သမ္မတဦးဝင်းမြင့်နဲ့ ဒေါ်အောင်ဆန်းစုကြည်တို့ကို နိုင်ငံ့ခေါင်းဆောင်တွေအဖြစ် ကုလ ဆက်လက် အသိအမှတ်ပြု

ဧပြီ-၃၊ ၂၀၂၆။ သော်မွန်/People’s Spring

ကုလသမဂ္ဂက အဖွဲ့ဝင်နိုင်ငံပေါင်း ၁၉၀ ကျော်ရဲ့ နိုင်ငံ့အကြီးအကဲ၊ အစိုးရခေါင်းဆောင်၊ နိုင်ငံခြားရေးဝန်ကြီးတွေကို အသိအမှတ်ပြုစာရင်းထုတ်ပြန်ရာမှာ မြန်မာနိုင်ငံရဲ့ နိုင်ငံ့အကြီးအကဲနေရာမှာ သမ္မတဦးဝင်းမြင့်၊ နိုင်ငံခြားရေးဝန်ကြီးနေရာမှာ နိုင်ငံတော်ရဲ့အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်တို့ကို ဆက်လက်ထားရှိပါတယ်။

မနေ့က ဧပြီ ၂ရက် နေ့စွဲနဲ့ အများပြည်သူသိရှိအောင် ထုတ်ပြန်လိုက်တဲ့ ကုလသမဂ္ဂရဲ့ ထုတ်ပြန်ချက်အရ ၂၀၂၀ အထွေထွေရွေးကောက်ပွဲ အနိုင်ရ အရပ်သားအစိုးရခေါင်းဆောင်တွေဖြစ်တဲ့ နိုင်ငံတော်သမ္မတဦးဝင်းမြင့်၊ နိုင်ငံတော်ရဲ့အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်တို့ကို မြန်မာနိုင်ငံရဲ့နိုင်ငံ့ခေါင်းဆောင်၊ အကြီးအကဲတွေအဖြစ် ဆက်လက်အသိအမှတ်ပြုထားတာလည်း ဖြစ်ပါတယ်။

လက်ရှိ နယူးယောက်မြို့ရှိ ကုလသမဂ္ဂဌာနချုပ်မှာ ပြည်သူလူထုရွေးကောက်တင်မြှောက်ထားတဲ့ အရပ်သားအစိုးရလက်ထက်က ခန့်အပ်ခဲ့တဲ့ အမြဲတမ်းကိုယ်စားလှယ်သံအမတ်ကြီး ဦးကျော်မိုးထွန်းကို ကုလသမဂ္ဂက မြန်မာနိုင်ငံကိုယ်စားပြုအဖြစ် ဆက်လက် အသိအမှတ်ပြုထားပါတယ်။

ဒီနေ့(ဧပြီ ၃ရက်) နေပြည်တော်မှာ အာဏာသိမ်းစစ်ခေါင်းဆောင် စိတ်ကြိုက်ဖွဲ့စည်းထားတဲ့ လွှတ်တော်ကနေ စစ်ခေါင်းဆောင်မင်းအောင်လှိုင်ကို သမ္မတအဖြစ် တင်မြှောက်ခဲ့ပါတယ်။ ၂၀၂၁ ဖေဖော်ဝါရီ ၁ ရက်မှာ စစ်ခေါင်းဆောင်မင်းအောင်လှိုင်က ဒီမိုကရေစီနည်းကျ ရွေးကောက်ခံအရပ်သားအစိုးရခေါင်းဆောင်တွေကို ဖမ်းဆီးပြီး အာဏာသိမ်းယူခဲ့ပါတယ်။ လက်ရှိထိလည်း လူထုခေါင်းဆောင် ဒေါ်အောင်ဆန်းစုကြည်နဲ့ သမ္မတဦးဝင်းမြင့်တို့ကို စစ်တပ်က ဖမ်းဆီးချုပ်နှောင်ထားဆဲပါ။

စစ်တပ်အာဏာသိမ်းမှုကို ကုလသမဂ္ဂအပါအဝင် ကမ္ဘာ့နိုင်ငံအများအပြားက ကန့်ကွက်ရှုတ်ချပြီး စစ်ခေါင်းဆောင်မင်းအောင်လှိုင်အပါအဝင် အာဏာသိမ်းမှုမှာပါဝင်ပတ်သက်သူတွေကို အမေရိကန်၊ ဗြိတိန်၊ ကနေဒါ၊ ဥရောပသမဂ္ဂ၊ သြစတြေးလျ၊ နယူးဇီလန် စတဲ့နိုင်ငံတွေက ပိတ်ဆို့အရေးယူဒဏ်ခတ်မှုတွေ ပြုလုပ်ခဲ့ကြပါတယ်။

အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီး ဒေါ်ဇင်မာအောင်က နိုင်ငံတော်သမ္မတဦးဝင်းမြင့်ဓာတ်ပုံနဲ့အတူ ‘OUR PRESIDENT’(ငါတို့ရဲ့သမ္မတကြီး)လို့ လူမှုကွန်ရက်မှာ ရေးသားဖော်ပြပါတယ်။

ရန်ကုန်မြို့နေ ပြည်သူတစ်ဦးကလည်း နေပြည်တော်မှာ စစ်ခေါင်းဆောင်သမ္မတလုပ်တာကို စိတ်မဝင်စားကြောင်းနဲ့ သူ့ကို နိုင်ငံ့ခေါင်းဆောင်အဖြစ် ပြည်သူတွေက မသတ်မှတ်ကြောင်း မှတ်ချက်ပြုပါတယ်။

အပြည်ပြည်ဆိုင်ရာလွတ်ငြိမ်းချမ်းသာခွင့်အဖွဲ့(Amnesty International)က ‘ပြည်သူကို မတရားဗုံးကြဲ၊ သတ်ဖြတ်သူကို သမ္မတအဖြစ် ရွေးကောက်၍ မရ၊ တရားခွင်သို့သာ ပို့ရမည်’လို့ နေပြည်တော်မှာ မင်းအောင်လှိုင် သမ္မတဖြစ်အပြီး ထုတ်ပြန်ပါတယ်။

ဖားကန့်မှာ စစ်တပ်ရှေ့တန်းစခန်း ၆ခုကို KIA၊KPDFသိမ်းပိုက်

တိုက်ပွဲဆက်ပြင်းထန်ပြီး စစ်ကောင်စီက ၂ရက်ဆက် ဗုံးကြဲ

ဧပြီ−၃၊၂၀၂၆။ဇော်ရမ်း/People's Spring

တိုက်ပွဲပြင်းထန်နေတဲ့ ကချင်ပြည်နယ်၊ ဖားကန့်ဒေသမှာ ၂ရက်အတွင်း စစ်ကောင်စီတပ်ရှေ့တန်းစခန်း ၆ခုကို ကချင်လွတ်လပ်ရေးတပ်မတော် (KIA)၊KPDF ပူးပေါင်းတပ်က သိမ်းယူထားပြီး ဒီ‌နေ့ ဧပြီ ၃ရက်မှာလည်း စစ်ကောင်စီက လေကြောင်းကနေ ဗုံးကြဲနေပါတယ်။

ဖားကန့်ဒေသက စစ်ကောင်စီတပ်ရဲ့စခန်းတွေကို ဧပြီ ၂ ရက်မနက် ၅နာရီကစပြီး KIA၊KPDFက တိုက်ခိုက်ခဲ့တာပါ။

ဒီကနေ့ဟာ တိုက်ပွဲ ၂ရက်မြောက်ဖြစ်ပြီး စစ်ကောင်စီတပ်ရှေ့တန်းစခန်း ၆ခုကို သိမ်းယူပြီးပြီလို့ KIA၊KPDFနဲ့ နီးစပ်သူက ပြောပါတယ်။

"စစ်ဆင်ရေးကို KIAက ဦးဆောင်ပြီး KPDF‌တွေအနီးကပ် တက်သိမ်းတာ" လို့ ၎င်းက ပြောပါတယ်။

မနေ့က ဧပြီ ၂ရက်တိုက်ပွဲမှာ လေကြောင်းကနေ ၆ကြိမ်ဗုံးကြဲခဲ့ပြီး ဒီနေ့လည်း နေ့လယ် ၁၂နာရီကျော်နဲ့ ၁နာရီ ကျော်မှာ လေကြောင်းကနေ ၂ကြိမ်ဗုံးကြဲသွားတယ်လို့ သတင်းရရှိပါတယ်။

ဖားကန့်မြို့နယ်က စစ်ကောင်စီတပ်စခန်း ၃ခုကို ဧပြီ ၂ရက်မှာ ကချင်လွတ်လပ်ရေးတပ်မတော်(KIA) ပူးပေါင်းတပ်က သိမ်းပိုက်နိုင်ခဲ့ကြောင်း KIAသတင်းပြန်ကြားရေးဌာန တာဝန်ခံဗိုလ်မှူးကြီးနော်ဘူက အတည်ပြုပါတယ်။

ဖားကန့်ဒေသနဲ့ ကချင်ပြည်နယ်အတွင်း စစ်ရေးအခြေအနေတွေ မေးမြန်းမှုအပေါ် ဗိုလ်မှူးကြီးနော်ဘူက ဒီကနေ့ နေ့လည်ပိုင်းမှာ အခုလို ပြောတာဖြစ်ပါတယ်။

“မနေ့က ဧပြီ ၂ရက်နေ့မှာ မနက် ၅နာရီကတည်းက တိုက်ပွဲဖြစ်တယ်။ ယူမာတို့ နောက် သင်္ချိုင်းကုန်းတွေပေါ့ အဲဒီဘက်မှာကာကင်းထိုင်နေတဲ့ စစ်ကော်မရှင်ရဲ့ ကာကင်းတွေ ၃ခု သိမ်းရတယ်တဲ့။ အဲဒီ ကာကင်းတွေကတော့ အရင်က KIAနဲ့ PDF တွေထိုင်နေတဲ့ ကာကင်းတွေဖြစ်ပါတယ်တဲ့။ စစ်ကော်မရှင်ဘက်က သိမ်းပိုက်ထားတဲ့ ကာကင်းတွေကို မနေ့က တော့ KIAနဲ့ ပူးပေါင်းတပ်တွေ သူတို့ ပြန်သိမ်းတာပေါ့။ “ လို့ ဗိုလ်မှူးကြီးနော်ဘူက ပြောပါတယ်။

ဒီနေ့ ဧပြီ ၃ရက်မှာ တိုက်ပွဲဆက်မရှိပေမယ့် မနေ့က ညနေပိုင်းမှာတော့ ဖားကန့်ဒေသကို စစ်ကောင်စီက လေကြောင်း တိုက်ခိုက်တာတွေရှိခဲ့တယ်လို့ ဗိုလ်မှူးကြီးနော်ဘူက ပြောပါတယ်။

မနေ့ကတိုက်ပွဲဖြစ်နေချိန်မှာ လေကြောင်းကနေဗုံးကြဲတဲ့အပြင် ဖားကန့်ဗျူဟာကုန်းအပါအဝင်လက်နက်ကြီးတပ်ဆင်ထားတဲ့ နေရာတွေကနေ စစ်ကောင်စီက ပစ်ခတ်လို့ ကလေးငယ်အချို့ပါဝင်ဒေသခံ ၆ဦး ဒဏ်ရာရခဲ့ပါတယ်။

လက်ရှိ ဖြစ်ပွား‌နေတဲ့တိုက်ပွဲအတွင်း စစ်ကောင်စီတပ် ထိခိုက်သေဆုံးမှုများပြီး KIA၊KPDF ပူးပေါင်းတပ်က ရဲဘော်တစ်ဦး ကျဆုံးထားပါတယ်။ တိုက်ပွဲတွေကြောင့် လုံးခင်းနဲ့ ဖားကန့်သွားတဲ့လမ်းပိုင်းကို အသုံးမပြုကြဖို့နဲ့ လေကြောင်းနဲ့လက်နက်ကြီးအန္တရာယ်သတိပြုကြဖို့ KIA၊KPDFက သတိပေးထားပါတယ်။

ဖားကန့်ဒေသကို စစ်ကောင်စီက လေကြောင်းတိုက်ခိုက်တာမှာ ဟုမ္မလင်းလေဆိပ်ကို အများဆုံးအသုံးပြုနေတယ်လို့ ဒေသခံတွေက ပြောပါတယ်။ကချင်ပြည်နယ်နဲ့ စစ်ကိုင်းတိုင်းအတွင်း မြို့တွေကို စစ်ကောင်စီတပ်က လေကြောင်းကနေတိုက်ခိုက်ရာမှာ အသုံးပြုနေတဲ့ ဟုမ္မလင်းလေတပ်ရဲ့ အန္တရာယ်ကို အထူးဂရုပြုကြဖို့ ကချင်လွတ်လပ်ရေးတပ်မတော်(KIA)က ပြီးခဲ့တဲ့ ဖေဖော်ဝါရီမှာ သတိပေးထားပါတယ်။

ပြီးခဲ့တဲ့ ဖော်ဖော်ဝါရီနဲ့ လက်ရှိမတ်လအတွင်းမှာ စစ်ကောင်စီတပ်က ကချင်ပြည်နယ်က ဖားကန့်၊ ဗန်းမော်၊ ရွှေကူ၊ အင်းတော်ကြီးနဲ့ စစ်ကိုင်းတိုင်းအတွင်းက ပင်လည်ဘူး၊ဗန်းမောက်၊ အင်းတော်၊ ဖောင်းပြင်၊ကောလင်း၊ ဝန်းသို၊ တန့်ဆည်၊ ကျွန်းလှ၊ ထီးချိုင့်မြို့နယ်တွေကို လေကြောင်းကနေ တိုက်ခိုက်ရာမှာ ဟုမ္မလင်းလေတပ်တက် ဂျက်ဖိုက်တာတွေ၊ ဂျိုင်ရိုကော်ပတာတွေအများဆုံးအသုံးပြုခဲ့တယ်လို့တော်လှန်ရေးအင်အားစုတွေက ပြောပါတယ်။

မြိုင်နဲ့ ပေါက်နယ်က စီမံခန့်ခွဲမှုဆိုင်ရာပြသနာဖြေရှင်းနိုင်မယ့် သဘောတူညီချက်တွေရဟု NUG ထုတ်ပြန်

■ရေနံနဲ့ ရေနံထွက် ပစ္စည်းတွေ ကြီးကြပ်ရေး အဖွဲ့ ကို ပူးတွဲဖွဲ့စည်းဖို့၊မကွေးဖက်ဒရယ်ယူနစ်အတွင်းရှိကာကွယ်ရေးအဖွဲ့အစည်းတွေကွပ်ကဲမှု စနစ်တ
ကျဖြစ်စေရေးပူးပေါင်း‌ဆောင်ရွက်ဖို့ဆုံးဖြတ်

ဧပြီ-၃ရက်၊၂၀၂၆။ထားမြတ်/People’s Spring

မကွေးဖက်ဒရယ်ယူနစ် ပခုက္ကူခရိုင်၊ မြိုင်နဲ့ ပေါက်မြိုနယ်အတွင်းရှိ စီမံခန့်ခွဲမှုဆိုင်ရာ ကိစ္စရပ်တွေနဲ့ ပတ်သက်ပြီး အမျိုးသားညီညွတ်ရေးအစိုးရ
(NUG)တာဝန်ရှိသူတွေနဲ့ ကြားကာလမကွေးဖက်ဒရယ်ယူနစ်အစိုးရတာဝန်ရှိသူတွေဒီကနေ့မှာ ထပ်
မံတွေ့ဆုံဆွေးနွေးခဲ့ပြီး လတ်တလောဖြစ်ပေါ်နေတဲ့ အခြေအနေတွေ ဖြေရှင်းနိုင်မယ့် သဘောတူညီမှုများရရှိခဲ့တယ်လို့ NUGက ထုတ်ပြန်ပါတယ်။

မြိုင်နဲ့ ပေါက်မြို့နယ်အတွင်းရှိစီမံခန့်ခွဲမှုဆိုင်ရာ ကိစ္စရပ်တွေနဲ့ ပတ်သက်ပြီး ဧပြီ ၂ရက်မှာ ဆွေး
နွေးမှုတွေ ပြုလုပ်ခဲ့သလိုဧပြီ ၃ရက်မှာလည်း
ဆက်လက်ဆွေးနွေးရာ ရေနံနဲ့ရေနံထွက် ပစ္စည်းတွေကြီးကြပ်ရေး အဖွဲ့ ကို ပူးတွဲဖွဲ့စည်းဖို့၊ မကွေးဖက်ဒရယ်ယူနစ်အတွင်းရှိ ကာကွယ်ရေး အဖွဲ့အစည်းတွေ ကွပ်ကဲမှု စနစ်တကျ ဖြစ်စေရေး၊ အမှုအခင်းများ ဖြေရှင်းဆောင်ရွက်ရေး၊ လုံခြုံ
ရေးနဲ့ တရားဥပဒေ စိုးမိုးရေးဆိုင်ရာကိစ္စရပ်များပူးပေါင်းဆောင်ရွက်ဖို့ ဆွေးနွေးဆုံးဖြတ်ခဲ့ကြတယ်လို့ အသိပေးပါတယ်။

အမျိုးသားညီညွတ်ရေးအစိုးရပြည်ထောင်စုဝန်
ကြီးချုပ်ရုံး ပြည်ထောင်စုဝန်ကြီး ဒေါက်တာဇော်ဝေစိုး၊လျှစ်စစ်နဲ့ စွမ်းအင်ဝန်ကြီးဌာနပြည်ထောင်
စုဝန်ကြီး ဦးစိုးသူရထွန်း ဦးဆောင်တဲ့ တာဝန်ရှိသူများမကွေးဖက်ဒရယ်ယူနစ်ကြားကာလအစိုးရ ဝန်ကြီးချုပ်၊ဒုဝန်ကြီးချုပ်နဲ့မကွေးဖက်ဒရယ်ယူနစ်လွှတ်တော်မှ ကိုယ်စားလှယ်တဦး တို့ ဦးဆောင်တဲ့ တာဝန်ရှိသူများ ပူးတွဲ၍ မကွေးဖက်ဒရယ်ယူနစ် ရေနံနဲ့ ရေနံထွက်ပစ္စည်းများဆိုင်ရာ ကြီးကြပ်ရေးအဖွဲ့ကို ဖွဲ့စည်းသွားမယ်လို့အသိ​ပေးပါတယ်။

“အဆိုပါ အဖွဲ့မှနေ၍ ရေနံမြေ၊ ရေနံလုပ်ငန်းများနှင့်ပတ်သက်သည့် စီမံခန့်ခွဲမှုဆိုင်ရာ ကိစ္စရပ်များကို ကြီးကြပ်ဆောင်ရွက်သွားကြရန် အတည်ပြုဆုံးဖြတ်ခဲ့ကြသည်” လို့ ထုတ်ပြန်ချက်မှာ ဖော်ပြပါတယ်။

NUGနဲ့ မကွေးဖက်ဒရယ်ယူနစ်တို့ရဲ့မနေ့ကထုတ်ပြန်တဲ့ ပူးတွဲကြေညာချက်မှာ မြိုင်နဲ့ ပေါက်က စီမံခန့်ခွဲရေးဆိုင်ရာ ပြဿနာကိုလူထုမထိခိုက်စေတဲ့ နည်းနာတွေနဲ့ အမြန်ဆုံးပြေလည်အောင်ဆောင်
ရွက်နိုင်ရေး အလေးထားဆွေးနွေးခဲ့ကြောင်း အ
သိပေးပြီးအဆင်ပြေမှုရရှိတဲ့အထိ စဉ်ဆက်မပြတ် ဆက်လက်ညှိနှိင်းဆွေးနွေးသွားကြဖို့ သဘောတူဆုံးဖြတ်ခဲ့ကြောင်း​ထုတ်ပြန်ပါတယ်။

"ဒီနေ့မှာဆိုရင် ရေနံနှင့် ရေနံထွက်ပစ္စည်းများဆိုင်ရာကြီးကြပ်ရေးအဖွဲ့ ဆိုတာကို အဖွဲ့ကိုဖွဲ့ပြီးတော့ ၊အဲဒီ့အဖွဲ့ထဲမှာဆိုရင်လည်း ဖက်ဒရယ်ယူနစ်အစိုးရဘက်ကလည်းပါမယ်။ ဒီဘက်အမျိုးသားညီညွှတ်ရေးအစိုးရဘက်ကလည်းပါမယ်။ အဲဒီလိုမျိုးပူးပေါင်းပြီး ကြီးကြပ်ရေးအဖွဲ့ဖွဲ့ပြီး‌ တော့ စီမံခန့်ခွဲ‌ ရေးဆောင်ရွက်သွားမယ်ဆိုတဲ့ဟာမျိုးတွေ အတည်ပြုဆုံးဖြတ်ခဲ့တာရှိပါတယ်။ အဲဒိလိုပဲ မကွေး ဖက်ဒရယ်ယူနစ်အတွင်းမှာဆိုရင်လည်း ပြည်သူ့ကာကွယ်ရေးတပ်မတော် PDF တွေရှိတယ်။ ပကဖတွေရှိတယ်ပေါ့နော်။ ဒီကာကွယ်ရေးအဖွဲ့အစည်းတွေ ကွပ်ကဲမှုတွေ စနစ်တကျဖြစ်စေဖို့ ကိစ္စတွေရှိတယ်"လို့ NUG ဝန်ကြီးချုပ်ရုံး​ပြော​ရေးဆိုခွင့်ရှိသူ ဦး​နေဘုန်းလတ်က​ပြောပါတယ်။

ဆက်လက်ပြီး​တော့လည်းဝန်ကြီးချုပ်ရုံး​ပြော​ရေးဆိုခွင့်ရှိသူက"အဲဒီလိုပဲ အရင်ကာလတွေတုန်းကဖြစ်ခဲ့တဲ့ ကိစ္စတွေပေါ့ ။ ဒါတွေဆိုလည်းပဲ ဖြေရှင်းဆောင်ရွက်ဖို့ လိုအပ်နေတာတွေရှ်ိတယ်။ ပြီးတော့ မကွေးဖက်ဒရယ်ယူနစ်မှာ ပြည်သူလူထုအတွက် တရားဥပဒေစိုးမိုးရေးပေါ့ ဒါတွေလည်းပဲ ဆောင်ရွက်ဖို့ရှိတယ်။အဲဒီလိုဆောင်ရွက်တဲ့အခါမှာ အရင်တုန်းကတော့ အမျိုးသားညီညွှတ်ရေးအစိုးရ ပြည်ထောင်စုအစိုးရအနေနဲ့ လုပ်ကိုင်ဆောင်ရွက်တာတွေရှိတယ်။ အခုကျတော့ ဖက်ဒရယ်ယူနစ်အစိုးရလည်းပေါ်ပေါက်လာပြီဖြစ်တဲ့အတွက် ကြောင့်မိုလို့ ကျွန်တော်တို့ ဒီ မကွေးဖက်ဒရယ်ယူနစ်ကြားကာလ အစီအမံဆိုင်ရာဥပဒေဆိုတာကိုလည်း မကွေးဖက်ဒရယ်ယူနစ်လွှတ်တော်ကအတည်ပြုထားပြီဖြစ်တယ်။အဲဒီ့ဥပဒေထဲက ရေးဆွဲထားတဲ့ ဥပဒေပုဒ်မတွေနဲ့အညီ ပူးပေါင်းဆောင်ရွက်သွားကြဖို့ ဆွေးနွေးဆုံးဖြတ်ခဲ့တာတော့ရှိပါတယ်"လို့​ပြောပါတယ်။

မ​ကွေးတိုင်း၊မင်းလှမြို့နယ်မှာရှိတဲ့ ​ရေနံတွင်း​တွေကို စစ်တပ်အာဏာမသိမ်းခင်က​တွေ့ရစဥ်။
ဓါတ်ပုံ-CJ

ရေးမြို့နယ်အတွင်း စစ်တပ်ကို တော်လှန်ရေးပူးပေါင်းတပ် နှစ်ရက်ဆက် တိုက်ခိုက်

ဧပြီ-၃၊ ၂၀၂၆။ ထားမြတ်/People’s Spring

မွန်ပြည်နယ်၊ ရေးမြို့နယ် အောင်သပြေကျေးရွာအနီးရှိ စစ်ကောင်စီတပ်စစ်ကြောင်းကို မွန်-တနင်္သာရီ ညီနောင်ဒရုန်းတပ်ပေါင်းစုနဲ့ တော်လှန်ရေးမဟာမိတ်ပူးပေါင်းတပ်ဖွဲ့များက တိုက်ခိုက်ရာ သေဆုံးထိခိုက်ရှိခဲ့တယ်လို့ မွန် ပြည်တော်လှန်ရေးတပ်(MSRF)က သတင်းထုတ်ပြန်ပါတယ်။

ရေးမြို့နယ်အတွင်း ကာလရှည်စစ်ကြောင်းထိုးနေတဲ့ စစ်ကောင်စီတပ်ကို မတ်လ ၃၀နဲ့ ၃၁ရက်မှာ တော်လှန်ရေးတပ်ဖွဲ့တွေက ထပ်မံ တိုက်ခိုက်ခဲ့တာပါ။

မတ်လ ၃၀ရက် အောင်သပြေကျေးရွာအနီး ဗုံးသီး ၁လုံး ကြဲချတိုက်ခိုက်မှုအတွင်း စစ်ကောင်စီ ၁ဦးသေဆုံးကာ မတ်လ ၃၁ရက် ည အောင်သပြေရွာအနီး စစ်ကောင်စီတပ်ကို ဒရုန်းနဲ့ ဗုံးသီး ၆လုံး ကြဲချခဲ့ရာ စစ်ကောင်စီ ၄ဦး သေဆုံးပြီး ၁၁ဦး ဒဏ်ရာရခဲ့တယ်လို့ ထုတ်ပြန်ထားပါတယ်။

စစ်ဆင်ရေးကို မွန်-တနင်္သာရီ ညီနောင်ဒရုန်းတပ်ပေါင်းစုနဲ့ တော်လှန်ရေးမဟာမိတ် ပူးပေါင်းတပ်က တိုက်ခိုက်ခဲ့တာလို့ ဆိုပါတယ်။ ညီနောင်ဒရုန်းတပ်ပေါင်းစုကို MSRF နဲ့ နည်းဗျူဟာ (၃၃) ကွပ်ကဲမှုအောက်ရှိ ကံပေါက်ပြည်သူ့ကာကွယ်ရေးတပ်ရင်း (အမှတ်-၈၀၀၂ တပ်ရင်း)(KBDF)၊ ရေးပြောက်ကျားတပ်ရင်း (အမှတ်-၈၀၀၁ တပ်ရင်း)(YGF) တို့က ဒရုန်းတပ်ဖွဲ့တွေနဲ့ စုစည်းထားတာဖြစ်ပြီး တော်လှန်ရေးမဟာမိတ်ပူးပေါင်းတပ်မှာ MSRF၊ ရေးပြည်သူ့ကာကွယ်ရေးတပ် (YPDF)၊ ရာမညမွန်တပ်တော် (RMA) (၉၀၁) တပ်ရင်း၊ KNLA တပ်ရင်း (၂၇) တပ်ခွဲ (၁)နဲ့ ရေး‌ပြောက်ကျားတပ် (YGF)အမှတ် (၈၀၀၁) ချေမှုန်းရေးတပ်ခွဲ တို့ ပူး‌ပေါင်းပါဝင်ခဲ့တယ်လိုပ ဖော်ပြပါတယ်။

စစ်ကောင်စီတပ်ဟာ ရေးမြို့နယ်ကို အင်အားအများအပြားနဲ့ စစ်ကြောင်းထိုးလာလို့ တော်လှန်ရေးပူးပေါင်းတပ်တွေက ဖေဖော်ဝါရီနဲ့ မတ်လအတွင်းမှာလည်း အကြိမ်ကြိမ် တိုက်ခိုက်ခဲ့ပါတယ်။ ထိတွေ့တိုက်ပွဲတွေဖြစ်ပွားခဲ့သလို စစ်ကောင်စီ စစ်ကြောင်းကို တိုက်ခိုက်တာ၊ စစ်ကောင်စီ တပ်စွဲရာနေရာတွေကို တိုက်ခိုက်တာတွေလုပ်ဆောင်ခဲ့ရာ စစ်ကောင်စီတပ်ဖွဲ့ဝင်တွေသေဆုံးထိခိုက်ရှိခဲ့ပါတယ်။ စစ်ဆင်ရေးအတွင်း တော်လှန်ရေးရဲဘော်အချို့လည်း ကျဆုံးထိခိုက်ရှိခဲ့ပါတယ်။

(မွန်ပြည်တော်လှန်ရေးတပ်(MSRF)က ရဲဘော်တွေကို တွေ့ရစဉ်။ ဓာတ်ပုံ - MSRF)

ဖားကန့်တပ်မကုန်း KIA ဒရုန်းနဲ့ တိုက်ခိုက်လို့ မီးလောင်နေ

ဧပြီ ၃၊ ၂၀၂၆။ ထားမြတ်/People’s Spring

ကချင်ပြည်နယ်၊ ဖားကန့်မြို့ရှိ စစ်ကောင်စီရဲ့ တပ်မကုန်းကို ကချင်လွတ်လပ်ရေးတပ်မတော်(KIA)ပူးပေါင်းတပ်က တိုက်ခိုက်ခဲ့ရာ အခုညပိုင်းအထိ မီးလောင်နေဆဲဖြစ်ဟု ကချင်စစ်ရေး သတင်းရင်းမြစ်က ပြောပါတယ်။

ဧပြီ ၃ရက် ညနေပိုင်းမှာ တိုက်ခိုက်မှု လုပ်ဆောင်ခဲ့တာလို့ ဆိုပါတယ်။

“ဒီညနေ ဖားကန့်မြို့ စခတပ်မကုန်းကို KIA အသေခံဒရုန်းနဲ့တိုက်ခိုက်တာ ညမိုးချုပ်အထိ မီးလောင်နေတယ်။ အခုည ၈နာရီခွဲ မီးက ပိုပြီး ပြင်းထန်လာနေတယ်” လို့ ကချင်စစ်ရေး သတင်းရင်းမြစ်က ပြောပါတယ်။

ဖားကန့်တပ်မကုန်းမီးလောင်မှု အခြေအနေနဲ့ ဒေသစစ်ရေးအခြေအနေတွေ ဆက်လက်စုံစမ်းနေဆဲဖြစ်ပါတယ်။

KIAနဲ့ KPDF ပူးပေါင်းတပ်ဟာ ဧပြီ ၂ရက်ကလည်း ဖားကန့်မြို့နယ်က စစ်ကောင်စီ တပ်စခန်းတွေကို တိုက်ခိုက်သိမ်းပိုက်ခဲ့ပါတယ်။ တပ်စခန်း ၃ခုကို သိမ်းပိုက်ထားနိုင်ခဲ့ဟု KIA ဘက်က အတည်ပြုထားသလို သတင်းရင်းမြစ်အချို့ကလည်း စစ်ကောင်စီရဲ့ တပ်စခန်းနေရာ ၆ခုထိ သိမ်းပိုက်နိုင်ပြီလို့ ပြောပြထားပါတယ်။

သိမ်းပိုက်ထားတဲ့ နေရာတွေဟာ အရင်က KIA ရဲ့ နေရာတွေဖြစ်ပြီး အခုပြန်လည်သိမ်းပိုက်နိုင်တာဖြစ်တယ်လို့ ပြောပါတယ်။

KIA ပူးပေါင်းတပ်နဲ့ စစ်တပ်ဟာ ဖားကန့်မြို့နယ်အပြင် ဗန်းမော်နဲ့ ဝိုင်းမော်မြို့နယ်တွေမှာလည်း တိုက်ပွဲဖြစ်ပွားမှု ရှိနေတယ်လို့ KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောပါတယ်။

အဲဒီဘက်မှာတော့ တိုက်ပွဲကြီးတွေ မဟုတ်ဘဲ စစ်တပ်က ထိုးစစ်ဆင်လာလို့ တိုက်ပွဲတွေဖြစ်နေတာလို့ အသိပေးပါတယ်။

မင်းအောင်လှိုင်သမ္မတဖြစ်ပြီးနာရီပိုင်းအကြာ မြောင်မြို့နယ် နဘက်ရွာကို ဗုံးကြဲတိုက်ခိုက်လို့ ပြည်သူ ၄ဦး ထိခိုက်

​ဧပြီ−၃၊ ၂၀၂၆ ဇေအောင်/People's Spring

အာဏာသိမ်းစစ်ခေါင်းဆောင်မင်းအောင်လှိုင်ကို စစ်တပ်လွှတ်တော်က သမ္မတအဖြစ် တင်မြှောက်ပြီး နာရီပိုင်းအကြာမှာ စစ်ကိုင်းတိုင်း၊ မြောင်မြို့နယ်က နဘက်ကျေးရွာကို လေကြောင်းတိုက်ခိုက်ခဲ့လို့ အရပ်သားပြည်သူ ၄ ဦး ထိခိုက်ဒဏ်ရာရပြီး အဆောက်အအုံအချို့ ပျက်စီးဆုံးရှုံးခဲ့ကြောင်း သတင်းရရှိပါတယ်။

အာဏာသိမ်းစစ်ခေါင်းဆောင် မင်းအောင်လှိုင်ကို သမ္မတအဖြစ် တင်မြှောက်အပြီး နာရီပိုင်းအကြာ ​ဒီကနေ့ ဧပြီ ၃ ရက် ညနေ ၅ နာရီခန့်မှာ မကွေးလေတပ်စခန်းကနေ တက်လာတဲ့ ဂျက်ဖိုက်တာ (Jet Fighter) ၂စီးဟာ မြောင်မြို့နယ်၊ နဘက်ကျေးရွာကို လေကြောင်းကနေ ဗုံးကြဲတိုက်ခိုက်ခဲ့တာဖြစ်ကြောင်း ဒေသခံတွေက ပြောပါတယ်။

လေကြောင်းတိုက်ခိုက်မှုကြောင့် ကျေးရွာအတွင်းရှိ အရပ်သားပြည်သူ ၄ ဦး ဗုံးစထိမှန်ဒဏ်ရာများ ရရှိခဲ့ကြောင်း မြောင်မြို့နယ် T.G.R. သတင်းမှန်ပြန်ကြားရေးရဲ့ တာဝန်ရှိသူက ပြောပါတယ်။

"ပြည်သူ ၄ ယောက်ထိပါတယ်။ ကျား ၂ ယောက် မ ၂ ယောက် ပါ။ မ ၂ ယောက်က စိုးရိမ်ရပါတယ်"လို့ အထက်ပါတာဝန်ရှိသူက ပြောပါတယ်။

ဒါ့အပြင် ကျေးရွာအတွင်းရှိ နေအိမ် ၂လုံးနဲ့စာသင်ကျောင်း ထိမှန်ပျက်စီးခဲ့ကြောင်း ဒေသခံတွေက ပြောပါတယ်။

​လက်ရှိမှာ ဒေသခံတွေအနေနဲ့ လေကြောင်းအန္တရာယ်ကြောင့် ဘေးလွတ်ရာသို့ တိမ်းရှောင်နေကြရပြီး ဒဏ်ရာရရှိသူတွေကို ဆေးကုသမှုပေးဖို့ ကြိုးစားနေတယ်လို့ သိရပါတယ်။

မြောင်မြို့နယ်က နဘတ်ကျေးရွာဟာ ပြီးခဲ့တဲ့ မတ်လ ၂၀ ရက်ကလည်း လေကြောင်းတိုက်ခိုက်ခံရပြီး ရက်သားကလေးတစ်ဦးနဲ့ အမျိုးသမီးတစ်ဦး သေဆုံးခဲ့ပါသေးတယ်။

စစ်တပ်ဟာ ယခုရက်ပိုင်းအတွင်း အရာတော်၊ ဘုတလင်နဲ့ မုံရွာမြို့နယ်က ဆေးခန်းတွေကိုပါ လေကြောင်းတိုက်ခိုက်မှုတွေပြုလုပ်နေပြီး ပြည်သူထိခိုက်သေဆုံးမှုတွေ ရှိနေပါတယ်။

(မတ်လ ၂၀ ရက်က နဘတ်ကျေးရွာ လေကြောင်းတိုက်ခိုက်ခံရပြီးနောက် တွေ့ရစဥ်။ ဓာတ်ပုံ − မြောင်မြို့နယ် T. G. R. သတင်းမှန် ပြန်ကြားရေး

စေတုတ္တရာမြို့မရဲစခန်းအနီးက စစ်တပ်ဂိတ်စခန်းကို တော်လှန်ရေးတပ် တိုက်ခိုက်

ဧပြီ−၃၊ ၂၀၂၆။မိုမို/People's Spring

မကွေးတိုင်း၊ စေတုတ္တရာမြို့မရဲစခန်းအနီးက စစ်တပ်ဂိတ်စခန်းကို တိုက်ခိုက်ခဲ့တယ်လို့ မြေလတ်လွတ်မြောက်ရေးတပ်တော်(CLLA)က ထုတ်ပြန်ပါတယ်။

ဧပြီ ၁ ရက် ညပိုင်းက တိုက်ခိုက်ခဲ့တဲ့ အဲဒီဂိတ်စခန်းမှာ စစ်သားနဲ့ ပျူစောထီး ၁၅ ဦးခန့် ရှိပြီး စေတုတ္တရာမြို့နဲ့ ငဖဲမြို့ကို ဆက်သွယ်ထားတဲ့ လမ်းမကြီးပေါ် မှာ တည်ရှိတာလို့ ဆိုပါတယ်။

"ဒီဂိတ်က နေ ပေါ်တာဆွဲတာ ငွေညှစ်တာတွေ အများဆုံး လုပ်တယ်လို့ ပြည်သူတွေက ပြောပါတယ် ။ပြည်သူတွေရဲ့ သတင်းပေးချက်အရ ကျနော်တို့ မြေလတ်လွတ်မြောက်ရေးတပ်တော်မှ ဝင်ရောက်ပစ်ခတ်တိုက်ခဲ့ ခြင်းဖြစ်ပါတယ်"လို့ CLLA တာဝန်ရှိသူက ပြောပါတယ်။

တိုက်ခိုက်မှုမှာ စစ်တပ်က သုံးဦးသေပြီး ငါးဦးဒဏ်ရာရတယ်လို့ ဆိုပါတယ်။ဒါပေမယ့် လူထုနွေဦးက သီးခြား အတည်မပြုနိုင်သေးပါဘူး။

"အဲ့အဖွဲ့ ဖွဲ့စည်းတာ ရှစ်လလောက်တော့ ရှိပြီ။သင်တန်းနဲ့ နည်းပညာကိုက CB Chin Brother အဖွဲ့က ရယူရတာ"လို့ မကွေးတိုင်းစစ်ရေးသတင်းရင်းမြစ်က ပြောပါတယ်။

စေတုတ္တရာအပါအဝင် မြေလတ်ဒေသအဖြစ် အသိများတဲ့ မကွေးတိုင်းအတွင်း မြို့နယ်တွေက စစ်တပ်အရင်းအမြစ်တွေကို ဖြတ်တောက်နိုင်ဖို့ရည်ရွယ်တယ်လို့ CLLA တာဝန်ရှိသူက ပြောပါတယ်။

စေတုတ္တရာမြို့နယ်မှာ လေကြောင်းရန်ကာကွယ်ရေးလက်နက်တွေထုတ်တဲ့(ကပစ−၂၀)စက်ရုံအခြေစိုက်ထားပါတယ်။ဒါ့အပြင် စစ်တပ်နဲ့ ပျူစောထီး အင်အား ၄၀၀ ဝန်းကျင်ရှိပါတယ်။

(မြေလတ်လွတ်မြောက်ရေးတပ်တော်(CLLA)က ရဲဘော်တွေကို တွေ့ရစဉ်။ ဓာတ်ပုံ − CLLA)

■​မေးမြန်းခန်း

"ဒါ(ဖက်ဒရယ် ဒီမိုက​ရေစီပြည်​ထောင်စု​ပေါ်ထွန်း​​ရေးဦး​ဆောင်​ကောင်စီ-SCEF)က​နွေဦး​တော်လှန်​ရေး​အောင်မြင်ဖို့ အတွက်အဆုံးအဖြတ်လည်းဖြစ်တယ်"

■ဦးမင်းကိုနိုင်နဲ့ ​မေးမြန်းခန်း


စစ်တပ်စိတ်တိုင်းကျစီစဥ်ခဲ့တဲ့ ​ရွေး​ကောက်ပွဲက​နေ တက်လာတဲ့ စစ်တပ်လွှတ်​တော်က ဒီ​နေ့မှာ အာဏာသိမ်း​ခေါင်း​ဆောင်ဗိုလ်ချုပ်မှူးကြီးမင်း​အောင်လှိုင်ကို သမ္မတအဖြစ်​ရွေးချယ်တင်​မြှောက်လိုက်တယ်လို့​ကြေညာပါတယ်။ ​ရွေး​ကောက်ခံအရပ်သားအစိုးရကို မဲခိုးတယ်လို့ လိမ်လည်စွပ်စွဲပြီး အာဏာသိမ်းတာဟာ မင်း​အောင်လှိုင် သမ္မတလုပ်ချင်လို့ဆိုတဲ့အဖြစ်မှန်ဟာ အာဏာသိမ်းပြီး ငါးနှစ်​ကျော်အကြာ ၂၀၂၆ ဧပြီ ၃ ရက်မှာထင်ရှားခဲ့ပါတယ်။ ပြည်သူအများစုက​တော့ မင်း​အောင်
လှိုင်သမ္မတလုပ်ချင်လို့ အာဏာသိမ်းတယ်ဆိုတာကို အ​စောကြီးကတည်းကသိခဲ့ကြတာမို့ အမှန်တရားအတွက်ရပ်တည် ​တော်လှန်ရင်း မြန်မာ့သမိုင်းတစ်​လျှောက်အကြီးမားဆုံး လူထု​တော်လှန်​ရေးဖြစ်တဲ့​နွေဦး​တော်လှန်​​ရေး​ပေါ်​ပေါ်လာတာလည်းဖြစ်ပါတယ် ။

စစ်အုပ်စုကကသူတို့ကြိုတင်စီစဥ်ထားတဲ့အတိုင်း မင်း​အောင်လှိုင်ကို သမ္မတအဖြစ်​ကြေညာတဲ့​နေ့မှာ
ရှစ်​လေးလုံးလူထုအ​ရေး​တော်ပုံကထွက်​ပေါ်လာတဲ့​ခေါင်း​​ဆောင်တစ်ဦးဖြစ်သလို ၊ လူထု​​တော်လှန်​ရေးတိုင်းမှာ ဦး​ဆောင်ပါဝင်​ခဲ့၊ ပါဝင်​နေတဲ့ ၈၈ မျိုးဆက်​ကျောင်းသား​ခေါင်း​ဆောင် ဦးမင်းကိုနိုင်ကို People's Spring က ဆက်သွယ်​မေးမြန်းထားပါတယ် ​။

​နေ့သစ်/People's Spring

​မေး-မင်း​အောင်လှိုင်သမ္မတလုပ်ချင်တာနဲ့ ပြည်သူ​သောင်းချီသတ်ဖြတ်၊ ​​နေအိမ်သိန်းချီမီးရှို့၊ပြည်သူသန်း​ပေါင်းများစွာထွက်​ပြေး​အောင်လုပ်တယ်။
တစ်နိုင်ငံလုံးကိုဖျက်ဆီးပြီး​​တော့ အခုလို စစ်တပ်ရဲ့ဟန်ပြလွှတ်​တော်က သမ္မတဖြစ်ပြီလို့​ကြေညာလာတဲ့အ​ပေါ် ဘယ်လိုမှတ်ချက်ပြုချင်ပါလဲ။ လူတစ်​ယောက် သမ္မတရူးတာနဲ့ တိုင်းပြည်ကို အခုလိုဖျက်ဆီးခဲ့တဲ့အ​​ပေါ် ဘယ်လိုမြင်ပါလဲ။


​ဖြေ-ဒါ ၂၀၂၀ ‌စစ်မှန်တဲ့ရွေးကောက်ပွဲပြီးကတည်းက အားလုံးမှတ်မိကြဦးမှာပေါ့နော်။ အနိုင်ရပါတီကိုလာပြီး ခြိမ်းခြောက်တောင်းဆိုတာ ။ သူသမ္မတဖြစ်ဖို့ကိစ္စ ။ အဲဒါကို အဲဒီ့တုန်းကပိတ်ပြီးငြင်းတဲ့လူတွေကရှိတယ်။ မဲစာရင်းအကြောင်းပြပြီး တော့ ။ဘယ်လိုမှတောင်းဆိုလို့မရတဲ့အခါမှာ အာဏာကိုလုလိုက်တာ။ သိမ်းလိုက်တာ။ တက်ပြီးတော့လုတာ။ အဲဒီ့ဟာက အခုပေါ်ပြီပေါ့။ သူဒါကိုမရလို့ အာဏာလုခဲ့တယ်ဆိုတာ ပေါ်သွားပြီပေါ့။ တကယ်တော့ ဒီပြည်သူလူထုရွေးချယ်တင်မြှောက်ထားတဲ့အနိုင်ရပါတီကလည်း ပြည်သူကိုသစ္စာဖောက်ပြီးတော့ အဲဒီလိုအနိုင်ကျင့်တိုင်း ပေးလို့မရဘူး။ အခုတော့ပေါ်ပြီပေါ့ဗျာ။ ဒါပါပဲ။




​​မေး-​စစ်အာဏာရှင်​တွေလက်​အောက်မှာ စစ်အုပ်စုကစစ်ရာဇဝတ်မှု​တွေ အများကြီးကျူးလွန်ခဲ့တယ်။ဒါ​ပေမယ့်အစဥ်အဆက် အ​ရေးယူမခံခဲ့ရပဲ ပြစ်မှု​တွေက​နေ ကင်းလွတ်ခွင့်ရခဲ့တယ်။ အခုတကြိမ်မှာ​ရော စစ်တပ်က ပြစ်မှု​တွေက​နေအ​ရေးယူမခံရပဲ ကင်းလွတ်ခွင့်ရမယ်လို့ထင်လား။ဘာ​ကြောင့်လဲ ။

​ဖြေ-ကျွန်‌တော်တို့ တစိုက်မတ်မတ် တောင်းဆိုနေဝာာ ပြောနေတာလည်း ဒါပဲလေ။ စစ်ရာဇဝတ်မှုကျူးလွန်တဲ့သူတွေကို အရေးမယူဘူးဆိုရင် သူတို့ ထပ်ခါ ထပ်ခါ ကျူးလွန်နေမှာပေါ့။ ကျူးလွန်တိုင်းအရေးမခံရဘူးကွာ ။ ဒါဆိုလို့ရှိရင်တော့ အချိန်မရွေးထပ်ပြီးကျူးလွန်နေမှာပေါ့။ ဒါကအဓိကပါ။ နောက်တစ်ခုက ဒါကိုထင်မြင်ချက်တွေ အနေနဲ့ မပြောချင်ဘူး။ မဖြစ်ဖြစ်အောင်ကိုလုပ်ရမယ်။ အလုပ် လုပ်ကို လုပ်ရမှာပေါ့။


​မေး-တိုင်းရင်းသား​တော်လှန်​ရေးအဖွဲ့​တွေနဲ့ NUG ၊CRPH တို့ပူး​ပေါင်းဖွဲ့စည်းလိုက်တဲ့ ဖက်ဒရယ် ဒီမိုက​ရေစီ ပြည်​ထောင်စု​ပေါ်ထွန်း​ရေးဦး​ဆောင်​ကော်မတီ-SCEF က ​​​နွေဦး​တော်လှန်​ရေးအတွက်ဘယ်​လောက်အ​ရေးကြီးတယ်လို့သုံးသပ်လဲ။ဘာ​ကြောင့်ပါလဲ။

​ဖြေ- SCEF ကနွေဦးတော်လှန်ရေးအတွက်ဘယ်
လောက်အရေးကြီးလဲဆိုရင် အပြည့်အရေးကြီးတယ်။ ဒါသည် ကျွန်တော်တို့ တော်လှန်ပြည်သူတစ်ရပ်လုံးက တစိုက်မတ်မတ် ဒါကိုလည်းတောင်းဆိုလာတာ။ ဒီအတွက်လည်း အားစိုက်ခဲ့ရတာတွေ အများကြီး။ လပေါင်းများစွာညှိခဲ့ရတယ်။ သည့်မတိုင်ခင်ကလည်း နှစ်နဲ့ချီပြီးတော့ အကြိုညှိခဲ့ရတယ်။ အများကြီးလုပ်ခဲ့ရတာဗျ။ ဘာဖြစ်လို့လည်းဆိုတော့ တကယ့်အရေးပါတဲ့ မဟာမိတ်ခေါင်းဆောင်တွေပါရမယ်။ ကိုယ်တိုင်ဦးဆောင်နိုင်ရမယ်။ ကိုယ်တိုင်ထဲထဲဝင်ဝင် ကိုယ်ဖိရင်ဖိ ဒီတော်လှန်ရေးတစ်ရပ်လုံးကို ဦးဆောင်နေပြီဆိုတာပြရမယ်။ စစ်ရေးအရရော နိုင်ငံရေးအရရော ကမ္ဘာကြီးကိုပြရမယ်။ ဒီမှာ ပင်မရေစီး။ ဒါသည် ဒီအတိုင်းသာလျှင် ဒီလမ်းစဉ်အတိုင်းသာလိုက်ရမယ်ဆိုတာကိုကိုယ့်ရဲ့ အင်အားနဲ့လည်းပြရမယ်။အဲဒီတော့ ဒီလောက်နဲ့လည်းမပြီးသေးဘူး။တကယ်ကကျတော့ ဒီ့ထက်ပိုပြီး တော့ ကျယ်ပြန့်ခိုင်မာပြီးတော့ ပိုအားကောင်းတဲ့ စုဖွဲ့မှုအတွက် လမ်းလည်းဖွင့်ထားပါတယ်။ အဲဒီ့အတွက်ကြောင့် နောက်ထပ်တိုးချဲ့ပြီး မဟာမိတ်တွေ အင်အားကောင်းလာအောင်လည်း လုပ်ကြရဦးမှာပါ။ဒါက နွေဦးတော်လှန်ရေး အောင်မြင်ဖို့အတွက် အဆုံးအဖြတ်လည်းဖြစ်တယ်။ အားလုံးကမျှော်လင့်ထားတယ်။ အခုရတာနဲ့ ပွဲဦးတာထွက်ပြီ။ နောက်ထပ်ပေါင်းဖို့ ၊ ပေါင်းနိုင်တဲ့ အားတွေနဲ့အတူ စစ်ရေးရော နိုင်ငံရေးရော တိုက်ပွဲဝင်ပြီးတော့ အရယူနိုင်ဖို့ကိုတော့ ပြည်သူလူထုတစ်ရပ်လုံးကလည်း ဒီ့ထက်ပိုပြီးတော့

အားပေးထောက်ခံကြဖို့လိုပါတယ်ဗျ။



​မေး-​​နွေဦး​တော်လှန်​ရေး ရည်မှန်ချက်​တွေ​အောင်
မြင်ဖို့ ဘာ​တွေထက်ကြိုးစားကြရဦးမယ်လို့သုံး
သပ်ပါလဲ။ တော်လှန်​ရေးအဖွဲ့​တွေကို​​​​ရော ၊ ပြည်သူ​တွေကို ဘယ်လိုတိုက်တွန်းချင်ပါလဲ ။

​ဖြေ-ဖက်ဒရယ်ပြည်ထောင်စုပေါ်ထွန်းရေး ဦးဆောင်ကောင်စီဟာ တော်လှန်ရေးကို ကိုယ်စားပြုပြီး ကမ္ဘာ့နိုင်ငံအသီးသီးရဲ့ အစိုးရတွေ လွှတ်တော်တွေ Institution အသီးသီးကို ထိုးဖောက်ပြီးတော့ ကိုယ်တိုင်ကိုယ်ကျ ခေါင်းဆောင်တွေ ကိုယ်တိုင် ဆွေးနွေးနိုင်ရမယ်။ ရှင်းပြနိုင်ရမယ်။ အသိပေးနိုင်ရမယ်။ ကမ္ဘာကြီးရဲ့ ဆက်ဆံမှု ဒီ့ထက်ပိုပြီးအားကောင်းလာအောင် အဲဒီ့စုဖွဲ့မှု အားကောင်းကောင်းနဲ့ ရှင်းပြနိုင်ရမယ်။တစ်ဖက်ကလည်း စစ်ရေးမှာ မဟာမိတ်တွေစုဖွဲ့ပြီးတော့ ပိုပြီးတော့ တိုက်နိုင်ရမယ်။ အမိန့်ပေးကွပ်ကဲမှု တစ်ခုတည်းရဲ့အောက်မှာ တိုက်နိုင်ရမယ်။ ပြီးတော့ အောင်ပွဲတွေယူနိုင်ရမယ်။ အဲဒီလိုသွားနေရမှာ။ ဟိုဘက်မှာ ဖက်ဆစ်ကလုပ်နေတဲ့ အတုအယောင်ရွေးကောက်ပွဲနဲ့ အရေခြုံထားတဲ့ အရပ်သားအရေခြုံ အစိုးရပုံစံနဲ့ သူတို့လုပ်မှာက တိုက်ရာပါပစ္စည်းတွေကို ရတနာဆိုင်ဖွင့်ပြီး အရောင်းအဝယ်လုပ်မှာဖြစ်တယ်။ အဲဒီ့မှာ သွားပြီး ရောင်းဝယ်ဖောက်ကားချင်ကြတဲ့ ကံစမ်းမဲနှိုက်ချင်ကြတဲ့ သူတွေကို အဲဒါကို ပြတ်ပြတ်ရှင်းရှင်းပြောပြနိုင်ရမယ်။ ဒီဘက်က တကယ်စစ်မှန်တဲ့တော်လှန်ရေးနဲ့ တကယ့်ပြည်သူလူထုရွေးချယ်တင်မြှောက်ထားတဲ့ သူတွေ တိုင်းရင်းသားတော်လှန်ရေးခေါင်းဆောင်တွေနဲ့ စုဖွဲ့ပြီးတော့ အစစ်အမှန် ဖက်ဒရယ် ဒီမိုကရေစီ ပြည်ထောင်စုကို တကယ်တည်ဆောက်မယ့်လမ်းစဉ်နဲ့သွားနေတယ်ဆိုတာကိုပြမယ်။ ဟိုဘက်က ဓားပြတိုက်ရာပါအုပ်စုကိုတော့ ငြင်းဆန်ကြဖို့ ကိုတော့ ကြိုးစားကြရမှာ။ တစ်ခါတည်း စစ်ရေးရော နိုင်ငံရေးရော နှစ်ခုစလုံးပေါင်းပြီးတော့ အားစိုက်ကြရမှာပါ။



●အခုလို​ဖြေကြား​ပေးတဲ့အတွက် ကျေးဇူးတင်ပါတယ်။