(ရခိုင်ပြည်နယ်က ဂွမြို့သိမ်းအပြီး တွေ့ရတဲ့ AA ရဲဘော်တွေ။ ဓာတ်ပုံ - AA)

မင်းတပ်မြို့ကို စစ်တပ်က တစ်ရက်တည်း လေကြောင်းကနေ ၁၁ကြိမ်ဗုံးကြဲလို့ စစ်သုံ့ပန်းတွေ အပါအဝင် ၄ဦးသေဆုံး

မေ ၁၃၊ ၂၀၂၀၆။ ထားမြတ်/People’s Spring

ချင်းပြည်နယ်၊ မင်းတပ်မြို့နယ်ကို အာဏာသိမ်းစစ်တပ်က လေကြောင်းကနေဗုံးကြဲတိုက်ခိုက်မှု ထပ်မံလုပ်ဆောင်ခဲ့လို့ စစ်သုံ့ပန်းတွေ အပါအဝင် ၄ဦးသေဆုံးခဲ့ပြီး နေအိမ်အဆောက်အအုံ ပျက်စီးမှုတွေရှိခဲ့ကြောင်း ချင်းတောင်ပိုင်းတပ်ဖွဲ့ဖြစ်တဲ့ ချင်းပြည်သူ့အစည်းအရုံး(CPU/CPA)က သတင်းထုတ်ပြန်ပါတယ်။

စစ်တပ်ဟာ မင်းတပ်မြို့ကို မေလ ၁၁ရက်ည သန်းခေါင်ယံမှ မေလ ၁၂ရက် ည ၆နာရီခွဲအတွင်း လေကြောင်း တိုက်ခိုက်မှု ၁၁ကြိမ် ပြုလုပ်ခဲ့တာလို့ဆိုပါတယ်။

မေလ ၁၁ရက် ည ၁၁နာရီ ၄၅မှာ မင်းတပ်မြို့ပေါ် တနေရာကို တိုက်လေယာဉ်နဲ့ ၂ကြိမ်၊ မေလ ၈ရက် မနက်မှာ မင်းတပ်မြို့အနီး ၂ကြိမ်၊ မနက် ၁၁နာရီ မှာ မင်းတပ်မြို့ပေါ်ကို ၂ကြိမ်၊ ည ၆နာရီခွဲမှာ မင်းတပ်မြို့ပေါ်ကို ၅ကြိမ် လေကြော်ငး ဗုံးကြဲတိုက်ခိုက်ခဲ့တာလို့ အသိပေးထားပါတယ်။

လေကြောင်းတိုက်ခိုက်မှု ၁၁ကြိမ် ပြုလုပ်ခဲ့လို့ စစ်သုံ့ပန်းတွေ အပါအဝင် ၄ဦးသေဆုံးကာ အရပ်သား နေအိမ် ၁၅လုံး၊ အစိုးရရုံးဌာန အဆောက်အဦ (၁၀)ခု၊ မော်တော်ယာဉ် (၄) စီး ပျက်စီးမှုရှိခဲ့ပြီး ဒဏ်ရာရသူတွေလည်း ရှိခဲ့တယ်လို့ ဖော်ပြထားပါတယ်။

“ပြည်သူများအနေဖြင့် လက်ရှိအချိန်အတောတွင်း လူစုလူတွေးများရှောင်ရှားပြီး မိမိတို့နေအိမ်၊ ဈေးဆိုင်များတွင် ဗုံးခိုကျင်းများ၊ ကတုတ်ကျင်းများ အဆင်သင့်ထားရှိကာ ထောက်လှမ်းရေးဒရုန်းများ၊ ကင်းထောက်လေယာဉ်များ၊ လေကြောင်းသတင်းများကို နားစွင့်၍ လေကြောင်းသတိထားနေထိုင်ကြပါရန် ချင်းပြည်သူ့အစည်းအရုံးအနေဖြင့် တိုက်တွန်းနှိုးဆော် အပ်ပါသည်” လို့လည်း ထုတ်ပြန်ပါတယ်။

အာဏာသိမ်းစစ်တပ်ဟာ မင်းတပ်မြို့ကို အခု မေလအတွင်းမျာ လေကြောင်းတိုက်ခိုက်မှု အကြိမ်ကြိမ် ပြုလုပ်ခဲ့ပါတယ်။ ဒီလို တိုက်ခိုက်ရာမှာ လေကြောင်းတိုက်ခိုက်ခံရမှု ကယ်ဆယ်ရေး လုပ်ဆောင်နေသူတွေကို ပစ်မှတ်ထားတိုက်ခိုက်နေကြောင်းလည်း CPU/CPA အထွေထွေအတွင်းရေးမှူး ဆလိုင်းယောမာန်က အသိပေးထားပါတယ်။

မေလ ၈ရက်မှာလည်း စစ်တပ်က မင်းတပ်မြို့တနေရာကို လေကြောင်းကနေ ဗုံးကြဲပြီး ဒရုန်းနဲ့ စောင့်ကြည့်ကာ နေ့လည်ပိုင်းမှာ ကယ်ဆယ်ရေးလုပ်သူတွေကို မီးလောင်ဗုံးတွေသုံး တိုက်ခိုက်ခဲ့တဲ့ ဖြစ်စဉ်အပြီး ဆလိုင်းယောမာန်က အခုလို သတိပေးချက်ကို လူမှုကွန်ရက်မှာ ရေးသားခဲ့ပါတယ်။

" ၂၀၂၁ – ၂၀၂၃ စစ်ကောင်စီ ဗုံးကြဲပြီးသွားတာနဲ့… ဒေသခံတွေ ကယ်ဆယ်ရေးလုပ်ကြ၊ ဒဏ်ရာရသူတွေဆွဲထုတ်ကြ၊ ကူညီကြတယ်။ လေကြောင်း ထပ်ဆင့်မလာတော့ဘူး။၂၀၂၄-၂၀၂၅ … စစ်ကောင်စီ လေကြောင်းတိုက်ခိုက်မှုလုပ်တယ်။ ဗုံးကြဲပြီး ၁၅ မိနစ်၊ နာရီဝက်အကြာ… ဒေသခံတွေ မီးငြိမ်းနေတုန်း၊ ဒဏ်ရာရသူတွေ ဆွဲထုတ်နေတုန်း၊ ကူညီကယ်ဆယ်ရေးလုပ်နေတုန်း.. အချိန်ကိုက် နောက်တစ်ကြိမ် ဗုံးလာကြဲတယ်။၂၀၂၆ – စစ်ကော်မရှင် လေကြောင်းတိုက်ခိုက်မှုလုပ်တယ်။ ဗုံးကြဲပြီး… နာရီ ၃ ချက်လောက် ဒေသခံတွေ စောင့်ကြည့်တယ်။ ဘာမှ လှုပ်ရှားမှု မရှိဘူး။ ကူညီကယ်ဆယ်ရေး၊ ဒဏ်ရာရသူတွေ ဆွဲထုတ်နေတာလုပ်တယ်။ စကမ က အဲဒီလို လူစုလူဝေး ရှိ မရှိကို ဒရုန်းနဲ့စောင့်ကြည့်တယ်။ ပြီးမှ… လူစုလူဝေးရှိရာနေရာကို စောင့်ကြည့်ပြီး ထပ်ဗုံးကြဲတယ်” လို့ ဆလိုင်းယောမာန်က လေကြောင်း ဗုံးကြဲတိုက်ခိုက်ခံရမှု အတွေ့အကြုံတွေကို ပြောထားပါတယ်။

စစ်တပ်ရဲ့ ဒရုန်းရန်ကို သတိထားဖို့ ၊ ကူညီကယ်ဆယ်ရေး လုပ်ဆောင်ရာမှာ အမြန်လုပ်ဆောင်ပြီး အမြန်လူစုခွဲဖို့ သတိပေးပါတယ်။

“ကယ်ဆယ်ရေးလုပ်နေတုန်းမှာလည်း.. သတိရှိပါ။ လူထုအနေနဲ့…. လူစုလူဝေး တတ်နိုင်သမျှ ရှောင်ပါ။ ဆိုင်ကယ်တွေ အစုလိုက်အပုံလိုက်ရပ်တာ၊ ကားတွေ အစုလိုက်ရပ်တာမျိုး ရှောင်ပါ။ လေကြောင်းသတင်း အမြဲနားစွင့်ပြီး… ကိုယ်ရောက်တဲ့နေရာတိုင်း အနီးအနားမှာ ဗုံးခိုကျင်း၊ ကတုတ်ကျင်း၊ ရေမြောင်း၊ ရေပြွန်၊ ဗုံးဒဏ်ခံနိုင်တဲ့ အဆောက်အဦတွေ ရှိ မရှိ လေ့လာမှတ်သားပါ။ သတိ/အသိနဲ့ တော်လှန်ကြပါစို့” လို့ ဆလိုင်းယောမာန်က သတိပေးထားပါတယ်။

KNPP အမြဲတမ်းဗဟိုကော်မတီဝင် ခွန်းရီမာန်ထူး ကွယ်လွန်

မေ-၁၃၊၂၀၂၆။မိုမို/People's Spring

ကရင်နီအမျိုးသားရေးနဲ့တော်လှန်ရေးအတွက် ဘဝသက်တမ်းတစ်လျှောက်လုံးပါဝင်ခဲ့တဲ့ ကရင်နီအမျိုးသားတိုးတက်ရေးပါတီ(KNPP) အမြဲတမ်းဗဟိုကော်မတီဝင် ခွန်းရီမာန်ထူးဟာ လူကြီးရောဂါနဲ့ ကွယ်လွန်သွားပါတယ်။

အသက်(၈၂)နှစ်အရွယ် ခွန်းရီမာန်ထူးဟာ မေလ ၁၀ရက် ညနေ ၅ နာရီ ၅၄မိနစ်မှာ ကွယ်လွန်သွားခဲ့ရာ တော်လှန်ရေးအဖွဲ့တွေအတွက် ကြီးမားတဲ့ ဆုံးရှုံးမှုလို့ KNPP က ဆိုပါတယ်။

" ကရင်နီခုခံတော်လှန်ရေးမှာ ထဲထဲဝင်ဝင်ပါတယ်။ အားတက်သရောတာဝန်ကျေပွန်အောင်ထမ်းဆောင်တဲ့ ခေါင်းဆောင်ကြီးတစ်ဦးဖြစ်တယ်။၂၀၂၁ စစ်အာဏာသိမ်းပြီးနောက်ပိုင်းမှာလည်း ဖြစ်ထွန်းလာတဲ့ ပြည်နယ်မှာရှိနေတဲ့လူငယ်အင်အားစုတွေ ပြည်သူလူထုတော်လှန်ရေးမှာလည်း သူနိုင်တဲ့ဘက်ကနေ ပါဝင်ခဲ့တယ်။အသက်ကြီးပေမယ့် သူသိသလောက် ကျွန်တော်တို့ ကရင်နီပြည်နယ် မှာသွားနေတဲ့ ဖယ်ဒရယ်တည်ဆောက်ရေးမှာ ပါဝင်ပူးပေါင်းတာရှိတယ်"လို့ ကရင်နီပြည်ကြားကာလအုပ်ချုပ်ရေးကောင်စီ(IEC) တွဲဖက်အတွင်းရေးမှူး ဦးဗညားက ပြောပါတယ်။

ခွန်းရီမာန်ထူးရဲ့ စျာပနကို မနေ့က မေလ ၁၂ရက်မှာ လွတ်မြောက်နယ်မြေတနေရာမှာ ဂူသွင်းသဂြိုလ်တာလုပ်ခဲ့တယ်လို့ KNPP က အသိပေးပါတယ်။

"လူငယ်တွေရဲ့ အခန်းကဏ္ဍကို အရမ်းအားပေးတဲ့သူ။လူငယ်တွေကို ကြုံရင်ကြုံသလိုအားပေးတယ် "လို့ ခွန်းရီမာန်ထူးနဲ့ပတ်သက်လို့ ဦးဗညားက ရှင်းပြပါတယ်။

၁၉၄၄ ဒီဇင်ဘာ ၁၉ ရက်က မိုးဗြဲမြို့အနီး စနှိုက်ကျေးရွာမှာ ခွန်းရီမာန်ထူးကို မွေးဖွားခဲ့ပြီး ၁၉၇၅ သြဂုတ် ၂၂ရက်မှာ ကရင်နီခုခံတော်လှန်ရေးအဖွဲ့ဝင် ဖြစ်ခဲ့ပါတယ်။

တော်လှန်ရေးနယ်မြေမှာ ကျောင်းဆရာနဲ့ တော်လှန်ရေးတာဝန်ထမ်းဆောင်းခဲ့ပြီး ၁၉၈၀ ၊ ၈၁တွေမှာ ကရင်နီအမျိုးသားတော်လှန်ရေးအဖွဲ့ တရားရေးဌာန၊နိုင်ငံတော်တရားရေးဌာနတာဝန်ခံအဖြစ် တာဝန်ပေးအပ်ခံခဲ့ရပါတယ်။

အဲဒီနောက် ၁၉၈၂မှာ KNPP ပါတီဗဟို ကော်မတီဝင်အဖြစ် ရွေးချယ်ခံရပြီး အမြဲတမ်းပါတီဗဟိုကော်မတီဝင်အဖြစ် ၂၀၀၉မှာ ဖြစ်လာခဲ့တယ်လို့ သိရပါတယ်။

ဓာတ်ပုံ - KNPP

ချောင်းဦးမှာ စစ်တပ်က လက်နက်ကြီးနဲ့ပစ်လို့ သက်ကြီးရွယ်အိုတစ်ဦးသေဆုံးပြီး ၂ဦး ဒဏ်ရာရ

မေ ၁၃၊ ၂၀၂၆ ဟာနာဆန်/People's Spring

စစ်ကိုင်းတိုင်း၊ ချောင်းဦးမြို့နယ်မှာ စစ်တပ်က လက်နက်ကြီးနဲ့ပစ်ခတ်လို့ သက်ကြီးရွယ်အို
တစ်ဦးသေဆုံးပြီး ၂ ဦးဒဏ်ရာ ရရှိတဲ့ဖြစ်စဉ် ဖြစ်ပွားခဲ့ပါတယ်။

မနေ့က မေလ ၁၂ ရက် ညနေ ၄ နာရီခန့်က ချောင်းဦးမြို့ပေါ်က စစ်တပ်က တိုက်ပွဲဖြစ်ပွားခြင်း မရှိဘဲ လက်နက်ကြီးတွေနဲ့ အကြောင်းမဲ့ပစ်ခတ်တိုက်ခိုက်လို့ ရှမ်းထူးကျေးရွာအတွင်း လက်နက်ကြီးတွေ ကျရောက်ပေါက်ကွဲကာ လူထိခိုက်သေဆုံးမှုတွေရှိခဲ့ကြောင်း ဒေသခံတွေက ပြောပါတယ်။

"တစ်ယောက်သေတယ်။ ၂ ယောက်က ဆေးရုံမယ်"လို့ ဒေသခံတစ်ဦးက ပြောပါတယ်။

သေဆုံးသူဟာ အသက် ၈၀ ခန့်အရွယ် အမျိုးသမီးကြီးတစ်ဦးဖြစ်ပြီး ဒဏ်ရာရသူမှာ အသက် ၃၀ အရွယ် လင်မယားနှစ်ဦးဖြစ်ကြောင်း ဒေသခံတွေက ပြောပါတယ်။

ဒါ့အပြင် လူနေအိမ် ၂ လုံးပါ ပျက်စီးခဲ့ကြောင်း ဒေသခံတွေက ပြောပါတယ်။

ရှမ်းထူးရွာဟာ ပြီးခဲ့တဲ့မတ်လအတွင်းကလည်း စစ်တပ်ရဲ့မီးရှို့ဖျက်ဆီးမှုကြောင့် နေအိမ်တစ်ရာကျော် မီးလောင်ပျက်စီးခဲ့ပါသေးတယ်။ ဒါ့အပြင် လက်နက်ကြီးကျလို့ လူထိခိုက်သေဆုံးမှုတွေလည်း မကြာခဏ ဖြစ်ပွားနေကြောင်း ဒေသခံတွေက ပြောပါတယ်။

မေလ ၉ ရက်ကလည်း ချောင်းဦးနဲ့နယ်မြေချင်းထိဆက်နေတဲ့ မုံရွာမြို့နယ်မှာ အမြောက်တပ်ကနေလက်နက်ကြီး ၃ ကြိမ်ပစ်ခတ်တိုက်ခိုက်လို့ ဘူးတောင့်ကန်ကျေးရွာ လက်နက်ကြီးကျပြီး (၅)နှစ်အရွယ်ကလေးနဲ့ အမျိုးသမီးတစ်ဦး သေဆုံးကာ သက်ကြီးရွယ်အိုတွေအပါအဝင် ပြည်သူ ၇ ဦး ဒဏ်ရာရရှိခဲ့ပါသေးတယ်။

(လက်နက်ကြီးကျခဲ့သည့် ရှမ်းထူးရွာကို စစ်တပ်က ၂၀၂၃ ဇွန်လမှာ မီးရှို့ဖျက်ဆီးခဲ့စဉ်။ ဓါတ်ပုံ Chaung U Revolution)

ချင်း-မကွေးအစပ်ဒေသတွေကို စစ်တပ်က လေကြောင်းကနေ ဆက်တိုက်ဗုံးကြဲ

မေ ၁၃၊ ၂၀၂၆။ ထားမြတ်/People’s Spring

ချင်းပြည်နယ်နဲ့ မကွေးတိုင်းအစပ်က မြို့နယ်တွေဖြစ်တဲ့ မင်းတပ်၊ ကန်ပက်လက်နဲ့ ဆောမြို့နယ်တွေ စစ်တပ်က လေကြောင်းကဗုံးကြဲတာတွေ အခုရက်ပိုင်းအတွင်း နေ့စဉ်ရက်ဆက် အပြင်းအထန် လုပ်နေပါတယ်။

မေလ ၁၁ရက် ညသန်းခေါင်ကနေ မေလ ၁၂ရက် ညအထိ ချင်းပြည်နယ် မင်းတပ်မြို့နဲ့ အနီးကို စစ်တပ်က ဗုံးကြဲတိုက်ခိုက်မှု ၁၁ကြိမ်ပြုလုပ်ခဲ့သလို မင်းတပ်နဲ့ ဆက်စပ်နေတဲ့ ကန်ပက်လက်မြို့ကိုလည်း မနေ့ည (မေလ ၁၂ရက်ည) မှာလည်း တိုက်လေယာဉ် ၂စီး၊ Y12 လေယာဉ် တို့ သုံးပြီး ၁၂ကြိမ် ဗုံးကြဲခဲ့တယ်လို့ ဒေသခံက အသိပေးထားပါတယ်။ အတွဲလိုက်ဗုံးတွေပါ အသုံးပြု တိုက်ခိုက်သွားပြီး ထိခိုက်မှု အခြေအနေ စုံစမ်းနေဆဲဖြစ်ပါတယ်။

ဒီနေ့ မေ ၁၃ရက်မနက်မှာ စစ်တပ်ဟာ မကွေးတိုင်း၊ ဆောမြို့နယ် ကျောက်ထုဒေသ တနေရာကို လေကြောင်း တိုက်ခိုက်မှု ၆ကြိမ်ပြုလုပ်ခဲ့သလို အဲဒီ ဗုံးကြဲခဲ့တဲ့နေရာကို Y12နဲ့ ထပ်မံ ဗုံးကြဲခဲ့တယ်လို့ ဒေသခံက အသိပေးပါတယ်။

စစ်တပ်ဟာ မင်းတပ်မြို့ပေါ်ကိုလည်း ဒီကနေ့ လေကြောင်းကနေ ကင်းထောက်တာတွေဆက်လက် ပြုလုပ်နေလို့ လူစုလူဝေး ရှောင်ရှားကြဖို့လည်း ဒေသခံက သတိပေးထားပါတယ်။

မင်းတပ်နဲ့ ကန်ပက်လက်မြို့နယ်တွေကို ထိန်းချုပ်ထားတဲ့ ချင်းပြည်သူ့အစည်းအရုံး(CPU/CPA)က စစ်တပ်ရဲ့ မင်းတပ်မြို့နယ်အတွင်း လေကြောင်း တိုက်ခိုက်မှု အခြေအနေတွေကို သတင်းထုတ်ပြန်ထားရာ မေလ ၁၁ရက်ကနေ ၁၂ရက်အတွင်းလေကြောင်းဗုံးကြဲ တိုက်ခိုက်မှုတွေကြောင့် စစ်သုံ့ပန်းတွေ အပါအဝင် ၄ဦးသေဆုံးကာ ဒဏ်ရာရသူတွေလည်းရှိဟု အသိပေးထားပါတယ်။

ပြည်သူတွေ လူစုလူဝေး ရှောင်ဖို့ ဗုံးခိုကျင်း၊ ကတုတ်ကျင်းတွေ အသင့်ထားရှိဖို့ ထောက်လှမ်းရေးဒရုန်း၊ ကင်းထောက်လေယာဉ်တွေနဲ့ လေကြောင်း သတင်းတွေ နားစွန့်ပြီး လေကြောင်း သတိထားဖို့ လည်း နှိုးဆော်ထားပါတယ်။

စစ်တပ်ဟာ ဧပြီလကုန်ပိုင်းကလည်း ကန်ပက်လက်မြို့နယ် ကျင်ဒွေးမြို့ ကျင်ဒွေးတံတားကို လေကြောင်းဗုံးကြဲခဲ့ရာ ပြည်သူ ၉ဦးသေဆုံးခဲ့ပါတယ်။ တဖက်မှာလည်း ချင်းမကွေး အစပ်ဒေသတွေကို စစ်တပ်က အင်အားဖြည့်တင်းတာတွေ လုပ်ဆောင်လျက်ရှိပါတယ်။

ချင်းပြည်သူ့အစည်းအရုံး တာဝန်ရှိသူတွေကတော့ စစ်တပ်ထိုးစစ်ဆင်လာပါက ခုခံတိုက်ခိုက်ဖို့ ထိန်းချုပ်နယ်မြေကို ကာကွယ်ဖို့ ပြင်ဆင်ထားကြောင်း အသိပေးထားပါတယ်။

ရုပ်သံ - Ĥkl Mindat

ကြံဖွံ့ပါတီရဲ့ အမတ်​ဟောင်းလည်းဖြစ် ၊စစ်သား​ဟောင်းလည်းဖြစ် ၊စစ်တပ်အတွက်ဝါဒဖြန့်​ပေး​​နေတဲ့ဘူးလက်လှ​​ဆွေကဆိုရင် အာဏာရှင်နိုင်ငံ​တွေက အတိုက်အခံ​ခေါင်း​ဆောင်​တွေကို နိုင်ငံ​ရေးကဖယ်ထုတ်တာ ၊လုပ်ကြံတာ​တွေအထိပါနမူနာ​ပေးပြီး ​ဒေါ်​အောင်ဆန်းစုကြည်ကို ပြန်မလွှတ်ဖို့ ၊လုပ်ကြံဖို့အထိပါသ​ဘော​ရောက်​အောင် အန္တရာယ်များလှတဲ့ စကား​တွေကိုပါ အထိန်းအကွပ်မရှိ​ပြောခဲ့ပါတယ် ။

​ဒေါ်​အောင်ဆန်းစုကြည်အသက်ရှင်လျက်ရှိ​ကြောင်း​သက်​သေပြ​ပေးဖို့ လှုပ်ရှားမှု​တွေပိုမိုကြီးမားကျယ်ပြန့်လာတာနဲ့ အမျှ စစ်အုပ်စုက လူထုကို အာရုံ​ပြောင်းဖို့ ကြိုးစားတဲ့ဖြစ်စဥ်​တွေပိုများလာပါတယ် ။

ရန်ကုန်မှာ ပုဏ္ဏကတိုက်ပြီး ပန်းချီကားထဲက ဘီလူးးကအပြင်​ရောက်လာတာ ၊ ​ညောင်ရွက်​တွေ ​ရွှေအိုရောင်​​ပြောင်းကုန်လို့ စစ်တပ်ဝန်ထမ်း​တွေ သွားဖူးခိုင်းတာ ၊ ဘုန်းကြီးက ကိုရင်​လေးကို နှိပ်စက်ညှင်းပန်းတဲ့ ဗီဒီယိုဖိုင် အ​ဟောင်းတင်ပြီး အခုမှ ဖြစ်သလို လုပ် အ​ရေးယူပြတာ​တွေ ၊ စစ်တပ်ထိန်းချုပ်မှု​အောက်က မယ်ပြိုင်ပွဲမှာ မယ်သီလရှင် ဝတ်ရုံဝတ်တယ်ဆိုပြီး အ​ရေးယူ
တာ​တွေ စတဲ့ ဇာတ်လမ်းမျိုးစုံကို တစ်ခုပြီးတစ်ခု
​ပေါ်​နေပါ​တော့တယ် ။ ဒါ​ပေမယ့် စစ်တပ်ထိန်းချုပ်မှု​အောက်က မီဒီယာ​တွေ​ရော၊ စစ်တပ်ဝါဒဖြန့် မီဒီယာ​တွေ​ရောက ​​ဒေါ်​အောင်ဆန်းစုကြည် အသက်ရှင်လျက်ရှိ​ကြောင်းသက်​သေပြဖို့
​တောင်းဆိုတဲ့ လူထုလှုပ်ရှားမှု​တွေ အ​ကြောင်ူကို​တော့ တစ်လုံးမျှ မ​ဖော်ပြကြပါဘူး ။

ရှစ်​လေးလုံး​တော်လှန်​​ရေးက​နေ အခု​နွေဦး​တော်လှန်​ရေးအထိ့ ပြည်သူနဲ့အတူရပ်ခဲ့တဲ့ ​တော်လှန်​ရေးသမားတဦးဖြစ်တဲ့ ဦးမင်းကိုနိုင်ကလည်း
ပြည်သူ​တွေအ​နေနဲ့ စစ်တပ်ရဲ့ဝါဒဖြန့်ချီ​ရေး​တွေကို သတိထားကြဖို့ အာရုံမပြန့်ဖို့ တိုက်တွန်းပါတယ်။ အရင်းအမြစ်​တွေ​ပေါများတဲ့စစ်အုပ်စုက ဝါဒဖြန့်ချီ​ရေးအတွက် ​ငွေ​ကြေးအများကြီးအသုံး
ပြုပြီး ပုံစံမျိုးစုံလုပ်နိုင်တာကိုသူက​​ထောက်
ပြပါတယ် ။

"ပြည်သူတွေရှင်းလင်းနေအောင်လို့ ဒီတော်လှန်ရေးကို
တာဝန်အသီးသီးယူထားတဲ့သူတွေကလည်း ကောင်းစွာရှင်းတဲ့ သတင်းစကားတွေကို ပြောဖို့လိုသလို ပြည်သူလူထုကလည်း ကိုယ်ဘယ်လိုအရာမျိုးကို ‌ရွေးချယ်ယုံကြည်ရမလဲဆိုတာကို တစ်သက်စာ အတွေ့အကြုံတွေနဲ့ရွေးပါ။ ပြီးတော့ နားထောင်ပြီးတော့မှ မိမိဉာဏ်ပညာနဲ့ ပိုင်းခြားပြီးတော့ ဆုံးဖြတ်ပါ။ အတူချီတတ်ကြပါမယ်။ အတူပန်းတိုင်ရောက်အောင်လည်း သွားရမယ်လို့မြင်ပါတယ်ဗျ"လို့ ဦးမင်းကိုနိုင်က တိုက်တွန်းပါတယ် ။

https://youtu.be/pWCZxaydsvw?si=_i3GtRDaEMkjSX3u

ဝက်လက်နယ်အရှေ့ခြမ်း စစ်တပ်လေကြောင်းတိုက်မှု သံဃား ၁ပါးနဲ့ ပြည်သူ ၁ဦး ဒဏ်ရာရ

မေ-၁၃၊ ၂၀၂၆။ ရှိန်း/People's Spring

စစ်ကိုင်းတိုင်း၊ ဝက်လက်မြို့နယ်အရှေ့ခြမ်း နဘဲပင်လှကျေးရွာ ဘုန်းကြီးကျောင်းကို စစ်တပ်က လေကြောင်းတိုက်ခိုက်ခဲ့တာကြောင့် သံဃာ ၁ပါးနဲ့ ပြည်သူ ၁ဦးတို့ ထိခိုက်ဒဏ်ရာတွေ ရခဲ့တယ်လို့ ဒေသခံတွေက ပြောပါတယ်။

ဝက်လက်မြို့နယ်အရှေ့ခြမ်း နဘဲပင်လှကျေးရွာ ဘုန်းကြီးကျောင်းကို စစ်တပ်က ဒီနေ့ မေလ ၁၃ ရက် နေ့လယ် ၁၂နာရီခွဲလောက်မှာ ဂျက်ဖိုက်တာနဲ့ လေကြောင်းတိုက်ခိုက်သွားတာလို့ သိရပါတယ်။

"ဘာမှမရှိဘူး အဲဒီနေရာမှာ။ စစ်ရှောင်လည်း မထားဘူး။ ဒီနေရာက ဘာမှမရှိတဲ့ နေရာကို ဝင်ပစ်သွားတာ"လို့ ဒေသခံတစ်ဦးက ပြောပါတယ်။

လေကြောင်းတိုက်ခိုက်ခံရမှုမှာ ကိုရင်ကြီး ၁ပါးနဲ့ ပြည်သူ ၁ဦး ထိခိုက်ဒဏ်ရာ ရခဲ့တယ်လို့ ဆိုပါတယ်။

အဲဒီကျေးရွာ ဘုန်းကြီးကျောင်းကို စစ်တပ်က ၂၀၂၅ ခုနှစ် ဩဂုတ်လအတွင်းကလည်း လေကြောင်းတိုက်ခိုက်ခဲ့တာကြောင့် သံဃာ ၁ပါးအပါအဝင် ပြည်သူ ၃ဦး ထိခိုက်ဒဏ်ရာရခဲ့ပါသေးတယ်။

ဒီရက်ပိုင်းအတွင်း စစ်တပ်က ဝက်လက်မြို့နယ်နဲ့ ရွှေဘိုမြို့နယ်က ဘုန်းကြီးကျောင်းတွေကို လေကြောင်းတိုက်ခိုက်မှုတွေ ဆက်တိုက်ပြုလုပ်နေပါတယ်။ ရွှေဘိုမြို့နယ် မဲတောရွာကို စစ်တပ်က မေလ ၁၁ ရက်မှာ လေကြောင်းတိုက်ခိုက်ခဲ့တာကြောင့် အမျိုးသမီး၂ဦး အပါအဝင် ပြည်သူ၄ဦး ထိခိုက်ဒဏ်ရာ ရခဲ့ပါတယ်။

အကြမ်းဖက်မှုတွေ ဆက်ရှိနေရင် စစ်တပ်ရွေးကောက်ပွဲကို အာဆီယံအသိအမှတ်ပြုဖို့ ခဲယဥ်းနေမယ်လို့ ဆို

မေ-၁၃၊ ၂၀၂၆။ People’s Spring

စစ်တပ်ရဲ့ အကြမ်းဖက်မှုတွေ ဆက်ရှိနေပြီး အာဆီယံဘုံသဘောတူညီချက် ၅ရပ်ကို အပြည့်အဝ မဖော်ဆောင်သေးရင် စစ်တပ်ရွေးကောက်ပွဲတွေကို အသိအမှတ်ပြုဖို့ ခဲယဥ်းလိမ့်မယ်လို့ အာဆီယံအထူးကိုယ်စားလှယ်က ရန်ကုန်လွှတ်တော်ကို စာပို့ခဲ့ကြောင်း သိရပါတယ်။

၂၀၂၀ အထွေထွေရွေးကောက်ပွဲ အနိုင်ရ လွှတ်တော်ကိုယ်စားလှယ်တွေနဲ့ စုဖွဲ့ထားတဲ့ ရန်ကုန်ဖက်ဒရယ်ယူနစ်လွှတ်တော်က ပြီးခဲ့တဲ့ ဧပြီ ၁ရက်မှာ နိုင်ငံတော်သမ္မတဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပါအဝင် နိုင်ငံရေးအကျဥ်းသားလွတ်မြောက်ရေးအတွက် ကူညီဆောင်ရွက်ပေးဖို့ အာဆီယံအပါအဝင် ကမ္ဘာ့နိုင်ငံခေါင်းဆောင်တွေဆီကို စာရေးသားပေးပို့ တိုက်တွန်းခဲ့တယ်လို့ ဆိုပါတယ်။

မြန်မာနိုင်ငံဆိုင်ရာ အာဆီယံအထူးကိုယ်စားလှယ်၊ ဖိလစ်ပိုင်နိုင်ငံခြားရေးဝန်ကြီး လာဇာရိုရဲ့ အကြောင်းပြန်စာထဲမှာတော့ နိုင်ငံရေးအကျဥ်းသားများ လွတ်မြောက်ရေးဟာ မြန်မာပြည်ရဲ့ ငြိမ်းချမ်းရေးနဲ့ အမျိုးသားပြန်လည်သင့်မြတ်ရေးအတွက် အရေးကြီးတဲ့ ခြေလှမ်းဖြစ်တယ်လို့ ဖော်ပြပါတယ်။ နောက်ပြီး အကြမ်းဖက်မှုလျော့ကျရေး၊ အပြုသဘောဆောင်တဲ့တွေ့ဆုံဆွေးနွေးရေးနဲ့ ကြားဝင်ဖျန်ဖြေရေးတို့ဆီ ဦးတည်တဲ့ တိုးတက်မှုတွေ ဖြစ်လာမှာလည်းဖြစ်တယ်လို့ အာဆီယံအထူးကိုယ်စားလှယ်က ဆိုပါတယ်။

အာဆီယံအလှည့်ကျဥက္ကဋ္ဌအနေနဲ့လည်း မြန်မာနိုင်ငံရဲ့ နိုင်ငံရေးအကျဥ်းသားများလွတ်မြောက်ရေးအတွက် သံတမန်လမ်းကြောင်းတွေကတဆင့်လည်း တစိုက်မတ်မတ်တောင်းဆိုနေတယ်လို့ ရန်ကုန်လွှတ်တော်က ထုတ်ပြန်တဲ့ အထူးကိုယ်စားလှယ်ရဲ့ စာမှာ ပါရှိပါတယ်။

တဖက်မှာလည်း အာဆီယံဟာ ဘုံသဘောတူညီချက် ၅ရပ် အကောင်အထည်ဖော်နိုင်ရေးအတွက် အာဏာသိမ်းစစ်တပ်နဲ့လည်း ထိတွေ့ဆက်ဆံမှု ဆက်ရှိနေမယ့်အကြောင်း အထူးကိုယ်စားလှယ်က အသိပေးပါတယ်။

ဒါပေမဲ့ အကြမ်းဖက်မှုတွေ ဆက်ရှိနေပြီး အာဏာသိမ်းစစ်တပ်က ဘုံသဘောတူညီချက် ၅ရပ်ကို ပြည့်ဝထိရောက်စွာ အကောင်အထည်ဖော်ဖို့ ရှင်းလင်းပြီး အပြုသဘောဆောင်တဲ့ လုပ်ဆောင်မှုတွေ မရှိဘူးဆိုရင် စစ်တပ်ရွေးကောက်ပွဲတွေကို အသိအမှတ်ပြုဖို့ ခဲယဥ်းလိမ့်မယ်လို့ အာဆီယံက ရှုမြင်ကြောင်း အထူးကိုယ်စားလှယ်က ဆိုပါတယ်။ ပြီးခဲ့တဲ့ ဇန်နဝါရီက ဖိလစ်ပိုင်နိုင်ငံ စီဘူးမှာ ပြုလုပ်ခဲ့တဲ့ အာဆီယံနိုင်ငံခြားရေးဝန်ကြီးများ သီးသန့်အစည်းအဝေးမှာ အာဆီယံက စစ်တပ်ရွေးကောက်ပွဲတွေနဲ့ ထွက်ပေါ်လာတဲ့ ရလဒ်တွေကို အသိအမှတ်ပြုဖို့ ဘုံသဘောတူညီချက် မရရှိခဲ့ဘူးလို့ အထူးကိုယ်စားလှယ်က အသိပေးပါတယ်။

အာဆီယံအနေနဲ့ လူထုခေါင်းဆောင်၊ ကမ္ဘာ့ငြိမ်းချမ်းရေးနိုဗယ်ဆုရှင် ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားများလွတ်မြောက်ရေးကို ငြိမ်းချမ်းရေးအတွက် အရေးပါတဲ့ အရွေ့တခု အဖြစ် ရှုမြင်ကြောင်းနဲ့ စစ်အုပ်စုရဲ့ အတုအယောင် ရွေးကောက်ပွဲများအပေါ် အာဆီယံအဖွဲ့အစည်း အတွင်း သဘောတူညီမှုမရှိကြောင်း ရန်ကုန်ဖက်ဒရယ်ယူနစ်လွှတ်တော်ကို အသိပေးပြန်ကြားလာခြင်းက ရန်ကုန်ဖက်ဒရယ်ယူနစ်လွှတ်တော်ရဲ့ သံတမန်ရေးရာ ထိတွေ့ဆက်ဆံခြင်း အောင်မြင်မှုနဲ့ နိုင်ငံ တကာ မျက်နှာစာမှာ ဖက်ဒရယ်ယူနစ်လွှတ်တော်တွေရဲ့ အခန်းကဏ္ဍ မြင့်မားလာမှုကို ပြသနေခြင်းဖြစ်ကြောင်း သတင်းထုတ်ပြန်ပါတယ်။