုရဲ့ အိုးအိမ်တွေထိခိုက်တာ ခဏခဏ တွေ့ရပါတယ်။ အင်းတော်ကြီးဘက်မှာလည်း ဒီအတိုင်းပါပဲ။ သူတို့ကတော့ စစ်အင်အားတွေ တိုးထားပြီးမှ စစ်ဆင်ရေးလုပ်ဖို့ ပြင်ဆင်တာကို တွေ့ရပါတယ်” လို့ ဗိုလ်မှူးကြီးနော်ဘူက ပြောကြားပါတယ်။

အာဏာသိမ်းစစ်တပ်ဟာ ကချင်ဒေသ ဆုံးရှုံးနယ်မြေတွေ ပြန်ရဖို့ ကြိုးပမ်းနေပြီး အင်အားအလုံးအရင်းဖြည့်တင်းတာ၊ စစ်ကြောင်းထိုးတာတွေ လုပ်ဆောင်နေလို့ KIA တပ်မဟာ နယ်မြေ အသီးသီးမှာ စစ်ရေးတင်းမာတာ၊ တိုက်ပွဲဖြစ်ပွားတာတွေ ဆက်တိုက်ရှိနေတာဖြစ်ပါတယ်။

(ကချင်လွတ်လပ်ရေးတပ်မတော်(KIA)က ရဲဘော်တွေကို တွေ့ရစဉ်။ ဓာတ်ပုံ - Lung Jung LA N/FB)

မဟာအောင်မြေမြို့နယ်က ယာဥ်ထိန်းရဲကင်း မီးလောင်

မေ ၂၉၊ ၂၀၂၆။မေရီ/People's Spring

မန္တလေးမြို့၊မဟာအောင်မြေမြို့နယ်မှာ စစ်ကောင်စီရဲ့ယာဥ်ထိန်းရဲကင်း မီးလောင်ကျွမ်းမှုဖြစ်ပွားခဲ့ကြောင်း ဒေသခံတွေက ပြောပါတယ်။

မေလ ၂၈ ရက် ညနေ ၅ နာရီ မိနစ် ၂၀ခန့်က မန္တလေးမြို့၊ မဟာအောင်မြေမြို့နယ်၊ မဟာနွယ်စဉ်ရပ်ကွက်၊ ၇၃ လမ်းမကြီးနဲ့ ၃၅ လမ်းမကြီးထောင့်ရှိ ယာဥ်ထိန်းရဲကင်း မီးလောင်ကျွမ်းခဲ့တာဖြစ်ကြောင်း ရပ်ကွက်ခံတွေက ပြောပါတယ်။

"ယာဥ်ထိန်းရဲကင်းထဲက စက်ခန်းမီးလောင်တာ"လို့ ဒေသခံတစ်ဦးက ပြောပါတယ်။

မီးလောင်ရာကို မြို့ပေါ်မီးသတ်စခန်းတွေက မီးသတ်ကားတွေ လာရောက်ငြှိမ်းသတ်ခဲ့တယ်လို့ သိရပြီး ဘေးဝန်းကျင် နေအိမ်တွေနဲ့ ဆိုင်ခန်းတွေကို မီးကူးစက်တာမျိုး မရှိဘူးလို့ ဒေသခံတွေက ပြောပါတယ်။

မီးသတင်းတွေကို ဖော်ပြနေတဲ့ မီးသတ်ဦးစီးဌာနကတော့ အဆိုပါ ယာဥ်ထိန်းရဲကင်းမီးလောင်တဲ့သတင်းကို ထုတ်ပြန်ထားတာ မတွေ့ရသေးပါဘူး။

ရုပ်သံ-ဒေသခံ လူမှုကွန်ရက်သုံးစွဲသူ

စစ်ခေါင်းဆောင်က ယာဥ်အိုယာဥ်ဟောင်းတွေ အပ်နှံပြီး EVကား တင်သွင်းပေးမယ်ဟုဆို

မေ-၂၉၊ ၂၀၂၆။ဇော်ဝင်း/People's Spring

အာဏာသိမ်းစစ်ခေါင်းဆောင်မင်းအောင်လှိုင်က ယာဥ်အိုယာဥ်ဟောင်းတွေ အပ်နှံပြီး လျှပ်စစ်သုံးယာဉ်(EV) တင်သွင်းမယ့်စနစ် စတော့မယ်လို့ သိရပါတယ်။

စစ်တပ်လက်အောက်ခံ စီးပွားရေးနဲ့ ကူးသန်းရောင်းဝယ်ရေးဝန်ကြီးဌာနရဲ့ကြေညာချက်အရ ထုတ်လုပ်တဲ့ခုနှစ်မှ သက်တမ်း နှစ်(၂၀) ကျော်လွန်ယာဉ်၊ ပြင်ဆင်မရနိုင်တဲ့ ယာဉ်‌တွေနဲ့ သက်တမ်း နှစ်(၂၀) မကျော်သော်လည်း ဆန္ဒအရ အပ်နှံလိုတဲ့ ယာဉ်တွေရဲ့တန်ဖိုးနဲ့အညီ EV ယာဉ်တွေ အစားထိုးလဲလှယ်နိုင်ဖို့ ဆောင်ရွက်မယ်လို့ ဆိုပါတယ်။

"မူဝါဒ လို့ပဲ ပြောရဦးမယ်။အသေးစိတ်အချက်အလက်တွေ မပါသေးဘူး။ဥပမာ ယာဉ်တန်ဖိုးကို ဘယ်လို ဖြတ်မလဲ။၂၀၀၆ မော်ဒယ် အောက်ယာဉ်တွေ အကုန်ပါမှာလား။ပြန်လဲမယ့် EV ကားအတွက် ဒေါ်လာကို အလုံအလောက်ထုတ်ပေးမှာလား။ဒါတွေ ဖြေရှင်းဖို့ကျန်သေးတယ်"လို့ မော်‌တော်ယာဉ်ဈေးကွက် စောင့်ကြည့်သူတစ်ဦးက ပြောပါတယ်။

ယာဉ်အို၊ ယာဉ်ဟောင်း အပ်နှံမှုအတွက် ကုန်းလမ်းပို့ဆောင်ရေးညွှန်ကြားမှုဦးစီးဌာနက ထုတ်ပေးမယ့်ဖျက်သိမ်းယာဉ် ထောက်ခံချက် ပုံစံ (ဃ)တင်ပြရင် အပ်နှံတဲ့ ယာဉ်အမျိုးအစားအလိုက် သင့်လျော်တဲ့ လျှပ်စစ်သုံးယာဉ် (EV)တစ်စီးကို အမျိုးသားအဆင့် လျှပ်စစ်သုံးယာဉ်နဲ့ဆက်စပ်လုပ်ငန်း‌‌ဖွံ့ဖြိုးတိုးတက်ရေးဦးဆောင်ကော်မတီက စိစစ်မယ်လို့ သိရပါတယ်။

အစားထိုးတင်သွင်းမယ့် EVယာဉ်အတွက် ကျသင့်မယ့်နိုင်ငံခြားငွေကိုလည်း ဗဟိုဘဏ်က သင့်တင့်တဲ့ဈေးနှုန်းနဲ့ ရောင်းချပေးသွားမယ်လို့ပဲ ထုတ်ပြန်ချက်မှာ ဖော်ပြပါတယ်။

"ဗဟိုဘဏ်က ဒေါ်လာဘယ်လောက်အထိ ချပေးနိုင်မလဲဆိုတဲ့ အချက်နဲ့ ပြည်တွင်း လျှပ်စစ်မီးရရှိမှု အခြေအနေပေါ်မှာလည်း အများကြီး မူတည်နေပါသေးတယ်။လက်ရှိ ဈေးကွက်ထဲက EV ကားတွေတောင် နာရီ၀က် ၄၅ မိနစ်လောက် တန်းစီပြီး အားသွင်းနေတာတွေ ဖြစ်နေတာလေ"လို့ မရမ်းကုန်းမြို့နယ်က ယာဉ်ပိုင်ရှင်တစ်ဦးက ပြောပါတယ်။

ကုန်လမ်းပို့ဆောင်ရေးညွှန်ကြားမှုဦးစီးဌာန(ကညန)ရဲ့စာရင်းတွေအရ အခု ၂၀၂၆ မေလအထိ မြန်မာနိုင်ငံမှာ မှတ်ပုံတင်ထားတဲ့ မော်တော်ယာဥ်စာရင်းအရ EV ကားအစီးရေ ၁၃,၀၀၀ နီးပါး ရှိပါတယ်။အများစုက တရုတ်နိုင်ငံက တင်သွင်းခဲ့တာ ဖြစ်ပါတယ်။

အဲဒီ EV ယာဥ်အရေအတွက် ထက်ဝက်နီးပါးကို စစ်ခေါင်းဆောင်မင်းအောင်လှိုင်ရဲ့ သားနဲ့ သမီးက တင်သွင်းထားတဲ့အပြင် သူတို့နဲ့ ဆက်စပ်ပတ်သက် သူတွေလည်း EV ယာဥ်တွေ တင်သွင်းနေတယ်လို့ အမည်မဖော်လိုတဲ့ မော်တော်ယာဥ်အရောင်းပြခန်းပိုင်ရှင်အချို့က ပြောပါတယ်။

တရုတ်နိုင်ငံကို အမှီပြုလွန်ပြီး ခိုင်မာမှုမရှိတဲ့ မြန်မာနိုင်ငံ EV ကား မူဝါဒကြောင့် သုံးစွဲသူတွေအတွက် ဆုံးရှုံးမှုတွေကို အကာအကွယ်ပေးဖို့ ပြဌာန်းချက်လည်းမရှိဘူးလို့ သူတို့က ဆိုပါတယ်။

ဒါ့အပြင် တစ်ရက်ကို နာရီပိုင်းအလိုက် အလှည့်ကျစနစ်နဲ့သာရနေတဲ့ လျှပ်စစ်မီးနဲ့ မြင့်တက်နေဆဲ အခြေခံစားသောက် ကုန်စျေးတွေကို မဖြေရှင်းနိုင်သေးဘဲ EV ကားတွေ တင်သွင်းမယ့် စစ်ခေါင်းဆောင်ကို ဝေဖန်မှုတွေ ရှိခဲ့ပါတယ်။

အခု ၂၀၂၆ဧပြီ ၁ ရက်က နေပြည်တော်မှာလုပ်တဲ့ စက်သုံးဆီ ဖူလုံစွာရရှိရေးနဲ့ စိုက်ပျိုးရေးလုပ်ငန်းတွေ အတွက် လိုအပ်တဲ့ မြေဩဇာရရှိရေး အစည်းအဝေးမှာယာဥ်အိုယာဥ်ဟောင်း အပ်နှံပြီး EV ကားတင်သွင်းမယ့်စနစ်ကို ဆောင်ရွက်မယ်လို့ စစ်ခေါင်းဆောင်မင်းအောင်လှိုင်က ပြောဆိုခဲ့တာဖြစ်ပါတယ်။

(ရန်ကုန်မြို့၊ ဒဂုံမြို့သစ်မြောက်ပိုင်းမှာ ၂၀၂၃အောက်တိုဘာ ၅ ရက်က လျှပ်စစ်ကား (EV)မီးလောင်နေတာကို တွေ့ရစဉ်။ ဓာတ်ပုံ - CJ)

ဖားကန့်ကို စစ်တပ်က စစ်မှုထမ်းဆင်း ၃၀၀၀ ထပ်ပို့ဖို့ စီစဉ်နေ

မေ-၂၉၊၂၀၂၆။ဇော်ရမ်း/People's Spring

တိုက်ပွဲဖြစ်ပွားနေတဲ့ ကချင်ပြည်နယ်၊ ဖားကန့်မြို့ကို စစ်တပ်က စစ်မှုထမ်းသင်တန်းဆင်း ၃၀၀၀ ထပ်မံပို့မယ်လို့ သတင်းထွက်ပေါ်နေပြီး စစ်မြေပြင်ရောက်လာရင်အလင်းဝင် လက်နက်ချကြဖို့ ကချင်ဒေသကာကွယ်ရေးတပ်မတော်(KPDF)နဲ့ နီးစပ်သူတွေက သတိပေးပါတယ်။

စစ်တပ်က မေလကုန်နဲ့ ဇွန်လဆန်းမှာ မြစ်ကြီးနား- မိုးကောင်း-ဖားကန့်လမ်းပိုင်းကတဆင့် စစ်မှုထမ်းသင်တန်းဆင်း‌တွေ ပို့မယ်လို့ သတင်းတွေထွက်ပေါ်နေတာပါ။

" ပစ(စစ်မှုထမ်းသင်တန်းဆင်း‌)တွေ ထပ်ပို့မယ်လို့ကြားတယ်။ တော်တော် သေကြအုံးမှာပဲ။ ဖားကန့်ရောက်ရင် ထွက်ပြေးရင်ပြေး၊ မပြေးလည်း မြန်မြန်ဆန်ဆန်လက်နက်ချဖို့ပဲ ပြောချင်တာ"လို့ KPDF နဲ့ နီးစပ်သူတစ်ဦးက ပြောပါတယ်။

ဖားကန့်ဒေသမှာ စစ်တပ်နဲ့ လက်အောက်ခံတပ်တွေဖြစ်တဲ့ ရှမ်းနီတပ်(SNA)၊ ဝါရာဇွပ်ပြည်သူ့စစ်ပူးပေါင်းတပ်တွေ အင်အား ၂၀၀၀ နီးပါးရှိနေပြီး လက်ရှိမှာလည်း စစ်ရေးတင်းမာနေပါတယ်။

စစ်တပ်စစ်ကြောင်းတွေမှာ စစ်မှုထမ်းသင်တန်းဆင်းတွေလည်း အများအပြားပါဝင်နေပါတယ်။ စစ်တပ်တပ်စွဲထားတဲ့နေရာတွေကို ကချင်လွတ်လပ်ရေးတပ်မတော်(KIA) ၊KPDFက ဒရုန်းနဲ့ဗုံးကြဲနေလို့
သေဆုံးသူတွေထဲမှာ စစ်မှုထမ်းသင်တန်းဆင်းတွေ အများဆုံးပါဝင်တယ်လို့ ဒေသခံတွေက ပြောပါတယ်။

မေလ ၁၉ရက် ညနေက ဖားကန့်မြို့နယ်၊ ယူမာကျေးရွာအနီးက စစ်တပ် တပ်စွဲထားတဲ့မျောခြံကို KIA၊KPDF က ဒရုန်းနဲ့ ဗုံးကြဲတိုက်ခိုက်ခဲ့ပါတယ်။

အဲဒီဖြစ်စဉ်မှာ စစ်တပ်က ၄ဦးသေဆုံးသွားတယ်လို့ ဒေသခံသတင်းရင်းမြစ်တွေက ပြောပါတယ်။ညပိုင်းမှာတော့ မှော်ဝမ်းလေးရွာကို စစ်တပ်၊ရှမ်းနီ(SNA) ပူး‌ပေါင်းတပ်တွေက နေအိမ်တွေ မီးရှို့လို့ အများအပြားပျက်စီးသွားတယ်လို့ ဒေသခံတွေက ပြောပါတယ်။

စစ်တပ်က တော်လှန်ရေးအင်အားစုတွေထိန်းချုပ်ထားတဲ့ဒေသတွေမှာ စစ်မှုထမ်းသင်တန်းဆင်းတွေအများဆုံးအသုံးပြုပြီး စစ်ကြောင်းထိုးဖို့ကြိုးပမ်းနေပါတယ်။

လက်ရှိမှာတိုက်ပွဲတွေ အပြင်းထန်ဆုံးဖြစ်ပွားနေတဲ့ စစ်ကိုင်းတိုင်းနဲ့ကချင်ပြည်နယ်ဆက်စပ်ဒေသ၊ မကွေးတိုင်း ယောဒေသနဲ့ ချင်းပြည်နယ်ဆက်စပ်ဒေသ၊ မကွေးတိုင်း၊ ငဖဲမြို့နယ်က နတ်ရေကန်ဗျူဟာကုန်းတိုက်ပွဲ၊ ပဲခူးတိုင်း၊ ပန်းတောင်းမြို့နယ်က ကပစ(၁၆)အနီးတိုက်ပွဲတွေမှာ စစ်မှုထမ်းသင်တန်းဆင့်တွေအများအပြားသေဆုံးနေတယ်လို့ စစ်ရေးသတင်းရင်းမြစ်တွေကပြောပါတယ်။

စစ်တပ်က ရန်ကုန်နဲ့မန္တလေးမြို့အပါအဝင် မြို့ကြီးတွေမှာ လူငယ်အများအပြားကိုဖမ်းဆီးပြီး စစ်သားစုဆောင်းနေပါတယ်။ စစ်မြေပြင်ကိုအပို့ခံရတဲ့ စစ်မှုထမ်းသင်တန်းဆင်းတွေအနေနဲ့ တော်လှန်ရေးအင်အားစုတွေထံအလင်းဝင်ကြဖို့ အာရက္ခတပ်တော်(AA)က မကြာခဏထုတ်ပြန်တိုက်တွန်းနေပါတယ်။

နိုင်ငံတဝန်း တိုက်ပွဲတွေမှာ စစ်ကောင်စီတပ်ဘက်က အကျအဆုံးအထိအခိုက်များစွာ ရှိနေကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာန ပြည်သူ့ကာကွယ်ရေးတပ်မတော်(PDF) စစ်ရုံးချုပ် ဒုတိယ စစ်ဦးစီးအရာရှိချုပ် ဒေါက်တာစိုးသူရဇော်က ပြောပါတယ်။

ဒေါက်တာစိုးသူရဇော်က မေလ ၂၈ရက်ညပိုင်းမှာ နိုင်ငံတဝန်း စစ်ရေးအခြေအနေတွေ ပြည်သူတွေ သိရှိစေဖို့နဲ့ အာဏာသိမ်းစစ်တပ်ရဲ့ အတင်းအဓမ္မ စစ်သားစုဆောင်းမှု မခံရအောင် ရှောင်ဖို့၊ တကယ်လို့ စုဆောင်းခံရရင် လွတ်အောင်ပြေးဖို့ ၊လွတ်လမ်းမရှာနိုင်ဘဲ စစ်မြေပြင် ရောက်လာရင် တော်လှန်ရေးဘက် ကူးပြောင်းပြီး လက်နက်ချဖို့ တိုက်တွန်းချက် ကို ရေးသားဖော်ပြခဲ့တာဖြစ်ပါတယ်။

" စစ်မြေပြင်မှာ ရန်သူဘက်က အကျအဆုံး အင်မတန်များပါတယ် ။ တနေရာ/ နှစ်နေရာမှာဘဲ ဒီလို ဖြစ်နေတာ မဟုတ်ပါဘူး ။မြန်မာတနိုင်ငံလုံးက စစ်ဂွင်အသီးသီးမှာ ရန်သူဘက်က အကျအဆုံး အထိအခိုက်ဟာ ကြောက်ခမန်းလိလိ ဖြစ်ပါတယ် ။ တရားဝင် သတင်းမထုတ်ပြန်ပေမယ့် ကျွန်တော်တို့ဆီ တက်လာတဲ့ Daily Report တွေအရ နေ့စဉ်တိုက်ပွဲအသီးသီးကနေ သိမ်းဆည်းရမိတဲ့ ရန်သူ့အလက် ၊ အလောင်းတွေဟာ မနည်းပါဘူး” လို့ ဒေါက်တာစိုးသူရဇော်က ပြောပါတယ်။

တကယ့်စစ်မြေပြင်ရဲ့ အဖြစ်သနစ်ကို ရန်သူကိုယ်တိုင်လည်း ကောင်းကောင်းသိပေမယ့် ပြည်သူလူထုအနေနဲ့ အခြေအနေမှန်ကို သိဖို့ ခက်ခဲနေဟု ပြောပါတယ်။

" အထူးသဖြင့် ရန်သူ့နယ်မြေမှာ ရှင်သန်ရပ်တည်နေရတဲ့ ပြည်သူလူထုဟာ မနီးမဝေးမှာ ဖြစ်နေတဲ့ တိုက်ပွဲတွေမှာ နေ့စဉ်ဘာတွေ ဖြစ်နေသလဲဆိုတာ မသိပါဘူး ။ကိုယ့်ဘေးပတ်ဝန်းကျင်မှာ တရိရိနဲ့ ပျောက်ဆုံးသွားတဲ့ ကိုယ့်သူငယ်ချင်းတွေနဲ့ အဆက်အသွယ်ရော ရကြသေးရဲ့လား၊ သူတို့တွေ အိမ်ရော ပြန်လာနိုင်ကြရဲ့လား ၊ စစ်အာဏာရှင်ကတော့ သူတို့အာဏာမစွန့်ရရင်ပြီးရော တတိုင်းပြည်လုံးက လူငယ်တွေကို အသက်စွန့်ခိုင်းနေပါတယ် ။အခုဘဲ လူစု …..အခုဘဲ သင်တန်းပေး…..အခုဘဲ စစ်မြေပြင်လွှတ်ခံလိုက်ရတဲ့ ….ပစတွေနဲ့ ကျွန်တော်တို့ တော်လှန်ရေးရဲဘော်တွေရဲ့ တိုက်ရည်ခိုက်ရည်က အပုံကြီးကွာပါတယ်” လို့ ဒေါက်တာစိုးသူရဇော်က ရှင်းပြပါတယ်။

တကယ့်လက်တွေ့ စစ်မြေပြင်မှာ တော်လှန်ရေးဘက်တော်သားတွေအတွက် ရွေးချယ်စရာမရှိကြောင်း၊ ရန်သူ့ အဓမ္မအမိန့်နာခံပြီး စစ်ချီလာရင် အပြတ်ချေမှုန်းရုံသာရှိကြောင်း ပြောပါတယ်။