မိဘခေါ်လာမှ ကျောင်းအပ်လို့ရမယ့် စစ်ကောင်စီသတ်မှတ်ချက်ကြောင့် ကလေးတွေအချို့ ကျောင်းအပ်ဖို့ အခက်အခဲဖြစ်နေ

မေ -၂၅၊၂၀၂၆။မိုမို/People's Spring

ရန်ကုန်မြို့စာသင်ကျောင်းတွေမှာ မိဘခေါ်လာမှ ကျောင်းအပ်လို့ရမယ့် စစ်ကောင်စီရဲ့ သတ်မှတ်ချက်ကြောင့် ကျောင်းနေအရွယ်ကလေးတွေအချို့ ကျောင်းအပ်ဖို့ အခက်အခဲဖြစ်နေတယ်လို့ ရန်ကုန်မြို့နေပြည်သူတွေက ပြောပါတယ်။

အရင်က အုပ်ထိန်းသူ တစ်ဦးဦး ဒါမှမဟုတ် ဆွေမျိုးတော်စပ်သူတွေက မိဘကိုယ်စား ကျောင်းအပ်နှံလို့ ရပေမယ့် အခုနှစ်ကစပြီး မိဘကိုယ်တိုင်ကျောင်းအပ်ရမယ်လို့ စစ်တပ် လက်အောက်ခံ အ‌ခြေခံပညာရေးဦးစီးဌာနက သတ်မှတ်လိုက်တာလို့ ဆိုပါတယ်။

"ဘာရည်ရွယ်ချက်နဲ့ လုပ်လည်း မသိပေမယ့် တော်တော် ဒုက္ခရောက်တယ်။ဒီမနက် ကလေးကို ကျောင်းသွားအပ်တာ မိဘ အရင်း လာမှ ။ပြီးရင် မိဘ တွေ မှာလည်း မှတ်ပုံတင်ပါမှလက်ခံမှာ ဆိုပြီး ကျောင်းဆရာ၊ဆရာမ တွေက ပြောလိုက်တယ်။ကလေး မိဘတွေက နိုင်ငံခြားမှာအလုပ်သွားလုပ်တယ် ပြောလည်းမရဘူး"လို့ မြောက်ဒဂုံ မြို့နယ် (၄၅)ရပ်ကွက်က အမျိုးသမီးတစ်ဦးက ပြောပါတယ်။

လာမယ့် ဇွန်လ ၁ ရက်မှာ စာသင်ကျောင်းတွေ ဖွင့်တော့မှာဖြစ်လို့ အခုလို သတ်မှတ်ချက်ကြောင့် ကျောင်းနေအရွယ် ကလေးငယ်အများစု ကျောင်းမအပ်နိုင်သေးဘူးလို့ အင်းစိန်မြို့နယ်၊ဖော့ကန် ရပ်ကွက် နေအမျိုးသားတစ်ဦးက သူနေထိုင်ရာရပ်ကွက် အခြေအနေကို အသိပေးပါတယ်။

"အရင်က တက်မယ့်သူမရှိတော့ ဘယ်လိုအခြေအနေ မဆိုလက်ခံတာလေ။အခုလို လုပ်တော့ ကျွန်တော့် မြေး ရဲ့ သူ့အဖေ က တောထဲမှာ ဆုံးတယ်။မအေ လုပ်တဲ့သူက အဝေးရောက်နေတယ်။ဘယ်လို လုပ်ရမလဲ မေးတော့ ဖအေ မအေ မှတ်ပုံတင်ယူလာပေး တဲ့။တော်တော် ဆိုးပါတယ်။ကျွန်တော့်မြေးလိုပဲ ရပ်ကွက်ထဲမှာရှိတဲ့ ကလေး ငါးယောက် လောက် ကျောင်းမအပ်နိုင်သေးဘူး"လို့ သူက ပြောပါတယ်။

ဒါ့အပြင် စစ်ကောင်စီက ကျောင်းအပ်ရာမှာပေးရတဲ့ မိဘအုပ်ထိန်းသူတွေရဲ့ နောက်ခံရာဇ၀င်အကြောင်းနဲ့ အချက်အလက်တွေကို စုဆောင်းတာ‌လို့လည်း သူ့အမြင်ကို ဆက်ပြောပါတယ်။

အခုဖြစ်စဉ်တွေနဲ့ပတ်သက်ပြီး အခြေခံပညာရေးဦးစီးဌာန ကို လူထုနွေဦးက ဆက်သွယ် မေးမြန်းခဲ့ပေမယ့် ဖုန်းလက်ခံဖြေကြားတာ မရှိပါဘူး။

"စနစ်ထဲမှာ မပါပေမယ့် မိဘ တွေကိုယ်တိုင်အပ်ရမယ်ဆိုပြီး ပြောထားတာ။လုပ်နေတာ တွေရှိတယ်"လို့ ရန်ကုန်မြို့ လှိုင်သာယာမြို့နယ်ပညာရေးမှူးရုံး၀န်ထမ်းတစ်ဦးက ပြောပါတယ်။

စစ်တပ်အာဏာသိမ်းပြီးနောက်ပိုင်း မြန်မာနိုင်ငံမှာ ကျောင်းနေအရွယ်ကလေး ၇ သန်းဝန်းကျင် အခြေခံပညာသင်ယူခွင့် ဆုံးရှုံးနိုင်တယ်လို့ မြန်မာ့မဟာဗျူဟာနဲ့ မူဝါဒလေ့လာရေး အင်စတီကျူ ISP Myanmar က ပြီးခဲ့တဲ့နှစ် ဩဂုတ်က ထုတ်ပြန်ထားပါတယ်။

စစ်မက်နဲ့ပဋိပက္ခ၊ ကျဆင်းလာတဲ့စီးပွားရေး အခြေအနေနဲ့ စီးပွားရေး မပြေလည်ခြင်း၊ ဝင်ငွေထွက်ငွေ မမျှတခြင်းတွေဟာ ကလေးငယ်တွေကျောင်းတက်ဖို့ အခက်အခဲဖြစ်စေနိုင်တဲ့ အကြောင်းအရင်းတွေဖြစ်တယ်လို့ ဖော်ပြပါတယ်။

ဒါ့အပြင် အာဏာသိမ်းစစ်တပ်က နိုင်ငံရဲ့ပညာရေးဘက်ဂျက်ကို လျှော့ချသုံးစွဲခဲ့ပါတယ်။

စစ်ခေါင်းဆောင်မင်းအောင်လှိုင် ယာယီသမ္မတရာထူးဆက်ယူခဲ့တဲ့ ၂၀၂၅ ဇူလိုင်က ပြင်ဆင်ဖွဲ့စည်းခဲ့တဲ့ အစိုးရအဖွဲ့သစ်စာရင်းထုတ်ပြန်ရာမှာ ပညာရေးဝန်ကြီးဌာန ကျန်နေခဲ့လို့ ဖြည့်စွက်ဖွဲ့စည်းတဲ့ ထုတ်ပြန်စာထပ်မံထုတ်ခဲ့ရတာလည်း ဖြစ်ခဲ့ပါတယ်။

(ပြီးခဲ့တဲ့ ၂၀၂၅-၂၀၂၆ ပညာသင်နှစ်မှာ ရန်ကုန်မြို့က ကလေးငယ်တွေ ကျောင်းစတက်နေ့မှာ တွေ့ရစဉ်။ ဓာတ်ပုံ - စစ်ကောင်စီ)

ပခုက္ကူမှာ စစ်တပ်က ပေါ်တာဆွဲကြမ်းနေလို့ လူသွားလူလာနည်းပါးနေ

မေ ၂၅၊ ၂၀၂၆။ဟာနာဆန်/People's Spring

မကွေးတိုင်း၊ ပခုက္ကူမြို့ပေါ်မှာ အာဏာသိမ်းစစ်တပ်က ပေါ်တာဆွဲဖမ်းဆီးတာကြမ်းနေလို့ လူသွားလူလာနည်းပါးနေကြောင်း မြို့ခံတွေက ပြောပါတယ်။

ပြီးခဲ့တဲ့ မေလလယ်ကစပြီး ပခုက္ကူမြို့ပေါ်မှာ အာဏာသိမ်းစစ်တပ်ဟာ နေ့ခင်းကြောင်တောင်မှာ လူငယ်၊လူရွယ်တွေကို ပေါ်တာဆွဲနေလို့ အများအပြား ဖမ်းဆီးခံလိုက်ရကြောင်း ဒေသခံတွေက ပြောပါတယ်။

"အသက်နဲ့လည်း မဆိုင်ဘူး။ လေးဆယ်ကျော်လည်း ဆွဲနေတာ။ မြင်မြင်သမျှ ဆွဲတဲ့သဘောဖြစ်နေတယ်"လို့ ပခုက္ကူမြို့ခံတစ်ဦးက ပြောပါတယ်။

စစ်တပ်ရဲ့ပေါ်တာဆွဲဖမ်းဆီးခံရတဲ့ အရေအတွက်ကိုတော့ အတိအကျမသိရပါဘူး။

စစ်တပ်ရဲ့ပေါ်တာဆွဲဖမ်းဆီးမှုတွေကြောင့် မြို့ပေါ်နေလူငယ်တွေလည်း အပြင်မထွက်ရဲတော့ကြောင်း၊ ဒါ့အပြင် ဒေသတွင်းကျေးရွာတွေကပါ မြို့ပေါ်တက်စျေးလာဝယ်တာတွေ မရှိတော့တာကြောင့် အရောင်းအဝယ်တွေပါ ကျဆင်းနေတယ်လို့ ဒေသခံတွေက ပြောပါတယ်။

"အခုတော့မြို့ပေါ်မှာ ခြောက်သွေ့နေတယ်။အသွားအလာတွေနည်းတယ်"လို့ ပခုက္ကူနယ်အခြေစိုက် Cobra One တပ်ဖွဲ့ရဲ့ တာဝန်ရှိသူက ဆိုပါတယ်။

မြို့ပေါ်မှာ ပေါ်တာဆွဲလို့ လူနည်းနေပေမဲ့ စစ်တပ်ကတော့ သီဟိုဠ်ရှင်ဘုရားပွဲကို ဇာတ်ပွဲတွေနဲ့အတူ မနေ့ညကစတင်ကာ ကျင်းပနေပြီး စမ်းရေမိုးအပါအဝင် ဇာတ်အဖွဲ့ ၃ ဖွဲဲ့ ပါဝင်တယ်လို့ သိရပါတယ်။

အလားတူ ပခုက္ကူမြို့နယ်၊ မြစ်ခြေဒေသမှာလည်း စစ်တပ်စစ်ကြောင်းထိုးနေလို့ ကျေးရွာအများအပြားက ပြည်သူတွေ တိမ်းရှောင်နေရပြီး ပြည်သူ ၅ ဦးထက်မနည်း သတ်ဖြတ်ခံထားရကာ ကျေးရွာ၇ ရွာထက်မနည်းလည်း မီးရှို့ဖျက်ဆီးခံထားရကြောင်း သိရပါတယ်။

အာဏာသိမ်းစစ်တပ်ဟာ ယခုနောက်ပိုင်း ရန်ကုန်၊ မန္တလေးအပါအဝင် မြို့ကြီးတွေမှာပါ နေအိမ်ပေါ်တက် ပေါ်တာဆွဲတာတွေ ပိုမိုပြုလုပ်နေပြီး စစ်မှုထမ်း အပတ်စဥ် (၂၅)ကို စတင်ဖို့ ပြင်ဆင်နေပါတယ်။

MNDAA အနေနဲ့ ဒေသခံတွေဒုက္ခမပေးဘဲ ဒီမိုကရေစီ၊ ဖက်ဒရယ်စံနှုန်းနဲ့ ကိုက်ညီတာတွေ စီမံဖို့ ရှမ်းလူငယ်ကွန်ဂရက် တိုက်တွန်း

မေ ၂၅၊ ၂၀၂၆။ ထားမြတ်/People’s Spring

ကိုးကန့်တပ်မတော်(MNDAA)ရဲ့ စီမံခန့်ခွဲမှုအောက်မှာ ဒေသခံပြည်သူတွေ အခက်အခဲ ပြဿနာတွေ ကြုံနေရကြောင်း ရှမ်း(သျှမ်း)လူငယ်ကွန်ဂရက်က ဒီကနေ့ မေလ ၂၅ရက်မှာ ထုတ်ပြန်ခဲ့ပြီး MNDAAအနေနဲ့ ဒေသခံတွေကို ဒုက္ခမပေးဘဲ ဒီမိုကရေစီစံနှုန်း ဖက်ဒရယ်စံနှုန်းနဲ့ ကိုက်ညီတာတွေကိုသာ စီမံဖို့ တိုက်တွန်းလိုက်ပါတယ်။

“ဖက်ဒရယ်စနစ်နှင့် ကိုးကန့်တပ်(MNDAA)၏ လားရာ” ဆိုတဲ့ ခေါင်းစဉ်နဲ့ ထုတ်ပြန်ခဲ့တဲ့ ရှမ်းလူငယ်ကွန်ဂရက်ရဲ့ ထုတ်ပြန်ချက်မှာ MNDAAရဲ့ စီမံမှုအောက်မှာ ဒေသခံတွေ ရင်ဆိုင်နေရတဲ့ အုပ်ချုပ်ရေးနဲ့ မြေယာသိမ်းဆည်းမှုဆိုင်ရာ ပြဿနာတွေ၊ လူ့အခွင့်အရေးနဲ့ လူမှုစီးပွားဆိုင်ရာ ပြဿနာတွေမီးမောင်းထိုးပြကာ ရှမ်းလူငယ်ကွန်ဂရက်ရဲ့ သဘာထားကို အခုလို ထုတ်ပြန်ခဲ့တာပါ။

MNDAAကတော်လှန်ရေးကို အကြောင်းပြုကာ ပြည်သူလူထုကို ဒုက္ခတွင်းသက်ဆင်းစေတဲ့ လွဲမှားတဲ့ လုပ်ရပ်တွေနဲ့ စီမံခန့်ခွဲမှုများကို ပြင်းထန်စွာ ရှုတ်ချကန့်ကွက်ကြောင်း ဖော်ပြထားပါတယ်။

“ဖက်ဒရယ်စနစ်ကို အခြေခံ၍ တည်ဆောက်နေသော ရှမ်းပြည်နယ်အတွင်း ယင်းကဲ့သို့သော လုပ်ရပ်များ ဆက်လက်လုပ်ဆောင်နေမှုကို MNDAA အနေဖြင့် အမြန်ဆုံး ပြန်လည်သုံးသပ်ပြီး ဒေသခံလူထုနှင့် လိုက်လျောညီထွေဖြစ်မည့်၊ တရားမျှတမှုရှိမည့် ဒီမိုကရေစီစံနှုန်း၊ ဖက်ဒရယ်စံနူန်းများနှင့်ကိုက်ညီသည့် စီမံဆောင်ရွက်မှုများကိုသာ ရှေးရှုလုပ်ဆောင်သွားပါရန် လေးနက်စွာ အသိပေး တိုက်တွန်းအပ်ပါသည်။” လို့ ထုတ်ပြန်ခဲ့ပြီး ဒေသတွင်း ကြုံနေရတဲ့ ပြဿနာတွေကို ဖော်ပြပါတယ်။

၁၀၂၇ စစ်ဆင်ရေးရဲ့ ပထမပိုင်းနဲ့ ဒုတိယပိုင်းနောက်ပိုင်း အထူးသဖြင့် ရှမ်းပြည်နယ်မြောက်ပိုင်းဒေသမှာ MNDAA ဟာ နယ်မြေချဲ့ထွင်ခြင်းနဲ့ အုပ်ချုပ်စီမံမှုဆိုင်ရာကိစ္စရပ်တွေမှာ လက်နက်အင်အားကို အလွန်အကျွံအသုံးပြုလာ အထင်အရှား တွေ့ရလို့ ရှမ်းလူငယ်ကွန်ဂရက်က ထုတ်ပြန်ပါတယ်။

ကိုးကန့်ပြုမှုခြင်း၊ မြို့ရွာများရဲ့ မူလသွင်ပြင်ကိုပြောင်းလဲခြင်း၊ လယ်ယာမြေ သိမ်းဆည်းခြင်းနဲ့ စျေးနှိမ်ခြင်း၊ ပြည်ပ နိုင်ငံသားများအား အထူးအခွင့်အရေးပေးခြင်း၊ သယံဇာတတွေကို အဓမ္မတူးဖော်ခြင်း စတဲ့ အုပ်ချုပ်ရေးနဲ့ မြေယာပြဿနာတွေ ရင်ဆိုင်နေရတယ်လို့ ရှမ်းလူငယ်ကွန်ဂရက်က ဖော်ပြထားပါတယ်။

သမိုင်းအစဉ်အလာအရ နဂိုမူလ ဌာနေလူမျိုးများ သဟဇာတဖြစ်စွာ မှီတင်းနေထိုင်ခဲ့ကြသော အသွင်သဏ္ဌာန်များကို သွေဖည်ကာ ကိုးကန့်မူပြုရန် ကြိုးပမ်းလာတာ၊ မြို့ရွာများရဲ့ ရိုးရာနဲ့ မူလအသွင်အပြင်များကို အတင်းအဓမ္မ ပြောင်းလဲတာ၊ မူလလယ်ယာပိုင်ရှင်များထံမှ မြေယာများကို အတင်းအဓမ္မ သိမ်းယူခြင်း၊ ဈေးနှိမ်ခြင်းနဲ့ ဖိအားပေး ရောင်းချစေခြင်း စတာတွေ MNDAA ရဲ့ စီမံမှုအောက်မှာ ဒေသခံတွေ ရင်ဆိုင်နေရတယ်လို့ ဆိုပါတယ်။

ဒါ့အပြင် နိုင်ငံခြားသားများအား တစ်ဖက်သတ်ဆန်သော အခွင့်အရေးများ ပေးအပ်ကာ စီးပွားရေးလုပ်ငန်းများကို လုပ်ကိုင်ခွင့်ပြုထားတာ ရှိတယ်လို့ ထုတ်ပြန်ပါတယ်။ ဒါ့အပြင် နဂိုမူလပိုင်ရှင်များရဲ့ သဘောတူခွင့်ပြုချက်နဲ့ ညှိနှိုင်းမှုများ လုံးဝမရှိဘဲ သယံဇာတများကို အတင်းအဓမ္မ တူးဖော်ခြင်း သို့မဟုတ် တူးဖော်ခွင့် ပေးခြင်းတွေ ကြုံနေရတယ်လို့လည်း ဖော်ပြထားပါတယ်။

လူ့အခွင့်အရေးနဲ့ လူမှုစီးပွားဆိုင်ရာ ပြဿနာတွေလည်း ကြုံနေရပြီး MNDAAက ဆန္ဒပြပြည်သူများကို နှိပ်ကွပ်တာ၊ ပညာရေးနဲ့ ယဉ်ကျေးမှုကဏ္ဍ လွှမ်းမိုးတာ၊ ပြည်သူ့သဘောဆန္ဒကို မျက်ကွယ်ပြုတာတွေလည်း ရှိနေတယ်လို့ ဆိုပါတယ်။

ဒေသခံပြည်သူများရဲ့ ဆန္ဒကို အလေးမထားဘဲ တိုင်းတစ်ပါးမှ ဝိသမလောဘသား စီးပွားရေးသမားများကို အထူးအခွင့်အရေးများပေးကာ စိတ်ကြိုက် ဝင်ထွက်ချယ်လှယ်ခွင့်ပြုထားတဲ့ အခြေနေကိုလည်း ရှမ်းလူငယ်ကွန်ဂရက်က ထောက်ပြထားပါတယ်။

ဒါ့အပြင် တိုင်းတစ်ပါးရဲ့ ကျူးကျော်လွှမ်းမိုးမှုများအပေါ် ကာကွယ်တားဆီးခြင်းမပြုဘဲ ပူးပေါင်းဆောင်ရွက်နေကြောင်း ဖော်ပြထားပါတယ်။

စနစ်တကျ ထိန်းချုပ်မှုမရှိဘဲ အကန့်အသတ်မဲ့ လောင်းကစားဝိုင်းများနဲ့ KTV ဖျော်ဖြေရေးခန်းမများကို အလွန်အကျွံ ဖွင့်လှစ်ခွင့်ပြုထားတာတွေ ကြုံနေရသလို ဒေသခံပြည်သူများ ဆန္ဒမပါဘဲ အတင်းအကျပ် စစ်မှုထမ်းဆောင်ခိုင်းတာတွေရှိနေတယ်လို့ ထုတ်ပြန်ပါတယ်။

“စစ်အုပ်စုရဲ့ အာဏာလောဘကြောင့် တရားဥပဒေစိုးမိုးရေးပျောက်ကွယ်ရုံမက နိုင်ငံ့အချုပ်အခြာပါ ယိမ်းယိုင်လျော့ပါးလာနေတာကို MNDAA က သူ့တကိုယ်စာအကျိုးစီးပွါးအတွက် အသုံးချနေတာဟာ အရုပ်ဆိုးလွန်းပါတယ်။ နွေဦးလှိုင်းစီးပြီး လူငယ်တွေကို သူ့နယ်ပယ်ချဲ့ထွင်ရေးအတွက် အသုံးချရုံမက၊ သူတို့ညီနောင်မဟာမိတ်အချင်းချင်းကိုပါ သစ္စာထပ်ဖောက်၊ ကိုယ်လာရာသမိုင်းကြောင်းကိုမထောက်ရှုဘဲ ဒေသခံလူအများစုကို နိုင့်ထက်စီးနင်းလုပ်နေတာတွေဟာ ပြည်ကြီးအားကိုးတာသက်သက် မဟုတ်တော့ဘူးဗျ၊ သူကိုယ်တိုင် နိုင်ငံရေးစိတ်ဆန္ဒအမှန် မရှိနေတာကို ဖော်ပြတာပဲ” လို့ ရှမ်းပြည်ဒေသခံ တဦးက ပြောပါတယ်။

MNDAA အနေနဲ့ လားရှိုးမြို့ကို စစ်ကောင်စီထံ ပေးသလို ကွတ်ခိုင်မြို့ကိုပါ ထပ်ပေးပါက MNDAA ဟာ စနစ်ပြောင်းတော်လှန်ရေးရဲ့အဖျက်အမှောင့်လို့ဆိုရတော့မယ်လို့ ရှမ်းပြည် ဒေသခံက ပြောပါတယ်။

“လူထုအပေါ်ကိုလည်း နိုင့်ထက်စီနင်းဆက်လုပ်နေမယ်ဆိုရင် ဒါဟာလူထုကိုစိန်ခေါ်နေတာလို့ ယူဆရတော့မှာပါ” လို့ ရှမ်းပြည်ဒေသခံ က ပြောပါတယ်။

MNDAAဟာ ၂၀၂၃မှာ ညီနောင်မဟာမိတ်တွေနဲ့အတူ ၁၀၂၇ စစ်ဆင်ရေးကို ဖော်ဆောင်ခဲ့ရာ ကိုးကန့်ဒေသ တခုလုံးကို ပြန်လည်ထိန်းချုပ်နိုင်ရုံသာမက လားရှိုး၊ သိန္နီမြို့တွေကိုပါ ထိန်းချုပ်နိုင်ခဲ့တာပါ။ နောက်ပိုင်းမှာ တရုတ်အစိုးရရဲ့ ကြားဝင်မှုနဲ့ စစ်ကောင်စီနဲ့ အပစ်ရပ်စဲပြီး လားရှိုးမြို့ကို ပြန်လွှဲပေးခဲ့ပါတယ်။ ၂၀၂၆ မတ်လမှတော့ ၁၀၂၇ စစ်ဆင်ရေးအတူဆင်နွှဲခဲ့တဲ့ တအာင်းတပ်မတော်(TNLA)နဲ့ နယ်မြေဆိုင်ရာ အငြင်းပွားမှုကို အကြောင်းပြပြီး TNLA ထိန်းချုပ်ထားတဲ့ ကွတ်ခိုင်မြို့ကို MNDAAက တိုက်ခိုက်သိမ်းပိုက်ခဲ့ပါတယ်။

MNDAA အနေနဲ့ ၁၀၂၇ စစ်ဆင်ရေး ဖော်ဆောင်စဉ်က အဖွဲ့ရဲ့ သဘောထားတွေ စစ်ရေး သတင်းတွေနဲ့ပတ်သက်ပြီးမီဒီယာတွေကို ဖြေကြားလေ့ရှိပေမယ့် နောက်ပိုင်းမှာ အကြိမ်ကြိမ်ဆက်သွယ်ခဲ့ပေမယ့် ပြန်လည်ဖြေကြားမှု မပြုတော့ပါဘူး။ ဒါပေမဲ့ MNDAA ရဲ့ သတင်းပြန်ကြားရေးဌာန The Kokang ကတဆင့် အဖွဲ့ရဲ့ ဆောင်ရွက်ချက်တွေကို ပုံမှန် သတင်းထုတ်ပြန်လေ့ရှိရာ ဒေသတွင်း ငြိမ်းချမ်းရေးနဲ့ တည်ငြိမ်းရေးကို ထိန်းသိမ်းမယ်လို့ ဖော်ပြမှုတွေရှိပါတယ်။

(ကိုးကန့်တပ်မတော်(MNDAA)ရဲ့ ရဲဘော်တွေကို တွေ့ရစဉ်။ ဓာတ်ပုံ - MNDAA)

KNU တပ်မဟာ(၄)နယ်မြေက မူကြိုကျောင်းကို စစ်တပ် လေယာဉ်နဲ့ ဗုံးကြဲ

မေ ၂၅၊ ၂၀၂၆။ ထားမြတ်/People’s Spring

ကရင်အမျိုးသားအစည်းအရုံး(KNU) မြိတ်ထားဝယ်ခရိုင် တပ်မဟာ(၄)နယ်မြေက မူကြိုကျောင်းကို အာဏာသိမ်းစစ်တပ်က လေကြောင်းကနေ ဗုံးကြဲတိုက်ခိုက်ခဲ့တယ်လို့ KNUက သတင်းထုတ်ပြန်ပါတယ်။

မေလ ၂၂ရက်မှာ KNU မြိတ်ထားဝယ်ခရိုင် လယ်မူလား(ပုလော)မြို့နယ် ထီးမိုပွာထပ်ခေါကျေးရွာအုပ်စု၊ ဖားကွင်းကျေးရွာကို စစ်တပ်က ပေါင် ၅၀၀ ဗုံး ၂လုံး ကြဲချ တိုက်ခိုက်ခဲ့တာလို့ ဆိုပါတယ်။ဒီလို လေကြောင်း တိုက်ခိုက်လို့ မူကြို စာသင်ကျောင်း ပျက်စီးခဲ့ကြောင်း ဖော်ပြထားပြီး လူအထိအခိုက်ရှိမရှိကိုတော့ ဖော်ပြမထားပါဘူး။

စစ်တပ်ဟာ အရင်ကလည်း KNU တပ်မဟာ(၄)နယ်မြေမှာ ကလေးငယ်တွေ စာသင်ကြားရာ နေရာတွေကို ပစ်မှတ်ထား ဗုံးကြဲတိုက်ခိုက်တာတွေ ကျူးလွန်ခဲ့လို့ ကလေးငယ်တွေ အစုလိုက်သေဆုံးထိခိုက်မှုတွေရှိခဲ့ပါတယ်။

မတ်လအတွင်းက KNU မြိတ်ထားဝယ်ခရိုင် တဖီလေးခိုရွာ ခရစ်ယာန် ဘုရားကျောင်းမှာ ကျောင်းသား/သူများ ရက်တိုကျမ်းစာသင်တန်းနဲ့ ဂီတတူရိယာသင်တန်းကို စစ်တပ်က ဗုံးကြဲခဲ့လို့ ကလေးငယ် ၇ဦး အပါအဝင် ၁၁ဦး သေဆုံးခဲ့ပါတယ်။

ကလေးငယ်တွေ၊ ကျောင်းသားကျောင်းသူများဟာ အနာဂတ်အတွက် ကျောင်းစာကို အာရုံစိုက်ရမည့်အစား တိုက်လေယာဉ်သံ များကို နားစွင့်ကြောက်ရွံ့ နေကြရကြောင်း KNUက ထုတ်ပြန်ထားပါတယ်။

" ခဲတံ နှင့် ဘောပင် များကို အေးချမ်းစွာ ကိုင်ဆောင်ရမည့်အစား ဗုံးဒဏ်မှလွှတ် မြောက်ရန် ပုန်းအောင်းနေကြရပါသည်။စာသင်ကျောင်းများ၊ စာသင်ခန်းများ နှင့် ပြည်သူများ နေထိုင်သည့် နေရာများ သည် ဘေးကင်းလုံခြုံရာနေရာများ ဖြစ်သင့်သော်လည်း ယနေ့တွင်မူ ထိုနေရာများသည် စစ်ကောင်စီ၏ ပစ်မှတ်များ ဖြစ်နေရသည်” လို့ KNUက မတ်လအတွင်းမှာ ထုတ်ပြန်ထားပါတယ်။

အာဏာသိမ်းစစ်တပ်ရဲ့အကြမ်းဖက်တိုက်ခိုက်မှုများကြောင့် အရပ်သားပြည်သူများစွာ ထိခိုက်သေဆုံးမှုကို မျက်ဝါးထင်ထင် တွေ့ နေရပါလျက်နဲ့ မျက်ကွယ်ပြု နှုတ်ငုံနေခြင်း၊ ဖိအားပေးအရေးယူရန် ပျက်ကွက်ကာ အာဏာသိမ်းစစ်တပ်ကို သံတမန် အခင်းအကျဉ်းတွင် ဆက်လက်နေရာပေး ထိတွေ့ဆက်ဆံနေခြင်းဟာ စစ်ရာဇဝတ်မှုကျူးလွန်မှုများကို ပိုမိုအားပေး ရာရောက်ကြောင်းလည်း KNUက ထုတ်ပြန်ထားပါတယ်။

အမြန်လမ်းမှာ အိမ်စီးကားမှောက်ပြီး အမျိုးသမီး ၂ဦး သေဆုံး

မေ-၂၅၊၂၀၂၆။တေဇ/People's Spring

ရန်ကုန်-မန္တလေး အမြန်လမ်းမှာ အိမ်စီးကားတစ်စီး ဘီးပေါက်လမ်းဘေးထိုးကျ တိမ်းမှောက်လို့ ယာဉ်ပေါ်မှာပါတဲ့ အမျိုးသမီး ၂ဦးသေဆုံးခဲ့တယ်လို့ သွားရောက်ကူညီခဲ့တဲ့ စကားအင်းအမြန်လမ်း မီးသတ်စခန်းရဲ့ တာဝန်ရှိသူက ပြောပါတယ်။

ဒီနေ့(မေ ၂၅) မနက် ၉နာရီခွဲလောက်မှာ ယာဉ်တိမ်းမှောက်မှုဖြစ်ခဲ့တာပါ။

"သူတို့က မိတ္ထီလာကနေ မန္တလေးကို သွားမှာ။ ကားက မိုင်တိုင် ၃၃၃/၇ ဖာလုံအရောက်မှာ ညာဘက်ဘီးပေါက်ပြီး လမ်းဘေးကိုထိုးကျသွားတာ ။ ထိုးကျသွားတဲ့ အရှိန်က များတာဖြစ်တဲ့အတွက် ကားပေါ်မှာပါလာတဲ့သူ‌တွေအကုန်လွင့်ထွက်ကုန်တာ။" လို့ စကားအင်းအမြန်လမ်း မီးသတ်စခန်းရဲ့ တာဝန်ရှိသူက ပြောပါတယ်။

ကားပေါ်မှာ လူကြီး ၃ဦးနဲ့ ကလေး ၃ဦး လိုက်ပါလာတာဖြစ်ပြီး အသက် ၆၀ ကျော် နဲ့ အသက် ၄၀ ကျော်အရွယ် အမျိုးသမီး ၂ဦးကတော့ အခင်းဖြစ်တဲ့နေရာမှာ သေဆုံးသွားတယ်လို့ ဆိုပါတယ်။

ထိခိုက်ဒဏ်ရာရရှိသူတွေထဲက အသက် ၉ နှစ်ရွယ်ကလေးတစ်ဦးကိုတော့ စိုးရိမ်ရတဲ့အေခြအနေနဲ့ တံတားဦးမြို့နယ်ပြည်သူ့ဆေးရုံကို အချိန်မီတင်ပို့နိုင်ခဲ့တာကြောင့် ဆေးကုသမှုခံယူနေတယ်လို့ အထက်ပါတာဝန်ရှိသူကပြောပါတယ်။

ကျန်တဲ့ ယာဉ်မောင်းနဲ့ကလေး ၂ဦးကတော့ ထိခိုက်ဒဏ်ရာ ကြီးကြီးမားမားမရဘူးလို့ ဆိုပါတယ်။

ဓာတ်ပုံ - MFSD

စစ်တပ်က အင်အား ၁၀၀၀ကျော်နဲ့ စစ်ဆိုင်ထားပြီး ထိတွေ့တိုက်ပွဲ ၁၀ရက်ခန့်ရှိဟု ချင်းတပ် CPU/CPA ခေါင်းဆောင်ပြော

▪️တိုက်ပွဲကာလ ကြာရှည်ပြင်းထန်မယ့်သဘောရှိဟု အသိပေး

မေ ၂၅။၂၀၂၆။ ထားမြတ်/People’s Spring

အာဏာသိမ်းစစ်တပ် အင်အား ၁၀၀၀ ကျော်နဲ့ စစ်ဆိုင်ထားရသလို အင်အားတွေ ထပ်ဖြည့်တင်းဖို့ ပြင်ဆင်နေလို့ တိုက်ပွဲကာလ ကြာရှည်ပြင်းထန်မယ့် အခြေအနေရှိကြောင်း ချင်းပြည်တောင်ပိုင်း တပ်ဖွဲ့ဖြစ်တဲ့ ချင်းပြည်သူ့အစည်းအရုံး/ချင်းပြည်သူ့တပ်မတော်(CPU/CPA) အထွေထွေအတွင်းရေးမှူး ဆလိုင်းယောမာန်က ပြောပါတယ်။

စစ်တပ်က မေလအတွင်းမှာ ချင်း-မကွေးအစပ်ဒေသတွေကို အင်အားအလုံးအရင်းဖြည့်တင်း ထိုးစစ်ဆင်လာလို့ ဒေသတွင်း တိုက်ပွဲတွေ ဖြစ်ပွားနေတာနဲ့ ပတ်သက်ပြီး CPU/CPAက စစ်ရေး အခြေအနေတွေနဲ့ ပတ်သက်ပြီး ပထမဆုံးအကြိမ် အသိပေးခြင်းဖြစ်သကဲ့သို့ စစ်ဆင်ရေးလိုအပ်ချက်တွေ အတွက် ပူးပေါင်းပါဝင်ပေးကြဖို့ ဖိတ်ခေါ်ခြင်းလည်းဖြစ်ပါတယ်။

“လက်ရှိအချိန်မှာ ချင်းပြည်တောင်ပိုင်း၊ ယောဒေသနှင့် ပုံတောင်ပုံညာမှာ စကမ အင်အား ၁၀၀၀ ကျော်နဲ့ ကျနော်တို့ စစ်ဆိုင်ထားပါတယ်။ စကမတပ်တွေနဲ့ ကျနော်တို့ ထိတွေ့တိုက်ပွဲတွေ ဖြစ်နေတာ (၁၀) ရက်ဝန်းကျင် ရှိနေပါပြီ။CPU ထိန်းချုပ်နယ်မြေတွေဖြစ်တဲ့ မင်းတပ်၊ မတူပီ၊ ကန်ပက်လက် မြို့တွေက အရပ်ဘက်၊ စစ်ဘက် ပစ်မှတ်တွေကို စကမ အနေနဲ့ မနားတမ်း လေကြောင်းတိုက်ခိုက်မှုလုပ်နေတာတွေကို ကြည့်ရင်လည်း မြေပြင်တိုက်ပွဲတွေ ဘယ်လောက် ပြင်းထန်နေတယ်ဆိုတာ သိနိုင်ပါတယ်။လက်ရှိမှာ အကြမ်းဖက် စကမတွေ ရှေ့ဆက်မတိုးနိုင်အောင် တားထားနိုင်ပေမဲ့လည်း စခတွေ နောက်ထပ် စစ်ကူအင်အား (၁၀၀၀) ကျော် ထပ်မံဖြည့်တင်းဖို့ ပြင်ဆင်နေတာကြောင့် တိုက်ပွဲကာလ ကြာရှည်မဲ့၊ ပြင်းထန်မဲ့သဘော ရှိပါတယ်” လို့ ဆလိုင်းယောမာန်က လူမှုကွန်ရက်မှာ ရေးသားဖော်ပြပါတယ်။

စစ်ဆင်ရေးအတွက် အလှူခံလိုတဲ့ အချက် ၂ချက်ရှိပြီး ဒါတွေကတော့ ရှေ့တန်းစစ်မြေပြင်မှာ အလိုအပ်ဆုံးအရာတွေ ကူညီဖြည့်တင်းဖို့နဲ့ ရဲဘော်တွေကို ဆေးကုသတဲ့အခါ လိုအပ်တဲ့အရာတွေ ဝယ်ယူဖြည့်တင်းဖို့ ဖြစ်ကြောင်း အသိပေးပါတယ်။

လက်ရှိ ရှေ့တန်းစစ်မျက်နှာမှာ အလိုအပ်ဆုံးအရာတွေဘာလဲဆိုတာ စစ်ဘက်ဆိုင်ရာ တာဝန်ရှိသူကို မေးမြန်းစုံစမ်းထားကြောင်းလည်း ပြောပါတယ်။

“အလှူငွေလက်ခံတာတော့ NUG Pay, SDB တို့နဲ့ အဓိက လက်ခံပါမယ်။ လုံခြုံအောင်လို့ပါ။ CB ကနေတဆင့် ဆက်သွယ်ပေးပါ။လက်ရှိစစ်ဆင်ရေးကုန်ကျစရိတ် ပဏာမလျာထားချက်က သိန်းသောင်းနဲ့ချီ ရှိပါတယ်။ကိုယ်အလှူခံတာကနေ သိန်းဆယ်ချီ၊ ရာချီလောက်ရတယ်ဆိုရင်ပဲ လိုအပ်တဲ့နေရာတွေ တတ်နိုင်သလောက် ဖြည့်စွက်သွားချင်လို့ အလှူခံရခြင်း ဖြစ်ပါတယ်။အလှူလက်ခံရရှိမှုနဲ့ ရှေ့တန်းကို ပံ့ပိုးတဲ့ပစ္စည်းတွေကို ပြန်လည်တင်ပြသွားပါမယ်။” လို့ ဆလိုင်းယောမာန်က ရေးသားထားပါတယ်။

ပံ့ပိုးမဲ့ပစ္စည်းတွေက စစ်ဘက်ဆိုင်ရာတာဝန်ရှိသူတွေက လက်ရှိ အလိုအပ်ဆုံးလို့ ပြောတဲ့အရာတွေ ဖြစ်ပြီး ကျည်ကာတို့၊ Equipment တို့ ဖြစ်ချင်မှ ဖြစ်မယ်လို့လည်း အသိပေးထားပါတယ်။

ဂုဏ်ပြုမှတ်တမ်းနဲ့ လက်ခံရရှိတဲ့ အလှူငွေတွေကိုတော့ အဖွဲ့အစည်းကိုပဲ အပ်မှာဖြစ်ပြီး အဖွဲ့အစည်းကပဲ ငွေကြေးကို စီမံခန့်ခွဲမယ်လို့ ဆိုပါတယ်။

“ကျနော်တို့အားလုံး ဝိုင်းဝန်းပူးပေါင်းရုန်းကန်ကြရင် ဒီ စကမ စစ်ကြောင်းကို အကောင်းဆုံး တုံ့ပြန်ရင်ဆိုင်နိုင်မယ်လို့ သေချာယုံကြည်ပါတယ်” လို့ ရေးသားကာ ပူးပေါင်းပါဝင်ပေးကြဖို့ ဖိတ်ခေါ်ထားပါတယ်။

စစ်တပ်ဟာ လက်ရှိမှာ ချင်းတပ် CPU/CPAထိန်းချုပ်ထားတဲ့ ကန်ပက်လက်မြို့ကို ထိုးစစ်ဆင်နေလို့ တိုက်ပွဲတွေ ပြင်းထန်နေသလို မင်းတပ်၊ ကန်ပက်လက် ၊ မတူပီ စတဲ့ ချင်းတောင်ပိုင်းမြို့တွေကို လေကြောင်းဗုံးကြဲတာတွေ ဆက်တိုက်လုပ်ဆောင်နေပါတယ်။ မေလ ဒုတိယပတ်မှ အခုအချိန်ထိ ချင်းတောင်ပိုင်း မြို့ ၃ခုကို စစ်တပ်က လေကြောင်းဗုံးကြဲမှု အကြိမ် ၄၀ကျော်ရှိပြီး ကလေးငယ် အပါအဝင် ပြည်သူသေဆုံးထိခိုက်မှုတွေလည်း ရှိခဲ့ပါတယ်။

(ဖလမ်းမြို့သိမ်းတိုက်ပွဲအောင်ပွဲရ ချင်းညီနောင်(CB)အဖွဲ့၀င် CDF-Mindat နှင့် CDF Kanpetlet ရဲဘော်များ။ဓာတ်ပုံ - Chin Defence Force - Mindat)

မြန်မာ့အရေးကို အင်ဒို-ပစိဖိတ်ဒေသ မဟာဗျူ
ဟာမြောက်ဦးစားပေးအဖြစ် အသိအမှတ်ပြုဖို့ QUAD ကို အရပ်ဘက်အဖွဲ့ ၆၆ ခု တောင်းဆို

မေ-၂၅၊ ၂၀၂၆။ People’s Spring

မြန်မာ့အရေးကို အင်ဒို-ပစိဖိတ်ဒေသ မဟာဗျူ
ဟာမြောက်ဦးစားပေးအဖြစ် အသိအမှတ်ပြုဖို့ အမေရိကန်၊ သြစတြေးလျ၊ အိန္ဒိယ၊ ဂျပန် တို့ပါဝင်တဲ့ လေးနိုင်ငံ လုံခြုံရေးဆွေးနွေးဖက်နိုင်ငံများအဖွဲ့ QUAD ကို တော်လှန်ရေးနဲ့ အရပ်ဘက်အဖွဲ့အစည်း ၆၆ ခု ထုတ်ပြန်တောင်းဆိုလိုက်ပါတယ်။

အမေရိကန်၊ သြစတြေးလျ၊ အိန္ဒိယ၊ ဂျပန်နိုင်ငံတို့ရဲ့ နိုင်ငံခြားရေးဝန်ကြီးတွေဆီ လိပ်မူပြီး QUAD အဖွဲ့ကို တောင်းဆိုခဲ့တာဖြစ်ပြီး အာဏာသိမ်းစစ်တပ်ရဲ့ တရားဝင်မှုကို ငြင်းပယ်ဖို့၊ နယ်စပ်ဖြတ်ကျော် လူသားချင်းစာနာမှုအကူအညီ တိုးချဲ့လုပ်ဆောင်ဖို့၊ မြေပြင်ရှိ အဖွဲ့အစည်းတွေနဲ့ ထိတွေ့ဆက်ဆံဖို့နဲ့ နိုင်ငံဖြတ်ကျော်မှုခင်းတိုက်ဖျက်ရေးအတွက် ပူးပေါင်းဆောင်ရွက်မှုမြှင့်တင်ဖို့ အချက်တွေကိုလည်း အရပ်ဘက်အဖွဲ့အစည်း ၆၆ ခုက ထည့်သွင်းတောင်းဆိုပါတယ်။

အရပ်ဘက်အဖွဲ့အစည်းတွေ၊ လူသားချင်းစာနာမှုဆိုင်ရာကွန်ရက်တွေနဲ့ လူမျိုးစုအခြေစုအဖွဲ့တွေပါဝင်တဲ့ ၆၆ ဖွဲ့ဟာ QUASအနေနဲ့ မြန်မာ့အကျပ်
အတည်းကို ပူးပေါင်းဆောင်ရွက်မှုလိုအပ်နေတဲ့ ကမ္ဘာလုံးဆိုင်ရာအရေးပေါ်စိန်ခေါ်မှုတစ်ခုအဖြစ် အသိအမှတ်ပြုဖို့ တောင်းဆိုထားပါတယ်။

စစ်တပ်အာဏာသိမ်းဖို့ကြိုးပမ်းမှု ၅နှစ်ကျော်လာချိန်မှာ မြန်မာနိုင်ငံဟာ မကြုံစဖူးလူသားချင်းစာနာမှုဆိုင်ရာ ပြိုလဲမှုနဲ့ နက်ရှိုင်းတဲ့ နိုင်ငံရေးအကျပ်
အတည်းတွေ ရင်ဆိုင်နေရပြီး ပြည်သူသန်းပေါင်းများစွာဟာ နေရပ်စွန့်ခွာထွက်ပြေးတိမ်းရှောင်နေရသလို အိန္ဒိယ၊ ထိုင်း၊ ဘင်္ဂလားဒေ့ရှ် နယ်စပ်တလျှောက်မှာလည်း မတည်ငြိမ်မှုတွေ ဆက်လက်ဆိုးရွားနေတယ်လို့ ဖော်ပြပါတယ်။

မြန်မာ့အကျပ်အတည်းဟာ ပြည်တွင်းနိုင်ငံရေး ဒါမှမဟုတ် လူသားချင်းစာနာမှုဆိုင်ရာ ကိစ္စရပ်တစ်ခုတည်း မဟုတ်တော့ဘဲ အင်ဒို-ပစိဖိတ်ဒေသတစ်ခုလုံးရဲ့ ဒေသတွင်းမတည်ငြိမ်မှု၊ နိုင်ငံဖြတ်ကျော် ရာဇဝတ်မှုများနဲ့ပိုမိုကျယ်ပြန့်သောလုံခြုံရေးခြိမ်း
ခြောက်မှုများကို ပိုမိုတိုးပွားလာစေတယ်လို့ အသိ
ပေးပါတယ်။

ဒါ့အပြင် မြန်မာနိုင်ငံနဲ့ဆက်နွှယ်နေတဲ့ အွန်လိုင်းငွေလိမ်လည်မှုလုပ်ငန်းတွေ၊ လူကုန်ကူးမှု၊ မူးယစ်ဆေးဝါးမှောင်ခိုကူးမှုနဲ့ တရားမဝင် ဘဏ္ဍာရေးကွန်ရက်တွေဟာ လက်ရှိ အာရှနဲ့ အာရှပြင်ပရှိ သားကောင်များ၊ စီးပွားရေးများနဲ့ ဒစ်ဂျစ်တယ်လုံခြုံရေးစနစ်များကိုပါ ထိခိုက်နေတယ်လို့ ဖော်ပြပါတယ်။ ဒါ့အပြင် မြန်မာနိုင်ငံဟာ ကမ္ဘာပေါ်မှာ ဘိန်းနဲ့ စိတ်ကြွရူးသွပ်ဆေးဝါး အများဆုံး ထုတ်
လုပ်တဲ့ နိုင်ငံတစ်ခု ဖြစ်လာပြီး နောက်ဆက်တွဲ ဆိုးကျိုးများစွာနဲ့ နိုင်ငံတကာ ရာဇဝတ်မှုကွန်ရက်များကို ပံ့ပိုးပေးနေတယ်လို့ ဆက်လက်ဖော်ပြပါတယ်။

ဒါကြောင့် မြန်မာ့အကျပ်အတည်းဟာ လက်ရှိ ဒေ
သတွင်းတည်ငြိမ်ရေး၊ နိုင်ငံတကာလုံခြုံရေးနဲ့ အင်ဒို-ပစိဖိတ်ဒေသရဲ့ အနာဂတ်အတွက် မဟာဗျူဟာမြောက် စိန်ခေါ်မှုတစ်ရပ် ဖြစ်နေပြီလို့ အရပ်ဘက်အဖွဲ့အစည်းတွေက ဆိုပါတယ်။

မြန်မာ့အကျပ်အတည်းကို လျစ်လျူရှုထားခြင်းဟာ ဒေသတွင်းနဲ့ ဒေသပြင်ပရှိ မတည်ငြိမ်မှုတွေကို ပိုမိုနက်ရှိုင်းစေလိမ့်မယ်လို့ သတိပေးပါတယ်။

မြန်မာပြည်သူများကို ပံ့ပိုးကူညီခြင်းနဲ့ မြေပြင်ရှိ ပကတိအခြေအနေများကို အပြုသဘောဆောင်စွာ ထိတွေ့ဆက်ဆံခြင်းဟာ ပိုမိုလုံခြုံ၊ တည်ငြိမ်၊ ခံနိုင်ရည်ရှိတဲ့ အင်ဒို-ပစိဖိတ်ဒေသ ဖြစ်လာစေဖို့ အထောက်အကူပြုမှာ ဖြစ်တယ်လို့ ဆိုပါတယ်။ ဒါကြောင့် Quad အဖွဲ့ဝင်နိုင်ငံတွေအနေနဲ့ အရေး
တကြီးဟန်ချက်ညီညီနဲ့အမြန်ဆုံးအရေးယူဆောင်
ရွက်ပေးဖို့ အရပ်ဘက်အဖွဲ့အစည်းတွေက တိုက််တွန်းပါတယ်။

QUAD အဖွဲ့ဝင်၄ နိုင်ငံရဲ့ နိုင်ငံခြား​ရေးဝန်ကြီး​တွေ။ဓါတ်ပုံ-US Embassy in India

ပခုက္ကူမှာ စစ်ရှောင်တွေကို စစ်တပ်က ဖမ်းဆီးငွေညှစ်နေ

မေ ၂၅၊ ၂၀၂၆။ ဟာနာဆန်/People's Spring

မကွေးတိုင်း၊ ပခုက္ကူမြို့နယ်မှာ စစ်တပ်စစ်ကြောင်းထိုးလို့ ထွက်ပြေးလာတဲ့ စစ်ဘေးရှောင်ပြည်သူတွေကို စစ်ကောင်စီတပ်ဖွဲ့ဝင်တွေက ဖမ်းဆီးငွေညှစ်နေကြောင်း ပခုက္ကူလူထုတိုက်ပွဲကော်မတီက အသိပေးပါတယ်။

ပခုက္ကူမြို့နယ်အတွင်းမှာ စစ်တပ်စစ်ကြောင်းထိုး​နေလို့ ပြည်သူတွေ ထွက်ပြေးလာခဲ့ရာ မြို့ပေါ်နဲ့ အခြားနေရာတွေမှာ နေထိုင်နေကြောင်း၊ အဲဒီလို နေထိုင်နေတဲ့ ပြည်သူတွေကို ယခု မေလ တတိယပတ်အတွင်းမှာ စစ်တပ်က ဝင်ရောက်ဖမ်းဆီးတာ၊ ခြိမ်းခြောက်ပြီး ကျပ်သိန်းရာဂဏန်းအထိ တောင်းယူနေကြောင်း ပခုက္ကူလူထုတိုက်ပွဲကော်မတီရဲ့ တာဝန်ရှိသူက ပြောပါတယ်။

"မိသားစု နှစ်စုသုံးစုလောက် ငွေညှစ်ခံရတယ်။ ရပ်ကွက်အတိအကျ ပြောလို့မရဘူး"လို့ အထက်ပါတာဝန်ရှိသူက ပြောပါတယ်။

ဒါ့ကြောင့် စစ်ရှောင်ပြည်သူတွေအနေနဲ့ စစ်တပ်ရဲ့အန္တရာယ်ကို ကြိုတင်ပြင်ဆင်ပြီးမှ ရှောင်ကြဖို့
ပခုက္ကူလူထုတိုက်ပွဲကော်မတီက သတိပေးထားပါတယ်။

ပခုက္ကူမြို့နယ်၊ မြစ်ခြေဒေသမှာ စစ်တပ်စစ်ကြောင်းထိုးနေလို့ ကျေးရွာအများအပြားက ပြည်သူတွေ တိမ်းရှောင်နေရပြီး ပြည်သူ ၅ ဦးထက်မနည်း သတ်ဖြတ်ခံထားရကာ ကျေးရွာ ၇ ရွာထက်မနည်းလည်း မီးရှို့ဖျက်ဆီးခံထားရကြောင်း သိရပါတယ်။

ဒါ့အပြင် ပခုက္ကူမြို့ပေါ်မှာ လူငယ်တွေကို စစ်တပ်က ပေါ်တာဆွဲဖမ်းဆီးနေပြီး လူငယ်အများအပြား ဖမ်းဆီးခံထားရကြောင်း ဒေသခံတွေက ပြောပါတယ်။