◾️ဖက်ဒရယ်ဦးဆောင်ကောင်စီကို နိုင်ငံတကာက ထောက်ခံဖို့ SAC-M တိုက်တွန်း

အမျိုးသားညီညွတ်ရေးအစိုးရ(NUG)နဲ့ တိုင်းရင်းသားတော်လှန်ရေးတပ်ဖွဲ့တွေ ပူးပေါင်းလိုက်တဲ့ စစ်ရေးမဟာမိတ်အစုအဖွဲ့သစ် ဖက်ဒရယ်ဦးဆောင်ကောင်စီ(SCEF)ကို နိုင်ငံတကာ အသိုက်အဝန်းက ထောက်ခံပေးကြဖို့ မြန်မာနိုင်ငံဆိုင်ရာ အထူးအကြံပေးကောင်စီ(SAC-M)က တိုက်တွန်းလိုက်ပါတယ်။ NUG နဲ့ ပြည်ထောင်စုလွှတ်တော် ကိုယ်စားပြုကော်မတီ (CRPH)တို့က အင်အားကြီးလူမျိုးစု လက်နက်ကိုင်တပ်တွေဖြစ်တဲ့ ချင်းအမျိုးသားတပ်ဦး (CNF/CNA)၊ ကချင်လွတ်လပ်ရေးအဖွဲ့ (KIO/KIA)၊ ကရင်အမျိုးသား အစည်းအရုံး (KNU/KNLA)၊ ကရင်နီအမျိုးသားတိုးတက်ရေးပါတီ (KNPP/KA)တို့နဲ့အတူ ဖက်ဒရယ် ဒီမိုကရေစီပြည်ထောင်စုပေါ်ထွန်းရေးဦးဆောင်ကော်မတီ (SCEF)လို့ နာမည်ပေးထားတဲ့ တပ်ပေါင်းစု ဖွဲ့စည်းကြောင်း ကြေညာအပြီး SAC-Mက အဲဒီ မဟာမိတ်အစုအဖွဲ့သစ်ကို နိုင်ငံတကာက ထောက်ခံရပ်တည်ပေးဖို့ ဆော်ဩလိုက်ခြင်းလည်း ဖြစ်ပါတယ်။ ဒီအရွေ့ဟာ မြန်မာစစ်တပ်ကို အစဉ်အဆက် ဆန့်ကျင်တော်လှန်ခဲ့တဲ့ တိုင်းရင်းသား အင်အားစုတွေနဲ့ စစ်အာဏာသိမ်းမှုအပြီး စတင်ပေါ်ပေါက်လာတဲ့ ဖက်ဒရယ် ဒီမိုကရေစီ တော်လှန်ရေး အင်အားစုတွေကြားမှာ အထင်ရှားဆုံး တရားဝင် ပေါင်းစည်းမှုလို့လည်း ရှုမြင်ခံခဲ့ရပါတယ်။ SCEF ထွက်ပေါ်လာချိန်ဟာ အချိန်ကိုက်မှုအရ အထူးကောင်းမွန်သလို သိသာထင်ရှားတဲ့တိုးတက်မှု တစ်ခုလည်း ဖြစ်တယ်လို့ SAC-Mရဲ့ အဖွဲ့ဝင် တစ်ဦးဖြစ်သူ ယန်ဟီးလီက ပြောပါတယ်။

◾️အမေရိကန်ဝါရင့်သံတမန်တစ်ဦး မြန်မာ့လူ့အခွင့်အရေး အထူးအစီရင်ခံစာတင်သွင်းသူ ဖြစ်လာ

မြန်မာနိုင်ငံဆိုင်ရာ လူ့အခွင့်အရေးအခြေအနေ အထူးအစီရင်ခံစာတင်သွင်းသူ(Special Rapporteur)အဖြစ် ကုလသမဂ္ဂလူ့အခွင့်အရေးကောင်စီဥက္ကဋ္ဌ အဆိုပြုခဲ့တဲ့ အမေရိကန်နိုင်ငံသူ မစ္စစ်ကယ်လီအန်းကို မတ်လ ၃၁ရက် မနေ့က အတည်ပြုခန့်အပ်လိုက်ပါတယ်။ ကုလသမဂ္ဂလူ့အခွင့်အရေးကောင်စီရဲ့ မြန်မာနိုင်ငံ လူ့အခွင့်အရေးအခြေအနေ အထူးအစီရင်ခံစာတင်သွင်းသူ ၇ ဦးမြောက်ဖြစ်လာတဲ့ မစ္စစ်ကယ်လီအန်းဟာ လူ့အခွင့်အရေးနဲ့ နိုင်ငံတကာဥပဒေနယ်ပယ်မှာ ကျွမ်းကျင်သူဖြစ်တယ်လို့ သိရပါတယ်။ လက်ရှိ ကုလလူ့အခွင့်အရေးကောင်စီဥက္ကဋ္ဌက မစ္စစ်ကယ်လီအန်းကို အဆိုပြုခဲ့ရာမှာ သူမရဲ့ ကျွမ်းကျင်မှု၊ လုပ်ပိုင်ခွင့်နယ်ပယ်မှာ အတွေ့အကြုံရှိမှု၊ လွတ်လပ်မှု၊ သမာသမတ်ကျမှု၊ ကိုယ်ကျင့်တရားကောင်းမွန်မှုနဲ့ မျှတစွာ ရှုမြင်နိုင်စွမ်းရှိမှုတွေကြောင့်လို့ ဆိုထားပါတယ်။ အသက် ၅၇ နှစ်အရွယ် အထူးအစီရင်ခံစာတင်သွင်းသူအသစ် မစ္စစ်ကယ်လီအန်းက မစ္စတာတွမ်းအန်ဒရူးစ်နေရာကို ဆက်ခံမှာဖြစ်ပြီး သူမဟာ မြန်မာ့လူ့အခွင့်အရေးတက်ကြွလှုပ်ရှားသူတွေရဲ့ အားပေးထောက်ခံမှုကို ရရှိထားပါတယ်။ မစ္စစ်ကယ်လီအန်းဟာ အာရှ-ပစိဖိတ်ဒေသကို အာရုံစိုက်ပြီး လူ့အခွင့်အရေး၊ နိုင်ငံရေးပြုပြင်ပြောင်းလဲမှု၊ ဖွံ့ဖြိုးရေးနဲ့ လူသားချင်းစာနာမှုဆိုင်ရာအရေးကိစ္စတွေမှာ အထူးကျွမ်းကျင်သူဖြစ်တယ်လို့ သိရပါတယ်။ သူမဟာ အမေရိကန်နိုင်ငံခြားရေးဝန်ကြီးဌာန၊ အမေရိကန်လွှတ်တော်၊ နိုင်ငံတကာနဲ့ အစိုးရမဟုတ်တဲ့ လူ့အခွင့်အရေးအဖွဲ့အစည်းတွေနဲ့ လူသားချင်းစာနာမှုဆိုင်ရာအဖွဲ့အစည်းတွေ အများအပြားမှာ အကြီးတန်းမူဝါဒပိုင်းရာထူးတွေမှာ တာဝန်ထမ်းဆောင်ခဲ့သူလည်းဖြစ်ပါတယ်။

◾️မြစ်ဆုံစီမံကိန်းအပြီးဖျက်သိမ်းဖို့ ကချင်လူ့အခွင့်အရေးကွန်ရက် တောင်းဆို

မြစ်ဆုံရေကာတာ စီမံကိန်းအပြီးတိုင်ဖျက်သိမ်းဖို့ အပါအဝင် အချက် ၃ချက်ကို ကချင်ပြည်နယ်လူ့အခွင့်အရေးကာကွယ်စောင့်ရှောက်သူများကွန်ရက်က ဒီနေ့ ဧပြီ ၁ရက်မှာ တောင်းဆိုလိုက်ပါတယ်။ မြစ်ဆုံရေကာတာ စီမံကိန်း ပြန်လည်ဆောက်လုပ်ဖို့ လုပ်ဆောင်လာခြင်းအပေါ် ကချင်လူ့အခွင့်အရေးစောင့်ကြည့်အဖွဲ့(KHRW)အပါအဝင် အဖွဲ့ ၆ဖွဲ့နဲ့ စုဖွဲ့ထားတဲ့ လူ့အခွင့်အရေး ကာကွယ်စောင့်ရှောက်သူများကွန်ရက်က ဒီနေ့မှာ သဘောထား ထုတ်ပြန်လိုက်တာပါ။ ကွန်ရက်ရဲ့တောင်းဆိုချက်တွေကတော့ ပြည်သူလူထုရဲ့ သဘောထားဆန္ဒတွေကို အပြည့်အဝ လေးစားလိုက်နာဖို့၊ စီမံကိန်းကို ကန့်ကွက်တဲ့ ပြည်သူတွေအပေါ် အရေးယူမယ်ဆိုတဲ့ ခြိမ်းခြောက်နေမှုတွေကို ချက်ချင်း ရပ်တန့်ဖို့၊ ဒေသခံပြည်သူတွေနဲ့ မြန်မာတစ်နိုင်ငံလုံးရဲ့ အကျိုးစီးပွားကို ထိခိုက်စေမယ့် မြစ်ဆုံရေကာတာ စီမံကိန်းကို အပြီးတိုင် ဖျက်သိမ်းဖို့ တို့ ဖြစ်ပါတယ်။ မြစ်ဆုံစီမံကိန်းက လူထုအားလုံးကို အကျိုးပြုမယ့် စီမံကိန်းမဟုတ်တဲ့အတွက်ကြောင့် ပြည်သူလူထုအားလုံး ဆက်လက်ပြီး အတူတကွ ကန့်ကွက်ကြဖို့ ပြောလိုကြောင်း ကြေညာချက် ပြောရေးဆိုခွင့်ရှိသူ ကချင်လူ့အခွင့်အရေးစောင့်ကြည့်အဖွဲ့(KHRW) တာဝန်ရှိသူ ကိုဂျေကော့က ပြောပါတယ်။

◾️စစ်တပ်ဂိတ်စခန်းကို KNUပူးပေါင်းတပ် စီးနင်းတိုက်ခိုက်

ကရင်အမျိုးသားအစည်းအရုံး(KNU) ညောင်လေးပင်ခရိုင် တပ်မဟာ(၃)နယ်မြေက စစ်တပ်ဂိတ်စခန်းတစ်ခုကို တော်လှန်ရေးပူးပေါင်းတပ်က တိုက်ခိုက်ခဲ့ကြောင်း KNU ညောင်လေးပင်ခရိုင်က သတင်းထုတ်ပြန်ပါတယ်။ KNU အုပ်ချုပ်နယ်မြေ သတ်မှတ်ချက်အရ ညောင်လေးပင်ခရိုင် လယ်ဒို(ကျောက်ကြီး)မြို့နယ်က သာယာကုန်းနဲ့ ခြံကြီးရွာကြား မီးရထားလမ်း (၁၄၆) တံတားမှာ အခြေချတဲ့ စစ်တပ်ဂိတ်စခန်းကို မတ်လ ၃၁ရက် မနေ့ညက တိုက်ခိုက်ခဲ့တာလို့ ဆိုပါတယ်။ မနေ့ည ၁၀နာရီခွဲမှာ ဝင်ရောက်စီးနင်းတိုက်ခိုက်ခဲ့ရာ စစ်သား ၅ဦး သေဆုံးပြီး လက်နက်ငယ် ၆လက်နဲ့ ကျည်တွေသိမ်းရခဲ့ကြောင်း အသိပေးပါတယ်။ သေဆုံးသူတွေထဲမှာ အရာရှိ တစ်ဦး ပါဝင်တယ်လို့ ဆိုပါတယ်။ စစ်ဆင်ရေးမှာ တော်လှန်ရေးပူးပေါင်းတပ်က အထိအခိုက်မရှိဘဲ ပြန်လည်ဆုတ်ခွာခဲ့ကြောင်း ဖော်ပြပါတယ်။

◾️သရက်ချောင်းမြို့က စစ်ကောင်စီ တပ်ရင်းဌာနချုပ် ၂ခုနဲ့ ရဲစခန်းကို တော်လှန်ရေးပူးပေါင်းတပ် တိုက်ခိုက်

တနင်္သာရီတိုင်း၊ သရက်ချောင်းမြို့က စစ် ကောင်စီရဲ့ တပ်ဌာနချုပ် ၂ခုဖြစ်တဲ့ ခမရ (၄၀၃) တပ်ရင်း၊(၄၀၅)တပ်ရင်း၊ရဲစခန်းနဲ့ မြို့‌တော်ခန်းမတို့အား ၆ရက်ဆက် ဒရုန်းနဲ့ တိုက်ခိုက်ခဲ့ကြောင်း PDF ထားဝယ်ခရိုင် တပ်ရင်း(၂) T5 Wings ဒရုန်းတပ်ဖွဲ့က ဒီကနေ့ သတင်းထုတ်ပြန် အသိပေးပါတယ်။ မတ်လ ၂၄ရက်ကနေ မတ်လ ၃၁ရက်အထိ စစ်ကောင်စီတပ်စွဲရာနေရာတွေကို ဒရုန်းနဲ့ တိုက်ခိုက်ခဲ့မှု အခြေအနေတွေကို အသိပေးထားတာဖြစ်ပါတယ်။ ဒရုန်းတိုက်ခိုက်မှုကြောင့် စစ်ကောင်စီတပ် သေဆုံးထိခိုက်အခြေအနေကို ဖော်ပြမထားလို့ အခြေအနေတွေ မေးမြန်းနိုင်ဖို့ T5 Wings ဒရုန်းတပ်ဖွဲ့ထံ ဆက်သွယ်ထားဆဲဖြစ်ပြီး အဆက်အသွယ်မရသေးပါဘူး။ ဒရုန်းတိုက်ခိုက်မှုတွေကို ထားဝယ်ခရိုင် အမှတ်(၂)တပ်ရင်း T5 Wings ဒရုန်းတပ်ဖွဲ့၊ ဒေါင်းညီ‌ နောင်စစ်ကြောင်း PBDF ဒရုန်းတပ်ဖွဲ့တို့ ပူးပေါင်းတိုက်ခိုက်ခဲ့ကြောင်း ထုတ်ပြန်ထားပါတယ်။

◾️စစ်တပ်ကပြန်ထိန်းချုပ်ထားတဲ့ မတ္တရာမြို့နယ်မှာ စစ်မှုထမ်းစတင် ခေါ်ယူ

စစ်တပ်က ပြန်လည်ထိန်းချုပ်ထားတဲ့ မန္တလေးတိုင်း၊ မတ္တရာမြို့နယ်မှာ စစ်မှုထမ်းဖို့ လူဦးရေ ၁,၅၀၀ တောင်းထားပြီး ကျေးရွာတွေအလိုက် စတင်လူတောင်းနေတယ်လို့ ဒေသခံတွေက ပြောပါတယ်။ မတ္တရာတမြို့နယ်လုံးအနေနဲ့ ဧပြီလအတွက် စစ်မှုထမ်းရန် လူဦးရေ ၁.၅၀၀ စစ်တပ်က တောင်းထားပြီး ကျေးရွာတွေအတွင်းလည်း စစ်မှုထမ်းဖို့ လော်စပီကာတွေနဲ့လိုက်လံ အော်ဟစ် သတိပေးနေတယ်လို့ သိရပါတယ်။ ‌မတ္တရာမြို့နယ်မှာ ကျေးရွာငယ်တစ်ရွာကို ၅ဦးနဲ့ ကျေးရွာအကြီးဖြစ်ပါက ၁၀ဦးကနေ ၁၅ဦးအထိ စစ်မှုထမ်းဖို့လူ တောင်းထားတယ်လို့ သိရပါတယ်။

◾️ချောက်မြို့နယ်မှာ စစ်ကြောင်းထိုးတဲ့ စစ်တပ်ကို PDF တိုက်ခိုက်

မကွေးတိုင်း၊ ချောက်မြို့နယ်အတွင်းမှာ အင်အား ၂၀၀ ခန့်နဲ့ စစ်ကြောင်းထိုးလာတဲ့ စစ်တပ်စစ်ကြောင်းကို တိုက်ခိုက်ခဲ့ပြီး စစ်တပ်က ကျေးရွားသုံးရွာ မီးရှို့ဖျက်ဆီးရာ နေအိမ် ၁၅၀ကျော် မီးလောင်ဆုံးရှုံးခဲ့တယ်လို့ ပြည်သူ့ကာကွယ်ရေးတပ်မတော်၊ မကွေးခရိုင်အမှတ်(၃)တပ်ရင်းက သတင်းထုတ်ပြန်ပါတယ်။ တလုံးသွေးရွာ၊ ပြရွာနဲ့ ကန်တောက်ကျောင်းကျေးရွာက ပြည်သူတွေရဲ့ နေအိမ် ၁၅၀ ကျော်ကို မီးရှို့ဖျက်ဆီးသွားတာလို့ ဆိုပါတယ်။ မတ်လ ၂၁ရက်ကစတင်ပြီး ကျေးရွာ ၁၀ရွာလောက်ကို စစ်တပ်က စစ်ကြောင်းထိုးခဲ့ရာ တပတ်ကြာမြင့်ခဲ့ပြီး တလုံးသွေးရွာ၊ ပြရွာနဲ့ ကန်တောက်ကျောင်းရွာတွေက ပြည်သူလူထုနေအိမ်တွေကို မီးရှို့ဖျက်ဆီးခဲ့တာလို့ ဆိုပါတယ်။ သလုံးသွေးရွာက နေအိမ် ၂၄ အိမ်၊ ပြရွာက နေအိမ် ၁၀၀ကျော် နဲ့ စာသင်ကျောင်းဆောင်ကြီးတစ်ဆောင်၊ ကန်တောက်ကျောင်းရွာက နေအိမ်၂၀ကို မီးရှို့ဖျက်စီးခဲ့ကြောင်း PDF မကွေးခရိုင် တပ်ရင်း(၃)က အသိပေးပါတယ်။

◾️စလင်းမှာ စစ်သားနဲ့ ရဲတွေကို ဒေါင်းညီနောင်ပြောက်ကျားတပ် တိုက်ခိုက်

မကွေးတိုင်း၊ စလင်းမြို့နယ်မှာ စစ်အုပ်စုကို တိုက်ခိုက်ရာ သုံးဦးသေပြီး ခဲယမ်းအချို့ရတယ်လို့ ဒေါင်းညီနောင်ပြောက်ကျားတပ်ဖွဲ့တာဝန်ရှိသူက ပြောပါတယ်။ ဒီနေ့ မနက် ၈ နာရီခန့်က စစ်တပ်နဲ့ရဲ အင်အား ၃၀ခန့်နဲ့ တပ်စွဲထားတဲ့ လင်းဇင်းတိုက်နယ်ရဲစခန်းက ထွက်လာတဲ့ ရဲနဲ့စစ်သားတွေကို တိုက်ခိုက်ခဲ့တာလို့ ဆိုပါတယ်။ စစ်အုပ်စုက စလင်း-ကံပြား လမ်းပိုင်းပေါ်ကနေ ဖြတ်သန်းတဲ့ ပြည်သူတွေရဲ့ သစ်ကား၊ဝါးကား၊ကုန်ကားတွေကို အတင်းအဓ္ဓမ ငွေကြေးကောက်ခံတာတွေ နေ့စဉ်လုပ်နေလို့ ကြိုတင်စောင့်ဆိုင်းတိုက်ခိုက်ခဲ့တာလို့ အသိပေးပါတယ်။ တိုက်ခိုက်မှုအတွင်း ရဲတစ်ဦး မျက်မြင်သေဆုံးပြီး ဒဏ်ရာရသွားတဲ့ စစ်သားနှစ်ဦးဟာလည်း စလင်းဆေးရုံမှာ သေဆုံးတယ်လို့ ဒေါင်းညီနောင်ပြောက်ကျားတပ်ဖွဲ့က ထုတ်ပြန်ထားပါတယ်။

◾️မိုးကုတ်မှာ ကျောက်တောင်ပြိုကျလို့ ရေပိုက်လိုင်းတွေ ပျက်စီး၊ မြို့ပေါ်ရပ်ကွက်အချို့ ရေအခက်အခဲရှိနိုင်

မန္တလေးတိုင်း၊ ​မိုးကုတ်မြို့၊ ရေပေါက်တစ်ရာရပ်အနီးမှာ ကျောက်တောင်ပြိုကျမှုဖြစ်ပွားပြီး မြို့တွင်းရေပေးဝေနေတဲ့ အဓိကပိုက်လိုင်းတွေ ပျက်စီးသွားတာကြောင့် မြို့ပေါ်ရပ်ကွက်တွေ ၄ရက်လောက် ရေအခက်အခဲရှိနိုင်ကြောင်း ဒေသခံတွေက ပြောပါတယ်။ မိုးကုတ်မြို့မှာ ဧပြီ ၁ ရက် မနက်ပိုင်းက ရေပေါက်တစ်ရာရပ်အနီးမှာ ကျောက်တောင်ပြိုကျမှုဖြစ်ပွားပြီး မြို့တွင်းသို့ ရေသွယ်တန်းပေးထားတဲ့ ၆လက်မနဲ့ ၄ လက်မ ရေပိုက်လိုင်းများအပြင် အခြားဆက်စပ်ပစ္စည်းများပါ ပျက်စီးသွားခဲ့ကြောင်း ဒေသခံအချို့က ပြောပါတယ်။ ​လက်ရှိမှာ မြို့နယ်စည်ပင်နဲ့ သက်ဆိုင်ရာ ရပ်ကွက်ရေကော်မတီတွေ ပူးပေါင်းကာ အမြန်ဆုံး ပြန်လည်ပြုပြင်နိုင်ဖို့ လုပ်ဆောင်နေတယ်လို့ သိရပါတယ်။မိုးကုတ်မြို့မှာ ရေအရင်းအမြစ်ထွက်တဲ့နေရာတွေကိုပါ ကျောက်တူးကြသူတွေရှိနေတာကြောင့် ရေရရှိရေး အခက်အခဲဖြစ်လာနိုင်ကြောင်း ဒေသခံတွေက ပြောပါတယ်။

◾️နိုင်ငံတဝန်းဆန္ဒပြပွဲတွေ

စစ်ကိုင်းတိုင်း၊ ယင်းမာပင်မြို့နယ်မှာ အောင်လံလွှင့်မည် ဒေါင်းသွေးနီ သပိတ်စစ်ကြောင်းက စစ်တပ်ရဲ့ မတရားတဲ့စစ်မှုထမ်းဥပဒေနဲ့ စစ်အာဏာရှင်စနစ်ကို ဆန့်ကျင်ကြဖို့ ချီတက်ဆန္ဒထုတ်ဖော်ခဲ့ပြီး စစ်တပ်ထုတ်ကုန်တွေကို ပြည်သူတွေမသုံးစွဲကြဖို့ တိုက်တွန်းခဲ့ပါတယ်။
ရွှေဘိုမြို့နယ်အတွင်းမှာလည်း စစ်ဘေးရှောင်တွေအတွက် မရှိမဖြစ် လိုအပ်နေတဲ့ သောက်ရေ သုံးရေရရှိဖို့ ရေတွင်းတူးဖော်ဖို့အတွက် အလှူရှင်ကိုယ်စား ရွှေဘိုမြို့နယ်သပိတ်အင်အားစုက သွားရောက် ကူညီလှူဒါန်းခဲ့ပါတယ်။
ဝက်လက်မြို့နယ် ရှားကွဲကျေးရွာနဲ့ ငါးကြင်းအိုင် ကျေးရွာမှ ပြည်သူတွေဟာ နေရပ်စွန့်ခွာတိမ်းရှောင်ရတာ အချိန်ကြာမြင့်လာတာကြောင့် ဝက်လက်လူထုသပိတ်ဦးဆောင်ကော်မတီက ဆန်တွေ သွားရောက်ထောက်ပံ့ခဲ့ပါတယ်။
ဝက်လက်ဒေသက စစ်ရှောင်ပြည်သူတွေဟာ နေရပ်စွန့်ခွာတိမ်းရှောင်ရသော အချိန်ကြာမြင့်လာသောကြောင့် နေထိုင်စရာအခက်အခဲ၊ စားနပ်ရိက္ခာ အခက်အခဲတွေနဲ့ ရင်ဆိုင်နေရတယ်လို့ ဝက်လက်လူထုသပိတ်က ဆိုပါတယ်။

ဖက်ဒရယ်ဒီမိုက​ရေစီပြည်ထောင်စုပေါ်ထွန်းရေးဦးဆောင်ကောင်စီ- SCEF တည်​ထောင်​ကြောင်း​ကြေညာပွဲမှ မိန့်ခွန်း​ကောက်နှုတ်ချက်များ

-People's Spring

ဖက်ဒရယ်ဒီမိုက​ရေစီပြည်ထောင်စုပေါ်ထွန်းရေးဦးဆောင်ကောင်စီ- SCEF ကို မတ်လ ၃၀ ရက်မှာ
ကချင်လွတ်လပ်​ရေးအဖွဲ့( KIO)၊ကရင်အမျိုး
သားအစည်းအရုံး( KNU)၊ကရင်နီ အမျိုးသား
တိုးတက်​ရေးပါတီ(KNPP)၊ချင်းအမျိုးသားတပ်ဦး(CNF) ၊အမျိုးသားညီညွတ်ရေးအစိုးရ(NUG)
၊ပြည်ထောင်စုလွှတ်တော်ကိုယ်စားပြုကော်မတီ
(CRPH)တို့နဲ့ကနဦးဖွဲ့စည်းလိုက်တာဖြစ်ပါတယ်။

●NUG ယာယီသမ္မတ ဒူဝါလရှီးလ

-နွေဦးတော်လှန်ရေးသမိုင်းမှာ ထင်ရှားတဲ့ နိုင်ငံ
ရေးမှတ်တိုင်တစ်ခုအနေနဲ့ ကျနော်တို့ဟာ "ဖက်ဒရယ်ပြည်ထောင်စုပေါ်ထွန်းရေး ဦးဆောင်ကောင်
စီ ကို စတင်ဖွဲ့စည်းလိုက်ပြီဖြစ်ကြောင်း ပြောလိုပါတယ်။ “ဖက်ဒရယ်ပြည်ထောင်စုပေါ်ထွန်းရေး ဦးဆောင်ကောင်စီ" ကို၊ ပိုမိုညီညွတ်သော နိုင်ငံရေး - စစ်ရေး မဟာမိတ်စုဖွဲ့မှုပုံစံနဲ့ စုဖွဲ့လိုက်တာဖြစ်သလို၊ ဖက်ဒရယ်ဒီမိုကရေစီပြည်ထောင်စု သစ် ပေါ်ထွန်းရေးအတွက်၊ တာဝန်ယူမှု / တာဝန်ခံမှုရှိတဲ့ အမျိုးသားညီညွတ်ရေးအခြေခံမူအပေါ်မှာ အခြေခံပြီး စတင်ဖွဲ့စည်းလိုက်ကြောင်း ပြောကြားလိုပါတယ်။

ဖက်ဒရယ်ပြည်ထောင်စုပေါ်ထွန်းရေး ဦးဆောင်ကောင်စီ" မှာ၊ တိုင်းရင်းသားလက်နက်ကိုင်အဖွဲ့အစည်းအများအပြားနဲ့ ဒီမိုကရေစီအင်အားစုတွေ၊ လူထုကိုယ်စား လှယ်တွေ စုပေါင်းပြီး စုဖွဲ့လိုက်တာဖြစ်ပါတယ်။ ကျနော်တို့ဖွဲ့စည်းလိုက်တဲ့ "ဖက်ဒရယ်ပြည်ထောင်စု ပေါ်ထွန်းရေး ဦးဆောင်ကောင်စီ" ဟာ၊ တရားဝင်မှု၊ တာဝန်ခံမှုနဲ့ ညီညွတ်မှုကို အခြေခံတဲ့ မဟာဗျူဟာ ခြေလှမ်းသစ်ဖြစ်ကြောင်း၊ ပြည်သူလူထုတစ်ရပ်လုံးကို သိစေချင်ပါတယ်။ ဒါဟာ စစ်ရေးအရဦးဆောင်လှုပ်ရှားမှုတွေကို စုစည်းကွပ်ကဲနိုင်ဖို့ ရည်ရွယ်သလို၊ နိုင်ငံရေးအရ အမျိုးသားရေး ညီညွတ်မှုကို ကျစ်ကျစ်လစ်လစ် ဦးဆောင်စုစည်းပုံဖော်ဖို့ ရည်ရွယ်ပါတယ်။

ဖက်ဒရယ်ဆိုတာဟာ ပြည်နယ်နဲ့ ဒေသတွေ အားကောင်းသန်မာရေးမူအပေါ်မှာ အခြေခံပါတယ်။ ဒါ့ကြောင့် ဖက်ဒရယ်စနစ်ကို ခြေခြေ
မြစ်မြစ် အုတ်မြစ်, တည်နိုင်ဖို့အတွက် လက်တွေ့ကျတဲ့ မူဝါဒဆိုင်ရာဦးဆောင်ညှိနှိုင်းမှုတွေကို အဆင့်လိုက်က လုပ်ဆောင်ဖို့ ဦးတည်ထားပါတယ်။ ပြည်နယ်နဲ့ ဒေသများ အားကောင်းသန်မာရေးမှာ အစပြုပြီး ပြည်ထောင်စုတစ်ခုလုံး အားကောင်းရေးဆီကို စုစည်းပုံဖော်ကြဖို့ ဖက်ဒရယ်အစီအမံတွေကို ချမှတ်ထားပါတယ်။ အဲသည့်ထဲမှာ၊ ကျနော်တို့ အနေနဲ့ အပြီးသပ် နိဂုံးချုပ်ပေးလိုက်ဖို့ လိုအပ်တဲ့ အရေးကြီးကိစ္စကတော့ စစ်အာဏာရှင်စနစ် ဖျက်သိမ်းရေးနှင့် အကြမ်းဖက် စစ်တပ်ကို နိုင်ငံရေးထဲကနေ အပြီးသပ် ဖယ်ရှားပစ်ဖို့ကိစ္စ ဖြစ်ပါတယ်။

ကျွန်​​တော်တို့ စုစည်းလိုက်တဲ့ “ဖက်ဒရယ်ပြည်
ထောင်စုပေါ်ထွန်းရေး ဦးဆောင်ကောင်စီ" ဟာ၊ တော်လှန်ရေးအရ ပြတ်ပြတ်သားသားဖြစ်ရမယ်။ နိုင်ငံရေးအရ ကျယ်ကျယ်ပြန့်ပြန့် ဖြစ်ရမယ်လို့ ခံယူပါတယ်။ ဒါ့အပြင် စစ်အရေးအရ ကျစ်လစ်သော မဟာမိတ်အင်အားစုကို အခြေခံပြီး၊ စနစ်ကျနတဲ့ ဖက်ဒရယ်တပ်မတော် ဆီကို ဦးတည်နေကြောင်း ပြောလိုပါတယ်။

ကျွန်​တော်တို့ အနေနဲ့ မဟာမိတ်စစ်ရေးအင်အားစု အချင်းချင်းအကြား အပြန်အလှန် ယုံကြည်မှုအပေါ်မှာ အခိုင်အမာ တည်ဆောက်ထားပါတယ်။ လွတ်မြောက်ရေးကို ဦးတည်တာဖြစ်ပြီး ဒါတွေ အားလုံးဟာ ဖက်ဒရယ်ဒီမိုကရေစီပြည်ထောင်စုသစ်အတွက် အလိုအပ်ဆုံးသော ပြည်နယ်/ ဒေသအားလုံး လက်နက်ကိုင်လမ်းစဉ်နဲ့ယှဉ်သော လူထုတော်လှန်ရေးနည်းနာတွေကို ကျယ်ကျယ်ပြန့်ပြန့် ပေါင်းစပ်ဖို့ ခြေလှမ်းသစ်စတင်လိုက်တာ ဖြစ်
ကြောင်း ပြောကြားရင်း နိဂုံးချုပ်အပ်ပါတယ်။

●KNU ဥက္ကဋ္ဌ ပဒိုစောကွယ်ထူးဝင်း

ကျွန်​တော်တို့ရဲ့ တော်လှန်ရေးဟာ ဒီအချိန်အခါမှာ ပူးပေါင်းညှိနှိုင်းမှု၊ နိုင်ငံ ရေးရည်ရွယ်ချက်များ ရှင်းလင်းပြတ်သားမှု နဲ့ ပူးပေါင်းဦးဆောင်မှု စတာတွေဟာ မရှိမဖြစ် လိုအပ်နေ တဲ့ အဆင့်ကို ရောက်ရှိနေပါတယ်။ ခုအချိန်မှာ ကျွန်​တော်တို့ဟာ တစ်ဦးချင်း သီးခြား လှုပ်ရှားနေတဲ့ အဖွဲ့အစည်းများ မဟုတ်တော့ပါ။ ကျွန်​တော်တို့ဟာ ဖက်ဒရယ် ဒီမိုကရေစီ ပြည်ထောင်စုတစ်ခု တည်ဆောက်နေတဲ့ သမိုင်းဝင်လုပ်ငန်းစဉ် တစ်ခုရဲ့ အစိတ်အပိုင်းတွေ ဖြစ်နေပါတယ်။ သို့သော် အဲ့ဒီ ပြည်ထောင်စုကို အဖွဲ့အစည်း တစ်ခုတည်းက ကြေညာလို့ မရနိုင်ပါ။ အတူတကွ တည် ဆောက်ရမယ့်အရာဖြစ်ပါတယ်။

ဒီဦးဆောင်ကောင်စီကို မဏ္ဍိုင်သုံးခုဖြစ်တဲ့၊( ၁) ပြည်နယ်/ဖက်ဒရယ်ယူနစ်/EROs ကိုယ်စားပြု မဏ္ဍိုင် (၂) ပြည်သူ့ကိုယ်စားပြု မဏ္ဍိုင်( ၃) အမျိုးသမီးကိုယ်စားပြု မဏ္ဍိုင်- စသည်တို့ နဲ့ တည်ဆောက်ထားခြင်း ဖြစ်ပါတယ်။ ပထမ မဏ္ဍိုင်မှာ ပြည်နယ်/ယူနစ်များနဲ့ တိုင်းရင်းသား တော်လှန်ရေးအဖွဲ့အစည်းများ ဖြစ်ပါတယ်။ နှစ်ပေါင်းများစွာ အတွင်း ပြည်နယ်အသီးသီးက တိုင်းရင်းသား တော်လှန်ရေး အဖွဲ့များဟာ ကိုယ်
ပိုင် ဒေသများတွင် လက်နက်ကိုင်တော်လှန်ရေးနှင့် နိုင်ငံရေးတော်လှန်ရေးကို ဆောင်ရွက် လာခဲ့ကြပါတယ်။ ကျနော်တို့ရဲ့ လူထုကို ကာကွယ်ခဲ့ကြပြီး၊ ကိုယ်ပိုင် အမျိုးသားလက္ခဏာများကို ထိန်းသိမ်းခဲ့ကြပါတယ်၊ ဖက်ဒရယ်စနစ်အတွက် အမျှော်အ

မြင်ကို ဆက်လက် ထိန်းသိမ်းထားခဲ့ကြပါတယ်။ ဒီမဏ္ဍိုင်မှာ ပါဝင် ခြင်းဟာ သမိုင်းနဲ့ တာဝန် နှစ်ခုလုံးကို ထင်ဟပ်စေပါတယ်။အဲ့ဒီလိုပါပဲဖက်ဒရယ်စနစ်ဟာ သီအိုရီတစ် ခုသာ မဟုတ်ပါဘူး။ ပြည်နယ်/ယူနစ်များနဲ့ လူမျိုးစုများ၏ ကိုယ်ပိုင် ပြဌာန်းခွင့်အပေါ် အခြေခံထားပါ တယ်။ ဒီမဏ္ဍိုင်ဟာ အနာဂတ် ပြည်ထောင်စုရဲ့ အခြေခံဖြစ်လာမယ့် နိုင်ငံရေးအစုအဖွဲ့များကို ကိုယ်စား ပြုပါတယ်။ အဲ့ဒီအတွက်ကြောင့် ဒီဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင်ကောင်စီ ဟာ လက်ရှိတော်လှန်ရေးအတွက်သာ မဟုတ်ဘဲ ဖက်ဒရယ် အုပ်ချုပ်မှုစနစ်ကို အခြေခံမှ စတင်တည် ဆောက်ဖို့ရန်ကိုလည်း ရည်ရွယ်ထားတာဖြစ်ပါတယ်။

ကျနော်အထူးအလေးထား တင်ပြလိုတဲ့ မဏ္ဍိုင်ကတော့ အမျိုးသမီးကိုယ်စားပြုမဏ္ဍိုင် ဖြစ်ပါတယ်။ဒီမဏ္ဍိုင်ကို သယုတ်ပြ ထည့်သွင်းခြင်း မဟုတ်ပါဘူး။ အစဉ်တစိုက် မှားယွင်းပျက် ကွက်ခဲ့တဲ့ အခြေ အနေတစ်ခုကို ပြန်လည်မှန်ကန်စေခြင်း ဖြစ်ပါတယ်။ အမျိုးသမီးများဟာ အမြဲတမ်း ကျနော်တို့တော် လှန်ရေး၏ အရေးကြီးတဲ့ အစိတ်အပိုင်း ဖြစ်ခဲ့ကြပါတယ်။ ခေါင်းဆောင်များအဖြစ်၊ စီမံခန့်ခွဲသူများ အဖြစ်၊လူထုကို ထောက်ပံ့ပေးသူများအဖြစ်၊ လူမှုအသိုင်းအဝိုင်းကို ထိန်းသိမ်း ထားသူများအဖြစ် ပါဝင် ခဲ့ကြပါတယ်။ သို့သော် ဦးဆောင်မှုအဆင့်မှာတော့ သူတို့ရဲ့ အခန်းကဏ္ဍကို လုံလောက်စွာ အသိအမှတ် ပြုခဲ့တာမျိုးမရှိခဲ့ပါဘူး။ ဒီတစ်ကြိမ်မှာ ၎င်းတို့ကို မဏ္ဍိုင်တစ်ခုအဖြစ် သတ်မှတ်ခြင်းဟာ အနာဂတ် ဖက်ဒရယ် ဒီမိုကရေစီမှာ မဖြစ်မနေပါဝင်ရမယ့် အဓိက အချက်တစ်ချက် ဖြစ်ကြောင်းကို ပြသခြင်း ဖြစ်ပါတယ်။

ကျနော်တို့ဟာ စစ်တပ်ကိုသာ ရင်ဆိုင်ရမှာမဟုတ်ပဲ ကျနော်တို့ အချင်းချင်းအတွင်းမှာလည်း ညီညွတ် မှုကို တည်ဆောက်ဖို့ လိုအပ်ပါတယ်။ အဲ့ဒီညီညွတ်မှုကို တည်ဆောက်ဖို့အတွက် မတူညီ မှုများကို အသိအမှတ်ပြုပြီး ပေါင်းစည်းနိုင်တဲ့ ဖွဲ့စည်းပုံတစ်ခု လိုအပ်ပါတယ်။ဒီဖက်ဒရယ်ဦးဆောင်ကောင်စီဟာ အဲ့ဒီလိုအပ်ချက်ကို ဖြည့်ဆည်းဖို့ ရည်ရွယ်တာဖြစ်ပါတယ်။ မဏ္ဍိုင်အသီးသီးက ကိုယ်စားပြု ပါဝင်သူများကိုယ်စား ကျနော်ပြောလိုတာကတော့ ကျနော်တို့ဟာ တာဝန်ယူမှု၊ ပြတ်သားမှုနဲ့အတူ ဒီဦးဆောင်ကောင်စီမှာ ပါဝင်ကြပါတယ်။

ပြည်သူလူထုကိုလည်း ဒီဦးဆောင်ကောင်စီဟာ သင်တို့ရဲ့ကောင်စီ/ ခင်ဗျားတို့ရဲ့ကောင်စီပဲ ဖြစ်ပါတယ် လို့ ပြောချင်ပါတယ်။ ပြည်သူတွေရဲ့ အားထုတ်မှုများ၊ ပြည်သူတွေရဲ့ သွေးနဲ့ ချွေးများ၊ ပြည်သူတွေရဲ့ မျှော်လင့်ချက်များ က သာလျှင် ဒီဦးဆောင်ကောင်စီကို ဖွဲ့စည်းနိုင်ဖို့ တွန်းပို့ခဲ့တာဖြစ်ပါတယ်။ ကျနော်တို့ရဲ့ တာဝန်ကတော့ အဲ့ဒီအရာတွေကို တာဝန်ယူမှုနဲ့ သမာဓိရှိစွာ ဆက်လက် ဆောင်ရွက်သွားဖို့ပဲ ဖြစ်ပါတယ်။ ရှေ့မှာစိန်ခေါ်မှုတွေအများကြီး ရှိမယ်ဆိုတာကို ကျနော်တို့ သိပါတယ်။ကျနော်တို့ အတူတကွ ရှေ့သို့ ဆက်လက် လျှောက်လှမ်းသွားကြမှာ ဖြစ်ပါတယ်။

●KNPP ဥက္ကဋ္ဌ ခူဦးရယ်

ဒီကနေ့ဟာဆိုရင်ကျွန်​တော်တို့ဆင်နွှဲနေတဲ့ လူထုတော်လှန်ရေးကြီးရဲ့ အကွေ့တစ်ခုကိုရောက်ရှိခဲ့ပြီလို့ ကျနော်ယုံကြည်မျှော်လင့်ခြင်းများနဲ့အတူ ကနဦးအသိပေးပြောကြားလိုပါတယ်။နေ့စဉ်နဲ့အမျှ မျက်ရည်မစဲ၊ဝမ်းနည်းနာကြည်းဖွယ်ရာအ
ဖြစ်ဆိုးများကို ခါးစည်းရင်ဆိုင်နေကြရတဲ့ ကျွန်​တော်တို့ ပြည်သူတွေအတွက်အထူးအားရကျေနပ်ဖွယ်ရာမဟုတ်သော်လည်း ကျွန်​တော်တို့လျှောက်လှမ်းနေရတဲ့ တော်လှန်ရေးခရီးရှည်လမ်းကြမ်းကြီးရဲ့ အချိုးအဆစ်တစ်ကွေ့ကိုတော့ ရောက်လာပြီလို့ ပြောရမယ့်နေ့ ဘဲ ဖြစ်ပါတယ်။

၂၀၂၁ ခုနှစ်ဖေဖေါ်ဝါရီလမှာ စစ်တပ်က အာဏာ
သိမ်းလိုက်တဲ့အခါမှာ တိုင်းပြည်တွင်းမှာရှိကြတဲ့ပြည်သူများနဲ့ တိုင်းပြည်အပြင်အပ ကမ္ဘာ့နိုင်ငံ အသီးသီးကို ရောက်ရှိနေကြတဲ့ မြန်မာြပည်သူများဟာ စစ်အာဏာရှင်ကို အကြွင်းမဲ့ဆန့်ကျင်ဖီဆန် ခဲ့ကြတဲ့အပြင် အာဏာရှင်ကရေးပြီး အာဏာရှင်ကပဲ ဖျက်ဆီးပစ်လိုက်တဲ့ ၂၀၀၈ ဖွဲ့စည်းပုံကိုလည်း ချွင်းချက်မရှိ အပြီးတိုင် ငြင်းဆန်စွန့်ပစ်ခဲ့တာဖြစ်ပါတယ်။ အဲဒါအပြင် ပြည်သူတွေဟာ ပြည်ထောင်စု ဖွဲ့စည်းပုံအခြေခံဥပဒေအသစ်ရေးဆွဲနိုင်ရေးကိုပါ တညီတညွတ်တည်း တောင်းဆိုခဲ့ကြပါတယ်။

ဖက်ဒရယ်ပေါ်ထွန်းရေးဦးဆောင်ကောင်စီကို ကျနော်တို့ မဏ္ဍိုင်ကြီး ၃ ခုနဲ့ဖွဲ့စည်းဖို့ဆုံးဖြတ်ခဲ့ကြပါတယ် — ဒီမဏ္ဍိုင်ကြီးများကတော့ ၁) ပြည်နယ်/ယူနစ်/EROs၊ ၂) ပြည်သူ့ကိုယ်စားပြု နဲ့ ၃) အမျိုးသမီးကိုယ်စားပြု - စသည်တို့ပဲဖြစ်ပါတယ်။ မဏ္ဍိုင်ကြီး ၃ ခုကို အခြေခံထားသော်လည်း အခြေအနေနဲ့ စိန်ခေါ်မှုအမျိုးမျိုးကြောင့် ကနဦးအနေနဲ့ စတင်ဆွေးနွေးခဲ့ကြတဲ့ ကျွန်​တော်တို့ အဖွဲ့ ၅ ဖွဲ့ နဲ့အတူ ပြည်သူ့လွှတ်တော်ကိုယ်စားပြုကော်မတ (CRPH) – အားလုံးပေါင်း ၆ ဖွဲ့ နဲ့အစပျိုးတာထွက်ဖို့ ဖြစ်လာခဲ့ပါတယ်။ မဏ္ဍိုင် ၃ ခု စုံစုံလင်လင်မပါနိုင်သေးတာနဲ့ မဏ္ဍိုင်တစ်ခုစီမှာလည်း ပါသင့်ပါထိုင်သူအားလုံး ပါမနေသေးတာဟာ အချိန်ရဲ့စိန်ခေါ်မှုနဲ့ဖိအားကို မကျော်လွှားနိုင်တဲ့ ကျွန်​တော်တို့ရဲ့ အားနည်းချက်တခုတော့ ဖြစ်ခဲ့ပါတယ်။ ဒီအတွက်လည်း ကျွန်​တော်တို့ လာမယ့် ရက် ၆၀ အတွင်း အမြန်ဆုံးပြင်ဆင်ဖြည့်စွက်နိင်ဖို့ကို ကြိုစားသွားမှာဖြစ်ပါတယ်။

●CRPH ဥက္ကဋ္ဌ ဦးအောင်ကြည်ညွန့်