မင်းတပ်မြို့ကို စစ်တပ် ဗုံးကြဲလို့ကလေးငယ် အပါအဝင် ပြည်သူအချို့ ထိခိုက်ဒဏ်ရာရ

ဧပြီ-၁၊ ၂၀၂၆။ ထားမြတ်/People’s Spring

ချင်းပြည်နယ်၊ မင်းတပ်မြို့တနေရာကို အာဏာသိမ်းစစ်တပ်က လေကြောင်းကနေ ဗုံးကြဲတိုက်ခိုက်ခဲ့လို့ ကလေးငယ်အပါအဝင် အရပ်သားပြည်သူအချို့ထိခိုက်မှု ရှိခဲ့ကြောင်း ဒေသခံ သတင်းရင်းမြစ်က ပြောပါတယ်။

မတ် ၃၁ရက် နေ့လည်ပိုင်းမှာ စစ်တပ်က တိုက်လေယာဉ်နဲ့ ဗုံး ၂လုံးကြဲချ တိုက်ခိုက်ခဲ့တာလို့ ဆိုပါတယ်။

" ကလေး၁ဦးနဲ့ အမျိုးသား ၁ဦးလို့တော့ ကြားတယ် ထိခိုက်တာ။ အခြေအနေ မဆိုးဘူးထင်တာပဲ။ သေချာတော့ မသိရသေးဘူး”လို့ ဒေသခံ သတင်းရင်းမြစ်က ပြည်သူထိခိုက်မှု အခြေအနေကို ပြောပါတယ်။

မင်းတပ်မြို့နယ်ဟာ ချင်းညီနောင်အဖွဲ့ဝင် ချင်းပြည်သူ့အစည်းအရုံး/ချင်းပြည်သူ့တပ်မတော် (CPU/CPA) ထိန်းချုပ်ထားတဲ့နယ်မြေဖြစ်ပါတယ်။ အရင်ကလည်း စစ်တပ်ဟာ မင်းတပ်မြို့နယ်ကို လေကြောင်းဗုံးကြဲတိုက်ခိုက်တာတွေ မကြာခဏ လုပ်ဆောင်နေတာဖြစ်ပါတယ်။

CPU/CPA တာဝန်ရှိသူတဦးဖြစ်တဲ့ ဆလိုင်းယောမာန်ကလည်း "သတ်မတော် ကာကွယ်ရေး ဦးစီးချုပ် ရာထူးတိုးတာ လာသတိပေးတာလား ငရဲဝင်းဦး" လို့ မနေ့က မင်းတပ်မြို့ကို စစ်ကောင်စီ လေကြောင်း တိုက်ခိုက်လာမှု အပြီးမှာ ရေးသားထားပါတယ်။

ပြည်သူကို သတ်ဖြတ်မှုတွေ ကျူးလွန်နေတဲ့ စစ်ကောင်စီအနေနဲ့ ကာကွယ်ရေးဦးစီးချုပ် အပြောင်းအလဲ ဖြစ်ပေမယ့် ပြည်သူကို ပစ်မှတ်ထားတဲ့ လေကြောင်းတိုက်ခိုက်မှုတွေ ဆက်လက်ကျူးလွန်နေတာဖြစ်ပါတယ်။

စစ်ခေါင်းဆောင်မင်းအောင်လှိုင်က လက်ရှိ ခေါင်းဆောင်သစ် ရဲဝင်းဦးကို တပ်ချုပ်အဖြစ်လွှဲအပ်ပြီး နာရီပိုင်းအကြာ မတ်လ ၃၀ရက် မနက်မှာပဲ စစ်ကိုင်းတိုင်း ဘုတလင်မြို့နယ် ငပယင်းရွာဆေးခန်းကို လေကြောင်းဗုံးကြဲတိုက်ခိုက်ခဲ့ရာ ဒေသခံ ပြည်သူအများအပြား သေဆုံးထိခိုက်ခဲ့ရပါတယ်။

မတ်လ ၂၉ရက် ညနေပိုင်းကလည်း ချင်းပြည်နယ် ပလက်၀မြို့နယ် ကြောင်းချောင်းရွာကို စစ်ကောင်စီက လေကြောင်းဗုံးကြဲတိုက်ခိုက်ခဲ့ရာ ကလေးငယ် ၄ဦးအပါအဝင် ပြည်သူ ၇ဦးသေဆုံးပြီး ကလေး ၂ဦး အပါအဝင် ၄ဦး ဒဏ်ရာရရှိခဲ့ကြောင်း အာရက္ခတပ်တော် (AA)က သတင်းထုတ်ပြန်ထားပါတယ်။

ဖက်ဒရယ်ဒီမိုကရေစီပဋိညာဥ်ရဲ့ ပြဌာန်းချက်တွေနဲ့ ပေးအပ်ထားတဲ့ တာဝန်တွေ လိုက်နာကျင့်သုံးကြဖို့ NUCC တိုက်တွန်း

ဧပြီ-၁၊ ၂၀၂၆။ထားမြတ်/People’s Spring

ဖက်ဒရယ်ဒီမိုကရေစီပဋိညာဥ် အတည်ပြု ပြဋ္ဌာန်းခြင်း (၅) နှစ်ပြည့် ကြေညာချက်ကို အမျိုးသားညီညွတ်ရေးအတိုင်ပင်ခံကောင်စီ ( NUCC) က ထုတ်ပြန်ခဲ့ရာ ပဋိညာဉ်ရဲ့ ပြဋ္ဌာန်းချက်တွေနဲ့ပေးအပ်ထားသော တာဝန်များကို တာဝန်ယူမှုတာဝန်ခံမှုအပြည့်နဲ့ ကတိသစ္စာတည်ကြည်စွာ လိုက်နာကျင့်သုံးသွားကြဖို့ လေးနက်စွာ တိုက်တွန်းကြောင်း ဖော်ပြထားပါတယ်။

ဖက်ဒရယ်ဒီမိုကရေစီပဋိညာဉ်ကို ပူးပေါင်းပါဝင် ရေးဆွဲ အတည်ပြုခဲ့ကြပြီး ပြည်သူ့ တော်လှန်ရေးကြီးရဲ့ ရှေ့မှောက်တွင် အတူဝန်ခံ ကတိပြုခဲ့ကြခြင်းနဲ့ သဘောတူ အတည်ပြု (ratify) ခဲ့ကြတဲ့ အမျိုးသားညီညွတ်ရေးအစိုးရ (NUG)၊ ပြည်ထောင်စုလွှတ်တော် ကိုယ်စားပြု ကော်မတီ (CRPH)နဲ့ အမျိုးသားညီညွတ်ရေး အတိုင်ပင်ခံကောင်စီ (NUCC) ရဲ့ အဖွဲ့ဝင်အဖွဲ့အစည်းများ အပါအဝင် အင်အားစုအသီးသီးကို NUCCက အခုလိုတိုက်တွန်းခဲ့တာပါ။

တော်လှန်ရေးအင်အားစုများ အချင်းချင်းကြား အားပြိုင်မှု၊ လွှမ်းမိုးမှု မရှိစေရေး အတွက် ချာတာအစိတ်အပိုင်း (၁)မှာပြဋ္ဌာန်းထားသော ပြည်ထောင်စု စံတန်ဖိုးတွင် ပါဝင်တဲ့ လူနည်းစုအခွင့်အရေး၊ တန်းတူရေးနဲ့ ကိုယ်ပိုင်ပြဋ္ဌာန်းခွင့်၊ စုပေါင်းခေါင်းဆောင်မှု၊ စုံလင်ကွဲပြားမှုကို အပြန်အလှန်လေးစား အသိအမှတ်ပြုခြင်းတို့ကို အင်အားစုအသီးသီးက မည်သို့မျှ ခွဲခြားဆက်ဆံမှုမရှိဘဲ တော်လှန်ရေးရဲ့ စံတန်ဖိုးများ အဖြစ် အလေးအနက်ပြု လိုက်နာကျင့်သုံးသွားကြဖို့ လိုအပ်ကြောင်းလည်း NUCCက ထုတ်ပြန်ပါတယ်။

နွေဦးတော်လှန်ရေး၏ အင်အားဖြင့် ၂၀၀၈ စစ်ကျွန် အခြေခံဥပဒေကို ဖျက်သိမ်း၍ နိုင်ငံရေးအင်အားစုပေါင်းစုံ ပါဝင်ရေးဆွဲခဲ့ကြသော ဖက်ဒရယ်ဒီမိုကရေစီ ပဋိညာဉ်ကို အတည်ပြုပြဋ္ဌာန်းနိုင်ခဲ့တာ ဒီကနေ့ မတ်လ ၃၁ရက်နေ့မှာ ၅နှစ် ပြည့်ခဲ့ပြီလို့ အသိပေးပါတယ်။

ဖက်ဒရယ်ဒီမိုကရေစီ ပဋိညာဥ်ဟာ ပြည်ထောင်စုအတွင်း ဖြစ်ပွားခဲ့သည့် ပဋိပက္ခများ၊ အရင်းခံပြဿနာများကို အပြီးသတ် ချုပ်ငြိမ်းစေနိုင်ဖို့ အတွက် လည်းကောင်း၊ တိုင်းရင်းသားပြည်သူလူထု တရပ်လုံး ပူးပေါင်းပါဝင်လက်တွဲနိုင်ဖို့အတွက် လည်းကောင်း၊ ဒီမိုကရေစီ စနစ်ကို ကျင့်သုံးပြီး တန်းတူရေးနဲ့ ကိုယ်ပိုင်ပြဋ္ဌာန်းခွင့်တို့ကို အာမခံသော ငြိမ်းချမ်းစွာ အေးအတူပူအမျှ အတူတကွ ယှဥ်တွဲနေထိုင်နိုင်သော သာယာဝပြောတဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်ဖို့ လည်းကောင်း ရည်ရွယ် ရေးဆွဲခဲ့တာလို့ ဆိုပါတယ်။

အဲဒီလိုရေးဆွဲပြီး စစ်အာဏာရှင်စနစ် အပါအဝင် အာဏာရှင်စနစ်မှန်သမျှ ပပျောက်ရေး ၊ ၂၀၀၈ ဖွဲ့စည်းပုံအခြေခံ ဥပဒေအပြီးသတ် ဖျက်သိမ်းရေး ၊ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး၊ အရပ်သား ပြည်သူ့ အစိုးရ ပေါ်ထွန်းရေး စတဲ့ လုပ်ငန်းတွေ ဆောင်ရွက်သွားဖို့ လက်ခံ သဘောတူ ရေးဆွဲအတည်ပြုခဲ့တာလို့လည်း NUCCက အသိပေးပါတယ်။

အသွင်သဏ္ဍာန် အမျိုးမျိုးနဲ့ တည်ရှိနေသော မတရားမှုများကို ဖြိုချရန် ခေတ်ပြောင်း စနစ်ပြောင်း တော်လှန်ရေး ဆင်နွှဲရာတွင် ဖက်ဒရယ်ဒီမိုကရေစီ ပဋိညာဉ်ဟာ အသက်သွေးကြောဖြစ်တယ်လို့ NUCCက ထုတ်ပြန်ပါတယ်။

ဖက်ဒရယ်ဒီမိုကရေစီ ပဋိညာဉ်မှာ အစိတ်အပိုင်း (၂) ရပ်ပါဝင်ပြီး အစိတ်အပိုင်း (၁)မှာ ပြည်ထောင်စု မျှော်ရည်ချက်နဲ့ စံတန်ဖိုးများ၊ ဖက်ဒရယ် ဒီမိုကရေစီ ပြည်ထောင်စုတည်ဆောက်ရေးဆိုင်ရာ လမ်းညွှန်အခြေခံမူများ၊ အခြေခံမူဝါဒများ၊ အကောင်အထည်ဖော်မည့် လုပ်ငန်းစဥ် (သို့မဟုတ်) နိုင်ငံရေးလမ်းပြမြေပုံတို့ကို တိကျ ရှင်းလင်းစွာ ဖော်ပြထားပြီး “ဖက်ဒရယ် ဒီမိုကရေစီ ပြည်ထောင်စု ကြေညာစာတမ်း” အဖြစ် ဝန်ခံကတိပြုခဲ့ကြပြီးဖြစ်တယ်လို့ ဆိုပါတယ်။

အစိတ်အပိုင်း (၂)ဟာ ဖက်ဒရယ်ဒီမိုကရေစီ ပြည်ထောင်စု ကြေညာစာတမ်းပါ ဦးတည်ချက်၊ ရည်ရွယ်ချက်များကို လက်တွေ့အကောင်အထည် ဖော်ဖို့ ရှေ့ဆက် သွားမယ့် နိုင်ငံရေးလမ်းပြ မြေပုံ အဆင့်ဆင့်အား လက်တွေ့အကောင်အထည် ဖော်ခြင်းဖြင့် ဖက်ဒရယ် ဒီမိုကရေစီ ပြည်ထောင်စုကြီး တည်ဆောက်နိုင်ဖို့ အလို့ငှာ ကြားကာလတွင် အခြေခံရမယ့် “ကြားကာလဖွဲ့စည်းပုံ အခြေခံဥပဒေဆိုင်ရာ အစီအမံများ - Interim Constitutional Arrangements” အဖြစ် သဘောတူ အတည်ပြု (ratify) ခဲ့ကြခြင်း ဖြစ်တယ်လို့ ဖော်ပြထားပါတယ်။

ဖက်ဒရယ်ဒီမိုကရေစီပဋိညာဉ်အား ၅ နှစ်တာ ကာလအတွင်း အင်အားစုအသီးသီးမှ စုပေါင်းခေါင်းဆောင်မှုဖြင့် အကောင်အထည်ဖော်ကြရာတွင် ထင်ရှားသော ရလဒ်များ အဖြစ် အမျိုးသားညီညွတ်ရေးအတိုင်ပင်ခံကောင်စီ (NUCC) အား ဖွဲ့စည်းခြင်း၊ ကြားကာလအတွက် ဖက်ဒရယ်ပြည်ထောင်စုရဲ့ ဥပဒေပြုရေးအာဏာကို ၂၀၂၀ ပြည့်နှစ် ပါတီစုံအထွေထွေ ရွေးကောက်ပွဲတွင် ရွေးကောက်ခံရပြီး အကြမ်းဖက်အာဏာသိမ်း စစ်အုပ်စုနဲ့ ပူးပေါင်းဆောင်ရွက်ခြင်း မပြုသော ပြည်ထောင်စုအဆင့်လွှတ်တော် ကိုယ်စားလှယ်များအား အပ်နှင်းခြင်း၊ ယင်းလွှတ်တော်ကိုယ်စားလှယ်များဖြင့် ပြည်ထောင်စု လွှတ်တော် ကိုယ်စားပြုကော်မတီ (CRPH) ဖွဲ့စည်းမှုအား အတည်ပြုခြင်း၊ ပြည်ထောင်စု လွှတ်တော်ကိုယ်စားပြု ကော်မတီ (CRPH) နဲ့ အမျိုးသားညီညွတ်ရေး အတိုင်ပင်ခံကောင်စီ (NUCC) တို့ ညှိနှိုင်း သဘောတူညီချက်ဖြင့် အမျိုးသားညီညွတ်ရေး အစိုးရ (NUG) အား ဖွဲ့စည်းခြင်း၊ ပြည်နယ်/ဖက်ဒရယ်ယူနစ်အခြေပြု နှင့် လူမျိုးအခြေပြု ကောင်စီများ အပါအဝင် ဖက်ဒရယ်ယူနစ် အစိုးရများ ပေါ်ထွန်းလာခဲ့ကြောင်းလည်း ရှင်းပြထားပါတယ်။

ဒါ့အပြင် ပဋိညာဉ် အစိတ်အပိုင်း (၁) ပါ လမ်းပြမြေပုံ ပြဋ္ဌာန်းချက် အရ အသွင်ကူးပြောင်းရေးကာလဖွဲ့စည်းပုံ အခြေခံဥပဒေ (တနည်းအားဖြင့်) ဖက်ဒရယ်အသွင်ကူးပြောင်းရေး အစီအမံများဆိုင်ရာ အခြေခံဥပဒေ (Articles of Federal Transitional Arrangements - AFTA) ကိုလည်း မကြာမီတွင် အပြီးသတ် ရေးဆွဲအတည်ပြုနိုင်မည် ဖြစ်ကြောင်း NUCCက အသိပေးထုတ်ပြန်ပါတယ်။

အမျိုးသားညီညွတ်ရေးအတိုင်ပင်ခံကောင်စီ (NUCC)ဟာ ဖက်ဒရယ် ဒီမိုကရေစီပဋိညာဉ် အစိတ်အပိုင်း (၁) နဲ့ (၂) ပါ ပြဋ္ဌာန်းချက်များ အရ ပေးအပ်ထားသော တာဝန်များကို တာဝန်ယူမှု၊ တာဝန်ခံမှုရှိစွာ ကျေပွန်အောင် ဆက်လက်ထမ်းဆောင် သွားမယ်လို့လည်း ထုတ်ပြန်ကြေညာခဲ့ပါတယ်။

ဒီလိုပဋိညာဉ်ပါ တာဝန်များကို ထမ်းဆောင်ရာမှာ နယ်ပယ်အသီးသီးတွင် လက်ရှိ ဦးဆောင်မှုပြု ဆောင်ရွက်နေကြသည့် အစုအဖွဲ့များ၊ တော်လှန်ရေး လက်တွေ့ လိုအပ်ချက်များအရ အခါအားလျော်စွာ ပေါ်ပေါက်လာသော ဦးဆောင်မှု အစုအဖွဲ့များနဲ့ လိုအပ်တဲ့ ပူးပေါင်းဆောင်ရွက်မှုတွေ လုပ်ဆောင်ရာမှာ ပဋိညာဉ်ပါ ပြဋ္ဌာန်းချက်များ နဲ့အညီ လိုက်နာကျင့်သုံးဆောင်ရွက်မယ်လို့လည်း အသိပေးထုတ်ပြန်ပါတယ်။

NUG၊ CRPHနဲ့ KNU၊ KIO၊ KNPP၊ CNFစတဲ့ တိုင်းရင်းသားလက်နက်ကိုင်တော်လှန်ရေးအဖွဲ့ တွေဟာ မတ်လ ၃၀ရက်မှာ ဖက်ဒရယ်ဒီမိုကရေစီ ပြည်ထောင်စုပေါ်ထွန်းရေး ဦးဆောင်ကောင်စီတရပ်ဖွဲ့စည်းခဲ့ပြီး တော်လှန်ရေး အရှိန်မြှင့် အောင်မြင်မှု ရရှိဖို့ ၊ စစ်အာဏာရှင်စနစ်ဖယ်ရှားဖို့၊ ဖက်ဒရယ်ဒီမိုကရေစီပြည်ထောင်စုတည်ဆောက်ဖို့ လုပ်ဆောင်သွားမယ်ဖြစ်ကြောင်း အသိပေးကြေညာထားပါတယ်။

NUCCနဲ့ NUG တို့ဟာလည်း အခုနှစ်အတွင်းမှာ ခိုင်မာအားကောင်းတဲ့ တော်လှန်ရေးဦးဆောင်မှု ဖြစ်ပေါ်လာရေး ဆွေးနွေးမှုတွေ ဆက်တိုက်ပြုလုပ်ခဲ့ပါတယ်။

မြန်မာဖက် တိုက်ပွဲတွေက ကျည်ဆန်တွေ လမ်း
ချော်လာလို့ ထိုင်းစစ်တပ် သတိပေးပစ်ခတ်

ဧပြီ-၁၊၂၀၂၆။People's Spring

မြန်မာဖက်ခြမ်းတိုက်ပွဲတွေကနေထိုင်းပိုင်နက်ထဲ ကျည်ဆန်တွေလမ်းချော်ကျရောက်လာတဲ့နောက် ထိုင်းစစ်တပ်ကသတိပေးပစ်ခတ်ခဲ့တယ်လို့ထိုင်းသတင်းဌာန​တွေက​ဖော်ပြပါတယ်။

မဲဆောက်မှာမြန်မာဖက်ကပစ်ခတ်လိုက်တဲ့ ကျည်
ဆန်တွေ ကျရောက်ခဲ့တာကြောင့် ရွှေ့ပြောင်း မြန်
မာအလုပ်သမား တစ်ဦး ဒဏ်ရာရခဲ့ပြီး ဒေသခံတွေ အထိတ်တလန့် ဖြစ်ခဲ့တယ်လို့ ထိုင်းနယ်ခြားစောင့်နာရူဆွမ်တပ်ဖွဲ့ရဲ့ အကြီးအကဲ ဗိုလ်ချုပ် မိုင်ထရီ ချူပရီချာက ပြောကြားခဲ့ပါတယ်။

မတ်လ ၃၁ ရက်နေ့ ညနေပိုင်းက မဲဆောက်မှာရှိတဲ့ ဟွိုင်မဟာဝေါင်နဲ့ မဟာဝမ်တို့မှာ မြန်မာဖက်ခြမ်း တိုက်ပွဲတွေက ကျည်ဆန်တွေ ကျရောက်ခဲ့တာလို့ သိရပါတယ်။

နယ်စပ်စည်းကိုကျော်ပြီး ကျည်ဆန်တွေ ကျလာတ့နောက် ထိုင်းဖက်က မီးခိုးဗုံး လေးလုံးကို သတိ
ပေးတဲ့ အနေနဲ့ ပစ်ခတ်ခဲ့တယ်လို့ သိရပါတယ်။ အဲဒီလို မီးခိုးဗုံးတွေ ပစ်ခတ်တာက မြန်မာစစ်တပ်ကိုရော၊ တော်လှန်ရေး အင်အားစုတွေကိုပါ အသိ
ပေး အကြောင်းကြားတဲ့ အဓိပ္ပါယ် ဖြစ်တယ်လို့ မိုင်ထရီက ဆိုပါတယ်။

မြန်မာဖက်မှာ တိုက်ပွဲတွေ ဆက်လက် ဖြစ်ပွားနေတာကြောင့် နယ်စပ်ဒေသမှာ နေထိုင်တဲ့ ပြည်သူတွေ အနေနဲ့ နိုးကြား သတိရှိနေကြဖို့ ထိုင်းအာ
ဏာပိုင်တွေက တိုက်တွန်းထားပါတယ်။ ဒါပေမဲ့ ထိုင်းနယ်စပ်ဖက်ခြမ်း အခြေအနေက လုံခြုံရေး တပ်ဖွဲ့ဝင်တွေရဲ့ ပိုင်ပိုင်နိုင်နိုင် ထိန်းချုပ်မှုအောက်မှာ ရှိနေဆဲလို့လည်း သိရပါတယ်။

မြန်မာ-ထိုင်းနယ်စပ်မှာ ဖလူး၊မင်းလက်ပံ​ဒေသမှာ​ရော ၊​ဝေါ​လေ​ဗျူဟာမှာပါတိုက်ပွဲ​တွေပြင်းထန်​နေတယ်လို့​ဒေသတွင်းစစ်​ရေးသတင်းရင်းမြစ်​တွေက
​ပြောပါတယ် ။ ဖလူး၊မင်းလက်ပံမှာ စစ်တပ်က စစ်​ကြောင်းထိုးဖို့ကြိုးစားလို့​တော်လှန်​ရေးတပ်​တွေကခုခံတိုက်ခိုက်​နေတာ​ကြောင့်တိုက်ပွဲပြင်းထန်​နေတာဖြစ်ပြီး ၊ဝေါ​လေဗျူဟာကို ​တော်လှန်​ရေးတပ်​တွေကထိုးစစ်ဆင်တာ​ကြောင့်တိုက်ပွဲ​တွေပြင်းထန်​နေတာဖြစ်ပါတယ် ။

ကိုးကား-Khaosod

ထိုင်းစစ်တပ်ဘက်က မြန်မာဘက်ကိုမီးခိုးဗုံးပစ်ပြီး​တော့ သတိ​ပေး​​နေစဥ်။ဓါတ်ပုံ-Addy

ဗကသခေါင်းဆောင်ဟောင်း ကိုဂျိမ်းပြန်
လွတ်မြောက်လာ

ဧပြီ-၁၊၂၀၂၆။သတိုး/People's Spring

စစ်ကောင်စီက မတရားပြစ်ဒဏ် (၈)နှစ်ကျော် ချမှတ်ခံထားရတဲ့ ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ် (ဗကသ) ခေါင်း‌ဆောင်ဟောင်း ကိုဂျိမ်း (ခ)လင်းထက်နိုင် ပြန်လည်လွတ်မြောက်လာတယ်လို့ သူရဲ့ဇနီးဖြစ်သူ မဖြိုးဖြိုးအောင်က အသိပေးထားပါတယ်။

"ဂျိမ်း ဒီနေ့ လွတ် လာပါပြီ"လို့ မဖြိုးဖြိုးအောင်က ဒီနေ့ (ဧပြီ ၁)မှာ ခင်ပွန်းဖြစ်သူရဲ့ ဓာတ်ပုံနဲ့အတူ ‌မျှဝေထားတာပါ။

စစ်တပ်က ကိုဂျိမ်း ကို ၂၀၂၂ ဇွန်လ ၁၈ ရက်က ရန်ကုန်မြို့မှာဖမ်းဆီးခဲ့ပြီး အဲဒီ့နှစ်ဒီဇင်ဘာ ၇ ရက်က အင်းစိန်ထောင်တွင်းတရားရုံးကနေ ပုဒ်မ ၅၀၅-က နဲ့ ထောင်ဒဏ် သုံးနှစ်ချခဲ့ပါတယ်။

ဒါ့အပြင် ၂၀၂၃ ဖေဖော်ဝါရီမှာ ဗိုလ်တထောင်တရားရုံးက ပုဒ်မ ၅၂-ခ နဲ့ ထောင်ဒဏ် ငါးနှစ်ချမှတ်ခဲ့ပြီး ၅၀-ည နဲ့လည်းအမှုဆက်လက်ရင်ဆိုင်နေရသူပါ။

ပြန်လွတ်​မြောက်လာတဲ့ကိုဂျိမ်း။ဓါတ်ပုံ-Phyo Phyo Aung's FB