(မုံရွာမြို့ပေါ်တွင် ပြီးခဲ့သည့် ဇန်နဝါရီအတွင်းက မီးကြိုးများ အခိုးခံရ၍ မီးစက်ဖြင့် ယာယီလျှပ်စစ်မီးပေးရန် ပြင်ဆင်နေစဥ်။ ဓာတ်ပုံ - CJ)

စိတ်ကျန်းမာရေးဆိုင်ရာအထူးကုဆရာဝန်တစ်ဦးကလည်း စိတ်ကျန်းမာရေးအတွက် မိမိကိုယ်ကိုစောင့်ရှောက်နိုင်ရန် အဓိကအခြေခံအကျဆုံးအချက်မှာ Thinking Healthyလို့ခေါ်တဲ့ ကောင်း
မွန်စွာတွေးခေါ်စဥ်းစားပေးမှုပဲဖြစ်တယ်လို့ပြောပါတယ်။

တိုင်းပြည်ရဲ့လက်ရှိအခြေအနေအရ လူတိုင်းကိုယ်စီမှာ အခက်အခဲတွေနဲ့ ကြုံတွေ့နေကြရတယ်လို့ သူကဆက်ပြောပါတယ်။ ဒီလိုအခြေအနေမှာ ကြုံတွေ့နေရတဲ့ပြသနာတွေကိုအခက်အခဲလို့သာ မြင်ယောင်မိပြီး မကျော်လွားနိုင်တော့ဘူးလို့ခံစားရကာ ကိုယ့်ကိုယ်ကို အားမရတာ၊ မကျေနပ်တာ၊ သိမ်ငယ်တာတွေဖြစ်လာရင် နောက်ဆက်တွဲစိတ်ခံစားမှုတွေ မကောင်းမွန်တော့ဘူးလို့ အထက်ပါ စိတ်ကျန်းမာရေးအထူးကုကရှင်းပြပါတယ်။

“အနီးစပ်ဆုံးဆိုရင်ကိုယ့်မိသားစုအပေါ်ဆက်ဆံတာအရင်လိုမဟုတ်တော့ဘူး၊စိတ်မရှည်တော့ဘူး။ကလေးတွေအပေါ်လည်းစိတ်မရှည်ဘူး၊အော်ငေါက်မိတယ်၊ကိုယ်နောက်ထပ်အလုပ်တွေလုပ်ဖို့လည်းခွန်အားမရှိတော့ဘူး”လို့စိတ်ဖိစီးမှုကြောင့်ပြောင်းလဲလာတဲ့အပြုအမှုတချို့ကိုသူကဆက်ရှင်းပြပါတယ်။

ဒီလိုအခြေအနေတွေကို ဖြတ်ကျော်ရမယ့်နည်းလမ်းကိုလည်း “ ဒါကိုကျွန်တော်တို့က ကောင်းမွန်တဲ့ တွေးခေါ်တဲ့ပုံစံနဲ့စဥ်းစားရမှာပေါ့”လို့စိတ်ကျန်းရေးအထူးကုကအကြံပြုပါတယ်။

သာဓကအနေနဲ့လည်း

အလုပ်အကိုင်၊စီးပွားရေးမပြေလည်ရင်လည်း လက်ရှိကာလ နိုင်ငံရေး အခြေအနေတွေအရ လူတိုင်း ကိုယ်စီအခက်အခဲတွေ ရင်ဆိုင်နေကြရတယ်၊ ကိုယ်တစ်ဦးမဟုတ်လို့ တွေးတောပေးတာ။
အရင်ကကိုယ်လုပ်ကိုင်အောင်မြင်မှုတွေကို ပြန်စဥ်းစားပေးတာ၊ နောက်ထပ် အခွင့်အလမ်းတွေ ထပ်ရှာဖွေနိုင်သေးတာ။

အလုပ်အကိုင်၊စီးပွားရေးမပြေလည်သေးချိန်မှာလည်း ကလေးထိန်းတာ၊အိမ်မှု ကိစ္စ ကူညီပေးတာနဲ့ မိသားစုကိုအချိန်ပေးတာ စတာတွေဆောင်ရွက်ပေးခြင်းနဲ့ စိတ်ခွန်အား(motivation)ရရှိနိုင်တယ်လို့ အထက်ပါစိတ်ကျန်းမာရေးအထူးကုက လမ်းညွန်အကြံပေးပါတယ်။

https://www.ludunwayoo.com/feature-mm/2026/05/06/156246/

ပိုပြီးရှင်းလင်း​​အောင် PR သမားတဦးဖြစ်တဲ့ M ရဲ့သုံးသပ်ချက်ကို မျှ​ဝေလိုပါတယ်။

“ PR professional တစ်ယောက်အနေနဲ့ ဒီလိုပွဲတွေကို အားကစားပွဲတစ်ခုတည်းအဖြစ် မမြင်ပါဘူး။ မြန်မာနိုင်ငံရဲ့ လက်ရှိဖြစ်ပွားနေတဲ့ ပဋိပက္ခအခြေအနေ‌​တွေကြားမှာ ဒေသအများအပြားက အရပ်သားပြည်သူတွေဟာ လေကြောင်းတိုက်ခိုက်မှုတွေ၊ အကြမ်းဖက်မှုတွေကြောင့် တကယ်ပဲ အသက်လွတ်ဖို့ ပြေးလွှားနေရတဲ့အချိန်မှာ “run/ပြေးခြင်း”ဆိုတဲ့စကားလုံးကို ထပ်ကာထပ်ကာ ပျော်ရွှင်စရာ အခမ်းအနားသဘောနဲ့ သင်္ကေတပြုအသုံးပြုတာကိုက နိုင်ငံရေးအဓိပ္ပာယ်ဆောင်လာတယ်လို့မြင်ပါတယ်။ စစ်မီးတောက်နေတဲ့ ပကတိအခြေအနေ‌​တွေကို ဖုံးကွယ်ပြီးဒီလိုပွဲမျိုးတွေကို စစ်တပ်နဲ့ နီးစပ်တဲ့ အဖွဲ့အစည်းတွေ၊ မီဒီယာတွေကနေ ပြချင်တဲ့ရှုထောင့်၊ လိုချင်တဲ့ emotion

တွေ‌ရ‌​အောင် ရိုက်ထားတဲ့ပုံတွေနဲ့အကြီးအကျယ် ချဲ့ကားဖော်ပြနေတာဟာ လူထုကျန်းမာရေးအတွက် ရည်ရွယ်တာထက် ‘အခြေအနေတွေ ပုံမှန်ရှိ‌​တေတယ်၊ ငြိမ်းချမ်းနေတယ်၊ ထိန်းချုပ်နိုင်စွမ်းရှိ‌​နေပါတယ်’ လို့ နိုင်ငံတကာကို လှည့်စားတဲ့ ဝါဒဖြန့်မှု Perception Management သာ ဖြစ်ပါတယ်” လို့ သူက​ပြောပါတယ် ။

ဆက်လက်ပြီး​တော့ M က “ PR ရှုထောင့်ကနေ ကြည့်မယ်ဆိုရင် ဒါဟာ အခြေအနေတွေ ပုံမှန်ဖြစ်နေတယ်လို့ ထင်ယောင်ထင်မှားဖြစ်အောင် ဗျူဟာမြောက် ဖန်တီးတဲ့ ‘Strategic Normalcy Messaging’ လို့ပဲ ဆိုရပါမယ်။ Crisis Communications တွေမှာ ပကတိ အခြေအနေတွေက ဘယ်လောက်ပဲ ဆိုးရွားနေပါစေ အများပြည်သူမြင်ကွင်းမှာ positive ဖြစ်တဲ့၊ အဆင်ပြေအေးချမ်းနေတဲ့ပုံရိပ်တွေကို ဖော်ပြခြင်းအားဖြင့် တည်ငြိမ်မှုရှိနေတယ်ဆိုတဲ့ အမြင်မျိုးရအောင် ပုံဖော်လေ့ရှိပါတယ်။ဒါက propaganda communications မှာသိပြီးသားဖြစ်တဲ့ pattern တစ်ခုပါပဲ” လို့​ပြောပါတယ်။

https://www.ludunwayoo.com/opinion-mm/2026/05/11/156779/

စစ်တပ်စစ်ကြောင်း ကျောက်ထုမြို့နဲ့ မိုင်(၂၀)ခန့်အကွာရောက်လာလို့ ဒေသခံ ၅၀၀၀နီးပါး ဘေးလွတ်ရာတိမ်းရှောင်

မေ -၁၂၊၂၀၂၆။ဖိုးသား/People's Spring

မကွေးတိုင်း၊ ပေါက်မြို့နယ်က စစ်တပ်စစ်ကြောင်း ကျောက်ထုမြို့နဲ့ မိုင်(၂၀)ခန့်အကွာ ရောက်လာလို့ ဒေသခံ ၅၀၀၀နီးပါး ဘေးလွတ်ရာတိမ်းရှောင်နေရတယ်လို့ ဒေသခံသတင်းရင်းမြစ်တွေက ပြောပါတယ်။

အင်အား ၃၀၀ ဝန်းကျင်ပါတဲ့ စစ်တပ်စစ်ကြောင်းက အမှတ်(၂၄)ကာကွယ်ရေးပစ္စည်းစက်ရုံ(ကပစ -၂၄)ကတဆင့် ပေါက်-ကျောက်ထုလမ်းပိုင်းပေါ်က ကျေးရွာတွေကို မေလ၁၁ရက်မှာ ဝင်ရောက်လာတာလို့ ဆိုပါတယ်။

"ကျောက်မဲတောင်ရွာ ကျောက်တံခါးရွာ ပုံတောင်ခြေ(ကျောက်ထု နဲ့ ပေါက်မြို့ကြား)မှာ အင်အား ၃၀၀ ခန့် တပ်ဖြန့်ထားတယ်"လို့ ပေါက်မြို့နယ် လူသားစာနာထောက်ထားရေးဌာနတာဝန်ရှိသူက ပြောပါတယ်။

စစ်တပ်စစ်ကြောင်းကြောင့် ကျေးရွာ ၁၁ရွာက ဒေသခံ ၅၀၀၀ နီးပါးဟာ နေရပ်စွန့်ခွာစစ်ဘေးရှောင် စခန်းတွေကနေ ထပ်ဆင့်ဘေးလွတ်ရာ တိမ်းရှောင်နေရတယ်လို့လည်း အသိပေးပါတယ်။

"ကျောက်ထုကို သွားနိုင်ဖို့ ခြေကုပ်ယူတယ် ယူဆရတယ်ခန့်မှန် ၁၅ မိုင် နဲ့ ၂၀ မိုင်ပဲ ဝေးမယ်"လို့ ပေါက်မြို့နယ်သတင်းရင်းမြစ်က ပြောပါတယ်။

ကပစ(၂၄)စစ်ကြောင်းဟာ ဧပြီလနောက်ဆုံးပတ်က မန္တလေးတိုင်း၊ပြင်ဦးလွင်မြို့ကတဆင့် မကွေး တိုင်း ဆိပ်ဖြူမြို့နယ်အခြေစိုက် အမှတ်(၂၂)ကာကွယ်ရေးပစ္စည်းစက်ရုံ(ကပစ-၂၂)ကို ကနဦးဝင်ရောက်ပြီးနောက် ကပစ(၂၄)ကို မေလ ၈ရက်က ရောက်ရှိခဲ့တာလို့ ဆိုပါတယ်။

ဒါ့အပြင် မန္တလေးတိုင်းဘ ကျောက်ပန်းတောင်းမြို့ကနေ နောက်ထပ် အင်အား ၃၀၀ကျော်ပါတဲ့စစ်ယာဥ်တန်းတွေက ဆိပ်ဖြူ ကပစ (၂၂)ကို မနေ့က (မေလ ၁၁ ရက်)က ထပ်ပြီးရောက်လာတယ်လို့ သိရပါတယ်။

ကျောက်ထုမြို့အခြေစိုက် အမြောက်တပ်(အမတ-၃၆၈)ကလည်း ကျောက်ထုနဲ့ မင်းတပ်မြို့ ဆက်သွယ်ရေးလမ်းပိုင်းပေါ်က ကံကြီးရွာမှာ အခြေပြုပြီး အခိုင်အမာစခန်းချနေတယ်လို့ ဒေသခံသတင်းရင်းမြစ်တွေက ပြောထားပါတယ်။

လူဦးရေ ၅၀၀ ဝန်းကျင်ရှိတဲ့ ကံကြီးရွာဟာ မကွေး - ချင်း - ရခိုင် ကုန်လမ်းကြောင်းပေါ်မှာရှိပြီး ကျောက်ထုမြို့နဲ့ (၇)မိုင်ဝန်းကျင် မင်းတပ်မြို့နယ်နဲ့ (၁၀)မိုင်နီးပါးပဲ ကွာဝေးပါတယ်။

"ချင်းတောင်ကို ဦးတည်မယ့်စစ်ရေး စုဖွဲ့ပြင်ဆင်မှု မြင်တယ်။စစ်ကြောင်းကို စောင့်ကြည့်ရမယ်"လို့ စစ်ရေးသတင်းရင်းမြစ်က ပြောပါတယ်။

မြေပြင်စစ်ကြောင်းစုဖွဲ့မှုတွေအပြင် စစ်တပ်က ထီးလင်းမြို့နယ်တောင်ပိုင်းက ဆော (ကျောက်ထု)နယ်နဲ့ မင်းတပ်မြို့နယ်ကို မကြာခဏ လေကြောင်းတိုက်ခိုက်မှုတွေ လုပ်နေပါတယ်။

ရွှေဘိုနယ် အနောက်ခြမ်း စစ်တပ် လေ‌ကြောင်းတိုက်မှု ပြည်သူ ၄ဦး ဒဏ်ရာရ

မေ-၁၂၊ ၂၀၂၆။ ရှိန်း/People's Spring

စစ်ကိုင်းတိုင်း၊ ရွှေဘိုမြို့နယ်အနောက်ခြမ်း မဲတောရွာကို စစ်တပ်က လေကြောင်းတိုက်ခိုက်ခဲ့တာကြောင့် အမျိုးသမီး၂ဦး အပါအဝင် ပြည်သူ ၄ဦး ထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။

မေလ ၁၁ ရက် မနေ့က ညပိုင်း ၉နာရီခွဲခန့်မှာ မန္တလေးတံတားဦး လေတပ်ကနေ တက်လာတဲ့ ဂျက်ဖိုက်တာနဲ့ မဲတောရွာဘုန်းကြီးကျောင်းကို လေကြောင်းတိုက်ခိုက်ခဲ့တာလို့ သိရပါတယ်။

"စစ်ရေး ပစ်မှတ်မဟုတ်ဘဲ စစ်ရှောင်တွေရှိမယ်ထင်တဲ့ ဘုန်းကြီးကျောင်းကို ကြဲတာ။ ဘုန်းကြီးကျောင်းဘေးက နေအိမ်တွေက ပြည်သူတွေထိတာ"လို့ ဒေသခံတစ်ဦးက ပြောပါတယ်။

လေကြောင်းတိုက်ခိုက်ခံရမှုမှာ ဒေသခံ လူလတ်ပိုင်း အမျိုးသမီး၂ဦးနဲ့ အမျိုးသား၂ဦးတို့ ထိခိုက် ဒဏ်ရာရခဲ့တယ်လို့ သိရပါတယ်။

စစ်တပ်က လေကြောင်းကနေ ဗုံး ၃လုံး ကြဲချခဲ့ပြီး စာသင်ကျောင်းနဲ့ ဘုန်းကြီးကျောင်းဆောင်တချို့လည်း ဗုံးစထိမှန်ပျက်စီခဲ့တယ်လို့ ဒေသခံက ပြောပါတယ်။

စစ်တပ်က ရွှေဘိုမြို့နယ်အနောက်ခြမ်းကို ဧပြီလကစတင်ကာ လေကြောင်းတိုက်မှုတွေ ဆက်တိုက်ပြုလုပ်နေခဲ့ပြီး ဦးဇင်း၂ပါးနဲ့ ကိုယ်ဝန်သည်မိခင်အပါအဝင် ပြည်သူ ၅ဦးထပ်မနည်း သေဆုံးခဲ့တယ်လို့ သိရပါတယ်။

ငြိမ်းချမ်းရေးဆွေးနွေးဖို့ဖိတ်ခေါ်တဲ့ ရက် ၁၀၀ ကာလအတွင်း စစ်တပ်က KNUတပ်မဟာ ၃နယ်မြေကို အင်အားဖြည့်စစ်ကြောင်းထိုး

မေ -၁၂၊၂၀၂၆။နော်/People's Spring

တိုင်းရင်းသားလက်နက်ကိုင်အဖွဲ့အစည်းတွေကို ရက် ၁၀၀အတွင်း ငြိမ်းချမ်းရေးဆွေးနွေးဖို့ ဖိတ်ခေါ်နေတဲ့ စစ်တပ်က တစ်ဖက်မှာ ကရင်အမျိုးသားအစည်းအရုံး KNU တပ်မဟာ ၃ နယ်မြေကို စစ်အင်အား ရာကျော် ဖြည့်တင်းပြီး စစ်ကြောင်းထိုးတာတွေ လုပ်ဆောင်နေတယ်လို့ ဒေသခံတွေက ပြောပါတယ်။

မနေ့ မေလ ၁၁ရက်ကစပြီး ပဲခူးတိုင်း၊ ပဲနွယ်ကုန်း - နတ်သံကွင်း - ကျောက်ကြီး ကားလမ်းပိုင်းအတိုင်း စစ်တပ်က အင်အားရာကျော် ဖြည့်တင်းပြီး စစ်ကြောင်းထိုးတာတွေ လုပ်ဆောင်နေတာလည်းဖြစ်ပါတယ်။

" မနေ့က စစ်ကား သုံးဆယ်ကျော်တယ်တက်သွားတာ။ လမ်းဘေးက ရွာတွေကို ဝင်တာလည်းရှိတယ်။ အဓိကကတော့ ကျောက်ကြီး ကားလမ်းပိုင်းကို နယ်မြေရှင်းပြီး အင်အားဖြည့်တာပေါ့ "လို့ ဒေသခံတစ်ဦးက ပြောပါတယ်။

KNU တပ်မဟာ ၃နယ်မြေအတွင်းက ပဲနွယ်ကုန်း - နတ်သံကွင်း - ကျောက်ကြီးလမ်းပိုင်းဟာ စစ်တပ်အတွက် စစ်ဆင်ရေးလမ်းကြောင်းဖြစ်တဲ့အပြင် စစ်ရေးအရ အရေးပါတဲ့ လမ်းတစ်ခုလည်းဖြစ်ပါတယ်။

ပဲနွယ်ကုန်းနဲ့ ကျောက်ကြီးဟာ မိုင်(၂၀) လောက်သာဝေးကွာပြီး အဲ့ဒီမြို့နှစ်မြို့ရဲ့ အလယ် မှာ နတ်သံကွင်းမြို့ ရှိပါတယ်။

နတ်သံကွင်းမြို့ဟာ စစ်တောင်းမြစ်အရှေ့ဘက်နဲ့ အနောက်ဘက်ခြမ်းကို ပေါင်းကူးပေးတဲ့ စစ်တောင်းမြစ်ကူးတံတား (သို့မဟုတ်) နတ်သံကွင်းတံတားရှိပြီး စစ်ရေးအရ ဗျူဟာကျတဲ့ မြို့လည်းဖြစ်ပါတယ်။

အဲ့ဒီ စစ်တောင်းတံတားထိပ်မှာလည်း စစ်တပ်က အထိုင်ချတပ်စွဲထားပြီး စစ်တောင်းမြစ်အနီးဝန်းကျင်က ကျေးရွာတွေကို လက်နက်ကြီး ပစ်ခတ်တာတွေကို လုပ်ဆောင်နေတာလည်းဖြစ်ပါတယ်။

စစ်တပ်က နတ်သံကွင်း နဲ့ ကျောက်ကြီးမြို့မှာကျန်ရှိနေတဲ့ တပ်စခန်းတွေအပါအဝင် ရှေ့တန်းတပ်စခန်းတွေဆီကို လက်နက်၊ ရိက္ခာနဲ့ လူအင်အားဖြည့်တင်းဖို့ ပဲနွယ်ကုန်း - နတ်သံကွင်း - ကျောက်ကြီးလမ်းပိုင်းကို အဓိကထား အသုံးပြုနေတာလည်းဖြစ်ပါတယ်။

" ပဲနွယ်ကုန်း အထွက်ကျော်တာနဲ့ အဲ့ဒီလမ်းကနေ မသွားခိုင်းတော့ဘူး ။ သူတို့ ( စစ်တပ် )ကပဲ သုံးတာ ပြည်သူတွေကို ပေးမသုံးဘူး "လို့ ဒေသခံတစ်ဦးက ပြောပါတယ်။

ကရင်အမျိုးသားအစည်းအရုံး KNU တပ်မဟာ ၃ နယ်မြေဖြစ်တဲ့ ညောင်လေးပင်ခရိုင်အတွင်းမှာ ရွှေကျင်၊ ကျောက်ကြီးနဲ့ မုန်းမြို့နယ်တို့ ပါဝင်ပါတယ်။

ပြီးခဲ့တဲ့ မတ်လ ၅ရက်မှာလည်း ညောင်လေးပင် မြို့နယ်အတွင်းက ရေတွင်းကုန်း၊ ခရုကုန်းနဲ့ ကျောင်းကုန်းရွာ​တွေကို စစ်တပ်ရဲ့တပ်မ(၇၇)ဦးဆောင်တဲ့ အင်အား (၁၀၀) ပါ စစ်ကြောင်း​လေး​ကြောင်းက​ဝင်ရောက်လာပြီး ပြည်သူ ၃၀၀ ​ကျော်ကိုဖမ်းဆီးပြီး​တော့ ၄၀ ​ကျော်ကိုသတ်ဖြတ်ခဲ့ပါတယ်။

(ကျောက်ကြီးမြို့နယ်အတွင်း စစ်တပ် အင်အားဖြည့်တင်းမှုများလုပ်ဆောင်နေစဥ်။ ပုံအဟောင်း ။ဓာတ်ပုံ - ပေးပို့)

စစ်တပ်ကို တာဝန်ခံမှုရှိစေမယ့် ခိုင်မာတဲ့ ယန္တရားများ ချမှတ်ပေးဖို့ အာဆီယံကို NUG တိုက်တွန်း

မေ-၁၂၊ ၂၀၂၆။ People’s Spring

အာဆီယံက အာဏာသိမ်းစစ်တပ်ကို တာဝန်ခံမှုရှိစေမယ့် ခိုင်မာတဲ့ ယန္တရားများ ချမှတ်ပေးဖို့ အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီးဌာနက ဒီနေ့ ထုတ်ပြန်တိုက်တွန်းပါတယ်။

ဖိလစ်ပိုင်နိုင်ငံ စီဘူးမှာ ကျင်းပပြီးစီးခဲ့တဲ့ အာဆီယံဥက္ကဋ္ဌရဲ့ (၄၈) ကြိမ်မြောက် အာဆီယံထိပ်သီးအစည်းအဝေးဆိုင်ရာ ထုတ်ပြန်ချက်နဲ့ အာဆီယံ ဘုံသဘောတူညီချက် ၅ ရပ် အကောင်အထည်ဖော်ဆောင်မှုတို့နဲ့ပတ်သက်လို့ NUG နိုင်ငံခြားရေးက သဘောထားထုတ်ပြန်ခဲ့ရာမှာ ဖော်ပြထားတာပါ။

ခွဲခြားမှုမရှိအကြမ်းဖက်နေမှုတွေကို ချက်ချင်းရပ်တန့်ဖို့နဲ့ အစွမ်းကုန် ထိန်းသိမ်းလုပ်ဆောင်သွားကြဖို့ ထိပ်သီးအစည်းအဝေးက သက်ဆိုင်ရာအဖွဲ့အစည်းအားလုံးကို တိုက်တွန်းချက်အပေါ် NUG က ကြိုဆိုတယ်လို့ ဆိုပါတယ်။ ဒါပေမဲ့ ရှုတ်ချပြစ်တင်ပြောဆိုမှုတွေဟာ တာဝန်ခံမှုရှိစေမယ့် ခိုင်မာတဲ့ ယန္တရားများ တွဲဖက်ပါဝင်ရမှာဖြစ်တယ်လို့ တိုက်တွန်းပါတယ်။

အရပ်သားပြည်သူများနဲ့ အရပ်ဘက်အခြေခံအဆောက်အဦများအပေါ် လေကြောင်းတိုက်ခိုက်မှုများ၊ လက်နက်ကြီးပစ်ခတ်မှုများနဲ့ အခြားသော ခွဲခြားမှုမရှိ အကြမ်းဖက်နေမှုများ ရပ်တန့်စေဖို့အတွက် အာဆီယံအနေနဲ့ ရှင်းလင်းပြတ်သားတဲ့၊ အချိန်ကာလ သတ်မှတ်ချက် တိကျစွာပါဝင်တဲ့ စံသတ်မှတ်ချက်များကို ချမှတ်ဖို့ ဆက်လက်တိုက်တွန်းပါတယ်။

အာဆီယံအနေနဲ့ အဲဒီလိုယန္တရားများမချမှတ်ပါက အရပ်သားပြည်သူများကို ကာကွယ်စောင့်ရှောက်ပေးရေး တောင်းဆိုချက်မှာ လက်တွေ့မကျဘဲ ဆန္ဒသက်သက်သာ ဖြစ်နေလိမ့်မယ်လို့ NUG နိုင်ငံခြားရေးက ဖော်ပြပါတယ်။

ဒါ့အပြင် မြန်မာနိုင်ငံအတွင်း ပဋိပက္ခများ ဆက်လက် အရှိန်မြင့်တက်လာမှုနဲ့ လူသားချင်းစာနာထောက်ထားမှုဆိုင်ရာ အခြေအနေများအပေါ် ထိပ်သီးအစည်းအဝေးရဲ့ စိုးရိမ်ပူပန်ကြောင်းဖော်ပြချက်နဲ့ အရပ်သားများအပေါ် အကြမ်းဖက်မှုများကို ရှုတ်ချချက်များကို NUGက ကြိုဆိုပါတယ်။

နိုင်ငံရေးအကျပ်အတည်းကို ဖြေရှင်းရာမှာ အာဆီယံဘုံသဘော တူညီချက် ၅ ရပ်က အဓိကမူဘောင်အဖြစ် ဆက်လက်တည်ရှိလျက်ရှိကြောင်း ထိပ်သီးအစည်းအဝေးရဲ့ ထပ်လောင်း အတည်ပြုချက်ကို ထောက်ခံပြီး အဲဒီမူဘောင်ကို စစ်မှန်ပြည့်ဝစွာ အကောင်အထည် ဖော်ဆောင်နိုင်ရေးအတွက် NUG က ဆက်လက် ကတိကဝတ်ပြုကြောင်းလည်း ထပ်လောင်း အတည်ပြုပါတယ်။

NUGဟာ အာဆီယံဥက္ကဋ္ဌရဲ့ မြန်မာနိုင်ငံဆိုင်ရာ အထူးကိုယ်စားလှယ်၊ ဖိလစ်ပိုင်နိုင်ငံခြားရေးဝန်ကြီး မစ္စစ်လာဇာရိုရဲ့ ကြိုးပမ်းဆောင်ရွက်မှုများကို ချီးကျူးအသိအမှတ်ပြုပြီး မြန်မာနိုင်ငံရှိ သက်ဆိုင်သည့်အစုအဖွဲ့များနဲ့ ကျယ်ပြန့်စွာ ထိတွေ့ဆက်ဆံနေမှုကို ကြိုဆိုကြောင်း ဖော်ပြပါတယ်။ မြန်မာနိုင်ငံဆိုင်ရာ အာဆီယံအထူးကိုယ်စားလှယ်ကို ရေရှည်တာဝန်ပေးအပ်ရေးအတွက် လုပ်ငန်း တာဝန်သတ်မှတ်ချက်များနဲ့ပတ်သက်လို့ ဆွေးနွေးညှိနှိုင်းနေမှုများကိုလည်း ထောက်ခံကြောင်း ဖော်ပြပါတယ်။

အဲဒီလို လုပ်ပိုင်ခွင့်သတ်မှတ်ချက်တွေနဲ့ပတ်သက်လို့ နိုင်ငံရေးလုပ်ငန်းစဉ်များမှာ NUG၊ တိုင်းရင်းသားတော်လှန်ရေးအဖွဲ့တွေကို တရားဝင်သက်ဆိုင်သူ အစုအဖွဲ့များအဖြစ် အသိအမှတ်ပြုကာ တရားဝင် စနစ်တကျ ထိတွေ့ဆက်ဆံရေးကိုလည်း အတိအလင်း ထည့်သွင်းဖို့ အလေးအနက်တိုက်တွန်းပါတယ်။

နောက်ပြီး နိုင်ငံရေးအကျဉ်းသားအချို့လွှတ်ပေးမှုအပေါ် အာဆီယံရဲ့ မှတ်သားချက်ကို အသိအမှတ်ပြုပေမယ့် အဲဒီ ဆောင်ရွက်ချက်တွေဟာ လုံးဝ လုံလောက်မှု မရှိသေးကြောင်းနဲ့ လက်ရှိအချိန်မှာ နိုင်ငံရေး အကျဉ်းသား ထောင်ပေါင်းများစွာတို့မှာ မတရားသဖြင့် ဆက်လက်ထိန်းသိမ်းခံထားရဆဲဖြစ်ကြောင်း ဖော်ပြပါတယ်။

ယုံကြည်စိတ်ချရပြီး အားလုံးပါဝင်နိုင်တဲ့ နိုင်ငံရေးဆွေးနွေးပွဲများ ဖြစ်ပေါ်လာဖို့အတွက် နိုင်ငံရေး အကျဉ်းသားအားလုံးကို ချက်ချင်းနဲ့ ခြွင်းချက်မရှိ လွှတ်ပေးဖို့ မဖြစ်မနေ လိုအပ်ကြောင်း NUG နိုင်ငံခြားရေးဝန်ကြီးဌာနက ထုတ်ပြန်ပါတယ်။

(၄၈ကြိမ်မြောက်အာဆီယံထိပ်သီးညီလာခံကို ဖိလစ်ပိုင် စီဘူးမှာ ကျင်းပခဲ့စဥ်။ ဓာတ်ပုံ - ASEAN)

ထီးချိုင့် - ကသာလမ်းပိုင်းမှာ စစ်တပ်ယာဉ်တန်းတိုက်ခံရပြီး စစ်သား၆ဦး သေ၊ လက်နက်နဲ့ ပစ္စည်းတွေ သိမ်းရ

မေ-၁၂၊၂၀၂၆၊ရှိန်း/People's Spring

စစ်ကိုင်းတိုင်းအထက်ပိုင်း၊ ထီးချိုင့် - ကသာလမ်းပိုင်းမှာ စစ်တပ်ရိက္ခာပို့ယာဉ်တန်း နှစ်ကြိမ်တိုက်ခိုက်ခံခဲ့ရပြီး စစ်သား ၆ဦးသေဆုံးကာ လက်နက် ၆လက်နဲ့ ပစ္စည်းအချို့သိမ်းရခဲ့တယ်လို့ စစ်ရေးသတင်းအရင်းမြစ် တွေက ပြောပါတယ်။

ထီးချိုင့်မြို့ကနေ ကသာမြို့ထွက်လာတဲ့ စစ်တပ်ရိက္ခာပို့ယာဉ်တန်းကို မေလ၁၀ရက် ည၈နာရီကျော်မှာ ပြည်သူ့ကာကွယ်ရေးတပ်မတော် PDFနဲ့ မဟာမိတ်တော်လှန်ရေးတပ်တွေစုပေါင်းပြီး ကြားဖြတ်တိုက်ခိုက်ခဲ့တယ်လို့ သိရပါတယ်။

စစ်တပ်က စစ်ကား၂စီး ပျက်စီးပြီး မိနစ် ၄၀ခန့် တိုက်ပွဲဖြစ်ခဲ့တယ်လို့ သိရပါတယ်။ အဲဒီနောက် တော်လှန်ရေးတပ်တွေ အထိခိုက်မရှိပြန်လည်ဆုတ်ခွာနိုင်ခဲ့‌‌တယ်လို့ တော်လှန်ရေးသတင်းအရင်းမြစ်တဉီးက ပြောပါတယ်။

"မြစ်ရိုးနား တလျှောက်မှာ တိုက်ပွဲဖြစ်တာပါ။စစ်တပ်ကရင်ကွဲတောင်ဘက်ကနေ ကသာကိုတက်ဖို့လုပ်တာ။ကသာနဲ့ထီးချိုင့် အသွားအလာလုပ် နေတဲ့ယာဉ်တန်း ပေါ့"လို့ တော်လှန်ရေးတပ်ဖွဲ့ဝင်တစ်ဦးက ပြောပါတယ်။

မေလ ၁၁ရက်မှာလည်း အဲဒီလမ်းပိုင်းမှာ စစ်တပ်ယာဉ်တန်းက ကားတွေပြုပြင် နေတဲ့အချိန် တော်လှန်ရေး ပူးပေါင်းတပ်တွေကပြန်လည် ဝင်ရောက်တိုက်ခဲ့တယ်လို့ သိရပါတယ်။

အဲဒီတိုက်ပွဲမှာ စစ်သား ၆ဦး သေဆုံးပြီး စတားလင့်စက်တွေတခြားပစ္စည်း‌တွေအပါအဝင် လက်နက်၆လက် သိမ်းယူနိုင်ခဲ့တယ်လို့ သိရပါတယ်။

စစ်တပ်က မေလ၉ရက်မှာ မန္တလေးမြို့က Non-CDM ဝန်ထမ်းတွေအပါအဝင် စစ်သား၊လက်နက်ခဲယမ်းပါတဲ့ ကားတွေဟာ ပြည်သူပိုင်ကား တွေကိုပါ ချောဆွဲပြီး စစ်ကားအစီးရေ ၄၀၀ကျော်ပါတဲ့ စစ်တပ်ယာဉ်တန်းနဲ့ မော်လူး၊အင်းတော်မြို့တို့မှာ အုပ်ချုပ်ရေးယန္တရားလည်ပတ်ဖို့ကြိုးစားနေပြီး ဒီကနေ့မှာ ယာဉ်တန်းတချို့အင်းတော်မြို့ကို ရောက်တယ်လို့ သိရပါတယ်။

(စစ်တပ်အာဏာသိမ်းပြီးနောက် စစ်ကားတစ်စီးကို တော်လှန်ရေးတပ်တွေက တိုက်ခိုက်အပြီး မီးလောင်နေတာကို တွေ့ရစဉ်။ ဓာတ်ပုံ - Maung Saungkha/FB)

စစ်ကိုင်းမှာ တစ်ရက်တည်း လူ ၁၅၀နီးပါး ပေါ်တာဆွဲခံရ

မေ ၁၂၊ ၂၀၂၆။ဟာနာဆန်/People's Spring

စစ်ကိုင်းမြို့မှာ မနေ့က မေလ ၁၁ရက်တစ်ရက်တည်း လူ ၁၅၀နီးပါး စစ်တပ်ရဲ့ ဖမ်းဆီးပေါ်တာဆွဲခံရကြောင်း ဒေသခံတွေက ပြောပါတယ်။

မေလ ၁၁ ရက်က စစ်ကိုင်းမြို့ပေါ်မှာ စစ်တပ်က လိုက်လံ ပေါ်တာဆွဲခဲ့ရာ တစ်ရက်တည်း လူတစ်ရာကျော် ဖမ်းဆီးခံလိုက်ရတယ်လို့ မြို့ခံတွေကပြောပါတယ်။

"အကုန်ပတ်ဆွဲနေတာ။ မြို့ထဲတွေ။ တစ်ပတ်လောက်တောင် ရှိနေပြီ"လို့ စစ်ကိုင်းမြို့ခံတစ်ဦးက ပြောပါတယ်။

စစ်တပ်ဟာ စစ်ကိုင်းမြို့ပေါ်နေရာတွေဖြစ်တဲ့ မြို့မဈေးထောင့်၊ မြောက်ဘော်ဂါကျောက်ဝိုင်း၊ နန္ဒဝန်ရပ်၊ ပန်းဘဲတန်းရပ်၊ မင်းလမ်းရပ်၊ တကောင်းရပ်၊ စိန်ကုန်းရပ်၊ မြစ်ဆိပ်နဲ့ ကိုးပေတံတားစတဲ့နေရာတွေမှာ ပေါ်တာပတ်ဆွဲခဲ့တာဖြစ်ပြီး လူပေါင်း ၁၅၀ နီးပါး အဆွဲခံရတယ်လို့ စစ်ကိုင်းမြေပြင်ကင်းထောက်အဖွဲ့ဖြစ်တဲ့ Ground Press အဖွဲ့တာဝန်ရှိသူက ပြောပါတယ်။

ပေါ်တာဆွဲခံလိုက်ရတဲ့ သူတွေထဲက စစ်ကိုင်းတိုင်းဒေသခံကလွဲလို့ အခြားဒေသခံတွေဆိုရင် ကျပ်သိန်း ၂၀၀နဲ့ ပြန်ရွေးခိုင်းတယ်လို့ တဲ့ Ground Press အဖွဲ့တာဝန်ရှိသူက ပြောပါတယ်။

"၅/ တွေဆို ငွေနဲ့ ရွေးလို့မရပေမဲ့ ကျန်တဲ့မျဥ်းစောင်းတွေနဲ့ ခရီးသွားတွေဆို ကျပ်သိန်း ၂၀၀ နဲ့ ရွေးပြီးမှ ပြန်လွှတ်ပေးတာလို့ စစ်တပ်နဲ့ နီးစပ်သူ တစ်ဦးထံမှ သိရပါတယ်။"လို့ Ground Press အဖွဲ့တာဝန်ရှိသူက ပြောပါတယ်။

စစ်ကိုင်းမြို့ရဲ့တဘက်ကမ်း မန္တလေးမြို့ဘက်ခြမ်းတွေမှာလည်း စစ်တပ်က ပေါ်တာဆွဲနေပြီး လူမှုကူညီရေးအသင်းဝင်တွေကအစ ပေါ်တာဆွဲခံနေရတယ်လို့ သိရပါတယ်။

စစ်တပ်ဟာ ပြီးခဲ့တဲ့ ဧပြီလကုန်ပိုင်းမှာ စစ်မှုထမ်းအပတ်စဥ် (၂၄)ကို စတင်နေပြီဖြစ်ပါတယ်။

(စစ်ကိုင်းမြို့အဝင်တွင် စစ်ဆေးနေသော စစ်ကောင်စီတပ်ဖွဲ့ဝင်များအား တွေ့ရစဥ်။ ဓါတ်ပုံ-စကစ)

ကျောက်မဲမှာ ၁၀၂၇ စစ်ဆင်ရေးကာလ စစ်ကျန်လက်နက်ပေါက်ကွဲပြီး ဒေသခံတစ်ဦး သေဆုံး

မေ-၁၂၊၂၀၂၆။ဇော်ရမ်း/People's Spring

ရှမ်းပြည်နယ်မြောက်ပိုင်း၊ ကျောက်မဲမြို့နယ်မှာ ၁၀၂၇ စစ်ဆင်ရေးကာလက ကျန်ခဲ့တဲ့ စစ်ကျန်လက်နက်ပေါက်ကွဲပြီး ဒေသခံအမျိုးသားတစ်ဦး သေဆုံးခဲ့ရပါတယ်။

ဒီနေ့ မေလ ၁၂ ရက်နေ့မနက်ပိုင်းမှာ ကျောက်မဲမြို့နယ်၊ပန်ဟိုက်ကျေးရွာအတွင်းမှာ RPG ကျည်တစ်လုံးပေါက်ကွဲမှုကြောင့် အသက် (၃၃)နှစ်အရွယ် စိုင်းထွန်းဟန်ဆိုသူ သေဆုံးသွားတာဖြစ်ပါတယ်။

"တောစပ်ကနေ ကောက်ရလာတာ။ RPG အဆံက တော်တော်သစ်သေးတယ်။ သတိပေးတဲ့ကြားထဲကနေ သူကယူသွားတာ။သူ့လက်ထဲမှာတင်ပေါက်ကွဲတာ"လို့ ဒေသခံတစ်ဦးကပြောပါတယ်။

ကျောက်မဲမြို့ဟာ ၂၀၂၃ အောက်တိုဘာ၂၇ရက်ကစတင်ခဲ့တဲ့ ၁၀၂၇ စစ်ဆင်ရေးနဲ့အတူ တအာင်းအမျိုးသားလွတ်မြောက်ရေးတပ်မတော်((TNLA)ကသိမ်းယူခဲ့ပြီး ‌၂၀၂၅ အောက်တိုဘာမှာ စစ်တပ်ကပြန်လည်ထိန်းချုပ်သွားတာ ဖြစ်ပါတယ်။

လက်တလောကျောက်မဲမြို့မှာ စစ်တပ်အုပ်ချုပ်ရေး ယန္တရားအအပြည့်အစုံလည်ပတ်နိုင်ခြင်းမရှိသေးသလို စစ်ကျန်လက်နက်တွေဖျက်သိမ်းရေးကိုလည်း လုပ်ဆောင်ခြင်းမရှိသေးဘူးလို့ ဒေသခံတွေက ပြောပါတယ်။

၁၀၂၇ စစ်ဆင်ရေးနဲ့အတူ TNLA)ကသိမ်းယူခဲ့ပြီး စစ်တပ်ကပြန်လည်ထိန်းချုပ်သွားတဲ့ ရှမ်းပြည်နယ် မြောက်ပိုင်းသီပေါမြို့မှာလည်း စစ်ကျန်လက်နက်ပေါက်ကွဲမှုကြောင့် အရပ်သာထိခိုက်သေဆုံးမှုမကြာခဏဖြစ်ပွားနေပါတယ်။

(၂၀၂၄ ဇူလိုင် ၃ရက်က ကျောက်မဲမြို့အနီးမှာ လက်နက်ကြီးပစ်ခတ်ဖို့ ပြင်ဆင်နေတဲ့ TNLA တပ်ဖွဲ့ဝင်နှစ်ဦး။ ဓာတ်ပုံ-AFP)

ရွှေကူနဲ့ မဘိမ်းမြို့ကြားမှာ တိုက်ပွဲဖြစ်နေ

မေ-၁၂၊၂၀၂၆။ဇော်ရမ်း/People's Spring

ရွှေကူနဲ့ မဘိမ်းမြို့နယ်ကြားမှာ ကချင်လွတ်လပ်ရေးတပ်မတော် (KIA)ပူးပေါင်းတပ်တွေနဲ့ စစ်တပ်တိုက်ပွဲတွေဖြစ်နေတယ်လို့ ဒေသခံတွေ ပြောပြီး စစ်တပ်က လက်နက်ကြီးနဲ့ပစ်သလို ဒရုန်းနဲ့ကင်းထောက်တာတွေလည်း ရှိနေတယ်လို့ KIA ပြောရေးဆိုခွင့်ရှိသူ ဗိုလ်မှူးကြီးနော်ဘူကပြောပါတယ်။

ခလရ(၁၂၁)တပ်ရင်းတပ်စွဲထားတဲ့ ငါးအိုးကျေးရွာကနေ စစ်တပ်စစ်ကြောင်းဝင်လာလို့ KIA၊PDFနဲ့ ကျောင်းသားတပ်မတော် ABSDFနဲ့ ပူးပေါင်းတပ်တွေက တိုက်ခိုက်နေတာလို့ ဒေသခံတွေက ပြောပါတယ်။

" စစ်ကြောင်းမှာက အင်အားများပြီး အဲ့ဒါကို ဖြတ်တိုက်နေတာပါ။ တိုက်ပွဲက မနေ့က ဖြစ်ပြီး ဒီနေ့လည်း တော်တော်လေး သတိနဲ့နေနေကြရတယ်။ စစ်တပ်စစ်ကြောင်းဝင်လာမှာကို စိုးရိမ်နေရတယ်။ အရပ်သားတွေကကြောက်နေတာ"လို့ ရွှေကူမြို့ခံတစ်ဦးက ပြောပါတယ်။

လက်ရှိစစ်ရေးအခြေအနေဟာ မြေပြင်တိုက်ပွဲထက် စစ်တပ်က လက်နက်ကြီးနဲ့ပစ်သလို ဒရုန်းနဲ့ကင်းထောက်နေတယ်လို့ ဗိုလ်မှူးကြီးနော်ဘူက ဒီနေ့ မေလ ၁၂ရက် ညနေမှာ ပြောပါတယ်။

ငါးအိုးကျေးရွာအနီး ၅လမ်းဆုံမှာ ပြီးခဲ့တဲ့ ဧပြီလကုန်၊ မေလဆန်းမှာ ခလရ(၁၂၁)တပ်ရင်းကထွက်လာတဲ့ စစ်ကြောင်းကို တိုက်ခိုက်ခဲ့တာရှိတယ်လို့ ဆိုပါတယ်။

" အဲ့ဒီစစ်ကြောင်းကတော့ ပြန်ဆုတ်သွားတယ်။ မနေ့ကတော့ လက်နက်ကြီးတွေ ပစ်ခတ်တာရှိတယ်။ ဒေသခံတွေအနေနဲ့ကတော့ စစ်ရေးကို သတိရှိနေဖို့ လိုပါတယ်"လို့ ဗိုလ်မှူးကြီးနော်ဘူက ပြောပါတယ်။

မဘိမ်းမြို့ဟာ ရှမ်းပြည်နယ်က မိုးမိတ်၊ ကချင်ပြည်နယ်ထဲက ရွှေကူ၊ စစ်ကိုင်းတိုင်းက ကသာမြို့နယ်နဲ့လည်း ဆက်စပ်နေပါတယ်။

မဘိမ်းမြို့ကို KIA၊PDFနဲ့ ABSDFနဲ့ ပူးပေါင်းတပ်တွေက ၂၀ ၂၄ ဇန်နဝါရီက သိမ်းယူခဲ့ပြီး အခုအခါ စစ်တပ်က စစ်ကြောင်းထိုးဖို့ ကြိုးစားနေတာပါ။

" မဘိမ်းမြို့နယ်က ငါးအိုးဘက်ခြမ်းမှာ ဖြစ်နေတာ။စစ်တပ်က မဘိမ်းဘက်ကို စစ်ကြောင်းထိုးမယ်လို့ သတင်းလွှင့်ခဲ့တာသင်္ကြန်ကတည်းကပဲ။ မနေ့ကတော့ လက်နက်ကြီး အပြန်အလှန်ပစ် နေတဲ့ အသံတွေ ကြားရပါတယ်"လို့ ဒေသခံ တစ်ဦးက ပြောပါတယ်။

မဘိိမ်းမြို့နယ်အတွင်းမှာ တိုက်ပွဲတွေဖြစ်လာနိုင်တာကြောင့် ဒေသခံပြည်သူတွေ ရှောင်တိမ်းကြဖို့ KIA မေလဆန်းမှာ သတိပေးထားပါတယ်။

စစ်တပ်က ဧပြီ ၂၃ရက် ညမှာ အရေးပေါ်အခြေအနေကြေညာလိုက်တဲ့ မြို့နယ်တွေအနက်ကချင်ပြည်နယ်မှာ KIAထိန်းချုပ်ထားတဲ့ ဆွမ်ပရာဘွမ်၊ အင်ဂျန်းယန်၊ ဆော့လော်၊ဘချီဖွေမြို့နယ်တို့နဲ့အတူ ရွှေကူမြို့နယ်လည်းပါဝင်နေပါတယ်။ ဒါကြောင့် စစ်တပ်က လေကြောင်းတိုက်ခိုက်မှုတွေလုပ်လာနိုင်တာကို သတိပြုဖို့လိုတယ်လို့ KIAက သတိပေးထားပါတယ်။