ဒါအပြင် စစ်တပ်အာဏာသိမ်းပြီး​နောက်ပိုင်းတရုတ်နိုင်ငံက ရာဇဝတ်ဂိုဏ်း​တွေအများကြီးဝင်လာပြီး အွန်လိုင်​ငွေလိမ်လုပ်ငန်း(ကျားဖြန့်)
လုပ်ကိုင်မှုအများဆုံးနိုင်ငံတစ်ခုလည်းဖြစ်လာပါတယ်။စစ်တပ်တဲ့တရုတ်အစိုးရစနက်​တွေ​ကြောင့်ကြီးထွားခဲ့တဲ့ ကျားဖြန့်လုပ်ငန်း​တွေ​ဟာ နိုင်ငံရဲ့ပုံရိပ်ကို​ဆိုးဆိုးဝါးဝါးဖျက်ဆီးပစ်ပါတယ်။ ဒီဒဏ်ကိုမြန်မာနိုင်ငံသားတိုင်းခံရပါတယ်။ အာဏာသိမ်းစစ်တပ်ကို ခုခံ​တော်လှန်​နေတဲ့မြန်မာပြည်သူ​​တွေကို နိုင်ငံအချို့က စာနာ နားလည်​ပေးခဲ့ကြ​ပေမယ့် ကျားဖြန့်​တွေ​ကြောင့် မြန်မာဆိုရင်ကျားဖြန့်သမား​တွေအများကြီးရှိတဲ့နိုင်ငံကလာသူ ၊ကျားဖြန့်လုပ်သူများလားဆိုတဲ့ သင်ကာမကင်းမှု ၊အထင်​အမြင်သေးမှုတွေနဲ့အကြည့်ခံရတဲ့အ​ခြေအ​နေဆိုက်ကုန်ပါတယ် ။

ဒီထက်ဆိုးတာ​တွေရှိပါ​သေးတယ်။မင်း​အောင်လှိုင်က သူပြုတ်မကျ​ရေးကျားခံ​ပေးခဲ့တဲ့ တရုတ်နဲ့ ရုရှားကို​ကျေးဇူးဆပ်ရင်းဆပ်ရင်း နဲ့ တရုတ်နဲ့ ရုရှားတို့ကကျည်တစ်​​တောင့်မ​ဖောက်ရပဲ လက်​​အောက်ခံနိုင်ငံဖြစ်လာတဲ့အ​ခြေအ​နေပါ ။မင်း​အောင်လှိုင်က သူနဲ့သူ့မိသားစု ​ဘေးကင်း​ရေးတရုတ်ကိုဆိုရင်လည်း မြစ်ဆုံစီမံကိန်းလည်း​ပေးမယ် ၊​ကျောက်ဖြူ​ရေနက်ဆိပ်ကမ်းလည်း​ဈေး​ပေါ​ပေါနဲ့​ပေးမယ် ၊ နယ်စပ်က​မြေ​တွေခိုးယူခံ​နေရတာလည်းမသိချင်​ယောင်​ဆောင်ရင်း စစ်ဖိနပ်​အောက်ကနိုင်ငံဟာ တရုတ်​ကြွေးနွံမှာပါ နစ်​နေပါပြီ ။

အလားတူရုရှားကိုဆိုရင်လည်းထားဝယ်​ရေနက်ဆိပ်ကမ်း​ပေးမယ် ၊ စက်မှုဇုန်​ စီးပွား​​ရေးဇုန်ပေးမယ် ၊ ရုရှားစစ်တပ်အ​ခြေချခွင့်ပါ​ပေးရမယ့်အ​ခြေအ​နေဆိုက်လာပါတယ် ။ စစ်တပ်က ဒို့တာဝန်အ​ရေးသုံးပါးဆိုပြီး အချုပ်အခြာအာဏာတည်တံ့ခိုင်မြဲ​ရေးကို​နေ့စဥ်ရွတ်​နေ​ပေမယ့် အာဏာသိမ်းစစ်တပ်လက်​အောက်မှာ တရုတ်သြဇာခံ၊ရုရှားသြဇာခံနိုင်ငံဖြစ်လာတာကို မဘသ​တွေ​ရော၊မျိုးချစ်​တွေ​ရော မြင်လျက်နဲ့ မသိချင်​ယောင်​ဆောင်​နေကြပါတယ်။


https://www.ludunwayoo.com/opinion-mm/2026/04/04/153142/

စစ်ကောင်စီတပ်သားသစ် ၂ဦး လက်နက်တွေယူလာပြီး ရေးပြောက်ကျားတပ်ဖွဲ့ထံ အလင်းဝင်

ဧပြီ ၄၊ ၂၀၂၆။ ထားမြတ်/People’s Spring

မွန်ပြည်နယ် ရေးမြို့နယ် အခြေစိုက် ခလရ(၃၄၃) တပ်က စစ်မှုထမ်း တပ်သား ၂ဦး လက်နက် ၂လက် ယူလာပြီး အလင်းဝင်လာကြောင်း ရေးပြောက်ကျားတပ်ဖွဲ့(YGF)- အမှတ် (၈၀၀၁) တပ်ရင်း တပ်ရင်းမှူး ဗိုလ်ကျန်ရစ်က ဒီကနေ့ ဧပြီ ၄ရက်မှာ မှတ်တမ်းဓာတ်ပုံနဲ့အတူ အသိပေးထားပါတယ်။

အလင်းဝင်လာသူနှစ်ဦးနဲ့ပတ်သက်တဲ့ သတင်းအချက်အလက် အသေးစိတ် ဖော်ပြမထားပေမယ့် အလင်းဝင်လာတဲ့ စစ်မှုထမ်း တပ်သား ၂ဦးဟာ အပတ်စဉ်(၁၆)က တပ်သား သစ်တွေဖြစ်ပြီး MA1 နှစ်လက် ယူလာတယ်လို့ ဖော်ပြထားပါတယ်။

စစ်ကောင်စီတပ်သား ၂ဦး အလင်းဝင်ရောက်လာမှုနဲ့ပတ်သက်ပြီး ဗိုလ်ကျန်ရစ်နဲ့ ရေးပြောက်ကျားတပ်ဖွဲ့ တာဝန်ရှိသူတွေထံ ဆက်သွယ်မေးမြန်းထားဆဲပါ။

ရေးပြောက်ကျားတပ်ဖွဲ့ထံကို အရင်ကလည်း စစ်ကောင်စီတပ်သားတွေအလင်းဝင်ရောက်မှုရှိခဲ့ပါတယ်။ ဇန်နဝါရီလ ၁၅ရက်က စစ်ကောင်စီတပ်သား ၃ဦး အလင်းဝင်ရောက်ခဲ့တာ အပါအဝင် စစ်ကောင်စီ တပ်သား ၁၈ဦး ရေးပြောက်ကျားတပ်ထံ အလင်းဝင်ခဲ့ကြောင်း အဖွဲ့ သတင်းပြန်ကြားရေး တာဝန်ခံ ရဲဘော်စောခေတ်သစ်က ဇန်နဝါရီလအတွင်းက ပြောပြခဲ့ပါတယ်။ ဒါကြောင့် ရေးပြောက်ကျားတပ်ထံ အလင်းဝင်တဲ့ စစ်ကောင်စီတပ်သား ၂၀ဦးထက်မနည်းရှိခဲ့ပြီဖြစ်ပါတယ်။

အလင်းဝင်လာသူတွေအနက် ထက်ဝက်နီးပါးလောက်က လက်နက်တွေ ယူလာခဲ့တယ်လို့လည်း ပြောပြပါတယ်။

အလင်းဝင်ရောက်လာသူတွေကို နွေးထွေးစွာကြိုဆိုဂုဏ်ယူကြောင်း ရေးပြောက်ကျားတပ်ဖွဲက ထုတ်ပြန်ထားပြီး စစ်ကောင်စီတပ်ရဲ့ အတင်းအဓမ္မစစ်မှုထမ်းခံမယ့်အစား ပြည်သူ့ကာကွယ်ရေးတပ်မတော်ထဲကို ဝင်ပြီး တော်လှန်ရေးအမြန်ပြီးဆုံးအောင် ဝိုင်းဝန်းတွန်းလှန်ကြဖိုလည်း တပ်ရင်းမှူး ဗိုလ်ကျန်ရစ်က တိုက်တွန်းထားပါတယ်။

ဒါ့အပြင် တော်လှန်ရေးအမြန်ဆုံးအောင်မြင်ဖိုအတွက် ကျရာနေရာကနေ ဝိုင်းဝန်းတွန်းလှန်ကြဖို့ နှိုးဆော်ထားပြီး စစ်ကောင်စီတပ်သားတွေအနေနဲ့ နီးစပ်ရာတော်လှန်ရေးအဖွဲ့တွေနဲ့ချိတ်ဆက်ပြီး အမြန်ဆုံး အလင်းဝင်ကြဖို့ ရေးပြောက်ကျားတပ်ဖွဲက ထုတ်ပြန်ထားပါတယ်။

(အလင်းဝင်လာတဲ့ စစ်ကောင်စီတပ်သား ၂ဦး၊ ဓာတ်ပုံ − ဗိုလ်ကျန်ရစ်)

ရာထူးကနေ ဆင်းပေးလိုက်ရတာနဲ့ သူရဲ့ impunity (ပြစ်မှုတွေအတွက် အရေးယူဒဏ်ခတ်မခံရဘဲ ကင်းလွတ်ခွင့်ရနေမှု)ကို ဆုံးရှုံးသွားမှာကို သူ ကြောက်ရွံ့နေသလို၊ အဲဒီလို ဆုံးရှုံးသွားတာနဲ့အမျှ တာဝန်ခံရမှုတွေနဲ့ ရင်ဆိုင်ရမှာကိုလည်း သူ ထိတ်လန့်နေပါတယ်။ ဒါ့အပြင် စစ်တပ်အင်စတီကျူးရှင်းအနေနဲ့ အဆုံးအဖြတ်ပေးရမယ့် အချိန်တခုရောက်လာရင် သူ့ကို ဝန်ထုပ်ဝန်ပိုးတခုလို့ သဘောထားပြီး သူတို့ရဲ့အာဏာနဲ့အင်ပျူနတီကို ဆက်လက်ထိန်းသိမ်းဖို့အတွက် သူ့ကို ဖယ်ရှားပစ်မှာကိုလည်း စိုးရိမ်နေပါတယ်။ ဒါကြောင့်မို့လို့ သူက အဓိကကျတဲ့ ရာထူးနေရာ ခွဲဝေမှုတွေကို သူစိတ်တိုင်းကျ ပုံဖော်ထိန်းချုပ်ပြီး၊ အာဏာရဲ့အမြင့်ဆုံးနေရာတွေမှာ သူ့သစ္စာခံတွေကိုချည်း နေရာချထားဖို့ ကြိုးစားနေတာပါ။

မင်းအောင်လှိုင်၊ စစ်တပ်အင်စတီကျူးရှင်းနဲ့ သူတို့ကိုဝန်းရံထားတဲ့ စစ်အရင်းရှင်အုပ်စုတွေအားလုံးဟာ သူတို့ရဲ့ အမိန့်ပေးကွပ်ကဲမှု၊ နယ်မြေ၊ တရားဝင်မှု၊ အရင်းအမြစ်နှိုက်ထုတ်ယူမှု၊ အခွင့်ထူးခံမှု၊ ဓနဥစ္စာစည်းစိမ်နဲ့ အင်ပျူနတီတွေ အစစအရာရာ တိုက်စားခံရပြီး ပြိုကျပျက်စီးသွားမယ့် အန္တရာယ်ကို ထိတ်လန့်နေကြပါတယ်။ သူတို့ ရှာဖွေနေတာဟာစစ်အာဏာရှင်အုပ်စိုးမှုကနေလွတ်မြောက်ရေး ထွက်ပေါက်ရှာနေတာ မဟုတ်ဘဲ၊ အာဏာကို လက်မလွှတ်ရဘဲ သူတို့ရဲ့ကျဆင်းလာနေမှုကို အရှိန်လျှော့ပစ်နိုင်မယ့် လမ်းကြောင်းတခုကိုသာ ရှာဖွေနေကြတာပါ။


https://www.ludunwayoo.com/opinion-mm/2026/04/04/153145/

■​မေးမြန်းခန်း

“တိုက်ရာပါပစ္စည်းနဲ့ရွှေဆိုင်ဖွင့်တာကို ရောင်းဝယ် ကံစမ်းမဲနှိက်ချင်သူများ”

■ဦးမင်းကိုနိုင်နဲ့ ​မေးမြန်းခန်း

စစ်တပ်စိတ်တိုင်းကျစီစဥ်ခဲ့တဲ့ ​ရွေး​ကောက်ပွဲက​နေ တက်လာတဲ့ စစ်တပ်လွှတ်​တော်က ဒီ​နေ့မှာ အာဏာသိမ်း​ခေါင်း​ဆောင်ဗိုလ်ချုပ်မှူးကြီးမင်း​အောင်လှိုင်ကို သမ္မတအဖြစ်​ရွေးချယ်တင်​မြှောက်လိုက်တယ်လို့​ကြေညာပါတယ်။ ​ရွေး​ကောက်ခံအရပ်သားအစိုးရကို မဲခိုးတယ်လို့ လိမ်လည်စွပ်စွဲပြီး အာဏာသိမ်းတာဟာ မင်း​အောင်လှိုင် သမ္မတလုပ်ချင်လို့ဆိုတဲ့အဖြစ်မှန်ဟာ အာဏာသိမ်းပြီး ငါးနှစ်​ကျော်အကြာ ၂၀၂၆ ဧပြီ ၃ ရက်မှာထင်ရှားခဲ့ပါတယ်။ ပြည်သူအများစုက​တော့ မင်း​အောင်
လှိုင်သမ္မတလုပ်ချင်လို့ အာဏာသိမ်းတယ်ဆိုတာကို အ​စောကြီးကတည်းကသိခဲ့ကြတာမို့ အမှန်တရားအတွက်ရပ်တည် ​တော်လှန်ရင်း မြန်မာ့သမိုင်းတစ်​လျှောက်အကြီးမားဆုံး လူထု​တော်လှန်​ရေးဖြစ်တဲ့​နွေဦး​တော်လှန်​​ရေး​ပေါ်​ပေါ်လာတာလည်းဖြစ်ပါတယ် ။

စစ်အုပ်စုကကသူတို့ကြိုတင်စီစဥ်ထားတဲ့အတိုင်း မင်း​အောင်လှိုင်ကို သမ္မတအဖြစ်​ကြေညာတဲ့​နေ့မှာ
ရှစ်​လေးလုံးလူထုအ​ရေး​တော်ပုံကထွက်​ပေါ်လာတဲ့​ခေါင်း​​ဆောင်တစ်ဦးဖြစ်သလို ၊ လူထု​​တော်လှန်​ရေးတိုင်းမှာ ဦး​ဆောင်ပါဝင်​ခဲ့၊ ပါဝင်​နေတဲ့ ၈၈ မျိုးဆက်​ကျောင်းသား​ခေါင်း​ဆောင် ဦးမင်းကိုနိုင်ကို People's Spring က ဆက်သွယ်​မေးမြန်းထားပါတယ် ​။

​နေ့သစ်/People's Spring

​မေး-မင်း​အောင်လှိုင်သမ္မတလုပ်ချင်တာနဲ့ ပြည်သူ​သောင်းချီသတ်ဖြတ်၊ ​​နေအိမ်သိန်းချီမီးရှို့၊ပြည်သူသန်း​ပေါင်းများစွာထွက်​ပြေး​အောင်လုပ်တယ်။
တစ်နိုင်ငံလုံးကိုဖျက်ဆီးပြီး​​တော့ အခုလို စစ်တပ်ရဲ့ဟန်ပြလွှတ်​တော်က သမ္မတဖြစ်ပြီလို့​ကြေညာလာတဲ့အ​ပေါ် ဘယ်လိုမှတ်ချက်ပြုချင်ပါလဲ။ လူတစ်​ယောက် သမ္မတရူးတာနဲ့ တိုင်းပြည်ကို အခုလိုဖျက်ဆီးခဲ့တဲ့အ​​ပေါ် ဘယ်လိုမြင်ပါလဲ။

​ဖြေ-ဒါ ၂၀၂၀ ‌စစ်မှန်တဲ့ရွေးကောက်ပွဲပြီးကတည်းက အားလုံးမှတ်မိကြဦးမှာပေါ့နော်။ အနိုင်ရပါတီကိုလာပြီး ခြိမ်းခြောက်တောင်းဆိုတာ ။ သူသမ္မတဖြစ်ဖို့ကိစ္စ ။ အဲဒါကို အဲဒီ့တုန်းကပိတ်ပြီးငြင်းတဲ့လူတွေကရှိတယ်။ မဲစာရင်းအကြောင်းပြပြီး တော့ ။ဘယ်လိုမှတောင်းဆိုလို့မရတဲ့အခါမှာ အာဏာကိုလုလိုက်တာ။ သိမ်းလိုက်တာ။ တက်ပြီးတော့လုတာ။ အဲဒီ့ဟာက အခုပေါ်ပြီပေါ့။ သူဒါကိုမရလို့ အာဏာလုခဲ့တယ်ဆိုတာ ပေါ်သွားပြီပေါ့။ တကယ်တော့ ဒီပြည်သူလူထုရွေးချယ်တင်မြှောက်ထားတဲ့အနိုင်ရပါတီကလည်း ပြည်သူကိုသစ္စာဖောက်ပြီးတော့ အဲဒီလိုအနိုင်ကျင့်တိုင်း ပေးလို့မရဘူး။ အခုတော့ပေါ်ပြီပေါ့ဗျာ။ ဒါပါပဲ။

​​မေး-​စစ်အာဏာရှင်​တွေလက်​အောက်မှာ စစ်အုပ်စုကစစ်ရာဇဝတ်မှု​တွေ အများကြီးကျူးလွန်ခဲ့တယ်။ဒါ​ပေမယ့်အစဥ်အဆက် အ​ရေးယူမခံခဲ့ရပဲ ပြစ်မှု​တွေက​နေ ကင်းလွတ်ခွင့်ရခဲ့တယ်။ အခုတကြိမ်မှာ​ရော စစ်တပ်က ပြစ်မှု​တွေက​နေအ​ရေးယူမခံရပဲ ကင်းလွတ်ခွင့်ရမယ်လို့ထင်လား။ဘာ​ကြောင့်လဲ ။

​ဖြေ-ကျွန်‌တော်တို့ တစိုက်မတ်မတ် တောင်းဆိုနေဝာာ ပြောနေတာလည်း ဒါပဲလေ။ စစ်ရာဇဝတ်မှုကျူးလွန်တဲ့သူတွေကို အရေးမယူဘူးဆိုရင် သူတို့ ထပ်ခါ ထပ်ခါ ကျူးလွန်နေမှာပေါ့။ ကျူးလွန်တိုင်းအရေးမခံရဘူးကွာ ။ ဒါဆိုလို့ရှိရင်တော့ အချိန်မရွေးထပ်ပြီးကျူးလွန်နေမှာပေါ့။ ဒါကအဓိကပါ။ နောက်တစ်ခုက ဒါကိုထင်မြင်ချက်တွေ အနေနဲ့ မပြောချင်ဘူး။ မဖြစ်ဖြစ်အောင်ကိုလုပ်ရမယ်။ အလုပ် လုပ်ကို လုပ်ရမှာပေါ့။

​မေး-တိုင်းရင်းသား​တော်လှန်​ရေးအဖွဲ့​တွေနဲ့ NUG ၊CRPH တို့ပူး​ပေါင်းဖွဲ့စည်းလိုက်တဲ့ ဖက်ဒရယ် ဒီမိုက​ရေစီ ပြည်​ထောင်စု​ပေါ်ထွန်း​ရေးဦး​ဆောင်​ကော်မတီ-SCEF က ​​​နွေဦး​တော်လှန်​ရေးအတွက်ဘယ်​လောက်အ​ရေးကြီးတယ်လို့သုံးသပ်လဲ။ဘာ​ကြောင့်ပါလဲ။

​ဖြေ- SCEF ကနွေဦးတော်လှန်ရေးအတွက်ဘယ်
လောက်အရေးကြီးလဲဆိုရင် အပြည့်အရေးကြီးတယ်။ ဒါသည် ကျွန်တော်တို့ တော်လှန်ပြည်သူတစ်ရပ်လုံးက တစိုက်မတ်မတ် ဒါကိုလည်းတောင်းဆိုလာတာ။ ဒီအတွက်လည်း အားစိုက်ခဲ့ရတာတွေ အများကြီး။ လပေါင်းများစွာညှိခဲ့ရတယ်။ သည့်မတိုင်ခင်ကလည်း နှစ်နဲ့ချီပြီးတော့ အကြိုညှိခဲ့ရတယ်။ အများကြီးလုပ်ခဲ့ရတာဗျ။ ဘာဖြစ်လို့လည်းဆိုတော့ တကယ့်အရေးပါတဲ့ မဟာမိတ်ခေါင်းဆောင်တွေပါရမယ်။ ကိုယ်တိုင်ဦးဆောင်နိုင်ရမယ်။ ကိုယ်တိုင်ထဲထဲဝင်ဝင် ကိုယ်ဖိရင်ဖိ ဒီတော်လှန်ရေးတစ်ရပ်လုံးကို ဦးဆောင်နေပြီဆိုတာပြရမယ်။ စစ်ရေးအရရော နိုင်ငံရေးအရရော ကမ္ဘာကြီးကိုပြရမယ်။ ဒီမှာ ပင်မရေစီး။ ဒါသည် ဒီအတိုင်းသာလျှင် ဒီလမ်းစဉ်အတိုင်းသာလိုက်ရမယ်ဆိုတာကိုကိုယ့်ရဲ့ အင်အားနဲ့လည်းပြရမယ်။အဲဒီတော့ ဒီလောက်နဲ့လည်းမပြီးသေးဘူး။တကယ်ကကျတော့ ဒီ့ထက်ပိုပြီး တော့ ကျယ်ပြန့်ခိုင်မာပြီးတော့ ပိုအားကောင်းတဲ့ စုဖွဲ့မှုအတွက် လမ်းလည်းဖွင့်ထားပါတယ်။ အဲဒီ့အတွက်ကြောင့် နောက်ထပ်တိုးချဲ့ပြီး မဟာမိတ်တွေ အင်အားကောင်းလာအောင်လည်း လုပ်ကြရဦးမှာပါ။ဒါက နွေဦးတော်လှန်ရေး အောင်မြင်ဖို့အတွက် အဆုံးအဖြတ်လည်းဖြစ်တယ်။ အားလုံးကမျှော်လင့်ထားတယ်။ အခုရတာနဲ့ ပွဲဦးတာထွက်ပြီ။ နောက်ထပ်ပေါင်းဖို့ ၊ ပေါင်းနိုင်တဲ့ အားတွေနဲ့အတူ စစ်ရေးရော နိုင်ငံရေးရော တိုက်ပွဲဝင်ပြီးတော့ အရယူနိုင်ဖို့ကိုတော့ ပြည်သူလူထုတစ်ရပ်လုံးကလည်း ဒီ့ထက်ပိုပြီးတော့ အားပေးထောက်ခံကြဖို့လိုပါတယ်ဗျ။

​မေး-​​နွေဦး​တော်လှန်​ရေး ရည်မှန်ချက်​တွေ​အောင်
မြင်ဖို့ ဘာ​တွေထက်ကြိုးစားကြရဦးမယ်လို့သုံး
သပ်ပါလဲ။ တော်လှန်​ရေးအဖွဲ့​တွေကို​​​​ရော ၊ ပြည်သူ​တွေကို ဘယ်လိုတိုက်တွန်းချင်ပါလဲ ။

​ဖြေ-ဖက်ဒရယ်ပြည်ထောင်စုပေါ်ထွန်းရေး ဦးဆောင်ကောင်စီဟာ တော်လှန်ရေးကို ကိုယ်စားပြုပြီး ကမ္ဘာ့နိုင်ငံအသီးသီးရဲ့ အစိုးရတွေ လွှတ်တော်တွေ Institution အသီးသီးကို ထိုးဖောက်ပြီးတော့ ကိုယ်တိုင်ကိုယ်ကျ ခေါင်းဆောင်တွေ ကိုယ်တိုင် ဆွေးနွေးနိုင်ရမယ်။ ရှင်းပြနိုင်ရမယ်။ အသိပေးနိုင်ရမယ်။ ကမ္ဘာကြီးရဲ့ ဆက်ဆံမှု ဒီ့ထက်ပိုပြီးအားကောင်းလာအောင် အဲဒီ့စုဖွဲ့မှု အားကောင်းကောင်းနဲ့ ရှင်းပြနိုင်ရမယ်။တစ်ဖက်ကလည်း စစ်ရေးမှာ မဟာမိတ်တွေစုဖွဲ့ပြီးတော့ ပိုပြီးတော့ တိုက်နိုင်ရမယ်။ အမိန့်ပေးကွပ်ကဲမှု တစ်ခုတည်းရဲ့အောက်မှာ တိုက်နိုင်ရမယ်။ ပြီးတော့ အောင်ပွဲတွေယူနိုင်ရမယ်။ အဲဒီလိုသွားနေရမှာ။ ဟိုဘက်မှာ ဖက်ဆစ်ကလုပ်နေတဲ့ အတုအယောင်ရွေးကောက်ပွဲနဲ့ အရေခြုံထားတဲ့ အရပ်သားအရေခြုံ အစိုးရပုံစံနဲ့ သူတို့လုပ်မှာက တိုက်ရာပါပစ္စည်းတွေကို ရတနာဆိုင်ဖွင့်ပြီး အရောင်းအဝယ်လုပ်မှာဖြစ်တယ်။ အဲဒီ့မှာ သွားပြီး ရောင်းဝယ်ဖောက်ကားချင်ကြတဲ့ ကံစမ်းမဲနှိုက်ချင်ကြတဲ့ သူတွေကို အဲဒါကို ပြတ်ပြတ်ရှင်းရှင်းပြောပြနိုင်ရမယ်။ ဒီဘက်က တကယ်စစ်မှန်တဲ့တော်လှန်ရေးနဲ့ တကယ့်ပြည်သူလူထုရွေးချယ်တင်မြှောက်ထားတဲ့ သူတွေ တိုင်းရင်းသားတော်လှန်ရေးခေါင်းဆောင်တွေနဲ့ စုဖွဲ့ပြီးတော့ အစစ်အမှန် ဖက်ဒရယ် ဒီမိုကရေစီ ပြည်ထောင်စုကို တကယ်တည်ဆောက်မယ့်လမ်းစဉ်နဲ့သွားနေတယ်ဆိုတာကိုပြမယ်။ ဟိုဘက်က ဓားပြတိုက်ရာပါအုပ်စုကိုတော့ ငြင်းဆန်ကြဖို့ ကိုတော့ ကြိုးစားကြရမှာ။ တစ်ခါတည်း စစ်ရေးရော နိုင်ငံရေးရော နှစ်ခုစလုံးပေါင်းပြီးတော့ အားစိုက်ကြရမှာပါ။

●အခုလို​ဖြေကြား​ပေးတဲ့အတွက် ကျေးဇူးတင်ပါတယ်။

ဖက်ပင်အိုင်ရွာ စစ်တပ်စီးနင်းမှု ပြည်သူ ၇ဦး သေဆုံး၊ ပိတ်မိနေတဲ့ ဒဏ်ရာရပြည်သူတွေကို ကယ်ထုတ်ရင်း PDFရဲဘော်၂ဦး ကျဆုံး

ဧပြီ−၄၊၂၀၂၆၊ရှိန်း/People's Spring

မန္တလေးတိုင်း၊ မြင်းခြံမြို့နယ်က ဖက်ပင်အိုင်ကျေးရွာကို စစ်တပ်စီးနင်းပစ်ခတ်မှုအတွင်း သက်ကြီးရွယ်အိုတွေ အပါအဝင်ပြည်သူ ၇ဦး သေဆုံးကာ ပိတ်မိနေတဲ့ ပြည်သူတွေကို ကယ်ထုတ်ရင်း ပြည်သူ့ကာကွယ်ရေးရဲဘော်၂ဦးလည်း ကျဆုံးခဲ့တယ်လို့ မြင်းခြံမြို့နယ်ပြည်သူ့ကာကွယ်ရေးအဖွဲ့(ပကဖ)က ပြောပါတယ်။

ဧပြီ၂ရက်မနက် ၇နာရီမှာ နဘူးအိုင်ကျေးရွာကို မီးရှို့ နေတဲ့ ရဲကွန်မန်ဒိုစစ်ကြောင်းဟာ ဖက်ပင်အိုင်ကျေးရွာကို ပစ်ခတ်ဝင်ရောက်လာပြီး တွေ့သမျှပြည်သူတွေကို ပစ်သတ်ခဲ့တယ်လို့ မြို့နယ်ပကဖ သတင်း ထောက်လှမ်းရေးနဲ့ ပြန်ကြားရေးတာဝန်ရှိသူက ပြောပါတယ်။

အဲဒီစစ်ကြောင်းဝင်လာချိန် ထွက်ပြေးတဲ့ အသက်(၆၀)အရွယ်အမျိုးသားတစ်ဦးနဲ့ အမျိုးသမီးတစ်ဦးကို ပစ်သတ်ခဲ့ပြီး ဒရုန်းနဲ့ပါ ဗုံးတွေချခဲ့တာမို့ (၇၈)နှစ်အရွယ် အမျိုးသားတစ်ဦး၊ (၆၃)နှစ်အရွယ် အမျိုးသမီးတစ်ဦး၊(၆၃)နှစ်အရွယ်ဗုံးထိတဲ့မိခင်ကို သွားသယ်စဉ် ဒရုန်းနဲ့ချခံရတဲ့ (၃၇)နှစ်အရွယ် အမျိုးသားတစ်ဦး ၊ (၃၃)နှစ်အရွယ် အမျိုးသမီးတစ်ဦးနဲ့ (၂၇)နှစ်အရွယ် အမျိုးသမီးတစ်ဦး စုစုပေါင်း အမျိုးသား ၃ဦးနဲ့ အမျိုးသမီး ၄ဦး သေဆုံးခဲ့တယ်လို့ သိရပါတယ်။

ကျေးရွာအတွင်း ပြည်သူတွေပိတ်မိနေပြီး ဗုံးထိထားတဲ့ ဒဏ်ရာရပြည်သူတွေ ဆေးကုသခွင့်မရတာကြောင့် မနက်၁၁နာရီ လောက်မှာ မြင်းခြံခရိုင်တပ်ရင်းတွေအပါအဝင်နယ်မြေခံ တော်လှန်ရေးတပ်တွေက ပြည်သူတွေကို ကယ်ထုတ်ဖို့ ဝင်ရောက်ချိန်တိုက်ပွဲဖြစ်ပွားခဲ့တယ်လို့ သိရပါတယ်။

"နေပူချိန်ကြီး လောက်မှာ တချို့ပစ်ဝင်တဲ့ရဲဘော်တွေက ပစ်ဝင်၊ကယ်ထုတ်တဲ့ရဲဘော်တွေက ကယ်ထုတ် ပေါ့။တိုက်ပွဲဖြစ်တယ်။ဒဏ်ရာရပြည်သူ တွေ‌‌ကို ရော ကသလောက် ကယ်ထုတ်ပြီးတဲ့အချိန် နောက်ပြန်ဆုတ်တဲ့အချိန်မှာ စကစက ဒရုန်းနဲ့ ဗုံးလိုက်ချတာ"လို့ သတင်းထောက်လှမ်းရေးနဲ့ ပြန်ကြားရေးတာဝန်ရှိသူက ပြောပါတယ်။

ဒရုန်းနဲ့ ဗုံးချခံရမှုမှာ ရဲဘော် ၃ဦး ထိမှန်ပြီး ၂ဦးကျဆုံးကာ တစ်ဦးကို ဆေးကုသနေတယ်လို့ သိရပါတယ်။

အဲဒီစစ်ကြောင်းဟာ ဒီကနေ့ ဧပြီ ၄ရက် မနက်မှာ ဆုံရွာပျူစောထီးရွာကို ဝင်ပြီး နဘူးအိုင်ကျေးရွာဘက်ကို ပြန်သွားနေတယ်လို့ သိရပါတယ်။

"အခုက စစ်ကြောင်းလာပြီး ပြန်ထွက်ရင် ရွာ တွေမှာ နောက်ချန်အင်အားထားခဲ့တက်တယ်။ဖက်ပင်အိုင်မှာလည်း ရှိ‌‌ နေနိူင်သေးတယ်။ဒါပေမယ့် စစ်ကြောင်းက တော့နဘူးအိုင်ဘက်ကိုပြန်သွားနေပြီ"လို့ သတင်းထောက်လှမ်းရေးနဲ့ ပြန်ကြားရေးတာဝန်ရှိသူက ပြောပါတယ်။

ဖက်ပင်အိုင်ကျေးရွာမှာ ရွာထဲကျန်ခဲ့တဲ့ပြည်သူ တချို့လည်းရှိသေးတယ်လို့ သိရပါတယ်။ကျေးရွာက နေအိမ် ၃၀၀ကျော်လည်း မီးရှို့ဖျက်ဆီးခံလိုက်ရတယ်လို့ သိရပါတယ်။

စစ်တပ်က မြင်းခြံ- မြို့သာလမ်းပိုင်းက နဘူအိုင်ကျေးရွာကို ဖေဖော်ဝါရီ၂၂ရက်ကထိန်းချုပ်ပြီးတဲ့ နောက် စစ်ကြောင်း နှစ်ကြောင်းခွဲကာ ကျေးရွာတွေက နေအိမ်တွေက ပစ္စည်းတွေသယ်ပြီး နေအိမ်တွေကို မီးရှို့နေတာလို့ သိရပါတယ်။

တစ်လကျော်အတွင်း မြင်းခြံမြို့နယ်မှာ ကျေးရွာ၁၀ရွာ‌‌ထပ်မနည်း မီးရှို့ဖျက်ဆီးခံထားရတယ်လို့ သိရပါတယ်။

(မြင်းခြံမြို့နယ်က နဘူးအိုင်ရွာကို စစ်အုပ်စုက ပြီးခဲ့တဲ့ မတ်လနောက်ဆုံးပတ်ကလည်း စီးနင်းမီးရှို့ဖျက်ဆီးမှုအပြီး တွေ့ရစဉ်။ ဓာတ်ပုံ − CJ)

ဖက်ဒရယ်ဦးဆောင်ကောင်စီဟာ ခေတ်အဆက်ဆက်တော်လှန်ရေးအတွေ့အကြုံတွေ သုံးသပ်ပြီး ဖွဲ့စည်းမှုဟု ချင်းညီနောင်စစ်ဦးစီးချုပ် ပြော

ဧပြီ− ၄၊ ၂၀၂၆။ ထားမြတ်/People’s Spring

ဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင်ကောင်စီ ဖွဲကစည်းမှုဟာ ခေတ်ရေစီးကြောင်းအရ လိုအပ်ချက်အရ ဖွဲ့စည်းလာတဲ့ အစုအဖွဲ့လို့ မြင်ကြောင်း ချင်းညီနောင်စစ်ဦးစီးချုပ်ဖြစ်သူ PDF ဇိုလဲန်း စစ်ဦးစီးချုပ်ကိုဂိဒွန်က ပြောပါတယ်။

ဒီကနေ့ ဧပြီ ၄ရက်မှာ ကျင်းပတဲ့ ချင်းညီနောင်အတွက် ရန်ပုံငွေ ရှာဖွေပွဲ တော်လှန်ရေးခေါင်းဆောင်များနဲ့ စကား၀ိုင်းမှာ ချင်းညီနောင်စစ်ဦးစီးချုပ်က အခုလို ပြောပြတာပါ။

အမျိုးသားညီညွတ်ရေးအစိုးရ(NUG)၊ ပြည်ထောင်စုလွှတ်တော်ကိုယ်စားပြုကော်မတီ(CRPH)နဲ့ K3C(KNU၊ KIO၊ KNPP၊ CNF) ခြောက်ဖွဲ့ ဦးဆောင်ပြီး ဖက်ဒရယ်ဦးဆောင်ကောင်စီ စတင်ဖွဲ့စည်းကြောင်း မတ်လ ၃၀ရက်မှာ ကြေညာခဲ့တဲ့အပေါ် ချင်းညီနောင် အနေနဲ့ ဖြစ်စေ ပုဂ္ဂိုလ်ရေးအမြင်ဖြစ်စေ သဘောထားမှတ်ချက်ပြောကြားပေးရန် မေးမြန်းမှုအား စစ်ဦးစီးချုပ်ကိုဂိဒွန်က အခုလို ပြောပြတာပါ။
နွေဦးတော်လှန်ရေးက နိုင်ငံရေးကြောင့်ဖြစ်လာတာဖြစ်လို့ အခု ဦးဆောင်ကော်မတီဟာ လိုအပ်ချက်အရ ခေတ်ရေစီးကြောင်းအရ နိုင်ငံရေးအရ ညှိနှိုင်းဖို့အတွက်လည်း လိုအပ်လာလို့ စုဖွဲ့ခဲ့တာလို့ မြင်ကြောင်း ပြောပါတယ်။

“ကျနော့်တဦးတည်းသော အမြင်အနေနဲ့တော့ ကောင်းပါတယ်လို့ ပြောလိုပါတယ်။ ဒါလိုအပ်ချက်အရ လူကြီးတွေကလည်း ခေါင်းဆောင်ကြီးတွေကလည်း အများကြီး စဉ်းစားပြီးမှ ခေတ်အဆက်ဆက် တော်လှန်ရေးမှာလည်း အတွေ့အကြုံတွေကို သုံးသပ်ပြီးမှ ခေတ်ရေစီးကြောင်းအရ ဖွဲ့စည်းလာတဲ့ အဖွဲ့အစည်းတခုလို့ မြင်ပါတယ်” လို့ ကိုဂိဒွန်က ပြောပါတယ်။

ဖက်ဒရယ်ဦးဆောင်ကောင်စီကို ပြည်နယ်ယူနစ် EROများ၊ ပြည်သူကိုယ်စားပြုနဲ့ အမျိုးသမီးကိုယ်စားပြုမှု စတဲ့ မဏ္ဍိုင်ကြီး သုံးခုကို အခြေခံဖွဲ့စည်းမှုလို့ ကောင်စီခေါင်းဆောင်တွေက အသိပေးထားပါတယ်။

စတင်ဖွဲ့စည်းချိန်မှာ အခြေအနေနဲ့ စိန်ခေါ်မှု အမျိုးမျိုးကြောင့် စတင်ဆွေးခဲ့ကြတဲ့ အဖွဲ ၅ဖွဲ(NUG၊ KNU၊ KIO၊ KNPP၊ CNF) နဲ့ CRPH အားလုံး ခြောက်ဖွဲနဲ့ အစပြု တာထွက်ခဲ့တာဖြစ်ပြီး နှစ်လအတွင်း ပါဝင်သင့်သူတွေ ပါဝင်ဖို့ ကြိုးစားမယ်လို့ ဖက်ဒရယ်ဦးဆောင်ကောင်စီ ခေါင်းဆောင်တဦးဖြစ်တဲ့ KNPP ဥက္ကဋ္ဌ ခူဦးရယ်က ပြောပြပါတယ်။

“မဏ္ဍိုင်သုံးခု စုံစုံလင်လင် မပါနိုင်သေးတာနဲ့ မဏ္ဍိုင်တခုဆီမှာ ပါသင့်ပါထိုက် သူအားလုံး ပါမနေသေးတာကလည်း အချိန်နဲ့ စိန်ခေါ်မှုနဲ့ ဖိအားကို မကျော်လွှားနိုင်တဲ့ ကျနော်တိုရဲ့ အားနည်းချက်တခုတော့ ဖြစ်ခဲ့ပါတယ်။ ဒီအတွက်လည်း လာမယ့် ရက် ၆၀ အတွင်း အမြန်ဆုံး ပြင်ဆင် ဖြည့်စွက်နိုင်ဖို ကြိုးစားသွားမှာ ဖြစ်ပါတယ်” လို ခူဦးရယ်က ပြောပါတယ်။

စစ်ဦးစီးချုပ် ကိုဂိဒွန်က ချင်းညီနောင်အဖွဲ့ရဲ့ မဟာမိတ်ဆက်ဆံရေးအခြေအနေတွေကို အသိပေးခဲ့သလို တော်လှန်ရေးအင်အားစုအချင်းချင်းအကြား ပွတ်တိုက်မှုတွေနဲ့ ပတ်သက်ပြီးလည်း အမြင်သဘောထားတွေ အခုလို ပြောကြားခဲ့ပါတယ်။

“ကျနော်တို့ရဲ့ မဟာမိတ်ဆက်ဆံရေးကတော့ အထူးသဖြင့် ULA/AAနဲ့လည်းကောင်းမွန်တဲ့ မဟာမိတ် ဆက်ဆံရေး ရှိပါတယ်။ ကျနော်တို့ CB(ချင်းညီနောင်) အနေနဲ့ SRA(နွေဦးတော်လှန်ရေးမဟာမိတ်တပ်ပေါင်းစု) မှာလည်း ပူးပေါင်းပါဝင်တာမျိုးရှိပါတယ်။ ပြီးရင် တဖက်မှာလည်း တော်လှန်ရေး ဖခင်ကြီးလို့ ပြောလို့ရတဲ့ KIO/KIAနဲ့လည်း မြေပြင်တွေ့ဆုံတာမျိုးတွေ ကောင်းမွန်တဲ့ ဆက်ဆံရေးတွေလည်းရှိပါတယ်။ ကျနော်တို့ ဆက်ပြီးမှလည်း ပိုပြီးမှ ခိုင်မာတဲ့ ဆက်ဆံရေး စစ်ရေး၊ နိုင်ငံရေး၊ လူမှုရေး အဲဒီလိုမျိုးတည်ဆောက်နိုင်ဖို့ ချင်းညီနောင်အနေနဲ့လည်း ကြိုးစားနေပါတယ်” လို့ စစ်ဦးစီးချုပ် ကိုဂိဒွန်က ပြောပါတယ်။

တော်လှန်ရေးတပ်အချင်းချင်း မြေပြင်ပွတ်တိုက်ခိုက်မှုတွေမှာ ဖြေရှင်းလို့ ရတဲ့ ပြဿနာတွေက ပြဿနာမဟုတ်ကြောင်း လည်း ပြောပြပါတယ်။ ပြဿနာတွေကို ရေရှည်အတွက် စဉ်းစားပြီးဖြေရှင်းနိုင်ကြမယ်လို့ ယူဆကြောင်း စစ်ဦးစီးချုပ်က ပြောပါတယ်။

“ကျနော်တို့အနေနဲ့လည်း ဒီဟာတွေကို သင်ခန်းစာယူပြီးမှ ကိုယ့်နဲ့ သက်ဆိုင်တဲ့နေရာတွေမှာလည်း ဒီလိုမဖြစ်အောင်။ ဒါကတော့ တော်လှန်ရေးဆိုတော့ ဒီလိုပြဿနာမျိုးစုံကို ကြုံရမှာပဲ။မထင်မှတ်တဲ့ ပြဿနာ မျိုးတွေလည်း ထပ်ပြီးမျ ကြုံရအုံးမှာပဲ။ ရန်သူဘက်က ဒီလို ဖြစ်နေအောင် လုံး၀ ကြိုးစားနေတဲ့အပိုင်းရှိတယ်။ အမျိုးမျိုး နည်းပေါင်းစုံနဲ့ ပေါ့နော် ကျနော်တို့ တော်လှန်သမားတွေအနေနဲ့လည်း နည်းလမ်းပေါင်းစုံနဲ့ အကောင်းဆုံးဖြစ်အောင် အဓိက ကျနော်တို့ လိုချင်နေတဲ့ တော်လှန်ရေးအဖွဲ့အချင်းချင်း ကို သွေးကွဲတာမျိုး သွေးထွက်သံယိုမှု မဖြစ်အောင် ပိုပြီးမှ စည်းလုံးအောင် ပိုပြီးမှ နားလည်မှု ရှိအောင် ဖြေရှင်းနိုင်ကြဖို့တော့ မျှော်လင့်ပါတယ်” လို့ စစ်ဦးစီးချုပ် ကိုဂိဒွန်က ပြောပါတယ်။

စစ်ဖြစ်နေချိန်ဖြစ်လို့ ပြည်သူတွေအနေနဲ့ ထောက်ပို့ပိုင်း ငွေကြေးပိုင်း အပါအဝင် တက်နိုင်တဲ့ဘက်က ပါဝင်ကြဖို့ အားကောင်းနေတဲ့ လူငယ်တွေ နီးစပ်ရာ တော်လှန်ရေးတပ်တွေမျာ တာဝန်ထမ်းဆောင်ကြဖို့ လည်း ကိုဂိဒွန်က တိုက်တွန်းပါတယ်။

(ချင်းညီနောင်စစ်ဦးစီးချုပ်ဖြစ်သူ PDFဇိုလဲန်း စစ်ဦးစီးချုပ်ကိုဂိဒွန်။ ဓာတ်ပုံ − CJ)

အငှားယာဥ်နဲ့ ကုန်တင်ယာဥ်တွေ ကီလိုမီတာနဲ့တွက်ပြီးမှ ဆီရောင်းပေးလို့ ကီလိုတိုင်းတဲ့စနစ်ပျက်နေတဲ့ယာဥ်တွေ ပြင်ဆင်နေရ

ဧပြီ-၃၊၂၀၂၆။ဟာနာဆန်/People's Spring

အငှားယာဉ်နဲ့ ကုန်တင်ယာဥ်တွေကို ကီလိုမီတာနဲ့တွက်ပြီးမှ ဆီရောင်းပေးမယ်ဆိုလို့ ကီလိုတိုင်းတဲ့စနစ်ပျက်နေတဲ့ယာဥ်တွေ အမြန်ပြင်ဆင်နေရကြောင်း သတင်းရရှိပါတယ်။

Taxiယာဉ်တွေ၊ သုံးဘီးယာဉ်တွေ၊ ကုန်တင်ယာဉ် တွေကို တစ်ပတ် ၃ရက် ဆီဖြည့်တင်းခွင့်ပေးထားခဲ့ရာမှာ မသမာမှုလုပ်နေတယ်လို့ စစ်ကောင်စီကစွပ်စွဲပြီး အဆိုပါယာဉ်တွေကို မောင်းနှင်ခဲ့တဲ့ ခရီးအကွာအဝေးပေါ် မူတည်ကာ ဆီရောင်းချပေးတဲ့စနစ်ကို ဧပြီ ၃ရက်ကစပြီး ပြောင်းလဲလိုက်တာပါ။

စနစ်သစ်အရ ၅ ကီလိုမီတာမောင်းနှင်မှုအတွက် ၁ လီတာနှုန်းဖြင့်သာ ဆီဖြည့်တင်းခွင့်ပြုမှာဖြစ်ကြောင်း၊ ကီလိုမီတာ တိုင်းတာတဲ့စနစ် ပျက်စီးနေတဲ့ ယာဉ်တွေအနေနဲ့ အမြန်ဆုံး ပြင်ဆင်ထားရမှာဖြစ်ကြောင်း စက်သုံးဆီဆိုင်တွေက အသိပေးပါတယ်။

နောက်တစ်ကြိမ် ဆီဖြည့်ချိန်မှာ ကီလိုမီတာ တိုးတက်မှုမရှိပါက ဆီဖြည့်တင်းခွင့်ပြုမှာမဟုတ်ကြောင်း ဆီဆိုင်တွေက ဆိုပါတယ်။

အဲဒီ စနစ်သစ်ကြောင့် ယာဉ်ပိုင်ရှင်တွေဟာ ကီလိုမီတာတိုင်းတဲ့စနစ်ကို ပြန်လည်တပ်ဆင်နေရလို့ ယာဉ်ပြင်ဆင်စရိတ်ကုန်ကျမှုတွေရှိနေတယ်လို့ သိရပါတယ်။

မန္တလေးမြို့ခံ သုံးဘီးယာဉ်မောင်းတစ်ဦးက "မိုင်းလစ် (Mileage) ပျက်နေလို့ ပြင်ထားရတယ်။ အုံလိုက်လဲရမှာဆိုတော့ ခုနစ်သောင်းကျော်လောက် ကုန်ကျသွားတယ်"လို့ ပြောပါတယ်။

ဧပြီ ၃ရက် မတိုင်ခင်အထိ အငှားယာဉ်တွေကို တစ်ပတ် ၃ ကြိမ် (အင်ဂျင်အလိုက် ၉၀ မှ ၁၁၀ လီတာအထိ)၊ ကုန်တင်ယာဉ်တွေကို တစ်ပတ် ၂ ကြိမ် (အင်ဂျင်အလိုက် ၁၂၀ မှ ၂၅၀ လီတာအထိ) ဆီရောင်းချပေးနေတာဖြစ်ပါတယ်။ ကီလိုမီတာနဲ့တွက်ပြီး ရောင်းချပေးတဲ့စနစ် မနေ့ကမှစတင်တာဖြစ်တဲ့အတွက် သက်ရောက်မှုကိုတော့ မသိရသေးပါဘူး။

ယခုအခါ မော်တော်ယာဥ်တွေဟာ QR စနစ်၊ စုံမစနစ်နဲ့ စက်သုံးဆီဝယ်ယူနေရတာဖြစ်ပြီး အငှားယာဥ်တွေ ကုန်တင်ယာဥ်တွေဟာ နောက်ထပ်စနစ်တစ်ခုနဲ့ပါ ထပ်မံ ကန့်သတ်ခံရတာဖြစ်ပါတယ်။

(စစ်ကောင်စီလက်အောက်ခံ ရဲတွေက ကုန်ကားတစ်စီးကို စစ်ဆေးနေစဉ်။ ဓာတ်ပုံ - CJ)

မြိုင်နဲ့ ပေါက်နယ်စပ်ကို စစ်တပ်တိုက်​လေယာဥ် ငါးစီးနဲ့ ဗုံးကြဲ PDF ၅ဦးကျဆုံး ၁၀ဦးဒဏ်ရာရ

ဧပြီ-၄၊၂၀၂၆။ရှိန်း/ People's Spring

စစ်တပ်က မကွေးတိုင်း၊မြိုင်နဲ့ ပေါက်နယ်စပ်ကို တိုက်လေယာဉ် ၅ စီးနဲ့ ဒီက​နေ့ည​နေမှာ ဗုံးကြဲ
ခဲ့တာ​ကြောင့် PDF တပ်ဖွဲ့ဝင် ၅ ဦးကျဆုံးပြီး ၁၀ ဦးခန့်ဒဏ်ရာရခဲ့တယ်လို့ ​ဒေသခံ​တွေနဲ့စစ်​ရေးရင်းမြစ်အချို့က​ပြောပါတယ်။

မြိုင်မှာ NUGအစိုးရ နဲ့ မကွေး ဖက်ဒရယ်ယူနစ်အစိုးရတို့အကြား သဘာဝသယံဇာတကိစ္စနဲ့ ပတ်သတ်ပြီးညှိုနှိုင်းရေး တချို့ပြုလုပ်နေချိန်မှာ စစ်တပ်ကဧပြီ ၄ ရက်ည​နေ ၂ နာရီခွဲဝန်းကျင်မှာ တိုက်လေယာဉ်၅ စီးနဲ့လေကြောင်းက​နေ၁၀ကြိမ်ထက်မနည်းဗုံးကြဲခဲ့တာလို့သိရပါတယ်။

"အောက်ခြေရဲဘော်တွေထိတာပေါ့။ကြဲတဲ့ နေရာက PDFတပ်ကရင်းတွေအင်အားချထားတဲ့ နေရာ လေ"လို့ဒေသခံတဦးကပြောပါတယ်။ကနဦးရရှိတဲ့သတင်းအရ PDF‌ ရဲ​ဘော်အချို့ထိခိုက်ကျဆုံးမှုရှိတယ်လို့အထက်ပါ​ဒေသခံက​ပြောပါတယ်။

ထပ်မံရရှိတဲ့သတင်း​တွေအရ PDF ၅ ဦးကျဆုံးခဲ့ပြီး ၁၀ ဦးဒဏ်ရာရခဲ့တယ်လို့စစ်​ရေးသတင်းရင်းမြစ်တစ်ဦးက​ပြောပါတယ်။

စစ်တပ်က PDF တပ်ရင်း​တွေတပ်ချထားတဲ့​နေရာ​တွေကို တိုက်လယာဥ်​တွေနဲ့ ဗုံးလာကြဲတာဖြစ်ပြီး မ​ကွေးဖက်ဒရယ်ယူနစ်တပ်ဖွဲ့​တွေ​တော့ထိခိုက်မှုမရှိဘူးလို့ ​ရဲ​ဘော်တဦးက​ပြောပါတယ်။

မြိုင်နဲ့ ပေါက်နယ်စပ်မှာ အချင်းအချင်းညှိုနှိုင်းမှုပြုလုပ်​နေပြီး NUG ဘက်က PDF ခရိုင်တပ်ရင်းတွေက တပ်ဖွဲ့ဝင်​တွေ လုံခြုံ​ရေးအင်အားချထားစဉ် အခုလို စစ်တပ်က တိုက်လေယာဉ် တွေနဲ့ လာပြီး ဗုံးကြဲခဲ့တာလို့​ဒေသခံအချို့က​ပြောပါတယ်။

အမျိုးသားညီညွတ်ရေးအစိုးရ NUG နဲ့ မကွေးဖက်ဒရယ်ယူနစ် အစိုးရတို့ ဧပြီ ၂ ရက် နဲ့ ၃ ရက် နှစ်ရက်တာ တွေ့ဆုံညှိနှိုင်းဆွေးနွေးမှု​တွေမှာ​တော့ သဘောတူညီမှု ရရှိခဲ့တယ်လို့ NUG ကထုတ်ပြန်ထားပါတယ်။

မြိုင်နဲ့ ပေါက်မြို့နယ်အတွင်းရှိ စီမံခန့်ခွဲမှုဆိုင်ရာ ကိစ္စရပ်တွေနဲ့ ပတ်သက်ပြီး နှစ်ရက်တာ တွေ့ဆုံဆွေးနွေးပွဲအပြီး ရေနံနဲ့ ရေနံထွက် ပစ္စည်းတွေ ကြီးကြပ်ရေးအဖွဲ့ ကို ပူးတွဲဖွဲ့စည်းဖို့၊ မကွေးဖက်ဒရယ်ယူနစ်အတွင်းရှိ ကာကွယ်ရေး အဖွဲ့အစည်းတွေ ကွပ်ကဲမှု စနစ်တကျ ဖြစ်စေရေး၊ အမှုအခင်းတွေ ဖြေရှင်းဆောင်ရွက်ရေး၊ လုံခြုံရေးနဲ့ တရားဥပဒေ စိုးမိုးရေးဆိုင်ရာကိစ္စရပ်တွေပူးပေါင်းဆောင်ရွက်ဖို့ ဆွေးနွေးဆုံးဖြတ်ခဲ့ကြတယ်လို့ အသိပေးပါတယ်။

အမျိုးသားညီညွတ်ရေးအစိုးရ NUG ပြည်ထောင်စုဝန်ကြီးချုပ်ရုံး ပြည်ထောင်စုဝန်ကြီး ဒေါက်တာဇော်ဝေစိုး၊ လျှစ်စစ်နဲ့ စွမ်းအင်ဝန်ကြီးဌာနပြည်ထောင်စုဝန်ကြီး ဦးစိုးသူရထွန်း ဦးဆောင်တဲ့ တာဝန်ရှိသူတွေနဲ့၊ မကွေးဖက်ဒရယ်ယူနစ်ကြားကာလအစိုးရ ဝန်ကြီးချုပ်၊ ဒုဝန်ကြီးချုပ်နဲ့ မကွေးဖက်ဒရယ်ယူနစ်လွှတ်တော်က ကိုယ်စားလှယ်တစ်ဦး တို့ ဦးဆောင်တဲ့ တာဝန်ရှိသူများ ပူးတွဲကာ မကွေးဖက်ဒရယ်ယူနစ် ရေနံနဲ့ ရေနံထွက်ပစ္စည်းများဆိုင်ရာ ကြီးကြပ်ရေးအဖွဲ့ကို ဖွဲ့စည်းသွားမယ်လို့ အသိ​ပေးပါတယ်။

အဲဒီအဖွဲ့က ရေနံမြေ၊ ရေနံလုပ်ငန်းတွေနဲ့ ပတ်သက်တဲ့ စီမံခန့်ခွဲမှုဆိုင်ရာ ကိစ္စရပ်တွေကို ကြီးကြပ်ဆောင်ရွက်သွားကြဖို့ အတည်ပြုဆုံးဖြတ်ခဲ့ကြတယ်လို့ ထုတ်ပြန်ချက်မှာ ဖော်ပြပါတယ်။ဒါ့အပြင် မကွေးဖက်ဒရယ်ယူနစ်မှာ ပြည်သူလူထုအတွက် တရားဥပဒေစိုးမိုးရေးကိစ္စရပ်တွေကိုလည်း ပူးပေါင်းဆောင်ရွက်ကြဖို့ သဘောတူညီခဲ့ကြတယ်လို့ သူက ဆက်ပြောပါတယ်။

မှတ်ချက်-သတင်းကို ဧပြီ ၄ ရက် ည​နေ ၅ နာရီ ၅၀ မိနစ်မှာထပ်မံဖြည့်စွက်ထားပါတယ်။

■ရသစာတမ်းငယ်

“မနက်ဖြန် အဝါရောင်ပန်းတွေပွင့်ရင်”

◼️ချမ်းငြိမ်း

(၁)
လူခြေတိတ်ဆိတ် ငှက်ကလေးတွေ အိပ်ပျော်နေဆဲ။ အိမ်ရှေ့က ခရေပင်ထိပ်မှာ လခြမ်းကွေးကွေးလေး လာချိတ်ချိန်။ အဲဒီ လခြမ်းကွေးကွေးလေးကို မျက်နှာမူပြီး ကျနော် ခရီးစထွက်ခဲ့ပါသည်။ လရောင်ရဲ့ အလင်းပုဝါပါးအောက်မှာ ရိုးတိုးရိပ်တိပ် မြင်ရတဲ့ မပန်းဝါရဲ့ ပန်းခင်းလေးကို ခေတ္တ ငေးမိပါသေးသည်။ ကျနော် ခရီးထွက်ရပါဦးမည်။ တိတ်ဆိတ်သော အိမ်ငယ်လေးထဲမှာ အဝါရောင်ပန်းတပွင့် အိပ်ပျော်နေပါသည်။ ဒါက ကျနော့်အထင်လည်း ဖြစ်နိုင်ပါသည်။ အရုဏ်မလာမီ အမှောင်သည် သိပ်သည်းလွန်းပါသည်။ လရောင်ပန်ထားသော ကမ္ဘာမြေသည် မကြည်လင်လှ။ မြူလွှာပါးပါးသည် မျက်ရည်ခိုးတွေများလားဟု ကျနော်ထင်မိသည်။ ဒီမြေပေါ်မှာ တိတ်ဆိတ်စွာ ငိုကြွေးသူတွေ များလှသည်။ အသံမထွက်ဘဲ ငိုတဲ့အခါ မျက်ရည်ပိုများသည်ဟု ကျနော်ထင် သည်။ တိတ်ဆိတ်သော အိမ်ငယ်လေးထဲက မျက်ရည်စွန်းထင်းနေသော ခေါင်းအုံထက်မှာ မပန်းဝါ ရှိသည်။ သူရော ငိုနေသလား။

(၂)
“ကျနော်သွားမှဖြစ်မယ် မပန်းဝါ”။ ကျနော့်အသံမှာ နှင်းတွေဝေနေသလား၊ ဒါမှမဟုတ် ခပ်ဝေးဝေးကအသံလို မှိန်ပြနေသလား။ မပန်းဝါသည် ကျနော့်အသံကြားနိုင်ပါသည်။ သို့တိုင် ခေါင်းမော့မလာ။ သူ့ဆံနွယ်မှ ရနံ့တချို့သည် ကျနော့် အသက်ရှူလမ်းကြောင်းမှတဆင့် ကျနော့်နှလုံးသားအတွင်း ဝင်ရောက် လာ၏။ “ဟုတ်တယ် သွားမှ ဖြစ်မယ်။”

သူမအသံမှာ တည်ငြိမ်လွန်းသည်ဟု ထင်ရသည်။ ထိုအခါမှ သူမနှင့် ကျနော်ကြားမှာ ကန္တာရတခု ခြားတော့မှာဖြစ်ကြောင်း၊ သို့မဟုတ် သူမနှင့် ကျနော့်ကြားမှာ ချောက်ကမ်းပါးတခု ခြားတော့မှာဖြစ်ကြောင်း သိလာပါသည်။ ဖေဖော်ဝါရီ ကန္တာရ၊ ဖေဖော်ဝါရီ ချောက်ကမ်းပါး။ ထို ကန္တာရနှင့် ချောက် ကမ်းပါးကို နွေဦးနဲ့ တံတားထိုးရပေမည်။

(၃)
မပန်းဝါနှင့် ကျနော် တွေ့ကြသည့်နေ့ဟာ ပူပြင်းခြောက်သယောင်းသော သာမန်နွေတနေ့သာ ဖြစ်ပါသည်။ ထူးထူးခြားခြားလည်း မရှိပါ။ မိုးလည်း အုံ့မနေပါ။ အပြင်မှာ ပန်းတွေလည်း ပွင့်မနေပါ။ သို့သော် အဲဒီနေ့မှာပဲ ကျနော့်ရင်ထဲမှာ အဝါရောင်သစ်ပင်လေးတပင် အမြစ်တွယ်ခဲ့ပါသည်။ ဒီနောက်တော့ ထိုအပင်လေးမှ အဝါရောင်ပန်းကလေးတပွင့် ပွင့်လာပါသည်။

“မပန်းဝါ” … ကျနော့်အသံကြောင့် သူမ နှုတ်ခမ်းတစုံအောက်က အဖြူရောင် ပုလဲကုံးလေးတွေ ပေါ်သည်အထိ တအံတဩနှင့် ကျနော့်ကို ကြည့်ပါသည်။ သူမကိုခေါ်ကြောင်း အလိုလို သိပုံရသွားပါသည်။ ကျနော့်ကို ပြုံးပြပါသည်။ ခေါင်းငုံ့မသွားပါ။ သူမ နားသယ်စပ်က ချွေးစလေးတွေကို ကျနော် ငေးမိပါသည်။ ဝိုင်စက်တွေ စွန်းထင်းနေသလို မပန်းဝါရဲ့ ဆံနွယ်တွေမှာ ရနံ့တချို့ရှိကြောင်း ကျနော် ကောင်းစွာသိခဲ့ပါသည်။ ယခုတိုင် ထိုရနံ့ကို ကျနော်မှတ်မိပါသေးသည်။ ကျနော် သူမကို မပန်းဝါ ဟု အမည်ပေးခဲ့ပါသည်။ ထိုအမည်သည် သူမကို ကျနော်တယောက်တည်းခေါ်သော အမည်ဖြစ်ပါသည်။ အမှန်ပြောရလျှင် မပန်းဝါသည် ကျနော် သတ်မှတ်သော အမျိုးသမီးတယောက်၏ လှပခြင်းမျိုးတို့ မရှိပါ။ သို့တိုင် မပန်းဝါသည် နှစ်လိုဖွယ်ကောင်းပါသည်။ “မပန်းဝါကို ကျနော်ချစ်တယ်။” မပန်းဝါသည် ကျနော်၏ တောင်းဆိုမှုကို နှုတ်နဲ့ရော မျက်ဝန်းနဲ့ရော ဒါမှမဟုတ် အခြားတနည်းနည်းနဲ့ပါ ဖြေခဲ့ပါသည်။ မပန်းဝါသည် ကျနော့်ကို အလွန်ချစ်ပါသည်။ ထိုအတိုင်း ကျနော်ထင်ပါသည်။ အသေအချာကို ပြောနိုင်ပါသည်။

(၄)
ချောင်းရိုးလေးဘေးတဘက်မှာ တောပန်းတွေ ဝေနေတယ် မပန်းဝါ။ အဝါရောင် ပန်းကလေးတွေပေါ့။ ကျနော် မပန်းဝါကို သတိရနေပါတယ်။ အခု ကျနော် သဘာဝတရားရဲ့ ဘာသာစကားကို တတ်ကျွမ်းနေခဲ့ပြီလေ။ ကျနော် ပန်းတွေနဲ့ စကားပြောတတ်နေပါပြီ။ ဒီအချိန် မပန်းဝါရဲ့ ပန်းခင်းလေးထဲ အဝါရောင်ပန်းကလေးတွေ ပွင့်နေလောက်ပြီပေါ့။ မပန်းဝါရော ပန်းတွေနဲ့ စကားပြောတတ်နေပြီလား။

သေနတ်သံတွေဟာ နတ်ဆိုးရဲ့ ဘာသာစကားတခုပဲ မပန်းဝါ။ အခု အဲဒီဘာသာစကားကိုလည်း ကျနော် တတ်ကျွမ်းနေပါပြီ။ ကျနော့်ရဲ့ သေနတ်လွယ်ကြိုးမှာ အဝါရောင်ပန်းတပွင့် ထိုးထားတယ် မပန်းဝါ။ ဒါက ကျနော် မပန်းဝါကို အမြဲသတိရနေကြောင်း သင်္ကေတ တခုပေါ့။

ခြေလက်ဗလာနဲ့ ထွက်လာခဲ့တဲ့ ကျနော့်မှာ သေနတ်တလက်ရှိနေခဲ့ပါပြီ။ တခါက ကဗျာတွေရေးတဲ့လက်ဟာ အခုသေနတ်ကြီးနဲ့ပေါ့ မပန်းဝါ။ ရယ်တော့ ရယ်ရသားပဲ မပန်းဝါ။ မတတ်နိုင်ဘူးလေ။ လူဆိုတာ ကိုယ်ချစ်တဲ့အရာတွေနဲ့ အဝေးကြီးမှာ နေရပြီး ကိုယ်မုန်းတဲ့ အရာတွေနဲ့တော့ အတူတူနေရတတ်တယ် မဟုတ်လား။

(၅)
သေနတ်သံတွေ ကြားနေရတယ် မပန်းဝါ။ ကျနော့်ရင်ဘတ်မှာ အနီရောင်ပန်းတပွင့် လာစိုက်နေတယ်။ အဲဒီပန်းပွင့်ကလေးကနေ အနီရောင် မျက်ရည်စက်တွေ တစက်စက်ထွက်နေတယ်။ ကျနော် နာကျင်တယ်လို့ မခံစားရတော့ပါဘူး။ ကျနော့် သေနတ်လွယ်ကြိုးကနေ လွင့်စင်သွားတဲ့ အဝါရောင်ပန်းကလေးဟာ ကျနော်နဲ့ ခပ်ဝေးဝေးမှာ ရှိနေတယ်။ ကျနော် မျက်လုံးတွေ လေးလံလာတယ် မပန်းဝါ။ ကျနော် ခဏလောက် အိပ်ပါရစေ။ ခဏလေးပါ။

ကျနော် ရနံ့တခုရတယ်။ ဟိုး ခပ်ဝေးဝေးက လွင့်ပျံ့လာတဲ့ ရနံ့မျိုး။ မပန်းဝါရဲ့ ဆံနွယ်တွေဆီမှာရှိတဲ့ ရနံ့မျိုး။ တဖြည်းဖြည်း နီးကပ်လာတယ်လို့ ကျနော်ခံစားရတယ်။ ကျနော့်မျက်လုံးတွေကို အားယူပြီး ဖွင့်ကြည့်လိုက်တယ်။ အမြင်တွေက မှုန်ဝါးနေတယ်။ နောက် တဖြည်းဖြည်း ကြည်လင်လာတယ်။ အဝါရောင် ဟုတ်တယ် အဝါရောင်ဝတ်စုံလေးနဲ့ ကျနော့်ကို ပြုံးကြည့်နေတဲ့ မပန်းဝါ။ သူမ ခေါင်းမှာလည်း အဝါရောင်

ပန်းကလေးတပွင့်ကို ဖြစ်သလို ထိုးထားတယ်။ မပန်းဝါ ကျနော့်ကို တခုခုပြောနေပုံရတယ်။ ဒါပေမယ့် ကျနော် မကြားရပါဘူး။ သူမအသံက နီးသွားလိုက် ဝေးသွားလိုက်။ နောက် တဖြည်းဖြည်း ပီသလာတယ်။ “အိမ်ပြန်ရောက်နေပြီပဲ အိပ်လိုက်ဦးနော်” တဲ့။ ကျနော် ဘေးဘီကို ကြည့်မိတယ်။
ဟုတ်ပါရဲ့ ကျနော်အိမ်ပြန်ရောက်နေတာပဲ။

ဘယ်လို ရောက်လာပါလိမ့်။ သူမအသံ ထပ်ကြားရတယ်။ “မနက်ဖြန် အဝါရောင်ပန်းတွေ အများကြီးပွင့်တော့မှာ” တဲ့။ ကျနော် မပန်းဝါကို စကားပြန်ပြောဖို့ ကြိုးစားကြည့်မိတယ်။ မရ။ ဒါကြောင့် ကျနော် မပန်းဝါကို ပြုံးပြလိုက်ပါတယ်။ ဟုတ်တယ် ကျနော် ပင်ပန်းနေပြီ။ အိပ်မှဖြစ်မယ်။ ခဏလောက်ပါပဲ မပန်းဝါ။ မနက်ဖြန် မပန်းဝါကို အဝါရောင်ပန်းတွေ ပန်ပေးရဦးမယ်လေ။

(၆)
တောတန်းလေးတနေရာက ဝါးကွပ်ပျစ်လေးပေါ်မှာ လူငယ်လေးတယောက် လဲလျောင်းနေသည်။ သူ့ရင်ဘက်က ဒဏ်ရာမှ ထွက်လာသော သွေးစက်တွေခြောက်နေပြီဖြစ်တာကြောင့် နာရီအတန်ကြာကပင် သူသေဆုံးခဲ့ကြောင်း သက်သေပြနေသည်။ သူ့ရင်ဘတ်ပေါ်မှာ အဝါရောင် တောပန်းပွင့်လေးတပွင့် တင်ထားသည်။ ဒဏ်ရာမှ သွေးတို့ဖြင့် နီစွေးနေသော အောက်ခံအရောင်ကြောင့် အဝါရောင်ပန်းကလေးသည် တောက်ပနေသည်။
သူ့မျက်နှာသည် ပြုံးလျက်။

(The Call -ခေါ်သံ"အွန်လိုင်းမဂ္ဂဇင်းမှာ '​ချမ်းငြိမ်း'
ရေးဖွဲ့တဲ့ “​မနက်ဖြန် အဝါရောင်ပန်းတွေပွင့်ရင်”
ရသစာတမ်းငယ်ကို People's Spring ကပြန်လည်​ဖော်ပြ​ပေးတာဖြစ်ပါတယ်။အနုရသကဲပြီးတော်လှန်​ရေးအတွက်အ​ထောက်အကူပြုတဲ့ စာ​ပေကဏ္ဍမျိုးစုံကို "The Call - ​ခေါ်သံ" အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ https://www.facebook.com/profile.php?id=100087677882749... မှာလည်းသွား​ရောက်ဖတ်ရှုနိုင်ပါတယ်)